📜

စမ္မက္ခန္ဓကကထာဝဏ္ဏနာ

၂၆၅၀။ ဧဠကာ စ အဇာ စ မိဂါ စာတိ ဝိဂ္ဂဟော။ ပသူနံ ဒွန္ဒေ ဧကတ္တနပုံသကတ္တဿ ဝိဘာသိတတ္တာ ဗဟုဝစနနိဒ္ဒေသော။ ဧဠကာနဉ္စ အဇာနဉ္စ မိဂါနံ ရောဟိတေဏိကုရုင်္ဂါနဉ္စ။ ပသဒါ စ မိဂမာတာ စ ပသဒမိဂမာတာ၊ ‘‘ပသဒမိဂမာတုယာ’’တိ ဝတ္တဗ္ဗေ ဂါထာဗန္ဓဝသေန ‘‘ပသဒ’’န္တိ နိဂ္ဂဟိတာဂမော။ ပသဒမိဂမာတုယာ စ စမ္မံ ဘိက္ခုနော ဝဋ္ဋတီတိ ယောဇနာ။ ‘‘မိဂါန’’န္တိ ဣမိနာ ဂဟိတာနမေဝေတ္ထ ဝိဘာဂဒဿနံ ‘‘ရောဟိတေဏီ’’တိအာဒိ။ ရောဟိတာဒယော မိဂဝိဘာဂဝိသေသာ။

၂၆၅၁။ ဧတေသံ ယထာဝုတ္တသတ္တာနံ စမ္မံ ဌပေတွာ အညံ စမ္မံ ဒုက္ကဋာပတ္တိယာ ဝတ္ထုဘူတန္တိ အတ္ထော။ အညန္တိ စ –

‘‘မက္ကဋော ကာဠသီဟော စ၊ သရဘော ကဒလီမိဂေါ၊

ယေ စ ဝါဠမိဂါ ဟောန္တိ၊ တေသံ စမ္မံ န ဝဋ္ဋတီ’’တိ။ (မဟာဝ။ အဋ္ဌ။ ၂၅၉) –

အဋ္ဌကထာယ ပဋိက္ခိတ္တံ စမ္မမာဟ။ မက္ကဋော နာမ သာခမိဂေါ။ ကာဠသီဟော နာမ မဟာမုခဝါနရဇာတိကော။ ဝါဠမိဂါ နာမ သီဟဗျဂ္ဃာဒယော။ ယထာဟ – ‘‘တတ္ထ ဝါဠမိဂါတိ သီဟဗျဂ္ဃအစ္ဆတရစ္ဆာ၊ န ကေဝလဉ္စ ဧတေယေဝ၊ ယေသံ ပန စမ္မံ ဝဋ္ဋတီတိ ဝုတ္တံ၊ တေ ဌပေတွာ အဝသေသာ အန္တမသော ဂေါမဟိံသဿမိဠာရာဒယောပိ သဗ္ဗေ ဣမသ္မိံ အတ္ထေ ‘ဝါဠမိဂါ’တွေဝ ဝေဒိတဗ္ဗာ’’တိ။

ထဝိကာ စ ဥပါဟနာ စ ထဝိကောပါဟနံ။ အမာနုသံ မနုဿစမ္မရဟိတံ သဗ္ဗံ စမ္မံ ထဝိကောပါဟနေ ဝဋ္ဋတီတိ ယောဇနာ။ ဧတ္ထ ထဝိကာတိ ဥပါဟနာဒိကောသကဿ ဂဟဏံ။ ယထာဟ ‘‘မနုဿစမ္မံ ဌပေတွာ ယေန ကေနစိ စမ္မေန ဥပါဟနာ ဝဋ္ဋတိ။ ဥပါဟနာကောသကသတ္ထကကောသကကုဉ္ဇိကာကောသကေသုပိ ဧသေဝ နယော’’တိ (မဟာဝ။ အဋ္ဌ။ ၂၅၉)။

၂၆၅၂။ ‘‘အနုဇာနာမိ၊ ဘိက္ခဝေ၊ သဗ္ဗပစ္စန္တိမေသု ဇနပဒေသု ဂုဏင်္ဂုဏူပါဟန’’န္တိ (မဟာဝ။ ၂၅၉) ဝစနတော ‘‘ဝဋ္ဋန္တိ မဇ္ဈိမေ ဒေသေ၊ န ဂုဏင်္ဂုဏူပါဟနာ’’တိ ဝုတ္တံ။ မဇ္ဈိမေ ဒေသေတိ ‘‘ပုရတ္ထိမာယ ဒိသာယ ဂဇင်္ဂလံ နာမ နိဂမော’’တိအာဒိနာ (မဟာဝ။ ၂၅၉) ဝုတ္တသီမာပရိစ္ဆေဒေ မဇ္ဈိမဒေသေ။ ဂုဏင်္ဂုဏူပါဟနာတိ စတုပဋလတော ပဋ္ဌာယ ဗဟုပဋလာ ဥပါဟနာ။ ယထာဟ – ‘‘ဂုဏင်္ဂုဏူပါဟနာတိ စတုပဋလတော ပဋ္ဌာယ ဝုစ္စတီ’’တိ (မဟာဝ။ အဋ္ဌ။ ၂၄၅)။ မဇ္ဈိမဒေသေ ဂုဏင်္ဂုဏူပါဟနာ န ဝဋ္ဋန္တီတိ ယောဇနာ။ အန္တောအာရာမေတိ ဧတ္ထ ပကရဏတော ‘‘သဗ္ဗေသ’’န္တိ လဗ္ဘတိ၊ ဂိလာနာနမိတရေသဉ္စ သဗ္ဗေသန္တိ အတ္ထော။ သဗ္ဗတ္ထာပိ စာတိ အန္တောအာရာမေ၊ ဗဟိ စာတိ သဗ္ဗတ္ထာပိ။ ရောဂိနောတိ ဂိလာနဿ ဝဋ္ဋန္တီတိ ယောဇနာ။

၂၆၅၃။ ပုဋဗဒ္ဓါ ခလ္လကဗဒ္ဓါစာတိ ပစ္စေကံ ယောဇေတဗ္ဗံ။ ဝိသေသော ပနေတာသံ အဋ္ဌကထာယမေဝ ဝုတ္တော ‘‘ပုဋဗဒ္ဓါတိ ယောနကဥပါဟနာ ဝုစ္စတိ၊ ယာ ယာဝဇင်္ဃတော သဗ္ဗပါဒံ ပဋိစ္ဆာဒေတိ။ ခလ္လကဗဒ္ဓါတိ ပဏှိပိဓာနတ္ထံ တလေ ခလ္လကံ ဗန္ဓိတွာ ကတာ’’တိ။ ပါလိဂုဏ္ဌိမာ စ ‘‘ပလိဂုဏ္ဌိတွာ ကတာ၊ ယာ ဥပရိ ပါဒမတ္တမေဝ ပဋိစ္ဆာဒေတိ၊ န ဇင်္ဃ’’န္တိ အဋ္ဌကထာယံ ဒဿိတာဝ။ တူလပုဏ္ဏာတိ တူလပိစုနာ ပူရေတွာ ကတာ။

သဗ္ဗာဝ နီလာ သဗ္ဗနီလာ၊ သာ အာဒိ ယာသံ တာ သဗ္ဗနီလာဒယော။ အာဒိ-သဒ္ဒေန မဟာနာမရတ္တပရိယန္တာနံ ဂဟဏံ။ ဧတာသံ သရူပံ အဋ္ဌကထာယမေဝ ဝုတ္တံ ‘‘နီလိကာ ဥမာပုပ္ဖဝဏ္ဏာ ဟောတိ၊ ပီတိကာ ကဏိကာရပုပ္ဖဝဏ္ဏာ၊ လောဟိတိကာ ဇယသုမနပုပ္ဖဝဏ္ဏာ၊ မဉ္ဇိဋ္ဌိကာ မဉ္ဇိဋ္ဌဝဏ္ဏာ ဧဝ၊ ကဏှာ အဒ္ဒါရိဋ္ဌကဝဏ္ဏာ၊ မဟာရင်္ဂရတ္တာ သတပဒိပိဋ္ဌိဝဏ္ဏာ၊ မဟာနာမရတ္တာ သမ္ဘိန္နဝဏ္ဏာ ဟောတိ ပဏ္ဍုပလာသဝဏ္ဏာ။ ကုရုန္ဒိယံ ပန ‘ပဒုမပုပ္ဖဝဏ္ဏာ’တိ ဝုတ္တ’’န္တိ (မဟာဝ။ အဋ္ဌ။ ၂၄၆)။ သဗ္ဗနီလာဒယောပိ စာတိ အပိ-သဒ္ဒေန နီလာဒိဝဒ္ဓိကာနံ ဂဟဏံ။

၂၆၅၄။ စိတြာတိ ဝိစိတြာ။ မေဏ္ဍဝိသာဏူပမဝဒ္ဓိကာတိ မေဏ္ဍာနံ ဝိသာဏသဒိသဝဒ္ဓိကာ၊ ကဏ္ဏိကဋ္ဌာနေ မေဏ္ဍသိင်္ဂသဏ္ဌာနေ ဝဒ္ဓေ ယောဇေတွာ ကတာတိ အတ္ထော။ ‘‘မေဏ္ဍဝိသာဏူပမဝဒ္ဓိကာ’’တိ ဣဒံ အဇဝိသာဏူပမဝဒ္ဓိကာနံ ဥပလက္ခဏံ။ မောရဿ ပိဉ္ဆေန ပရိသိဗ္ဗိတာတိ တလေသု ဝါ ဝဒ္ဓေသု ဝါ မောရပိဉ္ဆေဟိ သုတ္တကသဒိသေဟိ ပရိသိဗ္ဗိတာ။ ဥပါဟနာ န စ ဝဋ္ဋန္တီတိ ယောဇနာ။

၂၆၅၅။ မဇ္ဇာရာတိ ဗိဠာရာ။ ကာဠကာ ရုက္ခကဏ္ဋကာ။ ဦလူကာ ပက္ခိဗိဠာလာ။ သီဟာတိ ကေသရသီဟာဒယော သီဟာ။ ဥဒ္ဒါတိ စတုပ္ပဒဇာတိကာ။ ဒီပီ သဒ္ဒလာ။ အဇိနဿာတိ ဧဝံနာမိကဿ။ ပရိက္ခဋာတိ ဥပါဟနပရိယန္တေ စီဝရေ အနုဝါတံ ဝိယ ဝုတ္တပ္ပကာရံ စမ္မံ ယောဇေတွာ ကတာ။

၂၆၅၆။ သစေ ဤဒိသာ ဥပါဟနာ လဘန္တိ၊ တာသံ ဝဠဉ္ဇနပ္ပကာရံ ဒဿေတုမာဟ ‘‘ပုဋာဒိံ အပနေတွာ’’တိအာဒိ။ ပုဋာဒိံ သဗ္ဗသော ဆိန္ဒိတွာ ဝါ အပနေတွာ ဝါ ဥပါဟနာ ဓာရေတဗ္ဗာတိ ယောဇနာ။ ဧဝမကတွာ လဒ္ဓနီဟာရေနေဝ ဓာရေန္တဿ ဒုက္ကဋံ။ ယထာဟ – ‘‘ဧတာသု ယံ ကိဉ္စိ လဘိတွာ သစေ တာနိ ခလ္လကာဒီနိ အပနေတွာ သက္ကာ ဟောန္တိ ဝဠဉ္ဇိတုံ၊ ဝဠဉ္ဇေတဗ္ဗာ၊ တေသု ပန သတိ ဝဠဉ္ဇန္တဿ ဒုက္ကဋ’’န္တိ (မဟာဝ။ အဋ္ဌ။ ၂၄၆)။

ဝဏ္ဏဘေဒံတထာ ကတွာတိ ဧတ္ထ ‘‘ဧကဒေသေနာ’’တိ သေသော။ ‘‘သဗ္ဗသော ဝါ’’တိ အာဟရိတွာ သဗ္ဗသော ဝါ ဧကဒေသေန ဝါ ဝဏ္ဏဘေဒံ ကတွာ သဗ္ဗနီလာဒယော ဥပါဟနာ ဓာရေတဗ္ဗာတိ ယောဇနာ။ တထာ အကတွာ ဓာရေန္တဿ ဒုက္ကဋံ။ ယထာဟ ‘‘ဧတာသု ယံ ကိဉ္စိ လဘိတွာ ရဇနံ စောဠကေန ပုဉ္ဆိတွာ ဝဏ္ဏံ ဘိန္ဒိတွာ ဓာရေတုံ ဝဋ္ဋတိ။ အပ္ပမတ္တကေပိ ဘိန္နေ ဝဋ္ဋတိယေဝါ’’တိ။ နီလဝဒ္ဓိကာဒယောပိ ဝဏ္ဏဘေဒံ ကတွာ ဓာရေတဗ္ဗာ။

၂၆၅၇။ တတ္ထ ဌာနေ ပဿာဝပါဒုကာ၊ ဝစ္စပါဒုကာ၊ အာစမနပါဒုကာတိ တိဿော ပါဒုကာယော ဌပေတွာ သဗ္ဗာပိ ပါဒုကာ တာလပတ္တိကာဒိဘေဒါ သဗ္ဗာပိ သင်္ကမနီယာ ပါဒုကာ ဓာရေတုံ န ဝဋ္ဋန္တီတိ ယောဇနာ။

၂၆၅၈။ အတိက္ကန္တပမာဏံ ဥစ္စာသယနသညိတံ အာသန္ဒိဉ္စေဝ ပလ္လင်္ကဉ္စ သေဝမာနဿ ဒုက္ကဋန္တိ ယောဇနာ။ အာသန္ဒီ ဝုတ္တလက္ခဏာဝ။ ပလ္လင်္ကောတိ ပါဒေသု အာဟရိမာနိ ဝါဠရူပါနိ ဌပေတွာ ကတော၊ ဧကသ္မိံယေဝ ဒါရုမှိ ကဋ္ဌကမ္မဝသေန ဆိန္ဒိတွာ ကတာနိ အသံဟာရိမာနိ တတြဋ္ဌာနေဝ ဝါဠရူပါနိ ယဿ ပါဒေသု သန္တိ၊ ဧဝရူပေါ ပလ္လင်္ကော ကပ္ပတီတိ ‘‘အာဟရိမေနာ’’တိ ဣမိနာဝ ဒီပိတံ။ ‘‘အကပ္ပိယရူပကတော အကပ္ပိယမဉ္စော ပလ္လင်္ကော’’တိ ဟိ သာရသမာသေ ဝုတ္တံ။

၂၆၅၉။ ဂေါနကန္တိ ဒီဃလောမကမဟာကောဇဝံ။ စတုရင်္ဂုလာဓိကာနိ ကိရ တဿ လောမာနိ၊ ကာဠဝဏ္ဏဉ္စ ဟောတိ။ ‘‘စတုရင်္ဂုလတော ဦနကပ္ပမာဏလောမော ကောဇဝေါ ဝဋ္ဋတီ’’တိ ဝဒန္တိ။ ကုတ္တကန္တိ သောဠသန္နံ နာဋကိတ္ထီနံ ဌတွာ နစ္စနယောဂ္ဂံ ဥဏ္ဏာမယတ္ထရဏံ။ စိတ္တန္တိ ဘိတ္တိစ္ဆိဒ္ဒါဒိကဝိစိတြံ ဥဏ္ဏာမယတ္ထရဏံ။ ပဋိကန္တိ ဥဏ္ဏာမယံ သေတတ္ထရဏံ။ ပဋလိကန္တိ ဃနပုပ္ဖကံ ဥဏ္ဏာမယံ လောဟိတတ္ထရဏံ၊ ယော ‘‘အာမလကပတ္တော’’တိပိ ဝုစ္စတိ။

ဧကန္တလောမိန္တိ ဥဘတော ဥဂ္ဂတလောမံ ဥဏ္ဏာမယတ္ထရဏံ။ ဝိကတိန္တိ သီဟဗျဂ္ဃာဒိရူပဝိစိတြံ ဥဏ္ဏာမယတ္ထရဏံ။ ‘‘ဧကန္တလောမီတိ ဧကတောဒသံ ဥဏ္ဏာမယတ္ထရဏ’’န္တိ ဒီဃနိကာ။ တူလိကန္တိ ရုက္ခတူလလတာတူလပေါဋကိတူလသင်္ခါတာနံ တိဏ္ဏံ တူလာနံ အညတရပုဏ္ဏံ ပကတိတူလိကံ။ ဥဒ္ဒလောမိကန္တိ ဧကတော ဥဂ္ဂတလောမံ ဥဏ္ဏာမယတ္ထရဏံ။ ‘‘ဥဒ္ဒလောမီတိ ဥဘတောဒသံ ဥဏ္ဏာမယတ္ထရဏံ။ ဧကန္တလောမီတိ ဧကတောဒသံ ဥဏ္ဏာမယတ္ထရဏ’’န္တိ (ဒီ။ နိ။ အဋ္ဌ။ ၁။၁၅) ဒီဃနိကာယဋ္ဌကထာယံ ဝုတ္တံ။ သာရသမာသေ ပန ‘‘ဥဒ္ဒလောမီတိ ဧကတော ဥဂ္ဂတပုပ္ဖံ။ ဧကန္တလောမီတိ ဥဘတော ဥဂ္ဂတပုပ္ဖ’’န္တိ ဝုတ္တံ။

၂၆၆၀။ ကဋ္ဋိဿန္တိ ရတနပရိသိဗ္ဗိတံ ကောသေယျကဋ္ဋိဿမယံ ပစ္စတ္ထရဏံ။ ‘‘ကောသေယျကဋ္ဋိဿမယန္တိ ကောသေယျကသဋမယ’’န္တိ (ဒီ။ နိ။ ဋီ။ ၁။၁၅) အာစရိယဓမ္မပါလတ္ထေရေန ဝုတ္တံ၊ ကန္တိတကောသေယျပုဋမယန္တိ အတ္ထော။ ကောသေယျန္တိ ရတနပရိသိဗ္ဗိတံ ကောသိယသုတ္တမယံ ပစ္စတ္ထရဏံ။ ရတနပရိသိဗ္ဗနရဟိတံ သုဒ္ဓကောသေယျံ ပန ဝဋ္ဋတိ။

ဒီဃနိကာယဋ္ဌကထာယံ ပနေတ္ထ ‘‘ဌပေတွာ တူလိကံ သဗ္ဗာနေဝ ဂေါနကာဒီနိ ရတနပရိသိဗ္ဗိတာနိ န ဝဋ္ဋန္တီ’’တိ (ဒီ။ နိ။ အဋ္ဌ။ ၁။၁၅) ဝုတ္တံ။ တတ္ထ ‘‘ဌပေတွာ တူလိက’’န္တိ ဧတေန ရတနပရိသိဗ္ဗနရဟိတာပိ တူလိကာ န ဝဋ္ဋတီတိ ဒီပေတိ။ ‘‘ရတနပရိသိဗ္ဗိတာနိ န ဝဋ္ဋန္တီ’’တိ ဣမိနာ ပန ယာနိ ရတနပရိသိဗ္ဗိတာနိ၊ တာနိ ဘူမတ္ထရဏဝသေန ယထာနုရူပံ မဉ္စာဒီသု စ ဥပနေတုံ ဝဋ္ဋတီတိ ဒီပိတန္တိ ဝေဒိတဗ္ဗံ။ ဧတ္ထ စ ဝိနယပရိယာယံ ပတွာ ဂရုကေ ဌာတဗ္ဗတ္တာ ဣဓ ဝုတ္တနယေနေဝေတ္ထ ဝိနိစ္ဆယော ဝေဒိတဗ္ဗော။ သုတ္တန္တိကဒေသနာယံ ပန ဂဟဋ္ဌာနမ္ပိ ဝသေန ဝုတ္တတ္တာ နေသံ သင်္ဂဏှနတ္ထံ ‘‘ဌပေတွာ တူလိကံ…ပေ… ဝဋ္ဋန္တီတိ ဝုတ္တ’’န္တိ (ဒီ။ နိ။ အဋ္ဌ။ ၁။၁၅) အပရေ။

ဟတ္ထိအဿရထတ္ထရန္တိ ဟတ္ထိပိဋ္ဌေ အတ္ထရိတံ အတ္ထရဏံ ဟတ္ထတ္ထရဏံ နာမ။ အဿရထတ္ထရေပိ ဧသေဝ နယော။ ကဒလိမိဂပဝရ-ပစ္စတ္ထရဏကမ္ပိ စာတိ ကဒလိမိဂစမ္မံ နာမ အတ္ထိ၊ တေန ကတံ ပဝရပစ္စတ္ထရဏန္တိ အတ္ထော။ တံ ကိရ သေတဝတ္ထဿ ဥပရိ ကဒလိမိဂစမ္မံ ပတ္ထရိတွာ သိဗ္ဗေတွာ ကရောန္တိ။ ပိ-သဒ္ဒေန အဇိနပ္ပဝေဏီ ဂဟိတာ။ အဇိနပ္ပဝေဏီ နာမ အဇိနစမ္မေဟိ မဉ္စပမာဏေန သိဗ္ဗေတွာ ကတာ ပဝေဏီ။ တာနိ ကိရ စမ္မာနိ သုခုမတရာနိ၊ တသ္မာ ဒုပဋ္ဋတိပဋ္ဋာနိ ကတွာ သိဗ္ဗန္တိ။ တေန ဝုတ္တံ ‘‘အဇိနပ္ပဝေဏီ’’တိ။

၂၆၆၁။ ရတ္တဝိတာနဿ ဟေဋ္ဌာတိ ကုသုမ္ဘာဒိရတ္တဿ လောဟိတဝိတာနဿ ဟေဋ္ဌာ ကပ္ပိယပစ္စတ္ထရဏေဟိ အတ္ထတံ သယနာသနဉ္စ။ ကသာဝရတ္တဝိတာနဿ ပန ဟေဋ္ဌာ ကပ္ပိယပစ္စတ္ထရဏေန အတ္ထတံ ဝဋ္ဋတိ။ တေနေဝ ဝက္ခတိ ‘‘ဟေဋ္ဌာ အကပ္ပိယေ’’တိအာဒိ။

ဒွိဓာရတ္တူပဓာနကန္တိ သီသပဿေ၊ ပါဒပဿေ စာတိ ဥဘတောပဿေ ပညတ္တရတ္တဗိဗ္ဗောဟနဝန္တဉ္စ သယနာသနံ။ ဣဒံ သဗ္ဗံ အကပ္ပိယံ ပရိဘုဉ္ဇတော ဒုက္ကဋံ ဟောတိ။ ‘‘ယံ ပန ဧကမေဝ ဥပဓာနံ ဥဘောသု ပဿေသု ရတ္တံ ဝါ ဟောတိ ပဒုမဝဏ္ဏံ ဝါ ဝိစိတြံ ဝါ၊ သစေ ပမာဏယုတ္တံ၊ ဝဋ္ဋတီ’’တိ (မဟာဝ။ အဋ္ဌ။ ၂၅၄) အဋ္ဌကထာဝိနိစ္ဆယော ဧတေနေဝ ဗျတိရေကတော ဝုတ္တော ဟောတိ။ ‘‘ယေဘုယျရတ္တာနိပိ ဒွေ ဗိဗ္ဗောဟနာနိ န ဝဋ္ဋန္တီ’’တိ ဂဏ္ဌိပဒေ ဝုတ္တံ။ တေနေဝ ယေဘုယျေန ရတ္တဝိတာနမ္ပိ န ဝဋ္ဋတီတိ ဝိညာယတိ။

ဧတ္ထ စ ကိဉ္စာပိ ဒီဃနိကာယဋ္ဌကထာယံ ‘‘အလောဟိတကာနိ ဒွေပိ ဝဋ္ဋန္တိယေဝ၊ တတော ဥတ္တရိ လဘိတွာ အညေသံ ဒါတဗ္ဗာနိ၊ ဒါတုံ အသက္ကောန္တော မဉ္စေ တိရိယံ အတ္ထရိတွာ ဥပရိ ပစ္စတ္ထရဏံ ဒတွာ နိပဇ္ဇိတုမ္ပိ လဘတီ’’တိ (ဒီ။ နိ။ အဋ္ဌ။ ၁။၁၅) အဝိသေသေန ဝုတ္တံ။ သေနာသနက္ခန္ဓကသံဝဏ္ဏနာယံ ပန ‘‘အဂိလာနဿ သီသူပဓာနဉ္စ ပါဒူပဓာနဉ္စာတိ ဒွယမေဝ ဝဋ္ဋတိ၊ ဂိလာနဿ ဗိဗ္ဗောဟနာနိ သန္ထရိတွာ ဥပရိ ပစ္စတ္ထရဏံ ဒတွာ နိပဇ္ဇိတုမ္ပိ ဝဋ္ဋတီ’’တိ (စူဠဝ။ အဋ္ဌ။ ၂၉၇) ဝုတ္တတ္တာ ဂိလာနောယေဝ မဉ္စေ တိရိယံ အတ္ထရိတွာ နိပဇ္ဇိတုံ လဘတီတိ ဝေဒိတဗ္ဗံ။

၂၆၆၂။ ဥဒ္ဓံ သေတဝိတာနမ္ပိ ဟေဋ္ဌာ အကပ္ပိယေ ပစ္စတ္ထရဏေ သတိ န ဝဋ္ဋတီတိ ယောဇနာ။ တသ္မိန္တိ အကပ္ပိယပစ္စတ္ထရဏေ။

၂၆၆၃။ ‘‘ဌပေတွာ’’တိ ဣမိနာ အာသန္ဒာဒိတ္တယဿ ဝဋ္ဋနာကာရော နတ္ထီတိ ဒီပေတိ။ သေသံ သဗ္ဗန္တိ ဂေါနကာဒိ ဒွိဓာရတ္တူပဓာနကပရိယန္တံ သဗ္ဗံ။ ဂိဟိသန္တကန္တိ ဂိဟီနံ သန္တကံ တေဟိယေဝ ပညတ္တံ၊ ဣမိနာ ပဉ္စသု သဟဓမ္မိကေသု အညတရေန ဝါ တေသံ အာဏတ္တိယာ ဝါ ပညတ္တံ န ဝဋ္ဋတီတိ ဒီပေတိ။ လဘတေတိ နိသီဒိတုံ လဘတိ။

၂၆၆၄။ တံ ကတ္ထ လဘတီတိ ပဒေသနိယမံ ဒဿေတုမာဟ ‘‘ဓမ္မာသနေ’’တိအာဒိ။ ဓမ္မာသနေတိ ဧတ္ထ အဋ္ဌကထာယံ ‘‘ယဒိ ဓမ္မာသနေ သင်္ဃိကမ္ပိ ဂေါနကာဒိံ ဘိက္ခူဟိ အနာဏတ္တာ အာရာမိကာဒယော သယမေဝ ပညာပေန္တိ စေဝ နီဟရန္တိ စ၊ ဧတံ ဂိဟိဝိကတနီဟာရံ နာမ။ ဣမိနာ ဂိဟိဝိကတနီဟာရေန ဝဋ္ဋတီ’’တိ (စူဠဝ။ အဋ္ဌ။ ၃၂၀၊ ဝိ။ သင်္ဂ။ အဋ္ဌ။ ပကိဏ္ဏကဝိနိစ္ဆယကထာ ၅၆ အတ္ထတော သမာနံ) ဝုတ္တံ။ ဘတ္တဂ္ဂေ ဝါတိ ဝိဟာရေ နိသီဒါပေတွာ ပရိဝေသနဋ္ဌာနေ ဝါ ဘောဇနသာလာယံ ဝါ။ အပိသဒ္ဒေန ဂိဟီနံ ဂေဟေပိ တေဟိ ပညတ္တေ ဂေါနကာဒိမှိ နိသီဒိတုံ အနာပတ္တီတိ ဒီပေတိ။ ဓမ္မာသနာဒိပဒေသနိယမနေန တတော အညတ္ထ ဂိဟိပညတ္တေပိ တတ္ထ နိသီဒိတုံ န ဝဋ္ဋတီတိ ဗျတိရေကတော ဝိညာယတိ။

ဘူမတ္ထရဏကေတိ ဧတ္ထ ‘‘ကတေ’’တိ သေသော။ တတ္ထာတိ သင်္ဃိကေ ဝါ ဂိဟိသန္တကေ ဝါ ဂေါနကာဒိမှိ သဟဓမ္မိကေဟိ အနာဏတ္တေဟိ ဂိဟီဟိ ဧဝ ဘူမတ္ထရဏေ ကတေ။ သယိတုန္တိ ဥပရိ အတ္တနော ပစ္စတ္ထရဏံ ဒတွာ နိပဇ္ဇိတုံ ဝဋ္ဋတိ။ အပိ-သဒ္ဒေန နိသီဒိတုမ္ပိ ဝါတိ သမုစ္စိနောတိ။ ‘‘ဘူမတ္ထရဏကေ’’တိ ဣမိနာ ဂိဟီဟိ ဧဝ မဉ္စာဒီသု သယနတ္ထံ အတ္ထတေ ဥပရိ အတ္တနော ပစ္စတ္ထရဏံ ဒတွာ သယိတုံ ဝါ နိသီဒိတုံ ဝါ န ဝဋ္ဋတီတိ ဒီပေတိ။

စမ္မက္ခန္ဓကကထာဝဏ္ဏနာ။