📜

ကမ္မဝိပတ္တိကထာဝဏ္ဏနာ

၃၀၁၄။ ကမ္မာနံ ဝိပတ္တိယာ ဒဿိတာယ သမ္ပတ္တိပိ ဗျတိရေကတော ဝိညာယတီတိ ကမ္မဝိပတ္တိံ တာဝ ဒဿေတုမာဟ ‘‘ဝတ္ထုတော’’တိအာဒိ။ ဝသတိ ဧတ္ထ ကမ္မသင်္ခါတံ ဖလံ တဒါယတ္တဝုတ္တိတာယာတိ ဝတ္ထု၊ ကမ္မဿ ပဓာနကာရဏံ၊ တတော ဝတ္ထုတော စ။ အနုဿာဝနသီမတောတိ အနုဿာဝနတော၊ သီမတော စ။ ပဉ္စေဝါတိ ဧဝကာရေန ကမ္မဒေါသာနံ ဧတံပရမတံ ဒဿေတိ။

၃၀၁၅။ ယထာနိက္ခိတ္တကမ္မဒေါသမာတိကာနုက္ကမေ ကမ္မဝိပတ္တိံ ဝိဘဇိတွာ ဒဿေတုမာဟ ‘‘သမ္မုခါ’’တိအာဒိ။ သင်္ဃဓမ္မဝိနယပုဂ္ဂလသမ္မုခါသင်္ခါတံ စတုဗ္ဗိဓံ သမ္မုခါဝိနယံ ဥပနေတွာ ကာတဗ္ဗံ ကမ္မံ သမ္မုခါကရဏီယံ နာမ။

တတ္ထ ယာဝတိကာ ဘိက္ခူ ကမ္မပတ္တာ၊ တေ အာဂတာ ဟောန္တိ၊ ဆန္ဒာရဟာနံ ဆန္ဒော အာဟဋော ဟောတိ၊ သမ္မုခီဘူတာ န ပဋိက္ကောသန္တိ၊ အယံ သင်္ဃသမ္မုခတာ။ ယေန ဓမ္မေန ယေန ဝိနယေန ယေန သတ္ထုသာသနေန သင်္ဃော တံ ကမ္မံ ကရောတိ၊ အယံ ဓမ္မသမ္မုခတာ၊ ဝိနယသမ္မုခတာ။ တတ္ထ ဓမ္မောတိ ဘူတံ ဝတ္ထု။ ဝိနယောတိ စောဒနာ စေဝ သာရဏာ စ။ သတ္ထုသာသနံ နာမ ဉတ္တိသမ္ပဒါ စေဝ အနုဿာဝနသမ္ပဒါ စ။ ယဿ သင်္ဃော တံ ကမ္မံ ကရောတိ၊ တဿ သမ္မုခဘာဝေါ ပုဂ္ဂလသမ္မုခတာ။ ဧဝံ စတုဗ္ဗိဓေန သမ္မုခါဝိနယေန ယံ သင်္ဃကမ္မံ ‘‘ကရဏီယ’’န္တိ ဝုတ္တံ၊ တံ အသမ္မုခါ ကရောတိ စတုဗ္ဗိဓလက္ခဏတော ဧကမ္ပိ ပရိဟာပေတွာ ကရောတိ၊ တံ ကမ္မံ ဝတ္ထုဝိပန္နံ သမ္မုခါဝိနယသင်္ခါတေန ဝတ္ထုနာ ဝေကလ္လံ ‘‘အဓမ္မကမ္မ’’န္တိ ပဝုစ္စတီတိ ယောဇနာ။

၃၀၁၆-၈။ ဧဝံ သမ္မုခါကရဏီယေ ဝတ္ထုတော ကမ္မဝိပတ္တိံ ဒဿေတွာ အသမ္မုခါကရဏီယံ ဝိဘဇိတွာ ဒဿေတုမာဟ ‘‘အသမ္မုခါ’’တိအာဒိ။

ဒေဝဒတ္တဿ ကတံ ပကာသနီယကမ္မဉ္စ။ သေက္ခသမ္မုတိ ဥမ္မတ္တကသမ္မုတီတိ ယောဇနာ။ အဝန္ဒိယကမ္မံ ပုဂ္ဂလသီသေန ‘‘အဝန္ဒိယော’’တိ ဝုတ္တံ။ အဍ္ဎကာသိယာ ဂဏိကာယ အနုညာတာ ဒူတေန ဥပသမ္ပဒါ ဒူတူပသမ္ပဒါ။ ဣတိ ဣမာနိ အဋ္ဌ ကမ္မာနိ ဌပေတွာန သေသာနိ ပန သဗ္ဗသော သဗ္ဗာနိ ကမ္မာနိ ‘‘သမ္မုခါကရဏီယာနီ’’တိ သောဘနဂမနာဒီဟိ သုဂတော သတ္ထာ အဗြွိ ကထေသီတိ ယောဇနာ။

၃၀၁၉-၂၀။ ဧဝံ ဝတ္ထုတော ကမ္မဝိပတ္တိံ ဒဿေတွာ ဉတ္တိတော ဒဿေတုမာဟ ‘‘ဉတ္တိတော’’တိအာဒိ။ ဝိပဇ္ဇနနယာတိ ဝိနယဝိပဇ္ဇနက္ကမာ။ ဝတ္ထုံ န ပရာမသတီတိ ယဿ ဥပသမ္ပဒါဒိကမ္မံ ကရောတိ၊ တံ န ပရာမသတိ တဿ နာမံ န ဂဏှာတိ။ ‘‘သုဏာတု မေ၊ ဘန္တေ သင်္ဃော၊ အယံ ဓမ္မရက္ခိတော အာယသ္မတော ဗုဒ္ဓရက္ခိတဿ ဥပသမ္ပဒါပေက္ခော’’တိ ဝတ္တဗ္ဗေ ‘‘သုဏာတု မေ၊ ဘန္တေ သင်္ဃော၊ အာယသ္မတော ဗုဒ္ဓရက္ခိတဿ ဥပသမ္ပဒါပေက္ခော’’တိ ဝဒတိ။ ဧဝံ ဝတ္ထုံ န ပရာမသတိ။

သင်္ဃံ န ပရာမသတီတိ သင်္ဃဿ နာမံ န ပရာမသတိ တဿ နာမံ န ဂဏှာတိ။ ‘‘သုဏာတု မေ၊ ဘန္တေ သင်္ဃော၊ အယံ ဓမ္မရက္ခိတော’’တိ ဝတ္တဗ္ဗေ ‘‘သုဏာတု မေ၊ ဘန္တေ၊ အယံ ဓမ္မရက္ခိတော’’တိ ဝဒတိ။ ဧဝံ သင်္ဃံ န ပရာမသတိ။

ပုဂ္ဂလံန ပရာမသတီတိ ယော ဥပသမ္ပဒါပေက္ခဿ ဥပဇ္ဈာယော၊ တံ န ပရာမသတိ တဿ နာမံ န ဂဏှာတိ။ ‘‘သုဏာတု မေ၊ ဘန္တေ သင်္ဃော၊ အယံ ဓမ္မရက္ခိတော အာယသ္မတော ဗုဒ္ဓရက္ခိတဿ ဥပသမ္ပဒါပေက္ခော’’တိ ဝတ္တဗ္ဗေ ‘‘သုဏာတု မေ၊ ဘန္တေ သင်္ဃော၊ အယံ ဓမ္မရက္ခိတော ဥပသမ္ပဒါပေက္ခော’’တိ ဝဒတိ။ ဧဝံ ပုဂ္ဂလံ န ပရာမသတိ။

ဉတ္တိံ န ပရာမသတီတိ သဗ္ဗေန သဗ္ဗံ ဉတ္တိံ န ပရာမသတိ၊ ဉတ္တိဒုတိယကမ္မေ ဉတ္တိံ အဋ္ဌပေတွာ ဒွိက္ခတ္တုံ ကမ္မဝါစာယ ဧဝ အနုဿာဝနကမ္မံ ကရောတိ၊ ဉတ္တိစတုတ္ထကမ္မေပိ ဉတ္တိံ အဋ္ဌပေတွာ စတုက္ခတ္တုံ ကမ္မဝါစာယ ဧဝ အနုဿာဝနကမ္မံ ကရောတိ။ ဧဝံ ဉတ္တိံ န ပရာမသတိ။

ပစ္ဆာ ဝါ ဉတ္တိံ ဌပေတီတိ ပဌမံ ကမ္မဝါစာယ အနုဿာဝနကမ္မံ ကတွာ ‘‘ဧသာ ဉတ္တီ’’တိ ဝတွာ ‘‘ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ ဝဒတိ။ ဧဝံ ပစ္ဆာ ဉတ္တိံ ဌပေတိ။ ပဉ္စဟေတေဟီတိ ဧတေဟိ ပဉ္စဟိ ကာရဏေဟိ။

၃၀၂၁-၂။ ဧဝံ ဉတ္တိတော ကမ္မဝိပတ္တိံ ဒဿေတွာ ဣဒါနိ အနုဿာဝနတော ဒဿေတုမာဟ ‘‘အနုဿာဝနတော’’တိအာဒိ။ အနုဿာဝနတော ကမ္မဒေါသာ ပဉ္စ ပကာသိတာတိ ယောဇနာ။ ‘‘န ပရာမသတိ ဝတ္ထုံ ဝါ’’တိအာဒီသု ဝတ္ထုအာဒီနိ ဝုတ္တနယေနေဝ ဝေဒိတဗ္ဗာနိ။ ဧဝံ ပန နေသံ အပရာမသနံ ဟောတိ (ပရိ။ အဋ္ဌ။ ၄၈၅) – ‘‘သုဏာတု မေ၊ ဘန္တေ သင်္ဃော’’တိ ပဌမာနုဿာဝနေ ဝါ ‘‘ဒုတိယမ္ပိ ဧတမတ္ထံ ဝဒါမိ… တတိယမ္ပိ ဧတမတ္ထံ ဝဒါမိ၊ ‘‘သုဏာတု မေ ဘန္တေ သင်္ဃော’’တိ ဒုတိယတတိယာနုဿာဝနေသု ဝါ ‘‘အယံ ဓမ္မရက္ခိတော အာယသ္မတော ဗုဒ္ဓရက္ခိတဿ ဥပသမ္ပဒါပေက္ခော’’တိ ဝတ္တဗ္ဗေ ‘‘သုဏာတု မေ၊ ဘန္တေ သင်္ဃော၊ အာယသ္မတော ဗုဒ္ဓရက္ခိတဿာ’’တိ ဝဒန္တော ဝတ္ထုံ န ပရာမသတိ နာမ။

‘‘သုဏာတု မေ၊ ဘန္တေ သင်္ဃော၊ အယံ ဓမ္မရက္ခိတော’’တိ ဝတ္တဗ္ဗေ ‘‘သုဏာတု မေ၊ ဘန္တေ၊ အယံ ဓမ္မရက္ခိတော’’တိ ဝဒန္တော သင်္ဃံ န ပရာမသတိ နာမ။

‘‘သုဏာတု မေ၊ ဘန္တေ သင်္ဃော၊ အယံ ဓမ္မရက္ခိတော အာယသ္မတော ဗုဒ္ဓရက္ခိတဿာ’’တိ ဝတ္တဗ္ဗေ ‘‘သုဏာတု မေ၊ ဘန္တေ သင်္ဃော၊ အယံ ဓမ္မရက္ခိတော ဥပသမ္ပဒါပေက္ခော’’တိ ဝဒန္တော ပုဂ္ဂလံ န ပရာမသတိ နာမ။

သာဝနံ ဟာပေတီတိ သဗ္ဗေန သဗ္ဗံ ကမ္မဝါစာယ အနုဿာဝနံ န ကရောတိ၊ ဉတ္တိဒုတိယကမ္မေ ဒွိက္ခတ္တုံ ဉတ္တိမေဝ ဌပေတိ၊ ဉတ္တိစတုတ္ထကမ္မေ စတုက္ခတ္တုံ ဉတ္တိမေဝ ဌပေတိ။ ဧဝံ အနုဿာဝနံ ဟာပေတိ။ ယောပိ ဉတ္တိဒုတိယကမ္မေ ဧကံ ဉတ္တိံ ဌပေတွာ ဧကံ ကမ္မဝါစံ အနုဿာဝေန္တော အက္ခရံ ဝါ ဆဍ္ဍေတိ၊ ပဒံ ဝါ ဒုရုတ္တံ ကရောတိ၊ အယမ္ပိ အနုဿာဝနံ ဟာပေတိယေဝ။ ဉတ္တိစတုတ္ထကမ္မေ ပန ဧကံ ဉတ္တိံ ဌပေတွာ သကိမေဝ ဝါ ဒွိက္ခတ္တုံ ဝါ ကမ္မဝါစာယ အနုဿာဝနံ ကရောန္တောပိ အက္ခရံ ဝါ ပဒံ ဝါ ဆဍ္ဍေန္တောပိ ဒုရုတ္တံ ကရောန္တောပိ အနုဿာဝနံ ဟာပေတိယေဝါတိ ဝေဒိတဗ္ဗော။

ဒုရုတ္တံ ကရောတီတိ ဧတ္ထ ပန အယံ ဝိနိစ္ဆယော (ပရိ။ အဋ္ဌ။ ၄၈၅) – ယော ဟိ အညသ္မိံ အက္ခရေ ဝတ္တဗ္ဗေ အညံ ဝဒတိ၊ အယံ ဒုရုတ္တံ ကရောတိ နာမ။ တသ္မာ ကမ္မဝါစံ ကရောန္တေန ဘိက္ခုနာ ယွာယံ –

‘‘သိထိလံ ဓနိတဉ္စ ဒီဃရဿံ၊

ဂရုကံ လဟုကဉ္စ နိဂ္ဂဟိတံ၊

သမ္ဗန္ဓံ ဝဝတ္ထိတံ ဝိမုတ္တံ၊

ဒသဓာ ဗျဉ္ဇနဗုဒ္ဓိယာ ပဘေဒေါ’’တိ။ (ပရိ။ အဋ္ဌ။ ၄၈၅) –

ဝုတ္တော ၊ အယံ သုဋ္ဌု ဥပလက္ခေတဗ္ဗော။

ဧတ္ထ ဟိ သိထိလံ နာမ ပဉ္စသု ဝဂ္ဂေသု ပဌမတတိယံ။ ဓနိတံ နာမ တေသွေဝ ဒုတိယစတုတ္ထံ။ ဒီဃန္တိ ဒီဃေန ကာလေန ဝတ္တဗ္ဗံ အာကာရာဒိ ။ ရဿန္တိ တတော ဥပဍ္ဎကာလေန ဝတ္တဗ္ဗံ အကာရာဒိ။ ဂရုကန္တိ ဒီဃမေဝ၊ ယံ ဝါ ‘‘အာယသ္မတော ဗုဒ္ဓရက္ခိတတ္ထေရဿ၊ ယဿ နက္ခမတီ’’တိ ဧဝံ သံယောဂပရံ ကတွာ ဝုစ္စတိ။ လဟုကန္တိ ရဿမေဝ၊ ယံ ဝါ ‘‘အာယသ္မတော ဗုဒ္ဓရက္ခိတထေရဿ၊ ယဿ န ခမတီ’’တိ ဧဝံ အသံယောဂပရံ ကတွာ ဝုစ္စတိ။ နိဂ္ဂဟိတန္တိ ယံ ကရဏာနိ နိဂ္ဂဟေတွာ အဝိဿဇ္ဇေတွာ အဝိဝဋေန မုခေန အနုနာသိကံ ကတွာ ဝတ္တဗ္ဗံ။ သမ္ဗန္ဓန္တိ ယံ ပရပဒေန သမ္ဗန္ဓိတွာ ‘‘တုဏှဿာ’’တိ ဝါ ‘‘တုဏှိဿာ’’တိ ဝါ ဝုစ္စတိ။ ဝဝတ္ထိတန္တိ ယံ ပရပဒေန အသမ္ဗန္ဓံ ကတွာ ဝိစ္ဆိန္ဒိတွာ ‘‘တုဏှီ အဿာ’’တိ ဝါ ‘‘တုဏှ အဿာ’’တိ ဝါ ဝုစ္စတိ။ ဝိမုတ္တန္တိ ယံ ကရဏာနိ အနိဂ္ဂဟေတွာ ဝိဿဇ္ဇေတွာ ဝိဝဋေန မုခေန အနုနာသိကံ အကတွာ ဝုစ္စတိ။

တတ္ထ ‘‘သုဏာတု မေ’’တိ ဝတ္တဗ္ဗေ တ-ကာရဿ ထ-ကာရံ ကတွာ ‘‘သုဏာထု မေ’’တိ ဝစနံ သိထိလဿ ဓနိတကရဏံ နာမ၊ တထာ ‘‘ပတ္တကလ္လံ၊ ဧသာ ဉတ္တီ’’တိ ဝတ္တဗ္ဗေ ‘‘ပတ္ထကလ္လံ၊ ဧသာ ဉတ္ထီ’’တိအာဒိဝစနဉ္စ။ ‘‘ဘန္တေ သင်္ဃော’’တိ ဝတ္တဗ္ဗေ ဘကာရဃကာရာနံ ဗကာရဂကာရေ ကတွာ ‘‘ဗန္တေ သံဂေါ’’တိ ဝစနံ ဓနိတဿ သိထိလကရဏံ နာမ။ ‘‘သုဏာတု မေ’’တိ ဝိဝဋေန မုခေန ဝတ္တဗ္ဗေ ပန ‘‘သုဏံတု မေ’’တိ ဝါ ‘‘ဧသာ ဉတ္တီ’’တိ ဝတ္တဗ္ဗေ ‘‘ဧသံ ဉတ္တီ’’တိ ဝါ အဝိဝဋေန မုခေန အနုနာသိကံ ကတွာ ဝစနံ ဝိမုတ္တဿ နိဂ္ဂဟိတဝစနံ နာမ။ ‘‘ပတ္တကလ္လ’’န္တိ အဝိဝဋေန မုခေန အနုနာသိကံ ကတွာ ဝတ္တဗ္ဗေ ‘‘ပတ္တကလ္လာ’’တိ ဝိဝဋေန မုခေန အနုနာသိကံ အကတွာ ဝစနံ နိဂ္ဂဟိတဿ ဝိမုတ္တဝစနံ နာမ။ ဣတိ သိထိလေ ကတ္တဗ္ဗေ ဓနိတံ၊ ဓနိတေ ကတ္တဗ္ဗေ သိထိလံ၊ ဝိမုတ္တေ ကတ္တဗ္ဗေ နိဂ္ဂဟိတံ၊ နိဂ္ဂဟိတေ ကတ္တဗ္ဗေ ဝိမုတ္တန္တိ ဣမာနိ စတ္တာရိ ဗျဉ္ဇနာနိ အန္တောကမ္မဝါစာယ ကမ္မံ ဒူသေန္တိ။ ဧဝံ ဝဒန္တော ဟိ အညသ္မိံ အက္ခရေ ဝတ္တဗ္ဗေ အညံ ဝဒတိ၊ ဒုရုတ္တံ ကရောတီတိ ဝုစ္စတိ။

ဣတရေသု ပန ဒီဃရဿာဒီသု ဆသု ဗျဉ္ဇနေသု ဒီဃဋ္ဌာနေ ဒီဃမေဝ၊ ရဿဋ္ဌာနေ စ ရဿမေဝါတိ ဧဝံ ယထာဌာနေ တံ တဒေဝ အက္ခရံ ဘာသန္တေန အနုက္ကမာဂတံ ပဝေဏိံ အဝိနာသေန္တေန ကမ္မဝါစာ ကာတဗ္ဗာ။ သစေ ပန ဧဝံ အကတွာ ဒီဃေ ဝတ္တဗ္ဗေ ရဿံ၊ ရဿေ ဝါ ဝတ္တဗ္ဗေ ဒီဃံ ဝဒတိ ၊ တထာ ဂရုကေ ဝတ္တဗ္ဗေ လဟုကံ၊ လဟုကေ ဝါ ဝတ္တဗ္ဗေ ဂရုကံ ဝဒတိ၊ သမ္ဗန္ဓေ ဝါ ပန ဝတ္တဗ္ဗေ ဝဝတ္ထိတံ၊ ဝဝတ္ထိတေ ဝါ ဝတ္တဗ္ဗေ သမ္ဗန္ဓံ ဝဒတိ၊ ဧဝံ ဝုတ္တေပိ ကမ္မဝါစာ န ကုပ္ပတိ။ ဣမာနိ ဟိ ဆ ဗျဉ္ဇနာနိ ကမ္မံ န ကောပေန္တိ။

ယံ ပန သုတ္တန္တိကတ္ထေရာ ‘‘ဒ-ကာရော တ-ကာရမာပဇ္ဇတိ၊ တ-ကာရော ဒ-ကာရမာပဇ္ဇတိ၊ စ-ကာရော ဇ-ကာရမာပဇ္ဇတိ၊ ဇ-ကာရော စ-ကာရမာပဇ္ဇတိ၊ ယ-ကာရော က-ကာရမာပဇ္ဇတိ၊ က-ကာရော ယ-ကာရမာပဇ္ဇတိ၊ တသ္မာ ဒ-ကာရာဒီသု ဝတ္တဗ္ဗေသု တ-ကာရာဒိဝစနံ န ဝိရုဇ္ဈတီ’’တိ ဝဒန္တိ၊ တံ ကမ္မဝါစံ ပတွာ န ဝဋ္ဋတိ။ တသ္မာ ဝိနယဓရေန နေဝ ဒ-ကာရော တ-ကာရော ကာတဗ္ဗော…ပေ… န က-ကာရော ယ-ကာရော။ ယထာပါဠိယာ နိရုတ္တိံ သောဓေတွာ ဒသဝိဓာယ ဗျဉ္ဇနနိရုတ္တိယာ ဝုတ္တဒေါသေ ပရိဟရန္တေန ကမ္မဝါစာ ကာတဗ္ဗာ။ ဣတရထာ ဟိ သာဝနံ ဟာပေတိ နာမ။

အသမယေ သာဝေတီတိ သာဝနာယ အကာလေ အနဝကာသေ ဉတ္တိံ အဋ္ဌပေတွာ ပဌမံယေဝ အနုဿာဝနကမ္မံ ကတွာ ပစ္ဆာ ဉတ္တိံ ဌပေတိ။ ဣတိ ဣမေဟိ ပဉ္စဟာကာရေဟိ အနုဿာဝနတော ကမ္မာနိ ဝိပဇ္ဇန္တိ။ တေနာဟ – ‘‘ဧဝံ ပန ဝိပဇ္ဇန္တိ၊ အနုဿာဝနတောပိ စာ’’တိ။

၃၀၂၃။ ဧဝံ အနုဿာဝနတော ကမ္မဝိပတ္တိံ ဒဿေတွာ သီမတော ကမ္မဝိပတ္တိ ဥပေါသထက္ခန္ဓကကထာယ ဝုတ္တနယာ ဧဝါတိ တမေဝ အတိဒိသန္တော အာဟ ‘‘ဧကာဒသဟိ…ပေ… မယာ’’တိ။ ကမ္မဒေါသောယေဝ ကမ္မဒေါသတာ။ တာဝ ပဌမံ။

၃၀၂၄-၇။ ဧဝံ သီမတော ကမ္မဝိပတ္တိံ အတိဒေသတော ဒဿေတွာ ဣဒါနိ ပရိသဝသေန ဒဿေတုမာဟ ‘‘စတုဝဂ္ဂေနာ’’တိအာဒိ။ ကမ္မပတ္တာတိ ဧတ္ထ ‘‘စတ္တာရော ပကတတ္တာ’’တိ သေသော။ ယထာဟ – ‘‘စတုဝဂ္ဂကရဏေ ကမ္မေ စတ္တာရော ဘိက္ခူ ပကတတ္တာ ကမ္မပတ္တာ’’တိ (ပရိ။ ၄၉၇)။ ဧတ္ထ စ ပကတတ္တာ နာမ အနုက္ခိတ္တာ အနိဿာရိတာ ပရိသုဒ္ဓသီလာ စတ္တာရော ဘိက္ခူ။ ကမ္မပတ္တာ ကမ္မဿ အရဟာ အနုစ္ဆဝိကာ သာမိနော။ န တေဟိ ဝိနာ တံ ကမ္မံ ကရီယတိ၊ န တေသံ ဆန္ဒော ဝါ ပါရိသုဒ္ဓိ ဝါ ဧတိ။ အနာဂတာတိ ပရိသာယ ဟတ္ထပါသံ အနာဂတာ။ ဆန္ဒောတိ ဧတ္ထ ‘‘ဆန္ဒာရဟာန’’န္တိ သေသော။ ယထာဟ ‘‘အဝသေသာ ပကတတ္တာ ဆန္ဒာရဟာ’’တိ။ ဣမိနာ အယမတ္ထော ဒီပိတော ဟောတိ – ‘‘အဝသေသာ ပန သစေပိ သဟဿမတ္တာ ဟောန္တိ၊ သစေ သမာနသံဝါသကာ၊ သဗ္ဗေ ဆန္ဒာရဟာဝ ဟောန္တိ၊ ဆန္ဒပါရိသုဒ္ဓိံ ဒတွာ အာဂစ္ဆန္တု ဝါ မာ ဝါ၊ ကမ္မံ ပန တိဋ္ဌတီ’’တိ။ သမ္မုခါတိ သမ္မုခီဘူတာ။

တိဝင်္ဂိကောတိ ကမ္မပတ္တာနာဂမနဆန္ဒာနာဟရဏပဋိက္ကောသနသင်္ခါတအင်္ဂတ္တယယုတ္တော။ ဒေါသော ကမ္မဝိပတ္တိလက္ခဏော။ ပရိသာယ ဝသာ သိယာတိ ပရိသဝသေန ဟောတိ။

ပဋိသေဓေန္တီတိ ပဋိက္ကောသန္တိ။ ဒုတိယေ စတုဝဂ္ဂိကေ ကမ္မေ ဒုဝင်္ဂိကော ဒေါသော ပရိသာယ ဝသာ သိယာတိ ယောဇနာ။

ဧတ္ထ ဧတသ္မိံ တတိယေ စတုဝဂ္ဂိကေ ပဋိက္ကောသောဝ အတ္ထိ၊ န ဣတရေ ပရိသဒေါသာတိ ဧကင်္ဂိကော ဒေါသော ပရိသာယ ဝသာ သိယာတိ ယောဇနာ။ ဒုဝင်္ဂ ယုတ္တပရိသာဒေါသဿ ဒုတိယံ ဒေသိတတ္တာ ဒုဝင်္ဂ ယုတ္တပရိသာဒေါသော ‘‘ဒုတိယော’’တိ ဝုတ္တော။ တထာ တတိယံ ဒေသိတတ္တာ ဧကင်္ဂယုတ္တော တတိယော ဝေဒိတဗ္ဗော။ ဣမမေဝ နယံ ပဉ္စဝဂ္ဂါဒိသင်္ဃတ္တယဿ အတိဒိသန္တော အာဟ ‘‘ဧဝံ…ပေ… တိဝိဓေသုပီ’’တိ။ အာဒိ-သဒ္ဒေန ဒသဝဂ္ဂဝီသတိဝဂ္ဂသင်္ဃာနံ ဂဟဏံ။

၃၀၂၈။ ဧဝံ စတူသု သင်္ဃေသု စတုန္နံ တိကာနံ ဝသေန ပရိသတော ကမ္မဝိပတ္တိယာ ဒွါဒသဝိဓတံ ဒဿေတုမာဟ ‘‘စတုတ္ထိကာ’’တိ။ အနုဝါဒေန ‘‘ဒသ ဒွေ သိယု’’န္တိ ဝိဓီယတိ။ ပရိသာဝသာ စတုတ္ထိကာ ဒေါသာ ဒသ ဒွေ ဒွါဒသ သိယုန္တိ ယောဇနာ။ ဧတ္ထာတိ ဧတေသု ‘‘ဝတ္ထုတော’’တိအာဒိနာ ဝုတ္တေသု ပဉ္စသု ကမ္မဒေါသေသု၊ နိဒ္ဓါရဏေ ဘုမ္မံ။ ‘‘ပရိသာဝသာ’’တိ ဣဒံ နိဒ္ဓါရေတဗ္ဗံ။ ကမ္မာနီတိ အပလောကနာဒီနိ စတ္တာရိ။ ဧတ္ထ စ စတုဝဂ္ဂါဒိကရဏီယေသု ကမ္မေသု ပကတတ္တေန ကမ္မဝါစံ သာဝေတွာ ကတမေဝ ကမ္မံ ကမ္မပတ္တေန ကတံ ဟောတိ။ ကမ္မပတ္တေ ပကတတ္တေ ဌပေတွာ အပကတတ္တေန ကေနစိ၊ ကေဝလေနေဝ ကမ္မဝါစံ သာဝေတွာ ကတံ အပကတတ္တကမ္မပတ္တလက္ခဏာဘာဝါ၊ ကမ္မပတ္တေန စ ကမ္မဝါစာယ အဿာဝိတတ္တာ အနုဿာဝနဒေါသေန ဝိပန္နံ ဟောတီတိ ဝေဒိတဗ္ဗံ။ တေနေဝ ပေါရာဏကဝိနယဓရတ္ထေရာ ကမ္မဝိပတ္တိသင်္ကာပရိဟာရတ္ထံ ဒွီဟိ တီဟိ ဧကတော ကမ္မဝါစံ သာဝယန္တိ။ အယမေတ္ထ သင်္ခေပေါ၊ ဝိတ္ထာရော ပန ပရိဝါရာဝသာနေ ပါဠိယာ (ပရိ။ ၄၈၂ အာဒယော) ဝါ အဋ္ဌကထာယ (ပရိ။ အဋ္ဌ။ ၄၈၂ အာဒယော) စ ဂဟေတဗ္ဗော။

ကမ္မဝိပတ္တိကထာဝဏ္ဏနာ။