📜

စတုဝိပတ္တိကထာဝဏ္ဏနာ

၂၇၃။ ဣဒါနိ ဥဘယသာဓာရဏံ ကတွာ ဝိပတ္တိဝါရာဒီနံ ဝိသိဋ္ဌဝါရာနံ သင်္ဂဟံ ကာတုမာဟ ‘‘ကတိ အာပတ္တိယော’’တိအာဒိ။

၂၇၄။ ဘိက္ခုနီ သစေ ဆာဒေတိ၊ စုတာ ဟောတိ။ သစေ ဝေမတိကာ ဆာဒေတိ၊ ထုလ္လစ္စယံ သိယာတိ ယောဇနာ။

၂၇၅။ သင်္ဃာဒိသေသန္တိ ပရဿ သင်္ဃာဒိသေသံ။

၂၇၆။ ‘‘ကတိ အာစာရဝိပတ္တိပစ္စယာ’’တိ ပဒစ္ဆေဒေါ။

၂၇၇။ အာစာရဝိပတ္တိန္တိ အတ္တနော ဝါ ပရဿ ဝါ အာစာရဝိပတ္တိံ။

၂၇၉။ ပါပိကံ ဒိဋ္ဌိန္တိ အဟေတုကအကိရိယနတ္ထိကဒိဋ္ဌိအာဒိံ လာမိကံ ဒိဋ္ဌိံ။

၂၈၁။ မနုဿုတ္တရိဓမ္မန္တိ ဥတ္တရိမနုဿဓမ္မံ။

၂၈၂။ အာဇီဝဟေတု သဉ္စရိတ္တံ သမာပန္နောတိ ယောဇနာ။ ပရိယာယဝစနေတိ ‘‘ယော တေ ဝိဟာရေ ဝသတိ၊ သော ဘိက္ခု အရဟာ’’တိအာဒိကေ လေသဝစနေ။ ဉာတေတိ ယံ ဥဒ္ဒိဿ ဝဒတိ၊ တသ္မိံ မနုဿဇာတိကေ ဝစနသမနန္တရမေဝ ဉာတေ။

၂၈၃။ ဝတွာတိ အဂိလာနော အတ္တနော အတ္ထာယ ဝိညာပေတွာ။ ဘိက္ခုနီ ပန သစေ ဧဝံ ဟောတိ၊ ဘိက္ခုနီ အဂိလာနာ အတ္တနော အတ္ထာယ ပဏီတဘောဇနံ ဝိညာပေတွာ ဘုတ္တာဝိနီ သစေ ဟောတီတိ အဓိပ္ပာယော။ တဿာ ပါဋိဒေသနီယံ သိယာတိ ယောဇနာ။

၂၈၄။ ‘‘အတ္တနော အတ္ထာယ ဝိညာပေတွာနာ’’တိ ဣမိနာ ပရဿ ဉာတကပဝါရိတေ တဿေဝတ္ထာယ ဝိညာပေတွာ တေန ဒိန္နံ ဝါ တဿ ဝိဿာသေန ဝါ ပရိဘုဉ္ဇန္တဿ တေသံ အတ္တနော အညာတကအပ္ပဝါရိတေ သုဒ္ဓစိတ္တတာယ အနာပတ္တီတိ ဒီပေတိ။

ဣတိ ဥတ္တရေ လီနတ္ထပကာသနိယာ

စတုဝိပတ္တိကထာဝဏ္ဏနာ နိဋ္ဌိတာ။