📜

သမထက္ခန္ဓကကထာဝဏ္ဏနာ

၂၇၆၀။ ဣဒါနိ သမထဝိနိစ္ဆယံ ဒဿေတုံ ယေသု အဓိကရဏေသု သန္တေသု သမထေဟိ ဘဝိတဗ္ဗံ၊ တာနိ တာဝ ဒဿေန္တော အာဟ ‘‘ဝိဝါဒါဓာရတာ’’တိအာဒိ။ ဝိဝါဒါဓာရတာတိ ဝိဝါဒါဓိကရဏံ။ အာပတ္တာဓာရတာတိ ဧတ္ထာပိ ဧသေဝ နယော။ အာဓာရတာတိ အဓိကရဏပရိယာယော။ အာဓာရီယတိ အဘိဘုယျတိ ဝူပသမ္မတိ သမထေဟီတိ အာဓာရော၊ ဝိဝါဒေါ စ သော အာဓာရော စာတိ ဝိဝါဒါဓာရော၊ သော ဧဝ ဝိဝါဒါဓာရတာ။ ဧဝမာဓာရာဓိကရဏ-သဒ္ဒါနံ ဝိဝါဒါဒိသဒ္ဒေဟိ သဟ ကမ္မဓာရယသမာသော ဒဋ္ဌဗ္ဗော။ အဓိကရီယတိ အဘိဘုယျတိ ဝူပသမ္မတိ သမထေဟီတိ အဓိကရဏန္တိ ဝိဝါဒါဒိစတုဗ္ဗိဓမေဝ ပါဠိယံ ဒဿိတံ။ အယမတ္ထော ‘‘ဧတေသံ တု စတုန္နမ္ပိ၊ သမတ္တာ သမထာ မတာ’’တိ ဝက္ခမာနေန ဝိညာယတိ။

၂၇၆၁။ ဧတာနိ စတ္တာရိ အဓိကရဏာနိ စ ‘‘ဣဓ ပန၊ ဘိက္ခဝေ၊ ဘိက္ခူ ဝိဝဒန္တိ ‘ဓမ္မော’တိ ဝါ ‘အဓမ္မော’တိ ဝါ’’တိ (စူဠဝ။ ၂၁၅) အဋ္ဌာရသ ဘေဒကာရကဝတ္ထူနိ စ မဟေသိနာ ဝုတ္တာနိ။ တတ္ထ တေသု စတူသု အဓိကရဏေသု ဝိဝါဒေါ အဓိကရဏသင်္ခါတော ဧတာနိ အဋ္ဌာရသ ဘေဒကရဝတ္ထူနိ နိဿိတော နိဿာယ ပဝတ္တောတိ ယောဇနာ။

၂၇၆၂။ ဝိပတ္တိယော စတဿောဝါတိ ‘‘ဣဓ ပန၊ ဘိက္ခဝေ၊ ဘိက္ခူ ဘိက္ခုံ အနုဝဒန္တိ သီလဝိပတ္တိယာ ဝါ အာစာရဝိပတ္တိယာ ဝါ ဒိဋ္ဌိဝိပတ္တိယာ ဝါ အာဇီဝဝိပတ္တိယာ ဝါ’’တိ (စူဠဝ။ ၂၁၅) ဝုတ္တာ စတဿော ဝိပတ္တိယော။ ဒိဋ္ဌာဒီနံ အနုဂန္တွာ သီလဝိပတ္တိအာဒီဟိ ဝဒနံ စောဒနာ အနုဝါဒေါ။ ဥပါဂတောတိ နိဿိတော၊ အနုဝါဒေါ စတဿော ဝိပတ္တိယော နိဿာယ ပဝတ္တောတိ အတ္ထော။ ‘‘တတ္ထာ’’တိ ပဌမမေဝ နိဒ္ဓါရဏဿ ဝုတ္တတ္တာ ဣဓ ပုနဝစနေ ပယောဇနံ န ဒိဿတိ၊ ‘‘သမ္ဘဝါ’’တိ ဝစနဿာပိ န ကောစိ အတ္ထဝိသေသော ဒိဿတိ။ တသ္မာ ‘‘အာပတ္တာဓာရတာ တတ္ထ၊ သတ္တအာပတ္တိသမ္ဘဝါ’’တိ ပါဌော န ယုဇ္ဇတိ၊ ‘‘အာပတ္တာဓာရတာ နာမ၊ သတ္တ အာပတ္တိယော မတာ’’တိ ပါဌော ယုတ္တတရော၊ အာပတ္တာဓာရတာ နာမ အာပတ္တာဓိကရဏံ နာမ သတ္တ အာပတ္တိယော မတာ သတ္တ အာပတ္တိယောဝ အဓိပ္ပေတာတိ အတ္ထော။

၂၇၆၃။ သင်္ဃကိစ္စာနိ နိဿာယာတိ အပလောကနကမ္မာဒီနိ စတ္တာရိ သင်္ဃကမ္မာနိ ဥပါဒါယ ကိစ္စာဓိကရဏာဘိဓာနံ သိယာ၊ ကိစ္စာဓိကရဏံ နာမ စတ္တာရိ သင်္ဃကမ္မာနီတိ အတ္ထော။ ဧတေသံ တု စတုန္နမ္ပီတိ ဧတေသံ ပန စတုန္နမ္ပိ အဓိကရဏာနံ။ သမတ္တာတိ ဝူပသမဟေတုတ္တာ။ သမထာ မတာတိ သမ္မုခါဝိနယာဒယော သတ္တ အဓိကရဏသမထာတိ အဓိပ္ပေတာ။ အဓိကရဏာနိ သမေန္တိ၊ သမ္မန္တိ ဝါ ဧတေဟီတိ ‘‘သမထာ’’တိ ဝုစ္စန္တီတိ ‘‘သမတ္တာ သမထာ မတာ’’တိ ဣမိနာ သမထ-သဒ္ဒဿ အနွတ္ထံ ဒီပေတိ။

၂၇၆၄-၅။ တေ သရူပတော ဒဿေတုမာဟ ‘‘သမ္မုခါ’’တိအာဒိ။ ‘‘ဝိနယော’’တိ ဣဒံ သမ္မုခါဒိပဒေဟိ ပစ္စေကံ ယောဇေတဗ္ဗံ ‘‘သမ္မုခါဝိနယော သတိဝိနယော အမူဠှဝိနယော’’တိ။ ‘‘ပဋိညာဝိနယော’’တိ စ ပဋိညာတကရဏံ ဝုတ္တံ။ သတ္တမော ဝိနယောတိ သမထော အဓိပ္ပေတော။ တိဏဝတ္ထာရကောတိ ဣမေ သတ္တ သမထာ ဗုဒ္ဓေနာဒိစ္စဗန္ဓုနာ ဝုတ္တာတိ ယောဇနာ။

၂၇၆၆။ စတူသု အဓိကရဏေသု ယံ အဓိကရဏံ ယတ္တကေဟိ သမထေဟိ သမ္မတိ၊ တေ သင်္ဂဟေတွာ ဒဿေန္တော အာဟ ‘‘ဝိဝါဒေါ’’တိအာဒိ။

၂၇၆၇-၉။ ‘‘ဝိဝါဒေါ’’တိအာဒိနာ ဥဒ္ဒိဋ္ဌမတ္ထံ နိဒ္ဒိသန္တော အာဟ ‘‘ဆဋ္ဌေနာ’’တိအာဒိ။ ဧတ္ထ ဧတေသု စတူသု အဓိကရဏေသု၊ သမထေသု စ ကိံ ကေန သမ္မတီတိ စေ? ဝိဝါဒေါ ဝိဝါဒါဓိကရဏံ ဆဋ္ဌေန ယေဘုယျသိကာယ၊ ပဌမေန သမထေန သမ္မုခါဝိနယေန စာတိ ဒွီဟိ သမထေဟိ သမ္မတိ။ ယဿာ ကိရိယာယ ဓမ္မဝါဒိနော ဗဟုတရာ၊ ဧသာ ယေဘုယျသိကာ။ ‘‘သင်္ဃသမ္မုခတာ၊ ဓမ္မသမ္မုခတာ၊ ဝိနယသမ္မုခတာ၊ ပုဂ္ဂလသမ္မုခတာ’’တိ (စူဠဝ။ ၂၂၉၊ ၂၃၄၊ ၂၃၆၊ ၂၃၇၊ ၂၄၂) ဝုတ္တာနံ သင်္ဃာဒီနံ စတုန္နံ သန္နိဓာနေန ဝါ ဂဏပုဂ္ဂလေဟိ သမိယမာနံ ဝိဝါဒါဓိကရဏံ သင်္ဃသမ္မုခတံ ဝိနာ ဣတရေဟိ တီဟိ ဝါ သမ္မတီတိ ဝုတ္တံ ဟောတိ။

ဧတ္ထ စ ကာရကသင်္ဃဿ သင်္ဃသာမဂ္ဂိဝသေန သမ္မုခီဘာဝေါ သင်္ဃသမ္မုခတာ၊ သမေတဗ္ဗဿ ဝတ္ထုနော ဘူတတာ ဓမ္မသမ္မုခတာ၊ ယထာ တံ သမေတဗ္ဗံ၊ တထေဝဿ သမနံ ဝိနယသမ္မုခတာ၊ ယော စ ဝိဝဒတိ၊ ယေန စ ဝိဝဒတိ၊ တေသံ ဥဘိန္နံ အတ္ထပစ္စတ္ထိကာနံ သမ္မုခီဘာဝေါ ပုဂ္ဂလသမ္မုခတာ။

‘‘အနုဝါဒေါ စတူဟိပီ’’တိ ဥဒ္ဒိဋ္ဌံ နိဒ္ဒိသန္တော အာဟ ‘‘သမ္မုခါ’’တိအာဒိ။ အနုပုဗ္ဗေနာတိ အနုပဋိပါဋိယာ။ သမ္မုခါဝိနယာဒီဟိ တီဟိပီတိ သမ္မုခါဝိနယသတိဝိနယအမူဠှဝိနယေဟိ တီဟိပိ။ တထေဝါတိ ယထာ တီဟိ၊ တထာ ပဉ္စမေန တဿပါပိယသိကာသမထေနာပိ အနုဝါဒေါ သမ္မတိ၊ ပဂေဝ စတူဟီတိ အတ္ထော။

ယော ပါပုဿန္နတာယ ပါပိယော ပုဂ္ဂလော၊ တဿ ကတ္တဗ္ဗတော ‘‘တဿပါပိယသိကာ’’တိ ကမ္မံ ဝုစ္စတိ။ အာယသ္မတော ဒဗ္ဗဿ မလ္လပုတ္တဿ ဝိယ သတိဝေပုလ္လပ္ပတ္တဿ ခီဏာသဝဿ ကတာ အမူလိကာ သီလဝိပတ္တိစောဒနာ သမ္မုခါဝိနယေန၊ ဉတ္တိစတုတ္ထာယ ကမ္မဝါစာယ ဒိန္နေန သတိဝိနယေန စ သမ္မတိ။ ဥမ္မတ္တကဿ ဘိက္ခုနော ကတာ အာပတ္တိစောဒနာ သမ္မုခါဝိနယေန စ တထေဝ ဒိန္နေန အမူဠှဝိနယေန စ သမ္မတိ။ သင်္ဃမဇ္ဈေ အာပတ္တိယာ စောဒိယမာနဿ အဝဇာနိတွာ ပဋိဇာနနာဒိံ ကရောန္တဿ ပါပဘိက္ခုနော ဗဟုလာပတ္တိစောဒနာ သမ္မုခါဝိနယေန စေဝ တထေဝ ပကတေန တဿပါပိယသိကာကမ္မေန စ ဝူပသမ္မတီတိ ဝုတ္တံ ဟောတိ။

‘‘အာပတ္တိ ပန တီဟေဝါ’’တိ ဥဒ္ဒေသဿ နိဒ္ဒေသမာဟ ‘‘သမ္မုခေနာ’’တိအာဒိ။ သမ္မုခေန သမ္မုခါဝိနယေန၊ ပဋိညာယ ပဋိညာတကရဏေန၊ တိဏဝတ္ထာရကေန ဝါ ဣမေဟိ တီဟိ ဧဝ သမထေဟိ သာ အာပတ္တိ အာပတ္တာဓိကရဏံ ဥပသမံ ယာတီတိ ယောဇနာ။ ဧတ္ထ ပဋိညာတကရဏံ နာမ အာပတ္တိံ ပဋိဂ္ဂဏှန္တေန ‘‘ပဿသီ’’တိ ဝုတ္တေ အာပတ္တိံ ဒေသေန္တေန ‘‘အာမ ပဿာမီ’’တိ သမ္ပဋိစ္ဆနံ။ တိဏဝတ္ထာရကံ ပန သယမေဝ ဝက္ခတိ။

တီဟေဝ သမထေဟီတိ ဧတ္ထ ဂရုကာပတ္တိ သမ္မုခါဝိနယေန၊ ပဋိညာတကရဏေန စာတိ ဒွီဟိ၊ လဟုကာပတ္တိံ အာပဇ္ဇိတွာ သင်္ဃေ ဝါ ဂဏေ ဝါ ပုဂ္ဂလေ ဝါ ဒေသနာယ သမ္မုခါဝိနယေန စေဝ ပဋိညာတကရဏေန စ၊ ကောသမ္ဗကာနံ ဝိဂ္ဂဟသဒိသံ မဟာဝိဂ္ဂဟံ ကရောန္တေဟိ အာပန္နာ အနေကဝိဓာ အာပတ္တိယော သစေ ဟောန္တိ၊ တာသု ဝက္ခမာနသရူပံ ထုလ္လဝဇ္ဇာဒိံ ဌပေတွာ အဝသေသာ သဗ္ဗာ အာပတ္တိယော သမ္မုခါဝိနယေန၊ တိဏဝတ္ထာရကေန စ သမ္မန္တီတိ အတ္ထော။

ကိစ္စံ ကိစ္စာဓိကရဏံ ဧကေန သမ္မုခါဝိနယေနေဝ သမ္မတီတိ ယောဇနာ။

၂၇၇၀။ ယေဘုယျသိကကမ္မေတိ ဧတ္ထ နိမိတ္တတ္ထေ ဘုမ္မံ။ သလာကံ ဂါဟယေတိ ဝိနိစ္ဆယကာရကေ သင်္ဃေ ဓမ္မဝါဒီနံ ဗဟုတ္တံ ဝါ အပ္ပတရတ္တံ ဝါ ဇာနိတုံ ဝက္ခမာနေန နယေန သလာကံ ဂါဟာပေယျ။ ဗုဓောတိ ‘‘န ဆန္ဒာဂတိံ ဂစ္ဆတိ…ပေ… ဂဟိတာဂဟိတဉ္စ ဇာနာတီ’’တိ ဝုတ္တံ ပဉ္စဟိ အင်္ဂေဟိ သမန္နာဂတံ ပုဂ္ဂလံ ဒဿေတိ။ ‘‘ဂူဠှေနာ’’တိအာဒိနာ သလာကဂ္ဂါဟပ္ပကာရော ဒဿိတော။ ကဏ္ဏဇပ္ပေနာတိ ဧတ္ထ ကဏ္ဏေ ဇပ္ပော ယသ္မိံ သလာကဂ္ဂါဟပယောဂေတိ ဝိဂ္ဂဟော။ ဧတ္ထ ဂူဠှသလာကဂ္ဂါဟော နာမ ဓမ္မဝါဒိသလာကာ စ အဓမ္မဝါဒိသလာကာ စ ဝိသုံ ဝိသုံ စီဝရကဏ္ဏေ ပက္ခိပိတွာ ပုဂ္ဂလာနံ သန္တိကံ ဝိသုံ ဝိသုံ ဥပသင်္ကမိတွာ သလာကာ ဝိသုံ ဝိသုံ ဒဿေတွာ ‘‘ဣတော တဝ ရုစ္စနကံ ဂဏှာဟီ’’တိ ရဟော ဌတွာ ဂါဟာပနံ။ ဝိဝဋကံ နာမ ဓမ္မဝါဒီနံ ဗဟုဘာဝံ ဉတွာ သဗ္ဗေသု ဇာနန္တေသု ပုဂ္ဂလာနံ သန္တိကံ ဂါဟာပနံ။ ကဏ္ဏဇပ္ပနံ နာမ ဧဝမေဝ ကဏ္ဏမူလေ ရဟော ဌတွာ ဂါဟာပနံ။

၂၇၇၁။ အလဇ္ဇုဿဒေတိ ဧတ္ထ ‘‘သင်္ဃေ’’တိ သေသော။ လဇ္ဇိသု ဗာလေသူတိ ဧတ္ထာပိ ‘‘ဥဿဒေသူ’’တိ ဝတ္တဗ္ဗံ။

၂၇၇၂။ သကေန ကမ္မုနာယေဝါတိ အတ္တနော ယံ ကိစ္စံ၊ တေနေဝါတိ။

၂၇၇၃-၅။ ‘‘အာပဇ္ဇတီ’’တိအာဒိ ‘‘အလဇ္ဇီ၊ လဇ္ဇီ၊ ဗာလော’’တိ ဇာနနဿ ဟေတုဘူတကမ္မဒဿနံ။ ဒုစ္စိန္တိတောတိ အဘိဇ္ဈာဒိတိဝိဓမနောဒုစ္စရိတဝသေန ဒုဋ္ဌု စိန္တေန္တော။ ဒုဗ္ဘာသီတိ မုသာဝါဒါဒိစတုဗ္ဗိဓဝစီဒုစ္စရိတဝသေန ဝစီဒွါရေ ပညတ္တာနံ သိက္ခာပဒါနံ ဝီတိက္ကမဝသေန ဒုဋ္ဌု ဘာသနသီလော။ ဒုက္ကဋကာရိကောတိ ပါဏာတိပါတာဒိတိဝိဓကာယဒုစ္စရိတဝသေန ကာယဒွါရေ ပညတ္တသိက္ခာပဒါနံ ဝီတိက္ကမဝသေန ကုစ္ဆိတကမ္မဿ ကရဏသီလော။ ဣတိ လက္ခဏေနေဝါတိ ယထာဝုတ္တံ အလဇ္ဇီလဇ္ဇီဗာလလက္ခဏံ နိဂမေတိ။

၂၇၇၆။ ‘‘ယေဘုယျသိကာ’’တိအာဒိဂါထာဟိ နိဒ္ဒိဋ္ဌမေဝ အတ္ထံ နိဂမေတုမာဟ ‘‘တိဓာ’’တိအာဒိ။ တိဓာသလာကဂါဟေနာတိ တိဝိဓဿ သလာကဂါဟဿ အညတရေန။ ဗဟုကာ ဓမ္မဝါဒိနော ယဒိ သိယုန္တိ ယောဇနာ။ ကာတဗ္ဗန္တိ ဧတ္ထ ‘‘ဝိဝါဒါဓိကရဏဝူပသမန’’န္တိ သေသော။

၂၇၇၇။ ယော ပုဂ္ဂလော အလဇ္ဇီ စ ဟောတိ သာနုဝါဒေါ စ ကမ္မတော ကာယကမ္မတော၊ ဝစီကမ္မတော စ အသုစိ စ သမ္ဗုဒ္ဓဇိဂုစ္ဆနီယောတိ အတ္ထော။ သော ဧဝံဝိဓော ပါပပုဂ္ဂလော တဿ ပါပိယသိကကမ္မဿ ယောဂေါ ဟောတီတိ သမ္ဗန္ဓော။ သာနုဝါဒေါတိ ဧတ္ထ အနုဝါဒေါ နာမ စောဒနာ၊ သဟ အနုဝါဒေန ဝတ္တတီတိ သာနုဝါဒေါ၊ ပါပဂရဟိတပုဂ္ဂလေဟိ ကာတဗ္ဗစောဒနာယ အနုရူပေါတိ အတ္ထော။

၂၇၇၈-၉။ ဘဏ္ဍနေတိ ကလဟဿ ပုဗ္ဗဘာဂေ။ ကလဟေတိ ကာယဝစီဒွါရပ္ပဝတ္တေ ဟတ္ထပရာမသာဒိကေ ကလဟေ စ။ ဝိဝါဒမှိ အနပ္ပကေတိ ဗဟုဝိဓေ ဝိဝါဒေ ဇာတေ။ ဗဟုအဿာမဏေ စိဏ္ဏေတိ သမဏာနံ အနနုစ္ဆဝိကေ နာနပ္ပကာရေ ကာယိကဝါစသိကဝီတိက္ကမေ စ ကတေ။ အနဂ္ဂေတိ အနန္တေ။ ဘဿကေတိ ကုစ္ဆိတေ အမနာပဝစနေ စိဏ္ဏေတိ ယောဇနာ၊ ဘာသိတေတိ အတ္ထော။ ဂဝေသန္တန္တိ ဂဝေသိယမာနံ၊ အာပတ္တာဓိကရဏန္တိ သေသော။ ဝါဠန္တိ စဏ္ဍံ။ ကက္ခဠန္တိ အာသဇ္ဇံ။ ကာတဗ္ဗန္တိ ဝူပသမေတဗ္ဗံ။

၂၇၈၀-၂။ ယထာ စ ဝူပသမ္မတိ၊ တထာ တိဏဝတ္ထာရကေ သုဒ္ဓါ ဟောတီတိ သမ္ဗန္ဓော။

ထုလ္လဝဇ္ဇန္တိ ပါရာဇိကဉ္စေဝ သင်္ဃာဒိသေသဉ္စ။ ဂိဟီဟိ ပဋိသံယုတန္တိ ဂိဟီနံ ဇာတိအာဒီဟိ ပါဠိယာ အာဂတေဟိ ဒသဟိ အက္ကောသဝတ္ထူဟိ၊ အဋ္ဌကထာဂတေဟိ စ တဒညေဟိ အက္ကောသဝတ္ထူဟိ ခုံသနဝမ္ဘနပစ္စယာ စ ဓမ္မိကပဋိဿဝဿ အသစ္စာပနပစ္စယာ စ အာပန္နာပတ္တိံ။ ဧသာ ဧဝ ဟိ အာပတ္တိ ဂိဟိပဋိသံယုတ္တာ နာမ ပရိဝါရေ ‘‘အတ္ထိ ဂိဟိပဋိသံယုတ္တာ၊ အတ္ထိ နဂိဟိပဋိသံယုတ္တာ’’တိ ဒုကံ နိက္ခိပိတွာ ‘‘ဂိဟိပဋိသံယုတ္တာတိ သုဓမ္မတ္ထေရဿ အာပတ္တိ၊ ယာ စ ဓမ္မိကဿ ပဋိဿဝဿ အသစ္စာပနေ အာပတ္တိ။ အဝသေသာ နဂိဟိပဋိသံယုတ္တာ’’တိ (ပရိ။ အဋ္ဌ။ ၃၂၁) ဝစနတော။

သုဓမ္မတ္ထေရဿ အာပတ္တီတိ စ တေန စိတ္တဿ ဂဟပတိနော ဇာတိံ ပဋိစ္စ ခုံသနဝမ္ဘနပစ္စယာ အာပန္နာ ဩမသဝါဒသိက္ခာပဒဝိဘာဂဂတာ ဒုက္ကဋာပတ္တိ ဂဟေတဗ္ဗာ။ ဣဒဉ္စ ဥပလက္ခဏမတ္တံ၊ တသ္မာ ဣတရေဟိပိ အက္ကောသဝတ္ထူဟိ ဂိဟိံ ခုံသေန္တာနံ ဝမ္ဘေန္တာနံ ဣတရေသံ ဘိက္ခူနံ သာ အာပတ္တိ ဂိဟိပဋိသံယုတ္တာဝါတိ ဝေဒိတဗ္ဗံ။ တထာ အာပန္နံ အာပတ္တိံ ဒေသာပေန္တေန ဒဿနူပစာရံ အဝိဇဟာပေတွာ သဝနူပစာရံ ဇဟာပေတွာ ဧကံသေ ဥတ္တရာသင်္ဂံ ကာရာပေတွာ ဥက္ကုဋိကံ နိသီဒါပေတွာ အဉ္ဇလိံ ပဂ္ဂဏှာပေတွာ သာ အာပတ္တိ ဒေသာပေတဗ္ဗာ။

ဒိဋ္ဌာဝိကမ္မိကန္တိ ဒိဋ္ဌာဝိကမ္မေ နိယုတ္တော ဒိဋ္ဌာဝိကမ္မိကော၊ တံ၊ အဋ္ဌကထာယံ ‘‘ယေ ပန ‘န မေတံ ခမတီ’တိ အညမညံ ဒိဋ္ဌာဝိကမ္မံ ကရောန္တီ’’တိ (စူဠဝ။ အဋ္ဌ။ ၂၁၄) ယေ ပုဂ္ဂလာ ဒဿိတာ၊ တေသမညတရဿေဝ ဂဟဏံ။

ယောတိ ဘဏ္ဍနကာရကေဟိ ဘိက္ခူဟိ သဒ္ဓိံ မဟန္တံ ဝိဂ္ဂဟံ ကတွာ သမ္ဗဟုလာ အာပတ္တိယော အာပန္နော ယော ဘိက္ခု။ တတ္ထာတိ တသ္မိံ တိဏဝတ္ထာရကသမထကာရကေ ဘိက္ခုသမူဟေ။ န ဟောတီတိ ဆန္ဒံ ဒတွာ တံ ဘိက္ခုပရိသံ အနာဂတတ္တာ န သံဝိဇ္ဇတိ။ တဉ္စ ဌပေတွာတိ ယောဇနာ။

တိဏဝတ္ထာရကေ ကတေ သတိ ယာဝ ဥပသမ္ပဒမာဠတော ပဘုတိ အာပန္နာယ သေသာယ အာပတ္တိယာ နိရာပတ္တိ ဟုတွာ သုဒ္ဓါ ဟောတိ သင်္ဃောတိ ယောဇနာ။

သမထက္ခန္ဓကကထာဝဏ္ဏနာ။