📜

နိဿဂ္ဂိယကထာဝဏ္ဏနာ

၅၅၁။ ဧဝံ အနိယတကထံ ဒဿေတွာ ဣဒါနိ နိဿဂ္ဂိယကထံ ဒဿေတုမာဟ ‘‘ခေါမ’’န္တိအာဒိ ¶ ။ ခေါမန္တိ ဧဝံနာမကံ စီဝရံ။ ခေါမန္တိ ဂစ္ဆဝိသေသဿ နာမံ၊ တဿ ဝါကေဟိ ကတစီဝရံ ကာရဏောပစာရဝေါဟာရဝသေန ‘‘ခေါမ’’န္တိ ဝုတ္တံ။ ကပ္ပာသန္တိ ကပ္ပာသသုတ္တမယံ စီဝရံ၊ ဣဒမ္ပိ ဝုတ္တနယေနေဝ ‘‘ကပ္ပာသ’’န္တိ ဝုစ္စတိ။ ကောသေယျံ နာမ ကောသကာရကိမိကောသံ၊ ကောသေန နိဗ္ဗတ္တံ သုတ္တံ ကောသေယျံ။ ဣဓ ပန တေန ကောသေယျသုတ္တေန နိဗ္ဗတ္တံ စီဝရံ ‘‘ကောသေယျ’’န္တိ ဝုတ္တံ။ သာဏန္တိ သာဏဝါကသုတ္တေဟိ ဝါယိတွာ ကတစီဝရံ။ ဣဒဉ္စ ခေါမံ ဝိယ ဒဋ္ဌဗ္ဗံ။ ဘင်္ဂန္တိ ခေါမသုတ္တာဒီနိ သဗ္ဗာနိ၊ ဧကစ္စာနိ ဝါ မိဿေတွာ ကတစီဝရံ။ ဣဒမ္ပိ ကရဏပ္ပကာရေန လဒ္ဓနာမကံ။ ‘‘ဘင်္ဂံ နာမ ဧကာ ဂစ္ဆဇာတိ၊ တဿာ ဝါကမယသုတ္တေဟိ ဝါယိတွာ ကတစီဝရ’’န္တိ ကေစိ။ ဣမသ္မိံ ပက္ခေ ခေါမံ ဝိယ ဂဟေတဗ္ဗံ။ ကမ္ဗလန္တိ မနုဿလောမဝါဠလောမံ ဝိနာ သေသလောမေဟိ ဝါယိတွာ ကတစီဝရံ ဝုတ္တန္တိ။ ဣဒံ ‘‘စီဝရံ နာမ ဆန္နံ စီဝရာနံ အညတရံ စီဝရ’’န္တိ (ပါရာ။ ၄၆၃) ပဒဘာဇနေ စ ‘‘ခေါမံ ကပ္ပာသိကံ ကောသေယျံ ကမ္ဗလံ သာဏံ ဘင်္ဂ’’န္တိ (ပါရာ။ အဋ္ဌ။ ၂။၄၆၂-၄၆၃) အဋ္ဌကထာယ စ ဝုတ္တံ သန္ဓာယာဟ။ ‘‘ဇာတိတော’’တိ ¶ ဣဒံ ပမာဏာဒိဘေဒဿ ဝက္ခမာနတ္တာ ဝုတ္တံ။ ဇာတိတောတိ ခေါမာဒိသာမညတော။ သာမညဉှိ ‘‘ဇာတီ’’တိ ဝုစ္စတိ။ ဒီဃရဿထူလသုခုမနီလပီတာဒိဘေဒဘိန္နာနံ သဗ္ဗေသံ ဝတ္ထာဝယဝါနံ သင်္ဂါဟိကခေါမသုတ္တမယတာသာမညံ ဇာတီတိ ဝုတ္တံ ဟောတိ။ ဧဝံ သေသေသုပိ။

၅၅၂။ ဒုကူလန္တိ ဧဝံနာမကံ ရုက္ခဝါကမယစီဝရံ။ ပတ္တုဏ္ဏန္တိ ပတ္တုဏ္ဏဒေသေ သဉ္ဇာတဝတ္ထံ။ ‘‘ပတ္တုဏ္ဏံ ကောသေယျဝိသေသော’’တိ အဘိဓာနကောသေ ဝုတ္တံ။ စိနန္တိ စိနဒေသေ ဥပ္ပန္နဝတ္ထံ။ သောမာရပဋ္ဋကန္တိ သောမာရဒေသေ ဥပ္ပန္နဝတ္ထံ။ ‘‘သောမာရစိနပဋက’’န္တိပိ လိခန္တိ၊ သောယေဝတ္ထော။ ဣဒ္ဓိဇန္တိ ဧဟိဘိက္ခူနံ ပုညိဒ္ဓိယာ နိဗ္ဗတ္တံ စီဝရံ။ ဒေဝဒိန္နန္တိ ဒေဝတာဟိ ဒိန္နံ စီဝရံ။ တဉှိ ကပ္ပရုက္ခေ နိဗ္ဗတ္တံ၊ ဇာလိနိယာ ဒေဝကညာယ အနုရုဒ္ဓတ္ထေရဿ ဒိန္နဝတ္ထသဒိသံ။ တဿာတိ ဇာတိတော ဆဗ္ဗိဓဿ ကပ္ပိယစီဝရဿ။ ဣဒံ ဆဗ္ဗိဓစီဝရံ ယထာရဟံ အနုလောမိကံ ဝုတ္တန္တိ အတ္ထော။ ဒုကူလဉှိ သာဏဿ အနုလောမံ ဝါကမယတ္တာ၊ ပတ္တုဏ္ဏာဒီနိ ကောသေယျဿ အနုလောမာနိ ပါဏကေဟိ ကတသုတ္တမယတ္တာ၊ ဣဒ္ဓိဇမ္ပိ ခေါမာဒီနံယေဝ အညတရံ ဟောတီတိ တေသံ အနုလောမံ၊ ဒေဝဒိန္နမ္ပိ ခေါမာဒီနံယေဝ အနုလောမံ ဟောတိ တေသံ အညတရဘာဝတော။ ယထာဟ –

‘‘သာဏဿ တု ဒုကူလဉှိ၊ ဣဒ္ဓိဇံ ဒေဝဒိန္နကံ၊

ခေါမာဒီနံဝသိဋ္ဌံတု၊ ကောသေယျဿာနုလောမိက’’န္တိ။

၅၅၃။ တိဏ္ဏံ ¶ စီဝရာနံ သမာဟာရော တိစီဝရန္တိ ပမာဏယုတ္တံ သင်္ဃာဋိအာဒိနာမေန အဓိဋ္ဌိတစီဝရဿေဝ နာမတ္တာ တဒေဝ ဝုစ္စတိ။ ဂဏနဝသေန ယံ ကိဉ္စိ စီဝရတ္တယံ န ဝတ္တဗ္ဗံ။ သမုဒ္ဒေကဒေသောပိ ယထာ ‘‘သမုဒ္ဒေါ’’တိ ဝုစ္စတိ၊ ဧဝံ အဓိဋ္ဌိတေသု တီသု စီဝရေသု အညတရံ ‘‘တိစီဝရ’’န္တိ ဝုစ္စတိ။ ပရိက္ခာရစောဠန္တိ ¶ သင်္ဃာဋိအာဒိဝိသိဋ္ဌနာမေဟိ အနဓိဋ္ဌိတံ ‘‘အနုဇာနာမိ ဘိက္ခဝေ အာယာမေန အဋ္ဌင်္ဂုလံ သုဂတင်္ဂုလေန စတုရင်္ဂုလဝိတ္ထတံ ပစ္ဆိမံ စီဝရ’’န္တိ (ပါရာ။ ၃၅၈) အနုညာတံ ပစ္ဆိမစီဝရပရိယန္တံ ကတွာ ကတာကတဿ ယဿ ကဿစိ စီဝရဿ ရုဠှိသညာ။

မုခံ သန္ဒမာနလာလံ ပုဉ္ဆတိ ဧတေနာတိ မုခပုဉ္ဆနန္တိ ကပေါလတော နိစ္စံ သန္ဒမာနလာလာနံ ပုဉ္ဆနတ္ထာယ အနုညာတဿ စီဝရဝိသေသဿ နာမံ။ နိသီဒန္တိ ဧတ္ထာတိ နိသီဒနန္တိ စ ဘိက္ခူနံ အတ္ထရိတွာ နိသီဒိတုံ အနုညာတဿ စီဝရဿ နာမံ။ အဓိဋ္ဌေယျာတိ ‘‘ဣမံ ကဏ္ဍုပ္ပဋိစ္ဆာဒိ’’န္တိအာဒိနာ (ဝိ။ ဝိ။ ၅၈၅) ဝက္ခမာနနယေန နာမံ ဂဟေတွာ အဓိဋ္ဌေယျာတိ အတ္ထော။ ပစ္စတ္ထရဏမေဝ စာတိ သင်္ဃိကေ မဉ္စပီဌေ သရီရသမ္ဖုသနေန အာပဇ္ဇိတဗ္ဗာယ အာပတ္တိယာ မောစနတ္ထာယ တတ္ထ အတ္ထရိတွာ ပရိဘောဂတ္ထာယ အနုညာတံ ပစ္စတ္ထရဏစီဝရဉ္စ။

၅၅၄။ ဧကာဟန္တိ ဝသနကိရိယာယ အစ္စန္တသံယောဂေ ဥပယောဂဝစနံ။ တိစီဝရန္တိ တိစီဝရေန။ ဝိပ္ပဝသေယျာတိ ‘‘သင်္ဃာဋိယာ ဝါ ဥတ္တရာသင်္ဂေန ဝါ အန္တရဝါသကေန ဝါ’’တိ (ပါရာ။ ၄၇၆) ဝုတ္တတ္တာ ဧကဒေသေ သမုဒါယောပစာရဝသေန အဝယဝဿ ဝစနတော တိဏ္ဏံ စီဝရာနံ အညတရေနာတိပိ ဝုတ္တံ ဟောတိ။ ‘‘တထာ’’တိ ဣမိနာ ‘‘ဝိနာ’’တိ ဣဒံ ပစ္စာမသတိ။ အဓိဋ္ဌာတိ အဓိဋ္ဌာယာတိ ဂဟေတဗ္ဗံ ‘‘ပဋိသင်္ခါ ယောနိသော’’တိ (မ။ နိ။ ၁။၂၂၊ ၂၃၊ အ။ နိ။ ၆။၅၈) ယထာ၊ ဧတ္ထ ‘‘ဝဠဉ္ဇိယမာန’’န္တိ သေသော၊ အဓိဋ္ဌာယ ဝဠဉ္ဇိယမာနံ နိသီဒနံ တထာ ဝိနာ စတုမာသံ န ဝသေယျာတိ ယောဇနာ။

၅၅၅။ ကပ္ပိယန္တိ ကပ္ပိယကာရဏံ နီလာဒိဝဏ္ဏဘေဒကရဏံ။ ကပ္ပိယန္တိ စ ကာရဏေ ကာရိယူပစာရေန ဂဟေတဗ္ဗံ။ ဗိန္ဒုံ ဒတွာတိ ‘‘နီလံ ဝါ ကဒ္ဒမံ ဝါ ကာဠသာမံ ဝါ’’တိ (ပါစိ။ ၃၆၈) ဝုတ္တလောဟမလာဒိနာ ¶ ယေန ကေနစိပိ မင်္ဂုလပိဋ္ဌိပ္ပမာဏာဒိကံ ဗိန္ဒုံ ဒတွာ။ တတ္ထာတိ တေသု အဓိဋ္ဌာတဗ္ဗေသု တိစီဝရာဒီသု၊ နိဒ္ဓါရဏေ ဘုမ္မံ။ တိစီဝရန္တိ နိဒ္ဓါရိတဗ္ဗံ။ ဥပပန္နန္တိ ယုတ္တံ။ ပမာဏေနာတိ အနန္တရံ ဝက္ခမာနေန ပမာဏေန။ အဓိဋ္ဌာတဗ္ဗန္တိ ‘‘ဣမံ သင်္ဃာဋိံ အဓိဋ္ဌာမီ’’တိအာဒိနာ ¶ ဝက္ခမာနနယေန နာမံ ဝတွာ အဓိဋ္ဌာတဗ္ဗံ။ ဧဝကာရေန ပန နာမံ ဝတွာ န ဝိကပ္ပေတဗ္ဗန္တိ ဒဿေတိ။ ဧသ နယော သေသစီဝရေသုပိ။ ဝုတ္တဉှေတံ ဘဂဝတာ ‘‘အနုဇာနာမိ ဘိက္ခဝေ တိစီဝရံ အဓိဋ္ဌာတုံ၊ န ဝိကပ္ပေတု’’န္တိအာဒိ (မဟာဝ။ ၃၅၈)။ တသ္မာ တိစီဝရာဒီနိ အဓိဋ္ဌဟန္တေန ‘‘ဣမံ သင်္ဃာဋိံ အဓိဋ္ဌာမီ’’တိအာဒိနာ နာမံ ဝတွာ အဓိဋ္ဌာတဗ္ဗံ။ ဝိကပ္ပေန္တေန ပန ‘‘ဣမံ သင်္ဃာဋိ’’န္တိအာဒိနာ တဿ စီဝရဿ နာမံ အဂ္ဂဟေတွာ ‘‘ဣမံ စီဝရံ တုယှံ ဝိကပ္ပေမီ’’တိ ဝိကပ္ပေတဗ္ဗံ။ တိစီဝရံ ဝါ ဟောတု အညံ ဝါ၊ ယဒိ တံ တံ နာမံ ဂဟေတွာ ဝိကပ္ပေတိ၊ အဝိကပ္ပိတံ ဟောတိ အတိရေကစီဝရဋ္ဌာနေ တိဋ္ဌတိ။ တံ စီဝရန္တိ သမ္ဗန္ဓော။

၅၅၆-၇။ ‘‘ဥပပန္နံ ပမာဏေနာ’’တိ ဧတ္ထ ဝုတ္တပ္ပမာဏံ ဒဿေတုမာဟ ‘‘ပစ္ဆိမန္တေနာ’’တိအာဒိ။ သင်္ဃဋိတဋ္ဌေန သင်္ဃာဋိ။ ဝတ္ထခဏ္ဍာနိ သိဗ္ဗနကမ္မေန သင်္ဃဋေတွာ ကတတ္တာ ‘‘သင်္ဃာဋီ’’တိ စီဝရာနံ သာမညနာမံ။ ဣဓ ပန ရုဠှိယာ အန္တရဝါသကာဒိဝိသေသနာမဗျတိရိတ္တေ စီဝရဝိသေသေ ဝတ္တတိ။ မုဋ္ဌိပဉ္စကာတိ ဧတ္ထ ဧကာဒီနမဋ္ဌာရသန္တာနံ သင်္ချာသဒ္ဒါနံ သင်္ချေယျေ ဝတ္တမာနတ္တာ ပဉ္စသဒ္ဒေါ စီဝရပ္ပမာဏပ္ပကရဏတော လဗ္ဘမာနဟတ္ထသင်္ခါတရတနေယေဝ ပဝတ္တတိ၊ တေနေဝ မုဋ္ဌိသဒ္ဒေါပိ ဥတ္တရပဒလောပေန မုဋ္ဌိရတနေ ဝတ္တတိ။ ပဉ္စန္နံ ပူရဏော ပဉ္စမော၊ မုဋ္ဌိယာ ပဉ္စမော မုဋ္ဌိပဉ္စမော။ မုဋ္ဌိပဉ္စမော ပရိမာဏမေတိဿာတိ ‘‘မုဋ္ဌိပဉ္စမကာ’’တိ ဝတ္တဗ္ဗေ မ-ကာရလောပေန ‘‘မုဋ္ဌိပဉ္စကာ’’တိ သင်္ဃာဋိ ဝုတ္တာ။

မုဋ္ဌိတ္တိကာတိ ¶ ဧတ္ထ ဝုတ္တနယေန သင်္ချေယျေ ဝတ္တမာနော တိ-သဒ္ဒေါ စီဝရပ္ပမာဏပ္ပကရဏတော လဗ္ဘမာနဟတ္ထသင်္ခါတရတနေယေဝ ဝတ္တတိ၊ တေနေဝ မုဋ္ဌိသဒ္ဒေါပိ ဥတ္တရပဒလောပေန မုဋ္ဌိရတနေ ဝတ္တတိ။ တိဏ္ဏံ ပူရဏော တတိယော၊ မုဋ္ဌိယာ တတိယော မုဋ္ဌိတတိယော၊ မုဋ္ဌိတတိယော ပရိမာဏမေတိဿာတိ ‘‘မုဋ္ဌိတတိယကာ’’တိ ဝတ္တဗ္ဗေ တိယ-ပစ္စယလောပေန ‘‘မုဋ္ဌိတ္တိကာ’’တိ သင်္ဃာဋိယေဝ ဝုစ္စတိ။ ဧဝမုပရိပိ။ တိရိယန္တိ တိရိယတော။

ဥတ္တမန္တေနာတိ ဥက္ကဋ္ဌပရိမာဏန္တေန။ သတ္ထုနော စီဝရူနာပီတိ ‘‘တတြိဒံ သုဂတဿ သုဂတစီဝရပ္ပမာဏံ၊ ဒီဃသော နဝ ဝိဒတ္ထိယော သုဂတဝိဒတ္ထိယာ၊ တိရိယံ ဆ ဝိဒတ္ထိယော’’တိ (ပါစိ။ ၅၄၈) ဝုတ္တပ္ပမာဏသုဂတစီဝရတော ဦနာပိ။ ပိ-သဒ္ဒေါ သမ္ဘာဝနေ၊ ဥက္ကဋ္ဌပရိစ္ဆေဒေန တတ္တကမ္ပိ ဝဋ္ဋတိ၊ တတော စေ ဦနံ ဝတ္တဗ္ဗမေဝ နတ္ထီတိ အတ္ထော။ အန္တဒွယသန္ဒဿနေန ဥဘယမဇ္ဈေ ယံ ပဟောနကရုစ္စနကပ္ပမာဏံ၊ တံ ဂဟေတဗ္ဗန္တိ ဒဿေတိ။

၅၅၈။ မုဋ္ဌိပဉ္စကသဒ္ဒေါ ¶ ပုဗ္ဗေ ဝုတ္တနယေနိဓ ဒီဃန္တေ ဝတ္တတိ။ မုဋ္ဌိပဉ္စကော ဒီဃန္တော ယဿ၊ ယသ္မိံ ဝါ ပမာဏေတိ ဝိဂ္ဂဟော၊ ဒီဃန္တတော မုဋ္ဌိပဉ္စကပ္ပမာဏေနာတိ ဝုတ္တံ ဟောတိ။ ‘‘မုဋ္ဌိပဉ္စမ’’န္တိပိ လိခန္တိ။ တိရိယန္တတောတိ ဝိတ္ထာရန္တတော။ အဍ္ဎဟတ္ထော အဍ္ဎော ဥတ္တရပဒလောပေန၊ သော တေယျော တတိယော ယဿ ပမာဏဿာတိ ဂဟေတဗ္ဗံ၊ တံ၊ အဍ္ဎတေယျရတနပ္ပမာဏံ ဟောတီတိ အတ္ထော။ ဒွိဟတ္ထံ ဝါတိ ဒွေ ဟတ္ထာ ယဿ ပမာဏဿာတိ ဝိဂ္ဂဟော၊ ဒွိရတနပ္ပမာဏံ ဝါ ဟောတီတိ အတ္ထော။ ဣဒဉ္စ ‘‘တိရိယံ ဒွိဟတ္ထောပိ ဝဋ္ဋတိ။ ပါရုပနေနပိ ဟိ သက္ကာ နာဘိံ ပဋိစ္ဆာဒေတု’’န္တိ (ပါရာ။ အဋ္ဌ။ ၂။၄၆၉) အဋ္ဌကထာဂတတ္တာ ဝုတ္တံ။ ‘‘သေသေ အန္တရဝါသကေ’’တိ ဣဒံ ယထာဝုတ္တပရိမာဏေန ပရိမိတစီဝရနိဒဿနံ။

၅၅၉။ အဟတာဟတကပ္ပာနန္တိ ¶ ဧတ္ထ ‘‘ဝတ္ထာန’’န္တိ သေသော။ အဟတာနံ ဝတ္ထာနန္တိ နဝဝတ္ထာနံ။ အဟတတော ကိဉ္စိ ဦနာနိ အဟတကပ္ပာနိ၊ တေသံ နဝဝေါဟာရူပဂါနံ ကတိပယဓောတာနံ ဝတ္ထာနန္တိ ဝုတ္တံ ဟောတိ။ သင်္ဃာဋီတိ သင်္ဃာဋိနာမကစီဝရံ။ ဒိဂုဏာတိ ဒုပဋ္ဋကတာ။

၅၆၀။ ဥတုဒ္ဓဋာနန္တိ အတိက္ကန္တဒိဝသာနံ၊ ဗဟုကာလံ နိဝါသေတွာ ပရိစ္စတ္တာနန္တိ ဝုတ္တံ ဟောတိ။ အထ ဝါ ယာနိ ဥတုတော ဥဒ္ဓဋာနိ၊ တေသံ ဝတ္ထာနန္တိ ဂဟေတဗ္ဗံ၊ တိဏ္ဏံ ဥတူနမညတရံ အတိက္ကမိတွာ ဌိတာနံ ပုရာဏဝတ္ထာနန္တိ ဝုတ္တံ ဟောတိ။ စီဝရာနန္တိ စီဝရတ္ထာနိ ဝတ္ထာနေဝ ဂဟိတာနိ။ စတုဂ္ဂုဏာတိ စတုပဋ္ဋာ။ သေသာ ဒုဝေတိ အန္တရဝါသကဥတ္တရာသင်္ဂါ ဒွေ။ ယထာသုခန္တိ ယထာရုစိ။ ပံသုကူလန္တိ သုသာနာဒီသု ပတိတပိလောတိကစီဝရံ။

၅၆၁။ ‘‘တီဏိပီ’’တိအာဒီသု ‘‘တိစီဝရေ ကယိရမာနေ သဗ္ဗံ ဆိန္နကံ နပ္ပဟောတီ’’တိ ပါဠိယံ အာဂတဝတ္ထုမှိ ‘‘အနုဇာနာမိ ဘိက္ခဝေ ဒွေ ဆိန္နကာနိ ဧကံ အဆိန္နက’’န္တိ (မဟာဝ။ ၃၆၀) အာဒိဝစနတော ‘‘စီဝရ’’န္တိ သေသော။ ဆိန္ဒိတဗ္ဗန္တိ ဝတ္ထာနိ ဆိန္ဒိတွာ သိဗ္ဗေတွာ ကာတဗ္ဗံ။ ပဟောတိ စေတိ ဝတ္ထာနိ ဆိန္ဒိတွာ ကရဏေ ယဒိ စီဝရဿ ပဟောတိ။ သဗ္ဗေသူတိ တီသု စီဝရေသု။ အပ္ပဟောန္တေသူတိ ဝတ္ထာနံ ဆိန္ဒိတွာ သိဗ္ဗနေန အပ္ပဟောန္တေသု။ အနွာဓိကန္တိ ဝတ္ထေ ဦနာတိရေကံ အပနေတွာ အာဂန္တုကပတ္တသင်္ခါတံ အနုဝါတံ စီဝရဿ ပရိယန္တေ၊ မဇ္ဈေ စ ယထာရဟံ ဒီဃရဿပရိမာဏယုတ္တံ အလ္လိယာပေတဗ္ဗန္တိ ဝုတ္တံ ဟောတိ။

၅၆၂။ အစ္ဆိန္နံ ဝါတိ ယထာဝုတ္တနယေန အစ္ဆိန္နံ ဝါ။ အနာဒိန္နန္တိ အနာဒိန္နအာဂန္တုကပတ္တံ ¶ ။ တိစီဝရန္တိ တီသု စီဝရေသု ဧကေကန္တိ ဝုတ္တံ ဟောတိ။ ဒုဗ္ဘောဂေနာတိ ဒုဋ္ဌု ပရိဘောဂေန ¶ ။ ယထာ ပရိဘုတ္တံ နဿတိ၊ တထာ ကိလိဋ္ဌာနံ ဓောဝနာဒိမကတွာ နိဝါသနာဒိနာ ပရိဘောဂေန။

၅၆၃-၄။ ကုသိန္တိ အာယာမတော စ ဝိတ္ထာရတော စ အနုဝါတံ စီဝရမဇ္ဈေ တာဒိသမေဝ ဒီဃပတ္တဉ္စ။ ဝုတ္တဉှေတံ စီဝရက္ခန္ဓအဋ္ဌကထာယံ ‘‘ကုသီတိ အာယာမတော စ ဝိတ္ထာရတော စ အနုဝါတာဒီနံ ဒီဃပတ္တာနမေတံ အဓိဝစန’’န္တိ (မဟာဝ။ အဋ္ဌ။ ၃၄၅)။ အဍ္ဎကုသိန္တိ အနုဝါတသဒိသံ စီဝရမဇ္ဈေ တတ္ထ တတ္ထ ရဿပတ္တံ။ ဝုတ္တမ္ပိ စေတံ ‘‘အဍ္ဎကုသီတိ အန္တရန္တရာ ရဿပတ္တာနံ နာမ’’န္တိ (မဟာဝ။ အဋ္ဌ။ ၃၄၅)။ မဏ္ဍလန္တိ ဧကေကသ္မိံ ခဏ္ဍေ မဟာမဏ္ဍလံ။ ဝုတ္တမ္ပိ စေတံ ‘‘မဏ္ဍလန္တိ ပဉ္စခဏ္ဍိကစီဝရဿ ဧကေကသ္မိံ ခဏ္ဍေ မဟာမဏ္ဍလ’’န္တိ (မဟာဝ။ အဋ္ဌ။ ၃၄၅)။ အဍ္ဎမဏ္ဍလန္တိ မဏ္ဍလဿ အန္တော နိဝေသိယမာနံ ခုဒ္ဒကမဏ္ဍလံ။ ဝုတ္တမ္ပိ စေတံ ‘‘အဍ္ဎမဏ္ဍလန္တိ ခုဒ္ဒကမဏ္ဍလ’’န္တိ (မဟာဝ။ အဋ္ဌ။ ၃၄၅)။ ဝိဝဋ္ဋန္တိ မဏ္ဍလံ၊ အဍ္ဎမဏ္ဍလဉ္စာတိ ဒွေ ဧကတော ကတွာ သိဗ္ဗိတံ ဝေမဇ္ဈေ ခဏ္ဍံ။ ဝုတ္တမ္ပိ စေတံ ‘‘ဝိဝဋ္ဋန္တိ မဏ္ဍလဉ္စ အဍ္ဎမဏ္ဍလဉ္စ ဧကတော ကတွာ သိဗ္ဗိတံ မဇ္ဈိမခဏ္ဍ’’န္တိ (မဟာဝ။ အဋ္ဌ။ ၃၄၅)။ အနုဝိဝဋ္ဋန္တိ မဇ္ဈိမခဏ္ဍဿ ဥဘောသု ပဿေသု သိဗ္ဗိတံ တထေဝ ဒွိမဏ္ဍလပတ္တံ ခဏ္ဍဒွယံ။ ဝုတ္တမ္ပိ စေတံ ‘‘အနုဝိဝဋ္ဋန္တိ တဿ ဥဘောသု ပဿေသု ဒွေ ခဏ္ဍာနီ’’တိ (မဟာဝ။ အဋ္ဌ။ ၃၄၅)။ ဗာဟန္တန္တိ တေသံ အနုဝိဝဋ္ဋာနံ ဗာဟိရပဿေ သိဗ္ဗိတံ ဗာဟိရခဏ္ဍဒွယံ။ ဝုတ္တမ္ပိ စေတံ ‘‘ဗာဟန္တန္တိ တေသံ အနုဝိဝဋ္ဋာနံ ဗဟိ ဧကေကံ ခဏ္ဍ’’န္တိ (မဟာဝ။ အဋ္ဌ။ ၃၄၅)။

ပဉ္စန္နံ သမာဟာရော ပဉ္စကံ၊ ဒဿိတပ္ပကာရပဉ္စခဏ္ဍေဟိ သိဗ္ဗိတစီဝရံ ပဉ္စကံ နာမ။ အာဒိ-သဒ္ဒေန သတ္တခဏ္ဍာဒီဟိ သိဗ္ဗိတစီဝရာနံ ဂဟဏံ။ တေနေဝေတ္ထာဟ ‘‘ကတ္တဗ္ဗံ တု တိစီဝရ’’န္တိ။ သတ္တခဏ္ဍဿ စီဝရဿ ဧကံ မဇ္ဈိမခဏ္ဍံ ဝိဝဋ္ဋနာမမေဝ ဟောတိ၊ တဿ ဥဘောသု ပဿေသု ဒွေ ဒွေ ခဏ္ဍာနိ ¶ စူဠာနုဝိဝဋ္ဋမဟာနုဝိဝဋ္ဋသင်္ခါတာနိ အနုဝိဝဋ္ဋနာမာနေဝ ဟောန္တိ။ ဝုတ္တဉ္စေတံ အဋ္ဌကထာယံ ‘‘အထ ဝါ အနုဝိဝဋ္ဋန္တိ ဝိဝဋ္ဋဿ ဧကပဿတော ဒွိန္နံ၊ ဧကပဿတော ဒွိန္နန္တိ စတုန္နမ္ပိ ခဏ္ဍာနမေတံ နာမ’’န္တိ (မဟာဝ။ အဋ္ဌ။ ၃၄၅)။ ဗာဟန္တန္တိ ဒွီသု ပရိယန္တေသု သိဗ္ဗနီယံ ဗာဟိရခဏ္ဍဒွယံ၊ တဉ္စ သင်္ဃဋေတွာ ဗာဟမတ္ထကေ ဌပိယမာနတ္တာ ‘‘မဉ္စာ ဥက္ကုဋ္ဌိံ ကရောန္တီ’’တိအာဒီသု ဝိယ အာဓေယျေ အာဓာရောပစာရဝသေန ဗာဟာတိ စ စီဝရဿ ပရိယန္တာဝယဝတ္တာ ‘‘အန္တ’’န္တိ စ ဝုစ္စတိ။ ဝုတ္တမ္ပိ စေတံ ‘‘ဗာဟန္တန္တိ သုပ္ပမာဏံ စီဝရံ ပါရုပန္တေန သံဟရိတွာ ဗာဟာယ ¶ ဥပရိ ဌပိတာ ဥဘော အန္တာ ဗဟိမုခါ တိဋ္ဌန္တိ၊ တေသံ ဧတံ နာမ’’န္တိ (မဟာဝ။ အဋ္ဌ။ ၃၄၅)။ ဣဒံ သတ္တခဏ္ဍစီဝရမေဝ မဟာအဋ္ဌကထာယံ ဝိဟိတန္တိ ဣဒါနိပိ တဒေဝ ဝဋ္ဋတိ။ ဝုတ္တမ္ပိ စေတံ ‘‘အယမေဝ ဟိ နယော မဟာအဋ္ဌကထာယံ ဝုတ္တော’’တိ။ ဘိက္ခုနာ ကုသိံ…ပေ… ဗာဟန္တမ္ပိစာတိ သဗ္ဗံ ဝိဓိံ ဒဿေတွာဝ ဆိန္နံ ပဉ္စကာဒိပ္ပဘေဒကံ သမဏသာရုပ္ပံ တိစီဝရံ ကတ္တဗ္ဗန္တိ ယောဇနာ။

၅၆၅-၆။ ယထာဝုတ္တဝိဓိံ အဝိရာဓေတွာ စီဝရံ ကပ္ပဗိန္ဒုံ ဒတွာ သင်္ဃာဋိအာဒိနာမေန အဓိဋ္ဌာယ ပရိဘုဉ္ဇန္တဿ အဓိဋ္ဌာနံ ကထံ ဘိဇ္ဇတီတိ အာဟ ‘‘ဒါနေနာ’’တိအာဒိ။ ဒါနေနာတိ အညဿ ဒါနေန။ အစ္ဆိဇ္ဇဂါဟေနာတိ အညေန အစ္ဆိန္ဒိတွာ ဂဟဏေန။ ဝိဿာသဂ္ဂဟဏေန စာတိ အတ္တနိ ဝိဿာသေန အညဿ ဂဟဏေန။ ဟီနာယာဝတ္တနေနာတိ သိက္ခံ အပ္ပစ္စက္ခာယ ဂိဟိဘာဝူပဂမနေန အညဿ ဒါနေ ဝိယ စီဝရေ နိရာလယဘာဝေနေဝ ပရိစ္စတ္တာ။

ကေစိ ပန ‘‘ဟီနာယာဝတ္တနေနာတိ ဘိက္ခုနိယာ ဂိဟိဘာဝူပဂမနေနာတိ ဧဝမတ္ထံ ဂဟေတွာ ဘိက္ခု ပန ဝိဗ္ဘန္တောပိ ယာဝ သိက္ခံ န ပစ္စက္ခာတိ၊ တာဝ ဘိက္ခုယေဝါတိ အဓိဋ္ဌာနံ န ဝိဇဟတီ’’တိ ¶ ဝဒန္တိ၊ တံ န ဂဟေတဗ္ဗံ ‘‘ဘိက္ခုနိယာ ဟီနာယာဝတ္တနေနာ’’တိ ဝိသေသေတွာ အဝုတ္တတ္တာ၊ ဘိက္ခုနိယာ စ ဂိဟိဘာဝူပဂမနေ အဓိဋ္ဌာနဝိဇဟနံ ဝိသုံ ဝတ္တဗ္ဗန္တိ နတ္ထိ တဿာ ဝိဗ္ဘမနေနေဝ အဿမဏိဘာဝတော။

သိက္ခာယာတိ ဘိက္ခုသိက္ခာယ။ ပဟာနေနာတိ ပစ္စက္ခာနေန။ သိက္ခာပစ္စက္ခာနံ ပနေတ္ထ သစေ ဘိက္ခုလိင်္ဂေ ဌိတော သိက္ခံ ပစ္စက္ခာတိ၊ တဿ ကာယလဂ္ဂမ္ပိစီဝရံ အဓိဋ္ဌာနံ ဝိဇဟတီတိ ဒဿနတ္ထံ ဂဟိတံ။ ‘‘သိက္ခာယ စ ပဟာနတော’’တိ စ လိခန္တိ၊ တံ ‘‘ဟီနာယာဝတ္တနေနာပိ၊ သိက္ခာယ စ ပဟာနတော’’တိ ပါဌက္ကမေ သတိ ယုဇ္ဇတိ။ ယထာဝုတ္တော ပန ပါဌော ‘‘သိက္ခာယ စ ပဟာနေန၊ ဟီနာယာဝတ္တနေနပီ’’တိ ပါဌက္ကမေ ယုဇ္ဇတိ။ ယထာ တထာ ဝါ ဟောတု၊ န ကောစိ ဝိရောဓော။

ပစ္စုဒ္ဓါရေနာတိ စီဝရဿ ပစ္စုဒ္ဓရဏေန။ ‘‘ကာလကိရိယာယာ’’တိ အဋ္ဌကထာဝစနတော ဝိနာသေနာတိ စီဝရသာမိကဿ ဇီဝိတဝိနာသောဝ ဝုစ္စတီတိ။ လိင်္ဂဿ ပရိဝတ္တနာတိ ဘိက္ခုဿ ဣတ္ထိလိင်္ဂပရိဝတ္တနာ၊ ဘိက္ခုနိယာ ပုရိသလိင်္ဂပရိဝတ္တနာတိ ဧဝံ ဥဘယထာ လိင်္ဂဿ ပရိဝတ္တနေန။ သဗ္ဗံ ¶ နဝဝိဓမ္ပိ စီဝရံ။ အဓိဋ္ဌာနန္တိ ဧတ္ထ ‘‘ဣမေဟိ အဋ္ဌဟီ’’တိ သေသော။ ဝုတ္တောဝါယမတ္ထော အဋ္ဌကထာယံ ‘‘တတ္ထ ပုရိမေဟိ အဋ္ဌဟိ သဗ္ဗစီဝရာနိ အဓိဋ္ဌာနံ ဝိဇဟန္တီ’’တိ (ပါရာ။ အဋ္ဌ။ ၂။၄၆၉)။ ဘိဇ္ဇတီတိ ပဇဟတိ။ ဆိဒ္ဒဿ ဘာဝေါ ဆိဒ္ဒဘာဝေါ၊ တသ္မိံ၊ ဆိဒ္ဒေ သတိ ဆိဒ္ဒေ ဇာတေတိ ဝုတ္တံ ဟောတိ။ တိစီဝရန္တိ တီသု စီဝရေသု အညတရန္တိ ဝုတ္တံ ဟောတိ။ တိစီဝရမေဝ ဝါတိ ဂဟေတဗ္ဗံ။ ဝုတ္တဉ္စ ‘‘ဆိဒ္ဒဘာဝေန ပန တိစီဝရဿေဝါ’’တိ။

၅၆၇။ ကီဝပ္ပမာဏေ ဆိဒ္ဒေ ဇာတေတိ အာဟ ‘‘ကနိဋ္ဌဿာ’’တိအာဒိ။ ‘‘ကနိဋ္ဌ…ပေ… မာဏက’’န္တိ ဣမိနာ ဟေဋ္ဌိမပရိစ္ဆေဒံ ဒဿေတိ။

၅၆၈။ ဧကော ¶ တန္တုပီတိ ဒီဃတော ဝါ တိရိယတော ဝါ ဧကမ္ပိ သုတ္တံ။

၅၆၉။ ဇိဏ္ဏဋ္ဌာနေ အဂ္ဂဠံ ဒေန္တေန တေစီဝရိကေန ဝတ္တိတဗ္ဗဝိဓိံ ဒဿေတုမာဟ ‘‘ပဌမ’’န္တိအာဒိ။ ပဌမန္တိ ဆိန္နဋ္ဌာနဿ ဆိန္ဒနတော ပုဗ္ဗေယေဝ။ အဂ္ဂဠံ ဒတွာတိ ဝတ္ထခဏ္ဍံ အလ္လိယာပေတွာ။ ရက္ခတီတိ ဧတ္ထ ‘‘အဓိဋ္ဌာန’’န္တိ အနုဝတ္တတေ၊ ‘‘တေစီဝရိကော ဘိက္ခူ’’တိ လဗ္ဘတိ၊ ဧဝံ ဝတ္ထခဏ္ဍံ အလ္လိယာပေန္တော တေစီဝရိကော ဘိက္ခု အဓိဋ္ဌာနံ ရက္ခတီတိ ဝုတ္တံ ဟောတိ။ ဝိပရိယာယေန အဓိဋ္ဌာနံ ဘိန္ဒတီတိ လဗ္ဘတိ။ ပဌမံ ဒွေ ကောဋိယော ဃဋေတွာတိ ယောဇနာ။ မဇ္ဈေ ဇိဏ္ဏံ အဓိဋ္ဌိတစီဝရံ မဇ္ဈေ ဆိန္ဒန္တော တတော ပုဗ္ဗေယေဝ ဒွေ ကောဋိယော ဧကတော ဃဋေတွာ သိဗ္ဗိတွာ။ ပစ္ဆာတိ ကောဋိဃဋနတော ပစ္ဆာ။ ဆိန္ဒတီတိ မဇ္ဈံ ဥဘယကောဋိံ ကာတုံ ဆိန္ဒတိ။ ရက္ခတီတိ ဝုတ္တပ္ပကာရမေဝ။

၅၇၀။ တိစီဝရေ ကတ္ထ ဇာတံ ဆိဒ္ဒမဓိဋ္ဌာနံ ဘိန္ဒတီတိ အာဟ ‘‘စတုရင်္ဂုလာ’’တိအာဒိ။ စတ္တာရိ စ အဋ္ဌ စ စတုရဋ္ဌံ၊ စတုန္နံ အဋ္ဌန္နံ ဝါ အင်္ဂုလာနံ သမာဟာရော စတုရဋ္ဌင်္ဂုလံ၊ တသ္မာတိ ဂဟေတဗ္ဗံ။ စတုရင်္ဂုလာ အဋ္ဌင်္ဂုလာတိ ယောဇနာ။ ဩရန္တိ အဗ္ဘန္တရံ။ ဧကဉ္စ ဒွေ စ ဧကဒွေ၊ တေသံ ဧကဒွိန္နံ၊ ‘‘စီဝရာန’’န္တိ ပကရဏတော လဗ္ဘတိ၊ ဧကဿ စီဝရဿ၊ ဒွိန္နဉ္စ စီဝရာနန္တိ ယောဇနာ။ ယထာသင်္ချာနုဒ္ဒေသဝသေန ဧကဿ တိရိယတော စတုရင်္ဂုလတော ဩရံ၊ ဒွိန္နံ တိရိယတော အဋ္ဌင်္ဂုလတော ဩရန္တိ ယောဇနာ။ ဝါကျဒွယေပိ ‘‘ဆိဒ္ဒံ ဘိန္ဒတေဝါ’’တိ ယောဇေတဗ္ဗံ။

ဧကဿ စီဝရဿာတိ အန္တရဝါသကစီဝရဿ။ တိရိယတောတိ ဝိတ္ထာရတော။ စတုရင်္ဂုလံ ဩရန္တိ စတုရင်္ဂုလတော ¶ အဗ္ဘန္တရေ ဆိဒ္ဒံ အဓိဋ္ဌာနံ ဘိန္ဒတိ။ ဒွိန္နန္တိ ဥတ္တရာသင်္ဂသင်္ဃာဋီနံ။ တိရိယတောတိ ¶ ဝိတ္ထာရတော။ အဋ္ဌင်္ဂုလတော ဩရန္တိ အဋ္ဌင်္ဂုလတော အဗ္ဘန္တရေ။ တိဏ္ဏမ္ပိ ဒီဃတော ဝိဒတ္ထိယာ ဩရံ ဆိဒ္ဒံ အဓိဋ္ဌာနံ ဘိန္ဒတေဝါတိ ယောဇနာ။ ဧတ္ထ ဝိဒတ္ထိ ဝဍ္ဎကိဝိဒတ္ထိ ဂဟေတဗ္ဗာ။ ဧဝံ ဝုတ္တပရိစ္ဆေဒဗ္ဘန္တရေ ဆိဒ္ဒေ ဇာတေ တဿ စီဝရဿ အတိရေကစီဝရတ္တာ ဒသာဟမနတိက္ကမိတွာ သူစိကမ္မံ ကတွာ အဓိဋ္ဌာတဗ္ဗံ။ တထာ အကရောန္တေန ပန ပရိက္ခာရစောဠံ အဓိဋ္ဌာတဗ္ဗံ။

၅၇၁။ ‘‘နိသီဒနဿာ’’တိ ‘‘နိသီဒနစီဝရဿာ’’တိ ဝတ္တဗ္ဗေ ဥတ္တရပဒလောပေန ဝုတ္တန္တိ ဒဋ္ဌဗ္ဗံ။ ဒိယဍ္ဎာတိ ဧတ္ထ ဝိသေသိတဗ္ဗာ ဝိဒတ္ထိ ‘‘ဒွေ ဝိဒတ္ထိယော’’တိ စ ‘‘သုဂတဿ ဝိဒတ္ထိယာ’’တိ စ ဝုတ္တသာမတ္ထိယာ လဗ္ဘတိ။ အဍ္ဎေန ဒုတိယာ ဒိယဍ္ဎာ၊ ဒုတိယံ အဍ္ဎမေတဿာတိ ‘‘ဒုတိယဍ္ဎာ’’တိ ဝတ္တဗ္ဗေ တိယ-ပစ္စယလောပေန ‘‘ဒိယဍ္ဎာ’’တိ ဝုတ္တံ၊ အဍ္ဎဒုတိယာတိ ဝုတ္တံ ဟောတိ။ ‘‘သုဂတဿ ဝိဒတ္ထိယာ’’တိ ပမာဏနိယမဿ ကတတ္တာ ဝဍ္ဎကိဝိဒတ္ထိယာ တိဿော ဝိဒတ္ထိယော ဧကာ သုဂတဝိဒတ္ထိ ဟောတိ။ ဣဒံ နိသီဒနစီဝရံ ဒီဃတော ဝဍ္ဎကိဟတ္ထေန တိဟတ္ထံ၊ ဝိတ္ထာရတော ဆဠင်္ဂုလာဓိကဒွိဟတ္ထပ္ပမာဏံ ဟောတိ။ ‘‘ဒသာ ဝိဒတ္ထီ’’တိ (ပါစိ။ ၅၃၃) ဝုတ္တတ္တာ ဒိယဍ္ဎဟတ္ထာ ဒသာတိ ဝေဒိတဗ္ဗာ။

၅၇၂။ စတဿောတိ ဧတ္ထာပိ ‘‘ဝိဒတ္ထိယော’’တိ သာမတ္ထိယာဝ လဗ္ဘတိ။ ‘‘ကဏ္ဍုပ္ပဋိစ္ဆာဒိယာ’’တိ ဝိဘတ္တိပရိဏာမေန ဒီဃတောတိ ယောဇနာ။

၅၇၃။ အဍ္ဎံ တေယျံ တတိယံ ယဿာ သာ အဍ္ဎတေယျာ၊ အဍ္ဎတတိယာတိ ဝုတ္တံ ဟောတိ။

၅၇၄။ တတော ဥတ္တရိံ တဒုတ္တရိံ၊ တဿ တဿ ဝုတ္တပ္ပမာဏတော အတိရေကံ။ အဓိကစ္ဆေဒနန္တိ အဓိကဿ ပမာဏာတိရိတ္တဋ္ဌာနဿ ဆေဒနံ အဿ ပါစိတ္တိယဿ ဒေသနာယာတိ ¶ အဓိကစ္ဆေဒနံ၊ ဝုတ္တပ္ပမာဏတော အဓိကဋ္ဌာနံ ဆိန္ဒိတွာ ဒေသေတဗ္ဗံ ပါစိတ္တိယံ။ ဥဒီရိတံ ဝုတ္တံ ပါဠိယာတိ အတ္ထော။

၅၇၅။ အပ္ပမာဏေနာတိ ဂုဏဝသေန အပ္ပမာဏေန သမ္မာသမ္ဗုဒ္ဓေန။

၅၇၆။ သဗ္ဗံ ဝဋ္ဋတီတိ သမ္ဗန္ဓော။ ‘‘သဗ္ဗ’’န္တိ ဣမိနာ အဋ္ဌကထာယ အာဂတံ နီလာဒိံ သင်္ဂဏှာတိ။ မဟန္တာဒိဘေဒံ သဗ္ဗံ ပစ္စတ္ထရဏစီဝရံ ဝဋ္ဋတိ။

၅၇၇။ ‘‘မုခပုဉ္ဆနစောဠံ ¶ ဧက’’န္တိ ပဒစ္ဆေဒေါ။ ဧကံ ဓောဝိတွာ ယာဝ သုက္ခာပီယတိ၊ တာဝ အညေန မုခပုဉ္ဆနေန ဘဝိတဗ္ဗတ္တာ အာဟ ‘‘ဒွေပိ ဝဋ္ဋန္တိ သဗ္ဗထာ’’တိ။

၅၇၉။ ပမာဏတော၊ ဂဏနတော စ အတီတာတိ ပမာဏဂဏနာတီတာ။ ‘‘ပမာဏာတီတာ’’တိ ဝစနေန ဝိနယဓရာနံ အပ္ပမာဏဂုဏတံ ဒဿေတိ၊ ‘‘ဂဏနာတီတာ’’တိ ဣမိနာ အတိက္ကန္တဂဏနတံ။ ပကတံ ဝိနယေ ပဌမံ ကတံ ဗုဒ္ဓေန ဘဂဝတာ ပညတ္တံ ဇာနန္တီတိ ပကတညူ၊ ဝိနယဓရာ၊ တေ ပကတညုနော။ အပရိမာဏဂုဏမဏိဂဏဘူသိတဥပါလိဒါသကာဒိမဟာထေရာစရိယပရမ္ပရာဂတာ သင်္ချာပထာတီတာ ဝိနယဓရာတိ ဝုတ္တံ ဟောတိ။

၅၈၀။ သုဂတဋ္ဌင်္ဂုလာယာမန္တိ ဝဍ္ဎကိရတနပ္ပမာဏဒီဃံ။ စတုရင်္ဂုလဝိတ္ထတန္တိ ဝဍ္ဎကိဝိဒတ္ထိပ္ပမာဏဝိတ္ထာရံ။ ဝိကပ္ပနုပဂံ ပစ္ဆိမံ စီဝရံ နာမ ဟောတိ။ ပစ္ဆိမံ စီဝရန္တိ ပရိဿာဝနပဋာဒီနံ ဝိသေသနံ၊ ပစ္ဆိမစီဝရပ္ပမာဏန္တိ ဝုတ္တံ ဟောတိ။

၅၈၁။ ပရိဿာဝပဋန္တိ ဥဒကပရိဿာဝနတ္ထံ ပဋံ။ ပတ္တတ္ထဝိကန္တိ ပတ္တကဉ္စုကံ။ ပေါတ္ထကတ္ထဝိကန္တိ ပေါတ္ထကကဉ္စုကံ ¶ ။ အာဒိဂ္ဂဟဏေန ပစ္ဆိမပ္ပမာဏာဒိံ ယံ ကိဉ္စိ ပဋံ၊ ဒဏ္ဍပဋဉ္စ သင်္ဂဏှာတိ။

၅၈၂။ အဓိဋ္ဌာတုန္တိ ပရိက္ခာရစောဠံ အဓိဋ္ဌာတုံ။ ဌပိတေတိ အနဓိဋ္ဌာယ ဌပိတေ။ မဟာပစ္စရိယံ ပန ‘‘အနာပတ္တီ’’တိ (ပါရာ။ အဋ္ဌ။ ၂။၄၆၉) အာဟ။ နတ္ထိ ဒေါသတာတိ ဒေါသော ဧဝ ဒေါသတာ။ ‘‘အတ္တနော သန္တကဘာဝတော မောစေတွာ ဌပိတံ သန္ဓာယ မဟာပစ္စရိယံ အနာပတ္တိ ဝုတ္တာ’’တိ ဝဒန္တိ။ ‘‘ဣမိနာ ဘေသဇ္ဇံ စေတာပေဿာမိ၊ ဣဒံ မာတုယာ ဒဿာမီ’’တိ ဌပေန္တေန အဓိဋ္ဌာတဗ္ဗံ။ ‘‘ဣဒံ ဘေသဇ္ဇဿ၊ မာတုယာ’’တိ ဝိဘဇိတွာ သသန္တကဘာဝတော မောစိတေ အဓိဋ္ဌာနကိစ္စံ နတ္ထီတိ အဓိပ္ပာယော။ ဟောတိ စေတ္ထ –

‘‘ယံ ဝတ္ထံ ဘိက္ခုနာ လဒ္ဓံ၊ ကတံ မာတာဒိသန္တကံ၊

နိဿဂ္ဂိယံ န ဟောတီတိ၊ တမာဟု ဝိနယညုနော’’တိ။

၅၈၃။ ဝဿမာသေ စတုရောတိ ဝဿာနေ စတုရော မာသေ၊ အဓိဋ္ဌာနကိရိယာယ စတ္တာရော မာသေ အဝိစ္ဆေဒေါတိ ¶ အစ္စန္တသံယောဂေ ဥပယောဂဝစနံ။ ဝဿိကေ စတ္တာရော မာသေ နိဝါသေတဗ္ဗာ သာဋိကာ ဝဿိကသာဋိကာ။

၅၈၄။ ကဏ္ဍုံ ပဋိစ္ဆာဒေတီတိ ကဏ္ဍုပ္ပဋိစ္ဆာဒိ၊ ကဏ္ဍုရောဂါတုရဿ ဘိက္ခုနော တပ္ပဋိစ္ဆာဒနတ္ထမနုညာတစီဝရဿေတမဓိဝစနံ။ ဟောန္တိ စေတ္ထ –

‘‘မာတိကဋ္ဌကထာယဿာ၊ ကဏ္ဍုစ္ဆာဒိကသာဋိယာ၊

န ကာလာတိက္ကမေ ဝုတ္တံ၊ အဓိဋ္ဌာနဝိဝဋ္ဋနံ။

အဓိဋ္ဌာနပဟာနင်္ဂေ-သု ဝုတ္တတ္တာ ဝိသေသတော၊

ဝီမံသိတဗ္ဗံ ဝိညူဟိ၊ တတ္ထ ယံ ကာရဏံ သိယာ’’တိ။

၅၈၆။ ‘‘အသမ္မုခေ ¶ ဧတန္တိ စာ’’တိ ဝစနေနေဝ သမ္မုခေ ‘‘ဣမ’’န္တိ ဝိညာယတိ။ ဝိစက္ခဏော ပစ္စုဒ္ဓရေယျာတိ ယောဇနာ။

၅၈၇။ အဓိဋ္ဌိတန္တိ အဓိဋ္ဌာနံ။

၅၈၈။ ဣတိ သဗ္ဗမိဒန္တိ ဧဝံ ဝုတ္တံ ဣဒံ တိစီဝရာဒီနံ ပမာဏာဒိသဗ္ဗဝိဓာနံ။ တေစီဝရိကဘိက္ခုနောတိ တိစီဝရာဓိဋ္ဌာနေန အဓိဋ္ဌိတတေစီဝရိကဿ ဝိနယတေစီဝရိကဿ။ တိဏ္ဏံ စီဝရာနံ သမာဟာရော တိစီဝရံ၊ တိဏ္ဏံ တိစီဝရာနံ သမာဟာရောတိ ‘‘တိတိစီဝရ’’န္တိ ဝတ္တဗ္ဗေ ဧကဒေသသရူပေကသေသနယေန ‘‘တိစီဝရ’’န္တိ နဝစီဝရာနိ သင်္ဂဟိတာနိ၊ တိစီဝရေ နိယုတ္တော တေစီဝရိကောတိ ဝိနယတေစီဝရိကော ဝုစ္စတိ။ ဓုတင်္ဂတေစီဝရိကဿာပိ တိစီဝရေ ဣဒမေဝ ဝိဓာနန္တိ သောပိ သင်္ဂယှတိ။ အညေသု ဝါ ပန ဆသု စီဝရေသု ပရိက္ခာရစောဠံ ဧကံ အံသကာသာဝမေဝ ဝဋ္ဋတိ။ တထာ ဝတွာဝါတိ ‘‘ဣမံ ပရိက္ခာရစောဠံ အဓိဋ္ဌာမီ’’တိအာဒိနာ နယေန ဝတွာ။ တံ ပရိက္ခာရစောဠံ။ ပရိက္ခာရစောဠမဿ အတ္ထိ၊ တတ္ထ ဝါ နိယုတ္တောတိ ပရိက္ခာရစောဠိကော။

၅၈၉။ ‘‘တိစီဝရံ ပန ပရိက္ခာရစောဠံ အဓိဋ္ဌာတုံ ဝဋ္ဋတိ၊ န ဝဋ္ဋတီ’’တိ အနုယောဂံ ကတွာ ‘‘ဝဋ္ဋတီ’’တိ ¶ (ပါရာ။ အဋ္ဌ။ ၂။၄၆၉) အဋ္ဌကထာယ ဝုတ္တတ္တာ ဣဓ ‘‘တိစီဝရ’’န္တိ စီဝရတ္တယမေဝ ဝုတ္တံ။ ‘‘သုခပရိဟာရတ္ထံ ဧကမ္ပိ ဝိကပ္ပေတဗ္ဗ’’န္တိ ဝစနတော ဧကဒေသေ သမုဒါယောပစာရဝသေန ဧကမ္ပိ ဝိကပ္ပေတဗ္ဗမေဝ ဟောတိ။

ပရိက္ခာရစောဠံ ကာတုမ္ပိ ဝဋ္ဋတီတိ ဗဒ္ဓသီမတော ဗဟိ ဝသန္တေန ဧကကေန တေစီဝရိကေန အန္တောအရုဏေ အသတိယာ တီသု စီဝရေသု ဟတ္ထပါသေ အကတေသု နိဿဂ္ဂိယံ ပါစိတ္တိယံ ဟောတီတိ၊ ဝိနယကမ္မံ ကာတုံ သဘာဂပုဂ္ဂလာနံ ဒုလ္လဘတ္တာ ¶ စ သုခပရိဟာရတ္ထံ တီသု ဧကံ ဝါ သဗ္ဗာနိ ဧဝ ဝါ တိစီဝရနာမေန ကတာဓိဋ္ဌာနာနိ ပစ္စုဒ္ဓရိတွာ ပရိက္ခာရစောဠနာမေန အဓိဋ္ဌာတုမ္ပိ ဝဋ္ဋတီတိ ဝုတ္တံ ဟောတိ။

ဧဝံ အဂ္ဂဟေတွာ ‘‘သစေ တိစီဝရံ ပရိက္ခာရစောဠာဓိဋ္ဌာနံ လဘေယျ၊ ဥဒေါသိတသိက္ခာပဒေ ပရိဟာရော နိရတ္ထကော ဘဝေယျာ’’တိ (ပါရာ။ အဋ္ဌ။ ၂။၄၆၉) ဝုတ္တံ မဟာပဒုမတ္ထေရဿ မတံ ဒဿေတုမာဟ ‘‘ဧဝံ စုဒေါသိတေ’’တိအာဒိ။ ဧဝံ စေတိ ဧဝံ တိစီဝရံ ပရိက္ခာရစောဠံ အဓိဋ္ဌဟိတွာ ပရိဟရိတုံ ဝဋ္ဋတိ စေ။ ဥဒေါသိတေတိ ဣမဿ သိက္ခာပဒဿ အနန္တရေ ဒုတိယကထိနသိက္ခာပဒေ။ ဝုတ္တော ပရိဟာရောတိ ‘‘ဧကကုလဿ ဂါမော ဟောတိ ပရိက္ခိတ္တော စ။ အန္တောဂါမေ စီဝရံ နိက္ခိပိတွာ အန္တောဂါမေ ဝတ္ထဗ္ဗ’’န္တိအာဒိနာ (ပါရာ။ ၄၇၈) နယေန ပဒဘာဇနာဝသာနေ ဝုတ္တော၊ ဣဓ စ ‘‘ဂါမာဒီသု ပဒေသေသူ’’တိအာဒိနာ နယေန အနန္တရံ ဝက္ခမာနော တိစီဝရဿ ပရိဟရဏဝိဓိ။ နိရတ္ထကောတိ ပရိက္ခာရစောဠနာမေန အဓိဋ္ဌိတစီဝရဿ တေန ဝိဓိနာ တိစီဝရံ အပရိဟရန္တဿာပိ ဘိက္ခုနော အနာပတ္တိဘာဝတော နိပ္ပယောဇနောတိ အတ္ထော။

၅၉၀။ တပ္ပရိဟရိတုမာဟ ‘‘န’’ဣစ္စာဒိ။ န နိရတ္ထကောတိ ယောဇနာ။ ဟေတုံ ဒဿေတုမာဟ ‘‘တေစီဝရိကဿေဝါ’’တိအာဒိ။ ယော တိစီဝရနာမေန အဓိဋ္ဌာနံ အပစ္စုဒ္ဓရိတွာ သတိံ ဥပဋ္ဌပေတွာ အန္တောအရုဏေ စီဝရံ ဟတ္ထပါသတော အမောစေတွာ အရုဏံ ဥဋ္ဌာပေတိ၊ တာဒိသဿ တေစီဝရိကဿေဝ တသ္မိံ သိက္ခာပဒေ ဥဒေါသိတပရိဟာရဿ ဘဂဝတာ ဒေသိတတ္တာတိ အတ္ထော။ ယသ္မာ တာဒိသဿေဝ တေစီဝရိကဿ ဥဒေါသိတသိက္ခာပဒေ ပရိဟာရော ဝုတ္တော၊ တသ္မာ။ တံ သဗ္ဗမ္ပီတိ တံ နဝဝိဓံ သဗ္ဗမ္ပိ စီဝရံ။ ပရိက္ခာရစောဠဿာတိ ပရိက္ခာရစောဠနာမေန အဓိဋ္ဌဟိတွာ စီဝရံ ပရိဘုဉ္ဇိတုကာမဿ ပရိက္ခာရစောဠနာမေန အဓိဋ္ဌာတုံ ဝဋ္ဋတိ။

၅၉၁။ ဣမိနာ ¶ ဥဒေါသိတပရိဟာရဿ အနိရတ္ထကဘာဝံ သာဓေတွာ ဣဒါနိ ‘‘တိစီဝရံ ပရိက္ခာရစောဠနာမေနာပိ ¶ အဓိဋ္ဌာတုံ ဝဋ္ဋတီ’’တိ ဣမဿ အဓိကတ္ထဿ မဟာကာရုဏိကေန အနုညာတဘာဝေ ကိရိယန္တရာနုဇာနနသင်္ခါတအဓိကဝစနဿ ဉာပကဟေတုဘာဝံ ဒဿေတုမာဟ ‘‘အဓိဋ္ဌေတီ’’တိအာဒိ။ ဣမသ္မိံယေဝ သိက္ခာပဒေ အနာပတ္တိဝါရေ ‘‘အနာပတ္တိ အန္တောဒသာဟံ အဓိဋ္ဌေတိ၊ ဝိကပ္ပေတီ’’တိ ပါဌေ အနာပတ္တိဘာဝေ ‘‘အဓိဋ္ဌေတီ’’တိ ဧတ္တကေနေဝ ပရိယတ္တေ (ပါရာ။ ၄၆၉) ‘‘ဝိကပ္ပေတီ’’တိ ကိရိယန္တရာနုဇာနနေန ပကာရန္တရေနာပိ ဒေါသော နတ္ထီတိ အဓိပ္ပာယဿ ဝိညာပိတတ္တာတိ အတ္ထော။

၅၉၂။ ဧဝံ ကရောန္တဿာတိ တိစီဝရနာမေန အဓိဋ္ဌာနံ ပစ္စုဒ္ဓရိတွာ ပရိက္ခာရစောဠနာမေန အဓိဋ္ဌဟန္တဿ။ ဣဒါနိ အတိပ္ပသင်္ဂံ ဒဿေတုကာမဿ စောဒကဿ အဓိပ္ပာယံ ဒဿေတုမာဟ ‘‘ဧဝ’’န္တိအာဒိ။ မူလာဓိဋ္ဌာနံ ပဟာယ ကာတဗ္ဗပ္ပကာရန္တရဿာပိ ဝိဇ္ဇမာနတ္တာ တိစီဝရံ ပစ္စုဒ္ဓရိတွာ မုခပုဉ္ဆနာဒိကံ ကတွာ အဓိဋ္ဌဟတောပိ ဒေါသော န သိယာတိ ကသ္မာ နာပဇ္ဇတီတိ အတ္ထော။ နဣတိ အတိပ္ပသင်္ဂနိဝါရဏေ။

၅၉၃။ ကိစ္စဝိဓာနတောတိ တေသံ မုခပုဉ္ဆနာဒီနံ အတ္တနော အတ္တနော ကိစ္စဿ သာဓနတော၊ တာဒိသံ ကိစ္စဝိသေသာပေက္ခံ ဝိနာ တံတံနာမေန အဓိဋ္ဌာတုံ န ယုဇ္ဇတီတိ အဓိပ္ပာယော။ အကိစ္စဿာတိ မုခပုဉ္ဆနာဒိကိစ္စရဟိတဿ။ အဓိကဿာတိ ပစ္စုဒ္ဓရိတွာ ပဌမံ အဓိဋ္ဌာနဿ ဝိဇဟိတတ္တာ အတိရေကဿ။ အဿာတိ တိစီဝရဿ။ အဓိဋ္ဌာနံ တု ယုဇ္ဇတီတိ ဒသာဟံ အနတိက္ကမိတွာ ပရိက္ခာရစောဠနာမေန အဓိဋ္ဌာနံ ပန ယုဇ္ဇတိ။

၅၉၄။ နိဓာနဿ ¶ မုခံ ဥပါယောတိ နိဓာနမုခံ၊ အန္တရဝါသကာဒိတံတံစီဝရနာမေန အဓိဋ္ဌာနတော အတိရေကံ ယံ ကိဉ္စိ စီဝရံ ယထာ ဌပိတံ အာပတ္တိံ န ကရောတိ၊ တထာ နိဓာနဿ ဥပါယောတိ အတ္ထော။ ဧတံ ပရိက္ခာရစောဠာဓိဋ္ဌာနံ။ မဟာပစ္စရိယန္တိ ဗြာဟ္မဏတိဿဘယေ ဘိက္ခုသင်္ဃံ ဇမ္ဗုဒီပံ နေတုံ သက္ကဿ ဒေဝါနမိန္ဒဿ အာဏတ္တိယာ ဝိသုကမ္မေန နိမ္မိတမဟာပစ္စရိယံ နိသီဒိတွာ လိခိတတ္တာ တံနာမကာယံ ဝိနယဋ္ဌကထာယံ၊ ‘‘မဟာပစ္စရိယာဒိသူ’’တိပိ လိခန္တိ။

၅၉၅။ ပရိက္ခာရစောဠနာမေန အဓိဋ္ဌာနဝိဓာနဿ ဝုတ္တပ္ပမာဏံ ကတမန္တိ အာဟ ‘‘စီဝရ’’န္တိအာဒိ။ ‘‘နိဒါနေ ဥပ္ပတ္တိတော’’တိ ပဒစ္ဆေဒေါ။ ‘‘စီဝရံ ပရိပုဏ္ဏ’’န္တိ နိဒါနေ ‘‘တိစီဝရံ သမ္ပုဏ္ဏံ ဝိဇ္ဇတိ၊ ဣဒမတိရေကစီဝရံ ကိံ ကာတဗ္ဗ’’န္တိ ဘိက္ခူဟိ ဘဂဝတော အာရောစိတဝတ္ထုမှိ ¶ ။ ဥပ္ပတ္တိတောတိ ပရိက္ခာရစောဠာဓိဋ္ဌာနဿ ဥပ္ပန္နတ္တာ၊ အနုညာတတ္တာတိ အတ္ထော။ ‘‘တေန ခေါ ပန သမယေန ဘိက္ခူနံ ပရိပုဏ္ဏံ ဟောတိ တိစီဝရံ၊ အတ္ထော စ ဟောတိ ပရိဿာဝနေဟိပိ ထဝိကာဟိပိ။ ဘဂဝတော ဧတမတ္ထံ အာရောစေသုံ။ အနုဇာနာမိ ဘိက္ခဝေ ပရိက္ခာရစောဠက’’န္တိ (မဟာဝ။ ၃၅၇) ဧတ္ထ ပါဠိယံ ဧဝံ ဝိပ္ပဝါသသုခတ္ထံ နာမေနာဓိဋ္ဌိတတိစီဝရံ အဓိဋ္ဌာနံ ပစ္စုဒ္ဓရိတွာ ပရိက္ခာရစောဠနာမေန အဓိဋ္ဌာတုံ ဝဋ္ဋတီတိ သာဓနေန တဒေကသာဓနတ္တာ ဧဝ ဧကမ္ပိ စီဝရံ ဝိကပ္ပေတုံ ဝဋ္ဋတီတိ ဝုတ္တမေဝ ဟောတိ။ တေနေဝါဟ အဋ္ဌကထာယံ ‘‘ဧဝဉ္စ သတိ ယော တိစီဝရေ ဧကေန စီဝရေန ဝိပ္ပဝသိတုကာမော ဟောတိ၊ တဿ တိစီဝရာဓိဋ္ဌာနံ ပစ္စုဒ္ဓရိတွာ ဝိပ္ပဝါသသုခတ္ထံ ဝိကပ္ပနာယ ဩကာသော ဒိန္နော ဟောတီ’’တိ (ပါရာ။ အဋ္ဌ။ ၂။၄၆၉)။

၅၉၆-၈။ ဧတ္တာဝတာ ကပ္ပိယစီဝရဉ္စ တတ္ထ ကတ္တဗ္ဗဉ္စ ဒဿေတွာ ဣဒါနိ အကပ္ပိယစီဝရံ ဒဿေတုမာဟ ‘‘ကုသဝါကာဒီ’’တိအာဒိ။ ကုသန္တိ ဒဗ္ဗတိဏံ။ ဝါကန္တိ ရုက္ခာဒီနံ ဝါကံ။ အာဒိ-သဒ္ဒေန ¶ ဖလကံ ဂဟိတံ၊ စီရ-သဒ္ဒေါ စီဝရပရိယာယော၊ ဣမသ္မိံ ကုသာဒယော ဂန္ထေတွာ ကတေ စီဝရေယေဝ ဝတ္တတိ။ ကေသဇံ ကမ္ဗလန္တိ မနုဿကေသေဟိ ဝီတကမ္ဗလဉ္စ။ ဝါလဇံ ကမ္ဗလန္တိ အဿဝါလစမရဝါလေဟိ ဝီတကမ္ဗလဉ္စ။ ဥလူကပက္ခန္တိ ကောသိယသကုဏပတ္တံ။ ဣဓ ပန တံ ဂန္ထေတွာ ကတစီဝရမေဝ ဂဟေတဗ္ဗံ။ အဇိနက္ခိပေတိ အဇိနဒီပိစမ္မေ။ ‘‘ဓာရယတော ထုလ္လစ္စယ’’န္တိ ပစ္စေကံ သမ္ဗန္ဓော။

ကဒလိဒုဿေတိ ကဒလိဝါကမယဝတ္ထေ။ ဧရကဒုဿေတိ ဧရကမယဝတ္ထေ။ အက္ကဒုဿေတိ အက္ကဒဏ္ဍေ ဝါ တေသံ သုတ္တာနိ ဝါ ဂဟေတွာ ကတဝတ္ထေ။ ပေါတ္ထကေတိ မကစိဝါကမယဝတ္ထေ။ တိရီဋေ ဝါတိ ဧဝံနာမကေ ရုက္ခတစေ။ ဝေဌနေတိ သီသဝေဌနေ။ ကဉ္စုကေတိ ကဝစေ။

သဗ္ဗနီလကေတိ ကေဝလနီလကေ။ ဧသ နယော မဉ္ဇေဋ္ဌာဒီသု။ မဟာနာမရတ္တေတိ တနုပဒုမဒလဝဏ္ဏရတ္တေ။ မဟာရင်္ဂရတ္တေတိ သတပဒိဝဏ္ဏရတ္တေ။

၅၉၉။ အစ္ဆိန္နဒသကေတိ အစ္ဆိန္နာ ဒသာ ယဿ၊ တသ္မိံ စီဝရေ။ ဧသ နယော ဒီဃဒသေပိ။ ဖလဒသေတိ ဖလသဒိသဂန္ထိတာ ဒသာ ယဿ၊ တသ္မိံ။ ပုပ္ဖဒသေတိ ကဏ္ဏိကံ ဗန္ဓိတွာ ဝိကာသေတွာ ကတာ ဒသာ ယဿ၊ တသ္မိံ စီဝရေတိ အတ္ထော။ အစ္ဆိန္နစီဝရဿာတိ နဂ္ဂံ ကတွာ စောရေဟိ ဝိလုတ္တစီဝရဿ ¶ ။ ဧတ္ထာတိ ကုသဝါကာဒီသု၊ သဗ္ဗနီလာဒီသု စ။ ကိဉ္စီတိ ဧကမ္ပိ အကပ္ပိယံ နတ္ထိ အနနုလောမိကံ နတ္ထိ။ ‘‘နဂ္ဂေန ဧတေသု အကပ္ပိယစီဝရေသု ယံကိဉ္စိ လဒ္ဓံ၊ တေန ဟိရိကောပိနံ ပဋိစ္ဆာဒေတွာ ပစ္ဆာ ကပ္ပိယစီဝရေ လဒ္ဓေ တံ အဓိဝါသေတွာ ဣဒံ အကပ္ပိယစီဝရံ ပရိစ္စဇိတဗ္ဗံ။ သဗ္ဗနီလကာဒိဝတ္ထေသု လဒ္ဓေသု ကပ္ပိယရဇနေန ရဇိတွာ၊ တံ ဝဏ္ဏံ နာသေတွာ ဝါ ကပ္ပိယဝတ္ထာနိ ဥဘယပဿေသု ¶ အလ္လိယာပေတွာ၊ ပဋိစ္ဆာဒေတွာ ဝါ နိဝါသေတုံ ဝဋ္ဋတီ’’တိ အဋ္ဌကထာယံ ဝုတ္တံ။

၆၀၀။ ‘‘အန္တောဒသာဟ’’န္တိ ဣဒံ ‘‘အဓိဋ္ဌေတီ’’တိအာဒီဟိ သဗ္ဗပဒေဟိပိ ယောဇေတဗ္ဗံ။ ဝိဿဇ္ဇေတီတိ အညဿ ဒေတိ။ ဣဓ ဒါနံ ဒုဝိဓံ သမ္မုခါဒါနံ၊ ပရမ္မုခါဒါနန္တိ။ ပဋိဂ္ဂါဟကံ ဒိသွာ ‘‘ဣဒံ တုယှံ ဒမ္မီ’’တိ ဒါနံ သမ္မုခါဒါနံ နာမ။ ပရမ္မုခါ ‘‘ဣဒံ ဣတ္ထန္နာမဿ ဒမ္မီ’’တိ ဒိန္နံ ပရမ္မုခါဒါနံ။ ‘‘ဣဒံ တွံ ဂဏှာဟီ’’တိ ဝါ ‘‘တုယှံ ဂဏှာဟီ’’တိ ဝါ ဝုတ္တေ ‘‘မယှံ ဂဏှာမီ’’တိ သစေ ဝဒတိ၊ ဒါနဂဟဏဒွယမ္ပိ သုဒ္ဓံ။ ‘‘ဣဒံ တဝ သန္တကံ ကရောဟိ၊ တဝ သန္တကံ ဟောတု၊ တဝ သန္တကံ ဟောတီ’’တိ ဒါယကေန ဝုတ္တေ ဂဏှန္တောပိ ‘‘မမ သန္တကံ ကရောမိ၊ မမ သန္တကံ ဟောတု၊ မမ သန္တကံ ဟောတီ’’တိ ဝဒတိ စေ၊ ဒါနံ၊ ဂဟဏဉ္စ အသုဒ္ဓံ ဟောတိ။ ‘‘တဝ သန္တကံ ကရောဟီ’’တိ ဝုတ္တေ ပန ‘‘သာဓု ဘန္တေ မယှံ ဂဏှာမီ’’တိ ဝတွာ ဂဏှာတိ၊ ဂဟဏံ သုဒ္ဓံ။ ‘‘ဣဒံ တုယှံ ဂဏှာဟီ’’တိ ဝုတ္တေ ‘‘အဟံ န ဂဏှာမီ’’တိ ဝဒတိ၊ ပုန ‘‘ဒိန္နံ မယာ၊ တုယှံ ဂဏှာဟီ’’တိ ဝုတ္တေ ဣတရောပိ ပုန ပဋိက္ခိပတိ၊ တံ စီဝရံ ကဿစိ အသန္တကတ္တာ ဒသာဟာတိက္ကမေနာပိ နိဿဂ္ဂိယံ န ဟောတီတိ ပစ္ဆာ တေသု ဒွီသု ယော ဣစ္ဆတိ၊ တေန အဓိဋ္ဌာယ ပရိဘုဉ္ဇိတဗ္ဗန္တိ သဗ္ဗမိဒံ အဋ္ဌကထာယ (ပါရာ။ အဋ္ဌ။ ၂။၄၆၉ အတ္ထတော သမာနံ) ဝုတ္တံ။

အဓိဋ္ဌိတစီဝရေ အဓိဋ္ဌာနေ ဝေမတိကေန အတ္တနော ဝိမတိံ ပဌမံ အာဝိ ကတွာ ‘‘သစေ အနဓိဋ္ဌိတံ၊ ဧဝံ ကတေ ကပ္ပိယံ ဟောတီ’’တိ စိန္တေတွာ နိဿဇ္ဇေတွာ ဝိနယကမ္မံ ကရောန္တဿ မုသာဝါဒဒေါသော နာပဇ္ဇတိ။ ယထာဟ အဋ္ဌကထာယံ ‘‘န ဟိ ဧဝံ ဇာနာပေတွာ ဝိနယကမ္မံ ကရောန္တဿ မုသာဝါဒေါ ဟောတီ’’တိ (ပါရာ။ အဋ္ဌ။ ၂။၄၆၉)။ ‘‘ကေစိ ‘တထာ ဝေမတိကစီဝရံ အညေန ¶ ဝိဿာသေန ဂဟေတွာ ပုန ဒါတဗ္ဗ’န္တိ ဝဒန္တိ၊ တံ န သုန္ဒရ’’န္တိ (ပါရာ။ အဋ္ဌ။ ၂။၄၆၉ ထောကံ ဝိသဒိသံ) တတ္ထေဝ ဝုတ္တံ။

ဝိနဿတီတိ စောရာဒီဟိ ဝိနဿတိ။ ‘‘နဿတိ၊ ဍယှတိ၊ အစ္ဆိန္ဒိတွာ ဂဏှန္တီ’’တိ ဣမာနိပိ ¶ ဝိနာသပ္ပကာရတ္တာ ‘‘ဝိနဿတီ’’တိ ဣမိနာဝ သင်္ဂယှန္တိ။ တတ္ထ ‘‘နဿတီ’’တိ ဣဒံ စောရာဒီဟိ ဟဋံ သန္ဓာယ ဝုတ္တံ၊ ‘‘ဝိနဿတီ’’တိ ဣဒံ ဥန္ဒူရခါယိတာဒိံ သန္ဓာယ ဝုတ္တံ၊ ‘‘ဍယှတီ’’တိ အဂ္ဂိနာ ဒဍ္ဎံ သန္ဓာယ။ ဝိဿာသေတိ ဧတ္ထ သန္ဒိဋ္ဌော စ သမ္ဘတ္တော စ အာလပိတော စ ဇီဝတိ စ ဂဟိတေ စတ္တမနော ဟောတီတိ ပဉ္စင်္ဂသမန္နာဂတေန အတ္တနိ ဝိဿာသေန အညေန ဂဟိတေတိ အတ္ထော။ ပကာသိတာတိ ‘‘အနာပတ္တိ အန္တောဒသာဟံ အဓိဋ္ဌေတီ’’တိအာဒိနာ (ပါရာ။ ၄၆၉) နယေန ဝုတ္တာ။

၆၀၁။ ဣဒံ ပန သမုဋ္ဌာနံ နာမေန ကထိနသမုဋ္ဌာနံ နာမာတိ အတ္ထော။ ဣဒံ ကထိနသမုဋ္ဌာနံ နာမ ကာယဝါစတော စ ကာယဝါစာစိတ္တတော စ သမုဋ္ဌာတိ။ အတိရေကစီဝရဘာဝဿ ဇာနနစိတ္တေန ပဏ္ဏတ္တိဇာနနစိတ္တေ အသတိပိ အာပတ္တိသမ္ဘဝတော အစိတ္တံ။ အနဓိဋ္ဌာနတော၊ အဝိကပ္ပနတော စ အကြိယံ။ ကမ္မဋ္ဌာနမနုယုဉ္ဇန္တော ဝါ စေတိယာဒိံ ဝန္ဒန္တော ဝါ ဧကာဒသမံ အရုဏံ ဥဋ္ဌာပေတိ၊ ကုသလစိတ္တော အာပဇ္ဇတိ၊ ကလဟာဒိပသုတော ဝါ ဝီတိက္ကမံ ဇာနန္တော ဝါ ဥဋ္ဌာပေတိ၊ အကုသလစိတ္တော အာပဇ္ဇတိ၊ ခီဏာသဝေါ ပန အသတိယာ ဝါ ပဏ္ဏတ္တိံ အဇာနန္တော ဝါ တထာ ကရောန္တော အဗျာကတစိတ္တော အာပဇ္ဇတီတိ တိစိတ္တံ။ ဝုတ္တနယေန ကမ္မဋ္ဌာနာဒိမနုယုဉ္ဇန္တဿ သောမနဿစိတ္တသမင်္ဂိနော သုခဝေဒနာ၊ ဥပေက္ခာစိတ္တသမင်္ဂိနော ဥပေက္ခာဝေဒနာ၊ ကလဟာဒိပသုတဿ ဒေါမနဿစိတ္တသမင်္ဂိနော ဒုက္ခဝေဒနာ ဟောတီတိ တိဝေဒနံ။ ဧသ နယော ဥပရိပိ ဧဝရူပေ ဌာနေ ယောဇေတဗ္ဗော။

ပဌမကထိနကထာဝဏ္ဏနာ။

၆၀၂။ ဂါမာဒီသု ¶ ပဒေသေသု တိပဉ္စသူတိ တိစီဝရာနိ နိက္ခိပိတွာ ဝိပ္ပဝါသေန ဒေါသံ၊ ဥပ္ပဇ္ဇနဋ္ဌာနဉ္စ ဒဿေတုံ ‘‘ဂါမော ဧကူပစာရော’’တိအာဒိနာ (ပါရာ။ ၄၇၇) နယေန ပါဠိယံ ဝုတ္တဂါမနိဝေသနဥဒေါသိတအဋ္ဋမာဠပါသာဒဟမ္မိယနာဝါသတ္ထခေတ္တဓညကရ- ဏအာရာမဝိဟာရရုက္ခမူလအဇ္ဈောကာသသင်္ခါတေသု ပန္နရသသု စီဝရနိက္ခေပဋ္ဌာနေသူတိ ဝုတ္တံ ဟောတိ။ ဧတ္ထ ဂါမော နာမ ဧကကုဋိကာဒိဂါမော။

နိဝေသနံ နာမ ဂါမတော ဗဟိ စတုသာလာဒိကော ဂေဟော။ တေနာဟ ဂဏ္ဌိပဒေ ‘‘ဂါမနိဝေသနာနံ ဝိသေသံ ဝဒန္တာ ‘ပုန ဧကပရိစ္ဆေဒံ ကတွာ နိဝေသိတာ ဗဟုဂေဟာ နိဝေသနံ နာမ ဟောန္တီ’တိ ဝဒန္တိ၊ တသ္မာ ဣဒံ နိဝေသနာဒိ သဗ္ဗံ ‘ဂါမတော ဗဟီ’တိ ဂဟေတဗ္ဗ’’န္တိ။ ဣဒဉ္စ တတ္ထေဝ ဝုတ္တံ ‘‘နိဝေသနာဒိကံ ¶ အန္တောဂါမေ စေ ဟောတိ၊ ဂါမေ ဝုတ္တပရိဟာရဿေဝ လဗ္ဘနတော အန္တောဂါမတော ဗဟီ’တိ ဂဟေတဗ္ဗ’’န္တိ။

အဋ္ဌကထာယံ ‘‘ဥဒေါသိတောတိ ယာနာဒီနံ ဘဏ္ဍာနံ သာလာ’’တိ (ပါရာ။ အဋ္ဌ။ ၂။၄၈၂-၄၈၇) ဝုတ္တသရူပံ ဥဒေါသိတံ နာမ။ ‘‘အဋ္ဋောတိ ပဋိရာဇာဒိပဋိဗာဟနတ္ထံ ဣဋ္ဌကာဟိ ကတော ဗဟလဘိတ္တိကော စတုပဉ္စဘူမိကော ပတိဿယဝိသေသော’’တိ (ပါရာ။ အဋ္ဌ။ ၂။၄၈၂-၄၈၇) ဝုတ္တသရူပေါ အဋ္ဋော နာမ။ ‘‘မာဠောတိ ဧကကူဋသင်္ဂဟိတော စတုရဿပါသာဒေါ’’တိ (ပါရာ။ အဋ္ဌ။ ၄၈၂-၄၈၇) ဝုတ္တော ဧကကဏ္ဏိကသင်္ဂဟိတော စတုရဿဂေဟော မာဠော နာမ။ ပါသာဒေါတိ ဒီဃပါသာဒေါ။ ဟမ္မိယန္တိ မုဏ္ဍစ္ဆဒနပါသာဒေါ။ နာဝါတိ ယာနပ္ပတ္တိ။ သတ္ထန္တိ ဇင်္ဃသတ္ထသကဋသတ္ထဝသေန ဒုဝိဓော ဇနသမူဟော၊ သော စ နိဝိဋ္ဌာနိဝိဋ္ဌဝသေန ပစ္စေကံ ဒုဝိဓော။ တတ္ထ နိဝိဋ္ဌေ ဝတိအာဒိပရိက္ခေပေါပိ ဟောတေဝ။

ခေတ္တန္တိ ¶ ယဝခေတ္တာဒိခေတ္တံ။ ဓညကရဏံ ခလံ။ အာရာမော ပုပ္ဖာရာမော၊ ဖလာရာမော စ။ ဝိဟာရောတိ ဧကမ္ပိ သေနာသနံ ဝုစ္စတိ။ ‘‘ရုက္ခော နာမ ယံ မဇ္ဈန္တိကေ ကာလေ သမန္တာ ဆာယာ ဖရတီ’’တိ (ပါရာ။ ၄၉၄) ဝုတ္တပ္ပမာဏပရိစ္ဆန္နော ရုက္ခော။ အဇ္ဈောကာသော နာမ သတ္တဗ္ဘန္တရော၊ သော ဝိဉ္စာဋဝိအာဒိအဂါမကာရညေ စ မစ္ဆဗန္ဓာနံ အဂမနပထေ သမုဒ္ဒဒီပေ စ လဗ္ဘတိ။ မစ္ဆဗန္ဓာနံ အဂမနပထော နာမ ဥဒကပိဋ္ဌိယာ ဂန္တွာ ပုန တဒဟေဝ ဂေဟံ အာဂန္တုံ အသက္ကုဏေယျတာယ ဒူရော သမုဒ္ဒပ္ပဒေသော ဝုစ္စတိ။

အယံ ဂါမာဒိကော ပစ္စေကံ ဧကူပစာရော၊ နာနူပစာရောတိ ဒုဝိဓော။ တတ္ထ အဇ္ဈောကာသံ ဝိနာ ဂါမာဒိကော တံတံရာဇာဒိသာမိကကုလာနံ ဧကတ္ထနာနတ္ထဝသေန ဧကကုလသန္တကော စေ ဟောတိ၊ ဧကူပစာရော။ နာနာကုလသန္တကော စေ၊ နာနူပစာရော ဟောတိ။ ဝုတ္တဉှေတံ ‘‘ဂါမော ဧကူပစာရော နာမ ဧကကုလဿ ဂါမော ဟောတီ’’တိအာဒိ (ပါရာ။ ၄၇၈)။ အဋ္ဌကထာယမ္ပိ ဝုတ္တံ ‘‘ဧကကုလဿ ဂါမောတိ ဧကဿ ရညော ဝါ ဘောဇကဿ ဝါ ဂါမော’’တိ စ ‘‘နာနာကုလဿ ဂါမောတိ နာနာရာဇူနံ ဝါ ဘောဇကာနံ ဝါ ဂါမော ဝေသာလီကုသိနာရာဒိသဒိသော’’တိ (ပါရာ။ အဋ္ဌ။ ၂။၄၇၉) စ။

ဧကကုလေန ကာရာပိတော ဝိဟာရော ဧကူပစာရော၊ နာနာကုလေဟိ ကာရာပိတော နာနူပစာရော ဟောတိ။ ယထာဟ ဂဏ္ဌိပဒေ ‘‘ဝိဟာရေ ဧကကုလနာနာကုလဝေါဟာရော ကာရာပကာနံ ဝသေန ဝုတ္တော’’တိ။ အဇ္ဈောကာသေ ပန ¶ ဥပစာရဘေဒေါ အဗ္ဘန္တရဝသေန ဝေဒိတဗ္ဗော။ ဝုတ္တဉ္စေတံ ပါဠိယံ ‘‘အဇ္ဈောကာသော ဧကူပစာရော နာမ အဂါမကေ အရညေ သမန္တာ သတ္တဗ္ဘန္တရာ ဧကူပစာရော။ တတော ပရံ နာနူပစာရော’’တိ။ ဣဓ ဧကံ အဗ္ဘန္တရံ အဋ္ဌဝီသတိရတနံ ဟောတိ။ ယထာဟ ¶ အဋ္ဌကထာယံ ‘‘ဧကံ အဗ္ဘန္တရံ အဋ္ဌဝီသတိဟတ္ထ’’န္တိ (ပါရာ။ အဋ္ဌ။ ၂။၄၈၉)။ ဧဝံ သင်္ခေပတော ဝုတ္တသရူပပ္ပဘေဒါနိ ပန္နရသ ဌာနာနိ ဒဿေတုမာဟ ‘‘ဂါမာဒီသု ပဒေသေသု တိပဉ္စသူ’’တိ။ အယမေတ္ထ သင်္ခေပေါ၊ ဝိတ္ထာရော ပန ပါဠိအဋ္ဌကထာဝဏ္ဏနတော ဝေဒိတဗ္ဗော။

‘‘တိစီဝရေန ဝိပ္ပဝါသေယျာတိ သင်္ဃာဋိယာ ဝါ ဥတ္တရာသင်္ဂေန ဝါ အန္တရဝါသကေန ဝါ။ အန္တောဂါမေ စီဝရံ နိက္ခိပိတွာ’’တိ (ပါရာ။ ၄၇၆၊ ၄၇၈) ဝစနတော ဧတ္ထ တိစီဝရန္တိ တိဏ္ဏံ စီဝရာနမညတရမေဝ စီဝရံ ဝတ္တဗ္ဗံ။ ဧကရတ္တန္တိ ဝိပ္ပဝါသကိရိယာယ အစ္စန္တသံယောဂေ ဥပယောဂဝစနံ။ အပိ-သဒ္ဒေန ကိံ ပန ဒိရတ္တာဒိကန္တိ ဒဿေတိ။

သင်္ဃသမ္မုတိယာ ဝိနာတိ တိစီဝရံ ပရိဟရိတုံ အသမတ္ထေန ဂိလာနေန ဘိက္ခုနာ သင်္ဃံ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂယှ ‘‘အဟံ ဘန္တေ ဂိလာနော၊ န သက္ကောမိ တိစီဝရံ အာဒါယ ပက္ကမိတုံ၊ သောဟံ ဘန္တေ သင်္ဃံ တိစီဝရေန အဝိပ္ပဝါသသမ္မုတိံ ယာစာမီ’’တိ တိက္ခတ္တုံ ယာစိတေန သင်္ဃေန တဿ ဉတ္တိဒုတိယာယ ကမ္မဝါစာယ ဒိန္နံ အဝိပ္ပဝါသသမ္မုတိံ ဝိနာတိ ဝုတ္တံ ဟောတိ။ တထာ လဒ္ဓသမ္မုတိကဿ ဂိလာနဿ ဘိက္ခုနော တသ္မိံ ဂေလညေ အဝူပသန္တေ ဝါ ဝူပသန္တေပိ စီဝရနိက္ခေပဋ္ဌာနံ အာဂမနကာလေ ဝါ ဥပ္ပန္နေ အညေပိ ရောဂေ အဝူပသန္တေ တာယယေဝ သမ္မုတိယာ န ဒေါသော။

၆၀၃။ ဘိက္ခုနောတိ အလဒ္ဓသမ္မုတိကဿ ဘိက္ခုနော။ တေန စီဝရေန။ ဝိပ္ပဝတ္ထုံ န ဝဋ္ဋတီတိ ဝိနာ ဝသိတုံ န ဝဋ္ဋတိ။ ကိံ ဝုတ္တံ ဟောတိ? ‘‘ဧကကုလဿ ဂါမော ဟောတိ ပရိက္ခိတ္တော စ၊ အန္တောဂါမေ စီဝရံ နိက္ခိပိတွာ အန္တောဂါမေ ဝတ္ထဗ္ဗံ။ အပရိက္ခိတ္တော ဟောတိ၊ ယသ္မိံ ဃရေ စီဝရံ နိက္ခိတ္တံ ဟောတိ၊ တသ္မိံ ဃရေ ဝတ္ထဗ္ဗံ၊ ဟတ္ထပါသာ ဝါ န ဝိဇဟိတဗ္ဗံ။ နာနာကုလဿ ¶ ဂါမော ဟောတိ ပရိက္ခိတ္တော စ၊ ယသ္မိံ ဃရေ စီဝရံ နိက္ခိတ္တံ ဟောတိ၊ တသ္မိံ ဃရေ ဝတ္ထဗ္ဗံ သဘာယေ ဝါ ဒွါရမူလေ ဝါ၊ ဟတ္ထပါသာ ဝါ န ဝိဇဟိတဗ္ဗ’’န္တိအာဒိနာ (ပါရာ။ ၄၇၈) နယေန ပါဠိယာ ဝုတ္တဋ္ဌာနတော ဗဟိ အရုဏံ ဥဋ္ဌာပေတုံ န ဝဋ္ဋတီတိ ဝုတ္တံ ဟောတိ။

ဣမသ္မိံ ¶ ပါဌေ ‘‘ပရိက္ခိတ္တော’’တိ ဣဒံ ပါကာရေန ဝါ ဝတိယာ ဝါ ပရိခါယ ဝါ ပရိက္ခိတ္တံ သန္ဓာယ ဝုတ္တံ။ ဟတ္ထပါသာ ဝါတိ ဧတ္ထ ဟတ္ထပါသာ နာမ အဍ္ဎတိယရတနံ ဟောတိ။ ယထာဟ အဋ္ဌကထာယံ ‘‘တံ ဃရံ သမန္တတော ဟတ္ထပါသာ န ဝိဇဟိတဗ္ဗံ၊ အဍ္ဎတေယျရတနပ္ပမာဏာ ပဒေသာ ဥဒ္ဓံ န ဝိဇဟိတဗ္ဗန္တိ ဝုတ္တံ ဟောတီ’’တိ (ပါရာ။ အဋ္ဌ။ ၂။၄၇၇-၄၇၈)။

ဝိပ္ပဝသန္တဿ ကော ဒေါသောတိ အာဟ ‘‘ဟောတိ…ပေ… အရုဏုဂ္ဂမေ’’တိ။ အနုညာတဋ္ဌာနတော ဟိ ဗဟိ စီဝရေန ဝိနာ အရုဏံ ဥဋ္ဌာပေန္တဿ တံ စီဝရံ နိဿဇ္ဇိတဗ္ဗံ ဟောတိ၊ တံဟေတုကာ ပါစိတ္တိယာပတ္တိပိ ဟောတီတိ အတ္ထော။ တေနေဝ ဝက္ခတိ ‘‘နိဿဇ္ဇိတွာ…ပေ… ဝိညုနာ’’တိ။

၆၀၄။ နှာယန္တဿေဝါတိ စီဝရဿ ဟတ္ထပါသတော ဒူရေ နဟာယန္တဿေဝ၊ အနာဒရေ သာမိဝစနံ။

၆၀၆။ အစ္ဆိန္နံ ဝိလုတ္တံ စီဝရံ ယဿ သော အစ္ဆိန္နစီဝရော၊ ဘိက္ခု၊ တဿ ဌာနံ အစ္ဆိန္နစီဝရဋ္ဌာနံ၊ တသ္မိံ။

၆၀၇။ နိဝါသေတွာတိ ဧတ္ထ ‘‘အန္တရဝါသက’’န္တိ စ ဂဟေတွာတိ ဧတ္ထ ‘‘ဣတရာနီ’’တိ စ သေသော။ ဣဒဉ္စ ဂန္တဗ္ဗဋ္ဌာနေ၊ အာသန္နေ မဂ္ဂေ စ မနုဿသမ္ဗာဓေ အသတိ ကတ္တဗ္ဗဒဿနံ။ ဣတရတ္ထ နိဝါသေတွာ၊ ပါရုပိတွာ စ သင်္ဃာဋိံ အံသေ ကတွာဝ ဂန္တဗ္ဗံ ဟောတိ။ ဝိဟာရေ သဘာဂေသု အလဗ္ဘမာနေသု အာသနသာလမ္ပိ ဂန္တွာ သဘာဂဿ သန္တိကေ ဝိနယကမ္မံ ကတ္တဗ္ဗန္တိ ¶ အဋ္ဌကထာယံ (ပါရာ။ အဋ္ဌ။ ၂။၄၉၅ အတ္ထတော သမာနံ) ဝုတ္တံ။ ‘‘နိဿဇ္ဇိတွာ’’တိ ဣမိနာ ‘‘ဣဒံ မေ ဘန္တေ စီဝရံ ရတ္တိဝိပ္ပဝုတ္ထံ အညတြ ဘိက္ခုသမ္မုတိယာ နိဿဂ္ဂိယံ၊ ဣမာဟံ သင်္ဃဿ နိဿဇ္ဇာမီ’’တိ သင်္ဃေ ဝါ ‘‘ဣဒံ မေ ဘန္တေ စီဝရံ…ပေ… အဟံ အာယသ္မန္တာနံ နိဿဇ္ဇာမီ’’တိ တိဏ္ဏံ၊ ဒွိန္နံ ဝါ သန္တိကေ ဝါ ‘‘ဣဒံ မေ အာဝုသော…ပေ… ဣမာဟံ အာယသ္မတော နိဿဇ္ဇာမီ’’တိ ဧကဿ သန္တိကေ ဝါ ဝတွာ နိဿဇ္ဇိတွာတိ ဝုတ္တံ ဟောတိ။ ဝိညုနာတိ ဧဝံ နိဿဂ္ဂိယဝတ္ထုနိဿဇ္ဇနာဒိနာနပ္ပကာရဝိဓိဇာနနကေန ဉာဏဝတာတိ အတ္ထော။

၆၀၈။ တံ နိဿဂ္ဂိယစီဝရံ။

၆၀၉။ ‘‘အဒေန္တဿ စ နိဿဋ္ဌံ ဒုက္ကဋ’’န္တိ ဣမိနာ ‘‘ဗျတ္တေန ဘိက္ခုနာ ပဋိဗလေန အာပတ္တိ ¶ ပဋိဂ္ဂဟေတဗ္ဗာ၊ နိဿဋ္ဌစီဝရံ ဒါတဗ္ဗ’’န္တိ ဝုတ္တတ္တာ ဣမံ ဝိဓိံ ဇာနနတာယ ဗျတ္တေန ယထာဝိဓိံ ကာတုံ သမတ္ထတာယ ပဋိဗလေန ခန္ဓကေ (စူဠဝ။ ၂၃၉) အာဂတနယေန အာပတ္တိံ ပဋိဂ္ဂဟေတွာ နိဿဋ္ဌစီဝရံ ဟတ္ထေန ဂဟေတွာ နိသီဒါပေတွာ သစေ သင်္ဃော ဟောတိ၊ ‘‘သုဏာတု မေ ဘန္တေ သင်္ဃော၊ ဣဒံ စီဝရံ ဣတ္ထန္နာမဿ ဘိက္ခုနော နိဿဂ္ဂိယံ သင်္ဃဿ နိဿဋ္ဌံ၊ ယဒိ သင်္ဃဿ ပတ္တကလ္လံ၊ သင်္ဃော ဣမံ စီဝရံ ဣတ္ထန္နာမဿ ဘိက္ခုနော ဒဒေယျာ’’တိ၊ သစေ တယော ဟောန္တိ၊ ‘‘သုဏန္တု မေ အာယသ္မန္တာ၊ ဣဒံ စီဝရံ ဣတ္ထန္နာမဿ ဘိက္ခုနော နိဿဂ္ဂိယံ အာယသ္မန္တာနံ နိဿဋ္ဌံ၊ ယဒါယသ္မန္တာနံ ပတ္တကလ္လံ၊ အာယသ္မန္တာ ဣမံ စီဝရံ ဣတ္ထန္နာမဿ ဘိက္ခုနော ဒဒေယျု’’န္တိ၊ သစေ ဧကကော ဟောတိ၊ ‘‘ဣမံ စီဝရံ အာယသ္မတော ဒမ္မီ’’တိ ဒါတဗ္ဗံ၊ နိဿဋ္ဌစီဝရံ ‘‘အတ္တနောယေဝ ဒိန္န’’န္တိ သုဒ္ဓသညာယ ဂဟေတွာ အဒေန္တဿ ဒုက္ကဋံ ဟောတီတိ ဝုတ္တံ ဟောတိ။

တဿ သန္တကဘာဝံ ဉတွာ လေသေန ဝိလုမ္ပန္တဿ ပန ဘဏ္ဍဂ္ဃဝသေန ဒုက္ကဋထုလ္လစ္စယပါရာဇိကာပတ္တိယော ဟောန္တိ။ ယထာဟ ¶ အဋ္ဌကထာယံ ‘‘တဿ သန္တကဘာဝံ ပန ဉတွာ လေသေန အစ္ဆိန္ဒန္တော ဘဏ္ဍံ အဂ္ဃာပေတွာ ကာရေတဗ္ဗော’’တိ (ပါရာ။ အဋ္ဌ။ ၂။၄၆၉)။ ပရိယာပုတန္တိ ‘‘န ဘိက္ခဝေ နိဿဋ္ဌစီဝရံ န ဒါတဗ္ဗံ၊ ယော န ဒဒေယျ၊ အာပတ္တိ ဒုက္ကဋဿာ’’တိ (ပါရာ။ ၄၇၀) ပါဠိယံ ဝုတ္တန္တိ အတ္ထော။

၆၁၀-၁။ ထေရေ ဒဟရေ စာတိ ဧတေသု ဥဘောသုပိ မဂ္ဂံ ဂစ္ဆန္တေသူတိ ယောဇနာ။ ‘‘ထေရေ’’တိ ဣမိနာ အနိဿိတဘာဝမာဟ၊ ‘‘ဒဟရေ စာ’’တိ ဣမိနာ နိဿိတဘာဝံ။ ဩဟီနေတိ ဩသက္ကိတေ။ သစေ သော ထေရော နိဿယာစရိယော ဘဝေယျာတိ အဓိပ္ပာယေနာဟ ‘‘ဂရု’’န္တိ။ တသ္မိံ ဒဟရေ။ ဝတ္ထန္တိ တဿ ဟတ္ထေ ဌိတစီဝရံ။ န ပဿမ္ဘတီတိ ဓုရနိက္ခေပံ အကတွာ ဂမနေ သဥဿာဟတ္တာ နိဿယပဋိပ္ပဿဒ္ဓိ န ဟောတီတိ အဓိပ္ပာယော။ တေနေဝ ‘‘မုဟုတ္တ’’န္တိအာဒိမာဟ။

၆၁၄။ ပစ္စုဒ္ဓါရေ အန္တောယေဝါရုဏေတိ ဣမိနာ သမ္ဗန္ဓော၊ ဒဟရဘိက္ခုနော ဒူရဘာဝဉ္စ အရုဏုဂ္ဂမနဉ္စ ဉတွာ စီဝရဿ အနိဿဂ္ဂိယတ္ထံ တဿ ဟတ္ထေ ဌိတဘာဝံ သလ္လက္ခေတွာ ပုရာရုဏာ ပစ္စုဒ္ဓရေတိ အတ္ထော။ ဝိဿဇ္ဇေတီတိ အညဿ ဒေတိ။ ဝိနဿတီတိ စောရာဒီဟိ နဿတိ။

ဒုတိယကထိနကထာဝဏ္ဏနာ။

၆၁၆။ အကာလစီဝရန္တိ ¶ ‘‘အကာလစီဝရံ နာမ အနတ္ထတေ ကထိနေ ဧကာဒသမာသေ ဥပ္ပန္နံ၊ အတ္ထတေ ကထိနေ သတ္တမာသေ ဥပ္ပန္နံ၊ ကာလေပိ အာဒိဿ ဒိန္န’’န္တိ (ပါရာ။ ၅၀၀) ဝစနတော အနတ္ထတကထိနေ ဝိဟာရေ ‘‘စီဝရမာသော’’တိ ယော ပုဗ္ဗကတ္တိကကာဠပက္ခပါဋိပဒတော ပဋ္ဌာယ ယာဝ အပရကတ္တိကပုဏ္ဏမီ၊ တာဝ မာသော ဝုစ္စတိ၊ တတော ပရေသု ဧကာဒသသု မာသေသု ¶ ဥပ္ပန္နဉ္စ အတ္ထတကထိနေ ဝိဟာရေ ယော စီဝရမာသော၊ ဟေမန္တာ စ စတ္တာရော မာသာတိ ပဉ္စမာသတော ဗဟိ သတ္တသု မာသေသု ဥပ္ပန္နဉ္စ အတ္ထတကထိနေ ပဉ္စ မာသာ ယထာပရိစ္ဆိန္နကာလေ သင်္ဃဿ စ ‘‘ဣဒံ အကာလစီဝရံ ဒမ္မီ’’တိ ပုဂ္ဂလဿ စ ‘‘ဣဒံ တုယှံ ဒမ္မီ’’တိ ဒိန္နဉ္စေတိ ဣဒံ အကာလစီဝရန္တိ အတ္ထော။ ‘‘ဥပ္ပန္န’’န္တိ သေသော၊ ‘‘ဥပ္ပဇ္ဇေယျ သင်္ဃတော ဝါ ဂဏတော ဝါ ဉာတိတော ဝါ မိတ္တတော ဝါ ပံသုကူလတော ဝါ အတ္တနော ဝါ ဓနေနာ’’တိ (ပါရာ။ ၅၀၀) ဝစနတော သင်္ဃဿ ဝါ ‘‘ဣဒံ သုတ္တန္တိကဂဏဿ ဒေမ၊ ဣဒံ အာဘိဓမ္မိကဂဏဿ ဒေမာ’’တိအာဒိနာ နယေန ဂဏဿ ဝါ ဒိန္နတော အတ္တနော ဝဿဂ္ဂေန ဝါ ဉာတိအာဒိတော ဝါ သုသာနာဒိပံသုကူလခေတ္တတော ဝါ အတ္တနော သန္တကေန သုတ္တကပ္ပာသာဒိကပ္ပိယဝတ္ထုတော ဝါ ဥပ္ပန္နစီဝရန္တိ အတ္ထော။

မာသပရမံ နိက္ခိပေတိ မာသော ပရမံ ပမာဏံ ဧတဿ နိက္ခိပနဿာတိ မာသပရမံ၊ နိက္ခိပနန္တိ ကိရိယာဝိသေသနံ ကာတဗ္ဗံ၊ မာသပရမံ နိက္ခိပနံ ကရေယျာတိ ဝုတ္တံ ဟောတိ။ ‘‘အာကင်္ခမာနေန ဘိက္ခုနာ ပဋိဂ္ဂဟေတဗ္ဗံ၊ ပဋိဂ္ဂဟေတွာ ခိပ္ပမေဝ ကာရေတဗ္ဗံ၊ နော စဿ ပါရိပူရီ၊ မာသပရမံ တေန ဘိက္ခုနာ တံ စီဝရံ နိက္ခိပိတဗ္ဗံ ဦနဿ ပါရိပူရိယာ’’တိ (ပါရာ။ ၅၀၀) ဝစနတော ဧဝံ ဥပ္ပန္နံ စီဝရံ ဣစ္ဆန္တေန ပဋိဂ္ဂဟေတွာ သစေ ပဟောတိ၊ ဒသာဟမနတိက္ကာမေတွာ ကာရေတဗ္ဗံ။ သစေ နပ္ပဟောတိ၊ ဦနဿ ပရိပူရဏတ္ထံ မာသပရမံ ဌပေတဗ္ဗန္တိ အတ္ထော။

ကဒါ ဧဝံ နိက္ခိပိတဗ္ဗန္တိ အာဟ ‘‘သတိ ပစ္စာသာယာ’’တိ၊ ‘‘ပစ္စာသာ ဟောတိ သင်္ဃတော ဝါ ဂဏတော ဝါ ဉာတိတော ဝါ မိတ္တတော ဝါ ပံသုကူလတော ဝါ အတ္တနော ဝါ ဓနေနာ’’တိ (ပါရာ။ ၅၀၀) ဝုတ္တသင်္ဃာဒိတော အတ္တနော ဝဿဂ္ဂါဒိတော လဘေယျ၊ တေန ‘‘ဣမဿ ဦနေ ပရိပုဏ္ဏေ ကာရေဿာမီ’’တိ ပစ္စာသာယ သတိ ဧဝံ နိက္ခိပိတဗ္ဗန္တိ အတ္ထော။ တတော ဥဒ္ဓံဌပေတုံ ¶ န ဝဋ္ဋတီတိ မာသတော အတိရေကကာလံ နိက္ခိပိတုံ န ဝဋ္ဋတိ၊ နိဿဂ္ဂိယပါစိတ္တိယံ ဟောတီတိ အတ္ထော။

ယဒိ ဧဝံ ‘‘တဒဟုပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ၊ ဒသာဟာ ကာရေတဗ္ဗံ…ပေ… ဝီသေ ¶ ဥပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ၊ ဒသာဟာ ကာရေတဗ္ဗ’’န္တိ (ပါရာ။ ၅၀၀) ကသ္မာ အာဟာတိ? ပစ္စာသာစီဝရဿ ဒသဒိဝသေ အတိက္ကမ္မ ဌပေတုံ အယုတ္တတ္တာ၊ မူလစီဝရဿ တဂ္ဂတိကတ္တာ ဧဝံ ဝုတ္တံ။ ယထာဟ အဋ္ဌကထာယံ ‘‘မူလစီဝရဿ ဥပ္ပန္နဒိဝသတော ယာဝ ဝီသတိမော ဒိဝသော၊ တာဝ ဥပ္ပန္နံ ပစ္စာသာစီဝရံ မူလစီဝရံ အတ္တနော ဂတိကံ ကရောတီ’’တိ (ပါရာ။ အဋ္ဌ။ ၂။၅၀၀)။

တတိယကထိနကထာဝဏ္ဏနာ။

၆၁၈-၉။ ဘိက္ခုနိယာ ယော ဓောဝါပေတီတိ သမ္ဗန္ဓော။ ‘‘ဘိက္ခုနီ နာမ ဥဘတောသင်္ဃေ ဥပသမ္ပန္နာ’’တိ (ပါရာ။ ၅၀၀) ဝစနတော ဘိက္ခုနိသင်္ဃေ ဉတ္တိစတုတ္ထာယ ကမ္မဝါစာယ၊ ဘိက္ခုသင်္ဃေ ဉတ္တိစတုတ္ထာယ ကမ္မဝါစာယာတိ အဋ္ဌဝါစိကာယ ဥပသမ္ပန္နာ ဘိက္ခုနီ နာမ။ ဘုတ္တန္တိ ဘိက္ခုနာ အတ္တနာ ပရိဘုတ္တံ ရဇိတံ အာဒိန္နကပ္ပံ၊ ‘‘ပရိဘောဂံ ကရိဿာမီ’’တိ အန္တမသော သီသံ ဌပေတွာ သယနမတ္တေနာပိ ပုရာဏဘူတံ စီဝရန္တိ အတ္ထော။ ယထာဟ အဋ္ဌကထာယံ ‘‘ရဇိတွာ ကပ္ပံ ကတွာ ဧကဝါရမ္ပိ နိဝတ္ထံ ဝါ ပါရုတံ ဝါ အန္တမသော ပရိဘောဂသီသေန အံသေ ဝါ မတ္ထကေ ဝါ ကတွာ မဂ္ဂံ ဂတော ဟောတိ၊ ဥဿီသကံ ဝါ ကတွာ နိပန္နော ဟောတိ၊ ဧတမ္ပိ ပုရာဏစီဝရမေဝါ’’တိ (ပါရာ။ အဋ္ဌ။ ၂။၅၀၃-၅၀၅)။ ဝတ္ထန္တိ ကာရိယေ ကာရဏောပစာရဝသေန စီဝရမေဝ အာဟ။

အညာတိကာယာတိ ‘‘အညာတိကာ နာမ မာတိတော ဝါ ပိတိတော ဝါ ယာဝ သတ္တမာ ပိတာမဟယုဂါ အသမ္ဗဒ္ဓါ’’တိ ဝစနတော ¶ အတ္တနော ဝါ တဿာ ဝါ မာတု ဝါ ပိတု ဝါ ပရမ္ပရာယ ယာဝ သတ္တမာ ယုဂါ၊ ဧတ္ထန္တရေ ယေန ကေနစိ ဉာတကေန အသမ္ဗဒ္ဓဘာဝေန အညာတိကာယာတိ အတ္ထော။ ယထာ စာဟ အဋ္ဌကထာယံ ‘‘ပိတာမဟောယေဝ ပိတာမဟယုဂံ။ တတော ဥဒ္ဓံ သဗ္ဗေပိ ပုဗ္ဗပုရိသာ ပိတာမဟဂ္ဂဟဏေနေဝ ဂဟိတာ။ ဧဝံ ယာဝ သတ္တမော ပုရိသော၊ တာဝ ယာ အသမ္ဗဒ္ဓါ’’တိ (ပါရာ။ အဋ္ဌ။ ၂။၅၀၃-၅၀၅)။ အာကောဋာပေတီတိ ပဟရာပေတိ။

တတော ဓောဝါပနာဒိတော။ နိဿဂ္ဂိယာပတ္တီတိ နိဿဂ္ဂိယဿ အာပတ္တိ နိဿဂ္ဂိယာပတ္တိ၊ နိဿဂ္ဂိယဿ စီဝရဿ နာမေန ဝိသိဋ္ဌာ ပါစိတ္တိယာပတ္တိ ဟောတီတိ အတ္ထော။ ဣဒဉ္စ တိဏ္ဏံ ပယောဂါနံ အန္တေ အာပဇ္ဇိတဗ္ဗာယ အာပတ္တိယာ ဒဿနံ။ တဿ နိယောဂေန ဓောဝနာဒိံ ကရောန္တိယာ ဘိက္ခုနိယာ တဒတ္ထံ သဗ္ဗပုဗ္ဗပယောဂဂဏနာယ ဘိက္ခုနော ဒုက္ကဋံ ဟောတီတိ ဂဟေတဗ္ဗော။ ယထာဟ အဋ္ဌကထာယံ ‘‘ယာဝ နံ ဓောဝိတွာ ဥက္ခိပတိ၊ တာဝ ဘိက္ခုနိယာ ပယောဂေ ပယောဂေ ဘိက္ခုဿ ဒုက္ကဋ’’န္တိ ¶ (ပါရာ။ အဋ္ဌ။ ၂။၅၀၃-၅၀၅)။ ပဌမေနာတိ တီဏိပိ ကာရာပေန္တဿ ယံ ပဌမံ ကာရာပေတိ၊ တေနာတိ အတ္ထော။ ဒီပိတန္တိ ‘‘အညာတိကာယ အညာတိကသညီ ပုရာဏစီဝရံ ဓောဝါပေတိ ရဇာပေတိ အာကောဋာပေတိ၊ နိဿဂ္ဂိယေန အာပတ္တိ ဒွိန္နံ ဒုက္ကဋာန’’န္တိအာဒိနာ (ပါရာ။ ၅၀၆) ဒေသိတံ။ ဣမိနာ နယေန ဒွေ ကာရာပေန္တဿ ပဌမေန နိဿဂ္ဂိယာပတ္တိ၊ ဒုတိယေန ဒုက္ကဋန္တိ အယမတ္ထော သင်္ဂယှတိ။

၆၂၀။ ‘‘ဓောဝနတ္ထာယ ဒေတီ’’တိ ဣမိနာ ‘‘ဘုတ္တံ ဝတ္ထ’’န္တိ အဓိကာရတော လဗ္ဘတိ။

၆၂၁။ သာမဏေရနိဒ္ဒေသေပီတိ ‘‘သာမဏေရာ’’တိ နိဒ္ဒေသော နာမ ယဿ၊ တသ္မိမ္ပိ၊ အတ္တနာ ပရိဘုတ္တံ ဝတ္ထံ ဓောဝနတ္ထာယ ဒေတီတိ ယောဇနာ၊ အတ္တနော ပရိဘုတ္တံ စီဝရံ ဓောဝနတ္ထာယ ¶ သာမဏေရဿ ဒေတီတိ အတ္ထော။ ပိ-သဒ္ဒေါ သမုစ္စယတ္ထော။ ဥပသမ္ပဇ္ဇာတိ ပုဗ္ဗကိရိယာယ ‘‘ဓောဝတီ’’တိ အပရကိရိယာ သာမတ္ထိယာ လဗ္ဘတိ။

၆၂၂။ ဒဟရာနဉ္စ ဘိက္ခူနန္တိ အတ္တနော နဝကတရာနံ ဘိက္ခူနံ။ နိယျာဒိတေ ဒိန္နေ။ ဧသ နယောတိ ‘‘ဧကေန ပါစိတ္တိယံ၊ အဝသိဋ္ဌေဟိ ဒွီဟိ ဝါ ဧကေန ဝါ သဗ္ဗပယောဂေသု ဒုက္ကဋံ ဟောတီ’’တိ နယော။

၆၂၃။ စီဝရေတိ ပရိဘုတ္တစီဝရေ။

၆၂၄။ ‘‘ဓောဝနပ္ပစ္စယာယေဝါ’’တိ ဣမိနာ ဣတရဒွယဿ တဿ အနာဏတ္တိယာ ကတတ္တာ တတော အနာပတ္တိဘာဝမာဟ။

၆၂၆။ ဉာတိကာတိ ဧတ္ထ ‘‘ပဋိသင်္ခါ ယောနိသော’’တိအာဒီသု (မ။ နိ။ ၁။၂၂-၂၃၊ ၄၂၂၊ အ။ နိ။ ၆။၅၈၊ ၈။၉၊ မဟာနိ။ ၂၀၆၊ ဓ။ သ။ ၁၃၅၅၊ ဝိဘ။ ၅၁၈) ဝိယ ဂါထာဗန္ဓဝသေန ယ-ကာရလောပေါ၊ ဉာတိကာယ ဘိက္ခုနိယာတိ အတ္ထော။ ‘‘ဉာတိကာ အညာတိသညိဿာ’’တိ ပဒစ္ဆေဒေါ။ ပစ္စတ္ထရဏန္တိ မဉ္စပီဌေ အတ္ထရိတဗ္ဗံ ပစ္စတ္ထရဏစီဝရဉ္စ။

၆၂၇။ ‘‘ဘိက္ခုနီနံ ဝသေနာ’’တိ ဣဒံ ဘိက္ခုသင်္ဃေပိ ဥပသမ္ပန္နာ စေ၊ ပါစိတ္တိယသမ္ဘဝါ ဝုတ္တံ ¶ ။ ယထာဟ အဋ္ဌကထာယံ ‘‘ဘိက္ခူနံ သန္တိကေ ဥပသမ္ပန္နာယ ပန ယထာဝတ္ထုကမေဝါ’’တိ (ပါရာ။ အဋ္ဌ။ ၂။၅၀၆)။ ဘိက္ခုနိသင်္ဃေ ပဌမံ ဥပသမ္ပဇ္ဇိတွာ ပစ္ဆာ ဘိက္ခုသင်္ဃေ စေ ဥပသမ္ပဇ္ဇတိ၊ ကေဝလံ ဘိက္ခုသင်္ဃေ ဥပသမ္ပန္နာတိ န ဝုစ္စတီတိ တာ ဘဂဝတိ ဓရမာနေ ပဌမံ ပဗ္ဗဇိတာ ပဉ္စသတာ သာကိယာနိယော ဝုစ္စန္တိ။ ယထာဟ အဋ္ဌကထာယံ ‘‘ဘိက္ခူနံ သန္တိကေ ဥပသမ္ပန္နာ နာမ ပဉ္စသတာ သာကိယာနိယော’’တိ (ပါရာ။ အဋ္ဌ။ ၂။၅၀၆)။ ဘိက္ခုနော ¶ လိင်္ဂေ ပရိဝတ္တေ တဿေဝ ဥပသမ္ပန္နကမ္မဿ အနုညာတတ္တာ သောပိ ဂဟေတဗ္ဗောယေဝ။

၆၂၈။ အဝုတ္တာ ဓောဝတီတိ ‘‘ဣမံ စီဝရံ ဓောဝါ’’တိ အဝုတ္တာ စီဝရံ ကိလိဋ္ဌံ ဒိသွာ အဝတွာ ဌပိတဋ္ဌာနတော စီဝရံ ဂဟေတွာ ဝါ သယမေဝ ဝတွာ ယာစနာဒိနယေန ဝါ အနာဏတ္တိယာ စ ဂဟေတွာ စီဝရဓောဝနာဒိံ ကရေယျ စေ။ အပရိဘုတ္တံ ဝါတိ ဟေဋ္ဌာ ဝုတ္တနယေန အပရိဘုတ္တံ စီဝရံ။ အညံ ဝါတိ ဥပါဟနတ္ထဝိကပတ္တတ္ထဝိကပေါတ္ထကတ္ထဝိကမဉ္စပီဌာဒိံ ယံ ကိဉ္စိ ပရိက္ခာရံ။

ပုရာဏစီဝရဓောဝါပနကထာဝဏ္ဏနာ။

၆၂၉။ ဝိကပ္ပနုပဂံ ပစ္ဆိမံ ဥပါဒါယ ကိဉ္စိ စီဝရံ ဂဏှတောတိ ယောဇနာ၊ ဧတ္ထ ‘‘အညာတိကာယ ဘိက္ခုနိယာ ဟတ္ထတော’’တိ စ ‘‘ဉာတိကာယ အညာတိကသညိဿာ’’တိ စ ‘‘ဧကတောဥပသမ္ပန္နာယ ဟတ္ထတော ဂဏှာတီ’’တိ စ ဝက္ခမာနဝစနသာမတ္ထိယာ လဗ္ဘမာနတော ပုဗ္ဗေ ဝုတ္တနယေန အညာတိကာယ ဥဘတောသင်္ဃေ ဥပသမ္ပန္နာယ ဘိက္ခုနိယာ ဟတ္ထတော ဝိကပ္ပနုပဂရတနဝိဒတ္ထိပ္ပမာဏဝတ္ထတော ပဋ္ဌာယ ယံ ကိဉ္စိ စီဝရံ ဂဏှန္တဿာတိ အတ္ထော။ ‘‘အာပတ္တီ’’တိ သာမညေန ဝုတ္တေပိ ‘‘နိဿဂ္ဂိယာ ပါစိတ္တိယာပတ္တီ’’တိ ပကရဏတော စ ‘‘နိဿဂ္ဂိယာပတ္တီ’’တိ ဝက္ခမာနတော စ လဗ္ဘတိ။ ဌပေတွာ ပါရိဝတ္တကန္တိ ‘‘ပါရိဝတ္တကံ ပရိတ္တေန ဝါ ဝိပုလံ၊ ဝိပုလေန ဝါ ပရိတ္တ’’န္တိ (ပါရာ။ ၅၁၄) ဝစနတော မဟာပစ္စရိယံ ‘‘အန္တမသော ဟရီတကခဏ္ဍေနာပီ’’တိ (ပါရာ။ အဋ္ဌ။ ၂။၅၁၄) ဝုတ္တတ္တာ စ ဟေဋ္ဌိမန္တတော ဟရီတကခဏ္ဍမ္ပိ ဒတွာ ဂဟေတဗ္ဗံ တိစီဝရဉ္စ ပါရိဝတ္တကံ နာမ ဟောတိ၊ တံ ဌပေတွာတိ ဝုတ္တံ ဟောတိ။ ပရိဝတ္တနံ ပရိဝတ္တံ၊ တံ ဧတဿ အတ္ထီတိ ပါရိဝတ္တကံ၊ ကယဝိက္ကယေန ဂဟေတဗ္ဗံ စီဝရန္တိ အတ္ထော။

၆၃၀။ ဂဟဏတ္ထာယ ¶ ပယောဂေတိ ဂဏှိတုံ ဟတ္ထပသာရဏာဒိပ္ပယောဂေ။ ပရိယာပုတန္တိ ‘‘ပဋိဂ္ဂဏှာတိ ပယောဂေ ဒုက္ကဋ’’န္တိ (ပါရာ။ ၅၁၂) ဒေသိတံ။

၆၃၁။ အနုပသမ္ပန္နဟတ္ထေတိ ¶ ဘိက္ခုဘိက္ခုနိတော အညေ သဗ္ဗေ အနုပသမ္ပန္နာ ဂဟိတာ။ ယထာဟ အဋ္ဌကထာယံ ‘‘သစေ ပန သိက္ခမာနာသာမဏေရသာမဏေရိဥပါသကဥပါသိကာနံ ဟတ္ထေ ပေသိတံ ပဋိဂ္ဂဏှာတိ၊ အနာပတ္တီ’’တိ (ပါရာ။ အဋ္ဌ။ ၂။၅၁၂)။

၆၃၂။ ဧကတောတိ ဧတ္ထ ဘိက္ခုနိသင်္ဃတောတိ ဂဟေတဗ္ဗံ။ အညသ္မိံ ပက္ခေ ပါစိတ္တိယမေဝ။ ယထာဟ အဋ္ဌကထာယံ ‘‘ဘိက္ခူနံ သန္တိကေ ဥပသမ္ပန္နာယ ပန ပါစိတ္တိယမေဝါ’’တိ (ပါရာ။ အဋ္ဌ။ ၂။၅၁၃)။

၆၃၃။ ‘‘ပါရိဝတ္တကံ ဒဿာမီ’’တိ အာဘောဂံ ကတွာ ဂဏှာတိ၊ ဒေါသော န ဝိဇ္ဇတီတိ ယောဇနာ။

၆၃၄။ အညံ ပရိက္ခာရန္တိ ထဝိကကာယဗန္ဓနာဒိ အဝိကပ္ပိယံ ဝါ အဝိကပ္ပနုပဂံ ဝါ ပရိက္ခာရမေဝ ဂဟေတဗ္ဗံ။ ဝိကပ္ပနုပဂံ ပန န ဝဋ္ဋတိ။ ယထာဟ အဋ္ဌကထာယံ ‘‘ဝိကပ္ပနုပဂံ ပစ္ဆိမစီဝရပ္ပမာဏံ ပန ပဋပရိဿာဝနမ္ပိ န ဝဋ္ဋတီ’’တိ (ပါရာ။ အဋ္ဌ။ ၂။၅၁၄)။ စီဝရပဋိဂ္ဂဏှနံ ကိရိယာ၊ ပါရိဝတ္တကဿ အဒါနံ အကိရိယာတိ ကိရိယာယ စ အကိရိယာယ စ အာပဇ္ဇိတဗ္ဗတော ကြိယာကြိယံ။

စီဝရပဋိဂ္ဂဟဏကထာဝဏ္ဏနာ။

၆၃၅။ ‘‘အညာတကံ အပ္ပဝါရိတ’’န္တိ ပဒစ္ဆေဒေါ။ ‘‘ဂဟပတိံ ဝါ ဂဟပတာနိံ ဝါ’’တိ ပါဌသေသော။ ဝုတ္တဉှိ ဘဂဝတာ ‘‘အညာတကံ ဂဟပတိံ ဝါ ဂဟပတာနိံ ဝါ’’တိ (ပါရာ။ ၅၁၆၊ ၅၁၈)။ ပုဗ္ဗေ ဝုတ္တနယေန ယာဝ သတ္တမာ ပိတာမဟယုဂါ သမ္ဗဒ္ဓညာတိကတာယ အဘာဝတော အညာတကံ။ ‘‘ယံ မယှံ ဂေဟေ ¶ အတ္ထိ၊ တံ ပဝါရေမီ’’တိအာဒိနာ နယေန အပ္ပဝါရိတံ။ ‘‘ဂဟပတိ နာမ ယော ကောစိ အဂါရံ အဇ္ဈာဝသတီ’’တိ (ပါရာ။ ၅၁၉) ပါဠိယံ ဝုတ္တံ ဂဟပတိံ ဝါ။ ‘‘ဂဟပတာနီ နာမ ယာ ကာစိ အဂါရံ အဇ္ဈာဝသတီ’’တိ (ပါရာ။ ၅၁၉) ပါဠိယံ ဝုတ္တံ ဃရဏိံ ဝါတိ အတ္ထော။

ဟောတိ နိဿဂ္ဂိယာပတ္တီတိ ‘‘အညတြ သမယာ ဝိညာပေတိ၊ ပယောဂေ ဒုက္ကဋံ၊ ပဋိလာဘေန နိဿဂ္ဂိယံ ဟောတီ’’တိ (ပါရာ။ ၅၁၉) ပါဠိယံ ဝုတ္တေသု သဗ္ဗေသု ပုဗ္ဗပယောဂေသု ဒုက္ကဋေန သဒ္ဓိံ နိဿဂ္ဂိယပါစိတ္တိယံ ¶ ဟောတီတိ ဝုတ္တံ ဟောတိ။ အညတြ သမယာတိ ‘‘တတ္ထာယံ သမယော၊ အစ္ဆိန္နစီဝရော ဝါ ဟောတိ ဘိက္ခု နဋ္ဌစီဝရော ဝါ’’တိ (ပါရာ။ ၅၁၈) မာတိကာယ၊ ‘‘အစ္ဆိန္နစီဝရော နာမ ဘိက္ခုဿ စီဝရံ အစ္ဆိန္နံ ဟောတိ ရာဇူဟိ ဝါ စောရေဟိ ဝါ ဓုတ္တေဟိ ဝါ ယေဟိ ကေဟိစိ ဝါ အစ္ဆိန္နံ ဟောတိ။ နဋ္ဌစီဝရော နာမ ဘိက္ခုဿ စီဝရံ အဂ္ဂိနာ ဝါ ဒဍ္ဎံ ဟောတိ၊ ဥဒကေန ဝါ ဝူဠှံ ဟောတိ၊ ဥန္ဒူရေဟိ ဝါ ဥပစိကာဟိ ဝါ ခါယိတံ ဟောတီ’’တိ (ပါရာ။ ၅၁၉) ပဒဘာဇနေ စ နိဒ္ဒိဋ္ဌသရူပကာလတော အညတြာတိ အတ္ထော။

၆၃၆။ တိကပါစိတ္တိယံ ဝုတ္တန္တိ ‘‘အညာတကေ အညာတကသညီ၊ ဝေမတိကော၊ ဉာတကသညီ အညတြ သမယာ စီဝရံ ဝိညာပေတိ၊ နိဿဂ္ဂိယံ ပါစိတ္တိယ’’န္တိ (ပါရာ။ ၅၂၀) ပါစိတ္တိယတ္တယံ ဘဂဝတာ ဝုတ္တံ။ ‘‘ဉာတကေ အညာတိသညိဿာ’’တိ ပဒစ္ဆေဒေါ။ တတ္ထာတိ တသ္မိံ ဉာတကေ။ ဝေမတိကဿာတိ ‘‘ဉာတကော နု ခေါ၊ အညာတကော’’တိ ဝေမတိကဿ။ ဒွိကဒုက္ကဋံ တထေဝါတိ ယောဇနာ။ ‘‘တထေဝါ’’တိ ‘‘ဝုတ္တ’’န္တိ ဣဒံ အာကဍ္ဎတိ၊ ‘‘ဉာတကေ အညာတကသညီ၊ ဝေမတိကော အညတြ သမယာ စီဝရံ ဝိညာပေတိ၊ အာပတ္တိ ဒုက္ကဋဿာ’’တိ (ပါရာ။ ၅၂၀) ဒေသိတန္တိ အတ္ထော။

၆၃၇-၈။ သမယေ ¶ ဝိညာပေန္တဿ အနာပတ္တီတိ ယောဇနာ။ ဧတ္ထ ‘‘စီဝရံ အညာတကအပ္ပဝါရိတ’’န္တိ အာနေတွာ သမ္ဗန္ဓိတဗ္ဗံ၊ ယထာပရိစ္ဆိန္နကာလဒွယတော အညတရသ္မိံ ကာလေ အညာတကအပ္ပဝါရိတံ စီဝရံ ဝိညာပေန္တဿ အနာပတ္တီတိ အတ္ထော။ ဉာတကေ ဝါ ပဝါရိတေတိ ဧတ္ထာပိ ‘‘အတ္တနော’’တိ အဇ္ဈာဟာရော၊ ‘‘သမယေ’’တိ ဣမိနာ ယောဇေတဗ္ဗံ၊ အတ္တနော ဉာတကပဝါရိတေ အသမယေပိ စီဝရံ ဝိညာပေန္တဿ အနာပတ္တီတိ အတ္ထော။ အညဿတ္ထာယာတိ ဧတ္ထ ‘‘အတ္တနော’’တိ သေသော၊ အတ္တနော ဉာတကေ၊ ပဝါရိတေ ဝါ ဝိညာပေန္တဿ အနာပတ္တီတိ ယောဇနာ၊ အညံ ဘိက္ခုံ နိဿာယ အတ္တနော ဉာတကေ ဝါ ပဝါရိတေ ဝါ စီဝရံ ဝိညာပေန္တဿ အနာပတ္တီတိ ဝုတ္တံ ဟောတိ။ ဣတရံ ပက္ခံ ဒဿေတိ ‘‘တဿ ဉာတကေ ဝါ ပဝါရိတေ ဝါ’’တိ။ တဿာတိ ‘‘အညဿာ’’တိ ဝုတ္တဿ၊ ‘‘ဝိညာပေန္တဿ အနာပတ္တီ’’တိ ဣမိနာ ယောဇေတဗ္ဗံ။ ဝါတိ ပုရိမဝိကပ္ပာပေက္ခံ။ ယံ သန္ဓာယ စီဝရံ ဝိညာပေတိ၊ တဿ ဉာတကေ ဝါ ပဝါရိတေ ဝါ တံယေဝ သန္ဓာယ စီဝရံ ဝိညာပေန္တဿ အနာပတ္တီတိ ဝုတ္တံ ဟောတိ။

‘‘အတ္တနော ဝါ ဓနေနာ’’တိ ဝုတ္တံ အနာပတ္တိအင်္ဂံ ဥမ္မတ္တကာဒိနောတိ ဧတ္ထ အာဒိ-သဒ္ဒေန သင်္ဂယှတိ ¶ ၊ အတ္တနော သန္တကံ သုတ္တကပ္ပာသာဒိကံ ကပ္ပိယဝတ္ထုံ ဒတွာ ဂဏှိတုကာမတာယ အကပ္ပိယဝေါဟာရေန ယာစန္တဿ စ အနာပတ္တီတိ အတ္ထော။

အညာတကဝိညတ္တိကထာဝဏ္ဏနာ။

၆၃၉။ အပ္ပဝါရိတမညာတိန္တိ ဧတ္ထ ‘‘ဂဟပတိံ ဝါ ဂဟပတာနိံ ဝါ’’တိ ဣဒံ သာမတ္ထိယာ လဗ္ဘတိ။ တတုတ္တရိန္တိ တတော သန္တရုတ္တရပရမတော ဥတ္တရိန္တိ ဂဟေတဗ္ဗံ၊ ‘‘သန္တရုတ္တရပရမံ တေန ဘိက္ခုနာ တတော စီဝရံ သာဒိတဗ္ဗ’’န္တိ (ပါရာ။ ၅၂၃) ဝုတ္တတ္တာ ¶ အစ္ဆိန္နစီဝရေန သာဒိတဗ္ဗအန္တရဝါသကဥတ္တရာသင်္ဂမတ္တေန အဓိကန္တိ အတ္ထော။

‘‘တတော စေ ဥတ္တရိ သာဒိယေယျာ’’တိ (ပါရာ။ ၅၂၃) ဝစနတော ‘‘သာဒိယန္တဿာ’’တိ ဝတ္တဗ္ဗံ၊ ဧဝံ ဝတ္တဗ္ဗေ ‘‘ဝိညာပေန္တဿာ’’တိ ကသ္မာ ဝုတ္တန္တိ? အစ္ဆိန္နစီဝရာနံ ဘိက္ခူနံ ဆဗ္ဗဂ္ဂိယေဟိ ဘိက္ခူဟိ စီဝရဝိညာပနဝတ္ထုသ္မိံ ‘‘ကထဉှိ နာမ တုမှေ မောဃပုရိသာ န မတ္တံ ဇာနိတွာ ဗဟုံ စီဝရံ ဝိညာပေဿထာ’’တိ (ပါရာ။ ၅၂၂) ဆဗ္ဗဂ္ဂိယေ ဘိက္ခူ ဂရဟိတွာ ဣမဿ သိက္ခာပဒဿ ပညတ္တတ္တာ ‘‘သာဒိတဗ္ဗ’’န္တိ ဧတ္ထ ဝိညာပေတဗ္ဗန္တိ အတ္ထော ဟောတိ၊ တေနေဝ ဣမသ္မိံ ပဒဘာဇနေ ‘‘တတော စေ ဥတ္တရိ သာဒိယေယျာတိ တတုတ္တရိ ဝိညာပေတီ’’တိ (ပါရာ။ ၅၂၄) စ အာပတ္တိဘေဒသန္ဒဿနဋ္ဌာနေ ‘‘အညာတကေ အညာတကသညီ တတုတ္တရိ စီဝရံ ဝိညာပေတိ၊ နိဿဂ္ဂိယံ ပါစိတ္တိယ’’န္တိအာဒိဝစနတော (ပါရာ။ ၅၂၅) စ ဝုတ္တံ။ ယဒိ ဧဝံ သိက္ခာပဒေယေဝ ‘‘သာဒိတဗ္ဗံ၊ သာဒိယေယျာ’’တိ စ ဥဘယတ္ထ ‘‘ဝိညာပေတဗ္ဗံ၊ ဝိညာပေယျာ’’တိ စ ကသ္မာ န ဝုတ္တန္တိ? အစ္ဆိန္နစီဝရဘာဝံ ဉတွာ အဝိညာပိတေပိ အဘိဟရိတွာ ဒိယျမာနမ္ပိ အဓိဝါသေန္တေန ဧဝမေဝ သာဒိတဗ္ဗန္တိ န ဝုတ္တံ။ ဣမဿေဝ စ အဓိကဝိညာပနနိသေဓနတ္ထံ ဝဒန္တေနာပိ ‘‘တဉ္စေ အညာတကော ဂဟပတိ ဝါ ဂဟပတာနီ ဝါ ဗဟူဟိ စီဝရေဟိ အဘိဟဋ္ဌုံ ပဝါရေယျ၊ သန္တရုတ္တရပရမံ တေန ဘိက္ခုနာ တတော စီဝရံ သာဒိတဗ္ဗ’’န္တိ သာဒိတဗ္ဗနိယမပ္ပဓာနံ ဝုတ္တံ။ တသ္မာ အစ္ဆိန္နစီဝရေန အတ္တနာ ဝါ တံ သန္ဓာယ အညေန ဝါ ဝိညာပေန္တေနပိ အဝိညာပေန္တေပိ ဒိယျမာနံ သာဒိယန္တေနာပိ သန္တရုတ္တရပရမတံ နာတိက္ကမိတဗ္ဗန္တိ ဣမသ္မိံ သိက္ခာပဒေ သန္ဓာယ ဘာသိတတ္ထောတိ သလ္လက္ခေတဗ္ဗန္တိ ဧတ္တကံ ဉာပေတုံ ‘‘သာဒိယန္တဿာ’’တိ အဝတွာ ‘‘ဝိညာပေန္တဿာ’’တိ ဝုတ္တန္တိ အာစရိယာဘိသန္ဓိ ဝေဒိတဗ္ဗာ။

၆၄၀။ ဣဒါနိ ¶ ¶ ဝိညာပနေ စ အဓိဝါသနေ စ ဥဘယတ္ထေဝ နိယမံ ဒဿေတုံ ‘‘သစေ တီဏိ နဋ္ဌာနိ ဟောန္တိ၊ ဒွေ သာဒိတဗ္ဗာနိ။ ဒွေ နဋ္ဌာနိ၊ ဧကံ သာဒိတဗ္ဗံ။ ဧကံ နဋ္ဌံ၊ န ကိဉ္စိ သာဒိတဗ္ဗ’’န္တိ (ပါရာ။ ၅၂၄) ပဒဘာဇနေ ဝုတ္တဝိနိစ္ဆယံ ဒဿေတုမာဟ ‘‘ယဿာ’’တိအာဒိ။ ‘‘ယဿ တီဏိပိ နဋ္ဌာနိ၊ ဒွေ ဝါ နဋ္ဌာနိ၊ ဧကံ ဝါ နဋ္ဌ’’န္တိ သမ္ဗန္ဓိတွာ ယထာက္ကမံ ‘‘တေန ဒွေ သာဒိတဗ္ဗာနိ၊ ဧကံ သာဒိတဗ္ဗံ၊ န ကိဉ္စိပိ သာဒိတဗ္ဗ’’န္တိ ယောဇနာ ကာတဗ္ဗာ။ ယဿ တီဏိပိ စီဝရာနိ နဋ္ဌာနိ၊ ဗဟု စ ဒိယျတိ၊ တေန ဒွေယေဝ စီဝရာနိ သာဒိတဗ္ဗာနိ။ ဒွေ စီဝရာနိ နဋ္ဌာနိ၊ ဧကံ သာဒိတဗ္ဗံ။ ဧကဉ္စေ နဋ္ဌံ၊ န သာဒိတဗ္ဗံ၊ အဝသိဋ္ဌံ ပစ္ဆာ ဓမ္မေန သမေန လဒ္ဓနီဟာရေန ဂဟေတဗ္ဗန္တိ အတ္ထော။ ယထာဟ အဋ္ဌကထာယံ ‘‘သေသံ သဘာဂဋ္ဌာနတော ပရိယေသိဿတီ’’တိ။ ‘‘ဘိက္ခုနိယာ ပန ပဉ္စသုပိ နဋ္ဌေသု ဒွေ သာဒိတဗ္ဗာနိ၊ စတူသု နဋ္ဌေသု ဧကံ သာဒိတဗ္ဗံ၊ တီသု နဋ္ဌေသု ကိဉ္စိ န သာဒိတဗ္ဗ’’န္တိ (ပါရာ။ အဋ္ဌ။ ၂။၅၂၂-၅၂၄) အဋ္ဌကထာယံ ဝုတ္တံ။

၆၄၁-၂။ သေသကံ အာဟရန္တဿ အနာပတ္တီတိ ဉာတဗ္ဗန္တိ ယောဇနာ။ ဧဝမုပရိပိ ယောဇေတဗ္ဗံ။ စီဝရံ ယောဇေတွာ အတိရေကံ ဝတ္ထံ ပစ္စာဟရိတွာ ‘‘ဒဿာမီ’’တိ ဗဟုမ္ပိ ဂဟေတွာ ဂစ္ဆန္တဿ အနာပတ္တီတိ အတ္ထော။ အတိရေကမ္ပိ တုမှေယေဝ ဂဏှထာတိ ဒိန္နံ ဂဏှတောပိ အနာပတ္တိ။ န အစ္ဆိန္နကာရဏာ ဒိန္နေတိ ယောဇနာ၊ အစ္ဆိန္နစီဝရဘာဝံ အနုဒ္ဒိဿ ဗဟူနံ စီဝရာနံ ဂဟဏနိမိတ္တေနာပိ အနာပတ္တီတိ အတ္ထော။ ဧဝမေဝ ‘‘န နဋ္ဌကာရဏာ ဒေန္တီ’’တိ ဣဒမ္ပိ ဒဿိတမေဝ။ အစ္ဆိန္နစီဝရေ နိဿာယ တတုတ္တရိစီဝရဝိညာပနဝတ္ထုမှိ ဣမဿ သိက္ခာပဒဿ ပညတ္တတ္တာ အနာပတ္တိဝါရေ ‘‘အညဿတ္ထာယာ’’တိ န ဂဟိတံ။

တတုတ္တရိကထာဝဏ္ဏနာ။

၆၄၃။ ကလျာဏကမျတာဟေတူတိ ¶ သုန္ဒရဿ မဟဂ္ဃဿ ကာမတံ ပဋိစ္စ စီဝရေ ဝိကပ္ပနံ အာပဇ္ဇေယျာတိ ယောဇနာ၊ ‘‘ကီဒိသေန တေ ဘန္တေ စီဝရေန အတ္ထော’’တိ ပုဗ္ဗေ အပ္ပဝါရိတော ‘‘အာယတံ ဝါ ဟောတု ဝိတ္ထတံ ဝါ အပ္ပိတံ ဝါ သဏှံ ဝါ’’တိ (ပါရာ။ ၅၂၉) ပဒဘာဇနေ ဝုတ္တဝိသိဋ္ဌကပ္ပံ အဓိကဝိဓာနံ ကရောတီတိ အတ္ထော။ တဿ လာဘာ နိဿဂ္ဂိယံ ဘဝေတိ တထာ အပ္ပဝါရိတေန ဟုတွာ ကတေန အဓိကဝိဓာနေန နိပ္ဖန္နစီဝရဿ လာဘပ္ပယောဂေန ဒုက္ကဋနိဿဂ္ဂိယပါစိတ္တိယာ ဟောန္တိ။

၆၄၄။ မဟဂ္ဃံ ¶ …ပေ… ဝိညာပေတီတိ ဝီသတိအဂ္ဃနကံ စီဝရံ ဒါတုကာမမှိ ဥပါသကေ၊ ‘‘အလံ မယှံ ဧတေန၊ ဒသဂ္ဃနကံ ဝါ အပ္ပဂ္ဃနကံ ဝါ ဒေဟီ’’တိ ဝဒတိ။

၆၄၅။ ‘‘ဉာတကေ အညာတိသညိဿာ’’တိ ပဒစ္ဆေဒေါ။

ပဌမောပက္ခဋကထာဝဏ္ဏနာ။

၆၄၆။ ပဌမသိက္ခာပဒေ ဧကေန ဥပါသကေန ပီဠာ လဒ္ဓါ၊ ဣဓ ဒွီဟီတိ ဧတ္တကံ နာနာကရဏံ။ သေသံ ပဌမသိက္ခာပဒသဒိသမေဝါတိ အာဟ ‘‘ဒုတိယော…ပေ… ဝိနိစ္ဆယော’’တိ။ ဥပက္ခဋပဒေန လက္ခိတံ သိက္ခာပဒံ ဥပက္ခဋံ၊ ဒုတိယဉ္စ တံ ဥပက္ခဋဉ္စာတိ ဒုတိယောပက္ခဋံ၊ တသ္မိံ ဒုတိယောပက္ခဋေ။ အဿာတိ ဒုတိယောပက္ခဋဿ။

ဒုတိယောပက္ခဋကထာဝဏ္ဏနာ။

၆၄၇။ ရညာ ဝါတိ ရာဇတော ဝါ။ ရာဇတော ဘောဂ္ဂံ ဘုဉ္ဇိတဗ္ဗံ အဿ အတ္ထီတိ ‘‘ရာဇဘောဂ္ဂေါ’’တိ ဝုတ္တော၊ ရာဇတော ဘတ္တဝေတ္တနလာဘိတော ယတော ကုတောစိ ဒါယကာ အာဘတန္တိ သမ္ဗန္ဓော။ န စ ဝဋ္ဋတီတိ ဧတ္ထ ‘‘နိဿဂ္ဂိယပါစိတ္တိယဘာဝတော’’တိ ¶ အဇ္ဈာဟရိတဗ္ဗံ။ ဣဓ ဥတ္တရိကရဏီယံ ‘‘တိက္ခတ္တု’’န္တိအာဒိဂါထာယ (ဝိ။ ဝိ။ ၆၇၁) ဝက္ခတိ။

၆၄၈။ စီဝရစေတာပန္နဝသေန အဓိဂတရဇတာဒိ ယေန ကေနစိ ပရိယာယေနာပိ န သာဒိတဗ္ဗန္တိ ဒဿေတုမာဟ ‘‘ရဇတံ ဝါ’’တိအာဒိ။ ဓဝလသဘာဝတာယ ရာဇတီတိ ရဇတံ၊ သဇ္ဈု။ ဇာတံ ရူပံ ဝဏ္ဏာယတနမေတဿာတိ ဇာတရူပံ၊ သုဝဏ္ဏံ။ ကိဉ္စီတိ အပ္ပမတ္တကမ္ပိ။ အတ္တနော ဝါ အတ္ထာယ ပရဿ ဝါ အတ္ထာယ ဒိယျမာနံ ကိဉ္စိ ဂဏှိတုံ န ဝဋ္ဋတီတိ ယောဇနာ။

၆၄၉။ အတ္တနော ပဋိဂ္ဂဟဏေ အာပတ္တိယာ ရူပိယဂဟဏသိက္ခာပဒေ ဝက္ခမာနတ္တာ အညဿ အတ္ထာယ ဂဟဏေ အာပတ္တိဒဿနတ္ထမာဟ ‘‘အညဿတ္ထာယာ’’တိအာဒိ။ တတ္ထ အညဿတ္ထာယာတိ အညဿ ပုဂ္ဂလဿ၊ ဂဏဿ၊ သင်္ဃဿ၊ စေတိယဿ၊ နဝကမ္မဿ ဝါ အတ္ထာယ။ နိဒ္ဒိဋ္ဌန္တိ အာဟရိတွာ ‘‘ဣမံ ဂဏှထာ’’တိ ဝုတ္တံ ရဇတံ၊ ဇာတရူပံ ဝါ အညံ ဝါ ယံ ကိဉ္စိ နိဿဂ္ဂိယဒုက္ကဋဝတ္ထုံ ¶ ပဋိဂ္ဂဏှတော တဿ ဘိက္ခုနော ဒုက္ကဋံ ဟောတီတိ မဟာပစ္စရိယံ ဝုတ္တန္တိ ယောဇနာ။

၆၅၀-၁။ ဝုတ္တမေဝတ္ထံ သရူပတော ဝိဘာဝေတုမာဟ ‘‘နေတွာ’’တိအာဒိ။ နေတွာတိ အာနေတွာ။ အကပ္ပိယံ ဘဏ္ဍန္တိ ‘‘ရဇတံ ဇာတရူပံ ဝါ’’တိ ယထာဝုတ္တမေဝ အကပ္ပိယဘဏ္ဍံ။ ဣတ္ထန္တိ ဝက္ခမာနပ္ပကာရေန။ န စ ဝဋ္ဋတီတိ ဧတ္ထ စ-ကာရေန ဝဋ္ဋတိ စာတိ အနုညာတံ ကတန္တိ။ ယထာဟ အဋ္ဌကထာယံ –

‘‘သစေ ပန ‘နယိဒံ ဘိက္ခူနံ သမ္ပဋိစ္ဆိတုံ ဝဋ္ဋတီ’တိ ပဋိက္ခိတ္တေ ‘ဝဍ္ဎကီနံ ဝါ ကမ္မကရာနံ ဝါ ဟတ္ထေ ဘဝိဿတိ၊ ကေဝလံ တုမှေ သုကတဒုက္ကဋံ ဇာနာထာ’တိ ဝတွာ တေသံ ဟတ္ထေ ဒတွာ ပက္ကမတိ၊ ဝဋ္ဋတိ။ အထာပိ ‘မမ မနုဿာနံ ဟတ္ထေ ဘဝိဿတိ၊ မယှမေဝ ¶ ဝါ ဟတ္ထေ ဘဝိဿတိ၊ ကေဝလံ တုမှေ ယံ ယဿ ဒါတဗ္ဗံ၊ တဒတ္ထာယ ပေသေယျာထာ’တိ ဝဒတိ၊ ဧဝမ္ပိ ဝဋ္ဋတီ’’တိ (ပါရာ။ အဋ္ဌ။ ၂။၅၃၈-၅၃၉)။

၆၅၂။ ဝိဟာရဿာတိ ဧတ္ထ ‘‘နဝကမ္မဿာ’’တိ (ပါရာ။ အဋ္ဌ။ ၂။၅၃၈-၅၃၉) အဋ္ဌကထာယံ ဝုတ္တတ္တာ ဝတ္တဗ္ဗံ ဂါထာဗန္ဓဝသေန န ဝုတ္တံ။

၆၅၄။ ရဇတံ ဇာတရူပံ ဝါ သင်္ဃဿာတိ ဧတ္ထ ‘‘စတ္တာရော ပစ္စယေ ပရိဘုဉ္ဇထာတိ ဒိန္န’’န္တိ သေသော။ ယထာဟ အဋ္ဌကထာယံ ‘‘သစေ ပန ကောစိ ဗဟုမ္ပိ ဟိရညသုဝဏ္ဏံ အာနေတွာ ‘ဣဒံ သင်္ဃဿ ဒမ္မိ၊ စတ္တာရော ပစ္စယေ ပရိဘုဉ္ဇထာ’တိ ဝဒတိ၊ တံ စေ သင်္ဃော သမ္ပဋိစ္ဆတိ၊ ပဋိဂ္ဂဟဏေပိ ပရိဘောဂေပိ အာပတ္တီ’’တိ (ပါရာ။ အဋ္ဌ။ ၂။၅၃၈-၅၃၉)။ ဧဝံ အာဘတံ တသ္မိံ သင်္ဃေ ယော ကောစိ ဘိက္ခု ‘‘နယိဒံ ကပ္ပတီ’’တိ သစေ ပဋိက္ခိပတိ၊ ‘‘အယံ သင်္ဃဿ လာဘန္တရာယံ ကရောတီ’’တိ ဝဒန္တဿေဝ အာပတ္တိ ဟောတိ။ ယထာဟ အဋ္ဌကထာယံ ‘‘ယော ဟိ တံ စောဒေတိ၊ သွေဝ သာပတ္တိကော ဟောတိ၊ တေန ပန ဧကေန ဗဟူ အနာပတ္တိကာ ကတာ’’တိ (ပါရာ။ အဋ္ဌ။ ၂။၅၃၈-၅၃၉)။ ဣဓ သွေဝ သာပတ္တိကောတိ ဧတ္ထ ‘‘ဒုက္ကဋာပတ္တိကောတိ ဝုတ္တံ ဟောတီ’’တိ ဂဏ္ဌိပဒေ ဝုတ္တံ။ ဣမိဿာ ဂါထာယ ‘‘သင်္ဃဿာ’’တိ အလိခိတွာ ‘‘ဘိက္ခုနော’’တိ စ လိခန္တိ၊ တံ န သုန္ဒရံ။ ဣဒါနိ ဒဿိတအဋ္ဌကထာပါဌေ ‘‘သင်္ဃော သမ္ပဋိစ္ဆတီ’’တိ (ပါရာ။ အဋ္ဌ။ ၂။၅၃၈-၅၃၉) ဝုတ္တတ္တာ ‘‘သင်္ဃဿာ’’တိ ပါဌော သုန္ဒရော။

၆၅၅။ တဠာကဿာတိ ¶ ဝါပိယာ။ သဿုပ္ပတ္တိနိဒါနတော တဠာကံ ခေတ္တံ၊ တတော တဿ ဂဟဏံ ဝါ ပရိဘောဂေါ ဝါ န စ ဝဋ္ဋတီတိ ယောဇနာ။ တဠာကဿ စာတိ ဧတ္ထ စ-ကာရေန ခေတ္တဝတ္ထု သင်္ဂဟိတံ။ န စ ဝဋ္ဋတီတိ ဧတ္ထ စကာရေန ဝဋ္ဋတိ စာတိ ဒဿိတံ ဟောတိ။

၆၅၆။ တံ ¶ ကတမန္တိ အာဟ ‘‘စတ္တာရော’’တိအာဒိ။ သဗ္ဗမ္ပီတိ တဠာကပေါက္ခရဏိခေတ္တာဒိ သဗ္ဗမ္ပိ။

၆၅၈-၉။ အပရိစ္ဆိန္နဘာဂသ္မိန္တိ ‘‘ဣမသ္မိံ ဘူမိဘာဂေ ကတဿ ကမ္မေဟိ ဧတ္တကော ဘာဂေါ ဒေယျော’’တိ ဧဝံ ပုဗ္ဗေ အနိယမိတအာယေ ဘူမိဘာဂေ။ အကတပုဗ္ဗံ နဝသဿံ နာမ။ ဧတ္တကံ ဘာဂံ ဒေထာတိ ဧတ္တကံ ကဟာပဏဘာဂံ ဒေထ။ ဥဋ္ဌာပေတီတိ ဥပ္ပာဒေတိ။

‘‘ကသထ ဝပထာ’’တိ အကပ္ပိယံ ဝါစံ ဝတွာတိ ယောဇနာ။ ဝပထာတိ စာတိ ဧတ္ထ စ-သဒ္ဒေါ ဣဓ အဝုတ္တံ တံကတ္တုယောဂကာလေ ဝုစ္စမာနံ အကပ္ပိယဝစနန္တရံ သမုစ္စိနောတိ။ ဥပ္ပာဒိတဉ္စာတိ ဧတ္ထ စ-သဒ္ဒေါ ကဟာပဏံ သမုစ္စိနောတိ။ သဗ္ဗန္တိ တထာ ဥပ္ပာဒိတကဟာပဏဉ္စ ဧဝံ အကပ္ပိယဝေါဟာရေန ဥပ္ပာဒိတဉ္စာတိ သဗ္ဗံ။

၆၆၀။ ကသထာဒိကံ ဝစနံ အဝတွာ ‘‘ဧတ္တိကာယ ဘူမိယာ ဧတ္တကော နာမ ဘာဂေါ’’တိ ဘူမိံ ယော စ ပတိဋ္ဌာပေတိ၊ တဿေဝေတမကပ္ပိယန္တိ ဝက္ခမာနေန ယောဇေတဗ္ဗံ။ စ-သဒ္ဒေါ ‘‘ယော ပနာ’’တိ ဝက္ခမာနပုဂ္ဂလန္တရာပေက္ခော။

၆၆၁-၂။ ဘူမိယာ သယမေဝ ပမာဏဿ ဇာနနတ္ထံ တူတိ ယောဇနာ၊ ‘‘ဧတ္တကေ ဘူမိဘာဂေ အမှေဟိ သဿံ ကတံ၊ ဧတ္တကံ နာမ ဘာဂံ ဂဏှထာ’’တိ ကသကေဟိ ဝုတ္တေ တေသံ ဝစနံ အသဒ္ဒဟိတွာ သယမေဝ ခေတ္တဘူမိယာ ပမာဏံ ဉာတုကာမတာယာတိ အတ္ထော။ တု-သဒ္ဒေါ ဣမမေဝ ဝိသေသံ ဇောတေတိ။ ယော ပန မိနာတိ၊ တဿေဝေတမကပ္ပိယန္တိ ဝက္ခမာနေန ယောဇေတဗ္ဗံ။ ရဇ္ဇုယာပိ စ ဒဏ္ဍေနာတိ ဧတ္ထ ပါဒေနာပိ မိနိတုံ န ဝဋ္ဋတီတိ ဝဒန္တိ။ ‘‘ရက္ခတီ’’တိအာဒိကိရိယာပဒေဟိပိ ဧဝမေဝ ယောဇေတဗ္ဗံ။

ခလေ ¶ ဌတွာ ရက္ခတီတိ ဓညကရဏေ ဌတွာ အညေ ဂဏှိတုံ အဒတွာ ပါလေတိ။ ကထံ ရက္ခိတုံ ¶ ဝဋ္ဋတိ၊ ကထံ ရက္ခိတုံ န ဝဋ္ဋတီတိ? တံ ပန ဝီဟိံ ‘‘ဣဒံ ဝါ ဧတ္တကံ ဝါ မာ ဂဏှ၊ ဣဒံ ဂဟေတုံ န လဗ္ဘတီ’’တိ ဝါ ‘‘ဣတော အပနေဟိ၊ ဣဓ ပုဉ္ဇံ ကရောဟီ’’တိ ဝါ ဧဝမာဒိနာ ပယောဂေန စေ ရက္ခတိ၊ တံ အကပ္ပိယံ။ သစေ ‘‘မယိ ဌိတေ ရက္ခိတံ ဟောတီ’’တိ ရက္ခတိ၊ ဂဏှန္တေ ဝါ ပဿိတွာ ‘‘ကိံ ကရောထာ’’တိ ဘဏတိ၊ ဝဋ္ဋတိ။ ရူပိယပဋိဂ္ဂဟဏသိက္ခာပဒေ ဒွါရံ ပိဒဟိတွာ ရက္ခန္တေန ဝသိတဗ္ဗန္တိ ဟိ ဝုတ္တန္တိ ဂဏ္ဌိပဒေ ဝုတ္တနယေန ဝေဒိတဗ္ဗော။ အညသ္မိမ္ပိ ဂဏ္ဌိပဒေ ဝုတ္တံ ‘‘ထေနေတွာ ဂဏှန္တေ သတိ ဧတံ ဘော ပဝတ္တိံ ဘိက္ခုသင်္ဃဿ ကိံ အာရောစေဿာမီတိ ပဋိပုစ္ဆိတုံ ဝဋ္ဋတီတိ ဝဒန္တီ’’တိ။ နီဟရာပေတီတိ ဧတ္ထာပိ သစေ ပရိယာယေန ဝဒတိ၊ ဝဋ္ဋတီတိ ဝဒန္တိ။ တဿေဝေတမကပ္ပိယန္တိ ဣဒံ ခေတ္တမိနနာဒိံ ကရောန္တေန လဒ္ဓဗ္ဗတော အညဿ အဘိနဝုပ္ပာဒိတဿ အဘာဝါ အညေသံ ဝဋ္ဋတီတိ ဒွီသု ဂဏ္ဌိပဒေသု ဝုတ္တံ။

၆၆၃။ ‘‘ဧတ္တကေဟိ ဝီဟီဟိ ဣဒံ အာဟရထာ’’တိ ဝုတ္တာ သစေ အာဟရန္တီတိ ယောဇနာ။ ဧတ္ထ ‘‘တဿေဝေတမကပ္ပိယ’’န္တိ ဣဒံ ဓညဿ ဝိစာရိတတ္တာ ဝုတ္တံ။ ယထာဟ အဋ္ဌကထာယံ ‘‘တဿေဝ အကပ္ပိယံ။ ကသ္မာ? ဓညဿ ဝိစာရိတတ္တာ’’တိ (ပါရာ။ အဋ္ဌ။ ၂။၅၃၈-၅၃၉)။

၆၆၄။ ဟိရညေနာတိ ကဟာပဏေန။ ‘‘တမကပ္ပိယ’’န္တိ ဣဒံ ကဟာပဏာနံ ဝိစာရိတတ္တာ ဝုတ္တံ။ ယထာဟ အဋ္ဌကထာယံ ‘‘သဗ္ဗေသံ အကပ္ပိယံ။ ကသ္မာ? ကဟာပဏာနံ ဝိစာရိတတ္တာ’’တိ (ပါရာ။ အဋ္ဌ။ ၂။၅၃၈-၅၃၉)။

၆၆၅။ ပေသကာရကဒါသံ ဝါတိ ပေသကာရကသင်္ခါတံ ဒါသံ ဝါ၊ ပေသကာရော တန္တဝါယော။ အာရာမိကာနံ နာမေန ဒေန္တေတိ ‘‘အာရာမိကံ ဒမ္မိ၊ ဝေယျာဝစ္စကရံ ဒမ္မီ’’တိအာဒိနာ နယေန ဒေန္တေ။

၆၆၆။ ခီရံ ¶ ဒဓိ တက္ကံ သပ္ပိ နဝနီတန္တိ ပဉ္စဂေါရသာ။

၆၆၇။ အဇိကာဒီသူတိ အာဒိ-သဒ္ဒေန မဟိသံ သင်္ဂဏှာတိ။

၆၆၉။ ပဋိသိဒ္ဓေပီတိ ပဋိက္ခိတ္တေပိ။ မူလံ ဒတွာတိ ကပ္ပိယဘဏ္ဍမူလံ ဒတွာ။ ကုက္ကုဋာဒယော ပန ‘‘သုခေန ဝသန္တူ’’တိ အရညေယေဝ ဝိဿဇ္ဇေတဗ္ဗံ။ ယထာဟ အဋ္ဌကထာယံ ‘‘ကုက္ကုဋသူကရေ ¶ ‘သုခံ ဇီဝန္တူ’တိ အရညေ ဝိဿဇ္ဇေတုံ ဝဋ္ဋတီ’’တိ (ပါရာ။ အဋ္ဌ။ ၂။၅၃၈-၅၃၉)။ သူကရမယူရာဒီသုပိ လဒ္ဓေသု တေသံ အနုရူပေယေဝ ဝိသယေ ဝိဿဇ္ဇေတဗ္ဗာ။

၆၇၁။ ‘‘တိက္ခတ္တု’’န္တိအာဒိဂါထာယ ကော သမ္ဗန္ဓော? ‘‘ရညာ ဝါ ရာဇဘောဂ္ဂေနာ’’တိအာဒိဂါထာယ သင်္ဂဟိတနယေန ရာဇရာဇာမစ္စဗြာဟ္မဏဂဟပတာဒီသု ယေန ကေနစိ အတ္တနာ ဝါ စီဝရစေတာပန္နေန စီဝရံ စေတာပေတွာ ‘‘ဣတ္ထန္နာမံ ဘိက္ခုံ စီဝရေန အစ္ဆာဒေဟီ’’တိ ဝတွာ တံ စီဝရစေတာပန္နသင်္ခါတံ စီဝရမူလံ ဒတွာ ပဟိတဒူတေန ဝါ ဘိက္ခုံ ဥပသင်္ကမိတွာ ‘‘ဣဒံ ခေါ ဘန္တေ အာယသ္မန္တံ ဥဒ္ဒိဿ စီဝရစေတာပန္နံ အာဘတံ၊ ပဋိဂ္ဂဏှာတု အာယသ္မာ စီဝရစေတာပန္န’’န္တိ ယဒိ ဝုစ္စေယျ၊ ဘိက္ခုနာ ‘‘န ခေါ မယံ အာဝုသော စီဝရစေတာပန္နံ ပဋိဂ္ဂဏှာမ၊ စီဝရဉ္စ ခေါ မယံ ပဋိဂ္ဂဏှာမ ကာလေန ကပ္ပိယ’’န္တိ ဝုတ္တေ သစေ တေန ‘‘အတ္ထိ ပနာယသ္မတော ကောစိ ဝေယျာဝစ္စကရော’’တိ ဝုတ္တေ စီဝရတ္ထိကေန ဘိက္ခုနာ ‘‘ဧသော ခေါ အာဝုသော ဘိက္ခူနံ ဝေယျာဝစ္စကရော’’တိ အာရာမိကေ ဝါ ဥပါသကေ ဝါ ဒဿိတေ ယဒိ သော တဿ အတ္တနာ အာဟရိတွာ ‘‘ဣမဿ ဘိက္ခုနော စီဝရေန အတ္ထေ သတိ ဣမိနာ စီဝရံ စေတာပေတွာ အစ္ဆာဒေဟီ’’တိ ဝတွာ တံ ဘိက္ခုံ ဥပသင်္ကမိတွာ ‘‘ယံ ခေါ ဘန္တေ အာယသ္မာ ဝေယျာဝစ္စကရံ နိဒ္ဒိသိ၊ သညတ္တော သော မယာ၊ ဥပသင်္ကမတု အာယသ္မာ ကာလေန၊ စီဝရေန ¶ တံ အစ္ဆာဒေဿတီ’’တိ ယဒိ ဝဒေယျ၊ တေန စီဝရတ္ထိကေန ဘိက္ခုနာ ကိံ ကာတဗ္ဗန္တိ ဘဂဝတာ ဝုတ္တန္တိ အာဟာတိ အယမိမိဿာ ဂါထာယ သမ္ဗန္ဓော။

တိက္ခတ္တုံ စောဒနာ ဝုတ္တာတိ ‘‘စီဝရတ္ထိကေန ဘိက္ခဝေ ဘိက္ခုနာ ဝေယျာဝစ္စကရော ဥပသင်္ကမိတွာ ဒွတ္တိက္ခတ္တုံ စောဒေတဗ္ဗော သာရေတဗ္ဗော ‘အတ္ထော မေ အာဝုသော စီဝရေနာ’’တိ တိက္ခတ္တုံ စောဒနာ ကာတဗ္ဗာတိ ဝုတ္တာ။

ဆက္ခတ္တုံ ဌာနမဗြဝီတိ ‘‘ဒွတ္တိက္ခတ္တုံ စောဒယမာနော သာရယမာနော တံ စီဝရံ အဘိနိပ္ဖာဒေယျ၊ ဣစ္စေတံ ကုသလံ၊ နော စေ အဘိနိပ္ဖာဒေယျ၊ စတုက္ခတ္တုံ ပဉ္စက္ခတ္တုံ ဆက္ခတ္တုပရမံ တုဏှီဘူတေန ဥဒ္ဒိဿ ဌာတဗ္ဗ’’န္တိ (ပါရာ။ ၅၃၈) ဝုတ္တတ္တာ တိက္ခတ္တုံ ဥပသင်္ကမိတွာ ‘‘အတ္ထော မေ အာဝုသော စီဝရေနာ’’တိ ကတာယ စောဒနာယ န နိပ္ပဇ္ဇေယျ၊ တေန ပုန ဂန္တွာ ယံ ကိဉ္စိ အဝတွာ ‘‘န အာသနေ နိသီဒိတဗ္ဗံ၊ န အာမိသံ ပဋိဂ္ဂဟေတဗ္ဗံ၊ န ဓမ္မော ဘာသိတဗ္ဗော’’တိ (ပါရာ။ ၅၃၉) ဝစနတော ဌာနဘဉ္ဇနကံ နိသဇ္ဇာဒိံ ကိဉ္စိ အကတွာ ‘‘ကိံ ကာရဏံ အာဂတောသီ’’တိ ပုစ္ဆိတေ ‘‘ဇာနာဟိ ¶ ၊ အာဝုသော’’တိ ဧတ္တကမတ္တံ ဝတွာ ဥက္ကဋ္ဌပရိစ္ဆေဒေန ဆက္ခတ္တုံ ဌာနံ သဒ္ဓမ္မဝရစက္ကဝတ္တိနာ ဘဂဝတာ ဒေသိတန္တိ ဝုတ္တံ ဟောတိ။

ယဒိ စောဒေတိယေဝါတိ သစေ ဌာနံ အကတွာ စောဒနာမတ္တံ ကရောတိ၊ ဆ အဗြဝီတိ ယောဇနာ၊ ‘‘စောဒနာ’’တိ သာမတ္ထိယတော လဗ္ဘတိ၊ ဆက္ခတ္တုံ စောဒေတွာ သကိမ္ပိ န ဌာတဗ္ဗန္တိ ဝုတ္တံ ဟောတိ။

ဆစောဒနံ အကတွာ ယော ဌာနမေဝ ကရောတိ၊ တေန ကတိ ဌာနာနိ ကာတဗ္ဗာနီတိ အာဟ ‘‘စောဒနာဒိဂုဏာ ဌိတီ’’တိ၊ ‘‘ကာတဗ္ဗာ’’တိ သေသော၊ ‘‘အဗြဝီ’’တိ ဣမိနာ ယောဇေတဗ္ဗံ၊ ‘‘စတုက္ခတ္တုံ စောဒေတွာ စတုက္ခတ္တုံ ဌာတဗ္ဗံ၊ ပဉ္စက္ခတ္တုံ စောဒေတွာ ဒွိက္ခတ္တုံ ဌာတဗ္ဗံ၊ ဆက္ခတ္တုံ စောဒေတွာ န ¶ ဌာတဗ္ဗ’’န္တိ (ပါရာ။ ၅၃၉) ဝစနတော၊ ‘‘ဆက္ခတ္တုပရမ’’န္တိ (ပါရာ။ ၅၃၉) ဝစနတော စ ဆက္ခတ္တုံ စောဒနာယ ဒိဂုဏာ ဒွါဒသက္ခတ္တုကာ ဌိတိ ဟောတီတိ သိဒ္ဓတ္တာ စောဒနမေဝ အကတွာ ဌာနမတ္တမေဝ ကရောန္တဿ ဒွါဒသက္ခတ္တုံ ဝုတ္တနယေန ဌာတဗ္ဗမေဝါတိ ဝုတ္တံ ဟောတိ။ တတော ပရံ ကာတဗ္ဗံ အဒဿေတွာ ဧတ္တကေနေဝ နိဝတ္တေတဗ္ဗန္တိ ဉာပေန္တော ‘‘တတော စေ ဥတ္တရိ ဝါယမမာနော တံ စီဝရံ အဘိနိပ္ဖာဒေတိ၊ ပယောဂေ ဒုက္ကဋံ၊ ပဋိလာဘေန နိဿဂ္ဂိယ’’န္တိ (ပါရာ။ ၅၃၉) ဝုတ္တနယာ အာပတ္တိ ဟောတီတိ ဒဿေတိ။

၆၇၂။ ‘‘အစောဒေတွာ လဒ္ဓေ’’တိ ဣဒံ ဥပလက္ခဏံ ‘‘အဋ္ဌတွာ လဒ္ဓေ’’တိ စ ဂယှမာနတ္တာ။

ရာဇသိက္ခာပဒကထာဝဏ္ဏနာ။

စီဝရဝဂ္ဂေါ ပဌမော။

၆၇၃။ ‘‘ဧကေနာပီ’’တိ ဣမိနာ ကိံ ပန ဒွီဟိ၊ ဗဟူဟိ ဝါတိ ဝုတ္တံ ဟောတိ။ မိဿေတွာတိ အန္တမသော ဝါတေန အာဟဋေနာပိ ကောသိယံသုနာ မိဿေတွာ။ သန္ထတန္တိ ‘‘သန္ထတံ နာမ သန္ထရိတွာ ကတံ ဟောတိ အဝါယိမ’’န္တိ (ပါရာ။ ၅၄၄) ပဒဘာဇနေ စ ‘‘သမေ ဘူမိဘာဂေ ကောသိယံသူနိ ဥပရူပရိ သန္ထရိတွာ ကဉ္ဇိကာဒီဟိ သိဉ္စိတွာ ကတံ ဟောတီ’’တိ (ပါရာ။ အဋ္ဌ။ ၂။၅၄၂) အဋ္ဌကထာယ စ ဝုတ္တသရူပံ ကဉ္ဇိကံ သိဉ္စိတွာ ကောသိယံသူနိ အတ္ထရိတွာ ယာဝ ဗဟလမိစ္ဆတိ၊ တာဝ ဝဍ္ဎေတွာ နိသီဒနနိပဇ္ဇနာဒိအတ္ထံ ကာတဗ္ဗံ သန္ထတန္တိ အတ္ထော။ ကောသိယံသုနာတိ ကောသိယကိမိကောသိယဿ ဣဒန္တိ ကောသိယံ၊ သုတ္တံ၊ တဿ သုတ္တဿ အံသု၊ တေန ကောသိယံသုနာတိ အတ္ထော ¶ ။ ကာရာပေန္တဿာတိ ဥပလက္ခဏတ္တာ ¶ ‘‘ကရောန္တဿာ’’တိပိ ဂဟေတဗ္ဗံ။ ဝုတ္တဉှေတံ ‘‘ကာရာပေယျာတိ ဧကေနာပိ ကောသိယံသုနာ မိဿေတွာ ကရောတိ ဝါ ကာရာပေတိ ဝါ’’တိ (ပါရာ။ ၅၄၄)။ တေနေဝါဟ ‘‘ပရတ္ထာယ ကရောန္တဿ ကာရာပေန္တဿာ’’တိ။

၆၇၅။ ဘူမတ္ထရဏန္တိ ပရိကမ္မကတာယ ဘူမိယာ ဆဝိရက္ခနတ္ထာယ အတ္ထရိတဗ္ဗံ အတ္ထရဏံ။ ဘိသိ နာမ မဉ္စဘိသိ၊ ပီဌဘိသီတိ ဒွယံ။ ဗိဗ္ဗောဟနံ ဥပဓာနံ။

ကောသိယကထာဝဏ္ဏနာ။

၆၇၆။ ကာဠကေဠကလောမာနန္တိ ‘‘ကာဠကံ နာမ ဒွေ ကာဠကာနိ ဇာတိယာ ကာဠကံ ဝါ ရဇနကာဠကံ ဝါ’’တိ (ပါရာ။ ၅၄၉) ဝစနတော ဧဝံ ကာဠကာနံ ဧဠကလောမာနံ။ သုဒ္ဓါနန္တိ ဣတရဝဏ္ဏေဟိ ဧဠကလောမေဟိ အမိဿာနံ။ ယထာဟ အဋ္ဌကထာယံ ‘‘သုဒ္ဓကာဠကာနန္တိ သုဒ္ဓါနံ ကာဠကာနံ၊ အညေဟိ အမိဿိတကာဠကာနန္တိ အတ္ထော’’တိ (ပါရာ။ အဋ္ဌ။ ၂။၅၄၇)။ ကရေယျာတိ ကရောန္တဿ စ ကာရာပေန္တဿ စာတိ ဝုတ္တံ ဟောတိ။ ယထာဟ ‘‘ကာရာပေယျာတိ ကရောတိ ဝါ ကာရာပေတိ ဝါ’’တိ။ အာပတ္တိ ဟောတီတိ ‘‘ပယောဂေ ဒုက္ကဋံ၊ ပဋိလာဘေန နိဿဂ္ဂိယ’’န္တိ ပါဠိယံ ဝုတ္တံ ပုဗ္ဗပယောဂဒုက္ကဋဉ္စ နိဿဂ္ဂိယပါစိတ္တိယဉ္စ အာဟ။

သုဒ္ဓကာဠကကထာဝဏ္ဏနာ။

၆၇၇။ ဩဒါတံ တုလံ ဝါ ဗဟုံ ဝါ သဗ္ဗမေဝ ဝါ ဂဟေတွာနာတိ ယောဇနာ။ ကပိလမ္ပိ ဝါတိ ဧတ္ထာပိ ဧဝမေဝ ယောဇေတဗ္ဗံ။ ဧတ္ထ သဗ္ဗမေဝ ဝါတိ သန္ထတဿ ဂဟေတဗ္ဗံ သဗ္ဗမေဝ ဝါ လောမံ။ ကရောန္တဿာတိ ဧတ္ထ ‘‘သန္ထတ’’န္တိ အဓိကာရတော ¶ လဗ္ဘတိ။ ‘‘နဝ’’န္တိ ဣဒံ ‘‘ကရောန္တဿာ’’တိ ပဒသာမတ္ထိယေန လဗ္ဘတိ၊ နဝံ သန္ထတံ ကရောန္တဿာတိ အတ္ထော၊ ‘‘အနာပတ္တီ’’တိ ဣမိနာ သမ္ဗန္ဓော။ ကပိလမ္ပိ ဝါတိ ဝါကာရေန ပကာရန္တရေနာပိ ကရောန္တဿ အနာပတ္တိံ သင်္ဂဏှာတိ။ သေယျထိဒံ? ‘‘နဝံ ပန ဘိက္ခုနာ သန္ထတံ ကာရယမာနေန ဒွေ ဘာဂါ သုဒ္ဓကာဠကာနံ ဧဠကလောမာနံ အာဒါတဗ္ဗာ တတိယံ ဩဒါတာနံ စတုတ္ထံ ဂေါစရိယာန’’န္တိ (ပါရာ။ ၅၅၃) မာတိကာယ အနုညာတပ္ပကာရော ဝေဒိတဗ္ဗော။

ဧတ္ထ ¶ ‘‘ဩဒါတံ ကပိလမ္ပိ ဝါ’’တိ ဧတဿ ‘‘ဗဟုံ ဝါ’’တိ ဝိသေသနေန ကာဠကာနံ ဧဠကလောမာနံ ယထာဝုတ္တဘာဂဒွယတော အဓိကံ ဧဠကလောမမ္ပိ န ဂဟေတဗ္ဗန္တိ ဒီပေတိ ကေဝလာနံ ကာဠကာနံ ဧဠကလောမာနံ အဂ္ဂဟေတဗ္ဗတာယ ပဌမသိက္ခာပဒေနေဝ ဝုတ္တတ္တာ။ ‘‘သဗ္ဗမေဝ ဝါ’’တိ ဣမိနာပိ ပုရိမသိက္ခာပဒေ ဝိယ ဣမေ ဩဒါတာဒယော သဗ္ဗေ ကေဝလာ န ဂဟေတဗ္ဗာ န ဟောန္တီတိ ဒဿိတံ ဟောတိ။ ‘‘အနာပတ္တီ’’တိ ဣမိနာ ဧဝံ အကတွာ အညေန ပကာရေန ကရောန္တဿ အာပတ္တိ ဟောတီတိ ဗျတိရေကတော ဒီပိတံ ဟောတိ။

သေယျထိဒံ? ဝုတ္တဉှေတံ ဘဂဝတာ ‘‘အနာဒါ စေ ဘိက္ခု ဒွေ ဘာဂေ သုဒ္ဓကာဠကာနံ ဧဠကလောမာနံ တတိယံ ဩဒါတာနံ စတုတ္ထံ ဂေါစရိယာနံ နဝံ သန္ထတံ ကာရာပေယျ၊ နိဿဂ္ဂိယံ ပါစိတ္တိယ’’န္တိ။ ယတ္တကပ္ပမာဏေဟိ ဧဠကလောမေဟိ နဝံ သန္ထတံ ကာတုကာမော ဟောတိ၊ တေ လောမေ စတုဘာဂံ တုလယိတွာ ဒွေ တုလေ ဝါ ဦနေ ဝါ ကာဠကလောမေ ဂဟေတွာ ဧကံ တုလံ ဩဒါတေဟိ ဝါ ဧကံ တုလံ ဂေါစရိယေဟိ ဝါ ကာဠကေဟိ ဝါ ဦနေ ကတွာ ဒွီဟိပိ အဓိကေ ဝါ ကတွာ ကာဠကလောမေ ဝဇ္ဇေတွာ ဒွီသု ဧကံ ဝါ ဒွေ ဧဝ ဝါ ဂဟေတွာ ကာတုဉ္စ ကာရာပေတုဉ္စ ဝဋ္ဋတီတိ ဝုတ္တံ ဟောတိ ¶ ။ ဧဝံ အနာပတ္တိဒဿနေန သဗ္ဗောပိ သိက္ခာပဒတ္ထော သင်္ဂဟိတောတိ ဒဋ္ဌဗ္ဗော။

၆၇၈။ ‘‘အနုက္ကမေနာ’’တိ ဣမိနာ ဣမမေဝ အဂ္ဂဟေတွာ ပုရိမာနန္တရံ ဝုတ္တသိက္ခာပဒဒွယဉ္စ ဂဟေတဗ္ဗန္တိ ဒီပေတိ။ နိဿဇ္ဇိတွာ လဒ္ဓါနိပီတိ ယောဇနာ။ ‘‘အပီ’’တိ ဣမိနာ ‘‘အညေန ကတံ ပဋိလဘိတွာ ပရိဘုဉ္ဇတိ၊ အာပတ္တိ ဒုက္ကဋဿာ’’တိ (ပါရာ။ ၅၅၅) ဝုတ္တဒုက္ကဋဉ္စ ‘‘နိဿဂ္ဂိယံ စီဝရံ အနိဿဇ္ဇိတွာ ပရိဘုဉ္ဇတိ၊ အာပတ္တိ ဒုက္ကဋဿာ’’တိ (ပါရာ။ ၄၆၈) ပဌမနိဿဂ္ဂိယသိက္ခာပဒေ ဝုတ္တနယေန ဣဟာပိ ‘‘နိဿဂ္ဂိယံ သန္ထတံ အနိဿဇ္ဇိတွာ ပရိဘုဉ္ဇတိ၊ အာပတ္တိ ဒုက္ကဋဿာ’’တိ ဝုတ္တမ္ပိ ဓမ္မသင်္ဂဟကာရကေဟိ ပေယျာလဝသေန သံခိတ္တံ တံ ဒုက္ကဋဉ္စာတိ ဣဒံ ဒွယံ သင်္ဂဟိတန္တိ ဒဋ္ဌဗ္ဗံ။

၆၇၉။ တတိယံ တု ကြိယာကြိယန္တိ ဣဒံ တတိယသိက္ခာပဒံ ပန ‘‘ဒွေ ဘာဂါ သုဒ္ဓကာဠကာန’’န္တိအာဒိနာ (ပါရာ။ ၅၅၄) ဝုတ္တနယေန အဂ္ဂဟေတွာ ကာဠကာနံ အတိရေကဂ္ဂဟဏဝသေန အနနုညာတပ္ပကာရေန ကရဏတော ကိရိယာကိရိယံ နာမ။ ယထာဟ အဋ္ဌကထာယံ ‘‘အာဒါယ စ အနာဒါယ စ ကရဏတော ကိရိယာကိရိယ’’န္တိ (ပါရာ။ အဋ္ဌ။ ၂။၅၅၂)။

ဒွေဘာဂကထာဝဏ္ဏနာ။

၆၈၀။ ဆန္နံ ¶ ဝဿာနံ ဩရေနာတိ ပုဗ္ဗေ သန္ထတဿ ကတဒိဝသတော ပဋ္ဌာယ ဥပရိ ဆန္နံ ဝဿာနံ အဗ္ဘန္တရေတိ အတ္ထော။ ဟောတိ နိဿဂ္ဂိယာပတ္တီတိ ဆဗ္ဗဿန္တရေ ကတသန္ထတံ နိဿဂ္ဂိယံ ဟောတိ၊ ကာရကဿ စ ပါစိတ္တိယံ ဟောတီတိ အတ္ထော။ ဘိက္ခုသမ္မုတိံ ဌပေတွာတိ သန္ထတံ ဂဟေတွာ အဒ္ဓါနမဂ္ဂံ ပဋိပဇ္ဇိတုံ အသမတ္ထဿ ဂိလာနဿ ‘‘အဟံ ဘန္တေ ဂိလာနော ¶ န သက္ကောမိ သန္ထတံ အာဒါယ ပက္ကမိတုံ၊ သောဟံ ဘန္တေ သင်္ဃံ သန္ထတသမ္မုတိံ ယာစာမီ’’တိ (ပါရာ။ ၅၅၉) သင်္ဃမဇ္ဈေ နိသဇ္ဇ အဉ္ဇလိံ ပဂ္ဂဟေတွာ တိက္ခတ္တုံ ယာစိတေ ဉတ္တိဒုတိယာယ ကမ္မဝါစာယ ဂတဋ္ဌာနေ ဆဗ္ဗဿာနံ အန္တောပိ သန္ထတံ ကာတုံ သင်္ဃေန ဒိန္နသမ္မုတိံ ဝိနာတိ အတ္ထော။

၆၈၂။ ဆဗ္ဗဿာနိ ကရောန္တဿာတိ ဧတ္ထ ‘‘ယဒါ ပရိပုဏ္ဏာနိ၊ တဒါ’’တိ သေသော၊ ဆဗ္ဗဿေသု ပရိပုဏ္ဏေသု သန္ထတံ ကရောန္တဿာတိ အတ္ထော။ ယထာဟ အဋ္ဌကထာယံ ‘‘ယဒါ ဆဗ္ဗဿာနိ ပရိပုဏ္ဏာနိ ဟောန္တိ၊ တဒါ သန္ထတံ ကရောတီ’’တိ (ပါရာ။ အဋ္ဌ။ ၂။၅၅၇)။ တဒုဒ္ဓမ္ပီတိ ဆဗ္ဗဿတော ဥပရိပိ။ ဝိတာနေတိ ဝိတာနနိမိတ္တံ ကရောန္တဿ။ သာဏိပါကာရေတိ ပါကာရသဒိသတိရောကရဏီယနိမိတ္တံ ကရောန္တဿ။ နိဿဇ္ဇိတွာ ကတေပိ စာတိ ပုရာဏသန္ထတေ အညဿ ဒတွာ အညသ္မိံ သန္ထတေ ဩရတော ဆန္နံ ဝဿာနံ ကတေပိ စ အနာပတ္တီတိ ယောဇနာ။ အယမနာပတ္တိဝါရော နေဝ ပါဠိယံ၊ န အဋ္ဌကထာသု ဒိဿတိ၊ တသ္မာ သော အာစရိယပရမ္ပရာဘတော အာစရိယေန ဒဿိတောတိ ဝိညာယတိ။ သာဓာရဏဝိနိစ္ဆယံ ပန ‘‘အနန္တရဿိမဿာပိ၊ ဝိသေသော နုပလဗ္ဘတီ’’တိ ဝက္ခတိ။

ဆဗ္ဗဿကထာဝဏ္ဏနာ။

၆၈၃။ အနာဒါယာတိ နဝံ နိသီဒနသန္ထတံ ကရောန္တေန ဘိက္ခုနာ တဿ ဝိဝဏ္ဏကရဏတ္ထာယ ပါဠိယံ ‘‘ပုရာဏသန္ထတဿ သာမန္တာ သုဂတဝိဒတ္ထိ အာဒါတဗ္ဗာ ဒုဗ္ဗဏ္ဏကရဏာယာ’’တိ (ပါရာ။ ၅၆၇) ယာ အာဒါတုံ ဝုတ္တာ၊ တံ ပုရာဏသန္ထတဿ ဆိန္နမုခါဝတ္တတော သုဂတဝိဒတ္ထိံ အဒတွာ။ ဧဝမေတံ ဝုတ္တန္တိ ကထံ ဝိညာယတီတိ? ‘‘အနာဒါနဝသေနဿ၊ သုဂတဿ ဝိဒတ္ထိယာ’’တိ ဝက္ခမာနေန ဝိညာယတိ။ သန္ထတေတိ ဧတ္ထ ‘‘ပုရာဏေ’’ဣတိ စ ကာရေတုံ ကတဉ္စာတိ ဧတ္ထ ‘‘နဝံ နိသီဒနံ သန္ထတ’’န္တိ စ သေသော ¶ ၊ ပုရာဏေ သန္ထတေ အသန္တေ သာမန္တာ သုဂတဝိဒတ္ထိံ အနာဒါယ နဝံ နိသီဒနသန္ထတံ ကရောန္တဿ အနာပတ္တိ။ အညဿတ္ထာယ နဝံ နိသီဒနသန္ထတံ ကာရေတုံ၊ နဝံ နိသီဒနသန္ထတံ အညေန ကတံ ပဋိလဘိတွာ ပရိဘုဉ္ဇိတုဉ္စ အနာပတ္တီတိ ယောဇနာ။

‘‘အညဿတ္ထာယ ¶ ကာရေတု’’န္တိ ဣဒမေတ္ထ ပါစိတ္တိယေနေဝ အနာပတ္တိဒဿနန္တိ ဂဟေတဗ္ဗံ။ တသ္မာ ‘‘အညဿတ္ထာယ ကရောတိ ဝါ ကာရာပေတိ ဝါ၊ အာပတ္တိ ဒုက္ကဋဿာ’’တိ (ပါရာ။ ၅၆၉) ဝုတ္တတ္တာ စ အဋ္ဌကထာယ၊ တဗ္ဗဏ္ဏနာသု စ အဒိဿမာနတ္တာ ဝါ တံ န ဝတ္တဗ္ဗံ။ ‘‘အနာပတ္တိ ဆဗ္ဗဿာနိ ကရောတိ…ပေ… အညဿတ္ထာယ ကရောတိ ဝါ ကာရာပေတိ ဝါ’’တိ (ပါရာ။ ၅၆၄) အနန္တရသိက္ခာပဒေ ဝုတ္တမောလောကေတွာ ဝါ ဒုက္ကဋဿ စ ဝိဟိတတ္တာ ပါစိတ္တိယေန အနာပတ္တိဘာဝံ သန္ဓာယ လိခိတန္တိ ဝိညာယတိ။ ကတဉ္စ ပရိဘုဉ္ဇိတုန္တိ ဧတ္ထ ‘‘အညေနာ’’တိ ဝတ္တဗ္ဗံ၊ ဣမိနာ ‘‘အညေန ကတံ ပဋိလဘိတွာ ပရိဘုဉ္ဇတိ၊ အနာပတ္တီ’’တိ ပါဌောဝ ဒဿိတော။

၆၈၄။ သုဂတဿ ဝိဒတ္ထိယာ အနာဒါနဝသေန စ အဿ သန္ထတဿ ကရဏေန စ သတ္ထာရာ ဧတံ သိက္ခာပဒံ ကိရိယာကိရိယံ ဝုတ္တန္တိ ယောဇနာ။

၆၈၅။ နနု စ ဣမဿ သိက္ခာပဒဿ အဋ္ဌကထာယ ‘‘သမုဋ္ဌာနာဒီနိ ကိရိယာကိရိယတ္တာ ဣမဿ သိက္ခာပဒဿ ဒွေဘာဂသိက္ခာပဒသဒိသာနီ’’တိ (ပါရာ။ အဋ္ဌ။ ၂။၅၆၇) ဝုတ္တာနိ၊ ဣဟ ‘‘သဉ္စရိတ္တသမာ’’တိ ကသ္မာ ဝုတ္တာနီတိ? ဝုစ္စတေ – ဒွေဘာဂသိက္ခာပဒေ ‘‘သမုဋ္ဌာနာဒီနိပိ ကောသိယသိက္ခာပဒသဒိသာနေဝါ’’တိ (ပါရာ။ အဋ္ဌ။ ၂။၅၅၂) အဋ္ဌကထာယ ဝုတ္တာနိ၊ ကောသိယသိက္ခာပဒေ သမုဋ္ဌာနာဒီနံ သဉ္စရိတ္တေန သမဘာဝဿ ဝုတ္တတ္တာ၊ မူလမေဝ သရိတွာ ကိရိယာကိရိယသင်္ခါတဝိသေသဿ ¶ ဝိသုံ ဒဿိတတ္တာ အဝသိဋ္ဌဝိနိစ္ဆယမတ္တံ သန္ဓာယ ဧဝံ ဝုတ္တန္တိ ဂဟေတဗ္ဗံ။ ဣမံ ဝိသေသံ မုဉ္စိတွာ အဝသိဋ္ဌဝိနိစ္ဆယေန ဒွီသု သိက္ခာပဒေသု သာဓာရဏဝိနိစ္ဆယဿ အဝိသေသတံ ဒဿေတုမာဟ ‘‘အနန္တရဿာ’’တိအာဒိ။

နိသီဒနသန္ထတကထာဝဏ္ဏနာ။

၆၈၆-၇။ ဂစ္ဆန္တေတိ တိယောဇနပူရဏဋ္ဌာနံ အတိက္ကမ္မ ဂစ္ဆန္တေ။ ယာနေတိ သကဋာဒိကေ။ လောမာနီတိ ဧဠကလောမာနိ။ သာမိကဿာတိ ယာနာဒိသာမိနော။ အဇာနတောတိ အနာဒရေ သာမိဝစနံ။ အဒ္ဓါနမဂ္ဂပဋိပန္နော ယော ပန ဘိက္ခု ဧဠကလောမံ လဘိတွာ ‘‘တိယောဇနပရမံ သဟတ္ထာ ဟာရေတဗ္ဗာနီ’’တိ (ပါရာ။ ၅၇၃) အနုညာတတ္တာ တိယောဇနဗ္ဘန္တရေ သဟတ္ထေနာပိ ဟရိတွာ တိယောဇနာတိက္ကမေ ပရေသံ ယာနာဒီသု သာမိကေသု အဇာနန္တေသု ‘‘ဧတေ ဟရိဿန္တီ’’တိ စိန္တေတွာ ယဒိ ဌပေယျာတိ အတ္ထော။ တေသူတိ ယေသု ဧဠကလောမာနိ ဌပိတာနိ၊ တေသု ယာနာဒီသု တိယောဇနမတီတေသု ¶ ဘိက္ခုဿ ပယောဂံ ဝိနာပိ တိယောဇနံ အတိက္ကန္တေသု တဿ ဘိက္ခုနော အာပတ္တိ ဟောတီတိ ယောဇနာ၊ တဿ ဘိက္ခုနော ‘‘ပဌမံ ပါဒံ တိယောဇနံ အတိက္ကာမေတိ၊ အာပတ္တိ ဒုက္ကဋဿ။ ဒုတိယံ ပါဒံ အတိက္ကာမေတိ၊ နိဿဂ္ဂိယံ ပါစိတ္တိယ’’န္တိ (ပါရာ။ ၅၇၃) ဝုတ္တတ္တာ ဒုက္ကဋပါစိတ္တိယာ ဟောန္တီတိ အတ္ထော။

အယံ နယောတိ ဘိက္ခုနော ပယောဂံ ဝိနာ ယတ္ထ ဧဠကလောမာနိ ဌပိတာနိ၊ တေသု ယာနာဒီသု တိယောဇနံ အတိက္ကမန္တေသု အာပတ္တိ ဟောတီတိ အယမတ္ထော ဒဋ္ဌဗ္ဗောတိ အတ္ထော။

၆၈၈။ အဂစ္ဆန္တေတိ တိယောဇနဗ္ဘန္တရေ ဌိတေ။ ‘‘အဘိရူဟိတွာ’’တိ ဣဒံ အနာပတ္တိကာရဏေသု ဧကံ ဒဿေတုမာဟ။ ‘‘ဘူမိယဉှိ ¶ ဌတွာ ဒေန္တော၊ အဝှာယန္တော ဝါ ပုရတော ဂစ္ဆတိ၊ ဧသေဝနယော’’တိ အဋ္ဌကထာယံ ဝုတ္တံ။ အနာပတ္တိဝါရေ ‘‘အညံ ဟရာပေတီ’’တိ ဝစနတော အတ္တနာ ပေသိတေ အညသ္မိံ ဟရန္တေ ဝဋ္ဋတီတိ ဒဿေတုမာဟ ‘‘သစေ သာရေတိ ဝဋ္ဋတီ’’တိ။ တေနေဝါဟ ‘‘တံ ပနညံ ဟရာပေတိ၊ ဝစနေန ဝိရုဇ္ဈတီ’’တိ။

၆၉၀။ ကဏ္ဏစ္ဆိဒ္ဒေသူတိ အတ္တနော ကဏ္ဏဗိလေသု။

၆၉၁။ အနာပတ္တိဝါရေ ‘‘ကတဘဏ္ဍ’’န္တိ ဝုတ္တတ္တာ တတ္ထ အန္တမသော သုတ္တကေန ဗဒ္ဓမတ္တမ္ပိ ကတဘဏ္ဍမေဝါတိ အာဟ ‘‘သုတ္တကေန စ ဗန္ဓိတွာ’’တိ။ ဝေဏိံ ကတွာတိ ကုဒြူသသီသပလာလဝေဏိသဒိသံ ဝေဏိံ ကတွာ။ အာပတ္တိ ပရိဒီပိတာတိ ‘‘ဝေဏိံ ကတွာ ဟရတိ၊ ဣဒံ နိဓာနမုခံ နာမ၊ အာပတ္တိယေဝါ’’တိ (ပါရာ။ အဋ္ဌ။ ၂။၅၇၅) အဋ္ဌကထာယံ ဝုတ္တံ။

၆၉၂။ သုင်္ကဃာတန္တိ ဧတ္ထ ‘‘တံ ဌာန’’န္တိ သေသော၊ ယဒိ တံ ဌာနံ သုင်္ကဃာတန္တိ ယောဇနာ၊ တိယောဇနောသာနဋ္ဌာနံ ယဒိ သုင်္ကဃာတဋ္ဌာနံ ဘဝေယျာတိ အတ္ထော။ အနုပ္ပတွာတိ တံ ဌာနံ ပတွာ။ စောရာဒီဟိ ဥပဒ္ဒုတော ဝါ ဂစ္ဆတိ၊ ယော အညဝိဟိတော ဝါ ဂစ္ဆတီတိ ယောဇနာ။ အာပတ္တီတိ ဧတ္ထ အာပတ္တိ တဿ ဂစ္ဆတောတိ လဗ္ဘတိ။ ဧတ္ထ ‘‘အာပတ္တီ’’တိ ဣမိနာ သိက္ခာပဒေန အာပတ္တိမာဟ။ ဣမိဿာ အစိတ္တကတာယ တေသံ ဒွိန္နမ္ပိ ဟောတိ။ အဒိန္နာဒါနပါရာဇိကံ ပန သစိတ္တကတာယ ဧတေသံ န ဟောတိ။ တေနာဟ အဋ္ဌကထာယံ ‘‘ယာ ဟိ တတ္ထ အာပတ္တိ၊ သာ ဣဓ အနာပတ္တိ။ ယာ ဣဓ အာပတ္တိ၊ သာ တတ္ထ အနာပတ္တီ’’တိ (ပါရာ။ အဋ္ဌ။ ၂။၅၇၂)။ ထေယျစိတ္တေန ဟရတော ဘဏ္ဍဂ္ဃဝသေန ပါရာဇိကထုလ္လစ္စယဒုက္ကဋေသု ¶ ဧကံ ဟောတိ။ တေနာဟ အဋ္ဌကထာယံ ¶ ‘‘အဒိန္နာဒါနေ ပန သုင်္ကဃာတေ အာပတ္တိ ဟောတီ’’တိ (ပါရာ။ အဋ္ဌ။ ၂။၅၇၂)။

၆၉၃။ တိယောဇနန္တိ ဧတ္ထ ဟရဏကိရိယာယ အစ္စန္တသံယောဂေ ဥပယောဂဝစနံ။ ‘‘ဟရန္တဿာ’’တိ ဣမဿ ကမ္မဒီပကံ ‘‘လောမာနီ’’တိ ဣဒံ ပကရဏတော လဗ္ဘတိ။ ‘‘အနာပတ္တိ ပကာသိတာ’’တိ ဣဒံ သဗ္ဗတ္ထ ဝက္ခမာနေန သမ္ဗန္ဓနီယံ။ တာနိယေဝ ပစ္စာဟရန္တဿာတိ ယောဇနာ။ တိယောဇနန္တိ ဧတ္ထ တံယေဝ တိယောဇနန္တိ လဗ္ဘတိ။ အတ္တနာ ဂတံ တိယောဇနံ ပုန တာနေဝ လောမာနိ ဂဟေတွာ ပစ္စာဂစ္ဆန္တဿာတိ အတ္ထော။

၆၉၄။ နိဝါသတ္ထာယ ဝါ ဂန္တွာတိ တိယောဇနဗ္ဘန္တရေ ဝါ သီမာယ ဝါ အာဝါသေ ဝသိတုကာမတာယ ဂန္တွာ။ တတော ပရံ ဟရန္တဿာတိ တသ္မိံ အာဝါသေ ဥဒ္ဒေသာဒိံ အလဘိတွာ တတော ပရံ အညသ္မိံ အာဝါသေ ဝသိတုကာမတာယ ပုနပိ တိယောဇနံ ဟရန္တဿာတိ အတ္ထော။ ဣမိနာဝ နယေန တတောပိ အညံ ဌာနံ၊ တတောပိ အညန္တိ သုဒ္ဓစိတ္တေန ဂတဂတဋ္ဌာနတော ပုနပိ ပရမ္ပရံ ဌာနံ ဂမနဝသေန ယောဇနသတမ္ပိ ဟရတော ဒေါသော နတ္ထီတိ ဣဒမ္ပိ ဝုတ္တံ ဟောတိ။ ယထာဟ အဋ္ဌကထာယံ ‘‘ဧဝံ ယောဇနသတမ္ပိ ဟရန္တဿ အနာပတ္တီ’’တိ (ပါရာ။ အဋ္ဌ။ ၂။၅၇၅)။ အစ္ဆိန္နံ ဝါပိ လဘိတွာ ဟရတောပီတိ ‘‘စောရာဝဟဋပရိစ္စတ္တံ လဘိတွာ ဟရန္တဿ။ ဣဓ သဗ္ဗတ္ထေဝ ‘‘နိဝါသတ္ထာယ ဝါ ဂန္တွာ’’တိအာဒိကေ အနာပတ္တိဝါရေ ပဌမလဒ္ဓဋ္ဌာနတော ပဘုတိ အတိရေကတိယောဇနမ္ပိ ဟရန္တဿ အနာပတ္တီတိ အတ္ထော ဝိညာယတိ။ နိဿဋ္ဌံ လဘိတွာတိ နိဿဇ္ဇိတွာ ဝိနယကမ္မံ ကတွာ ဒိန္နံ လဘိတွာ။

၆၉၅။ အညေနာတိ တာနိ ဟာရိနာ အညေန။ ကတဘဏ္ဍကန္တိ ‘‘ကမ္ဗလကောဇဝသန္ထတာဒိံ ယံ ကိဉ္စိ အန္တမသော သုတ္တကေန ¶ ဗဒ္ဓမတ္တမ္ပီ’’တိ (ပါရာ။ အဋ္ဌ။ ၂။၅၇၅) အဋ္ဌကထာယံ ဝုတ္တဧဠကလောမေဟိ ကတဘဏ္ဍကံ။

၆၉၆။ ဣဒံ သမုဋ္ဌာနန္တိ ဣဒံ ဧဠကလောမသမုဋ္ဌာနံ။ ပဏ္ဏတ္တိံ အဇာနနတာယ ဝါ ဉတွာပိ စီဝရာဒိပရိက္ခာရေသု လောမဿ အလ္လိနဘာဝံ အဇာနိတွာပိ ဝါ တိယောဇနံ အတိက္ကာမေန္တဿ အရဟတောပိ ဣမာယ အာပတ္တိယာ သမ္ဘဝတော ‘‘အစိတ္တ’’န္တိ အာဟ။

ဧဠကလောမကထာဝဏ္ဏနာ။

၆၉၇။ ဧဠကလောမဓောဝါပနကထာ ¶ ဥတ္တာနာယေဝ။

ဧဠကလောမဓောဝါပနကထာဝဏ္ဏနာ။

၆၉၈။ ဂဏှေယျ ဝါတိ ဧတ္ထ ‘‘ယော’’တိ သေသော။ ‘‘ဂဏှေယျ ဝါ ဂဏှာပေယျ ဝါ’’တိ ဣမိနာ ‘‘တတ္ထတ္တနော ပနတ္ထာယာ’’တိ ဝက္ခမာနတ္တာ စ ‘‘နိဿဇ္ဇိတွာ’’တိအာဒိဝစနတော စ အတ္တနော အတ္ထာယ ဥဂ္ဂဏှေယျ ဝါ ဥဂ္ဂဏှာပေယျ ဝါတိ ဝုတ္တံ ဟောတိ။ ဝါကာရေန ‘‘ဥပနိက္ခိတ္တံ ဝါ သာဒိယေယျာ’’တိ ဣဒံ သင်္ဂဏှာတိ၊ ‘‘ဣဒံ အယျဿ ဟောတူ’’တိ ဥပနိက္ခိတ္တံ စေ သာဒိယတီတိ အတ္ထော။

ရဇတန္တိ အညတ္ထ သဇ္ဈု ဝုစ္စတိ၊ ဣဓ ပန ဝေါဟာရူပဂကဟာပဏာဒိ ဝုစ္စတိ။ ဝုတ္တဉှေတံ ပါဠိယံ ‘‘ရဇတံ နာမ ကဟာပဏော လောဟမာသကော ဒါရုမာသကော ဇတုမာသကော၊ ယေ ဝေါဟာရံ ဂစ္ဆန္တီ’’တိ (ပါရာ။ ၅၈၄)။ ဣဓ ကဟာပဏာဒီနံ သရူပံ အဋ္ဌကထာယံ –

‘‘တတ္ထ ကဟာပဏောတိ သောဝဏ္ဏမယော ဝါ ရူပိယမယော ဝါ ပါကတိကော ဝါ။ လောဟမာသကောတိ တမ္ဗလောဟာဒီဟိ ကတမာသကော။ ဒါရုမာသကောတိ ¶ သာရဒါရုနာ ဝါ ဝေဠုပေသိကာယ ဝါ အန္တမသော တာလပဏ္ဏေပိ ရူပံ ဆိန္ဒိတွာ ကတမာသကော။ ဇတုမာသကောတိ လာခါယ ဝါ နိယျာသေန ဝါ ရူပံ သမုဋ္ဌာပေတွာ ကတမာသကော။ ‘ယေ ဝေါဟာရံ ဂစ္ဆန္တီ’တိ ဣမိနာ ပန ပဒေန ယော ယော ယတ္ထ ယတ္ထ ဇနပဒေ ယဒါ ယဒါ ဝေါဟာရံ ဂစ္ဆတိ၊ အန္တမသော အဋ္ဌိမယောပိ စမ္မမယောပိ ရုက္ခဖလဗီဇမယောပိ သမုဋ္ဌာပိတရူပေါပိ အသမုဋ္ဌာပိတရူပေါပိ သဗ္ဗော သင်္ဂဟိတော’’တိ (ပါရာ။ အဋ္ဌ။ ၂။၅၈၃-၅၈၄) –

ဝုတ္တနယေန ဝေဒိတဗ္ဗံ။

ဧတ္ထ စ ပါကတိကော နာမ ဧတရဟိ ပကတိကဟာပဏော။ ရုက္ခဖလဗီဇမယောတိ တိန္တိဏိကာဒိရုက္ခာနံ ဖလဗီဇေန ကတော။

ဇာတရူပကံ သုဝဏ္ဏံ။ ယထာဟ ပါဠိယံ ‘‘ဇာတရူပံ နာမ သတ္ထုဝဏ္ဏော ဝုစ္စတီ’’တိ (ပါရာ။ ၅၈၄)။ နိဿဇ္ဇိတွာတိ ¶ ဧတ္ထ ‘‘တေနာ’’တိ လဗ္ဘတိ၊ ‘‘ဘိက္ခုနာ’’တိ ဣမိနာ ယုဇ္ဇတိ၊ ဧဝံ သာဒိတဘိက္ခုနာတိ အတ္ထော။ နိဿဇ္ဇိတွာတိ အတ္တနာ ဥဂ္ဂဟိတံ ဝါ ပရေန ဥဂ္ဂဟာပိတံ ဝါ ဥပနိက္ခိပိတဿ သာဒိယနဝသေန သာဒိတံ ဝါ ရဇတံ ဝါ ဇာတရူပံ ဝါ ‘‘တေန ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ’’တိ (ပါရာ။ ၅၈၄) ဝစနတော သင်္ဃမဇ္ဈေ ဥပသင်္ကမိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂယှ ‘‘အဟံ ဘန္တေ ရူပိယံ ပဋိဂ္ဂဟေသိံ၊ ဣဒံ မေ နိဿဂ္ဂိယံ၊ ဣမာဟံ နိဿဇ္ဇာမီ’’တိ နိဿဇ္ဇိတွာတိ ဝုတ္တံ ဟောတိ။

အာပတ္တိ ¶ ဒေသေတဗ္ဗာဝါတိ အတ္တနာ ဧဝ အာပန္နံ နိဿဂ္ဂိယံ ပါစိတ္တိယံ တသ္မိံ သင်္ဃမဇ္ဈေ ဧဝမေဝ နိသီဒိတွာ ဒေသေတဗ္ဗာ။ ဧဝံ ဒေသိတာ အာပတ္တိ သင်္ဃာနုမတေန ဗျတ္တေန ပဋိဗလေန ဘိက္ခုနာ ပဋိဂ္ဂဟေတဗ္ဗာ။ ဝုတ္တဉှေတံ ‘‘ဗျတ္တေန ဘိက္ခုနာ ပဋိဗလေန အာပတ္တိ ပဋိဂ္ဂဟေတဗ္ဗာ’’တိ (ပါရာ။ ၅၈၄)။

၆၉၉။ ရဇတန္တိ ရူပိယံ။ ဇာတရူပန္တိ သုဝဏ္ဏံ။ ဣမိနာ ပဒဒွယေန ကတာကတံ သဗ္ဗံ သင်္ဂဏှာတိ။ ဥဘိန္နံ မာသကောတိ ဇာတရူပမာသကော၊ ရဇတမာသကောပိ စာတိ ဝုတ္တံ ဟောတိ။ ဣဓ ရဇတမာသကောတိ ‘‘ရဇတ’’န္တိ ပဒဘာဇနေ (ပါရာ။ ၅၈၄) ဝုတ္တကဟာပဏာဒိ ပဉ္စပ္ပကာရော မာသကော ဂဟိတော။ ယထာဟ အဋ္ဌကထာယံ ‘‘ဝုတ္တပ္ပကာရော သဗ္ဗောပိ ရဇတမာသကော’’တိ (ပါရာ။ အဋ္ဌ။ ၂။၅၈၃-၅၈၄)။ ဣဓ ‘‘ဇာတရူပမာသကော’’တိ ဝိသုံ ဂဟိတတ္တာ ကဟာပဏပဒေန သုဝဏ္ဏကဟာပဏံ ဝဇ္ဇေတွာ ဣတရဒွယမေဝ ဝတ္တဗ္ဗံ။ ‘‘နိဿဂ္ဂိယာဝဟ’’န္တိ ဣဒံ အတ္တနော အတ္ထာယ ဥဂ္ဂဏှနဥဂ္ဂဏှာပနသာဒိယနာနိ ကရောန္တံ သန္ဓာယာဟ။ ‘‘တတ္ထာ’’တိအာဒိနာ ဝက္ခမာနနယေန ဒုက္ကဋာဝဟဉ္စ ဟောတေဝ။

၇၀၀-၁။ မုတ္တာဒီနံ ဣမသ္မိံ သိက္ခာပဒဝိဘင်္ဂေ အဝုတ္တတ္တေပိ ပါစိတ္တိယကဏ္ဍေ နဝမဝဂ္ဂေ ဒုတိယဿ ရတနသိက္ခာပဒဿ ပဒဘာဇနေ ‘‘ရတနံ နာမ မုတ္တာ မဏိ ဝေဠုရိယော သင်္ခေါ သိလာ ပဝါလံ ရဇတံ ဇာတရူပံ လောဟိတင်္ကော မသာရဂလ္လ’’န္တိ (ပါစိ။ ၅၀၆) ဝုတ္တာနံ ဒသန္နံ ရတနာနံ ဣမသ္မိံ သိက္ခာပဒေ နိဿဂ္ဂိယဝတ္ထုံ ကတွာ ဝုတ္တံ ရဇတံ၊ ဇာတရူပဉ္စ ဝဇ္ဇေတွာ အဝသိဋ္ဌာနံ အဋ္ဌန္နံ ရတနာနံ ဒုက္ကဋဝတ္ထုဘာဝေါ ဣမဿ အဋ္ဌကထာယံ ဝဝတ္ထာပိတောတိ ဒဿနတ္ထမာဟ ‘‘မုတ္တာ…ပေ… မသာရဂလ္လ’’န္တိ။ ဧတ္ထ ဝေဠုရိယော ဂါထာဗန္ဓဝသေန န ဝုတ္တော ¶ ၊ သော ဧကယောဂနိဒ္ဒိဋ္ဌာနံ ¶ သတ္တန္နံ ရတနာနံ ဂဟဏေနေဝ ဂယှတိ။ မုတ္တာဒယော ယထာဒဿိတသရူပါယေဝ။ ဗြဟ္မဇာလာဒိသုတ္တန္တဝသေနာပိ ‘‘အကပ္ပိယာ’’တိ သိဒ္ဓါနံ သတ္တဓညာဒီနံ ပဋိဂ္ဂဟဏေ အာပတ္တိံ ဒဿေတုမာဟ ‘‘ဓညာနီ’’တိအာဒိ။

၇၀၂။ ရတနသိက္ခာပဒေယေဝ ‘‘ရတနသမ္မတ’’န္တိ အာဂတံ ကပ္ပိယဝတ္ထုံ ပဋိဂ္ဂဏှတော အနာပတ္တိဘာဝံ ဒဿေတုမာဟ ‘‘မုဂ္ဂမာသာဒိက’’န္တိအာဒိ။

၇၀၃-၄။ ဧဝံ တိပ္ပကာရေန ဌိတံ ဝတ္ထုံ ဂဏှတော အဓိပ္ပာယနာနတ္တေန သမ္ဘဝန္တံ အာပတ္တိပ္ပဘေဒံ ဒဿေတုမာဟ ‘‘တတ္ထာ’’တိအာဒိ။ တတ္ထာတိ တေသု တီသု နိဿဂ္ဂိယာဒိဝတ္ထူသု။ သင်္ဃာဒီနန္တိ သင်္ဃဂဏပုဂ္ဂလစေတိယာဒီနံ။ တန္တိ နိဿဂ္ဂိယဝတ္ထုံ။ သဗ္ဗတ္ထာယာတိ သဗ္ဗေသံ အတ္ထာယာတိ ဝိဂ္ဂဟော။ အတ္တနော အတ္ထာယ စ သင်္ဃာဒီနမတ္ထာယ စ ဒုက္ကဋဝတ္ထုံ ဂဏှန္တဿာပိ ဒုက္ကဋမေဝ ဟောတီတိ အတ္ထော။ အဝုတ္တသမုစ္စယေနေတ္ထ စ-သဒ္ဒေန ‘‘သဗ္ဗမ္ပိ နိက္ခိပနတ္ထာယ ဘဏ္ဍာဂါရိကသီသေန သမ္ပဋိစ္ဆတော ဥပရိ ရတနသိက္ခာပဒေ အာဂတဝသေန ပါစိတ္တိယ’’န္တိ (ပါရာ။ အဋ္ဌ။ ၂။၅၈၃-၅၈၄) အဋ္ဌကထာယ ဝုတ္တဝိနိစ္ဆယဝိသေသဿ သင်္ဂဟော ကတော။

၇၀၅။ ကဟာပဏာဒီနန္တိ အာဒိ-သဒ္ဒေန သုဝဏ္ဏာဒီနံ သင်္ဂဟော။ ‘‘သဟဿ’’န္တိ ဣဒံ ဥပလက္ခဏံ၊ သဟဿမ္ပီတိ ဝုတ္တံ ဟောတိ။

၇၀၆။ ထဝိကာဒီသူတိ အာဒိ-သဒ္ဒေန သိထိလပူရိတာနိ ဘာဇနာနိ ဂဟိတာနိ။ ‘‘သိထိလဗဒ္ဓေသူ’’တိ ဝိသေသနေန ဗျတိရေကဝသေန ‘‘ဃနဗဒ္ဓေ၊ ပန ဃနပူရိတေ ဝါ ဧကာဝ အာပတ္တီ’’တိ (ပါရာ။ အဋ္ဌ။ ၂။၅၈၃-၅၈၄) အဋ္ဌကထာသေသံ ဒီပေတိ။

၇၀၇။ ဥပနိက္ခိတ္တသာဒိယနကမ္မံ ¶ ဒဿေတုမာဟ ‘‘ဣဒ’’န္တိအာဒိ။ ဂဏှိတုကာမောပီတိ ဧတ္ထ ‘‘ဟောတူ’’တိ သေသော။ နိသေဓေတဗ္ဗမေဝါတိ ကာယေန ဝါ ဝါစာယ ဝါ ‘‘ဣဒံ န ကပ္ပတီ’’တိ ပဋိက္ခိပိတဗ္ဗမေဝ၊ ဧဝံ သတိ အနာပတ္တိယေဝါတိ အတ္ထော။ အယမတ္ထော အဋ္ဌကထာယံ ‘‘ကာယဝါစာဟိ ဝါ အပ္ပဋိက္ခိပိတွာပိ သုဒ္ဓစိတ္တော ဟုတွာ ‘နယိဒံ အမှာကံ ကပ္ပတီ’တိ န သာဒိယတိ၊ အနာပတ္တိယေဝါ’’တိ (ပါရာ။ အဋ္ဌ။ ၂။၅၈၃-၅၈၄) အာဂတောယေဝ။

၇၀၈။ တံ ¶ ဝတ္ထုန္တိ တထာ ပဋိက္ခိတ္တံ ဝတ္ထုံ။ ဌပေတွာ ယဒိ ဂစ္ဆတီတိ ‘‘တုမှေ ဂဏှထ ဝါ၊ မာ ဝါ၊ ဒိန္နံ ဒိန္နမေဝါ’’တိ သစေ သော ဌပေတွာဝ ဂစ္ဆတိ။ ယထာ တံ န ဝိနဿတိ၊ တထာ တံ ဂေါပယိတဗ္ဗန္တိ ယောဇနာ။ ‘‘အညော တတ္ထ အာဂန္တွာ ပုစ္ဆတီ’’တိအာဒိနာ အဋ္ဌကထာယ ဝုတ္တနယေန တတ္ထာဂတေန ကပ္ပိယကာရကေန ‘‘ကိမိဒ’’န္တိ ပုစ္ဆိတေ သရူပံ အာဝိ ကတွာ ‘‘ဂေါပယိဿာမဟံ ဘန္တေ၊ ဂုတ္တဋ္ဌာနံ ဒဿေထာ’’တိ ဝုတ္တေ ‘‘ဣမံ ဂဟေတွာ ဧဟီ’’တိ အဝတွာ သတ္တဘူမိကမ္ပိ ပါသာဒံ အဘိရုဟိတွာ ‘‘ဣဓ ဌပေဟီ’’တိ အဝတွာ ‘‘ဣဒံ ဂုတ္တဋ္ဌာန’’န္တိ သုရက္ခိတဋ္ဌာနံ ဒဿေတွာ တတ္ထ ဌပိတေ အဂ္ဂဠံ ဒတွာ ရက္ခိတဗ္ဗန္တိ ဝုတ္တံ ဟောတိ။

၇၀၉။ ဂုတ္တဋ္ဌာနံ ဂဟေတွာ ဂစ္ဆန္တဿ ကပ္ပိယကာရကဿ အဝတ္တဗ္ဗဝေါဟာရံ ဒဿေတုမာဟ ‘‘အာဟရေဒမိဒ’’န္တိအာဒိ။ အကပ္ပိယန္တိ ဧတ္ထ ‘‘ဝစန’’န္တိ လဗ္ဘတိ။ ဧဝံ အကပ္ပိယဝစနံ အဝတွာ သုရက္ခိတဋ္ဌာနေ အာဟရိတွာ ဌပိတေ ကိံ ကာတဗ္ဗန္တိ? ဝိက္ကာယိကေ ပတ္တစီဝရာဒိကပ္ပိယဘဏ္ဍေ အာဟဋေ ‘‘အမှာကံ ဣမိနာ အတ္ထော၊ ဣမဿ ဧဝရူပံ မူလမ္ပိ အတ္ထိ၊ ကပ္ပိယကာရကော ဧဝ နတ္ထီ’’တိ ဝတွာ တေန ‘‘အဟံ ကပ္ပိယကာရကော၊ မယှံ ဒဿေထာ’’တိ ဝုတ္တေ သစေ ရုစ္စတိ၊ ဒွါရံ ဝိဝရိတွာ ‘‘ဣဒံ ဂဏှာ’’တိ အဝတွာ ‘‘ဧတ္ထ ဌပိတ’’န္တိ ဒဿေတွာ တသ္မိံ တဿ အဂ္ဃပ္ပမာဏံ ¶ ဂဟေတွာ ဒေန္တေ အဓိဝါသေတဗ္ဗံ။ အတိရေကံ ဂဏှန္တေ ‘‘မယံ တုမှာကံ ဘဏ္ဍံ န ဂဏှာမ၊ ဂစ္ဆထာ’’တိ နီဟရိတွာ အဂ္ဂဠံ ဒတွာ ကပ္ပိယကာရကေ လဒ္ဓေ ‘‘အမှာကံ ဧဝရူပေန အတ္ထော၊ ဣဒံ နာမ မူလံ အတ္ထီ’’တိ ဝတွာ တေန ကိဏိတွာ ဒိန္နေ အဓိဝါသေတဗ္ဗန္တိ အဋ္ဌကထာယံ ဝုတ္တနယေန ပဋိပဇ္ဇိတဗ္ဗံ။

၇၁၀။ ဌပေတွာ ရူပိယဂ္ဂါဟန္တိ အနန္တရသိက္ခာပဒေ ဝက္ခမာနသရူပံ သုဝဏ္ဏာဒိရူပိယံ ပဋိဂ္ဂဟေတွာ နိဿဇ္ဇိတွာ ဒေသိတာပတ္တိကံ ပုဂ္ဂလံ ဌပေတွာ။ နိဿဋ္ဌပရိဝတ္တိတန္တိ ဧတ္ထ နိဿဇ္ဇိတွာ အာပတ္တိယာ ဒေသိတာယ ‘‘သစေ တတ္ထ အာဂစ္ဆတိ အာရာမိကော ဝါ ဥပါသကော ဝါ’’တိအာဒိနာ (ပါရာ။ ၅၈၄) ပဒဘာဇနေ ဝုတ္တနယေန တတ္ထာဂတံ ကပ္ပိယကာရကံ ‘‘အာဝုသော ဣမံ ဇာနာ’’တိ ဝတွာ ‘‘ဣမိနာ ကိံ အာဟရိယျတူ’’တိ တေန ဝုတ္တေ ‘‘ဣမံ ဝါ ဣမံ ဝါ အာဟရာ’’တိ အဝတွာ ‘‘ကပ္ပိယံ အာစိက္ခိတဗ္ဗံ သပ္ပိ ဝါ တေလံ ဝါ မဓု ဝါ ဖာဏိတံ ဝါ’’တိ (ပါရာ။ ၅၈၄) ဝုတ္တတ္တာ ဘိက္ခူနံ ကပ္ပိယဝတ္ထုမတ္တေ အာစိက္ခိတေ တေန နိဿဋ္ဌဝတ္ထုံ ပရိဝတ္တေတွာ အာဟဋံ ကပ္ပိယဘဏ္ဍန္တိ အတ္ထော။

၇၁၁။ အတ္တနော ¶ ပတ္တဘာဂမ္ပီတိ တထာ အာဟဋေ ကပ္ပိယဘဏ္ဍေ သင်္ဃဿ ဘာဇိယမာနေ အတ္တနော ဝဿဂ္ဂေန အတ္တနော ပတ္တကောဋ္ဌာသမ္ပိ။ ပဋိဂ္ဂါဟကဘိက္ခုနောတိ ရူပိယံ ပဋိဂ္ဂဟေတွာ အာပဇ္ဇိတွာ နိဿဇ္ဇိတွာ ဒေသိတာပတ္တိကဿ ဘိက္ခုနော န ဝဋ္ဋတီတိ သမ္ဗန္ဓော။ အညတောတိ အတ္တတော အညသ္မာ ပဗ္ဗဇိတမနုဿာမနုဿတိရစ္ဆာနဂတိတ္ထိပုရိသာနံ အညတရတော။ လဒ္ဓန္တိ တေဟိ အတ္တနာ လဒ္ဓကောဋ္ဌာသတော ဒိန္နဝသေနပိ လဒ္ဓံ တံ ဝတ္ထုံ။

၇၁၂။ ယံ ကိဉ္စိ ပစ္စယန္တိ တံ ဝတ္ထုံ ပရိဝတ္တေတွာ ဂဟိတေသု စတူသု ပစ္စယေသု အညတရမ္ပိ ပစ္စယံ။ အန္တမသော ပထဝိံ ခဏိတွာ ¶ ဥပ္ပာဒိတောဒကမ္ပိ ဒါရူဟိ အာဒိတ္တအဂ္ဂိမ္ပိ တေလေန ဇလိတပဒီပမ္ပိ ရုက္ခေ ဝါ ဂေဟေ ဝါ ပကတိဆာယမ္ပိ တာလပဏ္ဏမ္ပိ ဥပဘောဂပရိဘောဂါရဟံ အညမ္ပိ ယံ ကိဉ္စီတိ အဋ္ဌကထာယ ဝုတ္တနယံ ဣမိနာဝ သင်္ဂဟိတန္တိ ဂဟေတဗ္ဗံ။ ယထာဟ အဋ္ဌကထာယံ ‘‘အန္တမသော မက္ကဋာဒီဟိ တတော ဟရိတွာ အရညေ ဌပိတံ ဝါ တေသံ ဟတ္ထတော ဂဠိတွာ တိရစ္ဆာနပရိဂ္ဂဟိတမ္ပိ ပံသုကူလမ္ပိ န ဝဋ္ဋတိယေဝါ’’တိအာဒိ (ပါရာ။ အဋ္ဌ။ ၂။၅၈၃-၅၈၄)၊ ‘‘ရူပိယပဋိဂ္ဂါဟကဿ ပန ကေနစိ ပရိယာယေန တတော ဥပ္ပန္နပစ္စယပရိဘောဂေါ န ဝဋ္ဋတီ’’တိ (ပါရာ။ အဋ္ဌ။ ၂။၅၈၅) စာတိ။ ဘိက္ခုနောတိ ရူပိယပဋိဂ္ဂါဟကဿ ဘိက္ခုဿ။

၇၁၃။ အဇ္ဈာရာမေ ဝါတိ ဥပရိ ဝက္ခမာနလက္ခဏေန ပရိစ္ဆိန္နေ အဇ္ဈာရာမေ ဝါ။ တံ ရူပိယံ၊ ‘‘ပတိတံ ဒိသွာ’’တိ သေသော။ အဇ္ဈာဝသထေပိ ဝါတိ ဝက္ခမာနလက္ခဏေ အန္တောအာဝါသေ စ။ နိက္ခိပန္တဿာတိ ‘‘ယဿ ဘဝိဿတိ၊ သော ဟရိဿတီ’’တိ ဝုတ္တေ ဌာနေ တသ္မိံ ဝတ္ထုသ္မိံ ဂဏနဉ္စ ဥပလက္ခဏဉ္စ သလ္လက္ခေတွာ ဌပေန္တဿ။

၇၁၄။ တိကပါစိတ္တိယံ ဝုတ္တန္တိ ‘‘ရူပိယေ ရူပိယသညီ၊ ဝေမတိကော၊ အရူပိယသညီ ရူပိယံ ပဋိဂ္ဂဏှာတိ၊ နိဿဂ္ဂိယံ ပါစိတ္တိယ’’န္တိ (ပါရာ။ ၅၈၆) ဘဂဝတာ ပါစိတ္တိယံ ဝုတ္တံ။ ဒုက္ကဋန္တိ ဧတ္ထ ‘‘ဒွိကဒုက္ကဋ’’န္တိ သာမတ္ထိယာ လဗ္ဘတိ။

၇၁၅။ ကြိယာကြိယန္တိ ဂဟဏေန အာပဇ္ဇနတော ကိရိယံ။ ပဋိက္ခေပဿ အကရဏတော အကိရိယန္တိ။

ရူပိယပဋိဂ္ဂဟဏကထာဝဏ္ဏနာ။

၇၁၆-၇။ နိဿဂ္ဂိယဿာပိ ¶ ဝတ္ထုန္တိ ‘‘နိဿဂ္ဂိယပါစိတ္တိယဿ ဝတ္ထူ’’တိ ပဌမသိက္ခာပဒေ နိဒ္ဒိဋ္ဌေသု ရဇတာဒီသု စတူသု အညတရံ ¶ ဝတ္ထုံ။ ဒုက္ကဋဿ စ ဝတ္ထုံ ဝါတိ ပဌမံ ဒဿိတမုတ္တာဒိဒုက္ကဋဝတ္ထူသု အညတရံ ဝါ၊ ဣဟောဘယတ္ထ ဟေတုဖလသမ္ဗန္ဓေ သာမိဝစနံ။ ကပ္ပိယဿ စ ဝတ္ထုံ ဝါတိ ယထာဒဿိတေသု ဧဝ မုဂ္ဂမာသာဒိကပ္ပိယဝတ္ထူသု အညတရံ ဝါ၊ ဣဟ အဝယဝါဝယဝိသမ္ဗန္ဓေ သာမိဝစနံ။ အဝယဝါဝယဝီနံ အဘေဒေပိ ဘေဒူပစာရဝသေန ယထာ ‘‘သိလာပုတ္တကဿ သရီရ’’န္တိ ကပ္ပိယဝတ္ထုန္တိ ဝုတ္တံ ဟောတိ ‘‘ကပ္ပိယေန ဝတ္ထုနာ’’တိ ဝက္ခမာနတ္တာ။ ဣဒါနေတ္ထ ဒုက္ကဋဝတ္ထုနော၊ ကပ္ပိယဝတ္ထုနော စ နိဿဂ္ဂိယဝတ္ထုနာ ပရိဝတ္တိတတ္တာ အာပတ္တိ ဟောတီတိ ဂဟေတဗ္ဗံ။ နိဿဂ္ဂိယဝတ္ထုနာ ယော ပရိဝတ္တေတိ၊ တဿ အာပတ္တီတိ ယောဇနာ။

ဒုက္ကဋဿ ဝတ္ထုနာ၊ ကပ္ပိယေန စ ဝတ္ထုနာ ဝတ္ထုံ နိဿဂ္ဂိယဿ ပရိဝတ္တေတိ၊ အာပတ္တီတိ ယောဇနာ။ ဣဓ ဥဘယတ္ထာပိ ပရိဝတ္တိတဿ နိဿဂ္ဂိယဝတ္ထုတ္တာ အာပတ္တိ ဟောတိ။ ဧဝံ တီသုပိ ဌာနေသု ‘‘အာပတ္တီ’’တိ သာမညဝစနေန နိဿဂ္ဂိယပါစိတ္တိယမေဝ ဝုတ္တန္တိ ပကရဏတော လဗ္ဘတိ။

၇၁၈။ ဒုက္ကဋဿေဝ ဝတ္ထုနာ ဒုက္ကဋဿ စ ဝတ္ထုံ ဝါ ပရိဝတ္တေတိ၊ ဒုက္ကဋန္တိ ယောဇနာ။ ‘‘ဝတ္ထုံ ဝါ ကပ္ပိယဿာ’’တိ ဣဒံ ဝုတ္တနယမေဝ၊ ကပ္ပိယဝတ္ထုန္တိ ဝုတ္တံ ဟောတိ။ ဣမဿ ကပ္ပိယဝတ္ထုနောပိ ဒုက္ကဋဝတ္ထုနာ ပရိဝတ္တိတတ္တာ ဒုက္ကဋံ ဟောတီတိ ဂဟေတဗ္ဗံ။

၇၁၉။ ‘‘ဝတ္ထုနာ ကပ္ပိယဿာ’’တိ ဣဒမ္ပိ ဝုတ္တနယမေဝ။ ကပ္ပိယဝတ္ထုနာပိ ပရိဝတ္တိတေ ဒုက္ကဋဝတ္ထုဝသေန ဒုက္ကဋံ ဟောတီတိ အာဟ ‘‘တထာ’’တိ။

၇၂၀။ ‘‘တထာ’’တိ ဣမိနာ ‘‘ဝတ္ထုနော’’တိ ဣဒံ အာကဍ္ဎတိ။ ‘‘နိဿဂ္ဂိယဿာ’’တိ ဣမိနာ ပါစိတ္တိယမာဟ။ ပုဗ္ဗန္တိ ပဌမံ၊ ပုဗ္ဗေ ¶ ဝုတ္တရူပိယပဋိဂ္ဂဟဏသိက္ခာပဒေတိ ဝုတ္တံ ဟောတိ။ ဣမိနာတိ ရူပိယသံဝေါဟာရသိက္ခာပဒေန။ ပရိဝတ္တနံ ဝါရိတန္တိ သမ္ဗန္ဓော။

၇၂၁။ ရူပိယန္တိ စ သညိဿာတိ ‘‘ရူပိယံ နာမ သတ္ထုဝဏ္ဏော ကဟာပဏော လောဟမာသကော ဒါရုမာသကော ဇတုမာသကော၊ ယေ ဝေါဟာရံ ဂစ္ဆန္တီ’’တိ (ပါရာ။ ၅၈၉) ပဒဘာဇနေ ဝုတ္တေသု ရူပိယသညိတေသု ဝတ္ထူသု ‘‘အညတရ’’န္တိ သညိဿ။ အရူပိယေတိ ခရပတ္တာဒိမှိ။ တေန အရူပိယေန။ ‘‘စေတာပေန္တဿ အရူပိယ’’န္တိ ပဒစ္ဆေဒေါ။ ‘‘အရူပိယေ ရူပိယသညီ ရူပိယံ စေတာပေတိ ¶ ၊ နိဿဂ္ဂိယံ ပါစိတ္တိယ’’န္တိ (ပါရာ။ ၅၉၁) ဝုတ္တတ္တာ ရူပိယပရိဝတ္တနေ ဒုက္ကဋဿ အဘာဝတော၊ ပါစိတ္တိယဿ စ သမ္ဘဝတော ရူပိယံ န ဂဟေတဗ္ဗံ။ အရူပိယေ ရူပိယံ ဣတိ သညိဿ စ ဝိမတိဿ စ အရူပိယံ စေတာပေန္တဿ တေန ဒွေ ဒုက္ကဋာနိ ဟောန္တီတိ ယောဇနာ။

၇၂၂။ အရူပိယေ အရူပိယန္တိ သညိဿာတိ ဧတ္ထ ‘‘အရူပိယံ ပရိဝတ္တေန္တဿာ’’တိ သေသော။ ပဉ္စဟီတိ သဟတ္ထေ ကရဏဝစနံ၊ ‘‘သဟဓမ္မိကေဟီ’’တိ သေသော၊ ပဉ္စဟိ သဟဓမ္မိကေဟိ သဒ္ဓိန္တိ အတ္ထော။ ဝဒတောတိ ဝေါဟရတော၊ ကယဝိက္ကယံ ကရောန္တဿာတိ အတ္ထော။ ဘိက္ခုဘိက္ခုနိသာမဏေရသာမဏေရိသိက္ခမာနာသင်္ခါတေဟိ ပဉ္စဟိ သဟဓမ္မိကေဟိ အရူပိယံ ပရိဝတ္တေန္တဿ အနာပတ္တီတိ အတ္ထော။

၇၂၃။ သံဝေါဟာရေန သမုဋ္ဌာနတော ကြိယသမုဋ္ဌာနံ။

ရူပိယသံဝေါဟာရကထာဝဏ္ဏနာ။

၇၂၄။ ကပ္ပိယံ နာမ ‘‘စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရာ၊ အန္တမသော စုဏ္ဏပိဏ္ဍောပိ ဒန္တကဋ္ဌမ္ပိ ဒသိကသုတ္တမ္ပီ’’တိ ¶ ပဒဘာဇနေ ဝုတ္တာနိ ကပ္ပိယဝတ္ထူနိ။ ယထာဟ အဋ္ဌကထာယံ ‘‘စီဝရာဒီနံ ကပ္ပိယဘဏ္ဍာနံ ဝသေန အနေကဝိဓ’’န္တိ။ ကပ္ပိယေနေဝါတိ တေနေဝ ကပ္ပိယေန ဝတ္ထုနာ။ ‘‘ကယဝိက္ကယံ သမာပဇ္ဇေယျာတိ ‘ဣမိနာ ဣမံ ဒေဟိ၊ ဣမိနာ ဣမံ အာဟရ၊ ဣမိနာ ဣမံ ပရိဝတ္တေဟိ၊ ဣမိနာ ဣမံ စေတာပေဟီ’တိ အဇ္ဈာစရတီ’’တိ (ပါရာ။ ၅၉၅) ဝစနတော ‘‘ပရိဝတ္တယတော’’တိ ဣမဿ ‘‘ကယဝိက္ကယံ သမာပဇ္ဇတော’’တိ ပရိယာယော။

တတ္ထ အညဿ ဟတ္ထတော ကပ္ပိယဝတ္ထုနာ ပရိဝတ္တေတွာ ဂဟဏံ ကယော နာမ။ အတ္တနော ဟတ္ထတော ကပ္ပိယဝတ္ထုံ ပရိဝတ္တေတွာ ဒါနံ ဝိက္ကယော။ ယထာဟ အဋ္ဌကထာယံ ‘‘ဣမိနာ ဣမံ ဒေဟီ’တိအာဒိနာ ဟိ နယေန ပရဿ ကပ္ပိယဘဏ္ဍံ ဂဏှန္တော ကယံ သမာပဇ္ဇတိ၊ အတ္တနော ကပ္ပိယံ ဒေန္တော ဝိက္ကယ’’န္တိ။ ‘‘ဌပေတွာ သဟဓမ္မိကေ’’တိ ဝုတ္တတ္တာ ပရိဝတ္တယတောတိ ဧတ္ထ အညေဟိ သဒ္ဓိန္တိ လဗ္ဘတိ။ ဧတ္ထ အညေ နာမ ဂိဟိနော ဣတ္ထိပုရိသာ၊ သာသနတော ဗာဟိရာ ပဗ္ဗဇိတာ စ။ တသ္မာ အယံ ကယဝိက္ကယော အန္တမသော မာတာပိတူဟိပိ န ကာတဗ္ဗောယေဝ။ ယထာဟ အဋ္ဌကထာယံ ‘‘အယဉှိ ကယဝိက္ကယော ¶ ဌပေတွာ ပဉ္စ သဟဓမ္မိကေ အဝသေသေဟိ ဂိဟိပဗ္ဗဇိတေဟိ အန္တမသော မာတာပိတူဟိပိ သဒ္ဓိံ န ဝဋ္ဋတီ’’တိ (ပါရာ။ အဋ္ဌ။ ၂။၅၉၅)။

၇၂၅။ အကပ္ပိယဿ ဝတ္ထုဿာတိ ဣမသ္မိံ သိက္ခာပဒေ ဝုတ္တစီဝရာဒိကပ္ပိယဝတ္ထုတော အညဿ နိဿဂ္ဂိယဒုက္ကဋဝတ္ထုဿ။ တေနေဝါတိ အကပ္ပိယဝတ္ထုနာယေဝ။ ‘‘ကပ္ပိယဿ စာ’’တိ ပါဌသေသော၊ တေနေဝ အကပ္ပိယေန ဝတ္ထုနာ ကပ္ပိယဿ ဝတ္ထုဿ ပရိဝတ္တနဉ္စာတိ ယောဇနာ။ ဧဝဉှိ ပါဌသေသေ အကတေ အကပ္ပိယေန ဝတ္ထုနာ ကပ္ပိယဿ ပရိဝတ္တနံ ကယဝိက္ကယေ သင်္ဂဟေတဗ္ဗံ သိယာ၊ တံ န ယုဇ္ဇတိ တဿ ရူပိယသံဝေါဟာရေယေဝ သင်္ဂဟိတတ္တာ၊ ဣဓ စ ‘‘ကပ္ပိယဝတ္ထုဿေဝ ကပ္ပိယဝတ္ထုနာ ¶ ပရိဝတ္တနံ ကယဝိက္ကယော’’တိ နိယမိတတ္တာ။ နိဒ္ဒိဋ္ဌန္တိ ‘‘အကပ္ပိယဘဏ္ဍပရိဝတ္တနဉှိ ကယဝိက္ကယသင်္ဂဟံ န ဂစ္ဆတီ’’တိ (ပါရာ။ အဋ္ဌ။ ၂။၅၉၄) အဋ္ဌကထာယံ နိဒ္ဒိဋ္ဌန္တိ အတ္ထော။

၇၂၆။ တသ္မာတိ ယသ္မာ အညတြ သဟဓမ္မိကေဟိ ကပ္ပိယဝတ္ထုဿာပိ ကယဝိက္ကယော န ဝဋ္ဋတိ၊ အကပ္ပိယဿ၊ ကပ္ပိယဿ စ ဝတ္ထုနော အကပ္ပိယေနေဝ ဝတ္ထုနာ ပရိဝတ္တနဉ္စ ရူပိယသံဝေါဟာရေ သင်္ဂဟိတတ္တာ ကယဝိက္ကယသင်္ဂဟံ န ဂစ္ဆတိ၊ တသ္မာ။

၇၂၉။ ဣဒံ နာမာတိ ဩဒနာဒိကပ္ပိယဝတ္ထုမေဝ အာဟ။

၇၃၀-၁။ ‘‘ဂဟေတွာ’’တိအာဒိဂါထာယ ဝတ္ထုလက္ခဏဿ ဥဒါဟရဏံ ဒဿေတွာဝ အာပတ္တိဘေဒံ ဒဿေတုမာဟ ‘‘ဝိဃာသာဒ’’န္တိအာဒိ။ ဆလ္လိန္တိ ရုက္ခတစံ။ ဝလ္လိန္တိ လတံ။ ကဋ္ဌန္တိ ဣန္ဓနဒါရုံ။ ဒါရုန္တိ ဂေဟသမ္ဘာရာဒိဒါရုံ။ ဝိပလ္လာသေနာပိ ဝတ္တဗ္ဗံ ‘‘ဝလ္လိံ ဝါ ပန ဆလ္လိံ ဝါ၊ ဒါရုံ ဝါ ကဋ္ဌမေဝ ဝါ’’တိ။ ဝတ္ထူနန္တိ တထာ ဝတွာ အာဟရာပိတာနံ ဆလ္လိအာဒိဝတ္ထူနံ။ ကယဝိက္ကယေ အာပတ္တိယော ဟောန္တီတိ ယောဇနာ၊ နိဿဂ္ဂိယပါစိတ္တိယာပတ္တိယော ဟောန္တီတိ ဝုတ္တံ ဟောတိ။

၇၃၂။ ‘‘ဣတိ ဧဝါ’’တိ ပဒစ္ဆေဒေါ၊ ‘‘ပိဝိတွာ’’တိအာဒိနာ နယေန ပုဗ္ဗကာလေ ဝိဟိတပစ္စယန္တံ အကတွာ ဝုတ္တနယေနေဝါတိ အတ္ထော။

၇၃၃။ ဘူမိယာ လိမ္ပနေတိ ယောဇနာယံ ပန သေနာသနဘူမိယံ ပရိဘဏ္ဍကရဏကာဠကာဒိဝဏ္ဏကရဏဝသေန ¶ လေပနေ။ ဝတ္ထုဓောဝနေတိ စီဝရာဒိဝတ္ထူနံ ဓောဝနေ။ ဧတ္ထာတိ တေသု ဝုတ္တပ္ပကာရေသု။ ဧတေသံ ဂဟဏဿ ဥပလက္ခဏတ္တာ ဧဝရူပေသု အညေသု ဌာနေသု။

၇၃၄။ အယန္တိ ¶ ဘူမိသောဓနာဒိဝသေန အာပန္နာ ပါစိတ္တိယာပတ္တိ။

၇၃၅။ ဌပေတွာ ဘဏ္ဍသာမိကန္တိ ဧတ္ထ ဗျတိရေကဝသေန အညဿ ကပ္ပိယကာရဿာတိ လဗ္ဘတိ။

၇၃၆။ ဘာသတော အနာပတ္တီတိ ယောဇနာ။ သေသမေတ္ထ ဥတ္တာနမေဝ။

ကယဝိက္ကယကထာဝဏ္ဏနာ။

ကောသိယဝဂ္ဂေါ ဒုတိယော။

၇၃၇။ ကပ္ပိယာ ပတ္တာ မတ္တိကာယောမယာ ဇာတိတော ဒုဝေတိ ယောဇနာ။ ဝဏ္ဏာတိ ပမာဏာနိ။ ယထာဟ အဋ္ဌကထာယံ ‘‘တယော ပတ္တဿ ဝဏ္ဏာတိ တီဏိ ပတ္တဿ ပမာဏာနီ’’တိ (ပါရာ။ အဋ္ဌ။ ၂။၆၀၂)။ တေနာဟ ‘‘ဥက္ကဋ္ဌော မဇ္ဈိမောမကော’’တိ။

၇၃၈။ ဒွိန္နံ တဏ္ဍုလနာဠီနန္တိ သုကောဋ္ဋိတာနံ အခဏ္ဍာနံ ပုရာဏသာလိတဏ္ဍုလာနံ ဒွေ နာဠိယော ဂဟေတဗ္ဗာ။ ယထာဟ အဋ္ဌကထာယံ ‘‘အနုပဟတပုရာဏသာလိတဏ္ဍုလာနံ သုကောဋ္ဋိတပရိသုဒ္ဓါန’’န္တိ (ပါရာ။ အဋ္ဌ။ ၂။၆၀၂)။ ဘတ္တန္တိ အဝဿာဝိတံ အနုတ္တဏ္ဍုလံ အကိလိန္နံ အပိဏ္ဍိတံ သုဝိသဒံ ကုန္ဒမကုလရာသိသဒိသံ သုပက္ကောဒနမေဝ ဂဟေတဗ္ဗံ။ ယထာဟ အဋ္ဌကထာယံ ‘‘အနုတ္တဏ္ဍုလံ အကိလိန္နံ အပိဏ္ဍိတံ သုဝိသဒံ ကုန္ဒမကုလရာသိသဒိသံ အဝဿာဝိတောဒန’’န္တိ (ပါရာ။ အဋ္ဌ။ ၂။၆၀၂)။ မဂဓနာဠိယာတိ မဂဓရဋ္ဌေ နာဠိယာ၊ သာ နာဠိ တိလာနံ အဋ္ဌပသတာနိ ဂဏှာတိ။ တေနာဟု ပေါရာဏာ –

‘‘ခါရိဒသဒွယံ ¶ ဝါဟော၊ ခါရီ ဒေါဏဋ္ဌကဒွယံ၊

ဒွိအဋ္ဌနာဠိယော ဒေါဏော၊ နာဠေကာ ပသတဋ္ဌကံ၊

လက္ခံ တိလာနံ ပသတံ၊ ဧတံ ဝုတ္တံ ပမာဏတော’’တိ။

‘‘မဂဓနာဠိ ¶ နာမ အဍ္ဎတေရသပလာ ဟောတီ’’တိ (ပါရာ။ အဋ္ဌ။ ၂။၆၀၂) အန္ဓကဋ္ဌကထာယံ ဝုတ္တံ။ တဗ္ဗဏ္ဏနာယ ‘‘အဍ္ဎတေရသပလာနိ မာသေဟိ ဂဟေတဗ္ဗာနီ’’တိ ဝုတ္တံ။ ကေစိ ပနာဟု –

‘‘စတုပ္ပသတိကာ မုဋ္ဌိ၊ ပလဉ္စေတံ စတုဂ္ဂုဏံ၊

ကုဍုဝပ္ပသတဉ္စေဝ၊ စတ္တာရိ စေဝ နာဠိ တု။

‘‘သောယေဝ ပတ္ထော စတ္တာရော၊ ပတ္ထာ အဠှကမုစ္စတေ၊

အဠှကာနမ္ပိ စတ္တာရိ၊ ‘ဒေါဏော’တိ ပရိကိတ္တိတော’’တိ။

အာစရိယာ ပန ‘‘အဋ္ဌပသတာ မာဂဓနာဠီ’’တိ ပုဗ္ဗပက္ခမေဝ ရောစယန္တိ။

ခါဒနဉ္စ စတုဗ္ဘာဂန္တိ တသ္မိံ ဘတ္တေ စတုဓာ ဝိဘတ္တေ ဧကဘာဂမတ္တံ ဟတ္ထဟာရိယဃနမုဂ္ဂသူပန္တိ အတ္ထော။ ယထာဟ အဋ္ဌကထာယံ ‘‘တဿ ဩဒနဿ စတုတ္ထဘာဂပ္ပမာဏော နာတိဃနော နာတိတနုကော ဟတ္ထဟာရိယော သဗ္ဗသမ္ဘာရသင်္ခတော မုဂ္ဂသူပေါ ပက္ခိပိတဗ္ဗော’’တိ (ပါရာ။ အဋ္ဌ။ ၂။၆၀၂)။

ဗျဉ္ဇနဉ္စ တဒူပိယန္တိ ယာဝ စရိမာလောပံ၊ တာဝ သဗ္ဗာလောပါနုရူပံ မစ္ဆမံသာဒိဗျဉ္ဇနဉ္စ။ ယထာဟ အဋ္ဌကထာယံ ‘‘အာလောပဿ အာလောပဿ အနုရူပံ ယာဝစရိမာလောပပ္ပဟောနကံ မစ္ဆမံသာဒိဗျဉ္ဇနံ ပက္ခိပိတဗ္ဗ’’န္တိ။ ဧတ္ထ စ အာလောပဿ အာလောပဿ အနုရူပန္တိ ‘‘ဗျဉ္ဇနဿ မတ္တာ နာမ ဩဒနစတုတ္ထဘာဂေါ’’တိ (မ။ နိ။ အဋ္ဌ။ ၂။၃၈၇) ဗြဟ္မာယုသုတ္တဿ အဋ္ဌကထာယံ ဝုတ္တတ္တာ အာလောပဿ စတုတ္ထဘာဂပ္ပမာဏံ ဗျဉ္ဇနံ အာလောပဿ အနုရူပန္တိ ဂဟေတဗ္ဗံ။ ဣဓ ပန သူပဿေဝ ဩဒနစတုတ္ထဘာဂပ္ပမာဏံ ¶ ဒဿေတွာ ဧတဿ လက္ခဏေ ဒဿိတေ ဣတရဿာပိ ဒဿိတမေဝ ဟောတီတိ ဗျဉ္ဇနဿ တထာ ဝိသေသေတွာ ပမာဏံ န ဒဿိတံ။ ဩဒနေ ပက္ခိပိတဗ္ဗာနိ သပ္ပိတေလတက္ကရသကဉ္ဇိကာဒီနိ ဂဏနူပဂါနိ န ဟောန္တိ။

၇၃၉။ တံ သဗ္ဗန္တိ ယထာဝုတ္တဘတ္တာဒိနိရဝသေသံ။ ဂဏှတီတိ ဝက္ခမာနေဟိ တီဟိ ပကာရေဟိ ဂဏှာတိ။ တဿာတိ ဥက္ကဋ္ဌဿ ပတ္တဿ။ ဥပဍ္ဎောတိ တသ္မိံ ပတ္တေ ဂဏှနကဒဗ္ဗသမ္ဘာရဂါဟီ ပတ္တော တံသဟစရိယေန ¶ ‘‘ဥပဍ္ဎော’’တိ ဝုတ္တော။ တဒုပဍ္ဎော စာတိ ဧတ္ထာပိ ဧသေဝ နယော။ တဿ မဇ္ဈိမဿ ပတ္တဿ ဥပဍ္ဎော တဒုပဍ္ဎောတိ ဂဟေတဗ္ဗံ။

၇၄၀။ ဣမေသု တီသု ပတ္တေသု ဥက္ကဋ္ဌဿ ဝုတ္တံ ဩဒနာဒိ သဗ္ဗံ ယသ္မိံ ပတ္တေ ပက္ခိတ္တံ၊ တဿ မုခဝဋ္ဋိမတ္ထကေ ပုဉ္ဇိယမာနံ ဟီရကံ ဟေဋ္ဌာဘာဂေ ဖုသတိ၊ သော ဥက္ကဋ္ဌမဇ္ဈိမော နာမ၊ ဟီရတော အတိရေကံ တိဋ္ဌတိ၊ သော ဥက္ကဋ္ဌောမကော နာမ၊ အန္တောပတ္တေ မုခဝဋ္ဋိယာ ဟေဋ္ဌိမန္တံ အပ္ပတွာ တိဋ္ဌတိ၊ သော ဥက္ကဋ္ဌုက္ကဋ္ဌော နာမ၊ ဧဝံ မဇ္ဈိမော စ ဩမကော စ ပစ္စေကံ တိဝိဓော ဟောတီတိ သဗ္ဗေ နဝ ပတ္တာ ဟောန္တီတိ ဒဿေတုမာဟ ‘‘ဥက္ကဋ္ဌဿာ’’တိအာဒိ။ တဿေဝါတိ ဥက္ကဋ္ဌဿေဝ။ ဩမကော စ မဇ္ဈိမော စာတိ ဩမကမဇ္ဈိမာ။ ဣဓ မဇ္ဈိမော စ ဩမကော စ ဥက္ကဋ္ဌဿေဝ ဘေဒေါ။ ဧသ နယော ဣတရဒွယေပိ။ ‘‘ဧဝ’’န္တိ ဣမိနာ ယထာ ‘‘ဥက္ကဋ္ဌုက္ကဋ္ဌော ဥက္ကဋ္ဌောမကော ဥက္ကဋ္ဌမဇ္ဈိမော’’တိ ယောဇေတဗ္ဗော၊ ဧဝံ မဇ္ဈိမောမကာနမ္ပိ ယထာက္ကမယောဇနံ ဒဿေတိ ‘‘မဇ္ဈိမော မဇ္ဈိမုက္ကဋ္ဌော မဇ္ဈိမောမကော၊ ဩမကုက္ကဋ္ဌော ဩမကမဇ္ဈိမော ဩမကောမကော စာ’’တိ။

၇၄၁။ တေသူတိ ¶ နဝသု ပတ္တေသု။ တသ္မာတိ အပတ္တဘာဝတော။ န ဂစ္ဆန္တီတိ ဥက္ကဋ္ဌုက္ကဋ္ဌဉ္စ ဩမကောမကဉ္စာတိ ဒွေ အပေက္ခိတွာ ဗဟုဝစနံ ကတံ။ ဧတေ ဘာဇနသင်္ခေပေန ပရိဘုဉ္ဇိတဗ္ဗာတိ။ ယထာဟ အဋ္ဌကထာယံ ‘‘တသ္မာ ဧတေ ဘာဇနပရိဘောဂေန ပရိဘုဉ္ဇိတဗ္ဗာ’’တိ (ပါရာ။ အဋ္ဌ။ ၂။၆၀၂)။

၇၄၂။ ပတ္တလက္ခဏသံယုတန္တိ ဧတ္ထ ပတ္တလက္ခဏံ နာမ ယထာဝုတ္တပမာဏယုတ္တတာ၊ ‘‘အယောပတ္တော ပဉ္စဟိ ပါကေဟိ ပက္ကော မတ္တိကာပတ္တော ဒွီဟိ ပါကေဟိ ပက္ကော’’တိ (ပါရာ။ အဋ္ဌ။ ၂။၆၀၈) ဝုတ္တာ ပါကသမ္ပတ္တိ၊ ကိဏိတွာ ဂဏှာတိ စေ၊ တဿ ဒါတဗ္ဗမူလဿ အသေသေတွာ ဒိန္နဘာဝေါ၊ ဆိဒ္ဒါဘာဝေါ၊ ဆိန္နရာဇီနံ အဘာဝေါတိ ပဉ္စဝိဓံ။ ဟောတိ စေတ္ထ –

‘‘ပမာဏယုတ္တတာ ပါက-သမ္ပတ္တိ ဒိန္နမူလတာ၊

အစ္ဆိဒ္ဒါရာဇိတာ စေတိ၊ ပတ္တလက္ခဏပဉ္စက’’န္တိ။

‘‘အဓိဋ္ဌာယ ဝါ ဝိကပ္ပေတွာ ဝါ’’တိ ဝါ-သဒ္ဒေါ ယောဇေတဗ္ဗော။ အဓိဋ္ဌာယာတိ ပဌမံ ပရိဘုတ္တေ ပတ္တေ သတိ တံ ပစ္စုဒ္ဓရိတွာ အဓိဋ္ဌာတဗ္ဗပတ္တော ဟတ္ထပါသေ စေ ဟောတိ၊ ဝက္ခမာနနယေန ‘‘ဣမံ ပတ္တံ အဓိဋ္ဌာမီ’’တိ ¶ ဝစီဘေဒကရဏဝသေန ဝါစာယ ဝါ ဝစီဘေဒံ အကတွာ ဧဝမေဝ စိန္တေတွာ ဟတ္ထေန ဂဟေတွာ ဖန္ဒာပေန္တေန ကာယေန ဝါ ဒူရေ စေ ဟတ္ထပါသာ ဟောတိ၊ ဌပိတဋ္ဌာနံ သလ္လက္ခေတွာ ‘‘ဧတံ ပတ္တံ အဓိဋ္ဌာမီ’’တိ ဝါစာ ဘိန္ဒိတဗ္ဗာတိ အဋ္ဌကထာယံ (ပါရာ။ အဋ္ဌ။ ၂။၆၀၈ အတ္ထတော သမာနံ) ဝုတ္တနယေန ဧကကေန ဝါ ပစ္ဆာ သတိသမ္မောသေ သရာပေတွာ ကုက္ကုစ္စံ ဝူပသမေတုံ သမတ္ထဿ ပုဂ္ဂလဿ သန္နိဓာနေ ဝါ အဓိဋ္ဌာယာတိ ဝုတ္တံ ဟောတိ။ ‘‘အညဿ သန္တိကေ အဓိဋ္ဌာနေ အယမာနိသံသော – သစဿ ‘အဓိဋ္ဌိတော နု ခေါ မေ၊ နော’တိ ဝိမတိ ဥပ္ပဇ္ဇတိ၊ ဣတရော သာရေတွာ ဝိမတိံ ဆိန္ဒိဿတီ’’တိ ¶ (ပါရာ။ အဋ္ဌ။ ၂။၆၀၈) အယမတ္ထော အဋ္ဌကထာယံ ဝုတ္တော။ ‘‘ဒွေ ပတ္တေ အဓိဋ္ဌာတုံ န လဘတီ’’တိ ဂဏ္ဌိပဒေ ဝုတ္တံ။

ဝိကပ္ပေတွာတိ (ပါစိ။ ၃၇၃၊ ပါရာ။ အဋ္ဌ။ ၂။၆၀၈၊ ကင်္ကာ။ အဋ္ဌ။ ဝိကပ္ပနသိက္ခာပဒဝဏ္ဏနာ) တ္ထ ဝိကပ္ပေတဗ္ဗဿ ပတ္တဿ ဧကတ္တဗဟုတ္တံ၊ သန္နိဟိတာသန္နိဟိတတ္တဉ္စ သလ္လက္ခေတွာ ဧကံ စေ သန္နိဟိတံ၊ ‘‘ဣမံ ပတ္တံ တုယှံ ဝိကပ္ပေမီ’’တိ ဝါ ‘‘ဣမံ ပတ္တံ တိဿဿ ဘိက္ခုနော ဝိကပ္ပေမီ’’တိ ဝါ အာဒိနာ နယေန ဧကံ ဝိကပ္ပေတွာတိ ဝုတ္တံ ဟောတိ။ ဧတ္ထ ‘‘ပရိဘုဉ္ဇေယျာ’’တိ ဝုတ္တတ္တာ၊ ‘‘မယှံ သန္တကံ ပရိဘုဉ္ဇေဟိ ဝါ ဝိဿဇ္ဇေဟိ ဝါ ယထာပစ္စယံ ဝါ ကရောဟီ’’တိ တေန အပစ္စုဒ္ဓဋေ ပရိဘုဉ္ဇိတုံ အယုတ္တတ္တာ ‘‘ဝိကပ္ပေတွာ’’တိ ပစ္စုဒ္ဓဋဝိသေသော ဂဟေတဗ္ဗော။

၇၄၃။ ဓာရေယျာတိ အနဓိဋ္ဌဟိတွာ၊ အဝိကပ္ပေတွာ စ ပရိဘုဉ္ဇိတဗ္ဗော။ တံ ကာလံ ပတ္တံ အတိက္ကာမယတောတိ ယောဇနာ။ ‘‘နိဿဂ္ဂိယ’’န္တိ ဣမိနာပိ ‘‘ပတ္တ’’န္တိ ဣဒံ ယုဇ္ဇတိ။ ပတ္တ-သဒ္ဒေါ မာဂဓိကာနံ ဒွိလိင်္ဂကော၊ တသ္မာ ဧဝံ ဝုတ္တော။

၇၄၄။ အဓိဋ္ဌိတဝိကပ္ပိတေသု အနန္တောဂဓတ္တာ အတိရေကဘာဝံ ဒဿေတုမာဟ ‘‘ယံ ပတ္တ’’န္တိအာဒိ။

၇၄၅။ သမ္မုခေတိ အဍ္ဎတေယျဟတ္ထပ္ပဒေသတော အန္တော ဌိတံ ပတ္တံ။ ဒူရသ္မိန္တိ အဍ္ဎတေယျရတနတော ပရဘာဂေ ‘‘အန္တောဂဗ္ဘေ ဝါ ဥပရိပါသာဒေ ဝါ သာမန္တဝိဟာရေ ဝါ’’တိ အဋ္ဌကထာယံ ဝုတ္တပ္ပကာရေ ဒူရေပိ။ ယတ္ထ ကတ္ထစိ ဝိကပ္ပနကာလေပိ သန္တိကဒူရဝစနဘေဒါ ဧဝမေဝ ယောဇေတွာ ဝတ္တဗ္ဗာ။ ‘‘ဝိကပ္ပေတုံ ¶ ပန ဗဟူနိပိ လဗ္ဘတီ’’တိ ဂဏ္ဌိပဒေ ဝုတ္တံ။ အယံ နယောတိ ‘‘ဣမံ ပတ္တံ ပစ္စုဒ္ဓရာမီ’’တိအာဒိနယော။

၇၄၆။ ဝါစာကာယဝသေန ¶ ဒုဝိဓေ အဓိဋ္ဌာနေ ဝါစာဓိဋ္ဌာနံ ဒဿေတွာ ကာယာဓိဋ္ဌာနံ ဒဿေတုမာဟ ‘‘အာဘောဂ’’န္တိအာဒိ။ အာဘောဂန္တိ ‘‘ဣမံ ပတ္တံ အဓိဋ္ဌာမီ’’တိ အာဘောဂံ။ ‘‘မနသာ’’တိ ဣမိနာ န ဝစသာတိ ဝုတ္တံ ဟောတိ။ ကာယဝိကာရောဝ ကာယဝိကာရကံ၊ ဟတ္ထေန ဖန္ဒာပနာဒိကာယကိရိယာတိ အတ္ထော။ ဧတေနေဝ ကာယာဓိဋ္ဌာနံ ဟတ္ထေန အပတ္တဗ္ဗေ ဒူရေ န ကာတဗ္ဗန္တိ ဒဿေတိ။

၇၄၇-၈။ ‘‘ဇဟတိ အဓိဋ္ဌာန’’န္တိ ပဒစ္ဆေဒေါ။ ဒါနတောတိ အညဿ ဒါနေန။ ဘေဒကတောတိ ဘိဇ္ဇနေန။ နာသတောတိ ပတ္တသာမိကဿ ကာလကိရိယာယ။ ဝိဗ္ဘမတောတိ သိက္ခံ အပစ္စက္ခာယ ဂိဟိဘာဝူပဂမနေန။ ဥဒ္ဓါရတောတိ ပစ္စုဒ္ဓရဏေန။ ပစ္စက္ခတောတိ သိက္ခာပစ္စက္ခာနေန။ ပရိဝတ္တနတောတိ လိင်္ဂပရိဝတ္တနေန။ ဂါဟတောတိ ဝိဿာသဂ္ဂဟဏေန၊ အစ္ဆိန္ဒိတွာ ဂဟဏေန စ။

ကင်္ဂုသိတ္ထပ္ပမာဏေနာတိ သတ္တန္နံ ဓညာနံ ခုဒ္ဒကတရဿ ကင်္ဂုနော သိတ္ထပ္ပမာဏေန။ ခေနာတိ မုခဝဋ္ဋိယာ ဒွင်္ဂုလတော ဟေဋ္ဌာ အာကာသပရိယာယေန ဆိဒ္ဒေန။ အာဏိယာ ဝါတိ အယောမယာယ အာဏိယာ ဝါ။

၇၅၀-၁။ မဏိပတ္တောတိ မဏိနာ ကတော။ ဝေဠုရိယုဗ္ဘဝေါတိ မရကတမဏိမယော။ ဖလိကုဗ္ဘဝေါတိ ဖလိကပါသာဏေန ကတော။ ကာစမယောတိ ကာစမတ္တိကာမယော။ ကံသမယောတိ ကံသလောဟေန ကတော။ တိပုမယောတိ ကာဠတိပုမယော။ သီသမယောတိ သေတတိပုမယော။ ဝိပလ္လာသေန စ ဝဒန္တိ။ သဇ္ဈုမယောတိ ရဇတမယော။

၇၅၂။ ဃဋကဋာဟောတိ ဃဋကပါလံ။ သီသကဋာဟောတိ ဆဝသီသကပါလံ။ တုမ္ဗန္တိ အလာဗု။ အဿာတိ ဧကာဒသဝိဓဿ ¶ ပတ္တဿ။ အနုလောမိကန္တိ အကပ္ပိယဝသေန အနုလောမံ။ တတ္ထာတိ တသ္မိံ ဧကာဒသဝိဓေ။ တမ္ဗမယံ လောဟမယံ ထာလကံ ပန ဝဋ္ဋတီတိ ယောဇနာ၊ ပတ္တောယေဝ န ဝဋ္ဋတိ၊ တမ္ဗလောဟမယာ ထာလကာ ပန ဝဋ္ဋန္တီတိ အတ္ထော။

၇၅၃။ တဋ္ဋိကာဒီနီတိ ¶ အာဒိ-သဒ္ဒေန ဝဋ္ဋကာဒီနံ သင်္ဂဟော။ ဝဋ္ဋကန္တိ စ အဍ္ဎစန္ဒာကာရော လောဟာဒိမယော ဘာဇနိယဝိသေသော။ ပုဂ္ဂလဿာတိ ဘိက္ခုဿ။ ဂိဟီ စ သင်္ဃော စ ဂိဟိသင်္ဃာ၊ တေသံ သန္တကာ ဂိဟိသင်္ဃိကာ။

၇၅၄။ ယံ ကိဉ္စိ ပတ္တန္တိ သတ္တသု ပတ္တေသု ယံ ကိဉ္စိ ပတ္တံ။ ဝေါဒကံ ကတွာတိ ဝိဂတောဒကံ ကတွာ။ ပဋိသာမေယျာတိ နိက္ခေပါရဟဋ္ဌာနေ နိက္ခိပနဝသေန၊ ထဝိကာယ ပက္ခိပိတွာ ဗန္ဓနဝသေန ဝါ သင်္ဂေါပေယျ။

၇၅၅။ ဩတာပေတုန္တိ အာတပေ၊ အဂ္ဂိမှိ ဝါ တာပေတုံ။ ဥဏှေတိ တသ္မိံယေဝ ဥဏှေ။ န နိဒဟေတဗ္ဗောတိ န ဈာပေတဗ္ဗော။ သီသာပနယနမေဝ န ဝဋ္ဋတီတိ န နိဒဟေတဗ္ဗောတိ အတ္ထော အဓိကနိဝါရဏေနေဝ ဝိညာယတိ။

၇၅၆။ မိဍ္ဎန္တေတိ မိဍ္ဎိယာ အန္တေ။ ပရိဘဏ္ဍန္တေတိ ပမုခေ မဟာမိဍ္ဎိယာ အန္တေ။ ‘‘ဝိတ္ထိဏ္ဏေတိ အန္တမသော ဒွိပတ္တမတ္တောကာသဝိတ္ထာရေ’’တိ ကေစိ။ ဌပေတုံ ပန ဝဋ္ဋတီတိ ယောဇနာ၊ ဝလယာဒိအာဓာရေန ဝိနာပိ ဌပေတုံ ဝဋ္ဋတီတိ အတ္ထော။ ‘‘မိဍ္ဎိယာ ပမုခေ မိဍ္ဎိယာ စ ခရဘူမိပဒေသာဒီသု စ ဝလယမတ္ထကေ ဌပေတုံ ဝဋ္ဋတီ’’တိ ဝဒန္တိ။

၇၅၇။ ဒါရုအာဓာရကေတိ ဥဒုက္ခလသဒိသေ ဒါရုမယေ အာဓာရေ။ ဒွေ ပတ္တေ ဌပေတုမ္ပိ ဝဋ္ဋတီတိ ပတ္တမတ္ထကေ အပရဿာပိ ပတ္တဿ ဌပနဝသေန ဒွေ ပတ္တေ ဌပေတုမ္ပိ ဝဋ္ဋတိ။ အပိ-သဒ္ဒေန ¶ ဧကသ္မိံ ဝတ္တဗ္ဗမေဝ နတ္ထီတိ ဒဿေတိ။ အယမေဝ နယောတိ ‘‘ဒွေပိ ပတ္တေ ဌပေတုံ ဝဋ္ဋတီ’’တိ အယံ နယော။ ဒဏ္ဍဘူမိအာဓာရကေသူတိ ဧတ္ထ ဒဏ္ဍာဓာရော နာမ ဗဟူဟိ ဒဏ္ဍေဟိ ကတော။ ဘူမိအာဓာရကော နာမ ဘူမိယံ ကတော အာလဝါလဝလယာကာရော သိလိဋ္ဌာဓာရော။ ‘‘ဒန္တဝေတ္တလတာဒိမယော ဘူမိအာဓာရကော’’တိ ကေစိ။

၇၅၈-၉။ တဋ္ဋိကာယာတိ တာလပဏ္ဏာဒီဟိ ကတတဋ္ဋိကာယ။ ပေါတ္ထကေတိ မကစိဝါကမယေ ဝါ ရုက္ခဝါကမယေ ဝါ အတ္ထရဏေ။ ကဋသာရကေတိ တာလပဏ္ဏာဒီဟိ ဝီတေ အတ္ထရဏေ။ ပရိဘဏ္ဍကတာယာတိ ကတဂေါမယပရိဘဏ္ဍာယ။ အပိ-သဒ္ဒေန သုဓာကမ္မံ ကတွာ ပါသာဏေန ဃံသိတွာ မဋ္ဌကတာယ ဘူမိယာ ဝတ္တဗ္ဗမေဝ နတ္ထီတိ ဒဿေတိ။ ဝါလုကာသု ဝါတိ လေဍ္ဍုပါသာဏသက္ခရကပါလာဒိအမိဿာသု သဏှသုခုမဝါလုကာသူတိ ¶ ဝုတ္တံ ဟောတိ။ တေနေဝါဟ ‘‘တထာရူပါသူ’’တိအာဒိ။ ရဇမှိ သန္တေပိ အသန္တေပိ ဝိသုံယေဝ ‘‘ခရဘူမိယာ န ဌပေတဗ္ဗ’’န္တိ ဝုတ္တတ္တာ ‘‘သရဇာယာ’’တိ ဣမိနာ ရဇောကိဏ္ဏံ သဏှဘူမိမာဟ။ ခရဘူမိယာတိ ဖရုသဘူမိယာ။

၇၆၀။ လဂ္ဂေတုန္တိ ဩလမ္ဗေတုံ။ ဒဏ္ဍကောဋိယာ၊ နာဂဒန္တကောဋိယာ စ ပတ္တမုခေန ပက္ခိပိတွာ ဌပနမ္ပိ လဂ္ဂနံ နာမ။ ဆတ္တင်္ကမဉ္စပီဌေသူတိ ဆတ္တေ၊ အင်္ကေ၊ မဉ္စပီဌေ စ။

၇၆၁။ အဋနီသူတိ အင်္ဂေသု။ ဗန္ဓိတွာတိ ထဝိကာယ အံသဝဒ္ဓနကာဒိနာ ယေန ကေနစိ ဗန္ဓိတွာ။ ဩလမ္ဗေတုမ္ပီတိ လဂ္ဂေတုမ္ပိ။ ‘‘ဌပေတုံ ဥပရီ’’တိ ပဒစ္ဆေဒေါ။

၇၆၂။ မဉ္စပီဌဋ္ဋကေတိ မဉ္စပီဌေသု ဌပိတပတ္တာ ယထာ န ပတန္တိ၊ တထာ အဋနိမတ္ထကေ ဒါရုနာ ပရိက္ခေပေ ကတေ မဉ္စပီဌဋ္ဋကာ ¶ နာမ ဟောန္တိ၊ တာဒိသေ မဉ္စပီဌဋ္ဋကေ ဌပေတုံ ဝဋ္ဋတီတိ အတ္ထော။ ဘတ္တပူရောပီတိ ဘတ္တဿ ပူရောပိ။ အပိ-သဒ္ဒေန ယာဂုတေလပရိပူရိတဿာပိ သင်္ဂဟော။ တုစ္ဆပတ္တေ ဝိနိစ္ဆယော ယထာဝုတ္တောယေဝ။ ပူရဏံ ပူရော၊ ဘတ္တဿ ပူရော ဘတ္တပူရော။

တိဘာဏဝါရဝဏ္ဏနာ နိဋ္ဌိတာ။

၇၆၃။ ကဝါဋန္တိ ဒွါရကဝါဋဖလကံ။ ‘‘သေနာသနေ ဒွါရကဝါဋဝါတပါနကဝါဋာဒီ’’တိအာဒီသု ဒွါရဖလကံ ‘‘ကဝါဋ’’န္တိ ဟိ ဝုတ္တံ။ န ပဏာမေယျာတိ န နာမေယျ န စာလေယျ၊ န စ ပိဒဟေယျာတိ အတ္ထော။ ပတ္တံ ဟတ္ထေ ယဿ သော ပတ္တဟတ္ထောတိ ဘိန္နာဓိကရဏောယံ ဗာဟိရတ္ထသမာသော ‘‘ဝဇိရပါဏီ’’တိအာဒီသု ဝိယ။ ‘‘ပဏာမေယျ အဿာ’’တိ ပဒစ္ဆေဒေါ။

၇၆၄။ န နီဟရေယျ ပတ္တေန စလကာနီတိ ရသံ ပိဝိတွာ ပါတိတမဓုကဖလဋ္ဌိကာဒိ ဆဍ္ဍိတာနိ ဗဟိ ဆဍ္ဍေတုံ ပတ္တေန န နီဟရေယျ။ အဋ္ဌိကာနိ ဝါတိ ပနသဋ္ဌိကောလဋ္ဌိအာဒိအဋ္ဌိကာနိ ဝါ။ ဥစ္ဆိဋ္ဌမုဒကန္တိ မုခဓောဝနာဒိကံ ဥစ္ဆိဋ္ဌမုဒကံ။ ပတ္တေန နီဟရန္တဿာတိ ယောဇနာ၊ ဗဟိ ဆဍ္ဍေတုံ တံ ပတ္တေ အာသိဉ္စိတွာ ဟရန္တဿာတိ ဝုတ္တံ ဟောတိ။ ဣတရထာ ဥစ္ဆိဋ္ဌပတ္တဓောဝနောဒကမ္ပိ တေနေဝ ပတ္တေန ဗဟိ န နီဟရိတဗ္ဗံ သိယာ။

၇၆၅။ ပဋိဂ္ဂဟေတိ ¶ မုခဓောဝနောဒကန္တိ ပဋိဂ္ဂဟော၊ ခေဠမလ္လကောဝ။ မုခတော နီဟဋန္တိ မုခေန ဆဍ္ဍိတံ မံသခဏ္ဍာဒိ ယံ ကိဉ္စိ။

၇၆၆။ ဝိနဿတီတိ ဝိဗ္ဘမေန ဝါ သိက္ခာပစ္စက္ခာနေန ဝါ ကာလကိရိယာယ ဝါ ဝိနဿတိ။ အထ ဝါ ယောတိ ပစ္စတ္တဝစနံ ‘‘ယဿာ’’တိ သာမိဝသေန ပရိဏာမေတွာ ယဿ ဘိက္ခုနော ¶ ပတ္တော ဘေဒေန ဝါ အစ္ဆေဒေန ဝါ စောရိကာယ ဟရဏေန ဝါ နဿတိ၊ တဿ အနာပတ္တီတိ ယောဇနာ။

၇၆၇။ ပဌမဿာတိ ပတ္တဝဂ္ဂဿ ပဌမံ သင်္ဂဟိတတ္တာ ပဌမဿ။ ပတ္တဿာတိ ပတ္တသိက္ခာပဒဿ။ ပဌမေနာတိ စီဝရဝဂ္ဂဿ ပဌမံ သင်္ဂဟိတတ္တာ ပဌမေန ကထိနေနာတိ သမ္ဗန္ဓော။ မဟေသိနာတိ မဟန္တေ သီလက္ခန္ဓာဒယော ဂုဏေ ဧသိ ဂဝေသီတိ မဟေသိ။ ပဌမဿ ပတ္တဿ သမုဋ္ဌာနာဒယော သဗ္ဗေ ဣဓ အနိဒ္ဒိဋ္ဌဝိနိစ္ဆယာ ပဌမေန ကထိနေန သမာ သဒိသာ ဣတိ မဟေသိနာ မတာ အနုမတာ အနုညာတာတိ ယောဇနာ။

ပဌမပတ္တကထာဝဏ္ဏနာ။

၇၆၈။ ပဉ္စ ဗန္ဓနာနိ ဦနာနိ ယဿ သော ပဉ္စဗန္ဓနဦနော၊ ပတ္တော၊ တသ္မိံ၊ အဗန္ဓနဉ္စ ဧကဒွိတိစတုဗန္ဓနဉ္စ ‘‘ပဉ္စဗန္ဓနဦန’’န္တိ ဂဟိတံ။ ယထာဟ ပါဠိယံ ‘‘ဦနပဉ္စဗန္ဓနော နာမ ပတ္တော အဗန္ဓနော ဝါ ဧကဗန္ဓနော ဝါ ဒွိဗန္ဓနော ဝါ တိဗန္ဓနော ဝါ စတုဗန္ဓနော ဝါ’’တိ (ပါရာ။ ၆၁၃)။ ဗန္ဓနေ အကတေပိ ဗန္ဓနာရဟော ဝက္ခမာနလက္ခဏရာဇိယုတ္တောပိ ‘‘ဦနပဉ္စဗန္ဓနောယေဝါ’’တိ ဂဟေတဗ္ဗော။ ဧတ္ထ အဗန္ဓနော နာမ ယဿ ဗန္ဓနမေဝ နတ္ထိ၊ သော။ တေနေဝါဟ အဋ္ဌကထာယံ ‘‘ယသ္မာ အဗန္ဓနဿပိ ပတ္တဿ ပဉ္စ ဗန္ဓနာနိ န ပူရေန္တိ သဗ္ဗသော နတ္ထိတာယာ’’တိ (ပါရာ။ အဋ္ဌ။ ၂။၆၁၂-၆၁၃)။ ဒွင်္ဂုလပ္ပမာဏတော ဦနရာဇိယုတ္တော အဗန္ဓနောကာသောပိ ‘‘အဗန္ဓနောယေဝါ’’တိ ဂဟေတဗ္ဗော။ ယထာဟ ပါဠိယံ ‘‘အဗန္ဓနောကာသော နာမ ပတ္တော ယဿ ဒွင်္ဂုလာ ရာဇိ န ဟောတီ’’တိ (ပါရာ။ ၆၁၃)။

၇၆၉။ ဥဒ္ဒိဋ္ဌန္တိ ‘‘ဗန္ဓနောကာသော နာမ ပတ္တော ယဿ ဒွင်္ဂုလာ ရာဇိ ဟောတီ’’တိ (ပါရာ။ ၆၁၃) ပဒဘာဇနေ ဝုတ္တံ။ ဒွင်္ဂုလာယ ရာဇိယာ ဧကဉ္စ ဗန္ဓနန္တိ ယောဇနာ။ ‘‘မုခဝဋ္ဋိတော ဟေဋ္ဌာ ဘဋ္ဌာ’’တိ ¶ အဋ္ဌကထာဝစနတော (ပါရာ။ အဋ္ဌ။ ၂။၆၁၂-၆၁၃) ‘‘သဗ္ဗာပိ ရာဇိယော မုခဝဋ္ဋိတော ပဋ္ဌာယ ¶ ဟေဋ္ဌာ ဘဋ္ဌာယေဝ ဂဟေတဗ္ဗာ’’တိ နိဿန္ဒေဟေ ဝုတ္တံ။ မုခဝဋ္ဋိံ ဝိနာ အညတ္ထာပိ ဦနပဉ္စဗန္ဓနေ ဝါ ဦနပဉ္စဗန္ဓနောကာသေ ဝါ သတိ သောပိ ပတ္တော ဦနပဉ္စဗန္ဓနော န ဟောတီတိ န သက္ကာ ဝတ္တုံ၊ တသ္မာ ‘‘မုခဝဋ္ဋိတော ပဋ္ဌာယာ’’တိ (ပါရာ။ အဋ္ဌ။ ၂။၆၁၂-၆၁၃) အဋ္ဌကထာယံ နိယမေတွာ ဝစနံ ဝီမံသိတဗ္ဗံ။ ဣဓ ပန တထာ နိယမော န ဒဿိတော၊ တသ္မာ အယမေဝ ဝိနိစ္ဆယော သာမညေန ဝုတ္တာယ ပါဠိယာ အညဒတ္ထု သံသန္ဒတိ သမေတိ။ စ-ကာရဿ အဝုတ္တသမုစ္စယတ္ထတ္တာ ဒွင်္ဂုလဒွင်္ဂုလာဟိ ဒွီဟိ ဒွေ ဗန္ဓနာနိ စ တီဏိ ဗန္ဓနာနိ စာတိ ဣဒမ္ပိ ဝုတ္တမေဝ ဟောတိ။ ယထာဟ အဋ္ဌကထာယံ ‘‘ယဿ ပန ဒွေ ရာဇိယော၊ ဧကာယေဝ ဝါ စတုရင်္ဂုလာ၊ တဿ ဒွေ ဗန္ဓနာနိ ဒါတဗ္ဗာနိ။ ယဿ တိဿော၊ ဧကာယေဝ ဝါ ဆဠင်္ဂုလာ၊ တဿ တီဏိ ဗန္ဓနာနိ ဒါတဗ္ဗာနီ’’တိ (ပါရာ။ အဋ္ဌ။ ၂။၆၁၂-၆၁၃)။

ဦနပဉ္စဗန္ဓနပတ္တေသု အန္တိမပတ္တဿ ဝိဘာဂံ ဒဿေတုမာဟ ‘‘ဗန္ဓနာနိ စာ’’တိအာဒိ။ မုခဝဋ္ဋိယာ အဋ္ဌင်္ဂုလပ္ပမာဏာနံ စတုန္နံ ရာဇီနံ စတ္တာရိ ဗန္ဓနာနိ စာတိ ဝုတ္တံ ဟောတိ။ စကာရော ပုဗ္ဗေ ဝုတ္တဿေဝ သမုစ္စယံ ကရောတိ။ အဋ္ဌင်္ဂုလရာဇိယာ တထာတိ မုခဝဋ္ဋိတော ပဋ္ဌာယ အဋ္ဌင်္ဂုလာယာမံ ဘဋ္ဌာယ ရာဇိယာ ဒွင်္ဂုလဒွင်္ဂုလမတ္တေ ဌာနေ တေနေဝ နီဟာရေန ဗဒ္ဓါနိ စတ္တာရိ ဗန္ဓနာနိ စာတိ အတ္ထော။

၇၇၀။ ဧဝံ ဦနပဉ္စဗန္ဓနပတ္တံ ဒဿေတွာ ဣဒါနိ ပရိပုဏ္ဏပဉ္စဗန္ဓနပတ္တံ ဒဿေတုမာဟ ‘‘ပဉ္စ ဝါ’’တိအာဒိ။ မုခဝဋ္ဋိယာ ဒွင်္ဂုလဒွင်္ဂုလာယာမံ ဩတိဏ္ဏာ ပဉ္စ ရာဇိယော စ။ ဝါ-သဒ္ဒေန ပဉ္စဗန္ဓနဝိကပ္ပာ ဒဿိတာ။ ဧကာ ဝါပိ ဒသင်္ဂုလာတိ မုခဝဋ္ဋိတော ဒသင်္ဂုလာယာမာ ဧကာ ဝါ ရာဇိ ဟောတိ။ အပိ-သဒ္ဒေန တဿာ ရာဇိယာ ဗန္ဓနော ပဉ္စဗန္ဓနပက္ခော ဒဿိတော။ အယံ ပတ္တောတိ ¶ ယဿ ပဉ္စ ရာဇိယော ဝါ တတ္ထ ဗန္ဓနာနိ ပဉ္စဗန္ဓနာနိ ဝါ၊ ဒသင်္ဂုလာ ဧကာ ရာဇိ ဝါ တတ္ထ ဗန္ဓနာနိ ပဉ္စဗန္ဓနာနိ ဝါ သန္တိ၊ အယံ ပတ္တော ပဉ္စဗန္ဓနော နာမ။

၇၇၁။ ဧတ္တာဝတာ မတ္တိကာပတ္တေ ဝိနိစ္ဆယံ ဒဿေတွာ ဣဒါနိ အယောပတ္တေ ဒဿေတုမာဟ ‘‘အယောပတ္တော’’တိအာဒိ။ ဆိဒ္ဒါနိ ပဋိစ္ဆာဒေတုံ ဗန္ဓိတဗ္ဗာနိ အယောပဋ္ဋာနိ လောဟမဏ္ဍလကာနိ နာမ။ ‘‘ဘဏ္ဍီ’’တိပိ တဿေဝ ပရိယာယော။ ဘဏ္ဍိတဗ္ဗံ ဗန္ဓိတွာ ဆိဒ္ဒေ ပဋိစ္ဆာဒိတေပိ ယတ္ထ အသဏှတာယ အာမိသံ တိဋ္ဌတိ၊ တာဒိသောပိ အပတ္တောယေဝါတိ အာဟ ‘‘မဋ္ဌော ဝဋ္ဋတီ’’တိ။ အယောစုဏ္ဏေန ဝါဏိယာတိ ဧတ္ထာပိ ‘‘မဋ္ဌော ဝဋ္ဋတီ’’တိ သမ္ဗန္ဓနီယံ။

၇၇၂။ တဿ ¶ နိဿဂ္ဂိယံ သင်္ဃဿ နိဿဋ္ဌံ တံ ပတ္တံ တသ္မိံ အနုကမ္ပာယ အဂဏှန္တဿာတိ ယောဇနာ၊ ‘‘သင်္ဃမဇ္ဈေ နိဿဇ္ဇိတဗ္ဗော’’တိ (ပါရာ။ ၆၁၃) ဝစနတော သင်္ဃမဇ္ဈေ နိဿဋ္ဌံ တဿ တံ ပတ္တံ တသ္မိံ ပတ္တနိဿဇ္ဇကေ ပုဂ္ဂလေ အနုကမ္ပာယ အဂဏှန္တဿ။

၇၇၃။ ဒီယမာနေ တု ပတ္တသ္မိန္တိ ဦနပဉ္စဗန္ဓနေန ပတ္တေန ဝိညာပိတနဝပတ္တေ ဘိက္ခုမှိ တံ ပတ္တံ သင်္ဃမဇ္ဈေ နိဿဇ္ဇိတွာ အာပတ္တိံ ဒေသေတွာ နိသိန္နေ စတဿော အဂတိယော အဂမနံ၊ ဂဟိတာဂဟိတဇာနနန္တိ ဣမေဟိ ပဉ္စဟိ အင်္ဂေဟိ သမန္နာဂတေန ဘိက္ခုနာ ပဌမံ သင်္ဃံ ယာစိတွာ ဉတ္တိဒုတိယာယ ကမ္မဝါစာယ သင်္ဃေန ပတ္တဂါဟကံ ကတွာ သမ္မတေန နိဿဋ္ဌပတ္တံ ဟတ္ထေန ဂဟေတွာ တသ္မိံ သင်္ဃေ သင်္ဃတ္ထေရတော ပဋ္ဌာယ အနုက္ကမေန ဥပသင်္ကမ္မ ဝိညာယမာနံ ဂုဏံ ဝတွာ ပဏာမိတေ။ ယဿာတိ တသ္မိံ သင်္ဃမဇ္ဈေ နိသိန္နဿ ယဿ ¶ ဘိက္ခုနော၊ ရောစနတ္ထယောဂေ သမ္ပဒါနဝစနံ။ သော ဒီယမာနော ပတ္တော။ တံ ဒီယမာနံ ပတ္တံ။

၇၇၄။ ဒီပိတောတိ ‘‘အပတ္တကဿ န ဂါဟေတဗ္ဗော’’တိ (ပါရာ။ ၆၁၅) ဝုတ္တော။ တတ္ထာတိ တဿံ ဘိက္ခုပရိသာယံ။ ပတ္တပရိယန္တောတိ ဧတ္ထ ‘‘ဧဝံ ပရိဝတ္တေတွာ ပရိယန္တေ ဌိတပတ္တော’’တိ (ပါရာ။ အဋ္ဌ။ ၂။၆၁၅) အဋ္ဌကထာယံ ဝုတ္တတ္တာ တေန ပတ္တပရိဝတ္တနေန အာဂတော ဝါ သဗ္ဗေဟိ အဂ္ဂဟိတတ္တာ အာဂတော သော ဧဝ ဝါ ပတ္တော ပရိယန္တော နာမ ဟောတီတိ အတ္ထော။ တဿ ဘိက္ခုနောတိ ပတ္တံ နိဿဇ္ဇိတွာ နိသိန္နဿ တဿ ဘိက္ခုနော။

၇၇၅။ တန္တိ အတ္တနော ဒိန္နံ တံ ပရိယန္တပတ္တံ။ အပ္ပဒေသေတိ မဉ္စပီဌာဒိအဋ္ဌာနေ။ ယထာဟ အဋ္ဌကထာယံ ‘‘မဉ္စပီဌဆတ္တနာဂဒန္တာဒိကေ အဒေသေ’’တိ (ပါရာ။ အဋ္ဌ။ ၂။၆၁၅)။ ဝိဿဇ္ဇေတီတိ အညဿ ဒေတိ။ အတ္တနာ အဒါပေတွာ အညေန တံ ပတ္တံ သယမေဝ အတ္တနော ဂဟေတွာ အညံ အနုရူပံ ပတ္တံ ဒိယျမာနံ ဂဏှိတုံ ဝဋ္ဋတီတိ အဋ္ဌကထာယံ ဝုတ္တံ။ အဘောဂေန ပရိဘုဉ္ဇတီတိ ယာဂုရန္ဓနာဒိဝသေန ပရိဘုဉ္ဇတိ။ ယထာဟ အဋ္ဌကထာယံ ‘‘အဘောဂေနာတိ ယာဂုရန္ဓနရဇနပစနာဒိနာ’’တိ (ပါရာ။ အဋ္ဌ။ ၂။၆၁၅)။ ‘‘အန္တရာမဂ္ဂေ ပန ဗျာဓိမှိ ဥပ္ပန္နေ အညသ္မိံ ဘာဇနေ အသတိ မတ္တိကာယ လိမ္ပိတွာ ယာဂုံ ဝါ ပစိတုံ ဥဒကံ ဝါ တာပေတုံ ဝဋ္ဋတီ’’တိ (ပါရာ။ အဋ္ဌ။ ၂။၆၁၅) အဋ္ဌကထာယံ ဝုတ္တတ္တာ တာဒိသေ ဌာနေ တထာပိ ပရိဘုဉ္ဇိတုံ ဝဋ္ဋတီတိ ဧတ္ထ ဝိသေသော။

၇၇၆။ နဋ္ဌေတိ ¶ အတ္တနော ပရိဘုဉ္ဇိယမာနေ ပတ္တေ စောရဂ္ဂဟဏာဒိနာ နဋ္ဌေ။ ဘိန္နေတိ ဘေဒမုပဂတေ။ အနာပတ္တီတိ အညံ ပတ္တံ ဝိညာပေန္တဿ အနာပတ္တိ။ ပကာသိတာတိ ‘‘အနာပတ္တိ နဋ္ဌပတ္တဿ ဘိန္နပတ္တဿ ဉာတကာနံ ပဝါရိတာနံ အညဿတ္ထာယ ¶ အတ္တနော ဓနေနာ’’တိအာဒိနာ (ပါရာ။ ၆၁၇) နယေန ပါဠိယံ ဒေသိတာ။ ဣဓ ‘‘အညဿတ္ထာယာ’’တိ ဝုတ္တတ္တာ အတ္တနော ဝဠဉ္ဇိယမာနေ ပတ္တေ သတိပိ အညဿတ္ထာယ ပတ္တံ ဝိညာပေတုံ ဝဋ္ဋတိ။ ဉာတကာဒီနံ ဂဏှတောတိ ဧတ္ထ ‘‘သန္တက’’န္တိ လဗ္ဘတိ။ အတ္တနော ဓနေနာတိ ယောဇနာ။ ဧတ္ထ ဓနံ နာမ သုတ္တဝတ္ထာဒိ ကပ္ပိယဝတ္ထု။

၇၇၇။ ဧတ္ထ ဝိညာပနံ ကြိယံ။

ဒုတိယပတ္တကထာဝဏ္ဏနာ။

၇၇၈။ သပ္ပိအာဒိံ ဘေသဇ္ဇန္တိ ဧတ္ထ ပါဠိယံ ‘‘သေယျထိဒံ? သပ္ပိ နဝနီတံ တေလံ မဓု ဖာဏိတ’’န္တိ (ပါရာ။ ၆၂၂) ဥဒ္ဒိသိတွာ ‘‘သပ္ပိ နာမ ဂေါသပ္ပိ ဝါ အဇိကာသပ္ပိ ဝါ မဟိံသသပ္ပိ ဝါ၊ ယေသံ မံသံ ကပ္ပတိ၊ တေသံ သပ္ပီ’’တိ (ပါရာ။ ၆၂၃) နိဒ္ဒိဋ္ဌံ ဃတဉ္စ ‘‘တေသံယေဝ နဝနီတ’’န္တိ (ပါရာ။ ၆၂၃) နိဒ္ဒိဋ္ဌံ နဝနီတဉ္စ ‘‘တိလတေလံ သာသပတေလံ မဓုကတေလံ ဧရဏ္ဍကတေလံ ဝသာတေလ’’န္တိ (ပါရာ။ ၆၂၃) နိဒ္ဒိဋ္ဌံ တေလဉ္စ ‘‘မဓု နာမ မက္ခိကာမဓူ’’တိ (ပါရာ။ ၆၂၃) နိဒ္ဒိဋ္ဌံ မဓုဉ္စ ‘‘ဖာဏိတံ နာမ ဥစ္ဆုမှာ နိဗ္ဗတ္တ’’န္တိ (ပါရာ။ ၆၂၃) နိဒ္ဒိဋ္ဌံ ဂုဠာဒိဖာဏိတဉ္စာတိ ဧတသ္မိံ ပဉ္စဘေသဇ္ဇရာသိမှိ ယံ ယံ ဘေသဇ္ဇန္တိ အတ္ထော။ ပုရေဘတ္တန္တိ ပုရေဘတ္တေ။ ပဋိဂယှာတိ ပဋိဂ္ဂဟေတွာ။

၇၇၉။ တံ ပုရေဘတ္တံ ပဋိဂ္ဂဟိတံ ဘေသဇ္ဇံ။ သတ္တာဟန္တိ ဧတ္ထ ‘‘ဝဋ္ဋတီ’’တိ ကိရိယာယ အစ္စန္တသံယောဂေ ဥပယောဂဝစနံ။ ‘‘သတ္တာဟံ အတိက္ကမန္တဿာ’’တိ ပဒစ္ဆေဒေါ။ ‘‘သတ္တာဟာတိက္ကမေ တဿာ’’တိ ဝါ ပါဌော။ သတ္တာဟဿ အတိက္ကမော သတ္တာဟာတိက္ကမော၊ တသ္မိံ သတ္တာဟာတိက္ကမေ။ တဿာတိ ဘေသဇ္ဇပဋိဂ္ဂါဟကဿ ဘိက္ခုနော။ ‘‘နိဿဂ္ဂိယ’’န္တိ ဣမိနာ ပါစိတ္တိယမေဝ ဒဿိတံ။ နိဿဂ္ဂိယဝတ္ထု ဘာဇနဂဏနာယ အာပတ္တိံ ကရောတိ။ ဧကသ္မိံ ဘာဇနေပိ ဝိသုံ ဝိသုံ ဌပိတာနိ နဝနီတပိဏ္ဍဂုဠပိဏ္ဍသက္ကရမဓုပဋလာနိပိ ¶ အတ္တနော ဂဏနာယ အာပတ္တိံ ကရောန္တိ။

၇၈၀။ ဂဏှိတွာတိ ပဋိဂ္ဂဟေတွာ။ သန္နိဓီယတီတိ သန္နိဓိ၊ သန္နိဟိတဝတ္ထု၊ တဿ ကာရကံ ကရဏံ ¶ အပရာပရဒိဝသတ္ထာယ ဌပနံ၊ တံ ကတွာ၊ ပစ္ဆာဘတ္တံ ပဋိဂ္ဂဟိတံ ယထာ အပရံ ဒိဝသံ ဂစ္ဆတိ၊ တထာ ကတွာ နိက္ခိပိတွာတိ အတ္ထော။ နိရာမိသံ သာယတောတိ အာမိသေန အမိဿေတွာ ဘုဉ္ဇန္တဿ။

၇၈၁။ ဥဂ္ဂဟိတန္တိ အပ္ပဋိဂ္ဂဟာပေတွာ ဟတ္ထေန ဂဟိတံ။ သရီရဘောဂေတိ ဗဟိ သရီရပရိဘောဂေနေဝ။

၇၈၂။ ဂဟိတံ ပဋိဂ္ဂဟိတံ။ တာပေတွာတိ ဝိလီယာပေတွာ။

၇၈၃။ ‘‘သယံ တာပေတိ…ပေ… န ဟောတိ သော’’တိ ဣဒံ သုဓောတနဝနီတံ သန္ဓာယ ဝုတ္တံ၊ ဒုဒ္ဓါတေန ပန ဒဓိဂုဠိကာဒိသဟိတေန သာမံပါကော ဟောတေဝ။ နဝနီတဿ ယံ သယံ တာပနံ၊ သော သာမံပါကော န ဟောတီတိ ယောဇနာ။

၇၈၄။ ယေန ကေနစီတိ ဥပသမ္ပန္နေန၊ အနုပသမ္ပန္နေန ဝါ။

၇၈၅။ ‘‘သယံ ကရောတီ’’တိ ဣမိနာ အနုပသမ္ပန္နံ နိဝတ္တေတိ။ တေန ကတံ ပန တဒဟု ပုရေဘတ္တံ သာမိသမ္ပိ ဝဋ္ဋတိ။ ယထာဟ အဋ္ဌကထာယံ ‘‘ပုရေဘတ္တံ ပဋိဂ္ဂဟိတခီရေန ဝါ ဒဓိနာ ဝါ ကတသပ္ပိ အနုပသမ္ပန္နေန ကတံ သာမိသမ္ပိ တဒဟု ပုရေဘတ္တံ ဝဋ္ဋတီ’’တိ (ပါရာ။ အဋ္ဌ။ ၂။၆၂၂)။

၇၈၆။ သဝတ္ထုကဿာတိ ဧတ္ထ ဝတ္ထု နာမ ခီရဒဓိ။

၇၈၇။ အဿာတိ ပဋိဂ္ဂဟိတခီရဒဓီဟိ ကတသပ္ပိမာဟ။ ‘‘ပဋိဂ္ဂဟေတွာ တာနီ’’တိ ဝုတ္တတ္တာတိ ဣဒံ ‘‘ယာနိ ခေါ ပန တာနိ ¶ ဂိလာနာနံ ဘိက္ခူနံ ပဋိသာယနီယာနိ ဘေသဇ္ဇာနိ၊ သေယျထိဒံ? သပ္ပိ နဝနီတံ တေလံ မဓု ဖာဏိတံ၊ တာနိ ပဋိဂ္ဂဟေတွာ’’တိ (ပါရာ။ ၆၂၂) ဣမသ္မိံ မာတိကာပါဌေ ‘‘ယာနီ’’တိ ဝုတ္တသပ္ပိအာဒီနမေဝ ‘‘တာနိ ပဋိဂ္ဂဟေတွာ’’တိ ဝုတ္တတ္တာတိ ဝုတ္တံ ဟောတိ၊ တတ္ထ ခီရဒဓီနံ အဝုတ္တတ္တာတိ အဓိပ္ပာယော။

၇၈၈။ ကပ္ပိယသပ္ပိမှီတိ ¶ ကပ္ပိယမံသာနံ သတ္တာနံ ဃတေ။ အကပ္ပိယသပ္ပိမှီတိ အကပ္ပိယမံသာနံ သတ္တာနံ ဃတေ၊ ပဋိဂ္ဂဟေတွာ သတ္တာဟေ အတိက္ကန္တေတိ ဝုတ္တံ ဟောတိ။

၇၈၉။ တေန သပ္ပိနာ အကပ္ပိယေန ဘဝိတဗ္ဗန္တိ ဣဒံ ဒုက္ကဋံ ကထံ ဟောတီတိ အာဟ ‘‘သဗ္ဗာ’’တိအာဒိ။ အကပ္ပိယံ မံသံ ယေသံ တေ အကပ္ပိယမံသာ၊ မနုဿာဒယော၊ သဗ္ဗေ စ တေ အကပ္ပိယမံသာ စာတိ သဗ္ဗာကပ္ပိယမံသာ၊ တေသံ။

၇၉၀-၁။ ဧဝံ စေ ဝဋ္ဋတိ၊ ‘‘ယေသံ မံသံ ကပ္ပတိ၊ တေသံ သပ္ပီ’’တိ ကသ္မာ ပါဠိယံ ဝုတ္တန္တိ စောဒနံ သမုဋ္ဌာပေတွာ တံ ပရိဟရိတုမာဟ ‘‘ယေသ’’န္တိအာဒိ။ တတ္ထ ‘‘ယေသဉှိ ကပ္ပတိ မံသံ၊ တေသံ သပ္ပီ’’တိ ဣဒံ ဝစနံ ကိံ ပယောဇနံ သာဓေတီတိ ဝုတ္တံ ဟောတိ။ ဣဒါနိ ပရိစ္ဆေဒနိယမနသင်္ခါတံ တံပယောဇနဉ္စ တဗ္ဗိသယဉ္စ ဒဿေတုမာဟ ‘‘ပဏီတဘောဇနဿာ’’တိအာဒိ။ ပဏီတဘောဇနဿ ပရိစ္ဆေဒနိယာမနန္တိ ယောဇနာ။ သတ္တာဟကာလိကေ ပဉ္စဝိဓေ ဘေသဇ္ဇေတိ ဝုတ္တံ ဟောတိ၊ နိဒ္ဓါရဏေ ဘုမ္မံ။ နိဿဂ္ဂိယဿ ဝတ္ထူနန္တိ နိဒ္ဓါရိတဗ္ဗဒဿနံ။ နိဿဂ္ဂိယဿာတိ ဧတ္ထ တံဟေတုကဿ ပါစိတ္တိယဿာတိ အတ္ထော။ ဝတ္ထူနန္တိ သပ္ပိနဝနီတဒွယမေဝ ဝုတ္တံ။ သတ္တာဟကာလိကေ နိဿဂ္ဂိယပါစိတ္တိယဿ ဝတ္ထု နာမ ဧတေသမေဝ သပ္ပိနဝနီတာနိ၊ ပဏီတဘောဇနဉ္စ တေသမေဝ ခီရဒဓိသပ္ပိနဝနီတာနီတိ ဒဿေတုံ တထာ ဝုတ္တံ၊ န အကပ္ပိယမံသသတ္တာနံ သပ္ပိအာဒိနိဝါရဏတ္ထံ ¶ ဝုတ္တန္တိ အယံ ပါဠိယံ တထာဂတာ ဓိပ္ပေတော အတ္ထောတိ ဝုတ္တံ ဟောတိ။

၇၉၂။ ဂဟိတုဂ္ဂဟိတာဒိကေ ဥဂ္ဂဟိတပဋိဂ္ဂဟိတာဒိကေ နဝနီတေပိ သဗ္ဗော ဝိနိစ္ဆယော သပ္ပိမှိ ဝုတ္တနယေနေဝ ဝေဒိတဗ္ဗောတိ ယောဇနာ။ အာဒိ-သဒ္ဒေန ပုရေဘတ္တံ၊ ပစ္ဆာဘတ္တံ ပဋိဂ္ဂဟိတခီရဒဓီဟိ၊ ဥဂ္ဂဟိတခီရဒဓီဟိ စ ကတံ နဝနီတံ၊ တာဒိသမေဝ အကပ္ပိယမံသနဝနီတဉ္စ သင်္ဂဟိတံ။ သဗ္ဗော ဝိနိစ္ဆယောတိ အာပတ္တိအာဒိကံ သဗ္ဗဝိနိစ္ဆယံ သင်္ဂဏှာတိ။ ယထာဟ အဋ္ဌကထာယံ ‘‘သဗ္ဗော အာပတ္တာနာပတ္တိပရိဘောဂါပရိဘောဂနယော’’တိ (ပါရာ။ အဋ္ဌ။ ၂။၆၂၂)။

၇၉၃-၄။ ဘိက္ခူနံ အာကိရန္တီတိ ဧတ္ထ ‘‘ပတ္တေ’’တိ သာမတ္ထိယာ လဗ္ဘတိ။ အာဒိစ္စပက္ကန္တိ အာတပေ ဝိလီနံ။ သံသဋ္ဌံ ပရိဿာဝိတံ။

၇၉၅-၆။ တိလတေလံ သာသပတေလံ မဓုကတေလံ ဧရဏ္ဍကတေလံ။ ဂဟိတန္တိ ပဋိဂ္ဂဟိတံ။ ပုရေဘတ္တံ သာမိသမ္ပိ ¶ နိရာမိသမ္ပိ သာယိတဗ္ဗန္တိ ယောဇနာ။ တေသံ ဝသာတိ သတ္တာဟာတိက္ကန္တာနံ တေသံ တေလာနံ ဝသေန၊ တေလဘာဇနဂဏနာယာတိ ဝုတ္တံ ဟောတိ။

၇၉၈။ တေသံ တိဏ္ဏမ္ပီတိ ဧရဏ္ဍမဓုကသာသပဗီဇာနံ တိဏ္ဏံ။

၇၉၉။ နိဿဂ္ဂိယံ ပါစိတ္တိယံ။

၈၀၀။ သာသပါဒီနန္တိ ဧတ္ထ အာဒိ-သဒ္ဒေန ပဋိလောမေန မဓုကေရဏ္ဍကာနံ ဂဟဏံ။ ဂဟေတွာတိ ပဋိဂ္ဂဟေတွာ။ ဘိက္ခုနာ တေလတ္ထာယေဝ ဂဟေတွာ ဌပိတာနံ သာသပါဒီနံ သတ္တာဟာတိက္ကမေ ဒုက္ကဋံ သိယာတိ ယောဇနာ။

၈၀၁-၂။ နာဠိကေရဉ္စ ¶ ကရဉ္ဇဉ္စ နာဠိကေရကရဉ္ဇာနိ၊ တေသံ၊ နာဠိကေရဖလာနံ၊ နတ္တမာလဋ္ဌီနဉ္စ တေလန္တိ သမ္ဗန္ဓော။ ကုရုဝကဿာတိ အတသိဗီဇဿ။ နိမ္ဗဉ္စ ကောသမ္ဗကဉ္စ နိမ္ဗကောသမ္ဗကာနိ၊ တေသံ၊ ပုစိမန္ဒဗီဇဿ စ ဖန္ဒနဗီဇဿ စ တေလန္တိ သမ္ဗန္ဓော။ ဘလ္လာတကဿာတိ ဧဝံနာမကဿ ရုက္ခဗီဇဿ။ သမယစ္စယေတိ သတ္တာဟာတိက္ကမေ။

၈၀၃။ ယာဝကာလိကဘေဒဉ္စာတိ ဧတ္ထ ‘‘ယာဝကာလိက’’န္တိ ဘေဒေါ ဝိသေသနံ ယဿာတိ ဝိဂ္ဂဟော၊ ‘‘ဣဒံ ဝတ္ထု’’န္တိ ဧတဿ အဇ္ဈောဟရဏီယဝိသေသိတဗ္ဗဿ ဝိသေသနံ။ ယာဝဇီဝိကန္တိပိ တဿေဝ ဝိသေသနံ။ သေသန္တိ ‘‘သာမံပါကသဝတ္ထုက ပုရေဘတ္တပစ္ဆာဘတ္တပဋိဂ္ဂဟိတဥဂ္ဂဟိတကဝတ္ထုဝိဓာနံ သဗ္ဗ’’န္တိ (ပါရာ။ အဋ္ဌ။ ၂။၆၂၂) အဋ္ဌကထာယံ ဒဿိတံ သေသံ ဝိသေသပ္ပကာရဇာတမာဟ။ ဧတ္ထာပီတိ ဣမသ္မိံ တေလဝိနိစ္ဆယေပိ။

၈၀၄။ အစ္ဆဿ ဣသဿ။ မစ္ဆဿ ဇလဇဿ။ ဝရာဟဿ သူကရဿ။ သုသုကာသင်္ခါတဿ မကရဿ။ မစ္ဆဝစနေနေဝ မကရဿ သင်္ဂဟိတတ္တေပိ ဝါဠမစ္ဆဘာဝေန ဝိသုံ ဂဟဏန္တိ အဋ္ဌကထာယံ ဝုတ္တံ။ ဂဒြဘဿ ခရဿ။ ဣမေသံ ပဉ္စန္နံ သတ္တာနံ ဝသေန ပဉ္စဝိဓာနံ ဝသာနံ တေလဉ္စ ပဉ္စပ္ပကာရံ ဟောတီတိ အတ္ထော။

၈၀၅။ ကပ္ပိယာကပ္ပိယဿ စာတိ ကပ္ပိယာကပ္ပိယမံသဿ သတ္တဿာတိ ဝုတ္တံ ဟောတိ၊ သဗ္ဗမေဝ ¶ ဝသာတေလံ ဝဋ္ဋတီတိ ဣမိနာ သမ္ဗန္ဓော။ ဧတ္ထ ‘‘အနုဇာနာမိ ဘိက္ခဝေ ဝသာနိ ဘေသဇ္ဇာနိ အစ္ဆဝသံ မစ္ဆဝသံ သုသုကာဝသံ သူကရဝသံ ဂဒြဘဝသ’’န္တိ (မဟာဝ။ ၂၆၂) အနုညာတပါဌေ အစ္ဆဝသာဂ္ဂဟဏေန မနုဿေဟိ အညေသံ သဗ္ဗာကပ္ပိယမံသသတ္တာနံ ဝသာယ အနုညာတတ္တာ ¶ တံ သင်္ဂဟေတုံ အကပ္ပိယဂ္ဂဟဏံ ကတန္တိ ဒဋ္ဌဗ္ဗံ။ ယထာဟ အဋ္ဌကထာယံ ‘‘အစ္ဆဝသ’န္တိ ဝစနေန ဌပေတွာ မနုဿဝသံ သဗ္ဗေသံ အကပ္ပိယမံသာနံ ဝသာ အနုညာတာ’’တိ (ပါရာ။ အဋ္ဌ။ ၂။၆၂၃)။ ဧတ္ထ အကပ္ပိယမံသသတ္တာနံ မံသာနံ အကပ္ပိယဘာဝေါ ‘‘မံသေသု ဟိ ဒသ မနုဿဟတ္ထိအဿသုနခအဟိသီဟဗျဂ္ဃဒီပိအစ္ဆတရစ္ဆာနံ မံသာနိ အကပ္ပိယာနိ။ ဝသာသု ဧကာ မနုဿဝသာဝ။ ခီရာဒီသု အကပ္ပိယံ နာမ နတ္ထီ’’တိ (ပါရာ။ အဋ္ဌ။ ၂။၆၂၃) အဋ္ဌကထာဝစနတော ဝေဒိတဗ္ဗော။ အကပ္ပိယဝစနေန မနုဿဝသာယပိ ဂယှမာနတ္တာ တသ္မိံ နီဟရိတုမာဟ ‘‘ဌပေတွာ’’တိ။

၈၀၆။ ပုရေဘတ္တန္တိ ပုရေဘတ္တေ။ သံသဋ္ဌံ ပရိဿာဝိတံ။ ‘‘ပုရေဘတ္တ’’န္တိ ဣဒံ ‘‘ပဋိဂ္ဂဟေတွာန၊ ပက္ကံ၊ သံသဋ္ဌ’’န္တိ ဣမေဟိ ပဒေဟိ ပစ္စေကံ ယောဇေတဗ္ဗံ။ ယထာဟ ပါဠိယံ ‘‘ကာလေ ပဋိဂ္ဂဟိတံ ကာလေ နိပ္ပက္ကံ ကာလေ သံသဋ္ဌံ တေလပရိဘောဂေန ပရိဘုဉ္ဇိတု’’န္တိ (မဟာဝ။ ၂၆၂)။

၈၀၇။ တံ ကတွာ ဒေတီတိ အပဋိဂ္ဂဟိတဝသံ ဂဟေတွာ ပစိတွာ တေလံ ဒေတီတိ အတ္ထော။ တေနာဟ အဋ္ဌကထာယံ ‘‘အနုပသမ္ပန္နေဟိ ကတံ နိဗ္ဗဋ္ဋိတဝသာတေလံ ပုရေဘတ္တံ ပဋိဂ္ဂဟိတံ ပုရေဘတ္တံ သာမိသမ္ပိ ဝဋ္ဋတီ’’တိ (ပါရာ။ အဋ္ဌ။ ၂။၆၂၃)။ တတော ဥဒ္ဓံ သတ္တာဟမနတိက္ကမ္မာတိ ဂဟေတဗ္ဗံ။ ယထာဟ အဋ္ဌကထာယံ ‘‘ပစ္ဆာဘတ္တတော ပဋ္ဌာယ သတ္တာဟံ နိရာမိသမေဝ ဝဋ္ဋတီ’’တိ (ပါရာ။ အဋ္ဌ။ ၂။၆၂၃)။ ဣဓ ဥဘယတ္ထာပိ ကာလေ၊ ဝိကာလေ စ ကပ္ပိယာကပ္ပိယမံသဝသာနံ တေလံ ဒိယျမာနံ သုခုမမံသစုဏ္ဏာဒိကံ အဗ္ဗောဟာရိကံ။ ယထာဟ အဋ္ဌကထာယံ ‘‘ယံ ပန တတ္ထ သုခုမရဇသဒိသံ မံသံ ဝါ နှာရု ဝါ အဋ္ဌိ ဝါ လောဟိတံ ဝါ ဟောတိ၊ တံ အဗ္ဗောဟာရိက’’န္တိ (ပါရာ။ အဋ္ဌ။ ၂။၆၂၃)။

၈၀၈။ ပဋိဂ္ဂဟေတုန္တိ ဧတ္ထ ‘‘ဝသ’’န္တိ စ ကာတုန္တိ ဧတ္ထ ‘‘တေလ’’န္တိ စ ပကရဏတော လဗ္ဘတိ။ ကာတုန္တိ ဧတ္ထ ပစိတုံ ပရိဿာဝိတုန္တိ ¶ ဥဘယမေဝါတိ အတ္ထော။ ‘‘န ဝဋ္ဋတီ’’တိ ဣဒံ ပဋိဂ္ဂဟဏာဒိပယောဂတ္တယေ ဝိသုံ ဝိသုံ ဒုက္ကဋတ္တာ ဝုတ္တံ။ ယထာဟ ပါဠိယံ ‘‘ဝိကာလေ စေ ဘိက္ခဝေ ပဋိဂ္ဂဟိတံ ဝိကာလေ နိပ္ပက္ကံ ဝိကာလေ သံသဋ္ဌံ၊ တံ စေ ပရိဘုဉ္ဇေယျ၊ အာပတ္တိ တိဏ္ဏံ ဒုက္ကဋာန’’န္တိ ¶ (မဟာဝ။ ၂၆၂)။ ဣမာနိ ဟိ တီဟိ ပယောဂေဟိ တီဏိ ဒုက္ကဋာနိ ဟောန္တိ။ သေသောတိ ဥဂ္ဂဟိတကပဋိဂ္ဂဟိတကသဝတ္ထုကဝိသယော ဝိနိစ္ဆယော စ ဘာဇနဂဏနာယ အာပတ္တိဘေဒေါ စာတိ ဧဝံပကာရော ဝတ္တဗ္ဗဝိသေသော။

၈၀၉။ ဂဟိတန္တိ ပဋိဂ္ဂဟိတံ။ မဓုကရီကတန္တိ မဓုမက္ခိကာခုဒ္ဒကမက္ခိကာဘမရမက္ခိကာသင်္ခါတာဟိ တီဟိ မဓုကရီဟိ ကတံ။

၈၁၀။ ဝတ္ထူနံ ဂဏနာတိ မဓုပဋလေန ဌိတံ စေ၊ ပဋလဂဏနာယ၊ ပီဠေတွာ ဘာဇနေ ပက္ခိပိတွာ ဌပိတံ စေ၊ ဘာဇနဂဏနာယ၊ သိလေသမိဝ ပတ္ထိန္နံ စေ၊ မဟာဘမရမဓုခဏ္ဍပိဏ္ဍဝသေန၊ ဝိသုံ ဝိသုံ ကတေ တေသံ ဂဏနာယာတိ အတ္ထော။

၈၁၁။ ဃနာဃနန္တိ ဧတ္ထ ဂုဠဉ္စ နာနပ္ပကာရာ သက္ကရာ စ ဃနပက္ကံ နာမ။ ပက္ကတနုကံ ဖာဏိတံ အဃနပက္ကံ နာမ။ ဥစ္ဆုသိလေသော အပက္ကဃနံ နာမ။ ဥစ္ဆုဒဏ္ဍတော ပီဠိတရသော အပက္ကာဃနံ နာမ။ ‘‘ဖာဏိတံ နာမ ဥစ္ဆုမှာ နိဗ္ဗတ္တ’’န္တိ (ပါရာ။ ၆၂၃) သာဓာရဏပါဠိဝစနတော၊ ‘‘ဖာဏိတံ နာမ ဥစ္ဆုရသံ ဥပါဒါယာ’’တိ (ကင်္ခါ။ အဋ္ဌ။ ဘေသဇ္ဇသိက္ခာပဒဝဏ္ဏနာ၊ ဝိ။ သင်္ဂ အဋ္ဌ။ ၉၈) အဋ္ဌကထာဝစနတော စ ဣဟ ရသာဒီဟိ ဥစ္ဆုပါနမ္ပိ သင်္ဂဟိတံ။ ကေစိ ဥစ္ဆုနော စတုကာလိကတ္တံ ဝဏ္ဏယန္တိ၊ တံ န သာရတော ပစ္စေတဗ္ဗံ။

၈၁၂။ ဖာဏိတန္တိ ဝုတ္တပ္ပကာရေ တသ္မိံ ဖာဏိတေ အညတရံ။ ဂဟိတံ ပဋိဂ္ဂဟိတံ။

၈၁၃။ အသံသဋ္ဌေနာတိ ¶ အပရိဿာဝိတေန။ ကတဖာဏိတန္တိ ပရိဿာဝေတွာ အတ္တနာ ကတဖာဏိတံ။ ပုရေဘတ္တံ ဂဟိတေနာတိ ပုရေဘတ္တံ ပဋိဂ္ဂဟိတေန။ ‘‘သယံ ကတ’’န္တိ (ပါရာ။ အဋ္ဌ။ ၂။၆၂၃) ဝုတ္တတ္တာ ကတန္တိ ဥစ္ဆုရသော ဂဟေတဗ္ဗော။

၈၁၆။ ကတွာတိ ပစိတွာ ဖာဏိတံ ကတွာ။

၈၁၇။ ပစ္ဆာဘတ္တံ ကတဉ္စာပီတိ ပစ္ဆာဘတ္တံ အတ္တနာ စ ကတံ အနုပသမ္ပန္နေန စ ကတံ ဖာဏိတမ္ပိ။

၈၁၈။ ကတံ ¶ …ပေ… သီတဝါရိနာတိ သီတုဒကေ မဓုကပုပ္ဖာနိ ပက္ခိပိတွာ ဌပေတွာ မဒ္ဒိတွာ ပရိဿာဝိတရသေန ကတံ မဓုကဖာဏိတံ။

၈၁၉။ အဿာတိ မဓုကဖာဏိတဿ။ ဒုက္ကဋန္တိ တဒါဓာရဘာဇနဂဏနာယ ဒုက္ကဋံ။ ခီရံ ပက္ခိပိတွာ ကတံ မဓုကဖာဏိတံ ယာဝကာလိကံ စေ ဟောတိ၊ ကထံ ခဏ္ဍသက္ကရာကတံ သတ္တာဟကာလိကံ ဟောတီတိ ဝိစာရဏာယံ ခီရဇလ္လိကံ ဓောဝိတွာ ဓောဝိတွာ ဂယှမာနတ္တာ ဝဋ္ဋတီတိ ပရိဟရန္တိ။ ယထာဟ အဋ္ဌကထာယံ ‘‘ခဏ္ဍသက္ကရံ ပန ခီရဇလ္လိကံ အပနေတွာ အပနေတွာ သောဓေန္တိ၊ တသ္မာ ဝဋ္ဋတီ’’တိ (ပါရာ။ အဋ္ဌ။ ၂။၆၂၃)။ ‘‘ဗီဇတော ပဋ္ဌာယ န ဝဋ္ဋတီ’’တိ ပဋိက္ခိတ္တမဓုကပုပ္ဖမေရယံ ဝိနာ အာမကဉ္စ ပက္ကဉ္စ မဓုကပုပ္ဖံ ပုရေဘတ္တံ ဝဋ္ဋတီတိ အဋ္ဌကထာယံ ဝုတ္တံ။

၈၂၀။ သဗ္ဗေသံ ပန ဖလာနန္တိ ကဒလိခဇ္ဇူရိအာဒိဖလာနံ။

၈၂၁။ သာမညဇောတနာယ ဝိသေသေပိ အဝဋ္ဌာနတော ‘‘ကာလိကာ’’တိ ဣမိနာ ‘‘ပစ္ဆာဘတ္တံ သတိ ပစ္စယေ’’တိ ဝစနသာမတ္ထိယာ ယာဝကာလိကဝဇ္ဇာ တယော ကာလိကာ ဂဟေတဗ္ဗာ ¶ ၊ ‘‘ပုရေဘတ္တံ ယထာသုခ’’န္တိ ဝစနသာမတ္ထိယာ စတ္တာရောပိ ဂဟေတဗ္ဗာ။ ယာဝကာလိကဝဇ္ဇာ တယော ကာလိကာ ပစ္ဆာဘတ္တံ ဝိကာလေ ပစ္စယေ ပိပါသာဒိကာရဏေ သတိ ကေဝလမ္ပိ ပစ္စေကမ္ပိ မိဿေတွာပိ ပရိဘုဉ္ဇိတုံ ဘိက္ခုဿ ဝဋ္ဋန္တိ။ ကာလိကာ စတ္တာရောပိ ပုရေဘတ္တံ ကာလေ ယာဝမဇ္ဈနှာ ကေဝလမ္ပိ မိဿေတွာပိ ယထာသုခံ အသတိပိ ပစ္စယေ ပရိဘုဉ္ဇိတုံ ဘိက္ခုဿ ဝဋ္ဋန္တီတိ ယောဇနာ။

၈၂၂။ အရုအာဒီနီတိ ဝဏာဒီနိ။ ‘‘မက္ခေတုံ န ဝဋ္ဋတီ’’တိ ဣမိနာ ဗာဟိရပရိဘောဂေါပိ နိဝါရိတော။

၈၂၃။ အနာပတ္တိဝါရေ ‘‘အန္တောသတ္တာဟ’’န္တိ အဓိကာရေ ‘‘အနုပသမ္ပန္နဿ စတ္တေန ဝန္တေန မုတ္တေန အနပေက္ခော ဒတွာ ပဋိလဘိတွာ ပရိဘုဉ္ဇတီ’’တိ (ပါရာ။ ၆၂၅) ဝုတ္တတ္တာ စဇိတွာတိ ဧတ္ထ ‘‘အန္တောသတ္တာဟံ အနုပသမ္ပန္နဿာ’’တိ ဝတ္တဗ္ဗံ။ လဘိတွာတိ ဧတ္ထ ‘‘သတ္တာဟာတိက္ကမေပီ’’တိ သာမတ္ထိယာ လဗ္ဘတိ။ တေနာဟ မဟာပဒုမတ္ထေရော ‘‘အန္တောသတ္တာဟေ ဒိန္နဿ ဟိ ပုန ပရိဘောဂေ အာပတ္တိယေဝ နတ္ထိ၊ သတ္တာဟာတိက္ကန္တဿ ပန ပရိဘောဂေ အနာပတ္တီတိ ဒဿနတ္ထမိဒံ ဝုတ္တ’’န္တိ။ လဘိတွာတိ ¶ ဂဟိတတေလေန အနုပသမ္ပန္နေန သက္ကစ္စံ၊ အသက္ကစ္စံ ဝါ ဒိန္နံ လဘိတွာ။ သာယိတုန္တိ ဧတ္ထ ‘‘လဘတီ’’တိ သေသော။

၈၂၄။ ‘‘အနာပတ္တိ အဓိဋ္ဌေတီ’’တိ ဒွိန္နံ ပဒါနံ အန္တရေ ‘‘အန္တောသတ္တာဟ’’န္တိ သေသော၊ သဗ္ဗပဒေဟိပိ ယုဇ္ဇတိ။ အဓိဋ္ဌေတီတိ သတ္တာဟဗ္ဘန္တရေ သပ္ပိဉ္စ တေလဉ္စ ဝသဉ္စ မုဒ္ဓနိ တေလံ ဝါ အဗ္ဘဉ္ဇနံ ဝါ၊ မဓုံ အရုမက္ခနံ၊ ဖာဏိတံ ဃရဓူပနံ ဘဝိဿတီတိ အဓိဋ္ဌေတိ။ အဓိဋ္ဌိတေန အနဓိဋ္ဌိတံ စေ မိဿံ ဟောတိ၊ ပုနပိ အဓိဋ္ဌာတဗ္ဗံ။ ဝိဿဇ္ဇေတီတိ အန္တောသတ္တာဟေ အညဿ ဥပသမ္ပန္နဿ ဒေတိ။ သစေ တထာ ဒိန္နံ အညေန အပ္ပဋိဂ္ဂဟိတတ္တာ ¶ ၊ တေန ပဋိဂ္ဂဟိတမ္ပိ ဣတရဿ ဒိန္နတ္တာ တေသံ အနာပတ္တီတိ အဋ္ဌကထာယံ (ပါရာ။ အဋ္ဌ။ ၂။၆၂၅ အတ္ထတော သမာနံ) ဝုတ္တံ။

ဝိနဿတီတိ သတ္တာဟဗ္ဘန္တရေ ယေန ကေနစိ အာကာရေန ယထာ အပရိဘောဂံ ဟောတိ၊ တထာ စောရိကာယ ဟရဏာဒိဝသေန နဿတိ။ ယထာဟ အဋ္ဌကထာယံ ‘‘ဝိနဿတီတိ အပရိဘောဂံ ဟောတီ’’တိ (ပါရာ။ အဋ္ဌ။ ၂။၆၂၅)။ အစ္ဆိန္ဒိတွာ ဂဏှတီတိ အညော တသ္မိံ သတ္တာဟဗ္ဘန္တရေ ဝိလုမ္ပိတွာ ဂဏှာတိ။ ဝိဿာသံ ဂဏှတီတိ တသ္မိံယေဝ သတ္တာဟဗ္ဘန္တရေ အညော ဝိဿာသံ ဂဏှာတိ။

၈၂၅။ အကထိနစိတ္တေန သတ္ထုနာ သမုဋ္ဌာနာဒယော သဗ္ဗေဝ ပဌမေန ကထိနေန သမာ ပကာသိတာတိ ယောဇနာ။ အကထိနစိတ္တေနာတိ မဟာကရုဏာရသေန တိန္တတာယ အကက္ကသစိတ္တေန၊ အဝိဟိံသာဘိရတစိတ္တေနာတိ ဝုတ္တံ ဟောတိ။ သတ္ထုနာတိ ဒိဋ္ဌဓမ္မိကသမ္ပရာယိကာဒီဟိ အတ္ထေဟိ သဒေဝကံ လောကံ အနုသာသတီတိ သတ္ထာ၊ တေန သဗ္ဗညုနာ ဒသဗလေန သမ္မာသမ္ဗုဒ္ဓေန။

ဘေသဇ္ဇသိက္ခာပဒကထာဝဏ္ဏနာ။

၈၂၆။ ဂိမှာနန္တိ ဧတ္ထ ‘‘မာသာန’’န္တိ သာမတ္ထိယာ လဗ္ဘတိ၊ နိဒ္ဓါရဏေ သာမိဝစနံ၊ ဂိမှေသု စတူသု မာသေသူတိ အတ္ထော။ နိဒ္ဓါရိတဗ္ဗံ ဒဿေတိ ‘‘မာသော သေသော’’တိ၊ ဧတ္ထ ‘‘ဝတ္တဗ္ဗေ ကာလေ’’တိ သေသော။ ဖဂ္ဂုနမာသကဏှပက္ခပါဋိပဒတော ပဋ္ဌာယ ဇေဋ္ဌမာသပုဏ္ဏမိပရိယောသာနေသု တီသု မာသေသု အတိက္ကန္တေသူတိ အတ္ထော။ သေသမာသော နာမ ဇေဋ္ဌမာသဿ ကဏှပက္ခပါဋိပဒတော ပဋ္ဌာယ အာသာဠှိမာသပုဏ္ဏမိပရိယောသာနော။ ဂိမှာနံ မာသော သေသောတိ ဝတ္တဗ္ဗေ ကာလေတိ အတ္ထော။

ဣမသ္မိံ ¶ ¶ ပစ္ဆိမေ ဂိမှမာသေ ဇေဋ္ဌမာသဿ ကဏှပက္ခော ဝဿိကသာဋိကာ စေ န လဒ္ဓါ၊ ပရိယေသိတုံ လဒ္ဓံ ကာတုံ ခေတ္တံ၊ အဓိဋ္ဌာနနိဝါသနာနံ အခေတ္တံ။ အာသာဠှိပုရိမပက္ခော ပရိယေသနကရဏနိဝါသနာနံ ခေတ္တံ၊ အဓိဋ္ဌာတုံ အခေတ္တံ။ အာသာဠှိကဏှပက္ခပါဋိပဒတော ယာဝ ပစ္ဆိမကတ္တိကပုဏ္ဏမီ၊ ဣဒံ စတုန္နမ္ပိ ခေတ္တန္တိ အယမေတ္ထ သင်္ခေပေါ။

ပရိယေသေယျာတိ ‘‘ယေ မနုဿာ ပုဗ္ဗေ ဝဿိကသာဋိကံ ဒေန္တီ’’တိအာဒိနာ (ပါရာ။ ၆၂၈) ပဒဘာဇနေ ဝုတ္တနယေန ပုဗ္ဗေ ဝဿိကသာဋိကဒါယကံ ဥပသင်္ကမ္မ ‘‘ဒေထ မေ ဝဿိကသာဋိကစီဝရ’’န္တိအာဒိနာ ဝစနေန အဝိညာပေတွာ ‘‘ကာလော ဝဿိကသာဋိကာယ သမယော ဝဿိကသာဋိကာယ၊ အညေပိ မနုဿာ ဝဿိကသာဋိကံ ဒေန္တီ’’တိ ဧဝံ သတုပ္ပာဒမတ္တကရဏေန ပရိယေသေယျ။

သာဋိကန္တိ ဝဿိကသာဋိကံ။ ‘‘အဒ္ဓမာသော သေသော’’တိ ဣဒံ ‘‘ဂိမှာန’’န္တိ ဣမိနာဝ ယုဇ္ဇတိ။ တတ္ထ ‘‘ဝတ္တဗ္ဗေ ကာလေ’’တိ အဇ္ဈာဟရိတဗ္ဗံ၊ အာသာဠှိမာသဿ ပုရိမပက္ခေတိ အတ္ထော။ ကတွာတိ ဧတ္ထ ‘‘လဒ္ဓ’’န္တိ သာမတ္ထိယာ လဗ္ဘတိ။ ယထာဝုတ္တနယေန သတုပ္ပာဒေန ဝါ အဝသေသာနံ သဒ္ဓါသမ္ပန္နကုလာနံ ဝါ သန္တိကာ လဒ္ဓံ သိဗ္ဗနရဇနကပ္ပဗိန္ဒုဒါနဝသေန နိဋ္ဌာပေတွာတိ ဝုတ္တံ ဟောတိ။ ပရိဒဟေတိ နိဝါသေယျ။

၈၂၇-၈။ ပိဋ္ဌိသမ္မတေ သမယေတိ ‘‘ကတ္တိကပုဏ္ဏမာသိယာ ပန ပစ္ဆိမပါဋိပဒဒိဝသတော ပဋ္ဌာယ ယာဝ ဇေဋ္ဌမူလပုဏ္ဏမာ ဣမေ သတ္တ မာသာ ပိဋ္ဌိသမယော နာမာ’’တိ (ပါရာ။ အဋ္ဌ။ ၂။၆၂၈) ဧဝံ ဒဿိတေသု သတ္တသု မာသေသု။ ဉာတကာညာတကာဒိနော သတုပ္ပာဒံ ကတွာတိ ယောဇနာ။ အာဒိ-သဒ္ဒေန ပဝါရိတာပဝါရိတာနံ သင်္ဂဟော။ ယထာဟ အဋ္ဌကထာယံ ‘‘အညာတကအပ္ပဝါရိတဋ္ဌာနတော’’တိ။

တေသုယေဝါတိ ¶ ဉာတကအညာတကပဝါရိတအပ္ပဝါရိတေသု။ ‘‘တထာ’’တိ ဣမိနာ ‘‘ဟောတိ နိဿဂ္ဂိယာပတ္တီ’’တိ ဣဒံ ဒဿိတံ။ သာ အာပတ္တိ အညာတကအပ္ပဝါရိတေသု အညာတကဝိညတ္တိသိက္ခာပဒေန ဟောတိ။ ယထာဟ အဋ္ဌကထာယံ ‘‘ဒေထ မေ ဝဿိကသာဋိကစီဝရ’န္တိအာဒိနာ နယေန ဝိညတ္တိံ ကတွာ နိပ္ဖာဒေန္တဿ အညာတကဝိညတ္တိသိက္ခာပဒေန နိဿဂ္ဂိယံ ပါစိတ္တိယ’’န္တိ (ပါရာ။ အဋ္ဌ။ ၂။၆၂၈)။ ဉာတကပဝါရိတေသု တေန သိက္ခာပဒေန အနာပတ္တိ၊ ပိဋ္ဌိသမယတ္တာ ဣမိနာ ¶ အာပတ္တိ ဟောတိ။ အညာတကအပ္ပဝါရိတေသု စ ဝက္ခမာနနယေန ဝတ္တဘေဒဒုက္ကဋေန သဒ္ဓိံ ဟောတီတိ ဒဋ္ဌဗ္ဗံ။

၈၂၉-၃၀။ အညာတကာဒိနော ကတွာ ပန သတုပ္ပာဒန္တိ ယောဇနာ။ အာဒိ-သဒ္ဒေန အပ္ပဝါရိတာနံ သင်္ဂဟော။ ကုစ္ဆိသညိတေ သမယေတိ ယထာဝုတ္တပိဋ္ဌိသမယေ သတ္တမာသေ ဝိနာ ဣတရေ ပဉ္စ မာသာ ဝုတ္တာ။ ယထာဟ အဋ္ဌကထာယံ ‘‘ဇေဋ္ဌမူလပုဏ္ဏမာသိယာ ပန ပစ္ဆိမပါဋိပဒဒိဝသတော ပဋ္ဌာယ ယာဝ ကတ္တိကပုဏ္ဏမာ ဣမေ ပဉ္စ မာသာ ကုစ္ဆိသမယော နာမာ’’တိ (ပါရာ။ အဋ္ဌ။ ၂။၆၂၈)။ ဝတ္ထန္တိ ဝဿိကသာဋိကံ။ အဒိန္နပုဗ္ဗေသူတိ ယေဟိ ဝဿိကသာဋိကာ န ဒိန္နပုဗ္ဗာ၊ တေသု၊ ဣမိနာ ဝတ္တဘေဒဿ ကာရဏမာဟ။ ဣဟ ဝတ္တဘေဒေါ နာမ ‘‘ယေ မနုဿာ ပုဗ္ဗေ ဝဿိကသာဋိကစီဝရံ ဒေန္တီ’’တိအာဒိဝစနတော (ပါရာ။ ၆၂၈) ဒိန္နပုဗ္ဗေသု ကာတဗ္ဗဿ သတုပ္ပာဒဿ အဒိန္နပုဗ္ဗေသု ကရဏံ။ ဗျတိရေကတော ဒိန္နပုဗ္ဗေသု နတ္ထီတိ ဒီပိတံ ဟောတိ။

တတြာတိ အညာတကာဒိမှိ။ ‘‘နိဿဂ္ဂိယ’’န္တိ ဣမိနာ အညာတကဝိညတ္တိသိက္ခာပဒေန အာပတ္တိံ အာဟ။ ယထာဟ ကုစ္ဆိသမယစတုက္ကေ ‘‘ဝိညတ္တိမ္ပိ ကတွာ နိပ္ဖာဒေန္တဿ အညာတကဝိညတ္တိသိက္ခာပဒေန နိဿဂ္ဂိယံ ပါစိတ္တိယ’’န္တိ။ အယံ ပါစိတ္တိယာပတ္တိ ပကတိယာ ဝဿိကသာဋိကဒါယကေသုပိ ဟောတီတိ ဣဒံ ¶ အဋ္ဌကထာယံ ‘‘ဣဒံ ပန ပကတိယာ ဝဿိကသာဋိကဒါယကေသုပိ ဟောတိယေဝါ’’တိ (ပါရာ။ အဋ္ဌ။ ၂။၆၂၈) ဝစနတော ဝိညာယတိ။

၈၃၁။ ဩဝဿာပေတီတိ အာကာသတော ပတိတဥဒကေနေဝ ကာယံ တေမေတိ၊ ဣမိနာ ‘‘ဃဋာဒီဟိ ဩသိဉ္စိတုံ ဝဋ္ဋတီ’’တိ ဒီပိတံ ဟောတိ။ ‘‘နိဗ္ဗကောသမ္ဗုနာ နဟာယိတုံ ဝဋ္ဋတီ’’တိ ဂဏ္ဌိပဒေသု ဝုတ္တံ။ သတိပိ စီဝရေတိ ဝဿိကသာဋိကာယ သတိယာပိ။ ‘‘ပရိယောသာနေ ဒုက္ကဋ’’န္တိ ဣမိနာ ဗိန္ဒုဂဏနာယာတိ ဒီပေတိ။ ဝိဝဋင်္ဂဏေတိ ရုက္ခာဒိနာ ကေနစိ အနာဝဋဋ္ဌာနေ။

၈၃၂။ မာသသ္မိန္တိ ဂိမှာနံ ပစ္ဆိမမာသသ္မိံ။

၈၃၃။ ‘‘အစ္ဆိန္နစီဝရဿာတိ ဧတံ ဝဿိကသာဋိကမေဝ သန္ဓာယ ဝုတ္တ’’န္တိ (ပါရာ။ အဋ္ဌ။ ၂။၆၃၀) အဋ္ဌကထာယံ ဝုတ္တံ။ ဝဿိကသာဋိကံ နိဝါသေတွာ နဟာယန္တဿ စောရုပဒ္ဒဝေါ အာပဒါ နာမ။ နှာနကောဋ္ဌကန္တိ နဟာနတ္ထာယ ကတကောဋ္ဌကံ။ ‘‘ဝါပီ’’တိ ဣမိနာ ပေါက္ခရဏိဇာတဿရာဒယော ¶ ဥပလက္ခိတာ။ နှာယန္တဿာတိ နဂ္ဂေါ ဟုတွာ နဟာယန္တဿာတိ ပကရဏတော လဗ္ဘတိ။ ‘‘အာကာသတော ပတိတဥဒကေနေဝါ’’တိ (ပါရာ။ အဋ္ဌ။ ၂။၆၂၉) အဋ္ဌကထာယမေဝ ဝုတ္တံ။

၈၃၄။ ကြိယန္တိ အကာလေ ပရိယေသနကရဏအဓိဋ္ဌာနနိဝါသနေဟိ အာပဇ္ဇိတဗ္ဗတော ကိရိယံ။ ကာယေန စ ဝါစာယ စ ဝိညာပနာဒိံ ကရောန္တဿ ကာယကမ္မံ ဝစီကမ္မံ ဟောတိ။

ဝဿိကသာဋိကကထာဝဏ္ဏနာ။

၈၃၅။ ‘‘ယော ¶ ပန ဘိက္ခု ဘိက္ခုဿ သာမံ စီဝရံ ဒတွာ’’တိ (ပါရာ။ ၆၃၂) ဝစနတော သာမန္တိ ဧတ္ထ ‘‘ဘိက္ခူ’’တိ စ ဒတွာတိ ဧတ္ထ ‘‘ဘိက္ခုဿ’’ဣတိ စ လဗ္ဘတိ။ စီဝရန္တိ ဆန္နံ စီဝရာနံ အညတရံ စီဝရံ ဝိကပ္ပနုပဂံ ပစ္ဆိမံ။ ‘‘ကုပိတော အနတ္တမနော အစ္ဆိန္ဒေယျာ’’တိ (ပါရာ။ ၆၃၂) ဝစနတော အစ္ဆိန္ဒန္တဿာတိ ဧတ္ထ ‘‘ကုပိတဿ အနတ္တမနဿာ’’တိ သေသော၊ ကုပိတဿ အနတ္တမနဿ အစ္ဆိန္ဒန္တဿ ဝါ အစ္ဆိန္ဒာပေန္တဿ ဝါတိ အတ္ထော။ တန္တိ အတ္တနာ ဒိန္နစီဝရံ။ ‘‘သကသညာယာ’’တိ ဣမိနာ ပါရာဇိကာယ အဝတ္ထုဘာဝံ ဒီပေတိ။

၈၃၆။ တထာတိ ဧကာယေဝ အာပတ္တီတိ ဒီပေတိ။

၈၃၇။ ဝတ္ထာနန္တိ စီဝရာနံ။ အဿာတိ ဘိက္ခုဿ။

၈၄၁။ သင်္ဃာဋိံ ဂဏှ၊ ဥတ္တရာသင်္ဂံ ဂဏှာတိ ယောဇနာ။

၈၄၂။ ဝိကပ္ပနုပဂံ ပစ္ဆိမန္တိ ဧတ္ထ ‘‘စီဝရ’’န္တိ လဗ္ဘတိ။ အာယာမတော ဝဍ္ဎကိဟတ္ထံ တိရိယံ တထာ ဝိဒတ္ထိပ္ပမာဏံ ဝတ္ထခဏ္ဍံ ဟေဋ္ဌိမပရိစ္ဆေဒတော ဝိကပ္ပနုပဂံ နာမ။ အညံ ကိဉ္စိ ပရိက္ခာရန္တိ ယောဇနာ၊ အန္တမသော သုစိမ္ပီတိ ဝုတ္တံ ဟောတိ။ ပရံ ပုဂ္ဂလံ။ ဆိန္ဒာပေန္တဿာတိ အစ္ဆိန္ဒာပေန္တဿ။ ကာရိတန္တဿ ဒွိကမ္မကတ္တာ ‘‘ပရ’’န္တိ စ ‘‘ပရိက္ခာရ’’န္တိ စ ကမ္မဒွယဂဟဏံ။ အညန္တိ ပရိက္ခာရဝိသေသနံ။ ဒုက္ကဋံ ဝတ္ထုဂဏနာယ၊ ဝစနဂဏနာယ စ။

၈၄၄။ ဧဝန္တိ ¶ ယထာ အနုပသမ္ပန္နေ အနုပသမ္ပန္နသညိနော ဒုက္ကဋံ၊ ဧဝံ အနုပသမ္ပန္နေ…ပေ… ဝေမတိကဿာပိ ဒုက္ကဋန္တိ ယောဇနာ။ အစ္ဆိန္ဒန္တဿာတိ ဧတ္ထ ယထာဝုတ္တံ ‘‘အနုပသမ္ပန္နေ’’တိ ဣဒံ ဝိဘတ္တိဝိပရိဏာမေန သာမိဝစနံ ကတွာ ‘‘ဒိန္န’’န္တိ အဇ္ဈာဟာရေန သဟ ယောဇေတဗ္ဗံ၊ ‘‘စီဝရ’’န္တိ ပကရဏတော ¶ လဗ္ဘတိ၊ အနုပသမ္ပန္နဿ ဒိန္နံ စီဝရံ အစ္ဆိန္ဒန္တဿာတိ ဝုတ္တံ ဟောတိ။

၈၄၅။ သော ဝါတိ ယဿ စီဝရံ ဒိန္နံ၊ သော ဧဝ ဝါ ဘိက္ခု။ တုဋ္ဌော ဝါ ဒုဋ္ဌော ဝါ သော ဒေတီတိ ယောဇနာ။ ဝိဿာသမေဝ ဝါတိ ဝိဿာသံ ကတွာ ဂဏှတောတိ ယောဇနာ။

၈၄၆။ ဧတ္ထာတိ ဣမသ္မိံ သိက္ခာပဒေ။

စီဝရစ္ဆိန္ဒနကထာဝဏ္ဏနာ။

၈၄၇။ ဝိညာပေတွာတိ ဝတ္ထဝါယာပနံ သန္ဓာယ ယာစိတွာ။ ဆဗ္ဗိဓံ သုတ္တန္တိ ပဒဘာဇနေ ‘‘ခေါမံ ကပ္ပာသိကံ ကောသေယျံ ကမ္ဗလံ သာဏံ ဘင်္ဂ’’န္တိ (ပါရာ။ ၆၃၈) အာဂတံ ဆပ္ပကာရံ သုတ္တံ။ ကမ္ဗလန္တိ ဧဠကလောမသုတ္တံ။ သာနုလောမာနိ ဆပ္ပကာရသုတ္တာနိ ဟေဋ္ဌာ စီဝရဝိနိစ္ဆယေ ဝုတ္တာနုသာရေန ဝေဒိတဗ္ဗာနိ။ စီဝရတ္ထံ ဝတ္ထံ ‘‘စီဝရ’’န္တိ ဝုတ္တံ။ တန္တဝါယေဟီတိ ကပ္ပိယာကပ္ပိယေဟိ ပေသကာရေဟိ။ ပေါတ္ထကေသု ‘‘ဝါယာပေတုံ န ဝဋ္ဋတီ’’တိ ပါဌော ဒိဿတိ၊ ‘‘သစေ’’တိ ဣမိနာ အယုဇ္ဇမာနတ္တာ သော အပါဌော။ ‘‘ဝါယာပေတိ န ဝဋ္ဋတီ’’တိ ပါဌော ယုဇ္ဇတီတိ သစေ ဝါယာပေတီတိ ယောဇနာ၊ အတ္တနော အတ္ထာယ ယဒိ ဝါယာပေယျာတိ အတ္ထော။

၈၄၈။ တထာ အကပ္ပိယော။ ကီဒိသောတိ အာဟ ‘‘အညာတကာဒိကော’’တိ။ အညာတကာဒိကောတိ အညာတကော အာဒိ ယဿ သော အညာတကာဒိကော။ အာဒိ-သဒ္ဒေန အပ္ပဝါရိတော ဂဟိတော။ ယော ဘိက္ခု တန္တဝါယဿ အညာတကော၊ တေန အပ္ပဝါရိတော စ၊ တဿ အညာတကာဒိကော ဘိက္ခုနာ ဝိညတ္တော သော တန္တဝါယော အကပ္ပိယောတိ အတ္ထော။

၈၄၉။ အကပ္ပိယေနာတိ ¶ ဝိညာပိတေန။ ဝါယာပေန္တဿာတိ ဧတ္ထ ‘‘ပယောဂေ ပယောဂေ ဒုက္ကဋံ၊ ပဋိလာဘေနာ’’တိ သေသော။ ယထာဟ ‘‘ဝါယာပေတိ၊ ပယောဂေ ပယောဂေ ဒုက္ကဋံ။ ပဋိလာဘေန နိဿဂ္ဂိယ’’န္တိ (ပါရာ။ ၆၃၈)။

၈၅၀။ ကိတ္တကေ ¶ ဝီတေ နိဿဂ္ဂိယံ ဟောတီတိ အာဟ ‘‘ဝိဒတ္ထိမတ္တေ’’တိအာဒိ။ ဟတ္ထမတ္တေတိ ရတနမတ္တေ။ ပဒဘာဇနေ ‘‘ပဋိလာဘေန နိဿဂ္ဂိယ’’န္တိ ဝုတ္တံ၊ ဣဓ ‘‘ဝီတေ နိဿဂ္ဂိယ’’န္တိ ကသ္မာ အာဟာတိ? အဋ္ဌကထာယံ ဝုတ္တတ္တာ။ တတ္ထာပိ တထာ ကသ္မာ ဝုတ္တန္တိ? တဒနန္တရံ အတ္တနော သန္တကတ္တာ ဝီတဝီတဋ္ဌာနံ ပဋိလဒ္ဓမေဝ ဟောတိ၊ ပဒဘာဇနေပိ ဣမိနာ အဓိပ္ပာယေန ပဋိလာဘေန နိဿဂ္ဂိယံ ဝုတ္တံ၊ တသ္မာ ယာဝ စီဝရံ ဝဍ္ဎတိ၊ တာဝ ဣမိနာ ပမာဏေန အာပတ္တိယော ဝဍ္ဎန္တိ။ ဖလကေပိ စာတိ ဧတ္ထ ဖလကံ နာမ တုရိဝီတဋ္ဌာနံ၊ ယတ္ထ သံဟရိတွာ ဌပေန္တိ။ ဖလကေ ဖလကေပိ စ နိဿဂ္ဂိယံ ဝုတ္တန္တိ ယောဇနာ။

၈၅၁။ တေနေဝါတိ ဝိညတ္တတန္တဝါယေနေဝ။ ကပ္ပိယံ သုတ္တန္တိ အဝိညတ္တိယာ လဒ္ဓသုတ္တံ။ ကပ္ပိယေန တန္တဝါယေန အကပ္ပိယသုတ္တံ ဝါယာပေန္တဿ တထေဝ ဒုက္ကဋန္တိ ယောဇနာ။

၈၅၂။ ဧကန္တရိကတော ဝါ ကပ္ပိယာကပ္ပိယေဟေဝ သုတ္တေဟိ ဝီတေ ဒုက္ကဋန္တိ ယောဇနာ၊ အန္တရန္တရာ အကပ္ပိယသုတ္တာနံ ပသာရဏေန၊ ဝါယနေန စ ဒုက္ကဋံ ဟောတီတိ အတ္ထော။ ဒီဃတော ဝါ တိရိယတော ဝါ ကပ္ပိယာကပ္ပိယေဟေဝ သုတ္တေဟိ ဝီတေ ဒုက္ကဋန္တိ ယောဇနာ၊ ဒီဃတော ကပ္ပိယသုတ္တံ ပသာရေတွာ တိရိယံ အကပ္ပိယသုတ္တေန ဝီတေ ဒုက္ကဋံ ဟောတီတိ အတ္ထော။ ဝါဂ္ဂဟဏေန ဝုတ္တဝိပရိယာယတောပိ ယောဇေတဗ္ဗံ။ ဒီဃတော အကပ္ပိယသုတ္တံ ပသာရေတွာ တိရိယတော ကပ္ပိယသုတ္တေန ¶ ဝီတေတိ အယမေတ္ထ ဝိပရိယာယော။ ဝီတေတိ ဧတ္ထ ‘‘ဖလကေ ဖလကေ’’တိ အနုဝတ္တေတဗ္ဗံ။

၈၅၃။ ကပ္ပိယာကပ္ပိယေဟိ တန္တဝါယေဟိ ကပ္ပိယာကပ္ပိယသုတ္တံ မိဿေတွာ ကတေ ဝီတေ ဖလကေ ဖလကေ တဿ ဘိက္ခုဿ ဒုက္ကဋန္တိ ယောဇနာ။ ဝေတိ နိပါတမတ္တံ၊ အထ ဝါ ဝေ တသ္မိံ ကတေ ဝီတေတိ အတ္ထော။

၈၅၄-၅။ တေ ကပ္ပိယာကပ္ပိယတန္တဝါယာ ပရိစ္ဆေဒံ ဒဿေတွာ ဝါရေနေဝ အကပ္ပိယသုတ္တံ သစေ ဝိနန္တီတိ ယောဇနာ။ အကပ္ပိယေန တန္တဝါယေန ဝီတေ။ ဆန္ဒာနုရက္ခနတ္ထံ ‘‘ဝိတေ’’တိ ဝုတ္တံ။ ပမာဏသ္မိန္တိ ဝိကပ္ပနုပဂပစ္ဆိမပ္ပမာဏသ္မိံ။ တဒူနေတိ တတော ဝိကပ္ပနုပဂပစ္ဆိမပ္ပမာဏတော ဦနေ။ ဣတရေနာတိ ကပ္ပိယတန္တဝါယေန။ ဥဘယတ္ထာတိ ပမာဏသ္မိံ၊ တဒူနေ စ ဒုက္ကဋံ ဧဝါတိ ယောဇနာ။

၈၅၆။ သစေ ¶ ကပ္ပိယာကပ္ပိယတန္တဝါယာ ဒွေပိ ဝေမံ ဥဘယကောဋိယာ ဂဟေတွာ ဧကတောဝ ဝိနန္တိ ဝါတိ ယောဇနာ။ တိရိယံ သုတ္တံ ပဝေသေတွာ ယေန အာကောဋေန္တော ဃနဘာဝံ သမ္ပာဒေန္တိ၊ တံ ဝေမံ ဝုစ္စတိ။

၈၅၇။ သဗ္ဗတ္ထ ဘေဒေတိ ကပ္ပိယာကပ္ပိယသုတ္တတန္တဝါယေဟိ ကတေ ပမာဏတဒူနဧကန္တရိကဒီဃတိရိယပ္ပကာရေ သဗ္ဗတ္ထ ဝါရဘေဒေ။ အာပတ္တိဘေဒေါတိ အကပ္ပိယသုတ္တေဟိ အာယာမဝိတ္ထာရတော အကပ္ပိယတန္တဝါယေန ဝီတပ္ပဒေသေ ပမာဏယုတ္တေ ပါစိတ္တိယံ၊ ဣတရတြ ဒုက္ကဋန္တိ ဘေဒေါ။

၈၅၈။ ကပ္ပိယော တန္တဝါယော နာမ ဉာတကော ဝါ ပဝါရိတော ဝါ ကပ္ပိယမူလေန ပယောဇိတော ဝါ။

၈၅၉။ ‘‘အနာပတ္တိ ¶ စီဝရံ သိဗ္ဗေတုံ၊ အာယောဂေ၊ ကာယဗန္ဓနေ၊ အံသဗဒ္ဓကေ၊ ပတ္တတ္ထဝိကာယ၊ ပရိဿာဝနေ၊ ဉာတကာနံ၊ ပဝါရိတာနံ၊ အညဿတ္ထာယ၊ အတ္တနော ဓနေနာ’’တိအာဒိကံ (ပါရာ။ ၆၄၀) အနာပတ္တိဝါရံ ဒဿေတုမာဟ ‘‘အနာပတ္တီ’’တိအာဒိ။ ဣဓ နိဒ္ဒိဋ္ဌောဝ လက္ခဏေန အနိဒ္ဒိဋ္ဌမ္ပိ ဝေဒိတဗ္ဗံ။ ဧတ္ထ စီဝရံ သိဗ္ဗေတုံ သုတ္တံ ဝိညာပေန္တဿ အနာပတ္တီတိ ယောဇနာ။ ဓနံ နာမ တဏ္ဍုလာဒိ ကပ္ပိယဝတ္ထု။ ‘‘ပရိဿာဝနေ’’တိအာဒီသု နိမိတ္တတ္ထေ ဘုမ္မံ၊ ပရိဿာဝနာဒိနိမိတ္တံ သုတ္တဉ္စ တန္တဝါယေ စ ဝိညာပေန္တဿ အနာပတ္တီတိ ဝုတ္တံ ဟောတိ။

သုတ္တဝိညတ္တိကထာဝဏ္ဏနာ။

၈၆၀။ အပ္ပဝါရိတညာတီနန္တိ အပ္ပဝါရိတာနံ အညာတီနံ၊ ‘‘ကီဒိသေန တေ ဘန္တေ စီဝရေန အတ္ထော၊ ကီဒိသံ တေ စီဝရံ ဝါယာပေမီ’’တိ (ပါရာ။ ၆၄၃) ပဒဘာဇနေ ဝုတ္တနယေန အပ္ပဝါရိတာနံ အညာတီနန္တိ အတ္ထော။ သမေစ္စာတိ ဥပဂန္တွာ။ ဝိကပ္ပန္တိ ဝိသိဋ္ဌံ ကပ္ပံ အဓိကဝိဓာနံ။ အာပဇ္ဇတီတိ ကရောတိ၊ ‘‘ဣဒံ ခေါ အာဝုသော စီဝရံ မံ ဥဒ္ဒိဿ ဝိယျတိ၊ အာယတဉ္စ ကရောထ၊ ဝိတ္ထတဉ္စ အပ္ပိတဉ္စ သုဝီတဉ္စ သုပ္ပဝါယိတဉ္စ သုဝိလေခိတဉ္စ သုဝိတစ္ဆိတဉ္စ ကရောထာ’’တိအာဒိနာ (ပါရာ။ ၆၄၂) နယေန ဒါယကာနံ အဓိပ္ပာယတော အဓိကတရအာယတာဒိကရဏတ္ထံ ဝိဓာနံ ကရောတီတိ ဝုတ္တံ ဟောတိ။

တတ္ထ ¶ အာယတန္တိ ဒီဃံ။ ဝိတ္ထတန္တိ ပုထုလံ။ အပ္ပိတန္တိ ဃနံ။ သုဝီတန္တိ သုဋ္ဌု ဝီတံ သဗ္ဗဋ္ဌာနေသု သမံ ကတွာ ဝီတံ။ သုပ္ပဝါယိတန္တိ သုဋ္ဌု ပဝါယိတံ သဗ္ဗဋ္ဌာနေ သမံ ကတွာ တန္တေ ပသာရိတံ။ သုဝိလေခိတန္တိ လေခနိယာ သုဋ္ဌု ဝိလိခိတံ။ သုဝိတစ္ဆိတန္တိ ကောစ္ဆေန သုဋ္ဌု ဝိတစ္ဆိတံ၊ သုဝိနိဒ္ဓါတန္တိ အတ္ထော။

၈၆၁။ သုတ္တဝဍ္ဎနပ္ပကာရံ ¶ ဒဿေတုမာဟ ‘‘ဒီဃာယတပ္ပိတတ္ထာယာ’’တိ။ တေန စ ပဒဘာဇနေ ‘‘တဿ ဝစနေန အာယတံ ဝါ ဝိတ္ထတံ ဝါ အပ္ပိတံ ဝါ ကရောတိ၊ ပယောဂေ ဒုက္ကဋံ၊ ပဋိလာဘေန နိဿဂ္ဂိယံ ဟောတီ’’တိ (ပါရာ။ ၆၄၃) ဧတံ အာယတာဒိတ္တယမေဝ ဝုတ္တံ။ သုတ္တဝဍ္ဎနကေ ကတေတိ ဧတ္ထ အနန္တရံ ဝတ္တဗ္ဗေန ‘‘ပယောဂေ ဒုက္ကဋံ ပဋိလာဘေနာ’’တိ ပါဌသေသေန သဟ ယောဇနာ ကာတဗ္ဗာ၊ ဒါယကေဟိ တုလယိတွာ ဒိန္နပ္ပမာဏတော သုတ္တံ ဝဍ္ဎိတုံ တေန ကတေန သဗ္ဗေနာပိ ပယောဂေန ဘိက္ခုနော ဒုက္ကဋဉ္စ ပဋိလာဘေန နိဿဂ္ဂိယပါစိတ္တိယဉ္စ ဟောတီတိ အတ္ထော။

၈၆၂။ ဉာတကာဒီနံ တန္တဝါယေသု စီဝရေ ဝိကပ္ပံ အာပဇ္ဇန္တဿ အနာပတ္တိံ ဝိနိဒ္ဒိသေတိ ယောဇနာ။ အတ္တနော ဓနေနာတိ ဧတ္ထ ‘‘ပယောဇိတေသူ’’တိ သေသော၊ တန္တဝါယေသူတိ ဧတဿ ဝိသေသနံ။ အတ္တနော ဓနေန ပယောဇိတေသု တန္တဝါယေသု စီဝရေ ဝိကပ္ပံ အာပဇ္ဇန္တဿ အနာပတ္တိံ ဝိနိဒ္ဒိသေတိ ယောဇနာ၊ အတ္တနော သန္တကံ ကပ္ပိယဝတ္ထုံ ဂဟေတွာ ဝိနန္တေသု ဝိကပ္ပံ အာပဇ္ဇန္တဿာတိ အတ္ထော။ အညဿတ္ထာယ ဝိနန္တေသု ဝိကပ္ပံ အာပဇ္ဇန္တဿာတိ သဟ ပါဌသေသေန ယောဇနာ ဒဋ္ဌဗ္ဗာ။

၈၆၃။ မဟဂ္ဃံ ကတ္တုကာမိနော တန္တဝါယေဟိ အပ္ပဂ္ဃံ ဝါယာပေန္တဿ အနာပတ္တိံ ဝိနိဒ္ဒိသေတိ ယောဇနာ။

ပေသကာရကထာဝဏ္ဏနာ။

၈၆၄။ ဝဿံဝုတ္ထေ ဘိက္ခူ ဥဒ္ဒိဿာတိ ပုရိမိကာယ ဝဿူပဂတေ ဘိက္ခူ ဥဒ္ဒိသိတွာ။ ပဝါရဏာယ ပုဗ္ဗေဝ ယံ စီဝရံ ဒီယတီတိ သမ္ဗန္ဓော။ ဣဒံ ဝုတ္တံ ဟောတိ – ‘‘ဒသာဟာနာဂတံ ကတ္တိကတေမာသိကပုဏ္ဏမ’’န္တိ ¶ (ပါရာ။ ၆၄၈) ပါဠိယံ ဝုတ္တံ မဟာပဝါရဏာဥပေါသထဒိဝသဿ ပုရေတရမေဝ ပုဗ္ဗကတ္တိကမာသဿ ဇုဏှပက္ခပဉ္စမိယံ ယံ စီဝရံ ‘‘အစ္စေကစီဝရံ နာမ သေနာယ ဝါ ဂန္တုကာမော ဟောတီ’’တိအာဒိနာ (ပါရာ။ ၆၄၉) ပဒဘာဇနာဂတေသု ဂမိကဂိလာနဂဗ္ဘိနိအဘိနဝုပ္ပန္နသဒ္ဓါဒီသု ¶ အညတရေန ဒူတံ ပေသေတွာ ဝါ အတ္တနာ ဝါ အာဂန္တွာ ‘‘ဝဿာဝါသိကံ ဒမ္မီ’’တိ ဝတွာ ဒိယျတီတိ။ တံ ဟောတစ္စေကစီဝရန္တိ တံ အစ္စာယိကစီဝရံ နာမ ဟောတိ။

၈၆၅။ ပုရေ ပဝါရဏာယေဝါတိ မဟာပဝါရဏာယ ပုရေတရမေဝ ပဉ္စမိတော ပဋ္ဌာယ ယသ္မိံ ကိသ္မိဉ္စိ ဒိဝသေ။ ဘာဇေတွာ ယဒိ ဂယှတီတိ ဧတ္ထ ‘‘ယေနာ’’တိ စ န ကာတဗ္ဗောတိ ဧတ္ထ ‘‘တေနာ’’တိ စ ကရောတိ စေတိ ဧတ္ထ ‘‘သော ဝဿစ္ဆေဒ’’န္တိ စ သာမတ္ထိယာ လဗ္ဘတိ။ ဘာဇေတွာ ယဒိ ယေန ဂယှတိ၊ တေန ဝဿစ္ဆေဒေါ န ကာတဗ္ဗော။ သော ဝဿစ္ဆေဒံ ကရောတိ စေ၊ တံ ဘာဇေတွာ ဂဟိတစီဝရံ သင်္ဃိကံ ဟောတီတိ ယောဇနာ၊ ဆိန္နဝဿေန တံ စီဝရံ သင်္ဃဿေဝ ဒါတဗ္ဗန္တိ ဝုတ္တံ ဟောတိ။

၈၆၆။ ‘‘အန္တောသမယမေဝါ’’တိ ဣဒံ ‘‘အဓိဋ္ဌေတီ’’တိအာဒီဟိ ပဒေဟိ ပစ္စေကံ ယောဇေတဗ္ဗံ။ ပဒဘာဇနေ ‘‘စီဝရကာလသမယော နာမ အနတ္ထတေ ကထိနေ ဝဿာနဿ ပစ္ဆိမော မာသော၊ အတ္ထတေ ကထိနေ ပဉ္စမာသာ’’တိ ဝုတ္တသမယဗ္ဘန္တရေယေဝ တံ အစ္စေကစီဝရံ။

၈၆၇။ ကထိနေ တု အနတ္ထတေတိ ယသ္မိံ ကထိနံ အနတ္ထတံ၊ တသ္မိံ ဝိဟာရေတိ ဝုတ္တံ ဟောတိ။ တု-သဒ္ဒေါ ဝိသေသတ္ထဇောတကော။ အနဓိဋ္ဌာယ အဝိကပ္ပေတွာ ပရိဟရီယတိ ဧတ္ထ အစ္စေကစီဝရန္တိ ပရိဟာရော၊ မာသော၊ ဧကော စ သော မာသော ¶ စာတိ ဧကမာသော၊ ပုဗ္ဗကတ္တိကမာသဿ ပါဋိပဒဒိဝသတော ပဋ္ဌာယ ယာဝ အပရကတ္တိကမာသဿ ပုဏ္ဏမီ၊ အယံ စီဝရကာလသမယောတိ ဝုတ္တော မာသော။ ဒသန္နံ အဟာနံ သမာဟာရော ဒသာဟံ၊ တံ ပရမံ အဓိကံ ဧတဿာတိ ဒသာဟပရမော၊ မာသော။ ‘‘ဒသာဟာနာဂတံ ကတ္တိကတေမာသိကပုဏ္ဏမ’’န္တိ (ပါရာ။ ၆၄၈) ပါဠိယံ ဝုတ္တပုဗ္ဗကတ္တိကပုဏ္ဏမိပရိယန္တဒသာဟာဓိကောတိ အတ္ထော။ ကထိနေ အနတ္ထတေ တု ဒသာဟပရမော ဧကမာသောဝ တဿ အစ္စာယိကဝတ္ထဿ ပရိဟာရော မတောတိ ယောဇနာ။

၈၆၈။ အတ္ထတေ ကထိနေတိ ကထိနတ္ထတဝိဟာရေတိ ဝုတ္တံ ဟောတိ။ တဿ အစ္စာယိကဝတ္ထဿာတိ သမ္ဗန္ဓော။ ဒသာဟပရမာ ပဉ္စ မာသာတိ သမ္ဗန္ဓော။ အနတ္ထတကထိနေ ဝိဟာရေ ယထာဝုတ္တစီဝရကာလသမယသင်္ခါတဝဿာနာဝသာနမာသော စ ကထိနုဒ္ဓါရဒိဝသသင်္ခါတပစ္ဆိမကတ္တိကကာဠပက္ခပါဋိပဒတော ယာဝ ဖဂ္ဂုနမာသပုဏ္ဏမီ၊ တာဝ ဟေမန္တာ စတ္တာရော မာသာ စာတိ ပဉ္စ မာသာ။ ပကာသိတာတိ ‘‘အနတ္ထတေ ကထိနေ ဝဿာနဿ ပစ္ဆိမော မာသော၊ အတ္ထတေ ကထိနေ ပဉ္စ မာသာ’’တိ ¶ (ပါရာ။ ၆၄၉) ဒီပိတာ။ ဒသာဟပရမာတိ ဝုတ္တတ္ထောယေဝ။ အတ္ထတေ ကထိနေ ဒသာဟပရမာ ပဉ္စ မာသာ တဿ အစ္စာယိကဝတ္ထဿ ပရိဟာရော ကာလောတိ မုနိန္ဒေန ပကာသိတာတိ ယောဇနာ။

အယမုဘယတ္ထ ဝုတ္တာ ဒသာဟပရမတာ အဋ္ဌကထာယံ ‘‘အနတ္ထတေ ကထိနေ ဧကာဒသဒိဝသာဓိကော မာသော၊ အတ္ထတေ ကထိနေ ဧကာဒသဒိဝသာဓိကာ ပဉ္စ မာသာ’’တိ (ပါရာ။ အဋ္ဌ။ ၂။၆၅၀) ဝုတ္တပါဌေန ယထာ န ဝိရုဇ္ဈတိ၊ တထာ ဝိစာရေတွာ ဂဟေတဗ္ဗာ။ ဧဝဉှိ ပါဌေ သတိ န ဝိရုဇ္ဈတိ –

‘‘တဿစ္စာယိကဝတ္ထဿ ¶ ၊ ကထိနေ တု အနတ္ထတေ၊

ပရိဟာရေကမာသေကာ-ဒသာဟပရမော မတော။

အတ္ထတေ ကထိနေ တဿ၊ ပဉ္စ မာသာ ပကာသိတာ၊

ပရိဟာရော ဒိနေနေကာ-ဒသာဟပရမာ ပနာ’’တိ။

၈၆၉။ ပဌမေန ကထိနေနာတိ ယောဇနာ။ ‘‘အကြိယံ အစိတ္တ’’န္တိ ပဒစ္ဆေဒေါ။ အကြိယန္တိ အန္တောသမယေ အဓိဋ္ဌာနာဒိအကရဏံ။

အစ္စေကစီဝရကထာဝဏ္ဏနာ။

၈၇၀-၁။ ဘိက္ခူတိ သာသင်္ကသမ္မတေ သပ္ပဋိဘယေ အာရညကသေနာသနေ ဝသန္တံ ဘိက္ခုမာဟ။ ယထာဟ ‘‘ယာနိ ခေါ ပန တာနိ အာရညကာနိ သေနာသနာနိ သာသင်္ကသမ္မတာနိ သပ္ပဋိဘယာနိ၊ တထာရူပေသု ဘိက္ခု သေနာသနေသု ဝိဟရန္တော’’တိ (ပါရာ။ ၆၅၃)။ ပုဗ္ဗကတ္တိကပုဏ္ဏမံ ဝသိတွာတိ သမ္ဗန္ဓော။ ပုဗ္ဗကတ္တိကပုဏ္ဏမာ နာမ အဿယုဇမာသဿ ဇုဏှပက္ခပန္နရသီ၊ ဧတ္ထ ပန သဟစရိယနယေန တဒုပလက္ခိတာ ပုရိမိကာ တယော ဝဿာနမာသာ ဝုစ္စန္တိ။ ပုဏ္ဏမန္တိ ဧတ္ထ ဝါသကိရိယာယ အစ္စန္တသံယောဂေ ဥပယောဂဝစနံ။ ပုရိမိကာယ ဝဿံ ဥပဂန္တွာ အစ္ဆိန္နဝဿော ဟုတွာ တယော မာသေ ဝသိတွာတိ အတ္ထော။ ယထာဟ အဋ္ဌကထာယံ ‘‘ယသ္မာ ပန ယော ဝဿံ ဥပဂန္တွာ ယာဝ ပဌမကတ္တိကပုဏ္ဏမံ ဝသတီ’’တိ (ပါရာ။ အဋ္ဌ။ ၂။၆၅၃-၆၅၄)။

‘‘စီဝရ’’န္တိ တိဏ္ဏံ စီဝရာနံ အညတရံ ဝုစ္စတိ။ ဂါမေ ဌပေတွာတိ သမ္ဗန္ဓော၊ ဧတ္ထ ‘‘ကတ္တိကပုဏ္ဏမ’’န္တိ ¶ စ ‘‘အာကင်္ခမာနော’’တိ စ သေသော၊ အပရကတ္တိကမာသေ ကတ္တိကစောရဘယေန စီဝရံ ပဋိသာမေတုကာမော ဘိက္ခု အာရညကသေနာသနဿ သာမန္တာ ဂေါစရဂါမေ နိက္ခိပိတွာတိ အတ္ထော။ ယထာဟ ‘‘ဥပဝဿံ ¶ ခေါ ပန ကတ္တိကပုဏ္ဏမံ…ပေ… အာကင်္ခမာနော တိဏ္ဏံ စီဝရာနံ အညတရံ စီဝရံ အန္တရဃရေ နိက္ခိပေယျာ’’တိ (ပါရာ။ ၆၅၃)။

‘‘သမန္တာ ဂေါစရဂါမေ’’တိ ဣဒံ ‘‘အန္တရဃရေ နိက္ခိပေယျာတိ သမန္တာ ဂေါစရဂါမေ နိက္ခိပေယျာ’’တိ (ပါရာ။ ၆၅၄) ပဒဘာဇနေ ဝုတ္တတ္တာ ဝုတ္တံ။ ‘‘အပရကတ္တိကမာသေ’’တိ စ ‘‘ကတ္တိကပုဏ္ဏမန္တိ ကတ္တိကစာတုမာသိနီ ဝုစ္စတီ’’တိ (ပါရာ။ ၆၅၄) ပဒဘာဇနိယဝသေန ဝုတ္တံ။ ဣဓာပိ ဟိ ‘‘ကတ္တိကပုဏ္ဏမ’’န္တိ အပရကတ္တိကဇုဏှပက္ခပန္နရသိယာ ဝုစ္စမာနာယာပိ သဟစရိယနယေန တံသဟစရိတော စတုတ္ထော မာသော ဝုတ္တော။

ဧတ္တာဝတာ ပုရိမိကာယ ဝဿံ ဥပဂန္တွာ မဟာပဝါရဏာယ ပဝါရေတွာ ဝုတ္တလက္ခဏေ အာရညကသေနာသနေ ဝသန္တဿ အာရညကဿ ဘိက္ခုနော ပစ္ဆိမကတ္တိကမာသေ ကတ္တိကစောရဘယေ သတိ တိဏ္ဏံ စီဝရာနံ အညတရံ ဂေါစရဂါမေ ဌပေတွာ အာရညကင်္ဂံ ပူရယတော စီဝရေန ဝိပ္ပဝါသော တသ္မိံ မာသေ န ဟောတီတိ အနုညာတဘာဝေါ ဒီပိတော။ တဒေဝ ပကာသေတုံ နိက္ခေပေါပါယသန္ဒဿနမုခေန ဝက္ခတိ ‘‘ကတ္တိကေယေဝ မာသသ္မိံ…ပေ… ဝဋ္ဋတီ’’တိ။

ဣဒါနိ အသ္မိံယေဝ မာသေ တတော အညတ္ထ တဿ ဘိက္ခုနော ကေနစိ ကရဏီယေန ဂစ္ဆတော ဂါမေ ဌပိတေန တေန စီဝရေန ဝိပ္ပဝသတော နိဒ္ဒေါသဘာဝံ အနုဇာနန္တေန ဘဂဝတာ ‘‘သိယာ စ တဿ ဘိက္ခုနော…ပေ… တေန စီဝရေန ဝိပ္ပဝသိတဗ္ဗ’’န္တိ (ပါရာ။ ၆၅၃) ဝုတ္တမတ္ထံ ဒဿေတုမာဟ ‘‘ပစ္စယေ…ပေ… သမ္မုတိ’’န္တိ။ ပစ္စယေ သတိ တာဒိသေတိ ‘‘သိယာ ပစ္စယော၊ သိယာ ကရဏီယ’’န္တိ (ပါရာ။ ၆၅၄) ဝစနတော တာဒိသေ ကိစ္စေ သတီတိ အတ္ထော။ ဆာရတ္တပရမန္တိ ဆ ရတ္တိယော ပရမာ ယဿ ဝါသကမ္မဿ တံ ဆာရတ္တပရမံ၊ ကိရိယာဝိသေသနံ၊ ဆာရတ္တပရမံ ဝါသကမ္မံ ကာတဗ္ဗန္တိ အတ္ထော။ တေန ဝိနာ ဝသိတဗ္ဗန္တိ ဂါမေ နိက္ခိတ္တေန တေန စီဝရေန ဝိနာ တမှာ အာဝါသာ အညတ္ထ ဝသိတဗ္ဗံ။ တဒေဝ ¶ ပါကဋံ ကာတုံ ဝက္ခတိ ‘‘အညတ္ထေဝ ဝသန္တဿ၊ ဆာရတ္တပရမံ မတ’’န္တိ။

တတောတိ ဆာရတ္တတော။ ဥတ္တရိ ဝသတောတိ သတ္တမံ အရုဏံ ဥဋ္ဌာပေတွာ ဝသန္တဿာတိ အတ္ထော။ ယထာဟ ¶ ‘‘တတော စေ ဥတ္တရိ ဝိပ္ပဝသေယျာတိ သတ္တမေ အရုဏုဂ္ဂမနေ နိဿဂ္ဂိယ’’န္တိ (ပါရာ။ ၆၅၄)။ ဒေါသောတိ နိဿဂ္ဂိယပါစိတ္တိယံ။ ‘‘ဝိနာ သင်္ဃဿ သမ္မုတိ’’န္တိ ဣမိနာ ကိံ ဝုတ္တံ ဟောတိ? ဥဒေါသိတသိက္ခာပဒေ အနုပညတ္တိံ ကတွာ ကောသမ္ဗိယံ ဂိလာနဘိက္ခုနော ‘‘အနုဇာနာမိ ဘိက္ခဝေ ဂိလာနဿ ဘိက္ခုနော တိစီဝရေန အဝိပ္ပဝါသသမ္မုတိံ ဒါတု’’န္တိ (ပါရာ။ ၄၇၃) အနုညာတတ္တာ ဂိလာနဿ ဘိက္ခုနော သင်္ဃေန ဉတ္တိဒုတိယာယ ကမ္မဝါစာယ ပုရိမမေဝ ယာ အဝိပ္ပဝါသသမ္မုတိ ဒိန္နာ၊ တံ ဝိနာတိ ဝုတ္တံ ဟောတိ။ တေန လဒ္ဓသမ္မုတိကေန ယာဝ ရောဂေါ ဝူပသမ္မတိ၊ တာဝ စိရမ္ပိ တေန စီဝရေန ဝိနာ ဝသိတုံ ဝဋ္ဋတီတိ အဓိပ္ပာယော။ ယထာဟ အဋ္ဌကထာယံ ‘‘အညတြ ဘိက္ခုသမ္မုတိယာတိ ယာ ဥဒေါသိတသိက္ခာပဒေ ကောသမ္ဗကသမ္မုတိ အနုညာတာ၊ တဿာ သမ္မုတိယာ အညတြ။ သစေ သာ လဒ္ဓါ ဟောတိ၊ ဆာရတ္တာတိရေကမ္ပိ ဝိပ္ပဝသိတုံ ဝဋ္ဋတီ’’တိ (ပါရာ။ အဋ္ဌ။ ၂။၆၅၃-၆၅၄)။

၈၇၂-၃။ စီဝရနိက္ခေပံ ဒဿေတုမာဟ ‘‘ကတ္တိကေယေဝ…ပေ… ပကာသိတော’’တိ။ ကတ္တိကေယေဝ မာသသ္မိန္တိ စတုန္နံ ဝဿာနာနံ မာသာနံ ပစ္ဆိမေ ကတ္တိကမာသေယေဝ ဣဒမေကင်္ဂံ။ ပဌမာယ ပဝါရိတောတိ ဒုတိယမင်္ဂံ၊ ဣဓ ပဌမာယ ဝဿူပနာယိကာယ ဝဿံ ဥပဂန္တွာ ပဝါရိတောတိ ယောဇနာ၊ မဟာပဝါရဏာယ ပဝါရိတောတိ ဝုတ္တံ ဟောတိ။ ယထာဟ အဋ္ဌကထာယံ ‘‘ပုရိမိကာယ ဥပဂန္တွာ မဟာပဝါရဏာယ ပဝါရိတော ဟောတီ’’တိ (ပါရာ။ အဋ္ဌ။ ၂။၆၅၃-၆၅၄)။ ပစ္ဆိမေန ပမာဏေန ယုတ္တေတိ တတိယမင်္ဂံ။ သေနာသနေတိ ဧတဿ ဝိသေသနံ။ ဣဟ အာရညကသေနာသနဿ ပစ္ဆိမပ္ပမာဏံ ¶ နာမ ပါကာရေန ဝါ ဝတိယာ ဝါ ပရိခါယ ဝါ ပရိက္ခိတ္တဿ ဂါမဿ ဣန္ဒခီလသင်္ခါတဂါမဒွါရကောဋ္ဌကုမ္မာရတော ဝါ အပရိက္ခိတ္တဿ ဂါမဿ ပရိက္ခေပါရဟဋ္ဌာနသင်္ခါတေ ပရိယန္တဂေဟဿ ဥပစာရေ ဌိတဿ ထာမမဇ္ဈိမဿ ပုရိသဿ ဗလပ္ပမာဏေန ဝိဿဋ္ဌလေဍ္ဍုပါတဒွယတော ဝါ ပဋ္ဌာယ ပရိက္ခိတ္တဿ ဝိဟာရဿ သပရိက္ခေပံ ဝါ အပရိက္ခိတ္တဿ ဝိဟာရဿ ယဿံ ဒိသာယံ ဂါမော ဟောတိ၊ တတ္ထ ဂါမပရိယန္တသေနာသနံ ဝါ စေတိယံ ဝါ ဗောဓိံ ဝါ အဝဓိံ ကတွာ ဝိဟာရဂမနီယေန ပကတိမဂ္ဂေန ဝိဒတ္ထိဂမ္ဘီရံ အာရောပိတေန အာစရိယဓနုနာ ပမိတပဉ္စဓနုသတပမာဏဒူရန္တိ သင်္ခေပတော ဂဟေတဗ္ဗံ။

သာသင်္ကသမ္မတေတိ စတုတ္ထမင်္ဂံ၊ ‘‘ဣဟ သပ္ပဋိဘယေ’’တိ သေသော။ ‘‘သာသင်္ကသမ္မတာနိ သပ္ပဋိဘယာနီ’’တိ (ပါရာ။ ၆၅၃) ဟိ ပါဠိ။ ဣဒံ ဒွယမ္ပိ ‘‘သေနာသနေ’’တိ ဧတဿ ဝိသေသနံ။ အာရာမအာရာမူပစာရေသု စောရာနံ နိသိန္နသယိတဋ္ဌိတဘုတ္တပီတဋ္ဌာနာဒီနံ ဒိဿမာနတာယ အာသင်္ကာသဟိတေ တတ္ထေဝ အာရာမာဒီသု ပဟဋမာရိတဝိလုတ္တမနုဿာနံ ဒိဿမာနတာယ ဝိသေသေန သဟဘယတာယ ¶ သပ္ပဋိဘယေ အာရညကေ သေနာသနေတိ အတ္ထော။ ဝသန္တော ဘိက္ခု။ ဝသန္တောဝါတိ ဧတ္ထ ဧဝကာရော အဋ္ဌာနပ္ပယုတ္တော။ တသ္မာ တတော အာနေတွာ စတုရင်္ဂသမာယောဂေ ဧဝါတိ ယောဇေတဗ္ဗော။ စတုရင်္ဂသမာယောဂေ ဧဝါတိ ယထာဝုတ္တာနံ စတုန္နံ အင်္ဂါနံ သမာယောဂေ သန္နိပါတေ သတိ ဧဝ။ ဧတ္ထ ဧဝကာရေန တဿ အင်္ဂဿ အဘာဝေ အလဗ္ဘမာနတံ ဒီပေတိ။ ပကာသိတောတိ ‘‘တတြာယံ အင်္ဂသမ္ပတ္တီ’’တိအာဒိကာယ (ပါရာ။ အဋ္ဌ။ ၂။၆၅၃-၆၅၄) အဋ္ဌကထာယ ဝုတ္တော။

၈၇၄။ တံ စီဝရံ။ မာသမေကန္တိ ဝဿာနဿ ပစ္ဆိမမာသသင်္ခါတံ ဧကံ မာသံ။ ယော ဂါမော သစေ ပုရိမဗဒ္ဓါယ အဝိပ္ပဝါသသီမာယ ¶ အန္တော ဟောတိ၊ တတ္ထ မာသတော အတိရေကမ္ပိ ဌပေတုံ ဝဋ္ဋတီတိ (ဝဇိရ။ ဋီ။ ပါရာဇိက ၆၅၃ အတ္ထတော သမာနံ) ဝဇိရဗုဒ္ဓိတ္ထေရေန ဝုတ္တံ။

၈၇၅။ အညတ္ထေဝါတိ ယဿ အာရညကသေနာသနဿ ဂေါစရဂါမေ စီဝရံ နိက္ခိတ္တံ၊ တတော အာရညကသေနာသနတော ဗဟိ ဧဝ။ အယံ အဓိပ္ပာယောတိ ‘‘ယံ ဂါမ’’န္တိအာဒိကာယ ဒိယဍ္ဎဂါထာယ ပဋိပါဒိတတ္ထဒွယသင်္ခါတော အဓိပ္ပာယော။ အဿာတိ သာသင်္ကသိက္ခာပဒဿ။ ဧဝံ ဣမိနာ သိက္ခာပဒေန ‘‘စီဝရေန ဝိနာ ကတ္တိကမာသေ အရညေ ဝသေယျာ’’တိ အနုညာတတ္တာ ‘‘ဆာရတ္တပရမံ တေန ဘိက္ခုနာ တေန စီဝရေန ဝိပ္ပဝသိတဗ္ဗ’’န္တိ (ပါရာ။ ၆၅၃) ဣမိနာ ဂေါစရဂါမေ တံ ဌပေတွာ တသ္မိံ အာရညကာဝါသေ ဝသိတွာ ကေနစိ ကရဏီယေန တတော အာဝါသတော ဂန္တွာ ဗဟိ ဝသတော ဒိဝသပရိစ္ဆေဒဿ ဝိညာယမာနတ္တာယေဝါဟ ‘‘ပဋိစ္ဆန္နော ပကာသိတော’’တိ။

၈၇၆။ ‘‘သစေ ဂေါစရဂါမတော ပုရတ္ထိမာယ ဒိသာယ သေနာသနံ၊ အယဉ္စ ပစ္ဆိမံ ဒိသံ ဂတော ဟောတီ’’တိအာဒိနာ (ပါရာ။ အဋ္ဌ။ ၂။၆၅၆) အဋ္ဌကထာယံ ကထိတနိယာမေန ဝိနိစ္ဆယံ ဒဿေတုမာဟ ‘‘သေနာသနမထာဂန္တွာ’’တိအာဒိ။ သေနာသနန္တိ အတ္တနာ နိဝုတ္ထံ အာရညကသေနာသနံ။ အာဂန္တွာတိ ဗဟိ ဂတဋ္ဌာနတော အာဂန္တွာ။ ဂေါစရဂါမေ စီဝရံ နိက္ခိပိတွာ တတော ပုရတ္ထိမာယ ဒိသာယ အာရညကသေနာသနေ ဝိဟရတော ဝိဟာရာ နိက္ခမ္မ တတော ဂေါစရဂါမတော ပစ္ဆိမဒိသာယ ဒူရဋ္ဌာနံ ဂတဿ အာဂတဋ္ဌာနတော တံ သေနာသနံ အာဂန္တွာ ဝိဒူရတ္တာ သတ္တမံ အရုဏံ ဥဋ္ဌာပေတုံ အသက္ကောန္တဿ ဘိက္ခုနော ကိံ ဝိဟိတန္တိ အယမေတ္ထ ယောဇနာ။

၈၇၇။ ဂါမသီမမ္ပိ ¶ ဝါဂန္တွာတိ ယတ္ထ စီဝရံ နိက္ခိတ္တံ၊ တံ ဂါမသီမမ္ပိ ပုရာရုဏာယေဝ အာဂန္တွာ။ ယတ္ထ ကတ္ထစီတိ (ပါရာ။ အဋ္ဌ။ ၂။၆၅၆) သဘာဒေဝါလယဒွါရကောဋ္ဌကာဒီသု ယတ္ထ ကတ္ထစိ ကပ္ပိယဋ္ဌာနေ ¶ ။ ‘‘ယတ္ထ ကတ္ထစီ’’တိ သာမညေန ဝုတ္တတ္တာ တဿာ ဂါမသီမာယ အန္တော အာရညကင်္ဂါရက္ခနာရဟံ ဒူရဋ္ဌာနံ လဒ္ဓံ စေ၊ အင်္ဂဘေဒံ အကတွာ တတ္ထ အရုဏံ ဥဋ္ဌာပေတဗ္ဗံ။ ဓုတင်္ဂေ ဝိဇ္ဇမာနေပိ အာပတ္တိံ အနာပဇ္ဇိတုံ အန္တောဂါမေပိ အရုဏံ ဥဋ္ဌာပေတွာ စီဝရပဝတ္တိယေဝ ဉာတဗ္ဗာ။ ယထာဟ အဋ္ဌကထာယံ ‘‘ဂါမသီမမ္ပိ ဩက္ကမိတွာ သဘာယံ ဝါ ယတ္ထ ကတ္ထစိ ဝါ ဝသိတွာ စီဝရပ္ပဝတ္တိံ ဉတွာ ပက္ကမိတုံ ဝဋ္ဋတီ’’တိ (ပါရာ။ အဋ္ဌ။ ၂။၆၅၆)။

၈၇၈။ ဧဝဉ္စာပိ အသက္ကောန္တောတိ အင်္ဂဘေဒံ အကတွာ၊ ကတွာ ဝါ အန္တောဂါမသီမာယ အရုဏံ ဥဋ္ဌာပေတုမ္ပိ ဂန္တုံ အသက္ကောန္တော။ ဉတွာတိ အတ္တနော စီဝရဿ ဌပိတဋ္ဌာနံ သလ္လက္ခေတွာ။ တတ္ထေဝါတိ ဧတ္ထ ‘‘ဌိတော’’တိ လဗ္ဘတိ။ ခိပ္ပန္တိ သီဃံ၊ ပုရာရုဏာတိ ဝုတ္တံ ဟောတိ။ အတိရေကေ ဌာနေတိ ယောဇနာ၊ ယထာဟ အဋ္ဌကထာယံ ‘‘အတိရေကစီဝရဋ္ဌာနေ ဌဿတီ’’တိ (ပါရာ။ အဋ္ဌ။ ၂။၆၅၆)၊ ‘‘အတိရေကစီဝရဋ္ဌာနေ တိဋ္ဌတီ’’တိ စိန္တေတွာတိ အတ္ထော။

၈၇၉။ ဝိဿဇ္ဇေတီတိ သတ္တမအရုဏုဋ္ဌာနတော ပုရေတရမေဝ အညဿ ဒေတိ။ ဥပရိပိ ဧဝမေဝ ဝတ္တဗ္ဗံ။

၈၈၀။ သာသင်္ကသမ္မတေ ဧဝံနာမကေ သိက္ခာပဒေ သမုဋ္ဌာနာဒယော သဗ္ဗေ တေန ဒုတိယေန ကထိနေန သမာ ဣတိ မုနိန္ဒေန မတာ အနုမတာ အနုညာတာတိ ယောဇနာ။

သာသင်္ကကထာဝဏ္ဏနာ။

၈၈၁။ ဇာနန္တိ ‘‘သင်္ဃဿ ဒေမာ’’တိ ဝစနေန ပရိဏာမိတဘာဝံ ယေန ကေနစိ အာကာရေန ဇာနန္တော။ ယထာဟ ပဒဘာဇနေ ¶ ‘‘သာမံ ဝါ ဇာနာတီ’’တိအာဒိ (ပါရာ။ ၆၅၉)။ ပရိဏတန္တိ ဧတ္ထ ပဒဘာဇနေ ‘‘ပရိဏတံ နာမ ‘ဒဿာမ ကရိဿာမာ’တိ ဝါစာ ဘိန္နာ ဟောတီ’’တိ ဝုတ္တနိယာမေန သင်္ဃဿ ပရိဏတန္တိ အတ္ထော။ လာဘန္တိ လဘိတဗ္ဗံ စီဝရာဒိ ယံ ကိဉ္စိ။ ယထာဟ ‘‘လာဘော နာမ စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရာ၊ အန္တမသော စုဏ္ဏပိဏ္ဍောပိ ဒန္တကဋ္ဌမ္ပိ ဒသိကသုတ္တမ္ပီ’’တိ။ အတ္တနော ပရိဏာမေယျာတိ ‘‘ဗဟူ အာဝုသော သင်္ဃဿ ဒါယကာ၊ ဗဟူ သင်္ဃဿ ဘတ္တာ၊ မယံ တုမှေ နိဿာယ တုမှေ သမ္ပဿန္တာ ဣဓ ဝိဟရာမ။ တုမှေ စေ အမှာကံ န ဒဿထ၊ အထ ကော စရဟိ အမှာကံ ဒဿတိ။ ဒေထာဝုသော အမှာကံ ဣမာနိ စီဝရာနီ’’တိ (ပါရာ။ ၆၅၇) ပါဠိယာ ¶ အာဂတနယေန အတ္တနော ပရိဏာမေယျာတိ ဝုတ္တံ ဟောတိ။ တဿ နိဿဂ္ဂိယန္တိ ဧတ္ထ ‘‘ပယောဂေ ဒုက္ကဋံ၊ ပဋိလာဘေနာ’’တိ သေသော။ နိဿဂ္ဂိယန္တိ ဣဒံ ပရိဏတေ ပရိဏတသညိံ သန္ဓာယ ဝုတ္တံ။ ဝေမတိကဿ ပန ဒုက္ကဋံ ဟောတိ။ ယထာဟ ‘‘ပရိဏတေ ဝေမတိကော အတ္တနော ပရိဏာမေတိ၊ အာပတ္တိ ဒုက္ကဋဿာ’’တိ။ အပရိဏတသညိနော အနာပတ္တိ။ ယထာဟ ‘‘ပရိဏတေ အပရိဏတသညီ အတ္တနော ပရိဏာမေတိ၊ အနာပတ္တီ’’တိ။

၈၈၂။ ‘‘အညဿ ဒေဟီ’’တိ သစေ ပရိဏာမေတီတိ တထာ သင်္ဃဿ ပရိဏတဘာဝံ ဇာနန္တော ‘‘အညဿ ဒေဟီ’’တိ ယဒိ ပရိဏာမေတိ။ သုဒ္ဓိကံ ပါစိတ္တိယန္တိ နိဿဇ္ဇိတဗ္ဗဝတ္ထုရဟိတံ ကေဝလံ ပါစိတ္တိယမတ္တန္တိ အတ္ထော။ သုဒ္ဓစိတ္တေနာတိ သဝါသနာနဝသေသကိလေသပ္ပဟာနေန ပရိသုဒ္ဓစိတ္တေန ဘဂဝတာ။ ပါစိတ္တိယမုဒီရိတန္တိ ပါစိတ္တိယေသု အဋ္ဌမဿ သဟဓမ္မိကဝဂ္ဂဿ အဝသာနေ ‘‘ယော ပန ဘိက္ခု ဇာနံ သင်္ဃိကံ လာဘံ ပရိဏတံ ပုဂ္ဂလဿ ပရိဏာမေယျ၊ ပါစိတ္တိယ’’န္တိ (ပါစိ။ ၄၉၀) ဒေသိတံ။

၈၈၃။ ဧကံ ¶ စီဝရန္တိ သင်္ဃဿ ပရိဏတစီဝရတော ဧကံ စီဝရံ။ စီဝရံ ဝါတိ ဧတ္ထ ဝါ-သဒ္ဒေါ ပစ္စယန္တရဝိကပ္ပတ္ထော။ ဝါ ပနာတိ ဧတ္ထ ဝါ-သဒ္ဒေါ အတ္ထဝိကပ္ပတ္ထော။ ဧကံ စီဝရံ ဝါ အညံ ဝါ ပစ္စယံ ပရဿ၊ ဧကံ ပန အတ္တနော ဝါ ပရိဏာမေယျ စေတိ ယောဇနာ။ သဒ္ဓိန္တိ ဧကတော၊ ဧကက္ခဏေတိ ဝုတ္တံ ဟောတိ။ ဒွေ ပါစိတ္တိယော သဒ္ဓိံ သိယုန္တိ ယောဇနာ၊ အညဿ ပရိဏာမနေန သုဒ္ဓပါစိတ္တိယဉ္စ အတ္တနော ပရိဏာမနေန နိဿဂ္ဂိယပါစိတ္တိယဉ္စာတိ ဒွေ ပါစိတ္တိယော ဧကက္ခဏေ ဟောန္တီတိ အတ္ထော။

၈၈၄။ ပရိဏာမေတွာ ဌပိတေ ဝိနိစ္ဆယံ ဒဿေတွာ ပရိစ္စဇိတွာ ဒိန္နေ ဝိနိစ္ဆယံ ဒဿေတုမာဟ ‘‘သင်္ဃဿာ’’တိအာဒိ။ ‘‘ပရာဇယော’’တိ ဣဒံ ပါဒပ္ပဟောနကံ ဝတ္ထုံ သန္ဓာယ ဝုတ္တံ။ ယထာဝတ္ထုဝသေန ပန ဒုက္ကဋထုလ္လစ္စယာပိ ဝတ္တဗ္ဗာ။

၈၈၅။ အညဿ စေတိယဿ ပေါဏံ ပရိဏတံ အညဿ စေတိယဿ ဝါ သင်္ဃဿ ဝါ ပုဂ္ဂလဿ ဝါပိ ပန ပရိဏာမေယျာတိ ယောဇနာ။ သင်္ဃဿ ပုဂ္ဂလဿာတိ ပဒဒွယေပိ ဧဝမေဝ ယောဇေတဗ္ဗံ။ ယထာဟ ‘‘သင်္ဃဿ ပရိဏတံ အညသင်္ဃဿ ဝါ စေတိယဿ ဝါ ပုဂ္ဂလဿ ဝါ ပရိဏာမေတိ ¶ ၊ အာပတ္တိ ဒုက္ကဋဿာ’’တိအာဒိ (ပါစိ။ ၄၉၂)။ အညဿ ပုဂ္ဂလဿ ပေါဏံ အညဿ ပုဂ္ဂလဿ ပရိဏာမေယျာတိ။

၈၈၆။ ဣမဿ သဗ္ဗသတ္တဝိသယတံ ဒဿေတုမာဟ ‘‘ယော ပနာ’’တိအာဒိ။

၈၈၇။ ဣဒံ ပရိဏတသိက္ခာပဒံ။ တိသမုဋ္ဌာနန္တိ ကာယစိတ္တဝါစာစိတ္တကာယဝါစာစိတ္တသင်္ခါတေဟိ တီဟိ သစိတ္တကသမုဋ္ဌာနေဟိ သမုဋ္ဌာနတော တိသမုဋ္ဌာနံ။ ပရိဏာမနပစ္စယာ အာပဇ္ဇိတဗ္ဗတော ကြိယံ။ သင်္ဃာဒီနံ ပရိဏတန္တိသညာယ အဘာဝေန ¶ ဝိမုစ္စနတော သညာဝိမောက္ခံ။ ကာယဝိညတ္တိဝစီဝိညတ္တီဟိ ပရိဏာမေတဗ္ဗတော ကာယကမ္မံ ဝစီကမ္မံ။

ပရိဏတကထာဝဏ္ဏနာ။

ပတ္တဝဂ္ဂေါ တတိယော။

၈၈၈။ ယေ ဣမံ ဝိနိစ္ဆယံ တရန္တိ၊ တေ ပညတ္တိမဟာသမုဒ္ဒံ တရန္တီတိ ယောဇနာ။ ပညတ္တိသင်္ခါတံ ဝိနယပိဋကမေဝ မဟာသမုဒ္ဒေါ ဝိယာတိ ပညတ္တိမဟာသမုဒ္ဒေါ၊ တံ။ ဧဝံ သမုဒါယံ ဒဿေတွာ တဒဝယဝေ ဒဿေတုမာဟ ‘‘နေကာ’’တိအာဒိ။ နေကာနိ နာနပ္ပကာရာနိ ဝတ္တာနိ သေနာသနဝတ္တာဒီနိ ခန္ဓကာဂတာနိ ဥဂ္ဂါ ဥတ္တုင်္ဂါ တရင်္ဂမာလာ မဟာဝီစိပရမ္ပရာ ယဿာတိ ဝိဂ္ဂဟော၊ နာနပ္ပကာရခန္ဓကဝတ္တသင်္ခါတမဟာတရင်္ဂပရမ္ပရာယ သဇ္ဇိတန္တိ အတ္ထော။ သီလံ ပါတိမောက္ခသံဝရာဒိကမေဝ အန္တော ဝေလာဝလယော ယဿ သော သီလန္တော၊ တံ၊ ပါတိမောက္ခသံဝရသီလာဒိစတုပါရိသုဒ္ဓိသီလမေဝ ပဋိပါဒေတဗ္ဗတာယ အန္တံ ဝေလာဝလယဘူတန္တိ အတ္ထော။ အာပတ္တိယော သတ္တာပတ္တိက္ခန္ဓာ၊ သီလာစာရဒိဋ္ဌိအာဇီဝဝိပတ္တိယော စ ဂါဟကာ မကရာဒယော ယဿာတိ ဝိဂ္ဂဟော၊ သီလာစာရာဇီဝဒိဋ္ဌိသမ္ပတ္တိသင်္ခါတမုဒုသတ္တနာသကအာပတ္တိဝိပတ္တိသင်္ခါ- တမာတင်္ဂမကရာဒိစဏ္ဍသတ္တဝန္တန္တိ အတ္ထော။ ဧဝံ အယံ ဂါထာ သမုဒါယာဝယဝါနံ သဗ္ဗေသမေဝ ရူပကာလင်္ကာရေန ဝိရစိတာတိ ဒဋ္ဌဗ္ဗာ။

ဣတိ ဝိနယတ္ထသာရသန္ဒီပနိယာ

ဝိနယဝိနိစ္ဆယဝဏ္ဏနာယ

နိဿဂ္ဂိယကထာဝဏ္ဏနာ နိဋ္ဌိတာ။