📜

၉။ ပါတိမောက္ခဋ္ဌပနက္ခန္ဓကော

ပါတိမောက္ခုဒ္ဒေသယာစနကထာဝဏ္ဏနာ

၃၈၃။ ပါတိမောက္ခဋ္ဌပနက္ခန္ဓကေ ပါဠိယံ နန္ဒိမုခိယာတိ ဩဒါတဒိသာမုခတာယ တုဋ္ဌမုခိယာ။ ‘‘ဥဒ္ဓသ္တံ အရုဏ’’န္တိ ဝတွာပိ ‘‘ဥဒ္ဒိသတု၊ ဘန္တေ၊ ဘဂဝါ’’တိ ပါတိမောက္ခုဒ္ဒေသယာစနံ အနုပေါသထေ ဥပေါသထကရဏပဋိက္ခေပဿ သိက္ခာပဒဿ အပညတ္တတ္တာ ထေရေန ကတန္တိ ဒဋ္ဌဗ္ဗံ။ ကသ္မာ ပန ဘဂဝါ ဧဝံ တုဏှီဘူတောဝ တိယာမရတ္တိံ ဝီတိနာမေသီတိ? အပရိသုဒ္ဓါယ ပရိသာယ ဥပေါသထာဒိသံဝါသကရဏဿ သာဝဇ္ဇတံ ဘိက္ခုသင်္ဃေ ပါကဋံ ကာတုံ၊ တဉ္စ အာယတိံ ဘိက္ခူနံ တထာပဋိပဇ္ဇနတ္ထံ သိက္ခာပဒံ ဉာပေတုံ။ ကေစိ ပနေတ္ထ ‘‘အပရိသုဒ္ဓမ္ပိ ပုဂ္ဂလံ တဿ သမ္မုခါ ‘အပရိသုဒ္ဓါ’တိ ဝတ္တုံ မဟာကရုဏာယ အဝိသဟန္တော ဘဂဝါ တထာ နိသီဒီ’’တိ ကာရဏံ ဝဒန္တိ။ တံ အကာရဏံ ပစ္ဆာပိ အဝတ္တဗ္ဗတော၊ မဟာမောဂ္ဂလ္လာနတ္ထေရေနာပိ တံ ဗာဟာယံ ဂဟေတွာ ဗဟိ နီဟရဏဿ အကတ္တဗ္ဗတာပသင်္ဂတော။ တသ္မာ ယထာဝုတ္တမေဝေတ္ထ ကာရဏန္တိ။ တေနေဝ ‘‘အဋ္ဌာနမေတံ၊ ဘိက္ခဝေ၊ အနဝကာသော၊ ယံ တထာဂတော အပရိသုဒ္ဓါယ ပရိသာယ ဥပေါသထံ ကရေယျ၊ ပါတိမောက္ခံ ဥဒ္ဒိသေယျာ’’တိ (အ။ နိ။ ၈။၂၀၊ စူဠဝ။ ၃၈၆၊ ဥဒါ။ ၄၅) ဝတွာ ‘‘န စ၊ ဘိက္ခဝေ၊ သာပတ္တိကေန ပါတိမောက္ခံ သောတဗ္ဗ’’န္တိအာဒိနာ (စူဠဝ။ ၃၈၆) သာပတ္တိကပရိသာယ ကတ္တဗ္ဗဝိဓိ ဒဿိတော။

သင်္ကဿရသမာစာရန္တိ ကိဉ္စိဒေဝ အသာရုပ္ပံ ဒိသွာ ‘‘ဣဒံ ဣမိနာ ကတံ ဘဝိဿတီ’’တိ ပရေဟိ သင်္ကာယ သရိတဗ္ဗသမာစာရံ၊ အတ္တနာ ဝါ ‘‘မမ အနာစာရံ ဧတေ ဇာနန္တီ’’တိ သင်္ကာယ သရိတဗ္ဗသမာစာရံ။ သမဏဝေသဓာရဏေန၊ သင်္ဃိကပစ္စယဘာဂဂဟဏာဒိနာ စ ဇီဝိကံ ကပ္ပေန္တော ‘‘အဟံ သမဏော’’တိ ပဋိညံ အဒေန္တောပိ အတ္ထတော ဒေန္တော ဝိယ ဟောတီတိ ‘‘သမဏပဋိညံ ဗြဟ္မစာရိပဋိည’’န္တိ ဝုတ္တံ။ အဝဿုတန္တိ ကိလေသာဝဿနေန တိန္တံ။ သဉ္ဇာတဒုဿိလျကစဝရတ္တာ ကသမ္ဗုဇာတံ၊ အသာရတာယ ဝါ ကသမ္ဗု ဝိယ ဇာတံ။ ဗဟိဒွါရကောဋ္ဌကာ နိက္ခာမေတွာတိ ဒွါရသာလတော ဗဟိ နိက္ခမာပေတွာ။

၃၈၄။ မဟာသမုဒ္ဒေအဘိရမန္တီတိ ဗဟုသော ဒဿနပဝိသနာဒိနာ မဟာသမုဒ္ဒေ အဘိရတိံ ဝိန္ဒန္တိ။ န အာယတကေနေဝ ပပါတောတိ ဆိန္နတဋမဟာသောဗ္ဘော ဝိယ န အာဒိတောဝ နိန္နောတိ အတ္ထော။ ဌိတဓမ္မောတိ အဝဋ္ဌိတသဘာဝေါ။ ပူရတ္တန္တိ ပုဏ္ဏတ္တံ။ နာဂါတိ သပ္ပဇာတိကာ။

ပါတိမောက္ခုဒ္ဒေသယာစနကထာဝဏ္ဏနာ နိဋ္ဌိတာ။

ပါတိမောက္ခသဝနာရဟကထာဒိဝဏ္ဏနာ

၃၈၆။ ဥဒါဟရိတဗ္ဗန္တိ ပါဠိယာ အဝတွာ တမတ္ထံ ယာယ ကာယစိ ဘာသာယ ဥဒါဟဋမ္ပိ ဥဒါဟဋမေဝါတိ ဒဋ္ဌဗ္ဗံ။

ပုရေ ဝါ ပစ္ဆာ ဝါတိ ဉတ္တိအာရမ္ဘတော ပုဗ္ဗေ ဝါ ဉတ္တိနိဋ္ဌာနတော ပစ္ဆာ ဝါ။

၃၈၇။ ကတဉ္စ အကတဉ္စ ဥဘယံ ဂဟေတွာတိ ယဿ ကတာပိ အတ္ထိ အကတာပိ။ တဿ တဒုဘယံ ဂဟေတွာ။ ဓမ္မိကံ သာမဂ္ဂိန္တိ ဓမ္မိကံ သမဂ္ဂကမ္မံ။ ပစ္စာဒိယတီတိ ဥက္ကောဋနာဓိပ္ပာယေန ပုန ကာတုံ အာဒိယတိ။

၃၈၈။ အာကာရာဒိသညာ ဝေဒိတဗ္ဗာတိ အာကာရလိင်္ဂနိမိတ္တနာမာနိ ဝုတ္တာနီတိ ဝေဒိတဗ္ဗာနိ။

ပါတိမောက္ခသဝနာရဟကထာဒိဝဏ္ဏနာ နိဋ္ဌိတာ။

အတ္တာဒါနအင်္ဂကထာဒိဝဏ္ဏနာ

၃၉၈။ ပုန စောဒေတုံ အတ္တနာ အာဒါတဗ္ဗံ ဂဟေတဗ္ဗံ အဓိကရဏံ အတ္တာဒါနန္တိ အာဟ ‘‘သာသနံ သောဓေတုကာမော’’တိအာဒိ။ ဝဿာရတ္တောတိ ဝဿကာလော။ သောပိ ဟိ ဒုဗ္ဘိက္ခာဒိကာလော ဝိယ အဓိကရဏဝူပသမတ္ထံ လဇ္ဇိပရိသာယ ဒူရတော အာနယနဿ၊ အာဂတာနဉ္စ ပိဏ္ဍာယ စရဏာဒိသမာစာရဿ ဒုက္ကရတ္တာ အကာလော ဧဝ။

သမနုဿရဏကရဏန္တိ အနုဿရိတာနုဿရိတက္ခဏေ ပီတိပါမောဇ္ဇဇနနတော အနုဿရဏုပ္ပာဒကံ။ ဝိဂတူပက္ကိလေသ…ပေ… သံဝတ္တတီတိ ဧတ္ထ ယထာ အဗ္ဘဟိမာဒိဥပက္ကိလေသဝိရဟိတာနံ စန္ဒိမသူရိယာနံ သဿိရီကတာ ဟောတိ၊ ဧဝမဿာပိ စောဒကဿ ပါပပုဂ္ဂလူပက္ကိလေသဝိဂမေန သဿိရီကတာ ဟောတီတိ အဓိပ္ပာယော။

၃၉၉။ အဓိဂတံ မေတ္တစိတ္တန္တိ အပ္ပနာပ္ပတ္တံ မေတ္တဈာနံ။

၄၀၀-၁။ ‘‘ဒေါသန္တရော’’တိ ဧတ္ထ အန္တရ-သဒ္ဒေါ စိတ္တပရိယာယောတိ အာဟ ‘‘န ဒုဋ္ဌစိတ္တော ဟုတွာ’’တိ။

ကာရုညံ နာမ ကရုဏာ ဧဝါတိ အာဟ ‘‘ကာရုညတာတိ ကရုဏာဘာဝေါ’’တိ။ ကရုဏန္တိ အပ္ပနာပ္ပတ္တံ ဝဒတိ။ တထာ မေတ္တန္တိ။

အတ္တာဒါနအင်္ဂကထာဒိဝဏ္ဏနာ နိဋ္ဌိတာ။

ပါတိမောက္ခဋ္ဌပနက္ခန္ဓကဝဏ္ဏနာနယော နိဋ္ဌိတော။