📜

သာဓာရဏာသာဓာရဏကထာဝဏ္ဏနာ

၇၇၉-၈၀။ သဗ္ဗသိက္ခာပဒါနန္တိ ဥဘတောဝိဘင်္ဂါဂတာနံ သဗ္ဗသိက္ခာပဒါနံ။ ဘိက္ခူဟိ ဘိက္ခုနီဟီတိ ဥဘယတ္ထ သဟတ္ထေ ကရဏဝစနံ။ ဘိက္ခူဟိ ဘိက္ခုနီနဉ္စ၊ ဘိက္ခုနီဟိ ဘိက္ခူနဉ္စာတိ ဥဘယတ္ထ အသာဓာရဏပညတ္တဉ္စ၊ တထာ ဘိက္ခူဟိ ဘိက္ခုနီနဉ္စ၊ ဘိက္ခုနီဟိ ဘိက္ခူနဉ္စာတိ ဥဘယတ္ထ သာဓာရဏသိက္ခာပဒဉ္စ အဟံ ဝက္ခာမီတိ ယောဇနာ။ သမာဟိတာတိ ဧကဂ္ဂစိတ္တာ။ တံ မယာ ဝုစ္စမာနံ နိဒါနာဒိနယံ။ သုဏာထာတိ သောတုဇနံ သက္ကစ္စသဝနေ နိယောဇေတိ။

၇၈၁။ ‘‘နိဒါန’’န္တိအာဒိဂါထာ ဝုတ္တတ္ထာဝ။

၇၈၂-၃။ ‘‘ကတိ ဝေသာလိယာ’’တိအာဒိ ပုစ္ဆာဂါထာ ဥတ္တာနတ္ထာယေဝ။

၇၈၆။ ‘‘ဒသ ဝေသာလိယာ’’တိအာဒိဝိဿဇ္ဇနဂါထာနံ ‘‘မေထုန’’န္တိအာဒယော နိဒ္ဒေသဝသေန ဝုတ္တာ။ ဝိဂ္ဂဟောတိ မနုဿဝိဂ္ဂဟံ ပါရာဇိကံ။ စတုတ္ထန္တိမဝတ္ထုကန္တိ ဥတ္တရိမနုဿဓမ္မပါရာဇိကံ။ အတိရေကစီဝရန္တိ ပဌမကထိနံ။ သုဒ္ဓကာဠကေဠကလောမကန္တိ ဧဠကလောမဝဂ္ဂေ ဒုတိယံ။

၇၈၇။ ဘူတန္တိ ပဌမေ မုသာဝါဒဝဂ္ဂေ အဋ္ဌမံ။ ပရမ္ပရဉ္စေဝါတိ ပရမ္ပရဘောဇနသိက္ခာပဒံ။ မုခဒွါရန္တိ စတုတ္ထေ ဘောဇနဝဂ္ဂေ ဒသမံ။ ဘိက္ခုနီသု စ အက္ကောသောတိ ဘိက္ခုနိပါတိမောက္ခေ ဆဋ္ဌေ အာရာမဝဂ္ဂေ ဒုတိယံ။

၇၈၈။ ဒွေအနုဒ္ဓံသနာနီတိ အဋ္ဌမနဝမသင်္ဃာဒိသေသာ။ စီဝရဿ ပဋိဂ္ဂဟောတိ စီဝရဝဂ္ဂေ ပဉ္စမံ။

၇၈၉။ ရူပိယန္တိ ဧဠကလောမဝဂ္ဂေ အဋ္ဌမံ။ သုတ္တဝိညတ္တီတိ ပတ္တဝဂ္ဂေ ဆဋ္ဌံ။ ဥဇ္ဈာပနန္တိ ဒုတိယေ ဘူတဂါမဝဂ္ဂေ တတိယံ။ ပရိပါစိတပိဏ္ဍောတိ တတိယေ ဩဝါဒဝဂ္ဂေ နဝမံ။ တထေဝ ဂဏဘောဇနန္တိ စတုတ္ထေ ဘောဇနဝဂ္ဂေ ဒုတိယံ။

၇၉၀။ ဝိကာလေ ဘောဇနဉ္စေဝါတိ တတ္ထေဝ သတ္တမံ။ စာရိတ္တန္တိ အစေလကဝဂ္ဂေ ပဉ္စမေ ဆဋ္ဌံ။ နှာနန္တိ သုရာပါနဝဂ္ဂေ ဆဋ္ဌေ သတ္တမံ။ ဦနဝီသတိဝဿန္တိ သတ္တမေ သပ္ပာဏကဝဂ္ဂေ ပဉ္စမံ။ ဒတွာ သင်္ဃေန စီဝရန္တိ အဋ္ဌမေ သဟဓမ္မိကဝဂ္ဂေ နဝမံ။

၇၉၁။ ဝေါသာသန္တီတိ ဒုတိယံ ဘိက္ခုပါဋိဒေသနီယံ။ နစ္စံ ဝါ ဂီတံ ဝါတိ ပဌမေ လသုဏဝဂ္ဂေ ဒသမံ။ စာရိကဒွယန္တိ စတုတ္ထေ တုဝဋ္ဋဝဂ္ဂေ သတ္တမဋ္ဌမာနိ။ ဆန္ဒဒါနေနာတိ အဋ္ဌမေ ကုမာရိဘူတဝဂ္ဂေ ဧကာဒသမံ။ ‘‘ဆန္ဒဒါနေတီ’’တိ ဝါ ပါဌော။ ‘‘ဆန္ဒဒါနံ ဣတိ ဣမေ’’တိ ပဒစ္ဆေဒေါ။

၇၉၂။ ကုဋီတိ ဆဋ္ဌော သင်္ဃာဒိသေသော။ ကောသိယန္တိ နိဿဂ္ဂိယေသု ဒုတိယေ ဧဠကလောမဝဂ္ဂေ ပဌမံ။ သေယျန္တိ မုသာဝါဒဝဂ္ဂေ ပဉ္စမံ။ ပထဝီတိ မုသာဝါဒဝဂ္ဂေ ဒသမံ။ ဘူတဂါမကန္တိ ဘူတဂါမဝဂ္ဂေ ဒုတိယေ ပဌမံ။ သပ္ပာဏကဉ္စ သိဉ္စန္တီတိ ဘူတဂါမဝဂ္ဂေ ဒသမံ။

၈၀၀။ ဆဦနာနိ တီဏေဝ သတာနီတိ ဆဟိ ဦနာနိ တီဏေဝ သတာနိ၊ စတုနဝုတာဓိကာနိ ဒွိသတာနီတိ အတ္ထော။ သမစေတသာတိ –

‘‘ဝဓကေ ဒေဝဒတ္တမှိ၊ စောရေ အင်္ဂုလိမာလကေ၊

ဓနပါလေ ရာဟုလေ စ၊ သဗ္ဗတ္ထ သမမာနသော’’တိ။ (မိ။ ပ။ ၆။၆။၅၊ ဓ။ ပ။ အဋ္ဌ။ ၁။၁၆ ဒေဝဒတ္တဝတ္ထု၊ ဣတိဝု။ အဋ္ဌ။ ၁၀၀) –

ဝစနတော သဗ္ဗေသု ဟိတာဟိတေသု၊ လာဘာလာဘာဒီသု စ အဋ္ဌသု လောကဓမ္မေသု နိဗ္ဗိကာရတာယ စ သမာနစိတ္တေန တထာဂတေန။

ဝုတ္တာဝသေသာတိ ဝေသာလိယာဒီသု ဆသု နဂရေသု ဝုတ္တေဟိ အဝသိဋ္ဌာနိ။ ဣမေ သဗ္ဗေ ဣမာနိ သဗ္ဗာနိ သိက္ခာပဒါနိ သာဝတ္ထိယံ ကတာနိ ဘဝန္တိ၊ ပညတ္တာနိ ဟောန္တီတိ အတ္ထော။

၈၀၁။ ပါရာဇိကာနိ စတ္တာရီတိ ဝေသာလိယံ ဝုတ္တံ မေထုနမနုဿဝိဂ္ဂဟဥတ္တရိမနုဿဓမ္မံ၊ ရာဇဂဟေ အဒိန္နာဒါနန္တိ စတ္တာရိ။ သတ္တ သင်္ဃာဒိသေသကာတိ ရာဇဂဟေ ဝုတ္တာ ဒွေ အနုဒ္ဓံသနာ၊ ဒွေ စ ဘေဒါ၊ အာဠဝိယံ ကုဋိကာရော၊ ကောသမ္ဗိယံ မဟလ္လကဝိဟာရော၊ ဒေါဝစဿန္တိ သတ္တ။ နိဿဂ္ဂိယာနိ အဋ္ဌေဝါတိ ဝေသာလိယံ အတိရေကစီဝရံ၊ ကာဠကဧဠကလောမံ၊ ရာဇဂဟေ စီဝရပဋိဂ္ဂဟဏံ၊ ရူပိယပဋိဂ္ဂဟဏံ၊ သုတ္တဝိညတ္တိ၊ အာဠဝိယံ ကောသိယမိဿကံ၊ ကပိလဝတ္ထုမှိ ဧဠကလောမဓောဝနံ၊ ဦနပဉ္စဗန္ဓနန္တိ အဋ္ဌ။

ဒွတ္တိံသေဝ စ ခုဒ္ဒကာတိ ဝေသာလိယံ ဘူတာရောစနံ၊ ပရမ္ပရဘောဇနံ၊ အပ္ပဋိဂ္ဂဟဏံ၊ အစေလကံ၊ ‘‘ယာ ပန ဘိက္ခုနီ ဘိက္ခုံ အက္ကောသေယျာ’’တိ ပဉ္စ၊ ရာဇဂဟေ ဥဇ္ဈာပနကံ၊ ဘိက္ခုနိပရိပါစိတပိဏ္ဍော၊ ဂဏဘောဇနံ၊ ဝိကာလဘောဇနံ၊ ‘‘ယော ပန ဘိက္ခု နိမန္တိတော’’တိအာဒိ စ၊ ‘‘ဩရေနဍ္ဎမာသံ နဟာယေယျာ’’တိ၊ ဦနဝီသတိဝဿံ၊ ‘‘သမဂ္ဂေန သင်္ဃေန စီဝရံ ဒတွာ’’တိ ဘိက္ခူနံ အဋ္ဌ၊ ဘိက္ခုနီနံ ပန ‘‘နစ္စံ ဝါ ဂီတံ ဝါ’’တိအာဒိ စ၊ ‘‘ယာ ပန ဘိက္ခုနီ အန္တောဝဿ’’န္တိအာဒိ စ၊ ‘‘ယာ ပန ဘိက္ခုနီ ဝဿံဝုတ္ထာ’’တိအာဒိ စာတိ ဒွယံ၊ ‘‘ယာ ပန ဘိက္ခုနီ ပါရိဝါသိကဆန္ဒဒါနေနာ’’တိအာဒိ စာတိ စတ္တာရိ၊ အာဠဝိယံ အနုပသမ္ပန္နေန ဥတ္တရိ ဒိရတ္တတိရတ္တံ၊ ‘‘ပထဝိံ ခဏေယျ ဝါ’’တိအာဒိ၊ ဘူတဂါမပါတဗျတာယ၊ ‘‘ဇာနံ သပ္ပာဏကံ ဥဒက’’န္တိ စတ္တာရိ၊ ကောသမ္ဗိယံ အညဝါဒကေ ဝိဟေသကေ၊ ယာဝဒွါရကောသာ အဂ္ဂဠဋ္ဌပနာယ၊ သုရာမေရယပါနေ၊ အနာဒရိယေ၊ ‘‘ယော ပန ဘိက္ခု ဘိက္ခူဟိ သဟဓမ္မိက’’န္တိအာဒိ စာတိ ပဉ္စ၊ ကပိလဝတ္ထုမှိ ‘‘ဘိက္ခုနုပဿယံ ဂန္တွာ’’တိအာဒိ၊ ‘‘အဂိလာနေန ဘိက္ခုနာ စာတုမာသ’’န္တိအာဒိ၊ ‘‘အဋ္ဌိမယံ ဝါ ဒန္တမယံ ဝါ’’တိအာဒိ တီဏိ ဘိက္ခူနံ၊ ဘိက္ခုနီနံ ပန ‘‘ဥဒကသုဒ္ဓိကံ ပနာ’’တိအာဒိ၊ ‘‘ဩဝါဒါယ ဝါ’’တိအာဒီတိ ဒွေ၊ ဘဂ္ဂေသု ‘‘အဂိလာနော ဝိသိဗ္ဗနာပေက္ခော’’တိအာဒိ ဧကန္တိ ဧတာနိ ဗာတ္တိံသေဝ ပါစိတ္တိယာနိ။

၈၀၂။ ဒွေဂါရယှာတိ ‘‘ဘိက္ခု ပနေဝ ကုလေသူ’’တိအာဒိ၊ ‘‘ယာနိ ခေါ ပန တာနိ အာရညကာနီ’’တိအာဒိ စာတိ ဒွေ ပါဋိဒေသနီယာ။ တယော သေခါတိ ကောသမ္ဗိယံ န သုရုသုရုကာရကံ၊ ဘဂ္ဂေသု န သာမိသေန ဟတ္ထေန ပါနီယထာလကံ၊ န သသိတ္ထကံ ပတ္တဓောဝနန္တိ တီဏိ သေခိယာနိ။ ဆပ္ပညာသေဝ သိက္ခာပဒါနိ ပိဏ္ဍိတာနိ ဝေသာလိယာဒီသု ဆသု နဂရေသု ပညတ္တာနိ ဘဝန္တီတိ ယောဇနာ။

၈၀၃။ သတ္တသု နဂရေသု ပညတ္တာနိ ဧတာနိ သဗ္ဗာနေဝ သိက္ခာပဒါနိ ပန အဍ္ဎုဍ္ဎာနိ သတာနေဝ ဘဝန္တိ။ သာဝတ္ထိယံ ပညတ္တေဟိ စတုနဝုတာဓိကဒွိသတသိက္ခာပဒေဟိ သဒ္ဓိံ ဆသု နဂရေသု ပညတ္တာနိ ဆပညာသ သိက္ခာပဒါနိ ပညာသာဓိကာနိ တီဏိ သတာနိ ဘဝန္တီတိ အတ္ထော။ အဍ္ဎေန စတုတ္ထံ ယေသံ တာနိ အဍ္ဎုဍ္ဎာနိ။

၈၀၄-၁၀။ ဧဝံ နိဒါနဝသေန နဂရံ ဒဿေတွာ ဣဒါနိ နိဒါနမညမသေသေတွာ ဥဘတောဝိဘင်္ဂါဂတာနံ သဗ္ဗေသံ သိက္ခာပဒါနံ ကေဝလံ ပိဏ္ဍဝသေန ဂဏနံ ဒဿေတုမာဟ ‘‘သိက္ခာပဒါနိ ဘိက္ခူန’’န္တိအာဒိ။

၈၁၁။ ဧဝံ သဗ္ဗသိက္ခာပဒါနံ နိဒါနဉ္စ ဂဏနဉ္စ ဒဿေတွာ ဣဒါနိ အသာဓာရဏာနိ ဒဿေတုမာဟ ‘‘ဆစတ္တာလီသာ’’တိအာဒိ။ ဘိက္ခူနံ ဘိက္ခုနီဟိ အသာဓာရဏဘာဝံ မဟေသိနာ ဂမိတာနိ သိက္ခာပဒါနိ ဆစတ္တာလီသေဝ ဟောန္တီတိ ယောဇနာ။ ဣမိနာ ဥဒ္ဒေသမာဟ။

၈၁၄။ ‘‘ဆ စ သင်္ဃာဒိသေသာ’’တိအာဒီဟိ ဒွီဟိ ဂါထာဟိ နိဒ္ဒေသံ ဒဿေတွာ ‘‘ဝိဿဋ္ဌီ’’တိအာဒိနာ ပဋိနိဒ္ဒေသမာဟ။

၈၁၅။ ‘‘နိဿဂ္ဂိယေ အာဒိဝဂ္ဂသ္မိ’’န္တိ ပဒစ္ဆေဒေါ။ ဓောဝနန္တိ အညာတိကာယ ဘိက္ခုနိယာ စီဝရဓောဝနံ။ ပဋိဂ္ဂဟောတိ တဿာယေဝ ဟတ္ထတော စီဝရပဋိဂ္ဂဟဏံ။

၈၁၆။ အာရညန္တိ ဧကူနတိံသတိမံ သိက္ခာပဒံ။

၈၁၇။ ဘိက္ခူနံ၊ ဘိက္ခုနီနဉ္စ ဝုတ္တာနိ သဗ္ဗာနိ ပါစိတ္တိယာနိ ဂဏနာဝသာ အဋ္ဌာသီတိသတံ ဘဝန္တီတိ ယောဇနာ။ အဋ္ဌာသီတိသတန္တိ ဘိက္ခုနိပါတိမောက္ခာဂတံ ဆသဋ္ဌိသတပါစိတ္တိယံ ဝက္ခမာနေဟိ ဘိက္ခုနိယတေဟိ ဗာဝီသတိပါစိတ္တိယေဟိ သဒ္ဓိံ အဋ္ဌာသီတိသတံ ဟောတိ။ တတောတိ အဋ္ဌာသီတာဓိကသတပါစိတ္တိယတော နိဒ္ဓါရိတာနိ ဧတာနိ ဒွါဝီသတိ ခုဒ္ဒကာနိ ဘိက္ခူနံ ပါတိမောက္ခကေ ဘဝန္တီတိ ယောဇနာ။

၈၁၈။ ဘိက္ခုနိဝဂ္ဂေါတိ ဘိက္ခုနီနံ ဩဝါဒဝဂ္ဂေါ။ ပရမ္ပရဘောဇနေ ပညတ္တံ သိက္ခာပဒံ ပရမ္ပရဘောဇနံ၊ ပရမ္ပရဘောဇနေန သဟ ဝတ္တတီတိ သပရမ္ပရဘောဇနော။

၈၂၂။ ‘‘ဧကတော ပန ပညတ္တာ’’တိအာဒိ နိဂမနံ။ ဘိက္ခုနီဟိ အသာဓာရဏတံ ဂတာ ဧကတောဝ ပညတ္တာ ဣမေ ဣမာနိ သိက္ခာပဒါနိ ပိဏ္ဍိတာနိ ဆစတ္တာလီသ ဟောန္တီတိ ယောဇနာ။

၈၂၃။ မဟေသိနာ ဘိက္ခူဟိ အသာဓာရဏဘာဝံ ဂမိတာနိ ဘိက္ခုနီနံ သိက္ခာပဒါနိ ပရိပိဏ္ဍိတာနိ သတံ၊ တိံသ စ ဘဝန္တီတိ ယောဇနာ။

၈၂၄။ ဧဝံ ဥဒ္ဒိဋ္ဌာနံ နိဒ္ဒေသမာဟ ‘‘ပါရာဇိကာနီ’’တိအာဒိနာ။ ပါရာဇိကာနိ စတ္တာရီတိ ဥဗ္ဘဇာဏုမဏ္ဍလိကဝဇ္ဇပဋိစ္ဆာဒိကဥက္ခိတ္တာနုဝတ္တိကအဋ္ဌဝတ္ထုကသင်္ခါတာနိ စတ္တာရိ ပါရာဇိကာနိ။

၈၂၆။ ဒွီဟိ ဂါထာဟိ နိဒ္ဒိဋ္ဌာနံ ပဋိနိဒ္ဒေသော ‘‘ဘိက္ခုနီနံ တု သင်္ဃာဒိသေသေဟီ’’တိအာဒိ။ စတုန္နံ ပါရာဇိကာနံ ဥဒ္ဒေသဝသေနေဝ ပါကဋတ္တာ ပဋိနိဒ္ဒေသေ အဂ္ဂဟဏံ။ အာဒိတော ဆာတိ ဥဿယဝါဒိကာဒယော ဆ သင်္ဃာဒိသေသာ။ ‘‘အာဒိတော’’တိ ဣဒံ ‘‘ယာဝတတိယကာ’’တိ ဣမိနာပိ ယောဇေတဗ္ဗံ၊ အဋ္ဌသု ယာဝတတိယကေသု ပုရိမာနိ စတ္တာရိ သိက္ခာပဒါနီတိ ဝုတ္တံ ဟောတိ။

၈၂၇။ သတ္တညဒတ္ထိကာဒီနီတိ အာဒိ-သဒ္ဒေန အညဒတ္ထိကသိက္ခာပဒတော ပစ္ဆိမာနိ စတ္တာရိ၊ ပုရိမာနိ ‘‘အညံ ဝိညာပေယျ၊ အညံ စေတာပေယျာ’’တိ ဒွေ စ ဂဟိတာနိ။ ပတ္တော စေဝါတိ ပဌမံ ပတ္တသန္နိစယသိက္ခာပဒမာဟ။ ဒုတိယဝဂ္ဂေ ပုရိမသိက္ခာပဒဒွယံ ‘‘ဂရုံ လဟု’’န္တိ ဣမိနာ ဂဟိတံ။

၈၂၈။ ဣဓ ဘိက္ခုနိပါတိမောက္ခေ ဧတာနိ ပန ဒွါဒသေဝ နိဿဂ္ဂိယာနိ သတ္ထာရာ ဘိက္ခုနီနံ ဝသေန ဧကတော ပညတ္တာနီတိ ယောဇနာ။

၈၂၉-၃၀။ ‘‘သဗ္ဗေဝ ဂဏနာဝသာ’’တိအာဒိ နိဂမနံ။ ဘိက္ခူဟိ အသာဓာရဏတံ ဂတာ ဘိက္ခုနီနံ ဧကတော ပညတ္တာ သတံ၊ တိံသ ဘဝန္တီတိ ယောဇနာ။

၈၃၁-၃။ ‘‘အသာဓာရဏာ ဥဘိန္န’’န္တိ ပဒစ္ဆေဒေါ။ ဥဘိန္နံ အသာဓာရဏသိက္ခာပဒါနိ သတဉ္စ သတ္တတိ စ ဆ စ ဘဝန္တိ။ ဧဝမုဒ္ဒိဋ္ဌာနံ နိဒ္ဒေသော ‘‘ပါရာဇိကာနိ စတ္တာရီ’’တိအာဒိ။ ဘိက္ခူဟိ အသာဓာရဏာနိ ဘိက္ခုနီနံ စတ္တာရိ ပါရာဇိကာနိ။ ဒသစ္ဆစာတိ ဘိက္ခူဟိ အသာဓာရဏာနိ ဘိက္ခုနီနံ သင်္ဃာဒိသေသာ ဒသ၊ ဘိက္ခုနီဟိ အသာဓာရဏာနိ ဘိက္ခူနံ ဝိဿဋ္ဌိအာဒိကာ သင်္ဃာဒိသေသာ ဆ စာတိ သင်္ဃာဒိသေသာ သောဠသ။

အနိယတာ ဒုဝေ စေဝါတိ ဘိက္ခုနီဟိ အသာဓာရဏာနိ ဘိက္ခူနံ အနိယတာ ဒွေ စ။ နိဿဂ္ဂါ စတုဝီသတီတိ ဘိက္ခုနီဟိ အသာဓာရဏာနိ ဘိက္ခူနံ ဒွါဒသ၊ ဘိက္ခူဟိ အသာဓာရဏာနိ ဘိက္ခုနီနံ ဒွါဒသာတိ ဧဝံ နိဿဂ္ဂိယာ စတုဝီသတိ စ။ သတံ အဋ္ဌာရသ ခုဒ္ဒကာတိ ဘိက္ခုနီဟိ အသာဓာရဏာနိ ဘိက္ခူနံ ဗာဝီသတိ၊ ဘိက္ခူဟိ အသာဓာရဏာနိ ဘိက္ခုနီနံ ဆန္နဝုတီတိ အဋ္ဌာရသာဓိကသတံ ခုဒ္ဒကာနိ စ။ ဧတ္ထာတိ ဣမသ္မိံ အသာဓာရဏသင်္ဂဟေ။

ဒွါဒသေဝ စ ဂါရယှာတိ ဘိက္ခုနီဟိ အသာဓာရဏာနိ ဘိက္ခူနံ စတ္တာရိ၊ ဘိက္ခူဟိ အသာဓာရဏာနိ ဘိက္ခုနီနံ အဋ္ဌာတိ ဧတေ ပါဋိဒေသနီယာ စာတိ ဣမေ ဆသတ္တတိအဓိကာနိ သတသိက္ခာပဒါနိ ဥဘိန္နမ္ပိ အသာဓာရဏာနီတိ ယောဇနာ။

၈၃၄။ ဥဘိန္နမ္ပိ သာဓာရဏာနိ သတ္ထုနာ ပညတ္တာနိ သိက္ခာပဒါနိ သတဉ္စ သတ္တတိ စ စတ္တာရိ စ ဘဝန္တီတိ ပကာသိတာတိ ယောဇနာ။

၈၃၅-၆။ ပါရာဇိကာနိ စတ္တာရီတိ မေထုနအဒိန္နာဒါနမနုဿဝိဂ္ဂဟဥတ္တရိမနုဿဓမ္မပါရာဇိကာနိ စတ္တာရိ စ။ သတ္တ သင်္ဃာဒိသေသကာတိ သဉ္စရိတ္တအမူလကအညဘာဂိယာ၊ စတ္တာရော ယာဝတတိယကာ စာတိ သင်္ဃာဒိသေသာ သတ္တ စ။ အဋ္ဌာရသ စ နိဿဂ္ဂါတိ နိဿဂ္ဂိယေသု ပဌမေ စီဝရဝဂ္ဂေ ဓောဝနပဋိဂ္ဂဟဏသိက္ခာပဒဒွယဝဇ္ဇိတာနိ အဋ္ဌ၊ ဧဠကလောမဝဂ္ဂေ အဋ္ဌမနဝမဒသမာနီတိ တယော၊ ပတ္တဝဂ္ဂေ ပဌမပတ္တဝဿိကသာဋိကအာရညကသိက္ခာပဒတ္တယဿ ဝဇ္ဇိတာနိ သတ္တ စာတိ ဣမာနိ အဋ္ဌာရသ နိဿဂ္ဂိယသိက္ခာပဒါနိ စ။ သမသတ္တတိ ခုဒ္ဒကာတိ –

‘‘သဗ္ဗော ဘိက္ခုနိဝဂ္ဂေါပိ…ပေ… ဒွါဝီသတိ ဘဝန္တိ ဟီ’’တိ။ (ဥ။ ဝိ။ ၈၁၈-၈၂၁) –

ဝုတ္တာ ဘိက္ခူနံ ဘိက္ခုနီဟိ အသာဓာရဏာတိ ဣမေဟိ ဗာဝီသတိပါစိတ္တိယေဟိ ဝဇ္ဇိတာနိ အဝသေသာနိ သတ္တတိ ပါစိတ္တိယာနိ စ ဥဘယသာဓာရဏဝသေန ပညတ္တာနိ။ ပဉ္စသတ္တတိ သေခိယာပိ စာတိ ဥဘိန္နံ ဘိက္ခုဘိက္ခုနီနံ သမသိက္ခတာ သာဓာရဏသိက္ခာပဒါနိ သဗ္ဗသော သတံ၊ သတ္တတိ၊ စတ္တာရိ စ ဟောန္တီတိ ယောဇနာ။

ဣတိ ဥတ္တရေ လီနတ္ထပကာသနိယာ

သာဓာရဏာသာဓာရဏကထာဝဏ္ဏနာ နိဋ္ဌိတာ။