📜

၁၀။ ဘိက္ခုနိက္ခန္ဓကော

မဟာပဇာပတိဂေါတမီဝတ္ထုကထာဝဏ္ဏနာ

၄၀၃။ ဘိက္ခုနိက္ခန္ဓကေ ‘‘မာတုဂါမဿ ပဗ္ဗဇိတတ္တာ’’တိ ဣဒံ ပဉ္စဝဿသတတော ဥဒ္ဓံ သဒ္ဓမ္မဿ အပ္ပဝတ္တနကာရဏဒဿနံ။ သုက္ခဝိပဿကခီဏာသဝဝသေန ဝဿသဟဿန္တိအာဒိ ခန္ဓကဘာဏကာနံ မတံ ဂဟေတွာ ဝုတ္တံ။ ဒီဃနိကာယဋ္ဌကထာယံ ပန ‘‘ပဋိသမ္ဘိဒါပ္ပတ္တေဟိ ဝဿသဟဿံ အဋ္ဌာသိ၊ ဆဠဘိညေဟိ ဝဿသဟဿံ၊ တေဝိဇ္ဇေဟိ ဝဿသဟဿံ၊ သုက္ခဝိပဿကေဟိ ဝဿသဟဿံ၊ ပါတိမောက္ခေဟိ ဝဿသဟဿံ အဋ္ဌာသီ’’တိ (ဒီ။ နိ။ အဋ္ဌ။ ၃။၁၆၁) ဝုတ္တံ။ အင်္ဂုတ္တရ (အ။ နိ။ အဋ္ဌ။ ၃။၈။၅၁) -သံယုတ္တဋ္ဌကထာသုပိ (သံ။ နိ။ အဋ္ဌ။ ၂။၂။၁၅၆) အညထာဝ ဝုတ္တံ၊ တံ သဗ္ဗံ အညမညဝိရုဒ္ဓမ္ပိ တံတံဘာဏကာနံ မတေန လိခိတသီဟဠဋ္ဌကထာသု အာဂတနယမေဝ ဂဟေတွာ အာစရိယေန လိခိတံ ဤဒိသေ ကထာဝိရောဓေ သာသနပရိဟာနိယာ အဘာဝတော၊ သောဓနုပါယာဘာဝါ စ။ ပရမတ္ထဝိရောဓော ဧဝ ဟိ သုတ္တာဒိနယေန သောဓနီယော၊ န ကထာမဂ္ဂဝိရောဓောတိ။

မဟာပဇာပတိဂေါတမီဝတ္ထုကထာဝဏ္ဏနာ နိဋ္ဌိတာ။

ဘိက္ခုနီဥပသမ္ပဒါနုဇာနနကထာဝဏ္ဏနာ

၄၀၄-၈။ ပါဠိယံ ယဒဂ္ဂေနာတိ ယသ္မိံ ဒိဝသေ။ တဒါတိ တသ္မိံယေဝ ဒိဝသေ။ ဝိမာနေတွာတိ အဝမာနံ ကတွာ။

၄၁၀-၁။ အာပတ္တိဂါမိနိယောတိ အာပတ္တိံ အာပန္နာယော။ ကမ္မဝိဘင်္ဂေတိ ပရိဝါရေ ကမ္မဝိဘင်္ဂေ (ပရိ။ ၄၈၂ အာဒယော)။

၄၁၃-၅။ ပါဠိယံ ဒွေ တိဿော ဘိက္ခုနိယောတိ ဒွီဟိ တီဟိ ဘိက္ခုနီဟိ။ န အာရောစေန္တီတိ ပါတိမောက္ခုဒ္ဒေသကဿ န အာရောစေန္တိ။

၄၁၆။ ဒုဿဝေဏိယာတိ အနေကဒုဿပဋ္ဋေ ဧကတော ကတွာ ကတဝေဏိယာ။

၄၁၇။ ဝိသေသကန္တိ ပတ္တလေခါဒိဝဏ္ဏဝိသေသံ။ ပကိဏန္တီတိ ဝိက္ကိဏန္တိ။ နမနကန္တိ ပါသုကဋ္ဌိနမနကဗန္ဓနံ။

၄၂၂-၅။ သံဝေလ္လိယန္တိ ကစ္ဆံ ဗန္ဓိတွာ နိဝါသနံ။ တယော နိဿယေတိ ရုက္ခမူလသေနာသနဿ တာသံ အလဗ္ဘနတော ဝုတ္တံ။

၄၂၆-၈။ အဋ္ဌေဝ ဘိက္ခုနိယော ယထာဝုဍ္ဎံ ပဋိဗာဟန္တီတိ အဋ္ဌ ဘိက္ခုနိယော ဝုဍ္ဎပဋိပါဋိယာဝ ဂဏှန္တိယော အာဂတပဋိပါဋိံ ပဋိဗာဟန္တိ၊ နာညာတိ အတ္ထော။ အနုဝါဒံ ပဋ္ဌပေန္တီတိ ဣဿရိယံ ပဝတ္တေန္တီတိ အတ္ထံ ဝဒန္တိ။

၄၃၀။ ဘိက္ခုဒူတေနာတိ ဘိက္ခုနာ ဒူတဘူတေန။ သိက္ခမာနဒူတေနာတိ သိက္ခမာနာယ ဒူတာယ။

၄၃၁။ န သမ္မတီတိ နပ္ပဟောတိ။ နဝကမ္မန္တိ ‘‘နဝကမ္မံ ကတွာ ဝသတူ’’တိ အပလောကေတွာ သင်္ဃိကဘူမိယာ ဩကာသဒါနံ။

၄၃၂-၆။ သန္နိသိန္နဂဗ္ဘာတိ ဒုဝိညေယျဂဗ္ဘာ။ မဟိလာတိတ္ထေတိ ဣတ္ထီနံ သာဓာရဏတိတ္ထေ။

ဘိက္ခုနီဥပသမ္ပဒါနုဇာနနကထာဝဏ္ဏနာ နိဋ္ဌိတာ။

ဘိက္ခုနိက္ခန္ဓကဝဏ္ဏနာနယော နိဋ္ဌိတော။