📜

အတ္ထာပတ္တိသမုဋ္ဌာနံ

၁။ ပါရာဇိကံ

၄၇၀။ အတ္ထာပတ္တိ အစိတ္တကော အာပဇ္ဇတိ၊ သစိတ္တကော ဝုဋ္ဌာတိ။ အတ္ထာပတ္တိ သစိတ္တကော အာပဇ္ဇတိ၊ အစိတ္တကော ဝုဋ္ဌာတိ။ အတ္ထာပတ္တိ အစိတ္တကော အာပဇ္ဇတိ၊ အစိတ္တကော ဝုဋ္ဌာတိ။ အတ္ထာပတ္တိ သစိတ္တကော အာပဇ္ဇတိ၊ သစိတ္တကော ဝုဋ္ဌာတိ။ အတ္ထာပတ္တိ ကုသလစိတ္တော အာပဇ္ဇတိ၊ ကုသလစိတ္တော ဝုဋ္ဌာတိ။ အတ္ထာပတ္တိ ကုသလစိတ္တော အာပဇ္ဇတိ၊ အကုသလစိတ္တော ဝုဋ္ဌာတိ။ အတ္ထာပတ္တိ ကုသလစိတ္တော အာပဇ္ဇတိ၊ အဗျာကတစိတ္တော ဝုဋ္ဌာတိ။ အတ္ထာပတ္တိ အကုသလစိတ္တော အာပဇ္ဇတိ၊ ကုသလစိတ္တော ဝုဋ္ဌာတိ။ အတ္ထာပတ္တိ အကုသလစိတ္တော အာပဇ္ဇတိ၊ အကုသလစိတ္တော ဝုဋ္ဌာတိ။ အတ္ထာပတ္တိ အကုသလစိတ္တော အာပဇ္ဇတိ၊ အဗျာကတစိတ္တော ဝုဋ္ဌာတိ။ အတ္ထာပတ္တိ အဗျာကတစိတ္တော အာပဇ္ဇတိ၊ ကုသလစိတ္တော ဝုဋ္ဌာတိ။ အတ္ထာပတ္တိ အဗျာကတစိတ္တော အာပဇ္ဇတိ၊ အကုသလစိတ္တော ဝုဋ္ဌာတိ။ အတ္ထာပတ္တိ အဗျာကတစိတ္တော အာပဇ္ဇတိ၊ အဗျာကတစိတ္တော ဝုဋ္ဌာတိ။

ပဌမံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? ပဌမံ ပါရာဇိကံ ဧကေန သမုဋ္ဌာနေန သမုဋ္ဌာတိ။ ကာယတော စ စိတ္တတော စ သမုဋ္ဌာတိ၊ န ဝါစတော။

ဒုတိယံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? ဒုတိယံ ပါရာဇိကံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ။

တတိယံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? တတိယံ ပါရာဇိကံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ။

စတုတ္ထံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? စတုတ္ထံ ပါရာဇိကံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ ၊ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ။

စတ္တာရော ပါရာဇိကာ နိဋ္ဌိတာ။

၂။ သင်္ဃာဒိသေသံ

၄၇၁။ ဥပက္ကမိတွာ အသုစိံ မောစေန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? ဥပက္ကမိတွာ အသုစိံ မောစေန္တဿ သင်္ဃာဒိသေသော ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ၊ န ဝါစတော။

မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တဿ သင်္ဃာဒိသေသော ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ၊ န ဝါစတော။

မာတုဂါမံ ဒုဋ္ဌုလ္လာဟိ ဝါစာဟိ ဩဘာသေန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? မာတုဂါမံ ဒုဋ္ဌုလ္လာဟိ ဝါစာဟိ ဩဘာသေန္တဿ သင်္ဃာဒိသေသော တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ။

မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသန္တဿ သင်္ဃာဒိသေသော တီဟိ သမုဋ္ဌာနေဟိ သမုဋ္ဌာတိ…ပေ…။

သဉ္စရိတ္တံ သမာပဇ္ဇန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? သဉ္စရိတ္တံ သမာပဇ္ဇန္တဿ သင်္ဃာဒိသေသော ဆဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ၊ န ဝါစတော န စိတ္တတော၊ သိယာ ဝါစတော သမုဋ္ဌာတိ၊ န ကာယတော န စိတ္တတော၊ သိယာ ကာယတော စ ဝါစတော စ သမုဋ္ဌာတိ၊ န စိတ္တတော၊ သိယာ ကာယတော စ စိတ္တတော စ သမုဋ္ဌာတိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ။

သညာစိကာယ ကုဋိံ ကာရာပေန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? သညာစိကာယ ကုဋိံ ကာရာပေန္တဿ သင်္ဃာဒိသေသော ဆဟိ သမုဋ္ဌာနေဟိ သမုဋ္ဌာတိ…ပေ…။

မဟလ္လကံ ဝိဟာရံ ကာရာပေန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? မဟလ္လကံ ဝိဟာရံ ကာရာပေန္တဿ သင်္ဃာဒိသေသော ဆဟိ သမုဋ္ဌာနေဟိ သမုဋ္ဌာတိ…ပေ…။

ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေန္တဿ သင်္ဃာဒိသေသော တီဟိ သမုဋ္ဌာနေဟိ သမုဋ္ဌာတိ…ပေ…။

ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေန္တဿ သင်္ဃာဒိသေသော တီဟိ သမုဋ္ဌာနေဟိ သမုဋ္ဌာတိ…ပေ…။

သင်္ဃဘေဒကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? သင်္ဃဘေဒကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သင်္ဃာဒိသေသော ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။

ဘေဒကာနုဝတ္တကာနံ ဘိက္ခူနံ ယာဝတတိယံ သမနုဘာသနာယ န ပဋိနိဿဇ္ဇန္တာနံ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? ဘေဒကာနုဝတ္တကာနံ ဘိက္ခူနံ ယာဝတတိယံ သမနုဘာသနာယ န ပဋိနိဿဇ္ဇန္တာနံ သင်္ဃာဒိသေသော ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။

ဒုဗ္ဗစဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? ဒုဗ္ဗစဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သင်္ဃာဒိသေသော ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။

ကုလဒူသကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သင်္ဃာဒိသေသော ကတိဟိ သမုဋ္ဌာနေဟိ သမုဋ္ဌာတိ? ကုလဒူသကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သင်္ဃာဒိသေသော ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။

တေရသ သင်္ဃာဒိသေသာ နိဋ္ဌိတာ။

၄၇၂။ …ပေ… အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ ဒုက္ကဋံ ကတိဟိ သမုဋ္ဌာနေဟိ သမုဋ္ဌာတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ ဒုက္ကဋံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ၊ န ဝါစတော။

သေခိယာ နိဋ္ဌိတာ။

၃။ ပါရာဇိကာဒိ

၄၇၃။ စတ္တာရော ပါရာဇိကာ ကတိဟိ သမုဋ္ဌာနေဟိ သမုဋ္ဌန္တိ? စတ္တာရော ပါရာဇိကာ တီဟိ သမုဋ္ဌာနေဟိ သမုဋ္ဌန္တိ – သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။

တေရသ သင်္ဃာဒိသေသာ ကတိဟိ သမုဋ္ဌာနေဟိ သမုဋ္ဌန္တိ? တေရသ သင်္ဃာဒိသေသာ ဆဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ၊ န ဝါစတော န စိတ္တတော၊ သိယာ ဝါစတော သမုဋ္ဌန္တိ၊ န ကာယတော န စိတ္တတော၊ သိယာ ကာယတော စ ဝါစတော န သမုဋ္ဌန္တိ၊ န စိတ္တတော၊ သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။

ဒွေ အနိယတာ ကတိဟိ သမုဋ္ဌာနေဟိ သမုဋ္ဌန္တိ? ဒွေ အနိယတာ တီဟိ သမုဋ္ဌာနေဟိ သမုဋ္ဌန္တိ – သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။

တိံသ နိဿဂ္ဂိယာ ပါစိတ္တိယာ ကတိဟိ သမုဋ္ဌာနေဟိ သမုဋ္ဌန္တိ? တိံသ နိဿဂ္ဂိယာ ပါစိတ္တိယာ ဆဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ၊ န ဝါစတော န စိတ္တတော၊ သိယာ ဝါစတော သမုဋ္ဌန္တိ၊ န ကာယတော န စိတ္တတော၊ သိယာ ကာယတော စ ဝါစတော စ သမုဋ္ဌန္တိ၊ န စိတ္တတော၊ သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။

ဒွေနဝုတိ ပါစိတ္တိယာ ကတိဟိ သမုဋ္ဌာနေဟိ သမုဋ္ဌန္တိ? ဒွေနဝုတိ ပါစိတ္တိယာ ဆဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ၊ န ဝါစတော န စိတ္တတော၊ သိယာ ဝါစတော သမုဋ္ဌန္တိ၊ န ကာယတော န စိတ္တတော၊ သိယာ ကာယတော စ ဝါစတော စ သမုဋ္ဌန္တိ၊ န စိတ္တတော၊ သိယာ ကာယတော စ စိတ္တတော စ သမုဋ္ဌန္တိ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။

စတ္တာရော ပါဋိဒေသနီယာ ကတိဟိ သမုဋ္ဌာနေဟိ သမုဋ္ဌန္တိ? စတ္တာရော ပါဋိဒေသနီယာ စတူဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ၊ န ဝါစတော န စိတ္တတော၊ သိယာ ကာယတော စ ဝါစတော စ သမုဋ္ဌန္တိ၊ န စိတ္တတော၊ သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။

ပဉ္စသတ္တတိ သေခိယာ ကတိဟိ သမုဋ္ဌာနေဟိ သမုဋ္ဌန္တိ? ပဉ္စသတ္တတိ သေခိယာ တီဟိ သမုဋ္ဌာနေဟိ သမုဋ္ဌန္တိ – သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။

သမုဋ္ဌာနံ နိဋ္ဌိတံ။

တဿုဒ္ဒါနံ –

အစိတ္တကုသလာ စေဝ၊ သမုဋ္ဌာနဉ္စ သဗ္ဗထာ၊

ယထာဓမ္မေန ဉာယေန၊ သမုဋ္ဌာနံ ဝိဇာနထာတိ။