မူလ > ဝိနယပိဋက > ပရိဝါရပါဠိ

၂၇၁။ ကတိ ¶ ¶ ¶ ¶ အာပတ္တိယော? ကတိ အာပတ္တိက္ခန္ဓာ? ကတိ ဝိနီတဝတ္ထူနိ? ကတိ အဂါရဝါ? ကတိ ဂါရဝါ? ကတိ ဝိနီတဝတ္ထူနိ? ကတိ ဝိပတ္တိယော? ကတိ အာပတ္တိသမုဋ္ဌာနာ? ကတိ ဝိဝါဒမူလာနိ? ကတိ အနုဝါဒမူလာနိ? ကတိ သာရဏီယာ ဓမ္မာ? ကတိ ဘေဒကရဝတ္ထူနိ? ကတိ အဓိကရဏာနိ? ကတိ သမထာ?

ပဉ္စ အာပတ္တိယော။ ပဉ္စ အာပတ္တိက္ခန္ဓာ။ ပဉ္စ ဝိနီတဝတ္ထူနိ။ သတ္တ အာပတ္တိယော။ သတ္တ အာပတ္တိက္ခန္ဓာ။ သတ္တ ဝိနီတဝတ္ထူနိ။ ဆ အဂါရဝါ။ ဆ ဂါရဝါ။ ဆ ဝိနီတဝတ္ထူနိ။ စတဿော ဝိပတ္တိယော။ ဆ အာပတ္တိသမုဋ္ဌာနာ။ ဆ ဝိဝါဒမူလာနိ။ ဆ အနုဝါဒမူလာနိ။ ဆ သာရဏီယာ ဓမ္မာ။ အဋ္ဌာရသ ဘေဒကရဝတ္ထူနိ။ စတ္တာရိ အဓိကရဏာနိ။ သတ္တ သမထာ။

တတ္ထ ကတမာ ပဉ္စ အာပတ္တိယော? ပါရာဇိကာပတ္တိ၊ သင်္ဃာဒိသေသာပတ္တိ၊ ပါစိတ္တိယာပတ္တိ၊ ပါဋိဒေသနီယာပတ္တိ၊ ဒုက္ကဋာပတ္တိ – ဣမာ ပဉ္စ အာပတ္တိယော။

တတ္ထ ကတမေ ပဉ္စ အာပတ္တိက္ခန္ဓာ? ပါရာဇိကာပတ္တိက္ခန္ဓော၊ သင်္ဃာဒိသေသာပတ္တိက္ခန္ဓော၊ ပါစိတ္တိယာပတ္တိက္ခန္ဓော၊ ပါဋိဒေသနီယာပတ္တိက္ခန္ဓော၊ ဒုက္ကဋာပတ္တိက္ခန္ဓော – ဣမေ ပဉ္စ အာပတ္တိက္ခန္ဓာ။

တတ္ထ ¶ ကတမာနိ ပဉ္စ ဝိနီတဝတ္ထူနိ? ပဉ္စဟိ အာပတ္တိက္ခန္ဓေဟိ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣမာနိ ပဉ္စ ဝိနီတဝတ္ထူနိ။

တတ္ထ ¶ ကတမာ သတ္တ အာပတ္တိယော? ပါရာဇိကာပတ္တိ၊ သင်္ဃာဒိသေသာပတ္တိ၊ ထုလ္လစ္စယာပတ္တိ၊ ပါစိတ္တိယာပတ္တိ၊ ပါဋိဒေသနီယာပတ္တိ၊ ဒုက္ကဋာပတ္တိ၊ ဒုဗ္ဘာသိတာပတ္တိ – ဣမာ သတ္တ အာပတ္တိယော။

တတ္ထ ကတမေ သတ္တ အာပတ္တိက္ခန္ဓာ? ပါရာဇိကာပတ္တိက္ခန္ဓော၊ သင်္ဃာဒိသေသာပတ္တိက္ခန္ဓော၊ ထုလ္လစ္စယာပတ္တိက္ခန္ဓော၊ ပါစိတ္တိယာပတ္တိက္ခန္ဓော၊ ပါဋိဒေသနီယာပတ္တိက္ခန္ဓော၊ ဒုက္ကဋာပတ္တိက္ခန္ဓော၊ ဒုဗ္ဘာသိတာပတ္တိက္ခန္ဓော – ဣမေ သတ္တ အာပတ္တိက္ခန္ဓာ။

တတ္ထ ¶ ကတမာနိ သတ္တ ဝိနီတဝတ္ထူနိ? သတ္တဟိ အာပတ္တိက္ခန္ဓေဟိ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣမာနိ သတ္တ ဝိနီတဝတ္ထူနိ။

တတ္ထ ¶ ကတမေ ဆ အဂါရဝါ? ဗုဒ္ဓေ အဂါရဝေါ၊ ဓမ္မေ အဂါရဝေါ၊ သင်္ဃေ အဂါရဝေါ၊ သိက္ခာယ အဂါရဝေါ၊ အပ္ပမာဒေ အဂါရဝေါ၊ ပဋိသန္ဓာရေ အဂါရဝေါ – ဣမေ ဆ အဂါရဝါ။

တတ္ထ ကတမေ ဆ ဂါရဝါ? ဗုဒ္ဓေ ဂါရဝေါ၊ ဓမ္မေ ဂါရဝေါ၊ သင်္ဃေ ဂါရဝေါ၊ သိက္ခာယ ဂါရဝေါ၊ အပ္ပမာဒေ ဂါရဝေါ၊ ပဋိသန္ဓာရေ ဂါရဝေါ – ဣမေ ဆ ဂါရဝါ။

တတ္ထ ကတမာနိ ဆ ဝိနီတဝတ္ထူနိ? ဆဟိ အဂါရဝေဟိ အာရတိ ဝိရတိ ပဋိဝိရတိ ¶ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော – ဣမာနိ ဆ ဝိနီတဝတ္ထူနိ။

တတ္ထ ကတမာ စတဿော ဝိပတ္တိယော? သီလဝိပတ္တိ၊ အာစာရဝိပတ္တိ၊ ဒိဋ္ဌိဝိပတ္တိ၊ အာဇီဝဝိပတ္တိ – ဣမာ စတဿော ဝိပတ္တိယော။

တတ္ထ ကတမေ ဆ အာပတ္တိသမုဋ္ဌာနာ? အတ္ထာပတ္တိ ကာယတော သမုဋ္ဌာတိ၊ န ဝါစတော န စိတ္တတော၊ အတ္ထာပတ္တိ ဝါစတော သမုဋ္ဌာတိ၊ န ကာယတော န စိတ္တတော၊ အတ္ထာပတ္တိ ကာယတော စ ဝါစတော စ သမုဋ္ဌာတိ၊ န စိတ္တတော၊ အတ္ထာပတ္တိ ကာယတော စ စိတ္တတော စ သမုဋ္ဌာတိ၊ န ဝါစတော၊ အတ္ထာပတ္တိ ဝါစတော စ စိတ္တတော စ သမုဋ္ဌာတိ၊ န ကာယတော၊ အတ္ထာပတ္တိ ကာယတော စ ဝါစတော စ စိတ္တတော စ သမုဋ္ဌာတိ – ဣမေ ဆ အာပတ္တိသမုဋ္ဌာနာ။

၂၇၂။ တတ္ထ ¶ [စူဠဝ။ ၂၁၆၊ အ။ နိ။ ၆။၃၆၊ မ။ နိ။ ၃။၄၄၊ ဒီ။ နိ။ ၃။၃၂၅] ကတမာနိ ဆ ဝိဝါဒမူလာနိ? ဣဓ ဘိက္ခု ကောဓနော ဟောတိ ဥပနာဟီ။ ယော သော ဘိက္ခု ကောဓနော ဟောတိ ဥပနာဟီ သော သတ္ထရိပိ အဂါရဝေါ ဝိဟရတိ အပ္ပတိဿော၊ ဓမ္မေပိ အဂါရဝေါ ဝိဟရတိ အပ္ပတိဿော၊ သင်္ဃေပိ အဂါရဝေါ ဝိဟရတိ အပ္ပတိဿော၊ သိက္ခာယပိ န ပရိပူရကာရီ ဟောတိ။ ယော သော ဘိက္ခု သတ္ထရိ အဂါရဝေါ ဝိဟရတိ အပ္ပတိဿော၊ ဓမ္မေ…ပေ… သင်္ဃေ…ပေ… သိက္ခာယ န ပရိပူရကာရီ၊ သော သင်္ဃေ ဝိဝါဒံ ဇနေတိ။ ယော ဟောတိ ဝိဝါဒေါ ဗဟုဇနာဟိတာယ ဗဟုဇနာသုခါယ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ။ ဧဝရူပံ စေ တုမှေ ဝိဝါဒမူလံ အဇ္ဈတ္တံ ဝါ ¶ ဗဟိဒ္ဓါ ဝါ သမနုပဿေယျာထ တတြ တုမှေ ¶ တဿေဝ ပါပကဿ ဝိဝါဒမူလဿ ပဟာနာယ ဝါယမေယျာထ။ ဧဝရူပံ စေ တုမှေ ဝိဝါဒမူလံ အဇ္ဈတ္တံ ဝါ ဗဟိဒ္ဓါ ဝါ န သမနုပဿေယျာထ တတြ တုမှေ တဿေဝ ပါပကဿ ဝိဝါဒမူလဿ အာယတိံ အနဝဿဝါယ ပဋိပဇ္ဇေယျာထ။ ဧဝမေတဿ ပါပကဿ ဝိဝါဒမူလဿ ပဟာနံ ဟောတိ။ ဧဝမေတဿ ပါပကဿ ဝိဝါဒမူလဿ အာယတိံ အနဝဿဝေါ ဟောတိ။

[စူဠဝ။ ၂၁၆] ပုန စပရံ ဘိက္ခု မက္ခီ ဟောတိ ပဠာသီ…ပေ… ဣဿုကီ ဟောတိ မစ္ဆရီ၊ သဌော ဟောတိ မာယာဝီ၊ ပါပိစ္ဆော ဟောတိ မိစ္ဆာဒိဋ္ဌိ၊ သန္ဒိဋ္ဌိပရာမာသီ ဟောတိ အာဓာနဂ္ဂါဟီ ဒုပ္ပဋိနိဿဂ္ဂီ။ ယော သော ဘိက္ခု သန္ဒိဋ္ဌိပရာမာသီ ဟောတိ အာဓာနဂ္ဂါဟီ ဒုပ္ပဋိနိဿဂ္ဂီ သော သတ္ထရိပိ အဂါရဝေါ ဝိဟရတိ အပ္ပတိဿော၊ ဓမ္မေပိ အဂါရဝေါ ဝိဟရတိ အပ္ပတိဿော၊ သင်္ဃေပိ အဂါရဝေါ ဝိဟရတိ အပ္ပတိဿော၊ သိက္ခာယပိ န ပရိပူရကာရီ ဟောတိ။ ယော သော ဘိက္ခု သတ္ထရိ အဂါရဝေါ ဝိဟရတိ အပ္ပတိဿော ဓမ္မေ…ပေ… သင်္ဃေ…ပေ… သိက္ခာယ န ပရိပူရကာရီ၊ သော သင်္ဃေ ဝိဝါဒံ ဇနေတိ။ ယော သော ဟောတိ ဝိဝါဒေါ ဗဟုဇနာဟိတာယ ဗဟုဇနာသုခါယ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ။ ဧဝရူပံ စေ တုမှေ ဝိဝါဒမူလံ အဇ္ဈတ္တံ ဝါ ဗဟိဒ္ဓါ ဝါ သမနုပဿေယျာထ တတြ တုမှေ တဿေဝ ပါပကဿ ဝိဝါဒမူလဿ ¶ ပဟာနာယ ဝါယမေယျာထ။ ဧဝရူပံ စေ တုမှေ ဝိဝါဒမူလံ အဇ္ဈတ္တံ ဝါ ဗဟိဒ္ဓါ ဝါ န သမနုပဿေယျာထ တတြ တုမှေ တဿေဝ ပါပကဿ ဝိဝါဒမူလဿ အာယတိံ အနဝဿဝါယ ပဋိပဇ္ဇေယျာထ။ ဧဝမေတဿ ပါပကဿ ဝိဝါဒမူလဿ ပဟာနံ ဟောတိ။ ဧဝမေတဿ ပါပကဿ ဝိဝါဒမူလဿ အာယတိံ အနဝဿဝေါ ဟောတိ။ ဣမာနိ ဆ ဝိဝါဒမူလာနိ။

၂၇၃။ [စူဠဝ။ ၂၁၇] တတ္ထ ကတမာနိ ဆ အနုဝါဒမူလာနိ? ဣဓ ဘိက္ခု ကောဓနော ဟောတိ ဥပနာဟီ။ ယော သော ဘိက္ခု ကောဓနော ဟောတိ ဥပနာဟီ သော သတ္ထရိပိ အဂါရဝေါ ဝိဟရတိ အပ္ပတိဿော၊ ဓမ္မေပိ အဂါရဝေါ ဝိဟရတိ အပ္ပတိဿော၊ သင်္ဃေပိ အဂါရဝေါ ဝိဟရတိ အပ္ပတိဿော၊ သိက္ခာယပိ န ပရိပူရကာရီ ဟောတိ။ ယော သော ဘိက္ခု သတ္ထရိ အဂါရဝေါ ဝိဟရတိ အပ္ပတိဿော ဓမ္မေ…ပေ… သင်္ဃေ ¶ …ပေ… သိက္ခာယ န ပရိပူရကာရီ သော သင်္ဃေ အနုဝါဒံ ဇနေတိ။ ယော ဟောတိ အနုဝါဒေါ ဗဟုဇနာဟိတာယ ဗဟုဇနာသုခါယ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ။ ဧဝရူပံ ¶ စေ တုမှေ အနုဝါဒမူလံ အဇ္ဈတ္တံ ဝါ ဗဟိဒ္ဓါ ဝါ သမနုပဿေယျာထ တတြ တုမှေ တဿေဝ ပါပကဿ အနုဝါဒမူလဿ ပဟာနာယ ဝါယမေယျာထ။ ဧဝရူပံ စေ တုမှေ အနုဝါဒမူလံ အဇ္ဈတ္တံ ဝါ ဗဟိဒ္ဓါ ဝါ န သမနုပဿေယျာထ တတြ တုမှေ တဿေဝ ပါပကဿ အနုဝါဒမူလဿ အာယတိံ အနဝဿဝါယ ပဋိပဇ္ဇေယျာထ။ ဧဝမေတဿ ပါပကဿ အနုဝါဒမူလဿ ပဟာနံ ဟောတိ။ ဧဝမေတဿ ပါပကဿ အနုဝါဒမူလဿ အာယတိံ အနဝဿဝေါ ဟောတိ။

ပုန စပရံ ဘိက္ခု မက္ခီ ဟောတိ ပလာသီ…ပေ… ဣဿုကီ ဟောတိ မစ္ဆရီ၊ သဌော ဟောတိ မာယာဝီ၊ ပါပိစ္ဆော ဟောတိ မိစ္ဆာဒိဋ္ဌိ၊ သန္ဒိဋ္ဌိပရာမာသီ ¶ ဟောတိ အာဓာနဂ္ဂါဟီ ဒုပ္ပဋိနိဿဂ္ဂီ။ ယော သော ဘိက္ခု သန္ဒိဋ္ဌိပရာမာသီ ဟောတိ အာဓာနဂ္ဂါဟီ ဒုပ္ပဋိနိဿဂ္ဂီ သော သတ္ထရိပိ အဂါရဝေါ ဝိဟရတိ အပ္ပတိဿော၊ ဓမ္မေပိ အဂါရဝေါ ဝိဟရတိ အပ္ပတိဿော၊ သင်္ဃေပိ အဂါရဝေါ ဝိဟရတိ အပ္ပတိဿော၊ သိက္ခာယပိ န ပရိပူရကာရီ ဟောတိ။ ယော ဘိက္ခု သတ္ထရိ အဂါရဝေါ ဝိဟရတိ အပ္ပတိဿော ဓမ္မေ…ပေ… သင်္ဃေ…ပေ… သိက္ခာယ န ပရိပူရကာရီ သော သင်္ဃေ အနုဝါဒံ ဇနေတိ။ ယော ဟောတိ အနုဝါဒေါ ဗဟုဇနာဟိတာယ ဗဟုဇနာသုခါယ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ။ ဧဝရူပံ စေ တုမှေ အနုဝါဒမူလံ အဇ္ဈတ္တံ ဝါ ဗဟိဒ္ဓါ ဝါ သမနုပဿေယျာထ တတြ တုမှေ တဿေဝ ပါပကဿ အနုဝါဒမူလဿ ပဟာနာယ ဝါယမေယျာထ။ ဧဝရူပံ စေ တုမှေ အနုဝါဒမူလံ အဇ္ဈတ္တံ ဝါ ဗဟိဒ္ဓါ ဝါ န သမနုပဿေယျာထ တတြ တုမှေ တဿေဝ ပါပကဿ အနုဝါဒမူလဿ အာယတိံ အနဝဿဝါယ ပဋိပဇ္ဇေယျာထ။ ဧဝမေတဿ ပါပကဿ အနုဝါဒမူလဿ ပဟာနံ ဟောတိ။ ဧဝမေတဿ ပါပကဿ အနုဝါဒမူလဿ အာယတိံ အနဝဿဝေါ ဟောတိ။ ဣမာနိ ဆ အနုဝါဒမူလာနိ။

၂၇၄။ [ဒီ။ နိ။ ၃။၃၂၄၊ အ။ နိ။ ၆။၁၁] တတ္ထ ကတမေ ဆ သာရဏီယာ ဓမ္မာ? ဣဓ ဘိက္ခုနော မေတ္တံ ကာယကမ္မံ ပစ္စုပဋ္ဌိတံ ဟောတိ သဗြဟ္မစာရီသု အာဝိ စေဝ ရဟော စ။ အယမ္ပိ ဓမ္မော သာရဏီယော ပိယကရဏော ဂရုကရဏော သင်္ဂဟာယ အဝိဝါဒါယ သာမဂ္ဂိယာ ဧကီဘာဝါယ သံဝတ္တတိ။

ပုန စပရံ ဘိက္ခုနော မေတ္တံ ¶ ဝစီကမ္မံ ပစ္စုပဋ္ဌိတံ ဟောတိ သဗြဟ္မစာရီသု အာဝိ စေဝ ရဟော စ။ အယမ္ပိ ဓမ္မော သာရဏီယော ပိယကရဏော ဂရုကရဏော သင်္ဂဟာယ အဝိဝါဒါယ သာမဂ္ဂိယာ ဧကီဘာဝါယ သံဝတ္တတိ။

ပုန ¶ ¶ စပရံ ဘိက္ခုနော မေတ္တံ မနောကမ္မံ ပစ္စုပဋ္ဌိတံ ဟောတိ သဗြဟ္မစာရီသု အာဝိ စေဝ ရဟော စ။ အယမ္ပိ ဓမ္မော သာရဏီယော ပိယကရဏော ဂရုကရဏော သင်္ဂဟာယ အဝိဝါဒါယ သာမဂ္ဂိယာ ဧကီဘာဝါယ သံဝတ္တတိ။

ပုန စပရံ ဘိက္ခု ယေ တေ လာဘာ ဓမ္မိကာ ဓမ္မလဒ္ဓါ အန္တမသော ပတ္တပရိယာပန္နမတ္တမ္ပိ တထာရူပေဟိ လာဘေဟိ အပ္ပဋိဝိဘတ္တဘောဂီ ဟောတိ သီလဝန္တေဟိ သဗြဟ္မစာရီဟိ သာဓာရဏဘောဂီ။ အယမ္ပိ ဓမ္မော သာရဏီယော ပိယကရဏော ဂရုကရဏော သင်္ဂဟာယ အဝိဝါဒါယ သာမဂ္ဂိယာ ဧကီဘာဝါယ သံဝတ္တတိ။

ပုန စပရံ ဘိက္ခု ယာနိ တာနိ သီလာနိ အခဏ္ဍာနိ အစ္ဆိဒ္ဒါနိ အသဗလာနိ အကမ္မာသာနိ ဘုဇိဿာနိ ဝိညုပသတ္ထာနိ အပရာမဋ္ဌာနိ သမာဓိသံဝတ္တနိကာနိ ¶ ၊ တထာရူပေသု သီလေသု သီလသာမညဂတော ဝိဟရတိ သဗြဟ္မစာရီဟိ အာဝိ စေဝ ရဟော စ။ အယမ္ပိ ဓမ္မော သာရဏီယော ပိယကရဏော ဂရုကရဏော သင်္ဂဟာယ အဝိဝါဒါယ သာမဂ္ဂိယာ ဧကီဘာဝါယ သံဝတ္တတိ။

ပုန စပရံ ဘိက္ခု ယာယံ ဒိဋ္ဌိ အရိယာ နိယျာနိကာ နိယျာတိ တက္ကရဿ သမ္မာ ဒုက္ခက္ခယာယ တထာရူပါယ ဒိဋ္ဌိယာ ဒိဋ္ဌိသာမညဂတော ဝိဟရတိ သဗြဟ္မစာရီဟိ အာဝိ စေဝ ရဟော စ။ အယမ္ပိ ဓမ္မော သာရဏီယော ပိယကရဏော ဂရုကရဏော သင်္ဂဟာယ အဝိဝါဒါယ သာမဂ္ဂိယာ ဧကီဘာဝါယ သံဝတ္တတိ။ ဣမေ ဆ သာရဏီယာ ဓမ္မာ။

၂၇၅။ တတ္ထ ¶ ကတမာနိ အဋ္ဌာရသ ဘေဒကရဝတ္ထူနိ? ဣဓ ဘိက္ခု အဓမ္မံ ‘‘ဓမ္မော’’တိ ဒီပေတိ၊ ဓမ္မံ ‘‘အဓမ္မော’’တိ ဒီပေတိ၊ အဝိနယံ ‘‘ဝိနယော’’တိ ဒီပေတိ၊ ဝိနယံ ‘‘အဝိနယော’’တိ ဒီပေတိ၊ အဘာသိတံ အလပိတံ တထာဂတေန ‘‘ဘာသိတံ လပိတံ တထာဂတေနာ’’တိ ဒီပေတိ၊ ဘာသိတံ လပိတံ တထာဂတေန ‘‘အဘာသိတံ အလပိတံ တထာဂတေနာ’’တိ ဒီပေတိ၊ အနာစိဏ္ဏံ တထာဂတေန ‘‘အာစိဏ္ဏံ တထာဂတေနာ’’တိ ဒီပေတိ၊ အာစိဏ္ဏံ တထာဂတေန ‘‘အနာစိဏ္ဏံ တထာဂတေနာ’’တိ ဒီပေတိ၊ အပညတ္တံ တထာဂတေန ‘‘ပညတ္တံ တထာဂတေနာ’’တိ ဒီပေတိ၊ ပညတ္တံ တထာဂတေန ‘‘အပညတ္တံ တထာဂတေနာ’’တိ ဒီပေတိ၊ အာပတ္တိံ ‘‘အနာပတ္တီ’’တိ ဒီပေတိ၊ အနာပတ္တိံ ‘‘အာပတ္တီ’’တိ ဒီပေတိ၊ လဟုကံ အာပတ္တိံ ‘‘ဂရုကာ အာပတ္တီ’’တိ ဒီပေတိ၊ ဂရုကံ အာပတ္တိံ ‘‘လဟုကာ အာပတ္တီ’’တိ ဒီပေတိ၊ သာဝသေသံ အာပတ္တိံ ‘‘အနဝသေသာ အာပတ္တီ’’တိ ¶ ဒီပေတိ၊ အနဝသေသံ အာပတ္တိံ ‘‘သာဝသေသာ အာပတ္တီ’’တိ ¶ ဒီပေတိ၊ ဒုဋ္ဌုလ္လံ အာပတ္တိံ ‘‘အဒုဋ္ဌုလ္လာ အာပတ္တီ’’တိ ဒီပေတိ၊ အဒုဋ္ဌုလ္လံ အာပတ္တိံ ‘‘ဒုဋ္ဌုလ္လာ အာပတ္တီ’’တိ ဒီပေတိ။ ဣမာနိ အဋ္ဌာရသ ဘေဒကရဝတ္ထူနိ။

[စူဠဝ။ ၂၁၅၊ ပရိ။ ၃၄၀] တတ္ထ ကတမာနိ စတ္တာရိ အဓိကရဏာနိ? ဝိဝါဒါဓိကရဏံ၊ အနုဝါဒါဓိကရဏံ၊ အာပတ္တာဓိကရဏံ၊ ကိစ္စာဓိကရဏံ – ဣမာနိ စတ္တာရိ အဓိကရဏာနိ။

တတ္ထ ကတမေ သတ္တ သမထာ? သမ္မုခါဝိနယော၊ သတိဝိနယော၊ အမူဠှဝိနယော၊ ပဋိညာတကရဏံ၊ ယေဘုယျသိကာ၊ တဿပါပိယသိကာ၊ တိဏဝတ္ထာရကော ¶ – ဣမေ သတ္တ သမထာ။

အာပတ္တိ အာပတ္တိက္ခန္ဓာ၊ ဝိနီတာ သတ္တဓာ ပုန၊

ဝိနီတာဂါရဝါ စေဝ၊ ဂါရဝါ မူလမေဝ စ။

ပုန ဝိနီတာ ဝိပတ္တိ၊ သမုဋ္ဌာနာ ဝိဝါဒနာ၊

အနုဝါဒါ သာရဏီယံ၊ ဘေဒါဓိကရဏေန စ။

သတ္တေဝ သမထာ ဝုတ္တာ၊ ပဒါ သတ္တရသာ ဣမေတိ။

၂၇၆။ ပဌမေန ¶ အာပတ္တိသမုဋ္ဌာနေန ပါရာဇိကံ အာပဇ္ဇေယျာတိ? န ဟီတိ ဝတ္တဗ္ဗံ။ သင်္ဃာဒိသေသံ အာပဇ္ဇေယျာတိ? သိယာတိ ဝတ္တဗ္ဗံ။ ထုလ္လစ္စယံ အာပဇ္ဇေယျာတိ? သိယာတိ ဝတ္တဗ္ဗံ။ ပါစိတ္တိယံ အာပဇ္ဇေယျာတိ? သိယာတိ ဝတ္တဗ္ဗံ။ ပါဋိဒေသနီယံ အာပဇ္ဇေယျာတိ? သိယာတိ ဝတ္တဗ္ဗံ။ ဒုက္ကဋံ အာပဇ္ဇေယျာတိ? သိယာတိ ဝတ္တဗ္ဗံ။ ဒုဗ္ဘာသိတံ အာပဇ္ဇေယျာတိ? န ဟီတိ ဝတ္တဗ္ဗံ။

ဒုတိယေန အာပတ္တိသမုဋ္ဌာနေန ပါရာဇိကံ အာပဇ္ဇေယျာတိ? န ဟီတိ ဝတ္တဗ္ဗံ။ သင်္ဃာဒိသေသံ အာပဇ္ဇေယျာတိ? သိယာတိ ဝတ္တဗ္ဗံ။ ထုလ္လစ္စယံ အာပဇ္ဇေယျာတိ? သိယာတိ ဝတ္တဗ္ဗံ။ ပါစိတ္တိယံ အာပဇ္ဇေယျာတိ? သိယာတိ ဝတ္တဗ္ဗံ။ ပါဋိဒေသနီယံ အာပဇ္ဇေယျာတိ? န ဟီတိ ဝတ္တဗ္ဗံ။ ဒုက္ကဋံ အာပဇ္ဇေယျာတိ? သိယာတိ ဝတ္တဗ္ဗံ။ ဒုဗ္ဘာသိတံ အာပဇ္ဇေယျာတိ? န ဟီတိ ဝတ္တဗ္ဗံ။

တတိယေန ¶ ¶ အာပတ္တိသမုဋ္ဌာနေန ပါရာဇိကံ အာပဇ္ဇေယျာတိ? န ဟီတိ ဝတ္တဗ္ဗံ။ သင်္ဃာဒိသေသံ အာပဇ္ဇေယျာတိ? သိယာတိ ဝတ္တဗ္ဗံ။ ထုလ္လစ္စယံ အာပဇ္ဇေယျာတိ? သိယာတိ ဝတ္တဗ္ဗံ။ ပါစိတ္တိယံ အာပဇ္ဇေယျာတိ? သိယာတိ ဝတ္တဗ္ဗံ။ ပါဋိဒေသနီယံ အာပဇ္ဇေယျာတိ? သိယာတိ ဝတ္တဗ္ဗံ။ ဒုက္ကဋံ အာပဇ္ဇေယျာတိ? သိယာတိ ဝတ္တဗ္ဗံ။ ဒုဗ္ဘာသိတံ အာပဇ္ဇေယျာတိ? န ဟီတိ ဝတ္တဗ္ဗံ။

စတုတ္ထေ ¶ ¶ အာပတ္တိသမုဋ္ဌာနေန ပါရာဇိကံ အာပဇ္ဇေယျာတိ? သိယာတိ ဝတ္တဗ္ဗံ။ သင်္ဃာဒိသေသံ အာပဇ္ဇေယျာတိ? သိယာတိ ဝတ္တဗ္ဗံ။ ထုလ္လစ္စယံ အာပဇ္ဇေယျာတိ? သိယာတိ ဝတ္တဗ္ဗံ။ ပါစိတ္တိယံ အာပဇ္ဇေယျာတိ? သိယာတိ ဝတ္တဗ္ဗံ။ ပါဋိဒေသနီယံ အာပဇ္ဇေယျာတိ? သိယာတိ ဝတ္တဗ္ဗံ။ ဒုက္ကဋံ အာပဇ္ဇေယျာတိ? သိယာတိ ဝတ္တဗ္ဗံ။ ဒုဗ္ဘာသိတံ အာပဇ္ဇေယျာတိ? န ဟီတိ ဝတ္တဗ္ဗံ။

ပဉ္စမေန အာပတ္တိသမုဋ္ဌာနေန ပါရာဇိကံ အာပဇ္ဇေယျာတိ? သိယာတိ ဝတ္တဗ္ဗံ။ သင်္ဃာဒိသေသံ အာပဇ္ဇေယျာတိ? သိယာတိ ဝတ္တဗ္ဗံ။ ထုလ္လစ္စယံ အာပဇ္ဇေယျာတိ? သိယာတိ ဝတ္တဗ္ဗံ။ ပါစိတ္တိယံ အာပဇ္ဇေယျာတိ? သိယာတိ ဝတ္တဗ္ဗံ။ ပါဋိဒေသနီယံ အာပဇ္ဇေယျာတိ? န ဟီတိ ဝတ္တဗ္ဗံ။ ဒုက္ကဋံ အာပဇ္ဇေယျာတိ? သိယာတိ ဝတ္တဗ္ဗံ။ ဒုဗ္ဘာသိတံ အာပဇ္ဇေယျာတိ? သိယာတိ ဝတ္တဗ္ဗံ။

ဆဋ္ဌေန အာပတ္တိသမုဋ္ဌာနေန ပါရာဇိကံ အာပဇ္ဇေယျာတိ? သိယာတိ ဝတ္တဗ္ဗံ။ သင်္ဃာဒိသေသံ အာပဇ္ဇေယျာတိ? သိယာတိ ဝတ္တဗ္ဗံ။ ထုလ္လစ္စယံ အာပဇ္ဇေယျာတိ? သိယာတိ ဝတ္တဗ္ဗံ။ ပါစိတ္တိယံ အာပဇ္ဇေယျာတိ? သိယာတိ ဝတ္တဗ္ဗံ။ ပါဋိဒေသနီယံ အာပဇ္ဇေယျာတိ? သိယာတိ ဝတ္တဗ္ဗံ။ ဒုက္ကဋံ အာပဇ္ဇေယျာတိ? သိယာတိ ဝတ္တဗ္ဗံ။ ဒုဗ္ဘာသိတံ အာပဇ္ဇေယျာတိ? န ဟီတိ ဝတ္တဗ္ဗံ။

ဆအာပတ္တိသမုဋ္ဌာနဝါရော နိဋ္ဌိတော ပဌမော။

၂၇၇။ ပဌမေန အာပတ္တိသမုဋ္ဌာနေန ကတိ အာပတ္တိယော အာပဇ္ဇတိ? ပဌမေန ¶ အာပတ္တိသမုဋ္ဌာနေန ပဉ္စ အာပတ္တိယော အာပဇ္ဇတိ။ ဘိက္ခု ကပ္ပိယသညီ သညာစိကာယ ကုဋိံ ကရောတိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ၊ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ အာပတ္တိ ¶ ထုလ္လစ္စယဿ၊ တသ္မိံ ပိဏ္ဍေ အာဂတေ အာပတ္တိ သင်္ဃာဒိသေသဿ၊ ဘိက္ခု ကပ္ပိယသညီ ဝိကာလေ ဘောဇနံ ဘုဉ္ဇတိ၊ အာပတ္တိ ပါစိတ္တိယဿ၊ ဘိက္ခု ကပ္ပိယသညီ အညာတိကာယ ¶ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇတိ၊ အာပတ္တိ ပါဋိဒေသနီယဿ – ပဌမေန အာပတ္တိသမုဋ္ဌာနေန ဣမာ ပဉ္စ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ပဉ္စဟိ အာပတ္တိက္ခန္ဓေဟိ သင်္ဂဟိတာ – သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ပါဋိဒေသနီယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော သမုဋ္ဌန္တိ၊ န ဝါစတော န စိတ္တတော။ စတုန္နံ အဓိကရဏာနံ အာပတ္တာဓိကရဏံ ¶ ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၇၈။ ဒုတိယေန အာပတ္တိသမုဋ္ဌာနေန ကတိ အာပတ္တိယော အာပဇ္ဇတိ? ဒုတိယေန အာပတ္တိသမုဋ္ဌာနေန စတဿော အာပတ္တိယော အာပဇ္ဇတိ – ဘိက္ခု ကပ္ပိယသညီ သမာဒိသတိ ¶ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ။ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ အာပတ္တိ သင်္ဃာဒိသေသဿ။ ဘိက္ခု ကပ္ပိယသညီ အနုပသမ္ပန္နံ ပဒသော ဓမ္မံ ဝါစေတိ၊ အာပတ္တိ ပါစိတ္တိယဿ – ဒုတိယေန အာပတ္တိသမုဋ္ဌာနေန ဣမာ စတဿော အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ¶ စတူဟိ အာပတ္တိက္ခန္ဓေဟိ သင်္ဂဟိတာ – သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ဝါစတော သမုဋ္ဌန္တိ၊ န ကာယတော န စိတ္တတော။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန ¶ စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၇၉။ တတိယေန ¶ အာပတ္တိသမုဋ္ဌာနေန ကတိ အာပတ္တိယော အာပဇ္ဇတိ? တတိယေန အာပတ္တိသမုဋ္ဌာနေန ပဉ္စ အာပတ္တိယော အာပဇ္ဇတိ။ ဘိက္ခု ကပ္ပိယသညီ သံဝိဒဟိတွာ ကုဋိံ ကရောတိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ။ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ အာပတ္တိ သင်္ဃာဒိသေသဿ။ ဘိက္ခု ကပ္ပိယသညီ ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ၊ အာပတ္တိ ပါစိတ္တိယဿ။ ဘိက္ခု ကပ္ပိယသညီ ဘိက္ခုနိယာ ဝေါသာသန္တိယာ န နိဝါရေတွာ ဘုဉ္ဇတိ၊ အာပတ္တိ ပါဋိဒေသနီယဿ – တတိယေန အာပတ္တိသမုဋ္ဌာနေန ဣမာ ပဉ္စ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ပဉ္စဟိ အာပတ္တိက္ခန္ဓေဟိ သင်္ဂဟိတာ – သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ပါဋိဒေသနီယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝါစတော စ သမုဋ္ဌန္တိ၊ န စိတ္တတော။ စတုန္နံ အဓိကရဏာနံ၊ အာပတ္တာဓိကရဏံ ¶ ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၈၀။ စတုတ္ထေန အာပတ္တိသမုဋ္ဌာနေန ကတိ အာပတ္တိယော အာပဇ္ဇတိ? စတုတ္ထေန အာပတ္တိသမုဋ္ဌာနေန ဆ အာပတ္တိယော အာပဇ္ဇတိ – ဘိက္ခု မေထုနံ ဓမ္မံ ပဋိသေဝတိ၊ အာပတ္တိ ပါရာဇိကဿ၊ ဘိက္ခု အကပ္ပိယသညီ သညာစိကာယ ကုဋိံ ကရောတိ ¶ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ၊ ပယောဂေ ¶ ဒုက္ကဋံ၊ ဧကံ ပိဏ္ဍံ အနာဂတေ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ အာပတ္တိ သင်္ဃာဒိသေသဿ။ ဘိက္ခု အကပ္ပိယသညီ ဝိကာလေ ဘောဇနံ ဘုဉ္ဇတိ၊ အာပတ္တိ ပါစိတ္တိယဿ။ ဘိက္ခု အကပ္ပိယသညီ အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇတိ၊ အာပတ္တိ ပါဋိဒေသနီယဿ။ စတုတ္ထေန အာပတ္တိသမုဋ္ဌာနေန ဣမာ ဆ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ ¶ ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဆဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ပါဋိဒေသနီယာပတ္တိက္ခန္ဓေန ¶ ၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ၊ န ဝါစတော။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၈၁။ ပဉ္စမေန အာပတ္တိသမုဋ္ဌာနေန ကတိ အာပတ္တိယော အာပဇ္ဇတိ? ပဉ္စမေန အာပတ္တိသမုဋ္ဌာနေန ဆ အာပတ္တိယော အာပဇ္ဇတိ။ ဘိက္ခု ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ၊ အာပတ္တိ ပါရာဇိကဿ၊ ဘိက္ခု အကပ္ပိယသညီ သမာဒိသတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ။ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ အာပတ္တိ သင်္ဃာဒိသေသဿ။ ဘိက္ခု အကပ္ပိယသညီ အနုပသမ္ပန္နံ ပဒသော ဓမ္မံ ဝါစေတိ၊ အာပတ္တိ ပါစိတ္တိယဿ။ န ခုံသေတုကာမော န ဝမ္ဘေတုကာမော န မင်္ကုကတ္တုကာမော ဒဝကမျတာ ဟီနေန ဟီနံ ဝဒေတိ၊ အာပတ္တိ ဒုဗ္ဘာသိတဿ – ပဉ္စမေန အာပတ္တိသမုဋ္ဌာနေန ဣမာ ဆ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ¶ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဆဟိ အာပတ္တိက္ခန္ဓေဟိ ¶ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန၊ သိယာ ဒုဗ္ဘာသိတာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ဝါစတော စ စိတ္တတော စ သမုဋ္ဌန္တိ၊ န ကာယတော။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၈၂။ ဆဋ္ဌေန အာပတ္တိသမုဋ္ဌာနေန ကတိ အာပတ္တိယော အာပဇ္ဇတိ? ဆဋ္ဌေန အာပတ္တိသမုဋ္ဌာနေန ဆ အာပတ္တိယော အာပဇ္ဇတိ – ဘိက္ခု သံဝိဒဟိတွာ ဘဏ္ဍံ အဝဟရတိ၊ အာပတ္တိ ¶ ပါရာဇိကဿ ¶ ၊ ဘိက္ခု အကပ္ပိယသညီ သံဝိဒဟိတွာ ကုဋိံ ကရောတိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ၊ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ၊ အာပတ္တိ သင်္ဃာဒိသေသဿ။ ဘိက္ခု အကပ္ပိယသညီ ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ၊ အာပတ္တိ ပါစိတ္တိယဿ။ ဘိက္ခု အကပ္ပိယသညီ ဘိက္ခုနိယာ ဝေါသာသန္တိယာ န နိဝါရေတွာ ဘုဉ္ဇတိ၊ အာပတ္တိ ပါဋိဒေသနီယဿ – ဆဋ္ဌေန အာပတ္တိသမုဋ္ဌာနေန ဣမာ ဆ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ ¶ ? ဆန္နံ အာပတ္တိသမုဋ္ဌာနာနံ ကတိဟိ အာပတ္တိသမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဆဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ပါဋိဒေသနီယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ ¶ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စာတိ။

ကတာပတ္တိဝါရော နိဋ္ဌိတော ဒုတိယော။

သမုဋ္ဌာနာ ကာယိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ကတိ၊

ပုစ္ဆာမိ တံ ဗြူဟိ ဝိဘင်္ဂကောဝိဒ။

သမုဋ္ဌာနာ ¶ ကာယိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ပဉ္စ၊

ဧတံ ¶ တေ အက္ခာမိ ဝိဘင်္ဂကောဝိဒ။

သမုဋ္ဌာနာ ဝါစသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ကတိ၊

ပုစ္ဆာမိ တံ ဗြူဟိ ဝိဘင်္ဂကောဝိဒ။

သမုဋ္ဌာနာ ဝါစသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ စတဿော၊

ဧတံ တေ အက္ခာမိ ဝိဘင်္ဂကောဝိဒ။

သမုဋ္ဌာနာ ကာယိကာ ဝါစသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ကတိ၊

ပုစ္ဆာမိ ¶ တံ ဗြူဟိ ဝိဘင်္ဂကောဝိဒ။

သမုဋ္ဌာနာ ¶ ကာယိကာ ဝါစသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ပဉ္စ၊

ဧတံ တေ အက္ခာမိ ဝိဘင်္ဂကောဝိဒ။

သမုဋ္ဌာနာ ကာယိကာ မာနသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ကတိ၊

ပုစ္ဆာမိ တံ ဗြူဟိ ဝိဘင်္ဂကောဝိဒ။

သမုဋ္ဌာနာ ¶ ကာယိကာ မာနသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

ဧတံ တေ အက္ခာမိ ဝိဘင်္ဂကောဝိဒ။

သမုဋ္ဌာနာ ဝါစသိကာ မာနသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ကတိ၊

ပုစ္ဆာမိ တံ ဗြူဟိ ဝိဘင်္ဂကောဝိဒ။

သမုဋ္ဌာနာ ဝါစသိကာ မာနသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

ဧတံ တေ အက္ခာမိ ဝိဘင်္ဂကောဝိဒ။

သမုဋ္ဌာနာ ကာယိကာ ဝါစသိကာ မာနသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

အာပတ္တိယော တေန သမုဋ္ဌိတာ ကတိ၊

ပုစ္ဆာမိ တံ ဗြူဟိ ဝိဘင်္ဂကောဝိဒ။

သမုဋ္ဌာနာ ¶ ကာယိကာ ဝါစသိကာ မာနသိကာ အနန္တဒဿိနာ၊

အက္ခာတာ လောကဟိတေန ဝိဝေကဒဿိနာ၊

ဧတံ ¶ တေ အက္ခာမိ ဝိဘင်္ဂကောဝိဒါတိ။

အာပတ္တိသမုဋ္ဌာနဂါထာ နိဋ္ဌိတာ တတိယာ။

၂၈၄။ သီလဝိပတ္တိပစ္စယာ ¶ ကတိ အာပတ္တိယော အာပဇ္ဇတိ? သီလဝိပတ္တိပစ္စယာ စတဿော ¶ အာပတ္တိယော အာပဇ္ဇတိ – ဘိက္ခုနီ ဇာနံ ပါရာဇိကံ ဓမ္မံ ပဋိစ္ဆာဒေတိ၊ အာပတ္တိ ပါရာဇိကဿ၊ ဝေမတိကာ ပဋိစ္ဆာဒေတိ၊ အာပတ္တိ ထုလ္လစ္စယဿ၊ ဘိက္ခု သင်္ဃာဒိသေသံ ပဋိစ္ဆာဒေတိ၊ အာပတ္တိ ပါစိတ္တိယဿ၊ အတ္တနော ဒုဋ္ဌုလ္လံ အာပတ္တိံ ပဋိစ္ဆာဒေတိ၊ အာပတ္တိ ဒုက္ကဋဿ – သီလဝိပတ္တိပစ္စယာ ဣမာ စတဿော အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ စတူဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၈၅။ အာစာရဝိပတ္တိပစ္စယာ ကတိ အာပတ္တိယော အာပဇ္ဇတိ? အာစာရဝိပတ္တိပစ္စယာ ¶ ဧကံ အာပတ္တိံ အာပဇ္ဇတိ။ အာစာရဝိပတ္တိံ ပဋိစ္ဆာဒေတိ၊ အာပတ္တိ ဒုက္ကဋဿ – အာစာရဝိပတ္တိပစ္စယာ ဣမံ ဧကံ အာပတ္တိံ အာပဇ္ဇတိ။

သာ အာပတ္တိ စတုန္နံ ဝိပတ္တီနံ ကတိ ဝိပတ္တိယော ဘဇတိ …ပေ… သတ္တန္နံ သမထာနံ ကတိဟိ သမထေဟိ သမ္မတိ? သာ အာပတ္တိ စတုန္နံ ဝိပတ္တီနံ ဧကံ ဝိပတ္တိံ ဘဇတိ – အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဧကေန အာပတ္တိက္ခန္ဓေန သင်္ဂဟိတာ – ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ စတုန္နံ အဓိကရဏာနံ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၈၆။ ဒိဋ္ဌိဝိပတ္တိပစ္စယာ ¶ ကတိ အာပတ္တိယော အာပဇ္ဇတိ? ဒိဋ္ဌိဝိပတ္တိပစ္စယာ ဒွေ အာပတ္တိယော အာပဇ္ဇတိ။ ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇတိ၊ ဉတ္တိယာ ဒုက္ကဋံ [ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ဒုက္ကဋာ (သျာ။ က။)]၊ ကမ္မဝါစာပရိယောသာနေ အာပတ္တိ ပါစိတ္တိယဿ – ဒိဋ္ဌိဝိပတ္တိပစ္စယာ ဣမာ ဒွေ အာပတ္တိယော အာပဇ္ဇတိ။

တာ ¶ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ ¶ – သိယာ ပါစိတ္တိယာပတ္တိက္ခန္ဓေန ¶ ၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၈၇။ အာဇီဝဝိပတ္တိပစ္စယာ ကတိ အာပတ္တိယော အာပဇ္ဇတိ? အာဇီဝဝိပတ္တိပစ္စယာ ဆ အာပတ္တိယော အာပဇ္ဇတိ – အာဇီဝဟေတု အာဇီဝကာရဏာ ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ၊ အာပတ္တိ ပါရာဇိကဿ၊ အာဇီဝဟေတု အာဇီဝကာရဏာ သဉ္စရိတ္တံ သမာပဇ္ဇတိ၊ အာပတ္တိ သင်္ဃာဒိသေသဿ၊ အာဇီဝဟေတု အာဇီဝကာရဏာ ‘‘ယော တေ ဝိဟာရေ ဝသတိ၊ သော ဘိက္ခု အရဟာ’’တိ ဘဏတိ၊ ပဋိဝိဇာနန္တဿ အာပတ္တိ ထုလ္လစ္စယဿ၊ အာဇီဝဟေတု အာဇီဝကာရဏာ ဘိက္ခု ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ၊ အာပတ္တိ ပါစိတ္တိယဿ၊ အာဇီဝဟေတု အာဇီဝကာရဏာ ဘိက္ခုနီ ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ၊ အာပတ္တိ ပါဋိဒေသနီယဿ၊ အာဇီဝဟေတု အာဇီဝကာရဏာ သူပံ ဝါ ဩဒနံ ဝါ အဂိလာနော အတ္တနော အတ္ထာယ ဝိညာပေတွာ ဘုဉ္ဇတိ၊ အာပတ္တိ ဒုက္ကဋဿ – အာဇီဝဝိပတ္တိပစ္စယာ ဣမာ ဆ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ။ တာ အာပတ္တိယော စတုန္နံ ဝိပတ္တီနံ ဒွေ ¶ ဝိပတ္တိယော ¶ ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဆဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ပါဋိဒေသနီယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ၊ န ဝါစတော န စိတ္တတော၊ သိယာ ဝါစတော သမုဋ္ဌန္တိ၊ န ကာယတော န စိတ္တတော၊ သိယာ ကာယတော စ ဝါစတော စ သမုဋ္ဌန္တိ၊ န စိတ္တတော၊ သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ ¶ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

ဝိပတ္တိပစ္စယဝါရော နိဋ္ဌိတော စတုတ္ထော။

၂၈၈။ ဝိဝါဒါဓိကရဏပစ္စယာ ကတိ အာပတ္တိယော အာပဇ္ဇတိ? ဝိဝါဒါဓိကရဏပစ္စယာ ဒွေ အာပတ္တိယော အာပဇ္ဇတိ – ဥပသမ္ပန္နံ ဩမသတိ၊ အာပတ္တိ ပါစိတ္တိယဿ၊ အနုပသမ္ပန္နံ ဩမသတိ၊ အာပတ္တိ ဒုက္ကဋဿ – ဝိဝါဒါဓိကရဏပစ္စယာ ဣမာ ဒွေ အာပတ္တိယော အာပဇ္ဇတိ။

တာ အာပတ္တိယော စတုန္နံ ¶ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ – သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌန္တိ – သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ ¶ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော ¶ စ သမုဋ္ဌန္တိ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၈၉။ အနုဝါဒါဓိကရဏပစ္စယာ ကတိ အာပတ္တိယော အာပဇ္ဇတိ? အနုဝါဒါဓိကရဏပစ္စယာ တိဿော အာပတ္တိယော အာပဇ္ဇတိ။ ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေတိ၊ အာပတ္တိ သင်္ဃာဒိသေသဿ၊ အမူလကေန သင်္ဃာဒိသေသေန အနုဒ္ဓံသေတိ၊ အာပတ္တိ ပါစိတ္တိယဿ၊ အမူလိကာယ အာစာရဝိပတ္တိယာ အနုဒ္ဓံသေတိ၊ အာပတ္တိ ဒုက္ကဋဿ – အနုဝါဒါဓိကရဏပစ္စယာ ဣမာ တိဿော အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင်္ဂဟိတာ – သိယာ သင်္ဃာဒိသေသာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန ¶ ¶ ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌန္တိ – သိယာ ကာယတော စ စိတ္တတော စ သမုဋ္ဌန္တိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌန္တိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၉၀။ အာပတ္တာဓိကရဏပစ္စယာ ကတိ အာပတ္တိယော အာပဇ္ဇတိ? အာပတ္တာဓိကရဏပစ္စယာ စတဿော အာပတ္တိယော အာပဇ္ဇတိ။ ဘိက္ခုနီ ဇာနံ ပါရာဇိကံ ဓမ္မံ ပဋိစ္ဆာဒေတိ၊ အာပတ္တိ ပါရာဇိကဿ၊ ဝေမတိကာ ပဋိစ္ဆာဒေတိ၊ အာပတ္တိ ထုလ္လစ္စယဿ၊ ဘိက္ခု သင်္ဃာဒိသေသံ ပဋိစ္ဆာဒေတိ၊ အာပတ္တိ ပါစိတ္တိယဿ၊ အာစာရဝိပတ္တိံ ပဋိစ္ဆာဒေတိ၊ အာပတ္တိ ဒုက္ကဋဿ – အာပတ္တာဓိကရဏပစ္စယာ ဣမာ စတဿော အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ ¶ အာပတ္တိက္ခန္ဓာနံ စတူဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန ¶ သမုဋ္ဌန္တိ – ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

၂၉၁။ ကိစ္စာဓိကရဏပစ္စယာ ကတိ အာပတ္တိယော အာပဇ္ဇတိ? ကိစ္စာဓိကရဏပစ္စယာ ပဉ္စ အာပတ္တိယော အာပဇ္ဇတိ။ ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇတိ၊ ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ ပါရာဇိကဿ။ ဘေဒကာနုဝတ္တကာ ဘိက္ခူ ယာဝတတိယံ သမနုဘာသနာယ န ပဋိနိဿဇ္ဇန္တိ၊ အာပတ္တိ သင်္ဃာဒိသေသဿ၊ ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇတိ၊ အာပတ္တိ ပါစိတ္တိယဿ ¶ – ကိစ္စာဓိကရဏပစ္စယာ ဣမာ ပဉ္စ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ…ပေ… သတ္တန္နံ သမထာနံ ကတိဟိ ¶ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ပဉ္စဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ သင်္ဃာဒိသေသာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝါစတော စ စိတ္တတော စ သမုဋ္ဌန္တိ ¶ ။ စတုန္နံ အဓိကရဏာနံ၊ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။

ဌပေတွာ သတ္တ အာပတ္တိယော သတ္တ အာပတ္တိက္ခန္ဓေ၊ အဝသေသာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? ဌပေတွာ သတ္တ အာပတ္တိယော သတ္တ ¶ အာပတ္တိက္ခန္ဓေ အဝသေသာ အာပတ္တိယော စတုန္နံ ဝိပတ္တီနံ န ကတမံ ဝိပတ္တိံ ဘဇန္တိ? သတ္တန္နံ အာပတ္တိက္ခန္ဓာနံ န ကတမေန အာပတ္တိက္ခန္ဓေန သင်္ဂဟိတာ။ ဆန္နံ အာပတ္တိသမုဋ္ဌာနာနံ န ကတမေန အာပတ္တိသမုဋ္ဌာနေန သမုဋ္ဌန္တိ။ စတုန္နံ အဓိကရဏာနံ န ကတမံ အဓိကရဏံ။ သတ္တန္နံ သမထာနံ န ကတမေန သမထေန သမ္မန္တိ။ တံ ကိဿ ဟေတု? ဌပေတွာ သတ္တ အာပတ္တိယော သတ္တ အာပတ္တိက္ခန္ဓေ၊ နတ္ထညာ အာပတ္တိယောတိ။

အဓိကရဏပစ္စယဝါရော နိဋ္ဌိတော ပဉ္စမော။

အန္တရပေယျာလံ [အနန္တရပေယျာလံ (သီ။ သျာ။)] နိဋ္ဌိတံ။

ကတိပုစ္ဆာ သမုဋ္ဌာနာ၊ ကတာပတ္တိ တထေဝ စ၊

သမုဋ္ဌာနာ ဝိပတ္တိ စ၊ တထာဓိကရဏေန စာတိ။

၂၉၂။ ဝိဝါဒါဓိကရဏဿ ¶ ¶ ¶ – ကိံ ပုဗ္ဗင်္ဂမံ? ကတိ ဌာနာနိ? ကတိ ဝတ္ထူနိ? ကတိ ဘူမိယော? ကတိ ဟေတူ? ကတိ မူလာနိ? ကတိဟာကာရေဟိ ဝိဝဒတိ? ဝိဝါဒါဓိကရဏံ ကတိဟိ သမထေဟိ သမ္မတိ?

အနုဝါဒါဓိကရဏဿ – ကိံ ပုဗ္ဗင်္ဂမံ? ကတိ ဌာနာနိ? ကတိ ဝတ္ထူနိ? ကတိ ဘူမိယော? ကတိ ဟေတူ? ကတိ မူလာနိ? ကတိဟာကာရေဟိ အနုဝဒတိ? အနုဝါဒါဓိကရဏံ ကတိဟိ သမထေဟိ သမ္မတိ?

အာပတ္တာဓိကရဏဿ – ကိံ ပုဗ္ဗင်္ဂမံ? ကတိ ဌာနာနိ? ကတိ ဝတ္ထူနိ? ကတိ ဘူမိယော? ကတိ ဟေတူ? ကတိ မူလာနိ? ကတိဟာကာရေဟိ အာပတ္တိံ အာပဇ္ဇတိ? အာပတ္တာဓိကရဏံ ကတိဟိ သမထေဟိ သမ္မတိ?

ကိစ္စာဓိကရဏဿ – ကိံ ပုဗ္ဗင်္ဂမံ? ကတိ ဌာနာနိ? ကတိ ဝတ္ထူနိ? ကတိ ဘူမိယော? ကတိ ဟေတူ? ကတိ မူလာနိ? ကတိဟာကာရေဟိ ကိစ္စံ ဇာယတိ? ကိစ္စာဓိကရဏံ ကတိဟိ သမထေဟိ သမ္မတိ?

၂၉၃။ ဝိဝါဒါဓိကရဏဿ ¶ ကိံ ပုဗ္ဗင်္ဂမန္တိ? လောဘော ပုဗ္ဗင်္ဂမော၊ ဒေါသော ပုဗ္ဗင်္ဂမော၊ မောဟော ပုဗ္ဗင်္ဂမော၊ အလောဘော ပုဗ္ဗင်္ဂမော၊ အဒေါသော ပုဗ္ဗင်္ဂမော၊ အမောဟော ပုဗ္ဗင်္ဂမော။ ကတိ ဌာနာနီတိ? အဋ္ဌာရသ ဘေဒကရဝတ္ထူနိ ဌာနာနိ။ ကတိ ဝတ္ထူနီတိ? အဋ္ဌာရသ ဘေဒကရဝတ္ထူနိ။ ကတိ ဘူမိယောတိ? အဋ္ဌာရသ ဘေဒကရဝတ္ထူနိ ဘူမိယော။ ကတိ ဟေတူတိ? နဝ ဟေတူ – တယော ကုသလဟေတူ ¶ ၊ တယော အကုသလဟေတူ၊ တယော အဗျာကတဟေတူ။ ကတိ မူလာနီတိ? ဒွါဒသ မူလာနိ။ ကတိဟာကာရေဟိ ဝိဝဒတီတိ? ဒွီဟာကာရေဟိ ဝိဝဒတိ – ဓမ္မဒိဋ္ဌိ ဝါ အဓမ္မဒိဋ္ဌိ ဝါ။ [စူဠဝ။ ၂၂၈] ဝိဝါဒါဓိကရဏံ ကတိဟိ သမထေဟိ သမ္မတီတိ? ဝိဝါဒါဓိကရဏံ ¶ ဒွီဟိ သမထေဟိ သမ္မတိ – သမ္မုခါဝိနယေန စ ယေဘုယျသိကာယ စ။

၂၉၄။ အနုဝါဒါဓိကရဏဿ ကိံ ပုဗ္ဗင်္ဂမန္တိ? လောဘော ပုဗ္ဗင်္ဂမော၊ ဒေါသော ပုဗ္ဗင်္ဂမော၊ မောဟော ပုဗ္ဗင်္ဂမော၊ အလောဘော ပုဗ္ဗင်္ဂမော၊ အဒေါသော ပုဗ္ဗင်္ဂမော၊ အမောဟော ပုဗ္ဗင်္ဂမော။ ကတိ ဌာနာနီတိ? စတဿော ဝိပတ္တိယော ¶ ဌာနာနိ။ ကတိ ဝတ္ထူနီတိ? စတဿော ဝိပတ္တိယော ဝတ္ထူနိ။ ကတိ ဘူမိယောတိ? စတဿော ဝိပတ္တိယော ဘူမိယော။ ကတိ ဟေတူတိ? နဝ ဟေတူ – တယော ကုသလဟေတူ၊ တယော အကုသလဟေတူ၊ တယော အဗျာကတဟေတူ။ ကတိ မူလာနီတိ? စုဒ္ဒသ မူလာနိ။ ကတိဟာကာရေဟိ အနုဝဒတီတိ? ဒွီဟာကာရေဟိ အနုဝဒတိ – ဝတ္ထုတော ဝါ အာပတ္တိတော ဝါ။ [စူဠဝ။ ၂၃၆] အနုဝါဒါဓိကရဏံ ကတိဟိ သမထေဟိ သမ္မတီတိ? အနုဝါဒါဓိကရဏံ စတူဟိ သမထေဟိ သမ္မတိ – သမ္မုခါဝိနယေန စ သတိဝိနယေန စ အမူဠှဝိနယေန စ တဿပါပိယသိကာယ စ။

၂၉၅။ အာပတ္တာဓိကရဏဿ ကိံ ပုဗ္ဗင်္ဂမန္တိ? လောဘော ပုဗ္ဗင်္ဂမော၊ ဒေါသော ပုဗ္ဗင်္ဂမော၊ မောဟော ပုဗ္ဗင်္ဂမော၊ အလောဘော ပုဗ္ဗင်္ဂမော၊ အဒေါသော ပုဗ္ဗင်္ဂမော၊ အမောဟော ပုဗ္ဗင်္ဂမော။ ကတိ ဌာနာနီတိ? သတ္တ အာပတ္တိက္ခန္ဓာ ဌာနာနိ။ ကတိ ဝတ္ထူနီတိ? သတ္တ အာပတ္တိက္ခန္ဓာ ဝတ္ထူနိ။ ကတိ ဘူမိယောတိ? သတ္တ အာပတ္တိက္ခန္ဓာ ဘူမိယော။ ကတိ ဟေတူတိ? ဆ ဟေတူ [ကတိ ဟေတူတိ နဝ ဟေတူ၊ တယော ကုသလဟေတူ (သီ။ သျာ။)] – တယော အကုသလဟေတူ၊ တယော အဗျာကတဟေတူ။ ကတိ မူလာနီတိ? ဆ အာပတ္တိသမုဋ္ဌာနာနိ မူလာနိ ¶ ။ ကတိဟာကာရေဟိ အာပတ္တိံ အာပဇ္ဇတီတိ? ဆဟာကာရေဟိ အာပတ္တိံ အာပဇ္ဇတိ – အလဇ္ဇိတာ၊ အညာဏတာ၊ ကုက္ကုစ္စပကတတာ၊ အကပ္ပိယေ ကပ္ပိယသညိတာ၊ ကပ္ပိယေ အကပ္ပိယသညိတာ၊ သတိသမ္မောသာ။ [စူဠဝ။ ၂၃၉] အာပတ္တာဓိကရဏံ ကတိဟိ သမထေဟိ သမ္မတီတိ? အာပတ္တာဓိကရဏံ တီဟိ သမထေဟိ သမ္မတိ – သမ္မုခါဝိနယေန စ ပဋိညာတကရဏေန စ၊ သမ္မုခါဝိနယေန စ တိဏဝတ္ထာရကေန စ။

၂၉၆။ ကိစ္စာဓိကရဏဿ ကိံ ပုဗ္ဗင်္ဂမန္တိ? လောဘော ပုဗ္ဗင်္ဂမော၊ ဒေါသော ပုဗ္ဗင်္ဂမော၊ မောဟော ပုဗ္ဗင်္ဂမော၊ အလောဘော ပုဗ္ဗင်္ဂမော၊ အဒေါသော ပုဗ္ဗင်္ဂမော၊ အမောဟော ပုဗ္ဗင်္ဂမော။ ကတိ ဌာနာနီတိ? စတ္တာရိ ကမ္မာနိ ဌာနာနိ။ ကတိ ဝတ္ထူနီတိ? စတ္တာရိ ကမ္မာနိ ဝတ္ထူနိ။ ကတိ ဘူမိယောတိ? စတ္တာရိ ကမ္မာနိ ဘူမိယော။ ကတိ ဟေတူတိ? နဝ ဟေတူ – တယော ကုသလဟေတူ၊ တယော အကုသလဟေတူ၊ တယော အဗျာကတဟေတူ။ ကတိ မူလာနီတိ? ဧကံ မူလံ – သင်္ဃော။ ကတိဟာကာရေဟိ ကိစ္စံ ဇာယတီတိ ¶ ? ဒွီဟာကာရေဟိ ကိစ္စံ ဇာယတိ – ဉတ္တိတော ဝါ အပလောကနတော ဝါ။ [စူဠဝ။ ၂၄၂] ကိစ္စာဓိကရဏံ ¶ ကတိဟိ သမထေဟိ သမ္မတီတိ? ကိစ္စာဓိကရဏံ ဧကေန သမထေန သမ္မတိ – သမ္မုခါဝိနယေန။

ကတိ ¶ သမထာ? သတ္တ သမထာ။ သမ္မုခါဝိနယော၊ သတိဝိနယော၊ အမူဠှဝိနယော၊ ပဋိညာတကရဏံ၊ ယေဘုယျသိကာ၊ တဿပါပိယသိကာ၊ တိဏဝတ္ထာရကော – ဣမေ သတ္တ သမထာ။

သိယာ ဣမေ သတ္တ သမထာ ဒသ သမထာ ဟောန္တိ၊ ဒသ သမထာ သတ္တ သမထာ ဟောန္တိ ဝတ္ထုဝသေန ပရိယာယေန သိယာတိ။

ကထဉ္စ သိယာ? ဝိဝါဒါဓိကရဏဿ ဒွေ သမထာ ¶ ၊ အနုဝါဒါဓိကရဏဿ စတ္တာရော သမထာ၊ အာပတ္တာဓိကရဏဿ တယော သမထာ၊ ကိစ္စာဓိကရဏဿ ဧကော သမထော။ ဧဝံ ဣမေ သတ္တ သမထာ ဒသ သမထာ ဟောန္တိ၊ ဒသ သမထာ သတ္တ သမထာ ဟောန္တိ ဝတ္ထုဝသေန ပရိယာယေန။

ပရိယာယဝါရော နိဋ္ဌိတော ဆဋ္ဌော။

၂၉၇။ ကတိ သမထာ ဝိဝါဒါဓိကရဏဿ သာဓာရဏာ? ကတိ သမထာ ဝိဝါဒါဓိကရဏဿ အသာဓာရဏာ? ကတိ သမထာ အနုဝါဒါဓိကရဏဿ သာဓာရဏာ? ကတိ သမထာ အနုဝါဒါဓိကရဏဿ အသာဓာရဏာ? ကတိ သမထာ အာပတ္တာဓိကရဏဿ သာဓာရဏာ? ကတိ သမထာ အာပတ္တာဓိကရဏဿ အသာဓာရဏာ? ကတိ သမထာ ကိစ္စာဓိကရဏဿ သာဓာရဏာ? ကတိ သမထာ ကိစ္စာဓိကရဏဿ အသာဓာရဏာ?

ဒွေ သမထာ ဝိဝါဒါဓိကရဏဿ သာဓာရဏာ – သမ္မုခါဝိနယော၊ ယေဘုယျသိကာ။ ပဉ္စ သမထာ ဝိဝါဒါဓိကရဏဿ အသာဓာရဏာ – သတိဝိနယော၊ အမူဠှဝိနယော၊ ပဋိညာတကရဏံ၊ တဿပါပိယသိကာ၊ တိဏဝတ္ထာရကော။

စတ္တာရော သမထာ အနုဝါဒါဓိကရဏဿ သာဓာရဏာ – သမ္မုခါဝိနယော၊ သတိဝိနယော၊ အမူဠှဝိနယော၊ တဿပါပိယသိကာ။ တယော သမထာ အနုဝါဒါဓိကရဏဿ အသာဓာရဏာ – ယေဘုယျသိကာ၊ ပဋိညာတကရဏံ၊ တိဏဝတ္ထာရကော။

တယော ¶ ¶ သမထာ အာပတ္တာဓိကရဏဿ သာဓာရဏာ – သမ္မုခါဝိနယော၊ ပဋိညာတကရဏံ၊ တိဏဝတ္ထာရကော။ စတ္တာရော သမထာ အာပတ္တာဓိကရဏဿ အသာဓာရဏာ – ယေဘုယျသိကာ၊ သတိဝိနယော၊ အမူဠှဝိနယော၊ တဿပါပိယသိကာ ¶ ။

ဧကော သမထော ကိစ္စာဓိကရဏဿ သာဓာရဏော – သမ္မုခါဝိနယော။ ဆ သမထာ ကိစ္စာဓိကရဏဿ အသာဓာရဏာ – ယေဘုယျသိကာ၊ သတိဝိနယော၊ အမူဠှဝိနယော၊ ပဋိညာတကရဏံ၊ တဿပါပိယသိကာ၊ တိဏဝတ္ထာရကော။

သာဓာရဏဝါရော နိဋ္ဌိတော သတ္တမော။

၂၉၈။ ကတိ သမထာ ဝိဝါဒါဓိကရဏဿ တဗ္ဘာဂိယာ? ကတိ သမထာ ဝိဝါဒါဓိကရဏဿ အညဘာဂိယာ? ကတိ သမထာ အနုဝါဒါဓိကရဏဿ တဗ္ဘာဂိယာ? ကတိ သမထာ အနုဝါဒါဓိကရဏဿ အညဘာဂိယာ? ကတိ သမထာ အာပတ္တာဓိကရဏဿ တဗ္ဘာဂိယာ? ကတိ သမထာ အာပတ္တာဓိကရဏဿ အညဘာဂိယာ? ကတိ သမထာ ကိစ္စာဓိကရဏဿ တဗ္ဘာဂိယာ? ကတိ သမထာ ကိစ္စာဓိကရဏဿ အညဘာဂိယာ?

ဒွေ ¶ သမထာ ဝိဝါဒါဓိကရဏဿ တဗ္ဘာဂိယာ – သမ္မုခါဝိနယော၊ ယေဘုယျသိကာ။ ပဉ္စ သမထာ ဝိဝါဒါဓိကရဏဿ အညဘာဂိယာ – သတိဝိနယော၊ အမူဠှဝိနယော၊ ပဋိညာတကရဏံ၊ တဿပါပိယသိကာ၊ တိဏဝတ္ထာရကော။

စတ္တာရော သမထာ အနုဝါဒါဓိကရဏဿ တဗ္ဘာဂိယာ – သမ္မုခါဝိနယော၊ သတိဝိနယော၊ အမူဠှဝိနယော၊ တဿပါပိယသိကာ။ တယော သမထာ အနုဝါဒါဓိကရဏဿ အညဘာဂိယာ – ယေဘုယျသိကာ၊ ပဋိညာတကရဏံ၊ တိဏဝတ္ထာရကော။

တယော သမထာ အာပတ္တာဓိကရဏဿ တဗ္ဘာဂိယာ – သမ္မုခါဝိနယော၊ ပဋိညာတကရဏံ၊ တိဏဝတ္ထာရကော။ စတ္တာရော သမထာ အာပတ္တာဓိကရဏဿ အညဘာဂိယာ – ယေဘုယျသိကာ၊ သတိဝိနယော၊ အမူဠှဝိနယော၊ တဿပါပိယသိကာ။

ဧကော ¶ ¶ ¶ သမထော ကိစ္စာဓိကရဏဿ တဗ္ဘာဂိယော – သမ္မုခါဝိနယော။ ဆ သမထာ ကိစ္စာဓိကရဏဿ အညဘာဂိယာ – ယေဘုယျသိကာ၊ သတိဝိနယော၊ အမူဠှဝိနယော၊ ပဋိညာတကရဏံ၊ တဿပါပိယသိကာ၊ တိဏဝတ္ထာရကော။

တဗ္ဘာဂိယဝါရော နိဋ္ဌိတော အဋ္ဌမော။

၂၉၉။ သမထာ သမထဿ သာဓာရဏာ၊ သမထာ သမထဿ အသာဓာရဏာ။ သိယာ သမထာ သမထဿ သာဓာရဏာ၊ သိယာ သမထာ သမထဿ အသာဓာရဏာ။

ကထံ သိယာ သမထာ သမထဿ သာဓာရဏာ? ကထံ သိယာ သမထာ သမထဿ အသာဓာရဏာ? ယေဘုယျသိကာ သမ္မုခါဝိနယဿ သာဓာရဏာ၊ သတိဝိနယဿ အမူဠှဝိနယဿ ပဋိညာတကရဏဿ တဿပါပိယသိကာယ တိဏဝတ္ထာရကဿ အသာဓာရဏာ။

သတိဝိနယော သမ္မုခါဝိနယဿ သာဓာရဏော၊ အမူဠှဝိနယဿ ပဋိညာတကရဏဿ တဿပါပိယသိကာယ တိဏဝတ္ထာရကဿ ယေဘုယျသိကာယ အသာဓာရဏော။

အမူဠှဝိနယော သမ္မုခါဝိနယဿ သာဓာရဏော၊ ပဋိညာတကရဏဿ တဿပါပိယသိကာယ တိဏဝတ္ထာရကဿ ယေဘုယျသိကာယ သတိဝိနယဿ အသာဓာရဏော။

ပဋိညာတကရဏံ သမ္မုခါဝိနယဿ သာဓာရဏံ၊ တဿပါပိယသိကာယ တိဏဝတ္ထာရကဿ ယေဘုယျသိကာယ သတိဝိနယဿ အမူဠှဝိနယဿ အသာဓာရဏံ။

တဿပါပိယသိကာ သမ္မုခါဝိနယဿ သာဓာရဏာ၊ တိဏဝတ္ထာရကဿ ယေဘုယျသိကာယ သတိဝိနယဿ အမူဠှဝိနယဿ ပဋိညာတကရဏဿ အသာဓာရဏာ။

တိဏဝတ္ထာရကော သမ္မုခါဝိနယဿ သာဓာရဏော၊ ယေဘုယျသိကာယ သတိဝိနယဿ အမူဠှဝိနယဿ ¶ ပဋိညာတကရဏဿ တဿပါပိယသိကာယ အသာဓာရဏော ¶ ။ ဧဝံ ¶ သိယာ သမထာ သမထဿ သာဓာရဏာ၊ ဧဝံ သိယာ သမထာ သမထဿ အသာဓာရဏာ။

သမထာ သမထဿ သာဓာရဏဝါရော နိဋ္ဌိတော နဝမော။

၃၀၀။ သမထာ သမထဿ တဗ္ဘာဂိယာ၊ သမထာ သမထဿ အညဘာဂိယာ။ သိယာ သမထာ သမထဿ တဗ္ဘာဂိယာ၊ သိယာ သမထာ သမထဿ အညဘာဂိယာ။

ကထံ သိယာ သမထာ သမထဿ တဗ္ဘာဂိယာ? ကထံ သိယာ သမထာ သမထဿ အညဘာဂိယာ? ယေဘုယျသိကာ သမ္မုခါဝိနယဿ တဗ္ဘာဂိယာ၊ သတိဝိနယဿ အမူဠှဝိနယဿ ပဋိညာတကရဏဿ တဿပါပိယသိကာယ တိဏဝတ္ထာရကဿ အညဘာဂိယာ။

သတိဝိနယော သမ္မုခါဝိနယဿ တဗ္ဘာဂိယော၊ အမူဠှဝိနယဿ ပဋိညာတကရဏဿ တဿပါပိယသိကာယ တိဏဝတ္ထာရကဿ ယေဘုယျသိကာယ အညဘာဂိယော။

အမူဠှဝိနယော သမ္မုခါဝိနယဿ တဗ္ဘာဂိယော၊ ပဋိညာတကရဏဿ တဿပါပိယသိကာယ တိဏဝတ္ထာရကဿ ယေဘုယျသိကာယ သတိဝိနယဿ အညဘာဂိယော။

ပဋိညာတကရဏံ သမ္မုခါဝိနယဿ တဗ္ဘာဂိယံ၊ တဿပါပိယသိကာယ တိဏဝတ္ထာရကဿ ယေဘုယျသိကာယ သတိဝိနယဿ အမူဠှဝိနယဿ အညဘာဂိယံ။

တဿပါပိယသိကာ သမ္မုခါဝိနယဿ တဗ္ဘာဂိယာ၊ တိဏဝတ္ထာရကဿ ယေဘုယျသိကာယ သတိဝိနယဿ အမူဠှဝိနယဿ ပဋိညာတကရဏဿ အညဘာဂိယာ။

တိဏဝတ္ထာရကော သမ္မုခါဝိနယဿ တဗ္ဘာဂိယော၊ ယေဘုယျသိကာယ သတိဝိနယဿ အမူဠှဝိနယဿ ပဋိညာတကရဏဿ တဿပါပိယသိကာယ အညဘာဂိယော။ ဧဝံ သိယာ သမထာ သမထဿ တဗ္ဘာဂိယာ၊ ဧဝံ သိယာ ¶ သမထာ သမထဿ အညဘာဂိယာ။

သမထာ သမထဿ တဗ္ဘာဂိယဝါရော နိဋ္ဌိတော ဒသမော။

၃၀၁။ သမထော ¶ ¶ သမ္မုခါဝိနယော၊ သမ္မုခါဝိနယော သမထော? သမထော ယေဘုယျသိကာ၊ ယေဘုယျသိကာ သမထော? သမထော သတိဝိနယော ¶ ၊ သတိဝိနယော သမထော? သမထော အမူဠှဝိနယော၊ အမူဠှဝိနယော သမထော? သမထော ပဋိညာတကရဏံ၊ ပဋိညာတကရဏံ သမထော? သမထော တဿပါပိယသိကာ၊ တဿပါပိယသိကာ သမထော? သမထော တိဏဝတ္ထာရကော၊ တိဏဝတ္ထာရကော သမထော?

ယေဘုယျသိကာ သတိဝိနယော အမူဠှဝိနယော ပဋိညာတကရဏံ တဿပါပိယသိကာ တိဏဝတ္ထာရကော – ဣမေ သမထာ သမထာ၊ နော သမ္မုခါဝိနယော။ သမ္မုခါဝိနယော သမထော စေဝ သမ္မုခါဝိနယော စ။

သတိဝိနယော အမူဠှဝိနယော ပဋိညာတကရဏံ တဿပါပိယသိကာ တိဏဝတ္ထာရကော သမ္မုခါဝိနယော – ဣမေ သမထာ သမထာ၊ နော ယေဘုယျသိကာ။ ယေဘုယျသိကာ သမထော စေဝ ယေဘုယျသိကာ စ။

အမူဠှဝိနယော ပဋိညာတကရဏံ တဿပါပိယသိကာ တိဏဝတ္ထာရကော သမ္မုခါဝိနယော ယေဘုယျသိကာ – ဣမေ သမထာ သမထာ၊ နော သတိဝိနယော။ သတိဝိနယော သမထော စေဝ သတိဝိနယော စ။

ပဋိညာတကရဏံ တဿပါပိယသိကာ တိဏဝတ္ထာရကော သမ္မုခါဝိနယော ယေဘုယျသိကာ သတိဝိနယော – ဣမေ သမထာ သမထာ၊ နော အမူဠှဝိနယော။ အမူဠှဝိနယော သမထော စေဝ အမူဠှဝိနယော စ။

တဿပါပိယသိကာ တိဏဝတ္ထာရကော သမ္မုခါဝိနယော ယေဘုယျသိကာ သတိဝိနယော အမူဠှဝိနယော – ဣမေ သမထာ သမထာ၊ နော ပဋိညာတကရဏံ။ ပဋိညာတကရဏံ ¶ သမထော စေဝ ပဋိညာတကရဏဉ္စ။

တိဏဝတ္ထာရကော သမ္မုခါဝိနယော ယေဘုယျသိကာ သတိဝိနယော အမူဠှဝိနယော ပဋိညာတကရဏံ – ဣမေ သမထာ သမထာ၊ နော တဿပါပိယသိကာ။ တဿပါပိယသိကာ သမထော စေဝ တဿပါပိယသိကာ စ။

သမ္မုခါဝိနယော ¶ ယေဘုယျသိကာ သတိဝိနယော အမူဠှဝိနယော ပဋိညာတကရဏံ တဿပါပိယသိကာ – ဣမေ သမထာ သမထာ၊ နော တိဏဝတ္ထာရကော။ တိဏဝတ္ထာရကော သမထော စေဝ တိဏဝတ္ထာရကော စ။

သမထသမ္မုခါဝိနယဝါရော နိဋ္ဌိတော ဧကာဒသမော။

၃၀၂။ ဝိနယော ¶ သမ္မုခါဝိနယော၊ သမ္မုခါဝိနယော ဝိနယော? ဝိနယော ယေဘုယျသိကာ၊ ယေဘုယျသိကာ ဝိနယော? ဝိနယော သတိဝိနယော၊ သတိဝိနယော ဝိနယော? ဝိနယော အမူဠှဝိနယော၊ အမူဠှဝိနယော ဝိနယော? ဝိနယော ပဋိညာတကရဏံ၊ ပဋိညာတကရဏံ ဝိနယော? ဝိနယော တဿပါပိယသိကာ၊ တဿပါပိယသိကာ ဝိနယော? ဝိနယော တိဏဝတ္ထာရကော၊ တိဏဝတ္ထာရကော ဝိနယော?

ဝိနယော သိယာ သမ္မုခါဝိနယော သိယာ န သမ္မုခါဝိနယော။ သမ္မုခါဝိနယော ဝိနယော စေဝ သမ္မုခါဝိနယော စ။

ဝိနယော သိယာ ယေဘုယျသိကာ၊ သိယာ န ယေဘုယျသိကာ။ ယေဘုယျသိကာ ဝိနယော စေဝ ယေဘုယျသိကာ စ။

ဝိနယော သိယာ သတိဝိနယော၊ သိယာ န သတိဝိနယော။ သတိဝိနယော ဝိနယော စေဝ သတိဝိနယော စ။

ဝိနယော သိယာ အမူဠှဝိနယော၊ သိယာ န အမူဠှဝိနယော။ အမူဠှဝိနယော ဝိနယော စေဝ အမူဠှဝိနယော စ ¶ ။

ဝိနယော သိယာ ပဋိညာတကရဏံ၊ သိယာ န ပဋိညာတကရဏံ။ ပဋိညာတကရဏံ ဝိနယော စေဝ ပဋိညာတကရဏဉ္စ။

ဝိနယော ¶ သိယာ တဿပါပိယသိကာ၊ သိယာ န တဿပါပိယသိကာ။ တဿပါပိယသိကာ ဝိနယော စေဝ တဿပါပိယသိကာ စ။

ဝိနယော သိယာ တိဏဝတ္ထာရကော၊ သိယာ န တိဏဝတ္ထာရကော။ တိဏဝတ္ထာရကော ဝိနယော စေဝ တိဏဝတ္ထာရကော စ။

ဝိနယဝါရော နိဋ္ဌိတော ဒွါဒသမော။

၃၀၃။ သမ္မုခါဝိနယော ကုသလော အကုသလော အဗျာကတော? ယေဘုယျသိကာ ကုသလာ အကုသလာ အဗျာကတာ? သတိဝိနယော ကုသလော အကုသလော အဗျာကတော? အမူဠှဝိနယော ကုသလော အကုသလော ¶ အဗျာကတော? ပဋိညာတကရဏံ ကုသလံ အကုသလံ အဗျာကတံ? တဿပါပိယသိကာ ကုသလာ အကုသလာ အဗျာကတာ? တိဏဝတ္ထာရကော ကုသလော အကုသလော အဗျာကတော?

သမ္မုခါဝိနယော သိယာ ကုသလော၊ သိယာ အဗျာကတော။ နတ္ထိ သမ္မုခါဝိနယော အကုသလော။

ယေဘုယျသိကာ သိယာ ကုသလာ၊ သိယာ အကုသလာ၊ သိယာ အဗျာကတာ။

သတိဝိနယော သိယာ ကုသလော၊ သိယာ အကုသလော၊ သိယာ အဗျာကတော။

အမူဠှဝိနယော သိယာ ကုသလော၊ သိယာ အကုသလော၊ သိယာ အဗျာကတော။

ပဋိညာတကရဏံ သိယာ ကုသလံ၊ သိယာ အကုသလံ၊ သိယာ အဗျာကတံ။

တဿပါပိယသိကာ သိယာ ကုသလာ၊ သိယာ အကုသလာ သိယာ အဗျာကတာ။

တိဏဝတ္ထာရကော သိယာ ကုသလော၊ သိယာ အကုသလော၊ သိယာ အဗျာကတော။

ဝိဝါဒါဓိကရဏံ ကုသလံ အကုသလံ အဗျာကတံ။ အနုဝါဒါဓိကရဏံ ကုသလံ အကုသလံ ¶ အဗျာကတံ။ အာပတ္တာဓိကရဏံ ကုသလံ အကုသလံ အဗျာကတံ။ ကိစ္စာဓိကရဏံ ¶ ကုသလံ အကုသလံ အဗျာကတံ။

ဝိဝါဒါဓိကရဏံ ¶ သိယာ ကုသလံ၊ သိယာ အကုသလံ၊ သိယာ အဗျာကတံ။

အနုဝါဒါဓိကရဏံ သိယာ ကုသလံ၊ သိယာ အကုသလံ၊ သိယာ အဗျာကတံ။

အာပတ္တာဓိကရဏံ သိယာ အကုသလံ၊ သိယာ အဗျာကတံ။ နတ္ထိ အာပတ္တာဓိကရဏံ ကုသလံ။

ကိစ္စာဓိကရဏံ သိယာ ကုသလံ၊ သိယာ အကုသလံ၊ သိယာ အဗျာကတံ။

ကုသလဝါရော နိဋ္ဌိတော တေရသမော။

၃၀၄။ ယတ္ထ ¶ ယေဘုယျသိကာ လဗ္ဘတိ၊ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ၊ တတ္ထ ယေဘုယျသိကာ လဗ္ဘတိ။ န တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော လဗ္ဘတိ၊ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ လဗ္ဘတိ၊ န တတ္ထ တိဏဝတ္ထာရကော လဗ္ဘတိ။

ယတ္ထ သတိဝိနယော လဗ္ဘတိ၊ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ၊ တတ္ထ သတိဝိနယော လဗ္ဘတိ။ န တတ္ထ အမူဠှဝိနယော လဗ္ဘတိ၊ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ လဗ္ဘတိ၊ န တတ္ထ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ။

ယတ္ထ အမူဠှဝိနယော လဗ္ဘတိ၊ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ၊ တတ္ထ အမူဠှဝိနယော လဗ္ဘတိ။ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ လဗ္ဘတိ၊ န တတ္ထ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ၊ န တတ္ထ သတိဝိနယော လဗ္ဘတိ။

ယတ္ထ ¶ ပဋိညာတကရဏံ လဗ္ဘတိ၊ တတ္ထ သမ္မုခါဝိနယော ¶ လဗ္ဘတိ၊ ယတ္ထ သမ္မုခါဝိနယော လဗ္ဘတိ၊ တတ္ထ ပဋိညာတကရဏံ လဗ္ဘတိ။ န တတ္ထ တဿပါပိယသိကာ လဗ္ဘတိ၊ န တတ္ထ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ၊ န တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော လဗ္ဘတိ။

ယတ္ထ တဿပါပိယသိကာ လဗ္ဘတိ၊ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ၊ တတ္ထ တဿပါပိယသိကာ လဗ္ဘတိ။ န တတ္ထ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ၊ န တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော လဗ္ဘတိ၊ န တတ္ထ ပဋိညာတကရဏံ လဗ္ဘတိ။

ယတ္ထ တိဏဝတ္ထာရကော လဗ္ဘတိ၊ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ၊ တတ္ထ တိဏဝတ္ထာရကော လဗ္ဘတိ။ န တတ္ထ ယေဘုယျသိကာ လဗ္ဘတိ၊ န တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော ¶ လဗ္ဘတိ၊ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ လဗ္ဘတိ။

ယတ္ထ ယေဘုယျသိကာ တတ္ထ သမ္မုခါဝိနယော၊ ယတ္ထ သမ္မုခါဝိနယော တတ္ထ ယေဘုယျသိကာ။ န တတ္ထ သတိဝိနယော၊ န တတ္ထ အမူဠှဝိနယော၊ န တတ္ထ ပဋိညာတကရဏံ၊ န တတ္ထ တဿပါပိယသိကာ၊ န တတ္ထ တိဏဝတ္ထာရကော။

ယတ္ထ သတိဝိနယော တတ္ထ သမ္မုခါဝိနယော၊ ယတ္ထ သမ္မုခါဝိနယော တတ္ထ သတိဝိနယော။ န တတ္ထ အမူဠှဝိနယော၊ န တတ္ထ ပဋိညာတကရဏံ၊ န တတ္ထ တဿပါပိယသိကာ၊ န တတ္ထ တိဏဝတ္ထာရကော၊ န တတ္ထ ယေဘုယျသိကာ။ သမ္မုခါဝိနယံ ¶ ကာတုန မူလံ…ပေ…။

ယတ္ထ တိဏဝတ္ထာရကော တတ္ထ သမ္မုခါဝိနယော၊ ယတ္ထ သမ္မုခါဝိနယော တတ္ထ တိဏဝတ္ထာရကော။ န တတ္ထ ယေဘုယျသိကာ၊ န တတ္ထ သတိဝိနယော၊ န တတ္ထ အမူဠှဝိနယော၊ န တတ္ထ ပဋိညာတကရဏံ၊ န တတ္ထ တဿပါပိယသိကာ။

ယတ္ထဝါရော နိဋ္ဌိတော စုဒ္ဒသမော။

၃၀၅။ ယသ္မိံ ¶ သမယေ သမ္မုခါဝိနယေန စ ယေဘုယျသိကာယ စ အဓိကရဏံ ဝူပသမ္မတိ၊ ယတ္ထ ယေဘုယျသိကာ လဗ္ဘတိ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ တတ္ထ ယေဘုယျသိကာ လဗ္ဘတိ။ န တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော လဗ္ဘတိ၊ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ လဗ္ဘတိ၊ န တတ္ထ တိဏဝတ္ထာရကော လဗ္ဘတိ။

ယသ္မိံ ¶ သမယေ သမ္မုခါဝိနယေန စ သတိဝိနယေန စ အဓိကရဏံ ဝူပသမ္မတိ၊ ယတ္ထ သတိဝိနယော လဗ္ဘတိ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ တတ္ထ သတိဝိနယော လဗ္ဘတိ။ န တတ္ထ အမူဠှဝိနယော လဗ္ဘတိ၊ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ ¶ လဗ္ဘတိ၊ န တတ္ထ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ။

ယသ္မိံ သမယေ သမ္မုခါဝိနယေန စ အမူဠှဝိနယေန စ အဓိကရဏံ ဝူပသမ္မတိ၊ ယတ္ထ အမူဠှဝိနယော လဗ္ဘတိ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ တတ္ထ အမူဠှဝိနယော လဗ္ဘတိ။ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ လဗ္ဘတိ၊ န တတ္ထ ¶ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ၊ န တတ္ထ သတိဝိနယော လဗ္ဘတိ။

ယသ္မိံ သမယေ သမ္မုခါဝိနယေန စ ပဋိညာတကရဏေန စ အဓိကရဏံ ဝူပသမ္မတိ၊ ယတ္ထ ပဋိညာတကရဏံ လဗ္ဘတိ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ တတ္ထ ပဋိညာတကရဏံ လဗ္ဘတိ။ န တတ္ထ တဿပါပိယသိကာ လဗ္ဘတိ၊ န တတ္ထ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ၊ န တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော လဗ္ဘတိ။

ယသ္မိံ သမယေ သမ္မုခါဝိနယေန စ တဿပါပိယသိကာယ စ အဓိကရဏံ ဝူပသမ္မတိ၊ ယတ္ထ တဿပါပိယသိကာ လဗ္ဘတိ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ တတ္ထ တဿပါပိယသိကာ လဗ္ဘတိ။ န တတ္ထ တိဏဝတ္ထာရကော လဗ္ဘတိ၊ န တတ္ထ ယေဘုယျသိကာ လဗ္ဘတိ၊ န ¶ တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော လဗ္ဘတိ၊ န တတ္ထ ပဋိညာတကရဏံ လဗ္ဘတိ။

ယသ္မိံ သမယေ သမ္မုခါဝိနယေန စ တိဏဝတ္ထာရကေန စ အဓိကရဏံ ဝူပသမ္မတိ၊ ယတ္ထ တိဏဝတ္ထာရကော လဗ္ဘတိ တတ္ထ သမ္မုခါဝိနယော လဗ္ဘတိ၊ ယတ္ထ သမ္မုခါဝိနယော လဗ္ဘတိ တတ္ထ တိဏဝတ္ထာရကော လဗ္ဘတိ။ န တတ္ထ ယေဘုယျသိကာ လဗ္ဘတိ၊ န တတ္ထ သတိဝိနယော လဗ္ဘတိ၊ န တတ္ထ အမူဠှဝိနယော လဗ္ဘတိ၊ န တတ္ထ ပဋိညာတကရဏံ လဗ္ဘတိ၊ န တတ္ထ တဿပါပိယသိကာ လဗ္ဘတိ။

သမထဝါရော နိဋ္ဌိတော ပန္နရသမော။

၃၀၆။ အဓိကရဏန္တိ ¶ ¶ ဝါ သမထာတိ ဝါ ဣမေ ဓမ္မာ သံသဋ္ဌာ ဥဒါဟု ဝိသံသဋ္ဌာ? လဗ္ဘာ စ ပနိမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ [ဝိနိဗ္ဘုဇ္ဇိတွာ ဝိနိဗ္ဘုဇ္ဇိတွာ (က။)၊ ဋီကာယံ ဧကပဒမေဝ ဒိဿတိ] နာနာကရဏံ ပညာပေတုန္တိ?

အဓိကရဏန္တိ ဝါ သမထာတိ ဝါ ဣမေ ဓမ္မာ ဝိသံသဋ္ဌာ၊ နော သံသဋ္ဌာ။ လဗ္ဘာ စ ပနိမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုန္တိ။ သော – ‘‘မာ ဟေဝ’’န္တိဿ ဝစနီယော။ အဓိကရဏန္တိ ဝါ သမထာတိ ဝါ ဣမေ ဓမ္မာ သံသဋ္ဌာ၊ နော ဝိသံသဋ္ဌာ။ နော စ လဗ္ဘာ [န စ လဗ္ဘာ (က။)] ဣမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ။ တံ ကိဿ ဟေတု? နနု ဝုတ္တံ ဘဂဝတာ – ‘‘စတ္တာရိမာနိ၊ ဘိက္ခဝေ၊ အဓိကရဏာနိ၊ သတ္တ သမထာ။ အဓိကရဏာ သမထေဟိ သမ္မန္တိ၊ သမထာ အဓိကရဏေဟိ သမ္မန္တိ။ ဧဝံ၊ ဣမေ ဓမ္မာ သံသဋ္ဌာ နော ဝိသံသဋ္ဌာ၊ နော စ လဗ္ဘာ ဣမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတု’’န္တိ။

သံသဋ္ဌဝါရော နိဋ္ဌိတော သောဠသမော။

၃၀၇။ ဝိဝါဒါဓိကရဏံ ကတိဟိ သမထေဟိ သမ္မတိ? အနုဝါဒါဓိကရဏံ ကတိဟိ သမထေဟိ သမ္မတိ? အာပတ္တာဓိကရဏံ ကတိဟိ သမထေဟိ သမ္မတိ? ကိစ္စာဓိကရဏံ ကတိဟိ သမထေဟိ သမ္မတိ?

[စူဠဝ။ ၂၂၈၊ ၂၃၆ အာဒယော] ဝိဝါဒါဓိကရဏံ ¶ ဒွီဟိ သမထေဟိ သမ္မတိ – သမ္မုခါဝိနယေန စ ယေဘုယျသိကာယ စ။

[စူဠဝ။ ၂၂၈၊ ၂၃၆ အာဒယော] အနုဝါဒါဓိကရဏံ စတူဟိ သမထေဟိ သမ္မတိ – သမ္မုခါဝိနယေန စ သတိဝိနယေန စ အမူဠှဝိနယေန စ တဿပါပိယသိကာယ စ။

[စူဠဝ။ ၂၃၉၊ ၂၄၂ အာဒယော] အာပတ္တာဓိကရဏံ တီဟိ သမထေဟိ ¶ သမ္မတိ – သမ္မုခါဝိနယေန စ ပဋိညာတကရဏေန စ တိဏဝတ္ထာရကေန စ။

[စူဠဝ။ ၂၃၉၊ ၂၄၂ အာဒယော] ကိစ္စာဓိကရဏံ ဧကေန သမထေန သမ္မတိ – သမ္မုခါဝိနယေန။

ဝိဝါဒါဓိကရဏဉ္စ ¶ အနုဝါဒါဓိကရဏဉ္စ ကတိဟိ သမထေဟိ သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ ပဉ္စဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ တဿပါပိယသိကာယ စ။

ဝိဝါဒါဓိကရဏဉ္စ ¶ အာပတ္တာဓိကရဏဉ္စ ကတိဟိ သမထေဟိ သမ္မန္တိ? ဝိဝါဒါဓိကရဏဉ္စ အာပတ္တာဓိကရဏဉ္စ စတူဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ ပဋိညာတကရဏေန စ တိဏဝတ္ထာရကေန စ။

ဝိဝါဒါဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ဝိဝါဒါဓိကရဏဉ္စ ကိစ္စာဓိကရဏဉ္စ ဒွီဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ။

အနုဝါဒါဓိကရဏဉ္စ အာပတ္တာဓိကရဏဉ္စ ကတိဟိ သမထေဟိ သမ္မန္တိ? အနုဝါဒါဓိကရဏဉ္စ အာပတ္တာဓိကရဏဉ္စ ဆဟိ သမထေဟိ သမ္မန္တိ – သမ္မုခါဝိနယေန စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

အနုဝါဒါဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? အနုဝါဒါဓိကရဏဉ္စ ကိစ္စာဓိကရဏဉ္စ စတူဟိ သမထေဟိ သမ္မန္တိ – သမ္မုခါဝိနယေန စ သတိဝိနယေန စ အမူဠှဝိနယေန စ တဿပါပိယသိကာယ စ။

အာပတ္တာဓိကရဏဉ္စ ¶ ကိစ္စာဓိကရဏဉ္စ ကတိဟိ သမထေဟိ သမ္မန္တိ? အာပတ္တာဓိကရဏဉ္စ ကိစ္စာဓိကရဏဉ္စ တီဟိ သမထေဟိ သမ္မန္တိ – သမ္မုခါဝိနယေန ¶ စ ပဋိညာတကရဏေန စ တိဏဝတ္ထာရကေန စ။

ဝိဝါဒါဓိကရဏဉ္စ အနုဝါဒါဓိကရဏဉ္စ အာပတ္တာဓိကရဏဉ္စ ကတိဟိ သမထေဟိ သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ အာပတ္တာဓိကရဏဉ္စ သတ္တဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

ဝိဝါဒါဓိကရဏဉ္စ အနုဝါဒါဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ ကိစ္စာဓိကရဏဉ္စ ပဉ္စဟိ သမထေဟိ ¶ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ တဿပါပိယသိကာယ စ။

အနုဝါဒါဓိကရဏဉ္စ အာပတ္တာဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? အနုဝါဒါဓိကရဏဉ္စ အာပတ္တာဓိကရဏဉ္စ ကိစ္စာဓိကရဏဉ္စ ဆဟိ သမထေဟိ သမ္မန္တိ – သမ္မုခါဝိနယေန စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

ဝိဝါဒါဓိကရဏဉ္စ အနုဝါဒါဓိကရဏဉ္စ အာပတ္တာဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ အာပတ္တာဓိကရဏဉ္စ ကိစ္စာဓိကရဏဉ္စ သတ္တဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

သမ္မတိဝါရော နိဋ္ဌိတော သတ္တရသမော။

၃၀၈။ ဝိဝါဒါဓိကရဏံ ကတိဟိ သမထေဟိ သမ္မတိ၊ ကတိဟိ သမထေဟိ န သမ္မတိ? အနုဝါဒါဓိကရဏံ ကတိဟိ သမထေဟိ သမ္မတိ၊ ကတိဟိ သမထေဟိ န သမ္မတိ? အာပတ္တာဓိကရဏံ ကတိဟိ ¶ သမထေဟိ သမ္မတိ၊ ကတိဟိ သမထေဟိ န သမ္မတိ? ကိစ္စာဓိကရဏံ ကတိဟိ သမထေဟိ သမ္မတိ၊ ကတိဟိ သမထေဟိ န သမ္မတိ?

ဝိဝါဒါဓိကရဏံ ဒွီဟိ သမထေဟိ သမ္မတိ – သမ္မုခါဝိနယေန စ ယေဘုယျသိကာယ ¶ စ။ ပဉ္စဟိ သမထေဟိ န သမ္မတိ – သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

အနုဝါဒါဓိကရဏံ စတူဟိ သမထေဟိ သမ္မတိ – သမ္မုခါဝိနယေန စ သတိဝိနယေန စ အမူဠှဝိနယေန စ တဿပါပိယသိကာယ စ။ တီဟိ သမထေဟိ န သမ္မတိ – ယေဘုယျသိကာယ စ ပဋိညာတကရဏေန စ တိဏဝတ္ထာရကေန စ။

[စူဠဝ။ ၂၃၉] အာပတ္တာဓိကရဏံ ¶ တီဟိ သမထေဟိ သမ္မတိ – သမ္မုခါဝိနယေန စ ပဋိညာတကရဏေန စ တိဏဝတ္ထာရကေန စ။ စတူဟိ သမထေဟိ န သမ္မတိ – ယေဘုယျသိကာယ စ သတိဝိနယေန စ အမူဠှဝိနယေန စ တဿပါပိယသိကာယ စ။

ကိစ္စာဓိကရဏံ ¶ ဧကေန သမထေန သမ္မတိ – သမ္မုခါဝိနယေန။ ဆဟိ သမထေဟိ န သမ္မတိ – ယေဘုယျသိကာယ စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

ဝိဝါဒါဓိကရဏဉ္စ အနုဝါဒါဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ ပဉ္စဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ တဿပါပိယသိကာယ စ။ ဒွီဟိ သမထေဟိ န သမ္မန္တိ – ပဋိညာတကရဏေန စ တိဏဝတ္ထာရကေန စ။

ဝိဝါဒါဓိကရဏဉ္စ အာပတ္တာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? ဝိဝါဒါဓိကရဏဉ္စ အာပတ္တာဓိကရဏဉ္စ စတူဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ ပဋိညာတကရဏေန စ ¶ တိဏဝတ္ထာရကေန စ။ တီဟိ သမထေဟိ န သမ္မန္တိ – သတိဝိနယေန စ အမူဠှဝိနယေန စ တဿပါပိယသိကာယ စ။

ဝိဝါဒါဓိကရဏဉ္စ ¶ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? ဝိဝါဒါဓိကရဏဉ္စ ကိစ္စာဓိကရဏဉ္စ ဒွီဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ။ ပဉ္စဟိ သမထေဟိ န သမ္မန္တိ – သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

အနုဝါဒါဓိကရဏဉ္စ အာပတ္တာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? အနုဝါဒါဓိကရဏဉ္စ အာပတ္တာဓိကရဏဉ္စ ဆဟိ သမထေဟိ သမ္မန္တိ – သမ္မုခါဝိနယေန စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။ ဧကေန သမထေန န သမ္မန္တိ – ယေဘုယျသိကာယ။

အနုဝါဒါဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? အနုဝါဒါဓိကရဏဉ္စ ကိစ္စာဓိကရဏဉ္စ စတူဟိ သမထေဟိ သမ္မန္တိ – သမ္မုခါဝိနယေန စ သတိဝိနယေန စ အမူဠှဝိနယေန စ တဿပါပိယသိကာ ¶ စ။ တီဟိ သမထေဟိ န သမ္မန္တိ – ယေဘုယျသိကာယ စ ပဋိညာတကရဏေန စ တိဏဝတ္ထာရကေန စ။

အာပတ္တာဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? အာပတ္တာဓိကရဏဉ္စ ကိစ္စာဓိကရဏဉ္စ တီဟိ သမထေဟိ သမ္မန္တိ – သမ္မုခါဝိနယေန စ ပဋိညာတကရဏေန စ တိဏဝတ္ထာရကေန စ ¶ ။ စတူဟိ သမထေဟိ န သမ္မန္တိ – ယေဘုယျသိကာယ စ သတိဝိနယေန စ အမူဠှဝိနယေန စ တဿပါပိယသိကာယ စ။

ဝိဝါဒါဓိကရဏဉ္စ အနုဝါဒါဓိကရဏဉ္စ အာပတ္တာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ အာပတ္တာဓိကရဏဉ္စ သတ္တဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

ဝိဝါဒါဓိကရဏဉ္စ အနုဝါဒါဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ ကိစ္စာဓိကရဏဉ္စ ပဉ္စဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ တဿပါပိယသိကာယ စ။ ဒွီဟိ သမထေဟိ န သမ္မန္တိ – ပဋိညာတကရဏေန စ တိဏဝတ္ထာရကေန စ။

အနုဝါဒါဓိကရဏဉ္စ ¶ အာပတ္တာဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? အနုဝါဒါဓိကရဏဉ္စ အာပတ္တာဓိကရဏဉ္စ ကိစ္စာဓိကရဏဉ္စ ဆဟိ သမထေဟိ သမ္မန္တိ – သမ္မုခါဝိနယေန စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။ ဧကေန သမထေန န သမ္မန္တိ – ယေဘုယျသိကာယ။

ဝိဝါဒါဓိကရဏဉ္စ အနုဝါဒါဓိကရဏဉ္စ အာပတ္တာဓိကရဏဉ္စ ကိစ္စာဓိကရဏဉ္စ ကတိဟိ သမထေဟိ သမ္မန္တိ? ကတိဟိ သမထေဟိ န သမ္မန္တိ? ဝိဝါဒါဓိကရဏဉ္စ အနုဝါဒါဓိကရဏဉ္စ ¶ အာပတ္တာဓိကရဏဉ္စ ကိစ္စာဓိကရဏဉ္စ သတ္တဟိ သမထေဟိ သမ္မန္တိ – သမ္မုခါဝိနယေန စ ယေဘုယျသိကာယ စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ။

သမ္မန္တိ န သမ္မန္တိဝါရော နိဋ္ဌိတော အဋ္ဌာရသမော။

၃၀၉။ သမထာ ¶ သမထေဟိ သမ္မန္တိ? သမထာ အဓိကရဏေဟိ သမ္မန္တိ? အဓိကရဏာ သမထေဟိ သမ္မန္တိ? အဓိကရဏာ အဓိကရဏေဟိ သမ္မန္တိ?

သိယာ ¶ သမထာ သမထေဟိ သမ္မန္တိ၊ သိယာ သမထာ သမထေဟိ န သမ္မန္တိ။ သိယာ သမထာ အဓိကရဏေဟိ သမ္မန္တိ၊ သိယာ သမထာ အဓိကရဏေဟိ န သမ္မန္တိ။ သိယာ အဓိကရဏာ သမထေဟိ သမ္မန္တိ၊ သိယာ အဓိကရဏာ သမထေဟိ န သမ္မန္တိ။ သိယာ အဓိကရဏာ အဓိကရဏေဟိ သမ္မန္တိ၊ သိယာ အဓိကရဏာ အဓိကရဏေဟိ န သမ္မန္တိ။

၃၁၀။ ကထံ သိယာ သမထာ သမထေဟိ သမ္မန္တိ၊ ကထံ သိယာ သမထာ သမထေဟိ န သမ္မန္တိ? ယေဘုယျသိကာ သမ္မုခါဝိနယေန သမ္မတိ၊ သတိဝိနယေန န သမ္မတိ၊ အမူဠှဝိနယေန န သမ္မတိ၊ ပဋိညာတကရဏေန န သမ္မတိ၊ တဿပါပိယသိကာယ န သမ္မတိ၊ တိဏဝတ္ထာရကေန န သမ္မတိ။

သတိဝိနယော သမ္မုခါဝိနယေန သမ္မတိ၊ အမူဠှဝိနယေန န သမ္မတိ၊ ပဋိညာတကရဏေန န ¶ သမ္မာတိ၊ တဿပါပိယသိကာယ န သမ္မတိ၊ တိဏဝတ္ထာရကေန န သမ္မတိ၊ ယေဘုယျသိကာယ န သမ္မတိ။

အမူဠှဝိနယော သမ္မုခါဝိနယေန သမ္မတိ၊ ပဋိညာတကရဏေန န သမ္မတိ၊ တဿပါပိယသိကာယ ¶ န သမ္မတိ၊ တိဏဝတ္ထာရကေန န သမ္မတိ၊ ယေဘုယျသိကာယ န သမ္မတိ၊ သတိဝိနယေန န သမ္မတိ။

ပဋိညာတကရဏံ သမ္မုခါဝိနယေန သမ္မတိ၊ တဿပါပိယသိကာယ န သမ္မတိ၊ တိဏဝတ္ထာရကေန န သမ္မတိ၊ ယေဘုယျသိကာယ န သမ္မတိ၊ သတိဝိနယေန န သမ္မတိ၊ အမူဠှဝိနယေန န သမ္မတိ။

တဿပါပိယသိကာ သမ္မုခါဝိနယေန သမ္မတိ၊ တိဏဝတ္ထာရကေန န သမ္မတိ၊ ယေဘုယျသိကာယ န သမ္မတိ၊ သတိဝိနယေန န သမ္မတိ၊ အမူဠှဝိနယေန န သမ္မတိ၊ ပဋိညာတကရဏေန န သမ္မတိ။

တိဏဝတ္ထာရကော သမ္မုခါဝိနယေန သမ္မတိ၊ ယေဘုယျသိကာယ န သမ္မတိ၊ သတိဝိနယေန န သမ္မတိ၊ အမူဠှဝိနယေန န သမ္မတိ၊ ပဋိညာတကရဏေန န သမ္မတိ၊ တဿပါပိယသိကာယ န သမ္မတိ။ ဧဝံ သိယာ သမထာ သမထေဟိ သမ္မန္တိ။ ဧဝံ သိယာ သမထာ သမထေဟိ န သမ္မန္တိ။

၃၁၁။ ကထံ ¶ သိယာ သမထာ အဓိကရဏေဟိ သမ္မန္တိ၊ ကထံ သိယာ သမထာ အဓိကရဏေဟိ န သမ္မန္တိ? သမ္မုခါဝိနယော ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

ယေဘုယျသိကာ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

သတိဝိနယော ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

အမူဠှဝိနယော ¶ ¶ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

ပဋိညာတကရဏံ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

တဿပါပိယသိကာ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

တိဏဝတ္ထာရကော ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။ ဧဝံ သိယာ သမထာ အဓိကရဏေဟိ သမ္မန္တိ။ ဧဝံ သိယာ သမထာ အဓိကရဏေဟိ န သမ္မန္တိ။

၃၁၂။ ကထံ သိယာ အဓိကရဏာ သမထေဟိ သမ္မန္တိ၊ ကထံ သိယာ အဓိကရဏာ သမထေဟိ န သမ္မန္တိ? ဝိဝါဒါဓိကရဏံ သမ္မုခါဝိနယေန စ ယေဘုယျသိကာယ စ သမ္မတိ၊ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ စ တိဏဝတ္ထာရကေန စ န သမ္မတိ။

အနုဝါဒါဓိကရဏံ သမ္မုခါဝိနယေန စ သတိဝိနယေန စ အမူဠှဝိနယေန စ တဿပါပိယသိကာယ စ သမ္မတိ၊ ယေဘုယျသိကာယ စ ပဋိညာတကရဏေန စ တိဏဝတ္ထာရကေန စ န သမ္မတိ။

အာပတ္တာဓိကရဏံ သမ္မုခါဝိနယေန စ ပဋိညာတကရဏေန စ တိဏဝတ္ထာရကေန စ သမ္မတိ၊ ယေဘုယျသိကာယ စ သတိဝိနယေန စ အမူဠှဝိနယေန စ တဿပါပိယသိကာယ စ န သမ္မတိ။

ကိစ္စာဓိကရဏံ ¶ သမ္မုခါဝိနယေန သမ္မတိ ¶ ၊ ယေဘုယျသိကာယ စ သတိဝိနယေန စ အမူဠှဝိနယေန စ ပဋိညာတကရဏေန စ တဿပါပိယသိကာယ ¶ တိဏဝတ္ထာရကေန စ န သမ္မတိ။ ဧဝံ သိယာ အဓိကရဏာ သမထေဟိ သမ္မန္တိ။ ဧဝံ သိယာ အဓိကရဏာ သမထေဟိ န သမ္မန္တိ။

၃၁၃။ ကထံ ¶ သိယာ အဓိကရဏာ အဓိကရဏေဟိ သမ္မန္တိ? ကထံ သိယာ အဓိကရဏာ အဓိကရဏေဟိ န သမ္မန္တိ? ဝိဝါဒါဓိကရဏံ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

အနုဝါဒါဓိကရဏံ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

အာပတ္တာဓိကရဏံ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။

ကိစ္စာဓိကရဏံ ဝိဝါဒါဓိကရဏေန န သမ္မတိ၊ အနုဝါဒါဓိကရဏေန န သမ္မတိ၊ အာပတ္တာဓိကရဏေန န သမ္မတိ၊ ကိစ္စာဓိကရဏေန သမ္မတိ။ ဧဝံ သိယာ အဓိကရဏာ အဓိကရဏေဟိ သမ္မန္တိ။ ဧဝံ သိယာ အဓိကရဏာ အဓိကရဏေဟိ န သမ္မန္တိ။

ဆာပိ သမထာ စတ္တာရောပိ အဓိကရဏာ သမ္မုခါဝိနယေန သမ္မန္တိ၊ သမ္မုခါဝိနယော န ကေနစိ သမ္မတိ။

သမထာဓိကရဏဝါရော နိဋ္ဌိတော ဧကူနဝီသတိမော။

၃၁၄။ ဝိဝါဒါဓိကရဏံ ¶ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ? ဝိဝါဒါဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ၊ ဝိဝါဒါဓိကရဏပစ္စယာ စတ္တာရော အဓိကရဏာ ဇာယန္တိ။ ယထာ ကထံ ဝိယ? [စူဠဝ။ ၂၁၅၊ ပရိ။ ၃၄၈ အာဒယော] ဣဓ ဘိက္ခူ ဝိဝဒန္တိ – ‘‘ဓမ္မောတိ ဝါ၊ အဓမ္မောတိ ဝါ၊ ဝိနယောတိ ဝါ၊ အဝိနယောတိ ဝါ၊ အဘာသိတံ အလပိတံ တထာဂတေနာတိ ဝါ၊ ဘာသိတံ လပိတံ တထာဂတေနာတိ ဝါ၊ အနာစိဏ္ဏံ တထာဂတေနာတိ ဝါ၊ အာစိဏ္ဏံ တထာဂတေနာတိ ¶ ဝါ၊ အပညတ္တံ တထာဂတေနာတိ ဝါ၊ ပညတ္တံ တထာဂတေနာတိ ဝါ၊ အာပတ္တီတိ ဝါ၊ အနာပတ္တီတိ ဝါ၊ လဟုကာ အာပတ္တီတိ ဝါ၊ ဂရုကာ အာပတ္တီတိ ဝါ၊ သာဝသေသာ အာပတ္တီတိ ဝါ၊ အနဝသေသာ အာပတ္တီတိ ဝါ၊ ဒုဋ္ဌုလ္လာ အာပတ္တီတိ ဝါ အဒုဋ္ဌုလ္လာ အာပတ္တီတိ ဝါ’’။ ယံ တတ္ထ ဘဏ္ဍနံ ကလဟော ဝိဂ္ဂဟော ဝိဝါဒေါ နာနာဝါဒေါ အညထာဝါဒေါ ဝိပစ္စတာယ ဝေါဟာရော မေဓကံ [မေဓဂံ (က။)]၊ ဣဒံ ဝုစ္စတိ ဝိဝါဒါဓိကရဏံ။ ဝိဝါဒါဓိကရဏေ သင်္ဃော ဝိဝဒတိ။ ဝိဝါဒါဓိကရဏံ ¶ ဝိဝဒမာနော အနုဝဒတိ။ အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ။ တာယ အာပတ္တိယာ သင်္ဃော ကမ္မံ ကရောတိ ကိစ္စာဓိကရဏံ။ ဧဝံ ဝိဝါဒါဓိကရဏပစ္စယာ စတ္တာရော အဓိကရဏာ ဇာယန္တိ။

၃၁၅။ အနုဝါဒါဓိကရဏံ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ? အနုဝါဒါဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ၊ အနုဝါဒါဓိကရဏပစ္စယာ စတ္တာရော အဓိကရဏာ ¶ ဇာယန္တိ။ ယထာ ကထံ ဝိယ? [စူဠဝ။ ၂၁၅၊ ပရိ။ ၃၄၈ အာဒယော] ဣဓ ဘိက္ခူ ဘိက္ခုံ အနုဝဒန္တိ သီလဝိပတ္တိယာ ဝါ အာစာရဝိပတ္တိယာ ဝါ ဒိဋ္ဌိဝိပတ္တိယာ ဝါ အာဇီဝဝိပတ္တိယာ ဝါ။ ယော တတ္ထ အနုဝါဒေါ အနုဝဒနာ အနုလ္လပနာ အနုဘဏနာ အနုသမ္ပဝင်္ကတာ အဗ္ဘုဿဟနတာ အနုဗလပ္ပဒါနံ၊ ဣဒံ ဝုစ္စတိ အနုဝါဒါဓိကရဏံ။ အနုဝါဒါဓိကရဏေ သင်္ဃော ဝိဝဒတိ။ ဝိဝါဒါဓိကရဏံ ဝိဝဒမာနော အနုဝဒတိ။ အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ။ တာယ အာပတ္တိယာ သင်္ဃော ကမ္မံ ကရောတိ ကိစ္စာဓိကရဏံ။ ဧဝံ အနုဝါဒါဓိကရဏပစ္စယာ စတ္တာရော အဓိကရဏာ ဇာယန္တိ။

၃၁၆။ အာပတ္တာဓိကရဏံ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ? အာပတ္တာဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ၊ အာပတ္တာဓိကရဏပစ္စယာ စတ္တာရော အဓိကရဏာ ဇာယန္တိ။ ယထာ ကထံ ဝိယ? ပဉ္စပိ အာပတ္တိက္ခန္ဓာ အာပတ္တာဓိကရဏံ၊ သတ္တပိ အာပတ္တိက္ခန္ဓာ အာပတ္တာဓိကရဏံ၊ ဣဒံ ဝုစ္စတိ အာပတ္တာဓိကရဏံ။ အာပတ္တာဓိကရဏေ သင်္ဃော ဝိဝဒတိ။ ဝိဝါဒါဓိကရဏံ ဝိဝဒမာနော ¶ အနုဝဒတိ။ အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ။ တာယ ¶ အာပတ္တိယာ သင်္ဃော ကမ္မံ ကရောတိ ကိစ္စာဓိကရဏံ။ ဧဝံ အာပတ္တာဓိကရဏပစ္စယာ စတ္တာရော အဓိကရဏာ ဇာယန္တိ။

၃၁၇။ ကိစ္စာဓိကရဏံ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ ¶ ? ကိစ္စာဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ ကိစ္စာဓိကရဏပစ္စယာ စတ္တာရော အဓိကရဏာ ဇာယန္တိ။ ယထာ ကထံ ဝိယ? ယာ သင်္ဃဿ ကိစ္စယတာ ကရဏီယတာ အပလောကနကမ္မံ ဉတ္တိကမ္မံ ဉတ္တိဒုတိယကမ္မံ ဉတ္တိစတုတ္ထကမ္မံ၊ ဣဒံ ဝုစ္စတိ ကိစ္စာဓိကရဏံ။ ကိစ္စာဓိကရဏေ သင်္ဃော ဝိဝဒတိ။ ဝိဝါဒါဓိကရဏံ ဝိဝဒမာနော အနုဝဒတိ။ အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ။ တာယ အာပတ္တိယာ ¶ သင်္ဃော ကမ္မံ ကရောတိ ကိစ္စာဓိကရဏံ။ ဧဝံ ကိစ္စာဓိကရဏပစ္စယာ စတ္တာရော အဓိကရဏာ ဇာယန္တိ။

သမုဋ္ဌာပနဝါရော နိဋ္ဌိတော ဝီသတိမော။

၃၁၈။ ဝိဝါဒါဓိကရဏံ စတုန္နံ အဓိကရဏာနံ ကတမံ အဓိကရဏံ ဘဇတိ? ကတမံ အဓိကရဏံ ဥပနိဿိတံ? ကတမံ အဓိကရဏံ ပရိယာပန္နံ? ကတမေန အဓိကရဏေန သင်္ဂဟိတံ?

အနုဝါဒါဓိကရဏံ စတုန္နံ အဓိကရဏာနံ ကတမံ အဓိကရဏံ ဘဇတိ? ကတမံ အဓိကရဏံ ဥပနိဿိတံ? ကတမံ အဓိကရဏံ ပရိယာပန္နံ? ကတမေန အဓိကရဏေန သင်္ဂဟိတံ?

အာပတ္တာဓိကရဏံ စတုန္နံ အဓိကရဏာနံ ကတမံ အဓိကရဏံ ဘဇတိ? ကတမံ အဓိကရဏံ ဥပနိဿိတံ? ကတမံ အဓိကရဏံ ပရိယာပန္နံ? ကတမေန အဓိကရဏေန သင်္ဂဟိတံ?

ကိစ္စာဓိကရဏံ စတုန္နံ အဓိကရဏာနံ ကတမံ အဓိကရဏံ ဘဇတိ? ကတမံ အဓိကရဏံ ဥပနိဿိတံ? ကတမံ အဓိကရဏံ ပရိယာပန္နံ? ကတမေန အဓိကရဏေန ¶ သင်္ဂဟိတံ?

ဝိဝါဒါဓိကရဏံ စတုန္နံ အဓိကရဏာနံ ဝိဝါဒါဓိကရဏံ ဘဇတိ၊ ဝိဝါဒါဓိကရဏံ ဥပနိဿိတံ၊ ဝိဝါဒါဓိကရဏံ ပရိယာပန္နံ၊ ဝိဝါဒါဓိကရဏေန သင်္ဂဟိတံ။

အနုဝါဒါဓိကရဏံ ¶ စတုန္နံ အဓိကရဏာနံ အနုဝါဒါဓိကရဏံ ဘဇတိ၊ အနုဝါဒါဓိကရဏံ ဥပနိဿိတံ၊ အနုဝါဒါဓိကရဏံ ပရိယာပန္နံ၊ အနုဝါဒါဓိကရဏေန သင်္ဂဟိတံ။

အာပတ္တာဓိကရဏံ စတုန္နံ အဓိကရဏာနံ အာပတ္တာဓိကရဏံ ဘဇတိ၊ အာပတ္တာဓိကရဏံ ဥပနိဿိတံ၊ အာပတ္တာဓိကရဏံ ပရိယာပန္နံ၊ အာပတ္တာဓိကရဏေန သင်္ဂဟိတံ။

ကိစ္စာဓိကရဏံ စတုန္နံ အဓိကရဏာနံ ကိစ္စာဓိကရဏံ ဘဇတိ၊ ကိစ္စာဓိကရဏံ ဥပနိဿိတံ၊ ကိစ္စာဓိကရဏံ ပရိယာပန္နံ၊ ကိစ္စာဓိကရဏေန သင်္ဂဟိတံ။

၃၁၉။ ဝိဝါဒါဓိကရဏံ ¶ သတ္တန္နံ သမထာနံ ကတိ သမထေ ဘဇတိ၊ ကတိ သမထေ ဥပနိဿိတံ၊ ကတိ သမထေ ပရိယာပန္နံ၊ ကတိဟိ သမထေဟိ သင်္ဂဟိတံ၊ ကတိဟိ သမထေဟိ သမ္မတိ?

အနုဝါဒါဓိကရဏံ သတ္တန္နံ သမထာနံ ကတိ သမထေ ဘဇတိ၊ ကတိ သမထေ ဥပနိဿိတံ၊ ကတိ သမထေ ပရိယာပန္နံ၊ ကတိဟိ သမထေဟိ သင်္ဂဟိတံ၊ ကတိဟိ သမထေဟိ သမ္မတိ?

အာပတ္တာဓိကရဏံ သတ္တန္နံ သမထာနံ ကတိ သမထေ ဘဇတိ၊ ကတိ သမထေ ဥပနိဿိတံ၊ ကတိ သမထေ ပရိယာပန္နံ၊ ကတိဟိ သမထေဟိ သင်္ဂဟိတံ၊ ကတိဟိ သမထေဟိ သမ္မတိ?

ကိစ္စာဓိကရဏံ သတ္တန္နံ သမထာနံ ကတိ သမထေ ဘဇတိ၊ ကတိ သမထေ ဥပနိဿိတံ၊ ကတိ သမထေ ပရိယာပန္နံ၊ ကတိဟိ သမထေဟိ သင်္ဂဟိတံ၊ ကတိဟိ သမထေဟိ သမ္မတိ?

ဝိဝါဒါဓိကရဏံ သတ္တန္နံ သမထာနံ ဒွေ သမထေ ဘဇတိ၊ ဒွေ သမထေ ဥပနိဿိတံ၊ ဒွေ သမထေ ပရိယာပန္နံ၊ ဒွီဟိ သမထေဟိ သင်္ဂဟိတံ၊ ဒွီဟိ သမထေဟိ သမ္မတိ – သမ္မုခါဝိနယေန စ ယေဘုယျသိကာယ စ။

အနုဝါဒါဓိကရဏံ သတ္တန္နံ သမထာနံ စတ္တာရော သမထေ ဘဇတိ၊ စတ္တာရော သမထေ ဥပနိဿိတံ၊ စတ္တာရော သမထေ ပရိယာပန္နံ၊ စတူဟိ သမထေဟိ သင်္ဂဟိတံ၊ စတူဟိ သမထေဟိ သမ္မတိ – သမ္မုခါဝိနယေန စ သတိဝိနယေန ¶ စ အမူဠှဝိနယေန စ တဿပါပိယသိကာယ စ။

အာပတ္တာဓိကရဏံ ¶ သတ္တန္နံ သမထာနံ တယော သမထေ ဘဇတိ၊ တယော သမထေ ဥပနိဿိတံ၊ တယော သမထေ ပရိယာပန္နံ၊ တီဟိ သမထေဟိ သင်္ဂဟိတံ တီဟိ သမထေဟိ သမ္မတိ – သမ္မုခါဝိနယေန စ ပဋိညာတကရဏေန ¶ တိဏဝတ္ထာရကေန စ။

ကိစ္စာဓိကရဏံ သတ္တန္နံ သမထာနံ ဧကံ သမထံ ဘဇတိ၊ ဧကံ သမထံ ဥပနိဿိတံ၊ ဧကံ သမထံ ပရိယာပန္နံ၊ ဧကေန သမထေန သင်္ဂဟိတံ၊ ဧကေန သမထေန သမ္မတိ – သမ္မုခါဝိနယေနာတိ။

ဘဇတိဝါရော နိဋ္ဌိတော ဧကဝီသတိမော။

အဓိကရဏံ ¶ ပရိယာယံ၊ သာဓာရဏာ စ ဘာဂိယာ၊

သမထာ သာဓာရဏိကာ၊ သမထဿ တဗ္ဘာဂိယာ။

သမထာ သမ္မုခါ စေဝ၊ ဝိနယေန ကုသလေန စ၊

ယတ္ထ သမထသံသဋ္ဌာ၊ သမ္မန္တိ န သမ္မန္တိ စ။

သမထာဓိကရဏဉ္စေဝ၊ သမုဋ္ဌာနံ ဘဇန္တိ စာတိ။