📜

နိဿဂ္ဂိယကထာဝဏ္ဏနာ

၂၀၉၄-၅။ ဧဝံ သတ္တရသသင်္ဃာဒိသေသေ ဒဿေတွာ ဣဒါနိ တဒနန္တရာနိ နိဿဂ္ဂိယာနိ ဒဿေတုမာဟ ‘‘အဓိဋ္ဌာနုပဂံ ပတ္တ’’န္တိအာဒိ။ ‘‘အဓိဋ္ဌာနုပဂံ ပတ္တ’’န္တိ ဣမိနာ ပဒေန ကေနစိ ကာရဏေန အနဓိဋ္ဌာနုပဂေ ပတ္တေ အနာပတ္တိဘာဝံ ဒီပေတိ။ ‘‘တဿာ’’တိ တ-သဒ္ဒါပေက္ခာယ ဘိက္ခုနီတိ ဧတ္ထ ‘‘ယာ’’တိ လဗ္ဘတိ။ ပတ္တသန္နိဓိကာရဏာတိ အနဓိဋ္ဌာယ၊ အဝိကပ္ပေတွာ ဧကရတ္တမ္ပိ ပတ္တဿ နိက္ခိတ္တကာရဏာ။

၂၀၉၆။ ဣဓ ဣမသ္မိံ သိက္ခာပဒေ သေသော သဗ္ဗော ဝိနိစ္ဆယော ကထာမဂ္ဂေါတိ ယောဇနာ၊ အဝသေသသဗ္ဗဝိနိစ္ဆယကထာမဂ္ဂေါတိ အတ္ထော။ ပတ္တသိက္ခာပဒေတိ မဟာဝိဘင်္ဂပဌမပတ္တသိက္ခာပဒေ။

၂၀၉၇။ ဝိသေသောဝ ဝိသေသတာ။

ပဌမံ။

၂၀၉၈။ အကာလေတိ ‘‘အနတ္ထတကထိနေ ဝိဟာရေ ဧကာဒသ မာသာ၊ အတ္ထတကထိနေ ဝိဟာရေ သတ္တ မာသာ’’တိ (ပါစိ။ ၇၄၀ အတ္ထတော သမာနံ) ဧဝံ ဝုတ္တေ အကာလေ။ ဝိကပ္ပန္တရံ ဒဿေတုမာဟ ‘‘ဒိန္နံ ကာလေပိ ကေနစီ’’တိအာဒိ။ ဝုတ္တဝိပရိယာယေန ကာလနိယမော ဝေဒိတဗ္ဗော။ ကေနစိ အကာလေ ယံ စီဝရံ ဒိန္နံ၊ ကာလေပိ ယံ စီဝရံ အာဒိဿ ဒိန္နံ၊ တံ အကာလစီဝရံ နာမာတိ ယောဇနာ။ အာဒိဿ ဒါနပ္ပကာရံ ဒဿေတုမာဟ ‘‘သမ္ပတ္တာ ဘာဇေန္တူ’’တိ။ နိယာမိတန္တိ ‘‘သမ္ပတ္တာ ဘာဇေန္တူ’’တိ ဧဝံ ဝတွာ ဒိန္နဉ္စ ‘‘ဣဒံ ဂဏဿ၊ ဣဒံ တုယှံ ဒမ္မီ’’တိ ဝတွာ ဝါ ဒါတုကာမတာယ ပါဒမူလေ ဌပေတွာ ဝါ ဒိန္နဉ္စ အာဒိဿ ဒိန္နံ နာမာတိ အတ္ထော။ ယထာဟ ‘‘သမ္ပတ္တာ ဘာဇေန္တူ’တိ ဝတွာ ဝါ ‘ဣဒံ ဂဏဿ၊ ဣဒံ တုမှာကံ ဒမ္မီ’တိ ဝတွာ ဝါ ဒါတုကမျတာယ ပါဒမူလေ ဌပေတွာ ဝါ ဒိန္နမ္ပိ အာဒိဿ ဒိန္နံ နာမ ဟောတီ’’တိ (ပါစိ။ အဋ္ဌ။ ၇၄၀)။

၂၀၉၉။ အကာလစီဝရန္တိ ဝုတ္တပ္ပကာရံ အကာလစီဝရံ။

၂၁၀၀။ အတ္တနာ ပဋိလဒ္ဓန္တိ တတော ယံ စီဝရံ အတ္တနာ ဝဿဂ္ဂေန ပဋိလဒ္ဓံ။ နိဿဇ္ဇိတွာ ပဋိလဒ္ဓကာလေ ကတ္တဗ္ဗဝိဓိံ ဒဿေတုမာဟ ‘‘လဘိတွာ…ပေ… နိယောဇယေ’’တိ။ ယထာဒါနေ နိယောဇယေတိ ယထာ ဒါယကေန ဒိန္နံ၊ တထာ ဥပနေတဗ္ဗံ၊ အကာလစီဝရပက္ခေယေဝ ဌပေတဗ္ဗန္တိ ဝုတ္တံ ဟောတိ။

၂၁၀၁။ တဿာတိ ‘‘ယထာဒါနေ နိယောဇယေ’’တိ ဝစနဿ။ ဝိနယကမ္မံ ကတွာ ပဋိလဒ္ဓမ္ပိ တံ ပုန သေဝိတုံ န စ ဝဋ္ဋတီတိ အယမဓိပ္ပာယောတိ ယောဇနာ။

၂၁၀၂။ ကာလစီဝရေ အကာလဝတ္ထသညာယ ဒုက္ကဋန္တိ ယောဇနာ။ ဥဘယတ္ထပီတိ အကာလစီဝရေပိ ကာလစီဝရေပိ။ ဝေမတိကာယ တထာ ဒုက္ကဋန္တိ ယောဇနာ။

၂၁၀၃။ ဥဘယတ္ထပိစီဝရေ ကာလစီဝရေ စ အကာလစီဝရေ စာတိ ဥဘယစီဝရေပိ ကာလစီဝရသညာယ ဘာဇာပေန္တိယာ နဒေါသောတိ ယောဇနာ။ သစိတ္တကသမုဋ္ဌာနတ္တယံ သန္ဓာယာဟ ‘‘တိသမုဋ္ဌာနတာ’’တိ။

ဒုတိယံ။

၂၁၀၄။ သစေ သယံ အစ္ဆိန္ဒတိ အညာယ ဘိက္ခုနိယာ သဒ္ဓိံ စီဝရံ ပရိဝတ္တေတွာ ပစ္ဆာ ‘‘တုယှံ စီဝရံ တွမေဝ ဂဏှ၊ မယှံ စီဝရံ ဒေဟီ’’တိ ဧဝံ ယဒိ သယံ အစ္ဆိန္ဒတိ။ ဧတ္ထ ‘‘သကသညာယာ’’တိ သေသော။ သကသညာယ ဂဟိတတ္တာ ပါစိတ္တိယံ၊ ဒုက္ကဋဉ္စ ဝုတ္တံ၊ ဣတရထာ ဘဏ္ဍဂ္ဃေန ကာရေတဗ္ဗော။

၂၁၀၅။ ဣတရေသူတိ အဗန္ဓနဉ္စ အာဏတ္တိဗဟုတ္တဉ္စ သင်္ဂဏှာတိ။ တေနာဟ ‘‘ဝတ္ထူနံ ပယောဂဿ ဝသာ သိယာ’’တိ။

၂၁၀၆။ ‘‘တိကပါစိတ္တီ’’တိ ဣဒမပေက္ခိတွာ ‘‘ဥဒ္ဒိဋ္ဌာ’’တိ သမ္ဗန္ဓနီယံ၊ ဥပသမ္ပန္နာယ ဥပသမ္ပန္နသညာ၊ ဝေမတိကာ၊ အနုပသမ္ပန္နသညာတိ ဧတာသံ ဝသေန တိကပါစိတ္တိ ဝုတ္တာတိ အတ္ထော။ အညသ္မိံ ပရိက္ခာရေတိ ဥပသမ္ပန္နာနုပသမ္ပန္နာနံ အညသ္မိံ ပရိက္ခာရေ။ ဣတရိဿာတိ အနုပသမ္ပန္နာယ။ တိကဒုက္ကဋန္တိ အနုပသမ္ပန္နာယ ဥပသမ္ပန္နသညာဝေမတိကာအနုပသမ္ပန္နသညာနံ ဝသေန တိကဒုက္ကဋံ ဥဒ္ဒိဋ္ဌံ။

၂၁၀၇။ တာယ ဝါ ဒီယမာနံ တာယ အညာယ ဘိက္ခုနိယာ ဒုဋ္ဌာယ ဝါ တုဋ္ဌာယ ဝါ ဒီယမာနံ ဂဏှန္တိယာ၊ တဿာ ဝိဿာသမေဝ ဝါ ဂဏှန္တိယာ အနာပတ္တီတိ ယောဇနာ။ ‘‘တိသမုဋ္ဌာနတာ မတာ’’တိ ဣဒံ ဝုတ္တတ္ထမေဝ။

တတိယံ။

၂၁၀၈။ ယာ ပန ဘိက္ခုနီ ‘‘ကိံ တေ၊ အယျေ၊ အဖာသု၊ ကိံ အာဟရီယတူ’’တိ ဝုတ္တာ အညံ ဝိညာပေတွာ တံ အာဟဋံ ပဋိက္ခိပိတွာ တဉ္စ အညဉ္စ ဂဏှိတုကာမာ သစေ အညံ ဝိညာပေတိ၊ တဿာ ဝိညတ္တိဒုက္ကဋံ၊ လာဘာ နိဿဂ္ဂိယံ သိယာတိ သာဓိပ္ပာယယောဇနာ။ ဝိညတ္တိယာ ဒုက္ကဋံ ဝိညတ္တိဒုက္ကဋံ။

၂၁၀၉-၁၁။ တိကပါစိတ္တိယံ ဝုတ္တန္တိ ‘‘အညေ အညသညာ၊ အညေ ဝေမတိကာ၊ အညေ အနညသညာ အညံ ဝိညာပေတွာ အညံ ဝိညာပေတိ၊ နိဿဂ္ဂိယံ ပါစိတ္တိယ’’န္တိ (ပါစိ။ ၇၅၁) တိကပါစိတ္တိယံ ဝုတ္တံ။ အနညေ ဒွိကဒုက္ကဋန္တိ အနညေ အညသညာယ၊ ဝေမတိကာယ စ ဝသေန ဒွိကဒုက္ကဋံ။ ‘‘အနညေနညသညာယာ’’တိအာဒိနာ အနာပတ္တိဝိသယော ဒဿိတော။ ‘‘အနညေ အနညသညာယာ’’တိ ပဒစ္ဆေဒေါ။ အနညေ အနညသညာယ ဝိညာပေန္တိယာ အနာပတ္တိ။ တသ္မိံ ပဌမဝိညာပိတေ အပ္ပဟောန္တေ ဝါ တညေဝ ဝါ ဝိညာပေန္တိယာ အနာပတ္တိ။ အညေနပိ အတ္ထေ သတိ တေန သဒ္ဓိံ အညံ ဝိညာပေန္တိယာ အနာပတ္တိ။ ဣဒံ ဝုတ္တံ ဟောတိ – သစေ ပဌမံ သပ္ပိ ဝိညတ္တံ၊ ‘‘အာမကမံသံ ပစိတဗ္ဗ’’န္တိ စ ဝေဇ္ဇေန ဝုတ္တတ္တာ တေလေန အတ္ထော ဟောတိ၊ တတော ‘‘တေလေနာပိ မေ အတ္ထော’’တိ ဧဝံ အညဉ္စ ဝိညာပေတီတိ။ အာနိသံသဉ္စ ဒဿေတွာ တတော အညံ ဝိညာပေန္တိယာပိ အနာပတ္တီတိ ဉာတဗ္ဗန္တိ ယောဇနာ။ ဣဒံ ဝုတ္တံ ဟောတိ – သစေ ကဟာပဏဿ သပ္ပိ အာဘတံ ဟောတိ၊ ဣမိနာ မူလေန ဒိဂုဏံ တေလံ လဗ္ဘတိ၊ တေလေနာပိ စ ဣဒံ ကိစ္စံ နိပ္ပဇ္ဇတိ၊ တသ္မာ တေလမာဟရာတိ ဧဝံ အာနိသံသံ ဒဿေတွာ ဝိညာပေတီတိ။

စတုတ္ထံ။

၂၁၁၂-၃။ ပုဗ္ဗံ အညံ စေတာပေတွာတိ ယောဇနာ၊ အတ္တနော ကပ္ပိယဘဏ္ဍေန ‘‘ဣဒံ နာမ အာဟရာ’’တိ ပုဗ္ဗံ အညံ ပရိဝတ္တာပေတွာတိ အတ္ထော။ ဧဝန္တိ ဧတ္ထ ‘‘ဝုတ္တေ’’တိ သေသော။ ဓနေန နိဗ္ဗတ္တံ ဓညံ၊ အတ္တနော ဓနေန နိပ္ဖာဒိတတ္တာ တေလာဒိ ဣဓ ‘‘ဓည’’န္တိ အဓိပ္ပေတံ၊ န ဝီဟာဒိ။ ဧဝံ ဝုတ္တေ မယှံ အညံ ဓညံ အာနေတွာ ဒေတိ ဣတိ သညာယ ပစ္ဆာ အညံ စေတာပေယျာတိ ယောဇနာ၊ န မေ ဣမိနာ အတ္ထော၊ အညံ အာဟရာတိ ဝုတ္တေ ဣဒဉ္စ ဒတွာ အညဉ္စ အာဟရိတွာ ဒေတီတိ သညာယ ‘‘န မေ ဣဒံ ရုစ္စတိ၊ အညံ အာဟရာ’’တိ ပစ္ဆာ အညံ ပရိဝတ္တာပေယျာတိ အတ္ထော။ စေတာပနပယောဂေနာတိ အာဏတ္တာယ စေတာပနဝသေန။ မူလဋ္ဌာယာတိ အာဏာပိကာယ။ တေန စ အညေန ဝါ မူလေန အာဘတံ ဟောတု၊ တဿ လာဘေ နိဿဂ္ဂိယံ ဟောတီတိ ယောဇနာ။

၂၁၁၄။ သေသန္တိ တိကပါစိတ္တိယာဒိကံ ဝိနိစ္ဆယဝိသေသံ။

ပဉ္စမံ။

၂၁၁၅-၆။ အညဒတ္ထာယ ဒိန္နေနာတိ ဥပါသကေဟိ ‘‘ဧဝရူပံ ဂဟေတွာ ဘာဇေတွာ ပရိဘုဉ္ဇထာ’’တိ အညဿတ္ထာယ ဒိန္နေန။ ‘‘သင်္ဃိကေန ပရိက္ခာရေနာ’’တိ ဣမိနာ သမ္ဗန္ဓော။ ပရိက္ခာရေနာတိ ကပ္ပိယဘဏ္ဍေန။ သင်္ဃိကေနာတိ သင်္ဃဿ ပရိစ္စတ္တေန။ ဣဓာတိ ဣမသ္မိံ သာသနေ။ တဿာတိ ယာယ စေတာပိတံ။ နိဿဂ္ဂိယံ သိယာတိ ဧတ္ထ နိဿဋ္ဌပဋိလဒ္ဓံ ယထာဒါနေ ဥပနေတဗ္ဗန္တိ ဝတ္တဗ္ဗံ။ ယထာဟ ‘‘နိဿဋ္ဌံ ပဋိလဘိတွာ ယထာဒါနေ ဥပနေတဗ္ဗ’’န္တိ (ပါစိ။ ၇၆၁)။ ဣဒံ ဟေဋ္ဌာ ဝုတ္တတ္ထာဓိပ္ပာယမေဝ။ ဧတ္ထာတိ ဣမသ္မိံ သိက္ခာပဒေ။ ‘‘အနညဒတ္ထိကေ အညဒတ္ထိကသညာ၊ အာပတ္တိ ဒုက္ကဋဿ။ အနညဒတ္ထိကေ ဝေမတိကာ၊ အာပတ္တိ ဒုက္ကဋဿာ’’တိ ဝုတ္တတ္တာ အာဟ ‘‘အနညဒတ္ထိကေ နိဒ္ဒိဋ္ဌံဒွိကဒုက္ကဋ’’န္တိ။ ဣမိနာ စ ‘‘အညဒတ္ထိကေ တိကပါစိတ္တိယ’’န္တိ ဣဒံ ဝုတ္တမေဝ။ ‘‘အညဒတ္ထိကေ အညဒတ္ထိကသညာ၊ ဝေမတိကာ၊ အနညဒတ္ထိကသညာ အညံ စေတာပေတိ၊ နိဿဂ္ဂိယံ ပါစိတ္တိယ’’န္တိ (ပါစိ။ ၇၆၁) ဟိ ဝုတ္တံ။

၂၁၁၇။ သေသကန္တိ ယဒတ္ထာယ ဒိန္နံ၊ တံ စေတာပေတွာ အာဟရိတွာ အတိရိတ္တံ မူလံ အညဒတ္ထာယ ဥပနေန္တိယာ အနာပတ္တီတိ ယောဇေတဗ္ဗံ။ သာမိကေ ပုစ္ဆိတွာတိ ‘‘တုမှေဟိ စီဝရတ္ထာယ ဒိန္နံ၊ အမှာကဉ္စ စီဝရံ သံဝိဇ္ဇတိ၊ တေလာဒီဟိ ပန အတ္ထော’’တိ ဧဝံ သာမိကေ ပုစ္ဆိတွာ။ တန္တိ တံ စေတာပန္နံ။ အာပဒါသူတိ ဘိက္ခုနီဟိ ဝိဟာရံ ပဟာယ ဂမနာရဟမုပဒ္ဒဝေါ ဂဟိတော။ ယထာဟ ‘‘အာပဒါသူတိ တထာရူပေသု ဥပဒ္ဒဝေသု ဘိက္ခုနိယော ဝိဟာရံ ဆဍ္ဍေတွာ ပက္ကမန္တိ၊ ဧဝရူပါသု အာပဒါသု ယံ ဝါ တံ ဝါ စေတာပေတုံ ဝဋ္ဋတီ’’တိ (ပါစိ။ အဋ္ဌ။ ၇၆၂)။

၂၁၁၈။ သယံ ယာစိတကံ ဝိနာတိ ‘‘သံယာစိတက’’န္တိ ပဒံ ဝိနာ၊ ဧတ္တကမေဝ ဝိသဒိသန္တိ ဝုတ္တံ ဟောတိ။

ဆဋ္ဌသတ္တမာနိ။

၂၁၁၉။ အဓိကဝစနံ ဒဿေတုမာဟ ‘‘မဟာဇနိကသညာစိကေနာ’’တိ။ ပဒတာဓိကာတိ ပဒမေဝ ပဒတာ။ မဟာဇနိကေနာတိ ဂဏဿ ပရိစ္စတ္တေန။ သညာစိကေနာတိ သယံ ယာစိတကေန။

၂၁၂၀။ အနန္တရသမာ မတာတိ ဣဓ ‘‘ပုဂ္ဂလိကေနာ’’တိ ပဒံ ဝိနာ သမုဋ္ဌာနာဒိနာ သဒ္ဓိံ သဗ္ဗေ ဝိနိစ္ဆယာ အနန္တရသိက္ခာပဒသဒိသာ မတာတိ အတ္ထော။ ‘‘ယာ ပန ဘိက္ခုနီ အညဒတ္ထိကေန ပရိက္ခာရေန အညုဒ္ဒိသိကေန ပုဂ္ဂလိကေနာ’’တိ ဟိ သိက္ခာပဒံ။ ပုဂ္ဂလိကေနာတိ ဧကဘိက္ခုနိယာ ပရိစ္စတ္တေန။ ‘‘ကိဉ္စိပီ’’တိ လိခန္တိ။ ‘‘ကောစိပီ’’တိ ပါဌော သုန္ဒရော ‘‘ဝိသေသော’’တိ ဣမိနာ တုလျာဓိကရဏတ္တာ။

အဋ္ဌမနဝမဒသမာနိ။

ပဌမော ဝဂ္ဂေါ။

၂၁၂၁-၂။ စတ္တာရိ ကံသာနိ သမာဟဋာနိ၊ စတုန္နံ ကံသာနံ သမာဟာရော ဝါ စတုက္ကံသံ၊ စတုက္ကံသတော အတိရေကံ အတိရေကစတုက္ကံသံ၊ တေန အတိရေကစတုက္ကံသဂ္ဃနကံ ပါဝုရဏမာဟ၊ ဥပစာရေန ‘‘အတိရေကစတုက္ကံသ’’န္တိ ဝုတ္တံ။ ကံသပရိမာဏံ ပနေတ္ထ သယမေဝ ဝက္ခတိ ‘‘ကဟာပဏစတုက္ကံ တု၊ ကံသော နာမ ပဝုစ္စတီ’’တိ။ တသ္မာ အတိရေကသောဠသကဟာပဏဂ္ဃနကန္တိ အတ္ထော။ ဂရုပါဝုရဏန္တိ သီတကာလေ ပါရုပိတဗ္ဗပါဝုရဏံ။ စေတာပေယျာတိ ဝိညာပေယျ။ စတ္တာရိ သစ္စာနိ သမာဟဋာနိ၊ စတုန္နံ ဝါ သစ္စာနံ သမာဟာရော စတုသစ္စံ၊ တံ ပကာသေတိ သီလေနာတိ စတုသစ္စပ္ပကာသီ၊ တေန၊ စတုန္နံ အရိယသစ္စာနံ နိဒ္ဒိသကေန သမ္မာသမ္ဗုဒ္ဓေန။ ပယောဂေတိ ‘‘ဒေဟီ’’တိ ဧဝံ ဝိညာပနပယောဂေ။ လာဘေတိ ပဋိလာဘေ။

စတုန္နံ သမူဟော စတုက္ကံ၊ ကဟာပဏာနံ စတုက္ကံ ကဟာပဏစတုက္ကံ။ ကဟာပဏော စေတ္ထ တံတံကာလေ၊ တံတံပဒေသေ စ ဝေါဟာရူပဂေါ ဂဟေတဗ္ဗော။ ဣမာ ဝုတ္တပ္ပကာရာ နိဿဂ္ဂိယာဝသာနာပတ္တိယော ‘‘ဉာတကာနဉ္စ သန္တကေ’’တိ အနာပတ္တိဝိသယေ ဝက္ခမာနတ္တာ ‘‘ယဒါ ယေန အတ္ထော၊ တဒါ တံ ဝဒေယျာထာ’’တိ ဧဝံ နိစ္စပဝါရဏံ အကတွာ တသ္မိံ ကာလေ ကိသ္မိဉ္စိ ဂုဏေ ပသီဒိတွာ ‘‘ဝဒေယျာထ ယေန အတ္ထော’’တိ ဧဝံ ပဝါရိတဋ္ဌာနေ သမ္ဘဝန္တီတိ ဒဋ္ဌဗ္ဗာ။

၂၁၂၃-၅။ ဦနကစတုက္ကံသေ အတိရေကသညာ၊ အာပတ္တိ ဒုက္ကဋဿ။ ဦနကစတုက္ကံသေ ဝေမတိကာ၊ အာပတ္တိ ဒုက္ကဋဿာ’’တိ ဝုတ္တတ္တာ အာဟ ‘‘ဦနကေ တု စတုက္ကံသေ၊ ဥဒ္ဒိဋ္ဌံ ဒွိကဒုက္ကဋ’’န္တိ။ ဣမိနာ ‘‘အတိရေကစတုက္ကံသေ အတိရေကသညာ၊ ဝေမတိကာ၊ ဦနကသညာ စေတာပေတိ၊ နိဿဂ္ဂိယံ ပါစိတ္တိယ’’န္တိ တိကပါစိတ္တိယဉ္စ ဒဿိတံ ဟောတိ။

ဂရုကန္တိ ဂရုပါဝုရဏံ။ တဒူနံ ဝါတိ စတုက္ကံသတော ဦနကံ ဝါ။ ဉာတကာနဉ္စာတိ ဧတ္ထ စ-သဒ္ဒေန ပဝါရိတာနံ သင်္ဂဟော။ ယထာဟ အနာပတ္တိဝါရေ ‘‘ဉာတကာနံ၊ ပဝါရိတာန’’န္တိ (ပါစိ။ ၇၈၇)။ ဧတ္ထ စ ‘‘အတိရေကစတုက္ကံသမ္ပီ’’တိ ဝတ္တဗ္ဗံ ‘‘တဒူနံ ဝါ’’တိ ဣမိနာ စတုက္ကံသူနဿ ဝုတ္တတ္တာ။ ‘‘အပ္ပမေဝ ဝါ’’တိ ဣမိနာ အတိရေကစတုက္ကံသေပိ မဟဂ္ဃတရံ ဝုတ္တန္တိ ဝေဒိတဗ္ဗံ။

ဧကာဒသမံ။

၂၁၂၆-၇။ ‘‘လဟုပါဝုရဏံ ပန ဘိက္ခုနိယာ စေတာပေန္တိယာ အဍ္ဎတေယျကံသပရမံ စေတာပေတဗ္ဗ’’န္တိ (ပါစိ။ ၇၈၉) ဝစနတော လဟုပါဝုရဏန္တိ ဧတ္ထ ‘‘စေတာပေန္တိယာ ဘိက္ခုနိယာ’’တိ စ အဍ္ဎတေယျကံသဂ္ဃနန္တိ ဧတ္ထ ‘‘စေတာပေတဗ္ဗ’’န္တိ စ သေသော။ လဟုပါဝုရဏန္တိ ဥဏှကာလေ ပါဝုရဏံ။ တိဏ္ဏံ ပူရဏော တေယျော၊ အဍ္ဎော တေယျော အဿာတိ အဍ္ဎတေယျော၊ အဍ္ဎတေယျော စ သော ကံသော စာတိ အဍ္ဎတေယျကံသော၊ တံ အဂ္ဃတီတိ အဍ္ဎတေယျကံသဂ္ဃနံ၊ ဒသကဟာပဏဂ္ဃနကန္တိ အတ္ထော။ တတောတိ အဍ္ဎတေယျကံသဂ္ဃနကတော။ ယံ ပန ပါဝုရဏံ အဍ္ဎတေယျကံသဂ္ဃနကံ၊ တံ လဟုပါဝုရဏံ ။ တတော အဍ္ဎတေယျကံသဂ္ဃနကတော လဟုပါဝုရဏတော။ ဥတ္တရိန္တိ အတိရေကံ။ အဍ္ဎတေယျကံသဂ္ဃနကံ ယံ ပါဝုရဏံ ယာ ဘိက္ခုနီ စေတာပေတိ ၊ တဿ ပါဝုရဏဿ ပဋိလာဘေ တဿာ ဘိက္ခုနိယာ နိဿဂ္ဂိယပါစိတ္တိယာ ဝုတ္တာတိ ယောဇနာ။

‘‘အနန္တရသမံ သေသ’’န္တိ ဣဒံ သမတ္ထေတုမာဟ ‘‘နတ္ထိ ကာစိ ဝိသေသတာ’’တိ။ ဝိသေသောယေဝ ဝိသေသတာ။

ဒွါဒသမံ။

၂၁၂၈။ ဣဒါနိ ပါတိမောက္ခုဒ္ဒေသေ အာဂတေသု သမတိံသနိဿဂ္ဂိယေသု ကေသဉ္စိ အတ္တနော အဝစနေ ကာရဏဉ္စ အဝုတ္တေဟိ သဒ္ဓိံ ဝုတ္တာနံ ဂဟဏဉ္စ ဒဿေတုမာဟ ‘‘သာဓာရဏာနီ’’တိအာဒိ။ ဟိ ယသ္မာ ဘိက္ခုနီနံ ဘိက္ခူဟိ သာဓာရဏာနိ ယာနိ သိက္ခာပဒါနိ သေသာနိ ဣဓ ဝုတ္တေဟိ အညာနိ၊ တာနိ အဋ္ဌာရသ သိက္ခာပဒါနိ စေဝ ဣဓ ဝုတ္တသရူပါနိ ဒွါဒသ သိက္ခာပဒါနိ စေတိ ဣစ္စေဝံ နိဿဂ္ဂိယပါစိတ္တိယသိက္ခာပဒါနိ သမတိံသေဝ ဟောန္တီတိ ယောဇနာ။

ဣတိ ဝိနယတ္ထသာရသန္ဒီပနိယာ ဝိနယဝိနိစ္ဆယဝဏ္ဏနာယ

နိဿဂ္ဂိယကထာဝဏ္ဏနာ နိဋ္ဌိတာ။