📜

မဟာသင်္ဂါမော

ဝေါဟရန္တေန ဇာနိတဗ္ဗာဒိဝဏ္ဏနာ

၃၆၈-၃၇၄။ မဟာသင်္ဂါမေ – ဝတ္ထုတော ဝါ ဝတ္ထုံ သင်္ကမတီတိ ‘‘ပဌမပါရာဇိကဝတ္ထု မယာ ဒိဋ္ဌံ ဝါ သုတံ ဝါ’’တိ ဝတွာ ပုန ပုစ္ဆိယမာနော နိဃံသိယမာနော ‘‘န မယာ ပဌမပါရာဇိကဿ ဝတ္ထု ဒိဋ္ဌံ၊ န သုတံ၊ ဒုတိယပါရာဇိကဿ ဝတ္ထု ဒိဋ္ဌံ ဝါ သုတံ ဝါ’’တိ ဝဒတိ။ ဧတေနေဝ နယေန သေသဝတ္ထုသင်္ကမနံ၊ ဝိပတ္တိတော ဝိပတ္တိသင်္ကမနံ အာပတ္တိတော အာပတ္တိသင်္ကမနဉ္စ ဝေဒိတဗ္ဗံ။ ယော ပန ‘‘နေဝ မယာ ဒိဋ္ဌံ၊ န သုတ’’န္တိ ဝတွာ ပစ္ဆာ ‘‘မယာပေတံ ဒိဋ္ဌံ ဝါ သုတံ ဝါ’’တိ ဝဒတိ၊ ‘‘ဒိဋ္ဌံ ဝါ သုတံ ဝါ’’တိ ဝတွာ ပစ္ဆာ ‘‘န ဒိဋ္ဌံ ဝါ န သုတံ ဝါ’’တိ ဝဒတိ၊ အယံ အဝဇာနိတွာ ပဋိဇာနာတိ၊ ပဋိဇာနိတွာ အဝဇာနာတီတိ ဝေဒိတဗ္ဗော။ ဧသေဝ အညေနညံ ပဋိစရတိ နာမ။

၃၇၅။ ဝဏ္ဏာဝဏ္ဏောတိ နီလာဒိဝဏ္ဏာဝဏ္ဏဝသေန သုက္ကဝိဿဋ္ဌိသိက္ခာပဒံ ဝုတ္တံ။ ဝစနမနုပ္ပဒါနန္တိ သဉ္စရိတ္တံ ဝုတ္တံ။ ကာယသံသဂ္ဂါဒိတ္တယံ သရူပေနေဝ ဝုတ္တံ။ ဣတိ ဣမာနိ ပဉ္စ မေထုနဓမ္မဿ ပုဗ္ဗဘာဂေါ ပုဗ္ဗပယောဂေါတိ ဝေဒိတဗ္ဗာနိ။

၃၇၆။ စတ္တာရိ အပလောကနကမ္မာနီတိ အဓမ္မေနဝဂ္ဂါဒီနိ။ သေသေသုပိ ဧသေဝ နယော။ ဣတိ စတ္တာရိ စတုက္ကာနိ သောဠသ ဟောန္တိ။

အဂတိအဂန္တဗ္ဗဝဏ္ဏနာ

၃၇၉။ ဗဟုဇနအဟိတာယပဋိပန္နော ဟောတီတိ ဝိနယဓရေန ဟိ ဧဝံ ဆန္ဒာဒိဂတိယာ အဓိကရဏေ ဝိနိစ္ဆိတေ တသ္မိံ ဝိဟာရေ သင်္ဃော ဒွိဓာ ဘိဇ္ဇတိ။ ဩဝါဒူပဇီဝိနိယော ဘိက္ခုနိယောပိ ဒွေ ဘာဂါ ဟောန္တိ။ ဥပါသကာပိ ဥပါသိကာယောပိ ဒါရကာပိ ဒါရိကာယောပိ တေသံ အာရက္ခဒေဝတာပိ တထေဝ ဒွိဓာ ဘိဇ္ဇန္တိ။ တတော ဘုမ္မဒေဝတာ အာဒိံ ကတွာ ယာဝ အကနိဋ္ဌဗြဟ္မာနော ဒွိဓာဝ ဟောန္တိ။ တေန ဝုတ္တံ – ‘‘ဗဟုဇနအဟိတာယ ပဋိပန္နော ဟောတိ…ပေ… ဒုက္ခာယ ဒေဝမနုဿာန’’န္တိ။

၃၈၂။ ဝိသမနိဿိတောတိ ဝိသမာနိ ကာယကမ္မာဒီနိ နိဿိတော။ ဂဟနနိဿိတောတိ မိစ္ဆာဒိဋ္ဌိအန္တဂ္ဂါဟိကဒိဋ္ဌိသင်္ခါတံ ဂဟနံ နိဿိတော။ ဗလဝနိဿိတောတိ ဗလဝန္တေ အဘိညာတေ ဘိက္ခူ နိဿိတော။

၃၉၃။ တဿ အဝဇာနန္တောတိ တဿ ဝစနံ အဝဇာနန္တော။ ဥပယောဂတ္ထေ ဝါ သာမိဝစနံ၊ တံ အဝဇာနန္တောတိ အတ္ထော။

၃၉၄။ ယံ အတ္ထာယာတိ ယဒတ္ထာယ။ တံ အတ္ထန္တိ သော အတ္ထော။ သေသံ သဗ္ဗတ္ထ ဥတ္တာနမေဝါတိ။

မဟာသင်္ဂါမဝဏ္ဏနာ နိဋ္ဌိတာ။