📜

ဥတ္တရဝိနိစ္ဆယ-ဋီကာ

ဂန္ထာရမ္ဘကထာဝဏ္ဏနာ

(က)

ဒေဝါတိဒေဝံ သုဂတံ၊ ဒေဝဗြဟ္မိန္ဒဝန္ဒိတံ၊

ဓမ္မဉ္စ ဝဋ္ဋုပစ္ဆေဒံ၊ နတွာ ဝဋ္ဋာတိတံ ဂဏံ။

(ခ)

ဝန္ဒနာမယပုညေန၊ ကမ္မေန ရတနတ္တယေ၊

ဆေတွာ ဥပဒ္ဒဝေ သဗ္ဗေ၊ အာရဘိဿံ သမာဟိတော။

(ဂ)

ထေရေန ဗုဒ္ဓဒတ္တေန၊ ရစိတဿ သမာသတော၊

သံဝဏ္ဏနမသံကိဏ္ဏံ၊ ဥတ္တရဿ ယထာဗလံ။

၁။ အထာယမာစရိယော အတ္တနော ဝိရစိတေ ဝိနယေ တဿုပနိဿယေ ဝိနယပိဋကေ စ ဘိက္ခူနံ နာနပ္ပကာရကောသလ္လဇနနတ္ထံ ပရိဝါရဋ္ဌကထာယဉ္စ အာဂတဝိနိစ္ဆယံ သင်္ဂဟေတွာ ဥတ္တရပကရဏံ ဝဏ္ဏယိတုကာမော ပဌမံ တာဝ အန္တရာယနိဝါရဏေန ယထာဓိပ္ပေတသာဓနတ္ထံ ရတနတ္တယံ ဝန္ဒန္တော အာဟ ‘‘သဗ္ဗသတ္တုတ္တမ’’န္တိအာဒိ။

ပကရဏာရမ္ဘေ ရတနတ္တယဝန္ဒနာပယောဇနံ တတ္ထ တတ္ထာစရိယေဟိ ဗဟုဓာ ပပဉ္စိတံ၊ အမှေဟိ စ ဝိနယဝိနိစ္ဆယဝဏ္ဏနာယံ သမာသတော ဒဿိတန္တိ န တံ ဣဓ ဝဏ္ဏယိဿာမ။ ပကရဏာဘိဓေယျ ကရဏပ္ပကာရပယောဇနာနိပိ တတ္ထ ဒဿိတနယာနုသာရေန ဣဓာပိ ဝေဒိတဗ္ဗာနိ။ သမ္ဗန္ဓာဒိဒဿနမုခေန အနုတ္တာနပဒဝဏ္ဏနမေဝေတ္ထ ကရိဿာမိ။

ဇိနံ၊ ဓမ္မဉ္စ၊ ဂဏဉ္စ ဝန္ဒိတွာ ဥတ္တရံ ဒါနိ ကရိဿာမီတိ သမ္ဗန္ဓော။ ကိံဝိသိဋ္ဌံ ဇိနံ၊ ဓမ္မံ၊ ဂဏဉ္စ ဝန္ဒိတွာတိ အာဟ ‘‘သဗ္ဗသတ္တုတ္တမ’’န္တိအာဒိ။ တတ္ထ သဗ္ဗသတ္တုတ္တမန္တိ ပဉ္စသု ကာမဂုဏေသု သတ္တာ အာသတ္တာ ဝိသတ္တာ လဂ္ဂိတာတိ သတ္တာ၊ ပရမတ္ထတော သတ္တပညတ္တိယာ ဥပါဒါနဘူတာ ဥပါဒါနက္ခန္ဓာ ဝေါဟာရတော ခန္ဓသန္တတိံ ဥပါဒါယ ပညတ္တာ သမ္မုတိ ‘‘သတ္တာ’’တိ ဝုစ္စန္တိ။ တေ ပန ကာမာဝစရာဒိဘူမိဝသေန၊ နိရယာဒိပဒေသဝသေန၊ အဟေတုကာဒိပဋိသန္ဓိဝသေနာတိ ဧဝမာဒီဟိ အနန္တပဘေဒါ။ တေသု ခီဏာသဝါနံ ယထာဝုတ္တနိဗ္ဗစနတ္ထေန သတ္တဝေါဟာရော န လဗ္ဘတိ။ တထာပိ တေ ဘူတပုဗ္ဗဂတိယာ ဝါ တံသဒိသတ္တာ ဝါ ‘‘သတ္တာ’’တိ ဝုစ္စန္တိ။ သဗ္ဗေ စ တေ သတ္တာ စာ တိ သဗ္ဗသတ္တာ။ ဥဒ္ဓဋတမတ္တာ၊ ဥဂ္ဂတတမတ္တာ၊ သေဋ္ဌတ္တာ စ ဥတ္တမော၊ သဗ္ဗသတ္တာနံ လောကိယလောကုတ္တရေဟိ ရူပါရူပဂုဏေဟိ ဥတ္တမော၊ သဗ္ဗသတ္တေသု ဝါ ဥတ္တမော ပဝရော သေဋ္ဌောတိ သဗ္ဗသတ္တုတ္တမော။ ‘‘ဇိန’’န္တိ ဧတဿ ဝိသေသနံ။

ပုနပိ ကိံဝိသိဋ္ဌန္တိ အာဟ ‘‘ဓီရ’’န္တိ။ ဓီ ဝုစ္စတိ ပညာ၊ တာယ ဤရတိ ဝတ္တတီတိ ဓီရော၊ တံ။ တာဒိဘာဝေန ဣန္ဒခီလသိနေရုအာဒယော ဝိယ အဋ္ဌလောကဓမ္မသင်္ခါတေန ဘုသဝါတေန အကမ္ပိယဋ္ဌေန၊ စတုဝေသာရဇ္ဇဝသေန သဒေဝကေ လောကေ ကေနစိ အကမ္ပနီယဋ္ဌေန စ ဓီရံ၊ ဓိတိသမ္ပန္နန္တိ အတ္ထော။ ဣဒမ္ပိ တဿေဝ ဝိသေသနံ။

ဝန္ဒိတွာတိ ကာယဝစီမနောဒွါရေဟိ အဘိဝါဒေတွာတိ အတ္ထော၊ ယထာဘုစ္စဂုဏသံကိတ္တနေန ထောမေတွာ။ သိရသာတိ ဘတ္တိဘာဝနတုတ္တမင်္ဂေန ကရဏဘူတေန။ ဣမိနာ ဝိသေသတော ကာယပဏာမော ဒဿိတော၊ ဂုဏသံကိတ္တနေန ဝစီပဏာမော၊ ဥဘယပဏာမေဟိ နာနန္တရိယကတာယ မနောပဏာမောပိ ဒဿိတော စ ဟောတိ။

ဇိနန္တိ ဒေဝပုတ္တကိလေသာဘိသင်္ခါရမစ္စုခန္ဓမာရသင်္ခါတေ ပဉ္စဝိဓေ မာရေ ဗလဝိဓမနသမဥစ္ဆေဒပဟာနသဟာယဝေကလ္လနိဒါနောပစ္ဆေဒဝိသယာတိက္ကမဝသေန ပဉ္စဟိ အာကာရေဟိ ဇိတဝါတိ ဇိနော၊ တံ။

‘‘ဓမ္မ’’န္တိ ဧတဿ နိဗ္ဗစနာဒိဝသေန အတ္ထဝိနိစ္ဆယော ဟေဋ္ဌာ ဒဿိတောဝ။ အဓမ္မဝိဒ္ဓံသန္တိ ဓမ္မသင်္ခါတဿ ကုသလဿ ပဋိပက္ခတ္တာ အဓမ္မော ဝုစ္စတိ အကုသလဓမ္မော၊ တံ အကုသလသင်္ခါတံ အဓမ္မံ ဝိဒ္ဓံသေတိ ဝိနာသေတိ ပဇဟတိ တဒင်္ဂဝိက္ခမ္ဘနသမုစ္ဆေဒပဋိပ္ပဿဒ္ဓိနိဿရဏပ္ပဟာနေနာတိ အဓမ္မဝိဒ္ဓံသော၊ သပရိယတ္တိကော နဝလောကုတ္တရော ဓမ္မော။ ပရိယတ္တိ ဟိ ပဉ္စန္နံ ပဟာနာနံ မူလကာရဏတ္တာ ဖလူပစာရေန တထာ ဝုစ္စတိ၊ တံ အဓမ္မဝိဒ္ဓံသံ။ ‘‘ဓမ္မ’’န္တိ ဧတဿ ဝိသေသနံ။

ဂဏန္တိ အဋ္ဌန္နံ အရိယပုဂ္ဂလာနံ သမူဟံ၊ သင်္ဃန္တိ အတ္ထော။ အင်္ဂဏနာသနန္တိ အတ္တနော နိဿယံ အင်္ဂန္တိ မတ္ထေန္တီတိ အင်္ဂဏာ၊ ကိလေသာ ရာဂဒေါသမောဟာ၊ တေ အင်္ဂဏေ နာသေတိ ယထာယောဂံ တဒင်္ဂဝိက္ခမ္ဘနသမုစ္ဆေဒပဋိပ္ပဿဒ္ဓိနိဿရဏပ္ပဟာနေဟိ ပဇဟတီတိ အင်္ဂဏနာသနော၊ တံ။ ‘‘ဂဏ’’န္တိ ဧတဿ ဝိသေသနံ။

၂။ မယာ ဝိနယဿ ယော သာရော ဝိနိစ္ဆယော ရစိတော၊ တဿ ဝိနိစ္ဆယဿာတိ ယောဇနာ။ နတ္ထိ တဿ ဥတ္တရောတိ အနုတ္တရော၊ သဗ္ဗေသု ဝိနိစ္ဆယေသု၊ သဗ္ဗေသံ ဝါ ဝိနိစ္ဆယာနံ အနုတ္တရော ဥတ္တမော ဝိနိစ္ဆယောတိ သဗ္ဗာနုတ္တရော၊ တံ။ ဥတ္တရံ ပကရဏံ ဣဒါနိ ကရိဿာမီတိ ယောဇနာ။

၃။ ဘဏတောတိ ဘဏန္တဿ ပဂုဏံ ဝါစုဂ္ဂတံ ကရောန္တဿ။ ပဌတောတိ ပဌန္တဿ ဝါစုဂ္ဂတံ သဇ္ဈာယန္တဿ။ ပယုဉ္ဇတောတိ တတ္ထ ပကာရေန ယုဉ္ဇန္တဿ၊ တံ အညေသံ ဝါစေန္တဿ ဝါ။ သုဏတောတိ ပရေဟိ ဝုစ္စမာနံ သုဏန္တဿ။ စိန္တယတောတိ ယထာသုတံ အတ္ထတော၊ သဒ္ဒတော စ စိန္တေန္တဿ။ ‘‘အဗုဒ္ဓဿ ဗုဒ္ဓိဝဍ္ဎန’’န္တိ ဝတ္တဗ္ဗေ ဂါထာဗန္ဓဝသေန ဝိဘတ္တိလောပေါ။ အဗုဒ္ဓဿ ဗာလဿ ဝိနယေ အပ္ပကတညုနော ဘိက္ခုဘိက္ခုနိဇနဿ။ ဗုဒ္ဓိဝဍ္ဎနံ ဝိနယဝိနိစ္ဆယေ ပညာဝုဒ္ဓိနိပ္ဖာဒကံ။ အထ ဝါ ဗုဒ္ဓဿ ဝိနိစ္ဆယေ ကတပရိစယတ္တာ ပညဝတော ဇနဿ ဗုဒ္ဓိဝဍ္ဎနံ ဗုဒ္ဓိယာ ပညာယ တိက္ခဝိသဒဘာဝါပါဒနေန ဘိယျောဘာဝသာဓကံ။ ပရမံ ဥတ္တမံ ဥတ္တရံ နာမ ပကရဏံ ဝဒတော ကထေန္တဿ မေ မမ သန္တိကာ နိရတာ ဝိနိစ္ဆယေ၊ တီသု သိက္ခာသု ဝါ ဝိသေသေန ရတာ နိဗောဓထ ဇာနာထ သုတမယဉာဏံ အဘိနိပ္ဖာဒေထာတိ သောတုဇနံ သဝနေ နိယောဇေတိ။