📜

၇။ သင်္ဃဘေဒကက္ခန္ဓကော

ဆသကျပဗ္ဗဇ္ဇာကထာဒိဝဏ္ဏနာ

၃၃၀။ သင်္ဃဘေဒကက္ခန္ဓကေ ပါဠိယံ အနုပိယံ နာမာတိ အနုပိယာ နာမ။ ဟေဋ္ဌာ ပါသာဒါတိ ပါသာဒတော ဟေဋ္ဌာ ဟေဋ္ဌိမတလံ၊ ‘‘ဟေဋ္ဌာပါသာဒ’’န္တိပိ ပါဌော။ အဘိနေတဗ္ဗန္တိ ဝပိတခေတ္တေသု ပဝေသေတဗ္ဗံ။ နိန္နေတဗ္ဗန္တိ တတော နီဟရိတဗ္ဗံ။ နိဒ္ဓါပေတဗ္ဗန္တိ သဿဒူသကတိဏာဒီနိ ဥဒ္ဓရိတဗ္ဗံ။ ဥဇုံ ကာရာပေတဗ္ဗန္တိ ပုဉ္ဇံ ကာရာပေတဗ္ဗံ၊ အယမေဝ ဝါ ပါဌော။

၃၃၂။ ပရဒတ္တောတိ ပရေဟိ ဒိန္နပစ္စယေဟိ ပဝတ္တမာနော။ မိဂဘူတေန စေတသာတိ ကတ္ထစိ အလဂ္ဂတာယ မိဂဿ ဝိယ ဇာတေန စိတ္တေန။

၃၃၃။ မနောမယံ ကာယန္တိ ဈာနမနေန နိဗ္ဗတ္တံ ဗြဟ္မကာယံ၊ ‘‘ကိံ နု ခေါ အဟံ ပသာဒေယျံ၊ ယသ္မိံ မေ ပသန္နေ ဗဟုလာဘသက္ကာရော ဥပ္ပဇ္ဇေယျာ’’တိ ပဌမံ ဥပ္ပန္နပရိဝိတက္ကဿ မန္ဒပရိယုဋ္ဌာနတာယ ဒေဝဒတ္တဿ တသ္မိံ ခဏေ ဈာနပရိဟာနိ နာဟောသိ၊ ပစ္ဆာ ဧဝ အဟောသီတိ ဒဋ္ဌဗ္ဗံ။ တေနာဟ ‘‘သဟ စိတ္တုပ္ပာဒါ’’တိအာဒိ။ ဒွေ ဝါ တီဏိ ဝါ မာဂဓကာနိ ဂါမခေတ္တာနီတိ ဧတ္ထ မဂဓရဋ္ဌေ ခုဒ္ဒကံ ဂါမခေတ္တံ ဂါဝုတမတ္တံ၊ မဇ္ဈိမံ ပန ဒိယဍ္ဎဂါဝုတမတ္တံ၊ မဟန္တံ အနေကယောဇနမ္ပိ ဟောတိ။ တေသု မဇ္ဈိမေန ဂါမခေတ္တေန ဒွေ ဝါ ခုဒ္ဒကေန တီဏိ ဝါ ဂါမခေတ္တာနိ၊ တဿ သရီရံ တိဂါဝုတပ္ပမာဏော အတ္တဘာဝေါတိ ဝုတ္တံ ဟောတိ။

၃၃၄။ သတ္ထာရောတိ ဂဏသတ္ထာရော။ နာဿဿာတိ န ဧတဿ ဘဝေယျ။ တန္တိ သတ္ထာရံ။ တေနာတိ အမနာပေန။ သမ္မန္နတီတိ စီဝရာဒိနာ အမှာကံ သမ္မာနံ ကရောတိ၊ ပရေဟိ ဝါ အယံ သတ္ထာ သမ္မာနီယတီတိ အတ္ထော။

၃၃၅။ နာသာယပိတ္တံ ဘိန္ဒေယျုန္တိ အစ္ဆပိတ္တံ ဝါ မစ္ဆပိတ္တံ ဝါ နာသာပုဋေ ပက္ခိပေယျုံ။ အဿတရီတိ ဝဠဝါယ ကုစ္ဆိသ္မိံ ဂဒြဘဿ ဇာတာ။ တဿာ ဟိ ဂဟိတဂဗ္ဘာယ ဝိဇာယိတုမသက္ကောန္တိယာ ဥဒရံ ဖာလေတွာ ပေါတကံ နီဟရန္တိ။ တေနာဟ ‘‘အတ္တဝဓာယ ဂဗ္ဘံ ဂဏှာတီ’’တိ။

၃၃၉။ ပေါတ္ထနိကန္တိ ဆုရိကံ၊ ‘‘ခရ’’န္တိပိ ဝုစ္စတိ။

၃၄၂။ မာကုဉ္ဇရ နာဂမာသဒေါတိ ဟေ ကုဉ္ဇရ ဗုဒ္ဓနာဂံ ဝဓကစိတ္တေန မာ ဥပဂစ္ဆ။ ဒုက္ခန္တိ ဒုက္ခကာရဏတ္တာ ဒုက္ခံ။ ဣတောတိ ဣတော ဇာတိတော။ ယတောတိ ယသ္မာ၊ ယန္တဿ ဝါ၊ ဂစ္ဆန္တဿာတိ အတ္ထော။ မာ စ မဒေါတိ မဒေါ တယာ န ကာတဗ္ဗောတိ အတ္ထော။

၃၄၃။ တိကဘောဇနန္တိ တီဟိ ဘုဉ္ဇိတဗ္ဗံ ဘောဇနံ၊ တတော အဓိကေဟိ ဧကတော ပဋိဂ္ဂဟေတွာ ဘုဉ္ဇိတုံ န ဝဋ္ဋနကံ ဂဏဘောဇနပဋိပက္ခံ ဘောဇနန္တိ အတ္ထော။ ကောကာလိကောတိအာဒီနိ ဒေဝဒတ္တပရိသာယ ဂဏပါမောက္ခာနံ နာမာနိ။ ကပ္ပန္တိ မဟာနိရယေ အာယုကပ္ပံ၊ တံ အန္တရကပ္ပန္တိ ကေစိ။ ကေစိ ပန ‘‘အသင်္ချေယျကပ္ပ’’န္တိ။

ဆသကျပဗ္ဗဇ္ဇာကထာဒိဝဏ္ဏနာ နိဋ္ဌိတာ။

သင်္ဃဘေဒကကထာဝဏ္ဏနာ

၃၄၅။ ပရဿ စိတ္တံ ဉတွာ ကထနံ အာဒေသနာပါဋိဟာရိယံ။ ကေဝလံ ဓမ္မဒေသနာ အနုသာသနီပါဋိဟာရိယံ။ တဒုဘယမ္ပိ ဓမ္မီ ကထာ နာမ။ တာယ ထေရော ဩဝဒိ။ ဣဒ္ဓိဝိဓံ ဣဒ္ဓိပါဋိဟာရိယံ နာမ။ တေန သဟိတာ အနုသာသနီ ဧဝ ဓမ္မီ ကထာ။ တာယ ထေရော ဩဝဒိ။

‘‘ထုလ္လစ္စယံ ဒေသာပေဟီ’’တိ ဣဒံ ဘေဒပုရေက္ခာရဿ ဥပေါသထာဒိကရဏေ ထုလ္လစ္စယဿ ဥပေါသထက္ခန္ဓကာဒီသု ပဌမမေဝ ပညတ္တတ္တာ ဝုတ္တံ၊ ဣတရထာ ဧတေသံ အာဒိကမ္မိကတ္တာ အနာပတ္တိယေဝ သိယာ။

၃၄၆။ သရသီတိ သရော။ မဟိံ ဝိကြုဗ္ဗတောတိ မဟိံ ဒန္တေဟိ ဝိလိခန္တဿ။ ဣဒဉ္စ ဟတ္ထီနံ သဘာဝဒဿနံ။ နဒီသူတိ သရေသု။ ဘိသံ ဃသမာနဿာတိ ယောဇနာ။ ဇဂ္ဂတောတိ ယူထံ ပါလေန္တဿ။

၃၄၇။ ဒူတေယျံဂန္တုန္တိ ဒူတကမ္မံ ပတ္တုံ၊ ဒူတကမ္မံ ကာတုန္တိ အတ္ထော။ သဟိတာသဟိတဿာတိ ယုတ္တာယုတ္တဿ၊ ယံ ဝတ္တုံ၊ ကာတုဉ္စ ယုတ္တံ၊ တတ္ထ ကုသလော။ အထ ဝါ အဓိပ္ပေတာနာဓိပ္ပေတဿ ဝစနဿ ကုသလော၊ ဗျဉ္ဇနမတ္တေ န တိဋ္ဌတိ၊ အဓိပ္ပေတတ္ထမေဝ အာရောစေတီတိ အတ္ထော။

၃၅၀။ ဂါထာသု ဇာတူတိ ဧကံသေန။ မာ ဥဒပဇ္ဇထ မာ ဟောတူတိ အတ္ထော။ ပါပိစ္ဆာနံ ယထာဂတီတိ ပါပိစ္ဆာနံ ပုဂ္ဂလာနံ ယာဒိသီ ဂတိ အဘိသမ္ပရာယော။ တံ အတ္ထဇာတံ။ ဣမိနာပိ ကာရဏေန ဇာနာထာတိ ဒေဝဒတ္တဿ ‘‘ပဏ္ဍိတော’’တိအာဒိနာ ဥပရိ ဝက္ခမာနာကာရံ ဒဿေတိ။

ပမာဒံ အနုစိဏ္ဏောတိ ပမာဒံ အာပန္နော။ အာသီသာယန္တိ အဝဿံဘာဝီအတ္ထသိဒ္ဓိယံ။ သာ ဟိ ဣဓ အာသီသာတိ အဓိပ္ပေတာ၊ န ပတ္ထနာ။ ဤဒိသေ အနာဂတတ္ထေ အတီတဝစနံ သဒ္ဒဝိဒူ ဣစ္ဆန္တိ။

ဒုဗ္ဘေတိ ဒုဗ္ဘေယျ။ ဝိသကုမ္ဘေနာတိ ဧကေန ဝိသပုဏ္ဏကုမ္ဘေန။ သောတိ သော ပုဂ္ဂလော။ န ပဒူသေယျ ဝိသမိဿံ ကာတုံ န သက္ကောတီတိ အတ္ထော။ ဘယာနကောတိ ဝိပုလဂမ္ဘီရဘာဝေန ဘယာနကော။ တေနာပိ ဒူသေတုံ န သက္ကုဏေယျတံ ဒဿေတိ။ ဝါဒေနာတိ ဒေါသကထနေန။ ဥပဟိံသတီတိ ဗာဓတိ။

သင်္ဃဘေဒကကထာဝဏ္ဏနာ နိဋ္ဌိတာ။

ဥပါလိပဉှာကထာဝဏ္ဏနာ

၃၅၁။ န ပန ဧတ္တာဝတာ သင်္ဃော ဘိန္နော ဟောတီတိ သလာကဂ္ဂါဟာပနမတ္တေန သင်္ဃဘေဒါနိဗ္ဗတ္တိတော ဝုတ္တံ။ ဥပေါသထာဒိသင်္ဃကမ္မေ ကတေ ဧဝ ဟိ သင်္ဃော ဘိန္နော ဟောတိ။ တတ္ထ စ ဥပေါသထပဝါရဏာသု ဉတ္တိနိဋ္ဌာနေန၊ သေသကမ္မေသု အပလောကနာဒိကမ္မပရိယောသာနေန သင်္ဃဘေဒေါ သမတ္ထောတိ ဒဋ္ဌဗ္ဗော။

‘‘အဘဗ္ဗတာ န ဝုတ္တာ’’တိ ဣဒံ ‘‘ဘိက္ခဝေ၊ ဒေဝဒတ္တေန ပဌမံ အာနန္တရိယကမ္မံ ဥပစိတ’’န္တိအာဒိနာ အာနန္တရိယတ္တံ ဝဒတာ ဘဂဝတာ တဿ အဘဗ္ဗတာသင်္ခါတာ ပါရာဇိကတာ န ပညတ္တာ။ ဧတေန အာပတ္တိ ဝိယ အဘဗ္ဗတာပိ ပညတ္တိအနန္တရမေဝ ဟောတိ၊ န တတော ပုရေတိ ဒဿေတိ။ ဣဓ ပန အာဒိကမ္မိကဿပိ အနာပတ္တိယာ အဝုတ္တတ္တာ ဒေဝဒတ္တာဒယောပိ န မုတ္တာတိ ဒဋ္ဌဗ္ဗံ။

တယော သတိပဋ္ဌာနာတိအာဒီသု တယော ဧဝ သတိပဋ္ဌာနာ၊ န တတော ပရန္တိ ဧကဿ သတိပဋ္ဌာနဿ ပဋိက္ခေပေါဝ ဣဓ အဓမ္မော၊ န ပန တိဏ္ဏံ သတိပဋ္ဌာနတ္တဝိဓာနံ တဿ ဓမ္မတ္တာ။ ဧဝံ သေသေသုပိ ဟာပနကောဋ္ဌာသေသု။ ဝဍ္ဎနေသု ပန ဆ ဣန္ဒြိယာနီတိ အနိန္ဒြိယဿပိ ဧကဿ ဣန္ဒြိယတ္တဝိဓာနမေဝ အဓမ္မော။ ဧဝံ သေသေသုပိ။ န ကေဝလဉ္စ ဧတေဝ၊ ‘‘စတ္တာရော ခန္ဓာ၊ တေရသာယတနာနီ’’တိအာဒိနာ ယတ္ထ ကတ္ထစိ ဝိပရီတတော ပကာသနံ သဗ္ဗံ အဓမ္မော။ ယာထာဝတော ပကာသနဉ္စ သဗ္ဗံ ဓမ္မောတိ ဒဋ္ဌဗ္ဗံ။ ပကာသနန္တိ စေတ္ထ တထာ တထာ ကာယဝစီပယောဂသမုဋ္ဌာပိကာ အရူပက္ခန္ဓာဝ အဓိပ္ပေတာ၊ ဧဝမေတ္ထ ဒသကုသလကမ္မပထာဒီသု အနဝဇ္ဇဋ္ဌေန သရူပတော ဓမ္မေသု၊ အကုသလကမ္မပထာဒီသု သာဝဇ္ဇဋ္ဌေန သရူပတော အဓမ္မေသု စ တဒညေသု စ အဗျာကတေသု ယဿ ကဿစိ ကောဋ္ဌာသဿ ဘဂဝတာ ပညတ္တက္ကမေနေဝ ပကာသနံ ‘‘ဓမ္မော’’တိ စ ဝိပရီတတော ပကာသနံ ‘‘အဓမ္မော’’တိ စ ဒဿိတန္တိ ဒဋ္ဌဗ္ဗံ။ ကာမဉ္စေတ္ထ ဝိနယာဒယောပိ ယထာဘူတတော၊ အယထာဘူတတော စ ပကာသနဝသေန ဓမ္မာဓမ္မေသု ဧဝ ပဝိသန္တိ၊ ဝိနယာဒိနာမေန ပန ဝိသေသေတွာ ဝိသုံ ဂဟိတတ္တာ တဒဝသေသမေဝ ဓမ္မာဓမ္မကောဋ္ဌာသေ ပဝိသတီတိ ဒဋ္ဌဗ္ဗံ။

ဣမံ အဓမ္မံ ဓမ္မောတိ ကရိဿာမာတိအာဒိ ဓမ္မဉ္စ အဓမ္မဉ္စ ယာထာဝတော ဉတွာဝ ပါပိစ္ဆံ နိဿာယ ဝိပရီတတော ပကာသေန္တဿေဝ သင်္ဃဘေဒေါ ဟောတိ၊ န ပန တထာသညာယ ပကာသေန္တဿာတိ ဒဿနတ္ထံ ဝုတ္တံ။ ဧသ နယော ‘‘အဝိနယံ ဝိနယောတိ ဒီပေန္တီ’’တိအာဒီသုပိ။ တတ္ထ နိယျာနိကန္တိ ဥက္ကဋ္ဌန္တိ အတ္ထော။ ‘‘တထေဝါ’’တိ ဣမိနာ ‘‘ဧဝံ အမှာကံ အာစရိယကုလ’’န္တိအာဒိနာ ဝုတ္တမတ္ထံ အာကဍ္ဎတိ။

သံဝရော ပဟာနံ ပဋိသင်္ခါတိ သံဝရဝိနယော၊ ပဟာနဝိနယော၊ ပဋိသင်္ခါဝိနယော စ ဝုတ္တော။ တေနာဟ ‘‘အယံ ဝိနယော’’တိ။ ‘‘ပညတ္တံ အပညတ္တ’’န္တိ ဒုကံ ‘‘ဘာသိတံ အဘာသိတ’’န္တိ ဒုကေန အတ္ထတော သမာနမေဝ၊ တထာ ဒုဋ္ဌုလ္လဒုကံ ဂရုကဒုကေန။ တေနေဝ တေသံ ‘‘စတ္တာရော သတိပဋ္ဌာနာ…ပေ… ဣဒံ အပညတ္တံ နာမာ’’တိအာဒိနာ သဒိသနိဒ္ဒေသော ကတော။ သာဝသေသာပတ္တိန္တိ အဝသေသသီလေဟိ သဟိတာပတ္တိံ။ နတ္ထိ ဧတိဿံ အာပန္နာယံ သီလာဝသေသာတိ အနဝသေသာပတ္တိ။

၃၅၄။ ပါဠိယံ သမဂ္ဂါနဉ္စ အနုဂ္ဂဟောတိ ယထာ သမဂ္ဂါနံ သာမဂ္ဂီ န ဘိဇ္ဇတိ၊ ဧဝံ အနုဂ္ဂဟဏံ အနုဗလပ္ပဒါနံ။

၃၅၅။ သိယာနု ခေါတိ သမ္ဘဝေယျ နု ခေါ။ တသ္မိံ အဓမ္မဒိဋ္ဌီတိ အတ္တနော ‘‘အဓမ္မံ ဓမ္မော’’တိ ဧတသ္မိံ ဒီပနေ အယုတ္တဒိဋ္ဌိ။ ဘေဒေ အဓမ္မဒိဋ္ဌီတိ ‘‘အဓမ္မံ ဓမ္မော’’တိ ဒီပေတွာ အနုဿာဝနသလာကဂ္ဂါဟာပနာဒိနာ အတ္တာနံ မုဉ္စိတွာ စတုဝဂ္ဂါဒိကံ သင်္ဃံ ဧကသီမာယမေဝ ဌိတတော စတုဝဂ္ဂါဒိသင်္ဃတော ဝိယောဇေတွာ ဧကကမ္မာဒိနိပ္ဖာဒနဝသေန သင်္ဃဘေဒကရဏေ အဓမ္မဒိဋ္ဌိကော ဟုတွာတိ အတ္ထော။ ဝိနိဓာယ ဒိဋ္ဌိန္တိ ယာ တသ္မိံ ‘‘အဓမ္မံ ဓမ္မော’’တိ ဒီပနေ အတ္တနော အဓမ္မဒိဋ္ဌိ ဥပ္ပဇ္ဇတိ၊ တံ ဝိနိဓာယ ပဋိစ္ဆာဒေတွာ ‘‘ဓမ္မော ဧဝါယ’’န္တိ ဝိပရီတတော ပကာသေတွာတိ အတ္ထော။ ဧဝံ သဗ္ဗတ္ထ အတ္ထော ဝေဒိတဗ္ဗော။

ဘေဒေ ဓမ္မဒိဋ္ဌီတိ ယထာဝုတ္တနယေန သင်္ဃဘေဒနေ ဒေါသော နတ္ထီတိ လဒ္ဓိကော။ အယံ ပန ‘‘အဓမ္မံ ဓမ္မော’’တိ ဒီပနေ အဓမ္မဒိဋ္ဌိကော ဟုတွာပိ တံ ဒိဋ္ဌိံ ဝိနိဓာယ ကရဏေန သင်္ဃဘေဒကော အတေကိစ္ဆော ဇာတော။ ဧဝံ ဘေဒေ ဝေမတိကောတိ ဣမဿ ပန ဘေဒေ ဝေမတိကဒိဋ္ဌိယာ ဝိနိဓာနမ္ပိ အတ္ထိ။ သေသံ သမမေဝ။ တသ္မိံ ဓမ္မဒိဋ္ဌိဘေဒေ အဓမ္မဒိဋ္ဌီတိ အယံ ပန ဘေဒေ အဓမ္မဒိဋ္ဌိံ ဝိနိဓာယ ကတတ္တာ သင်္ဃဘေဒကော အတေကိစ္ဆော ဇာတော။ သုက္ကပက္ခေ ပန သဗ္ဗတ္ထ ‘‘အဓမ္မံ ဓမ္မော’’တိအာဒိဒီပနေ ဝါ ဘေဒေ ဝါ ဓမ္မဒိဋ္ဌိတာယ ဒိဋ္ဌိံ အဝိနိဓာယေဝ ကတတ္တာ သင်္ဃဘေဒကောပိ သတေကိစ္ဆော ဇာတော။ တသ္မာ ‘‘အဓမ္မံ ဓမ္မော’’တိအာဒိဒီပနေ ဝါ သင်္ဃဘေဒေ ဝါ ဥဘောသုပိ ဝါ အဓမ္မဒိဋ္ဌိ ဝါ ဝေမတိကော ဝါ ဟုတွာ တံ ဒိဋ္ဌိံ၊ ဝိမတိဉ္စ ဝိနိဓာယ ‘‘ဓမ္မော’’တိ ပကာသေတွာ ဝုတ္တနယေန သင်္ဃဘေဒံ ကရောန္တဿေဝ အာနန္တရိယံ ဟောတီတိ ဝေဒိတဗ္ဗံ။

ဥပါလိပဉှာကထာဝဏ္ဏနာ နိဋ္ဌိတာ။

သင်္ဃဘေဒကက္ခန္ဓကဝဏ္ဏနာနယော နိဋ္ဌိတော။