📜

အဓိကရဏဘေဒံ

ဥက္ကောဋနဘေဒါဒိဝဏ္ဏနာ

၃၄၀။ အဓိကရဏဘေဒေ ဣမေ ဒသ ဥက္ကောဋာတိ အဓိကရဏာနံ ဥက္ကောဋေတွာ ပုန အဓိကရဏဥက္ကောဋေန သမထာနံ ဥက္ကောဋံ ဒဿေတုံ ‘‘ဝိဝါဒါဓိကရဏံ ဥက္ကောဋေန္တော ကတိ သမထေ ဥက္ကောဋေတီ’’တိအာဒိမာဟ။ တတ္ထ ဝိဝါဒါဓိကရဏံ ဥက္ကောဋေန္တော ဒွေ သမထေ ဥက္ကောဋေတီတိ သမ္မုခါဝိနယဉ္စ ယေဘုယျသိကဉ္စ ဣမေ ဒွေ ဥက္ကောဋေတိ၊ ပဋိသေဓေတိ၊ ပဋိက္ကောသတီတိ အတ္ထော။ အနုဝါဒါဓိကရဏံ ဥက္ကောဋေန္တော စတ္တာရောတိ သမ္မုခါဝိနယံ၊ သတိဝိနယံ၊ အမူဠှဝိနယံ၊ တဿပါပိယသိကန္တိ ဣမေ စတ္တာရော သမထေ ဥက္ကောဋေတိ။ အာပတ္တာဓိကရဏံ ဥက္ကောဋေန္တော တယောတိ သမ္မုခါဝိနယံ၊ ပဋိညာတကရဏံ၊ တိဏဝတ္ထာရကန္တိ ဣမေ တယော သမထေ ဥက္ကောဋေတိ။ ကိစ္စာဓိကရဏံ ဥက္ကောဋေန္တော ဧကန္တိ သမ္မုခါဝိနယံ ဣမံ ဧကံ သမထံ ဥက္ကောဋေတိ။

၃၄၁။ ကတိ ဥက္ကောဋာတိအာဒိပုစ္ဆာနံ ဝိဿဇ္ဇနေ ပန ဒွါဒသသု ဥက္ကောဋေသု အကတံ ကမ္မန္တိအာဒယော တာဝ တယော ဥက္ကောဋာ ဝိသေသတော ဒုတိယေ အနုဝါဒါဓိကရဏေ လဗ္ဘန္တိ။ အနိဟတံ ကမ္မန္တိအာဒယော တယော ပဌမေ ဝိဝါဒါဓိကရဏေ လဗ္ဘန္တိ။ အဝိနိစ္ဆိတန္တိအာဒယော တယော တတိယေ အာပတ္တာဓိကရဏေ လဗ္ဘန္တိ။ အဝူပသန္တန္တိအာဒယော တယော စတုတ္ထေ ကိစ္စာဓိကရဏေ လဗ္ဘန္တိ၊ အပိစ ဒွါဒသာပိ စ ဧကေကသ္မိံ အဓိကရဏေ လဗ္ဘန္တိယေဝ။

တတ္ထဇာတကံ အဓိကရဏံ ဥက္ကောဋေတီတိ ယသ္မိံ ဝိဟာရေ ‘‘မယှံ ဣမိနာ ပတ္တော ဂဟိတော၊ စီဝရံ ဂဟိတ’’န္တိအာဒိနာ နယေန ပတ္တစီဝရာဒီနံ အတ္ထာယ အဓိကရဏံ ဥပ္ပန္နံ ဟောတိ၊ တသ္မိံယေဝ စ နံ ဝိဟာရေ အာဝါသိကာ သန္နိပတိတွာ ‘‘အလံ အာဝုသော’’တိ အတ္တပစ္စတ္ထိကေ သညာပေတွာ ပါဠိမုတ္တကဝိနိစ္ဆယေနေဝ ဝူပသမေန္တိ၊ ဣဒံ တတ္ထဇာတကံ အဓိကရဏံ နာမ။ ယေနာပိ ဝိနိစ္ဆယေန သမိတံ၊ သောပိ ဧကော သမထောယေဝ။ ဣမံ ဥက္ကောဋေန္တဿာပိ ပါစိတ္တိယံ။

တတ္ထဇာတကံ ဝူပသန္တန္တိ သစေ ပန တံ အဓိကရဏံ နေဝါသိကာ ဝူပသမေတုံ န သက္ကောန္တိ၊ အထညော ဝိနယဓရော အာဂန္တွာ ‘‘ကိံ အာဝုသော ဣမသ္မိံ ဝိဟာရေ ဥပေါသထော ဝါ ပဝါရဏာ ဝါ ဌိတာ’’တိ ပုစ္ဆတိ၊ တေဟိ စ တသ္မိံ ကာရဏေ ကထိတေ တံ အဓိကရဏံ ခန္ဓကတော စ ပရိဝါရတော စ သုတ္တေန ဝိနိစ္ဆိနိတွာ ဝူပသမေတိ၊ ဣဒံ တတ္ထဇာတကံ ဝူပသန္တံ နာမ အဓိကရဏံ။ ဧတံ ဥက္ကောဋေန္တဿာပိ ပါစိတ္တိယမေဝ။

အန္တရာမဂ္ဂေတိ တေ အတ္တပစ္စတ္ထိကာ ‘‘န မယံ ဧတဿ ဝိနိစ္ဆယေ တိဋ္ဌာမ၊ နာယံ ဝိနယေ ကုသလော၊ အသုကသ္မိံ နာမ ဂါမေ ဝိနယဓရာ ထေရာ ဝသန္တိ၊ တတ္ထ ဂန္တွာ ဝိနိစ္ဆိနိဿာမာ’’တိ ဂစ္ဆန္တာ အန္တရာမဂ္ဂေယေဝ ကာရဏံ သလ္လက္ခေတွာ အညမညံ ဝါ သညာပေန္တိ၊ အညေ ဝါ တေ ဘိက္ခူ နိဇ္ဈာပေန္တိ၊ ဣဒမ္ပိ ဝူပသန္တမေဝ ဟောတိ။ ဧဝံ ဝူပသန္တံ အန္တရာမဂ္ဂေ အဓိကရဏံ ဥက္ကောဋေတိ ယော၊ တဿာပိ ပါစိတ္တိယမေဝ။

အန္တရာမဂ္ဂေ ဝူပသန္တန္တိ န ဟေဝ ခေါ ပန အညမညံ သညတ္တိယာ ဝါ သဘာဂဘိက္ခုနိဇ္ဈာပနေန ဝါ ဝူပသန္တံ ဟောတိ၊ အပိစ ခေါ ပဋိပထံ အာဂစ္ဆန္တော ဧကော ဝိနယဓရော ဒိသွာ ‘‘ကတ္ထ အာဝုသော ဂစ္ဆထာ’’တိ ပုစ္ဆိတွာ ‘‘အသုကံ နာမ ဂါမံ၊ ဣမိနာ နာမ ကာရဏေနာ’’တိ ဝုတ္တေ ‘‘အလံ၊ အာဝုသော၊ ကိံ တတ္ထ ဂတေနာ’’တိ တတ္ထေဝ ဓမ္မေန ဝိနယေန တံ အဓိကရဏံ ဝူပသမေတိ၊ ဣဒံ အန္တရာမဂ္ဂေ ဝူပသန္တံ နာမ။ ဧတံ ဥက္ကောဋေန္တဿာပိ ပါစိတ္တိယမေဝ။

တတ္ထ ဂတန္တိ သစေ ပန ‘‘အလံ၊ အာဝုသော၊ ကိံ တတ္ထ ဂတေနာ’’တိ ဝုစ္စမာနာပိ ‘‘မယံ တတ္ထေဝ ဂန္တွာ ဝိနိစ္ဆယံ ပါပေဿာမာ’’တိ ဝိနယဓရဿ ဝစနံ အနာဒိယိတွာ ဂစ္ဆန္တိယေဝ၊ ဂန္တွာ သဘာဂါနံ ဘိက္ခူနံ ဧတမတ္ထံ အာရောစေန္တိ။ သဘာဂါ ဘိက္ခူ ‘‘အလံ၊ အာဝုသော၊ သင်္ဃသန္နိပါတံ နာမ ဂရုက’’န္တိ တတ္ထေဝ နိသီဒါပေတွာ ဝိနိစ္ဆိနိတွာ သညာပေန္တိ၊ ဣဒမ္ပိ ဝူပသန္တမေဝ ဟောတိ။ ဧဝံ ဝူပသန္တံ တတ္ထ ဂတံ အဓိကရဏံ ဥက္ကောဋေတိ ယော၊ တဿာပိ ပါစိတ္တိယမေဝ။

တတ္ထဂတံ ဝူပသန္တန္တိ န ဟေဝ ခေါ ပန သဘာဂဘိက္ခူနံ သညတ္တိယာ ဝူပသန္တံ ဟောတိ၊ အပိစ ခေါ သင်္ဃံ သန္နိပါတေတွာ အာရောစိတံ သင်္ဃမဇ္ဈေ ဝိနယဓရာ ဝူပသမေန္တိ၊ ဣဒံ တတ္ထ ဂတံ ဝူပသန္တံ နာမ။ ဧတံ ဥက္ကောဋေန္တဿာပိ ပါစိတ္တိယမေဝ။

သတိဝိနယန္တိ ခီဏာသဝဿ ဒိန္နံ သတိဝိနယံ ဥက္ကောဋေတိ၊ ပါစိတ္တိယမေဝ။ ဥမ္မတ္တကဿ ဒိန္နေ အမူဠှဝိနယေ ပါပုဿန္နဿ ဒိန္နာယ တဿပါပိယသိကာယပိ ဧသေဝ နယော။

တိဏဝတ္ထာရကံဥက္ကောဋေတီတိ သင်္ဃေန တိဏဝတ္ထာရကသမထေန ဝူပသမိတေ အဓိကရဏေ ‘‘အာပတ္တိ နာမ ဧကံ ဘိက္ခုံ ဥပသင်္ကမိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဒေသိယမာနာ ဝုဋ္ဌာတိ၊ ယံ ပနေတံ နိဒ္ဒါယန္တဿာပိ အာပတ္တိဝုဋ္ဌာနံ နာမ၊ ဧတံ မယှံ န ခမတီ’’တိ ဧဝံ ဝဒန္တောပိ တိဏဝတ္ထာရကံ ဥက္ကောဋေတိ နာမ၊ တဿာပိ ပါစိတ္တိယမေဝ။

ဆန္ဒာဂတိံ ဂစ္ဆန္တော အဓိကရဏံ ဥက္ကောဋေတီတိ ဝိနယဓရော ဟုတွာ အတ္တနော ဥပဇ္ဈာယာဒီနံ အတ္ထာယ ‘‘အဓမ္မံ ဓမ္မော’’တိအာဒီနိ ဒီပေတွာ ပုဗ္ဗေ ဝိနိစ္ဆိတံ အဓိကရဏံ ဒွါဒသသု ဥက္ကောဋေသု ယေန ကေနစိ ဥက္ကောဋေန္တော ဆန္ဒာဂတိံ ဂစ္ဆန္တော အဓိကရဏံ ဥက္ကောဋေတိ နာမ။ ဒွီသု ပန အတ္တပစ္စတ္ထိကေသု ဧကသ္မိံ ‘‘အနတ္ထံ မေ အစရီ’’တိအာဒိနာ နယေန သမုပ္ပန္နာဃာတော၊ တဿ ပရာဇယံ အာရောပနတ္ထံ ‘‘အဓမ္မံ ဓမ္မော’’တိအာဒီနိ ဒီပေတွာ ပုဗ္ဗေ ဝိနိစ္ဆိတံ အဓိကရဏံ ဒွါဒသသု ဥက္ကောဋေသု ယေန ကေနစိ ဥက္ကောဋေန္တော ဒေါသာဂတိံ ဂစ္ဆန္တော အဓိကရဏံ ဥက္ကောဋေတိ နာမ။ မန္ဒော ပန မောမူဟော မောမူဟတ္တာ ဧဝ ‘‘အဓမ္မံ ဓမ္မော’’တိအာဒီနိ ဒီပေတွာ ဝုတ္တနယေနေဝ ဥက္ကောဋေန္တော မောဟာဂတိံ ဂစ္ဆန္တော အဓိကရဏံ ဥက္ကောဋေတိ နာမ။ သစေ ပန ဒွီသု အတ္တပစ္စတ္ထိကေသု ဧကော ဝိသမာနိ ကာယကမ္မာဒီနိ ဂဟနမိစ္ဆာဒိဋ္ဌိံ ဗလဝန္တေ စ ပက္ခန္တရိယေ အဘိညာတေ ဘိက္ခူ နိဿိတတ္တာ ဝိသမနိဿိတော ဂဟနနိဿိတော ဗလဝနိဿိတော စ ဟောတိ၊ တဿ ဘယေန ‘‘အယံ မေ ဇီဝိတန္တရာယံ ဝါ ဗြဟ္မစရိယန္တရာယံ ဝါ ကရေယျာ’’တိ ‘‘အဓမ္မံ ဓမ္မော’’တိအာဒီနိ ဒီပေတွာ ဝုတ္တနယေနေဝ ဥက္ကောဋေန္တော ဘယာဂတိံ ဂစ္ဆန္တော အဓိကရဏံ ဥက္ကောဋေတိ နာမ။

တဒဟုပသမ္ပန္နောတိ ဧကော သာမဏေရော ဗျတ္တော ဟောတိ ဗဟုဿုတော၊ သော ဝိနိစ္ဆယေ ပရာဇယံ ပတွာ မင်္ကုဘူတေ ဘိက္ခူ ဒိသွာ ပုစ္ဆတိ ‘‘ကသ္မာ မင်္ကုဘူတာတ္ထာ’’တိ? တေ တဿ တံ အဓိကရဏံ အာရောစေန္တိ။ သော တေ ဧဝံ ဝဒေတိ ‘‘ဟောတု၊ ဘန္တေ၊ မံ ဥပသမ္ပာဒေထ၊ အဟံ တံ အဓိကရဏံ ဝူပသမေဿာမီ’’တိ ။ တေ တံ ဥပသမ္ပာဒေန္တိ။ သော ဒုတိယဒိဝသေ ဘေရိံ ပဟရိတွာ သင်္ဃံ သန္နိပါတေတိ။ တတော ဘိက္ခူဟိ ‘‘ကေန သင်္ဃော သန္နိပါတိတော’’တိ ဝုတ္တေ ‘‘မယာ’’တိ ဝဒတိ။ ‘‘ကသ္မာ သန္နိပါတိတော’’တိ? ‘‘ဟိယျော အဓိကရဏံ ဒုဗ္ဗိနိစ္ဆိတံ၊ တမဟံ ဝိနိစ္ဆိနိဿာမီ’’တိ။ ‘‘တွံ ပန ဟိယျော ကုဟိံ ဂတော’’တိ? ‘‘အနုပသမ္ပန္နောမှိ၊ ဘန္တေ၊ အဇ္ဇ ပန ဥပသမ္ပန္နောမှီ’’တိ။ သော ဝတ္တဗ္ဗော ‘‘ဣဒံ အာဝုသော တုမှာဒိသာနံ ဘဂဝတာ သိက္ခာပဒံ ပညတ္တံ၊ ‘တဒဟုပသမ္ပန္နော ဥက္ကောဋေတိ၊ ဥက္ကောဋနကံ ပါစိတ္တိယ’န္တိ၊ ဂစ္ဆ အာပတ္တိံ ဒေသေဟီ’’တိ။ အာဂန္တုကေပိ ဧသေဝ နယော။

ကာရကောတိ ဧကံ သင်္ဃေန သဒ္ဓိံ အဓိကရဏံ ဝိနိစ္ဆိနိတွာ ပရိဝေဏဂတံ ပရာဇိတာ ဘိက္ခူ ဝဒန္တိ ‘‘ကိဿ၊ ဘန္တေ၊ တုမှေဟိ ဧဝံ ဝိနိစ္ဆိတံ အဓိကရဏံ၊ နနု ဧဝံ ဝိနိစ္ဆိနိတဗ္ဗ’’န္တိ။ သော ‘‘ကသ္မာ ပဌမံယေဝ ဧဝံ န ဝဒိတ္ထာ’’တိ တံ အဓိကရဏံ ဥက္ကောဋေတိ။ ဧဝံ ယော ကာရကော ဥက္ကောဋေတိ၊ တဿာပိ ဥက္ကောဋနကံ ပါစိတ္တိယံ။ ဆန္ဒဒါယကောတိ ဧကော အဓိကရဏဝိနိစ္ဆယေ ဆန္ဒံ ဒတွာ သဘာဂေ ဘိက္ခူ ပရာဇယံ ပတွာ အာဂတေ မင်္ကုဘူတေ ဒိသွာ ‘‘သွေ ဒါနိ အဟံ ဝိနိစ္ဆိနိဿာမီ’’တိ သင်္ဃံ သန္နိပါတေတွာ ‘‘ကသ္မာ သန္နိပါတေသီ’’တိ ဝုတ္တေ ‘‘ဟိယျော အဓိကရဏံ ဒုဗ္ဗိနိစ္ဆိတံ၊ တမဟံ အဇ္ဇ ဝိနိစ္ဆိနိဿာမီ’’တိ။ ‘‘ဟိယျော ပန တွံ ကတ္ထ ဂတော’’တိ။ ‘‘ဆန္ဒံ ဒတွာ နိသိန္နောမှီ’’တိ။ သော ဝတ္တဗ္ဗော ‘‘ဣဒံ အာဝုသော တုမှာဒိသာနံ ဘဂဝတာ သိက္ခာပဒံ ပညတ္တံ၊ ‘ဆန္ဒဒါယကော ဥက္ကောဋေတိ၊ ဥက္ကောဋနကံ ပါစိတ္တိယ’န္တိ၊ ဂစ္ဆ အာပတ္တိံ ဒေသေဟီ’’တိ။

အဓိကရဏနိဒါနာဒိဝဏ္ဏနာ

၃၄၂။ ဝိဝါဒါဓိကရဏံ ကိံနိဒါနန္တိအာဒီသု ကိံ နိဒါနမဿာတိ ကိံနိဒါနံ။ ကော သမုဒယော အဿာတိ ကိံသမုဒယံ။ ကာ ဇာတိ အဿာတိ ကိံဇာတိကံ။ ကော ပဘဝေါ အဿာတိ ကိံပဘဝံ။ ကော သမ္ဘာရော အဿာတိ ကိံသမ္ဘာရံ။ ကိံ သမုဋ္ဌာနံ အဿာတိ ကိံသမုဋ္ဌာနံ။ သဗ္ဗာနေတာနိ ကာရဏဝေဝစနာနိယေဝ။

ဝိဝါဒနိဒါနန္တိအာဒီသုပိ အဋ္ဌာရသဘေဒကရဝတ္ထုသင်္ခါတော ဝိဝါဒေါ နိဒါနမေတဿာတိ ဝိဝါဒနိဒါနံ။ ဝိဝါဒံ နိဿာယ ဥပ္ပဇ္ဇနကဝိဝါဒဝသေနေတံ ဝုတ္တံ။ အနုဝါဒေါ နိဒါနံ အဿာတိ အနုဝါဒနိဒါနံ။ ဣဒမ္ပိ အနုဝါဒံ နိဿာယ ဥပ္ပဇ္ဇနကအနုဝါဒဝသေန ဝုတ္တံ။ အာပတ္တိ နိဒါနံ အဿာတိ အာပတ္တိနိဒါနံ။ အာပတ္တာဓိကရဏပစ္စယာ စတဿော အာပတ္တိယော အာပဇ္ဇတီတိ ဧဝံ အာပတ္တိံ နိဿာယ ဥပ္ပဇ္ဇနကအာပတ္တိဝသေနေတံ ဝုတ္တံ။ ကိစ္စယံ နိဒါနမဿာတိ ကိစ္စယနိဒါနံ၊ စတုဗ္ဗိဓံ သင်္ဃကမ္မံ ကာရဏမဿာတိ အတ္ထော။ ဥက္ခိတ္တာနုဝတ္တိကာယ ဘိက္ခုနိယာ ယာဝတတိယံ သမနုဘာသနာဒီနံ ကိစ္စံ နိဿာယ ဥပ္ပဇ္ဇနကကိစ္စာနံ ဝသေနေတံ ဝုတ္တံ။ အယံ စတုန္နမ္ပိ အဓိကရဏာနံ ဝိဿဇ္ဇနပက္ခေ ဧကပဒယောဇနာ။ ဧတေနာနုသာရေန သဗ္ဗပဒါနိ ယောဇေတဗ္ဗာနိ။

ဒုတိယပုစ္ဆာယ ဟေတုနိဒါနန္တိအာဒိမှိ ဝိဿဇ္ဇနေ နဝန္နံ ကုသလာကုသလာဗျာကတဟေတူနံ ဝသေန ဟေတုနိဒါနာဒိတာ ဝေဒိတဗ္ဗာ။ တတိယပုစ္ဆာယ ဝိဿဇ္ဇနေ ဗျဉ္ဇနမတ္တံ နာနံ။ ဟေတုယေဝ ဟိ ဧတ္ထ ပစ္စယောတိ ဝုတ္တော။

၃၄၃။ မူလပုစ္ဆာယ ဝိဿဇ္ဇနေ ဒွါဒသ မူလာနီတိ ကောဓဥပနာဟယုဂဠကာဒီနိ ဆ ဝိဝါဒါမူလာနိ၊ လောဘဒေါသမောဟာ တယော၊ အလောဘာဒေါသာမောဟာ တယောတိ ဣမာနိ အဇ္ဈတ္တသန္တာနပ္ပဝတ္တာနိ ဒွါဒသ မူလာနိ။ စုဒ္ဒသ မူလာနီတိ တာနေဝ ဒွါဒသ ကာယဝါစာဟိ သဒ္ဓိံ စုဒ္ဒသ ဟောန္တိ။ ဆ မူလာနီတိ ကာယာဒီနိ ဆ သမုဋ္ဌာနာနိ။

သမုဋ္ဌာနပုစ္ဆာယ ဝိဿဇ္ဇနေ အဋ္ဌာရသ ဘေဒကရဝတ္ထူနိ သမုဋ္ဌာနာနိ၊ တဉှိ ဧတေသု အဋ္ဌာရသသု ဘေဒကရဝတ္ထူသု သမုဋ္ဌာတိ၊ ဧတေဟိ ဝါ ကာရဏဘူတေဟိ သမုဋ္ဌာတိ။ တေနဿေတာနိ သမုဋ္ဌာနာနိ ဝုစ္စန္တိ။ ဧသ နယော သဗ္ဗတ္ထ။

၃၄၄။ ဝိဝါဒါဓိကရဏံ အာပတ္တီတိအာဒိဘေဒေ ဧကေန အဓိကရဏေန ကိစ္စာဓိကရဏေနာတိ ဣဒံ ယေန အဓိကရဏေန သမ္မန္တိ၊ တံ ဒဿေတုံ ဝုတ္တံ၊ န ပနေတာနိ ဧကံသတော ကိစ္စာဓိကရဏေနေဝ သမ္မန္တိ။ န ဟိ ပုဂ္ဂလဿ သန္တိကေ ဒေသေန္တဿ ကိစ္စာဓိကရဏံ နာမ အတ္ထိ။

န ကတမေန သမထေနာတိ သာဝသေသာပတ္တိ ဝိယ န သမ္မတိ။ န ဟိ သက္ကာ သာ ဒေသေတုံ၊ န တတော ဝုဋ္ဌာယ သုဒ္ဓန္တေ ပတိဋ္ဌာတုံ။

၃၄၈။ ဝိဝါဒါဓိကရဏံ ဟောတိ အနုဝါဒါဓိကရဏန္တိအာဒိ နယော ဥတ္တာနောယေဝ။

၃၄၉။ တတော ပရံ ယတ္ထ သတိဝိနယောတိအာဒိကာ သမ္မုခါဝိနယံ အမုဉ္စိတွာ ဆ ယမကပုစ္ဆာ ဝုတ္တာ၊ တာသံ ဝိဿဇ္ဇနေနေဝ အတ္ထော ပကာသိတော။

၃၅၁။ သံသဋ္ဌာဒိပုစ္ဆာနံ ဝိဿဇ္ဇနေ သံသဋ္ဌာတိ သတိဝိနယကမ္မဝါစာက္ခဏသ္မိံယေဝ ဒွိန္နမ္ပိ သမထာနံ သိဒ္ဓတ္တာ သမ္မုခါဝိနယောတိ ဝါ သတိဝိနယောတိ ဝါ ဣမေ ဓမ္မာ သံသဋ္ဌာ၊ နော ဝိသံသဋ္ဌာ။ ယသ္မာ ပန ကဒလိက္ခန္ဓေ ပတ္တဝဋ္ဋီနံ ဝိယ န သက္ကာ တေသံ ဝိနိဗ္ဘုဇိတွာ နာနာကရဏံ ဒဿေတုံ၊ တေန ဝုတ္တံ ‘‘န စ လဗ္ဘာ ဣမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတု’’န္တိ။ ဧသ နယော သဗ္ဗတ္ထ။

သတ္တသမထနိဒါနဝဏ္ဏနာ

၃၅၂။ ကိံနိဒါနောတိ ပုစ္ဆာဝိဿဇ္ဇနေ နိဒါနံ နိဒါနမဿာတိ နိဒါနနိဒါနော။ တတ္ထ သင်္ဃသမ္မုခတာ၊ ဓမ္မသမ္မုခတာ၊ ဝိနယသမ္မုခတာ၊ ပုဂ္ဂလသမ္မုခတာတိ ဣဒံ သမ္မုခါဝိနယဿ နိဒါနံ။ သတိဝေပုလ္လပတ္တော ခီဏာသဝေါ လဒ္ဓုပဝါဒေါ သတိဝိနယဿ နိဒါနံ။ ဥမ္မတ္တကော ဘိက္ခု အမူဠှဝိနယဿ နိဒါနံ။ ယော စ ဒေသေတိ၊ ယဿ စ ဒေသေတိ၊ ဥဘိန္နံ သမ္မုခီဘာဝေါ ပဋိညာတကရဏဿ နိဒါနံ။ ဘဏ္ဍနဇာတာနံ အဓိကရဏံ ဝူပသမေတုံ အသက္ကုဏေယျတာ ယေဘုယျသိကာယ နိဒါနံ။ ပါပုဿန္နော ပုဂ္ဂလော တဿပါပိယသိကာယ နိဒါနံ။ ဘဏ္ဍနဇာတာနံ ဗဟု အဿာမဏကအဇ္ဈာစာရော တိဏဝတ္ထာရကဿ နိဒါနံ။ ဟေတုပစ္စယဝါရာ ဝုတ္တနယာ ဧဝ။

၃၅၃။ မူလပုစ္ဆာယ ဝိဿဇ္ဇနံ ဥတ္တာနမေဝ။ သမုဋ္ဌာနပုစ္ဆာယ ကိဉ္စာပိ ‘‘သတ္တန္နံ သမထာနံ ကတမေ ဆတ္တိံသ သမုဋ္ဌာနာ’’တိ ဝုတ္တံ၊ သမ္မုခါဝိနယဿ ပန ကမ္မသင်္ဂဟာဘာဝေန သမုဋ္ဌာနာဘာဝတော ဆန္နံယေဝ သမထာနံ ဆ သမုဋ္ဌာနာနိ ဝိဘတ္တာနိ။ တတ္ထ ကမ္မဿ ကိရိယာတိ ဉတ္တိ ဝေဒိတဗ္ဗာ။ ကရဏန္တိ တဿာယေဝ ဉတ္တိယာ ဌပေတဗ္ဗကာလေ ဌပနံ။ ဥပဂမနန္တိ သယံ ဥပဂမနံ၊ အတ္တနာယေဝ တဿ ကမ္မဿ ကရဏန္တိ အတ္ထော။ အဇ္ဈုပဂမနန္တိ အဇ္ဈေသနုပဂမနံ၊ အညံ သဒ္ဓိဝိဟာရိကာဒိကံ ‘‘ဣဒံ ကမ္မံ ကရောဟီ’’တိ အဇ္ဈေသနန္တိ အတ္ထော။ အဓိဝါသနာတိ ‘‘ရုစ္စတိ မေ ဧတံ၊ ကရောတု သင်္ဃော’’တိ ဧဝံ အဓိဝါသနာ၊ ဆန္ဒဒါနန္တိ အတ္ထော။ အပ္ပဋိက္ကောသနာတိ ‘‘န မေတံ ခမတိ၊ မာ ဧဝံ ကရောထာ’’တိ အပ္ပဋိသေဓနာ။ ဣတိ ဆန္နံ ဆက္ကာနံ ဝသေန ဆတ္တိံသ သမုဋ္ဌာနာ ဝေဒိတဗ္ဗာ။

သတ္တသမထနာနာတ္ထာဒိဝဏ္ဏနာ

၃၅၄။ နာနာတ္ထပုစ္ဆာဝိဿဇ္ဇနံ ဥတ္တာနမေဝ။ အဓိကရဏပုစ္ဆာဝိဿဇ္ဇနေ အယံ ဝိဝါဒေါ နော အဓိကရဏန္တိ အယံ မာတာပုတ္တာဒီနံ ဝိဝါဒေါ ဝိရုဒ္ဓဝါဒတ္တာ ဝိဝါဒေါ နာမ ဟောတိ၊ သမထေဟိ ပန အဓိကရဏီယတာယ အဘာဝတော အဓိကရဏံ န ဟောတိ။ အနုဝါဒါဒီသုပိ ဧသေဝ နယော။ သေသံ သဗ္ဗတ္ထ ဥတ္တာနမေဝါတိ။

အဓိကရဏဘေဒဝဏ္ဏနာ နိဋ္ဌိတာ။