📜

၃။ ဝဿူပနာယိကက္ခန္ဓကော

၁၀၇။ ဝဿူပနာယိကာနုဇာနနာ

၁၈၄။ တေန သမယေန ဗုဒ္ဓါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန ဘဂဝတာ ဘိက္ခူနံ ဝဿာဝါသော အပညတ္တော ဟောတိ။ တေဣဓ ဘိက္ခူ ဟေမန္တမ္ပိ ဂိမှမ္ပိ ဝဿမ္ပိ စာရိကံ စရန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ ဟေမန္တမ္ပိ ဂိမှမ္ပိ ဝဿမ္ပိ စာရိကံ စရိဿန္တိ၊ ဟရိတာနိ တိဏာနိ သမ္မဒ္ဒန္တာ၊ ဧကိန္ဒြိယံ ဇီဝံ ဝိဟေဌေန္တာ၊ ဗဟူ ခုဒ္ဒကေ ပါဏေ သင်္ဃာတံ အာပါဒေန္တာ။ ဣမေ ဟိ နာမ အညတိတ္ထိယာ ဒုရက္ခာတဓမ္မာ ဝဿာဝါသံ အလ္လီယိဿန္တိ သင်္ကသာယိဿန္တိ။ ဣမေ ဟိ နာမ သကုန္တကာ ရုက္ခဂ္ဂေသု ကုလာဝကာနိ ကရိတွာ ဝဿာဝါသံ အလ္လီယိဿန္တိ သင်္ကသာယိဿန္တိ [သင်္ကာသယိဿန္တိ (သီ။ သျာ။)]။ ဣမေ ပန သမဏာ သကျပုတ္တိယာ ဟေမန္တမ္ပိ ဂိမှမ္ပိ ဝဿမ္ပိ စာရိကံ စရန္တိ၊ ဟရိတာနိ တိဏာနိ သမ္မဒ္ဒန္တာ၊ ဧကိန္ဒြိယံ ဇီဝံ ဝိဟေဌေန္တာ၊ ဗဟူ ခုဒ္ဒကေ ပါဏေ သင်္ဃာတံ အာပါဒေန္တာ’’တိ။ အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ဝဿံ ဥပဂန္တု’’န္တိ။ အထ ခေါ ဘိက္ခူနံ ဧတဒဟောသိ – ‘‘ကဒါ နု ခေါ ဝဿံ ဥပဂန္တဗ္ဗ’’န္တိ? ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ဝဿာနေ ဝဿံ ဥပဂန္တုန္တိ။

အထ ခေါ ဘိက္ခူနံ ဧတဒဟောသိ – ‘‘ကတိ နု ခေါ ဝဿူပနာယိကာ’’တိ? ဘဂဝတော ဧတမတ္ထံ

အာရောစေသုံ။ ဒွေမာ၊ ဘိက္ခဝေ၊ ဝဿူပနာယိကာ – ပုရိမိကာ၊ ပစ္ဆိမိကာ။ အပရဇ္ဇုဂတာယ အာသာဠှိယာ ပုရိမိကာ ဥပဂန္တဗ္ဗာ၊ မာသဂတာယ အာသာဠှိယာ ပစ္ဆိမိကာ ဥပဂန္တဗ္ဗာ – ဣမာ ခေါ၊ ဘိက္ခဝေ၊ ဒွေ ဝဿူပနာယိကာတိ။

ဝဿူပနာယိကာနုဇာနနာ နိဋ္ဌိတာ။

၁၀၈။ ဝဿာနေ စာရိကာပဋိက္ခေပါဒိ

၁၈၅။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဝဿံ ဥပဂန္တွာ အန္တရာဝဿံ စာရိကံ စရန္တိ။ မနုဿာ တထေဝ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ ဟေမန္တမ္ပိ ဂိမှမ္ပိ ဝဿမ္ပိ စာရိကံ စရိဿန္တိ၊ ဟရိတာနိ တိဏာနိ သမ္မဒ္ဒန္တာ၊ ဧကိန္ဒြိယံ ဇီဝံ ဝိဟေဌေန္တာ၊ ဗဟူ ခုဒ္ဒကေ ပါဏေ သင်္ဃာတံ အာပါဒေန္တာ။ ဣမေ ဟိ နာမ အညတိတ္ထိယာ ဒုရက္ခာတဓမ္မာ ဝဿာဝါသံ အလ္လီယိဿန္တိ သင်္ကသာယိဿန္တိ။ ဣမေ ဟိ နာမ သကုန္တကာ ရုက္ခဂ္ဂေသု ကုလာဝကာနိ ကရိတွာ ဝဿာဝါသံ အလ္လီယိဿန္တိ သင်္ကသာယိဿန္တိ။ ဣမေ ပန သမဏာ သကျပုတ္တိယာ ဟေမန္တမ္ပိ ဂိမှမ္ပိ ဝဿမ္ပိ စာရိကံ စရန္တိ၊ ဟရိတာနိ တိဏာနိ သမ္မဒ္ဒန္တာ၊ ဧကိန္ဒြိယံ ဇီဝံ ဝိဟေဌေန္တာ၊ ဗဟူ ခုဒ္ဒကေ ပါဏေ သင်္ဃာတံ အာပါဒေန္တာ’’တိ။ အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဝဿံ ဥပဂန္တွာ အန္တရာဝဿံ စာရိကံ စရိဿန္တီ’’တိ? အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ ဝဿံ ဥပဂန္တွာ ပုရိမံ ဝါ တေမာသံ ပစ္ဆိမံ ဝါ တေမာသံ အဝသိတွာ စာရိကာ ပက္ကမိတဗ္ဗာ။ ယော ပက္ကမေယျ၊ အာပတ္တိ ဒုက္ကဋဿာ’’တိ။

၁၈၆။ တေန ခေါ ပန သမယေန ဆဗ္ဗဂ္ဂိယာ ဘိက္ခူ န ဣစ္ဆန္တိ ဝဿံ ဥပဂန္တုံ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ ဝဿံ န ဥပဂန္တဗ္ဗံ။ ယော န ဥပဂစ္ဆေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ဆဗ္ဗဂ္ဂိယာ ဘိက္ခူ တဒဟု ဝဿူပနာယိကာယ ဝဿံ အနုပဂန္တုကာမာ သဉ္စိစ္စ အာဝါသံ အတိက္ကမန္တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ တဒဟု ဝဿူပနာယိကာယ ဝဿံ အနုပဂန္တုကာမေန သဉ္စိစ္စ အာဝါသော အတိက္ကမိတဗ္ဗော။ ယော အတိက္ကမေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ရာဇာ မာဂဓော သေနိယော ဗိမ္ဗိသာရော ဝဿံ ဥက္ကဍ္ဎိတုကာမော

ဘိက္ခူနံ သန္တိကေ ဒူတံ ပါဟေသိ – ယဒိ ပနာယျာ အာဂမေ ဇုဏှေ ဝဿံ ဥပဂစ္ဆေယျုန္တိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ရာဇူနံ အနုဝတ္တိတုန္တိ။

ဝဿာနေ စာရိကာပဋိက္ခေပါဒိ နိဋ္ဌိတာ။

၁၀၉။ သတ္တာဟကရဏီယာနုဇာနနာ

၁၈၇။ အထ ခေါ ဘဂဝါ ရာဇဂဟေ ယထာဘိရန္တံ ဝိဟရိတွာ ယေန သာဝတ္ထိ တေန စာရိကံ ပက္ကာမိ။ အနုပုဗ္ဗေန စာရိကံ စရမာနော ယေန သာဝတ္ထိ တဒဝသရိ။ တတြ သုဒံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ကောသလေသု ဇနပဒေ ဥဒေနေန ဥပါသကေန သင်္ဃံ ဥဒ္ဒိဿ ဝိဟာရော ကာရာပိတော ဟောတိ။ သော ဘိက္ခူနံ သန္တိကေ ဒူတံ ပါဟေသိ – ‘‘အာဂစ္ဆန္တု ဘဒန္တာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ။ ဘိက္ခူ ဧဝမာဟံသု – ‘‘ဘဂဝတာ၊ အာဝုသော၊ ပညတ္တံ ‘န ဝဿံ ဥပဂန္တွာ ပုရိမံ ဝါ တေမာသံ ပစ္ဆိမံ ဝါ တေမာသံ အဝသိတွာ စာရိကာ ပက္ကမိတဗ္ဗာ’တိ။ အာဂမေတု ဥဒေနော ဥပါသကော၊ ယာဝ ဘိက္ခူ ဝဿံ ဝသန္တိ။ ဝဿံဝုဋ္ဌာ အာဂမိဿန္တိ။ သစေ ပနဿ အစ္စာယိကံ ကရဏီယံ၊ တတ္ထေဝ အာဝါသိကာနံ ဘိက္ခူနံ သန္တိကေ ဝိဟာရံ ပတိဋ္ဌာပေတူ’’တိ။ ဥဒေနော ဥပါသကော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘဒန္တာ မယာ ပဟိတေ န အာဂစ္ဆိဿန္တိ။ အဟဉှိ ဒါယကော ကာရကော သင်္ဃုပဋ္ဌာကော’’တိ။ အဿောသုံ ခေါ ဘိက္ခူ ဥဒေနဿ ဥပါသကဿ ဥဇ္ဈာယန္တဿ ခိယျန္တဿ ဝိပါစေန္တဿ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ သတ္တန္နံ သတ္တာဟကရဏီယေန ပဟိတေ ဂန္တုံ၊ န တွေဝ အပ္ပဟိတေ။ ဘိက္ခုဿ၊ ဘိက္ခုနိယာ၊ သိက္ခမာနာယ၊ သာမဏေရဿ၊ သာမဏေရိယာ၊ ဥပါသကဿ၊ ဥပါသိကာယ – အနုဇာနာမိ၊ ဘိက္ခဝေ၊ ဣမေသံ သတ္တန္နံ သတ္တာဟကရဏီယေန ပဟိတေ ဂန္တုံ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော’’။

၁၈၈။ ဣဓ ပန၊ ဘိက္ခဝေ၊ ဥပါသကေန သင်္ဃံ ဥဒ္ဒိဿ ဝိဟာရော ကာရာပိတော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု ဘဒန္တာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဥပါသကေန သင်္ဃံ ဥဒ္ဒိဿ အဍ္ဎယောဂေါ ကာရာပိတော ဟောတိ…ပေ… ပါသာဒေါ ကာရာပိတော ဟောတိ… ဟမ္မိယံ ကာရာပိတံ ဟောတိ… ဂုဟာ ကာရာပိတာ ဟောတိ… ပရိဝေဏံ ကာရာပိတံ ဟောတိ… ကောဋ္ဌကော ကာရာပိတော ဟောတိ… ဥပဋ္ဌာနသာလာ ကာရာပိတာ ဟောတိ… အဂ္ဂိသာလာ ကာရာပိတာ ဟောတိ… ကပ္ပိယကုဋိ ကာရာပိတာ ဟောတိ… ဝစ္စကုဋိ ကာရာပိတာ ဟောတိ… စင်္ကမော ကာရာပိတော ဟောတိ … စင်္ကမနသာလာ ကာရာပိတာ ဟောတိ… ဥဒပါနော ကာရာပိတော ဟောတိ … ဥဒပါနသာလာ ကာရာပိတာ ဟောတိ… ဇန္တာဃရံ ကာရာပိတံ ဟောတိ… ဇန္တာဃရသာလာ ကာရာပိတာ ဟောတိ… ပေါက္ခရဏီ ကာရာပိတာ ဟောတိ… မဏ္ဍပေါ ကာရာပိတော ဟောတိ… အာရာမော ကာရာပိတော ဟောတိ… အာရာမဝတ္ထု ကာရာပိတံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု ဘဒန္တာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဥပါသကေန သမ္ဗဟုလေ ဘိက္ခူ ဥဒ္ဒိဿ…ပေ… ဧကံ ဘိက္ခုံ ဥဒ္ဒိဿ ဝိဟာရော ကာရာပိတော ဟောတိ… အဍ္ဎယောဂေါ ကာရာပိတော ဟောတိ… ပါသာဒေါ ကာရာပိတော ဟောတိ … ဟမ္မိယံ ကာရာပိတံ ဟောတိ… ဂုဟာ ကာရာပိတာ ဟောတိ… ပရိဝေဏံ ကာရာပိတံ ဟောတိ… ကောဋ္ဌကော ကာရာပိတော ဟောတိ… ဥပဋ္ဌာနသာလာ ကာရာပိတာ ဟောတိ… အဂ္ဂိသာလာ ကာရာပိတာ ဟောတိ… ကပ္ပိယကုဋိ ကာရာပိတာ ဟောတိ… ဝစ္စကုဋိ ကာရာပိတာ ဟောတိ… စင်္ကမော ကာရာပိတော ဟောတိ… စင်္ကမနသာလာ ကာရာပိတာ ဟောတိ… ဥဒပါနော ကာရာပိတော ဟောတိ… ဥဒပါနသာလာ ကာရာပိတာ ဟောတိ… ဇန္တာဃရံ ကာရာပိတံ ဟောတိ… ဇန္တာဃရသာလာ ကာရာပိတာ ဟောတိ… ပေါက္ခရဏီ ကာရာပိတာ ဟောတိ… မဏ္ဍပေါ ကာရာပိတော ဟောတိ… အာရာမော ကာရာပိတော ဟောတိ… အာရာမဝတ္ထု ကာရာပိတံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု ဘဒန္တာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဥပါသကေန ဘိက္ခုနိသင်္ဃံ ဥဒ္ဒိဿ…ပေ… သမ္ဗဟုလာ ဘိက္ခုနိယော ဥဒ္ဒိဿ…ပေ… ဧကံ ဘိက္ခုနိံ ဥဒ္ဒိဿ…ပေ… သမ္ဗဟုလာ သိက္ခမာနာယော ဥဒ္ဒိဿ…ပေ… ဧကံ သိက္ခမာနံ ဥဒ္ဒိဿ…ပေ… သမ္ဗဟုလေ သာမဏေရေ ဥဒ္ဒိဿ…ပေ… ဧကံ သာမဏေရံ ဥဒ္ဒိဿ…ပေ… သမ္ဗဟုလာ သာမဏေရိယော ဥဒ္ဒိဿ…ပေ… ဧကံ သာမဏေရိံ ဥဒ္ဒိဿ ဝိဟာရော ကာရာပိတော ဟောတိ…ပေ… အဍ္ဎယောဂေါ ကာရာပိတော ဟောတိ… ပါသာဒေါ ကာရာပိတော ဟောတိ… ဟမ္မိယံ ကာရာပိတံ ဟောတိ… ဂုဟာ ကာရာပိတာ ဟောတိ… ပရိဝေဏံ ကာရာပိတံ ဟောတိ… ကောဋ္ဌကော ကာရာပိတော ဟောတိ… ဥပဋ္ဌာနသာလာ ကာရာပိတာ ဟောတိ… အဂ္ဂိသာလာ ကာရာပိတာ ဟောတိ … ကပ္ပိယကုဋိ ကာရာပိတာ ဟောတိ… စင်္ကမော ကာရာပိတော ဟောတိ… စင်္ကမနသာလာ ကာရာပိတာ ဟောတိ… ဥဒပါနော ကာရာပိတော ဟောတိ… ဥဒပါနသာလာ ကာရာပိတာ ဟောတိ… ပေါက္ခရဏီ ကာရာပိတာ ဟောတိ… မဏ္ဍပေါ ကာရာပိတော ဟောတိ… အာရာမော ကာရာပိတော ဟောတိ… အာရာမဝတ္ထု ကာရာပိတံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု ဘဒန္တာ၊ ဣစ္ဆာမိ ဒါနဉ္စ ဒါတုံ ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

၁၈၉။ ဣဓ ပန၊ ဘိက္ခဝေ၊ ဥပါသကေန အတ္တနော အတ္ထာယ နိဝေသနံ ကာရာပိတံ ဟောတိ…ပေ… သယနိဃရံ ကာရာပိတံ ဟောတိ… ဥဒေါသိတော ကာရာပိတော ဟောတိ… အဋ္ဋော ကာရာပိတော ဟောတိ… မာဠော ကာရာပိတော ဟောတိ… အာပဏော ကာရာပိတော ဟောတိ… အာပဏသာလာ ကာရာပိတာ ဟောတိ… ပါသာဒေါ ကာရာပိတော ဟောတိ… ဟမ္မိယံ ကာရာပိတံ ဟောတိ… ဂုဟာ ကာရာပိတာ ဟောတိ… ပရိဝေဏံ ကာရာပိတံ ဟောတိ… ကောဋ္ဌကော ကာရာပိတော ဟောတိ… ဥပဋ္ဌာနသာလာ ကာရာပိတာ ဟောတိ… အဂ္ဂိသာလာ ကာရာပိတာ ဟောတိ… ရသဝတီ ကာရာပိတာ ဟောတိ… စင်္ကမော ကာရာပိတော ဟောတိ… စင်္ကမနသာလာ ကာရာပိတာ ဟောတိ… ဥဒပါနော ကာရာပိတော ဟောတိ… ဥဒပါနသာလာ ကာရာပိတာ ဟောတိ… ပေါက္ခရဏီ ကာရာပိတာ ဟောတိ… မဏ္ဍပေါ ကာရာပိတော ဟောတိ… အာရာမော ကာရာပိတော ဟောတိ … အာရာမဝတ္ထု ကာရာပိတံ ဟောတိ… ပုတ္တဿ ဝါ ဝါရေယျံ ဟောတိ… ဓီတုယာ ဝါ ဝါရေယျံ ဟောတိ… ဂိလာနော ဝါ ဟောတိ… အဘိညာတံ ဝါ သုတ္တန္တံ ဘဏတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘အာဂစ္ဆန္တု ဘဒန္တာ၊ ဣမံ သုတ္တန္တံ ပရိယာပုဏိဿန္တိ၊ ပုရာယံ သုတ္တန္တော န ပလုဇ္ဇတီ’တိ။ အညတရံ ဝါ ပနဿ ကိစ္စံ ဟောတိ – ကရဏီယံ ဝါ၊ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု ဘဒန္တာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

၁၉၀။ ဣဓ ပန၊ ဘိက္ခဝေ၊ ဥပါသိကာယ သင်္ဃံ ဥဒ္ဒိဿ ဝိဟာရော ကာရာပိတော ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု အယျာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဥပါသိကာယ သင်္ဃံ ဥဒ္ဒိဿ အဍ္ဎယောဂေါ ကာရာပိတော ဟောတိ…ပေ… ပါသာဒေါ ကာရာပိတော ဟောတိ… ဟမ္မိယံ ကာရာပိတံ ဟောတိ… ဂုဟာ ကာရာပိတာ ဟောတိ… ပရိဝေဏံ ကာရာပိတံ ဟောတိ… ကောဋ္ဌကော ကာရာပိတော ဟောတိ… ဥပဋ္ဌာနသာလာ ကာရာပိတာ ဟောတိ… အဂ္ဂိသာလာ ကာရာပိတာ ဟောတိ… ကပ္ပိယကုဋိ ကာရာပိတာ ဟောတိ… ဝစ္စကုဋိ ကာရာပိတာ ဟောတိ… စင်္ကမော ကာရာပိတော ဟောတိ… စင်္ကမနသာလာ ကာရာပိတာ ဟောတိ… ဥဒပါနော ကာရာပိတော ဟောတိ… ဥဒပါနသာလာ ကာရာပိတာ ဟောတိ… ဇန္တာဃရံ ကာရာပိတံ ဟောတိ… ဇန္တာဃရသာလာ ကာရာပိတာ ဟောတိ… ပေါက္ခရဏီ ကာရာပိတာ ဟောတိ… မဏ္ဍပေါ ကာရာပိတော ဟောတိ… အာရာမော ကာရာပိတော ဟောတိ… အာရာမဝတ္ထု ကာရာပိတံ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု အယျာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဥပါသိကာယ သမ္ဗဟုလေ ဘိက္ခူ ဥဒ္ဒိဿ…ပေ… ဧကံ ဘိက္ခုံ ဥဒ္ဒိဿ…ပေ… ဘိက္ခုနိသင်္ဃံ ဥဒ္ဒိဿ…ပေ… သမ္ဗဟုလာ ဘိက္ခုနိယော ဥဒ္ဒိဿ…ပေ… ဧကံ ဘိက္ခုနိံ ဥဒ္ဒိဿ…ပေ… သမ္ဗဟုလာ သိက္ခမာနာယော ဥဒ္ဒိဿ…ပေ… ဧကံ သိက္ခမာနံ ဥဒ္ဒိဿ…ပေ… သမ္ဗဟုလေ သာမဏေရေ ဥဒ္ဒိဿ…ပေ… ဧကံ သာမဏေရံ ဥဒ္ဒိဿ…ပေ… သမ္ဗဟုလာ သာမဏေရိယော ဥဒ္ဒိဿ…ပေ… ဧကံ သာမဏေရိံ ဥဒ္ဒိဿ…ပေ…။

၁၉၁။ ဣဓ ပန၊ ဘိက္ခဝေ၊ ဥပါသိကာယ အတ္တနော အတ္ထာယ နိဝေသနံ ကာရာပိတံ ဟောတိ…ပေ… သယနိဃရံ ကာရာပိတံ ဟောတိ… ဥဒေါသိတော ကာရာပိတော ဟောတိ… အဋ္ဋော ကာရာပိတော ဟောတိ… မာဠော ကာရာပိတော ဟောတိ… အာပဏော ကာရာပိတော ဟောတိ… အာပဏသာလာ ကာရာပိတာ ဟောတိ… ပါသာဒေါ ကာရာပိတော ဟောတိ… ဟမ္မိယံ ကာရာပိတံ ဟောတိ… ဂုဟာ ကာရာပိတာ ဟောတိ… ပရိဝေဏံ ကာရာပိတံ ဟောတိ… ကောဋ္ဌကော ကာရာပိတော ဟောတိ… ဥပဋ္ဌာနသာလာ ကာရာပိတာ ဟောတိ… အဂ္ဂိသာလာ ကာရာပိတာ ဟောတိ… ရသဝတီ ကာရာပိတာ ဟောတိ… စင်္ကမော ကာရာပိတော ဟောတိ… စင်္ကမနသာလာ ကာရာပိတာ ဟောတိ… ဥဒပါနော ကာရာပိတော ဟောတိ … ဥဒပါနသာလာ ကာရာပိတာ ဟောတိ… ပေါက္ခရဏီ ကာရာပိတာ ဟောတိ… မဏ္ဍပေါ ကာရာပိတော ဟောတိ… အာရာမော ကာရာပိတော ဟောတိ… အာရာမဝတ္ထု ကာရာပိတံ ဟောတိ… ပုတ္တဿ ဝါ ဝါရေယျံ ဟောတိ… ဓီတုယာ ဝါ ဝါရေယျံ ဟောတိ… ဂိလာနာ ဝါ ဟောတိ… အဘိညာတံ ဝါ သုတ္တန္တံ ဘဏတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု အယျာ၊ ဣမံ သုတ္တန္တံ ပရိယာပုဏိဿန္တိ၊ ပုရာယံ သုတ္တန္တော ပလုဇ္ဇတီ’’တိ။ အညတရံ ဝါ ပနဿာ ကိစ္စံ ဟောတိ ကရဏီယံ ဝါ၊ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အာဂစ္ဆန္တု အယျာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

၁၉၂။ ဣဓ ပန၊ ဘိက္ခဝေ၊ ဘိက္ခုနာ သင်္ဃံ ဥဒ္ဒိဿ…ပေ… ဘိက္ခုနိယာ သင်္ဃံ ဥဒ္ဒိဿ… သိက္ခမာနာယ သင်္ဃံ ဥဒ္ဒိဿ… သာမဏေရေန သင်္ဃံ ဥဒ္ဒိဿ… သာမဏေရိယာ သင်္ဃံ ဥဒ္ဒိဿ … သမ္ဗဟုလေ ဘိက္ခူ ဥဒ္ဒိဿ… ဧကံ ဘိက္ခုံ ဥဒ္ဒိဿ… ဘိက္ခုနိသင်္ဃံ ဥဒ္ဒိဿ… သမ္ဗဟုလာ ဘိက္ခုနိယော ဥဒ္ဒိဿ… ဧကံ ဘိက္ခုနိံ ဥဒ္ဒိဿ… သမ္ဗဟုလာ သိက္ခမာနာယော ဥဒ္ဒိဿ… ဧကံ သိက္ခမာနံ ဥဒ္ဒိဿ… သမ္ဗဟုလေ သာမဏေရေ ဥဒ္ဒိဿ… ဧကံ သာမဏေရံ ဥဒ္ဒိဿ… သမ္ဗဟုလာ သာမဏေရိယော ဥဒ္ဒိဿ… ဧကံ သာမဏေရိံ ဥဒ္ဒိဿ… အတ္တနော အတ္ထာယ ဝိဟာရော ကာရာပိတော ဟောတိ…ပေ… အဍ္ဎယောဂေါ ကာရာပိတော ဟောတိ… ပါသာဒေါ ကာရာပိတော ဟောတိ… ဟမ္မိယံ ကာရာပိတံ ဟောတိ… ဂုဟာ ကာရာပိတာ ဟောတိ… ပရိဝေဏံ ကာရာပိတံ ဟောတိ … ကောဋ္ဌကော ကာရာပိတော ဟောတိ… ဥပဋ္ဌာနသာလာ ကာရာပိတာ ဟောတိ… အဂ္ဂိသာလာ ကာရာပိတာ ဟောတိ… ကပ္ပိယကုဋိ ကာရာပိတာ ဟောတိ… စင်္ကမော ကာရာပိတော ဟောတိ… စင်္ကမနသာလာ ကာရာပိတာ ဟောတိ… ဥဒပါနော ကာရာပိတော ဟောတိ… ဥဒပါနသာလာ ကာရာပိတာ ဟောတိ… ပေါက္ခရဏီ ကာရာပိတာ ဟောတိ… မဏ္ဍပေါ ကာရာပိတော ဟောတိ… အာရာမော ကာရာပိတော ဟောတိ… အာရာမဝတ္ထု ကာရာပိတံ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ… ‘‘အာဂစ္ဆန္တု အယျာ၊ ဣစ္ဆာမိ ဒါနဉ္စ ဒါတုံ၊ ဓမ္မဉ္စ သောတုံ၊ ဘိက္ခူ စ ပဿိတု’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗောတိ။

သတ္တာဟကရဏီယာနုဇာနတာ နိဋ္ဌိတာ။

၁၁၀။ ပဉ္စန္နံ အပ္ပဟိတေပိ အနုဇာနနာ

၁၉၃။ တေန ခေါ ပန သမယေန အညတရော ဘိက္ခု ဂိလာနော ဟောတိ။ သော ဘိက္ခူနံ သန္တိကေ ဒူတံ ပါဟေသိ – ‘‘အဟဉှိ ဂိလာနော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ပဉ္စန္နံ သတ္တာဟကရဏီယေန အပ္ပဟိတေပိ ဂန္တုံ၊ ပဂေဝ ပဟိတေ။ ဘိက္ခုဿ၊ ဘိက္ခုနိယာ၊ သိက္ခမာနာယ၊ သာမဏေရဿ၊ သာမဏေရိယာ – အနုဇာနာမိ၊ ဘိက္ခဝေ၊ ဣမေသံ ပဉ္စန္နံ သတ္တာဟကရဏီယေန အပ္ပဟိတေပိ ဂန္တုံ၊ ပဂေဝ ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခု ဂိလာနော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂိလာနော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဂိလာနဘတ္တံ ဝါ ပရိယေသိဿာမိ၊ ဂိလာနုပဋ္ဌာကဘတ္တံ ဝါ ပရိယေသိဿာမိ၊ ဂိလာနဘေသဇ္ဇံ ဝါ ပရိယေသိဿာမိ၊ ပုစ္ဆိဿာမိ ဝါ၊ ဥပဋ္ဌဟိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ အနဘိရတိ ဥပ္ပန္နာ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အနဘိရတိ မေ ဥပ္ပန္နာ၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘အနဘိရတံ ဝူပကာသေဿာမိ ဝါ၊ ဝူပကာသာပေဿာမိ ဝါ၊ ဓမ္မကထံ ဝါဿ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ ကုက္ကုစ္စံ ဥပ္ပန္နံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘ကုက္ကုစ္စံ မေ ဥပ္ပန္နံ၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ကုက္ကုစ္စံ ဝိနောဒေဿာမိ ဝါ၊ ဝိနောဒါပေဿာမိ ဝါ၊ ဓမ္မကထံ ဝါဿ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ ဒိဋ္ဌိဂတံ ဥပ္ပန္နံ ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘ဒိဋ္ဌိဂတံ မေ ဥပ္ပန္နံ၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဒိဋ္ဌိဂတံ ဝိဝေစေဿာမိ ဝါ၊ ဝိဝေစာပေဿာမိ ဝါ၊ ဓမ္မကထံ ဝါဿ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခု ဂရုဓမ္မံ အဇ္ဈာပန္နော ဟောတိ ပရိဝါသာရဟော။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂရုဓမ္မံ အဇ္ဈာပန္နော ပရိဝါသာရဟော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ပရိဝါသဒါနံ ဥဿုက္ကံ ကရိဿာမိ ဝါ၊ အနုဿာဝေဿာမိ ဝါ၊ ဂဏပူရကော ဝါ ဘဝိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခု မူလာယ ပဋိကဿနာရဟော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ မူလာယ ပဋိကဿနာရဟော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘မူလာယ ပဋိကဿနံ ဥဿုက္ကံ ကရိဿာမိ ဝါ၊ အနုဿာဝေဿာမိ ဝါ၊ ဂဏပူရကော ဝါ ဘဝိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခု မာနတ္တာရဟော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ မာနတ္တာရဟော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘မာနတ္တဒါနံ ဥဿုက္ကံ ကရိဿာမိ ဝါ၊ အနုဿာဝေဿာမိ ဝါ၊ ဂဏပူရကော ဝါ ဘဝိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခု အဗ္ဘာနာရဟော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ အဗ္ဘာနာရဟော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘အဗ္ဘာနံ ဥဿုက္ကံ ကရိဿာမိ ဝါ၊ အနုဿာဝေဿာမိ ဝါ၊ ဂဏပူရကော ဝါ ဘဝိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ သင်္ဃော ကမ္မံ ကတ္တုကာမော ဟောတိ တဇ္ဇနီယံ ဝါ၊ နိယဿံ ဝါ၊ ပဗ္ဗာဇနီယံ ဝါ၊ ပဋိသာရဏီယံ ဝါ၊ ဥက္ခေပနီယံ ဝါ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘သင်္ဃော မေ ကမ္မံ ကတ္တုကာမော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ကိန္တိ နု ခေါ သင်္ဃော ကမ္မံ န ကရေယျ၊ လဟုကာယ ဝါ ပရိဏာမေယျာ’’တိ။ သတ္တာဟံ သန္နိဝတ္တော ကာတဗ္ဗော။

ကတံ ဝါ ပနဿ ဟောတိ သင်္ဃေန ကမ္မံ တဇ္ဇနီယံ ဝါ နိယဿံ ဝါ ပဗ္ဗာဇနီယံ ဝါ ပဋိသာရဏီယံ ဝါ ဥက္ခေပနီယံ ဝါ။ သော စေ ဘိက္ခူနံ သန္တိကေ ဒူတံ ပဟိဏေယျ ‘‘သင်္ဃော မေ ကမ္မံ အကာသိ၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ကိန္တိ နု ခေါ သမ္မာ ဝတ္တေယျ၊ လောမံ ပါတေယျ၊ နေတ္ထာရံ ဝတ္တေယျ၊ သင်္ဃော တံ ကမ္မံ ပဋိပ္ပဿမ္ဘေယျာ’’တိ။ သတ္တာဟံ သန္နိဝတ္တော ကာတဗ္ဗော။

၁၉၄။ ဣဓ ပန၊ ဘိက္ခဝေ၊ ဘိက္ခုနီ ဂိလာနာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂိလာနာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဂိလာနဘတ္တံ ဝါ ပရိယေသိဿာမိ၊ ဂိလာနုပဋ္ဌာကဘတ္တံ ဝါ ပရိယေသိဿာမိ၊ ဂိလာနဘေသဇ္ဇံ ဝါ ပရိယေသိဿာမိ၊ ပုစ္ဆိဿာမိ ဝါ၊ ဥပဋ္ဌဟိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုနိယာ အနဘိရတိ ဥပ္ပန္နာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အနဘိရတိ မေ ဥပ္ပန္နာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘အနဘိရတံ ဝူပကာသေဿာမိ ဝါ၊ ဝူပကာသာပေဿာမိ ဝါ၊ ဓမ္မကထံ ဝါဿာ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုနိယာ ကုက္ကုစ္စံ ဥပ္ပန္နံ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘ကုက္ကုစ္စံ မေ ဥပ္ပန္နံ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ကုက္ကုစ္စံ ဝိနောဒေဿာမိ ဝါ၊ ဝိနောဒါပေဿာမိ ဝါ၊ ဓမ္မကထံ ဝါဿာ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုနိယာ ဒိဋ္ဌိဂတံ ဥပ္ပန္နံ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘ဒိဋ္ဌိဂတံ မေ ဥပ္ပန္နံ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဒိဋ္ဌိဂတံ ဝိဝေစေဿာမိ ဝါ၊ ဝိဝေစာပေဿာမိ ဝါ၊ ဓမ္မကထံ ဝါဿာ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုနီ ဂရုဓမ္မံ အဇ္ဈာပန္နာ ဟောတိ မာနတ္တာရဟာ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂရုဓမ္မံ အဇ္ဈာပန္နာ မာနတ္တာရဟာ ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘မာနတ္တဒါနံ ဥဿုက္ကံ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုနီ မူလာယ ပဋိကဿနာရဟာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ မူလာယ ပဋိကဿနာရဟာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘မူလာယ ပဋိကဿနံ ဥဿုက္ကံ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုနီ အဗ္ဘာနာရဟာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ အဗ္ဘာနာရဟာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘အဗ္ဘာနံ ဥဿုက္ကံ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုနိယာ သင်္ဃော ကမ္မံ ကတ္တုကာမော ဟောတိ – တဇ္ဇနီယံ ဝါ၊ နိယဿံ ဝါ၊ ပဗ္ဗာဇနီယံ ဝါ၊ ပဋိသာရဏီယံ ဝါ၊ ဥက္ခေပနီယံ ဝါ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘သင်္ဃော မေ ကမ္မံ ကတ္တုကာမော၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ကိန္တိ နု ခေါ သင်္ဃော ကမ္မံ န ကရေယျ၊ လဟုကာယ ဝါ ပရိဏာမေယျာ’’တိ။ သတ္တာဟံ သန္နိဝတ္တော ကာတဗ္ဗော။

ကတံ ဝါ ပနဿာ ဟောတိ သင်္ဃေန ကမ္မံ – တဇ္ဇနီယံ ဝါ ၊ နိယဿံ ဝါ၊ ပဗ္ဗာဇနီယံ ဝါ၊ ပဋိသာရဏီယံ ဝါ၊ ဥက္ခေပနီယံ ဝါ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘သင်္ဃော မေ ကမ္မံ အကာသိ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ကိန္တိ နု ခေါ သမ္မာ ဝတ္တေယျ၊ လောမံ ပါတေယျ၊ နေတ္ထာရံ ဝတ္တေယျ၊ သင်္ဃော တံ ကမ္မံ ပဋိပ္ပဿမ္ဘေယျာ’’တိ။ သတ္တာဟံ သန္နိဝတ္တော ကာတဗ္ဗော။

၁၉၅။ ဣဓ ပန၊ ဘိက္ခဝေ၊ သိက္ခမာနာ ဂိလာနာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂိလာနာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ – ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဂိလာနဘတ္တံ ဝါ ပရိယေသိဿာမိ၊ ဂိလာနုပဋ္ဌာကဘတ္တံ ဝါ ပရိယေသိဿာမိ၊ ဂိလာနဘေသဇ္ဇံ ဝါ ပရိယေသိဿာမိ၊ ပုစ္ဆိဿာမိ ဝါ၊ ဥပဋ္ဌဟိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ သိက္ခမာနာယ အနဘိရတိ ဥပ္ပန္နာ ဟောတိ…ပေ… သိက္ခမာနာယ ကုက္ကုစ္စံ ဥပ္ပန္နံ ဟောတိ… သိက္ခမာနာယ ဒိဋ္ဌိဂတံ ဥပ္ပန္နံ ဟောတိ… သိက္ခမာနာယ သိက္ခာ ကုပိတာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘သိက္ခာ မေ ကုပိတာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘သိက္ခာသမာဒါနံ ဥဿုက္ကံ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ သိက္ခမာနာ ဥပသမ္ပဇ္ဇိတုကာမာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဥပသမ္ပဇ္ဇိတုကာမာ၊ အာဂစ္ဆန္တု အယျာ ၊ ဣစ္ဆာမိ အယျာနံ အာဂတ’’န္တိ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ဥပသမ္ပဒံ ဥဿုက္ကံ ကရိဿာမိ ဝါ၊ အနုဿာဝေဿာမိ ဝါ၊ ဂဏပူရကော ဝါ ဘဝိဿာမီတိ။ သတ္တာဟံ သန္နိဝတ္တော ကာတဗ္ဗော။

၁၉၆။ ဣဓ ပန၊ ဘိက္ခဝေ၊ သာမဏေရော ဂိလာနော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂိလာနော၊ အာဂစ္ဆန္တု ဘိက္ခူ ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဂိလာနဘတ္တံ ဝါ ပရိယေသိဿာမိ၊ ဂိလာနုပဋ္ဌာကဘတ္တံ ဝါ ပရိယေသိဿာမိ၊ ဂိလာနဘေသဇ္ဇံ ဝါ ပရိယေသိဿာမိ၊ ပုစ္ဆိဿာမိ ဝါ၊ ဥပဋ္ဌဟိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ သာမဏေရဿ အနဘိရတိ ဥပ္ပန္နာ ဟောတိ…ပေ… သာမဏေရဿ ကုက္ကုစ္စံ ဥပ္ပန္နံ ဟောတိ… သာမဏေရဿ ဒိဋ္ဌိဂတံ ဥပ္ပန္နံ ဟောတိ… သာမဏေရော ဝဿံ ပုစ္ဆိတုကာမော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဝဿံ ပုစ္ဆိတုကာမော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ပုစ္ဆိဿာမိ ဝါ၊ အာစိက္ခိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ သာမဏေရော ဥပသမ္ပဇ္ဇိတုကာမော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဥပသမ္ပဇ္ဇိတုကာမော၊ အာဂစ္ဆန္တု ဘိက္ခူ၊ ဣစ္ဆာမိ ဘိက္ခူနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဥပသမ္ပဒံ ဥဿုက္ကံ ကရိဿာမိ ဝါ၊ အနုဿာဝေဿာမိ ဝါ၊ ဂဏပူရကော ဝါ ဘဝိဿာမီ’’တိ။ သတ္တာဟံ သန္နိဝတ္တော ကာတဗ္ဗော။

၁၉၇။ ဣဓ ပန၊ ဘိက္ခဝေ၊ သာမဏေရီ ဂိလာနာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂိလာနာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဂိလာနဘတ္တံ ဝါ ပရိယေသိဿာမိ၊ ဂိလာနုပဋ္ဌာကဘတ္တံ ဝါ ပရိယေသိဿာမိ၊ ဂိလာနဘေသဇ္ဇံ ဝါ ပရိယေသိဿာမိ၊ ပုစ္ဆိဿာမိ ဝါ၊ ဥပဋ္ဌဟိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ သာမဏေရိယာ အနဘိရတိ ဥပ္ပန္နာ ဟောတိ…ပေ… သာမဏေရိယာ ကုက္ကုစ္စံ ဥပ္ပန္နံ ဟောတိ… သာမဏေရိယာ ဒိဋ္ဌိဂတံ ဥပ္ပန္နံ ဟောတိ… သာမဏေရီ ဝဿံ ပုစ္ဆိတုကာမာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဝဿံ ပုစ္ဆိတုကာမာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ပုစ္ဆိဿာမိ ဝါ၊ အာစိက္ခိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ သာမဏေရီ သိက္ခံ သမာဒိယိတုကာမာ ဟောတိ။ သာ စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ သိက္ခံ သမာဒိယိတုကာမာ၊ အာဂစ္ဆန္တု အယျာ၊ ဣစ္ဆာမိ အယျာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘သိက္ခာသမာဒါနံ ဥဿုက္ကံ ကရိဿာမီ’’တိ။ သတ္တာဟံ သန္နိဝတ္တော ကာတဗ္ဗောတိ။

ပဉ္စန္နံ အပ္ပဟိတေပိ အနုဇာနနာ နိဋ္ဌိတာ။

၁၁၁။ သတ္တန္နံ အပ္ပဟိတေပိ အနုဇာနနာ

၁၉၈။ တေန ခေါ ပန သမယေန အညတရဿ ဘိက္ခုနော မာတာ ဂိလာနာ ဟောတိ။ သာ ပုတ္တဿ သန္တိကေ ဒူတံ ပါဟေသိ – ‘‘အဟဉှိ ဂိလာနာ၊ အာဂစ္ဆတု မေ ပုတ္တော၊ ဣစ္ဆာမိ ပုတ္တဿ အာဂတ’’န္တိ။ အထ ခေါ တဿ ဘိက္ခုနော ဧတဒဟောသိ – ‘‘ဘဂဝတာ ပညတ္တံ သတ္တန္နံ သတ္တာဟကရဏီယေန ပဟိတေ ဂန္တုံ၊ န တွေဝ အပ္ပဟိတေ၊ ပဉ္စန္နံ သတ္တာဟကရဏီယေန အပ္ပဟိတေပိ ဂန္တုံ၊ ပဂေဝ ပဟိတေတိ။ အယဉ္စ မေ မာတာ ဂိလာနာ၊ သာ စ အနုပါသိကာ၊ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ သတ္တန္နံ သတ္တာဟကရဏီယေန အပ္ပဟိတေပိ ဂန္တုံ၊ ပဂေဝ ပဟိတေ။ ဘိက္ခုဿ၊ ဘိက္ခုနိယာ၊ သိက္ခမာနာယ၊ သာမဏေရဿ၊ သာမဏေရိယာ၊ မာတုယာ စ ပိတုဿ စ – အနုဇာနာမိ၊ ဘိက္ခဝေ၊ ဣမေသံ သတ္တန္နံ သတ္တာဟကရဏီယေန အပ္ပဟိတေပိ ဂန္တုံ၊ ပဂေဝ ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ မာတာ ဂိလာနာ ဟောတိ။ သာ စေ ပုတ္တဿ သန္တိကေ ဒူတံ ပဟိဏေယျ – ‘‘အဟဉှိ ဂိလာနာ၊ အာဂစ္ဆတု မေ ပုတ္တော၊ ဣစ္ဆာမိ ပုတ္တဿ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဂိလာနဘတ္တံ ဝါ ပရိယေသိဿာမိ၊ ဂိလာနုပဋ္ဌာကဘတ္တံ ဝါ ပရိယေသိဿာမိ၊ ဂိလာနဘေသဇ္ဇံ ဝါ ပရိယေသိဿာမိ၊ ပုစ္ဆိဿာမိ ဝါ၊ ဥပဋ္ဌဟိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ ပိတာ ဂိလာနော ဟောတိ။ သော စေ ပုတ္တဿ သန္တိကေ ဒူတံ ပဟိဏေယျ – ‘‘အဟဉှိ ဂိလာနော၊ အာဂစ္ဆတု မေ ပုတ္တော၊ ဣစ္ဆာမိ ပုတ္တဿ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ အပ္ပဟိတေပိ၊ ပဂေဝ ပဟိတေ – ‘‘ဂိလာနဘတ္တံ ဝါ ပရိယေသိဿာမိ၊ ဂိလာနုပဋ္ဌာကဘတ္တံ ဝါ ပရိယေသိဿာမိ၊ ဂိလာနဘေသဇ္ဇံ ဝါ ပရိယေသိဿာမိ၊ ပုစ္ဆိဿာမိ ဝါ၊ ဥပဋ္ဌဟိဿာမိ ဝါ’’တိ။ သတ္တာဟံ သန္နိဝတ္တော ကာတဗ္ဗော။

သတ္တန္နံ အပ္ပဟိတေပိ အနုဇာနနာ နိဋ္ဌိတာ။

၁၁၂။ ပဟိတေယေဝ အနုဇာနနာ

၁၉၉။ ဣဓ ပန၊ ဘိက္ခဝေ၊ ဘိက္ခုဿ ဘာတာ ဂိလာနော ဟောတိ။ သော စေ ဘာတုနော သန္တိကေ ဒူတံ ပဟိဏေယျ – ‘‘အဟဉှိ ဂိလာနော၊ အာဂစ္ဆတု မေ ဘာတာ၊ ဣစ္ဆာမိ ဘာတုနော အာဂတ’’န္တိ၊ ဂန္တဗ္ဗံ၊ ဘိက္ခဝေ ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ ဘဂိနီ ဂိလာနာ ဟောတိ။ သာ စေ ဘာတုနော သန္တိကေ ဒူတံ ပဟိဏေယျ – ‘‘အဟဉှိ ဂိလာနာ၊ အာဂစ္ဆတု မေ ဘာတာ၊ ဣစ္ဆာမိ ဘာတုနော အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဿ ဉာတကော ဂိလာနော ဟောတိ။ သော စေ ဘိက္ခုဿ သန္တိကေ ဒူတံ ပဟိဏေယျ – ‘‘အဟဉှိ ဂိလာနော၊ အာဂစ္ဆတု ဘဒန္တော၊ ဣစ္ဆာမိ ဘဒန္တဿ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

ဣဓ ပန၊ ဘိက္ခဝေ၊ ဘိက္ခုဂတိကော ဂိလာနော ဟောတိ။ သော စေ ဘိက္ခူနံ သန္တိကေ ဒူတံ ပဟိဏေယျ – ‘‘အဟဉှိ ဂိလာနော၊ အာဂစ္ဆန္တု ဘဒန္တာ၊ ဣစ္ဆာမိ ဘဒန္တာနံ အာဂတ’’န္တိ၊ ဂန္တဗ္ဗံ၊ ဘိက္ခဝေ၊ သတ္တာဟကရဏီယေန၊ ပဟိတေ၊ န တွေဝ အပ္ပဟိတေ။ သတ္တာဟံ သန္နိဝတ္တော ကာတဗ္ဗော။

တေန ခေါ ပန သမယေန သင်္ဃဿ ဝိဟာရော ဥန္ဒြိယတိ။ အညတရေန ဥပါသကေန အရညေ ဘဏ္ဍံ ဆေဒါပိတံ ဟောတိ။ သော ဘိက္ခူနံ သန္တိကေ ဒူတံ ပါဟေသိ – ‘‘သစေ ဘဒန္တာ တံ ဘဏ္ဍံ အာဝဟာပေယျုံ၊ ဒဇ္ဇာဟံ တံ ဘဏ္ဍ’’န္တိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ သင်္ဃကရဏီယေန ဂန္တုံ။ သတ္တာဟံ သန္နိဝတ္တော ကာတဗ္ဗောတိ။

ပဟိတေယေဝ အနုဇာနနာ နိဋ္ဌိတာ။

ဝဿာဝါသဘာဏဝါရော နိဋ္ဌိတော။

၁၁၃။ အန္တရာယေ အနာပတ္တိဝဿစ္ဆေဒဝါရော

၂၀၀။ တေန ခေါ ပန သမယေန ကောသလေသု ဇနပဒေ အညတရသ္မိံ အာဝါသေ ဝဿူပဂတာ ဘိက္ခူ ဝါဠေဟိ ဥဗ္ဗာဠှာ ဟောန္တိ။ ဂဏှိံသုပိ ပရိပါတိံသုပိ။ ဘဂဝတော ဧတမတ္ထံ အာရောစေသုံ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ ဝါဠေဟိ ဥဗ္ဗာဠှာ ဟောန္တိ။ ဂဏှန္တိပိ ပရိပါတေန္တိပိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ သရီသပေဟိ ဥဗ္ဗာဠှာ ဟောန္တိ။ ဍံသန္တိပိ ပရိပါတေန္တိပိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ စောရေဟိ ဥဗ္ဗာဠှာ ဟောန္တိ။ ဝိလုမ္ပန္တိပိ အာကောဋေန္တိပိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ ပိသာစေဟိ ဥဗ္ဗာဠှာ ဟောန္တိ။ အာဝိသန္တိပိ ဟနန္တိပိ [ဩဇမ္ပိ ဟရန္တိ (သီ။)၊ ဟရန္တိပိ (သျာ။)]။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာနံ ဘိက္ခူနံ ဂါမော အဂ္ဂိနာ ဒဍ္ဎော ဟောတိ။ ဘိက္ခူ ပိဏ္ဍကေန ကိလမန္တိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာနံ ဘိက္ခူနံ သေနာသနံ အဂ္ဂိနာ ဒဍ္ဎံ ဟောတိ။ ဘိက္ခူ သေနာသနေန ကိလမန္တိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာနံ ဘိက္ခူနံ ဂါမော ဥဒကေန ဝူဠှော ဟောတိ။ ဘိက္ခူ ပိဏ္ဍကေန ကိလမန္တိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာနံ ဘိက္ခူနံ သေနာသနံ ဥဒကေန ဝူဠှံ ဟောတိ။ ဘိက္ခူ သေနာသနေန ကိလမန္တိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿာတိ။

၂၀၁။ တေန ခေါ ပန သမယေန အညတရသ္မိံ အာဝါသေ ဝဿူပဂတာနံ ဘိက္ခူနံ ဂါမော စောရေဟိ ဝုဋ္ဌာသိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ယေန ဂါမော တေန ဂန္တုန္တိ။

ဂါမော ဒွေဓာ ဘိဇ္ဇိတ္ထ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ယေန ဗဟုတရာ တေန ဂန္တုန္တိ။

ဗဟုတရာ အဿဒ္ဓါ ဟောန္တိ အပ္ပသန္နာ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ယေန သဒ္ဓါ ပသန္နာ တေန ဂန္တုန္တိ။

တေန ခေါ ပန သမယေန ကောသလေသု ဇနပဒေ အညတရသ္မိံ အာဝါသေ ဝဿူပဂတာ ဘိက္ခူ န လဘိံသု လူခဿ ဝါ ပဏီတဿ ဝါ ဘောဇနဿ ယာဝဒတ္ထံ ပါရိပူရိံ။ ဘဂဝတော ဧတမတ္ထံ အာရောစေသုံ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ န လဘန္တိ လူခဿ ဝါ ပဏီတဿ ဝါ ဘောဇနဿ ယာဝဒတ္ထံ ပါရိပူရိံ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ လဘန္တိ လူခဿ ဝါ ပဏီတဿ ဝါ ဘောဇနဿ ယာဝဒတ္ထံ ပါရိပူရိံ၊ န လဘန္တိ သပ္ပာယာနိ ဘောဇနာနိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ လဘန္တိ လူခဿ ဝါ ပဏီတဿ ဝါ ဘောဇနဿ ယာဝဒတ္ထံ ပါရိပူရိံ၊ လဘန္တိ သပ္ပာယာနိ ဘောဇနာနိ ၊ န လဘန္တိ သပ္ပာယာနိ ဘေသဇ္ဇာနိ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတာ ဘိက္ခူ လဘန္တိ လူခဿ ဝါ ပဏီတဿ ဝါ ဘောဇနဿ ယာဝဒတ္ထံ ပါရိပူရိံ၊ လဘန္တိ သပ္ပာယာနိ ဘောဇနာနိ၊ လဘန္တိ သပ္ပာယာနိ ဘေသဇ္ဇာနိ၊ န လဘန္တိ ပတိရူပံ ဥပဋ္ဌာကံ။ ဧသေဝ အန္တရာယောတိ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတံ ဘိက္ခုံ ဣတ္ထီ နိမန္တေတိ – ‘‘ဧဟိ၊ ဘန္တေ၊ ဟိရညံ ဝါ တေ ဒေမိ၊ သုဝဏ္ဏံ ဝါ တေ ဒေမိ၊ ခေတ္တံ ဝါ တေ ဒေမိ၊ ဝတ္ထုံ ဝါ တေ ဒေမိ၊ ဂါဝုံ ဝါ တေ ဒေမိ၊ ဂါဝိံ ဝါ တေ ဒေမိ၊ ဒါသံ ဝါ တေ ဒေမိ၊ ဒါသိံ ဝါ တေ ဒေမိ၊ ဓီတရံ ဝါ တေ ဒေမိ ဘရိယတ္ထာယ၊ အဟံ ဝါ တေ ဘရိယာ ဟောမိ၊ အညံ ဝါ တေ ဘရိယံ အာနေမီ’’တိ။ တတြ စေ ဘိက္ခုနော ဧဝံ ဟောတိ၊ ‘လဟုပရိဝတ္တံ ခေါ စိတ္တံ ဝုတ္တံ ဘဂဝတာ၊ သိယာပိ မေ ဗြဟ္မစရိယဿ အန္တရာယော’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတံ ဘိက္ခုံ ဝေသီ နိမန္တေတိ…ပေ… ထုလ္လကုမာရီ နိမန္တေတိ… ပဏ္ဍကော နိမန္တေတိ… ဉာတကာ နိမန္တေန္တိ… ရာဇာနော နိမန္တေန္တိ… စောရာ နိမန္တေန္တိ… ဓုတ္တာ နိမန္တေန္တိ – ‘‘ဧဟိ၊ ဘန္တေ၊ ဟိရညံ ဝါ တေ ဒေမ၊ သုဝဏ္ဏံ ဝါ တေ ဒေမ၊ ခေတ္တံ ဝါ တေ ဒေမ၊ ဝတ္ထုံ ဝါ တေ ဒေမ ၊ ဂါဝုံ ဝါ တေ ဒေမ၊ ဂါဝိံ ဝါ တေ ဒေမ၊ ဒါသံ ဝါ တေ ဒေမ၊ ဒါသိံ ဝါ တေ ဒေမ၊ ဓီတရံ ဝါ တေ ဒေမ ဘရိယတ္ထာယ၊ အညံ ဝါ တေ ဘရိယံ အာနေမာ’’တိ။ တတြ စေ ဘိက္ခုနော ဧဝံ ဟောတိ၊ ‘လဟုပရိဝတ္တံ ခေါ စိတ္တံ ဝုတ္တံ ဘဂဝတာ၊ သိယာပိ မေ ဗြဟ္မစရိယဿ အန္တရာယော’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု အဿာမိကံ နိဓိံ ပဿတိ။ တတြ စေ ဘိက္ခုနော ဧဝံ ဟောတိ၊ ‘လဟုပရိဝတ္တံ ခေါ စိတ္တံ ဝုတ္တံ ဘဂဝတာ၊ သိယာပိ မေ ဗြဟ္မစရိယဿ အန္တရာယော’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

အန္တရာယေ အနာပတ္တိဝဿစ္ဆေဒဝါရော နိဋ္ဌိတော။

၁၁၄။ သင်္ဃဘေဒေ အနာပတ္တိဝဿစ္ဆေဒဝါရော

၂၀၂။ ဣဓ ပန၊ ဘိက္ခဝေ၊ ဝဿူပဂတော ဘိက္ခု ပဿတိ သမ္ဗဟုလေ ဘိက္ခူ သင်္ဃဘေဒါယ ပရက္ကမန္တေ။ တတြ စေ ဘိက္ခုနော ဧဝံ ဟောတိ၊ ‘ဂရုကော ခေါ သင်္ဃဘေဒေါ ဝုတ္တော ဘဂဝတာ၊ မာ မယိ သမ္မုခီဘူတေ သင်္ဃော ဘိဇ္ဇီ’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလာ ဘိက္ခူ သင်္ဃဘေဒါယ ပရက္ကမန္တီ’’တိ။ တတြ စေ ဘိက္ခုနော ဧဝံ ဟောတိ၊ ‘ဂရုကော ခေါ သင်္ဃဘေဒေါ ဝုတ္တော ဘဂဝတာ၊ မာ မယိ သမ္မုခီဘူတေ သင်္ဃော ဘိဇ္ဇီ’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလာ ဘိက္ခူ သင်္ဃဘေဒါယ ပရက္ကမန္တီ’’တိ။ တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ မိတ္တာ။ တျာဟံ ဝက္ခာမိ ‘ဂရုကော ခေါ၊ အာဝုသော၊ သင်္ဃဘေဒေါ ဝုတ္တော ဘဂဝတာ၊ မာယသ္မန္တာနံ သင်္ဃဘေဒေါ ရုစ္စိတ္ထာ’တိ။ ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလာ ဘိက္ခူ သင်္ဃဘေဒါယ ပရက္ကမန္တီ’’တိ။ တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ န မိတ္တာ၊ အပိ စ ယေ တေသံ မိတ္တာ၊ တေ မေ မိတ္တာ။ တျာဟံ ဝက္ခာမိ။ တေ ဝုတ္တာ တေ ဝက္ခန္တိ ‘ဂရုကော ခေါ၊ အာဝုသော၊ သင်္ဃဘေဒေါ ဝုတ္တော ဘဂဝတာ၊ မာယသ္မန္တာနံ သင်္ဃဘေဒေါ ရုစ္စိတ္ထာ’တိ။ ကရိဿန္တိ တေသံ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလေဟိ ဘိက္ခူဟိ သင်္ဃော ဘိန္နော’’တိ။ တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ မိတ္တာ။ တျာဟံ ဝက္ခာမိ ‘ဂရုကော ခေါ၊ အာဝုသော၊ သင်္ဃဘေဒေါ ဝုတ္တော ဘဂဝတာ၊ မာယသ္မန္တာနံ သင်္ဃဘေဒေါ ရုစ္စိတ္ထာ’တိ။ ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလေဟိ ဘိက္ခူဟိ သင်္ဃော ဘိန္နော’’တိ။ တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ န မိတ္တာ၊ အပိ စ၊ ယေ တေသံ မိတ္တာ တေ မေ မိတ္တာ။ တျာဟံ ဝက္ခာမိ။ တေ ဝုတ္တာ တေ ဝက္ခန္တိ ‘ဂရုကော ခေါ၊ အာဝုသော၊ သင်္ဃဘေဒေါ ဝုတ္တော ဘဂဝတာ၊ မာယသ္မန္တာနံ သင်္ဃဘေဒေါ ရုစ္စိတ္ထာ’တိ။ ကရိဿန္တိ တေသံ ဝစနံ၊ သုဿူသိဿန္တိ ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာ ဘိက္ခုနိယော သင်္ဃဘေဒါယ ပရက္ကမန္တီ’’တိ။ တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော မိတ္တာ။ တာဟံ ဝက္ခာမိ ‘ဂရုကော ခေါ၊ ဘဂိနိယော၊ သင်္ဃဘေဒေါ ဝုတ္တော ဘဂဝတာ၊ မာ ဘဂိနီနံ သင်္ဃဘေဒေါ ရုစ္စိတ္ထာ’တိ။ ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာ ဘိက္ခုနိယော သင်္ဃဘေဒါယ ပရက္ကမန္တီ’’တိ။ တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော န မိတ္တာ။ အပိ စ၊ ယာ တာသံ မိတ္တာ၊ တာ မေ မိတ္တာ။ တာဟံ ဝက္ခာမိ။ တာ ဝုတ္တာ တာ ဝက္ခန္တိ ‘ဂရုကော ခေါ၊ ဘဂိနိယော၊ သင်္ဃဘေဒေါ ဝုတ္တော ဘဂဝတာ။ မာ ဘဂိနီနံ သင်္ဃဘေဒေါ ရုစ္စိတ္ထာ’တိ။ ကရိဿန္တိ တာသံ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿတိ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာဟိ ဘိက္ခုနီဟိ သင်္ဃော ဘိန္နော’’တိ။ တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော မိတ္တာ။ တာဟံ ဝက္ခာမိ ‘ဂရုကော ခေါ၊ ဘဂိနိယော၊ သင်္ဃဘေဒေါ ဝုတ္တော ဘဂဝတာ။ မာ ဘဂိနီနံ သင်္ဃဘေဒေါ ရုစ္စိတ္ထာ’တိ။ ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿတိ။

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာဟိ ဘိက္ခုနီဟိ သင်္ဃော ဘိန္နော’’တိ။ တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော န မိတ္တာ။ အပိ စ၊ ယာ တာသံ မိတ္တာ တာ မေ မိတ္တာ။ တာဟံ ဝက္ခာမိ။ တာ ဝုတ္တာ တာ ဝက္ခန္တိ ‘ဂရုကော ခေါ၊ ဘဂိနိယော [အယျာယော (သီ။)]၊ သင်္ဃဘေဒေါ ဝုတ္တော ဘဂဝတာ၊ မာ ဘဂိနီနံ [အယျာနံ (သီ။)] သင်္ဃဘေဒေါ ရုစ္စိတ္ထာ’တိ။ ကရိဿန္တိ တာသံ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ။ အနာပတ္တိ ဝဿစ္ဆေဒဿာတိ။

သင်္ဃဘေဒေ အနာပတ္တိဝဿစ္ဆေဒဝါရော နိဋ္ဌိတော။

၁၁၅။ ဝဇာဒီသု ဝဿူပဂမနံ

၂၀၃။ တေန ခေါ ပန သမယေန အညတရော ဘိက္ခု ဝဇေ ဝဿံ ဥပဂန္တုကာမော ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ဝဇေ ဝဿံ ဥပဂန္တုန္တိ။ ဝဇော ဝုဋ္ဌာသိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ ယေန ဝဇော တေန ဂန္တုန္တိ။

တေန ခေါ ပန သမယေန အညတရော ဘိက္ခု ဥပကဋ္ဌာယ ဝဿူပနာယိကာယ သတ္ထေန ဂန္တုကာမော ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ သတ္ထေ ဝဿံ ဥပဂန္တုန္တိ။

တေန ခေါ ပန သမယေန အညတရော ဘိက္ခု ဥပကဋ္ဌာယ ဝဿူပနာယိကာယ နာဝါယ ဂန္တုကာမော ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ၊ ဘိက္ခဝေ၊ နာဝါယ ဝဿံ ဥပဂန္တုန္တိ။

ဝဇာဒီသု ဝဿူပဂမနံ နိဋ္ဌိတံ။

၁၁၆။ ဝဿံ အနုပဂန္တဗ္ဗဋ္ဌာနာနိ

၂၀၄။ တေန ခေါ ပန သမယေန ဘိက္ခူ ရုက္ခသုသိရေ ဝဿံ ဥပဂစ္ဆန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘သေယျထာပိ ပိသာစိလ္လိကာ’’တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ ရုက္ခသုသိရေ ဝဿံ ဥပဂန္တဗ္ဗံ။ ယော ဥပဂစ္ဆေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ဘိက္ခူ ရုက္ခဝိဋဘိယာ ဝဿံ ဥပဂစ္ဆန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘သေယျထာပိ မိဂလုဒ္ဒကာ’’တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ ရုက္ခဝိဋဘိယာ ဝဿံ ဥပဂန္တဗ္ဗံ။ ယော ဥပဂစ္ဆေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ဘိက္ခူ အဇ္ဈောကာသေ ဝဿံ ဥပဂစ္ဆန္တိ။ ဒေဝေ ဝဿန္တေ ရုက္ခမူလမ္ပိ နိဗ္ဗကောသမ္ပိ ဥပဓာဝန္တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ အဇ္ဈောကာသေ ဝဿံ ဥပဂန္တဗ္ဗံ။ ယော ဥပဂစ္ဆေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ဘိက္ခူ အသေနာသနိကာ ဝဿံ ဥပဂစ္ဆန္တိ။ သီတေနပိ ကိလမန္တိ၊ ဥဏှေနပိ ကိလမန္တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ အသေနာသနိကေန ဝဿံ ဥပဂန္တဗ္ဗံ။ ယော ဥပဂစ္ဆေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ဘိက္ခူ ဆဝကုဋိကာယ ဝဿံ ဥပဂစ္ဆန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘သေယျထာပိ ဆဝဍာဟကာ’’တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ ဆဝကုဋိကာယ ဝဿံ ဥပဂန္တဗ္ဗံ။ ယော ဥပဂစ္ဆေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ဘိက္ခူ ဆတ္တေ ဝဿံ ဥပဂစ္ဆန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘သေယျထာပိ ဂေါပါလကာ’’တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ ဆတ္တေ ဝဿံ ဥပဂန္တဗ္ဗံ။ ယော ဥပဂစ္ဆေယျ၊ အာပတ္တိ ဒုက္ကဋဿာတိ။

တေန ခေါ ပန သမယေန ဘိက္ခူ စာဋိယာ ဝဿံ ဥပဂစ္ဆန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘သေယျထာပိ တိတ္ထိယာ’’တိ။ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ စာဋိယာ ဝဿံ ဥပဂန္တဗ္ဗံ။ ယော ဥပဂစ္ဆေယျ၊ အာပတ္တိ ဒုက္ကဋဿာတိ။

ဝဿံ အနုပဂန္တဗ္ဗဋ္ဌာနာနိ နိဋ္ဌိတာ။

၁၁၇။ အဓမ္မိကကတိကာ

၂၀၅။ တေန ခေါ ပန သမယေန သာဝတ္ထိယာ သင်္ဃေန ဧဝရူပါ ကတိကာ ကတာ ဟောတိ – အန္တရာဝဿံ န ပဗ္ဗာဇေတဗ္ဗန္တိ။ ဝိသာခါယ မိဂါရမာတုယာ နတ္တာ ဘိက္ခူ ဥပသင်္ကမိတွာ ပဗ္ဗဇ္ဇံ ယာစိ။ ဘိက္ခူ ဧဝမာဟံသု – ‘‘သင်္ဃေန ခေါ၊ အာဝုသော၊ ဧဝရူပါ ကတိကာ ကတာ ‘အန္တရာဝဿံ န ပဗ္ဗာဇေတဗ္ဗ’န္တိ။ အာဂမေဟိ၊ အာဝုသော၊ ယာဝ ဘိက္ခူ ဝဿံ ဝသန္တိ။ ဝဿံဝုဋ္ဌာ ပဗ္ဗာဇေဿန္တီ’’တိ။ အထ ခေါ တေ ဘိက္ခူ ဝဿံဝုဋ္ဌာ ဝိသာခါယ မိဂါရမာတုယာ နတ္တာရံ ဧတဒဝေါစုံ – ‘‘ဧဟိ၊ ဒါနိ၊ အာဝုသော၊ ပဗ္ဗဇာဟီ’’တိ။ သော ဧဝမာဟ – ‘‘သစာဟံ၊ ဘန္တေ၊ ပဗ္ဗဇိတော အဿံ၊ အဘိရမေယျာမဟံ [အဘိရမေယျံ စာဟံ (သီ။)]။ န ဒါနာဟံ၊ ဘန္တေ၊ ပဗ္ဗဇိဿာမီ’’တိ။ ဝိသာခါ မိဂါရမာတာ ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ အယျာ ဧဝရူပံ ကတိကံ ကရိဿန္တိ ‘န အန္တရာဝဿံ ပဗ္ဗာဇေတဗ္ဗ’န္တိ။ ကံ ကာလံ ဓမ္မော န စရိတဗ္ဗော’’တိ? အဿောသုံ ခေါ ဘိက္ခူ ဝိသာခါယ မိဂါရမာတုယာ ဥဇ္ဈာယန္တိယာ ခိယျန္တိယာ ဝိပါစေန္တိယာ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ န၊ ဘိက္ခဝေ၊ ဧဝရူပါ ကတိကာ ကာတဗ္ဗာ – ‘န အန္တရာဝဿံ ပဗ္ဗာဇေတဗ္ဗ’န္တိ။ ယော ကရေယျ၊ အာပတ္တိ ဒုက္ကဋဿာတိ။

အဓမ္မိကကတိကာ နိဋ္ဌိတာ။

၁၁၈။ ပဋိဿဝဒုက္ကဋာပတ္တိ

၂၀၆။ တေန ခေါ ပန သမယေန အာယသ္မတာ ဥပနန္ဒေန သကျပုတ္တေန ရညော ပသေနဒိဿ ကောသလဿ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော အဒ္ဒသ အန္တရာမဂ္ဂေ ဒွေ အာဝါသေ ဗဟုစီဝရကေ။ တဿ ဧတဒဟောသိ – ‘‘ယံနူနာဟံ ဣမေသု ဒွီသု အာဝါသေသု ဝဿံ ဝသေယျံ။ ဧဝံ မေ ဗဟုံ စီဝရံ [ဗဟုစီဝရံ (က။)] ဥပ္ပဇ္ဇိဿတီ’’တိ။ သော တေသု ဒွီသု အာဝါသေသု ဝဿံ ဝသိ။ ရာဇာ ပသေနဒိ ကောသလော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ အယျော ဥပနန္ဒော သကျပုတ္တော အမှာကံ ဝဿာဝါသံ ပဋိဿုဏိတွာ ဝိသံဝါဒေဿတိ။ နနု ဘဂဝတာ အနေကပရိယာယေန မုသာဝါဒေါ ဂရဟိတော၊ မုသာဝါဒါ ဝေရမဏီ ပသတ္ထာ’’တိ။ အဿောသုံ ခေါ ဘိက္ခူ ရညော ပသေနဒိဿ ကောသလဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥပနန္ဒော သကျပုတ္တော ရညော ပသေနဒိဿ ကောသလဿ ဝဿာဝါသံ ပဋိဿုဏိတွာ ဝိသံဝါဒေဿတိ။ နနု ဘဂဝတာ အနေကပရိယာယေန မုသာဝါဒေါ ဂရဟိတော၊ မုသာဝါဒါ ဝေရမဏီ ပသတ္ထာ’’တိ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ…ပေ… အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ အာယသ္မန္တံ ဥပနန္ဒံ သကျပုတ္တံ ပဋိပုစ္ဆိ – ‘‘သစ္စံ ကိရ တွံ၊ ဥပနန္ဒ၊ ရညော ပသေနဒိဿ ကောသလဿ ဝဿာဝါသံ ပဋိဿုဏိတွာ ဝိသံဝါဒေသီ’’တိ? ‘‘သစ္စံ၊ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ…ပေ… ကထဉှိ နာမ တွံ၊ မောဃပုရိသ၊ ရညော ပသေနဒိဿ ကောသလဿ ဝဿာဝါသံ ပဋိဿုဏိတွာ ဝိသံဝါဒေဿသိ။ နနု မယာ၊ မောဃပုရိသ၊ အနေကပရိယာယေန မုသာဝါဒေါ ဂရဟိတော၊ မုသာဝါဒါ ဝေရမဏီ ပသတ္ထာ။ နေတံ၊ မောဃပုရိသ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ –

၂၀၇။ ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ပဿတိ အန္တရာမဂ္ဂေ ဒွေ အာဝါသေ ဗဟုစီဝရကေ။ တဿ ဧဝံ ဟောတိ – ‘‘ယံနူနာဟံ ဣမေသု ဒွီသု အာဝါသေသု ဝဿံ ဝသေယျံ။ ဧဝံ မေ ဗဟုံ စီဝရံ ဥပ္ပဇ္ဇိဿတီ’’တိ။ သော တေသု ဒွီသု အာဝါသေသု ဝဿံ ဝသတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ [ပါဋိပဒေန (က။)] ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ အကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ သကရဏီယော ပက္ကမတိ။ တဿ ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ အကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ သကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ။ သော တံ သတ္တာဟံ ဗဟိဒ္ဓါ ဝီတိနာမေတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ ။ သော တံ သတ္တာဟံ အန္တော သန္နိဝတ္တံ ကရောတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ ပညာယတိ၊ ပဋိဿဝေ စ အနာပတ္တိ။

ဣဓ ပန၊ ဘိက္ခဝေ ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ ၊ ပရိဝေဏံ သမ္မဇ္ဇတိ။ သော သတ္တာဟံ အနာဂတာယ ပဝါရဏာယ သကရဏီယော ပက္ကမတိ။ အာဂစ္ဆေယျ ဝါ သော၊ ဘိက္ခဝေ၊ ဘိက္ခု တံ အာဝါသံ န ဝါ အာဂစ္ဆေယျ၊ တဿ၊ ဘိက္ခဝေ၊ ဘိက္ခုနော ပုရိမိကာ စ ပညာယတိ၊ ပဋိဿဝေ စ အနာပတ္တိ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂန္တွာ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ အကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပုရိမိကာယ။ သော တံ အာဝါသံ ဂန္တွာ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ သကရဏီယော ပက္ကမတိ…ပေ… သော ဒွီဟတီဟံ ဝသိတွာ အကရဏီယော ပက္ကမတိ…ပေ… သော ဒွီဟတီဟံ ဝသိတွာ သကရဏီယော ပက္ကမတိ…ပေ… သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ။ သော တံ သတ္တာဟံ ဗဟိဒ္ဓါ ဝီတိနာမေတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ…ပေ… သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ။ သော တံ သတ္တာဟံ အန္တော သန္နိဝတ္တံ ကရောတိ။ တဿ၊ ဘိက္ခဝေ၊ ဘိက္ခုနော ပုရိမိကာ စ ပညာယတိ၊ ပဋိဿဝေ စ အနာပတ္တိ…ပေ… သော သတ္တာဟံ အနာဂတာယ ပဝါရဏာယ သကရဏီယော ပက္ကမတိ။ အာဂစ္ဆေယျ ဝါ သော၊ ဘိက္ခဝေ၊ ဘိက္ခု တံ အာဝါသံ န ဝါ အာဂစ္ဆေယျ၊ တဿ၊ ဘိက္ခဝေ၊ ဘိက္ခုနော ပုရိမိကာ စ ပညာယတိ၊ ပဋိဿဝေ စ အနာပတ္တိ။

၂၀၈။ ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ အကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ သကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ အကရဏီယော ပက္ကမတိ ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ သကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ။ သော တံ သတ္တာဟံ ဗဟိဒ္ဓါ ဝီတိနာမေတိ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ။ သော တံ သတ္တာဟံ အန္တော သန္နိဝတ္တံ ကရောတိ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ ပညာယတိ၊ ပဋိဿဝေ စ အနာပတ္တိ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂစ္ဆန္တော ဗဟိဒ္ဓါ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော သတ္တာဟံ အနာဂတာယ ကောမုဒိယာ စာတုမာသိနိယာ သကရဏီယော ပက္ကမတိ။ အာဂစ္ဆေယျ ဝါ သော၊ ဘိက္ခဝေ၊ ဘိက္ခု တံ အာဝါသံ န ဝါ အာဂစ္ဆေယျ၊ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ ပညာယတိ၊ ပဋိဿဝေ စ အနာပတ္တိ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂန္တွာ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ အကရဏီယော ပက္ကမတိ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂန္တွာ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော တဒဟေဝ သကရဏီယော ပက္ကမတိ…ပေ… သော ဒွီဟတီဟံ ဝသိတွာ အကရဏီယော ပက္ကမတိ …ပေ… သော ဒွီဟတီဟံ ဝသိတွာ သကရဏီယော ပက္ကမတိ…ပေ… သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ။ သော တံ သတ္တာဟံ ဗဟိဒ္ဓါ ဝီတိနာမေတိ။ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ န ပညာယတိ၊ ပဋိဿဝေ စ အာပတ္တိ ဒုက္ကဋဿ…ပေ… သော ဒွီဟတီဟံ ဝသိတွာ သတ္တာဟကရဏီယေန ပက္ကမတိ။ သော တံ သတ္တာဟံ အန္တော သန္နိဝတ္တံ ကရောတိ။ တဿ ဘိက္ခဝေ၊ ဘိက္ခုနော ပစ္ဆိမိကာ စ ပညာယတိ၊ ပဋိဿဝေ စ အနာပတ္တိ။

ဣဓ ပန၊ ဘိက္ခဝေ၊ ဘိက္ခုနာ ဝဿာဝါသော ပဋိဿုတော ဟောတိ ပစ္ဆိမိကာယ။ သော တံ အာဝါသံ ဂန္တွာ ဥပေါသထံ ကရောတိ၊ ပါဋိပဒေ ဝိဟာရံ ဥပေတိ၊ သေနာသနံ ပညပေတိ၊ ပါနီယံ ပရိဘောဇနီယံ ဥပဋ္ဌာပေတိ၊ ပရိဝေဏံ သမ္မဇ္ဇတိ။ သော သတ္တာဟံ အနာဂတာယ ကောမုဒိယာ စာတုမာသိနိယာ သကရဏီယော ပက္ကမတိ။ အာဂစ္ဆေယျ ဝါ သော၊ ဘိက္ခဝေ၊ ဘိက္ခု တံ အာဝါသံ န ဝါ အာဂစ္ဆေယျ၊ တဿ၊ ဘိက္ခဝေ၊ ဘိက္ခုနော ပစ္ဆိမိကာ စ ပညာယတိ၊ ပဋိဿဝေ စ အနာပတ္တီတိ။

ပဋိဿဝဒုက္ကဋာပတ္တိ နိဋ္ဌိတာ။

ဝဿူပနာယိကက္ခန္ဓကော တတိယော။

၁၁၉။ တဿုဒ္ဒါနံ

ဥပဂန္တုံ ကဒါ စေဝ၊ ကတိ အန္တရာဝဿ စ၊

န ဣစ္ဆန္တိ စ သဉ္စိစ္စ၊ ဥက္ကဍ္ဎိတုံ ဥပါသကော။

ဂိလာနော မာတာ စ ပိတာ၊ ဘာတာ စ အထ ဉာတကော၊

ဘိက္ခုဂတိကော ဝိဟာရော၊ ဝါဠာ စာပိ သရီသပါ။

စောရော စေဝ ပိသာစာ စ၊ ဒဍ္ဎာ တဒုဘယေန စ၊

ဝူဠှောဒကေန ဝုဋ္ဌာသိ၊ ဗဟုတရာ စ ဒါယကာ။

လူခပ္ပဏီတသပ္ပာယ၊ ဘေသဇ္ဇုပဋ္ဌကေန စ၊

ဣတ္ထီ ဝေသီ ကုမာရီ စ၊ ပဏ္ဍကော ဉာတကေန စ။

ရာဇာ စောရာ ဓုတ္တာ နိဓိ၊ ဘေဒအဋ္ဌဝိဓေန [ဘေဒါ အဋ္ဌဝိဓေန (သီ။ သျာ။)] စ၊

ဝဇသတ္ထာ စ နာဝါ စ၊ သုသိရေ ဝိဋဘိယာ စ။

အဇ္ဈောကာသေ ဝဿာဝါသော၊ အသေနာသနိကေန စ၊

ဆဝကုဋိကာ ဆတ္တေ စ၊ စာဋိယာ စ ဥပေန္တိ တေ။

ကတိကာ ပဋိဿုဏိတွာ၊ ဗဟိဒ္ဓါ စ ဥပေါသထာ၊

ပုရိမိကာ ပစ္ဆိမိကာ၊ ယထာဉာယေန ယောဇယေ။

အကရဏီ ပက္ကမတိ၊ သကရဏီ တထေဝ စ၊

ဒွီဟတီဟာ စ ပုန စ [ဒွီဟတီဟံ ဝသိတွာန (သီ။)]၊ သတ္တာဟကရဏီယေန စ။

သတ္တာဟနာဂတာ စေဝ၊ အာဂစ္ဆေယျ န ဧယျ ဝါ၊

ဝတ္ထုဒ္ဒါနေ အန္တရိကာ၊ တန္တိမဂ္ဂံ နိသာမယေတိ။

ဣမမှိ ခန္ဓကေ ဝတ္ထူနိ ဒွေပဏ္ဏာသ။

ဝဿူပနာယိကက္ခန္ဓကော နိဋ္ဌိတော။