📜

ပါဋိဒေသနီယကထာဝဏ္ဏနာ

၂၄၃၂။ ဧဝံ ပါစိတ္တိယဝိနိစ္ဆယံ ဒဿေတွာ ဣဒါနိ ပါဋိဒေသနီယံ ဒဿေတုမာဟ ‘‘အဂိလာနာ’’တိအာဒိ။ ယာ ပန ဘိက္ခုနီ အဂိလာနာ သယံ အတ္တနာ ဝိညတ္တိယာ လဒ္ဓံ သပ္ပိံ သစေ ‘‘ဘုဉ္ဇိဿာမီ’’တိ ဂဏှတိ၊ တဿာ ဧဝံ ဂဟဏေ ဒုက္ကဋံ ပရိဒီပိတန္တိ ယောဇနာ။ တတ္ထ ယဿာ ဝိနာ သပ္ပိနာ ဖာသု ဟောတိ၊ သာ အဂိလာနာ နာမ။ သပ္ပိန္တိ ပုဗ္ဗေ ဝုတ္တဝိနိစ္ဆယံ ပါဠိအာဂတံ ဂေါသပ္ပိအာဒိကမေဝ။

၂၄၃၃။ တိပါဋိဒေသနီယန္တိ အဂိလာနာ အဂိလာနသညာ၊ ဝေမတိကာ၊ ဂိလာနသညာတိ တီသု ဝိကပ္ပေသု တီဏိ ပါဋိဒေသနီယာနိ။ ဂိလာနာ ဒွိကဒုက္ကဋန္တိ ဂိလာနာယ ဒွိကဒုက္ကဋံ။ ဂိလာနာ အဂိလာနသညာ၊ ဝေမတိကာ ဝါတိ ဒွီသု ဝိကပ္ပေသု ဒွေ ဒုက္ကဋာနိ။

၂၄၃၄-၅။ ဂိလာနာ ဟုတွာ သပ္ပိံ ဝိညာပေတွာ ပစ္ဆာ ဝူပသန္တဂေလညာ ဟုတွာ သေဝန္တိယာ ပရိဘုဉ္ဇန္တိယာပိ စ ဂိလာနာယ အဝသေသံ ပရိဘုဉ္ဇန္တိယာ ဝါ ဉာတကာဒိတော ဉာတကပဝါရိတဋ္ဌာနတော ဝိညတ္တံ ဘုဉ္ဇန္တိယာ ဝါ အညဿတ္ထာယ ဝိညတ္တံ ပရိဘုဉ္ဇန္တိယာ ဝါ အတ္တနော ဓနေန ဂဟိတံ ဘုဉ္ဇန္တိယာ ဝါ ဥမ္မတ္တိကာယ ဝါ အနာပတ္တီတိ ယောဇနာ။

ပဌမံ။

၂၄၃၆။ သေသေသု ဒုတိယာဒီသူတိ ‘‘ယာ ပန ဘိက္ခုနီ အဂိလာနာ တေလံ…ပေ… မဓုံ…ပေ… ဖာဏိတံ…ပေ… မစ္ဆံ…ပေ… မံသံ…ပေ… ခီရံ…ပေ… ဒဓိံ ဝိညာပေတွာ ဘုဉ္ဇေယျ၊ ပဋိဒေသေတဗ္ဗံ တာယ ဘိက္ခုနိယာ ဂါရယှံ အယျေ ဓမ္မံ အာပဇ္ဇိံ အသပ္ပာယံ ပါဋိဒေသနီယံ၊ တံ ပဋိဒေသေမီ’’တိ (ပါစိ။ ၁၂၃၆) ဧဝံ ဒုတိယာဒီသု သတ္တသု ပါဋိဒေသနီယေသု။ နတ္ထိ ကာစိ ဝိသေသတာတိ တေလာဒိပဒါနိ ဝိနာ အညော ကောစိ ဝိသေသော နတ္ထီတိ အတ္ထော။

၂၄၃၇။ ပါဠိယံ အနာဂတေသု သဗ္ဗေသု သပ္ပိအာဒီသု အဋ္ဌသု အညတရံ ဝိညာပေတွာ ဘုဉ္ဇန္တိယာပိ ဒုက္ကဋန္တိ ယောဇနာ။

ဣတိ ဝိနယတ္ထသာရသန္ဒီပနိယာ ဝိနယဝိနိစ္ဆယဝဏ္ဏနာယ

ပါဋိဒေသနီယကထာဝဏ္ဏနာ နိဋ္ဌိတာ။