📜

ပါရာဇိကကထာဝဏ္ဏနာ

၁၉၆၅။ ဆန္ဒသောတိ မေထုနသေဝနရာဂပဋိသံယုတ္တေန ဆန္ဒေန။ ဧတေန ‘‘ဆန္ဒေ ပန အသတိ ဗလက္ကာရေန ပဓံသိတာယ အနာပတ္တီ’’တိ (ကင်္ခါ။ အဋ္ဌ။ မေထုနဓမ္မသိက္ခာပဒဝဏ္ဏနာ) အဋ္ဌကထာ သူစိတာ ဟောတိ။ သာ သမဏီ ပါရာဇိကာ နာမ ဟောတီတိ ပဝုစ္စတီတိ ယောဇနာ။

၁၉၆၆-၇။ ‘‘သဇီဝဿ အပိ အဇီဝဿာ’’တိ ပဒစ္ဆေဒေါ။ ‘‘သန္ထတံ ဝါ အသန္ထတ’’န္တိ ဣဒံ ‘‘အင်္ဂဇာတ’’န္တိ ဣမဿ ဝိသေသနံ။ အတ္တနော တိဝိဓေ မဂ္ဂေတိ အတ္တနော ဝစ္စပဿာဝမုခမဂ္ဂါနံ အညတရသ္မိံ မဂ္ဂေ။ ဧတ္ထ ‘‘သန္ထတေ ဝါ အသန္ထတေ ဝါ’’တိ သေသော၊ ‘‘အလ္လောကာသေ’’တိ ဣမိနာ သမ္ဗန္ဓော။ ‘‘ယေဘုယျအက္ခာယိတာဒိက’’န္တိ ပဒစ္ဆေဒေါ။ အာဒိ-သဒ္ဒေန အက္ခာယိတံ သင်္ဂဏှာတိ။

မနုဿပုရိသာဒီနံ နဝန္နံ သဇီဝဿပိ အဇီဝဿပိ ယဿ ကဿစိ သန္ထတံ ဝါ အသန္ထတံ ဝါ ယေဘုယျက္ခာယိတာဒိကံ အင်္ဂဇာတံ အတ္တနော သန္ထတေ ဝါ အသန္ထတေ ဝါ တိဝိဓေ မဂ္ဂေ အလ္လောကာသေ တိလဖလမတ္တမ္ပိ ပဝေသေန္တီ ပရာဇိတာတိ ယောဇနာ။

၁၉၆၈။ သာဓာရဏဝိနိစ္ဆယန္တိ ဘိက္ခုဘိက္ခုနီနံ သာဓာရဏသိက္ခာပဒဝိနိစ္ဆယံ။

၁၉၆၉-၇၀။ အဓက္ခကန္တိ ဧတ္ထ အက္ခကာနံ အဓောတိ ဝိဂ္ဂဟော။ ဥဗ္ဘဇာဏုမဏ္ဍလန္တိ ဇာဏုမဏ္ဍလာနံ ဥဗ္ဘန္တိ ဝိဂ္ဂဟော။ ဥဗ္ဘ-သဒ္ဒေါ ဥဒ္ဓံ-သဒ္ဒပရိယာယော။ ဣဓ ‘‘အတ္တနော’’တိ သေသော။ အဝဿုတဿာတိ ကာယသံသဂ္ဂရာဂေန တိန္တဿ။ အဝဿုတာတိ ဧတ္ထာပိ ဧသေဝ နယော။ ယာတိ ဝုတ္တတ္တာ ‘‘သာ’’တိ လဗ္ဘတိ။ သရီရန္တိ ဧတ္ထ ‘‘ယံ ကိဉ္စီ’’တိ သေသော။ ပရောပက္ကမမူလကံ ပါရာဇိကံ ဒဿေတုမာဟ ‘‘တေန ဝါ ဖုဋ္ဌာ’’တိ။ ဧတ္ထ ‘‘ယထာပရိစ္ဆိန္နေ ကာယေ’’တိ စ ‘‘သာဒိယေယျာ’’တိ စ ဝတ္တဗ္ဗံ။

ယာ ပန ဘိက္ခုနီ အဝဿုတာ အဝဿုတဿ မနုဿပုဂ္ဂလဿ ယံ ကိဉ္စိ သရီရံ အတ္တနော အဓက္ခကံ ဥဗ္ဘဇာဏုမဏ္ဍလံ ယံ သရီရကံ၊ တေန သရီရကေန ဆုပေယျ၊ တေန မနုဿပုရိသေန ယထာပရိစ္ဆိန္နေ ကာယေ ဖုဋ္ဌာ သာဒိယေယျ ဝါ၊ သာ ပါရာဇိကာ သိယာတိ ယောဇနာ။

၁၉၇၁-၂။ ‘‘ဂဟိတံ ဥဗ္ဘဇာဏုနာ’’တိ ဣမိနာ ကပ္ပရတော ဥဒ္ဓံ ပါရာဇိကက္ခေတ္တမေဝါတိ ဒီပေတိ။ အတ္တနော ယထာဝုတ္တပ္ပကာရေန ကာယေနာတိ ယောဇနာ၊ အတ္တနော ‘‘အဓက္ခက’’န္တိအာဒိဝုတ္တပ္ပကာရေန ကာယေနာတိ အတ္ထော။ တထာ အဝဿုတာယ အဝဿုတဿ ပုရိသဿ ကာယပဋိဗဒ္ဓံ ဖုသန္တိယာ ထုလ္လစ္စယံ ဟောတိ။ အတ္တနော ယထာပရိစ္ဆိန္နကာယပဋိဗဒ္ဓေန တထာ အဝဿုတာယ အဝဿုတဿ ပုရိသဿ ကာယံ ဖုသန္တိယာ ထုလ္လစ္စယံ ဟောတိ။

၁၉၇၃။ အတ္တနော အဝသေသေန ကာယေန အဝဿုတာယ အဝဿုတဿ ပုရိသပုဂ္ဂလဿ ကာယံ ဖုသန္တိယာ ထုလ္လစ္စယံ ဟောတိ။ ဧဝံ အတ္တနော ပယောဂေ စ ပုရိသဿ ပယောဂေ စ တဿာ ဘိက္ခုနိယာယေဝ ထုလ္လစ္စယံ ဟောတီတိ ယောဇနာ။

၁၉၇၄။ ယက္ခပေတတိရစ္ဆာနပဏ္ဍကာနံ ကာယံ ‘‘အဓက္ခကံ ဥဗ္ဘဇာဏုမဏ္ဍလ’’န္တိ ယထာပရိစ္ဆိန္နံ တထေဝ အတ္တနော ကာယေန ဥဘတောအဝဿဝေ သတိ ဖုသန္တိယာ အဿာ ဘိက္ခုနိယာ ထုလ္လစ္စယံ၊ တထေဝ ယက္ခာဒီနံ ပယောဂေပိ တဿာယေဝ ထုလ္လစ္စယံ ဟောတီတိ ယောဇနာ။

၁၉၇၅။ ဧကတောဝဿဝေ စာပီတိ ဘိက္ခုနိယာ ဝသေန ဧကတောအဝဿဝေ စာပိ။ ထုလ္လစ္စယမုဒီရိတန္တိ ပါရာဇိကက္ခေတ္တဘူတေန အတ္တနော ကာယေန မနုဿပုရိသဿ ကာယံ ဖုသန္တိယာ ထုလ္လစ္စယံ အဋ္ဌကထာယံ (ပါစိ။ အဋ္ဌ။ ၆၆၂) ဝုတ္တန္တိ အတ္ထော။ အဝသေသေ စ သဗ္ဗတ္ထာတိ ယထာဝုတ္တပါရာဇိကက္ခေတ္တတော အဝသေသေ ထုလ္လစ္စယက္ခေတ္တေ သဗ္ဗတ္ထ ဧကတောအဝဿဝေ သတိ ဒုက္ကဋံ ဟောတီတိ အတ္ထော။ ကာယပဋိဗဒ္ဓေန ကာယပဋိဗဒ္ဓါမသနာဒီသု သဗ္ဗတ္ထ ဥဘတောအဝဿဝေ ဝါ ဧကတောအဝဿဝေ ဝါ ဒုက္ကဋမေဝ ဟောတိ။

၁၉၇၆။ ‘‘ဥဗ္ဘက္ခကမဓောဇာဏုမဏ္ဍလ’’န္တိ ယံ အပါရာဇိကက္ခေတ္တံ ဣဓ ဒဿိတံ၊ ဧတ္ထ ဧကတောအဝဿဝေ ဒုက္ကဋံ ဟောတိ။ ကပ္ပရဿ စ ဟေဋ္ဌာပိ ဧတ္ထေဝ အဓောဇာဏုမဏ္ဍလေ သင်္ဂဟံ ဂတန္တိ ယောဇနာ။

၁၉၇၇-၉။ ဘိက္ခု ဘိက္ခုနိယာ သဒ္ဓိံ သစေ ကာယသံသဂ္ဂံ ကေလာယတိ သေဝတီတိ ယောဇနာ။ ဘိက္ခုနိယာ နာသော သိယာတိ သီလဝိနာသော ပါရာဇိကာပတ္တိ သိယာတိ အတ္ထော။ ဂေဟပေမန္တိ ဧတ္ထ ‘‘ဂေဟသိတပေမ’’န္တိ ဝတ္တဗ္ဗေ ဂါထာဗန္ဓဝသေန သိတ-သဒ္ဒလောပေါ၊ အတ္ထော ပနဿ ဘိက္ခုဝိဘင်္ဂေ ဝုတ္တနယောဝ။

၁၉၈၀။ အဝိသေသေနာတိ ‘‘ဘိက္ခုနိယာ’’တိ ဝါ ‘‘ဘိက္ခုဿာ’’တိ ဝါ ဝိသေသံ အကတွာ။

၁၉၈၁။ ယဿာတိ ဘိက္ခုဿ ဝါ ဘိက္ခုနိယာ ဝါ။ ယတ္ထာတိ ဘိက္ခုနိယံ ဝါ ဘိက္ခုသ္မိံ ဝါ။ မနောသုဒ္ဓန္တိ ကာယသံသဂ္ဂါဒိရာဂရဟိတံ။ တဿ ဘိက္ခုဿ ဝါ ဘိက္ခုနိယာ ဝါ တတ္ထ ဘိက္ခုနိယံ ဝါ ဘိက္ခုသ္မိံ ဝါ ဝိသယေ နဒေါသတာ အနာပတ္တီတိ အတ္ထော။

၁၉၈၂။ ဘိန္ဒိတွာတိ သီလဘေဒံ ကတွာ။ ဘိက္ခုနိယာ အပကတတ္တာ အာဟ ‘‘နေဝ ဟောတိ ဘိက္ခုနိဒူသကော’’တိ။

၁၉၈၃။ အထာတိ ဝါကျာရမ္ဘေ။ န ဟောတာပတ္တိ ဘိက္ခုနောတိ ဧတ္ထ ဘိက္ခုနီဟိ ကာယသံသဂ္ဂသင်္ဃာဒိသေသမာဟ။

၁၉၈၄။ ‘‘ခေတ္တေ’’တိ ဝက္ခမာနံ ‘‘ဖုဋ္ဌာ’’တိ ဣမိနာ ယောဇေတွာ ‘‘ပါရာဇိက’’န္တိအာဒီဟိ၊ ‘‘ထုလ္လစ္စယံ ခေတ္တေ’’တိအာဒီဟိ စ သမ္ဗန္ဓိတဗ္ဗံ။ ‘‘ပါရာဇိက’’န္တိ ဝက္ခမာနတ္တာ ဖုဋ္ဌာတိ ဧတ္ထ ‘‘ပါရာဇိကက္ခေတ္တေ’’တိ သေသော။

၁၉၈၅။ တထာတိ နိစ္စလာပိ သာဒိယတိ။ ခေတ္တေတိ ထုလ္လစ္စယာဒီနံ ခေတ္တေ။ ကာယေန နိစ္စလာယပိ စိတ္တေန သာဒိယန္တိယာ အာပတ္တိ ကသ္မာ ဝုတ္တာတိ အာဟ ‘‘ဝုတ္တတ္တာ…ပေ… သတ္ထုနာ’’တိ ၊ ဘိက္ခုပါတိမောက္ခေ ဝိယ ‘‘ကာယသံသဂ္ဂံ သမာပဇ္ဇေယျာ’’တိ အဝတွာ ဣဓ ‘‘ကာယသံသဂ္ဂံ သာဒိယေယျာ’’တိ ဝုတ္တတ္တာတိ အဓိပ္ပာယော။

၁၉၈၆။ တဿာ အာပတ္တိယာ။ ကြိယသမုဋ္ဌာနန္တိ ကိရိယာယ သမုဋ္ဌာနံ။ ဧဝံ သတီတိ သာဒိယနမတ္တေနေဝ အာပဇ္ဇိတဗ္ဗဘာဝေ သတိ။ ဣဒန္တိ ‘‘ကိရိယသမုဋ္ဌာန’’မိတိဝိဓာနံ။ တဗ္ဗဟုလေနေဝ နယေနာတိ ကိရိယသမုဋ္ဌာနဗာဟုလ္လေန နယေန ခဒိရဝနာဒိဝေါဟာရော ဝိယာတိ ဒဋ္ဌဗ္ဗံ။

၁၉၈၇။ တဿာ ဘိက္ခုနိယာ အသဉ္စိစ္စ ဝိရဇ္ဈိတွာ အာမသန္တိယာ အနာပတ္တိ၊ ‘‘အယံ ပုရိသော’’တိ ဝါ ‘‘ဣတ္ထီ’’တိ ဝါ အဇာနိတွာ အာမသန္တိယာ အနာပတ္တိ၊ ပုရိသဿ အာမသနေ သတိ ဖဿံ အသာဒိယန္တိယာ ဝါ အနာပတ္တီတိ ယောဇနာ။

၁၉၈၈။ ခိတ္တစိတ္တာယာတိ ယက္ခုမ္မတ္တာယ။ ဥမ္မတ္တိကာယ ဝါတိ ပိတ္တကောပေန ဥမ္မာဒပ္ပတ္တာယ။ ဣဒဉ္စ ‘‘အသုစီ’’တိ ဝါ ‘‘စန္ဒန’’န္တိ ဝါ ဝိသေသတံ အဇာနနမေဝ ပမာဏံ။

ဥဗ္ဘဇာဏုမဏ္ဍလကထာဝဏ္ဏနာ။

၁၉၈၉-၉၀။ ‘‘ပါရာဇိကတ္တံ ဇာနန္တီ’’တိ ဣမိနာ အဝသေသာပတ္တိံ ဇာနိတွာ ဆာဒေန္တိယာ ပါရာဇိကာဘာဝံ ဒီပေတိ။ သလိင်္ဂေ တု ဌိတာယာတိ ပဗ္ဗဇ္ဇာလိင်္ဂေယေဝ ဌိတာယ။ ဣတိ ဓုရေ နိက္ခိတ္တမတ္တသ္မိန္တိ ယောဇနာ။ ဣတိ-သဒ္ဒေါ နိဒဿနေ။ ဣတရာယ ပုဗ္ဗေယေဝ အာပန္နတ္တာ တမပေက္ခိတွာ ‘‘သာ စာ’’တိ အာဟ။

၁၉၉၁။ ဝုတ္တာဝိသိဋ္ဌံ သဗ္ဗံ ဝိနိစ္ဆယံ သင်္ဂဟေတုမာဟ ‘‘သေသ’’န္တိအာဒိ။ တတ္ထာတိ ဒုဋ္ဌုလ္လပဋိစ္ဆာဒနေ။

ဝဇ္ဇပဋိစ္ဆာဒိကထာဝဏ္ဏနာ။

၁၉၉၂-၅။ သင်္ဃေနာတိ သမဂ္ဂေန သင်္ဃေန။ ဥက္ခိတ္တကောတိ အာပတ္တိယာ အဒဿနာဒီသု ဥက္ခိတ္တကော။ ‘‘ဥက္ခေပနေ ဌိတော’’တိ ဣမိနာ ဥက္ခေပနီယကမ္မကတဿ အနောသာရိတဘာဝံ ဒီပေတိ။ ယာ ဒိဋ္ဌိ ဧတဿာတိ ယံဒိဋ္ဌိကော၊ သော ဥက္ခိတ္တကော ဘိက္ခု ယာယ ဒိဋ္ဌိယာ သမန္နာဂတော ဟောတီတိ အဓိပ္ပာယော ။ ‘‘တဿာ ဒိဋ္ဌိယာ ဂဟဏေနာ’’တိ ဣမိနာ အနုဝတ္တပ္ပကာရော ဒဿိတော။ တံ ဥက္ခိတ္တကံ ဘိက္ခုန္တိ ယောဇနာ။ သာ ဘိက္ခုနီ အညာဟိ ဘိက္ခုနီဟိ ဝိသုမ္ပိစ သင်္ဃမဇ္ဈေပိ ‘‘ဧသော ခေါ အယျေ ဘိက္ခု သမဂ္ဂေန သင်္ဃေန ဥက္ခိတ္တော’’တိအာဒိနာ (ပါစိ။ ၆၆၉) နယေန တိက္ခတ္တုံ ဝုစ္စမာနာတိ ယောဇနာ။ တံ ဝတ္ထုံ အစဇန္တီ ဂဟေတွာ ယဒိ တထေဝ တိဋ္ဌတီတိ ယောဇနာ။ ဧတ္ထ ‘‘ယာဝတတိယံ သမနုဘာသိတဗ္ဗာ’’တိ သေသော။ တဿ ကမ္မဿ ဩသာနေတိ တတိယာယ ကမ္မဝါစာယ ယျကာရပ္ပတ္တဝသေန အဿ သမနုဘာသနကမ္မဿ ပရိယောသာနေ။ အသာကိယဓီတရာတိ အသာကိယဓီတာ၊ ပစ္စတ္တေ ကရဏဝစနံ။ ‘‘ပုန အပ္ပဋိသန္ဓေယာ’’တိ ဣမိနာ ပုန တေနေဝ စ အတ္တဘာဝေန ဘိက္ခုနိဘာဝေ ပဋိသန္ဓာတုံ အနရဟတာ ဝုတ္တာ။

၁၉၉၆။ တိကဒုက္ကဋံ နိဒ္ဒိဋ္ဌန္တိ အဓမ္မကမ္မေ အဓမ္မကမ္မသညာ၊ ဝေမတိကာ၊ ဓမ္မကမ္မသညာတိ ဧတာသံ ဝသေန တိကဒုက္ကဋံ ဝုတ္တံ။ သမနုဘာသနေ ဝုတ္တာ သမုဋ္ဌာနာဒယော သဗ္ဗေ ဣဓ ဝတ္တဗ္ဗာတိ ယောဇနာ။

ဥက္ခိတ္တာနုဝတ္တိကကထာဝဏ္ဏနာ။

၁၉၉၇။ ‘‘ဟတ္ထဂ္ဂဟဏံ ဝါ သာဒိယေယျာတိ ဟတ္ထော နာမ ကပ္ပရံ ဥပါဒါယ ယာဝ အဂ္ဂနခါ။ ဧတဿ အသဒ္ဓမ္မဿ ပဋိသေဝနတ္ထာယ ဥဗ္ဘက္ခကံ အဓောဇာဏုမဏ္ဍလံ ဂဟဏံ သာဒိယတိ၊ အာပတ္တိ ထုလ္လစ္စယဿာ’’တိ (ပါစိ။ ၆၇၆) ဝုတ္တတ္တာ အာဟ ‘‘အပါရာဇိကခေတ္တဿာ’’တိအာဒိ။ ‘‘တ’’န္တိ ဝက္ခမာနတ္တာ ‘‘ယ’’န္တိ လဗ္ဘတိ။ အပါရာဇိကက္ခေတ္တဿ ယဿ ကဿစိ အင်္ဂဿ ယံ ဂဟဏံ၊ တံ ဟတ္ထဂ္ဂဟဏန္တိ ပဝုစ္စတီတိ ယောဇနာ။ ဟတ္ထေ ဂဟဏံ ဟတ္ထဂ္ဂဟဏံ။

၁၉၉၈။ ယဿ ကဿစီတိ ဝုတ္တပ္ပကာရေန ယဿ ကဿစိ စီဝရဿ ယံ ဂဟဏန္တိ ယောဇနာ။

၁၉၉၉။ အသဒ္ဓမ္မ-သဒ္ဒေန မေထုနဿာပိ ဝုစ္စမာနတ္တာ တတော ဝိသေသေတုမာဟ ‘‘ကာယသံသဂ္ဂ…ပေ… ကာရဏာ’’တိ။ ဘိက္ခုနီ ကာယသံသဂ္ဂသင်္ခါတဿ အသဒ္ဓမ္မဿ ကာရဏာ ပုရိသဿ ဟတ္ထပါသသ္မိံ တိဋ္ဌေယျ ဝါတိ ယောဇနာ။

၂၀၀၀။ တတောတိ တဿ အသဒ္ဓမ္မဿ ကာရဏာ။ တတ္ထာတိ ဟတ္ထပါသေ။ ပုရိသေနာတိ ဧတ္ထ ‘‘ကတ’’န္တိ သေသော၊ ‘‘သင်္ကေတ’’န္တိ ဣမိနာ သမ္ဗန္ဓော။ ‘‘အာဂမနံ အဿာ’’တိ ပဒစ္ဆေဒေါ။ ဣစ္ဆေယျာတိ ဝုတ္တေပိ န ဂမနိစ္ဆာမတ္တေန၊ အထ ခေါ ဘိက္ခုနိယာ ပုရိသဿ ဟတ္ထပါသံ၊ ပုရိသေန စ ဘိက္ခုနိယာ ဟတ္ထပါသံ ဩက္ကန္တကာလေယေဝ ဝတ္ထုပူရဏံ ဒဋ္ဌဗ္ဗံ။ ယထာဟ ‘‘သင်္ကေတံ ဝါ ဂစ္ဆေယျာတိ ဧတဿ အသဒ္ဓမ္မဿ ပဋိသေဝနတ္ထာယ ပုရိသေန ‘ဣတ္ထန္နာမံ အာဂစ္ဆာ’တိ ဝုတ္တာ ဂစ္ဆတိ၊ ပဒေ ပဒေ အာပတ္တိ ဒုက္ကဋဿ။ ပုရိသဿ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿာ’’တိ (ပါစိ။ ၆၇၆) စ ‘‘ပုရိသဿ အဗ္ဘာဂမနံ သာဒိယတိ၊ အာပတ္တိ ဒုက္ကဋဿ။ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿာ’’တိ (ပါစိ။ ၆၇၆) စ။ ဧတ္ထ စ ဣတ္ထန္နာမံ အာဂစ္ဆာတိ ဣတ္ထန္နာမံ ဌာနံ အာဂစ္ဆာတိ အတ္ထော။

၂၀၀၁။ တဒတ္ထာယာတိ တဿေဝ ကာယသံသဂ္ဂသင်္ခါတအသဒ္ဓမ္မဿ သေဝနတ္ထာယ။ ပဋိစ္ဆန္နဋ္ဌာနဉ္စာတိ ဝတ္ထာဒိနာ ယေန ကေနစိ ပဋိစ္ဆန္နဩကာသံ။ ပုရိသဿ ဟတ္ထပါသေ ဌိတာ တဒတ္ထာယ ကာယံ ဥပသံဟရေယျ ဝါတိ ယောဇနာ။

၂၀၀၂။ ဟတ္ထဂ္ဂဟဏာဒီနံ ဝုတ္တပ္ပကာရာနံ အဋ္ဌန္နံ ဝတ္ထူနံ ပူရဏေန ‘‘အဋ္ဌဝတ္ထုကာ’’တိ သင်္ခါတာ အယံ ဘိက္ခုနီ ဝိနဋ္ဌာ ဟောတိ သီလဝိနာသေန၊ တတောယေဝ အဿမဏီ ဟောတိ အဘိက္ခုနီ ဟောတီတိ ယောဇနာ။

၂၀၀၃။ အနုလောမေနဝါတိ ဟတ္ထဂ္ဂဟဏာဒိပဋိပါဋိယာ ဝါ။ ပဋိလောမေန ဝါတိ တဗ္ဗိပရိယတော ပဋိလောမေန ဝါ။ ဧကန္တရိကာယ ဝါတိ ဧကမေကံ အန္တရိတွာ ပုန တဿာပိ ကရဏဝသေန ဧကန္တရိကာယ ဝါ။ အနုလောမေန ဝါ ပဋိလောမေန ဝါ တထေကန္တရိကာယ ဝါ အဋ္ဌမံ ဝတ္ထုံ ပရိပူရေန္တီ စုတာတိ ယောဇနာ။

၂၀၀၄။ ဧတဒေဝ အတ္ထံ ဗျတိရေကမုခေန သမတ္ထေတုမာဟ ‘‘အထာဒိတော’’တိအာဒိ။ သတက္ခတ္တုမ္ပီတိ ဗဟုက္ခတ္တုမ္ပိ။ သတ-သဒ္ဒေါ ဟေတ္ထ ဗဟု-သဒ္ဒပရိယာယော။ ပါရာဇိကာ နေဝ သိယာတိ ယောဇနာ၊ ဣမိနာ တံတံဝတ္ထုမူလကံ ဒုက္ကဋထုလ္လစ္စယံ အာပဇ္ဇတီတိ ဝုတ္တံ ဟောတိ။

၂၀၀၅။ ယာ ပန အာပတ္တိယော အာပန္နာ၊ ဒေသေတွာ တာဟိ မုစ္စတီတိ ယောဇနာ။ ဓုရနိက္ခေပနံ ကတွာတိ ‘‘န ပုနေဝံ ကရိဿာမီ’’တိ ဓုရံ နိက္ခိပိတွာ။ ဒေသိတာ ဂဏနူပိကာတိ ဒေသိတာ ဒေသိတဂဏနမေဝ ဥပေတိ၊ ပါရာဇိကဿ အင်္ဂံ န ဟောတီတိ အတ္ထော။ တသ္မာ ယာ ဧကံ အာပန္နာ၊ ဓုရနိက္ခေပံ ကတွာ ဒေသေတွာ ပုန ကိလေသဝသေန အာပဇ္ဇတိ၊ ပုန ဒေသေတိ၊ ဧဝံ အဋ္ဌ ဝတ္ထူနိ ပူရေန္တီပိ ပါရာဇိကာ န ဟောတိ။

၂၀၀၆။ သဥဿာဟာယ ဒေသိတာတိ ပုန အာပဇ္ဇနေ အနိက္ခိတ္တဓုရာယ ဘိက္ခုနိယာ ဒေသိတာပိ အာပတ္တိ ဒေသနာဂဏနံ န ဥပေတိ။ ကိံ ဟောတီတိ အာဟ ‘‘ဒေသိတာပိ အဒေသိတာ’’တိ၊ တသ္မာ ပါရာဇိကာပတ္တိယာ အင်္ဂမေဝ ဟောတီတိ အဓိပ္ပာယော။

၂၀၀၈။ အယံ အတ္ထောတိ ‘‘အသဒ္ဓမ္မော နာမ ကာယသံသဂ္ဂေါ’’တိ အယံ အတ္ထော။ ဥဒ္ဒိသိတောတိ ပကာသိတော။

၂၀၀၉။ အယမတ္ထော ကေန ဝစနေန ဥဒ္ဒိသိတောတိ အာဟ ‘‘ဝိညူ…ပေ… သာဓကံ ဝစနံ ဣဒ’’န္တိ။ ဣဒံ ဝစနန္တိ ‘‘ဝိညူ ပဋိဗလော ကာယသံသဂ္ဂံ သမာပဇ္ဇိတု’’န္တိ (ပါစိ။ ၆၇၆) ဣဒံ ဝစနံ။ သာဓကံ ပမာဏံ။

အဋ္ဌဝတ္ထုကကထာဝဏ္ဏနာ။

၂၀၁၀။ အဝဿုတာ၊ ဝဇ္ဇပဋိစ္ဆာဒိကာ၊ ဥက္ခိတ္တာနုဝတ္တိကာ၊ အဋ္ဌဝတ္ထုကာတိ ဣမာ စတဿော ပါရာဇိကာပတ္တိယော မဟေသိနာ အသာဓာရဏာ ဘိက္ခုနီနမေဝ ပညတ္တာတိ ယောဇနာ။

ဣတိ ဝိနယတ္ထသာရသန္ဒီပနိယာ

ဝိနယဝိနိစ္ဆယဝဏ္ဏနာယ

ပါရာဇိကကထာဝဏ္ဏနာ နိဋ္ဌိတာ။