📜

လက္ခဏကထာဝဏ္ဏနာ

၈၃၇။ ဣတောတိ သာဓာရဏာသာဓာရဏကထာယ ပရံ။ သဗ္ဗဂန္တိ သဗ္ဗသိက္ခာပဒသာဓာရဏံ။ ဝဒတော မေတိ ဝဒတော မမ ဝစနံ။ နိဗောဓထာတိ နိသာမေထ၊ ဧကဂ္ဂစိတ္တာ ဟုတွာ သက္ကစ္စံ သုဏာထာတိ အတ္ထော။

၈၃၈-၉။ ‘‘ဝိပတ္တိ အာပတ္တိ အနာပတ္တီ’’တိ ပဒစ္ဆေဒေါ။ ‘‘အာဏတ္တိ အင်္ဂ’’န္တိ ပဒစ္ဆေဒေါ။ ဝဇ္ဇကမ္မပဘေဒကန္တိ ဝဇ္ဇပဘေဒကံ ကမ္မပဘေဒကံ။ တိကဒွယန္တိ ကုသလတ္တိကဝေဒနာတ္တိကဒွယံ။ သဗ္ဗတ္ထာတိ ဣဒံ ပန သတ္တရသဝိဓသဗ္ဗသာဓာရဏလက္ခဏံ။ သဗ္ဗတ္ထ သဗ္ဗေသု သိက္ခာပဒေသု။

၈၄၀။ ဣဓ ဣမသ္မိံ သတ္တရသဝိဓေ ယံ လက္ခဏံ ပုဗ္ဗေ ဝုတ္တနယံ၊ ယဉ္စ ဥတ္တာနံ၊ တံ သဗ္ဗံ ဝဇ္ဇေတွာ အတ္ထဇောတနံ အတ္ထပ္ပကာသနံ ကရိဿာမီတိ ယောဇနာ။

၈၄၁။ နိဒါနံ နာမ ရာဇဂဟာဒိသိက္ခာပဒပညတ္တိဋ္ဌာနဘူတာနိ သတ္တ နဂရာနိ၊ တံ ပုဗ္ဗေ ဒဿိတန္တိ အဝသိဋ္ဌာနိ ဒဿေတုမာဟ ‘‘ပုဂ္ဂလော’’တိအာဒိ။ ပုဂ္ဂလော နာမ ကတမော? ယံ ယံ ဘိက္ခုနိံ၊ ဘိက္ခုဉ္စ အာရဗ္ဘ သိက္ခာပဒံ ပညတ္တံ၊ အယံ ဘိက္ခုနီ စ ဘိက္ခု စ သိက္ခာပဒပညတ္တိယာ အာဒိကမ္မိကော ပုဂ္ဂလောတိ ဝုစ္စတီတိ ယောဇနာ။

၈၄၂။ ဓနိယာဒယောတိ အာဒိ-သဒ္ဒေန သမ္ဗဟုလာ ဘိက္ခူ၊ ဝဂ္ဂုမုဒါတီရိယာ ဘိက္ခူ၊ သေယျသကော၊ ဥဒါယီ၊ အာဠဝကာ ဘိက္ခူ၊ ဆန္နော၊ မေတ္တိယဘူမဇကာ၊ ဒေဝဒတ္တော၊ အဿဇိပုနဗ္ဗသုကာ ဘိက္ခူ၊ ဆဗ္ဗဂ္ဂိယာ ဘိက္ခူ၊ ဥပနန္ဒော သကျပုတ္တော၊ အညတရော ဘိက္ခု၊ ဟတ္ထကော သကျပုတ္တော၊ အနုရုဒ္ဓါ၊ သတ္တရသဝဂ္ဂိယာ ဘိက္ခူ၊ စူဠပန္ထကော၊ ဗေလဋ္ဌသီသော၊ အာယသ္မာ အာနန္ဒော၊ သာဂတတ္ထေရော၊ အရိဋ္ဌော ဘိက္ခု၊ အာယသ္မာ အာနန္ဒောတိ ဣမေ ဧကဝီသတိ သင်္ဂဟိတာ။

၈၄၃။ ထုလ္လနန္ဒာဒယောတိ အာဒိ-သဒ္ဒေန သုန္ဒရီနန္ဒာ၊ ဆဗ္ဗဂ္ဂိယာ ဘိက္ခုနိယော၊ အညတရာ ဘိက္ခုနီ၊ စဏ္ဍကာဠီ၊ သမ္ဗဟုလာ ဘိက္ခုနိယော၊ ဒွေ ဘိက္ခုနိယောတိ ဆယိမေ သင်္ဂဟိတာ။ သဗ္ဗေတိ ဥဘယပါတိမောက္ခေ အာဒိကမ္မိကာ သဗ္ဗေ ပုဂ္ဂလာ။

၈၄၄။ ဝတ္ထူတိ ဝတ္ထု နာမ သုဒိန္နာဒိနော တဿ တဿေဝ ပုဂ္ဂလဿ မေထုနာဒိကဿ စ ဝတ္ထုနော သဗ္ဗပ္ပကာရေန အဇ္ဈာစာရော ဝီတိက္ကမော ပဝုစ္စတီတိ ယောဇနာ။

၈၄၅-၆။ ကေဝလာ မူလဘူတာ ပညတ္တိ။ အနု စ အနုပ္ပန္နော စ သဗ္ဗတ္ထ စ ပဒေသော စ အနွနုပ္ပန္နသဗ္ဗတ္ထပဒေသာ၊ တေယေဝ ပဒါနိ အနွနုပ္ပန္နသဗ္ဗတ္ထပဒေသပဒါနိ၊ တာနိ ပုဗ္ဗကာနိ ယာသံ ပညတ္တီနံ တာ အနွနုပ္ပန္နသဗ္ဗတ္ထပဒေသပဒပုဗ္ဗိကာ။ တထေဝ သာ ပညတ္တီတိ ယောဇနာ။ အနုပညတ္တိ အနုပ္ပန္နပညတ္တိ သဗ္ဗတ္ထပညတ္တိ ပဒေသပညတ္တိ ဟောတိ။ ဧကတော ဥဘတော ပုဗ္ဗာ ကထေဝ သာ ပညတ္တီတိ ယောဇနာ။ ဧကတောပဒံ ဥဘတောပဒဉ္စ ပုဗ္ဗမဿာတိ ဧကတောဥဘတောပုဗ္ဗာ၊ ဧကတောပညတ္တိ ဥဘတောပညတ္တီတိ ဝုတ္တံ ဟောတိ။

၈၄၇။ တတ္ထ နဝဓာသု ပညတ္တီသု။ ပညတ္တိ နာမ ကတမာတိ အာဟ ‘‘ယော မေထုန’’န္တိအာဒိ။ ‘‘ယော ဘိက္ခု မေထုနံ ဓမ္မံ ပဋိသေဝေယျာ’’တိ စ ‘‘ယော ဘိက္ခု အဒိန္နံ အာဒိယေယျာ’’တိ စ ဧဝမာဒိကာ သိက္ခာပဒဿ မူလဘူတာ ပညတ္တိ ဟောတီတိ ယောဇနာ။

၈၄၈။ ဣစ္စေဝမာဒိကာတိ အာဒိ-သဒ္ဒေန ‘‘သိက္ခံ အပစ္စက္ခာယ ဒုဗ္ဗလျံ အနာဝိကတွာ’’တိ စ ‘‘ဂါမာ ဝါ အရညာ ဝါ’’တိ စ ဧဝမာဒီနံ သင်္ဂဟော။

၈၄၉။ ဝဇ္ဇကေ အနုပ္ပန္နေယေဝ ပညတ္တာ အနုပ္ပန္နပညတ္တိ၊ သာ အနုပ္ပန္နပညတ္တိ။

၈၅၀-၁။ ဂုဏင်္ဂုဏုပါဟနသိက္ခာပဒေန သဟ စမ္မတ္ထရဏသိက္ခာပဒဉ္စ ဓုဝနှာနံ ဓုဝနဟာနသိက္ခာပဒံ၊ ပဉ္စဝဂ္ဂေန ဥပသမ္ပာဒနသိက္ခာပဒဉ္စာတိ ဧသာ စတုဗ္ဗိဓာ ပညတ္တိ ပဒေသပညတ္တိ နာမာတိ ဝုတ္တာတိ ယောဇနာ။ မဇ္ဈိမဒေသသ္မိံယေဝ ဟောတီတိ မဇ္ဈိမဒေသသ္မိံယေဝ အာပတ္တိကရာ ဟောတိ။ န အညတောတိ န အညတြ ပစ္စန္တိမေသု ဇနပဒေသု ဒေသန္တရေ ဌာနေ။

၈၅၂။ ဣတောတိ စတုဗ္ဗိဓပဒေသပညတ္တိတော။ ဧတ္ထာတိ ဣမသ္မိံ ပညတ္တိဘေဒေ။ သာဓာရဏဒုကာဒိကန္တိ သာဓာရဏပညတ္တိ အသာဓာရဏပညတ္တိ၊ ဧကတောပညတ္တိ ဥဘတောပညတ္တီတိ ဒုကဒွယံ။ အတ္ထတော ဧကမေဝါတိ အတ္ထတော အညမညသမာနမေဝ။ ဝိပတ္တာပတ္တာနာပတ္တိဝိနိစ္ဆယော ဝိတ္ထာရိတောတိ ဣဓ န ဒဿိတော။ အယံ ပနေတ္ထ သင်္ခေပေါ – ဝိပတ္တီတိ သီလအာစာရဒိဋ္ဌိအာဇီဝဝိပတ္တီနံ အညတရာ။ အာပတ္တီတိ ပုဗ္ဗပယောဂါဒိဝသေန အာပတ္တိဘေဒေါ။ အနာပတ္တီတိ အဇာနနာဒိဝသေန အနာပတ္တိ။

၈၅၃။ အာပတ္တိ ပန သာဏတ္တိကာပိ ဟောတိ၊ အနာဏတ္တိကာပိ ဟောတီတိ ယောဇနာ။ ‘‘အာဏတ္တီတိ စ နာမေသာ အာဏာပနာ’’တိ ဣမိနာ အာဏတ္တိ-သဒ္ဒဿ သဘာဝသာဓာရဏတ္တာတိ ဣဓာဟ။

၈၅၄။ သဗ္ဗသိက္ခာပဒေသုပိ သဗ္ဗာသံ အာပတ္တီနံ သဗ္ဗော ပန အင်္ဂဘေဒေါပိ ဝိဘာဝိနာ ဉာတဗ္ဗောတိ ယောဇနာ။

၈၅၆။ ‘‘သာ စ အကြိယသမုဋ္ဌာနာ’’တိ ပဒစ္ဆေဒေါ။ ကာယေန၊ ဝါစာယ ဝါ ဒသာဟဗ္ဘန္တရေ အတိရေကစီဝရဿ အနဓိဋ္ဌာနေန နိဿဂ္ဂိယပါစိတ္တိယံ ဟောတီတိ ‘‘ပဌမေ ကထိနေ ဝိယာ’’တိ ဥဒါဟရဏံ ကတံ။

၈၅၇။ ကြိယာကြိယတော ဟောတီတိ ကိရိယတော စ အကိရိယတော စ ဟောတိ။ တတ္ထ ဥဒါဟရဏမာဟ ‘‘စီဝရဂ္ဂဟဏေဝိယာ’’တိ။ အညာတိကာယ ဘိက္ခုနိယာ ဟတ္ထတော စီဝရဂ္ဂဟဏံ ကြိယာ၊ ပါရိဝတ္တကဿ အဒါနံ အကြိယာတိ ဧဝံ ကိရိယာယ စေဝ အကိရိယာယ စ ဣမံ အာပဇ္ဇတိ။

၈၅၈။ သိယာ ပန ကရောန္တဿ အကရောန္တဿာတိ ယာ ပန အာပတ္တိ သိယာ ကရောန္တဿ၊ သိယာ အကရောန္တဿ ဟောတိ၊ အယံ သိယာ ကိရိယတော၊ သိယာ အကိရိယတော သမုဋ္ဌာတိ။ သိယာတိ စ ကဒါစိ-သဒ္ဒတ္ထေ နိပါတော။ အတြောဒါဟရဏမာဟ ‘‘ရူပိယောဂ္ဂဟဏေ ဝိယာ’’တိ။ ရူပိယဿ ဥဂ္ဂဟဏေ၊ ဥဂ္ဂဏှာပနေ သိယာ ကဒါစိ ကိရိယတော သမုဋ္ဌာတိ၊ ဥပနိက္ခိတ္တဿ သာဒိယနေ ကာယဝါစာဟိ ကာတဗ္ဗဿ အကရဏေန ကဒါစိ အကရောန္တဿ ဟောတီတိ။

၈၅၉။ ယာ ကရောတော အကုဗ္ဗတော၊ ကဒါစိ ကရောန္တဿ စ ဟောတိ၊ သာ အာပတ္တိ သိယာ ကိရိယာကိရိယတော၊ သိယာ ကိရိယတောပိ စ ဟောတီတိ ယောဇနာ။ ‘‘ကုဋိကာရာပတ္တိ ဝိယာ’’တိ ဝတ္တဗ္ဗံ။ သာ ဟိ ဝတ္ထုံ ဒေသာပေတွာ ပမာဏာတိက္ကန္တံ ကရောတော ကိရိယတော သမုဋ္ဌာတိ၊ အဒေသာပေတွာ ပမာဏာတိက္ကန္တံ၊ ပမာဏယုတ္တံ ဝါ ကရောတော ကိရိယာကိရိယတော သမုဋ္ဌာတိ။

၈၆၁။ ယတော အာပတ္တိတော။ အယံ အာပတ္တိ။ သညာယ ကရဏဘူတာယ ဝိမောက္ခော ဧတာယာတိ သညာဝိမောက္ခာ။ ဧတ္ထ စ ဝီတိက္ကမသညာ အဝိဇ္ဇမာနာပိ အာပတ္တိယာ ဝိမုစ္စနဿ သာဓကတမဋ္ဌေန ဂဟိတာ။ ယထာ ဝုဋ္ဌိယာ အဘာဝေန ဇာတံ ဒုဗ္ဘိက္ခံ ‘‘ဝုဋ္ဌိကတ’’န္တိ ဝုစ္စတိ၊ ဧဝံသမ္ပဒမိဒံ ဝေဒိတဗ္ဗံ။ အယံ သစိတ္တကာပတ္တိ။

၈၆၂-၄။ ဣတရာ ပန အစိတ္တကာပတ္တိ။ ဝီတိက္ကမသညာယ အဘာဝေန နတ္ထိ ဝိမောက္ခော ဧတာယာတိ နောသညာဝိမောက္ခာ။ သုစိတ္တေန သဝါသနကိလေသပ္ပဟာနေန၊ သကလလောကိယလောကုတ္တရကုသလသမ္ပယောဂေန စ သုန္ဒရစိတ္တေန ဘဂဝတာ ပကာသိတာ သဗ္ဗာဝ အာပတ္တိ စိတ္တဿ ဝသေန ဒုဝိဓာ သိယုန္တိ ယောဇနာ။ သစိတ္တကသမုဋ္ဌာနဝသေန ပနာတိ သစိတ္တကသမုဋ္ဌာနဝသေနေဝ။ သစိတ္တကမိဿကဝိဝဇ္ဇနတ္ထာယ ပန-သဒ္ဒေါ ဧဝကာရတ္ထော ဝုတ္တော။

ယာ သစိတ္တကေဟိ ဝါ အစိတ္တကမိဿကသမုဋ္ဌာနဝသေန ဝါ သမုဋ္ဌာတိ၊ အယံ အစိတ္တကာ။

၈၆၅။ သုဝိဇ္ဇေနာတိ သောဘမာနာဟိ တီဟိ ဝိဇ္ဇာဟိ ဝါ အဋ္ဌဟိ ဝါ ဝိဇ္ဇာဟိ သမန္နာဂတတ္တာ သုဝိဇ္ဇေန။ အနဝဇ္ဇေနာတိ သဝါသနကိလေသာဝဇ္ဇရဟိတတ္တာ အနဝဇ္ဇေန ဘဂဝတာ ။ လောကပဏ္ဏတ္တိဝဇ္ဇတော လောကပဏ္ဏတ္တိဝဇ္ဇဝသေန သဗ္ဗာဝ အာပတ္တိယော ဝဇ္ဇဝသေန ဒုဝိဓာ ဒုကာ ဝုတ္တာတိ ယောဇနာ။

၈၆၆။ ယဿာ သစိတ္တကေ ပက္ခေ၊ စိတ္တံ အကုသလံ သိယာတိ ယဿာ သစိတ္တကာစိတ္တကသမုဋ္ဌာနာယ အစိတ္တကာယ သုရာပါနာဒိအာပတ္တိယာ သစိတ္တကသမုဋ္ဌာနပက္ခေ စိတ္တံ အကုသလမေဝ ဟောတိ၊ အယံ လောကဝဇ္ဇာ နာမာတိ အတ္ထော။ ယဿာ ပန သစိတ္တကသမုဋ္ဌာနာယ ပဌမပါရာဇိကာဒိအာပတ္တိယာ စိတ္တံ အကုသလမေဝ ဟောတိ၊ တဿာ လောကဝဇ္ဇတာယ ဝတ္တဗ္ဗမေဝ နတ္ထိ။ အစိတ္တကာပိ ဝါ အာပတ္တိ သစိတ္တကပက္ခေ ကုသလစိတ္တေ သတိ လောကဝဇ္ဇတာယ သိဒ္ဓါယ အစိတ္တကပက္ခေပိ လောကဝဇ္ဇော ဟောတိ၊ ကိမင်္ဂံ ပန အကုသလစိတ္တေနေဝ အာပဇ္ဇိတဗ္ဗာယ အာပတ္တိယာ လောကဝဇ္ဇတာတိ သာ ဝိသုံ န ဝုတ္တာ။

ယသ္မာ ပန ပဏ္ဏတ္တိဝဇ္ဇာယ ဝတ္ထုဝီတိက္ကမဝဇ္ဇာ သိယာ ကုသလံ၊ သိယာ အဗျာကတံ၊ တသ္မာ တဿာ သစိတ္တကပက္ခေ စိတ္တံ ကုသလမေဝါတိ အယံ နိယမော နတ္ထီတိ အာဟ ‘‘သေသာ ပဏ္ဏတ္တိဝဇ္ဇကာ’’တိ။ ‘‘ပဏ္ဏတ္တိဝဇ္ဇကာ’’တိ ဣမိနာ စ လက္ခဏေန ဝတ္ထုဝိဇာနနစိတ္တေန သစိတ္တကပက္ခေ စိတ္တံ သိယာ ကုသလံ၊ သိယာ အကုသလံ၊ သိယာ အဗျာကတံ၊ တသ္မာ တဿာ သစိတ္တကပက္ခေ စိတ္တံ အကုသလမေဝါတိ အယံ နိယမော နတ္ထီတိ အာဟ။

၈၆၇။ ကာယဒွါရေန အာပဇ္ဇိတဗ္ဗာ ကာယကမ္မံ။ ဥဘယတ္ထ အာပဇ္ဇိတဗ္ဗာ တဒုဘယံ ကာယကမ္မံ ဝစီကမ္မံ။ မနောဒွါရေ အာပတ္တိ နာမ နတ္ထီတိ မနောကမ္မံ န ဝုတ္တံ။ ‘‘မနောဒွါရေ အာပတ္တိ နာမ နတ္ထီတိ စ ဣဒံ ယေဘုယျဝသေန ဝုတ္တံ ဥပနိက္ခိတ္တသာဒိယနာဒီသု မနောဒွါရေပိ အာပတ္တိသမ္ဘဝတော’’တိ အာစရိယာ။

၈၆၈-၉။ ကုသလာဒိတိကဒွယန္တိ ကုသလတ္တိကဉ္စေဝ ဝေဒနာတ္တိကဉ္စ။ အာပတ္တိံ အာပဇ္ဇန္တော ကုသလာကုသလစိတ္တော၊ တထာ အဗျာကတစိတ္တော ဝါ ဟုတွာ အာပဇ္ဇတီတိ ယောဇနာ။

ဒုက္ခာဒိသံယုတောတိ အာဒိ-သဒ္ဒေန ဥပေက္ခာဝေဒနာသမင်္ဂိနော သင်္ဂဟော။ ဧဝံ သန္တေပိ သဗ္ဗသိက္ခာပဒေသု အကုသလစိတ္တဝသေန ဧကံ စိတ္တံ၊ ကုသလာဗျာကတဝသေန ဒွေ စိတ္တာနိ၊ သဗ္ဗေသံ ဝသေန တီဏိ စိတ္တာနိ။ ဒုက္ခဝေဒနာဝသေန ဧကာ ဝေဒနာ၊ သုခဥပေက္ခာဝသေန ဒွေ၊ သဗ္ဗာသံ ဝသေန တိဿော ဝေဒနာတိ အယမေဝ ဘေဒေါ လဗ္ဘတိ၊ န အညော ဘေဒေါ။

ကုသလတ္တိကံ သစေပိ ဂဟိတံ၊ န ပန သဗ္ဗေသမေဝ စိတ္တာနံ ဝသေန လဗ္ဘတိ၊ အထ ခေါ အာပတ္တိသမုဋ္ဌာပကာနံ ဗာတ္တိံသစိတ္တာနမေဝ ဝသေန လဗ္ဘတိ။ ဗာတ္တိံသေဝ ဟိ စိတ္တာနိ အာပတ္တိသမုဋ္ဌာပကာနိ။ ဒွါဒသ အကုသလာနိ၊ အဋ္ဌ ကာမာဝစရကုသလာနိ၊ ဒသ ကာမာဝစရကိရိယစိတ္တာနိ၊ ကုသလတော၊ ကိရိယတော စ ဒွေ အဘိညာစိတ္တာနိ စာတိ ဧဝံ ဗာတ္တိံသစိတ္တေဟိ သမုဋ္ဌိတာပိ အာပတ္တိ အကုသလာ ဝါ ဟောတိ အဗျာကတာ ဝါ၊ နတ္ထိ အာပတ္တိ ကုသလံ။ ယထာဟ သမထက္ခန္ဓကေ ‘‘အာပတ္တာဓိကရဏံ သိယာ အကုသလံ သိယာ အဗျာကတံ၊ နတ္ထိ အာပတ္တာဓိကရဏံ ကုသလ’’န္တိ (စူဠဝ။ ၂၂၂၊ ပရိ။ ၃၀၃)။ အယံ ပန ပါဌော ပဏ္ဏတ္တိဝဇ္ဇံယေဝ သန္ဓာယ ဝုတ္တော၊ န လောကဝဇ္ဇံ။ ယသ္မိဉှိ ပထဝိခဏနဘူတဂါမပါတဗျတာဒိကေ အာပတ္တာဓိကရဏေ ကုသလစိတ္တံ အင်္ဂံ ဟောတိ၊ တသ္မိဉ္စ သတိ န သက္ကာ ဝတ္တုံ ‘‘နတ္ထိ အာပတ္တာဓိကရဏံ ကုသလ’’န္တိ။ တသ္မာ နယိဒံ အင်္ဂပဟောနကစိတ္တံ သန္ဓာယ ဝုတ္တံ။ ယံ တာဝ အာပတ္တာဓိကရဏံ လောကဝဇ္ဇံ၊ တံ ဧကန္တတော အကုသလမေဝ။ တတ္ထ ‘‘သိယာ အကုသလ’’န္တိ ဝိကပ္ပော နတ္ထိ။ ယံ ပန ပဏ္ဏတ္တိဝဇ္ဇံ၊ တံ ယသ္မာ သဉ္စိစ္စ ‘‘ဣမံ အာပတ္တိံ ဝီတိက္ကမာမီ’’တိ ဝီတိက္ကမန္တဿေဝ အကုသလံ ဟောတိ၊ အသဉ္စိစ္စ ပန ကိဉ္စိ အဇာနန္တဿ သဟသေယျာဒိဝသေန အာပဇ္ဇနတော အဗျာကတံ ဟောတိ၊ တသ္မာ တတ္ထ သဉ္စိစ္စာသဉ္စိစ္စဝသေန ဣမံ ဝိကပ္ပဘာဝံ သန္ဓာယ ဣဒံ ဝုတ္တံ ‘‘အာပတ္တာဓိကရဏံ သိယာ အကုသလံ သိယာ အဗျာကတံ၊ နတ္ထိ အာပတ္တာဓိကရဏံ ကုသလ’’န္တိ။ သစေ ပန ‘‘ယံ ကုသလစိတ္တော အာပဇ္ဇတိ၊ ဣဒံ ဝုစ္စတိ အာပတ္တာဓိကရဏံ ကုသလ’’န္တိ ဝဒေယျ၊ အစိတ္တကာနံ ဧဠကလောမပဒသောဓမ္မာဒိသမုဋ္ဌာနာနမ္ပိ ကုသလစိတ္တံ အာပဇ္ဇေယျ၊ န စ တတ္ထ ဝိဇ္ဇမာနမ္ပိ ကုသလစိတ္တံ အာပတ္တိယာ အင်္ဂံ၊ ကာယဝစီဝိညတ္တိဝသေန ပန စလိတပဝတ္တာနံ ကာယဝါစာနံ အညတရမေဝ အင်္ဂံ၊ တဉ္စ ရူပက္ခန္ဓပရိယာပန္နတ္တာ အဗျာကတန္တိ။

၈၇၀။ ဣဒံ တု လက္ခဏန္တိ ဣဒံ နိဒါနာဒိသာဓာရဏဝိနိစ္ဆယလက္ခဏံ။

၈၇၁။ ‘‘တရု’’န္တိအာဒိဂါထာ ပုဗ္ဗေ ဝုတ္တတ္ထာဝ။ အယံ ပန ဝိသေသော – တတ္ထ ‘‘ဒွယင်္ကုရ’’န္တိ ဝုတ္တံ၊ ဣဓ ‘‘စတုဿိခ’’န္တိ။ တတ္ထ ‘‘ဒွယင်္ကုရ’’န္တိ လောကဝဇ္ဇပဏ္ဏတ္တိဝဇ္ဇာနံ ဂဟဏံ ၊ ဣဓ စတုဿိခန္တိ စတုန္နံ ဝိပတ္တီနံ။ စတ္တာရော သီခါ အင်္ကုရာ ဧတဿာတိ ဝိဂ္ဂဟော။ တတ္ထ ဝိပတ္တိ ‘‘သတ္တဖလ’’န္တိ သတ္တဖလေသု အန္တောဂဓာ၊ ဣဓ ဝိပတ္တိဋ္ဌာနေ ဝဇ္ဇံ ဂဟေတွာ သတ္တဖလာနိ။

၈၇၂။ အနုတ္တရတံ ဂတံ အတ္တနာ ဥတ္တရဿ ဥတ္တမဿ ကဿစိ အဝိဇ္ဇမာနတ္တာ ဣမံ ဥတ္တရံ ဥတ္တရံ နာမ ပကရဏံ ယော ထေရနဝမဇ္ဈိမေသု အညတရော ပရိယာပုဏာတိ ပါဌဿ ပဂုဏဝါစုဂ္ဂတကရဏေန အဓီယတိ၊ ပရိပုစ္ဆတိ အတ္ထဉ္စ အတ္ထဝဏ္ဏနံ သုတွာ သက္ကစ္စံ ဥဂ္ဂဟေတွာ မနသာ ပေက္ခိတွာ ပညာယ သုပ္ပဋိဝိဇ္ဈိတွာ ဓာရေတိ၊ သော စ ဘိက္ခု စ-သဒ္ဒေန ဧဝမေဝ ဝိနယဝိနိစ္ဆယေ ယော ဘိက္ခု ယုတ္တော၊ သော စ ကာယဝါစဝိနယေ ကာယဝါစာဝီတိက္ကမာနံ ဝိနယနေ သံဝရဏေ ဝိနယေ ဝိနယပိဋကေ အနုတ္တရတံ ဥပယာတိ အတ္တနော ဥတ္တရိတရဿ အဝိဇ္ဇမာနတံ ဥပဂစ္ဆတိ။ ဧတ္ထ ကာရဏမာဟ ‘‘ဥတ္တရတော’’တိ၊ ပဂုဏဝါစုဂ္ဂတကရဏေန အဓီတေန အတ္ထဝဏ္ဏနံ သုတွာ ဓာရဏေန သုဋ္ဌု ဓာရိတေန ဣမိနာ ဥတ္တရပကရဏေန ဟေတုဘူတေနာတိ အတ္ထော။

ဣတိ ဥတ္တရေ လီနတ္ထပကာသနိယာ

လက္ခဏကထာဝဏ္ဏနာ နိဋ္ဌိတာ။