📜

ပဌမဂါထာသင်္ဂဏိကံ

သတ္တနဂရေသု ပညတ္တသိက္ခာပဒဝဏ္ဏနာ

၃၃၅။ ဧကံသံစီဝရံ ကတွာတိ ဧကသ္မိံ အံသကူဋေ စီဝရံ ကတွာ၊ သာဓုကံ ဥတ္တရာသင်္ဂံ ကတွာတိ အတ္ထော။ ပဂ္ဂဏှိတွာန အဉ္ဇလိန္တိ ဒသနခသမောဓာနသမုဇ္ဇလံ အဉ္ဇလိံ ဥက္ခိပိတွာ။ အာသီသမာနရူပေါ ဝါတိ ပစ္စာသီသမာနရူပေါ ဝိယ။ ကိဿ တွံ ဣဓ မာဂတောတိ ကေန ကာရဏေန ကိမတ္ထံ ပတ္ထယမာနော တွံ ဣဓ အာဂတော။ ကော ဧဝမာဟ? သမ္မာသမ္ဗုဒ္ဓါ။ ကံ ဧဝမာဟ? အာယသ္မန္တံ ဥပါလိံ။ ဣတိ အာယသ္မာ ဥပါလိ ဘဂဝန္တံ ဥပသင်္ကမိတွာ ‘‘ဒွီသု ဝိနယေသူ’’တိ ဣမံ ဂါထံ ပုစ္ဆိ။ အထဿ ဘဂဝါ ‘‘ဘဒ္ဒကော တေ ဥမ္မင်္ဂေါ’’တိအာဒီနိ ဝတွာ တံ ဝိဿဇ္ဇေသိ။ ဧသ နယော သဗ္ဗတ္ထ။ ဣတိ ဣမေ သဗ္ဗပဉှေ ဗုဒ္ဓကာလေ ဥပါလိတ္ထေရော ပုစ္ဆိ။ ဘဂဝါ ဗျာကာသိ။ သင်္ဂီတိကာလေ ပန မဟာကဿပတ္ထေရော ပုစ္ဆိ။ ဥပါလိတ္ထေရော ဗျာကာသိ။

တတ္ထ ဘဒ္ဒကော တေ ဥမ္မင်္ဂေါတိ ဘဒ္ဒကာ တေ ပဉှာ၊ ပဉှာ ဟိ အဝိဇ္ဇန္ဓကာရတော ဥမ္မုဇ္ဇိတွာ ဌိတတ္တာ ‘‘ဥမ္မင်္ဂေါ’’တိ ဝုစ္စတိ။ တဂ္ဃာတိ ကာရဏတ္ထေ နိပါတော။ ယသ္မာ မံ ပုစ္ဆသိ၊ တသ္မာ တေ အဟမက္ခိဿန္တိ အတ္ထော။ သမ္ပဋိစ္ဆနတ္ထေ ဝါ၊ ‘‘တဂ္ဃာ’’တိ ဟိ ဣမိနာ ဝစနံ သမ္ပဋိစ္ဆိတွာ အက္ခိဿန္တိ အာဟ။ ‘‘သမာဒဟိတွာ ဝိသိဗ္ဗေန္တိ၊ သာမိသေန၊ သသိတ္ထက’’န္တိ ဣမာနိ တီဏိယေဝ သိက္ခာပဒါနိ ဘဂ္ဂေသု ပညတ္တာနိ။

စတုဝိပတ္တိဝဏ္ဏနာ

၃၃၆။ ယံ တံ ပုစ္ဆိမှာတိ ယံ တွံ အပုစ္ဆိမှာ။ အကိတ္တယီတိ အဘာသိ။ နောတိ အမှာကံ ။ တံ တံ ဗျာကတန္တိ ယံ ယံ ပုဋ္ဌံ၊ တံ တဒေဝ ဗျာကတံ။ အနညထာတိ အညထာ အကတွာ ဗျာကတံ။

ယေ ဒုဋ္ဌုလ္လာ သာ သီလဝိပတ္တီတိ ဧတ္ထ ကိဉ္စာပိ သီလဝိပတ္တိ နာမ ပဉှေ နတ္ထိ၊ အထ ခေါ ဒုဋ္ဌုလ္လံ ဝိဿဇ္ဇေတုကာမတာယေတံ ဝုတ္တံ။ စတူသု ဟိ ဝိပတ္တီသု ဒုဋ္ဌုလ္လံ ဧကာယ ဝိပတ္တိယာ သင်္ဂဟိတံ၊ အဒုဋ္ဌုလ္လံ တီဟိ ဝိပတ္တီဟိ သင်္ဂဟိတံ။ တသ္မာ ‘‘ယေ ဒုဋ္ဌုလ္လာ သာ သီလဝိပတ္တီ’’တိ ဝတွာ တမေဝ ဝိတ္ထာရတော ဒဿေတုံ ‘‘ပါရာဇိကံ သင်္ဃာဒိသေသော သီလဝိပတ္တီတိ ဝုစ္စတီ’’တိ အာဟ။

ဣဒါနိ တိဿန္နံ ဝိပတ္တီနံ ဝသေန အဒုဋ္ဌုလ္လံ ဒဿေတုံ ‘‘ထုလ္လစ္စယ’’န္တိအာဒိမာဟ။ တတ္ထ ယော စာယံ၊ အက္ကောသတိ ဟသာဓိပ္ပာယောတိ ဣဒံ ဒုဗ္ဘာသိတဿ ဝတ္ထုဒဿနတ္ထံ ဝုတ္တံ။

အဗ္ဘာစိက္ခန္တီတိ ‘‘တထာဟံ ဘဂဝတာ ဓမ္မံ ဒေသိတံ အာဇာနာမီ’’တိ ဝဒန္တာ အဗ္ဘာစိက္ခန္တိ။

အယံ သာ အာဇီဝဝိပတ္တိသမ္မတာတိ အယံ ဆဟိ သိက္ခာပဒေဟိ သင်္ဂဟိတာ အာဇီဝဝိပတ္တိ နာမ စတုတ္ထာ ဝိပတ္တိ သမ္မတာတိ ဧတ္တာဝတာ ‘‘အဒုဋ္ဌုလ္လ’’န္တိ ဣဒံ ဝိဿဇ္ဇိတံ ဟောတိ။

ဣဒါနိ ‘‘ယေ စ ယာဝတတိယကာ’’တိ ပဉှံ ဝိဿဇ္ဇေတုံ ‘‘ဧကာဒသာ’’တိအာဒိမာဟ။

ဆေဒနကာဒိဝဏ္ဏနာ

၃၃၇။ ယသ္မာ ပန ‘‘ယေ စ ယာဝတတိယကာ’’တိ အယံ ပဉှော ‘‘ဧကာဒသ ယာဝတတိယကာ’’တိ ဧဝံ သင်္ခါဝသေန ဝိဿဇ္ဇိတော၊ တသ္မာ သင်္ခါနုသန္ဓိဝသေနေဝ ‘‘ကတိ ဆေဒနကာနီ’’တိအာဒိကေ အညေ အန္တရာပဉှေ ပုစ္ဆိ။ တေသံ ဝိဿဇ္ဇနတ္ထံ ‘‘ဆ ဆေဒနကာနီ’’တိအာဒိ ဝုတ္တံ။ တတ္ထ ‘‘ဧကံ ဘေဒနကံ၊ ဧကံ ဥဒ္ဒါလနကံ၊ သောဒသ ဇာနန္တိ ပညတ္တာ’’တိ ဣဒမေဝ အပုဗ္ဗံ။ သေသံ မဟာဝဂ္ဂေ ဝိဘတ္တမေဝ။ ယံ ပနေတံ အပုဗ္ဗံ တတ္ထ ဧကံ ဘေဒနကန္တိ သူစိဃရံ။ ဧကံ ဥဒ္ဒါလနကန္တိ တူလောနဒ္ဓမဉ္စပီဌံ။ သောဒသာတိ သောဠသ။ ဇာနန္တိ ပညတ္တာတိ ‘‘ဇာန’’န္တိ ဧဝံ ဝတွာ ပညတ္တာ၊ တေ ဧဝံ ဝေဒိတဗ္ဗာ – ‘‘ဇာနံ သင်္ဃိကံ လာဘံ ပရိဏတံ အတ္တနော ပရိဏာမေယျ၊ ဇာနံ ပုဗ္ဗုပဂတံ ဘိက္ခုံ အနုပခဇ္ဇ နိသဇ္ဇံ ကပ္ပေယျ၊ ဇာနံ သပ္ပာဏကံ ဥဒကံ တိဏံ ဝါ မတ္တိကံ ဝါ သိဉ္စေယျ ဝါ သိဉ္စာပေယျ ဝါ၊ ဇာနံ ဘိက္ခုနိပရိပါစိတံ ပိဏ္ဍပါတံ ဘုဉ္ဇေယျ၊ ဇာနံ အာသာဒနာပေက္ခော ဘုတ္တသ္မိံ ပါစိတ္တိယံ၊ ဇာနံ သပ္ပာဏကံ ဥဒကံ ပရိဘုဉ္ဇေယျ၊ ဇာနံ ယထာဓမ္မံ နိဟတာဓိကရဏံ၊ ဇာနံ ဒုဋ္ဌုလ္လံ အာပတ္တိံ ပဋိစ္ဆာဒေယျ၊ ဇာနံ ဦနဝီသတိဝဿံ ပုဂ္ဂလံ ဥပသမ္ပာဒေယျ၊ ဇာနံ ထေယျသတ္ထေန သဒ္ဓိံ၊ ဇာနံ တထာဝါဒိနာ ဘိက္ခုနာ အကတာနုဓမ္မေန၊ ဇာနံ တထာနာသိတံ သမဏုဒ္ဒေသံ၊ ဇာနံ သင်္ဃိကံ လာဘံ ပရိဏတံ ပုဂ္ဂလဿ ပရိဏာမေယျ၊ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝ အတ္တနာ ပဋိစောဒေယျ၊ ဇာနံ စောရိံ ဝဇ္ဈံ ဝိဒိတံ အနပလောကေတွာ၊ ဇာနံ သဘိက္ခုကံ အာရာမံ အနာပုစ္ဆာ ပဝိသေယျာ’’တိ။

အသာဓာရဏာဒိဝဏ္ဏနာ

၃၃၈။ ဣဒါနိ ‘‘သာဓာရဏံ အသာဓာရဏ’’န္တိ ဣမံ ပုရိမပဉှံ ဝိဿဇ္ဇေန္တော ‘‘ဝီသံ ဒွေ သတာနီ’’တိအာဒိမာဟ။ တတ္ထ ဘိက္ခုနီဟိ အသာဓာရဏေသု ဆ သင်္ဃာဒိသေသာတိ ဝိဿဋ္ဌိ၊ ကာယသံသဂ္ဂေါ၊ ဒုဋ္ဌုလ္လံ၊ အတ္တကာမ၊ ကုဋိ၊ ဝိဟာရောတိ။ ဒွေ အနိယတေဟိ အဋ္ဌာတိ ဒွီဟိ အနိယတေဟိ သဒ္ဓိံ အဋ္ဌ ဣမေ။

နိဿဂ္ဂိယာနိ ဒွါဒသာတိ –

ဓောဝနဉ္စ ပဋိဂ္ဂဟော၊ ကောသေယျသုဒ္ဓဒွေဘာဂါ၊

ဆဗ္ဗဿာနိ နိသီဒနံ၊ ဒွေ လောမာ ပဌမော ပတ္တော၊

ဝဿိကာ အာရညကေန စာတိ – ဣမေ ဒွါဒသ။

ဒွေဝီသတိ ခုဒ္ဒကာတိ –

သကလော ဘိက္ခုနီဝဂ္ဂေါ၊ ပရမ္ပရဉ္စ ဘောဇနံ၊

အနတိရိတ္တံ အဘိဟဋံ၊ ပဏီတဉ္စ အစေလကံ၊

ဦနံ ဒုဋ္ဌုလ္လဆာဒနံ။

မာတုဂါမေန သဒ္ဓိဉ္စ၊ ယာ စ အနိက္ခန္တရာဇကေ၊

သန္တံ ဘိက္ခုံ အနာပုစ္ဆာ၊ ဝိကာလေ ဂါမပ္ပဝေသနာ။

နိသီဒနေ စ ယာ သိက္ခာ၊ ဝဿိကာ ယာ စ သာဋိကာ၊

ဒွါဝီသတိ ဣမာ သိက္ခာ၊ ခုဒ္ဒကေသု ပကာသိတာတိ။

ဘိက္ခူဟိ အသာဓာရဏေသုပိ သင်္ဃမှာ ဒသ နိဿရေတိ ‘‘သင်္ဃမှာ နိဿာရီယတီ’’တိ ဧဝံ ဝိဘင်္ဂေ ဝုတ္တာ၊ မာတိကာယံ ပန ‘‘နိဿာရဏီယံ သင်္ဃာဒိသေသ’’န္တိ ဧဝံ အာဂတာ ဒသ။ နိဿဂ္ဂိယာနိ ဒွါဒသာတိ ဘိက္ခုနိဝိဘင်္ဂေ ဝိဘတ္တာနိ နိဿဂ္ဂိယာနေဝ။ ခုဒ္ဒကာပိ တတ္ထ ဝိဘတ္တခုဒ္ဒကာ ဧဝ။ တထာ စတ္တာရော ပါဋိဒေသနီယာ၊ ဣတိ သတဉ္စေဝ တိံသဉ္စ သိက္ခာ ဝိဘင်္ဂေ ဘိက္ခုနီနံ ဘိက္ခူဟိ အသာဓာရဏာ။ သေသံ ဣမသ္မိံ သာဓာရဏာသာဓာရဏဝိဿဇ္ဇနေ ဥတ္တာနမေဝ။

ဣဒါနိ ဝိပတ္တိယော စ ‘‘ယေဟိ သမထေဟိ သမ္မန္တီ’’တိ ဣဒံ ပဉှံ ဝိဿဇ္ဇေန္တော အဋ္ဌေဝ ပါရာဇိကာတိအာဒိမာဟ။ တတ္ထ ဒုရာသဒါတိ ဣမိနာ တေသံ သပ္ပဋိဘယတံ ဒဿေတိ။ ကဏှသပ္ပာဒယော ဝိယ ဟိ ဧတေ ဒုရာသဒါ ဒုရူပဂမနာ ဒုရာသဇ္ဇနာ၊ အာပဇ္ဇိယမာနာ မူလစ္ဆေဒါယ သံဝတ္တန္တိ။ တာလဝတ္ထုသမူပမာတိ သဗ္ဗံ တာလံ ဥဒ္ဓရိတွာ တာလဿ ဝတ္ထုမတ္တကရဏေန သမူပမာ။ ယထာ ဝတ္ထုမတ္တကတော တာလော န ပုန ပါကတိကော ဟောတိ၊ ဧဝံ န ပုန ပါကတိကာ ဟောန္တိ။

ဧဝံ သာဓာရဏံ ဥပမံ ဒဿေတွာ ပုန ဧကေကဿ ဝုတ္တံ ဥပမံ ဒဿေန္တော ပဏ္ဍုပလာသောတိအာဒိမာဟ။ အဝိရုဠှီ ဘဝန္တိ တေတိ ယထာ ဧတေ ပဏ္ဍုပလာသာဒယော ပုနဟရိတာဒိဘာဝေန အဝိရုဠှိဓမ္မာ ဟောန္တိ၊ ဧဝံ ပါရာဇိကာပိ ပုန ပကတိသီလာဘာဝေန အဝိရုဠှိဓမ္မာ ဟောန္တီတိ အတ္ထော။ ဧတ္တာဝတာ ‘‘ဝိပတ္တိယော စ ယေဟိ သမထေဟိ သမ္မန္တီ’’တိ ဧတ္ထ ဣမာ တာဝ အဋ္ဌ ပါရာဇိကဝိပတ္တိယော ကေဟိစိ သမထေဟိ န သမ္မန္တီတိ ဧဝံ ဒဿိတံ ဟောတိ။ ယာ ပန ဝိပတ္တိယော သမ္မန္တိ၊ တာ ဒဿေတုံ တေဝီသတိ သင်္ဃာဒိသေသာတိအာဒိ ဝုတ္တံ။ တတ္ထ တီဟိ သမထေဟီတိ သဗ္ဗသင်္ဂါဟိကဝစနမေတံ။ သင်္ဃာဒိသေသာ ဟိ ဒွီဟိ သမထေဟိ သမ္မန္တိ၊ န တိဏဝတ္ထာရကေန။ သေသာ တီဟိပိ သမ္မန္တိ။

ဒွေ ဥပေါသထာ ဒွေ ပဝါရဏာတိ ဣဒံ ဘိက္ခူနဉ္စ ဘိက္ခုနီနဉ္စ ဝသေန ဝုတ္တံ။ ဝိဘတ္တိမတ္တဒဿနေနေဝ စေတံ ဝုတ္တံ၊ န သမထေဟိ ဝူပသမနဝသေန။ ဘိက္ခုဥပေါသထော၊ ဘိက္ခုနိဥပေါသထော၊ ဘိက္ခုပဝါရဏာ၊ ဘိက္ခုနိပဝါရဏာတိ ဣမာပိ ဟိ စတဿော ဝိဘတ္တိယော ၊ ဝိဘဇနာနီတိ အတ္ထော။ စတ္တာရိ ကမ္မာနီတိ အဓမ္မေနဝဂ္ဂါဒီနိ ဥပေါသထကမ္မာနိ။ ပဉ္စေဝ ဥဒ္ဒေသာ စတုရော ဘဝန္တိ အနညထာတိ ဘိက္ခူနံ ပဉ္စ ဥဒ္ဒေသာ ဘိက္ခုနီနံ စတုရော ဘဝန္တိ၊ အညထာ န ဘဝန္တိ၊ ဣမာ အပရာပိ ဝိဘတ္တိယော။ အာပတ္တိက္ခန္ဓာ စ ဘဝန္တိ သတ္တ၊ အဓိကရဏာနိ စတ္တာရီတိ ဣမာ ပန ဝိဘတ္တိယော သမထေဟိ သမ္မန္တိ၊ တသ္မာ သတ္တဟိ သမထေဟီတိအာဒိမာဟ။ အထ ဝါ ‘‘ဒွေ ဥပေါသထာ ဒွေ ပဝါရဏာ စတ္တာရိ ကမ္မာနိ ပဉ္စေဝ ဥဒ္ဒေသာ စတုရော ဘဝန္တိ၊ အနညထာ’’တိ ဣမာပိ စတဿော ဝိဘတ္တိယော နိဿာယ ‘‘နဿန္တေတေ ဝိနဿန္တေတေ’’တိအာဒိနာ နယေန ယာ အာပတ္တိယော အာပဇ္ဇန္တိ၊ တာ ယသ္မာ ဝုတ္တပ္ပကာရေဟေဝ သမထေဟိ သမ္မန္တိ၊ တသ္မာ တံမူလကာနံ အာပတ္တီနံ သမထဒဿနတ္ထမ္ပိ တာ ဝိဘတ္တိယော ဝုတ္တာတိ ဝေဒိတဗ္ဗာ။ ကိစ္စံ ဧကေနာတိ ကိစ္စာဓိကရဏံ ဧကေန သမထေန သမ္မတိ။

ပါရာဇိကာဒိအာပတ္တိဝဏ္ဏနာ

၃၃၉။ ဧဝံ ပုစ္ဆာနုက္ကမေန သဗ္ဗပဉှေ ဝိဿဇ္ဇေတွာ ဣဒါနိ ‘‘အာပတ္တိက္ခန္ဓာ စ ဘဝန္တိ သတ္တာ’’တိ ဧတ္ထ သင်္ဂဟိတအာပတ္တိက္ခန္ဓာနံ ပစ္စေကံ နိဗ္ဗစနမတ္တံ ဒဿေန္တော ပါရာဇိကန္တိအာဒိမာဟ။ တတ္ထ ပါရာဇိကန္တိ ဂါထာယ အယမတ္ထော – ယဒိဒံ ပုဂ္ဂလာပတ္တိသိက္ခာပဒပါရာဇိကေသု အာပတ္တိပါရာဇိကံ နာမ ဝုတ္တံ၊ တံ အာပဇ္ဇန္တော ပုဂ္ဂလော ယသ္မာ ပရာဇိတော ပရာဇယမာပန္နော သဒ္ဓမ္မာ စုတော ပရဒ္ဓါ ဘဋ္ဌော နိရင်္ကတော စ ဟောတိ၊ အနိဟတေ တသ္မိံ ပုဂ္ဂလေ ပုန ဥပေါသထပ္ပဝါရဏာဒိဘေဒေါ သံဝါသော နတ္ထိ။ တေနေတံ ဣတိ ဝုစ္စတီတိ တေန ကာရဏေန ဧတံ အာပတ္တိပါရာဇိကန္တိ ဝုစ္စတိ။ အယဉှေတ္ထ သင်္ခေပတ္ထော – ယသ္မာ ပရာဇိတော ဟောတိ တေန၊ တသ္မာ ဧတံ ပါရာဇိကန္တိ ဝုစ္စတိ။

ဒုတိယဂါထာယပိ ဗျဉ္ဇနံ အနာဒိယိတွာ အတ္ထမတ္တမေဝ ဒဿေတုံ သင်္ဃောဝ ဒေတိ ပရိဝါသန္တိအာဒိ ဝုတ္တံ။ အယံ ပနေတ္ထ အတ္ထော – ဣမံ အာပတ္တိံ အာပဇ္ဇိတွာ ဝုဋ္ဌာတုကာမဿ ယံ တံ အာပတ္တိဝုဋ္ဌာနံ တဿ အာဒိမှိ စေဝ ပရိဝါသဒါနတ္ထာယ အာဒိတော သေသေ မဇ္ဈေ မာနတ္တဒါနတ္ထာယ မူလာယပဋိကဿနေန ဝါ သဟ မာနတ္တဒါနတ္ထာယ၊ အဝသာနေ အဗ္ဘာနတ္ထာယ စ သင်္ဃော ဣစ္ဆိတဗ္ဗော၊ န ဟေတ္ထ ဧကမ္ပိ ကမ္မံ ဝိနာ သင်္ဃေန သက္ကာ ကာတုန္တိ သင်္ဃော၊ အာဒိမှိ စေဝ သေသေ စ ဣစ္ဆိတဗ္ဗော အဿာတိ သင်္ဃာဒိသေသော။

တတိယဂါထာယ အနိယတော န နိယတောတိ ယသ္မာ န နိယတော၊ တသ္မာ အနိယတော အယမာပတ္တိက္ခန္ဓောတိ အတ္ထော။ ကိံ ကာရဏာ န နိယတောတိ? အနေကံသိကတံပဒံ၊ ယသ္မာ ဣဒံ သိက္ခာပဒံ အနေကံသေန ကတန္တိ အတ္ထော။ ကထံ အနေကံသေန? တိဏ္ဏမညတရံ ဌာနံ၊ တိဏ္ဏံ ဓမ္မာနံ အညတရေန ကာရေတဗ္ဗောတိ ဟိ တတ္ထ ဝုတ္တံ၊ တသ္မာ ‘‘အနိယတော’’တိ ပဝုစ္စတိ၊ သော အာပတ္တိက္ခန္ဓော အနိယတောတိ ဝုစ္စတိ။ ယထာ စ တိဏ္ဏံ အညတရံ ဌာနံ၊ ဧဝံ ဒွိန္နံ ဓမ္မာနံ အညတရံ ဌာနံ ယတ္ထ ဝုတ္တံ၊ သောပိ အနိယတော ဧဝ။

စတုတ္ထဂါထာယ အစ္စယော တေန သမော နတ္ထီတိ ဒေသနာဂါမိနီသု အစ္စယေသု တေန သမော ထူလော အစ္စယော နတ္ထိ၊ တေနေတံ ဣတိ ဝုစ္စတိ၊ ထူလတ္တာ အစ္စယဿ ဧတံ ထုလ္လစ္စယန္တိ ဝုစ္စတီတိ အတ္ထော။

ပဉ္စမဂါထာယ နိဿဇ္ဇိတွာန ဒေသေတိ တေနေတန္တိ နိဿဇ္ဇိတွာ ဒေသေတဗ္ဗတော နိဿဂ္ဂိယန္တိ ဝုစ္စတီတိ အတ္ထော။

ဆဋ္ဌဂါထာယ ပါတေတိ ကုသလံ ဓမ္မန္တိ သဉ္စိစ္စ အာပဇ္ဇန္တဿ ကုသလဓမ္မသင်္ခါတံ ကုသလစိတ္တံ ပါတေတိ၊ တသ္မာ ပါတေတိ စိတ္တန္တိ ပါစိတ္တိယံ။ ယံ ပန စိတ္တံ ပါတေတိ၊ တံ ယသ္မာ အရိယမဂ္ဂံ အပရဇ္ဈတိ၊ စိတ္တသမ္မောဟကာရဏဉ္စ ဟောတိ၊ တသ္မာ ‘‘အရိယမဂ္ဂံ အပရဇ္ဈတိ၊ စိတ္တသမ္မောဟနဋ္ဌာန’’န္တိ စ ဝုတ္တံ။

ပါဋိဒေသနီယဂါထာသု ‘‘ဂါရယှံ အာဝုသော ဓမ္မံ အာပဇ္ဇိ’’န္တိ ဝုတ္တဂါရယှဘာဝကာရဏဒဿနတ္ထမေဝ ဘိက္ခု အညာတကော သန္တောတိအာဒိ ဝုတ္တံ။ ပဋိဒေသေတဗ္ဗတော ပန သာ အာပတ္တိ ပါဋိဒေသနီယာတိ ဝုစ္စတိ။

ဒုက္ကဋဂါထာယ အပရဒ္ဓံ ဝိရဒ္ဓဉ္စ ခလိတန္တိ သဗ္ဗမေတံ ‘‘ယဉ္စ ဒုက္ကဋ’’န္တိ ဧတ္ထ ဝုတ္တဿ ဒုက္ကဋဿ ပရိယာယဝစနံ။ ယဉှိ ဒုဋ္ဌု ကတံ ဝိရူပံ ဝါ ကတံ၊ တံ ဒုက္ကဋံ။ တံ ပနေတံ ယထာ သတ္ထာရာ ဝုတ္တံ၊ ဧဝံ အကတတ္တာ အပရဒ္ဓံ၊ ကုသလံ ဝိရဇ္ဈိတွာ ပဝတ္တတ္တာ ဝိရဒ္ဓံ၊ အရိယဝတ္တပဋိပဒံ အနာရုဠှတ္တာ ခလိတံ။ ယံ မနုဿော ကရေတိ ဣဒံ ပနဿ ဩပမ္မနိဒဿနံ။ တဿတ္ထော – ယထာ ဟိ ယံ လောကေ မနုဿော အာဝိ ဝါ ယဒိ ဝါ ရဟော ပါပံ ကရောတိ၊ တံ ဒုက္ကဋန္တိ ပဝေဒေန္တိ၊ ဧဝမိဒမ္ပိ ဗုဒ္ဓပ္ပဋိကုဋ္ဌေန လာမကဘာဝေန ပါပံ၊ တသ္မာ ဒုက္ကဋန္တိ ဝေဒိတဗ္ဗံ။

ဒုဗ္ဘာသိတဂါထာယ ဒုဗ္ဘာသိတံ ဒုရာဘဋ္ဌန္တိ ဒုဋ္ဌု အာဘဋ္ဌံ ဘာသိတံ လပိတန္တိ ဒုရာဘဋ္ဌံ။ ယံ ဒုရာဘဋ္ဌံ၊ တံ ဒုဗ္ဘာသိတန္တိ အတ္ထော။ ကိဉ္စ ဘိယျော? သံကိလိဋ္ဌဉ္စ ယံ ပဒံ၊ သံကိလိဋ္ဌံ ယသ္မာ တံ ပဒံ ဟောတီတိ အတ္ထော။ တထာ ယဉ္စ ဝိညူ ဂရဟန္တိ၊ ယသ္မာ စ နံ ဝိညူ ဂရဟန္တီတိ အတ္ထော။ တေနေတံ ဣတိ ဝုစ္စတီတိ တေန သံကိလိဋ္ဌဘာဝေန စ ဝိညုဂရဟနေနာပိ စ ဧတံ ဣတိ ဝုစ္စတိ၊ ‘‘ဒုဗ္ဘာသိတ’’န္တိ ဧဝံ ဝုစ္စတီတိ အတ္ထော။

သေခိယဂါထာယ ‘‘အာဒိ စေတံ စရဏဉ္စာ’’တိအာဒိနာ နယေန သေခဿ သန္တကဘာဝံ ဒီပေတိ။ တသ္မာ သေခဿ ဣဒံ သေခိယန္တိ အယမေတ္ထ သင်္ခေပတ္ထော။ ဣဒံ ‘‘ဂရုကလဟုကဉ္စာပီ’’တိအာဒိပဉှေဟိ အသင်္ဂဟိတဿ ‘‘ဟန္ဒ ဝါကျံ သုဏောမ တေ’’တိ ဣမိနာ ပန အာယာစနဝစနေန သင်္ဂဟိတဿ အတ္ထဿ ဒီပနတ္ထံ ဝုတ္တန္တိ ဝေဒိတဗ္ဗံ။

ဆန္နမတိဝဿတီတိအာဒိမှိပိ ဧသေဝ နယော။ တတ္ထ ဆန္နမတိဝဿတီတိ ဂေဟံ တာဝ တိဏာဒီဟိ အစ္ဆန္နံ အတိဝဿတိ။ ဣဒံ ပန အာပတ္တိသင်္ခါတံ ဂေဟံ ဆန္နံ အတိဝဿတိ၊ မူလာပတ္တိဉှိ ဆာဒေန္တော အညံ နဝံ အာပတ္တိံ အာပဇ္ဇတိ။ ဝိဝဋံ နာတိဝဿတီတိ ဂေဟံ တာဝ အဝိဝဋံ သုစ္ဆန္နံ နာတိဝဿတိ။ ဣဒံ ပန အာပတ္တိသင်္ခါတံ ဂေဟံ ဝိဝဋံ နာတိဝဿတိ၊ မူလာပတ္တိဉှိ ဝိဝရန္တော ဒေသနာဂါမိနိံ ဒေသေတွာ ဝုဋ္ဌာနဂါမိနိတော ဝုဋ္ဌဟိတွာ သုဒ္ဓန္တေ ပတိဋ္ဌာတိ။ အာယတိံ သံဝရန္တော အညံ အာပတ္တိံ နာပဇ္ဇတိ။ တသ္မာ ဆန္နံ ဝိဝရေထာတိ တေန ကာရဏေန ဒေသနာဂါမိနိံ ဒေသေန္တော ဝုဋ္ဌာနဂါမိနိတော စ ဝုဋ္ဌဟန္တော ဆန္နံ ဝိဝရေထ။ ဧဝံ တံ နာတိဝဿတီတိ ဧဝဉ္စေတံ ဝိဝဋံ နာတိဝဿတီတိ အတ္ထော။

ဂတိ မိဂါနံ ပဝနန္တိ အဇ္ဈောကာသေ ဗျဂ္ဃာဒီဟိ ပရိပါတိယမာနာနံ မိဂါနံ ပဝနံ ရုက္ခာဒိဂဟနံ အရညံ ဂတိ ပဋိသရဏံ ဟောတိ၊ တံ ပတွာ တေ အဿာသန္တိ။ ဧတေနေဝ နယေန အာကာသော ပက္ခီနံ ဂတိ။ အဝဿံ ဥပဂမနဋ္ဌေန ပန ဝိဘဝေါ ဂတိ ဓမ္မာနံ၊ သဗ္ဗေသမ္ပိ သင်္ခတဓမ္မာနံ ဝိနာသောဝ တေသံ ဂတိ။ န ဟိ တေ ဝိနာသံ အဂစ္ဆန္တာ ဌာတုံ သက္ကောန္တိ။ သုစိရမ္ပိ ဌတွာ ပန နိဗ္ဗာနံ အရဟတော ဂတိ၊ ခီဏာသဝဿ အရဟတော အနုပါဒိသေသနိဗ္ဗာနဓာတု ဧကံသေန ဂတီတိ အတ္ထော။

ပဌမဂါထာသင်္ဂဏိကဝဏ္ဏနာ နိဋ္ဌိတာ။