📜

ဥပေါသထာဒိပုစ္ဆာဝိဿဇ္ဇနာ

အာဒိမဇ္ဈန္တပုစ္ဆနံ

၃၃၂။ ဥပေါသထကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနံ? ပဝါရဏာကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနံ? တဇ္ဇနီယကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနံ? နိယဿကမ္မဿ…ပေ… ပဗ္ဗာဇနီယကမ္မဿ…ပေ… ပဋိသာရဏီယကမ္မဿ…ပေ… ဥက္ခေပနီယကမ္မဿ…ပေ… ပရိဝါသဒါနဿ…ပေ… မူလာယပဋိကဿနာယ…ပေ… မာနတ္တဒါနဿ…ပေ… အဗ္ဘာနဿ…ပေ… ဥပသမ္ပဒါကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနံ? တဇ္ဇနီယကမ္မဿ ပဋိပ္ပဿဒ္ဓိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? နိယဿကမ္မဿ ပဋိပ္ပဿဒ္ဓိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? ပဗ္ဗာဇနီယကမ္မဿ ပဋိပ္ပဿဒ္ဓိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? ပဋိသာရဏီယကမ္မဿ ပဋိပ္ပဿဒ္ဓိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? ဥက္ခေပနီယကမ္မဿ ပဋိပ္ပဿဒ္ဓိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? သတိဝိနယဿ ကော အာဒိ၊ ကိံ မဇ္ဇေ၊ ကိံ ပရိယောသာနံ? အမူဠှဝိနယဿ ကော အာဒိ၊ ကိံ မဇ္ဈေ၊ ကိံ ပရိယောသာနံ? တဿပါပိယသိကာယ ကော အာဒိ၊ ကိံ မဇ္ဈေ၊ ကိံ ပရိယောသာနံ? တိဏဝတ္ထာရကဿ ကော အာဒိ၊ ကိံ မဇ္ဈေ၊ ကိံ ပရိယောသာနံ? ဘိက္ခုနောဝါဒကသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? တိစီဝရေန အဝိပ္ပဝါသသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? သန္ထတသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? ရူပိယဆဍ္ဍကသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? သာဋိယဂ္ဂါဟာပကသမ္မုတိယော ကော အာဒိ၊ ကိံ မဇ္ဈေ၊ ကိံ ပရိယောသာနံ? ပတ္တဂ္ဂါဟာပကသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? ဒဏ္ဍသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? သိက္ကာသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ? ဒဏ္ဍသိက္ကာသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနံ?

အာဒိမဇ္ဈန္တဝိဿဇ္ဇနာ

၃၃၃။ ဥပေါသထကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? ဥပေါသထကမ္မဿ သာမဂ္ဂီ အာဒိ၊ ကိရိယာ မဇ္ဈေ၊ နိဋ္ဌာနံ ပရိယောသာနံ။

ပဝါရဏာကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? ပဝါရဏာကမ္မဿ သာမဂ္ဂီ အာဒိ၊ ကိရိယာ မဇ္ဈေ၊ နိဋ္ဌာနံ ပရိယောသာနံ။

တဇ္ဇနီယကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? တဇ္ဇနီယကမ္မဿ ဝတ္ထု စ ပုဂ္ဂလော စ အာဒိ၊ ဉတ္တိ မဇ္ဈေ၊ ကမ္မဝါစာ ပရိယောသာနံ။

နိယဿကမ္မဿ…ပေ… ပဗ္ဗာဇနီယကမ္မဿ…ပေ… ပဋိသာရဏီယကမ္မဿ…ပေ… ဥက္ခေပနီယကမ္မဿ…ပေ… ပရိဝါသဒါနဿ…ပေ… မူလာယပဋိကဿနာယ…ပေ… မာနတ္တဒါနဿ…ပေ… အဗ္ဘာနဿ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? အဗ္ဘာနဿ ဝတ္ထု စ ပုဂ္ဂလော စ အာဒိ၊ ဉတ္တိ မဇ္ဈေ၊ ကမ္မဝါစာ ပရိယောသာနံ။

ဥပသမ္ပဒါကမ္မဿ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? ဥပသမ္ပဒါကမ္မဿ ပုဂ္ဂလော အာဒိ၊ ဉတ္တိ မဇ္ဈေ၊ ကမ္မဝါစာ ပရိယောသာနံ။

တဇ္ဇနီယကမ္မဿ ပဋိပ္ပဿဒ္ဓိယာ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? တဇ္ဇနီယကမ္မဿ ပဋိပ္ပဿဒ္ဓိယာ သမ္မာဝတ္တနာ အာဒိ၊ ဉတ္တိ မဇ္ဈေ၊ ကမ္မဝါစာ ပရိယောသာနံ။

နိယဿကမ္မဿ…ပေ… ပဗ္ဗာဇနီယကမ္မဿ…ပေ… ပဋိသာရဏီယကမ္မဿ…ပေ… ဥက္ခေပနီယကမ္မဿ ပဋိပ္ပဿဒ္ဓိယာ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? ဥက္ခေပနီယကမ္မဿ ပဋိပ္ပဿဒ္ဓိယာ သမ္မာဝတ္တနာ အာဒိ၊ ဉတ္တိ မဇ္ဈေ၊ ကမ္မဝါစာ ပရိယောသာနံ။

သတိဝိနယဿ ကော အာဒိ ၊ ကိံ မဇ္ဈေ၊ ကိံ ပရိယောသာနန္တိ? သတိဝိနယဿ ဝတ္ထု စ ပုဂ္ဂလော စ အာဒိ၊ ဉတ္တိ မဇ္ဈေ၊ ကမ္မဝါစာ ပရိယောသာနံ။

အမူဠှဝိနယဿ …ပေ… တဿပါပိယသိကာယ…ပေ… တိဏဝတ္ထာရကဿ…ပေ… ဘိက္ခုနောဝါဒကသမ္မုတိယာ…ပေ… တိစီဝရေန အဝိပ္ပဝါသသမ္မုတိယာ…ပေ… သန္ထတသမ္မုတိယာ…ပေ… ရူပိယဆဍ္ဍကသမ္မုတိယာ…ပေ… သာဋိယဂ္ဂါဟာပကသမ္မုတိယာ…ပေ… ပတ္တဂ္ဂါဟာပကသမ္မုတိယာ…ပေ… ဒဏ္ဍသမ္မုတိယာ…ပေ… သိက္ကာသမ္မုတိယာ…ပေ… ဒဏ္ဍသိက္ကာသမ္မုတိယာ ကော အာဒိ၊ ကိံ မဇ္ဈေ၊ ကိံ ပရိယောသာနန္တိ? ဒဏ္ဍသိက္ကာသမ္မုတိယာ ဝတ္ထု စ ပုဂ္ဂလော စ အာဒိ၊ ဉတ္တိ မဇ္ဈေ၊ ကမ္မဝါစာ ပရိယောသာနံ။

ဥပေါသထာဒိပုစ္ဆာဝိဿဇ္ဇနာ နိဋ္ဌိတာ။

အတ္ထဝသပကရဏံ

၃၃၄။ [အ။ နိ။ ၁၀။၃၃၄၊ ပရိ။ ၂၂] ဒသ အတ္ထဝသေ ပဋိစ္စ တထာဂတေန သာဝကာနံ သိက္ခာပဒံ ပညတ္တံ – သင်္ဃသုဋ္ဌုတာယ၊ သင်္ဃဖာသုတာယ၊ ဒုမ္မင်္ကူနံ ပုဂ္ဂလာနံ နိဂ္ဂဟာယ၊ ပေသလာနံ ဘိက္ခူနံ ဖာသုဝိဟာရာယ၊ ဒိဋ္ဌဓမ္မိကာနံ အာသဝါနံ သံဝရာယ၊ သမ္ပရာယိကာနံ အာသဝါနံ ပဋိဃာတာယ၊ အပ္ပသန္နာနံ ပသာဒါယ၊ ပသန္နာနံ ဘိယျောဘာဝါယ၊ သဒ္ဓမ္မဋ္ဌိတိယာ ဝိနယာနုဂ္ဂဟာယ။

ယံ သင်္ဃသုဋ္ဌု တံ သင်္ဃဖာသု။ ယံ သင်္ဃဖာသု တံ ဒုမ္မင်္ကူနံ ပုဂ္ဂလာနံ နိဂ္ဂဟာယ။ ယံ ဒုမ္မင်္ကူနံ ပုဂ္ဂလာနံ နိဂ္ဂဟာယ တံ ပေသလာနံ ဘိက္ခူနံ ဖာသုဝိဟာရာယ။ ယံ ပေသလာနံ ဘိက္ခူနံ ဖာသုဝိဟာရာယ တံ ဒိဋ္ဌဓမ္မိကာနံ အာသဝါနံ သံဝရာယ။ ယံ ဒိဋ္ဌဓမ္မိကာနံ အာသဝါနံ သံဝရာယ တံ သမ္ပရာယိကာနံ အာသဝါနံ ပဋိဃာတာယ။ ယံ သမ္ပရာယိကာနံ အာသဝါနံ ပဋိဃာတာယ တံ အပ္ပသန္နာနံ ပသာဒါယ။ ယံ အပ္ပသန္နာနံ ပသာဒါယ တံ ပသန္နာနံ ဘိယျောဘာဝါယ။ ယံ ပသန္နာနံ ဘိယျောဘာဝါယ တံ သဒ္ဓမ္မဋ္ဌိတိယာ။ ယံ သဒ္ဓမ္မဋ္ဌိတိယာ တံ ဝိနယာနုဂ္ဂဟာယ။

ယံ သင်္ဃသုဋ္ဌု တံ သင်္ဃဖာသု။ ယံ သင်္ဃသုဋ္ဌု တံ ဒုမ္မင်္ကူနံ ပုဂ္ဂလာနံ နိဂ္ဂဟာယ။ ယံ သင်္ဃသုဋ္ဌု တံ ပေသလာနံ ဘိက္ခူနံ ဖာသုဝိဟာရာယ။ ယံ သင်္ဃသုဋ္ဌု တံ ဒိဋ္ဌဓမ္မိကာနံ အာသဝါနံ သံဝရာယ။ ယံ သင်္ဃသုဋ္ဌု တံ သမ္ပရာယိကာနံ အာသဝါနံ ပဋိဃာတာယ။ ယံ သင်္ဃသုဋ္ဌု တံ အပ္ပသန္နာနံ ပသာဒါယ။ ယံ သင်္ဃသုဋ္ဌု တံ ပသန္နာနံ ဘိယျောဘာဝါယ။ ယံ သင်္ဃသုဋ္ဌု တံ သဒ္ဓမ္မဋ္ဌိတိယာ။ ယံ သင်္ဃသုဋ္ဌု တံ ဝိနယာနုဂ္ဂဟာယ။

ယံ သင်္ဃဖာသု တံ ဒုမ္မင်္ကူနံ ပုဂ္ဂလာနံ နိဂ္ဂဟာယ။ ယံ သင်္ဃဖာသု တံ ပေသလာနံ ဘိက္ခူနံ ဖာသုဝိဟာရာယ ။ ယံ သင်္ဃဖာသု တံ ဒိဋ္ဌဓမ္မိကာနံ အာသဝါနံ သံဝရာယ။ ယံ သင်္ဃဖာသု တံ သမ္ပရာယိကာနံ အာသဝါနံ ပဋိဃာတာယ။ ယံ သင်္ဃဖာသု တံ အပ္ပသန္နာနံ ပသာဒါယ။ ယံ သင်္ဃဖာသု တံ ပသန္နာနံ ဘိယျောဘာဝါယ။ ယံ သင်္ဃဖာသု တံ သဒ္ဓမ္မဋ္ဌိတိယာ။ ယံ သင်္ဃဖာသု တံ ဝိနယာနုဂ္ဂဟာယ။ ယံ သင်္ဃဖာသု တံ သင်္ဃသုဋ္ဌု။

ယံ ဒုမ္မင်္ကူနံ ပုဂ္ဂလာနံ နိဂ္ဂဟာယ…ပေ… ယံ ပေသလာနံ ဘိက္ခူနံ ဖာသုဝိဟာရာယ… ယံ ဒိဋ္ဌဓမ္မိကာနံ အာသဝါနံ သံဝရာယ… ယံ သမ္ပရာယိကာနံ အာသဝါနံ ပဋိဃာတာယ… ယံ အပ္ပသန္နာနံ ပသာဒါယ… ယံ ပသန္နာနံ ဘိယျောဘာဝါယ… ယံ သဒ္ဓမ္မဋ္ဌိတိယာ… ယံ ဝိနယာနုဂ္ဂဟာယ တံ သင်္ဃသုဋ္ဌု။ ယံ ဝိနယာနုဂ္ဂဟာယ တံ သင်္ဃဖာသု။ ယံ ဝိနယာနုဂ္ဂဟာယ တံ ဒုမ္မင်္ကူနံ ပုဂ္ဂလာနံ နိဂ္ဂဟာယ။ ယံ ဝိနယာနုဂ္ဂဟာယ တံ ပေသလာနံ ဘိက္ခူနံ ဖာသုဝိဟာရာယ။ ယံ ဝိနယာနုဂ္ဂဟာယ တံ ဒိဋ္ဌဓမ္မိကာနံ အာသဝါနံ သံဝရာယ။ ယံ ဝိနယာနုဂ္ဂဟာယ တံ သမ္ပရာယိကာနံ အာသဝါနံ ပဋိဃာတာယ။ ယံ ဝိနယာနုဂ္ဂဟာယ တံ အပ္ပသန္နာနံ ပသာဒါယ။ ယံ ဝိနယာနုဂ္ဂဟာယ တံ ပသန္နာနံ ဘိယျောဘာဝါယ။ ယံ ဝိနယာနုဂ္ဂဟာယ တံ သဒ္ဓမ္မဋ္ဌိတိယာတိ။

အတ္ထသတံ ဓမ္မသတံ၊ ဒွေ စ နိရုတ္တိသတာနိ၊

စတ္တာရိ ဉာဏသတာနိ၊ အတ္ထဝသေ ပကရဏေတိ။

အတ္ထဝသပကရဏံ နိဋ္ဌိတံ။

မဟာဝဂ္ဂေါ နိဋ္ဌိတော။

တဿုဒ္ဒါနံ –

ပဌမံ အဋ္ဌပုစ္ဆာယံ၊ ပစ္စယေသု ပုနဋ္ဌ စ၊

ဘိက္ခူနံ သောဠသ ဧတေ၊ ဘိက္ခုနီနဉ္စ သောဠသ။

ပေယျာလအန္တရာ ဘေဒါ၊ ဧကုတ္တရိကမေဝ စ၊

ပဝါရဏတ္ထဝသိကာ၊ မဟာဝဂ္ဂဿ သင်္ဂဟောတိ။

အတ္ထဝသပကရဏံ နိဋ္ဌိတံ။