📜

ကထိနဘေဒံ

ကထိနအတ္ထတာဒိဝဏ္ဏနာ

၄၀၄။ ကထိနေ အနာဂတဝသေနာတိ ဥဒကာဟရဏာဒိပယောဂေ ဥပ္ပန္နေ ပစ္ဆာ ဓောဝနာဒိပုဗ္ဗကရဏဿ ဥပ္ပတ္တိတော တပ္ပယောဂဿ အနာဂတဝသေနေဝ အနန္တရပစ္စယော။ ပစ္စယတ္တဉ္စဿ ကာရိယဘူတဿ ယသ္မာ နိပ္ဖာဒေတဗ္ဗတံ နိဿာယ ပစ္စယာ ပဝတ္တာ၊ န ဝိနာ တေန၊ တသ္မာ တေန ပရိယာယေန ဝုတ္တံ၊ န သဘာဝတော သဗ္ဗတ္ထ။ တေနာဟ ‘‘ပယောဂဿ ဟီ’’တိအာဒိ။ တတ္ထ ပယောဂဿ သတ္တဝိဓမ္ပိ ပုဗ္ဗကရဏံ ပစ္စယော ဟောတီတိ သမ္ဗန္ဓော။ ကာရဏမာဟ ‘‘ယသ္မာ’’တိအာဒိ။ ပုဗ္ဗကရဏဿတ္ထာယာတိ ပုဗ္ဗကရဏဿ နိပ္ဖာဒနတ္ထာယ။ ပုရေဇာတပစ္စယေတိ ပုရေဇာတပစ္စယဿ ဝိသယေ။ ဧသာတိ ပယောဂေါ။ ဓောဝနာဒိဓမ္မေသု ဧကမ္ပိ အတ္တနော ပုရေဇာတပစ္စယဘူတံ ဓမ္မံ န လဘတိ၊ အတ္တနော ဥပ္ပတ္တိတော ပုရေဇာတဿ ပုဗ္ဗကရဏဿ အဘာဝါတိ အတ္ထော။ လဘတီတိ ပစ္ဆာဇာတပစ္စယံ ပုဗ္ဗကရဏံ လဘတိ၊ ပစ္ဆာဇာတပစ္စယော ဟောတီတိ အတ္ထော။

ပါဠိယံ ပန္နရသ ဓမ္မာ သဟဇာတပစ္စယေန ပစ္စယောတိ ဧတ္ထ ပုဗ္ဗကရဏဿာတိ ဝါ ပယောဂဿာတိ ဝါ အညဿ ကဿစိ ပစ္စယုပ္ပန္နဿ အပရာမဋ္ဌတ္တာ ပန္နရသ ဓမ္မာ သယံ အညမညသဟဇာတပစ္စယေန ပစ္စယောတိ ဧဝမတ္ထော ဂဟေတဗ္ဗော၊ တေဟိ သဟ ဥပ္ပဇ္ဇနကဿ အညဿ အဘာဝါ။ ဧဝံ ဥပရိ သဗ္ဗတ္ထ။ တေနာဟ ‘‘သဟဇာတပစ္စယံ ပနာ’’တိအာဒိ။ မာတိကာ စ ပလိဗောဓာ စာတိ ဧတ္ထ စ-သဒ္ဒေန ပဉ္စာနိသံသာနိ ဂဟိတာနီတိ ဒဋ္ဌဗ္ဗံ။ ဧဝံ မာတိကာနဉ္စ ပလိဗောဓာနဉ္စာတိ ဧတ္ထာပိ။ တေဟိပိ အတ္ထော အနန္တရမေဝ မာတိကာဒီဟိ သဟ ဇာယန္တိ။ တေနေဝ ‘‘ပန္နရသ ဓမ္မာ သဟဇာတပစ္စယေန ပစ္စယော’’တိ ဝုတ္တာ။ အာသာတိ စီဝရာသာ။ ဝတ္ထူတိ အာသာယ နိမိတ္တဘူတံ အနုပ္ပန္နစီဝရံ။ ‘‘ဒဿာမ ကရိဿာမာ’’တိ ဟိ ဒါယကေဟိ ပဋိညာတစီဝရံ နိဿာယ အနန္တရံ ဥပ္ပဇ္ဇမာနာ စီဝရာသာ အနန္တရပစ္စယာဒိဘာဝေန ဝုတ္တာ။ အာသာနဉ္စ အနာသာနဉ္စာတိ လဗ္ဘမာနကစီဝရေ ဥပ္ပဇ္ဇနကစီဝရာသာနဉ္စေဝ အလဗ္ဘမာနေ စီဝရေ ဥပ္ပဇ္ဇနကအနာသာနဉ္စ၊ အာသာနံ၊ တဗ္ဗိဂမာနဉ္စာတိ အတ္ထော။ ခဏေ ခဏေ ဥပ္ပတ္တိဘေဒံ သန္ဓာယ ‘‘အာသာန’’န္တိ ဗဟုဝစနံ ကတံ၊ အာသာယ ၊ အနာသာယ စာတိ အတ္ထော။ တေနာဟ ‘‘အာသာ စ အနာသာ စာ’’တိ။

ကထိနအတ္ထတာဒိဝဏ္ဏနာ နိဋ္ဌိတာ။

ပုဗ္ဗကရဏနိဒါနာဒိဝိဘာဂဝဏ္ဏနာ

၄၀၆-၇။ ဆ စီဝရာနီတိ ခေါမာဒီသု ဆသု အညတရံ သန္ဓာယ ဝုတ္တံ။ သဗ္ဗသင်္ဂါဟိကဝသေန ပန ‘‘စီဝရာနီ’’တိ ဗဟုဝစနံ ကတံ။ ပါဠိယံ ပနေတ္ထ ဝတ္ထု၊ အာသာ စ အနာသာ စာတိအာဒီသု အတ္ထတေ ကထိနေ အာနိသံသဝသေန ဥပ္ပဇ္ဇနကပစ္စာသာစီဝရံ ‘‘ဝတ္ထူ’’တိ ဝုတ္တံ။ ကထိနစီဝရံ ဟေတုပစ္စယ-သဒ္ဒေဟိ ဝုတ္တန္တိ ဝေဒိတဗ္ဗံ။

၄၀၈။ ပစ္စုဒ္ဓါရော တီဟိ ဓမ္မေဟီတိအာဒိ ကထိနတ္ထာရတ္ထာယ တိစီဝရတော အညံ ဝဿိကသာဋိကာဒိံ ပစ္စုဒ္ဓရိတုံ၊ အဓိဋ္ဌဟိတွာ အတ္ထရိတုဉ္စ န ဝဋ္ဋတီတိ ဒဿနတ္ထံ ဝုတ္တံ။ ‘‘ဝစီဘေဒေနာ’’တိ ဧတေန ကေဝလံ ကာယေန ကထိနတ္ထာရော န ရုဟတီတိ ဒဿေတိ။

ပုဗ္ဗကရဏနိဒါနာဒိဝိဘာဂဝဏ္ဏနာ နိဋ္ဌိတာ။

ကထိနာဒိဇာနိတဗ္ဗဝိဘာဂဝဏ္ဏနာ

၄၁၂။ ယေသုရူပါဒိဓမ္မေသူတိ ‘‘ပုရိမဝဿံဝုတ္ထာ ဘိက္ခူ၊ ပဉ္စဟိ အနူနော သင်္ဃော၊ စီဝရမာသော၊ ဓမ္မေန သမေန သမုပ္ပန္နံ စီဝရ’’န္တိ ဧဝမာဒီသု ယေသု ရူပါရူပဓမ္မေသု။ သတီတိ သန္တေသု။ မိဿီဘာဝေါတိ သံသဂ္ဂတာ သမူဟပညတ္တိမတ္တံ။ တေနာဟ ‘‘န ပရမတ္ထတော ဧကော ဓမ္မော အတ္ထီ’’တိ။

၄၁၆။ ဧကတော ဥပ္ပဇ္ဇန္တီတိ ကထိနုဒ္ဓါရေန သဟ ဥပ္ပဇ္ဇမာနာရဟာ ဟောန္တီတိ အတ္ထော။ ကထိနတ္ထာရတော ဟိ ပဘုတိ သဗ္ဗေ ကထိနုဒ္ဓါရာ တံ တံ ကာရဏန္တရမာဂမ္မ ဥပ္ပဇ္ဇန္တိ၊ တသ္မာ သဗ္ဗေ ဧကုပ္ပာဒါ နာမ ဇာတာ။ တေသု အန္တရုဗ္ဘာရသဟုဗ္ဘာရာ ဒွေ ဧဝ တံ ဝိဟာရံ အနတ္ထတကထိနဝိဟာရသဒိသံ ကရောန္တာ သယံ သကလေန ကထိနတ္ထာရေန သဟ နိရုဇ္ဈန္တိ ဥဒ္ဓါရဘာဝံ ပါပုဏန္တိ ။ အဝသေသာ ပန တံ တံ ပါဋိပုဂ္ဂလိကမေဝ ကထိနတ္ထာရံ ဒွိန္နံ ပလိဗောဓာနံ ဥပစ္ဆိန္ဒနဝသေန နိရောဓေန္တာ သယံ ဥဒ္ဓါရဘာဝံ ပါပုဏန္တိ၊ န သကလံ ကထိနတ္ထာရံ။ ကထိနုဒ္ဓါရာနဉ္စ နိရောဓော နာမ တံ တံ ကာရဏမာဂမ္မ ဥဒ္ဓါရဘာဝပ္ပတ္တိ၊ ဧဝဉ္စ ဥပ္ပတ္တိ နာမ ကထိနုဒ္ဓါရော ဧဝ။ တေနာဟ ‘‘သဗ္ဗေပိ အတ္ထာရေန သဒ္ဓိံ ဧကတော ဥပ္ပဇ္ဇန္တီ’’တိအာဒိ။ တတ္ထ ပုရိမာ ဒွေတိ ‘‘ဧကုပ္ပာဒါ ဧကနိရောဓာ’’တိ ပါဠိယံ ပဌမံ ဝုတ္တာ အန္တရုဗ္ဘာရသဟုဗ္ဘာရာ ဒွေ။ တေသူတိ ပက္ကမနန္တိကာဒီသု။ ဥဒ္ဓါရဘာဝံ ပတ္တေသူတိ ဥဒ္ဓါရဘာဝပ္ပတ္တိသင်္ခါတနိရောဓံ ပတ္တေသူတိ အတ္ထော။ အတ္ထာရော တိဋ္ဌတီတိ ကတစီဝရံ အာဒါယ ပက္ကန္တာဒိပုဂ္ဂလံ ဌပေတွာ တဒဝသေသာနံ ပလိဗောဓသဗ္ဘာဝတော ကထိနတ္ထာရော တိဋ္ဌတိ။

ကထိနာဒိဇာနိတဗ္ဗဝိဘာဂဝဏ္ဏနာ နိဋ္ဌိတာ။

ပညတ္တိဝဂ္ဂဝဏ္ဏနာနယော နိဋ္ဌိတော။

သင်္ဂဟဝဂ္ဂေါ