📜

အဓိကရဏဘေဒံ

ဥက္ကောဋနဘေဒါဒိကထာဝဏ္ဏနာ

၃၄၁။ ‘‘အလံအာဝုသော’’တိ အတ္တပစ္စတ္ထိကေ သညာပေတွာတိ ပတ္တစီဝရာဒိအတ္ထာယ အလံ ဘဏ္ဍနာဒိကရဏန္တိ ဝိဝါဒါဒီသု ဒေါသဒဿနမတ္တေန သညာပေတွာ အညမညံ ခမာပေတွာ ဝူပသမေန္တိ၊ န ပန အညမညံ အာပတ္တာနာပတ္တိဒဿနဝသေနာတိ အဓိပ္ပာယော။ တေနာဟ ‘‘ပါဠိမုတ္တကဝိနိစ္ဆယေနေဝါ’’တိ။

ဝိသမာနိ ကာယကမ္မာဒီနိ နိဿိတော ဘိက္ခု ဝိသမနိဿိတော နာမ၊ မိစ္ဆာဒိဋ္ဌိနိဿိတော ဂဟနနိဿိတော၊ ဗလဝန္တေ ပုရိသေ နိဿိတော ဗလဝနိဿိတော နာမာတိ ဒဿေန္တော ‘‘ဧကော ဝိသမာနီ’’တိအာဒိမာဟ။

ဥက္ကောဋနဘေဒါဒိကထာဝဏ္ဏနာ နိဋ္ဌိတာ။

အဓိကရဏနိဒါနာဒိဝဏ္ဏနာ

၃၄၂။ အာပတ္တိံ နိဿာယ ဥပ္ပဇ္ဇနကအာပတ္တိဝသေနာတိ ပရေသံ၊ အတ္တနော စ အာပတ္တိံ ပဋိစ္ဆာဒေန္တာနံ ဝဇ္ဇပဋိစ္ဆာဒီနံ ပါရာဇိကာဒိအာပတ္တိမေဝ သန္ဓာယ ဝုတ္တံ၊ န သဗ္ဗာပတ္တိယော။ ကိစ္စံ နိဿာယ ဥပ္ပဇ္ဇနကကိစ္စာနန္တိ ဥက္ခေပနီယာဒိကမ္မံ နိဿာယ ဥပ္ပဇ္ဇနကာနံ တဒနုဝတ္တိကာယ ဘိက္ခုနိယာ ယာဝတတိယာနုဿာဝနာနံ ကိစ္စာနံ ဝသေန၊ န သဗ္ဗေသံ ကိစ္စာနံ ဝသေနာတိ။

၃၄၄။ ပါဠိယံ ‘‘ကတိဟိ အဓိကရဏေဟီ’’တိ ပုစ္ဆာယ ‘‘ဧကေန အဓိကရဏေန ကိစ္စာဓိကရဏေနာ’’တိ ဝုတ္တံ။ ‘‘ကတိသု ဌာနေသူ’’တိ ပုစ္ဆာယ ‘‘တီသု ဌာနေသု သင်္ဃမဇ္ဈေ၊ ဂဏမဇ္ဈေ၊ ပုဂ္ဂလဿ သန္တိကေ’’တိ ဝုတ္တံ။ ‘‘ကတိဟိ သမထေဟီ’’တိ ပုစ္ဆာယ ‘‘တီဟိ သမထေဟီ’’တိ ဝုတ္တံ။ တီဟိပိ ဧတေဟိ ဧကော ဝူပသမနပ္ပကာရောဝ ပုစ္ဆိတော၊ ဝိဿဇ္ဇိတော စာတိ ဝေဒိတဗ္ဗော။

၃၄၈။ ဝိဝါဒါဓိကရဏံဟောတိ အနုဝါဒါဓိကရဏန္တိအာဒီသု ဝိဝါဒါဓိကရဏမေဝ အနုဝါဒါဓိကရဏာဒိပိ ဟောတီတိ ပုစ္ဆာယ ဝိဝါဒါဓိကရဏံ ဝိဝါဒါဓိကရဏမေဝ ဟောတိ၊ အနုဝါဒါဒယော န ဟောတီတိ ဝိဿဇ္ဇနံ။

အဓိကရဏနိဒါနာဒိဝဏ္ဏနာ နိဋ္ဌိတာ။

သတ္တသမထနာနာတ္ထာဒိဝဏ္ဏနာ

၃၅၄။ အဓိကရဏပုစ္ဆာဝိဿဇ္ဇနေ ပါဠိယံ ဝိပစ္စယတာယ ဝေါဟာရောတိ ဝိရူပဝိပါကာယ အညမညံ ဒုက္ခုပ္ပာဒနာယ ကာယဝစီဝေါဟာရော။ မေဓဂန္တိ ဝုဒ္ဓိပ္ပတ္တော ကလဟော။

အနုသမ္ပဝင်္ကတာတိ ဝိပတ္တိစောဒနာယ အနု အနု သံယုဇ္ဇနဝသေန နိန္နတာ။

အဗ္ဘုဿဟနတာတိ အတိဝိယ သဉ္ဇာတုဿာဟတာ။ အနုဗလပ္ပဒါနန္တိ စောဒကာနမ္ပိ ဥပတ္ထမ္ဘကရဏံ။ ကမ္မသင်္ဂဟာဘာဝေနာတိ သင်္ဃသမ္မုခတာဒိမတ္တဿ သမ္မုခါဝိနယဿ သင်္ဃာဒီဟိ ကတ္တဗ္ဗကိစ္စေသု သင်္ဂဟာဘာဝါ။

သတ္တသမထနာနာတ္ထာဒိဝဏ္ဏနာ နိဋ္ဌိတာ။

အဓိကရဏဘေဒဝဏ္ဏနာနယော နိဋ္ဌိတော။

ဒုတိယဂါထာသင်္ဂဏိကံ

စောဒနာဒိပုစ္ဆာဝိဿဇ္ဇနာဝဏ္ဏနာ

၃၅၉။ ဒုတိယဂါထာသင်္ဂဏိကာယ ‘‘စောဒနာ ကိမတ္ထာယာ’’တိအာဒိကာ ပုစ္ဆာ ဥပါလိတ္ထေရေန ကတာ။ ‘‘စောဒနာ သာရဏတ္ထာယာ’’တိအာဒိဝိဿဇ္ဇနံ ဘဂဝတာ ဝုတ္တံ။ ဥပါလိတ္ထေရော သယမေဝ ပုစ္ဆိတွာ ဝိဿဇ္ဇနံ အကာသီတိပိ ဝဒန္တိ။

မန္တဂ္ဂဟဏန္တိ တေသံ ဝိစာရဏာဂဟဏံ၊ သုတ္တန္တိကတ္ထေရာနံ၊ ဝိနယဓရတ္ထေရာနဉ္စ အဓိပ္ပာယဂဟဏန္တိ အတ္ထော။ ပါဋေက္ကံ ဝိနိစ္ဆယသန္နိဋ္ဌာပနတ္ထန္တိ တေသံ ပစ္စေကံ အဓိပ္ပာယံ ဉတွာ တေဟိ သမုဋ္ဌာပိတနယမ္ပိ ဂဟေတွာ ဝိနိစ္ဆယပရိယောသာပနတ္ထန္တိ အဓိပ္ပာယော။

‘‘မာ ခေါ တုရိတော အဘဏီ’’တိအာဒိနာ အဘိမုခေ ဌိတံ ကဉ္စိ အနုဝိဇ္ဇကံ ဩဝဒန္တေန ဝိယ ထေရေန အနုဝိဇ္ဇကဝတ္တံ ကထိတံ။

အနုယုဉ္ဇနဝတ္တန္တိ အနုယုဇ္ဇနက္ကမံ၊ တံ ပန ယသ္မာ သဗ္ဗသိက္ခာပဒဝီတိက္ကမဝိသယေပိ တံတံသိက္ခာပဒါနုလောမေန ကတ္တဗ္ဗံ၊ တသ္မာ ‘‘သိက္ခာပဒါနုလောမိက’’န္တိ ဝုတ္တံ။ အတ္တနော ဂတိံ နာသေတီတိ အတ္တနော သုဂတိဂမနံ ဝိနာသေတိ။

အနုသန္ဓိတ-သဒ္ဒေါ ဘာဝသာဓနောတိ အာဟ ‘‘အနုသန္ဓိတန္တိ ကထာနုသန္ဓီ’’တိ။ ဝတ္တာနုသန္ဓိတေနာတိ ဧတ္ထာပိ ဧသေဝ နယော။ ဝတ္တာနုသန္ဓိတေနာတိ အာစာရာနုသန္ဓိနာ၊ အာစာရေန သဒ္ဓိံ သမေန္တိယာ ပဋိညာယာတိ အတ္ထော။ တေနာဟ ‘‘ယာ အဿ ဝတ္တေနာ’’တိအာဒိ။

ပါဠိယံ သဉ္စိစ္စ အာပတ္တိန္တိအာဒိ အလဇ္ဇိလဇ္ဇိလက္ခဏံ ဘိက္ခုဘိက္ခုနီနံ ဝသေန ဝုတ္တံ တေသညေဝ သဗ္ဗပ္ပကာရတော သိက္ခာပဒါဓိကာရတ္တာ။ သာမဏေရာဒီနမ္ပိ သာဓာရဏဝသေန ပန သဉ္စိစ္စ ယထာသကံ သိက္ခာပဒဝီတိက္ကမနာဒိကံ အလဇ္ဇိလဇ္ဇိလက္ခဏံ ဝေဒိတဗ္ဗံ။

ကထာနုသန္ဓိဝစနန္တိ စုဒိတကအနုဝိဇ္ဇကာနံ ကထာယ အနုသန္ဓိယုတ္တံ ဝစနံ န ဇာနာတိ၊ တေဟိ ဧကသ္မိံ ကာရဏေ ဝုတ္တေ သယံ တံ အသလ္လက္ခေတွာ အတ္တနော အဘိရုစိတမေဝ အသမ္ဗန္ဓိတတ္ထန္တိ အတ္ထော။ ဝိနိစ္ဆယာနုသန္ဓိဝစနဉ္စာတိ အနုဝိဇ္ဇကေန ကတဿ အာပတ္တာနာပတ္တိဝိနိစ္ဆယဿ အနုဂုဏံ၊ သမ္ဗန္ဓဝစနဉ္စ။

စောဒနာဒိပုစ္ဆာဝိဿဇ္ဇနာဝဏ္ဏနာ နိဋ္ဌိတာ။