📜

ပဗ္ဗဇ္ဇာကထာဝဏ္ဏနာ

၂၄၄၄။ ဣစ္စေဝံ နာတိသင်္ခေပဝိတ္ထာရဝသေန ဝိဘင်္ဂဒွယေ၊ တဒဋ္ဌကထာယ စ အာဂတံ ဝိနိစ္ဆယံ ဒဿေတွာ ဣဒါနိ ခန္ဓကာဂတံ ဝိနိစ္ဆယံ ဒဿေတုမာရဘန္တော အာဟ ‘‘သီလက္ခန္ဓာဒီ’’တိအာဒိ။ တတ္ထ သီလက္ခန္ဓာဒိယုတ္တေနာတိ သီလသမာဓိပညာဝိမုတ္တိဝိမုတ္တိဉာဏဒဿနသင်္ခါတေဟိ ပဉ္စဟိ ခန္ဓေဟိ ဂုဏရာသီဟိ ယုတ္တေန သမန္နာဂတေန။ သုဘက္ခန္ဓေနာတိ သုဝဏ္ဏာလိင်္ဂသဒိသဝဋ္ဋက္ခန္ဓတာယ သုဘော သုန္ဒရော ခန္ဓော ဧတဿာတိ သုဘက္ခန္ဓော၊ ဘဂဝါ၊ တေန။ ဣမိနာ ဗာတ္တိံသလက္ခဏာနမေကဒေသဘူတဿ သမဝဋ္ဋက္ခန္ဓတာလက္ခဏဿ ပရိဒီပကေန ဝစနေန လက္ခဏာဟာရနယေန ဗာတ္တိံသလက္ခဏာဒိကာ သဗ္ဗာပိ ရူပကာယသိရီ သန္ဒဿိတာတိ ဝေဒိတဗ္ဗာ။

ခန္ဓကေတိ ခန္ဓာနံ သမူဟော ခန္ဓကော၊ ခန္ဓာနံ ဝါ ကာယနတော ဒီပနတော ခန္ဓကော။ ‘‘ခန္ဓာ’’တိ စေတ္ထ ပဗ္ဗဇ္ဇူပသမ္ပဒါဒိဝိနယကမ္မသင်္ခါတာ၊ စာရိတ္တဝါရိတ္တသိက္ခာပဒသင်္ခါတာ စ ပညတ္တိယော အဓိပ္ပေတာ။ ပဗ္ဗဇ္ဇာဒီနိ ဟိ ဘဂဝတာ ပညတ္တတ္တာ ‘‘ပညတ္တိယော’’တိ ဝုစ္စန္တိ။ ပညတ္တိယဉ္စ ခန္ဓ-သဒ္ဒေါ ဒိဿတိ ‘‘ဒါရုက္ခန္ဓော (သံ။ နိ။ ၄။၂၄၁) အဂ္ဂိက္ခန္ဓော (ပဋိ။ မ။ ၁။၁၁၆) ဥဒကက္ခန္ဓော’’တိအာဒီသု (အ။ နိ။ ၆။၃၇) ဝိယ။ အပိစ ဘာဂရာသတ္ထတာ စေတ္ထ ယုဇ္ဇတိယေဝ တာသံ ပညတ္တီနံ ဘာဂသော၊ ရာသိတော စ ဝိဘတ္တတ္တာ။ တသ္မိံ ခန္ဓကေ။ ပိ-သဒ္ဒေါ ဝုတ္တာပေက္ခာယ ပဉ္စသတိကသတ္တသတိကက္ခန္ဓကေ ဒွေ ဝဇ္ဇေတွာ ပဗ္ဗဇ္ဇက္ခန္ဓကာဒိကေ ဘိက္ခုနိခန္ဓကပရိယောသာနေ ဝီသတိဝိဓေ ခန္ဓကေ ဝုတ္တဝိနိစ္ဆယဿ ဣဓ ဝက္ခမာနတ္တာ။ တဒေဝ သန္ဓာယာဟ ‘‘ခန္ဓကေပိ ပဝက္ခာမိ၊ သမာသေန ဝိနိစ္ဆယ’’န္တိ။

၂၄၄၅။ ‘‘မာတရာ ပိတရာ’’တိ ဣမိနာ ဇနကာယေဝ အဓိပ္ပေတာ။ ‘‘ဘဏ္ဍုကမ္မံ၊ သမဏကရဏံ၊ ပဗ္ဗာဇနန္တိ စ ပရိယာယ-သဒ္ဒါ’’တိ ‘‘အနုဇာနာမိ၊ ဘိက္ခဝေ၊ သင်္ဃံ အပလောကေတုံ ဘဏ္ဍုကမ္မာယာ’’တိ (မဟာဝ။ ၉၈) ဣမိဿာ ပါဠိယာ အဋ္ဌကထာယ (မဟာဝ။ အဋ္ဌ။ ၉၈) ဝုတ္တံ။ အာပုစ္ဆိတွာတိ ဧတ္ထ ‘‘သင်္ဃ’’န္တိ သေသော။

၂၄၄၆။ ဝါဝဋောတိ ပသုတော၊ ယုတ္တပယုတ္တောတိ အတ္ထော။ ‘‘ပဗ္ဗာဇေတွာ အာနယ ဣတိ စာ’’တိ ပဒစ္ဆေဒေါ။ ဧတ္ထ စ တိဓာ ပဗ္ဗာဇနံ ဝေဒိတဗ္ဗံ ကေသစ္ဆေဒနံ၊ ကာသာယအစ္ဆာဒနံ၊ သရဏဒါနန္တိ၊ ဣမာနိ တီဏိ ကရောန္တော ‘‘ပဗ္ဗာဇေတီ’’တိ ဝုစ္စတိ။ တေသု ဧကံ၊ ဒွေ ဝါပိ ကရောန္တော တထာ ဝေါဟရီယတိယေဝ။ တသ္မာ ‘‘ပဗ္ဗာဇေတွာနယာ’’တိ ဣမိနာ ကေသေ ဆိန္ဒိတွာ ကာသာယာနိ အစ္ဆာဒေတွာ အာနေဟီတိ အယမတ္ထော ဒီပိတောတိ ဒဋ္ဌဗ္ဗော။

၂၄၄၇။ အဝုတ္တောတိ ဥပဇ္ဈာယေန အနုယျောဇိတော။ သော ဒဟရော သစေ တံ သယမေဝ ကေသစ္ဆေဒနကာသာယစ္ဆာဒနေဟိ ပဗ္ဗာဇေတိ၊ ဝဋ္ဋတီတိ ယောဇနာ။

၂၄၄၈။ တတ္ထာတိ အတ္တနော သမီပေ။ ခဏ္ဍသီမံ နေတွာတိ ဘဏ္ဍုကမ္မာရောစနပရိဟာရတ္ထံ ဝုတ္တံ။ တေန သဘိက္ခုကေ ဝိဟာရေ အညမ္ပိ ဘိက္ခုံ ‘‘ဧတဿ ကေသေ ဆိန္ဒာ’’တိ ဝတ္တုံ န ဝဋ္ဋတိ။ ပဗ္ဗာဇေတွာတိ ကေသစ္ဆေဒနံ သန္ဓာယ ဝဒတိ။

၂၄၅၀။ ‘‘ပုရိသံဘိက္ခုတော အညော၊ ပဗ္ဗာဇေတိ န ဝဋ္ဋတီ’’တိ ဣဒံ သရဏဒါနံ သန္ဓာယ ဝုတ္တံ။ တေနေဝါဟ ‘‘သာမဏေရော’’တိအာဒိ။

၂၄၅၁။ ဥဘိန္နမ္ပိ ထေရထေရီနံ ‘‘ဣမေဟိ စီဝရေဟိ ဣမံ အစ္ဆာဒေဟီ’’တိ အာဏတ္တိယာ သာမဏေရောပိ ဝါ ဟောတု၊ တထာ သာမဏေရီ ဝါ ဟောတု၊ တေ ဥဘော သာမဏေရသာမဏေရီ ကာသာယာနိ ဒါတုံ လဘန္တီတိ ယောဇနာ။

၂၄၅၂-၄။ ပဗ္ဗာဇေန္တေန ဘိက္ခုနာတိ ဧတ္ထ ‘‘တစပဉ္စကကမ္မဋ္ဌာနံ ဒတွာ’’တိ ဝတ္တဗ္ဗံ ဧဝဉှိ ကတွာ ကေသာပနယနဿ အဋ္ဌကထာယံ ဝုတ္တတ္တာ။ ဝုတ္တဉှိ တတ္ထ ‘‘အာဝုသော၊ သုဋ္ဌု ဥပဓာရေဟိ၊ သတိံ ဥပဋ္ဌာပေဟီတိ ဝတွာ တစပဉ္စကကမ္မဋ္ဌာနံ အာစိက္ခိတဗ္ဗံ။ အာစိက္ခန္တေန စ ဝဏ္ဏသဏ္ဌာနဂန္ဓာသယောကာသဝသေန အသုစိဇေဂုစ္ဆပဋိက္ကူလဘာဝံ၊ နိဇ္ဇီဝနိဿတ္တဘာဝံ ဝါ ပါကဋံ ကရောန္တေန အာစိက္ခိတဗ္ဗ’’န္တိအာဒိ။ ကိမတ္ထမေဝံ ကရီယတီတိ စေ? သစေ ဥပနိဿယသမ္ပန္နော ဟောတိ၊ တဿ ခုရဂ္ဂေယေဝ အရဟတ္တပါပုဏနတ္ထံ။ ဝုတ္တဉ္စေတံ အဋ္ဌကထာယံ –

‘‘ယေ ဟိ ကေစိ ခုရဂ္ဂေ အရဟတ္တံ ပတ္တာ၊ သဗ္ဗေ တေ ဧဝရူပံ သဝနံ လဘိတွာ ကလျာဏမိတ္တေန အာစရိယေန ဒိန္နနယံ နိဿာယ၊ နော အနိဿာယ၊ တသ္မာဿ အာဒိတောဝ ဧဝရူပီ ကထာ ကထေတဗ္ဗာ’’တိ (မဟာဝ။ အဋ္ဌ။ ၃၄)။

ဧတေနေဝ ဗျတိရေကတော ဣတော အညာ အနိယျာနိကကထာ န ကထေတဗ္ဗာတိ ဒီပိတံ ဟောတိ။ ဂေါမယာဒိနာတိ ဂေါမယစုဏ္ဏာဒိနာ။ အာဒိ-သဒ္ဒေန မတ္တိကာဒီနံ ဂဟဏံ။ ပီဠကာ ဝါတိ ထုလ္လပီဠကာ ဝါ။ ကစ္ဆု ဝါတိ သုခုမကစ္ဆု ဝါ။ နိယံပုတ္တန္တိ အတ္တနော ပုတ္တံ။ ‘‘ဘိက္ခုနာ’’တိ ဣမဿ ပဒဿ ဒူရတ္တာ ‘‘ယတိနာ’’တိ အာဟ။

၂၄၅၅-၆။ ကသ္မာ ပန ဧဝံ နဟာပေတဗ္ဗောတိ အာဟ ‘‘ဧတ္တကေနာပီ’’တိအာဒိ။ သောတိ ပဗ္ဗဇ္ဇာပေက္ခော။ ဥပဇ္ဈာယကာဒိသူတိ ဧတ္ထ အာဒိ-သဒ္ဒေန အာစရိယသမာနုပဇ္ဈာယကာဒီနံ ဂဟဏံ။ ပါပုဏန္တိ ဟီတိ ဧတ္ထ ဟိ-သဒ္ဒေါ ယသ္မာ-ပဒတ္ထေ ဝတ္တတိ။ ယသ္မာ ဧတ္တကေနာပိ ဥပဇ္ဈာယာဒီသု သဂါရဝေါ ဟောတိ၊ ယသ္မာ စ ဧဝရူပံ ဥပကာရံ လဘိတွာ ကုလပုတ္တာ ဥပ္ပန္နံ အနဘိရတိံ ပဋိဝိနောဒေတွာ သိက္ခာယော ပရိပူရေတွာ နိဗ္ဗာနံ ပါပုဏိဿန္တိ၊ တသ္မာ ဧဝရူပေါ ဥပကာရော ကာတဗ္ဗောတိ အတ္ထော။

၂၄၅၈။ ဧကတောတိ သဗ္ဗာနိ စီဝရာနိ ဧကတော ကတွာ။

၂၄၅၉။ အထာတိ အဓိကာရန္တရာရမ္ဘေ နိပါတော။ တဿ ဟတ္ထေ အဒတွာပိ ဥပဇ္ဈာယော ဝါ အာစရိယော ဝါပိ သယမေဝ တံ ပဗ္ဗဇ္ဇာပေက္ခံ အစ္ဆာဒေတိ၊ ဝဋ္ဋတီတိ ယောဇနာ။

၂၄၆၀။ အဒိန္နစီဝရဿ အဂ္ဂဟေတဗ္ဗတ္တာ အာဟ ‘‘အပနေတွာ တတော သဗ္ဗံ၊ ပုန ဒါတဗ္ဗမေဝ တ’’န္တိ။ တတောတိ တဿ သရီရတော။ တန္တိ စီဝရံ။

၂၄၆၁-၂။ ဧတဒေဝ အာဟ ‘‘ဘိက္ခုနာ’’တိအာဒိနာ။ အဒိန္နံ န ဝဋ္ဋတီတိ ဧတ္ထ ပဗ္ဗဇ္ဇာ န ရုဟတီတိ ဝဒန္တိ။ တဿေဝ သန္တကံ ဝါပိ စီဝရံ အဒိန္နံ န ဝဋ္ဋတိ အတ္တသန္တကေ အာစရိယုပဇ္ဈာယာနံ အတ္တနော သန္တကေ စီဝရေ ကာ ကထာ ဝတ္တဗ္ဗမေဝ နတ္ထီတိ အတ္ထော။ ဘိက္ခူတိ ယေ တတ္ထ သန္နိပတိတာ။ ကာရာပေတွာန ဥက္ကုဋိန္တိ ဧတ္ထ သဗ္ဗဓာတွတ္ထာနုဂတော ကရောတိ-သဒ္ဒေါ ဂဟိတောတိ ဥက္ကုဋိကံ နိသီဒါပေတွာတိ အတ္ထော ဂဟေတဗ္ဗော၊ ‘‘ဥက္ကုဋိက’’န္တိ (မဟာဝ။ အဋ္ဌ။ ၃၄) အဋ္ဌကထာပါဌော ဂါထာဗန္ဓသုခတ္ထံ ဣဓ က-ကာရလောပေန နိဒ္ဒိဋ္ဌော။

၂၄၆၄။ ဧကပဒံဝါပီတိ ဗုဒ္ဓမိစ္စာဒိကံ ဧကမ္ပိ ဝါ ပဒံ။ ဧကက္ခရမ္ပိ ဝါတိ ဗုကာရာဒိအက္ခရေသု ဧကမ္ပိ ဝါ အက္ခရံ။ ပဋိပါဋိန္တိ ‘‘ဗုဒ္ဓ’’မိစ္စာဒိကံ ပဒပန္တိံ။

၂၄၆၅။ အကတ္တဗ္ဗပ္ပကာရန္တရံ ဒဿေတုမာဟ ‘‘တိက္ခတ္တုံ ယဒိ ဝါ’’တိအာဒိ။ တထာ သေသေသူတိ ယဒိ ဝါ ‘‘ဓမ္မံ သရဏ’’န္တိ တိက္ခတ္တုံ ဒေတိ၊ ‘‘သင်္ဃံ သရဏ’’န္တိ ယဒိ ဝါ တိက္ခတ္တုံ ဒေတိ၊ ဧဝမ္ပိ တီဏိ သရဏာနိ အဒိန္နာနေဝ ဟောန္တိ။

၂၄၆၆။ အနုနာသိကန္တာနိ ကတွာ ဒါတဗ္ဗာနီတိ သမ္ဗန္ဓော။ အနုနာသိကန္တံ ကတွာ ဒါနကာလေ အန္တရာဝိစ္ဆေဒံ အကတွာ ဒါတဗ္ဗာနီတိ ဒဿေတုံ ‘‘ဧကာဗဒ္ဓါနိ ဝါ ပနာ’’တိ ဝုတ္တံ။ ဝိစ္ဆိန္ဒိတွာ ပဒပဋိပါဋိတော မ-ကာရန္တံ ကတွာ ဒါနသမယေ ဝိစ္ဆေဒံ ကတွာ။ မန္တာနီတိ ‘‘ဗုဒ္ဓံ သရဏံ ဣစ္စာဒိနာ မ-ကာရန္တာနိ။ ‘‘ဗုဒ္ဓံ သရဏံ ဂစ္ဆာမီ’’တိအာဒိနာ နယေန နိဂ္ဂဟိတန္တမေဝ ကတွာ န ဒါတဗ္ဗန္တိ ‘‘အထာ’’တိ အာဟ။

၂၄၆၇။ သုဒ္ဓိ နာမ အာစရိယဿ ဉတ္တိယာ၊ ကမ္မဝါစာယ စ ဥစ္စာရဏဝိသုဒ္ဓိ။ ပဗ္ဗဇ္ဇာတိ သာမဏေရသာမဏေရိပဗ္ဗဇ္ဇာ။ ဥဘတောသုဒ္ဓိယာ ဝိနာတိ ဥဘတောသုဒ္ဓိံ ဝိနာ အာစရိယန္တေဝါသီနံ ဥဘိန္နံ တီသု သရဏတ္တယဒါနဂ္ဂဟဏေသု ဥစ္စာရဏသုဒ္ဓိံ ဝိနာ၊ ဧကဿာပိ အက္ခရဿ ဝိပတ္တိသဗ္ဘာဝေ န ဟောတီတိ အတ္ထော။

၂၄၆၈-၉။ ‘‘ပဗ္ဗဇ္ဇာဂုဏမိစ္ဆတာ’’တိ ဣဒံ ‘‘အာစရိယေန၊ အန္တေဝါသိကေနာ’’တိ ပဒဒွယဿ ဝိသေသနံ ဒဋ္ဌဗ္ဗံ၊ အန္တေဝါသိကဿ ပဗ္ဗဇ္ဇာဂုဏံ ဣစ္ဆန္တေန အာစရိယေန၊ အတ္တနော ပဗ္ဗဇ္ဇာဂုဏံ ဣစ္ဆန္တေန အန္တေဝါသိကေန စ ဗု-ဒ္ဓ-ကာရာဒယော ဝဏ္ဏာ ဗု-ကာရ ဓ-ကာရာဒယော ဝဏ္ဏာ အက္ခရာ ဌာနကရဏသမ္ပဒံ ကဏ္ဌတာလုမုဒ္ဓဒန္တဩဋ္ဌနာသိကာဘေဒံ ဌာနသမ္ပဒဉ္စ အက္ခရုပ္ပတ္တိသာဓကတမဇိဝှာမဇ္ဈာဒိကရဏသမ္ပဒဉ္စ အဟာပေန္တေန အပရိဟာပေန္တေန ဝတ္တဗ္ဗာတိ ယောဇနာ။ ကသ္မာ ဣဒမေဝ ဒဠှံ ကတွာ ဝုတ္တန္တိ အာဟ ‘‘ဧကဝဏ္ဏဝိနာသေနာ’’တိအာဒိ။ ဟိ-သဒ္ဒေါ ယသ္မာ-ပဒတ္ထေ၊ ယသ္မာ ဧကဿာပိ ဝဏ္ဏဿ ဝိနာသေန အနုစ္စာရဏေန ဝါ ဒုရုစ္စာရဏေန ဝါ ပဗ္ဗဇ္ဇာ န ရုဟတိ၊ တသ္မာ ဧဝံ ဝုတ္တန္တိ အဓိပ္ပာယော။

၂၄၇၀။ ယဒိ သိဒ္ဓါတိ သာသင်္ကဝစနေန ဥဘတောဥစ္စာရဏသုဒ္ဓိယာ ဒုက္ကရတ္တံ ဒီပေတွာ ‘‘အပ္ပမတ္တေဟိ ဘဝိတဗ္ဗ’’န္တိ ဥဘိန္နံ အာစရိယန္တေဝါသိကာနံ အနုသိဋ္ဌိ ဒိန္နာ ဟောတိ။ သရဏဂမနတောဝါတိ အဝဓာရဏေန သာမဏေရပဗ္ဗဇ္ဇာ ဥပသမ္ပဒါ ဝိယ ဉတ္တိစတုတ္ထေန ကမ္မေန န ဟောတိ၊ ဣဒါနိပိ သရဏဂမနေနေဝ သိဇ္ဈတီတိ ဒီပေတိ။ ဟိ-သဒ္ဒေါ ပသိဒ္ဓိယံ။ ယထာဟ –

‘‘ယသ္မာ သရဏဂမနေန ဥပသမ္ပဒါ ပရတော ပဋိက္ခိတ္တာ၊ တသ္မာ သာ ဧတရဟိ သရဏဂမနမတ္တေနေဝ န ရုဟတိ။ သာမဏေရဿ ပဗ္ဗဇ္ဇာ ပန ယသ္မာ ပရတောပိ ‘အနုဇာနာမိ၊ ဘိက္ခဝေ၊ ဣမေဟိ တီဟိ သရဏဂမနေဟိ သာမဏေရပဗ္ဗဇ္ဇ’န္တိ (မဟာဝ။ ၁၀၅) အနုညာတာ ဧဝ၊ တသ္မာ သာ ဧတရဟိပိ သရဏဂမနမတ္တေနေဝ ရုဟတီ’’တိ (မဟာဝ။ အဋ္ဌ။ ၃၄)။

သရဏဂမနတော ဧဝ ပဗ္ဗဇ္ဇာ ယဒိပိ ကိဉ္စာပိ သိဒ္ဓါ နိပ္ဖန္နာ၊ တထာပိ အဿ သာမဏေရဿ ‘‘ဣဒဉ္စိဒဉ္စ မယာ ပူရေတဗ္ဗံ သီလ’’န္တိ ဉတွာ ပရိပူရဏတ္ထာယ ဘိက္ခုနာ ဒသ သီလာနိ ဒါတဗ္ဗာနီတိ ယောဇနာ။ ယထာဟ ‘‘အနုဇာနာမိ၊ ဘိက္ခဝေ၊ သာမဏေရာနံ ဒသ သိက္ခာပဒါနိ၊ တေသု စ သာမဏေရေဟိ သိက္ခိတုံ။ ပါဏာတိပါတာ ဝေရမဏီ’’တိအာဒိ (မဟာဝ။ ၁၀၆)။

ပဗ္ဗဇ္ဇာကထာဝဏ္ဏနာ။

၂၄၇၁။ ဥပဇ္ဈာယန္တိ ဝဇ္ဇာဝဇ္ဇေ ဥပနိဇ္ဈာယတီတိ ဥပဇ္ဈာယော၊ တံ၊ ဘဂဝတာ ဝုတ္တေဟိ အင်္ဂေဟိ သမန္နာဂတော ပရိပုဏ္ဏဒသဝဿော ပုဂ္ဂလော။ နိဝါသေတွာ စ ပါရုပိတွာ စ သိရသိ အဉ္ဇလိံ ပဂ္ဂဟေတွာ အတ္တနော အဘိမုခေ ဥက္ကုဋိကံ နိသီဒိတွာ ‘‘ဥပဇ္ဈာယော မေ၊ ဘန္တေ၊ ဟောဟီ’’တိ တိက္ခတ္တုံ ဝတွာ အာယာစနာယ ကတာယ ‘‘သာဟု၊ လဟု၊ ဩပါယိကံ၊ ပဋိရူပံ၊ ပါသာဒိကေန သမ္ပာဒေဟီ’’တိ ဣမေသု ပဉ္စသု ပဒေသု အညတရံ ကာယေန ဝါ ဝါစာယ ဝါ ဥဘယေန ဝါ ဝိညာပေတွာ တသ္မိံ သမ္ပဋိစ္ဆိတေ ပိတုဋ္ဌာနေ ဌတွာ အတြဇမိဝ တံ ဂဟေတွာ ဝဇ္ဇာဝဇ္ဇံ ဥပပရိက္ခိတွာ ဒေါသေန နိဂ္ဂဏှိတွာ သဒ္ဓိဝိဟာရိကေ သိက္ခာပေန္တော ဥပဇ္ဈာယော နာမ။

ဝိဇ္ဇာသိပ္ပံ၊ အာစာရသမာစာရံ ဝါ သိက္ခိတုကာမေဟိ အာဒရေန စရိတဗ္ဗော ဥပဋ္ဌာတဗ္ဗောတိ အာစရိယော၊ တံ၊ ဥပဇ္ဈာယေ ဝုတ္တလက္ခဏသမန္နာဂတောယေဝ ပုဂ္ဂလော။ ဝုတ္တနယေနေဝ နိသီဒိတွာ ‘‘အာစရိယော မေ၊ ဘန္တေ၊ ဟောဟိ၊ အာယသ္မတော နိဿာယ ဝစ္ဆာမီ’’တိ တိက္ခတ္တုံ ဝတွာ အာယာစနာယ ကတာယ ‘‘သာဟူ’’တိအာဒီသု ပဉ္စသု အညတရံ ဝတွာ တသ္မိံ သမ္ပဋိစ္ဆိတေ ပိတုဋ္ဌာနေ ဌတွာ ပုတ္တဋ္ဌာနိယံ အန္တေဝါသိံ သိက္ခာပေန္တော အာစရိယော နာမ။

ဧတ္ထ စ သာဟူတိ သာဓု။ လဟူတိ အဂရု၊ မမ တုယှံ ဥပဇ္ဈာယဘာဝေ ဘာရိယံ နတ္ထီတိ အတ္ထော။ ဩပါယိကန္တိ ဥပါယပဋိသံယုတ္တံ၊ တံ ဥပဇ္ဈာယဂ္ဂဟဏံ ဣမိနာ ဥပါယေန တွံ မေ ဣတော ပဋ္ဌာယ ဘာရော ဇာတောသီတိ ဝုတ္တံ ဟောတိ။ ပဋိရူပန္တိ အနုရူပံ တေ ဥပဇ္ဈာယဂ္ဂဟဏန္တိ အတ္ထော။ ပါသာဒိကေနာတိ ပသာဒါဝဟေန ကာယဝစီပယောဂေန။ သမ္ပာဒေဟီတိ တိဝိဓံ သိက္ခံ နိပ္ဖာဒေဟီတိ အတ္ထော။ ကာယေန ဝါတိ ဟတ္ထမုဒ္ဒါဒိံ ဒဿေန္တော ကာယေန ဝါ။ နာမဝိသေသံ ဝိနာ ပူရေတဗ္ဗဝတ္တာနံ သမတာယ ဥဘောပိ ဧကတော ဝုတ္တာ။

ဧတာနိ ဝတ္တာနိ ဥပဇ္ဈာယဿ သဒ္ဓိဝိဟာရိကေန၊ အာစရိယဿ အန္တေဝါသိကေနာပိ ဧဝမေဝ ကာတဗ္ဗာနေဝါတိ။ ဝသတာတိ ဝသန္တေန။ ပိယသီလေနာတိ ပိယံ သီလမေတဿာတိ ပိယသီလော၊ တေန၊ သီလံ ပရိပူရိတုကာမေနာတိ ဝုတ္တံ ဟောတိ။

၂၄၇၂-၃။ အာသနံ ပညပေတဗ္ဗန္တိ ဧတ္ထ ‘‘ကာလဿေဝ ဝုဋ္ဌာယ ဥပါဟနာ ဩမုဉ္စိတွာ ဧကံသံ ဥတ္တရာသင်္ဂံ ကရိတွာ’’တိ (မဟာဝ။ ၆၆) ဝုတ္တာ ပုဗ္ဗကိရိယာ ဝတ္တဗ္ဗာ။ အာသနံ ပညပေတဗ္ဗန္တိ ဒန္တကဋ္ဌခါဒနဋ္ဌာနံ သမ္မဇ္ဇိတွာ နိသီဒနတ္ထာယ အာသနံ ပညပေတဗ္ဗံ။ ဣမိနာ စ ယာဂုပါနဋ္ဌာနာဒီသုပိ အာသနာနိ ပညပေတဗ္ဗာနေဝါတိ ဒဿိတံ ဟောတိ။

ဒန္တကဋ္ဌံ ဒါတဗ္ဗန္တိ မဟန္တံ၊ မဇ္ဈိမံ၊ ခုဒ္ဒကန္တိ တီဏိ ဒန္တကဋ္ဌာနိ ဥပနေတွာ တတော ယံ တီဏိ ဒိဝသာနိ ဂဏှာတိ၊ စတုတ္ထဒိဝသတော ပဋ္ဌာယ တာဒိသမေဝ ဒါတဗ္ဗံ။ သစေ အနိယမံ ကတွာ ယံ ဝါ တံ ဝါ ဂဏှာတိ၊ အထ ယာဒိသံ လဘတိ၊ တာဒိသံ ဒါတဗ္ဗံ။

မုခေါဒကံ ဒါတဗ္ဗန္တိ မုခဓောဝနောဒကံ မုခေါဒကန္တိ မဇ္ဈေပဒလောပီသမာသော၊ တံ ဒေန္တေန သီတဉ္စ ဥဏှဉ္စ ဥဒကံ ဥပနေတွာ တတော ယံ တီဏိ ဒိဝသာနိ ဝဠဉ္ဇေတိ၊ စတုတ္ထဒိဝသတော ပဋ္ဌာယ တာဒိသမေဝ မုခဓောဝနောဒကံ ဒါတဗ္ဗံ။ သစေ အနိယမံ ကတွာ ယံ ဝါ တံ ဝါ ဂဏှာတိ၊ အထ ယာဒိသံ လဘတိ၊ တာဒိသံ ဒါတဗ္ဗံ။ သစေ ဒုဝိဓမ္ပိ ဝဠဉ္ဇေတိ၊ ဒုဝိဓမ္ပိ ဥပနေတဗ္ဗံ။ ‘‘မုခေါဒကံ မုခဓောဝနဋ္ဌာနေ ဌပေတွာ အဝသေသဋ္ဌာနာနိ သမ္မဇ္ဇိတဗ္ဗာနိ။ သမ္မဇ္ဇန္တေန စ ဝစ္စကုဋိတော ပဋ္ဌာယ သမ္မဇ္ဇိတဗ္ဗံ။ ထေရေ ဝစ္စကုဋိံ ဂတေ ပရိဝေဏံ သမ္မဇ္ဇိတဗ္ဗံ၊ ဧဝံ ပရိဝေဏံ အသုညံ ဟောတီ’’တိ အဋ္ဌကထာယံ (မဟာဝ။ အဋ္ဌ။ ၆၄ အတ္ထတော သမာနံ) ဝုတ္တနယေနေဝ သမ္မဇ္ဇိတဗ္ဗံ။

တတော ဥတ္တရိံ ကတ္တဗ္ဗံ ဒဿေတုမာဟ ‘‘တဿ ကာလေနာ’’တိအာဒိ။ တဿာတိ ဥပဇ္ဈာယဿ ဝါ အာစရိယဿ ဝါ။ ကာလေနာတိ ယာဂုပါနကာလေ။ ဣဓာပိ ‘‘အာသနံ ပညပေတဗ္ဗ’’န္တိ သေသော။ ယထာဟ ‘‘ထေရေ ဝစ္စကုဋိတော အနိက္ခန္တေယေဝ အာသနံ ပညပေတဗ္ဗံ။ သရီရကိစ္စံ ကတွာ အာဂန္တွာ တသ္မိံ နိသိန္နဿ ‘သစေ ယာဂု ဟောတီ’တိအာဒိနာ နယေန ဝုတ္တံ ဝတ္တံ ကာတဗ္ဗ’’န္တိ (မဟာဝ။ အဋ္ဌ။ ၆၄)။

ယာဂု တဿုပနေတဗ္ဗာတိ ဧတ္ထ ‘‘ဘာဇနံ ဓောဝိတွာ’’တိ သေသော။ ယထာဟ – ‘‘ဘာဇနံ ဓောဝိတွာ ယာဂု ဥပနာမေတဗ္ဗာ’’တိ (မဟာဝ။ ၆၆)။ သင်္ဃတော ဝါတိ သလာကာဒိဝသေန သင်္ဃတော လဗ္ဘမာနာ ဝါ။ ကုလတောပိ ဝါတိ ဥပါသကာဒိကုလတော ဝါ။

‘‘ပတ္တေ ဝတ္တဉ္စ ကာတဗ္ဗ’’န္တိ ဣဒံ ‘‘ယာဂုံ ပီတဿ ဥဒကံ ဒတွာ ဘာဇနံ ပဋိဂ္ဂဟေတွာ နီစံ ကတွာ သာဓုကံ အပ္ပဋိဃံသန္တေန ဓောဝိတွာ ပဋိသာမေတဗ္ဗံ၊ ဥပဇ္ဈာယမှိ ဝုဋ္ဌိတေ အာသနံ ဥဒ္ဓရိတဗ္ဗံ ။ သစေ သော ဒေသော ဥက္လာပေါ ဟောတိ၊ သော ဒေသော သမ္မဇ္ဇိတဗ္ဗော’’တိ (မဟာဝ။ ၆၆) အာဂတဝတ္တံ သန္ဓာယာဟ။ ဒိဝါ ဘုတ္တပတ္တေပိ ကာတဗ္ဗံ ဧတေနေဝ ဒဿိတံ ဟောတိ။

ဝတ္တံ ‘‘ဂါမပ္ပဝေသနေ’’တိ ဣဒံ ‘‘သစေ ဥပဇ္ဈာယော ဂါမံ ပဝိသိတုကာမော ဟောတိ၊ နိဝါသနံ ဒါတဗ္ဗံ၊ ပဋိနိဝါသနံ ပဋိဂ္ဂဟေတဗ္ဗ’’န္တိအာဒိနယပ္ပဝတ္တံ (မဟာဝ။ ၆၆) ဝတ္တံ သန္ဓာယာဟ။ ‘‘ကာတဗ္ဗ’’န္တိ ဣဒံ သဗ္ဗပဒေဟိ ယောဇေတဗ္ဗံ။

၂၄၇၄။ စီဝရေ ယာနိ ဝတ္တာနီတိ ဂါမံ ပဝိသိတုကာမဿ စီဝရဒါနေ၊ ပဋိနိဝတ္တဿ စီဝရဂ္ဂဟဏသင်္ဃရဏပဋိသာမနေသု မဟေသိနာ ယာနိ ဝတ္တာနိ ဝုတ္တာနိ၊ တာနိ စ ကာတဗ္ဗာနိ။ သေနာသနေ တထာတိ ‘‘ယသ္မိံ ဝိဟာရေ ဥပဇ္ဈာယော ဝိဟရတီ’’တိအာဒိနာ (မဟာဝ။ ၆၆) ဝုတ္တနယေန ‘‘သေနာသနေ ကတ္တဗ္ဗ’’န္တိ ဒဿိတံ သေနာသနဝတ္တဉ္စ။

ပါဒပီဌကထလိကာဒီသု တထာတိ ယောဇနာ။ ဥပဇ္ဈာယေ ဂါမတော ပဋိနိဝတ္တေ စ ဇန္တာဃရေ စ ‘‘ပါဒေါဒကံ ပါဒပီဌံ ပါဒကထလိကံ ဥပနိက္ခိပိတဗ္ဗ’’န္တိ (မဟာဝ။ ၆၆) ဧဝမာဂတံ ဝတ္တဉ္စ ကာတဗ္ဗံ။ အာဒိ-သဒ္ဒေန ‘‘ဥပဇ္ဈာယော ပါနီယေန ပုစ္ဆိတဗ္ဗော’’တိအာဒိဝတ္တံ (မဟာဝ။ ၆၆) သင်္ဂဏှာတိ။

၂၄၇၅။ ဧဝံ သဗ္ဗတ္ထ ဝတ္တေသု ပါဋိယေက္ကံ ဒဿိယမာနေသု ပပဉ္စောတိ ခန္ဓကံ ဩလောကေတွာ သုခဂ္ဂဟဏတ္ထာယ ဂဏနံ ဒဿေတုကာမော အာဟ ‘‘ဧဝမာဒီနီ’’တိအာဒိ။ ရောဂတော ဝုဋ္ဌာနာဂမနန္တာနီတိ အာစရိယုပဇ္ဈာယာနံ ရောဂတော ဝုဋ္ဌာနာဂမနပရိယောသာနာနိ။ သတ္တတိံသသတံ သိယုန္တိ သတ္တတိံသာဓိကသတဝတ္တာနီတိ အတ္ထော။

တာနိ ပန ဝတ္တာနိ ခန္ဓကပါဠိယာ (မဟာဝ။ ၆၆) အာဂတက္ကမေန ဧဝံ ယထာဝုတ္တဂဏနာယ သမာနေတဗ္ဗာနိ – ဒန္တကဋ္ဌဒါနံ၊ မုခေါဒကဒါနံ၊ အာသနပညာပနံ၊ သစေ ယာဂု ဟောတိ၊ ဘာဇနံ ဓောဝိတွာ ယာဂုယာ ဥပနာမနံ၊ ယာဂုံ ပီတဿ ဥဒကံ ဒတွာ ဘာဇနံ ပဋိဂ္ဂဟေတွာ နီစံ ကတွာ သာဓုကံ အပ္ပဋိဃံသန္တေန ဓောဝိတွာ ပဋိသာမနံ၊ ဥပဇ္ဈာယမှိ ဝုဋ္ဌိတေ အာသနဿ ဥဒ္ဓရဏံ၊ သစေ သော ဒေသော ဥက္လာပေါ ဟောတိ၊ တဿ သမ္မဇ္ဇနံ၊ သစေ ဥပဇ္ဈာယော ဂါမံ ပဝိသိတုကာမော ဟောတိ၊ တဿ နိဝါသနဒါနံ၊ ပဋိနိဝါသနပဋိဂ္ဂဟဏံ၊ ကာယဗန္ဓနဒါနံ၊ သဂုဏံ ကတွာ သင်္ဃာဋိဒါနံ၊ ဓောဝိတွာ သောဒကပတ္တဿ ဒါနံ၊ သစေ ဥပဇ္ဈာယော ပစ္ဆာသမဏံ အာကင်္ခတိ၊ တိမဏ္ဍလံ ပဋိစ္ဆာဒေန္တေန ပရိမဏ္ဍလံ နိဝါသေတွာ ကာယဗန္ဓနံ ဗန္ဓိတွာ သဂုဏံ ကတွာ သင်္ဃာဋိယော ပါရုပိတွာ ဂဏ္ဌိကံ ပရိမုဉ္စိတွာ ဓောဝိတွာ ပတ္တံ ဂဟေတွာ ဥပဇ္ဈာယဿ ပစ္ဆာသမဏေန ဂမနံ၊ နာတိဒူရနစ္စာသန္နေ ဂမနံ၊ ပတ္တပရိယာပန္နဿ ပဋိဂ္ဂဟဏံ၊ န ဥပဇ္ဈာယဿ ဘဏမာနဿ အန္တရန္တရာ ကထာဩပါတနံ၊ ဥပဇ္ဈာယဿ အာပတ္တိသာမန္တာ ဘဏမာနဿ စ နိဝါရဏံ၊ နိဝတ္တန္တေန ပဌမတရံ အာဂန္တွာ အာသနပညာပနံ၊ ပါဒေါဒကပါဒပီဌပါဒကထလိကာနံ ဥပနိက္ခိပနံ၊ ပစ္စုဂ္ဂန္တွာ ပတ္တစီဝရပဋိဂ္ဂဟဏံ၊ ပဋိနိဝါသနဒါနံ၊ နိဝါသနပဋိဂ္ဂဟဏံ၊ သစေ စီဝရံ သိန္နံ ဟောတိ၊ မုဟုတ္တံ ဥဏှေ ဩတာပနံ၊ နေဝ ဥဏှေ စီဝရဿ နိဒဟနံ၊ မဇ္ဈေ ယထာ ဘင်္ဂေါ န ဟောတိ၊ ဧဝံ စတုရင်္ဂုလံ ကဏ္ဏံ ဥဿာရေတွာ စီဝရဿ သင်္ဃရဏံ၊ ဩဘောဂေ ကာယဗန္ဓနဿ ကရဏံ၊ သစေ ပိဏ္ဍပါတော ဟောတိ၊ ဥပဇ္ဈာယော စ ဘုဉ္ဇိတုကာမော ဟောတိ၊ ဥဒကံ ဒတွာ ပိဏ္ဍပါတဿ ဥပနာမနံ၊ ဥပဇ္ဈာယဿ ပါနီယေန ပုစ္ဆနံ၊ ဘုတ္တာဝိဿ ဥဒကံ ဒတွာ ပတ္တံ ပဋိဂ္ဂဟေတွာ နီစံ ကတွာ သာဓုကံ အပ္ပဋိဃံသန္တေန ဓောဝိတွာ ဝေါဒကံ ကတွာ မုဟုတ္တံ ဥဏှေ ဩတာပနံ၊ န စ ဥဏှေ ပတ္တဿ နိဒဟနံ၊ ပတ္တစီဝရံ နိက္ခိပိတဗ္ဗံ –

ပတ္တံ နိက္ခိပန္တေန ဧကေန ဟတ္ထေန ပတ္တံ ဂဟေတွာ ဧကေန ဟတ္ထေန ဟေဋ္ဌာမဉ္စံ ဝါ ဟေဋ္ဌာပီဌံ ဝါ ပရာမသိတွာ ပတ္တဿ နိက္ခိပနံ၊ န စ အနန္တရဟိတာယ ဘူမိယာ ပတ္တဿ နိက္ခိပနံ၊ စီဝရံ နိက္ခိပန္တေန ဧကေန ဟတ္ထေန စီဝရံ ဂဟေတွာ ဧကေန ဟတ္ထေန စီဝရဝံသံ ဝါ စီဝရရဇ္ဇုံ ဝါ ပမဇ္ဇိတွာ ပါရတော အန္တံ ဩရတော ဘောဂံ ကတွာ စီဝရဿ နိက္ခိပနံ၊ ဥပဇ္ဈာယမှိ ဝုဋ္ဌိတေ အာသနဿ ဥဒ္ဓရဏံ၊ ပါဒေါဒကပါဒပီဌပါဒကထလိကာနံ ပဋိသာမနံ၊ သစေ သော ဒေသော ဥက္လာပေါ ဟောတိ၊ တဿ သမ္မဇ္ဇနံ၊ သစေ ဥပဇ္ဈာယော နှာယိတုကာမော ဟောတိ၊ နှာနဿ ပဋိယာဒနံ၊ သစေ သီတေန အတ္ထော ဟောတိ၊ သီတဿ သစေ ဥဏှေန အတ္ထော ဟောတိ၊ ဥဏှဿ ပဋိယာဒနံ၊ သစေ ဥပဇ္ဈာယော ဇန္တာဃရံ ပဝိသိတုကာမော ဟောတိ၊ စုဏ္ဏဿ သန္နယနံ၊ မတ္တိကာတေမနံ၊ ဇန္တာဃရပီဌံ အာဒါယ ဥပဇ္ဈာယဿ ပိဋ္ဌိတော ပိဋ္ဌိတော ဂန္တွာ ဇန္တာဃရပီဌံ ဒတွာ စီဝရံ ပဋိဂ္ဂဟေတွာ ဧကမန္တံ နိက္ခိပနံ၊ စုဏ္ဏဒါနံ၊ မတ္တိကာဒါနံ၊ သစေ ဥဿဟတိ၊ ဇန္တာဃရံ ပဝိသိတဗ္ဗံ –

ဇန္တာဃရံ ပဝိသန္တေန မတ္တိကာယ မုခံ မက္ခေတွာ ပုရတော စ ပစ္ဆတော စ ပဋိစ္ဆာဒေတွာ ဇန္တာဃရပ္ပဝေသော၊ န ထေရာနံ ဘိက္ခူနံ အနုပခဇ္ဇ နိသီဒနံ၊ န နဝါနံ ဘိက္ခူနံ အာသနေန ပဋိဗာဟနံ၊ ဇန္တာဃရေ ဥပဇ္ဈာယဿ ပရိကမ္မဿ ကရဏံ၊ ဇန္တာဃရာ နိက္ခမန္တေန ဇန္တာဃရပီဌံ အာဒါယ ပုရတော စ ပစ္ဆတော စ ပဋိစ္ဆာဒေတွာ ဇန္တာဃရာ နိက္ခမနံ၊ ဥဒကေပိ ဥပဇ္ဈာယဿ ပရိကမ္မကရဏံ၊ နှာတေန ပဌမတရံ ဥတ္တရိတွာ အတ္တနော ဂတ္တံ ဝေါဒကံ ကတွာ နိဝါသေတွာ ဥပဇ္ဈာယဿ ဂတ္တတော ဥဒကဿ ပမဇ္ဇနံ၊ နိဝါသနဒါနံ၊ သင်္ဃာဋိဒါနံ၊ ဇန္တာဃရပီဌံ အာဒါယ ပဌမတရံ အာဂန္တွာ အာသနဿ ပညာပနံ၊ ပါဒေါဒကပါဒပီဌပါဒကထလိကာနံ ဥပနိက္ခိပနံ၊ ဥပဇ္ဈာယဿ ပါနီယေန ပုစ္ဆနံ၊ သစေ ဥဒ္ဒိသာပေတုကာမော ဟောတိ၊ ဥဒ္ဒိသာပနံ၊ သစေ ပရိပုစ္ဆိတုကာမော ဟောတိ၊ ပရိပုစ္ဆနံ၊ ယသ္မိံ ဝိဟာရေ ဥပဇ္ဈာယော ဝိဟရတိ၊ သစေ သော ဝိဟာရော ဥက္လာပေါ ဟောတိ၊ သစေ ဥဿဟတိ၊ တဿ သောဓနံ၊ ဝိဟာရံ သောဓေန္တေန ပဌမံ ပတ္တစီဝရဿ နီဟရိတွာ ဧကမန္တံ နိက္ခိပနံ၊ နိသီဒနပစ္စတ္ထရဏဿ နီဟရိတွာ ဧကမန္တံ နိက္ခိပနံ၊ ဘိသိဗိဗ္ဗောဟနဿ နီဟရိတွာ ဧကမန္တံ နိက္ခိပနံ၊ မဉ္စဿ နီစံ ကတွာ သာဓုကံ အပ္ပဋိဃံသန္တေန အသင်္ဃဋ္ဋေန္တေန ကဝါဋပီဌံ နီဟရိတွာ ဧကမန္တံ နိက္ခိပနံ၊ ပီဌဿ နီစံ ကတွာ သာဓုကံ အပ္ပဋိဃံသန္တေန အသင်္ဃဋ္ဋေန္တေန ကဝါဋပီဌံ နီဟရိတွာ ဧကမန္တံ နိက္ခိပနံ၊ မဉ္စပဋိပါဒကာနံ နီဟရိတွာ ဧကမန္တံ နိက္ခိပနံ၊ ခေဠမလ္လကဿ နီဟရိတွာ ဧကမန္တံ နိက္ခိပနံ၊ အပဿေနဖလကဿ နီဟရိတွာ ဧကမန္တံ နိက္ခိပနံ၊ ဘူမတ္ထရဏဿ ယထာပညတ္တဿ သလ္လက္ခေတွာ နီဟရိတွာ ဧကမန္တံ နိက္ခိပနံ ၊ သစေ ဝိဟာရေ သန္တာနကံ ဟောတိ၊ ဥလ္လောကာ ပဌမံ ဩဟာရဏံ၊ အာလောကသန္ဓိကဏ္ဏဘာဂါနံ ပမဇ္ဇနံ၊ သစေ ဂေရုကပရိကမ္မကတာ ဘိတ္တိ ကဏ္ဏကိတာ ဟောတိ၊ စောဠကံ တေမေတွာ ပီဠေတွာ ပမဇ္ဇနံ၊ သစေ ကာဠဝဏ္ဏကတာ ဘူမိ ကဏ္ဏကိတာ ဟောတိ၊ စောဠကံ တေမေတွာ ပီဠေတွာ ပမဇ္ဇနံ၊ သစေ အကတာ ဟောတိ ဘူမိ၊ ဥဒကေန ပရိပ္ဖောသိတွာ ပမဇ္ဇနံ ‘‘မာ ဝိဟာရော ရဇေန ဥဟညီ’’တိ၊ သင်္ကာရံ ဝိစိနိတွာ ဧကမန္တံ ဆဍ္ဍနံ၊ ဘူမတ္ထရဏဿ ဩတာပေတွာ သောဓေတွာ ပပ္ဖောဋေတွာ အတိဟရိတွာ ယထာပညတ္တံ ပညာပနံ၊ မဉ္စပဋိပါဒကာနံ ဩတာပေတွာ ပမဇ္ဇိတွာ အတိဟရိတွာ ယထာဋ္ဌာနေ ဌပနံ၊ မဉ္စဿ ဩတာပေတွာ သောဓေတွာ ပပ္ဖောဋေတွာ နီစံ ကတွာ သာဓုကံ အပ္ပဋိဃံသန္တေန အသင်္ဃဋ္ဋေန္တေန ကဝါဋပီဌံ အတိဟရိတွာ ယထာပညတ္တံ ပညာပနံ၊ ပီဌဿ ဩတာပေတွာ သောဓေတွာ ပပ္ဖောဋေတွာ နီစံ ကတွာ သာဓုကံ အပ္ပဋိဃံသန္တေန အသင်္ဃဋ္ဋေန္တေန ကဝါဋပီဌံ အတိဟရိတွာ ယထာပညတ္တံ ပညာပနံ၊ ဘိသိဗိဗ္ဗောဟနဿ ဩတာပေတွာ သောဓေတွာ ပပ္ဖောဋေတွာ အတိဟရိတွာ ယထာပညတ္တံ ပညာပနံ၊ နိသီဒနပစ္စတ္ထရဏဿ ဩတာပေတွာ သောဓေတွာ ပပ္ဖောဋေတွာ အတိဟရိတွာ ယထာပညတ္တံ ပညာပနံ၊ ခေဠမလ္လကဿ ဩတာပေတွာ ပမဇ္ဇိတွာ အတိဟရိတွာ ယထာဋ္ဌာနေ ဌပနံ၊ အပဿေနဖလကဿ ဩတာပေတွာ ပမဇ္ဇိတွာ အတိဟရိတွာ ယထာဋ္ဌာနေ ဌပနံ၊ ပတ္တစီဝရံ နိက္ခိပိတဗ္ဗံ –

ပတ္တံ နိက္ခိပန္တေန ဧကေန ဟတ္ထေန ပတ္တံ ဂဟေတွာ ဧကေန ဟတ္ထေန ဟေဋ္ဌာမဉ္စံ ဝါ ဟေဋ္ဌာပီဌံ ဝါ ပရာမသိတွာ ပတ္တဿ နိက္ခိပနံ၊ န စ အနန္တရဟိတာယ ဘူမိယာ ပတ္တဿ နိက္ခိပနံ၊ စီဝရံ နိက္ခိပန္တေန ဧကေန ဟတ္ထေန စီဝရံ ဂဟေတွာ ဧကေန ဟတ္ထေန စီဝရဝံသံ ဝါ စီဝရရဇ္ဇုံ ဝါ ပမဇ္ဇိတွာ ပါရတော အန္တံ ဩရတော ဘောဂံ ကတွာ စီဝရဿ နိက္ခိပနံ၊ သစေ ပုရတ္ထိမာယ သရဇာ ဝါတာ ဝါယန္တိ၊ ပုရတ္ထိမာနံ ဝါတပါနာနံ ထကနံ၊ တထာ ပစ္ဆိမာနံ၊ တထာ ဥတ္တရာနံ၊ တထာ ဒက္ခိဏာနံ ဝါတပါနာနံ ထကနံ၊ သစေ သီတကာလော ဟောတိ၊ ဒိဝါ ဝါတပါနာနံ ဝိဝရဏံ၊ ရတ္တိံ ထကနံ၊ သစေ ဥဏှကာလော ဟောတိ၊ ဒိဝါ ဝါတပါနာနံ ထကနံ၊ ရတ္တိံ ဝိဝရဏံ၊ သစေ ပရိဝေဏံ ဥက္လာပံ ဟောတိ၊ ပရိဝေဏဿ သမ္မဇ္ဇနံ၊ သစေ ကောဋ္ဌကော ဥက္လာပေါ ဟောတိ၊ ကောဋ္ဌကဿ သမ္မဇ္ဇနံ၊ သစေ ဥပဋ္ဌာနသာလာ ဥက္လာပါ ဟောတိ၊ တဿာ သမ္မဇ္ဇနံ၊ သစေ အဂ္ဂိသာလာ ဥက္လာပါ ဟောတိ၊ တဿာ သမ္မဇ္ဇနံ၊ သစေ ဝစ္စကုဋိ ဥက္လာပါ ဟောတိ၊ တဿာ သမ္မဇ္ဇနံ၊ သစေ ပါနီယံ န ဟောတိ၊ ပါနီယဿ ဥပဋ္ဌာပနံ၊ သစေ ပရိဘောဇနီယံ န ဟောတိ၊ ပရိဘောဇနီယဿ ဥပဋ္ဌာပနံ၊ သစေ အာစမနကုမ္ဘိယာ ဥဒကံ န ဟောတိ၊ အာစမနကုမ္ဘိယာ ဥဒကဿ အာသိဉ္စနံ၊ သစေ ဥပဇ္ဈာယဿ အနဘိရတိ ဥပ္ပန္နာ ဟောတိ၊ သဒ္ဓိဝိဟာရိကေန ဝူပကာသနံ ဝူပကာသာပနံ ဝါ၊ ဓမ္မကထာယ ဝါ တဿ ကရဏံ၊ သစေ ဥပဇ္ဈာယဿ ကုက္ကုစ္စံ ဥပ္ပန္နံ ဟောတိ၊ သဒ္ဓိဝိဟာရိကေန ဝိနောဒနံ ဝိနောဒါပနံ ဝါ၊ ဓမ္မကထာယ ဝါ တဿ ကရဏံ၊ သစေ ဥပဇ္ဈာယဿ ဒိဋ္ဌိဂတံ ဥပ္ပန္နံ ဟောတိ၊ သဒ္ဓိဝိဟာရိကေန ဝိဝေစနံ ဝိဝေစာပနံ ဝါ၊ ဓမ္မကထာယ ဝါ တဿ ကရဏံ၊ သစေ ဥပဇ္ဈာယော ဂရုဓမ္မံ အဇ္ဈာပန္နော ဟောတိ ပရိဝါသာရဟော၊ သဒ္ဓိဝိဟာရိကေန ဥဿုက္ကကရဏံ ‘‘ကိန္တိ နု ခေါ သင်္ဃော ဥပဇ္ဈာယဿ ပရိဝါသံ ဒဒေယျာ’’တိ၊ သစေ ဥပဇ္ဈာယော မူလာယပဋိကဿနာရဟော ဟောတိ၊ သဒ္ဓိဝိဟာရိကေန ဥဿုက္ကကရဏံ ‘‘ကိန္တိ နု ခေါ သင်္ဃော ဥပဇ္ဈာယံ မူလာယ ပဋိကဿေယျာ’’တိ၊ သစေ ဥပဇ္ဈာယော မာနတ္တာရဟော ဟောတိ၊ သဒ္ဓိဝိဟာရိကေန ဥဿုက္ကကရဏံ ‘‘ကိန္တိ နု ခေါ သင်္ဃော ဥပဇ္ဈာယဿ မာနတ္တံ ဒဒေယျာ’’တိ၊ သစေ ဥပဇ္ဈာယော အဗ္ဘာနာရဟော ဟောတိ၊ သဒ္ဓိဝိဟာရိကေန ဥဿုက္ကကရဏံ ‘‘ကိန္တိ နု ခေါ သင်္ဃော ဥပဇ္ဈာယံ အဗ္ဘေယျာ’’တိ၊ သစေ သင်္ဃော ဥပဇ္ဈာယဿ ကမ္မံ ကတ္တုကာမော ဟောတိ တဇ္ဇနီယံ ဝါ နိယဿံ ဝါ ပဗ္ဗာဇနီယံ ဝါ ပဋိသာရဏီယံ ဝါ ဥက္ခေပနီယံ ဝါ၊ သဒ္ဓိဝိဟာရိကေန ဥဿုက္ကကရဏံ ‘‘ကိန္တိ နု ခေါ သင်္ဃော ဥပဇ္ဈာယဿ ကမ္မံ န ကရေယျ၊ လဟုကာယ ဝါ ပရိဏာမေယျာ’’တိ၊ ကတံ ဝါ ပနဿ ဟောတိ သင်္ဃေန ကမ္မံ တဇ္ဇနီယံ ဝါ နိယဿံ ဝါ ပဗ္ဗာဇနီယံ ဝါ ပဋိသာရဏီယံ ဝါ ဥက္ခေပနီယံ ဝါ၊ သဒ္ဓိဝိဟာရိကေန ဥဿုက္ကကရဏံ ‘‘ကိန္တိ နု ခေါ ဥပဇ္ဈာယော သမ္မာ ဝတ္တေယျ၊ လောမံ ပါတေယျ၊ နေတ္ထာရံ ဝတ္တေယျ၊ သင်္ဃော တံ ကမ္မံ ပဋိပ္ပဿမ္ဘေယျာ’’တိ၊ သစေ ဥပဇ္ဈာယဿ စီဝရံ ဓောဝိတဗ္ဗံ ဟောတိ ၊ သဒ္ဓိဝိဟာရိကေန ဓောဝနံ ဥဿုက္ကကရဏံ ဝါ ‘‘ကိန္တိ နု ခေါ ဥပဇ္ဈာယဿ စီဝရံ ဓောဝိယေထာ’’တိ၊ သစေ ဥပဇ္ဈာယဿ စီဝရံ ကာတဗ္ဗံ ဟောတိ၊ သဒ္ဓိဝိဟာရိကေန ကရဏံ ဥဿုက္ကကရဏံ ဝါ ‘‘ကိန္တိ နု ခေါ ဥပဇ္ဈာယဿ စီဝရံ ကရိယေထာ’’တိ၊ သစေ ဥပဇ္ဈာယဿ ရဇနံ ပစိတဗ္ဗံ ဟောတိ၊ သဒ္ဓိဝိဟာရိကေန ပစနံ ဥဿုက္ကကရဏံ ဝါ ‘‘ကိန္တိ နု ခေါ ဥပဇ္ဈာယဿ ရဇနံ ပစိယေထာ’’တိ၊ သစေ ဥပဇ္ဈာယဿ စီဝရံ ရဇေတဗ္ဗံ ဟောတိ၊ သဒ္ဓိဝိဟာရိကေန ရဇနံ ဥဿုက္ကကရဏံ ဝါ ‘‘ကိန္တိ နု ခေါ ဥပဇ္ဈာယဿ စီဝရံ ရဇိယေထာ’’တိ၊ စီဝရံ ရဇန္တေန သာဓုကံ သမ္ပရိဝတ္တကံ သမ္ပရိဝတ္တကံ ရဇနံ၊ န စ အစ္ဆိန္နေ ထေဝေ ပက္ကမနံ၊ ဥပဇ္ဈာယံ အနာပုစ္ဆာ န ဧကစ္စဿ ပတ္တဒါနံ၊ န ဧကစ္စဿ ပတ္တပဋိဂ္ဂဟဏံ၊ န ဧကစ္စဿ စီဝရဒါနံ၊ န ဧကစ္စဿ စီဝရပဋိဂ္ဂဟဏံ၊ န ဧကစ္စဿ ပရိက္ခာရဒါနံ၊ န ဧကစ္စဿ ပရိက္ခာရပဋိဂ္ဂဟဏံ၊ န ဧကစ္စဿ ကေသစ္ဆေဒနံ၊ န ဧကစ္စေန ကေသာနံ ဆေဒါပနံ၊ န ဧကစ္စဿ ပရိကမ္မကရဏံ၊ န ဧကစ္စေန ပရိကမ္မဿ ကာရာပနံ၊ န ဧကစ္စဿ ဝေယျာဝစ္စကရဏံ၊ န ဧကစ္စေန ဝေယျာဝစ္စဿ ကာရာပနံ၊ န ဧကစ္စဿ ပစ္ဆာသမဏေန ဂမနံ၊ န ဧကစ္စဿ ပစ္ဆာသမဏဿ အာဒါနံ၊ န ဧကစ္စဿ ပိဏ္ဍပါတဿ နီဟရဏံ၊ န ဧကစ္စေန ပိဏ္ဍပါတနီဟရာပနံ၊ န ဥပဇ္ဈာယံ အနာပုစ္ဆာ ဂါမပ္ပဝေသနံ၊ န သုသာနဂမနံ၊ န ဒိသာပက္ကမနံ၊ သစေ ဥပဇ္ဈာယော ဂိလာနော ဟောတိ၊ ယာဝဇီဝံ ဥပဋ္ဌာနံ၊ ဝုဋ္ဌာနမဿ အာဂမနန္တိ တေသု ကာနိစိ ဝတ္တာနိ သဝိဘတ္တိကာနိ၊ ကာနိစိ အဝိဘတ္တိကာနိ၊ တေသု အဝိဘတ္တိကာနံ ဝိဘာဂေ ဝုစ္စမာနေ ယထာဝုတ္တဂဏနာယ အတိရေကတရာနိ ဟောန္တိ၊ တံ ပန ဝိဘာဂံ အနာမသိတွာ ပိဏ္ဍဝသေန ဂဟေတွာ ယထာ အယံ ဂဏနာ ဒဿိတာတိ ဝေဒိတဗ္ဗာ။

၂၄၇၆။ အကရောန္တဿာတိ ဧတ္ထ ‘‘ဝတ္တ’’န္တိ သေသော။ အနာဒရဝသေနေဝ ဝတ္တံ အကရောန္တဿ ဘိက္ခုနော တေန ဝတ္တဘေဒေန ဝတ္တာကရဏေန သဗ္ဗတ္ထ သတ္တတိံသာဓိကသတပ္ပဘေဒဋ္ဌာနေ တတ္တကံယေဝ ဒုက္ကဋံ ပကာသိတန္တိ ယောဇနာ။

ဥပဇ္ဈာယာစရိယဝတ္တကထာဝဏ္ဏနာ။

၂၄၇၇။ ဧဝံ ဥပဇ္ဈာယာစရိယဝတ္တာနိ သင်္ခေပေန ဒဿေတွာ ဥပဇ္ဈာယာစရိယေဟိ သဒ္ဓိဝိဟာရိကန္တေဝါသီနံ ကာတဗ္ဗဝတ္တာနိ ဒဿေတုမာဟ ‘‘ဥပဇ္ဈာယဿ ဝတ္တာနီ’’တိအာဒိ။ ဥပဇ္ဈာယဿ ဝတ္တာနီတိ ဥပဇ္ဈာယေန သဒ္ဓိဝိဟာရိကဿ ယုတ္တပတ္တကာလေ ကတ္တဗ္ဗတ္တာ ဥပဇ္ဈာယာယတ္တဝတ္တာနီတိ အတ္ထော။ တထာ သဒ္ဓိဝိဟာရိကေတိ ယထာ သဒ္ဓိဝိဟာရိကေန ဥပဇ္ဈာယဿ ကာတဗ္ဗာနိ၊ တထာ ဥပဇ္ဈာယေန သဒ္ဓိဝိဟာရိကေ ကာတဗ္ဗာနိ။

ဥပဇ္ဈာယာစရိယဝတ္တေသု ဂါမပ္ပဝေသေ ပစ္ဆာသမဏေန ဟုတွာ နာတိဒူရနစ္စာသန္နဂမနံ၊ န အန္တရန္တရာ ကထာဩပါတနံ၊ အာပတ္တိသာမန္တာ ဘဏမာနဿ နိဝါရဏံ၊ ပတ္တပရိယာပန္နပဋိဂ္ဂဟဏန္တိ စတ္တာရိ ဝတ္တာနိ၊ န ဧကစ္စဿ ပတ္တဒါနာဒိအနာပုစ္ဆာဒိသာပက္ကမနာဝသာနာနိ ဝီသတိ ပဋိက္ခေပါ စေတိ ဧတာနိ စတုဝီသတိ ဝတ္တာနိ ဌပေတွာ အဝသေသာနိ တေရသာဓိကသတဝတ္တာနိ သန္ဓာယာဟ ‘‘သတံ တေရသ ဟောန္တေဝါ’’တိ၊ တေရသာဓိကသတဝတ္တာနိ ဟောန္တီတိ အတ္ထော။ အာစရိယေန အန္တေဝါသိကေပိ စ ကာတဗ္ဗဝတ္တာနိ တထာ တတ္တကာနေဝါတိ အတ္ထော။

သဒ္ဓိဝိဟာရိကန္တေဝါသိကဝတ္တကထာဝဏ္ဏနာ။

၂၄၇၈။ ဥပဇ္ဈာယာစရိယေဟိ သဒ္ဓိဝိဟာရိကန္တေဝါသိကာနံ နိဿယပဋိပ္ပဿဒ္ဓိပ္ပကာရံ ဒဿေတုမာဟ ‘‘ပက္ကန္တေ ဝါပီ’’တိအာဒိ။ ပက္ကန္တေ ဝါပိ ဝိဗ္ဘန္တေ ဝါပိ ပက္ခသင်္ကန္တေ ဝါပိ မတေ ဝါပိ အာဏတ္တိယာ ဝါပိ ဧဝံ ပဉ္စဓာ ဥပဇ္ဈာယာ သဒ္ဓိဝိဟာရိကေန ဂဟိတော နိဿယော ပဋိပ္ပဿမ္ဘတီတိ ယောဇနာ။ ပက္ကန္တေတိ တဒဟု အပစ္စာဂန္တုကာမတာယ ဒိသံ ဂတေ။ ဝိဗ္ဘန္တေတိ ဂိဟိဘာဝံ ပတ္တေ။ ပက္ခသင်္ကန္တကေတိ တိတ္ထိယာယတနံ ဂတေ။ မတေတိ ကာလကတေ။ အာဏတ္တိယာတိ နိဿယပဏာမနေန။

၂၄၇၉-၈၀။ အာစရိယမှာပိ အန္တေဝါသိကေန ဂဟိတနိဿယဿ ဘေဒနံ ဆဓာ ဆပ္ပကာရေန ဟောတီတိ ယောဇနာ။ ကထန္တိ အာဟ ‘‘ပက္ကန္တေ စာ’’တိအာဒိ။ တံ ဥပဇ္ဈာယတော နိဿယဘေဒေ ဝုတ္တနယမေဝ။ ဝိသေသံ ပန သယမေဝ ဝက္ခတိ ‘‘အာဏတ္တိယ’’န္တိအာဒိနာ။ အာဏတ္တိယန္တိ ဧတ္ထ ဝိသေသတ္ထဇောတကော ပန-သဒ္ဒေါ လုတ္တနိဒ္ဒိဋ္ဌော။ ဥဘိန္နမ္ပိ ဓုရနိက္ခေပနေပိ စာတိ အာစရိယဿ နိဿယပဏာမနေ ပန ဥဘိန္နံ အာစရိယန္တေဝါသိကာနံယေဝ အညမညနိရာလယဘာဝေ သတိ နိဿယဘေဒေါ ဟောတိ၊ န ဧကဿာတိ အတ္ထော။ တမေဝတ္ထံ ဗျတိရေကတော ဒဠှီကရောတိ ‘‘ဧကေကဿာ’’တိအာဒိနာ။ ဧကေကဿ ဝါ ဥဘိန္နံ ဝါ အာလယေ သတိ န ဘိဇ္ဇတီတိ ယောဇနာ။ ယထာဟ –

‘‘အာဏတ္တိယံ ပန သစေပိ အာစရိယော မုဉ္စိတုကာမောဝ ဟုတွာ နိဿယပဏာမနာယ ပဏာမေတိ၊ အန္တေဝါသိကော စ ‘ကိဉ္စာပိ မံ အာစရိယော ပဏာမေတိ၊ အထ ခေါ ဟဒယေန မုဒုကော’တိ သာလယောဝ ဟောတိ၊ နိဿယော န ပဋိပ္ပဿမ္ဘတိယေဝ။ သစေပိ အာစရိယော သာလယော၊ အန္တေဝါသိကော နိရာလယော ‘န ဒါနိ ဣမံ နိဿာယ ဝသိဿာမီ’တိ ဓုရံ နိက္ခိပတိ၊ ဧဝမ္ပိ န ပဋိပ္ပဿမ္ဘတိ။ ဥဘိန္နံ သာလယဘာဝေ ပန န ပဋိပ္ပဿမ္ဘတိယေဝ။ ဥဘိန္နံ ဓုရနိက္ခေပေန ပဋိပ္ပဿမ္ဘတီ’’တိ (မဟာဝ။ အဋ္ဌ။ ၈၃)။

အယံ ပန ဝိသေသော အာစရိယာဏတ္တိယာ နိဿယဘေဒေယေဝ ဒဿိတော၊ န ဥပဇ္ဈာယာဏတ္တိယာ။ သာရတ္ထဒီပနိယံ ပန ‘‘သစေပိ အာစရိယော မုဉ္စိတုကာမောဝ ဟုတွာ နိဿယပဏာမနာယ ပဏာမေတီတိအာဒိ သဗ္ဗံ ဥပဇ္ဈာယဿ အာဏတ္တိယမ္ပိ ဝေဒိတဗ္ဗ’’န္တိ ဝုတ္တံ။

၂၄၈၁။ ဧဝံ ပဉ္စ သာဓာရဏင်္ဂါနိ ဒဿေတွာ အသာဓာရဏင်္ဂံ ဒဿေတုမာဟ ‘‘ဥပဇ္ဈာယသမောဓာန-ဂတဿာပိ စ ဘိဇ္ဇတီ’’တိ။ တတ္ထ သမောဓာနဂမနံ သရူပတော၊ ပဘေဒတော စ ဒဿေတုမာဟ ‘‘ဒဿနံ သဝနဉ္စာတိ၊ သမောဓာနံ ဒွိဓာ မတ’’န္တိ။ အယမေတ္ထ သင်္ခေပေါ၊ ဝိတ္ထာရော ပန သမန္တပါသာဒိကာယံ (မဟာဝ။ အဋ္ဌ။ ၈၃) ဂဟေတဗ္ဗော။ ဂန္ထဝိတ္ထာရဘီရူနံ အနုဂ္ဂဟာယ ပန ဣဓ န ဝိတ္ထာရိတော။

၂၄၈၂-၃။ သဘာဂေ ဒါယကေ အသန္တေ အဒ္ဓိကဿ စ ဂိလာနဿ စ ‘‘ဂိလာနေန မံ ဥပဋ္ဌဟာ’’တိ ယာစိတဿ ဂိလာနုပဋ္ဌာကဿ စ နိဿယံ ဝိနာ ဝသိတုံ ဒေါသော နတ္ထီတိ ယောဇနာ ။ ‘‘ဂိလာနုပဋ္ဌာကဿာ’’တိ ဝတ္တဗ္ဗေ ဂါထာဗန္ဓဝသေန ရဿတ္တံ။ ဣမိနာ သဘာဂေ နိဿယဒါယကေ သန္တေ ဧကဒိဝသမ္ပိ ပရိဟာရော န လဗ္ဘတီတိ ဒီပေတိ။ အတ္တနော ဝနေ ဖာသုဝိဟာရတံ ဇာနတာတိ အတ္တနော သမထဝိပဿနာပဋိလာဘဿ ဝနေ ဖာသုဝိဟာရံ ဇာနန္တေနပိ။ ‘‘သဘာဂေ ဒါယကေ အသန္တေ’’တိ ပဒစ္ဆေဒေါ။ သဗ္ဗမေတံ ဝိဓာနံ အန္တောဝဿတော အညသ္မိံ ကာလေ ဝေဒိတဗ္ဗံ။ အယမေတ္ထ သင်္ခေပေါ၊ ဝိတ္ထာရော ပန သမန္တပါသာဒိကာယ ဂဟေတဗ္ဗော။

နိဿယပဋိပ္ပဿမ္ဘနကထာဝဏ္ဏနာ။

၂၄၈၄။ ကုဋ္ဌမဿ အတ္ထီတိ ကုဋ္ဌီ၊ တံ။ ‘‘ဂဏ္ဍိ’’န္တိအာဒီသုပိ ဧသေဝ နယော။ ရတ္တသေတာဒိဘေဒေန ယေန ကေနစိ ကုဋ္ဌေန ဝေဝဏ္ဏိယံ ပတ္တသရီရန္တိ အတ္ထော။ ယထာဟ –

‘‘ရတ္တကုဋ္ဌံ ဝါ ဟောတု ကာဠကုဋ္ဌံ ဝါ၊ ယံ ကိဉ္စိ ကိဋိဘဒဒ္ဒုကစ္ဆုအာဒိပ္ပဘေဒမ္ပိ သဗ္ဗံ ကုဋ္ဌမေဝါတိ ဝုတ္တံ။ တဉ္စေ နခပိဋ္ဌိပ္ပမာဏမ္ပိ ဝဍ္ဎနကပက္ခေ ဌိတံ ဟောတိ၊ န ပဗ္ဗာဇေတဗ္ဗော။ သစေ ပန နိဝါသနပါရုပနေဟိ ပကတိပဋိစ္ဆန္နဋ္ဌာနေ နခပိဋ္ဌိပ္ပမာဏံ အဝဍ္ဎနကပက္ခေ ဌိတံ ဟောတိ၊ ဝဋ္ဋတိ။ မုခေ၊ ပန ဟတ္ထပါဒပိဋ္ဌေသု ဝါ သစေပိ အဝဍ္ဎနကပက္ခေ ဌိတံ နခပိဋ္ဌိတော ခုဒ္ဒကပမာဏမ္ပိ န ဝဋ္ဋတိယေဝါတိ ကုရုန္ဒိယံ ဝုတ္တံ။ တံ တိကိစ္ဆာပေတွာ ပဗ္ဗာဇေန္တေနာပိ ပကတိဝဏ္ဏေ ဇာတေယေဝ ပဗ္ဗာဇေတဗ္ဗော’’တိ (မဟာဝ။ အဋ္ဌ။ ၈၈)။

နခပိဋ္ဌိပ္ပမာဏန္တိ ဧတ္ထ ‘‘ကနိဋ္ဌင်္ဂုလိနခပိဋ္ဌိ အဓိပ္ပေတာ’’တိ တီသုပိ ဂဏ္ဌိပဒေသု ဝုတ္တံ။

ဂဏ္ဍိန္တိ မေဒဂဏ္ဍာဒိဂဏ္ဍဘေဒဝန္တံ။ ယထာဟ ‘‘မေဒဂဏ္ဍော ဝါ ဟောတု အညော ဝါ၊ ယော ကောစိ ကောလဋ္ဌိမတ္တကောပိ စေ ဝဍ္ဎနကပက္ခေ ဌိတော ဂဏ္ဍော ဟောတိ၊ န ပဗ္ဗာဇေတဗ္ဗော’’တိအာဒိ (မဟာဝ။ အဋ္ဌ။ ၈၈)။ ကောလဋ္ဌီတိ ဗဒရဋ္ဌိ။ ကိလာသိန္တိ ကိလာသဝန္တံ။ ယထာဟ – ‘‘ကိလာသောတိ နဘိဇ္ဇနကံ နပဂ္ဃရဏကံ ပဒုမပုဏ္ဍရီကပတ္တဝဏ္ဏံ ကုဋ္ဌံ၊ ယေန ဂုန္နံ ဝိယ သဗလံ သရီရံ ဟောတီ’’တိ (မဟာဝ။ အဋ္ဌ။ ၈၈)။ စ-သဒ္ဒေါ သဗ္ဗေဟိ ဥပယောဂဝန္တေဟိ ပစ္စေကံ ယောဇေတဗ္ဗော။ သောသိန္တိ ခယရောဂဝန္တံ။ ယထာဟ – ‘‘သောသောတိ သောသဗျာဓိ။ တသ္မိံ သတိ န ပဗ္ဗာဇေတဗ္ဗော’’တိ (မဟာဝ။ အဋ္ဌ။ ၈၈)။ အပမာရိကန္တိ အပမာရဝန္တံ။ ယထာဟ – ‘‘အပမာရောတိ ပိတ္တုမ္မာရော ဝါ ယက္ခုမ္မာရော ဝါ။ တတ္ထ ပုဗ္ဗဝေရိကေန အမနုဿေန ဂဟိတော ဒုတ္တိကိစ္ဆော ဟောတိ၊ အပ္ပမတ္တကေပိ ပန အပမာရေ သတိ န ပဗ္ဗာဇေတဗ္ဗော’’တိ။

ရာဇဘဋန္တိ ရညော ဘတ္တဝေတနဘဋံ ဝါ ဌာနန္တရံ ပတ္တံ ဝါ အပ္ပတ္တံ ဝါ ရာဇပုရိသံ။ ယထာဟ – ‘‘အမစ္စော ဝါ ဟောတု မဟာမတ္တော ဝါ သေဝကော ဝါ ကိဉ္စိ ဌာနန္တရံ ပတ္တော ဝါ အပ္ပတ္တော ဝါ၊ ယော ကောစိ ရညော ဘတ္တဝေတနဘဋော။ သဗ္ဗော ‘ရာဇဘဋော’တိ သင်္ချံ ဂစ္ဆတီ’’တိ။ စောရန္တိ မနုဿေဟိ အပ္ပမာဒနံ ဂါမဃာတပန္ထဃာတာဒိကမ္မေန ပါကဋံ စောရဉ္စ။ လိခိတကန္တိ ယံ ကဉ္စိ စောရိကံ ဝါ အညံ ဝါ ဂရုံ ရာဇာပရာဓံ ကတွာ ပလာတံ၊ ရာဇာ စ နံ ပဏ္ဏေ ဝါ ပေါတ္ထကေ ဝါ ‘‘ဣတ္ထန္နာမော ယတ္ထ ဒိဿတိ၊ တတ္ထ ဂဟေတွာ မာရေတဗ္ဗော’’တိ ဝါ ‘‘ဟတ္ထပါဒါဒီနိဿ ဆိန္ဒိတဗ္ဗာနီ’’တိ ဝါ ‘‘ဧတ္တကံ နာမ ဒဏ္ဍံ ဟရာပေတဗ္ဗော’’တိ ဝါ လိခါပေတိ၊ ဧဝရူပံ လိခိတကံ။

‘‘ကာရဘေဒက’’န္တိ ဂါထာဗန္ဓဝသေန ရဿော ကတော။ ကာရဘေဒကန္တိ ဒါတဗ္ဗကရဿ ဝါ ကတစောရကမ္မဿ ဝါ ကာရဏာ ကာရာဃရေ ပက္ခိတ္တော ဝါ နိဂဠဗန္ဓနာဒီဟိ ဗဒ္ဓါ ဝါ၊ တတော သော မုစ္စိတွာ ပလာယတိ၊ ဧဝရူပံ ကာရာဘေဒကဉ္စ။ ယထာဟ – ‘‘ကာရာ ဝုစ္စတိ ဗန္ဓနာဂါရံ၊ ဣဓ ပန အန္ဒုဗန္ဓနံ ဝါ ဟောတု သင်္ခလိကဗန္ဓနံ ဝါ ရဇ္ဇုဗန္ဓနံ ဝါ ဂါမဗန္ဓနံ ဝါ နိဂမဗန္ဓနံ ဝါ နဂရဗန္ဓနံ ဝါ ပုရိသဂုတ္တိ ဝါ ဇနပဒဗန္ဓနံ ဝါ ဒီပဗန္ဓနံ ဝါ၊ ယော ဧတေသု ယံ ကိဉ္စိ ဗန္ဓနံ ဆိန္ဒိတွာ ဘိန္ဒိတွာ မုဉ္စိတွာ ဝိဝရိတွာ ဝါ ပဿမာနာနံ ဝါ အပဿမာနာနံ ဝါ ပလာယတိ၊ သော ‘ကာရာဘေဒကော’တိ သင်္ချံ ဂစ္ဆတီ’’တိ (မဟာဝ။ အဋ္ဌ။ ၉၂)။

၂၄၈၅။ ကသာဟတန္တိ ဣဏံ ဂဟေတွာ ဒါတုံ အသမတ္ထတ္တာ ‘‘အယမေဝ တေ ဒဏ္ဍော ဟောတူ’’တိ ကသာဒိနာ ဒိန္နပ္ပဟာရံ အဝူပသန္တဝဏံ။ ယထာဟ –

‘‘ယော ဝစနပေသနာဒီနိ အကရောန္တော ဟညတိ၊ န သော ကတဒဏ္ဍကမ္မော။ ယော ပန ကေဏိယာ ဝါ အညထာ ဝါ ကိဉ္စိ ဂဟေတွာ ခါဒိတွာ ပုန ဒါတုံ အသက္ကောန္တော ‘အယမေဝ တေ ဒဏ္ဍော ဟောတူ’တိ ကသာဟိ ဟညတိ၊ အယံ ကသာဟတော ကတဒဏ္ဍကမ္မော။ ယော စ ကသာဟိ ဝါ ဟတော ဟောတု အဒ္ဓဒဏ္ဍကာဒီနံ ဝါ အညတရေန၊ ယာဝ အလ္လဝဏော ဟောတိ၊ တာဝ န ပဗ္ဗာဇေတဗ္ဗော’’တိ (မဟာဝ။ အဋ္ဌ။ ၉၄)။

လက္ခဏာဟတန္တိ ဧကံသံ ကတွာ ပါရုတေန ဥတ္တရာသင်္ဂေန အပ္ပဋိစ္ဆာဒနီယဋ္ဌာနေ တတ္တေန လောဟေန အာဟတံ အသစ္ဆဝိဘူတလက္ခဏေန သမန္နာဂတံ။ ယထာဟ –

‘‘ယဿ ပန နလာဋေ ဝါ ဥရာဒီသု ဝါ တတ္တေန လောဟေန လက္ခဏံ အာဟတံ ဟောတိ၊ သော သစေ ဘုဇိဿော၊ ယာဝ အလ္လဝဏော ဟောတိ၊ တာဝ န ပဗ္ဗာဇေတဗ္ဗော။ သစေပိဿ ဝဏာ ရုဠှာ ဟောန္တိ ဆဝိယာ သမပရိစ္ဆေဒါ၊ လက္ခဏံ ပန ပညာယတိ၊ တိမဏ္ဍလံ နိဝတ္ထဿ ဥတ္တရာသင်္ဂေ ကတေ ပဋိစ္ဆန္နောကာသေ စေ ဟောတိ၊ ပဗ္ဗာဇေတုံ ဝဋ္ဋတိ။ အပ္ပဋိစ္ဆန္နောကာသေ စေ၊ န ဝဋ္ဋတီ’’တိ (မဟာဝ။ အဋ္ဌ။ ၉၅)။

ဣဏာယိကဉ္စာတိ မာတာပိတုပိတာမဟာဒီဟိ ဝါ အတ္တနာ ဝါ ဂဟိတဣဏံ။ ယထာဟ –

‘‘ဣဏာယိကော နာမ ယဿ ပိတိပိတာမဟေဟိ ဝါ ဣဏံ ဂဟိတံ ဟောတိ၊ သယံ ဝါ ဣဏံ ဂဟိတံ ဟောတိ၊ ယံ ဝါ အာဌပေတွာ မာတာပိတူဟိ ကိဉ္စိ ဂဟိတံ ဟောတိ၊ သော တံ ဣဏံ ပရေသံ ဓာရေတီတိ ဣဏာယိကော။ ယံ ပန အညေ ဉာတကာ အာဌပေတွာ ကိဉ္စိ ဂဏှန္တိ၊ သော န ဣဏာယိကော။ န ဟိ တေ တံ အာဌပေတုံ ဣဿရာ။ တသ္မာ တံ ပဗ္ဗာဇေတုံ ဝဋ္ဋတီ’’တိ (မဟာဝ။ အဋ္ဌ။ ၉၆)။

ဒါသန္တိ အန္တောဇာတော၊ ဓနက္ကီတော၊ ကရမရာနီတော၊ သယံ ဝါ ဒါသဗျံ ဥပဂတောတိ စတုန္နံ ဒါသာနံ အညတရံ။ ဒါသဝိနိစ္ဆယော ပနေတ္ထ သမန္တပါသာဒိကာယ (မဟာဝ။ အဋ္ဌ။ ၉၇) ဝိတ္ထာရတော ဂဟေတဗ္ဗော။ ပဗ္ဗာဇေန္တဿ ဒုက္ကဋန္တိ ‘‘ကုဋ္ဌိ’’န္တိအာဒီဟိ ဥပယောဂဝန္တပဒေဟိ ပစ္စေကံ ယောဇေတဗ္ဗံ။

၂၄၈၆။ ဟတ္ထစ္ဆိန္နန္တိ ဟတ္ထတလေ ဝါ မဏိဗန္ဓေ ဝါ ကပ္ပရေ ဝါ ယတ္ထ ကတ္ထစိ ဆိန္နဟတ္ထံ။ အဋ္ဌစ္ဆိန္နန္တိ ယထာ နခံ န ပညာယတိ၊ ဧဝံ စတူသု အင်္ဂုဋ္ဌကေသု အညတရံ ဝါ သဗ္ဗေ ဝါ ယဿ ဆိန္နာ ဟောန္တိ၊ ဧဝရူပံ။ ပါဒစ္ဆိန္နန္တိ ယဿ အဂ္ဂပါဒေသု ဝါ ဂေါပ္ဖကေသု ဝါ ဇင်္ဃာယ ဝါ ယတ္ထ ကတ္ထစိ ဧကော ဝါ ဒွေ ဝါ ပါဒါ ဆိန္နာ ဟောန္တိ။ ဟတ္ထပါဒဆိန္နဿာပိ ပါဠိယံ (မဟာဝ။ ၁၁၉) အာဂတတ္တာ သောပိ ဣဓ ဝတ္တဗ္ဗော၊ ယထာဝုတ္တနယေနေဝ တဿ ဒုက္ကဋဝတ္ထုတာ ပညာယတီတိ န ဝုတ္တောတိ ဒဋ္ဌဗ္ဗံ။

ကဏ္ဏနာသင်္ဂုလိစ္ဆိန္နန္တိ ဧတ္ထ ‘‘ကဏ္ဏစ္ဆိန္နံ နာသစ္ဆိန္နံ ကဏ္ဏနာသစ္ဆိန္နံ အင်္ဂုလိစ္ဆိန္န’’န္တိ ယောဇနာ။ ကဏ္ဏစ္ဆိန္နန္တိ ယဿ ကဏ္ဏမူလေ ဝါ ကဏ္ဏသက္ခလိကာယ ဝါ ဧကော ဝါ ဒွေ ဝါ ကဏ္ဏာ ဆိန္နာ ဟောန္တိ။ ယဿ ပန ကဏ္ဏာဝဋ္ဋေ ဆိန္နာ ဟောန္တိ၊ သက္ကာ စ ဟောန္တိ သင်္ဃာဋေတုံ၊ သော ကဏ္ဏံ သင်္ဃာဋေတွာ ပဗ္ဗာဇေတဗ္ဗော။ နာသစ္ဆိန္နန္တိ ယဿ အဇပဒကေ ဝါ အဂ္ဂေ ဝါ ဧကပုဋေ ဝါ ယတ္ထ ကတ္ထစိ နာသာ ဆိန္နာ ဟောတိ။ ယဿ ပန နာသိကာ သက္ကာ ဟောတိ သန္ဓေတုံ၊ သော တံ ဖာသုကံ ကတွာ ပဗ္ဗာဇေတဗ္ဗော။ ကဏ္ဏနာသစ္ဆိန္နန္တိ တဒုဘယစ္ဆိန္နံ။ အင်္ဂုလိစ္ဆိန္နန္တိ ယဿ နခသေသံ အဒဿေတွာ ဧကာ ဝါ ဗဟူ ဝါ အင်္ဂုလိယော ဆိန္နာ ဟောန္တိ။ ယဿ ပန သုတ္တတန္တုမတ္တမ္ပိ နခသေသံ ပညာယတိ၊ တံ ပဗ္ဗာဇေတုံ ဝဋ္ဋတိ။ ကဏ္ဍရစ္ဆိန္နမေဝ စာတိ ယဿ ကဏ္ဍရနာမကာ မဟာနှာရူ ပုရတော ဝါ ပစ္ဆတော ဝါ ဆိန္နာ ဟောန္တိ၊ ယေသု ဧကဿာပိ ဆိန္နတ္တာ အဂ္ဂပါဒေန ဝါ စင်္ကမတိ၊ မူလေန ဝါ စင်္ကမတိ၊ န ဝါ ပါဒံ ပတိဋ္ဌာပေတုံ သက္ကောတိ။

၂၄၈၇။ ကာဏန္တိ ပသန္နန္ဓော ဝါ ဟောတု ပုပ္ဖာဒီဟိ ဝါ ဥပဟတပသာဒေါ၊ ယော ဒွီဟိ ဝါ ဧကေန ဝါ အက္ခိနာ န ပဿတိ၊ တံ ကာဏံ။ ကုဏိန္တိ ဟတ္ထကုဏီ ဝါ ပါဒကုဏီ ဝါ အင်္ဂုလိကုဏီ ဝါ၊ ယဿ ဧတေသု ဟတ္ထာဒီသု ယံ ကိဉ္စိ ဝင်္ကံ ပညာယတိ၊ သော ကုဏီ။ ခုဇ္ဇဉ္စာတိ ယော ဥရဿ ဝါ ပိဋ္ဌိယာ ဝါ ပဿဿ ဝါ နိက္ခန္တတ္တာ ခုဇ္ဇသရီရော၊ တံ ခုဇ္ဇံ။ ယဿ ပန ကိဉ္စိ ကိဉ္စိ အင်္ဂပစ္စင်္ဂံ ဤသကံ ဝင်္ကံ၊ တံ ပဗ္ဗာဇေတုံ ဝဋ္ဋတိ။ မဟာပုရိသော ဧဝ ဟိ ဗြဟ္မုဇုဂတ္တော၊ အဝသေသော သတ္တော အခုဇ္ဇော နာမ နတ္ထိ။

ဝါမနန္တိ ယော ဇင်္ဃဝါမနော ဝါ ကဋိဝါမနော ဝါ ဥဘယဝါမနော ဝါ၊ တံ။ တတ္ထ ဇင်္ဃဝါမနဿ ကဋိတော ပဋ္ဌာယ ဟေဋ္ဌိမကာယော ရဿော ဟောတိ၊ ဥပရိမကာယော ပရိပုဏ္ဏော။ ကဋိဝါမနဿ ကဋိတော ပဋ္ဌာယ ဥပရိမကာယော ရဿော ဟောတိ၊ ဟေဋ္ဌိမကာယော ပရိပုဏ္ဏော ဟောတိ။ ဥဘယဝါမနဿ ဥဘောပိ ကာယာ ရဿာ ဟောန္တိ။ ယေသံ ကာယရဿတ္တာ ဘူတာနံ ဝိယ ပရိဝဋုမော မဟာကုစ္ဆိဃဋသဒိသော အတ္တဘာဝေါ ဟောတိ။ တံ တိဝိဓမ္ပိ ပဗ္ဗာဇေတုံ န ဝဋ္ဋတိ။

ဖဏဟတ္ထကန္တိ ယဿ ဝဂ္ဂုလိပက္ခကာ ဝိယ အင်္ဂုလိယော သမ္ဗဒ္ဓါ ဟောန္တိ၊ တံ။ ဧတံ ပဗ္ဗာဇေတုကာမေန အင်္ဂုလန္တရိကာယော ဖာလေတွာ သဗ္ဗံ အန္တရစမ္မံ အပနေတွာ ဖာသုကံ ကတွာ ပဗ္ဗာဇေတဗ္ဗော။ ယဿာပိ ဆ အင်္ဂုလိယော ဟောန္တိ၊ တံ ပဗ္ဗာဇေတုကာမေန အဓိကံ အင်္ဂုလိံ ဆိန္ဒိတွာ ဖာသုကံ ကတွာ ပဗ္ဗာဇေတဗ္ဗော။

ခဉ္ဇန္တိ ယော နတဇာဏုကော ဝါ ဘိန္နဇင်္ဃော ဝါ မဇ္ဈေ သံကုဋိတပါဒတ္တာ ကုဏ္ဍပါဒကော ဝါ ပိဋ္ဌိပါဒမဇ္ဈေန စင်္ကမန္တော အဂ္ဂေ သံကုဋိတပါဒတ္တာ ကုဏ္ဍပါဒကော ဝါ ပိဋ္ဌိပါဒဂ္ဂေန စင်္ကမန္တော အဂ္ဂပါဒေနေဝ စင်္ကမနခဉ္ဇော ဝါ ပဏှိကာယ စင်္ကမနခဉ္ဇော ဝါ ပါဒဿ ဗာဟိရန္တေန စင်္ကမနခဉ္ဇော ဝါ ပါဒဿ အဗ္ဘန္တရန္တေန စင်္ကမနခဉ္ဇော ဝါ ဂေါပ္ဖကာနံ ဥပရိ ဘဂ္ဂတ္တာ သကလေန ပိဋ္ဌိပါဒေန စင်္ကမနခဉ္ဇော ဝါ၊ တံ ပဗ္ဗာဇေတုံ န ဝဋ္ဋတိ။ ဧတ္ထ နတဇာဏုကောတိ အန္တောပဝိဋ္ဌအာနတပါဒေါ။ ပက္ခဟတန္တိ ယဿ ဧကော ဟတ္ထော ဝါ ပါဒေါ ဝါ အဍ္ဎသရီရံ ဝါ သုခံ န ဝဟတိ။

သီပဒိန္တိ ဘာရပါဒံ။ ယဿ ပါဒေါ ထူလော ဟောတိ သဉ္ဇာတပီဠကော ခရော၊ သော န ပဗ္ဗာဇေတဗ္ဗော။ ယဿ ပန န တာဝ ခရဘာဝံ ဂဏှာတိ၊ သက္ကာ ဟောတိ ဥပနာဟံ ဗန္ဓိတွာ ဥဒကအာဝါဋေ ပဝေသေတွာ ဥဒကဝါလိကာယ ပူရေတွာ ယထာ သိရာ ပညာယန္တိ၊ ဇင်္ဃာ စ တေလနာဠိကာ ဝိယ ဟောန္တိ၊ ဧဝံ မိလာပေတုံ သက္ကာ၊ တဿ ပါဒံ ဤဒိသံ ကတွာ တံ ပဗ္ဗာဇေတုံ ဝဋ္ဋတိ။ သစေ ပုန ဝဍ္ဎတိ၊ ဥပသမ္ပာဒေန္တေနာပိ တထာ ကတွာဝ ဥပသမ္ပာဒေတဗ္ဗော။ ပါပရောဂိနန္တိ ယော အရိသဘဂန္ဒရပိတ္တသေမှကာသသောသာဒီသု ယေန ကေနစိ ရောဂေန နိစ္စာတုရော အတေကိစ္ဆရောဂေါ ဇေဂုစ္ဆော အမနာပေါ၊ တံ။

၂၄၈၈။ ဇရာယ ဒုဗ္ဗလန္တိ ယော ဇိဏ္ဏဘာဝေန ဒုဗ္ဗလော အတ္တနော စီဝရရဇနာဒိကမ္မမ္ပိ ကာတုံ အသမတ္ထော၊ တံ။ ယော ပန မဟလ္လကောပိ ဗလဝါ ဟောတိ အတ္တာနံ ပဋိဇဂ္ဂိတုံ သက္ကောတိ၊ သော ပဗ္ဗာဇေတဗ္ဗော။ အန္ဓန္တိ ဇစ္စန္ဓံ။ ပဓိရဉ္စေဝါတိ ယော သဗ္ဗေန သဗ္ဗံ န သုဏာတိ၊ တံ။ ယော ပန မဟာသဒ္ဒံ သုဏာတိ၊ တံ ပဗ္ဗာဇေတုံ ဝဋ္ဋတိ။ မမ္မနန္တိ ယဿ ဝစီဘေဒေါ ဝတ္တတိ၊ သရဏဂမနံ ပရိပုဏ္ဏံ ဘာသိတုံ န သက္ကောတိ၊ တာဒိသံ မမ္မနမ္ပိ ပဗ္ဗာဇေတုံ န ဝဋ္ဋတိ။ ယော ပန သရဏဂမနမတ္တံ ပရိပုဏ္ဏံ ဘာသိတုံ သက္ကောတိ၊ တံ ပဗ္ဗာဇေတုံ ဝဋ္ဋတိ။ အထ ဝါ မမ္မနန္တိ ခလိတဝစနံ၊ ယော ဧကမေဝ အက္ခရံ စတုပဉ္စက္ခတ္တုံ ဝဒတိ၊ တဿေတမဓိဝစနံ။ ပီဌသပ္ပိန္တိ ဆိန္နိရိယာပထံ။ မူဂန္တိ ယဿ ဝစီဘေဒေါ နပ္ပဝတ္တတိ။

၂၄၈၉။ အတ္တနော ဝိရူပဘာဝေန ပရိသံ ဒူသေန္တေန ပရိသဒူသကေ (မဟာဝ။ အဋ္ဌ။ ၁၁၉) ဒဿေတုမာဟ ‘‘အတိဒီဃော’’တိအာဒိ။ အတိဒီဃောတိ အညေသံ သီသပ္ပမာဏနာဘိပ္ပဒေသော။ အတိရဿောတိ ဝုတ္တပ္ပကာရော ဥဘယဝါမနော ဝိယ အတိရဿော။ အတိကာဠော ဝါတိ ဈာပိတခေတ္တေ ခါဏုကော ဝိယ အတိကာဠဝဏ္ဏော။ မဋ္ဌတမ္ဗလောဟနိဒဿနော အစ္စောဒါတောပိ ဝါတိ သမ္ဗန္ဓော၊ ဒဓိတက္ကာဒီဟိ မဇ္ဇိတမဋ္ဌတမ္ဗလောဟဝဏ္ဏော အတီဝ ဩဒါတသရီရောတိ အတ္ထော။

၂၄၉၀။ အတိထူလောဝါတိ ဘာရိယမံသော မဟောဒရော မဟာဘူတသဒိသော။ အတိကိသောတိ မန္ဒမံသလောဟိတော အဋ္ဌိသိရာစမ္မသရီရော ဝိယ။ အတိမဟာသီသော ဝါတိ ယောဇနာ။ အတိမဟာသီသော ဝါတိ ပစ္ဆိံ သီသေ ကတွာ ဌိတော ဝိယ။ ‘‘အတိခုဒ္ဒကသီသေန အသဟိတေနာ’’တိ ပဒစ္ဆေဒေါ။ အသဟိတေနာတိ သရီရဿ အနနုရူပေန။ ‘‘အတိခုဒ္ဒကသီသေနာ’’တိ ဧတဿ ဝိသေသနံ။ အသဟိတေန အတိခုဒ္ဒကသီသေန သမန္နာဂတောတိ ယောဇနာ။ ယထာဟ – ‘‘အတိခုဒ္ဒကသီသော ဝါ သရီရဿ အနနုရူပေန အတိခုဒ္ဒကေန သီသေန သမန္နာဂတော’’တိ။

၂၄၉၁။ ကုဋကုဋကသီသောတိ တာလဖလပိဏ္ဍိသဒိသေန သီသေန သမန္နာဂတော။ သိခရသီသကောတိ ဥဒ္ဓံ အနုပုဗ္ဗတနုကေန သီသေန သမန္နာဂတော၊ မတ္ထကတော သံကုဋိကော မူလတော ဝိတ္ထတော ဟုတွာ ဌိတပဗ္ဗတသိခရသဒိသသီသောတိ အတ္ထော။ ဝေဠုနာဠိသမာနေနာတိ မဟာဝေဠုပဗ္ဗသဒိသေန။ သီသေနာတိ ဒီဃသီသေန။ ယထာဟ – ‘‘နာဠိသီသော ဝါ မဟာဝေဠုပဗ္ဗသဒိသေန သီသေန သမန္နာဂတော’’တိ (မဟာဝ။ အဋ္ဌ။ ၁၁၉)။

၂၄၉၂။ ကပ္ပသီသောပီတိ မဇ္ဈေ ဒိဿမာနအာဝါဋေန ဟတ္ထိကုမ္ဘသဒိသေန ဒွိဓာဘူတသီသေန သမန္နာဂတော။ ပဗ္ဘာရသီသော ဝါတိ စတူသု ပဿေသု ယေန ကေနစိ ပဿေန ဩဏတေန သီသေန သမန္နာဂတော။ ဝဏသီသကောတိ ဝဏေဟိ သမန္နာဂတသီသော။ ကဏ္ဏိကကေသော ဝါတိ ပါဏကေဟိ ခါယိတကေဒါရေ သဿသဒိသေဟိ တဟိံ တဟိံ ဥဋ္ဌိတေဟိ ကေသေဟိ သမန္နာဂတော။ ထူလကေသောပိ ဝါတိ တာလဟီရသဒိသေဟိ ကေသေဟိ သမန္နာဂတော။

၂၄၉၃။ ပူတိသီသောတိ ဒုဂ္ဂန္ဓသီသော။ နိလ္လောမသီသော ဝါတိ လောမရဟိတသီသော။ ဇာတိပဏ္ဍရကေသကောတိ ဇာတိဖလိတေဟိ ပဏ္ဍရကေသော ဝါ။ ဇာတိယာ တမ္ဗကေသော ဝါတိ အာဒိတ္တေဟိ ဝိယ တမ္ဗဝဏ္ဏေဟိ ကေသေဟိ သမန္နာဂတော။ အာဝဋ္ဋသီသကောတိ ဂုန္နံ သရီရေ အာဝဋ္ဋသဒိသေဟိ ဥဒ္ဓဂ္ဂေဟိ ကေသာဝဋ္ဋေဟိ သမန္နာဂတော။

၂၄၉၄။ သီသလောမေကဗဒ္ဓေဟိ ဘမုကေဟိ ယုတောပီတိ သီသလောမေဟိ သဒ္ဓိံ ဧကာဗဒ္ဓလောမေဟိ ဘမုကေဟိ သမန္နာဂတော။ သမ္ဗဒ္ဓဘမုကော ဝါတိ ဧကာဗဒ္ဓဥဘယဘမုကော၊ မဇ္ဈေ သဉ္ဇာတလောမေဟိ ဘမုကေဟိ သမန္နာဂတောတိ အတ္ထော။ နိလ္လောမဘမုကောပိ ဝါတိ ဘမုလောမရဟိတော။ နိလ္လောမဘမုကောပိ ဝါတိ ပိ-သဒ္ဒေန အဝုတ္တသမုစ္စယတ္ထေန မက္ကဋဘမုကော သင်္ဂဟိတော။

၂၄၉၅။ မဟန္တခုဒ္ဒနေတ္တောဝါတိ ဧတ္ထ နေတ္တ-သဒ္ဒေါ မဟန္တခုဒ္ဒ-သဒ္ဒေဟိ ပစ္စေကံ ယောဇေတဗ္ဗော၊ မဟန္တနေတ္တော ဝါ ခုဒ္ဒကနေတ္တော ဝါတိ အတ္ထော။ မဟန္တနေတ္တော ဝါတိ အတိမဟန္တေဟိ နေတ္တေဟိ သမန္နာဂတော။ ခုဒ္ဒကနေတ္တော ဝါတိ မဟိံသစမ္မေ ဝါသိကောဏေန ပဟရိတွာ ကတဆိဒ္ဒသဒိသေဟိ အတိခုဒ္ဒကက္ခီဟိ သမန္နာဂတော။ ဝိသမလောစနောတိ ဧကေန မဟန္တေန၊ ဧကေန ခုဒ္ဒကေန အက္ခိနာ သမန္နာဂတော။ ကေကရော ဝါပီတိ တိရိယံ ပဿန္တော။ ဧတ္ထ အပိ-သဒ္ဒေန နိက္ခန္တက္ခိံ သမ္ပိဏ္ဍေတိ၊ ယဿ ကက္ကဋကဿေဝ အက္ခိတာရကာ နိက္ခန္တာ ဟောန္တိ။ ဂမ္ဘီရနေတ္တောတိ ယဿ ဂမ္ဘီရေ ဥဒပါနေ ဥဒကတာရကာ ဝိယ အက္ခိတာရကာ ပညာယန္တိ။ ဧတ္ထ စ ဥဒကတာရကာ နာမ ဥဒကပုဗ္ဗုဠံ။ အက္ခိတာရကာတိ အက္ခိဂေဏ္ဍကာ။ ဝိသမစက္ကလောတိ ဧကေန ဥဒ္ဓံ၊ ဧကေန အဓောတိ ဧဝံ ဝိသမဇာတေဟိ အက္ခိစက္ကေဟိ သမန္နာဂတော။

၂၄၉၆။ ဇတုကဏ္ဏောဝါတိ အတိခုဒ္ဒိကာဟိ ကဏ္ဏသက္ခလီဟိ သမန္နာဂတော။ မူသိကကဏ္ဏော ဝါတိ မူသိကာနံ ကဏ္ဏသဒိသေဟိ ကဏ္ဏေဟိ သမန္နာဂတော။ ဟတ္ထိကဏ္ဏောပိ ဝါတိ အနနုရူပါဟိ မဟန္တာဟိ ဟတ္ထိကဏ္ဏသဒိသာဟိ ကဏ္ဏသက္ခလီဟိ သမန္နာဂတော။ ဆိဒ္ဒမတ္တကကဏ္ဏော ဝါတိ ယဿ ဝိနာ ကဏ္ဏသက္ခလီဟိ ကဏ္ဏစ္ဆိဒ္ဒမေဝ ဟောတိ။ အဝိဒ္ဓကဏ္ဏကောတိ ကဏ္ဏဗန္ဓတ္ထာယ အဝိဒ္ဓေန ကဏ္ဏေန သမန္နာဂတော။

၂၄၉၇။ ဋင်္ကိတကဏ္ဏော ဝါတိ ဂေါဘတ္တနာဠိကာယ အဂ္ဂသဒိသေဟိ ကဏ္ဏေဟိ သမန္နာဂတော၊ ဂေါဟနုကောဋိသဏ္ဌာနေဟိ ကဏ္ဏေဟိ သမန္နာဂတောတိ အတ္ထော။ ပူတိကဏ္ဏောပိ ဝါတိ သဒါ ပဂ္ဃရိတပုဗ္ဗေန ကဏ္ဏေန သမန္နာဂတော။ ပူတိကဏ္ဏောပီတိ အပိ-သဒ္ဒေန ကဏ္ဏဘဂန္ဒရိကော ဂဟိတော။ ကဏ္ဏဘဂန္ဒရိကောတိ နိစ္စပူတိနာ ကဏ္ဏေန သမန္နာဂတော။ အဝိဒ္ဓကဏ္ဏော ပရိသဒူသကော ဝုတ္တော၊ ကထံ ယောနကဇာတီနံ ပဗ္ဗဇ္ဇာတိ အာဟ ‘‘ယောနကာဒိပ္ပဘေဒေါပိ၊ နာယံ ပရိသဒူသကော’’တိ၊ ကဏ္ဏာဝေဓနံ ယောနကာနံ သဘာဝေါ၊ အယံ ယောနကာဒိပ္ပဘေဒေါ ပရိသဒူသကော န ဟောတီတိ ဝုတ္တံ ဟောတိ။

၂၄၉၈။ အတိပိင်္ဂလနေတ္တောတိ အတိသယေန ပိင်္ဂလေဟိ နေတ္တေဟိ သမန္နာဂတော။ မဓုပိင်္ဂလံ ပန ပဗ္ဗာဇေတုံ ဝဋ္ဋတိ။ နိပ္ပခုမက္ခိ ဝါတိ အက္ခိဒလရောမေဟိ ဝိရဟိတအက္ခိကော။ ပခုမ-သဒ္ဒေါ ဟိ လောကေ အက္ခိဒလရောမေသု နိရုဠှော။ အဿုပဂ္ဃရနေတ္တော ဝါတိ ပဂ္ဃရဏဿူဟိ နေတ္တေဟိ သမန္နာဂတော။ ပက္ကပုပ္ဖိတလောစနောတိ ပက္ကလောစနော ပုပ္ဖိတလောစနောတိ ယောဇနာ။ ပရိပက္ကနေတ္တော သဉ္ဇာတပုပ္ဖနေတ္တောတိ အတ္ထော။

၂၄၉၉။ မဟာနာသောတိ သရီရဿ အနနုရူပါယ မဟတိယာ နာသာယ သမန္နာဂတော။ အတိခုဒ္ဒကနာသိကောတိ တထာ အတိခုဒ္ဒိကာယ နာသာယ သမန္နာဂတော။ စိပိဋနာသော ဝါတိ စိပိဋာယ အန္တော ပဝိဋ္ဌာယ ဝိယ အလ္လိနာသာယ သမန္နာဂတော။ စိပိဋနာသော ဝါတိ အဝုတ္တဝိကပ္ပတ္ထေန ဝါ-သဒ္ဒေန ဒီဃနာသိကော သင်္ဂယှတိ။ သော စ သုကတုဏ္ဍသဒိသာယ ဇိဝှာယ လေဟိတုံ သက္ကုဏေယျာယ နာသိကာယ သမန္နာဂတော။ ကုဋိလနာသိကောတိ မုခမဇ္ဈေ အပ္ပတိဋ္ဌဟိတွာ ဧကပဿေ ဌိတနာသိကော။

၂၅၀၀။ နိစ္စဝိဿဝနာသော ဝါတိ နိစ္စပဂ္ဃရိတသိင်္ဃာဏိကနာသော ဝါ။ မဟာမုခေါတိ ယဿ ပဋင်္ဂမဏ္ဍုကဿေဝ မုခနိမိတ္တံယေဝ မဟန္တံ ဟောတိ၊ မုခံ ပန လာဗုသဒိသံ အတိခုဒ္ဒကံ။ ပဋင်္ဂမဏ္ဍုကော နာမ မဟာမုခမဏ္ဍုကော။ ဝင်္ကဘိန္နမုခေါ ဝါပီတိ ဧတ္ထ ‘‘ဝင်္ကမုခေါ ဝါ ဘိန္နမုခေါ ဝါပီ’’တိ ယောဇနာ။ ဝင်္ကမုခေါတိ ဘမုကဿ၊ နလာတဿ ဝါ ဧကပဿေ နိန္နတာယ ဝင်္ကမုခေါ။ ဘိန္နမုခေါ ဝါတိ မက္ကဋဿေဝ ဘိန္နမုခေါ။ မဟာဩဋ္ဌောပိ ဝါတိ ဥက္ခလိမုခဝဋ္ဋိသဒိသေဟိ ဩဋ္ဌေဟိ သမန္နာဂတော။

၂၅၀၁။ တနုကဩဋ္ဌော ဝါတိ ဘေရိစမ္မသဒိသေဟိ ဒန္တေ ပိဒဟိတုံ အသမတ္ထေဟိ ဩဋ္ဌေဟိ သမန္နာဂတော။ ဘေရိစမ္မသဒိသေဟီတိ ဘေရိမုခစမ္မသဒိသေဟိ။ တနုကဩဋ္ဌော ဝါတိ ဧတ္ထ ဝါ-သဒ္ဒေန မဟာဓရောဋ္ဌော ဝါ တနုကဥတ္တရောဋ္ဌော ဝါ တနုကအဓရောဋ္ဌော ဝါတိ တယော ဝိကပ္ပာ သင်္ဂဟိတာ။ ဝိပုလုတ္တရဩဋ္ဌကောတိ မဟာဥတ္တရောဋ္ဌော။ ဩဋ္ဌဆိန္နောတိ ယဿ ဧကော ဝါ ဒွေ ဝါ ဩဋ္ဌာ ဆိန္နာ ဟောန္တိ။ ဥပ္ပက္ကမုခေါတိ ပက္ကမုခေါ။ ဧဠမုခေါပိ ဝါတိ နိစ္စပဂ္ဃရဏမုခေါ။

၂၅၀၂-၃။ သင်္ခတုဏ္ဍောပီတိ ဗဟိ သေတေဟိ အန္တော အတိရတ္တေဟိ ဩဋ္ဌေဟိ သမန္နာဂတော။ ဒုဂ္ဂန္ဓမုခေါတိ ဒုဂ္ဂန္ဓကုဏပမုခေါ။ မဟာဒန္တောပီတိ အဋ္ဌကဒန္တသဒိသေဟိ သမန္နာဂတော ။ အစ္စန္တန္တိ အတိသယေန။ ‘‘ဟေဋ္ဌာ ဥပရိတော ဝါပိ၊ ဗဟိ နိက္ခန္တဒန္တကော’’တိ ဣဒံ ‘‘အသုရဒန္တကော’’တိ ဧတဿ အတ္ထပဒံ။ အသုရောတိ ဒါနဝေါ။ ‘‘သိပ္ပိဒန္တော ဝါ ဩဋ္ဌဒန္တော ဝါ’’တိ ဂဏ္ဌိပဒေ လိခိတော။ ယဿ ပန သက္ကာ ဟောန္တိ ဩဋ္ဌေဟိ ပိဒဟိတုံ၊ ကထေန္တဿေဝ ပညာယတိ၊ နော အကထေန္တဿ၊ တံ ပဗ္ဗာဇေတုံ ဝဋ္ဋတိ။ အဒန္တောတိ ဒန္တရဟိတော။ ပူတိဒန္တောတိ ပူတိဘူတေဟိ ဒန္တေဟိ သမန္နာဂတော။

၂၅၀၄။ ‘‘အတိခုဒ္ဒကဒန္တကော’’တိ ဣမဿ ‘‘ယဿာ’’တိအာဒိ အပဝါဒေါ။ ယဿ ဒန္တန္တရေ ကာဠကဒန္တသန္နိဘော ကလန္ဒကဒန္တသဒိသော ဒန္တော သုခုမောဝ ဌိတော စေ၊ တံ တု ပဗ္ဗာဇေတုံ ဝဋ္ဋတီတိ ယောဇနာ။ ပဗ္ဗာဇေတုမ္ပီတိ ဧတ္ထ ပိ-သဒ္ဒေါ တု-သဒ္ဒတ္ထော။

၂၅၀၅။ ယော ပေါသောတိ သမ္ဗန္ဓော။ မဟာဟနုကောတိ ဂေါဟနုသဒိသေန ဟနုနာ သမန္နာဂတော။ ‘‘ရဿေန ဟနုနာ ယုတော’’တိ ဣဒံ ‘‘စိပိဋဟနုကော ဝါ’’တိ ဣမဿ အတ္ထပဒံ။ ယထာဟ – ‘‘စိပိဋဟနုကော ဝါ အန္တောပဝိဋ္ဌေန ဝိယ အတိရဿေန ဟနုကေန သမန္နာဂတော’’တိ (မဟာဝ။ အဋ္ဌ။ ၁၁၉)။ စိပိဋဟနုကော ဝါပီတိ ဧတ္ထ ပိ-သဒ္ဒေန ‘‘ဘိန္နဟနုကော ဝါ ဝင်္ကဟနုကော ဝါ’’တိ ဝိကပ္ပဒွယံ သင်္ဂဏှာတိ။

၂၅၀၆။ နိမ္မဿုဒါဌိကော ဝါပီတိ ဘိက္ခုနိသဒိသမုခေါ။ အတိဒီဃဂလောပိ ဝါတိ ဗကဂလသဒိသေန ဂလေန သမန္နာဂတော။ အတိရဿဂလောပိ ဝါတိ အန္တောပဝိဋ္ဌေန ဝိယ ဂလေန သမန္နာဂတော။ ဘိန္နဂလော ဝါ ဂဏ္ဍဂလောပိ ဝါတိ ယောဇနာ၊ ဘိန္နဂလဋ္ဌိကော ဝါ ဂဏ္ဍေန သမန္နာဂတဂလောပိ ဝါတိ အတ္ထော။

၂၅၀၇။ ဘဋ္ဌံသကူဋောဝါတိ မာတုဂါမဿ ဝိယ ဘဋ္ဌေန အံသကူဋေန သမန္နာဂတော။ ဘိန္နပိဋ္ဌိ ဝါ ဘိန္နဥရောပိ ဝါတိ ယောဇနာ၊ သုဒီဃဟတ္ထော ဝါ သုရဿဟတ္ထော ဝါတိ ယောဇနာ၊ အတိဒီဃဟတ္ထော ဝါ အတိရဿဟတ္ထော ဝါတိ အတ္ထော။ ဝါ-သဒ္ဒေန အဟတ္ထဧကဟတ္ထာနံ ဂဟဏံ။ ကစ္ဆုသမာယုတော ဝါ ကဏ္ဍုသမာယုတော ဝါတိ ယောဇနာ။ ဝါ-သဒ္ဒေန ‘‘ဒဒ္ဒုဂတ္တော ဝါ ဂေါဓာဂတ္တော ဝါ’’တိ ဣမေ ဒွေ သင်္ဂဏှာတိ။ တတ္ထ ဂေါဓာဂတ္တော ဝါတိ ယဿ ဂေါဓာယ ဝိယ ဂတ္တတော စုဏ္ဏာနိ ပတန္တိ။

၂၅၀၈။ မဟာနိသဒမံသောတိ ဣမဿ အတ္ထပဒံ ‘‘ဥဒ္ဓနဂ္ဂုပမာယုတော’’တိ။ ယထာဟ – ‘‘မဟာအာနိသဒေါ ဝါ ဥဒ္ဓနကူဋသဒိသေဟိ အာနိသဒမံသေဟိ အစ္စုဂ္ဂတေဟိ သမန္နာဂတော’’တိ (မဟာဝ။ အဋ္ဌ။ ၁၁၉)။ မဟာနိသဒမံသော ဝါတိ ဧတ္ထ ဝါ-သဒ္ဒေန ဘဋ္ဌကဋိကော သင်္ဂဟိတော။ ဝါတဏ္ဍိကောတိ အဏ္ဍကောသေသု ဝုဒ္ဓိရောဂေန သမန္နာဂတော။ မဟာဦရူတိ သရီရဿ အနနုရူပေဟိ မဟန္တေဟိ သတ္တီဟိ သမန္နာဂတော။ သင်္ဃဋ္ဋနကဇာဏုကောတိ အညမညံ သင်္ဃဋ္ဋေဟိ ဇာဏူဟိ သမန္နာဂတော။

၂၅၀၉။ ဘိန္နဇာဏူတိ ယဿ ဧကော ဝါ ဒွေ ဝါ ဇာဏူ ဘိန္နာ ဟောန္တိ။ မဟာဇာဏူတိ မဟန္တေန ဇာဏုနာ သမန္နာဂတော။ ဒီဃဇင်္ဃောတိ ယဋ္ဌိသဒိသဇင်္ဃော။ ဝိကဋော ဝါတိ တိရိယံ ဂမနပါဒေဟိ သမန္နာဂတော၊ ယဿ စင်္ကမတော ဇာဏုကာ ဗဟိ နိဂ္ဂစ္ဆန္တိ။ ပဏှော ဝါတိ ပစ္ဆတော ပရိဝတ္တပါဒေဟိ သမန္နာဂတော၊ ယဿ စင်္ကမတော ဇာဏုကာ အန္တော ပဝိသန္တိ။ ‘‘ပန္တော’’တိ စ ‘‘သဏှော’’တိ စ ဧတဿေဝ ဝေဝစနာနိ။ ဥဗ္ဗဒ္ဓပိဏ္ဍိကောတိ ဟေဋ္ဌာ ဩရုဠှာဟိ ဝါ ဥပရိ အာရုဠှာဟိ ဝါ မဟတီဟိ ဇင်္ဃပိဏ္ဍိကာဟိ သမန္နာဂတော။

၂၅၁၀။ ယဋ္ဌိဇင်္ဃောတိ ယဋ္ဌိသဒိသာယ ဇင်္ဃာယ သမန္နာဂတော။ မဟာဇင်္ဃောတိ သရီရဿ အနနုရူပါယ မဟတိယာ ဇင်္ဃာယ သမန္နာဂတော။ မဟာပါဒေါပိ ဝါတိ သရီရဿ အနနုရူပေဟိ မဟန္တေဟိ ပါဒေဟိ သမန္နာဂတော။ အပိ-သဒ္ဒေန ထူလဇင်္ဃပိဏ္ဍိကော သင်္ဂဟိတော၊ ဘတ္တပုဋသဒိသာယ ထူလာယ ဇင်္ဃပိဏ္ဍိယာ သမန္နာဂတောတိ အတ္ထော။ ပိဋ္ဌိကပါဒေါ ဝါတိ ပါဒဝေမဇ္ဈတော ဥဋ္ဌိတဇင်္ဃော။ မဟာပဏှိပိ ဝါတိ အနနုရူပေဟိ အတိမဟန္တေဟိ ပဏှီဟိ သမန္နာဂတော။

၂၅၁၁။ ဝင်္ကပါဒေါတိ အန္တော ဝါ ဗဟိ ဝါ ပရိဝတ္တပါဒဝသေန ဒုဝိဓော ဝင်္ကပါဒေါ။ ဂဏ္ဌိကင်္ဂုလိကောတိ သိင်္ဂိဝေရဖဏသဒိသာဟိ အင်္ဂုလီဟိ သမန္နာဂတော။ ‘‘အန္ဓနခေါ ဝါပီ’’တိ ဧတဿ အတ္ထပဒံ ‘‘ကာဠပူတိနခေါပိ စာ’’တိ။ ယထာဟ – ‘‘အန္ဓနခေါ ဝါ ကာဠဝဏ္ဏေဟိ ပူတိနခေဟိ သမန္နာဂတော’’တိ (မဟာဝ။ အဋ္ဌ။ ၁၁၉)။

၂၅၁၂။ ဣစ္စေဝန္တိ ယထာဝုတ္တဝစနီယနိဒဿနတ္ထောယံ နိပါတသမုဒါယော။ အင်္ဂဝေကလ္လတာယ ဗဟုဝိဓတ္တာ အနဝသေသံ ဝေကလ္လပ္ပကာရံ သင်္ဂဏှိတုမာဟ ‘‘ဣစ္စေဝမာဒိက’’န္တိ။

ပရိသဒူသကကထာဝဏ္ဏနာ။

၂၅၁၄။ ပတ္တစီဝရန္တိ ဧတ္ထ ‘‘သာမဏေရဿာ’’တိ အဓိကာရတော လဗ္ဘတိ။ အန္တော နိက္ခိပတောတိ ဩဝရကာဒီနံ အန္တော နိက္ခိပန္တဿ။ သဗ္ဗပယောဂေသူတိ ပတ္တစီဝရဿ အာမသနာဒိသဗ္ဗပယောဂေသု။

၂၅၁၅-၆။ ဒဏ္ဍကမ္မံ ကတွာတိ ဒဏ္ဍကမ္မံ ယောဇေတွာ။ ဒဏ္ဍေန္တိ ဝိနေန္တိ ဧတေနာတိ ဒဏ္ဍော၊ သောယေဝ ကတ္တဗ္ဗတ္တာ ကမ္မန္တိ ဒဏ္ဍကမ္မံ၊ အာဝရဏာဒိ။ အနာစာရဿ ဒုဗ္ဗစသာမဏေရဿ ကေဝလံ ဟိတကာမေန ဘိက္ခုနာ ဒဏ္ဍကမ္မံ ကတွာ ဒဏ္ဍကမ္မံ ယောဇေတွာ ယာဂုံ ဝါ ဘတ္တံ ဝါ ဝါ-သဒ္ဒေန ပတ္တံ ဝါ စီဝရံ ဝါ ဒဿေတွာ ‘‘ဒဏ္ဍကမ္မေ အာဟဋေ တွံ ဣဒံ လစ္ဆသိ’’ ဣတိ ဘာသိတုံ ဝဋ္ဋတီတိ ယောဇနာ။ ကိရာတိ ပဒပူရဏတ္ထေ နိပါတော။

၂၅၁၇။ ဓမ္မသင်္ဂါဟကတ္ထေရေဟိ ဌပိတဒဏ္ဍကမ္မံ ဒဿေတုမာဟ ‘‘အပရာဓာနုရူပေနာ’’တိအာဒိ။ တံ အပရာဓာနုရူပဒဏ္ဍကမ္မံ နာမ ဝါလိကာသလိလာဒီနံ အာဟရာပနမေဝါတိ ယောဇေတဗ္ဗံ။ အာဒိ-သဒ္ဒေန ဒါရုအာဒီနံ အာဟရာပနံ ဂဏှာတိ။ တဉ္စ ခေါ ‘‘ဩရမိဿတီ’’တိ အနုကမ္ပာယ၊ န ‘‘နဿိဿတိ ဝိဗ္ဘမိဿတီ’’တိအာဒိနယပ္ပဝတ္တေန ပါပဇ္ဈာသယေန။

၂၅၁၈-၉။ အကတ္တဗ္ဗံ ဒဏ္ဍကမ္မံ ဒဿေတုမာဟ ‘‘သီသေ ဝါ’’တိအာဒိ။ သီသေ ဝါတိ ဧတ္ထ ‘‘သာမဏေရဿာ’’တိ အဓိကာရတော လဗ္ဘတိ။ ပါသာဏာဒီနီတိ ဧတ္ထ အာဒိ-သဒ္ဒေန ဣဋ္ဌကာဒီနံ ဂဟဏံ။ သာမဏေရံ ဥဏှေ ပါသာဏေ နိပဇ္ဇာပေတုံ ဝါ ဥဏှာယ ဘူမိယာ နိပဇ္ဇာပေတုံ ဝါ ဥဒကံ ပဝေသေတုံ ဝါ ဘိက္ခုနော န ဝဋ္ဋတီတိ ယောဇနာ။

ဘဂဝတာ အနုညာတဒဏ္ဍကမ္မံ ဒဿေတုမာဟ ‘‘ဣဓာ’’တိအာဒိ။ ဣဓာတိ ဣမသ္မိံ ဒဏ္ဍကမ္မာဓိကာရေ။ အာဝရဏမတ္တန္တိ ‘‘မာ ဣဓ ပါဝိသီ’’တိ နိဝါရဏမတ္တံ။ ပကာသိတန္တိ ‘‘အနုဇာနာမိ၊ ဘိက္ခဝေ၊ ယတ္ထ ဝါ ဝသတိ၊ ယတ္ထ ဝါ ပဋိက္ကမတိ၊ တတ္ထ အာဝရဏံ ကာတု’’န္တိ (မဟာဝ။ ၁၀၇) ဘာသိတံ။

‘‘ယတ္ထ ဝါ ဝသတိ၊ ယတ္ထ ဝါ ပဋိက္ကမတီတိ ယတ္ထ ဝသတိ ဝါ ပဝိသတိ ဝါ၊ ဥဘယေနာပိ အတ္တနော ပရိဝေဏဉ္စ ဝဿဂ္ဂေန ပတ္တသေနာသနဉ္စ ဝုတ္တ’’န္တိ (မဟာဝ။ အဋ္ဌ။ ၁၀၇) အဋ္ဌကထာယ ဝုတ္တတ္တာ ယာဝ ယောဇိတံ ဒဏ္ဍကမ္မံ ကရောန္တိ၊ တာဝ အတ္တနော ပုဂ္ဂလိကပရိဝေဏံ ဝါ ဝဿဂ္ဂေန ပတ္တသေနာသနံ ဝါ ပဝိသိတုံ အဒတွာ နိဝါရဏံ အာဝရဏံ နာမ။ အဋ္ဌကထာယံ ‘‘အတ္တနော’’တိ ဝစနံ ယေ အာဝရဏံ ကရောန္တိ၊ တေ အာစရိယုပဇ္ဈာယေ သန္ဓာယ ဝုတ္တန္တိ ဝိညာယတိ။ ကေစိ ပနေတ္ထ ‘‘အတ္တနော’’တိ ဣဒံ ယဿ အာဝရဏံ ကရောန္တိ၊ တံ သန္ဓာယ ဝုတ္တန္တိ ဂဟေတွာ တတ္ထ ဝိနိစ္ဆယံ ဝဒန္တိ။ ကေစိ ဥဘယထာပိ အတ္ထံ ဂဟေတွာ ဥဘယတ္ထာပိ အာဝရဏံ ကာတဗ္ဗန္တိ ဝဒန္တိ။ ဝီမံသိတွာ ယမေတ္ထ ယုတ္တတရံ၊ တံ ဂဟေတဗ္ဗံ။

နိဝါရဏကထာဝဏ္ဏနာ။

၂၅၂၀။ ပက္ခော စ ဩပက္ကမိကော စ အာသိတ္တော စာတိ ဝိဂ္ဂဟော။ ဧတ္ထ စ ‘‘အနုပေါသထေ ဥပေါသထံ ကရောတီ’’တိအာဒီသု ယထာ ဥပေါသထဒိနေ ကတ္တဗ္ဗကမ္မံ ‘‘ဥပေါသထော’’တိ ဝုစ္စတိ၊ တထာ မာသဿ ပက္ခေ ပဏ္ဍကဘာဝမာပဇ္ဇန္တော ‘‘ပက္ခော’’တိ ဝုတ္တော။ အထ ဝါ ပက္ခပဏ္ဍကော ပက္ခော ဥတ္တရပဒလောပေန ယထာ ‘‘ဘီမသေနော ဘီမော’’တိ။ ဣဒဉ္စ ပါပါနုဘာဝေန ကဏှပက္ခေယေဝ ပဏ္ဍကဘာဝမာပဇ္ဇန္တဿ အဓိဝစနံ။ ယထာဟ ‘‘အကုသလဝိပါကာနုဘာဝေန ကာဠပက္ခေ ကာဠပက္ခေ ပဏ္ဍကော ဟောတိ၊ ဇုဏှပက္ခေ ပနဿ ပရိဠာဟော ဝူပသမ္မတိ၊ အယံ ပက္ခပဏ္ဍကော’’တိ (မဟာဝ။ အဋ္ဌ။ ၁၀၉)။

ယဿ ဥပက္ကမေန ဗီဇာနိ အပနီတာနိ၊ အယံ ဩပက္ကမိကပဏ္ဍကော။ ယဿ ပရေသံ အင်္ဂဇာတံ မုခေန ဂဟေတွာ အသုစိနာ အာသိတ္တဿ ပရိဠာဟော ဝူပသမ္မတိ၊ အယံ အာသိတ္တပဏ္ဍကော။ ဥသူယကောတိ ယဿ ပရေသံ အဇ္ဈာစာရံ ပဿတော ဥသူယာယ ဥပ္ပန္နာယ ပရိဠာဟော ဝူပသမ္မတိ၊ အယံ ဥသူယပဏ္ဍကော။ ယော ပဋိသန္ဓိယံယေဝ အဘာဝကော ဥပ္ပန္နော၊ အယံ နပုံသကပဏ္ဍကော။

၂၅၂၁။ တေသူတိ တေသု ပဉ္စသု ပဏ္ဍကေသု။ ‘‘ပက္ခပဏ္ဍကဿ ယသ္မိံပက္ခေ ပဏ္ဍကော ဟောတိ၊ တသ္မိံယေဝဿ ပက္ခေ ပဗ္ဗဇ္ဇာ ဝါရိတာ’’တိ (မဟာဝ။ အဋ္ဌ။ ၁၀၉) ကုရုန္ဒိယံ ဝုတ္တတ္တာ ‘‘တိဏ္ဏံ နိဝါရိတာ’’တိ ဣဒံ တဿ ပဏ္ဍကဿ ပဏ္ဍကပက္ခံ သန္ဓာယ ဝုတ္တန္တိ ဂဟေတဗ္ဗံ။

၂၅၂၂။ ‘‘နာသေတဗ္ဗော’’တိ ဣဒံ လိင်္ဂနာသနံ သန္ဓာယ ဝုတ္တံ။ ယထာဟ ‘‘သောပိ လိင်္ဂနာသနေနေဝ နာသေတဗ္ဗော’’တိ (မဟာဝ။ အဋ္ဌ။ ၁၀၉)။ ဧသ နယော ဥပရိပိ ဤဒိသေသု ဌာနေသု။

ပဏ္ဍကကထာဝဏ္ဏနာ။

၂၅၂၃။ ထေနေတီတိ ထေနော၊ လိင်္ဂဿ ပဗ္ဗဇိတဝေသဿ ထေနော လိင်္ဂထေနော။ သံဝါသဿ ဘိက္ခုဝဿဂဏနာဒိကဿ ထေနော သံဝါသထေနော။ တဒုဘယဿ စာတိ တဿ လိင်္ဂဿ၊ သံဝါသဿ စ ဥဘယဿ ထေနောတိ သမ္ဗန္ဓော။ ဧသ တိဝိဓောပိ ထေယျသံဝါသကော နာမ ပဝုစ္စတီတိ ယောဇနာ။

၂၅၂၄-၆။ တတ္ထ တေသု တီသု ထေယျသံဝါသကေသု ယော သယမေဝ ပဗ္ဗဇိတွာ ဘိက္ခုဝဿာနိ န ဂဏှတိ၊ ယထာဝုဍ္ဎံ ဝန္ဒနမ္ပိ နေဝ ဂဏှတိ၊ အပိ-သဒ္ဒေန အာသနေန နေဝ ပဋိဗာဟတိ ဥပေါသထပဝါရဏာဒီသု နေဝ သန္ဒိဿတီတိ သင်္ဂဏှနတော တဒုဘယမ္ပိ န ကရောတိ၊ အယံ လိင်္ဂမတ္တဿ ပဗ္ဗဇိတဝေသမတ္တဿ ထေနတော စောရိကာယ ဂဟဏတော လိင်္ဂတ္ထေနော သိယာတိ ယောဇနာ။

ယော စ ပဗ္ဗဇိတော ဟုတွာ ဘိက္ခုဝဿာနိ ဂဏှတိ၊ သော ယထာဝုဍ္ဎဝန္ဒနာဒိကံ သံဝါသံ သာဒိယန္တောဝ သံဝါသတ္ထေနကော မတောတိ ယောဇနာ။ ယထာဟ – ‘‘ဘိက္ခုဝဿဂဏနာဒိကော ဟိ သဗ္ဗောပိ ကိရိယဘေဒေါ ဣမသ္မိံ အတ္ထေ ‘သံဝါသော’တိ ဝေဒိတဗ္ဗော’’တိ (မဟာဝ။ အဋ္ဌ။ ၁၁၀)။

ဝုတ္တနယောယေဝါတိ ဥဘိန္နံ ပစ္စေကံ ဝုတ္တလက္ခဏမေဝ ဧတဿ လက္ခဏန္တိ ကတွာ ဝုတ္တံ။ အယံ တိဝိဓောပိ ထေယျသံဝါသကော အနုပသမ္ပန္နော န ဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော၊ ပုန ပဗ္ဗဇ္ဇံ ယာစန္တောပိ န ပဗ္ဗာဇေတဗ္ဗော။ ဗျတိရေကမုခေန ထေယျသံဝါသလက္ခဏံ နိယမေတုံ အဋ္ဌကထာယ (မဟာဝ။ အဋ္ဌ။ ၁၁၀) ဝုတ္တဂါထာဒွယံ ဥဒါဟရန္တော အာဟ ‘‘ယထာဟ စာ’’တိ။ ယထာ အဋ္ဌကထာစရိယော ရာဇဒုဗ္ဘိက္ခာဒိဂါထာဒွယမာဟ၊ တထာယမတ္ထော ဗျတိရေကတော ဝေဒိတဗ္ဗောတိ အဓိပ္ပာယော။

၂၅၂၇-၈။ ရာဇဒုဗ္ဘိက္ခကန္တာရ-ရောဂဝေရိဘယေဟိ ဝါတိ ဧတ္ထ ဘယ-သဒ္ဒေါ ပစ္စေကံ ယောဇေတဗ္ဗော ‘‘ရာဇဘယေန ဒုဗ္ဘိက္ခဘယေနာ’’တိအာဒိနာ။ စီဝရာဟရဏတ္ထံ ဝါတိ အတ္တနာ ပရိစ္စတ္တစီဝရံ ပုန ဝိဟာရံ အာဟရဏတ္ထာယ။ ဣဓ ဣမသ္မိံ သာသနေ။ သံဝါသံ နာဓိဝါသေတိ၊ ယာဝ သော သုဒ္ဓမာနသောတိ ရာဇဘယာဒီဟိ ဂဟိတလိင်္ဂတာယ သော သုဒ္ဓမာနသော ယာဝ သံဝါသံ နာဓိဝါသေတီတိ အတ္ထော။

ယော ဟိ ရာဇဘယာဒီဟိ ဝိနာ ကေဝလံ ဘိက္ခူ ဝဉ္စေတွာ တေဟိ သဒ္ဓိံ ဝသိတုကာမတာယ လိင်္ဂံ ဂဏှာတိ၊ သော အသုဒ္ဓစိတ္တတာယ လိင်္ဂဂ္ဂဟဏေနေဝ ထေယျသံဝါသကော နာမ ဟောတိ။ အယံ ပန တာဒိသေန အသုဒ္ဓစိတ္တေန ဘိက္ခူ ဝဉ္စေတုကာမတာယ အဘာဝတော ယာဝ သံဝါသံ နာဓိဝါသေတိ၊ တာဝ ထေယျသံဝါသကော နာမ န ဟောတိ။ တေနေဝ ‘‘ရာဇဘယာဒီဟိ ဂဟိတလိင်္ဂါနံ ‘ဂိဟီ မံ သမဏောတိ ဇာနန္တူ’တိ ဝဉ္စနာစိတ္တေ သတိပိ ဘိက္ခူနံ ဝဉ္စေတုကာမတာယ အဘာဝါ ဒေါသော န ဇာတော’’တိ တီသုပိ ဂဏ္ဌိပဒေသု ဝုတ္တံ။

ကေစိ ပန ‘‘ဝူပသန္တဘယတာ ဣဓ သုဒ္ဓစိတ္တတာ’’တိ ဝဒန္တိ၊ ဧဝဉ္စ သတိ သော ဝူပသန္တဘယော ယာဝ သံဝါသံ နာဓိဝါသေတိ၊ တာဝ ထေယျသံဝါသကော နာမ န ဟောတီတိ အယမတ္ထော ဝိညာယတိ။ ဣမသ္မိဉ္စ အတ္ထေ ဝိညာယမာနေ အဝူပသန္တဘယဿ သံဝါသသာဒိယနေပိ ထေယျသံဝါသကတာ န ဟောတီတိ အာပဇ္ဇေယျ၊ န စ အဋ္ဌကထာယံ အဝူပသန္တဘယဿ သံဝါသသာဒိယနေ အထေယျသံဝါသကတာ ဒဿိတာ။ ‘‘သဗ္ဗပါသဏ္ဍိယဘတ္တာနိ ဘုဉ္ဇန္တော’’တိ စ ဣမိနာ အဝူပသန္တဘယေနာပိ သံဝါသံ အသာဒိယန္တေနေဝ ဝသိတဗ္ဗန္တိ ဒီပေတိ။ တေနေဝ တီသုပိ ဂဏ္ဌိပဒေသု ဝုတ္တံ ‘‘ယသ္မာ ဝိဟာရံ အာဂန္တွာ သင်္ဃိကံ ဂဏှန္တဿ သံဝါသံ ပရိဟရိတုံ ဒုက္ကရံ၊ တသ္မာ ‘သဗ္ဗပါသဏ္ဍိယဘတ္တာနိ ဘုဉ္ဇန္တော’တိ ဣဒံ ဝုတ္တ’’န္တိ။ တသ္မာ ရာဇဘယာဒီဟိ ဂဟိတလိင်္ဂတာ စေတ္ထ သုဒ္ဓစိတ္တတာတိ ဂဟေတဗ္ဗံ။

တာဝ ဧသ ထေယျသံဝါသကော နာမ န ဝုစ္စတီတိ ယောဇနာ။ အယမေတ္ထ သင်္ခေပေါ၊ ဝိတ္ထာရော ပန ‘‘တတြာယံ ဝိတ္ထာရနယော’’တိ အဋ္ဌကထာယံ (မဟာဝ။ အဋ္ဌ။ ၁၁၀) အာဂတနယေန ဝေဒိတဗ္ဗော။

ထေယျသံဝါသကကထာဝဏ္ဏနာ။

၂၅၂၉-၃၀။ ယော ဥပသမ္ပန္နော ဘိက္ခု ‘‘အဟံ တိတ္ထိယော ဘဝိဿ’’န္တိ သလိင်္ဂေနေဝ အတ္တနော ဘိက္ခုဝေသေနေဝ တိတ္ထိယာနံ ဥပဿယံ ယာတိ စေတိ သမ္ဗန္ဓော။ တိတ္ထိယေသု ပက္ကန္တကော ပဝိဋ္ဌော တိတ္ထိယပက္ကန္တကော။ တေသံ လိင်္ဂေ နိဿိတေတိ တေသံ တိတ္ထိယာနံ ဝေသေ ဂဟိတေ။

၂၅၃၁။ ‘‘အဟံ တိတ္ထိယော ဘဝိဿ’’န္တိ ကုသစီရာဒိကံ ယော သယမေဝ နိဝါသေတိ၊ သောပိ ပက္ကန္တကော တိတ္ထိယပက္ကန္တကော သိယာတိ ယောဇနာ။

၂၅၃၂-၄။ နဂ္ဂေါ တေသံ အာဇီဝကာဒီနံ ဥပဿယံ ဂန္တွာတိ ယောဇနာ။ ကေသေ လုဉ္စာပေတီတိ အတ္တနော ကေသေ လုဉ္စာပေတိ။ တေသံ ဝတာနိ အာဒိယတိ ဝါတိ ယောဇနာ။ ဝတာနိ အာဒိယတီတိ ဥက္ကုဋိကပ္ပဓာနာဒီနိ ဝါ ဝတာနိ အာဒိယတိ။ တေသံ တိတ္ထိယာနံ မောရပိဉ္ဆာဒိကံ လိင်္ဂံ သညာဏံ သစေ ဂဏှာတိ ဝါ တေသံ ပဗ္ဗဇ္ဇံ၊ လဒ္ဓိမေဝ ဝါ သာရတော ဝါ ဧတိ ဥပဂစ္ဆတိ ဝါတိ ယောဇနာ။ ‘‘အယံ ပဗ္ဗဇ္ဇာ သေဋ္ဌာတိ သေဋ္ဌဘာဝံ ဝါ ဥပဂစ္ဆတီ’’တိ (မဟာဝ။ အဋ္ဌ။ ၁၁၀ တိတ္ထိယပက္ကန္တကကထာ) အဋ္ဌကထာယံ ဝုတ္တံ။ ဧသ တိတ္ထိယပက္ကန္တကော ဟောတိ ဧဝ၊ န ပန ဝိမုစ္စတိ တိတ္ထိယပက္ကန္တဘာဝတော။ နဂ္ဂဿ ဂစ္ဆတောတိ ‘‘အာဇီဝကော ဘဝိဿ’’န္တိ ကာသာယာဒီနိ အနာဒါယ နဂ္ဂဿ အာဇီဝကာနံ ဥပသံဂစ္ဆတော။

၂၅၃၅။ ထေယျသံဝါသကောအနုပသမ္ပန္နဝသေန ဝုတ္တော၊ နော ဥပသမ္ပန္နဝသေန။ ဣမိနာ ‘‘ဥပသမ္ပန္နော ဘိက္ခု ကူဋဝဿံ ဂဏှန္တောပိ အဿမဏော န ဟောတိ။ လိင်္ဂေ သဥဿာဟော ပါရာဇိကံ အာပဇ္ဇိတွာ ဘိက္ခုဝဿာဒီနိ ဂဏေန္တောပိ ထေယျသံဝါသကော န ဟောတီ’’တိ အဋ္ဌကထာဂတဝိနိစ္ဆယံ ဒီပေတိ။ တထာ ဝုတ္တောတိ ယောဇနာ။ ‘‘ဥပသမ္ပန္နဘိက္ခုနာ’’တိ ဣမိနာ အနုပသမ္ပန္နံ နိဝတ္တေတိ။ တေန စ ‘‘သာမဏေရော သလိင်္ဂေန တိတ္ထာယတနံ ဂတောပိ ပုန ပဗ္ဗဇ္ဇဉ္စ ဥပသမ္ပဒဉ္စ လဘတီ’’တိ ကုရုန္ဒဋ္ဌကထာဂတဝိနိစ္ဆယံ ဒဿေတိ။

တိတ္ထိယပက္ကန္တကဿ ကိံ ကာတဗ္ဗန္တိ? န ပဗ္ဗာဇေတဗ္ဗော၊ ပဗ္ဗာဇိတောပိ န ဥပသမ္ပာဒေတဗ္ဗော၊ ဥပသမ္ပာဒိတော စ ကာသာယာနိ အပနေတွာ သေတကာနိ ဒတွာ ဂိဟိဘာဝံ ဥပနေတဗ္ဗော။ အယမတ္ထော စ ‘‘တိတ္ထိယပက္ကန္တကော ဘိက္ခဝေ အနုပသမ္ပန္နော န ဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော’’တိ (မဟာဝ။ ၁၁၀) ပါဠိတော စ ‘‘သော န ကေဝလံ န ဥပသမ္ပာဒေတဗ္ဗော၊ အထ ခေါ န ပဗ္ဗာဇေတဗ္ဗောပီ’’တိ (မဟာဝ။ အဋ္ဌ။ ၁၁၀ တိတ္ထိယပက္ကန္တကကထာ) အဋ္ဌကထာဝစနတော စ ဝေဒိတဗ္ဗော။

တိတ္ထိယပက္ကန္တကကထာဝဏ္ဏနာ။

၂၅၃၆။ ဣဓာတိ ဣမသ္မိံ ပဗ္ဗဇ္ဇူပသမ္ပဒါဓိကာရေ။ မနုဿဇာတိကတော အညဿ တိရစ္ဆာနဂတေယေဝ အန္တောဂဓတ္တံ ဒဿေတုမာဟ ‘‘ယက္ခော သက္ကောပိ ဝါ’’တိ။ တိရစ္ဆာနဂတော ဝုတ္တောတိ ဧတ္ထ ဣတိ-သဒ္ဒေါ လုတ္တနိဒ္ဒိဋ္ဌော။ ‘‘တိရစ္ဆာနဂတော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော’’တိ (မဟာဝ။ ၁၁၁) ဝစနတော ပဗ္ဗဇ္ဇာပိ ဥပလက္ခဏတော နိဝါရိတာယေဝါတိ ကတွာ ဝုတ္တံ ‘‘ပဗ္ဗာဇေတုံ န ဝဋ္ဋတီ’’တိ။ တေန တိရစ္ဆာနဂတော စ ဘဂဝတော အဓိပ္ပာယညူဟိ အဋ္ဌကထာစရိယေဟိ န ပဗ္ဗာဇေတဗ္ဗောတိ (မဟာဝ။ အဋ္ဌ။ ၁၁၁) ဝုတ္တံ။

တိရစ္ဆာနကထာဝဏ္ဏနာ။

၂၅၃၇။ ပဉ္စာနန္တရိကေ ပေါသေတိ မာတုဃာတကော၊ ပိတုဃာတကော၊ အရဟန္တဃာတကော၊ လောဟိတုပ္ပာဒကော၊ သင်္ဃဘေဒကောတိ အာနန္တရိယကမ္မေဟိ သမန္နာဂတေ ပဉ္စ ပုဂ္ဂလေ။

တတ္ထ မာတုဃာတကော (မဟာဝ။ အဋ္ဌ။ ၁၁၂) နာမ ယေန မနုဿိတ္ထိဘူတာ ဇနိကာ မာတာ သယမ္ပိ မနုဿဇာတိကေနေဝ သတာ သဉ္စိစ္စ ဇီဝိတာ ဝေါရောပိတာ၊ အယံ အာနန္တရိယေန မာတုဃာတကကမ္မေန မာတုဃာတကော၊ ဧတဿ ပဗ္ဗဇ္ဇာ စ ဥပသမ္ပဒါ စ ပဋိက္ခိတ္တာ။ ယေန ပန မနုဿိတ္ထိဘူတာပိ အဇနိကာ ပေါသာဝနိကမာတာ ဝါ စူဠမာတာ ဝါ မဟာမာတာ ဝါ ဇနိကာပိ ဝါ နမနုဿိတ္ထိဘူတာ မာတာဃာတိတာ၊ တဿ ပဗ္ဗဇ္ဇာ န ဝါရိတာ၊ န စ အာနန္တရိယော ဟောတိ။ ယေန သယံ တိရစ္ဆာနဘူတေန မနုဿိတ္ထိဘူတာ မာတာ ဃာတိတာ၊ သောပိ အာနန္တရိယော န ဟောတိ၊ တိရစ္ဆာနဂတတ္တာ ပနဿ ပဗ္ဗဇ္ဇာ ပဋိက္ခိတ္တာဝ။ ပိတုဃာတကေပိ ဧသေဝ နယော။ သစေပိ ဟိ ဝေသိယာ ပုတ္တော ဟောတိ၊ ‘‘အယံ မေ ပိတာ’’တိ န ဇာနာတိ၊ ယဿ သမ္ဘဝေန နိဗ္ဗတ္တော၊ သော စေ အနေန ဃာတိတော၊ ‘‘ပိတုဃာတကော’’တွေဝ သင်္ချံ ဂစ္ဆတိ၊ အာနန္တရိယဉ္စ ဖုသတိ။

အရဟန္တဃာတကောပိ မနုဿအရဟန္တဝသေနေဝ ဝေဒိတဗ္ဗော။ မနုဿဇာတိယဉှိ အန္တမသော အပဗ္ဗဇိတမ္ပိ ခီဏာသဝံ ဒါရကံ ဝါ ဒါရိကံ ဝါ သဉ္စိစ္စ ဇီဝိတာ ဝေါရောပေန္တော အရဟန္တဃာတကောဝ ဟောတိ၊ အာနန္တရိယဉ္စ ဖုသတိ၊ ပဗ္ဗဇ္ဇာ စဿ ဝါရိတာ။ အမနုဿဇာတိကံ ပန အရဟန္တံ၊ မနုဿဇာတိကံ ဝါ အဝသေသံ အရိယပုဂ္ဂလံ ဃာတေတွာ အာနန္တရိယော န ဟောတိ၊ ပဗ္ဗဇ္ဇာပိဿ န ဝါရိတာ၊ ကမ္မံ ပန ဗလဝံ ဟောတိ။ တိရစ္ဆာနော မနုဿအရဟန္တမ္ပိ ဃာတေတွာ အာနန္တရိယော န ဟောတိ၊ ကမ္မံ ပန ဘာရိယံ။

ယော ဒေဝဒတ္တော ဝိယ ဒုဋ္ဌစိတ္တေန ဝဓကစိတ္တေန တထာဂတဿ ဇီဝမာနကသရီရေ ခုဒ္ဒကမက္ခိကာယ ပိဝနကမတ္တမ္ပိ လောဟိတံ ဥပ္ပာဒေတိ၊ အယံ လောဟိတုပ္ပာဒကော နာမ၊ ဧတဿ ပဗ္ဗဇ္ဇာ စ ဥပသမ္ပဒါ စ ဝါရိတာ။ ယော ပန ရောဂဝူပသမနတ္ထံ ဇီဝကော ဝိယ သတ္ထေန ဖာလေတွာ ပူတိမံသဉ္စ လောဟိတဉ္စ နီဟရိတွာ ဖာသုံ ကရောတိ၊ ဗဟုံ သော ပုညံ ပသဝတိ။

ယော ဒေဝဒတ္တော ဝိယ သာသနံ ဥဒ္ဓမ္မံ ဥဗ္ဗိနယံ ကတွာ စတုန္နံ ကမ္မာနံ အညတရဝသေန သင်္ဃံ ဘိန္ဒတိ၊ အယံ သင်္ဃဘေဒကော နာမ၊ ဧတဿ ပဗ္ဗဇ္ဇာ စ ဥပသမ္ပဒါ စ ဝါရိတာ။ ‘‘မာတုဃာတကော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော’’တိအာဒိကာယ (မဟာဝ။ ၁၁၂) ပါဠိယာ ဥပသမ္ပဒါပဋိက္ခေပေါ ပဗ္ဗဇ္ဇာပဋိက္ခေပဿ ဥပလက္ခဏန္တိ အာဟ ‘‘ပဗ္ဗာဇေန္တဿ ဒုက္ကဋ’’န္တိ။

ဥဘတောဗျဉ္ဇနဉ္စေဝ ဘိက္ခုနိဒူသကဉ္စ တထာ ပဗ္ဗာဇေန္တဿ ဒုက္ကဋန္တိ သမ္ဗန္ဓော။ ဥဘတောဗျဉ္ဇနန္တိ က-ကာရလောပေန နိဒ္ဒေသော။ ဣတ္ထိနိမိတ္တုပ္ပာဒနကမ္မတော စ ပုရိသနိမိတ္တုပ္ပာဒနကမ္မတော စ ဥဘတော ဗျဉ္ဇနမဿ အတ္ထီတိ ဥဘတောဗျဉ္ဇနကော။ သော ဒုဝိဓော ဟောတိ ဣတ္ထိဥဘတောဗျဉ္ဇနကော၊ ပုရိသဥဘတောဗျဉ္ဇနကောတိ။

တတ္ထ ဣတ္ထိဥဘတောဗျဉ္ဇနကဿ (မဟာဝ။ အဋ္ဌ။ ၁၁၆) ဣတ္ထိနိမိတ္တံ ပါကဋံ ဟောတိ၊ ပုရိသနိမိတ္တံ ပဋိစ္ဆန္နံ။ ပုရိသဥဘတောဗျဉ္ဇနကဿ ပုရိသနိမိတ္တံ ပါကဋံ ဟောတိ၊ ဣတ္ထိနိမိတ္တံ ပဋိစ္ဆန္နံ။ ဣတ္ထိဥဘတောဗျဉ္ဇနကဿ ဣတ္ထီသု ပုရိသတ္တံ ကရောန္တဿ ဣတ္ထိနိမိတ္တံ ပဋိစ္ဆန္နံ ဟောတိ၊ ပုရိသနိမိတ္တံ ပါကဋံ ဟောတိ။ ပုရိသဥဘတောဗျဉ္ဇနကဿ ပုရိသာနံ ဣတ္ထိဘာဝံ ဥပဂစ္ဆန္တဿ ပုရိသနိမိတ္တံ ပဋိစ္ဆန္နံ ဟောတိ၊ ဣတ္ထိနိမိတ္တံ ပါကဋံ ဟောတိ။ ဣတ္ထိဥဘတောဗျဉ္ဇနကော သယဉ္စ ဂဗ္ဘံ ဂဏှာတိ၊ ပရဉ္စ ဂဗ္ဘံ ဂဏှာပေတိ။ ပုရိသဥဘတောဗျဉ္ဇနကော သယံ န ဂဏှာတိ၊ ပရံ ဂဏှာပေတီတိ ဣဒမေတေသံ နာနာကရဏံ။ ဣမဿ ပန ဒုဝိဓဿာပိ ဥဘတောဗျဉ္ဇနကဿနေဝ ပဗ္ဗဇ္ဇာ အတ္ထိ၊ န ဥပသမ္ပဒါတိ ဣဒမိဓ သန္နိဋ္ဌာနံ ဝေဒိတဗ္ဗံ။

ယော ပကတတ္တံ ဘိက္ခုနိံ (မဟာဝ။ အဋ္ဌ။ ၁၁၅) တိဏ္ဏံ မဂ္ဂါနံ အညတရသ္မိံ ဒူသေတိ၊ အယံ ဘိက္ခုနိဒူသကော နာမ၊ ဧတဿ ပဗ္ဗဇ္ဇာ စ ဥပသမ္ပဒါ စ ဝါရိတာ။ ယော ပန ကာယသံသဂ္ဂေန သီလဝိနာသံ ပါပေတိ၊ တဿ ပဗ္ဗဇ္ဇာ စ ဥပသမ္ပဒါ စ န ဝါရိတာ။ ဗလက္ကာရေန ပန ဩဒါတဝတ္ထဝသနံ ကတွာ အနိစ္ဆမာနံယေဝ ဒူသေန္တောပိ ဘိက္ခုနိဒူသကောယေဝ။ ဗလက္ကာရေန ပန ဩဒါတဝတ္ထဝသနံ ကတွာ ဣစ္ဆမာနံ ဒူသေန္တော ဘိက္ခုနိဒူသကော န ဟောတိ။ ကသ္မာ? ယသ္မာ ဂိဟိဘာဝေ သမ္ပဋိစ္ဆိတမတ္တေယေဝ သာ အဘိက္ခုနီ ဟောတိ။ သကိံ သီလဝိပန္နံ ပန ပစ္ဆာ ဒူသေန္တော နေဝ ဘိက္ခုနိဒူသကော ဟောတိ၊ ပဗ္ဗဇ္ဇမ္ပိ ဥပသမ္ပဒမ္ပိ လဘတိ။

၂၅၃၈။ ပါဠိအဋ္ဌကထာဝိမုတ္တံ အာစရိယပရမ္ပရာဘတဝိနိစ္ဆယံ ဒဿေတုမာဟ ‘‘ဧကတော’’တိအာဒိ။ ‘‘ဧကတော’’တိ ဣမိနာ ဘိက္ခုသင်္ဃဿာပိ ဂဟဏံ ဘဝေယျာတိ တံ ပရိဝဇ္ဇေတုံ ‘‘ဘိက္ခုနီနံ တု သန္တိကေ’’တိ ဝုတ္တံ။ ဧတေန တံဒူသကဿ ဘဗ္ဗတံ ဒီပေတိ။ သော နေဝ ဘိက္ခုနိဒူသကော သိယာ၊ ‘‘ဥပသမ္ပဒံ လဘတေဝ စ ပဗ္ဗဇ္ဇံ၊ သာ စ နေဝ ပရာဇိတာ’’တိ ဣဒံ ဒုတိယဂါထာယ ဣဓာနေတွာ ယောဇေတဗ္ဗံ။ ကေဝလံ ဘိက္ခုနိသင်္ဃေ ဥပသမ္ပန္နာ နာမ န ဟောတီတိ အဓိပ္ပာယေနေဝ ဝုတ္တံ။ ‘‘သာ စ နေဝ ပရာဇိတာ’’တိ ဣမိနာ တဿာ စ ပုန ပဗ္ဗဇ္ဇူပသမ္ပဒါယ ဘဗ္ဗတံ ဒီပေတိ။ အယမတ္ထော အဋ္ဌကထာဂဏ္ဌိပဒေပိ ဝုတ္တောယေဝ ‘‘ဘိက္ခုနီနံ ဝသေန ဧကတောဥပသမ္ပန္နံ ဒူသေတွာ ဘိက္ခုနိဒူသကော န ဟောတိ၊ ပဗ္ဗဇ္ဇာဒီနိ လဘတိ၊ သာ စ ပါရာဇိကာ န ဟောတီတိ ဝိနိစ္ဆယော’’တိ။

၂၅၃၉။ ‘‘သိက္ခမာနာသာမဏေရီသု စ ဝိပ္ပဋိပဇ္ဇန္တော နေဝ ဘိက္ခုနိဒူသကော ဟောတိ၊ ပဗ္ဗဇ္ဇမ္ပိ ဥပသမ္ပဒမ္ပိ လဘတီ’’တိ (မဟာဝ။ အဋ္ဌ။ ၁၁၅) အဋ္ဌကထာဂတဝိနိစ္ဆယံ ဒဿေတုမာဟ ‘‘သစေ အနုပသမ္ပန္နဒူသကော’’တိ။ ‘‘ဥပသမ္ပဒံ လဘတေဝ စ ပဗ္ဗဇ္ဇ’’န္တိ ဣဒံ ယထာဌာနေပိ ယောဇေတဗ္ဗံ။ သာ စ နေဝ ပရာဇိတာတိ ဣဒံ ပန အဋ္ဌကထာယ အနာဂတတ္တာ စ အနုပသမ္ပန္နာယ ဥပသမ္ပန္နဝိကပ္ပာဘာဝါ စ န ယောဇေတဗ္ဗံ။ အသတိ ဟိ ဥပသမ္ပန္နဝိကပ္ပေ ပရာဇိတဝိကပ္ပာသင်္ဂဟော ပဋိသေဓော နိရတ္ထကောတိ သာ ပဗ္ဗဇ္ဇူပသမ္ပဒါနံ ဘဗ္ဗာယေဝါတိ ဒဋ္ဌဗ္ဗာ။ ဣမေ ပန ပဏ္ဍကာဒယော ဧကာဒသ ပုဂ္ဂလာ ‘‘ပဏ္ဍကော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော’’တိအာဒိဝစနတော (မဟာဝ။ ၁၀၉) အဘဗ္ဗာယေဝ၊ နေသံ ပဗ္ဗဇ္ဇာ စ ဥပသမ္ပဒါ စ န ရုဟတိ၊ တသ္မာ န ပဗ္ဗာဇေတဗ္ဗာ။ ဇာနိတွာ ပဗ္ဗာဇေန္တော၊ ဥပသမ္ပာဒေန္တော စ ဒုက္ကဋံ အာပဇ္ဇတိ။ အဇာနိတွာပိ ပဗ္ဗာဇိတာ၊ ဥပသမ္ပာဒိတာ စ ဇာနိတွာ လိင်္ဂနာသနာယ နာသေတဗ္ဗာ။

ဧကာဒသအဘဗ္ဗပုဂ္ဂလကထာဝဏ္ဏနာ။

၂၅၄၀။ နူပသမ္ပာဒနီယောဝါတိ န ဥပသမ္ပာဒေတဗ္ဗောဝ။ အနုပဇ္ဈာယကောတိ အသန္နိဟိတဥပဇ္ဈာယော ဝါ အဂ္ဂဟိတဥပဇ္ဈာယဂ္ဂဟဏော ဝါ။ ကရောတောတိ အနုပဇ္ဈာယကံ ဥပသမ္ပာဒယတော။ ဒုက္ကဋံ ဟောတီတိ အာစရိယဿ စ ဂဏဿ စ ဒုက္ကဋာပတ္တိ ဟောတိ။ န ကုပ္ပတိ သစေ ကတန္တိ သစေ အနုပဇ္ဈာယကဿ ဥပသမ္ပဒါကမ္မံ ကတံ ဘဝေယျ၊ တံ န ကုပ္ပတိ သမဂ္ဂေန သင်္ဃေန အကုပ္ပေန ဌာနာရဟေန ကတတ္တာ။

၂၅၄၁။ ဧကေတိ အဘယဂိရိဝါသိနော။ ‘‘န ဂဟေတဗ္ဗမေဝါ’’တိ အဋ္ဌကထာယ ဒဠှံ ဝုတ္တတ္တာ ဝုတ္တံ။ တံ ဝစနံ။ ဧတ္ထ စ ဥပဇ္ဈာယေ အသန္နိဟိတေပိ ဥပဇ္ဈာယဂ္ဂဟဏေ အကတေပိ ကမ္မဝါစာယံ ပန ဥပဇ္ဈာယကိတ္တနံ ကတံယေဝါတိ ဒဋ္ဌဗ္ဗံ။ အညထာ ‘‘ပုဂ္ဂလံ န ပရာမသတီ’’တိ ဝုတ္တာယ ကမ္မဝိပတ္တိယာ သမ္ဘဝတော ကမ္မံ ကုပ္ပေယျ။ တေနေဝ ‘‘ဥပဇ္ဈာယံ အကိတ္တေတွာ’’တိ အဝတွာ ‘‘ဥပဇ္ဈံ အဂ္ဂါဟာပေတွာ’’တိ (မဟာဝ။ အဋ္ဌ။ ၁၁၇) အဋ္ဌကထာယံ ဝုတ္တံ။ ယထာ စ အပရိပုဏ္ဏပတ္တစီဝရဿ ဥပသမ္ပဒါကာလေ ကမ္မဝါစာယံ ‘‘ပရိပုဏ္ဏဿ ပတ္တစီဝရ’’န္တိ အသန္တံ ဝတ္ထုံ ကိတ္တေတွာ ကမ္မဝါစာယ ကတာယပိ ဥပသမ္ပဒါ ရုဟတိ၊ ဧဝံ ‘‘အယံ ဗုဒ္ဓရက္ခိတော အာယသ္မတော ဓမ္မရက္ခိတဿ ဥပသမ္ပဒါပေက္ခော’’တိ အသန္တံ ပုဂ္ဂလံ ကိတ္တေတွာ ကေဝလံ သန္တပဒနီဟာရေန ကမ္မဝါစာယ ကတာယ ဥပသမ္ပဒါ ရုဟတိယေဝါတိ ဒဋ္ဌဗ္ဗံ။ တေနေဝါဟ ‘‘န ကုပ္ပတိ သစေ ကတ’’န္တိ။ ‘‘န၊ ဘိက္ခဝေ၊ အနုပဇ္ဈာယကော ဥပသမ္ပာဒေတဗ္ဗော၊ ယော ဥပသမ္ပာဒေယျ၊ အာပတ္တိ ဒုက္ကဋဿာ’’တိ (မဟာဝ။ ၁၁၇) ဧတ္တကမေဝ ဝတွာ ‘‘သော စ ပုဂ္ဂလော အနုပသမ္ပန္နော’’တိ အဝုတ္တတ္တာ၊ ကမ္မဝိပတ္တိလက္ခဏဿ စ အသမ္ဘဝတော ‘‘န ဂဟေတဗ္ဗမေဝ တ’’န္တိ ဝုတ္တံ။

သေသေသု သဗ္ဗတ္ထပီတိ သင်္ဃဂဏပဏ္ဍကထေယျသံဝါသကတိတ္ထိယပက္ကန္တကတိရစ္ဆာနဂတမာတုပိတုအရဟန္တဃာတကဘိက္ခုနိဒူသကသင်္ဃဘေဒကလောဟိတုပ္ပာဒကဥဘတောဗျဉ္ဇနကသင်္ခါတေဟိ ဥပဇ္ဈာယေဟိ ဥပသမ္ပာဒိတေသု သဗ္ဗေသု တေရသသု ဝိကပ္ပေသု။ ဝုတ္တဉှိ ဘဂဝတာ ‘‘န၊ ဘိက္ခဝေ၊ သင်္ဃေန ဥပဇ္ဈာယေန ဥပသမ္ပာဒေတဗ္ဗော၊ ယော ဥပသမ္ပာဒေယျ၊ အာပတ္တိ ဒုက္ကဋဿာ’’တိအာဒိ။ န ကေဝလံ ဧတေသုယေဝ တေရသသု၊ အထ ‘‘အပတ္တကအစီဝရကအစီဝရပတ္တကယာစိတကပတ္တယာစိတကစီဝရယာစိတကပတ္တစီဝရကာ’’တိ ဧတေသု ဆသု ဝိကပ္ပေသု အယံ နယော ယောဇေတဗ္ဗောတိ။ သေသ-ဂ္ဂဟဏေန ဧတေသမ္ပိ သင်္ဂဟော။ ဝုတ္တဉှေတံ ဘဂဝတာ ‘‘န၊ ဘိက္ခဝေ၊ အပတ္တကော ဥပသမ္ပာဒေတဗ္ဗော၊ ယော ဥပသမ္ပာဒေယျ၊ အာပတ္တိ ဒုက္ကဋဿာ’’တိအာဒိ (မဟာဝ။ ၁၁၈)။ အယံ နယောတိ ‘‘န ကုပ္ပတိ သစေ ကတ’’န္တိ ဝုတ္တနယော။

၂၅၄၂။ ပဉ္စဝီသတီတိ စတုဝီသတိ ပါရာဇိကာ၊ ဦနဝီသတိဝဿော စာတိ ပဉ္စဝီသတိ။ ဝုတ္တဉှိ ‘‘န၊ ဘိက္ခဝေ၊ ဇာနံ ဦနဝီသတိဝဿော ပုဂ္ဂလော ဥပသမ္ပာဒေတဗ္ဗော။ ယော ဥပသမ္ပာဒေယျ၊ ယထာဓမ္မော ကာရေတဗ္ဗော’’တိ (မဟာဝ။ ၉၉)။ ဩသာရောတိ ဥပသမ္ပဒါသင်္ခါတော ဩသာရော။ တေနေဝ စမ္ပေယျက္ခန္ဓကေ ‘‘တဉ္စေ သင်္ဃော ဩသာရေတိ၊ ဧကစ္စော သောသာရိတော’’တိအာဒိပါဌဿ (မဟာဝ။ ၃၉၆) အဋ္ဌကထာယံ ‘‘ဩသာရေတီတိ ဥပသမ္ပဒါကမ္မဝသေန ပဝေသေတီ’’တိ (မဟာဝ။ အဋ္ဌ။ ၃၉၆) ဝုတ္တံ။ ‘‘နာသနာရဟော’’တိ ဣမိနာ ‘‘ပဏ္ဍကော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော’’တိအာဒိဝစနတော (မဟာဝ။ ၁၀၉) ဥပသမ္ပာဒိတဿာပိ သေတကာနိ ဒတွာ ဂိဟိဘာဝံ ပါပေတဗ္ဗတံ ဒီပေတိ။

၂၅၄၃။ ဟတ္ထစ္ဆိန္နာဒိဗာတ္တိံသာတိ စမ္ပေယျက္ခန္ဓကေ –

‘‘ဟတ္ထစ္ဆိန္နော၊ ဘိက္ခဝေ၊ အပ္ပတ္တော ဩသာရဏံ၊ တဉ္စေ သင်္ဃော ဩသာရေတိ၊ သောသာရိတော။ ပါဒစ္ဆိန္နော…ပေ… ဟတ္ထပါဒစ္ဆိန္နော… ကဏ္ဏစ္ဆိန္နော… နာသစ္ဆိန္နော… ကဏ္ဏနာသစ္ဆိန္နော… အင်္ဂုလိစ္ဆိန္နော… အဠစ္ဆိန္နော… ကဏ္ဍရစ္ဆိန္နော… ဖဏဟတ္ထကော… ခုဇ္ဇော… ဝါမနော… ဂလဂဏ္ဍီ… လက္ခဏာဟတော… ကသာဟတော… လိခိတကော… သီပဒိကော… ပါပရောဂီ… ပရိသဒူသကော… ကာဏော… ကုဏီ… ခဉ္ဇော… ပက္ခဟတော… ဆိန္နိရိယာပထော… ဇရာဒုဗ္ဗလော… အန္ဓော… မူဂေါ… ပဓိရော… အန္ဓမူဂေါ… အန္ဓပဓိရော… မူဂပဓိရော… အန္ဓမူဂပဓိရော၊ ဘိက္ခဝေ၊ အပ္ပတ္တော ဩသာရဏံ၊ တဉ္စေ သင်္ဃော ဩသာရေတိ၊ သောသာရိတော’’တိ (မဟာဝ။ ၃၉၆) ဗာတ္တိံသ။

ကုဋ္ဌိအာဒိ စ တေရသာတိ မဟာခန္ဓကေ အာဂတာ –

‘‘ကုဋ္ဌိံ ဂဏ္ဍိံ ကိလာသိဉ္စ၊ သောသိဉ္စ အပမာရိကံ၊

တထာ ရာဇဘဋံ စောရံ၊ လိခိတံ ကာရဘေဒကံ။

‘‘ကသာဟတံ နရဉ္စေဝ၊ ပုရိသံ လက္ခဏာဟတံ၊

ဣဏာယိကဉ္စ ဒါသဉ္စ၊ ပဗ္ဗာဇေန္တဿ ဒုက္ကဋ’’န္တိ။ –

ယထာဝုတ္တာ တေရသ။

ဧဝမေတေ ပဉ္စစတ္တာလီသ ဝုတ္တာ။ တေသု ကသာဟတလက္ခဏာဟတလိခိတကာနံ တိဏ္ဏံ ဥဘယတ္ထ အာဂတတ္တာ အဂ္ဂဟိတဂ္ဂဟဏေန ဒွါစတ္တာလီသေဝ ဒဋ္ဌဗ္ဗာ။

‘‘ဟတ္ထစ္ဆိန္နာဒိဗာတ္တိံသ ၊ ကုဋ္ဌိအာဒိ စ တေရသာ’’တိ ယေ ပုဂ္ဂလာ ဝုတ္တာ၊ တေသံ။ ဩသာရော အပ္ပတ္တောတိ ဥပသမ္ပဒါအနနုရူပါတိ အတ္ထော။ ကတော စေတိ အကတ္တဗ္ဗဘာဝမသလ္လက္ခန္တေဟိ ဘိက္ခူဟိ ယဒိ ဥပသမ္ပဒါသင်္ခါတော ဩသာရော ကတော ဘဝေယျ။ ရူဟတီတိ သိဇ္ဈတိ၊ တေ ပုဂ္ဂလာ ဥပသမ္ပန္နာယေဝါတိ အဓိပ္ပာယော။ အာစရိယာဒယော ပန အာပတ္တိံ အာပဇ္ဇန္တိ။ ယထာဟ စမ္ပေယျက္ခန္ဓကဋ္ဌကထာယံ – ‘‘ဟတ္ထစ္ဆိန္နာဒယော ပန ဒွတ္တိံသ သုဩသာရိတာ၊ ဥပသမ္ပာဒိတာ ဥပသမ္ပန္နာဝ ဟောန္တိ၊ န တေ လဗ္ဘာ ကိဉ္စိ ဝတ္တုံ။ အာစရိယုပဇ္ဈာယာ၊ ပန ကာရကသင်္ဃော စ သာတိသာရာ၊ န ကောစိ အာပတ္တိတော မုစ္စတီ’’တိ (မဟာဝ။ အဋ္ဌ။ ၃၉၆)။

၂၅၄၄-၅။ ‘‘အနုဇာနာမိ၊ ဘိက္ခဝေ၊ ဒွေ တယော ဧကာနုဿာဝနေ ကာတုံ၊ တဉ္စ ခေါ ဧကေန ဥပဇ္ဈာယေနာ’’တိ (မဟာဝ။ ၁၂၃) ဝစနတော သစေ တယော အာစရိယာ ဧကသီမာယံ နိသိန္နာ ဧကဿ ဥပဇ္ဈာယဿ နာမံ ဂဟေတွာ တိဏ္ဏံ ဥပသမ္ပဒါပေက္ခာနံ ဝိသုံ ဝိသုံယေဝ ကမ္မဝါစံ ဧကက္ခဏေ ဝတွာ တယော ဥပသမ္ပာဒေန္တိ၊ ဝဋ္ဋတီတိ ဒဿေတုမာဟ ‘‘ဧကူပဇ္ဈာယကော ဟောတီ’’တိအာဒိ။

‘‘တယော’’တိ ဣဒံ အဋ္ဌုပ္ပတ္တိယံ ‘‘သမ္ဗဟုလာနံ ထေရာန’’န္တိ (မဟာဝ။ ၁၂၃) အာဂတတ္တာ ဝုတ္တံ။ ဧကတောတိ ဧကက္ခဏေ။ အနုသာဝနန္တိ ကမ္မဝါစံ။ ဩသာရေတွာတိ ဝတွာ။ ကမ္မန္တိ ဥပသမ္ပဒါကမ္မံ။ န စ ကုပ္ပတီတိ န ဝိပဇ္ဇတိ။ ကပ္ပတီတိ အဝိပဇ္ဇနတော ဧဝံ ကာတုံ ဝဋ္ဋတိ။

၂၅၄၆-၇။ ‘‘အနုဇာနာမိ၊ ဘိက္ခဝေ၊ ဒွေ တယော ဧကာနုဿာဝနေ ကာတု’’န္တိ (မဟာဝ။ ၁၂၃) ဝစနတော သစေ ဧကော အာစရိယော ‘‘ဗုဒ္ဓရက္ခိတော စ ဓမ္မရက္ခိတော စ သင်္ဃရက္ခိတော စ အာယသ္မတော သာရိပုတ္တဿ ဥပသမ္ပဒါပေက္ခော’’တိ ဥပသမ္ပဒါပေက္ခာနံ ပစ္စေကံ နာမံ ဂဟေတွာ ကမ္မဝါစံ ဝတွာ ဒွေ တယောပိ ဥပသမ္ပာဒေတိ၊ ဝဋ္ဋတီတိ ဒဿေတုမာဟ ‘‘ဧကူပဇ္ဈာယကော ဟောတီ’’တိအာဒိ။

ဥပသမ္ပဒံ အပေက္ခန္တီတိ ‘‘ဥပသမ္ပဒါပေက္ခာ’’တိ ဥပသမ္ပဇ္ဇနကာ ဝုစ္စန္တိ။ တေသံ နာမန္တိ တေသံ ဥပသမ္ပဇ္ဇန္တာနဉ္စေဝ ဥပဇ္ဈာယာနဉ္စ နာမံ။ အနုပုဗ္ဗေန သာဝေတွာတိ ယောဇနာ၊ ‘‘ဗုဒ္ဓရက္ခိတော’’တိအာဒိနာ ယထာဝုတ္တနယေန ကမ္မဝါစာယံ သကဋ္ဌာနေ ဝတွာ သာဝေတွာတိ ဝုတ္တံ ဟောတိ။ တေနာတိ ဧကေန အာစရိယေန။ ဧကတောတိ ဒွေ တယော ဇနေ ဧကတော ကတွာ။ အနုသာဝေတွာတိ ကမ္မဝါစံ ဝတွာ။ ကတံ ဥပသမ္ပဒါကမ္မံ။

၂၅၄၈။ အညမညာနုသာဝေတွာတိ အညမညဿ နာမံ အနုသာဝေတွာ၊ ဂဟေတွာတိ အတ္ထော၊ အညမညဿ နာမံ ဂဟေတွာ ကမ္မဝါစံ ဝတွာတိ ဝုတ္တံ ဟောတိ။

၂၅၄၉။ တံ ဝိဓိံ ဒဿေတုမာဟ ‘‘သုမနော’’တိအာဒိ။ သုမနောတိ အာစရိယော။ တိဿထေရဿ ဥပဇ္ဈာယဿ။ သိဿကံ သဒ္ဓိဝိဟာရိကံ။ အနုသာဝေတီတိ ကမ္မဝါစံ သာဝေတိ။ တိဿောတိ ပဌမံ ဥပဇ္ဈာယဘူတဿ ဂဟဏံ။ သုမနထေရဿာတိ ပဌမံ အာစရိယတ္ထေရမာဟ။ ဣမေ ဒွေ ဧကသီမာယံ နိသီဒိတွာ ဧကက္ခဏေ အညမညဿ သဒ္ဓိဝိဟာရိကာနံ ကမ္မဝါစံ ဝဒန္တာ အတ္တနော အတ္တနော သဒ္ဓိဝိဟာရိကံ ပဋိစ္စ ဥပဇ္ဈာယာပိ ဟောန္တိ၊ အန္တေဝါသိကေ ပဋိစ္စ အာစရိယာပိ ဟောန္တိ၊ အညမညဿ ဂဏပူရကာ စ ဟောန္တီတိ ဝုတ္တံ ဟောတိ။ ယထာဟ –

‘‘သစေ ပန နာနာစရိယာ နာနာဥပဇ္ဈာယာ ဟောန္တိ၊ တိဿတ္ထေရော သုမနတ္ထေရဿ သဒ္ဓိဝိဟာရိကံ၊ သုမနတ္ထေရော တိဿတ္ထေရဿ သဒ္ဓိဝိဟာရိကံ အနုဿာဝေတိ ၊ အညမညဉ္စ ဂဏပူရကာ ဟောန္တိ၊ ဝဋ္ဋတီ’’တိ (မဟာဝ။ အဋ္ဌ။ ၁၂၃)။

၂၅၅၀။ ဣဓာတိ ဣမသ္မိံ ဥပသမ္ပဒါဓိကာရေ။ ပဋိက္ခိတ္တာတိ ‘‘န တွေဝ နာနုပဇ္ဈာယေနာ’’တိ (မဟာဝ။ ၁၂၃) ပဋိသိဒ္ဓါ။ လောကိယေဟိ အာဒိစ္စပုတ္တော မနူတိ ယော ပဌမကပ္ပိကော မနုဿာနံ အာဒိရာဇာ ဝုစ္စတိ၊ တဿ ဝံသေ ဇာတတ္တာ အာဒိစ္စော ဗန္ဓု ဧတဿာတိ အာဒိစ္စဗန္ဓု၊ ဘဂဝါ၊ တေန။

မဟာခန္ဓကကထာဝဏ္ဏနာ။