📜

သိက္ခာကရဏီယကထာဝဏ္ဏနာ

၂၄၃၈။ ပါဋိဒေသနီယာနန္တရံ ဥဒ္ဒိဋ္ဌာနိ ပဉ္စသတ္တတိ သေခိယာနိ မဟာဝိဘင်္ဂေ ဝုတ္တဝိနိစ္ဆယာနေဝါတိ တဒေဝ အတိဒိသန္တော အာဟ ‘‘သေခိယာ ပန ယေ ဓမ္မာ’’တိအာဒိ။ ယေ ပန ပဉ္စသတ္တတိ သေခိယာ ဓမ္မာ ပါဋိဒေသနီယာနန္တရံ ဥဒ္ဒိဋ္ဌာ၊ တေသံ အတ္ထဝိနိစ္ဆယော မဟာဝိဘင်္ဂေ ဝုတ္တောဝါတိ ယောဇနာ၊ အတ္ထိကေဟိ တတောဝ ဂဟေတဗ္ဗော၊ န ပုန ဣဓ ဒဿေဿာမီတိ အဓိပ္ပာယော။

ဣတိ ဝိနယတ္ထသာရသန္ဒီပနိယာ ဝိနယဝိနိစ္ဆယဝဏ္ဏနာယ

သိက္ခာကရဏီယကထာဝဏ္ဏနာ နိဋ္ဌိတာ။

၂၄၃၉-၄၀။ သဝိဘင်္ဂါနံ ဥဘတောဝိဘင်္ဂသဟိတာနံ ဥဘတောပါတိမောက္ခာနံ ဘိက္ခူနံ၊ ဘိက္ခုနီနဉ္စ ပါတိမောက္ခာနံ အဋ္ဌကထာသာရော သဗ္ဗဋ္ဌကထာနံ သာရဘူတော ယော သော အတ္ထော ဝိသေသတော သမန္တပါသာဒိကာယံ ဝုတ္တော။ တံ သဗ္ဗံ သာရဘူတံ အတ္ထံ သမာဒါယ ယော ဝိနယဿဝိနိစ္ဆယော ဘိက္ခူနံ၊ ဘိက္ခုနီနဉ္စ ဟိတတ္ထာယ မယာ ကတော ဝိရစိတောတိ သမ္ဗန္ဓော။

၂၄၄၁။ နော အမှာကံ ပဋိဘာဏဇံ ပဋိဘာဏတော ဇာတံ ဣမံ တု ဣမံ ဝိနယဝိနိစ္ဆယံ ပန ယေ ဇန္တုနော သတ္တာ သုဏန္တိ ၊ တေ ဇန္တုနော ဇနဿ သတ္တလောကဿ ဟိတေ အဓိသီလသိက္ခာပကာသကတ္တာ ဥပကာရကေ သုမတဿ သောဘဏန္တိ ဗုဒ္ဓါဒီဟိ မတဿ၊ သောဘဏေဟိ ဝါ ဗုဒ္ဓါဒီဟိ မတဿ ပဋိဝိဒ္ဓဿ အမတမဟာနိဗ္ဗာနဿ အယနေ အဉ္ဇသဘူတေ ဇနဿ တာယနေ ကာယိကဝါစသိကဝီတိက္ကမပဋိပက္ခတ္တာ အပါယဘယနိဝါရဏဋ္ဌေန တာဏဘူတေ ဝိနယေ ဝိနယပိဋကေ ပကတညုနော ယထာသဘာဝံ ဇာနန္တာ တညုနော ဘဝန္တိ တံ တံ ကပ္ပိယာကပ္ပိယံ သေဝိတဗ္ဗာသေဝိတဗ္ဗံ ဇာနန္တာ ဘဝန္တေဝါတိ အတ္ထော။

၂၄၄၂။ ဗဟဝေါ သာရဘူတာ နယာ ဧတ္ထာတိ ဗဟုသာရနယော၊ တသ္မိံ ဗဟုသာရနယေ။ ပရမေ ဥတ္တမေ ဝိနယေ ဝိနယပိဋကေ ဝိသာရဒတံ ဝေသာရဇ္ဇံ အသံဟီရဉာဏံ အဘိပတ္ထယတာ ဝိသေသတော ဣစ္ဆန္တေန ဗုဒ္ဓိမတာ ဉာဏာတိသယမန္တေန ယတိနာ သဗ္ဗကာလံ တိဝိဓသိက္ခာပရိပူရဏေ အသိထိလပဝတ္တသမ္မာဝါယာမေန ဘိက္ခုနာ ဣမသ္မိံ ဝိနယဝိနိစ္ဆယေ ပရမာ ဥတ္တရိတရာ မဟတီ အာဒရတာ ကရဏီယတမာ ဝိသေသေန ကာတဗ္ဗာယေဝါတိ အတ္ထော။

၂၄၄၃။ ဣစ္စေဝံ သီလဝိသုဒ္ဓိသာဓနေ ဝိနယပိဋကေ ဝေသာရဇ္ဇဟေတုတာယ ဣမဿ ဝိနယဝိနိစ္ဆယဿ သီလဝိသုဒ္ဓိအာဒိသတ္တဝိသုဒ္ဓိပရမ္ပရာယ အဓိဂန္တဗ္ဗဿ အမတမဟာနိဗ္ဗာနဿ ပတ္တိယာပိ မူလဘူတတံ ဒဿေတုမာဟ ‘‘အဝဂစ္ဆတီ’’တိအာဒိ။

ယော ပန ဘိက္ခု အတ္ထယုတ္တံ မဟတာ ပယောဇနတ္ထေန၊ အဘိဓေယျတ္ထေန စ သမန္နာဂတံ ဣမံ ဝိနယဿဝိနိစ္ဆယံ အဝဂစ္ဆတိ အဝေစ္စ ယာထာဝတော ဇာနာတိ၊ သော အပရမ္ပရံ မရဏာဘာဝါ အမရံ ဇရာယာဘာဝါ အဇရံ ရာဂါဒိကိလေသရဇပဋိပက္ခတ္တာ အရဇံ အနေကပ္ပကာရရောဂါနံ အပ္ပဝတ္တိဟေတုတ္တာ အရုဇံ သန္တိပဒံ သဗ္ဗကိလေသဒရထပရိဠာဟာနံ ဝူပသမဟေတုတ္တာ သန္တိသင်္ခါတံ နိဗ္ဗာနပဒံ အဓိဂစ္ဆတိ သီလဝိသုဒ္ဓိအာဒိသတ္တဝိသုဒ္ဓိပရမ္ပရာယ ဂန္တွာ ပဋိဝိဇ္ဈတီတိ ယောဇနာ။

ဣတိ ဝိနယတ္ထသာရသန္ဒီပနိယာ ဝိနယဝိနိစ္ဆယဝဏ္ဏနာယ

ဘိက္ခုနိဝိဘင်္ဂကထာဝဏ္ဏနာ နိဋ္ဌိတာ။

ခန္ဓကကထာ