📜

ပါရိဝါသိကက္ခန္ဓကကထာဝဏ္ဏနာ

၂၇၄၈။ ဧဝံ မဟာဝဂ္ဂဝိနိစ္ဆယံ သင်္ခေပေန ဒဿေတွာ စူဠဝဂ္ဂါဂတဝိနိစ္ဆယံ ဒဿေတုမာဟ ‘‘တဇ္ဇနီယ’’န္တိအာဒိ။ တဇ္ဇနီယန္တိ ကလဟကာရကာနံ ဘိက္ခူနံ တတော ဝိရမနတ္ထာယ နိဂ္ဂဟဝသေန အနုညာတံ ဉတ္တိစတုတ္ထံ တဇ္ဇနီယကမ္မဉ္စ။ နိယဿန္တိ ဗာလဿ အဗျတ္တဿ အာပတ္တိဗဟုလဿ အနပဒါနဿ အနနုလောမိကေဟိ ဂိဟိသံသဂ္ဂေဟိ သံသဋ္ဌဿ ဝိဟရတော ဘိက္ခုနော နိဂ္ဂဟဝသေန နိဿာယ ဝသနတ္ထာယ ကာတုံ အနုညာတံ ဉတ္တိစတုတ္ထံ နိယဿကမ္မဉ္စ။

ပဗ္ဗာဇန္တိ ကုလဒူသကဿ ဘိက္ခုနော ယတ္ထ တေန ကုလဒူသနံ ကတံ၊ တတ္ထ န လဘိတဗ္ဗအာဝါသတ္ထာယ နိဂ္ဂဟဝသေန အနုညာတံ ဉတ္တိစတုတ္ထံ ပဗ္ဗာဇနီယကမ္မဉ္စ။ ပဋိသာရဏန္တိ သဒ္ဓဿ ဥပါသကဿ ဒါယကဿ ကာရကဿ သင်္ဃုပဋ္ဌာကဿ ဇာတိအာဒီဟိ အက္ကောသဝတ္ထူဟိ အက္ကောသကဿ ဘိက္ခုနော တံခမာပနတ္ထာယ နိဂ္ဂဟဝသေန အနုညာတံ ဉတ္တိစတုတ္ထံ ပဋိသာရဏီယကမ္မဉ္စ။

တိဝိဓုက္ခေပနန္တိ အာပတ္တိယာ အဒဿနေ၊ အာပတ္တိယာ အပ္ပဋိကမ္မေ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ စ တတော ဩရမိတုံ နိဂ္ဂဟဝသေန အနုညာတံ ဉတ္တိစတုတ္ထံ တိဝိဓံ ဥက္ခေပနီယကမ္မဉ္စာတိ။ ဒီပယေတိ ပါဠိယာ၊ အဋ္ဌကထာယ စ ဝုတ္တနယေန ပကာသေယျာတိ အတ္ထော။

တဇ္ဇနီယာဒိကမ္မာနံ ဩသာရဏနိဿာရဏဝသေန ပစ္စေကံ ဒုဝိဓတ္တေပိ တံ ဘေဒံ အနာမသိတွာ ကေဝလံ ဇာတိဝသေန ‘‘သတ္တ ကမ္မာနီ’’တိ ဝုတ္တန္တိ ဝေဒိတဗ္ဗံ။ ယထာ ဒဿိတော ပနေတေသံ ဝိသေသော အတ္ထုပ္ပတ္တိဝသေနာတိ ဒဋ္ဌဗ္ဗော။ ဝိတ္ထာရော ပနေသံ ကမ္မက္ခန္ဓကတော ဝေဒိတဗ္ဗော။

၂၇၄၉။ ခန္ဓကေ ကမ္မသင်္ခါတေ ခန္ဓကေ အာဂတာနိ တေစတ္တာလီသ ဝတ္တာနိ။ တဒနန္တရေတိ တဿ ကမ္မက္ခန္ဓကဿ အနန္တရေ။ ခန္ဓကေတိ ပါရိဝါသိကက္ခန္ဓကေ။ နဝ အဓိကာနိ ယေသံ တေ နဝါဓိကာနိ တိံသေဝ ဝတ္တာနိ၊ ဧကူနစတ္တာလီသ ဝတ္တာနီတိ ဝုတ္တံ ဟောတိ။

ကမ္မက္ခန္ဓကေ တာဝ –

‘‘အာပတ္တိယာ အဒဿနေ ဥက္ခေပနီယကမ္မကတေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနာပိ ဘိက္ခုနိယော န ဩဝဒိတဗ္ဗာ၊ ယာယ အာပတ္တိယာ သင်္ဃေန အာပတ္တိယာ အဒဿနေ ဥက္ခေပနီယကမ္မံ ကတံ ဟောတိ၊ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ၊ န ပကတတ္တဿ ဘိက္ခုနော အဘိဝါဒနံ ပစ္စုဋ္ဌာနံ အဉ္ဇလိကမ္မံ သာမီစိကမ္မံ အာသနာဘိဟာရော သေယျာဘိဟာရော ပါဒေါဒကံ ပါဒပီဌံ ပါဒကထလိကံ ပတ္တစီဝရပဋိဂ္ဂဟဏံ နဟာနေ ပိဋ္ဌိပရိကမ္မံ သာဒိတဗ္ဗံ၊ န ပကတတ္တော ဘိက္ခု သီလဝိပတ္တိယာ အနုဒ္ဓံသေတဗ္ဗော၊ န အာစာရဝိပတ္တိယာ အနုဒ္ဓံသေတဗ္ဗော၊ န ဒိဋ္ဌိဝိပတ္တိယာ အနုဒ္ဓံသေတဗ္ဗော၊ န အာဇီဝဝိပတ္တိယာ အနုဒ္ဓံသေတဗ္ဗော၊ န ဘိက္ခု ဘိက္ခူဟိ ဘေဒေတဗ္ဗော၊ န ဂိဟိဒ္ဓဇော ဓာရေတဗ္ဗော၊ န တိတ္ထိယဒ္ဓဇော ဓာရေတဗ္ဗော၊ န တိတ္ထိယာ သေဝိတဗ္ဗာ၊ ဘိက္ခူ သေဝိတဗ္ဗာ၊ ဘိက္ခုသိက္ခာယ သိက္ခိတဗ္ဗံ၊ န ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ န ပကတတ္တော ဘိက္ခု အာသာဒေတဗ္ဗော အန္တော ဝါ ဗဟိ ဝါ၊ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ (စူဠဝ။ ၅၁) –

ဧဝံ စေတာနိ တေစတ္တာလီသ ဝတ္တာနိ သန္ဓာယ ဝုတ္တံ ‘‘တေစတ္တာလီသ ဝတ္တာနိ၊ ခန္ဓကေ ကမ္မသညိတေ’’တိ။

ပါရိဝါသိကက္ခန္ဓကေ (စူဠဝ။ ၇၆-၈၂) –

‘‘ပါရိဝါသိကေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ၊ ယာယ အာပတ္တိယာ သင်္ဃေန ပရိဝါသော ဒိန္နော ဟောတိ၊ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ၊ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗံ။

‘‘န ၊ ဘိက္ခဝေ၊ ပါရိဝါသိကေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ၊ ယော ဟောတိ သင်္ဃဿ အာသနပရိယန္တော သေယျာပရိယန္တော ဝိဟာရပရိယန္တော၊ သော တဿ ပဒါတဗ္ဗော၊ တေန စ သော သာဒိတဗ္ဗော။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ ပကတတ္တဿ ဘိက္ခုနော ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော ‘မာ မံ ဇာနိံသူ’တိ။

‘‘ပါရိဝါသိကေန၊ ဘိက္ခဝေ၊ ဘိက္ခုနာ အာဂန္တုကေန အာရောစေတဗ္ဗံ၊ အာဂန္တုကဿ အာရောစေတဗ္ဗံ၊ ဥပေါသထေ အာရောစေတဗ္ဗံ၊ ပဝါရဏာယ အာရောစေတဗ္ဗံ၊ သစေ ဂိလာနော ဟောတိ၊ ဒူတေနပိ အာရောစေတဗ္ဗံ။

‘‘န ၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော အညတြ ပကတတ္တေန အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော အညတြ ပကတတ္တေန အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဂန္တဗ္ဗော အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ အဘိက္ခုကော အနာဝါသော ဂန္တဗ္ဗော အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော အညတြ ပကတတ္တေန အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အနာဝါသော ဂန္တဗ္ဗော အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော အညတြ ပကတတ္တေန အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အနာဝါသော ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အနာဝါသော ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အနာဝါသော ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော ယတ္ထဿု ဘိက္ခူ နာနာသံဝါသကာ အညတြ ပကတတ္တေန အညတြ အန္တရာယာ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အနာဝါသော ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဝါ အနာဝါသော ဝါ ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အနာဝါသော ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဝါ အနာဝါသော ဝါ ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အနာဝါသော ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘ဂန္တဗ္ဗော ၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဝါ အနာဝါသော ဝါ ယတ္ထဿု ဘိက္ခူ သမာနသံဝါသကာ ယံ ဇညာ ‘သက္ကောမိ အဇ္ဇေဝ ဂန္တု’န္တိ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ ပကတတ္တော ဘိက္ခု အာသနေန နိမန္တေတဗ္ဗော၊ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ ပါရိဝါသိကေန ဝုဍ္ဎတရေန ဘိက္ခုနာ သဒ္ဓိံ…ပေ… မူလာယပဋိကဿနာရဟေန ဘိက္ခုနာ သဒ္ဓိံ…ပေ… မာနတ္တာရဟေန ဘိက္ခုနာ သဒ္ဓိံ…ပေ… မာနတ္တစာရိကေန ဘိက္ခုနာ သဒ္ဓိံ…ပေ… အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

‘‘ပါရိဝါသိကစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ န စ ကရဏီယ’’န္တိ (စူဠဝ။ ၇၆-၈၂) –

ဧဝံ ပါရိဝါသိကာနံ စတုနဝုတိ ဝတ္တာနိ။

သာ စ နေသံ စတုနဝုတိသင်္ခါ ဧဝံ ဝေဒိတဗ္ဗာ – နဥပသမ္ပာဒနာဒိနကမ္မိကဂရဟပရိယောသာနာနိ နဝ ဝတ္တာနိ၊ တတော ပကတတ္တဿ ဥပေါသထဋ္ဌပနာဒိဘိက္ခူဟိသမ္ပယောဇနပရိယောသာနာနိ အဋ္ဌ၊ တတော နပုရတောဂမနာဒီ ပဉ္စ၊ နပုရေဂမနာဒီ စတ္တာရိ၊ အာဂန္တုကေန အာရောစနာဒီ စတ္တာရီတိ တိံသ၊ သဘိက္ခုကာဝါသာဒိတော အဘိက္ခုကာဝါသာဒိဂမနပအသံယုတ္တာနိ တီဏိ နဝကာနိ စာတိ သတ္တပညာသ၊ တတော နပကတတ္တေန သဒ္ဓိံ ဧကစ္ဆန္နဝါသာဒိပဋိသံယုတ္တာနိ ဧကာဒသ၊ တတော နပါရိဝါသိကဝုဍ္ဎတရမူလာယပဋိကဿနာရဟမာနတ္တာရဟမာနတ္တစာရိကအဗ္ဘာနာရဟေဟိ သဒ္ဓိံ ဧကစ္ဆန္နဝါသာဒိပဋိသံယုတ္တာနိ ပစ္စေကံ ဧကာဒသ ကတွာ ပဉ္စပညာသာယ ဝတ္တေသု ပါရိဝါသိကဝုဍ္ဎတရမူလာယပဋိကဿနာရဟမာနတ္တာရဟာနံ တိဏ္ဏံ သမာနတ္တာ တေသု ဧကံ ဧကာဒသကံ၊ မာနတ္တစာရိကအဗ္ဘာနာရဟာနံ ဒွိန္နံ သမာနတ္တာ တေသု ဧကံ ဧကာဒသကန္တိ ဒုဝေ ဧကာဒသကာနိ၊ အန္တေ ပါရိဝါသိကစတုတ္ထဿ သင်္ဃဿ ပရိဝါသာဒိဒါနစတုက္ကေ ဂဏပူရဏတ္ထဒေါသတော နိဝတ္တိဝသေန စတ္တာရိ စတ္တာရီတိ စတုနဝုတိ ဝတ္တာနိ။ တာနိ အဂ္ဂဟိတဂ္ဂဟဏေန ဧကူနစတ္တာလီသဝတ္တာနိ နာမ။ အာဒိတော နဝ၊ ဥပေါသထဋ္ဌပနာဒီနိ အဋ္ဌ၊ ပကတတ္တေန ဧကစ္ဆန္နဝါသာဒီ စတ္တာရိ စာတိ ဧကဝီသတိ ဝတ္တာနိ ကမ္မက္ခန္ဓကေ ဂဟိတတ္တာ ဣဓ ဂဏနာယ အဂ္ဂဟေတွာ တတော သေသေသု တေသတ္တတိယာ ဝတ္တေသု ပါရိဝါသိကဝုဍ္ဎတရာဒီဟိ ဧကစ္ဆန္နေ ဝါသာဒိပဋိသံယုတ္တာနိ ဒွါဝီသတိ ဝတ္တာနိ ပကတတ္တေဟိ သမာနတ္တာ တာနိ စ ‘‘ဂန္တဗ္ဗော ဘိက္ခဝေ’’တိအာဒိကံ နဝကံ တထာ ဂစ္ဆန္တဿ အနာပတ္တိဒဿနပရံ၊ န အာဝါသတော ဂစ္ဆန္တဿ အာပတ္တိဒဿနပရန္တိ တဉ္စ အဂ္ဂဟေတွာ အဝသေသေသု ဒွါစတ္တာလီသဝတ္တေသု ပါရိဝါသိကစတဥတ္ထာဒိကမ္မစတုက္ကံ ဂရုကာပတ္တိဝုဋ္ဌာနာယ ဂဏပူရဏတ္ထသာမညေန ဧကံ ကတွာ တယော အပနေတွာ ဂဏိတာနိ ဧကူနစတ္တာလီသာနိ ဟောန္တီတိ ဝုတ္တံ ‘‘နဝါဓိကာနိ တိံသေဝ၊ ခန္ဓကေ တဒနန္တရေ’’တိ။

၂၇၅၀။ ဣမာနိ ဧကူနစတ္တာလီသ ဝတ္တာနိ ပုရိမေဟိ တေစတ္တာလီသဝတ္တေဟိ သဒ္ဓိံ ဒွါသီတိ ဟောန္တီတိ အာဟ ‘‘ဧဝံ သဗ္ဗာနိ…ပေ… ဂဟိတာဂဟဏေန တူ’’တိ။

ဧဝံ ကမ္မက္ခန္ဓကပါရိဝါသိကက္ခန္ဓကေသု မဟေသိနာ ဝုတ္တာနိ ခန္ဓကဝတ္တာနိ ဂဟိတာဂဟဏေန ဒွါသီတိ ဧဝ ဟောန္တီတိ ယောဇနာ။ ဧဝမေတ္ထ ဒွါသီတိက္ခန္ဓကဝတ္တာနိ ဒဿိတာနိ။

အာဂမဋ္ဌကထာဝဏ္ဏနာယံ ပန –

‘‘ပါရိဝါသိကာနံ ဘိက္ခူနံ ဝတ္တံ ပညပေဿာမီတိ (စူဠဝ။ ၇၅) အာရဘိတွာ ‘န ဥပသမ္ပာဒေတဗ္ဗံ…ပေ… န ဆမာယံ စင်္ကမန္တေ စင်္ကမေ စင်္ကမိတဗ္ဗ’န္တိ (စူဠဝ။ ၇၆-၈၁) ဝုတ္တာဝသာနာနိ ဆသဋ္ဌိ၊ တတော ပရံ ‘န၊ ဘိက္ခဝေ၊ ပါရိဝါသိကေန ဘိက္ခုနာ ပါရိဝါသိကေန ဝုဍ္ဎတရေန ဘိက္ခုနာ သဒ္ဓိံ၊ မူလာယပဋိကဿနာရဟေန၊ မာနတ္တာရဟေန၊ မာနတ္တစာရိကေန၊ အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗ’န္တိအာဒီနံ (စူဠဝ။ ၈၂) ပကတတ္တေ စရိတဗ္ဗေဟိ အနညတ္တာ ဝိသုံ တေ အဂဏေတွာ ပါရိဝါသိကဝုဍ္ဎတရာဒီသု ပုဂ္ဂလန္တရေသု စရိတဗ္ဗတ္တာ တေသံ ဝသေန သမ္ပိဏ္ဍေတွာ ဧကေကံ ကတွာ ဂဏိတာနိ ပဉ္စာတိ ဧကသတ္တတိ ဝတ္တာနိ၊ ဥက္ခေပနီယကမ္မကတဝတ္တေသု ဝတ္တပညာပနဝသေန ဝုတ္တံ ‘န ပကတတ္တဿ ဘိက္ခုနော အဘိဝါဒနံ …ပေ… နဟာနေ ပိဋ္ဌိပရိကမ္မံ သာဒိတဗ္ဗ’န္တိ (စူဠဝ။ ၅၁) ဣဒံ အဘိဝါဒနာဒီနံ အသာဒိယနံ ဧကံ၊ ‘န ပကတတ္တော ဘိက္ခု သီလဝိပတ္တိယာ အနုဒ္ဓံသေတဗ္ဗော’တိအာဒီနိ စ ဒသာတိ ဧဝမေတာနိ ဒွါသီတိ ဟောန္တိ။ ဧတေသွေဝ ကာနိစိ တဇ္ဇနီယကမ္မာဒိဝတ္တာနိ၊ ကာနိစိ ပါရိဝါသိကာဒိဝတ္တာနီတိ အဂ္ဂဟိတဂ္ဂဟဏေန ဒွါသီတိ ဧဝါ’’တိ (မ။ နိ။ ဋီ။ ၂။၂၅၊ သာရတ္ထ။ ဋီ။ ၂။၃၉၊ ဝိ။ ဝိ။ ဋီ။ ၁။၃၉) –

ဝုတ္တံ။ ဧတာနိ ပန ဝတ္တာနိ ကဒါစိ တဇ္ဇနီယကမ္မကတာဒိကာလေ၊ ပါရိဝါသိကာဒိကာလေ စ စရိတဗ္ဗာနိ ခုဒ္ဒကဝတ္တာနီတိ ဂဟေတဗ္ဗာနိ အာဂန္တုကဝတ္တာဒီနံ စုဒ္ဒသမဟာဝတ္တာနံ ဝက္ခမာနတ္တာ။

၂၇၅၁။ ဣဒါနိ ပါရိဝါသိကဿ ဘိက္ခုနော ရတ္တိစ္ဆေဒံ၊ ဝတ္တဘေဒဉ္စ ဒဿေတုမာဟ ‘‘ပရိဝါသဉ္စ ဝတ္တဉ္စာ’’တိအာဒိ။ ပရိဝါသဉ္စ ဝတ္တဉ္စ သမာဒိန္နဿာတိ ‘‘ပရိဝါသံ သမာဒိယာမီ’’တိ ပရိဝါသဉ္စ ‘‘ဝတ္တံ သမာဒိယာမီ’’တိ ဝတ္တဉ္စ ပကတတ္တဿ ဘိက္ခုနော သန္တိကေ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဝစီဘေဒံ ကတွာ သမာဒိန္နဿ။ ဘိက္ခုနောတိ ပါရိဝါသိကဿ ဘိက္ခုနော။

၂၇၅၂။ သဟဝါသာဒယော ‘‘ဧကစ္ဆန္နေ’’တိအာဒိနာ သယမေဝ ဝက္ခတိ။ သဟဝါသော၊ ဝိနာဝါသော၊ အနာရောစနမေဝ စာတိ ဣမေဟိ တီဟိ ပါရိဝါသိကဘိက္ခုဿ ရတ္တိစ္ဆေဒေါ စ ဒုက္ကဋဉ္စ ဟောတီတိ ယောဇနာ။

၂၇၅၃။ ဥဒကပါတေန သမန္တာ နိဗ္ဗကောသဿ ဥဒကပါတဋ္ဌာနေန။ ဧကစ္ဆန္နေတိ ဧကစ္ဆန္နေ ပရိစ္ဆန္နေ ဝါ အပရိစ္ဆန္နေ ဝါ အာဝါသေ။ ပကတတ္တေန ဘိက္ခုနာ သဟ ဥက္ခိတ္တဿ နိဝါသော နိဝါရိတောတိ ယောဇနာ။ ‘‘နိဝါရိတော’’တိ ဣမိနာ ဒုက္ကဋံ ဟောတီတိ ဒီပေတိ။

၂၇၅၄။ အန္တောယေဝါတိ ဧကစ္ဆန္နဿ အာဝါသပရိစ္ဆေဒဿ အန္တောယေဝ။ ‘‘န လဗ္ဘတီ’’တိ ဣမိနာ ရတ္တိစ္ဆေဒေါ စ ဒုက္ကဋဉ္စ ဟောတီတိ ဒီပေတိ။

၂၇၅၅။ မဟာအဋ္ဌကထာဒိသူတိ အာဒိ-သဒ္ဒေန ကုရုန္ဒဋ္ဌကထာဒိံ သင်္ဂဏှာတိ။ ဥဘိန္နန္တိ ဥက္ခိတ္တကပါရိဝါသိကာနံ။ ဣတိ အဝိသေသေန နိဒ္ဒိဋ္ဌန္တိ ယောဇနာ။

၂၇၅၆။ ဣမိနာ သဟဝါသေန ရတ္တိစ္ဆေဒဉ္စ ဒုက္ကဋဉ္စ ဒဿေတွာ ဝိနာဝါသေန ဒဿေတုမာဟ ‘‘အဘိက္ခုကေ ပနာဝါသေ’’တိ။ အာဝါသေတိ ဝသနတ္ထာယ ကတသေနာသနေ။ အနာဝါသေတိ ဝါသတ္ထာယ အကတေ စေတိယဃရေ ဝါ ဗောဓိဃရေ ဝါ သမ္မဇ္ဇနိအဋ္ဋကေ ဝါ ဒါရုအဋ္ဋကေ ဝါ ပါနီယမာဠေ ဝါ ဝစ္စကုဋိယံ ဝါ ဒွါရကောဋ္ဌကေ ဝါ အညတြ ဝါ ယတ္ထ ကတ္ထစိ ဧဝရူပေ ဌာနေ။ ဝိပ္ပဝါသံ ဝသန္တဿာတိ ပကတတ္တေန ဝိနာ ဝါသံ ကပ္ပေန္တဿ။ ရတ္တိစ္ဆေဒေါ စ ဒုက္ကဋန္တိ ရတ္တိစ္ဆေဒေါ စေဝ ဝတ္တဘေဒဒုက္ကဋဉ္စ ဟောတိ။

၂၇၅၇။ ဧဝံ ဝိပ္ပဝါသေန ရတ္တိစ္ဆေဒဒုက္ကဋာနိ ဒဿေတွာ အနာရောစနေန ဒဿေတုမာဟ ‘‘ပါရိဝါသိကဘိက္ခုဿာ’’တိအာဒိ။ ဘိက္ခုံ ဒိသွာနာတိ အာကာသေနာပိ ဂစ္ဆန္တံ သမာနသံဝါသကံ အာဂန္တုကံ ဘိက္ခုံ ဒိသွာ။ တင်္ခဏေတိ တသ္မိံ ဒိဋ္ဌက္ခဏေယေဝ။ ‘‘အနာရောစေန္တဿ ဧဝ ဧတဿာ’’တိ ပဒစ္ဆေဒေါ။ ဧဝကာရေန ရတ္တိစ္ဆေဒေါ စ ဒုက္ကဋဉ္စာတိ ဥဘယံ ဧတဿ ဟောတီတိ ဒီပေန္တေန အဒိဋ္ဌော စေ၊ ရတ္တိစ္ဆေဒေါဝ ဟောတီတိ ဉာပေတိ။ ယထာဟ – ‘‘သောပိဿ ရတ္တိစ္ဆေဒံ ကရောတိ၊ အညာတတ္တာ ပန ဝတ္တဘေဒဒုက္ကဋံ နတ္ထီ’’တိ (စူဠဝ။ အဋ္ဌ။ ၇၅)။ နာနာသံဝါသကေန သဟ ဝိနယကမ္မံ ကာတုံ န ဝဋ္ဋတိ၊ တဿ အနာရောစနေပိ ရတ္တိစ္ဆေဒေါ န ဟောတိ။

၂၇၅၈-၉။ ပါရိဝါသိကော ဘိက္ခု ယတ္ထ သင်္ဃနဝကဋ္ဌာနေ ဌိတော၊ တတ္ထေဝ တသ္မိံယေဝ ဌာနေ ဌတွာ ယထာဝုဍ္ဎံ ပကတတ္တေဟိပိ သဒ္ဓိံ ဝုဍ္ဎပဋိပါဋိယာ ပဉ္စ ကိစ္စာနိ ကာတုံ ဝဋ္ဋတီတိ ယောဇနာ။

တာနိ သရူပတော ဒဿေတုမာဟ ‘‘ဥပေါသထပဝါရဏ’’န္တိအာဒိ။ ဥပေါသထပဝါရဏံ ယထာဝုဍ္ဎံ ကာတုံ လဘတီတိ ယောဇနာ။ ဒေန္တီတိ ဧတ္ထ ‘‘ဃဏ္ဋိံ ပဟရိတွာ’’တိ သေသော။ သင်္ဃဒါယကာတိ ကမ္မဓာရယသမာသော။ သင်္ဃဿ ဧကတ္တေပိ ဂရူသု ဗဟုဝစနနိဒ္ဒေသော။ ‘‘ဒေတိ စေ သင်္ဃဒါယကော’’တိပိ ပါဌော။ တတ္ထ ဃဏ္ဋိံ ပဟရိတွာ ဘာဇေတွာ ဒေန္တော သင်္ဃော ဝဿိကသာဋိကံ ဒေတိ စေ၊ ပါရိဝါသိကော ယထာဝုဍ္ဎံ အတ္တနော ပတ္တဋ္ဌာနေ လဘတီတိ ယောဇနာ။

ဩဏောဇနန္တိ ဝိဿဇ္ဇနံ၊ သင်္ဃတော အတ္တနော ပတ္တာနံ ဒွိန္နံ၊ တိဏ္ဏံ ဝါ ဥဒ္ဒေသဘတ္တာဒီနံ အတ္တနော ပုဂ္ဂလိကဘတ္တပစ္စာသာယ ပဋိဂ္ဂဟေတွာ ‘‘မယှံ အဇ္ဇ ဘတ္တပစ္စာသာ အတ္ထိ၊ သွေ ဂဏှိဿာမီ’’တိ ဝတွာ သင်္ဃဝိဿဇ္ဇနံ လဘတီတိ ဝုတ္တံ ဟောတိ။ ဘတ္တန္တိ အာဂတာဂတေဟိ ဝုဍ္ဎပဋိပါဋိယာ ဂဟေတွာ ဂန္တဗ္ဗံ ဝိဟာရေ သင်္ဃဿ စတုဿာလဘတ္တံ။ တထာ ပါရိဝါသိကော ယထာဝုဍ္ဎံ လဘတီတိ ယောဇနာ။ ဣမေ ပဉ္စာတိ ဝုတ္တမေဝတ္ထံ နိဂမယတိ။

တတြာယံ ဝိနိစ္ဆယော (စူဠဝ။ အဋ္ဌ။ ၇၅) – ဥပေါသထပဝါရဏေ တာဝ ပါတိမောက္ခေ ဥဒ္ဒိဿမာနေ ဟတ္ထပါသေ နိသီဒိတုံ ဝဋ္ဋတိ။ မဟာပစ္စရိယံ ပန ‘‘ပါဠိယာ အနိသီဒိတွာ ပါဠိံ ဝိဟာယ ဟတ္ထပါသံ အမုဉ္စန္တေန နိသီဒိတဗ္ဗ’’န္တိ ဝုတ္တံ။ ပါရိသုဒ္ဓိဥပေါသထေ ကရိယမာနေ သင်္ဃနဝကဋ္ဌာနေ နိသီဒိတွာ တတ္ထေဝ နိသိန္နေန အတ္တနော ပါဠိယာ ပါရိသုဒ္ဓိဥပေါသထော ကာတဗ္ဗောဝ။ ပဝါရဏာယပိ သင်္ဃနဝကဋ္ဌာနေ နိသီဒိတွာ တတ္ထေဝ နိသိန္နေန အတ္တနော ပါဠိယာ ပဝါရေတဗ္ဗံ။ သင်္ဃေန ဃဏ္ဋိံ ပဟရိတွာ ဘာဇိယမာနံ ဝဿိကသာဋိကမ္ပိ အတ္တနော ပတ္တဋ္ဌာနေ ဂဟေတုံ ဝဋ္ဋတိ။

ဩဏောဇနေ သစေ ပါရိဝါသိကဿ ဒွေ တီဏိ ဥဒ္ဒေသဘတ္တာဒီနိ ပါပုဏန္တိ၊ အညာ စဿ ပုဂ္ဂလိကဘတ္တပစ္စာသာ ဟောတိ၊ တာနိ ပဋိပါဋိယာ ဂဟေတွာ ‘‘ဘန္တေ၊ ဟေဋ္ဌာ ဂါဟေထ၊ အဇ္ဇ မယှံ ဘတ္တပစ္စာသာ အတ္ထိ၊ သွေဝ ဂဏှိဿာမီ’’တိ ဝတွာ ဝိဿဇ္ဇေတဗ္ဗာနိ၊ ဧဝံ တာနိ ပုနဒိဝသေသု ဂဏှိတုံ လဘတိ။ ‘‘ပုနဒိဝသေ သဗ္ဗပဌမံ ဧတဿ ဒါတဗ္ဗ’’န္တိ ကုရုန္ဒိယံ ဝုတ္တံ။ ယဒိ ပန န ဂဏှာတိ န ဝိဿဇ္ဇေတိ၊ ပုနဒိဝသေ န လဘတိ။ ဣဒံ ဩဏောဇနံ နာမ ပါရိဝါသိကဿေဝ ဩဒိဿ အနုညာတံ။ ကသ္မာ? တဿ ဟိ သင်္ဃနဝကဋ္ဌာနေ နိသိန္နဿ ဘတ္တဂ္ဂေ ယာဂုခဇ္ဇကာဒီနိ ပါပုဏန္တိ ဝါ န ဝါ၊ တသ္မာ ‘‘သော ဘိက္ခာဟာရေန မာ ကိလမိတ္ထာ’’တိ ဣဒမဿ သင်္ဂဟကရဏတ္ထာယ ဩဒိဿ အနုညာတံ။

ဘတ္တေ စတုဿာလဘတ္တံ ယထာဝုဍ္ဎံ လဘတိ၊ ပါဠိယာ ပန ဂန္တုံ ဝါ ဌာတုံ ဝါ န လဘတိ။ တသ္မာ ပါဠိတော ဩသက္ကိတွာ ဟတ္ထပါသေ ဌိတေန ဟတ္ထံ ပသာရေတွာ ယထာ သေနော နိပတိတွာ ဂဏှာတိ၊ ဧဝံ ဂဏှိတဗ္ဗံ။ အာရာမိကသမဏုဒ္ဒေသေဟိ အာဟရာပေတုံ န လဘတိ။ သစေ သယမေဝ အာဟရန္တိ၊ ဝဋ္ဋတိ။ ရညော မဟာပေဠဘတ္တေပိ ဧသေဝ နယော။ စတုဿာလဘတ္တေ ပန သစေ ဩဏောဇနံ ကတ္တုကာမော ဟောတိ၊ အတ္တနော အတ္ထာယ ဥက္ခိတ္တေ ပိဏ္ဍေ ‘‘အဇ္ဇ မေ ဘတ္တံ အတ္ထိ၊ သွေဝ ဂဏှိဿာမီ’’တိ ဝတ္တဗ္ဗံ။ ‘‘ပုနဒိဝသေ ဒွေ ပိဏ္ဍေ လဘတီ’’တိ (စူဠဝ။ အဋ္ဌ။ ၇၅) မဟာပစ္စရိယံ ဝုတ္တံ။ ဥဒ္ဒေသဘတ္တာဒီနိပိ ပါဠိတော ဩသက္ကိတွာဝ ဂဟေတဗ္ဗာနိ။ ယတ္ထ ပန နိသီဒါပေတွာ ပရိဝိသန္တိ ၊ တတ္ထ သာမဏေရာနံ ဇေဋ္ဌကေန ဘိက္ခူနံ သင်္ဃနဝကေန ဟုတွာ နိသီဒိတဗ္ဗန္တိ။

ပါရိဝါသိကက္ခန္ဓကကထာဝဏ္ဏနာ။