📜

၈။ ဝတ္တက္ခန္ဓကော

အာဂန္တုကဝတ္တကထာဝဏ္ဏနာ

၃၅၇။ ဝတ္တက္ခန္ဓကေ ¶ ¶ ပတ္ထရိတဗ္ဗန္တိ အာတပေ ပတ္ထရိတဗ္ဗံ။ ပါဠိယံ အဘိဝါဒါပေတဗ္ဗောတိ ဝန္ဒနတ္ထာယ ဝဿံ ပုစ္ဆနေန နဝကော သယမေဝ ဝန္ဒတီတိ ဝုတ္တံ။ နိလ္လောကေတဗ္ဗောတိ ဩလောကေတဗ္ဗော။

အာဂန္တုကဝတ္တကထာဝဏ္ဏနာ နိဋ္ဌိတာ။

အာဝါသိကဝတ္တကထာဝဏ္ဏနာ

၃၅၉။ ‘‘ယထာဘာဂ’’န္တိ ဌပိတဋ္ဌာနံ အနတိက္ကမိတွာ မဉ္စပီဌာဒိံ ပပ္ဖောဋေတွာ ပတ္ထရိတွာ ဥပရိ ပစ္စတ္ထရဏံ ဒတွာ ဒါနမ္ပိ သေနာသနပညာပနမေဝါတိ ဒဿေန္တော အာဟ ‘‘ပပ္ဖောဋေတွာ ဟိ ပတ္ထရိတုံ ပန ဝဋ္ဋတိယေဝါ’’တိ။

အာဝါသိကဝတ္တကထာဝဏ္ဏနာ နိဋ္ဌိတာ။

အနုမောဒနဝတ္တကထာဝဏ္ဏနာ

၃၆၂။ ပဉ္စမေ နိသိန္နေတိ အနုမောဒနတ္ထာယ နိသိန္နေ။ န မဟာထေရဿ ဘာရော ဟောတီတိ အနုမောဒကံ အာဂမေတုံ န ဘာရော။ အဇ္ဈိဋ္ဌောဝ အာဂမေတဗ္ဗောတိ အတ္တနာ အဇ္ဈိဋ္ဌေဟိ ဘိက္ခူဟိ အနုမောဒန္တေယေဝ နိသီဒိတဗ္ဗန္တိ အတ္ထော။

အနုမောဒနဝတ္တကထာဝဏ္ဏနာ နိဋ္ဌိတာ။

ဘတ္တဂ္ဂဝတ္တကထာဝဏ္ဏနာ

၃၆၄။ မနုဿာနံ ¶ ပရိဝိသနဋ္ဌာနန္တိ ယတ္ထ အန္တောဝိဟာရေပိ မနုဿာ သပုတ္တဒါရာ အာဝသိတွာ ဘိက္ခူ နေတွာ ဘောဇေန္တိ။ အာသနေသု သတီတိ နိသီဒနဋ္ဌာနေသု ¶ သန္တေသု။ ဣဒံ၊ ဘန္တေ၊ အာသနံ ဥစ္စန္တိ အာသန္နေ သမဘူမိဘာဂေ ပညတ္တံ ထေရာသနေန သမကံ အာသနံ သန္ဓာယ ဝုတ္တံ၊ ထေရာသနတော ပန ဥစ္စတရေ အာပုစ္ဆိတွာပိ နိသီဒိတုံ န ဝဋ္ဋတိ။ ယဒိ တံ အာသန္နမ္ပိ နီစတရံ ဟောတိ၊ အနာပုစ္ဆာပိ နိသီဒိတုံ ဝဋ္ဋတိ။ မဟာထေရဿေဝ အာပတ္တီတိ အာသနေန ပဋိဗာဟနာပတ္တိယာ အာပတ္တိ။ အဝတ္ထရိတွာတိ ပါရုတသင်္ဃာဋိံ အဝတ္ထရိတွာ၊ အနုက္ခိပိတွာတိ အတ္ထော။

ပါဠိယံ ‘‘ဥဘောဟိ ဟတ္ထေဟိ…ပေ… ဩဒနော ပဋိဂ္ဂဟေတဗ္ဗော’’တိ ဣဒံ ဟတ္ထတလေ ဝါ ပစ္ဆိပိဋ္ဌိအာဒိဒုဿဏ္ဌိတာဓာရေ ဝါ ပတ္တံ ဌပေတွာ ဩဒနဿ ဂဟဏကာလေ ပတ္တဿ အပတနတ္ထာယ ဝုတ္တံ၊ သုသဇ္ဇိတေ ပန အာဓာရေ ပတ္တံ ဌပေတွာ ဧကေန ဟတ္ထေန တံ ပရာမသိတွာပိ ဩဒနံ ပဋိဂ္ဂဟေတုံ ဝဋ္ဋတိ ဧဝ။ ဥဘောဟိ ဟတ္ထေဟိ…ပေ… ဥဒကံ ပဋိဂ္ဂဟေတဗ္ဗန္တိ ဧတ္ထာပိ ဧသေဝ နယော။

ဟတ္ထဓောဝနဥဒကန္တိ ဘောဇနာဝသာနေ ဥဒကံ။ တေနာဟ ‘‘ပါနီယံ ပိဝိတွာ ဟတ္ထာ ဓောဝိတဗ္ဗာ’’တိ။ တေန ပရိယောသာနေ ဓောဝနမေဝ ပဋိက္ခိတ္တံ၊ ဘောဇနန္တရေ ပန ပါနီယပိဝနာဒိနာ နယေန ဟတ္ထံ ဓောဝိတွာ ပုန ဘုဉ္ဇိတုံ ဝဋ္ဋတီတိ ဒဿေတိ။ ပေါတ္ထကေသု ပန ‘‘ပါနီယံ ပိဝိတွာ ဟတ္ထာ န ဓောဝိတဗ္ဗာ’’တိ လိခန္တိ၊ တံ ပုရိမဝစနေန န သမေတိ ပရိယောသာနေ ဥဒကဿေဝ ‘‘ဟတ္ထဓောဝနဥဒက’’န္တိ ဝုတ္တတ္တာ။ သစေ မနုဿာ ဓောဝထ၊ ဘန္တေတိအာဒိ နိဋ္ဌိတဘတ္တံ နိသိန္နံ ထေရံ သန္ဓာယ ဝုတ္တံ။ ဓုရေ ဒွါရသမီပေ။

ဘတ္တဂ္ဂဝတ္တကထာဝဏ္ဏနာ နိဋ္ဌိတာ။

ပိဏ္ဍစာရိကဝတ္တကထာဒိဝဏ္ဏနာ

၃၆၆။ ပါဠိယံ ဌာပေတိ ဝါတိ တိဋ္ဌ ဘန္တေတိ ဝဒန္တိ။

၃၆၇။ အတ္ထိ၊ ဘန္တေ၊ နက္ခတ္တပဒါနီတိ နက္ခတ္တပဒဝိသယာနိ ဉာတာနိ အတ္ထိ၊ အဿယုဇာဒိနက္ခတ္တံ ဇာနာထာတိ အဓိပ္ပာယော။ တေနာဟ ‘‘န ဇာနာမ၊ အာဝုသော’’တိ။ အတ္ထိ၊ ဘန္တေ ¶ ၊ ဒိသာဘာဂန္တိ ဧတ္ထာပိ ဧသေဝ နယော။ ကေနဇ္ဇ၊ ဘန္တေ၊ ယုတ္တန္တိ ကေန နက္ခတ္တေန စန္ဒော ယုတ္တောတိ အတ္ထော။

၃၆၉။ အင်္ဂဏေတိ ¶ အဗ္ဘောကာသေ။ ဧဝမေဝ ပဋိပဇ္ဇိတဗ္ဗန္တိ ဥဒ္ဒေသဒါနာဒိ အာပုစ္ဆိတဗ္ဗန္တိ ဒဿေတိ။

၃၇၄။ နိဗဒ္ဓဂမနတ္ထာယာတိ အတ္တနောဝ နိရန္တရဂမနတ္ထာယ။ ဦဟဒိတာတိ ဧတ္ထ ဟဒ-ဓာတုဿ ဝစ္စဝိဿဇ္ဇနတ္ထတာယာဟ ‘‘ဗဟိ ဝစ္စမက္ခိတာ’’တိ။

ပိဏ္ဍစာရိကဝတ္တကထာဒိဝဏ္ဏနာ နိဋ္ဌိတာ။

ဝတ္တက္ခန္ဓကဝဏ္ဏနာနယော နိဋ္ဌိတော။