📜

၁၁။ ပဉ္စသတိကက္ခန္ဓကော

ခုဒ္ဒါနုခုဒ္ဒကသိက္ခာပဒကထာဝဏ္ဏနာ

၄၃၇။ ပဉ္စသတိကက္ခန္ဓကေ ပါဠိယံ ‘‘အပါဝုသော၊ အမှာကံ သတ္ထာရံ ဇာနာသီ’’တိ ဣဒံ ထေရော သယံ ဘဂဝတော ပရိနိဗ္ဗုတဘာဝံ ဇာနန္တောပိ အတ္တနာ သဟဂတဘိက္ခုပရိသာယ ဉာပနတ္ထမေဝ၊ သုဘဒ္ဒဿ ဝုဍ္ဎပဗ္ဗဇိတဿ သာသနဿ ပဋိပက္ခဝစနံ ဘိက္ခူနံ ဝိညာပနတ္ထဉ္စ ဧဝံ ပုစ္ဆိ။ သုဘဒ္ဒေါ ဟိ ကုသိနာရာယံ ဘဂဝတိ အဘိပ္ပသန္နာယ ခတ္တိယာဒိဂဟဋ္ဌပရိသာယ မဇ္ဈေ ဘဂဝတော ပရိနိဗ္ဗာနံ သုတွာ ဟဋ္ဌပဟဋ္ဌောပိ ဘယေန ပဟဋ္ဌာကာရံ ဝါစာယ ပကာသေတုံ န သက္ခိဿတိ၊ ဣဓေဝ ပန ဝိဇနပဒေသေ သုတွာ ယထာဇ္ဈာသယံ အတ္တနော ပါပလဒ္ဓိံ ပကာသေဿတိ၊ တတော တမေဝ ပစ္စယံ ဒဿေတွာ ဘိက္ခူ သမုဿာဟေတွာ ဓမ္မဝိနယသင်္ဂဟံ ကာရေတွာ ဧတဿ ပါပဘိက္ခုဿ၊ အညေသဉ္စ ဤဒိသာနံ မနောရထဝိဃာတံ၊ သာသနဋ္ဌိတိဉ္စ ကရိဿာမီတိ ဇာနန္တောဝ တံ ပုစ္ဆီတိ ဝေဒိတဗ္ဗံ။ တေနေဝ ထေရော ‘‘ဧကမိဒါဟံ၊ အာဝုသော၊ သမယ’’န္တိအာဒိနာ သုဘဒ္ဒဝစနမေဝ ဒဿေတွာ ဓမ္မဝိနယံ သင်္ဂါယာပေသိ။ နာနာဘာဝေါတိ သရီရေန နာနာဒေသဘာဝေါ၊ ဝိပ္ပဝါသောတိ အတ္ထော။ ဝိနာဘာဝေါတိ မရဏေန ဝိယုဇ္ဇနံ။ အညထာဘာဝေါတိ ဘဝန္တရူပဂမနေန အညာကာရပ္ပတ္တိ။

၄၄၁။ ‘‘အာကင်္ခမာနော…ပေ… သမူဟနေယျာ’’တိ ဣဒံ ဘဂဝါ မယာ ‘‘အာကင်္ခမာနော’’တိ ဝုတ္တတ္တာ ဧကသိက္ခာပဒမ္ပိ သမူဟနိတဗ္ဗံ အပဿန္တာ၊ သမူဟနေ စ ဒေါသံ ဒိသွာ ဓမ္မသင်္ဂဟကာ ဘိက္ခူ ‘‘အပညတ္တံ န ပညာပေဿာမ၊ ပညတ္တံ န သမုစ္ဆိန္ဒိဿာမာ’’တိအာဒိနာ ပုန ‘‘ပညတ္တိသဒိသာယ အကုပ္ပာယ ကမ္မဝါစာယ သာဝေတွာ သမာဒါယ ဝတ္တိဿန္တိ၊ တတော ယာဝ သာသနန္တရဓာနာ အပ္ပဋိဗာဟိယာနိ သိက္ခာပဒါနိ ဘဝိဿန္တီ’’တိ ဣမိနာ အဓိပ္ပာယေန အဝေါစာတိ ဒဋ္ဌဗ္ဗံ။ တေနေဝ မဟာထေရာပိ တထေဝ ပဋိပဇ္ဇိံသု။

ဂိဟိဂတာနီတိ ဂိဟီသု ဂတာနိ။ ခတ္တိယမဟာသာရာဒိဂိဟီဟိ ဉာတာနီတိ အတ္ထော။ စိတကဓူမကာလော အတ္တနော ပဝတ္တိပရိယောသာနဘူတော ဧတဿာတိ ဓူမကာလိကံ။

၄၄၃။ ဩဠာရိကေနိမိတ္တေ ကရိယမာနေပီတိ ‘‘အာကင်္ခမာနော၊ အာနန္ဒ၊ တထာဂတော ကပ္ပံ ဝါ တိဋ္ဌေယျ ကပ္ပာဝသေသံ ဝါ’’တိ ဧဝံ ထူလတရေ ‘‘တိဋ္ဌတု၊ ဘဂဝါ၊ ကပ္ပ’’န္တိ ယာစနဟေတုဘူတေ ဩကာသနိမိတ္တေ ကမ္မေ ကရိယမာနေ။ မာရေန ပရိယုဋ္ဌိတစိတ္တောတိ မာရေန အာဝိဋ္ဌစိတ္တော။

၄၄၅။ ဥဇ္ဇဝနိကာယာတိ ပဋိသောတဂါမိနိယာ။ ကုစ္ဆိတော လဝေါ ဆေဒေါ ဝိနာသော ကုလဝေါ၊ နိရတ္ထကဝိနိယောဂေါ။ တံ န ဂစ္ဆန္တီတိ န ကုလဝံ ဂမေန္တိ။

ခုဒ္ဒါနုခုဒ္ဒကသိက္ခာပဒကထာဝဏ္ဏနာ နိဋ္ဌိတာ။

ပဉ္စသတိကက္ခန္ဓကဝဏ္ဏနာနယော နိဋ္ဌိတော။