📜

အနိယတကထာဝဏ္ဏနာ

၅၄၂-၃။ ဣဒါနိ သင်္ဃာဒိသေသကထာနန္တရံ အနိယတကထံ ဒဿေတုမာဟ ‘‘ရဟောနိသဇ္ဇဿာဒေနာ’’တိအာဒိ။ ရဟသိ နိသဇ္ဇာ ရဟောနိသဇ္ဇာ၊ တဿာ အဿာဒေါ ရဟောနိသဇ္ဇဿာဒေါ၊ တေန ရဟောနိသဇ္ဇဿာဒေန၊ မေထုနဓမ္မသန္နိဿိတေန ကိလေသေနာတိ အတ္ထော။ ဝုတ္တဉှိ အဋ္ဌကထာယံ ‘‘ရဟောနိသဇ္ဇဿာဒေါတိ မေထုနဓမ္မသန္နိဿိတကိလေသော ဝုစ္စတီ’’တိ (ပါရာ။ အဋ္ဌ။ ၂။၄၅၁)။ ‘‘ရဟော နာမ စက္ခုဿ ရဟော သောတဿ ရဟော။ စက္ခုဿ ရဟော နာမ န သက္ကာ ဟောတိ အက္ခိံ ဝါ နိခဏိယမာနေ ဘမုကံ ဝါ ဥက္ခိပိယမာနေ သီသံ ဝါ ဥက္ခိပိယမာနေ ပဿိတုံ။ သောတဿ ရဟော နာမ န သက္ကာ ဟောတိ ပကတိကထာ သောတု’’န္တိ (ပါရာ။ ၄၄၅) ပဒဘာဇနေ ဝုတ္တရဟေသု စက္ခုဿ ရဟော ဧဝ ဣဓာဓိပ္ပေတော။ ယထာဟ အဋ္ဌကထာယံ ‘‘ကိဉ္စာပိ ပါဠိယံ ‘သောတဿ ရဟော’တိ အာဂတံ၊ စက္ခုဿ ရဟေနေဝ ပန ပရိစ္ဆေဒေါ ဝေဒိတဗ္ဗော’’တိ (ပါရာ။ အဋ္ဌ။ ၂။၄၄၄-၄၄၅)။

စက္ခုဿ ရဟတ္တာ ‘‘ပဋိစ္ဆန္န’’န္တိ ဣမမ္ပိ ပဋိစ္ဆန္နတ္တာ ဧဝ ‘‘အလံကမ္မနိယ’’န္တိ ဣမမ္ပိ သင်္ဂဏှာတိ။ နိသဇ္ဇသဒ္ဒေါပါဒါနေန ‘‘အာသနေ’’တိ ဣဒမ္ပိ ဂဟိတမေဝ။ ‘‘မာတုဂါမဿ သန္တိကံ ဂန္တုကာမော’’တိ ဣမိနာ ‘‘မာတုဂါမေန သဒ္ဓိ’’န္တိ ဣဒမ္ပိ ဂဟိတမေဝ။ ဧဝံ သာမတ္ထိယာ လဗ္ဘမာနပဒေါပါဒါနေန ယော ပန ဘိက္ခု မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇဿာဒေနာတိ ဝုတ္တံ ဟောတိ။ စက္ခုဿ ရဟဘာဝေန ကုဋ္ဋာဒိပဋိစ္ဆန္နေ တေနေဝ မေထုနသေဝနကမ္မဿ အနုရူပေ အာသနေ တဒဟုဇာတာယပိ မနုဿိတ္ထိယာ သဟ နိသဇ္ဇဿာဒရာဂေန သမန္နာဂတော ဟုတွာတိ အတ္ထော။ ဧတ္ထ ‘‘မာတုဂါမဿာ’’တိ တဒဟုဇာတမ္ပိ ဣတ္ထိံ ဂဏှာတီတိ ကုတော လဗ္ဘတီတိ? ‘‘မာတုဂါမော နာမ မနုဿိတ္ထီ၊ န ယက္ခီ၊ န ပေတီ၊ န တိရစ္ဆာနဂတာ၊ အန္တမသော တဒဟုဇာတာပိ ဒါရိကာ၊ ပဂေဝ မဟတ္တရီ’’တိ (ပါရာ။ ၄၄၅) ပဒဘာဇနတော လဗ္ဘတိ။

‘‘နိဝါသေတီ’’တိ ဣမိနာ ‘‘ကာယဗန္ဓနံ ဗန္ဓတိ၊ စီဝရံ ပါရုပတီ’’တိ ဣဒံ လက္ခီယတိ။ သဗ္ဗတ္ထာတိ ယထာဝုတ္တံ ပယောဂတော ပုဗ္ဗာပရပယောဂေ သင်္ဂဏှာတိ။ တေနေဝ ‘‘ပယောဂေ စ ပယောဂေ စာ’’တိ ဝိစ္ဆာပယောဂေါ ကတော။ နိသီဒတော စဿ ဒုက္ကဋန္တိ ယောဇနာ။ ‘‘ဥဘိန္နမ္ပိ နိသဇ္ဇာယ ပါစိတ္တိယ’’န္တိ ဝက္ခမာနတ္တာ ဒုက္ကဋံ သန္ဓာယ ဧကကဿ နိသီဒတောတိ ဂဟေတဗ္ဗံ။

၅၄၄။ နိသဇ္ဇာယဥဘိန္နမ္ပီတိ ဧတ္ထ ‘‘သကိ’’န္တိ သေသော၊ ဥဘိန္နံ နိသဇ္ဇာပူရဏဝသေန အညမညဿ ပုရေ ဝါ ပစ္ဆာ ဝါ ဧကက္ခဏေ ဝါ မာတုဂါမဿ ဝါ ဘိက္ခုဿ ဝါ ဧကဝါရံ နိသဇ္ဇာယာတိ ဝုတ္တံ ဟောတိ။ ဝုတ္တဉှေတံ ပါဠိယံ ‘‘မာတုဂါမေ နိသိန္နေ ဘိက္ခု ဥပနိသိန္နော ဝါ ဟောတီ’’တိအာဒိ (ပါရာ။ ၄၄၅)။ ဟောတိ ပါစိတ္တိယန္တိ ယောဇနာ။ ပယောဂဂဏနာယ စ ဟောန္တိ ပါစိတ္တိယာနီတိ ဂဟေတဗ္ဗံ၊ မာတုဂါမဿ ဝါ ဘိက္ခုနော ဝါ ဥဘိန္နံ ဝါ ဥဋ္ဌာယုဋ္ဌာယ ပုနပ္ပုနံ ဥပနိသီဒနပယောဂဂဏနာယ စာတိ အတ္ထော။ ‘‘အာပတ္တီဟိပိ တီဟိပီ’’တိ ဝက္ခမာနတ္တာ ပါစိတ္တိယဂ္ဂဟဏံ ပါရာဇိကသင်္ဃာဒိသေသာနံ ဥပလက္ခဏံ ဟောတိ၊ တီသု ဧကံ ဟောတီတိ ဝုတ္တံ ဟောတိ။ ဧတ္ထ ‘‘ပယောဂဂဏနာယာ’’တိ ဣဒံ ပါရာဇိကာယ န လဗ္ဘတိ ဧကပယောဂေနေဝ သိဇ္ဈနတော။ ကာယသံသဂ္ဂသင်္ဃာဒိသေသော၊ ပန သရီရတော ပုနပ္ပုနံ ဝိယုဇ္ဇိတွာ ဖုသနေန ပါစိတ္တိယဉ္စ ယထာဝုတ္တနယေနေဝ လဗ္ဘတိ။

ဗဟူသုပိ မာတုဂါမေသု ဗဟုကာနိ ပါစိတ္တိယာနိ ဟောန္တီတိ ယောဇနာ။ ဗဟူသု မာတုဂါမေသု နိသိန္နေသု နိသိန္နာနံ ဂဏနာယ ဧကေနေဝ ပယောဂေန ဗဟူနိ ပါစိတ္တိယာနိ စ သင်္ဃာဒိသေသာ စ ဟောန္တိ။ ‘‘ပယောဂဂဏနာယ စာ’’တိ ဣမဿ ဧတ္ထာပိ ယုဇ္ဇမာနတ္တာ တာသု ဝိသုံ ဝိသုံ ဥဋ္ဌာယုဋ္ဌာယ ပုနပ္ပုနံ နိသီဒန္တီသု၊ သယဉ္စ ဥဋ္ဌာယုဋ္ဌာယ ပုနပ္ပုနံ နိသီဒတော တာသံ ဂဏနာယ အာပဇ္ဇိတဗ္ဗာပတ္တိယော ပယောဂဂဏနာယ စ ဗဟူ ဟောန္တီတိ ဣဒံ လဗ္ဘတိ။ ဧတ္ထာပိ ပန ပါရာဇိကံ န လဗ္ဘတိ၊ သင်္ဃာဒိသေသော၊ ပါစိတ္တိယဉ္စ လဗ္ဘတိ။

၅၄၅။ သမီပေ ဌိတောပိ အန္ဓော အနာပတ္တိံ န ကရောတီတိ သောတဿ ရဟဘာဝေ အသတိပိ ပဓာနဘူတဿ ‘‘စက္ခုဿ ရဟော’’တိ ဣမဿ အင်္ဂဿ ဝိဇ္ဇမာနတ္တာ ဝုတ္တံ ‘‘အန္တောဒွါဒသဟတ္ထကေ’’တိ၊ ဣမိနာ သဝနူပစာရေ ဝိဇ္ဇမာနေပီတိ ဝုတ္တံ ဟောတိ။ ဣတ္ထီနံ တု သတမ္ပိ စ န ကရောတိ အနာပတ္တိန္တိ ယောဇနာ၊ ဝိညုနော ပုရိသဿ အသန္နိဟိတဘာဝေနာတိ အဓိပ္ပာယော။ ‘‘ဣတ္ထီနမ္ပိ သတမ္ပိ စာ’’တိ လိခန္တိ၊ တတောပိ အယမေဝ ပါဌော သုန္ဒရော။ ပိ-သဒ္ဒေါ ဝါ တု-သဒ္ဒတ္ထေ ဒဋ္ဌဗ္ဗော။

၅၄၆။ နိပဇ္ဇိတွာတိ ဧတ္ထ ‘‘သမီပေ’’တိ သေသော၊ ‘‘နိဒ္ဒါယန္တောပီ’’တိ ဧတဿ ဝိသေသကေန ‘‘နိပဇ္ဇိတွာ’’တိ ဣမိနာ နိသီဒိတွာ နိဒ္ဒါယန္တောတိ ဣမဿ နိဝတ္တိတတ္တာ သမီပေ နိသီဒိတွာ နိဒ္ဒါယန္တောပိ အနန္ဓော မနုဿပုရိသော အနာပတ္တိံ ကရောတီတိ လဗ္ဘတိ။ ‘‘ကေဝလ’’န္တိ ဝိသေသနေန ဗလဝနိဒ္ဒူပဂတော ဂဟိတောတိ တထာ အဟုတွာ အန္တရန္တရာ အာပန္နာပန္နေ ဝိနိစ္ဆိနိတွာ ပဝတ္တမာနာယ ကပိနိဒ္ဒါယ နိဒ္ဒါယန္တောပိ အနာပတ္တိံ ကရောတီတိ အယမတ္ထော လဗ္ဘတိ။ ‘‘ပိဟိတဒွါရဂဗ္ဘဿာ’’တိ ဝတ္တဗ္ဗေ မဇ္ဈပဒလောပီသမာသဝသေန ‘‘ပိဟိတဂဗ္ဘဿာ’’တိ ဝုတ္တံ။ ‘‘ဒွါရေ’’တိ ဣမိနာ ဒွါရေကဒေသဘူတံ ဥမ္မာရံ ဝါ တံသမီပံ ဝါ ဥပစာရေန ဝုတ္တန္တိ ဒဋ္ဌဗ္ဗံ။ သစေ ဂဗ္ဘော ပိဟိတဒွါရော န ဟောတိ၊ အနာပတ္တီတိ ဗျတိရေကတော ဒဿိတံ။

၅၄၇။ ဣမသ္မိံ အနိယတသိက္ခာပဒေ ပါဠိယံ အနာပတ္တိဝါရေ အသတိပိ ‘‘ယော ပန ဘိက္ခု မာတုဂါမေန သဒ္ဓိံ ရဟော ပဋိစ္ဆန္နေ အာသနေ နိသဇ္ဇံ ကပ္ပေယျ၊ ပါစိတ္တိယ’’န္တိ (ပါစိ။ ၂၈၅) ပဉ္စမဿ အစေလကဝဂ္ဂဿ စတုတ္ထသိက္ခာပဒေ အနာပတ္တိဝါရေ ‘‘အနာပတ္တိ ယော ကောစိ ဝိညူ ပုရိသော ဒုတိယော ဟောတိ၊ တိဋ္ဌတိ န နိသီဒတိ၊ အရဟောပေက္ခော၊ အညဝိဟိတော နိသီဒတိ၊ ဥမ္မတ္တကဿ အာဒိကမ္မိကဿာ’’တိ (ပါစိ။ ၂၈၈) ဝုတ္တေ အနာပတ္တိဝါရေ သင်္ဂဟေတုမာဟ ‘‘အနန္ဓေ သတီ’’တိအာဒိ။ ‘‘ဧတဿ သမီပေ’’တိ ပကရဏတော လဗ္ဘတိ။ ဣဓ ပုလ္လိင်္ဂနိဒ္ဒေသေန ပုရိသော လဗ္ဘတိ၊ ‘‘တေနာပိ အဗာလေန ဘဝိတဗ္ဗံ၊ မနုဿဇာတိကေန ဘဝိတဗ္ဗ’’န္တိ ဣဒဉ္စ ‘‘ဝိညုသ္မိ’’န္တိ ဣမိနာ လဗ္ဘတိ။ အန္ဓသဒိသနိဒ္ဒူပဂတပဋိပက္ခဝါစိအနန္ဓပဒေန ‘‘အနိဒ္ဒါယန္တေ’’တိ လဗ္ဘတိ၊ မနာပါမနာပံ ဇာနန္တေ အနိဒ္ဒါယန္တေ မနုဿပုရိသေ ဒဿနူပစာရဿ အန္တော ဝိဇ္ဇမာနေတိ အတ္ထော။

‘‘နိသဇ္ဇပစ္စယာ ဒေါသော နတ္ထီ’’တိ ဣမိနာ သမ္ဗန္ဓော၊ ဧဝရူပေ ရဟော အာသနေ မာတုဂါမေန သဒ္ဓိံ နိသိန္နပစ္စယာ အာပတ္တိ နတ္ထီတိ အတ္ထော။ ‘‘ဌိတဿာ’’တိ ဣမိနာပိ တဒေဝ ပဒံ ယောဇေတဗ္ဗံ။ ဝိညုမှိ ပဋိဗလေ မနုဿပုရိသေ အသန္နိဟိတေပိ တထာဝိဓေ ရဟော အာသနေ မာတုဂါမေ အာသနေ နိသိန္နေပိ သယာနေပိ ဌိတေပိ သယံ ဌိတဿ နိသဇ္ဇာယ အဘာဝါ တပ္ပစ္စယာ အာပတ္တိ န ဟောတီတိ အတ္ထော။ အရဟသညိနော နိသဇ္ဇပစ္စယာ ဒေါသော နတ္ထီတိ ရဟော အာသနေ မာတုဂါမေန သဒ္ဓိံ နိသဇ္ဇန္တဿာပိ ‘‘ရဟော’’တိ သညာရဟိတဿ နိသီဒတော နိသဇ္ဇပစ္စယာ အနာပတ္တီတိ အတ္ထော။ ဝိက္ခိတ္တစေတသော နိသဇ္ဇပစ္စယာ ဒေါသော နတ္ထီတိ ယောဇနာ။

၅၄၈။ ဧတ္တာဝတာ ပါစိတ္တိယာပတ္တိမတ္တတော အနာပတ္တိပ္ပကာရံ ဒဿေတွာ ဣဒါနိ ဣမဿ သိက္ခာပဒဿ အနိယတဝေါဟာရဟေတုဘူတာဟိ တီဟိ အာပတ္တီဟိ အနာပတ္တိပကာရံ ဒဿေတုမာဟ ‘‘န ဒေါသော’’တိအာဒိ။ အာပတ္တီဟိပိ တီဟိပီတိ ‘‘နိသဇ္ဇံ ဘိက္ခု ပဋိဇာနမာနော တိဏ္ဏံ ဓမ္မာနံ အညတရေန ကာရေတဗ္ဗော ပါရာဇိကေန ဝါ သင်္ဃာဒိသေသေန ဝါ ပါစိတ္တိယေန ဝါ’’တိ (ပါရာ။ ၄၄၄) ပါဠိယံ ဝုတ္တာဟိ ‘‘ပဌမပါရာဇိကာပတ္တိကာယသံသဂ္ဂသင်္ဃာဒိသေသာပတ္တိပါစိတ္တိယာပတ္တီ’’တိ ဣမာဟိ တီဟိပိ အာပတ္တီဟီတိ ဝုတ္တံ ဟောတီတိ။

ပဌမာနိယတကထာဝဏ္ဏနာ။

၅၄၉။ ဝတ္တဗ္ဗဘာဝေနာဓိကတဒုတိယာနိယတဝိနိစ္ဆယတော ပဌမာနိယတေ ဝုတ္တဝိနိစ္ဆယေဟိ သမံ ဝိနိစ္ဆယံ ပဟာယ တတ္ထ အဝုတ္တံ ဣမဿေဝ ဝိနိစ္ဆယဝိသေသံ ဒဿေတုမာဟ ‘‘အနန္ဓာ’’တိအာဒိ။ ဣဓ ဒုဋ္ဌုလ္လဝါစာသင်္ဃာဒိသေသဿာပိ ဂဟိတတ္တာ တတော အနာပတ္တိကရံ ဒဿေတုံ ‘‘အဗဓိရော’’တိ ဝုတ္တံ။ အနန္ဓော အဗဓိရောတိ ‘‘ပုရိသော’’တိ ဣဒံ သန္ဓာယ ဝုတ္တံ။ ‘‘ဣတ္ထီ’’တိ ဣဒံ သန္ဓာယ ‘‘အနန္ဓာဗဓိရာ’’တိ ဂဟေတဗ္ဗံ။ ဧဝမုပရိပိ။ တေနာပိ သဝနူပစာရန္တောဂဓေန ဘဝိတဗ္ဗန္တိ ဒဿေတုံ ‘‘အန္တောဒွါဒသဟတ္ထဋ္ဌော’’တိ ဝုတ္တံ။

၅၅၀။ ‘‘အန္ဓော အဗဓိရော အနာပတ္တိံ န ကရောတီ’’တိ ဣဒံ ကာယသံသဂ္ဂသင်္ဃာဒိသေသံ သန္ဓာယ ဝုတ္တံ။ ‘‘ဗဓိရော ဝါပိ စက္ခုမာ၊ န ကရောတိ အနာပတ္တိ’’န္တိ ဣဒံ ပန ဒုဋ္ဌုလ္လဝါစာသင်္ဃာဒိသေသံ သန္ဓာယ ဝုတ္တန္တိ ဧဝမေတ္ထ သန္ဓာယ ဘာသိတတ္ထော ဝေဒိတဗ္ဗော။

ပုရိမာနိယတကထာယ အဝုတ္တဝိသေသဿ ဒုတိယာနိယတကထာယ ဝတ္တုမိစ္ဆိတတ္တာ အယမ္ပိ ဝိသေသော ဣဓ ဝတ္တဗ္ဗော။ ကောယံ ဝိသေသော၊ ယော ဣဓ ဝတ္တဗ္ဗောတိ စေ? တတ္ထ ‘‘ပဋိစ္ဆန္နေ အာသနေ အလံကမ္မနိယေ’’တိ (ပါရာ။ ၄၄၄) ဝုတ္တံ အာသနင်္ဂဒွယံ ဣဓ ‘‘န ဟေဝ ခေါ ပန ပဋိစ္ဆန္နံ အာသနံ ဟောတိ နာလံကမ္မနိယ’’န္တိ (ပါရာ။ ၄၅၃) နိသေဓေတွာ ‘‘အလဉ္စ ခေါ ဟောတိ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိတု’’န္တိ (ပါရာ။ ၄၅၃) ဣဒံ အပုဗ္ဗင်္ဂံ ဝုတ္တံ။ တတြ မာတုဂါမောတိ အန္တမသော တဒဟုဇာတာပိ ဒါရိကာ ဂဟိတာ၊ ဣဓ ‘‘မာတုဂါမော နာမ မနုဿိတ္ထီ၊ န ယက္ခီ၊ န ပေတီ၊ န တိရစ္ဆာနဂတာ၊ ဝိညူ ပဋိဗလာ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတု’’န္တိ (ပါရာ။ ၄၅၄) ဝိညူ ပဋိဗလော မာတုဂါမောဝ ဝုတ္တော။ တတ္ထ ‘‘ပါရာဇိကေန ဝါ သင်္ဃာဒိသေသေန ဝါ ပါစိတ္တိယေန ဝါ’’တိ (ပါရာ။ ၄၄၄) တိဿော အာပတ္တိယော ဝုတ္တာ၊ ဣဓ ‘‘နိသဇ္ဇံ ဘိက္ခု ပဋိဇာနမာနော ဒွိန္နံ ဓမ္မာနံ အညတရေန ကာရေတဗ္ဗော သင်္ဃာဒိသေသေန ဝါ ပါစိတ္တိယေန ဝါ’’တိ (ပါရာ။ ၄၅၃) ဒွေယေဝ အာပတ္တိယော ဝုတ္တာ။ သင်္ဃာဒိသေသေသု စ တတ္ထ ‘‘သာ စေ ဧဝံ ဝဒေယျ ‘အယျော မယာ ဒိဋ္ဌော နိသိန္နော မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော’’တိ (ပါရာ။ ၄၄၈) ကာယသံသဂ္ဂသင်္ဃာဒိသေသောဝ ဝုတ္တော၊ ဣဓ သော စ ဝုတ္တော၊ ‘‘သာ စေ ဧဝံ ဝဒေယျ ‘အယျဿ မယာ သုတံ နိသိန္နဿ မာတုဂါမံ ဒုဋ္ဌုလ္လာဟိ ဝါစာဟိ ဩဘာသေန္တဿာ’တိ၊ သော စ တံ ပဋိဇာနာတိ၊ အာပတ္တိယာ ကာရေတဗ္ဗော’’တိ (ပါရာ။ ၄၅၅) ဒုဋ္ဌုလ္လဝါစာသင်္ဃာဒိသေသော စ ဝုတ္တော။ ဧတ္တကော ဥဘိန္နမနိယတာနံ ဝိသေသော။

အယံ ကသ္မာ န ဝုတ္တောတိ? အယံ သမ္ဗောဓဝတ္ထုဝိသေသော ဝတ္တုမိစ္ဆိတော ပန အဋ္ဌကထာဂတဝိနိစ္ဆယဝိသေသတောတိ တသ္မာ န ဝုတ္တောတိ ဒဋ္ဌဗ္ဗော။ တိသမုဋ္ဌာနမေဝိဒံ ကာယစိတ္တဝါစာစိတ္တကာယဝါစာစိတ္တဝသေန တီဏိ သမုဋ္ဌာနာနိ ဧတဿာတိ ကတွာ။

ဣမေဟိပိ ဒွီဟိ အနိယတသိက္ခာပဒေဟိ သိက္ခာပဒန္တရေသု ပညတ္တာယေဝ အာပတ္တိယော၊ အနာပတ္တိယော စ ဒဿိတာ၊ န ကောစိ အာပတ္တိဝိသေသော ဝုတ္တော၊ တသ္မာ ကိမေတေသံ ဝစနေနာတိ? ဝုစ္စတေ – ဝိနယဝိနိစ္ဆယလက္ခဏံ ဌပေတုံ ဘဂဝတာ ဥပ္ပန္နေ ဝတ္ထုမှိ ဒွေ အနိယတာ ပညတ္တာ။ ကထံ? ဧဝရူပါယပိ သဒ္ဓေယျဝစနာယ ဥပါသိကာယ ဝုစ္စမာနော ပဋိဇာနမာနောဝ အာပတ္တိယာ ကာရေတဗ္ဗော၊ န အပ္ပဋိဇာနမာနော၊ တသ္မာ ‘‘ယာယ ကာယစိ အာပတ္တိယာ ယေန ကေနစိ စောဒိတေ ပဋိညာတကရဏံယေဝင်္ဂံ ကာတဗ္ဗ’’န္တိ ဣမေဟိ သိက္ခာပဒေဟိ ဝိနိစ္ဆယလက္ခဏံ ဌပိတန္တိ ဝေဒိတဗ္ဗံ။ အထ ကသ္မာ ဘိက္ခုနီနံ အနိယတံ န ဝုတ္တန္တိ? ဣဒမေဝ လက္ခဏံ သဗ္ဗတ္ထ အနုဂတန္တိ န ဝုတ္တံ။

ဒုတိယာနိယတကထာဝဏ္ဏနာ။

ဣတိ ဝိနယတ္ထသာရသန္ဒီပနိယာ

ဝိနယဝိနိစ္ဆယဝဏ္ဏနာယ

အနိယတကထာဝဏ္ဏနာ နိဋ္ဌိတာ။