📜

စောဒနာကဏ္ဍံ

အနုဝိဇ္ဇကကိစ္စဝဏ္ဏနာ

၃၆၀။ ပါဠိယံ ယံ ခေါ တွန္တိအာဒီသု တွံ၊ အာဝုသော၊ ယံ ဣမံ ဘိက္ခုံ စောဒေသိ၊ တံ ကိမှိ ဒေါသေ စောဒေသိ၊ ကတရာယ ဝိပတ္တိယာ စောဒေသီတိ အတ္ထော။ ဧဝံ သဗ္ဗတ္ထ။

၃၆၁။ အသုဒ္ဓပရိသင်္ကိတောတိ အသုဒ္ဓါယ အဋ္ဌာနေ ဥပ္ပန္နာယ ပရိသင်္ကာယ ပရိသင်္ကိတော။ တေနာဟ ‘‘အမူလကပရိသင်္ကိတော’’တိ။

၃၆၄။ ပါဠိယံ ဥပေါသထော သာမဂ္ဂတ္ထာယာတိ ဝိသုဒ္ဓါနံ ဘိက္ခူနံ အညောညနိရပေက္ခော အဟုတွာ ဥပေါသထော ဥပေါသထဋ္ဌာနံ သန္နိပတိတွာ ‘‘ပါရိသုဒ္ဓိံ အာယသ္မန္တော အာရောစေထ၊ ပရိသုဒ္ဓေတ္ထာယသ္မန္တော၊ ပရိသုဒ္ဓါ အဟံ အာဝုသော’’တိအာဒိနာ အညမညံ ပရိသုဒ္ဓိဝီမံသနာရောစနဝသေန အယုတ္တေ ဝိဝဇ္ဇေတွာ ယုတ္တေဟေဝ ကာယစိတ္တသာမဂ္ဂီကရဏတ္ထာယ။

ဝိသုဒ္ဓါယ ပဝါရဏာတိ ဒိဋ္ဌသုတာဒီဟိ အညမညံ ကထာပေတွာ ဝိသုဒ္ဓိသမ္ပာဒနတ္ထာယာတိ အတ္ထော။ ဥဘော ဧတေတိ အာမိသပုဂ္ဂလနိဿယနေ ဧတေ ဥဘော။

အနုဝိဇ္ဇကကိစ္စဝဏ္ဏနာ နိဋ္ဌိတာ။