📜

၄။ သမထက္ခန္ဓကော

သတိဝိနယကထာဒိဝဏ္ဏနာ

၁၉၅။ သမထက္ခန္ဓကေ ခီဏာသဝဿ ဝိပုလသတိံ နိဿာယ ဒါတဗ္ဗော ဝိနယော စောဒနာဒိအသာရုပ္ပာနံ ဝိနယနုပါယော သတိဝိနယော။

၁၉၆။ စိတ္တဝိပရိယာသကတောတိ ကတစိတ္တဝိပရိယာသော။ ဂဂ္ဂံ ဘိက္ခုံ…ပေ… စောဒေန္တီတိ ဧတ္ထ ပန ဥမ္မတ္တကဿ ဣဒံ ဥမ္မတ္တကံ၊ အဇ္ဈာစိဏ္ဏံ။ တဒေဝ စိတ္တဝိပရိယာသေန ကတန္တိ စိတ္တဝိပရိယာသကတံ။ တေန ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အနာစာရေန အာပန္နာယ အာပတ္တိယာ ဂဂ္ဂံ ဘိက္ခုံ စောဒေန္တီတိ ဧဝမတ္ထော ဒဋ္ဌဗ္ဗော။ ပဌမံ မူဠှော ဟုတွာ ပစ္ဆာ အမူဠှဘာဝံ ဥပဂတဿ ဒါတဗ္ဗော ဝိနယော အမူဠှဝိနယော။

၂၀၂။ ဓမ္မဝါဒီနံ ယေဘုယျဘာဝသမ္ပာဒိကာ ကိရိယာ ယေဘုယျသိကာတိ ဣမသ္မိံ အတ္ထေ သ-ကာရာဂမသဟိတော ဣက-ပစ္စယန္တောယံ သဒ္ဒေါတိ ဒဿေတုံ အာဟ ‘‘ယဿာ’’တိအာဒိ။ တတ္ထ ယဿာ ကိရိယာယာတိ ဂူဠှကဝိဝဋ္ဋကာဒိနာ သလာကဂ္ဂါဟာပကကိရိယာယ။ ယေဘုယျဘာဝံ နိဿိတသမထကိရိယာ ယေဘုယျသိကာတိ ဧဝံ ယေဘုယျသိကာသဒ္ဒဿ အတ္ထော ဂဟေတဗ္ဗော။ ဧဝဉှိ အယံ အဓိကရဏသမထော နာမ ဟောတိ။ ယထာဝုတ္တသလာကဂ္ဂါဟေန ဟိ ဓမ္မဝါဒီနံ ယေဘုယျဘာဝေ သိဒ္ဓေ ပစ္ဆာ တံ ယေဘုယျဘာဝံ နိဿာယေဝ အဓိကရဏဝူပသမော ဟောတိ၊ န ဓမ္မဝါဒီနံ ဗဟုတရဘာဝသာဓကကိရိယာမတ္တေန။

၂၀၇။ ‘‘သေသမေတ္ထ တဇ္ဇနီယာဒီသု ဝုတ္တနယမေဝါ’’တိ ဧတေန တဇ္ဇနီယာဒိသတ္တကမ္မာနိ ဝိယ ဣဒမ္ပိ တဿပါပိယသိကာကမ္မံ အသုစိဘာဝါဒိဒေါသယုတ္တဿ၊ သင်္ဃဿ စ ဝိနိစ္ဆယေ အတိဋ္ဌမာနဿ ကတ္တဗ္ဗံ ဝိသုံ ဧကံ နိဂ္ဂဟကမ္မန္တိ ဒဿေတိ။ ဧတသ္မိဉှိ နိဂ္ဂဟကမ္မေ ကတေ သော ပုဂ္ဂလော ‘‘အဟံ သုဒ္ဓါ’’တိ အတ္တနော သုဒ္ဓိယာ သာဓနတ္ထံ သင်္ဃမဇ္ဈံ ဩတရိတုံ၊ သင်္ဃော စဿ ဝိနိစ္ဆယံ ဒါတုံ န လဘတိ၊ တံ ကမ္မကရဏမတ္တေနေဝ စ တံ အဓိကရဏံ ဝူပသန္တံ ဟောတိ။

ကထံ ပနေတံ ကမ္မံ ပဋိပ္ပဿမ္ဘတီတိ? ကေစိ ပနေတ္ထ ‘‘သော တထာ နိဂ္ဂဟိတော နိဂ္ဂဟိတောဝ ဟောတိ၊ ဩသာရဏံ န လဘတိ။ တေနေဝ ပါဠိယံ ဩသာရဏာ န ဝုတ္တာ’’တိ ဝဒန္တိ။ အညေ ပန ‘‘ပါဠိယံ န ဥပသမ္ပာဒေတဗ္ဗန္တိအာဒိနာ သမ္မာဝတ္တနဿ ဝုတ္တတ္တာ သမ္မာဝတ္တိတွာ လဇ္ဇိဓမ္မေ ဩက္ကန္တဿ ဩသာရဏာ အဝုတ္တာပိ တဇ္ဇနီယာဒီသု ဝိယ နယတော ကမ္မဝါစံ ယောဇေတွာ ဩသာရဏာ ကာတဗ္ဗာ ဧဝါ’’တိ ဝဒန္တိ၊ ဣဒံ ယုတ္တံ။ တေနေဝ အဋ္ဌကထာယံ ဝက္ခတိ ‘‘သစေ သီလဝါ ဘဝိဿတိ၊ ဝတ္တံ ပရိပူရေတွာ ပဋိပ္ပဿဒ္ဓိံ လဘိဿတိ။ နော စေ၊ တထာနာသိတကောဝ ဘဝိဿတီ’’တိ (စူဠဝ။ အဋ္ဌ။ ၂၃၈)။ တဿပါပိယသိကာကမ္မန္တိ စ အလုတ္တသမာသောယေဝ။ တေနာဟ ‘‘ဣဒံ ဟီ’’တိ အာဒိ။

သတိဝိနယကထာဒိဝဏ္ဏနာ နိဋ္ဌိတာ။

အဓိကရဏကထာဝဏ္ဏနာ

၂၁၅။ ဝိရူပတော ဝိပရိဏာမဋ္ဌေန စိတ္တံ ဒုက္ခံ ဝိပစ္စတီတိ အာဟ ‘‘စိတ္တဒုက္ခတ္ထံ ဝေါဟာရော’’တိအာဒိ။ ဥပဝဒနာတိ စောဒနာ။ တတ္ထေဝါတိ အနုဝဒနေ။

အာဒိတော ပဋ္ဌာယ စ တဿ တဿ ကမ္မဿ ဝိညာတတ္တာတိ ဝိတ္ထာရတော အာဂတကမ္မဝဂ္ဂဿ အာဒိတော ပဋ္ဌာယ ဝဏ္ဏနာမုခေန ဝိညာတတ္တာ ဝိနိစ္ဆယော ဘဝိဿတီတိ ယောဇနာ။

၂၁၆။ ပါဠိယံ အဇ္ဈတ္တံ ဝါတိ အတ္တနိ ဝါ အတ္တနော ပရိသာယ ဝါ။ ဗဟိဒ္ဓါ ဝါတိ ပရသ္မိံ ဝါ ပရဿ ပရိသာယ ဝါ။ အနဝဿဝါယာတိ အနုပ္ပာဒါယ။

၂၂၀။ ‘‘ဝိဝါဒါဓိကရဏံ ကုသလံ အကုသလံ အဗျာကတ’’န္တိ ဣဒံ ပုစ္ဆာဝစနံ။ ဝိဝါဒါဓိကရဏံ သိယာ ကုသလန္တိအာဒိ ဝိသဇ္ဇနံ။ ဧသ နယော သေသေသုပိ။

၂၂၂။ သမ္မုတိသဘာဝါယပိ အာပတ္တိယာ ကာရဏူပစာရေန အကုသလာဗျာကတဘာဝေန ဝုစ္စမာနေ ကုသလဿာပိ အာပတ္တိကာရဏတ္တာ တဒုပစာရေန ‘‘အာပတ္တာဓိကရဏံ သိယာ ကုသလ’’န္တိ ဝတ္တဗ္ဗံ ဘဝေယျ ၊ တထာ အဝတွာ ‘‘နတ္ထိ အာပတ္တာဓိကရဏံ ကုသလ’’န္တိ ဧဝံဝစနဿ ကာရဏံ ဒဿေတုံ ‘‘ဧတ္ထ သန္ဓာယဘာသိတဝသေန အတ္ထော ဝေဒိတဗ္ဗော’’တိ ဝုတ္တံ။ ဧတ္ထ စာယမဓိပ္ပာယော – ယဒိ ဟိ အာပတ္တိ နာမ ပရမတ္ထဓမ္မသဘာဝါ ဘဝေယျ၊ တဒါ ‘‘အာပတ္တာဓိကရဏံ သိယာ အကုသလ’’န္တိအာဒိဝစနံ ယုဇ္ဇေယျ။ ယသ္မာ ဒုဋ္ဌဒေါသသိက္ခာပဒဋ္ဌကထာဒီသု ဒဿိတဒေါသပ္ပသင်္ဂတော ပရမတ္ထသဘအာဝတာ န ယုတ္တာ၊ ဧကန္တသမ္မုတိသဘာဝါ ဧဝ သာ ဟောတိ၊ တသ္မာ ‘‘သိယာ အကုသလံ သိယာ အဗျာကတ’’န္တိပိ နိပ္ပရိယာယတော န ဝတ္တဗ္ဗာ။ ယဒိ ပန အကုသလအဗျာကတဓမ္မသမုဋ္ဌိတတ္တမေဝ ဥပါဒါယ ပရိယာယတော ‘‘သိယာ အကုသလံ သိယာ အဗျာကတ’’န္တိ ဝုတ္တံ။ တဒါ ကုသလဓမ္မသမဥဋ္ဌိတတ္တမ္ပိ ဥပါဒါယ ပရိယာယတော ‘‘အာပတ္တာဓိကရဏံ သိယာ ကုသလ’’န္တိပိ ဝတ္တဗ္ဗံ ဘဝေယျ။ ယတော စေတံ ဝစနံ အာပတ္တိယာ အကုသလာဗျာကတူပစာရာရဟတ္တဿ ကုသလူပစာရာနာရဟတ္တဿ ဝိသုံ ကာရဏသဗ္ဘာဝံ သန္ဓာယ ဘာသိတံ၊ တသ္မာ ယံ တံ ကာရဏဝိသေသံ သန္ဓာယ ဣဒံ ဘာသိတံ၊ တဿ ဝသေနေဝေတ္ထ အတ္ထော ဝေဒိတဗ္ဗော။

ဣဒါနိ ပန ယော အင်္ဂပ္ပဟောနကစိတ္တမေဝ သန္ဓာယ အာပတ္တိယာ အကုသလာဒိဘာဝေါ ဝုတ္တော၊ နာညံ ဝိသေသကာရဏံ သန္ဓာယာတိ ဂဏှေယျ၊ တဿ ဂါဟေ ဒေါသံ ဒဿေန္တော ‘‘ယသ္မိံ ဟီ’’တိအာဒိမာဟ။ တတ္ထ ပထဝီခဏနာဒိကေတိ ပထဝီခဏနာဒိနိမိတ္တေ ပဏ္ဏတ္တိဝဇ္ဇေ။ အာပတ္တာဓိကရဏေ ကုသလစိတ္တံ အင်္ဂန္တိ ပဏ္ဏတ္တိံ အဇာနိတွာ ကုသလစိတ္တေန စေတိယင်္ဂဏာဒီသု ဘူမိသောဓနာဒိဝသေန ပထဝီဘူတဂါမဝိကောပနာဒိကာလေ ကုသလစိတ္တံ ကာရဏံ ဟောတိ။ တသ္မိံ သတီတိ တသ္မိံ အာပတ္တာဓိကရဏေ ဝိဇ္ဇမာနေ ကုသလစိတ္တသမုဋ္ဌိတတ္တေန ကုသလဝေါဟာရာရဟာယ အာပတ္တိယာ ဝိဇ္ဇမာနာယာတိ အဓိပ္ပာယော။ သာရတ္ထဒီပနိယံ (သာရတ္ထ။ ဋီ။ စူဠဝဂ္ဂ ၃။၂၂၂) ပန ‘‘တသ္မိံ သတီ’’တိ ဣမဿ ‘‘တသ္မိံ ကုသလစိတ္တေ အာပတ္တိဘာဝေန ဂဟိတေ’’တိ အတ္ထော ဝုတ္တော၊ တံ န ယုဇ္ဇတိ ‘‘ယသ္မိ’’န္တိ ယ-သဒ္ဒေန ပရာမဋ္ဌဿေဝ အာပတ္တာဓိကရဏဿ ‘‘တသ္မိ’’န္တိ ပရာမသိတဗ္ဗတော။

န သက္ကာ ဝတ္တုန္တိ ယဒိ သမ္မုတိသဘာဝါယပိ အာပတ္တိယာ အကုသလာဒိသမုဋ္ဌိတတ္တေန အကုသလာဒိဝေါဟာရော ကရီယတိ၊ တဒါ ကုသလဝေါဟာရောပိ ကတ္တဗ္ဗောတိ ‘‘နတ္ထိ အာပတ္တာဓိကရဏံ ကုသလ’’န္တိ န သက္ကာ ဝတ္တုံ၊ အညထာ အကုသလာဒိဘာဝေါပိဿ ပဋိက္ခိပိတဗ္ဗောတိ အဓိပ္ပာယော။ တသ္မာတိ ယသ္မာ ကုသလာဒီနံ တိဏ္ဏံ သမာနေပိ အာပတ္တိယာ အင်္ဂပ္ပဟောနကတ္တေ ကုသလဝေါဟာရောဝ အာပတ္တိယာ ပဋိက္ခိတ္တော၊ န အကုသလာဒိဝေါဟာရော၊ တသ္မာ နယိဒံ အင်္ဂပ္ပဟောနကံ စိတ္တံ သန္ဓာယ ဝုတ္တန္တိ ‘‘အာပတ္တာဓိကရဏံ သိယာ အကုသလံ သိယာ အဗျာကတံ၊ နတ္ထိ အာပတ္တာဓိကရဏံ ကုသလ’’န္တိ ဣဒံ အာပတ္တိယာ သမုဋ္ဌာပကတ္တေန အင်္ဂပ္ပဟောနကံ ကာရဏဘူတံ စိတ္တမတ္တံ သန္ဓာယ န ဝုတ္တံ ၊ အညထာ ‘‘အာပတ္တာဓိကရဏံ သိယာ ကုသလ’’န္တိပိ ဝတ္တဗ္ဗတောတိ အဓိပ္ပာယော။ ဧတေန အာပတ္တိယာ အကုသလာဒိဘာဝေါပိ ကေနစိ နိမိတ္တေန ပရိယာယတောဝ ဝုတ္တော၊ န ပရမတ္ထတောတိ ဒဿေတိ။ ယထာဟ ‘‘ယံ ကုသလစိတ္တေန အာပဇ္ဇတိ၊ တံ ကုသလံ၊ ဣတရေဟိ ဣတရ’’န္တိ။

ဣဒံ ပနာတိအာဒီသု အယံ အဓိပ္ပာယော – ‘‘အာပတ္တာဓိကရဏံ သိယာ အကုသလံ သိယာ အဗျာကတ’’န္တိ ဣဒဉှိ ယံ ကိဉ္စိ ကဒါစိ ကတ္ထစိ ကာရဏံ ဘဝန္တံ အနိယတကာရဏံ သန္ဓာယ ဝုတ္တံ န ဟောတိ။ ယံ ပန သဗ္ဗသိက္ခာပဒေသု အာပတ္တိယာ ကာရဏံ ဘဝိတုမရဟတိ၊ ဣဒမေဝ ကာရဏံ သန္ဓာယ ဝုတ္တံ။ အကုသလဉှိ ပဏ္ဏတ္တိံ ဉတွာ ဝီတိက္ကမန္တဿ သဗ္ဗာပတ္တိယာ ကာရဏံ ဟောတိ၊ လောကဝဇ္ဇာပတ္တိယာ ပန ပဏ္ဏတ္တိံ အဇာနန္တဿပိ ကာရဏံ ဟောတိ။ ကေဝလံ ပဏ္ဏတ္တိဝဇ္ဇာပတ္တီသု ကုသလာဗျာကတစိတ္တပဝတ္တိက္ခဏေ ဧဝ အကုသလံ န ဝတ္တတိ၊ တဒညတ္ထ သယမေဝ ပဝတ္တတိ။ အဗျာကတံ ပန ကာယဝစီဘူတံ ကုသလာကုသလာဒီနံ ပဝတ္တိက္ခဏေ နိရောဓသမာပန္နဿ သဟသေယျာပတ္တိယန္တိ သဗ္ဗာပတ္တိယာ အင်္ဂမေဝ ဟောတိ ဆန္နံ အာပတ္တိသမုဋ္ဌာနာနံ ကာယဝါစင်္ဂဝိရဟိတတ္တာဘာဝါ။ တသ္မာ ဣမေသံ အကုသလာဗျာကတာနံ သဗ္ဗာပတ္တိမူလကတ္တမေဝ သန္ဓာယ ဣဒံ အာပတ္တိယာ အကုသလတ္တံ၊ အဗျာကတတ္တဉ္စ ဝုတ္တံ။ ယတ္ထ ပန ပထဝီခဏနာဒီသု ကုသလမ္ပိ အာပတ္တိယာ ကာရဏံ ဟောတိ၊ တတ္ထာပိ အာပတ္တိယာ တဒုပစာရေန ကုသလတ္တဝေါဟာရော အယုတ္တော သာဝဇ္ဇာနဝဇ္ဇာနံ ဧကတ္တဝေါဟာရဿ ဝိရုဒ္ဓတ္တာ။ ယဒဂ္ဂေန အညမညံ ဝိရုဒ္ဓါ၊ တဒဂ္ဂေန ကာရဏကာရိယဝေါဟာရောပိ နေသံ အယုတ္တော။ တသ္မာ တတ္ထ ဝိဇ္ဇမာနမ္ပိ ကုသလံ အဗ္ဗောဟာရိကံ၊ ကာယဝစီဒွါရမေဝ အာဝေဏိကံ ကာရဏန္တိ။

တတ္ထ ဧကန္တတော အကုသလမေဝါတိ အကုသလစိတ္တေန သမုဋ္ဌဟနတော ကာရဏူပစာရတော ဧဝံ ဝုတ္တံ။ တတ္ထာတိ လောကဝဇ္ဇေ။ ဝိကပ္ပော နတ္ထီတိ သိယာ-သဒ္ဒဿ ဝိကပ္ပနတ္ထတံ ဒဿေတိ။ အကုသလံ ဟောတီတိ အကုသလသမုဋ္ဌိတာယ ကာရဏူပစာရေန အကုသလံ ဟောတိ။ သဟသေယျာဒိဝသေန အာပဇ္ဇနတောအဗျာကတံ ဟောတီတိ ဣတ္ထိယာဒီဟိ သဟ ပိဋ္ဌိပသာရဏဝသပ္ပဝတ္တကာယဒွါရသင်္ခါတရူပါဗျာကတဝသေနေဝ အာပဇ္ဇိတဗ္ဗတော ကာရဏူပစာရေနေဝ အာပတ္တိ အဗျာကတံ ဟောတိ။ တတ္ထာတိ တသ္မိံ ပဏ္ဏတ္တိဝဇ္ဇာပတ္တာဓိကရဏေ။ သဉ္စိစ္စာသဉ္စိစ္စဝသေနာတိ ပဏ္ဏတ္တိံ ဉတွာ၊ အညတွာ စ အာပဇ္ဇနဝသေန ဣမံ ဝိကပ္ပဘာဝံ သန္ဓာယ အကုသလတ္တအဗျာကတတ္တသင်္ခါတံ ယထာဝုတ္တံ ဣမံ ဝိကပ္ပသဘာဝံ သန္ဓာယ ဣဒံ ဝစနံ ဝုတ္တံ။

ယဒိ ဧဝံ အသဉ္စိစ္စာပဇ္ဇနပက္ခေ ကုသလေနာပိ အာပဇ္ဇနတော တမ္ပိ ဝိကပ္ပံ သန္ဓာယ ‘‘အာပတ္တာဓိကရဏံ သိယာ ကုသလ’’န္တိပိ ကသ္မာ န ဝုတ္တန္တိ အာဟ ‘‘သစေ ပနာ’’တိအာဒိ။ ‘‘အစိတ္တကာန’’န္တိ ဝုတ္တမေဝတ္ထံ သမုဋ္ဌာနဝသေန ဝိဘာဝေတုံ ‘‘ဧဠကလောမပဒသောဓမ္မာဒိသမုဋ္ဌာနာနမ္ပီ’’တိ ဝုတ္တံ။ အစိတ္တကသမုဋ္ဌာနာနံ ‘‘ကုသလစိတ္တံ အာပဇ္ဇေယျာ’’တိ ဧတေန သာဝဇ္ဇဘူတာယ အာပတ္တိယာ ကာရဏူပစာရေနာပိ အနဝဇ္ဇဘူတကုသလဝေါဟာရော အယုတ္တောတိ ဒဿေတိ။ ‘‘န စ တတ္ထာ’’တိအာဒိနာ ကုသလဿ အာပတ္တိယာ ကာရဏတ္တံ ဝိဇ္ဇမာနမ္ပိ တထာ ဝေါဟရိတုံ အယုတ္တန္တိ ပဋိက္ခိပိတွာ ကာယဝါစာသင်္ခါတံ အဗျာကတဿေဝ ကာရဏတ္တံ ဒဿေတိ။ တတ္ထ စလိတပ္ပဝတ္တာနန္တိ စလိတာနံ၊ ပဝတ္တာနဉ္စ။ စလိတော ဟိ ကာယော၊ ပဝတ္တာ ဝါစာ။ ဧတ္ထ စ ကာယဝါစာနမညတရမေဝ အင်္ဂံ။ တဉ္စ…ပေ… အဗျာကတန္တိ ဧဝံ အဗျာကတဿ အာပတ္တိကာရဏဘာဝေနေဝ ဝုတ္တတ္တာ။ ‘‘အာပတ္တာဓိကရဏံ သိယာ အကုသလံ သိယာ အဗျာကတ’’န္တိ ဣဒံ ကာရဏူပစာရေန ပရိယာယတော ဝုတ္တံ၊ န နိပ္ပရိယာယတောတိ သိဇ္ဈတိ။

ယံ ပန သာရတ္ထဒီပနိယံ (သာရတ္ထ။ ဋီ။ စူဠဝ။ ၃။၂၂၂) အာပတ္တိယာ နိပ္ပရိယာယတောဝ အကုသလာဒိသဘာဝတံ သမတ္ထေတုံ ဗဟုံ ပပဉ္စိတံ၊ တံ န သာရတော ပစ္စေတဗ္ဗံ ဒုဋ္ဌဒေါသသိက္ခာပဒဋ္ဌကထာယမေဝ ပဋိက္ခိတ္တတ္တာ။ တေနေဝေတ္ထာပိ ‘‘ယံ စိတ္တံ အာပတ္တိယာ အင်္ဂံ ဟောတီ’’တိအာဒိနာ အကုသလစိတ္တဿာပိ အာပတ္တိယာ ကာရဏတ္တေန ဘိန္နတာဝ ဒဿိတာ။ ယံ ပနေတ္ထ ဝတ္တဗ္ဗံ၊ တံ ဟေဋ္ဌာ ဒဿိတမေဝါတိ ဣဓ န ဝိတ္ထာရယိမှ။ ဧဝံ ဝီတိက္ကမတော ယော ဝီတိက္ကမောတိ ဧတ္ထ အကုသလစိတ္တေန ဉတွာ ဝီတိက္ကမန္တဿ ကာယဝစီဝီတိက္ကမသမုဋ္ဌိတာ အာပတ္တိဝီတိက္ကမောတိ ဝုတ္တော။ ဧသ နယော အဗျာကတဝါရေပိ။

အဓိကရဏကထာဝဏ္ဏနာ နိဋ္ဌိတာ။

အဓိကရဏဝူပသမနသမထကထာဒိဝဏ္ဏနာ

၂၂၈။ ပါဠိယံ ဝိဝါဒါဓိကရဏံ ဧကံ သမထံ အနာဂမ္မာတိအာဒိ ပုစ္ဆာ။ သိယာတိအာဒိ ဝိဿဇ္ဇနံ။ သိယာတိဿ ဝစနီယန္တိ ဧတေနေဝ ဝူပသမံ သိယာတိ ဝတ္တဗ္ဗံ ဘဝေယျာတိ အတ္ထော။ သမ္မုခါဝိနယသ္မိန္တိ သမ္မုခါဝိနယတ္တသ္မိန္တိ ဘာဝပ္ပဓာနော နိဒ္ဒေသော ဒဋ္ဌဗ္ဗော။ ဧဝံ သဗ္ဗဝါရေသု။ ‘‘ကာရကော ဥက္ကောဋေတီ’’တိ ဣဒံ ဥပလက္ခဏမတ္တံ၊ ယဿ ကဿစိ ဥက္ကောဋေန္တဿ ပါစိတ္တိယမေဝ။ ဥဗ္ဗာဟိကာယ ခီယနကေ ပါစိတ္တိယံ န ဝုတ္တံ တတ္ထ ဆန္ဒဒါနဿ နတ္ထိတာယ။

၂၃၅။ ဝဏ္ဏာဝဏ္ဏာယော ကတွာတိ ခုဒ္ဒကမဟန္တေဟိ သညာဏေဟိ ယုတ္တာယော ကတွာ။ တေနာဟ ‘‘နိမိတ္တသညံ အာရောပေတွာ’’တိ။

၂၄၂။ ကိစ္စာဓိကရဏံ …ပေ… သမ္မတီတိ ဧတ္ထ သမ္မုခါဝိနယေန အပလောကနာဒိကမ္မံ သမ္ပဇ္ဇတီတိ အတ္ထော ဒဋ္ဌဗ္ဗော။

အဓိကရဏဝူပသမနသမထကထာဒိဝဏ္ဏနာ နိဋ္ဌိတာ။

သမထက္ခန္ဓကဝဏ္ဏနာနယော နိဋ္ဌိတော။