📜

စတုဗ္ဗိဓကမ္မကထာဝဏ္ဏနာ

၂၉၈၃။ အပလောကနသညိတံ ကမ္မံ၊ ဉတ္တိကမ္မံ၊ ဉတ္တိဒုတိယကမ္မံ၊ ဉတ္တိစတုတ္ထကမ္မန္တိ ဣမာနိ စတ္တာရိ ကမ္မာနီတိ ယောဇနာ။ တတ္ထ စတ္တာရီတိ ဂဏနပရိစ္ဆေဒေါ။ ဣမာနီတိ အနန္တရမေဝ ဝက္ခမာနတ္တာ အာသန္နပစ္စက္ခဝစနံ။ ကမ္မာနီတိ ပရိစ္ဆိန္နကမ္မနိဒဿနံ။ ‘‘အပလောကနသအဉတ’’န္တိအာဒိ တေသံ သရူပဒဿနံ။

တတြာယံ သင်္ခေပတော ဝိနိစ္ဆယော (စူဠဝ။ အဋ္ဌ။ ၂၁၅၊ ပရိ။ အဋ္ဌ။ ၄၈၂) – အပလောကနကမ္မံ နာမ သီမဋ္ဌကသင်္ဃံ သောဓေတွာ ဆန္ဒာရဟာနံ ဆန္ဒံ အာဟရိတွာ သမဂ္ဂဿ သင်္ဃဿ အနုမတိယာ တံ တံ ဝတ္ထုံ ကိတ္တေတွာ ‘‘ရုစ္စတိ သင်္ဃဿာ’’တိ တိက္ခတ္တုံ သာဝေတွာ ကတ္တဗ္ဗံ ကမ္မံ ဝုစ္စတိ။ ဉတ္တိကမ္မံ နာမ ဝုတ္တနယေနေဝ သမဂ္ဂဿ သင်္ဃဿ အနုမတိယာ ဧကာယ ဉတ္တိယာ ကတ္တဗ္ဗံ ကမ္မံ။ ဉတ္တိဒုတိယကမ္မံ နာမ ဝုတ္တနယေနေဝ သမဂ္ဂဿ သင်္ဃဿ အနုမတိယာ ဧကာယ ဉတ္တိယာ၊ ဧကာယ စ အနုဿာဝနာယာတိ ဧဝံ ဉတ္တိဒုတိယာယ အနုဿာဝနာယ ကတ္တဗ္ဗံ ကမ္မံ။ ဉတ္တိစတုတ္ထကမ္မံ နာမ ဝုတ္တနယေနေဝ သမဂ္ဂဿ သင်္ဃဿ အနုမတိယာ ဧကာယ ဉတ္တိယာ၊ တီဟိ စ အနုဿာဝနာဟီတိ ဧဝံ ဉတ္တိစတုတ္ထာဟိ တီဟိ အနုဿာဝနာဟိ ကတ္တဗ္ဗံ ကမ္မံ။ ဉတ္တိ ဒုတိယာ ယဿ အနုဿာဝနဿ တံ ဉတ္တိဒုတိယံ၊ တေန ကတ္တဗ္ဗံ ကမ္မံ ဉတ္တိဒုတိယကမ္မံ။ ဉတ္တိ စတုတ္ထာ ယဿ အနုဿာဝနတ္တယဿ တံ ဉတ္တိစတုတ္ထံ၊ တေန ကာတဗ္ဗံ ကမ္မံ ဉတ္တိစတုတ္ထကမ္မံ။

၂၉၈၄-၇။ တေသံ ဌာနဝသေန ဘေဒံ ဒဿေတုမာဟ ‘‘အပလောကနကမ္မ’’န္တိအာဒိ။ နဝန္နံ ဌာနာနံ သမာဟာရော နဝဋ္ဌာနံ၊ ‘‘ဂစ္ဆတီ’’တိ ဣမိနာ သမ္ဗန္ဓော။ ဉတ္တိကမ္မန္တိ ဂမနကိရိယာကတ္တုနိဒဿနံ ။ နဝဋ္ဌာနန္တိ ကမ္မနိဒဿနံ။ ဒုတိယန္တိ ဉတ္တိဒုတိယကမ္မံ။ သတ္တ ဌာနာနိ ဂစ္ဆတီတိ ယောဇနာ။

ဣဒါနိ တံ ဌာနဘေဒံ သရူပတော ဒဿေတုမာဟ ‘‘နိဿာရဏဉ္စာ’’တိအာဒိ။ နိဿာရဏာဒိ ကမ္မဝိသေသာနံ သညာ။ အပလောကနကမ္မဉှိ နိဿာရဏံ…ပေ… ပဉ္စမံ ကမ္မလက္ခဏန္တိ ဣမာနိ ပဉ္စ ဌာနာနိ ဂစ္ဆတီတိ ယောဇနာ။

ဧဝံ နာမဝသေန ဒဿိတာနိ နိဿာရဏာဒီနိ အတ္ထတော ဝိဘဇိတွာ ဒဿေတုမာဟ ‘‘နိဿာရဏဉ္စာ’’တိအာဒိ။ သမဏုဒ္ဒေသတောတိ ကဏ္ဋကသာမဏေရတော နိဿာရဏဉ္စ ဩသာရဏဉ္စ ဝဒေတိ ယောဇနာ။ တတ္ထ ကဏ္ဋကသာမဏေရဿ နိဿာရဏာ တာဒိသာနံယေဝ သမ္မာဝတ္တံ ဒိသွာ ပဝေသနာ ‘‘ဩသာရဏာ’’တိ ဝေဒိတဗ္ဗာ။

ပဗ္ဗဇန္တေန ဟေတုဘူတေန ဘဏ္ဍုကံ ဘဏ္ဍုကမ္မပုစ္ဆနံ ဝဒေယျာတိ အတ္ထော။ ပဗ္ဗဇ္ဇာပေက္ခဿ ကေသစ္ဆေဒနပုစ္ဆနံ ဘဏ္ဍုကမ္မံ နာမ။ ဆန္နေန ဟေတုဘူတေန ဗြဟ္မဒဏ္ဍကံ ကမ္မံ ဝဒေတိ ယောဇနာ။ တထာရူပဿာတိ ဆန္နသဒိသဿ မုခရဿ ဘိက္ခူ ဒုရုတ္တဝစနေန ဃဋ္ဋေန္တဿ။ ကာတဗ္ဗောတိ ‘‘ဘန္တေ၊ ဣတ္ထန္နာမော ဘိက္ခု မုခရော ဘိက္ခူ ဒုရုတ္တဝစနေဟိ ဃဋ္ဋေန္တော ဝိဟရတိ၊ သော ဘိက္ခု ယံ ဣစ္ဆေယျ၊ တံ ဝဒေယျ။ ဘိက္ခူဟိ ဣတ္ထန္နာမော ဘိက္ခု နေဝ ဝတ္တဗ္ဗော၊ န ဩဝဒိတဗ္ဗော၊ န အနုသာသိတဗ္ဗော။ သင်္ဃံ၊ ဘန္တေ၊ ပုစ္ဆာမိ ‘ဣတ္ထန္နာမဿ ဘိက္ခုနော ဗြဟ္မဒဏ္ဍဿ ဒါနံ ရုစ္စတိ သင်္ဃဿာ’တိ။ ဒုတိယမ္ပိ ပုစ္ဆာမိ… တတိယမ္ပိ ပုစ္ဆာမိ ‘ဣတ္ထန္နာမဿ၊ ဘန္တေ၊ ဘိက္ခုနော ဗြဟ္မဒဏ္ဍဿ ဒါနံ ရုစ္စတိ သင်္ဃဿာ’’တိ (ပရိ။ အဋ္ဌ။ ၄၉၅-၄၉၆) ဧဝံ ဗြဟ္မဒဏ္ဍော ကာတဗ္ဗော။

၂၉၈၈-၉။ ‘‘အာပုစ္ဆိတွာနာ’’တိ ပုဗ္ဗကိရိယာယ ‘‘ဂဟိတာယာ’’တိ အပရကိရိယာ အဇ္ဈာဟရိတဗ္ဗာ၊ ‘‘ရုစိယာ’’တိ ဧတဿ ဝိသေသနံ။ ဒေတီတိ ဧတ္ထ ‘‘အစ္ဆိန္နစီဝရာဒီန’’န္တိ သေသော။ သဗ္ဗော သင်္ဃော သန္နိပတိတွာန သဗ္ဗသော သဗ္ဗေ သီမဋ္ဌေ အာဂတာဂတေ ဘိက္ခူ အာပုစ္ဆိတွာန ‘‘ဣတ္ထန္နာမေန ပရိက္ခာရေန ဘဝိတဗ္ဗံ၊ ရုစ္စတိ တဿ ဒါန’’န္တိ ဝိသုံ ပုစ္ဆိတွာ ဂဟိတာယ ဘိက္ခူနံ ရုစိယာ တိက္ခတ္တုံ အပလောကေတွာ စီဝရာဒိပရိက္ခာရံ အစ္ဆိန္နစီဝရာဒီနံ ဒေတိ၊ ယံ ဧဝံဘူတံ သင်္ဃဿ ဒါနံ၊ တံ တဿ အပလောကနကမ္မဿ ကမ္မလက္ခဏံ ဟောတီတိ ယောဇနာ။ လက္ခီယတီတိ လက္ခဏံ၊ ကမ္မမေဝ လက္ခဏံ၊ န နိဿာရဏာဒီနီတိ ကမ္မလက္ခဏံ။

၂၉၉၀-၁။ ဧဝံ အပလောကနကမ္မဿ ပဉ္စ ဌာနာနိ ဥဒ္ဒေသနိဒ္ဒေသဝသေန ဒဿေတွာ ဣဒါနိ ဉတ္တိကမ္မဿ ကမ္မလက္ခဏံ တာဝ ဒဿေတုမာဟ ‘‘နိဿာရဏ’’န္တိအာဒိ။ ဣတိ ‘‘ဉတ္တိယာ နဝ ဌာနာနီ’’တိ အယမုဒ္ဒေသော ဝက္ခမာနေန ‘‘ဝိနိစ္ဆယေ’’တိအာဒိနိဒ္ဒေသေနေဝ ဝိဘာဝီယတိ။

၂၉၉၂။ ဝိနိစ္ဆယေတိ ဥဗ္ဗာဟိကဝိနိစ္ဆယေ။ အသမ္ပတ္တေတိ နိဋ္ဌံ အဂတေ။ ထေရဿာတိ ဓမ္မကထိကဿ။ တေနေဝါဟ ‘‘အဝိနယညုနော’’တိ။ တဿ ‘‘သုဏန္တု မေ အာယသ္မန္တာ၊ အယံ ဣတ္ထန္နာမော ဘိက္ခု ဓမ္မကထိကော၊ ဣမဿ နေဝ သုတ္တံ အာဂစ္ဆတိ၊ နော သုတ္တဝိဘင်္ဂေါ၊ သော အတ္ထံ အသလ္လက္ခေတွာ ဗျဉ္ဇနစ္ဆာယာယ အတ္ထံ ပဋိဗာဟတိ၊ ယဒါယသ္မန္တာနံ ပတ္တကလ္လံ၊ ဣတ္ထန္နာမံ ဘိက္ခုံ ဝုဋ္ဌာပေတွာ အဝသေသာ ဣမံ အဓိကရဏံ ဝူပသမေယျာမာ’’တိ (စူဠဝ။ ၂၃၃) ဧဝံ ဥဗ္ဗာဟိကဝိနိစ္ဆယေ ဓမ္မကထိကဿ ဘိက္ခုနော ယာ နိဿရဏာ ဝုတ္တာ၊ သာ ဉတ္တိကမ္မေ ‘‘နိဿာရဏာ’’တိ ဝုတ္တာတိ ယောဇနာ။

၂၉၉၃-၄။ ဥပသမ္ပဒါပေက္ခဿ ‘‘သုဏာတု မေ၊ ဘန္တေ သင်္ဃော၊ ဣတ္ထန္နာမော ဣတ္ထန္နာမဿ အာယသ္မတော ဥပသမ္ပဒါပေက္ခော ၊ အနုသိဋ္ဌော သော မယာ၊ ယဒိ သင်္ဃဿ ပတ္တကလ္လံ၊ ဣတ္ထန္နာမော အာဂစ္ဆေယျာတိ။ အာဂစ္ဆာဟီ’’တိ (မဟာဝ။ ၁၂၆) ဝစနပဋိသံယုတ္တဿ သင်္ဃဿ သမ္မုခါနယနံ၊ သာ ဩသာရဏာ နာမ။ ‘‘အာဂစ္ဆ ဩသာရဏာ’’တိ ပဒစ္ဆေဒေါ။

ဥပေါသထဝသေနာပိ၊ ပဝါရဏာဝသေနာပိ။ ဉတ္တိယာ ဌပိတတ္တာတိ ‘‘သုဏာတု မေ၊ ဘန္တေ သင်္ဃော၊ အဇ္ဇုပေါသထော ပန္နရသော၊ ယဒိ သင်္ဃဿ ပတ္တကလ္လံ၊ သင်္ဃော ဥပေါသထံ ကရေယျ’’ (မဟာဝ။ ၁၃၄)၊ ‘‘သုဏာတု မေ၊ ဘန္တေ သင်္ဃော၊ အဇ္ဇ ပဝါရဏာ ပန္နရသီ၊ ယဒိ သင်္ဃဿ ပတ္တကလ္လံ၊ သင်္ဃော ပဝါရေယျာ’’တိ (မဟာဝ။ ၂၁၀) ဥပေါသထပဝါရဏာဝသေန ဉတ္တိယာ ဌပိတတ္တာ ဥပေါသထော၊ ပဝါရဏာ ဝါတိ ဣမာနိ ဒွေ ဉတ္တိကမ္မာနိ။

‘‘ဥပသမ္ပဒါပေက္ခဉှိ၊ အနုသာသေယျဟန္တိ စာ’’တိ ဣမိနာ ‘‘သုဏာတု မေ၊ ဘန္တေ သင်္ဃော၊ ဣတ္ထန္နာမော ဣတ္ထန္နာမဿ အာယသ္မတော ဥပသမ္ပဒါပေက္ခော၊ ယဒိ သင်္ဃဿ ပတ္တကလ္လံ၊ အဟံ ဣတ္ထန္နာမံ အနုသာသေယျ’’န္တိ (မဟာဝ။ ၁၂၆) အယံ ဧကာ ဉတ္တိ ဂဟိတာ။

၂၉၉၅။ ‘‘ဣတ္ထန္နာမမဟံ ဘိက္ခုံ၊ ပုစ္ဆေယျံ ဝိနယန္တိ စာ’’တိ ဣမိနာ ‘‘သုဏာတု မေ၊ ဘန္တေ သင်္ဃော၊ ယဒိ သင်္ဃဿ ပတ္တကလ္လံ၊ အဟံ ဣတ္ထန္နာမံ ဝိနယံ ပုစ္ဆေယျ’’န္တိ (မဟာဝ။ ၁၅၁) အယံ ဧကာ ဉတ္တိ ဂဟိတာ။ ဧဝမာဒီတိ အာဒိ-သဒ္ဒေန ‘‘ယဒိ သင်္ဃဿ ပတ္တကလ္လံ၊ ဣတ္ထန္နာမော ဣတ္ထန္နာမံ အနုသာသေယျာ’’တိ၊ ‘‘ယဒိ သင်္ဃဿ ပတ္တကလ္လံ၊ အဟံ ဣတ္ထန္နာမံ အန္တရာယိကေ ဓမ္မေ ပုစ္ဆေယျ’’န္တိ (မဟာဝ။ ၁၂၆)၊ ‘‘ယဒိ သင်္ဃဿ ပတ္တကလ္လံ၊ ဣတ္ထန္နာမော ဣတ္ထန္နာမံ အန္တရာယိကေ ဓမ္မေ ပုစ္ဆေယျာ’’တိ၊ ‘‘ယဒိ သင်္ဃဿ ပတ္တကလ္လံ၊ ဣတ္ထန္နာမော ဣတ္ထန္နာမံ ဝိနယံ ပုစ္ဆေယျာ’’တိ (မဟာဝ။ ၁၅၁)၊ ‘‘ယဒိ သင်္ဃဿ ပတ္တကလ္လံ၊ အဟံ ဣတ္ထန္နာမေန ဝိနယံ ပုဋ္ဌော ဝိဿဇ္ဇေယျ’’န္တိ (မဟာဝ။ ၁၅၂)၊ ‘‘ယဒိ သင်္ဃဿ ပတ္တကလ္လံ၊ ဣတ္ထန္နာမော ဣတ္ထန္နာမေန ဝိနယံ ပုဋ္ဌော ဝိဿဇ္ဇေယျာ’’တိ – (မဟာဝ။ ၁၅၂) ဣမာ ဆ ဉတ္တိယော ဂဟိတာ။ ဧဝံ ပုရိမာ ဒွေ၊ ဣမာ စ ဆာတိ ဧဒိသာ ဣမာ အဋ္ဌ ဉတ္တိယော ‘‘သမ္မုတီ’’တိ ဝုတ္တာ။

၂၉၉၆။ နိဿဋ္ဌစီဝရာဒီနံ ဒါနန္တိ ‘‘သုဏာတု မေ၊ ဘန္တေ သင်္ဃော၊ ဣဒံ စီဝရံ ဣတ္ထန္နာမဿ ဘိက္ခုနော နိဿဂ္ဂိယံ သင်္ဃဿ နိဿဋ္ဌံ၊ ယဒိ သင်္ဃဿ ပတ္တကလ္လံ၊ သင်္ဃော ဣမံ စီဝရံ ဣတ္ထန္နာမဿ ဘိက္ခုနော ဒဒေယျာ’’တိ (ပါရာ။ ၄၆၄) ဧဝံ နိဿဋ္ဌစီဝရပတ္တာဒီနံ ဒါနံ ‘‘ဒါန’’န္တိ ဝုစ္စတိ။ အာပတ္တီနံ ပဋိဂ္ဂါဟောတိ ‘‘သုဏာတု မေ၊ ဘန္တေ သင်္ဃော၊ အယံ ဣတ္ထန္နာမော ဘိက္ခု အာပတ္တိံ သရတိ ဝိဝရတိ ဥတ္တာနိံ ကရောတိ ဒေသေတိ၊ ယဒိ သင်္ဃဿ ပတ္တကလ္လံ၊ အဟံ ဣတ္ထန္နာမဿ ဘိက္ခုနော အာပတ္တိံ ပဋိဂ္ဂဏှေယျ’’န္တိ (စူဠဝ။ ၂၃၉)၊ ‘‘ယဒါယသ္မန္တာနံ ပတ္တကလ္လံ၊ အဟံ ဣတ္ထန္နာမဿ ဘိက္ခုနော အာပတ္တိံ ပဋိဂ္ဂဏှေယျ’’န္တိ (စူဠဝ။ ၂၃၉)။ တေန ဝတ္တဗ္ဗော ‘‘ပဿသီ’’တိ။ ‘‘အာမ ပဿာမီ’’တိ။ ‘‘အာယတိံ သံဝရေယျာသီ’’တိ။ ဧဝံ အာပတ္တီနံ ပဋိဂ္ဂါဟော ‘‘ပဋိဂ္ဂါဟော’’တိ ဝုစ္စတိ။

၂၉၉၇။ ပဝါရုက္ကဍ္ဎနာတိ ပဝါရဏုက္ကဍ္ဎနာ။ ဂါထာဗန္ဓဝသေန ဏ-ကာရလောပေါ။ အထ ဝါ ပဝါရဏံ ပဝါရောတိ ပဝါရဏ-သဒ္ဒပရိယာယော ပဝါရ-သဒ္ဒေါ။ ‘‘ဣမံ ဥပေါသထံ ကတွာ၊ ကာဠေ ပဝါရယာမီ’’တိ ဣမိနာ ‘‘သုဏန္တု မေ အာယသ္မန္တာ အာဝါသိကာ၊ ယဒါယသ္မန္တာနံ ပတ္တကလ္လံ၊ ဣဒါနိ ဥပေါသထံ ကရေယျာမ၊ ပါတိမောက္ခံ ဥဒ္ဒိသေယျာမ၊ အာဂမေ ကာဠေ ပဝါရေယျာမာ’’တိ (မဟာဝ။ ၂၄၀) အယံ ဉတ္တိ ဥပလက္ခဏတော ဒဿိတာ။ ဧဝံ ကတပဝါရဏာ ‘‘ပစ္စုက္ကဍ္ဎနာ’’တိ မတာ။ ဧတ္ထ စ ကာဠေတိ ပုဗ္ဗကတ္တိကမာသဿ ကာဠပက္ခုပေါသထေ။ ဣမိနာ စ ‘‘အာဂမေ ဇုဏှေ ပဝါရေယျာမာ’’တိ အယံ ဉတ္တိ စ ဥပလက္ခိတာ။ ဇုဏှေတိ အပရကတ္တိကဇုဏှပက္ခဥပေါသထေ။

၂၉၉၈။ တိဏဝတ္ထာရကေတိ တိဏဝတ္ထာရကသမထေ။ သဗ္ဗပဌမာ ဉတ္တီတိ သဗ္ဗသင်္ဂါဟိကာ ဉတ္တိ ဝုစ္စတိ။ ဣတရာ စာတိ ဥဘယပက္ခေ ပစ္စေကံ ဌပိတာ ဒွေ ဉတ္တိယော စာတိ ဧဝံ တိဓာ ပဝတ္တံ ဧတံ ဉတ္တိကမ္မံ ကမ္မလက္ခဏံ ဣတိ ဧဝံ ဝုတ္တနယေန ‘‘ဝိနိစ္ဆယေ’’တိအာဒိနာ ဉတ္တိယာ နဝ ဌာနာနိ ဝေဒိတဗ္ဗာနီတိ ယောဇနာ။

၂၉၉၉-၃၀၀၀။ ဧဝံ ဉတ္တိကမ္မေ နဝ ဌာနာနိ ဒဿေတွာ ဣဒါနိ ဉတ္တိဒုတိယကမ္မေ သတ္တ ဌာနာနိ ဒဿေတုမာဟ ‘‘ဉတ္တိဒုတိယကမ္မမ္ပီ’’တိအာဒိ။ ‘‘ဉတ္တိဒုတိယကမ္မ’’န္တိအာဒိကာ ဥဒ္ဒေသဂါထာ ဥတ္တာနတ္ထာဝ။

နိဒ္ဒေသေ ပတ္တနိက္ကုဇ္ဇနာဒီတိ အာဒိ-သဒ္ဒေန ပတ္တုက္ကုဇ္ဇနံ ဂဟိတံ။ နိဿာရောသာရဏာ မတာတိ ‘‘နိဿာရဏာ၊ ဩသာရဏာ’’တိ စ မတာ။ တတ္ထ ဘိက္ခူနံ အလာဘာယ ပရိသက္ကနာဒိကေဟိ အဋ္ဌဟိ အင်္ဂေဟိ သမန္နာဂတဿ ဥပါသကဿ သင်္ဃေန အသမ္ဘောဂကရဏတ္ထံ ပတ္တနိက္ကုဇ္ဇနဝသေန နိဿာရဏာ စ တဿေဝ သမ္မာ ဝတ္တန္တဿ ပတ္တုက္ကုဇ္ဇနဝသေန ဩသာရဏာ စ ဝေဒိတဗ္ဗာ။ သာ ခုဒ္ဒကဝတ္ထုက္ခန္ဓကေ ဝဍ္ဎလိစ္ဆဝိဝတ္ထုသ္မိံ (စူဠဝ။ ၂၆၅) ဝုတ္တာ။

၃၀၀၁။ သီမာဒိသမ္မုတိ သမ္မုတိ နာမ။ သာ ပဉ္စဒသဓာ မတာတိ သီမာသမ္မုတိ တိစီဝရေနအဝိပ္ပဝါသသမ္မုတိ သန္ထတသမ္မုတိ ဘတ္တုဒ္ဒေသက သေနာသနဂ္ဂါဟာပက ဘဏ္ဍာဂါရိက စီဝရပဋိဂ္ဂါဟက ယာဂုဘာဇက ဖလဘာဇက ခဇ္ဇဘာဇက အပ္ပမတ္တကဝိဿဇ္ဇက သာဋိယဂ္ဂါဟာပက ပတ္တဂ္ဂါဟာပက အာရာမိကပေသက သာမဏေရပေသကသမ္မုတီတိ ဧဝံ သာ သမ္မုတိ ပဉ္စဒသဝိဓာ မတာတိ အတ္ထော။ ကထိနဿ ဝတ္ထံ၊ တဿ။ မတောယေဝ မတကော၊ မတကဿ ဝါသော မတကဝါသော၊ တဿ မတကဝါသသော၊ မတကစီဝရဿ။

၃၀၀၂။ အာနိသံသခေတ္တဘူတပဉ္စမာသဗ္ဘန္တရေယေဝ ဥဗ္ဘာရော အန္တရုဗ္ဘာရော။ ကုဋိဝတ္ထုဿ၊ ဝိဟာရဿ ဝတ္ထုနော စ ဒေသနာ ဒေသနာ နာမာတိ ယောဇနာ။

၃၀၀၃။ တိဏဝတ္ထာရကေ ဒွိန္နံ ပက္ခာနံ သာဓာရဏဝသေန ဌပေတဗ္ဗဉတ္တိ စ ပစ္ဆာ ပက္ခဒွယေ ဝိသုံ ဝိသုံ ဌပေတဗ္ဗာ ဒွေ ဉတ္တိယော စာတိ တိဿော ဉတ္တိယော ကမ္မဝါစာယ အဘာဝေန ဉတ္တိကမ္မေ ‘‘ကမ္မလက္ခဏ’’န္တိ ဒဿိတာ၊ ပစ္ဆာ ဝိသုံ ဝိသုံ ဒွီသု ပက္ခေသု ဝတ္တဗ္ဗာ ဒွေ ဉတ္တိဒုတိယကမ္မဝါစာ ဉတ္တိဒုတိယကမ္မေ ‘‘ကမ္မလက္ခဏ’’န္တိ ဒဿိတာတိ တံ ဒဿေတုမာဟ ‘‘တိဏဝတ္ထာရကေ ကမ္မေ’’တိ။ ‘‘မောဟာရောပနတာဒိသူ’’တိ ဣမိနာ ပါစိတ္တိယေသု ဒဿိတမောဟာရောပနကမ္မဉ္စ အညဝါဒကဝိဟေသကာရောပနကမ္မာဒိဉ္စ သင်္ဂဏှာတိ။ ဧတ္ထာတိ ဣမသ္မိံ ဉတ္တိဒုတိယကမ္မေ။ ကမ္မလက္ခဏမေဝ ကမ္မလက္ခဏတာ။

၃၀၀၄-၅။ ဣတိ ဧဝံ ယထာဝုတ္တနယေန ဣမေ သတ္တ ဌာနဘေဒါ ဉတ္တိဒုတိယကမ္မဿ။ ဧဝံ ဉတ္တိဒုတိယကမ္မေ သတ္တ ဌာနာနိ ဒဿေတွာ ဉတ္တိစတုတ္ထကမ္မေ ဌာနဘေဒံ ဒဿေတုမာဟ ‘‘တထာ’’တိအာဒိ။

၃၀၀၆။ တဇ္ဇနာဒီနန္တိ အာဒိ-သဒ္ဒေန နိယဿာဒီနံ ဂဟဏံ။ တေသံ သတ္တန္နံ ကမ္မာနံ။ ပဿဒ္ဓိ ဝူပသမော။

၃၀၀၇။ ‘‘ဘိက္ခုနီနံဩဝါဒေါ’’တိ ဘိက္ခုနောဝါဒကသမ္မုတိ ဖလူပစာရေန ဝုတ္တာ။

၃၀၀၈-၉။ မူလပဋိက္ကဿော မူလာယ ပဋိကဿနာ၊ ဂါထာဗန္ဓဝသေန က-ကာရဿ ဒွေဘာဝေါ။ ဥက္ခိတ္တဿာနုဝတ္တိကာတိ ဥက္ခိတ္တာနုဝတ္တိကာ ဧကာ ယာဝတတိယကာ၊ အဋ္ဌ သင်္ဃာဒိသေသာ၊ အရိဋ္ဌော စဏ္ဍကာဠီ စ ဒွေ၊ ဣမေ ဧကာဒသ ယာဝတတိယကာ ဘဝန္တိ။ ဣမေသံ ဝသာတိ ဥက္ခိတ္တာနုဝတ္တိကာဒီနိ ပုဂ္ဂလာဓိဋ္ဌာနေန ဝုတ္တာနိ၊ ဣမေသံ သမနုဘာသနကမ္မာနံ ဝသေန။ ဒသေကာတိ ဧကာဒသ။

၃၀၁၁။ ဧဝံ စတုန္နမ္ပိ ကမ္မာနံ ဌာနဘေဒံ ဒဿေတွာ အနွယတော၊ ဗျတိရေကတော စ ကာတဗ္ဗပ္ပကာရံ ဒဿေတုမာဟ ‘‘အပလောကနကမ္မဉ္စာ’’တိအာဒိ။ ဉတ္တိယာပိ န ကာရယေ၊ ဉတ္တိဒုတိယေနပိ န ကာရယေတိ ယောဇနာ။

၃၀၁၂။ အပလောကနကမ္မေ ဝုတ္တလက္ခဏေန ဉတ္တိကမ္မာဒီနမ္ပိ ကာတဗ္ဗပ္ပကာရော သက္ကာ ဝိညာတုန္တိ တံ အဒဿေတွာ ဉတ္တိဒုတိယကမ္မေ လဗ္ဘမာနဝိသေသံ ဒဿေတုမာဟ ‘‘ဉတ္တိဒုတိယကမ္မာနီ’’တိအာဒိ။ အပလောကေတွာ ကာတဗ္ဗာနိ လဟုကာနိပိ ဉတ္တိဒုတိယကမ္မာနိ အတ္ထီတိ ယောဇနာ။ တာနိ ပန ကတမာနီတိ အာဟ ‘‘သဗ္ဗာ သမ္မုတိယော သိယု’’န္တိ။ ဧတ္ထ သီမာသမ္မုတိံ ဝိနာ သေသာ တိစီဝရေနအဝိပ္ပဝါသသမ္မုတိအာဒယော သဗ္ဗာပိ သမ္မုတိယောတိ အတ္ထော။

၃၀၁၃။ သေသာနီတိ ယထာဝုတ္တေဟိ သေသာနိ သီမာသမ္မုတိအာဒီနိ ဆ ကမ္မာနိ။ န ဝဋ္ဋတီတိ န ဝဋ္ဋန္တိ၊ ဂါထာဗန္ဓဝသေန န-ကာရလောပေါ။ ယထာဟ ‘‘သီမာသမ္မုတိ၊ သီမာသမူဟနနံ၊ ကထိနဒါနံ၊ ကထိနုဒ္ဓါရော၊ ကုဋိဝတ္ထုဒေသနာ၊ ဝိဟာရဝတ္ထုဒေသနာတိ ဣမာနိ ဆ ကမ္မာနိ ဂရုကာနိ အပလောကေတွာ ကာတုံ န ဝဋ္ဋန္တိ၊ ဉတ္တိဒုတိယကမ္မဝါစံ သာဝေတွာဝ ကာတဗ္ဗာနီ’’တိ (ပရိ။ အဋ္ဌ။ ၄၈၂)။ ‘‘အပလောကေတွာ ကာတုံ ပန န ဝဋ္ဋတီ’’တိ ဣဒံ နိဒဿနမတ္တံ၊ ဉတ္တိစတုတ္ထကမ္မဝသေနာပိ ကာတုံ န ဝဋ္ဋန္တေဝ။ တေနေဝါဟ ‘‘ယထာဝုတ္တနယေနေဝ၊ တေန တေနေဝ ကာရယေ’’တိ၊ ယော ယော နယော တံ တံ ကမ္မံ ကာတုံ ဝုတ္တော၊ တေနေဝ တေနေဝ နယေနာတိ အတ္ထော။

စတုဗ္ဗိဓကမ္မကထာဝဏ္ဏနာ။