📜

သေဒမောစနဂါထာ

အဝိပ္ပဝါသပဉှာဝဏ္ဏနာ

၄၇၉။ သေဒမောစနဂါထာသု အကပ္ပိယသမ္ဘောဂေါတိ အနုပသမ္ပန္နေဟိ သဒ္ဓိံ ကာတုံ ပဋိက္ခိတ္တော ဥပေါသထာဒိသံဝါသော ဧဝ ဝုတ္တော။ ပဉှာ မေသာတိ ဧတ္ထ မ-ကာရော ပဒသန္ဓိကရော။ ဧသာတိ စ လိင်္ဂဝိပလ္လာသဝသေန ဝုတ္တံ၊ ပဉှော ဧသောတိ အတ္ထော။ ပဉှ-သဒ္ဒေါ ဝါ ဒွိလိင်္ဂေါ ဒဋ္ဌဗ္ဗော။ တေနာဟ ‘‘ဧသာ ပဉှာ’’တိအာဒိ။

ဂရုဘဏ္ဍံ သန္ဓာယာတိ ဂရုဘဏ္ဍေန ဂရုဘဏ္ဍပရိဝတ္တနံ သန္ဓာယ။ ဒသာတိ ဒသ အဝန္ဒိယပုဂ္ဂလေ။ ဧကာဒသေတိ အဘဗ္ဗပုဂ္ဂလေ။ သိက္ခာယ အသာဓာရဏောတိ ခုရဘဏ္ဍံ ဓာရေတုံ အနုညာတသိက္ခာပဒေန ဘိက္ခူဟိ အသာဓာရဏသိက္ခာပဒေါတိ အတ္ထော။

ဥဗ္ဘက္ခကေ န ဝဒါမီတိ အက္ခတော ဥဒ္ဓံ သီသေ ဌိတမုခမဂ္ဂေပိ ပါရာဇိကံ သန္ဓာယ န ဝဒါမိ။ အဓောနာဘိန္တိ နာဘိတော ဟေဋ္ဌာ ဌိတဝစ္စပဿာဝမဂ္ဂေပိ ဝိဝဇ္ဇိယ အညသ္မိံ သရီရပ္ပဒေသေ မေထုနဓမ္မပစ္စယာ ကထံ ပါရာဇိကော သိယာတိ အတ္ထော။

ဆေဇ္ဇဝတ္ထုန္တိ ပါရာဇိကံ။

အဝိပ္ပဝါသပဉှာဝဏ္ဏနာ နိဋ္ဌိတာ။

ပါရာဇိကာဒိပဉှာဝဏ္ဏနာ

၄၈၀။ ဒုဿကုဋိအာဒီနီတိ အာဒိ-သဒ္ဒေန အစ္ဆတရတိပုပဋ္ဋာဒီဟိ၊ တိဏပဏ္ဏာဒီဟိ စ ပဋိစ္ဆန္နကုဋိယော သင်္ဂဏှာတိ။ တာဒိသာယ ဟိ ကုဋိယာ ဗဟိ ဌတွာ အန္တော ဌိတာယ ဣတ္ထိယာ မဂ္ဂေ ဒုဿာဒိနာ သန္ထတံ ကတွာ ပဝေသေန္တောပိ ပါရာဇိကော သိယာ။ လိင်္ဂပရိဝတ္တံ သန္ဓာယ ဝုတ္တာတိ လိင်္ဂေ ပရိဝတ္တေ ပဋိဂ္ဂဟဏဿ ဝိဇဟနတော ပုန အပ္ပဋိဂ္ဂဟေတွာ ပရိဘုဉ္ဇနာပတ္တိံ သန္ဓာယ ဝုတ္တံ။

ပါဠိယံ ဘိက္ခူ သိယာ ဝီသတိယာ သမာဂတာတိ ဝီသတိယာ သင်္ခါတာယ ဘိက္ခူ သမာဂတာ၊ ဧတေန သဗ္ဗကမ္မာရဟတံ သင်္ဃဿ ဒဿေတိ။

နိဝတ္ထောတိ ဂါထာယ အန္တရဝါသကေန နိဝတ္ထော ဥတ္တရာသင်္ဂေန ဒိဂုဏံ ကတွာ ပါရုတသင်္ဃာဋိယော။ ဣတိ တာနိ တီဏိပိ စီဝရာနိ ကာယေ ဂတာနေဝ ဘိက္ခုနိယာ ဗိန္ဒုမတ္တံ ကာဠကံ ဥဒကေန ဓောဝိတမတ္တေ နိဿဂ္ဂိယာနိ ဟောန္တီတိ အတ္ထော။

ဣတ္ထိံ ဟနေတိ ဂါထာယ န မာတုဘူတံ ဣတ္ထိံ ဟနေယျ၊ န ပိတုဘူတံ ပုရိသံ ဟနေယျ။ အနရိယန္တိ တဉ္စ အနရဟန္တမေဝ ဟနေယျ၊ ဧတေန အရဟန္တဃာတကောပိ န ဟောတီတိ ဒဿေတိ။ အနန္တရံ ဖုသေတိ အာနန္တရိယံ ဖုသတီတိ အတ္ထော။

၄၈၁။ သုပ္ပတိဋ္ဌိတ-နိဂြောဓသဒိသန္တိ ယောဇနဝိတ္ထတံ ရုက္ခံ သန္ဓာယ ဝုတ္တံ။

သတ္တရသကေသူတိ ဘိက္ခုနီနံ ပညတ္တသတ္တရသသင်္ဃာဒိသေသေသု။

ပါရာဇိကာဒိပဉှာဝဏ္ဏနာ နိဋ္ဌိတာ။