📜

ခန္ဓကပုစ္ဆာကထာဝဏ္ဏနာ

၃၀၀။ သေသေသူတိ အဘဗ္ဗပုဂ္ဂလပရိဒီပကေသု သဗ္ဗပဒေသု။

၃၀၂။ ‘‘နဿန္တု ဧတေ’’တိ ပဒစ္ဆေဒေါ။ ပုရက္ခကာတိ ဧတ္ထ သာမိအတ္ထေ ပစ္စတ္တဝစနံ၊ ဘေဒပုရေက္ခကဿ၊ ဘေဒပုရေက္ခကာယာတိ အတ္ထော။

၃၀၃။ သေသေသူတိ အဝသေသေသု အသံဝါသကာဒိဒီပကေသု ပဋိက္ခေပပဒေသု။

၃၀၄။ ဧကာဝဒုက္ကဋာပတ္တိ ဝုတ္တာတိ ဝဿံ အနုပဂမနာဒိပစ္စယာ ဇာတိတော ဧကာဝ ဒုက္ကဋာပတ္တိ ဝုတ္တာ။

၃၀၅။ ဥပေါသထသမာမတာတိ ဥပေါသထက္ခန္ဓကေ ဝုတ္တသဒိသာ ဇာတာ အာပတ္တိယော မတာ အဓိပ္ပေတာ။

၃၀၆။ စမ္မေတိ စမ္မက္ခန္ဓကေ။ ဝစ္ဆတရိံ ဂဟေတွာ မာရေန္တာနံ ဆဗ္ဗဂ္ဂိယာနံ ပါစိတ္တိ ဝုတ္တာတိ သမ္ဗန္ဓော။ ဝစ္ဆတရိန္တိ ဗလသမ္ပန္နံ တရုဏဂါဝိံ။ သာ ဟိ ဝစ္ဆကဘာဝံ တရိတွာ အတိက္ကမိတွာ ဌိတတ္တာ ‘‘ဝစ္ဆတရီ’’တိ ဝုစ္စတိ။

၃၀၇။ အင်္ဂဇာတံ ဆုပန္တဿာတိ ဂါဝီနံ အင်္ဂဇာတံ အတ္တနော အင်္ဂဇာတေန ဗဟိ ဆုပန္တဿ။ သေသေသူတိ ဂါဝီနံ ဝိသာဏာဒီသု ဂဟဏေ၊ ပိဋ္ဌိအဘိရုဟဏေ စ။ ယထာဟ ‘‘ဆဗ္ဗဂ္ဂိယာ ဘိက္ခူ အစိရဝတိယာ နဒိယာ ဂါဝီနံ တရန္တီနံ ဝိသာဏေသုပိ ဂဏှန္တီ’’တိအာဒိ (မဟာဝ။ ၂၅၂)။

၃၀၉။ တတ္ထ ဘေသဇ္ဇက္ခန္ဓကေ။ သာမန္တာ ဒွင်္ဂုလေတိ ဝစ္စမဂ္ဂပဿာဝမဂ္ဂါနံ သာမန္တာ ဒွင်္ဂုလမတ္တေ ပဒေသေ။ သတ္ထကမ္မံ ကရောန္တဿ ထုလ္လစ္စယမုဒီရိတန္တိ ယောဇနာ။ ယထာဟ – ‘‘န၊ ဘိက္ခဝေ၊ သမ္ဗာဓဿ သာမန္တာ ဒွင်္ဂုလေ သတ္ထကမ္မံ ဝါ ဝတ္ထိကမ္မံ ဝါ ကာရေတဗ္ဗံ၊ ယော ကာရေယျ၊ အာပတ္တိ ထုလ္လစ္စယဿာ’’တိ (မဟာဝ။ ၂၇၉)။ ဧတ္ထ စ ‘‘သာမန္တာ ဒွင်္ဂုလေ’’တိ ဣဒံ သတ္ထကမ္မံယေဝ သန္ဓာယ ဝုတ္တံ။ ဝတ္ထိကမ္မံ ပန သမ္ဗာဓေယေဝ ပဋိက္ခိတ္တံ။

‘‘န၊ ဘိက္ခဝေ၊ အညတြ နိမန္တိတေန အညဿ ဘောဇ္ဇယာဂု ပရိဘုဉ္ဇိတဗ္ဗာ၊ ယော ပရိဘုဉ္ဇေယျ၊ ယထာဓမ္မော ကာရေတဗ္ဗော’’တိ (မဟာဝ။ ၂၈၃) ဝုတ္တတ္တာ အာဟ ‘‘ဘောဇ္ဇယာဂူသု ပါစိတ္တီ’’တိ။ ဧတ္ထ စ ဘောဇ္ဇယာဂု နာမ ဗဟလယာဂု။ ‘‘ပိဏ္ဍံ ဝဋ္ဋေတွာ ပါတဗ္ဗယာဂူ’’တိ ဂဏ္ဌိပဒေ ဝုတ္တံ။ ပါစိတ္တီတိ ပရမ္ပရဘောဇနပဝါရဏသိက္ခာပဒေဟိ ပါစိတ္တိ။ သေသေသူတိ အန္တောဝုတ္ထအန္တောပက္ကသယံပက္ကပရိဘောဂါဒီသု။ ယထာဟ ‘‘န၊ ဘိက္ခဝေ၊ အန္တောဝုတ္ထံ အန္တောပက္ကံ သာမံပက္ကံ ပရိဘုဉ္ဇိတဗ္ဗံ၊ ယော ပရိဘုဉ္ဇေယျ၊ အာပတ္တိ ဒုက္ကဋဿာ’’တိအာဒိ (မဟာဝ။ ၂၇၄)။

၃၁၀။ စီဝရသံယုတ္တေတိ စီဝရက္ခန္ဓကေ။

၃၁၃။ စမ္ပေယျကေစ ကောသမ္ဗေတိ စမ္ပေယျက္ခန္ဓကေ စေဝ ကောသမ္ဗကက္ခန္ဓကေ စ။ ‘‘ကမ္မသ္မိ’’န္တိအာဒီသုပိ ဧသေဝ နယော။

၃၁၇။ ရောမန္ထေတိ ဘုတ္တဿ လဟုံ ပါကတ္တာယ ကုစ္ဆိဂတံ မုခံ အာရောပေတွာ သဏှကရဏဝသေန အနုစာလနေ။

၃၁၈။ သေနာသနသ္မိန္တိ သေနာသနက္ခန္ဓကေ။ ဂရုနောတိ ဂရုဘဏ္ဍဿ။

၃၂၀။ သင်္ဃဘေဒေတိ သင်္ဃဘေဒကက္ခန္ဓကေ။

၃၂၁။ ဘေဒါနုဝတ္တကာနန္တိ သင်္ဃဘေဒါနုဝတ္တကာနံ။ ဂဏဘောဂေတိ ဂဏဘောဇနေ။

၃၂၂။ သာတိ ဧတ္ထ သဗ္ဗဝတ္တေသု အနာဒရိယေန ဟောတီတိ သေသော။ သေသံ ဥတ္တာနတ္ထမေဝ။

ဣတိ ဥတ္တရေ လီနတ္ထပကာသနိယာ

ခန္ဓကပုစ္ဆာကထာဝဏ္ဏနာ နိဋ္ဌိတာ။