📜

နိဿဂ္ဂိယကဏ္ဍော

၁။ ပတ္တသန္နိစယသိက္ခာပဒဝဏ္ဏနာ

နိဿဂ္ဂိယေသု အာဒိဝဂ္ဂဿ တာဝ ပဌမေ ပတ္တသန္နိစယံ ကရေယျာတိ ပတ္တသန္နိဓိံ ကရေယျ၊ ဧကာဟံ အနဓိဋ္ဌဟိတွာ ဝါ အဝိကပ္ပေတွာ ဝါ အဓိဋ္ဌာနုပဂံ ပတ္တံ ဌပေယျာတိ အတ္ထော။

သာဝတ္ထိယံ ဆဗ္ဗဂ္ဂိယာ ဘိက္ခုနိယော အာရဗ္ဘ ပတ္တသန္နိစယဝတ္ထုသ္မိံ ပညတ္တံ၊ သေသကထာမဂ္ဂေါ ဘိက္ခုပါတိမောက္ခဝဏ္ဏနာယံ ဝုတ္တနယေနေဝ ဝေဒိတဗ္ဗော၊ တတြ ဟိ ဒသာဟာတိက္ကမေ အာပတ္တိ၊ ဣဓ ဧကာဟာတိက္ကမေတိ ဧတ္တကမေဝ တဿ စ ဣမဿ စ နာနာကရဏံ၊ သေသံ တာဒိသမေဝါတိ။

ပတ္တသန္နိစယသိက္ခာပဒဝဏ္ဏနာ နိဋ္ဌိတာ။

၂။ အကာလစီဝရသိက္ခာပဒဝဏ္ဏနာ

ဒုတိယေ အကာလစီဝရန္တိ အတ္ထတေ ကထိနေ ကထိနမာသေဟိ၊ အနတ္ထတေ စီဝရမာသတော အညသ္မိံ ကာလေ ဥပ္ပန္နံ၊ ယံ ဝါ ပန ကာလေပိ အာဒိဿ ဒိန္နံ။ အာဒိဿ ဒိန္နံ နာမ ‘‘သမ္ပတ္တာ ဘာဇေန္တူ’’တိ ဝတွာ ဝါ၊ ‘‘ဣဒံ ဂဏဿ၊ ဣဒံ တုမှာကံ ဒမ္မီ’’တိ ဝတွာ ဝါ၊ ဒါတုကာမတာယ ပါဒမူလေ ဌပေတွာ ဝါ ဒိန္နံ။ ဣစ္စေတံ အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေန္တိယာ ပယောဂေ ဒုက္ကဋံ၊ ယံ အတ္တနာ လဒ္ဓံ၊ တံ နိဿဂ္ဂိယံ ဟောတိ။ နိဿဋ္ဌံ ပဋိလဘိတွာပိ ယထာဒါနေယေဝ ဥပနေတဗ္ဗံ၊ အညသ္မိမ္ပိ ဧဝရူပေ သိက္ခာပဒေ ဧသေဝ နယော။

သာဝတ္ထိယံ ထုလ္လနန္ဒံ အာရဗ္ဘ အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇနဝတ္ထုသ္မိံ ပညတ္တံ၊ အကာလစီဝရေ ဝေမတိကာယ၊ ကာလစီဝရေ အကာလစီဝရသညာယ စေဝ ဝေမတိကာယ စ ဒုက္ကဋံ။ ဥဘောသု ကာလစီဝရသညာယ၊ ဥမ္မတ္တိကာဒီနဉ္စ အနာပတ္တိ။ အကာလစီဝရတာ၊ တထာသညိတာ၊ ‘‘ကာလစီဝရ’’န္တိ အဓိဋ္ဌာယ လေသေန ဘာဇာပနံ၊ ပဋိလာဘောတိ ဣမာနေတ္ထ စတ္တာရိ အင်္ဂါနိ။ သမုဋ္ဌာနာဒီနိ အဒိန္နာဒါနသဒိသာနီတိ။

အကာလစီဝရသိက္ခာပဒဝဏ္ဏနာ နိဋ္ဌိတာ။

၃။ စီဝရပရိဝတ္တနသိက္ခာပဒဝဏ္ဏနာ

တတိယေ ဟန္ဒာတိ ဂဏှ။ အစ္ဆိန္ဒေယျာတိ သယံ အစ္ဆိန္ဒန္တိယာ ဗန္ဓိတွာ ဌပိတေသု ဗဟူသုပိ ဧကာပတ္တိ၊ ဣတရေသု ဝတ္ထုဂဏနာယ အာပတ္တိယော။ အစ္ဆိန္ဒာပနေ ပန ဧကာယ အာဏတ္တိယာ ဗဟူသု အစ္ဆိန္နေသုပိ ဧကာဝါပတ္တိ။

သာဝတ္ထိယံ ထုလ္လနန္ဒံ အာရဗ္ဘ စီဝရံ ပရိဝတ္တေတွာ အစ္ဆိန္ဒနဝတ္ထုသ္မိံ ပညတ္တံ၊ သာဏတ္တိကံ၊ တိကပါစိတ္တိယံ၊ အညသ္မိံ ပရိက္ခာရေ တိကဒုက္ကဋံ၊ အနုပသမ္ပန္နာယ စီဝရေပိ တိကဒုက္ကဋမေဝ။ ယာ ပန တာယ ဝါ ဒိယျမာနံ၊ တဿာ ဝါ ဝိဿာသံ ဂဏှာတိ၊ တဿာ၊ ဥမ္မတ္တိကာဒီနဉ္စ အနာပတ္တိ။ ဥပသမ္ပန္နတာ၊ ပရိဝတ္တိတစီဝရဿ ဝိကပ္ပနုပဂတာ၊ သကသညာယ အစ္ဆိန္ဒနံ ဝါ အစ္ဆိန္ဒာပနံ ဝါတိ ဣမာနေတ္ထ တီဏိ အင်္ဂါနိ။ သမုဋ္ဌာနာဒီနိ အဒိန္နာဒါနသဒိသာနိ၊ ဣဒံ ပန ဒုက္ခဝေဒနန္တိ။

စီဝရပရိဝတ္တနသိက္ခာပဒဝဏ္ဏနာ နိဋ္ဌိတာ။

၄။ အညဝိညာပနသိက္ခာပဒဝဏ္ဏနာ

စတုတ္ထေ ဝိညာပေတွာတိ ဇာနာပေတွာ၊ ‘‘ဣဒံ နာမ အာဟရာ’’တိ ယာစိတွာ ဝါ။ အညံ ဝိညာပေယျာတိ ယံ ပုဗ္ဗေ ‘‘ကိန္တေ၊ အယျေ၊ အဖာသု၊ ကိံ အာဟရိယတူ’’တိ ဝုတ္တာယ ဝိညာပိတံ၊ တံ ပဋိက္ခိပိတွာ တဉ္စေဝ အညဉ္စ ဂဟေတုကာမာ တတော အညံ ဝိညာပေယျ၊ တဿာ ဝိညတ္တိယာ ဒုက္ကဋံ၊ ပဋိလာဘေန နိဿဂ္ဂိယံ ဟောတိ။

သာဝတ္ထိယံ ထုလ္လနန္ဒံ အာရဗ္ဘ အညံ ဝိညာပေတွာ အညံ ဝိညာပနဝတ္ထုသ္မိံ ပညတ္တံ၊ တိကပါစိတ္တိယံ၊ အနညေ ဒွိကဒုက္ကဋံ။ အနညေ အနညသညာယ ပန၊ တသ္မိံ အပ္ပဟောန္တေ ပုန တညေဝ၊ အညေနပိ အတ္ထေ သတိ တေန သဒ္ဓိံ အညဉ္စ၊ ယဉ္စ ဝိညတ္တံ၊ တတော စေ အညံ သမဂ္ဃတရံ ဟောတိ၊ ဣမံ အာနိသံသံ ဒဿေတွာ သုဒ္ဓံ အညမေဝ စ ဝိညာပေန္တိယာ၊ ဥမ္မတ္တိကာဒီနဉ္စ အနာပတ္တိ။ လေသေန ဂဟေတုကာမတာ၊ အညဿ ဝိညာပနံ၊ ပဋိလာဘောတိ ဣမာနေတ္ထ တီဏိ အင်္ဂါနိ။ သမုဋ္ဌာနာဒီနိ သဉ္စရိတ္တသဒိသာနီတိ။

အညဝိညာပနသိက္ခာပဒဝဏ္ဏနာ နိဋ္ဌိတာ။

၅။ အညစေတာပနသိက္ခာပဒဝဏ္ဏနာ

ပဉ္စမေ အညံ စေတာပေတွာတိ အတ္တနော ကပ္ပိယဘဏ္ဍေန ‘‘ဣဒံ နာမ အာဟရာ’’တိ အညံ ပရိဝတ္တာပေတွာ။ အညံ စေတာပေယျာတိ ‘‘ဧဝံ မေ ဣဒံ ဒတွာ အညမ္ပိ အာဟရိဿတီ’’တိ မညမာနာ ‘‘န မေ ဣမိနာ အတ္ထော၊ ဣဒံ နာမ မေ အာဟရာ’’တိ တတော အညံ စေတာပေယျ။ တဿာ စေတာပနပ္ပယောဂေ ဒုက္ကဋံ၊ ပဋိလာဘေန တေန ဝါ အညေန ဝါ မူလေန အာဟဋံ နိဿဂ္ဂိယံ ဟောတိ၊ သေသံ စတုတ္ထသဒိသမေဝါတိ။

အညစေတာပနသိက္ခာပဒဝဏ္ဏနာ နိဋ္ဌိတာ။

၆။ ပဌမသင်္ဃိကစေတာပနသိက္ခာပဒဝဏ္ဏနာ

ဆဋ္ဌေ အညဒတ္ထိကေနာတိ အညဿတ္ထာယ ဒိန္နေန။ အညုဒ္ဒိသိကေနာတိ အညံ ဥဒ္ဒိသိတွာ ဒိန္နေန။ သင်္ဃိကေနာတိ သင်္ဃဿ ပရိစ္စတ္တေန။ ပရိက္ခာရေနာတိ ကပ္ပိယဘဏ္ဍေန။ အညံ စေတာပေယျာတိ ‘‘ဣဒံ နာမ ပရိဘုဉ္ဇေယျာထာ’’တိ ယံ ဥဒ္ဒိသိတွာ နိယမေတွာ ယော ပရိက္ခာရော ဒိန္နော၊ တတော အညံ ပရိဝတ္တာပေယျ၊ တဿာ ပယောဂေ ဒုက္ကဋံ၊ ပဋိလာဘေန နိဿဂ္ဂိယံ။

သာဝတ္ထိယံ သမ္ဗဟုလာ ဘိက္ခုနိယော အာရဗ္ဘ တာဒိသေန ပရိက္ခာရေန အညံ စေတာပနဝတ္ထုသ္မိံ ပညတ္တံ၊ တိကပါစိတ္တိယံ၊ အနညဒတ္ထိကေ ဒွိကဒုက္ကဋံ။ တသ္မိံ ပန အနညဒတ္ထိကသညာယ၊ သေသကံ ဥပနေန္တိယာ၊ ‘‘တုမှေဟိ ဧတဒတ္ထာယ ဒိန္နော၊ အမှာကဉ္စ ဣမိနာ နာမ အတ္ထော’’တိ သာမိကေ အပလောကေတွာ ဥပနေန္တိယာ၊ ယဒါ ဘိက္ခုနိယော ဝိဟာရမ္ပိ ဆဍ္ဍေတွာ ပက္ကမန္တိ၊ ဧဝရူပါသု အာပဒါသု ဥပနေန္တီနံ၊ ဥမ္မတ္တိကာဒီနဉ္စ အနာပတ္တိ။ သေသံ စတုတ္ထသဒိသမေဝါတိ။

ပဌမသင်္ဃိကစေတာပနသိက္ခာပဒဝဏ္ဏနာ နိဋ္ဌိတာ။

၇။ ဒုတိယသင်္ဃိကစေတာပနသိက္ခာပဒဝဏ္ဏနာ

သတ္တမေ သညာစိကေနာတိ သယံ ယာစိတကေနာပိ။ ဧတဒေဝေတ္ထ နာနာကရဏံ၊ သေသံ ဆဋ္ဌသဒိသမေဝါတိ။

ဒုတိယသင်္ဃိကစေတာပနသိက္ခာပဒဝဏ္ဏနာ နိဋ္ဌိတာ။

၈။ ပဌမဂဏိကစေတာပနသိက္ခာပဒဝဏ္ဏနာ

အဋ္ဌမေ မဟာဇနိကေနာတိ ဂဏဿ ပရိစ္စတ္တေန၊ ဣဒမေတ္ထ ဆဋ္ဌတော နာနာကရဏံ။

ပဌမဂဏိကစေတာပနသိက္ခာပဒဝဏ္ဏနာ နိဋ္ဌိတာ။

၉။ ဒုတိယဂဏိကစေတာပနသိက္ခာပဒဝဏ္ဏနာ

နဝမေ သညာစိကေနာတိ ဣဒံ အဋ္ဌမတော အတိရိတ္တံ၊ သေသံ ဒွီသုပိ ဆဋ္ဌသိက္ခာပဒသဒိသမေဝါတိ။

ဒုတိယဂဏိကစေတာပနသိက္ခာပဒဝဏ္ဏနာ နိဋ္ဌိတာ။

၁၀။ ပုဂ္ဂလိကစေတာပနသိက္ခာပဒဝဏ္ဏနာ

ဒသမေ ပုဂ္ဂလိကေနာတိ ဧကဘိက္ခုနိယာ ပရိစ္စတ္တေန။ သညာစိကေနာတိ သယံ ယာစိတကေန စ။ အညံ စေတာပေယျာတိ ယံ ဥဒ္ဒိသိတွာ ဒိန္နံ၊ တတော အညံ စေတာပေန္တိယာ ပယောဂေ ဒုက္ကဋံ၊ ပဋိလာဘေန နိဿဂ္ဂိယံ ဟောတိ။

သာဝတ္ထိယံ ထုလ္လနန္ဒံ အာရဗ္ဘ တာဒိသေန ပရိက္ခာရေန အညံ စေတာပနဝတ္ထုသ္မိံ ပညတ္တံ၊ သေသံ ဆဋ္ဌသဒိသမေဝါတိ။

ပုဂ္ဂလိကစေတာပနသိက္ခာပဒဝဏ္ဏနာ နိဋ္ဌိတာ။

ပတ္တဝဂ္ဂေါ ပဌမော။

၁၁။ ဂရုပါဝုရဏသိက္ခာပဒဝဏ္ဏနာ

ဒုတိယဿ ပဌမေ ဂရုပါဝုရဏန္တိ သီတကာလေ ပါဝုရဏံ။ စတုက္ကံသပရမန္တိ ကံသော နာမ စတုက္ကဟာပဏိကော ဟောတိ၊ တသ္မာ သောဠသကဟာပဏဂ္ဃနကံ။ စေတာပေတဗ္ဗန္တိ ဌပေတွာ သဟဓမ္မိကေ စ ဉာတကပ္ပဝါရိတေ စ အညေန ကိသ္မိဉ္စိဒေဝ ဂုဏေ ပရိတုဋ္ဌေန ‘‘ဝဒေထာယျေ၊ ယေနတ္ထော’’တိ ဝုတ္တာယ ဝိညာပေတဗ္ဗံ။ တတော စေ ဥတ္တရီတိ တတုတ္တရိ ဝိညာပေန္တိယာ ဒုက္ကဋံ၊ ပဋိလဒ္ဓံ နိဿဂ္ဂိယံ ဟောတိ။

သာဝတ္ထိယံ ထုလ္လနန္ဒံ အာရဗ္ဘ ရာဇာနံ ကမ္ဗလံ ဝိညာပနဝတ္ထုသ္မိံ ပညတ္တံ၊ တိကပါစိတ္တိယံ၊ ဦနကစတုက္ကံသေ ဒွိကဒုက္ကဋံ။ တသ္မိံ ပန ဦနကသညာယ၊ စတုက္ကံသပရမံ စေတာပေန္တိယာ၊ ဉာတကပ္ပဝါရိတေ ဝါ၊ အညဿ ဝါ အတ္ထာယ၊ အတ္တနော ဝါ ဓနေန၊ မဟဂ္ဃံ စေတာပေန္တံ အပ္ပဂ္ဃံ စေတာပေန္တိယာ၊ ဥမ္မတ္တိကာဒီနဉ္စ အနာပတ္တိ။ ဂရုပါဝုရဏတာ၊ အတိရေကစတုက္ကံသတာ၊ အနနုညာတဋ္ဌာနေ ဝိညတ္တိ၊ ပဋိလာဘောတိ ဣမာနေတ္ထ စတ္တာရိ အင်္ဂါနိ။ သမုဋ္ဌာနာဒီနိ သဉ္စရိတ္တသဒိသာနီတိ။

ဂရုပါဝုရဏသိက္ခာပဒဝဏ္ဏနာ နိဋ္ဌိတာ။

၁၂။ လဟုပါဝုရဏသိက္ခာပဒဝဏ္ဏနာ

ဒုတိယေ လဟုပါဝုရဏန္တိ ဥဏှကာလေ ပါဝုရဏံ။ အဍ္ဎတေယျကံသပရမန္တိ ဒသကဟာပဏဂ္ဃနကံ၊ သေသံ ပဌမသဒိသမေဝါတိ။

လဟုပါဝုရဏသိက္ခာပဒဝဏ္ဏနာ နိဋ္ဌိတာ။

ဣတော ပရာနိ ဣမသ္မိံ ဝဂ္ဂေ အဋ္ဌ၊ တတိယဝဂ္ဂေ ဒသာတိ ဣမာနိ အဋ္ဌာရသ သိက္ခာပဒါနိ ဘိက္ခုပါတိမောက္ခဝဏ္ဏနာယံ ဝုတ္တနယေနေဝ ဝေဒိတဗ္ဗာနီတိ။

ဇာတရူပဝဂ္ဂေါ တတိယော။

ဥဒ္ဒိဋ္ဌာ ခေါ အယျာယော တိံသ နိဿဂ္ဂိယာ ပါစိတ္တိယာ ဓမ္မာတိ ဘိက္ခူ အာရဗ္ဘ ပညတ္တာ သာဓာရဏာ အဋ္ဌာရသ၊ အသာဓာရဏာ ဒွါဒသာတိ ဧဝံ တိံသ။ သေသံ သဗ္ဗတ္ထ ဥတ္တာနမေဝါတိ။

ကင်္ခါဝိတရဏိယာ ပါတိမောက္ခဝဏ္ဏနာယ ဘိက္ခုနိပါတိမောက္ခေ

နိဿဂ္ဂိယပါစိတ္တိယဝဏ္ဏနာ နိဋ္ဌိတာ။