📜

ကထိနဘေဒံ

ကထိနအတ္ထတာဒိဝဏ္ဏနာ

၄၀၃။ ကထိနေ – အဋ္ဌ မာတိကာတိ ခန္ဓကေ ဝုတ္တာ ပက္ကမနန္တိကာဒိကာ အဋ္ဌ။ ပလိဗောဓာနိသံသာပိ ပုဗ္ဗေ ဝုတ္တာ ဧဝ။

၄၀၄။ ပယောဂဿာတိ စီဝရဓောဝနာဒိနော သတ္တဝိဓဿ ပုဗ္ဗကရဏဿတ္ထာယ ယော ဥဒကာဟရဏာဒိကော ပယောဂေါ ကယိရတိ၊ တဿ ပယောဂဿ။ ကတမေ ဓမ္မာ အနန္တရပစ္စယေန ပစ္စယောတိ အနာဂတဝသေန အနန္တရာ ဟုတွာ ကတမေ ဓမ္မာ ပစ္စယာ ဟောန္တီတိ အတ္ထော။ သမနန္တရပစ္စယေနာတိ သုဋ္ဌု အနန္တရပစ္စယေန၊ အနန္တရပစ္စယမေဝ အာသန္နတရံ ကတွာ ပုစ္ဆတိ။ နိဿယပစ္စယေနာတိ ဥပ္ပဇ္ဇမာနဿ ပယောဂဿ နိဿယံ အာဓာရဘာဝံ ဥပဂတာ ဝိယ ဟုတွာ ကတမေ ဓမ္မာ ပစ္စယာ ဟောန္တီတိ အတ္ထော။ ဥပနိဿယပစ္စယေနာတိ ဥပေတေန နိဿယပစ္စယေန၊ နိဿယပစ္စယမေဝ ဥပဂတတရံ ကတွာ ပုစ္ဆတိ။ ပုရေဇာတပစ္စယေနာတိ ဣမိနာ ပဌမံ ဥပ္ပန္နဿ ပစ္စယဘာဝံ ပုစ္ဆတိ။ ပစ္ဆာဇာတပစ္စယေနာတိ ဣမိနာ ပစ္ဆာ ဥပ္ပဇ္ဇနကဿ ပစ္စယဘာဝံ ပုစ္ဆတိ။ သဟဇာတပစ္စယေနာတိ ဣမိနာ အပုဗ္ဗံ အစရိမံ ဥပ္ပဇ္ဇမာနာနံ ပစ္စယဘာဝံ ပုစ္ဆတိ။ ပုဗ္ဗကရဏဿာတိ ဓောဝနာဒိနော ပုဗ္ဗကရဏဿ။ ပစ္စုဒ္ဓါရဿာတိ ပုရာဏသင်္ဃာဋိအာဒီနံ ပစ္စုဒ္ဓရဏဿ။ အဓိဋ္ဌာနဿာတိ ကထိနစီဝရာဓိဋ္ဌာနဿ။ အတ္ထာရဿာတိ ကထိနတ္ထာရဿ။ မာတိကာနဉ္စ ပလိဗောဓာနဉ္စာတိ အဋ္ဌန္နံ မာတိကာနံ ဒွိန္နဉ္စ ပလိဗောဓာနံ။ ဝတ္ထုဿာတိ သင်္ဃာဋိအာဒိနော ကထိနဝတ္ထုဿ၊ သေသံ ဝုတ္တနယမေဝ။

ဧဝံ ယဉ္စ လဗ္ဘတိ ယဉ္စ န လဗ္ဘတိ၊ သဗ္ဗံ ပုစ္ဆိတွာ ဣဒါနိ ယံ ယဿ လဗ္ဘတိ၊ တဒေဝ ဒဿေန္တော ပုဗ္ဗကရဏံ ပယောဂဿာတိအာဒိနာ နယေန ဝိဿဇ္ဇနမာဟ။ တဿတ္ထော – ယံ ဝုတ္တံ ‘‘ပယောဂဿ ကတမေ ဓမ္မာ’’တိအာဒိ၊ တတ္ထ ဝုစ္စတေ၊ ပုဗ္ဗကရဏံ ပယောဂဿ အနန္တရပစ္စယေန ပစ္စယော၊ သမနန္တရနိဿယဥပနိဿယပစ္စယေန ပစ္စယော။ ပယောဂဿ ဟိ သတ္တဝိဓမ္ပိ ပုဗ္ဗကရဏံ ယသ္မာ တေန ပယောဂေန နိပ္ဖာဒေတဗ္ဗဿ ပုဗ္ဗကရဏဿတ္ထာယ သော ပယောဂေါ ကယိရတိ၊ တသ္မာ ဣမေဟိ စတူဟိ ပစ္စယေဟိ ပစ္စယော ဟောတိ။ ပုရေဇာတပစ္စယေ ပနေသ ဥဒ္ဒိဋ္ဌဓမ္မေသု ဧကဓမ္မမ္ပိ န လဘတိ၊ အညဒတ္ထု ပုဗ္ဗကရဏဿ သယံ ပုရေဇာတပစ္စယော ဟောတိ၊ ပယောဂေ သတိ ပုဗ္ဗကရဏဿ နိပ္ဖဇ္ဇနတော ။ တေန ဝုတ္တံ – ‘‘ပယောဂေါ ပုဗ္ဗကရဏဿ ပုရေဇာတပစ္စယေန ပစ္စယော’’တိ။ ပစ္ဆာဇာတပစ္စယံ ပန လဘတိ၊ တေန ဝုတ္တံ – ‘‘ပုဗ္ဗကရဏံ ပယောဂဿ ပစ္ဆာဇာတပစ္စယေန ပစ္စယော’’တိ။ ပစ္ဆာ ဥပ္ပဇ္ဇနကဿ ဟိ ပုဗ္ဗကရဏဿ အတ္ထာယ သော ပယောဂေါ ကယိရတိ။ သဟဇာတပစ္စယံ ပန မာတိကာပလိဗောဓာနိသံသသင်္ခါတေ ပန္နရသ ဓမ္မေ ဌပေတွာ အညော ပယောဂါဒီသု ဧကောပိ ဓမ္မော န လဘတိ၊ တေ ဧဝ ဟိ ပန္နရသ ဓမ္မာ သဟ ကထိနတ္ထာရေန ဧကတော နိပ္ဖဇ္ဇန္တီတိ အညမညံ သဟဇာတပစ္စယာ ဟောန္တိ။ တေန ဝုတ္တံ – ‘‘ပန္နရသ ဓမ္မာ သဟဇာတပစ္စယေန ပစ္စယော’’တိ။ ဧတေနုပါယေန သဗ္ဗပဒဝိဿဇ္ဇနာနိ ဝေဒိတဗ္ဗာနိ။

ပုဗ္ဗကရဏနိဒါနာဒိဝိဘာဂဝဏ္ဏနာ

၄၀၅။ ပုဗ္ဗကရဏံ ကိံနိဒါနန္တိအာဒိပုစ္ဆာဝိဿဇ္ဇနံ ဥတ္တာနမေဝ။

၄၀၆-၇။ ‘‘ပယောဂေါ ကိံနိဒါနော’’တိအာဒီသု ပုစ္ဆာဒွယဝိဿဇ္ဇနေသု ဟေတုနိဒါနော ပစ္စယနိဒါနောတိ ဧတ္ထ ဆ စီဝရာနိ ဟေတု စေဝ ပစ္စယော စာတိ ဝေဒိတဗ္ဗာနိ။ ပုဗ္ဗပယောဂါဒီနဉှိ သဗ္ဗေသံ တာနိယေဝ ဟေတု၊ တာနိ ပစ္စယော။ န ဟိ ဆဗ္ဗိဓေ စီဝရေ အသတိ ပယောဂေါ အတ္ထိ၊ န ပုဗ္ဗကရဏာဒီနိ၊ တသ္မာ ‘‘ပယောဂေါ ဟေတုနိဒါနော’’တိအာဒိ ဝုတ္တံ။

၄၀၈။ သင်္ဂဟဝါရေ – ဝစီဘေဒေနာတိ ‘‘ဣမာယ သင်္ဃာဋိယာ၊ ဣမိနာ ဥတ္တရာသင်္ဂေန၊ ဣမိနာ အန္တရဝါသကေန ကထိနံ အတ္ထရာမီ’’တိ ဧတေန ဝစီဘေဒေန။ ကတိမူလာဒိပုစ္ဆာဝိဿဇ္ဇနေ – ကိရိယာ မဇ္ဈေတိ ပစ္စုဒ္ဓါရော စေဝ အဓိဋ္ဌာနဉ္စ။

၄၁၁။ ဝတ္ထုဝိပန္နံ ဟောတီတိ အကပ္ပိယဒုဿံ ဟောတိ။ ကာလဝိပန္နံ နာမ အဇ္ဇ ဒါယကေဟိ ဒိန္နံ သွေ သင်္ဃော ကထိနတ္ထာရကဿ ဒေတိ။ ကရဏဝိပန္နံ နာမ တဒဟေဝ ဆိန္ဒိတွာ အကတံ။

ကထိနာဒိဇာနိတဗ္ဗဝိဘာဂဝဏ္ဏနာ

၄၁၂။ ကထိနံ ဇာနိတဗ္ဗန္တိအာဒိပုစ္ဆာယ ဝိဿဇ္ဇနေ – တေသညေဝ ဓမ္မာနန္တိ ယေသု ရူပါဒိဓမ္မေသု သတိ ကထိနံ နာမ ဟောတိ၊ တေသံ သမောဓာနံ မိဿီဘာဝေါ။ နာမံ နာမကမ္မန္တိအာဒိနာ ပန ‘‘ကထိန’’န္တိ ဣဒံ ဗဟူသု ဓမ္မေသု နာမမတ္တံ၊ န ပရမတ္ထတော ဧကော ဓမ္မော အတ္ထီတိ ဒဿေတိ။

စတုဝီသတိယာ အာကာရေဟီတိ ‘‘န ဥလ္လိခိတမတ္တေနာ’’တိအာဒီဟိ ပုဗ္ဗေ ဝုတ္တကာရဏေဟိ။ သတ္တရသဟိ အာကာရေဟီတိ ‘‘အဟတေန အတ္ထတံ ဟောတိ ကထိန’’န္တိအာဒီဟိ ပုဗ္ဗေ ဝုတ္တကာရဏေဟိ။ နိမိတ္တကမ္မာဒီသု ယံ ဝတ္တဗ္ဗံ သဗ္ဗံ ကထိနက္ခန္ဓကဝဏ္ဏနာယံ ဝုတ္တံ။

၄၁၆။ ဧကုပ္ပာဒါ ဧကနိရောဓာတိ ဥပ္ပဇ္ဇမာနာပိ ဧကတော ဥပ္ပဇ္ဇန္တိ၊ နိရုဇ္ဈမာနာပိ ဧကတော နိရုဇ္ဈန္တိ။ ဧကုပ္ပာဒါ နာနာနိရောဓာတိ ဥပ္ပဇ္ဇမာနာ ဧကတော ဥပ္ပဇ္ဇန္တိ၊ နိရုဇ္ဈမာနာ နာနာ နိရုဇ္ဈန္တိ။ ကိံ ဝုတ္တံ ဟောတိ ? သဗ္ဗေပိ အတ္ထာရေန သဒ္ဓိံ ဧကတော ဥပ္ပဇ္ဇန္တိ၊ အတ္ထာရေ ဟိ သတိ ဥဒ္ဓါရော နာမ။ နိရုဇ္ဈမာနာ ပနေတ္ထ ပုရိမာ ဒွေ အတ္ထာရေန သဒ္ဓိံ ဧကတော နိရုဇ္ဈန္တိ၊ ဥဒ္ဓါရဘာဝံ ပါပုဏန္တိ။ အတ္ထာရဿ ဟိ နိရောဓော ဧတေသဉ္စ ဥဒ္ဓါရဘာဝေါ ဧကက္ခဏေ ဟောတိ၊ ဣတရေ နာနာ နိရုဇ္ဈန္တိ။ တေသု ဥဒ္ဓါရဘာဝံ ပတ္တေသုပိ အတ္ထာရော တိဋ္ဌတိယေဝ။ သေသံ သဗ္ဗတ္ထ ဥတ္တာနမေဝါတိ။

သမန္တပါသာဒိကာယ ဝိနယသံဝဏ္ဏနာယ

ကထိနဘေဒဝဏ္ဏနာ နိဋ္ဌိတာ။

ပညတ္တိဝဂ္ဂဝဏ္ဏနာ နိဋ္ဌိတာ။