📜

ပါစိတ္တိယကထာဝဏ္ဏနာ

၈၈၉။ ဧဝံ နာတိဝိတ္ထာရသင်္ခေပတော နိဿဂ္ဂိယဝိနိစ္ဆယံ ဒဿေတွာ ဣဒါနိ တဒနန္တရံ နိဒ္ဒိဋ္ဌဿ ပါစိတ္တိယကဏ္ဍဿ ဝိနိစ္ဆယံ ဒဿေတုံ ‘‘သမ္ပဇာနမုသာဝါဒေ’’တိအာဒိ အာရဒ္ဓံ။ သမ္ပဇာနမုသာဝါဒေတိ အတ္တနော ဝစနဿ မုသာဘာဝံ ဉတွာ၊ အဒိဋ္ဌံ ‘‘ဒိဋ္ဌ’’န္တိအာဒိနာ နယေန မုသာဝါဒေ သမ္ပဇာနန္တဿ မုသာဘဏနေတိပိ အတ္ထော ဂဟေတဗ္ဗော။ ယထာဟ အဋ္ဌကထာယံ ‘‘ဇာနိတွာ ဇာနန္တဿ စ မုသာဘဏနေ’’တိ (ပါစိ။ အဋ္ဌ။ ၂)။ ‘‘မုသာဝါဒေ’’တိ ဟိ နိမိတ္တတ္ထေ ဘုမ္မံ၊ မုသာဝါဒနိမိတ္တန္တိ အတ္ထော။

ဒဝါ ဘဏန္တဿာတိ ယောဇနာ။ အနုပပရိက္ခိတွာ ဝေဂေန ဒိဋ္ဌမ္ပိ ‘‘အဒိဋ္ဌံ မေ’’တိ ဝဒန္တဿာတိ အတ္ထော။ ယထာဟ ‘‘ဒဝါ ဘဏတိ နာမ သဟသာ ဘဏတီ’’တိ ပဒဘာဇနီအဋ္ဌကထာယံ ‘‘သဟသာ ဘဏတီတိ အဝီမံသိတွာ အနုပဓာရေတွာ ဝေဂေန ဒိဋ္ဌမ္ပိ ‘အဒိဋ္ဌံ မေ’တိ ဘဏတီ’’တိ (ပါစိ။ အဋ္ဌ။ ၁၁)။ ရဝါ ဘဏန္တဿာတိ ‘‘စီဝရ’’န္တိ ဝတ္တုကာမဿ ‘‘စီရ’’န္တိ ဝစနံ ဝိယ မန္ဒတ္တာ မောမူဟတ္တာ ‘‘အညံ ဘဏိဿာမီ’’တိ အညံ ဘဏန္တဿ။ ယထာဟ ‘‘ရဝါ ဘဏတိ နာမ ‘အညံ ဘဏိဿာမီ’တိ အညံ ဘဏတီ’’တိ။

၈၉၀။ အညတ္ထာတိ စတုတ္ထပါရာဇိကာဒီသု။ အတ္တနာ အလဒ္ဓံ ဥတ္တရိမနုဿဓမ္မံ ‘‘လဒ္ဓံ မယာ’’တိ မုသာ ယဿ ဘဏတိ၊ တေန တင်္ခဏမေဝ သုတွာ တဒတ္ထေ ဉာတေ ပါရာဇိကဿ၊ အညာတေ ကာလန္တရေန ဉာတေ စ ပရိယာယဝစနေ စ ဉာတေ ထုလ္လစ္စယဿ၊ ပရိယာယဝစနေ အဝိညာတေ ဒုက္ကဋဿ၊ ဒုဋ္ဌဒေါသသိက္ခာပဒေ ပါရာဇိကံ အနာပန္နဿ ‘‘အာပန္နော’’တိ မုသာဘဏနေ သင်္ဃာဒိသေသဿ၊ ဩမသဝါဒသိက္ခာပဒေ ဒုဗ္ဘာသိတဿ စ ဝုတ္တတ္တာ အာဟ ‘‘မုသာဝါဒဿ ကာရဏာ ပဉ္စ အာပတ္တိယော’’တိ။ ဣမာယ ပါစိတ္တိယာ သဒ္ဓိံ ဆ အာပတ္တိက္ခန္ဓာ ဟောန္တိ။

သမ္ပဇာနမုသာဝါဒကထာဝဏ္ဏနာ။

၈၉၁-၃။ ဝုတ္တေသု ဇာတိအာဒီသု ဒသသု အက္ကောသဝတ္ထူသူတိ ယောဇနာ၊ ပဒဘာဇနေ ဝုတ္တေသု ဇာတိနာမဂေါတ္တကမ္မသိပ္ပအာဗာဓလိင်္ဂကိလေသအာပတ္တိအက္ကောသာနံ ဝသေန ဒသသု အက္ကောသဝတ္ထူသူတိ အတ္ထော ။ တေသု ကိလေသံ ဝိနာ သဗ္ဗေတေ ဟီနုက္ကဋ္ဌဝသေန ဒွိပ္ပကာရာ ဟောန္တိ။ ယထာဟ ပဒဘာဇနေ ‘‘ဇာတိ နာမ ဒွေ ဇာတိယော ဟီနာ စ ဇာတိ ဥက္ကဋ္ဌာ စ ဇာတီ’’တိအာဒိ။

တတ္ထ စဏ္ဍာလာဒိဇာတိ ဟီနာ၊ ခတ္တိယဗြာဟ္မဏဇာတိယော ဥက္ကဋ္ဌာ။ နာမေသု အဝကဏ္ဏကဇဝကဏ္ဏကာဒိနာမာနိ ဒါသနာမတ္တာ ဟီနာနိ၊ ဗုဒ္ဓရက္ခိတာဒိနာမာနိ ဥက္ကဋ္ဌာနိ။ ကောသိယာဒိဂေါတ္တံ ဟီနံ၊ ဂေါတမာဒိဂေါတ္တံ ဥက္ကဋ္ဌံ။ ကမ္မေသု ဝဍ္ဎကိမဏိကာရာဒိကမ္မာနိ ဟီနာနိ၊ ကသိဝါဏိဇ္ဇာဂေါရက္ခကမ္မာနိ ဥက္ကဋ္ဌာနိ။ သိပ္ပေသု နဠကာရကုမ္ဘကာရာဒိသိပ္ပံ ဟီနံ၊ မုဒ္ဒါဂဏနာဒိသိပ္ပံ ဥက္ကဋ္ဌံ။ အာဗာဓေသု သဗ္ဗေပိ အာဗာဓာ ဟီနာ၊ အပိစ မဓုမေဟော ပီဠာဇနကတ္တာဘာဝါ ဥက္ကဋ္ဌော။ လိင်္ဂေသု အတိဒီဃတာဒယော ဟီနာ၊ နာတိဒီဃတာဒယော ဥက္ကဋ္ဌာ။ သဗ္ဗေပိ ကိလေသာ ဟီနာ။ သဗ္ဗာပတ္တိယောပိ ဟီနာ၊ အပိစ သောတာပတ္တိသမာပတ္တိ ဥက္ကဋ္ဌာ။ အက္ကောသေသု ‘‘ဩဋ္ဌောသိ မေဏ္ဍောသိ ဂေါဏောသီ’’တိအာဒိကော ဟီနော၊ ‘‘ပဏ္ဍိတောသိ ဗျတ္တောသီ’’တိအာဒိကော ဥက္ကဋ္ဌော။

အညတြညာပဒေသေနာတိ ပရိယာယကထနေန ဝိနာ။ ဩမသန္တဿာတိ ဝစနပတောဒေန ဩဝိဇ္ဈန္တဿ။ သမ္ဗုဒ္ဓေန ပကာသိတာတိ ‘‘စဏ္ဍာလောသိ ဝေနောသိ နေသာဒေါသိ ရထကာရောသိ ပုက္ကုသောသီ’တိ ဘဏတိ၊ အာပတ္တိ ဝါစာယ ဝါစာယ ပါစိတ္တိယဿာ’’တိ သာမံ သဗ္ဗဓမ္မာဝဗောဓတော ‘‘သမ္ဗုဒ္ဓါ’’တိ ပညာတေန ဘဂဝတာ ဒေသိတာ။

၈၉၄။ တေဟေဝါတိ ဇာတိအာဒီဟိ အက္ကောသဝတ္ထူဟေဝ။ အညာပဒေသေန ဘူတေန ဝါ…ပေ… အာပန္နမေဝ ဝါ အနုပသမ္ပန္နံ အက္ကောသန္တဿ ဒုက္ကဋံ သမ္ဗုဒ္ဓေန ပကာသိတန္တိ သမ္ဗန္ဓော။ ဣဓ ဘူတာဘူတပဒါနိ တေဟီတိ အပေက္ခိတွာ ဗဟုဝစနန္တာနိ ယောဇေတဗ္ဗာနိ။ ဧတေန ‘‘သန္တိ ဣဓေကစ္စေ’’တိအာဒိဒုတိယဝါရတ္ထံ (ပါစိ။ ၂၆) ဒဿေန္တေန ဒုက္ကဋသာဓနတ္ထေန တဒေကကာရိယံ တတိယံ ယေနူနဝါရဉ္စ စတုတ္ထံ န မယန္တိအာဒိဝါရဉ္စ သင်္ဂဟိတန္တိ ဒဋ္ဌဗ္ဗံ။ ယထာဟ အဋ္ဌကထာယံ ‘‘သန္တိ ဣဓေကစ္စေ’တိ ဝါရေ ပန ပရိဟရိတွာ ဝုတ္တဘာဝေန ဒုက္ကဋံ။ ဧသေဝ နယော ‘ယေနူန…ပေ… န မယ’န္တိ ဝါရေသုပီ’’တိ (ပါစိ။ အဋ္ဌ။ ၂၆)။

ပါဠိမုတ္တပဒေဟိပီတိ ဧတ္ထာပိ တထေဝ ‘‘ဘူတေန ဝါ’’တိအာဒီနိ ပဒါနိ သမ္ဗန္ဓိတဗ္ဗာနိ။ ‘‘စောရောသိ၊ ဂဏ္ဌိဘေဒကောသီ’’တိအာဒိ ပါဠိမုတ္တပဒံ နာမ။ သဗ္ဗတ္ထာတိ သဗ္ဗေသု စတူသု ဝါရေသု၊ ပါဠိမုတ္တပဒေသု စ။ ဝုတ္တဉှိ ‘‘အနုပသမ္ပန္နေ ပန စတူသုပိ ဝါရေသု ဒုက္ကဋမေဝ။ ‘စောရောသိ၊ ဂဏ္ဌိဘေဒကောသီ’တိအာဒိဝစနေဟိ ပန ဥပသမ္ပန္နေပိ အနုပသမ္ပန္နေပိ သဗ္ဗဝါရေသု ဒုက္ကဋမေဝါ’’တိ (ပါစိ။ အဋ္ဌ။ ၂၆)။ ‘‘အနုပသမ္ပန္န’’န္တိ ဣမိနာ ‘‘ဣမသ္မိဉ္စ သိက္ခာပဒေ ဌပေတွာ ဘိက္ခုံ ဘိက္ခုနိအာဒယော သဗ္ဗေ သတ္တာ အနုပသမ္ပန္နဋ္ဌာနေ ဌိတာ’’တိ (ပါစိ။ အဋ္ဌ။ ၂၆) အဋ္ဌကထာယံ ဝုတ္တာ အနုပသမ္ပန္နာ သင်္ဂဟိတာ။ တေနေဝေတ္ထာပိ ဝက္ခတိ ‘‘ပဝိဋ္ဌာနုပသမ္ပန္နဋ္ဌာနေ ဣဓ စ ဘိက္ခုနီ’’တိ။

၈၉၅။ ဒဝကမျတာတိ ဧတ္ထ ‘‘ပဋိသင်္ခါ ယောနိသော’’တိအာဒီသု (မ။ နိ။ ၁။၂၂၊ ၂၃၊ ၄၂၂၊ အ။ နိ။ ၆။၅၈၊ ၉။၉၊ မဟာနိ။ ၂၀၆၊ ဝိဘ။ ၅၁၈) ဝိယ ယ-ကာရလောပေါ။ သဗ္ဗတ္ထာတိ သဗ္ဗေသု ဝုတ္တပါစိတ္တိယဝတ္ထူသု စ ဒုက္ကဋဝတ္ထူသု စာတိ သဗ္ဗတ္ထေဝ။ ဒုဗ္ဘာသိတမုဒီရိတန္တိ ‘‘စဏ္ဍာလောသိ…ပေ… ပုက္ကုသောသီ’တိ ဘဏတိ၊ အာပတ္တိ ဝါစာယ ဝါစာယ ဒုဗ္ဘာသိတဿာ’’တိ (ပါစိ။ ၃၂) ဝုတ္တန္တိ အတ္ထော။ ပရမ္မုခါ ပန ပါစိတ္တိယဝတ္ထူဟိ စ ဒုက္ကဋဝတ္ထူဟိ စ အက္ကောသနေ ဒုက္ကဋမေဝ။ တထာ ဒဝကမျတာယ ပရမ္မုခါ ဝဒန္တဿာပိ ဒုဗ္ဘာသိတမေဝါတိ အာစရိယာ ဝဒန္တိ။

၈၉၆-၇။ အတ္ထံ ပုရက္ခတွာ ဝဒတော ဘိက္ခုဿ အနာပတ္တီတိ ယောဇနာ။ ဓမ္မော နာမ ‘‘စဏ္ဍာလောသီ’’တိအာဒိပါဠိယေဝ။ ယထာဟ အဋ္ဌကထာယံ ‘‘ပါဠိံ ဝါစေန္တော ဓမ္မပုရေက္ခာရော’’တိ (ပါစိ။ အဋ္ဌ။ ၃၅)။ အနုသာသနီ နာမ ‘‘ဣဒါနိပိ စဏ္ဍာလောသိ၊ မာ ပါပဓမ္မံ အကာသိ၊ မာ တမော တမပရာယနော အဟောသီ’’တိအာဒိနာ (ပါစိ။ အဋ္ဌ။ ၃၅) နယေန အဋ္ဌကထာယံ ဝုတ္တသရူပါယေဝ အနုသာသနီပုရေက္ခတာယ ဌတွာ ဝဒန္တဿ စိတ္တဿ လဟုပရိဝတ္တိတဘာဝတော အန္တရာ ကောဓေ ဥပ္ပန္နေပိ အနာပတ္တိ။

ဧတ္ထာတိ ဣမသ္မိံ ဩမသဝါဒသိက္ခာပဒေ။ ပဋိဃသမ္ပယုတ္တစိတ္တေနေဝ အာပဇ္ဇိတဗ္ဗတ္တာ မာနသိကဒုက္ခဝေဒနာဝ ဟောတိ။

ဩမသဝါဒကထာဝဏ္ဏနာ။

၈၉၈။ ဒုဝိဓာကာရတော ဘိက္ခုပေသုညေ အာပတ္တိ သိယာတိ ယောဇနာ။ ပိသတီတိ ပိသုဏာ၊ ဝါစာ ၊ သမဂ္ဂေ သတ္တေ အဝယဝဘူတေ ဝဂ္ဂေ ဘိန္နေ ကရောတီတိ အတ္ထော။ ပိသုဏာ ဧဝ ပေသုညံ၊ တာယ ဝါစာယ သမန္နာဂတော ပုဂ္ဂလော သဟစရိယနယေန ပိသုဏော၊ တဿ ကမ္မံ ပေသုညံ၊ ဘိက္ခူနံ ပေသုညံ ဘိက္ခုပေသုညံ၊ တသ္မိံ ဘိက္ခုပေသုညေ။ ပဒဘာဇနေ ‘‘ဥပသမ္ပန္နော ဥပသမ္ပန္နဿ သုတွာ ဥပသမ္ပန္နဿ ပေသုညံ ဥပသံဟရတိ ‘ဣတ္ထန္နာမော တံ ‘စဏ္ဍာလော…ပေ… ပုက္ကုသော’တိ ဘဏတီ’တိ အာပတ္တိ…ပေ… ပါစိတ္တိယဿာ’’တိ (ပါစိ။ ၃၉) ဝုတ္တတ္တာ သယံ ဥပသမ္ပန္နော ဟုတွာ ဥပသမ္ပန္နဿ ဇာတိအာဒီသု ဒသသု အက္ကောသဝတ္ထူသု အညတရေန အညံ ဥပသမ္ပန္နံ ပရမ္မုခါ အက္ကောသန္တဿ သုတွာ တဿ သန္တိကံ ဂန္တွာ ဝက္ခမာနသရူပေသု အတ္တနော ပိယကာမတာဘေဒါဓိပ္ပာယသင်္ခါတေသု ဒွီသု ကာရဏေသု အညတရကာရဏံ ပဋိစ္စ ‘‘အသုကော တုယှံ ဧဝံ ဝဒတီ’’တိ ပေသုညံ ဟရတိ၊ တဿ ပေသုညကထနနိမိတ္တံ ပါစိတ္တိယံ ဟောတီတိ အတ္ထော။

ဒုဝိဓာကာရတောတိ ဧတ္ထ အာကာရ-သဒ္ဒေါ ကာရဏပရိယာယော။ ယထာဟ အဋ္ဌကထာယံ ‘‘ဒွီဟာကာရေဟီတိ ဒွီဟိ ကာရဏေဟီ’’တိ (ပါစိ။ အဋ္ဌ။ ၃၈)။ ဧတ္ထ ကာရဏံ နာမ အဓိပ္ပာယဝိသေသော။ တံ ကာရဏံ အဓိပ္ပာယမုခေန ဒဿေတုမာဟ ‘‘အတ္တနော’’တိအာဒိ။ အတ္တနော ပိယကာမဿာတိ အတ္တနော ပိယဘာဝကာမဿ ပေသုညံ ဘဏန္တဿ၊ အတ္တနော ပိယဘာဝံ ကာမယန္တဿာတိ အတ္ထော၊ တာဒိသေန အဓိပ္ပာယေနာတိ ဝုတ္တံ ဟောတိ။ ယထာဟ အဋ္ဌကထာယံ ‘‘ဧဝံ အဟံ ဧတဿ ပိယော ဘဝိဿာမီ’’တိ အတ္တနော ပိယဘာဝံ ပတ္ထယမာနဿာ’’တိ (ပါစိ။ အဋ္ဌ။ ၃၈)။ ပရဘေဒတ္ထိနောပိ ဝါတိ အက္ကောသကဿ စ အတ္တနော ပေသုညဝစနံ သုဏန္တဿ စာတိ ဥဘိန္နံ ဘေဒံ ဣစ္ဆန္တဿာတိ အတ္ထော၊ ဘေဒါဓိပ္ပာယေနာတိ ဝုတ္တံ ဟောတိ။ ယထာဟ အဋ္ဌကထာယံ ‘‘ပရဿ ပရေန ဘေဒံ ဣစ္ဆန္တဿာ’’တိ (ပါစိ။ အဋ္ဌ။ ၃၈)။

၈၉၉။ ပရိယာယနယေန အက္ကောသန္တဿ ဝစနဿ…ပေ… ဒုက္ကဋန္တိ ယောဇနာ၊ ပရိယာယအက္ကောသဝစနံ သုတွာ ပရဿ သန္တိကံ ဂန္တွာ ဝဒန္တဿ ဘိက္ခုနော ဒုက္ကဋံ ဟောတီတိ အတ္ထော။ ယထာဟ ‘‘ဣတ္ထန္နာမော သန္တိ ဣဓေကစ္စေ စဏ္ဍာလာ…ပေ… ဘဏတိ၊ န သော အညံ ဘဏတိ၊ တံယေဝ ဘဏတီတိ အာပတ္တိ ဝါစာယ ဝါစာယ ဒုက္ကဋဿာ’’တိအာဒိ (ပါစိ။ ၄၁)။ ပါဠိမုတ္တနယေန အက္ကောသန္တဿ ဝစနဿ…ပေ… ဒုက္ကဋန္တိ ယောဇနာ။ ဧတ္ထ ‘‘စောရောသိ၊ ဂဏ္ဌိဘေဒကောသီ’’တိအာဒိနာ ဒဿိတော ပါဠိမုတ္တနယော နာမ။

၉၀၀။ အနုပသမ္ပန္နဿ အက္ကောသံ ဥပသမ္ပန္နံ ဟရတောပိ စ တထာ ဒုက္ကဋန္တိ ယောဇနာ။ စ-သဒ္ဒေန ဥပသမ္ပန္နဿ အက္ကောသံ အနုပသမ္ပန္နံ ဟရတောပိ စ၊ အနုပသမ္ပန္နဿ အက္ကောသံ အနုပသမ္ပန္နံ ဟရတောပိ စ တထာ ဒုက္ကဋန္တိ ဝိကပ္ပဒွယဉ္စ သမုစ္စိနောတိ။ ‘‘ဣဓာပိ ဘိက္ခုနိံ အာဒိံ ကတွာ သဗ္ဗေ အနုပသမ္ပန္နာ နာမာ’’တိ (ပါစိ။ အဋ္ဌ။ ၃၈) အဋ္ဌကထာဝစနတော ‘‘ဘိက္ခုနီ’’တိ ဥပလက္ခဏံ။

၉၀၁။ န စေဝ ပိယကာမဿာတိ ပိယဘာဝံ အကာမယန္တဿ စ။ န ဘေဒတ္ထိနောပိ စာတိ ဘေဒံ အနိစ္ဆန္တဿ စ။ ပါပါနံ ဂရဟတ္ထာယာတိ ဧတ္ထ ‘‘ကေဝလ’’န္တိ သေသော။ ယထာဟ အဋ္ဌကထာယံ ‘‘ဧကံ အက္ကောသန္တံ၊ ဧကဉ္စ ခမန္တံ ဒိသွာ ‘အဟော နိလ္လဇ္ဇော၊ ဤဒိသမ္ပိ နာမ အာယသ္မန္တံ ပုန ဝတ္တဗ္ဗံ မညိဿတီ’တိ ဧဝံ ကေဝလံ ပါပဂရဟိတာယ ဘဏန္တဿ အနာပတ္တီ’’တိ (ပါစိ။ အဋ္ဌ။ ၃၈)။

ပေသုညကထာဝဏ္ဏနာ။

၉၀၃။ အညေနာတိ သာမဏေရာဒိနာ။ ‘‘ယဉ္စ ပဒံ ယဉ္စ အနုပဒံ ယဉ္စ အနွက္ခရံ ယဉ္စ အနုဗျဉ္ဇနံ၊ သဗ္ဗမေတံ ပဒသော နာမာ’’တိ (ပါစိ။ ၄၆) ပဒဘာဇနေ ဝုတ္တတ္တာ အဝယဝေ သမုဒါယောပစာရဝသေန ‘‘ပိဋကတ္တယ’’န္တိ တဒေကဒေသပဒါဒိ ဧဝ ဝုတ္တောတိ ဂဟေတဗ္ဗော။ ဧတ္ထ ပဒါဒိသရူပံ အဋ္ဌကထာယ ဝေဒိတဗ္ဗံ။ ဝုတ္တဉှိ တတ္ထ ‘‘ပဒန္တိ ဧကော ဂါထာပါဒေါ အဓိပ္ပေတော။ အနုပဒန္တိ ဒုတိယော ပါဒေါ။ အနွက္ခရန္တိ ဧကေကမက္ခရံ။ အနုဗျဉ္ဇနန္တိ ပုရိမဗျဉ္ဇနေန သဒိသံ ပစ္ဆာဗျဉ္ဇန’’န္တိ (ပါစိ။ အဋ္ဌ။ ၄၅)။ ဣဒံ ဂါထာမယဒေသနံ သန္ဓာယ ဝုတ္တံ။ ‘‘ယံ ကိဉ္စိ ဝါ ဧကမက္ခရံ အနွက္ခရံ၊ အက္ခရသမူဟော အနုဗျဉ္ဇနံ၊ အက္ခရာနုဗျဉ္ဇနသမူဟော ပဒံ၊ ပဌမပဒံ ပဒမေဝ၊ ဒုတိယံ အနုပဒန္တိ ဧဝမေတ္ထ နာနာကရဏံ ဝေဒိတဗ္ဗ’’န္တိပိ (ပါစိ။ အဋ္ဌ။ ၄၅) ဝုတ္တံ။ ဣဒံ စုဏ္ဏိယဒေသနံ သန္ဓာယ ဝုတ္တံ။

ဓမ္မန္တိ ဗုဒ္ဓဘာသိတာဒိပါဠိဓမ္မံ။ ပဋိသမ္ဘိဒါယဉှိ ဓမ္မပဉ္စကေ ပါဠိပိ ဓမ္မောတိ ဝုတ္တာ။ ဓမ္မပဉ္စကံ နာမ ဖလနိဗ္ဗတ္တကော ဟေတု၊ အရိယမဂ္ဂေါ၊ ဘာသိတံ၊ ကုသလာကုသလံ စေတိ ဧတေ ဓမ္မသညိတာတိ နိဒ္ဒိဋ္ဌံ။ ဧတ္ထ ဟိ ဘာသိတန္တိ ပါဠိ ဝုတ္တာ။ အဋ္ဌကထာနိဿိတောပိ ဧတ္ထေဝ သင်္ဂဟံ ဂစ္ဆတိ။ သော စ ပုဗ္ဗေ မဂဓဘာသာယ ဌိတော သင်္ဂီတိတ္တယာရုဠှော ဂဟေတဗ္ဗော။

‘‘သဟ ဘဏန္တဿ ပါစိတ္တိယံ သိယာ’’တိ ဣမိနာ ‘‘ဧကတော ပဋ္ဌပေတွာ ဧကတော ဩသာပေန္တီ’’တိအာဒိနာ (ပါစိ။ ၄၆) ပဒဘာဇနာဂတနယေန အနုပသမ္ပန္နေန သဒ္ဓိံ အာရဘိတွာ ဧကတော ဥစ္စာရဏဝသေန ပဒံ ဝါ အနုပဒံ ဝါ အနွက္ခရံ ဝါ အနုဗျဉ္ဇနံ ဝါ ဝဒတော ပဒါဒိဂဏနာဝသေန ပါစိတ္တိယန္တိ ဝုတ္တံ ဟောတိ။

၉၀၄။ သင်္ဂီတိံ အနာရုဠှေသု ဓမ္မေသု ရာဇောဝါဒါဒယော သုတ္တန္တာ အာပတ္တိဇနကာယေဝါတိ မဟာပစ္စရိယာဒိသု ဝုတ္တာတိ ယောဇနာ။ ရာဇောဝါဒေါ နာမ ဧကော သုတ္တန္တော။ အာဒိ-သဒ္ဒေန တိက္ခိန္ဒြိယာဒိသုတ္တန္တာ ဂဟိတာ။

၉၀၅။ ဘိက္ခုသ္မိမ္ပိ ဘိက္ခုနိယာပိ စ အနုပသမ္ပန္နသညိနော၊ ဝိမတိဿ ဝါ ဘိက္ခုဿ တထာ ပဒသောဓမ္မေ ဒုက္ကဋံ ဟောတီတိ ယောဇနာ။

၉၀၆-၇။ ဧကတော ဥဒ္ဒိသာပေတီတိ ဧကတော ဥဒ္ဒေသံ ဂဏှန္တေဟိ အနုပသမ္ပန္နေဟိ သဒ္ဓိံ ဥစ္စာရဏဝသေန ဥဒ္ဒိသာပေတိ။ သဇ္ဈာယံ ဝါ ကရောတီတိ တထာ ဧကတော သဇ္ဈာယတိ။

‘‘သစေ ဧကဂါထာယ ဧကော ပါဒေါ န အာဂစ္ဆတိ၊ သေသံ အာဂစ္ဆတိ၊ အယံ ယေဘုယျေန ပဂုဏဂန္ထော နာမ။ ဧသ နယော သုတ္တေပိ ဝေဒိတဗ္ဗောတီ’’တိ (ပါစိ။ အဋ္ဌ။ ၄၈) အဋ္ဌကထာဝစနတော ပဂုဏဂန္ထန္တိ ဧတ္ထ ‘‘ယေဘုယျေနာ’’တိ သေသော။ ဩပါတေတီတိ ‘‘ဧဝံ ဘဏာဟီ’’တိ ဧကတော ဘဏတိ။ ဥဒ္ဒေသန္တိ ဥဒ္ဒိသိတဗ္ဗံ။ တေနာတိ အနုပသမ္ပန္နေန။

၉၀၈။ ယသ္မာ ဣဒံ ပဒသောဓမ္မသိက္ခာပဒံ ဝါစတော စ သမုဋ္ဌာတိ၊ ဝါစာစိတ္တဒွယာပိ စ သမုဋ္ဌာတိ၊ တသ္မာ ဣဒံ သမုဋ္ဌာနံ ပဒသောဓမ္မသညိတန္တိ ဝုတ္တန္တိ ယောဇနာ။

ပဒသောဓမ္မကထာဝဏ္ဏနာ။

၉၀၉-၁၀။ သဗ္ဗစ္ဆန္နသဗ္ဗပရိစ္ဆန္နေ သေနာသနေ တိဿန္နံ ပန ရတ္တီနံ ယော ပန ဘိက္ခု ရတ္တိယံ ဌပေတွာ ဘိက္ခုံ အညေန သစေ နိပဇ္ဇေယျ၊ တဿ ပါစိတ္တိယံ သိယာတိ ယောဇနာ။ ‘‘ယံ ကိဉ္စိ ပဋိစ္ဆာဒနသမတ္ထံ ဣဓ ဆဒနဉ္စ ပရိစ္ဆန္နဉ္စ ဝေဒိတဗ္ဗ’’န္တိ (ပါစိ။ အဋ္ဌ။ ၅၁) အဋ္ဌကထာယံ ဝုတ္တတ္တာ ဆဒနာရဟံ ဣဋ္ဌကာသိလာသုဓာတိဏပဏ္ဏာဒီနံ ယေန ကေနစိ သဗ္ဗသော ဆာဒိတံ သေနာသနံ သဗ္ဗစ္ဆန္နံ။ ‘‘ဘူမိတော ပဋ္ဌာယ ယာဝ ဆဒနံ အာဟစ္စ ပါကာရေန ဝါ အညေန ဝါ ကေနစိ အန္တမသော ဝတ္ထေနပိ ပရိက္ခိတ္တ’’န္တိ (ပါစိ။ အဋ္ဌ။ ၅၁) အဋ္ဌကထာယံ ဝုတ္တတ္တာ ယေန ကေနစိ ပရိက္ခိပိတွာ ပဋိစ္ဆာဒိတသေနာသနံ သဗ္ဗပရိစ္ဆန္နံ။ ‘‘ဆဒနံ အနာဟစ္စ သဗ္ဗန္တိမေန ပရိယာယေန ဒိယဍ္ဎဟတ္ထုဗ္ဗေဓေန ပါကာရာဒိနာ ပရိက္ခိတ္တာပိ သဗ္ဗပရိစ္ဆန္နာယေဝါ’’တိ (ပါစိ။ အဋ္ဌ။ ၅၁) ကုရုန္ဒဋ္ဌကထာယံ ဝုတ္တံ၊ တံ ‘‘ဒိယဍ္ဎာ’’တိအာဒိနာ ဝက္ခတိ။

ဧဝံ သဗ္ဗစ္ဆန္နသဗ္ဗပရိစ္ဆန္နေ ဧကသ္မိံ သေနာသနေ ယော ဘိက္ခု ဥပသမ္ပန္နတော အညေန ဧကေန ဝါ အနေကေဟိ ဝါ တိရတ္တံ သဟသေယျံ ကပ္ပေတွာ စတုတ္ထရတ္တိံ အာဒိံ ကတွာ သဗ္ဗရတ္တီသု သူရိယတ္ထင်္ဂမတော ပဋ္ဌာယ သကလရတ္တိယံ ပဌမံ ဝါ ပစ္ဆာ ဝါ အပုဗ္ဗာစရိမံ ဝါ ပိဋ္ဌိံ ပသာရေတွာ သစေ ဧကသေနာသနေ သေယျံ ကပ္ပေတိ၊ တဿ ဒေဝသိကံ ပါစိတ္တိယံ ဟောတီတိ ဣဒံ ဝိဓာနံ ‘‘အပိစေတ္ထ ဧကာဝါသာဒိကမ္ပိ စတုက္ကံ ဝေဒိတဗ္ဗ’’န္တိအာဒိနာ (ပါစိ။ အဋ္ဌ။ ၅၁) အဋ္ဌကထာယံ ဝုတ္တံ။

‘‘ယေဘုယျေန ပရိစ္ဆန္နေ ဆန္နေ’’တိ ဣမိနာပိ ဧဝမေဝ ယောဇေတွာ အတ္ထော ဝေဒိတဗ္ဗော။ ‘‘ယဿာ ပန ဥပရိ ဗဟုတရံ ဌာနံ ဆန္နံ၊ အပ္ပံ အစ္ဆန္နံ၊ သမန္တတော စ ဗဟုတရံ ပရိက္ခိတ္တံ၊ အပ္ပံ အပရိက္ခိတ္တံ၊ အယံ ယေဘုယျေနဆန္နာ ယေဘုယျေနပရိစ္ဆန္နာ နာမာ’’တိ (ပါစိ။ အဋ္ဌ။ ၅၁) အဋ္ဌကထာယံ ဝုတ္တနယေန ယေဘုယျေန ဆန္နပရိစ္ဆန္နံ ဝေဒိတဗ္ဗံ။ အတ္ထော ဝုတ္တနယောယေဝ။ ‘‘ယေဘုယျေန ပံသုကာ’’တိ ဧတဿ အဋ္ဌကထာယံ (ပါစိ။ အဋ္ဌ။ ၈၆) တီသု ဒွေ ယေဘုယျံ နာမ၊ ဣဓ ပန ပဒသောဓမ္မေ ‘‘ယေဘုယျေန ပဂုဏံ ဂန္ထ’’န္တိ ဧတဿ အဋ္ဌကထာယံ (ပါစိ။ အဋ္ဌ။ ၄၈) ‘‘ဧကဂါထာယာ’’တိအာဒိဝိဝရဏေ ဝိယ စတူသု တယောပိ ဘာဂါ ယေဘုယျံ နာမာတိ ဝေဒိတဗ္ဗံ။

၉၁၁။ မေထုနဿ ပဟောနကံ ယံ ပန ဝတ္ထု ပဌမပါရာဇိကာယ နိဒ္ဒိဋ္ဌံ အန္တမသော တိရစ္ဆာနဂတေနပိ၊ တေန ပဌမပါရာဇိကဝတ္ထုနာ ပုဂ္ဂလေန သဟ နိပဇ္ဇိတွာ အာပတ္တိ သဟသေယျာပတ္တိ ဟောတီတိ ယောဇနာ။

၉၁၂-၃။ ‘‘ဥဘော ဝါ နိပဇ္ဇန္တီ’’တိ ဝိကပ္ပဿ ပဌမဂါထာဒွယေနေဝ အတ္ထတော ဒဿိတတ္တာ ပုဗ္ဗာပရိယဝသေနပိ သမ္ဘဝန္တံ ဒဿေတုံ ‘‘အနုပသမ္ပန္နေ’’တိအာဒိနာ (ပါစိ။ ၅၂-၅၄) နယေန ဒဿိတပက္ခဒွယံ နိဒဿေတုမာဟ ‘‘နိပန္နေ’’တိအာဒိ။ ‘‘ဥဋ္ဌဟိတွာ’’တိ ဣဒံ ဝိစ္ဆာဝသေန ဂဟေတဗ္ဗံ။ အနုပသမ္ပန္နဂဏနာယပိ ဝါတိ ဗဟူသု အနုပသမ္ပန္နေသု တေသံ ဂဏနာယ စ။ အနုပသမ္ပန္နေသု ဗဟူသု တေသံ ဂဏနာယ ဧကဿ ဘိက္ခုနော ဗဟူ အာပတ္တိယော ဟောန္တီတိ ဧဝံ ဒဿနေန ဥပသမ္ပန္နေသု ဗဟူသု ဧကသ္မိံ အနုပသမ္ပန္နေ သတိ တေသဉ္စ တဿ ပယောဂဂဏနာယ အာပဇ္ဇိတဗ္ဗာ ဗဟူ အာပတ္တိယော စ ဥဘောသုပိ ဗဟူသု ဧကေကဿေဝ ဥပသမ္ပန္နဿ အနုပသမ္ပန္နဂဏနာယ ဗဟူ အာပတ္တိယော စ ဟောန္တီတိပိ ဒဿိတံ ဟောတိ။

၉၁၄။ ဧကေနေဝ ဒွါရေန ဝဠဉ္ဇိတဗ္ဗတော ဧကူပစာရေ သတဂဗ္ဘေပိ သေနာသနေ ဥပသမ္ပန္နော ဧကသ္မိံ ဂဗ္ဘေ ဝသန္တော အတ္တနာ သယနဂဗ္ဘေ ဒွါရံ ပိဒဟိတွာ ဝါ အပိဒဟိတွာ ဝါ စတုတ္ထရတ္တိယံ သယတိ စေ၊ ဥပရိမတလေ၊ အဝသေသဂဗ္ဘေသု စ သယန္တေဟိ အနုပသမ္ပန္နေဟိ ပုဗ္ဗေ ဝုတ္တအာပတ္တိနိယမောယေဝါတိ ဒဿနတ္ထမာဟ ‘‘သစေ ပိဓာယာ’’တိအာဒိ။ ဂဗ္ဘဒွါရံ ဥတ္တရပဒလောပေန ‘‘ဂဗ္ဘ’’န္တိ ဝုတ္တံ။ စတုတ္ထဒိဝသေ အတ္ထင်္ဂတေ သူရိယေ နိပဇ္ဇတိ၊ အာပတ္တိ သိယာတိ ယောဇနာ။ ‘‘အနုပသမ္ပန္နေန သဟာ’’တိ ပကရဏတော လဗ္ဘတိ။ အာပတ္တိ ပါစိတ္တိယံ။

၉၁၅။ ဒိယဍ္ဎဟတ္ထုဗ္ဗေဓေနာတိ ဝဍ္ဎကိရတနေန ဒိယဍ္ဎရတနုဗ္ဗေဓေန။ ပါကာရော နာမ နိဋ္ဌိတော။ စယနံ နာမ ဝိပ္ပကတပါကာရောတိပိ ဝဒန္တိ။ ဣမိနာ စ အာဠိန္ဒဿ အဂ္ဂဟဏတ္ထံ ‘‘ဒသဟတ္ထုဗ္ဗေဓာပိ ဇဂတိ ပရိက္ခေပသင်္ချံ န ဂစ္ဆတီ’’တိ (ပါစိ။ အဋ္ဌ။ ၅၁) အဋ္ဌကထာ ပမာဏန္တိ ဝဒန္တိ။ ဇဂတီတိ အာဠိန္ဒံ။ အာဒိ-သဒ္ဒေန ဘိတ္တိပဏ္ဏာဝရဏာဒိဂဟဏံ။

၉၁၆။ ဒုဿကုဋိယန္တိ ဝတ္ထကုဋိယံ။

၉၁၇။ ‘‘သဗ္ဗစ္ဆန္နပရိစ္ဆန္နာဒိပ္ပဘေဒတော ယေဘုယျာဒိပ္ပဘေဒတော’’တိ အာဒိ-သဒ္ဒေါ ပစ္စေကံ ယောဇေတဗ္ဗော။ ပဌမေန အာဒိ-သဒ္ဒေန သဗ္ဗစ္ဆန္နယေဘုယျပရိစ္ဆန္နသဗ္ဗစ္ဆန္နဥပဍ္ဎပရိစ္ဆန္နသဗ္ဗပရိစ္ဆန္နယေဘုယျစ္ဆန္န- သဗ္ဗပရိစ္ဆန္နဥပဍ္ဎစ္ဆန္နသင်္ခါတာနိ စတ္တာရိ သေနာသနာနိ ဂဟိတာနိ။ ဂါထာယ သရူပေန ဝုတ္တသဗ္ဗစ္ဆန္နသဗ္ဗပရိစ္ဆန္နေန သဒ္ဓိံ ပဉ္စ သေနာသနာနိ ဒဿိတာနိ ဟောန္တိ။ ဒုတိယေန အာဒိ-သဒ္ဒေန ယေဘုယျစ္ဆန္နယေဘုယျပရိစ္ဆန္န ယေဘုယျစ္ဆန္နဥပဍ္ဎပရိစ္ဆန္န ယေဘုယျပရိစ္ဆန္နဥပဍ္ဎစ္ဆန္နသင်္ခါတာနိ တီဏိ သေနာသနာနိ ဂဟိတာနိ။ ဣမေ အဋ္ဌ ဝိကပ္ပာ လဗ္ဘန္တိ။ ကသ္မာ ဝုတ္တံ ‘‘သတ္တ ပါစိတ္တိယာနီ’’တိ? မဟာအဋ္ဌကထာယ ဝုတ္တတ္တာ။ ယထာဟ ‘‘မဟာအဋ္ဌကထာယံ ပန ‘သဗ္ဗစ္ဆန္နေ ယေဘုယျေနပရိစ္ဆန္နေ ပါစိတ္တိယံ၊ သဗ္ဗစ္ဆန္နေ ဥပဍ္ဎပရိစ္ဆန္နေ ပါစိတ္တိယံ၊ ယေဘုယျေနစ္ဆန္နေ ဥပဍ္ဎပရိစ္ဆန္နေ ပါစိတ္တိယံ၊ သဗ္ဗပရိစ္ဆန္နေ ယေဘုယျေနစ္ဆန္နေ ပါစိတ္တိယံ၊ သဗ္ဗပရိစ္ဆန္နေ ဥပဍ္ဎစ္ဆန္နေ ပါစိတ္တိယံ ၊ ယေဘုယျေနပရိစ္ဆန္နေ ဥပဍ္ဎစ္ဆန္နေ ပါစိတ္တိယံ၊ ပါဠိယံ ဝုတ္တပါစိတ္တိယေန သဒ္ဓိံ သတ္တ ပါစိတ္တိယာနီ’တိ ဝုတ္တ’’န္တိ (ပါစိ။ အဋ္ဌ။ ၅၃)။

ကသ္မာ ပန အဋ္ဌကထာယံ ‘‘အဋ္ဌ ပါစိတ္တိယာနီ’’တိ ဝတွာ ‘‘သတ္တာ’’တိ ဂဏနပရိစ္ဆေဒေါ ကတောတိ? နိဿန္ဒေဟေ တာဝ ‘‘သေယျာ နာမ သဗ္ဗစ္ဆန္နာ သဗ္ဗပရိစ္ဆန္နာ၊ ယေဘုယျေနစ္ဆန္နာ ယေဘုယျေနပရိစ္ဆန္နာ’တိ (ပါစိ။ ၅၂) ပါဠိယံ အာဂတေသု ဒွီသု ဝိကပ္ပေသု ဧကသ္မိံ ဝုတ္တပါစိတ္တိယံ ဂဟေတွာ ပါဠိယံ ဝုတ္တေန ပါစိတ္တိယေန ‘သတ္တာ’တိ ဝုတ္တ’’န္တိ ပရိဟာရော ဒဿိတော။ သာရတ္ထဒီပနိယဉ္စ ‘‘သတ္တ ပါစိတ္တိယာနီ’တိ ပါဠိယံ ဝုတ္တပါစိတ္တိယဒွယံ သာမညတော ဧကတ္တေန ဂဟေတွာ ဝုတ္တံ။ ဝိသုံ ပန ဂယှမာနေ သဗ္ဗစ္ဆန္နေ သဗ္ဗပရိစ္ဆန္နေ ပါစိတ္တိယံ၊ ယေဘုယျေနစ္ဆန္နေ ယေဘုယျေနပရိစ္ဆန္နေ ပါစိတ္တိယန္တိ အဋ္ဌေဝ ပါစိတ္တိယာနိ ဟောန္တီ’’တိ (သာရတ္ထ။ ဋီ။ ပါစိတ္တိယ ၃။၅၃) ပရိဟာရော ဝုတ္တော။

သဗ္ဗယေဘုယျဥပဍ္ဎပဒေသု ဆန္နပရိစ္ဆန္နပဒေဟိ ယောဇိတေသု နဝ ဝိကပ္ပာ သမ္ဘဝန္တိ၊ တေသု နဝမေ ဥပဍ္ဎစ္ဆန္နဥပဍ္ဎပရိစ္ဆန္နဝိကပ္ပေ ဒုက္ကဋဿ ဒဿိတတ္တာ ပါရိသေသတော ဣတရေသု အဋ္ဌသု အဋ္ဌ ပါစိတ္တိယာနေဝ သမ္ဘဝန္တိ။ အဋ္ဌကထာယံ ပန အပ္ပကံ ဦနမဓိကံ ဝါ ဂုဏနူပဂံ န ဟောတီတိ ကတွာ ‘‘သတ္တာ‘‘တိ ဝုတ္တန္တိ ဂဟေတဗ္ဗံ။ ဧတ္ထာတိ ဣမသ္မိံ သိက္ခာပဒေ။

၉၁၈။ ‘‘အဍ္ဎစ္ဆန္နေ အဍ္ဎပရိစ္ဆန္နေ’’တိ ယောဇနာ။ ‘‘သဗ္ဗပရိစ္ဆန္နေ စူဠစ္ဆန္နေ’’တိ ယထာက္ကမေန ယောဇနာ။ ဣမိနာ အဋ္ဌကထာဂတေသု ပဉ္စသု ဝိကပ္ပေသု တတိယဝိကပ္ပံ ဒဿေတွာ အာဒိ-သဒ္ဒေန သဗ္ဗစ္ဆန္နာဒယော သေသဝိကပ္ပာ ဂဟိတာ။ ယထာဟ အဋ္ဌကထာယံ ‘‘သဗ္ဗစ္ဆန္နေ စူဠကပရိစ္ဆန္နေ ဒုက္ကဋံ၊ ယေဘုယျေနစ္ဆန္နေ စူဠကပရိစ္ဆန္နေ ဒုက္ကဋံ၊ သဗ္ဗပရိစ္ဆန္နေ စူဠကစ္ဆန္နေ ဒုက္ကဋံ၊ ယေဘုယျေနပရိစ္ဆန္နေ စူဠကစ္ဆန္နေ ဒုက္ကဋံ၊ ပါဠိယံ အာဂတဒုက္ကဋေန သဟ ပဉ္စ ဒုက္ကဋာနီဟိ ဝုတ္တ’’န္တိ (ပါစိ။ အဋ္ဌ။ ၅၃)။ ပါဠိယံ အာဂတဒုက္ကဋံ နာမ ဣမိဿာယေဝ ဂါထာယ အာဒိမှိယေဝ ဝုတ္တဒုက္ကဋံ။ ယထာဟ ‘‘ဥပဍ္ဎစ္ဆန္နေ ဥပဍ္ဎပရိစ္ဆန္နေ အာပတ္တိ ဒုက္ကဋဿာ’’တိ (ပါစိ။ ၅၃)။

စူဠစ္ဆန္နာဒီနိ စေတ္ထ ဧဝံ ဝေဒိတဗ္ဗာနိ – ယဿ စတူသု ဘာဂေသု ဧကော ဆန္နော၊ သေသာ အစ္ဆန္နာ၊ ဣဒံ စူဠကစ္ဆန္နံ။ ယဿ တီသု ဘာဂေသု ဒွေ ဆန္နာ၊ ဧကော အစ္ဆန္နော၊ ဣဒံ ယေဘုယျေနစ္ဆန္နံ။ ယဿ ဒွီသု ဘာဂေသု ဧကော ဆန္နော၊ ဧကော အစ္ဆန္နော၊ ဣဒံ ဥပဍ္ဎစ္ဆန္နံ နာမ သေနာသနံ။ စူဠပရိစ္ဆန္နာဒီနိ ဣမိနာ နယေန ဝေဒိတဗ္ဗာနိ။ ဆန္နာဒီဟိပီတိ သဟတ္ထေ ကရဏဝစနံ။ ပိ-သဒ္ဒေါ သမုစ္စယတ္ထော။ သဗ္ဗစူဠပရိစ္ဆန္နဆန္နာဒီဟိ စတူဟိပိ သဟ အဍ္ဎစ္ဆန္နပရိစ္ဆန္နေ ပဉ္စဓာ ဒုက္ကဋံ ပရိဒီပိတန္တိ ယောဇနာ။

၉၂၀။ သဗ္ဗစ္ဆန္နာဒိကေတိ ဧတ္ထ အာဒိ-သဒ္ဒေန ‘‘သဗ္ဗပရိစ္ဆန္နေ သဗ္ဗအစ္ဆန္နေ ယေဘုယျေနအစ္ဆန္နေ ယေဘုယျေနအပရိစ္ဆန္နေ’’တိ (ပါစိ။ ၅၄) ပါဠိယံ ဝုတ္တာ အနာပတ္တိဝါရသေသာ စ အဋ္ဌကထာယံ ဝုတ္တာ ‘‘ဥပဍ္ဎစ္ဆန္နေ စူဠကပရိစ္ဆန္နေ၊ ဥပဍ္ဎပရိစ္ဆန္နေ စူဠကစ္ဆန္နေ ၊ စူဠကစ္ဆန္နေ စူဠကပရိစ္ဆန္နေ’’တိ (ပါစိ။ အဋ္ဌ။ ၅၃) တယော အနာပတ္တိဝါရာ စ ဂဟိတာ။

၉၂၁။ နိပန္နေပီတိ ဧတ္ထ ပိ-သဒ္ဒေန ‘‘ဘိက္ခု နိပန္နေ အနုပသမ္ပန္နော နိသီဒတိ၊ ဥဘော ဝါ နိသီဒန္တီ’’တိ (ပါစိ။ ၅၄) ပါဠိယံ ဝုတ္တပကာရန္တရေ သမုစ္စိနောတိ။

သဟသေယျကထာဝဏ္ဏနာ။

၉၂၂။ အပိ-သဒ္ဒေန ပဂေဝ မဟတ္တရိယာတိ ဒဿေတိ။ သဟသေယျံ ပကပ္ပေယျာတိ ယထာဝုတ္တလက္ခဏံ သဗ္ဗစ္ဆန္နသဗ္ဗပရိစ္ဆန္နာဒိသေနာသနံ ပဝိသိတွာ သူရိယတ္ထင်္ဂမတော ပဋ္ဌာယ ပုဗ္ဗေ ဝုတ္တပ္ပကာရေနေဝ ပိဋ္ဌိပ္ပသာရဏလက္ခဏံ သေယျံ ကပ္ပေယျ။

၉၂၃-၄။ ဒေဝိယာတိ ဒေဝိတ္ထိယာ။ တိရစ္ဆာနဂတိတ္ထိယာတိ ဂေါဓာဒိကာယ။ ‘‘မေထုနဝတ္ထုဘူတာယာ’’တိ ဣမိနာ မေထုနဓမ္မဿ အဝတ္ထုဘူတာယ သဟသေယျာယ ဒေါသာဘာဝံ ဒဿေတိ။ ဝတ္ထူနံ ဂဏနာယာတိ မာတုဂါမဿ ဂဏနာယ စ တာသဉ္စ အတ္တနော စ ပယောဂဂဏနာယ စ။ အဿာတိ ဘိက္ခုဿ။ မာတုဂါမေန တယော ဒိဝသေ သဟသေယျာယ ဣမိနာ သိက္ခာပဒေန အာပတ္တိံ အာပဇ္ဇိတွာ စတုတ္ထဒိဝသေ သဟသေယျာယ ဒွီဟိပိ သိက္ခာပဒေဟိ အာပတ္တိံ အာပဇ္ဇတီတိ ဧတ္ထ ဒုက္ကဋဝတ္ထုဘူတာယ ဣတ္ထိယာ တတ္ထေဝ သဟသေယျာယ ဣမိနာ သိက္ခာပဒေန ဒုက္ကဋံ အာပဇ္ဇိတွာ စတုတ္ထဒိဝသေ ရတ္တိယံ သဟသေယျာယ ဣမိနာ သိက္ခာပဒေန အာပဇ္ဇိတဗ္ဗဒုက္ကဋေန သဟ ပုရိမသိက္ခာပဒေန ပါစိတ္တိယံ အာပဇ္ဇတီတိ ဝေဒိတဗ္ဗံ။

ဒုတိယသဟသေယျကထာဝဏ္ဏနာ။

၉၂၆။ ဆပ္ပဉ္စဝါစာဟိ ဥဒ္ဓံ ဣတ္ထိယာ ဓမ္မံ ဘဏန္တဿာတိ သမ္ဗန္ဓော။ ဣတ္ထိယာတိ ‘‘မာတုဂါမော နာမ မနုဿိတ္ထီ၊ န ယက္ခီ၊ န ပေတီ၊ န တိရစ္ဆာနဂတာ၊ ဝိညူ ပဋိဗလာ ဟောတိ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတု’’န္တိ ပါဠိယံ ဝုတ္တမနုဿိတ္ထိယာ။ ဘဏန္တဿာတိ ဝက္ခမာနလက္ခဏံ ဓမ္မံ ဆဟိ ပဒေဟိ ဥတ္တရိ ဘဏန္တဿ။ ဝိညုံ ပုရိသဝိဂ္ဂဟံ ဝိနာတိ ‘‘ဝိညူ နာမ ပုရိသဝိဂ္ဂဟော ပဋိဗလော ဟောတိ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတု’’န္တိ (ပါစိ။ ၆၄) ပါဠိယံ ဝုတ္တသဝနူပစာရဂတမနုဿပုရိသံ ဝိနာ။ ဓမ္မန္တိ ဝက္ခမာနပ္ပကာရသရူပံ ဒေသနာဓမ္မံ။

၉၂၇။ ဂါထာမယာ၊ စုဏ္ဏိယဂန္ထမယာတိ ဒုဝိဓာ ဒေသနာ၊ တတ္ထ ဂါထာမယဒေသနာယ ဝါစာ နာမ ဂါထာပါဒလက္ခဏာတိ ဒဿေတုမာဟ ‘‘ဂါထာပါဒေါ’’တိအာဒိ။ စုဏ္ဏိယဒေသနာယံ ပန ဝါစာပရိစ္ဆေဒေါ ဝိဘတျန္တဝသေန ဝေဒိတဗ္ဗော။ တေနာဟ ဂဏ္ဌိပဒေ ‘‘ဧကော ဂါထာပါဒေါ’တိ ဣဒံ ဂါထာဗန္ဓမေဝ သန္ဓာယ ဝုတ္တံ၊ အညတ္ထ ပန ဝိဘတ္တိအန္တပဒမေဝ ဂဟေတဗ္ဗ’’န္တိ။ ပဒသောဓမ္မံ နိဒ္ဒိဋ္ဌံ ဓမ္မန္တိ ပိဋကတ္တယံ။ ‘‘အဋ္ဌကထ’’န္တိ ဣမိနာ သင်္ဂီတိတ္တယာရုဠှံ ပေါရာဏဋ္ဌကထံ ဂဟေတဗ္ဗံ။ တေနေဝ ဂဏ္ဌိပဒေ ဝုတ္တံ ‘‘အဋ္ဌကထံ ဓမ္မပဒဇာတကာဒိဝတ္ထုဉ္စာ’’တိ။ ဣမိနာပိ ပေါရာဏကံ သင်္ဂီတိအာရုဠှမေဝ အဋ္ဌကထံ ဝုတ္တန္တိ ဝဒန္တိ။ အဋ္ဌကထာဒိပါဌံ ဌပေတွာ ဒမိဠာဒိဘာသန္တရေန ယထာရုစိ ကထေတုံ ဝဋ္ဋတီတိ။

၉၂၈။ ပဒါဒီနံ ဝသာ ဆန္နံ ဝါစာနံ ဥပရိ ဓမ္မံ ဒေသေန္တဿာတိ ယောဇနာ။ ဒေသေန္တဿာတိ ပဒသောဓမ္မေ ဝုတ္တလက္ခဏပဒါဒိသရူပါဟိ ဆဟိ ဝါစာဟိ ဥတ္တရိ ဓမ္မံ ဒေသေန္တဿ။ ပဒါဒိဂဏနာယာတိ ယထာဝုတ္တလက္ခဏပဒအနုပဒအနွက္ခရအနုဗျဉ္ဇနဂဏနာယ။

၉၂၉။ ပုရိသဝိဂ္ဂဟန္တိ မနုဿပုရိသဝေသံ။ ဧတ္ထ တိရစ္ဆာနဂတာ နာမ ဝေသနိမ္မာနာရဟာ ဣဒ္ဓိမန္တာ နာဂသုပဏ္ဏာ။

၉၃၁။ ဝဒတောတိ အဓိကံ ဓမ္မံ ဘာသတော။

၉၃၂။ ဣတ္ထိရူပန္တိ မနုဿိတ္ထိဝေသံ။ တိရစ္ဆာနဂတိတ္ထိယာတိ ဝုတ္တသရူပါယ တိရစ္ဆာနဂတိတ္ထိယာ။

၉၃၃။ သယံ ဥဋ္ဌာယ နိသီဒိတွာ ပုန ဓမ္မံ ဒေသေန္တဿ အနာပတ္တိ ပကာသိတာတိ သမ္ဗန္ဓော။ မာတုဂါမဿ ဝါ တထာတိ ဧတ္ထ ‘‘တထာ’’တိ ဣမိနာ ဝုတ္တပ္ပကာရဿ ဂဟိတတ္တာ ဥဋ္ဌာယ နိသိန္နဿ မာတုဂါမဿ ပုန ဓမ္မံ ဒေသေန္တဿ အနာပတ္တိ ပကာသိတာတိ ဝုတ္တံ ဟောတိ။ ‘‘ဥဋ္ဌာယာ’’တိအာဒိနာ ဣရိယာပထပရိဝတ္တနဒဿနေန နာနာဣရိယာပထေပိ အနာပတ္တိံ ဒီပေတိ။

၉၃၄။ အညိဿာ ပုန အညိဿာတိ ဧတ္ထ ‘‘အာဂတာဂတာယာ’’တိ သေသော။ ယထာဟ အဋ္ဌကထာယံ ‘‘အညဿ မာတုဂါမဿာတိ ဧကိဿာ ဒေသေတွာ ပုန အာဂတာဂတာယ အညိဿာပိ ဒေသေတီတိ ဧဝံ ဧကာသနေ နိသိန္နော မာတုဂါမသတသဟဿန္နမ္ပိ ဒေသေတီတိ အတ္ထော’’တိ (ပါစိ။ အဋ္ဌ။ ၆၆)။ အဝုတ္တသမုစ္စယတ္ထေန စ-သဒ္ဒေန ‘‘ပဉှံ ပုဋ္ဌော ကထေတီ’’တိ (ပါစိ။ ၆၆) ဣဒံ သမုစ္စိနောတိ။ ‘‘ဒီဃနိကာယော ကိမတ္ထိယော ဘန္တေ’’တိ ပဉှံ ပုစ္ဆတော မာတုဂါမဿ သဗ္ဗံ ဒီဃနိကာယံ ဝဒတောပိ အနာပတ္တိ။ ယထာဟ အဋ္ဌကထာယံ ‘‘ပဉှံ ပုစ္ဆတိ၊ ပဉှံ ပုဋ္ဌော ကထေတီတိ မာတုဂါမော ‘ဒီဃနိကာယော နာမ ဘန္တေ ကိမတ္ထံ ဒီပေတီ’တိ ပုစ္ဆတိ၊ ဧဝံ ပဉှံ ပုဋ္ဌော ဘိက္ခု သဗ္ဗံ စေပိ ဒီဃနိကာယံ ကထေတိ၊ အနာပတ္တီ’’တိ (ပါစိ။ အဋ္ဌ။ ၆၆)။ ဧတ္ထ စ သဗ္ဗံ စေပိ ဒီဃနိကာယံ ကထေတီတိ ယာဝ န နိဋ္ဌာတိ၊ တာဝ ပုနဒိဝသေပိ ကထေတိ။

၉၃၅။ ဓမ္မဿ ဒေသနာယ၊ ဝိညုမနုဿပုရိသဿ အသန္နိဟိတကရဏေန စ အာပဇ္ဇိတဗ္ဗတော ကြိယာကြိယံ။

ဓမ္မဒေသနာကထာဝဏ္ဏနာ။

၉၃၆။ မဟဂ္ဂတံ ရူပါရူပဇ္ဈာနံ။ ပဏီတံ လောကုတ္တရဓမ္မံ။ ပဓာနဘာဝံ နီတန္တိ ပဏီတံ။ အာရောစေန္တဿာတိ ‘‘ပဌမံ ဈာနံ သမာပဇ္ဇာမီ’’တိအာဒိနာ (ပါရာ။ ၂၀၁) နယေန စတုတ္ထပါရာဇိကေ ဝုတ္တနယေန ဝဒန္တဿ။ ပရိနိဗ္ဗာနကာလေ စ ပုဋ္ဌကာလေ စ ဘိက္ခုဘိက္ခုနီနံ အတ္တနာ လဒ္ဓဿ ဥတ္တရိမနုဿဓမ္မဿ အာရောစေတဗ္ဗတ္တာ ‘‘ဌပေတွာ ဘိက္ခုနိံ ဘိက္ခု’’န္တိ ဝုတ္တံ။ ‘‘အညဿာ’’တိ သေသော။ ယထာဟ အဋ္ဌကထာယံ ‘‘ဥပသမ္ပန္နဿ ဘူတံ အာရောစေတီတိ ဥတ္တရိမနုဿဓမ္မမေဝ သန္ဓာယ ဝုတ္တံ။ ပရိနိဗ္ဗာနကာလေ၊ ဟိ အန္တရာ ဝါ အတိကဍ္ဎိယမာနေန ဥပသမ္ပန္နဿ ဘူတံ အာရောစေတုံ ဝဋ္ဋတီ’’တိ (ပါစိ။ အဋ္ဌ။ ၇၇)။ ဘူတေတိ ဧတ္ထ ‘‘ဥတ္တရိမနုဿဓမ္မေ အာရောစိတေ’’တိ ဝတ္တဗ္ဗံ၊ နိမိတ္တတ္ထေ ဘုမ္မံ၊ အတ္တနော သန္တာနေ ဣမသ္မိံ အတ္တဘာဝေ သိဒ္ဓဥတ္တရိမနုဿဓမ္မဿ အာရောစနနိမိတ္တန္တိ အတ္ထော။

၉၃၇။ နောစေ ဇာနာတိ သော ဝုတ္တန္တိ ယဿ အာရောစေတိ၊ သော သစေ သုတက္ခဏေယေဝ ဝုတ္တနယေနေဝ ‘‘ဧသ ပဌမဇ္ဈာနဿ လာဘီ’’တိအာဒိနာ နယေန ဝုတ္တံ နော ဇာနာတိ။ ပရိယာယဝစနေတိ ‘‘ယော တေ ဝိဟာရေ ဝသတိ၊ သော ပဌမဿ ဈာနဿ လာဘီ’’တိ ဧဝမာဒိပရိယာယဝစနေ။ ယဿ ဥတ္တရိမနုဿဓမ္မံ အာရောစေတိ၊ သော သစေ သုတသမနန္တရံ ‘‘ဧသ ဧဝံ ဝဒတီ’’တိ ဝုတ္တံ နော ဇာနာတိ၊ တာဒိသဿ အာရောစေန္တဿ ဘိက္ခုနော ဟောတိ အာပတ္တိ ဒုက္ကဋန္တိ သမ္ဗန္ဓော။ အဿ ဘူတဿ ပရိယာယဝစနေ စ ဘိက္ခုနော အာပတ္တိ ဒုက္ကဋံ ဟောတီတိ ယောဇနာ။

၉၃၈။ တထာရူပေကာရဏေ သတီတိ ပရဿ ကာရဏဘာဝံ ဉတွာပိ ပဋိပတ္တိယာ အမောဃဘာဝဒဿနသမုတ္တေဇနသမ္ပဟံသနာဒိကရသင်္ခါတေ ကာရဏေ သတိ။ သဗ္ဗဿာပီတိ ဥပသမ္ပန္နာနုပသမ္ပန္နဿ သဗ္ဗဿ။ သီလာဒိန္တိ သီလသုတပရိယတ္တိဂုဏံ။ ဝဒတောတိ ဧတ္ထ ‘‘ဘိက္ခုနော’’တိ ပကရဏတော လဗ္ဘတိ။

၉၃၉။ တဒသမ္ဘဝါတိ ဒိဋ္ဌိသမ္ပန္နဿ ဥမ္မာဒါဒီနံ အသမ္ဘဝါ။ ယထာဟ အဋ္ဌကထာယံ ‘‘ဒိဋ္ဌိသမ္ပန္နာနံ ဥမ္မာဒဿ ဝါ စိတ္တက္ခေပဿ ဝါ အဘာဝါတိ။ မဟာပစ္စရိယမ္ပိ ဟိ ဝိစာရိတ’’န္တိ (ပါစိ။ အဋ္ဌ။ ၇၇)။ ဥမ္မတ္တကပဒဿ အဝစနေ ကာရဏံ ဝဒန္တေနေဝ ခိတ္တစိတ္တာဒိပဒါနံ အဝစနေ ကာရဏဉ္စ ဥပလက္ခဏတော ဒဿိတမေဝါတိ ဒဋ္ဌဗ္ဗံ။ ဧတ္ထ စ မဂ္ဂဖလဒိဋ္ဌိယာ သမန္နာဂတာနံ အရိယာနမေဝ ဟိ ဥမ္မတ္တကာဒိဘာဝေါ နတ္ထိ။ ဈာနလာဘိနော ပန တသ္မိံ သတိ ဈာနာ ပရိဟာယန္တိ၊ တသ္မာ တေသံ အဘူတာရောစနပစ္စယာ အနာပတ္တိ ဝတ္တဗ္ဗာ၊ န ဘူတာရောစနပစ္စယာ။

၉၄၀။ ဣမိဿာပတ္တိယာ အညတြ ဈာနမဂ္ဂါဒိလာဘီနံ အညဿ အသမ္ဘဝါ ‘‘ကုသလာဗျာကတေဟေဝ ဒွိစိတ္တ’’န္တိ ဝုတ္တံ။ ဣဒဉ္စ ဥက္ကဋ္ဌပရိစ္ဆေဒေန အရိယပုဂ္ဂလေယေဝ သန္ဓာယ ဝုတ္တံ။ ပဏ္ဏတ္တိံ အဇာနန္တာ ပန ဈာနလာဘီ ပုထုဇ္ဇနာ နာနာဝတ္ထုမှိ လောဘဝသေန အကုသလစိတ္တေနာပိ န အာရောစေန္တီတိ နတ္ထိ၊ တသ္မာ ‘‘တိစိတ္တ’’န္တိ ဝတ္တဗ္ဗံ သိယာ၊ တထာပိ ဗဟုလေန ကုသလာဗျာကတာနမေဝ သမ္ဘဝေါတိ ဧဝံ ဝုတ္တန္တိ ဒဋ္ဌဗ္ဗံ။ ဒွိဝေဒနံ သုခေါပေက္ခာဝသေန။ ဣဒဉ္စ သိက္ခာပဒံ ပဏ္ဏတ္တိအဇာနနဝသေန အစိတ္တကသမုဋ္ဌာနံ ဟောတိ။ အရိယာ စေတ္ထ ပဏ္ဏတ္တိံ ဇာနန္တာ ဝီတိက္ကမံ န ကရောန္တိ၊ ပုထုဇ္ဇနာ ပန ပဏ္ဏတ္တိံ ဇာနိတွာပိ ဝီတိက္ကမံ ကရောန္တိ။ တေ စ သတ္ထုနော အာဏာဝီတိက္ကမစေတနာယ ဗလဝအကုသလဘာဝတော ဈာနာ ပရိဟာယန္တီတိ ဒဋ္ဌဗ္ဗံ။

ဘူတာရောစနကထာဝဏ္ဏနာ။

၉၄၁။ ဘိက္ခုနော ဒုဋ္ဌုလ္လံ အာပတ္တိံ ဘိက္ခုသမ္မုတိံ ဌပေတွာ အနုပသမ္ပန္နေ အာရောစေန္တဿ ဘိက္ခုနော အာပတ္တီတိ ယောဇနာ။ ဒုဋ္ဌုလ္လံ အာပတ္တိန္တိ သင်္ဃာဒိသေသော။ နနု စ ‘‘ဒုဋ္ဌုလ္လာ နာမ အာပတ္တိ စတ္တာရိ စ ပါရာဇိကာနိ တေရသ စ သင်္ဃာဒိသေသာ’’တိ (ပါစိ။ ၇၉) ပဒဘာဇနေ ပါရာဇိကသင်္ဃာဒိသေသာ ဒဿိတာ၊ ကသ္မာ ဣဓ သင်္ဃာဒိသေသောဝ ဂဟိတောတိ? ဝုစ္စတေ – ပါရာဇိကံ ဒုဋ္ဌုလ္လသဒ္ဒတ္ထဒဿနတ္ထံ ဝုတ္တံ၊ ဣဓ ပန သင်္ဃာဒိသေသောယေဝ ဘဂဝတာ အဓိပ္ပေတောတိ အဋ္ဌကထာယံ ဝိစာရိတမေတံ။ ဝုတ္တဉှိ တတ္ထ ‘‘ပါရာဇိကာနိ ဒုဋ္ဌုလ္လသဒ္ဒတ္ထဒဿနတ္ထံ ဝုတ္တာနိ၊ သင်္ဃာဒိသေသံ ပန ဣဓ အဓိပ္ပေတ’’န္တိ (ပါစိ။ အဋ္ဌ။ ၇၈)။ ဝက္ခတိ စ ‘‘ဣဓ သင်္ဃာဒိသေသာဝ၊ ဒုဋ္ဌုလ္လာပတ္တိယော မတာ’’တိ။ အနုပသမ္ပန္နေတိ ‘‘ဘိက္ခုဉ္စ ဘိက္ခုနိဉ္စ ဌပေတွာ အဝသေသော အနုပသမ္ပန္နော’’တိ (ပါစိ။ ၈၀) ပဒဘာဇနေ နိဒ္ဒိဋ္ဌအနုပသမ္ပန္နဿ အာရောစေန္တဿာတိ ဝုတ္တံ ဟောတိ။

ဌပေတွာ ဘိက္ခုသမ္မုတိန္တိ ‘‘အတ္ထိ ဘိက္ခုသမ္မုတိ အာပတ္တိပရိယန္တာ န ကုလပရိယန္တာ’’တိအာဒိနာ (ပါစိ။ ၈၀) ပဒဘာဇနေ ဒဿိတံ အဘိဏှာပတ္တိကဿ ဘိက္ခုနော အာယတိံ သံဝရတ္ထံ ဟိရောတ္တပ္ပဇနနတ္ထံ အာပတ္တိယော ဝါ ဥပါသကကုလာနိ ဝါ ဥဘယမေဝ ဝါ ပရိစ္ဆိန္ဒိတွာ ဝါ အပရိစ္ဆိန္ဒိတွာ ဝါ အာပတ္တိယော အာရောစေတုံ သင်္ဃေန သင်္ဃမဇ္ဈေ တိက္ခတ္တုံ သာဝေတွာ ကတသမ္မုတိံ ဌပေတွာတိ ဝုတ္တံ ဟောတိ။ ယထာဟ အဋ္ဌကထာယံ ‘‘အဘိဏှာပတ္တိကံ ဘိက္ခုံ ဒိသွာ ‘ဧဝမေသ ပရေသု ဟိရောတ္တပ္ပေနာပိ အာယတိံ သံဝရံ အာပဇ္ဇိဿတီ’တိ တဿ ဘိက္ခုနော ဟိတေသိတာယ တိက္ခတ္တုံ အပလောကေတွာ သင်္ဃေန ကာတဗ္ဗာ’’တိ (ပါစိ။ အဋ္ဌ။ ၈၀)။

၉၄၂။ ဃဋေတွာ ဝဒန္တဿေဝါတိ ဧဝကာရော ယထာဌာနေ ယောဇေတဗ္ဗော။ ဧဝကာရေန ဗျဝစ္ဆိန္နမတ္ထံ ဝက္ခတိ ‘‘ဝတ္ထု’’န္တိအာဒိနာ။ ‘‘အသုစိံ မောစေတွာ’’တိ ဣမိနာ ဝတ္ထုမာဟ၊ ‘‘သင်္ဃာဒိသေသ’’န္တိ ဣမိနာ အာပတ္တိံ။ ဝဇ္ဇမေဝ ဝဇ္ဇတာ။ ‘‘ပါစိတ္တိယာပတ္တီ’’တိ ဣမဿာယံ ပရိယာယော။ ‘‘အယံ အသုစိံ မောစေတွာ သင်္ဃာဒိသေသံ အာပန္နော’’တိ ဝတ္ထုနာ သဒ္ဓိံ ဃဋေတွာ အာပတ္တိံ ဝဒန္တဿ ဝဇ္ဇတာ ပါစိတ္တိယာပတ္တိ ဟောတီတိ ယောဇနာ။

၉၄၃။ သုဒ္ဓဿာတိ ပါရာဇိကမနာပန္နဿ။ ဝဒန္တိ ဝဒနဟေတု၊ ဝတ္ထုနာ သဒ္ဓိံ သင်္ဃာဒိသေသဿ ကထနတောတိ အတ္ထော။

၉၄၄။ အဒုဋ္ဌုလ္လာယာတိ သင်္ဃာဒိသေသတော အညာယ အာပတ္တိယာ။ ဒုဋ္ဌုလ္လသညိနောတိ သင်္ဃာဒိသေသသညိနော။ သေသာ အာပတ္တိယောပိ ဝါတိ သင်္ဃာဒိသေသံ ဝိနာ သေသေ ဆဠာပတ္တိက္ခန္ဓေ။

၉၄၅။ တထာတိ ဒုက္ကဋံ အတိဒိသတိ။ ပဉ္စဓာ မတံ အနုပသမ္ပန္နဿ ဒုဋ္ဌုလ္လံ အဇ္ဈာစာရံ အာရောစေန္တဿ တထာ ဒုက္ကဋန္တိ ယောဇနာ။ အနုပသမ္ပန္နဿ ပဉ္စဓာ မတံ ဒုဋ္ဌုလ္လံ အဇ္ဈာစာရန္တိ စ ပါဏာတိပါတာဒိပဉ္စသိက္ခာပဒဝီတိက္ကမာ ဂဟိတာ။ ကေစိ ပန ‘‘သုက္ကဝိဿဋ္ဌိအာဒယော ပဉ္စာ’’တိ ဝဒန္တိ၊ တံ န ဂဟေတဗ္ဗံ။ ပါဏာတိပါတာဒီနိ ဟိ ဒသေဝ သိက္ခာပဒါနိ သာမဏေရာနံ ပညတ္တာနိ။ တေသံ ပညတ္တေသုယေဝ စ သိက္ခာပဒေသု ဒုဋ္ဌုလ္လာဒုဋ္ဌုလ္လဝိစာရဏာ ကာတဗ္ဗာ၊ န စ သုက္ကဝိဿဋ္ဌိအာဒီနိ ဝိသုံ တေသံ ပညတ္တာနိ အတ္ထီတိ။

အထ ဘိက္ခုနော ဒုဋ္ဌုလ္လသင်္ခါတာနိ သုက္ကဝိဿဋ္ဌိအာဒီနိ အနုပသမ္ပန္နဿ ကိံ နာမ ဟောန္တီတိ? အဇ္ဈာစာရော နာမ ဟောန္တီတိ။ ယထာဟ အဋ္ဌကထာယံ ‘‘သုက္ကဝိဿဋ္ဌိ…ပေ… အဇ္ဈာစာရော နာမာတိ ဝုတ္တ’’န္တိ (ပါစိ။ အဋ္ဌ။ ၈၂)။ ဣမိနာပိ စေတံ သိဒ္ဓံ ‘‘အနုပသမ္ပန္နဿ သုက္ကဝိဿဋ္ဌိအာဒိ ဒုဋ္ဌုလ္လံ နာမ န ဟောတီ’’တိ။ ‘‘အဇ္ဈာစာရော နာမာ’’တိ ဟိ ဝဒန္တော အနုပသမ္ပန္နဿ သုက္ကဝိဿဋ္ဌိအာဒိ ကေဝလံ အဇ္ဈာစာရော နာမ ဟောတိ၊ န ပန ဒုဋ္ဌုလ္လော နာမ အဇ္ဈာစာရောတိ ဒီပေတိ။ ‘‘အဇ္ဈာစာရော နာမာ’’တိ စ အဋ္ဌကထာယံ ဝုတ္တတ္တာ၊ အကတ္တဗ္ဗရူပတ္တာ စ အနုပသမ္ပန္နဿ သုက္ကဝိဿဋ္ဌိအာဒီနိ ဒဏ္ဍကမ္မဝတ္ထုပက္ခံ ဘဇန္တိ။ တာနိ စ အညဿ အနုပသမ္ပန္နဿ အဝဏ္ဏကာမတာယ အာရောစေန္တော ဘိက္ခု ဒုက္ကဋံ အာပဇ္ဇတီတိ ဝဒန္တိ။ ဣဓ ပန အနုပသမ္ပန္နဂ္ဂဟဏေန သာမဏေရသာမဏေရိသိက္ခမာနာနံ ဂဟဏံ ဝေဒိတဗ္ဗံ။

အဒုဋ္ဌုလ္လံ အဇ္ဈာစာရန္တိ ယောဇနာ။ ‘‘အနုပသမ္ပန္နဿာ’’တိ စ အဇ္ဈာဟရိတဗ္ဗာနိ။ အနုပသမ္ပန္နဿ ယထာဝုတ္တေဟိ ပဉ္စသိက္ခာပဒေဟိ အညံ ဝိကာလဘောဇနာဒိံ အဒုဋ္ဌုလ္လံ အဇ္ဈာစာရံ ဝါ။ ယထာဟ ‘‘အနုပသမ္ပန္နဿ ဒုဋ္ဌုလ္လံ ဝါ အဒုဋ္ဌုလ္လံ ဝါ အဇ္ဈာစာရ’’န္တိအာဒိ (ပါစိ။ ၈၂)။

၉၄၆။ ကေဝလံဝတ္ထုံ ဝါ အာရောစေန္တဿာတိ ‘‘အယံ သုက္ကဝိဿဋ္ဌိံ အာပန္နော’’တိအာဒိနာ နယေန ဝတ္ထုမတ္တံ အာရောစေန္တဿ။ ကေဝလံ အာပတ္တိံ ဝါ အာရောစေန္တဿာတိ ‘‘အယံ ပါရာဇိကံ အာပန္နော၊ အယံ သင်္ဃာဒိသေသံ အာပန္နော’’တိအာဒိနာ နယေန အာပတ္တိမတ္တံ အာရောစေန္တဿ စ။ ဘိက္ခုသမ္မုတိယာတိ ဧတ္ထ ဝတ္ထုနာ ဃဋေတွာ အာပတ္တိံ အာရောစေန္တဿာတိ ဂဟေတဗ္ဗံ။ ‘‘တထာ’’တိ ဣမိနာ ‘‘အနာပတ္တီ’’တိ ဧတံ ပရာမသတိ။

ဒုဋ္ဌုလ္လာရောစနကထာဝဏ္ဏနာ။

၉၄၈။ အကပ္ပိယံ ပထဝိန္တိ ပဒဘာဇနေ ‘‘ဒွေ ပထဝိယော ဇာတာ စ ပထဝီ အဇာတာ စ ပထဝီ’’တိ (ပါစိ။ ၈၆) ဥဒ္ဒိသိတွာ –

‘‘ဇာတာ နာမ ပထဝီ သုဒ္ဓပံသု သုဒ္ဓမတ္တိကာ အပ္ပပါသာဏာ အပ္ပသက္ခရာ အပ္ပကထလာ အပ္ပမရုမ္ဗာ အပ္ပဝါလိကာ ယေဘုယျေနပံသုကာ ယေဘုယျေနမတ္တိကာ၊ အဒဍ္ဎာပိ ဝုစ္စတိ ဇာတာ ပထဝီ။ ယောပိ ပံသုပုဉ္ဇော ဝါ မတ္တိကာပုဉ္ဇော ဝါ အတိရေကစာတုမာသံ ဩဝဋ္ဌော၊ အယမ္ပိ ဝုစ္စတိ ဇာတာ ပထဝီ’’တိ (ပါစိ။ ၈၆) စ၊

‘‘အဇာတာ နာမ ပထဝီ သုဒ္ဓပါသာဏာ သုဒ္ဓသက္ခရာ သုဒ္ဓကထလာ သုဒ္ဓမရုမ္ဗာ သုဒ္ဓဝါလိကာ အပ္ပပံသု အပ္ပမတ္တိကာ ယေဘုယျေနပါသာဏာ ယေဘုယျေနသက္ခရာ ယေဘုယျေနကထလာ ယေဘုယျေနမရုမ္ဗာ ယေဘုယျေနဝါလိကာ၊ ဒဍ္ဎာပိ ဝုစ္စတိ အဇာတာ ပထဝီ။ ယောပိ ပံသုပုဉ္ဇော ဝါ မတ္တိကာပုဉ္ဇော ဝါ ဦနစာတုမာသံ ဩဝဋ္ဌော၊ အယမ္ပိ ဝုစ္စတိ အဇာတာ ပထဝီ’’တိ (ပါစိ။ ၈၆) စ –

နိဒ္ဒိဋ္ဌာသု ဒွီသု ပထဝီသု ဇာတပထဝိသင်္ခါတံ အကပ္ပိယပထဝိံ။

ဧတ္ထ ပါသာဏာဒီနံ လက္ခဏံ အဋ္ဌကထာယံ ‘‘မုဋ္ဌိပ္ပမာဏတော ဥပရိ ပါသာဏာတိ ဝေဒိတဗ္ဗာ၊ မုဋ္ဌိပ္ပမာဏာ သက္ခရာ။ ကထလာတိ ကပါလခဏ္ဍာနိ။ မရုမ္ဗာတိ ကဋသက္ခရာ။ ဝါလိကာတိ ဝါလုကာယေဝါ’’တိ ဝုတ္တနယေနေဝ ဝေဒိတဗ္ဗံ။ ယေဘုယျေနပံသုကာဒီနံ လက္ခဏံ ‘‘ယေဘုယျေနပံသုကာတိ တီသု ကောဋ္ဌာသေသု ဒွေ ကောဋ္ဌာသာ ပံသု၊ ဧကော ပါသာဏာဒီသု အညတရော ကောဋ္ဌာသော’’တိ (ပါစိ။ အဋ္ဌ။ ၈၆) စ ‘‘အဒဍ္ဎာပီတိ ဥဒ္ဓနပတ္တပစနကုမ္ဘကာရာဝါပါဒိဝသေန တထာ တထာ အဒဍ္ဎာ’’တိအာဒိ အဋ္ဌကထာတော စ ဝေဒိတဗ္ဗံ။ ‘‘အပ္ပပံသုအပ္ပမတ္တိကာ’’တိ ဒွီသုပိ ပဒေသု နိဒ္ဒေသရူပေန ယေဘုယျေနပါသာဏာဒိပဒပဉ္စကံ ဝုတ္တံ၊ တတ္ထာပိ အတ္ထော ယေဘုယျေနပံသုပဒါဒီသု ဝုတ္တဝိပလ္လာသေန ဝေဒိတဗ္ဗော။ ယထာဟ အဋ္ဌကထာယံ ‘‘တေသံယေဝ ဟိ ဒွိန္နံ ပဘေဒဒဿနမေတ’’န္တိ (ပါစိ။ ၈၆)။

ခဏေယျ ဝါတိ ဧဝရူပံ အကပ္ပိယပထဝိပဒေသံ အန္တမသော ပါဒင်္ဂုဋ္ဌေနာပိ သမ္မုဉ္ဇနိသလာကာယပိ သယံ ဝါ ခဏတိ။ ခဏာပေယျ ဝါတိ အညေန ဝါ ‘‘ဣဒံ ခဏာဟီ’’တိအာဒိနာ အကပ္ပိယဝေါဟာရေန ခဏာပေယျ။ ဘေဒါပေယျာတိ တထေဝ ဘေဒါပေယျ။ ဘိန္ဒေယျ ဝါတိ ပဿာဝဓာရာဒီဟိပိ ဘိန္ဒေယျ။ အဓိကာရဝသေန ဝါ-သဒ္ဒဿ သဗ္ဗကိရိယာပဒေဟိ သမ္ဗန္ဓော လဗ္ဘတီတိ ဘေဒါပေယျ စာတိ ဧတ္ထ စ-သဒ္ဒေါ ဣဓ အဝုတ္တဿ ‘‘ဒဟတိ ဝါ၊ ဒဟာပေတိ ဝါ’’တိ ပဒဒွယဿ သမုစ္စယကောတိ ဝေဒိတဗ္ဗော။ အန္တမသော ပတ္တမ္ပိ ပစန္တော သယံ ဝါ ဒဟတိ၊ အညေန ဝါ ဒဟာပေတီတိအာဒိ ဣမေသံ ပဒါနံ အဋ္ဌကထာဝသေန (ပါစိ။ အဋ္ဌ။ ၈၇) ဝေဒိတဗ္ဗံ။ ပါစိတ္တိယံ သိယာတိ ခဏန္တဿ၊ ဘိန္ဒန္တဿ စ ပဟာရေ ပဟာရေ ပါစိတ္တိယံ။

၉၄၉။ အာဏာပေန္တဿ အာဏတ္တိဂဏနာယ၊ ဒဟန္တဿ အဂ္ဂိပါတဂဏနာယ ဟောတီတိ ဣဒံ ‘‘ပဟာရေ ပဟာရေ ပါစိတ္တိယ’’န္တိအာဒိအဋ္ဌကထာဝစနဝသေန ဝေဒိတဗ္ဗံ၊ ဣမမေဝ ဒဿေတုမာဟ ‘‘သယမေဝါ’’တိအာဒိ။

၉၅၀။ အာဏာပေန္တဿာတိ သကိံ အာဏာပေန္တဿ။

၉၅၁။ ‘‘ခဏာပေယျာ’’တိ သာမညဝစနဿ အပဝါဒဒဿနတ္ထံ ‘‘ခဏ ပေါက္ခရဏိ’’န္တိအာဒိမာဟ။ ကောစိ ဒေါသော န ဝိဇ္ဇတီတိ ဧတ္ထ ပေါက္ခရဏိအာဝါဋာဒိသဒ္ဒါနံ ပထဝိပရိယာယတ္တာဘာဝတော ဧဝံဝစနေန အနာပတ္တီတိ အဓိပ္ပာယော။

၉၅၂။ ‘‘ဣမံ ဣဓာ’’တိအာဒီနံ ပဒါနံ ပစ္စက္ခဘူတာဓိပ္ပေတဘူမိဝါစကတ္တာ တေဟိ ယောဇေတွာ ဝုတ္တဿ တဿေဝ ပယောဂဿ အာပတ္တိကရဘာဝံ ဒဿေတုမာဟ ‘‘ဣမ’’န္တိအာဒိ။

၉၅၃။ ကန္ဒန္တိ တာလာဒိကန္ဒံ။ ကုရုန္ဒန္တိ ကုလစောစရုက္ခံ။ ထူဏန္တိ ထမ္ဘံ။ ခါဏုကန္တိ သာခါဝိဋပရဟိတံ ရုက္ခာဝယဝံ။ မူလန္တိ ပထဝိယာ သုပ္ပတိဋ္ဌိတဘာဝကရံ ရုက္ခာဝယဝံ။ ဝဋ္ဋတီတိ အနိယမေတွာ ဝစနေန အနာပတ္တိဘာဝတော ဝဋ္ဋတိ။

၉၅၄။ ဣမန္တိ ပစ္စက္ခပရာမာသပဒေန နိယမေတွာ ဝစနတော အာပတ္တိ ဟောတီတိ အာဟ ‘‘နိယမေတွာန ဝတ္တုံ ပန န ဝဋ္ဋတီ’’တိ။

၉၅၅။ ဃဋေဟိ ဥဿိဉ္စိတုန္တိ ဃဋေဟိ ဂဟေတွာ အဝသိဉ္စိတုံ။ တနုကဒ္ဒမောတိ ဇမ္ဗာလော။ ဗဟလံ ကဒ္ဒမံ ဘိက္ခုနာ အပနေတုံ န စ ဝဋ္ဋတီတိ ယောဇေတဗ္ဗံ။

၉၅၆။ နဒိယာဒီနန္တိ ဧတ္ထ အာဒိ-သဒ္ဒေန ဂင်္ဂါကန္ဒရာဒီနံ ဂဟဏံ။ ‘‘တဋ’’န္တိ ဣမိနာ သမ္ဗန္ဓော။ ဝဋ္ဌန္တိ ဝုဋ္ဌီဟိ ဩဝဋ္ဌဉ္စ။ စာတုမာသန္တိ ဝိကောပနကိရိယာယ အစ္စန္တသံယောဂေ ဥပယောဂဝစနံ၊ စာတုမာသဗ္ဘန္တရေ ဝိကောပေတုံ ဝဋ္ဋတီတိ အတ္ထော။

၉၅၇။ သစေ တောယသ္မိံ ပတတိ တဋန္တိ ယောဇနာ၊ သစေ ကူလံ ဘိဇ္ဇိတွာ အန္တောဥဒကေ ပတတီတိ။ ဒေဝေ ဝုဋ္ဌေပီတိ ပဇ္ဇုန္နဒေဝေ ဝုဋ္ဌေပိ။ ဝုဋ္ဌ-သဒ္ဒေါ ကတ္တုသာဓနော။ စာတုမာသမတိက္ကန္တေပီတိ ယောဇနာ။ တတ္ထ ဟေတုဒဿနတ္ထမာဟ ‘‘တောယေ ဒေဝေါ ဟိ ဝဿတီ’’တိ။

၉၅၈။ သောဏ္ဍိန္တိ ပါသာဏပေါက္ခရဏိံ။ တတ္ထ တူတိ ဥဒကရဟိတေ တသ္မိံ သောဏ္ဍိအာဝါဋေ။

၉၅၉။ အန္တောစာတုမာသံ သောဓေတုံ ဘိန္ဒိတုန္တိ ယောဇနာ။ ‘‘သောဓေတုံ ဘိန္ဒိတုံ ဝိကောပေတု’’န္တိ ကိရိယာပဒေဟိ ‘‘ရဇ’’န္တိ ကမ္မပဒံ အာနေတွာ သမ္ဗန္ဓိတဗ္ဗံ။ တံ ရဇောရာသိံ ဒေဝေ ဝုဋ္ဌေ ပစ္ဆာ ဥဒကဿ ဆိန္နတ္တာ ဗဟလဘူမိသုက္ခမ္ပိ ဝုဋ္ဌိပါတဒိဝသတော ပဋ္ဌာယ အန္တောစာတုမာသေ ကောပေတုံ ဘိန္ဒိတုံ ဝဋ္ဋတီတိ အတ္ထော။

၉၆၀။ ပုဏ္ဏေ သောဏ္ဍိမှိ တံ ရဇံ ဝိကောပေတုံ ဝဋ္ဋတိ စာတုမာသတော ဥဒ္ဓန္တိ ယောဇနာ။

၉၆၁။ ‘‘ဖုသာယန္တေ’’တိ ဧတေန ‘‘ဒေဝေါ’’တိ ဣဒံ ဘုမ္မဝသေန ဝိပရိဏာမေတွာ ‘‘ဒေဝေ ဖုသာယန္တေ’’တိ ယောဇေတဗ္ဗံ၊ ပဇ္ဇုန္နဒေဝေ ဝုဋ္ဌိပါတံ ကရောန္တေတိ အတ္ထော။ ပိဋ္ဌိပါသာဏကေတိ ပါသာဏပိဋ္ဌေ။ တမ္ပီတိ တထာ ပါသာဏပိဋ္ဌေ လဂ္ဂံ တမ္ပိ ရဇံ။

၉၆၂။ အကတပဗ္ဘာရော နာမ ယထာ ဟေဋ္ဌာဘာဂေါ ဝုဋ္ဌိဖုသိတေဟိ န တေမီယတိ၊ တထာ နမိတွာ ဌိတပဗ္ဗတပ္ပဒေသော။ ဣဒံ အနောဝဿကဋ္ဌာနေ ဥဋ္ဌိတဝမ္မိကာနံ ဥပလက္ခဏံ။

၉၆၃။ အဗ္ဘောကာသေ ဝုဋ္ဌိတော ဝမ္မိကော သစေ ဩဝဋ္ဌော၊ ကံ စာတုမာသံ ဝိကောပေတုံ ဝဋ္ဋတီတိ သမ္ဗန္ဓော။ စာတုမာသန္တိ ဝိကောပနကိရိယာယ အစ္စန္တသံယောဂေ ဥပယောဂဝစနံ။ ရုက္ခေတိ စ ထမ္ဘပါသာဏာဒီနံ ဥပလက္ခဏံ။ ဥပစိကာဒီနန္တိ အာဒိ-သဒ္ဒေန ကာဠကိပိလ္လိကာဒီနံ ဂဟဏံ။ သော နယောတိ ‘‘ဩဝဋ္ဌဒိဝသတော ဥတ္တရိ စာတုမာသဗ္ဘန္တရေ ကောပေတုံ ဝဋ္ဋတီ’’တိ ယထာဝုတ္တော နယော။

၉၆၄။ မူသိကုက္ကိရံ နာမ မူသိကာဟိ ဥဒ္ဓဋပံသု။ မူသိကာနံ ဥက္ကိရော မူသိကုက္ကိရောတိ ဝိဂ္ဂဟော။ ဂေါကဏ္ဋကံ နာမ ဂုန္နံ ခုရာနံ ဥဋ္ဌိတမတ္တိကာ။ ဂဏ္ဍုပ္ပာဒမလံ နာမ ဘူလတာယ မလမတ္တိကာ။ သမ္ဗန္ဓံ ပန ပကတိဘူမိံ အကောပေန္တေန မတ္ထကတော ဂဏှိတုံ ဝဋ္ဋတိ။

၉၆၅။ ကသီတိ ကသိတဋ္ဌာနံ၊ တတ္ထ နင်္ဂလေန ဥဒ္ဓဋမတ္တိကာ ကသိနင်္ဂလမတ္တိကာ။ ‘‘အစ္ဆိန္နာ’’တိဣမိနာ ခဏ္ဍာခဏ္ဍိကံ ကတွာ အာယတံ ဟုတွာ ဌိတမတ္တိကာပဋလမ္ပိ အဇာတပထဝီ သိယာတိ အာသင်္ကာနိဝတ္တနတ္ထမာဟ ‘‘ဘူမိသမ္ဗန္ဓာ’’တိ။ သာတိ ကသိနင်္ဂလမတ္တိကာ။

၉၆၆။ သေနာသနန္တိ ဧတ္ထ ‘‘ပုရာဏ’’န္တိ ပါဌသေသော ဂဟေတဗ္ဗော။ ဩဝဋ္ဌံ စာတုမာသတော ဥဒ္ဓံ န ဝိကောပယေတိ ယောဇနာ။

၉၆၇။ တတောတိ ဩဝဋ္ဌဒိဝသတော ပဋ္ဌာယ စာတုမာသာတိက္ကန္တဂေဟတော။ ‘‘ဂေါပါနသိ’’န္တိ ဣမိနာ ဂေါပါနသိမတ္ထကေ ဌိတဥပစိကာပံသုမှိ ဘိဇ္ဇန္တေပိ အနာပတ္တိဘာဝံ ဒီပေတိ။ ‘‘ဘိတ္တိ’’န္တိ ဣမိနာ တဒေကဒေသံ ဘိတ္တိပါဒါဒိဒါရုမာဟ။ ဣဒမ္ပိ ဘိတ္တိမတ္တိကံ ဥပစိကာမတ္တိကံ သန္ဓာယ ဝုတ္တံ။ ‘‘ထမ္ဘ’’န္တိ ဣဒမ္ပိ တံသမ္ဗန္ဓပါကာရဘူမိမတ္တိကာဥပစိကာဒိပံသုံ သန္ဓာယ ဝုတ္တံ။ ပဒရတ္ထရန္တိ အတ္ထတပဒရံ။ ဣဒမ္ပိ ပဒရာနံ ဥပရိ မတ္တိကာဥပစိကာပံသုံ သန္ဓာယ ဝုတ္တံ။ ‘‘ဂေါပါနသိ’’န္တိအာဒီဟိ ပဒေဟိ ‘‘ဂဏှိဿာမီ’’တိ ပစ္စေကံ ယောဇနီယံ။ ‘‘ဂဏှိဿာမီ’’တိ ဣမိနာ ဝိကောပနာဓိပ္ပာယာဘာဝံ ဒီပေတိ။

၉၆၈။ ဂဏှန္တဿာတိ ဧတ္ထ အနာဒရေ သာမိဝစနံ၊ ‘‘သုဒ္ဓစိတ္တေနာ’’တိ ပါဌသေသော။ ဣဋ္ဌကာတိ ဆဒနိဋ္ဌကာ။ အာဒိ-သဒ္ဒေန ပါသာဏသမုဒ္ဒဖေဏာဒီနံ ဂဟဏံ။ ပတတီတိ သုဒ္ဓစိတ္တေန ဂဏှန္တေ သစေ မတ္တိကာ ဆိဇ္ဇိတွာ ပတတိ၊ အနာပတ္တီတိ အတ္ထော။ မတ္တိကန္တိ ဘိတ္တိယံ၊ ဆဒနေ စ စာတုမာသာဓိကောဝဋ္ဌမတ္တိကံ၊ အနောဝဋ္ဌံ စေ၊ ဂဏှိတုံ ဝဋ္ဋတီတိ။ ယထာဟ အဋ္ဌကထာယံ ‘‘သစေ ယာ ယာ အတိန္တာ၊ တံ တံ ဂဏှာတိ၊ အနာပတ္တီ’’တိ (ပါစိ။ အဋ္ဌ။ ၈၆)။ ယဒိ ဂဏှတိ၊ အာပတ္တိ သိယာတိ ယောဇနာ။

၉၆၉။ အတိန္တောတိ ဝဿောဒကေန အတိန္တော၊ ဣမိနာ ဝိနိစ္ဆိတဗ္ဗဝတ္ထုံ ဒဿေတိ။ တဿ အန္တောဂေဟေ စ ဗဟိ စ သမ္ဘဝတော အန္တောဂေဟေ ဌိတဿ တာဝ ဝိနိစ္ဆယံ ဒဿေတုမာဟ ‘‘အန္တောဂေဟေ သစေ သိယာ’’တိ။ ဝဿောဒကေန တိန္တာတိန္တေသု ဒွီသု မတ္တိကာပုဉ္ဇေသု အတိန္တံ တာဝ ဒဿေတုမာဟ ‘‘အနောဝဋ္ဌော စာ’’တိ။

၉၇၀။ ဝဿောဒကေန တိန္တေ ဝိနိစ္ဆယံ ဒဿေတုမာဟ ‘‘ဝုဋ္ဌေ ပုန စာ’’တိအာဒိ။ ‘‘ဝုဋ္ဌေ’’တိ ဣမိနာ ‘‘မတ္တိကာပုဉ္ဇော’’တိ ပဒံ ဘုမ္မဝသေန ဝိပရိဏာမေတွာ ဝုဋ္ဌေ မတ္တိကာပုဉ္ဇေတိ ယောဇေတဗ္ဗံ၊ ‘‘ဧကဒိဝသမ္ပီ’’တိ သေသော၊ ဂေဟသ္မိန္တိ ဧတ္ထ ‘‘ဌိတေ’’တိ ဝတ္တဗ္ဗံ၊ ဂေဟသ္မိံ ဌိတေ မတ္တိကာပုဉ္ဇေ ဝဿောဒကေန ဧကဒိဝသမ္ပိ တိန္တေတိ ဝုတ္တံ ဟောတိ။ ဝက္ခမာနနယေန အညတ္ထ ပဟရိတွာ ဥဋ္ဌိတေန တေန အတေမိတွာ ဥဇုကံ ပတိတေဟိ ဝဿဖုသိတေဟိ တိန္တေတိ ဂဟေတဗ္ဗံ။ သစေ သဗ္ဗော တိန္တော ဟောတီတိ ယောဇနာ။ ‘‘မတ္တိကာပုဉ္ဇော’’တိ ဣမိနာ သမ္ဗန္ဓော။

၉၇၁။ ‘‘သဗ္ဗော’’တိ ဣမိနာ ဝိသေသနေန ဗျဝစ္ဆိန္နံ ဧကဒေသတိန္တေ ဝိနိစ္ဆယံ ဒဿေတုမာဟ ‘‘ယတ္တက’’န္တိအာဒိ။ တု-သဒ္ဒေါ ဣမမေဝ ဝိသေသံ ဇောတေတိ။ ယတ္တကန္တိ ဟေဋ္ဌာ အနောတရိတွာ မတ္ထကတော၊ ပရိယန္တကတော စ ယတ္တကပ္ပမာဏံ။ တတ္ထာတိ မတ္တိကာပုဉ္ဇေ။ ‘‘အကပ္ပိယ’’န္တိ ဧတဿ ‘‘စာတုမာသစ္စယေနာ’’တိ အနုဝတ္တတိ။ ‘‘အတိန္တံ…ပေ… ကပ္ပိယ’’န္တိ ဣမိနာ အကပ္ပိယဋ္ဌာနံ ပရိဟရိတွာ ဝါ ကပ္ပိယကာရကေဟိ ကပ္ပိယဝစနေန ဟရာပေတွာ ဝါ အတိန္တံ ဌာနံ ယထာကာမံ ဝဠဉ္ဇေတဗ္ဗန္တိ အယမတ္ထော ဒဿိတော ဟောတိ။ ယထာဟ အဋ္ဌကထာယံ ‘‘ကပ္ပိယကာရကေဟီ’’တိအာဒိ (ပါစိ။ အဋ္ဌ။ ၈၆)။

၉၇၂။ ဝါရိနာတိ ဥဇုကံ အာကာသတော ပတိတဝဿောဒကေန။ အညတ္ထ ပဟရိတွာ တတ္ထ ပတိတွာ တေမိတေ ဝဋ္ဋတိ။ သော မတ္တိကာပုဉ္ဇော။ တတော ပရန္တိ ဧကာဗဒ္ဓကာလတော ဥတ္တရိံ သော မတ္တိကာပုဉ္ဇော ဝါရိနာ တေမိတော ဘူမိယာ ဧကာဗဒ္ဓါ စေ ဟောတိ၊ တတော ပရံ သာ ဇာတာ ပထဝီ ဧဝ၊ ကောပေတုံ န ဝဋ္ဋတီတိ ယောဇနာ။

၉၇၃။ ‘‘ဩဝဋ္ဌော’’တိ ဣမိနာ အနောဝဋ္ဌပါကာရော ကပ္ပိယောတိ ဗျတိရေကဝသေန ဒဿေတိ။ ‘‘မတ္တိကာမယော’’တိ ဝိသေသနေန ဣဋ္ဌကပါကာရာဒိံ ဗျဝစ္ဆိန္ဒတိ။ တဿ ပန ကပ္ပိယဘာဝံ ဝက္ခတိ ‘‘သစေ ဣဋ္ဌကပါကာရော’’တိအာဒိနာ။ ‘‘စာတုမာသစ္စယေ’’တိ ဣမိနာ တတော အန္တော ဝိကောပနီယဘာဝံ ဒဿေတိ။

၉၇၄။ တတ္ထာတိ ဩဝဋ္ဌေ မတ္တိကပါကာရေ။ အဃံသန္တောဝါတိ ပါကာရမတ္တိကံ အကောပေန္တော။ မတ္တသော ဆုပိတွာတိ ပမာဏတော မုဒုကံ ကတွာ ဟတ္ထတလံ ဌပေတွာ။ အလ္လဟတ္ထေနာတိ ဥဒကတိန္တေန ဟတ္ထတလေန။ ဟတ္ထေကဒေသော ဟတ္ထော နာမ။

၉၇၅။ ယေဘုယျကထလေဌာနေတိ ပုဗ္ဗေ ဝုတ္တနယေန ယဿာ တီသု ဘာဂေသု ဒွေ ဘာဂါ ကထလာ ဟောန္တိ၊ တာဒိသေ ကပ္ပိယပထဝိဋ္ဌာနေ။

၉၇၆။ အဗ္ဘောကာသေတိ ဥပလက္ခဏတ္တာ အန္တောဂေဟေပိ ထမ္ဘံ စာလေတွာ ဇာတပထဝိံ ဝိကောပေတုံ န ဝဋ္ဋတီတိ ဒဋ္ဌဗ္ဗံ။ ဒွီသုပိ ဌာနေသု သုဒ္ဓစိတ္တေန နိဒ္ဒေါသဘာဝံ ယထာဝုတ္တေန ‘‘ထမ္ဘံ ဝါ ပဒရတ္ထရံ။ ဂဏှိဿာမီ’တိ သညာယ၊ ဂဟေတုံ ပန ဝဋ္ဋတီ’’တိ ဣမိနာ နယေနာဟ။ ပထဝိန္တိ အကပ္ပိယပထဝိံ။

၉၇၇။ ဥဇုမုဒ္ဓရတော န ဒေါသောတိ ယောဇနာ။

၉၇၈။ ဥစ္စာလေတွာတိ ဥက္ခိပိတွာ စာလေတွာ ပရိဝတ္တေတွာ။ ပဝဋ္ဋတီတိ ပဝဋ္ဋေတွာ ပဝဋ္ဋေတွာ နေတီတိ အတ္ထော။ သုဒ္ဓစိတ္တဿာတိ ‘‘ဘူမိ ဘိဇ္ဇတီ’’တိ အသလ္လက္ခေတွာ ‘‘ပါသာဏံ ပဝဋ္ဋေတွာ ပဝဋ္ဋေတွာ ဟရိဿာမီ’’တိ သုဒ္ဓစိတ္တဝတော။

၉၇၉။ ဘူမိယံ ဒါရူနိ ဖာလေန္တာနမ္ပိ ဘူမိယံ သာခါဒီနိ ကဍ္ဎတော စာတိ ယောဇနာ။

၉၈၀။ ကဏ္ဋကန္တိ ရုက္ခကဏ္ဋကံ၊ မစ္ဆကဏ္ဋကဉ္စ။ သူစိ နာမ အယောမယဒန္တမယတမ္ဗမယကဋ္ဌမယာဒိသူစီနံ အညတရာ။ အဋ္ဌိံ ဝါတိ ဂေါမဟိံသာဒီနံ အဋ္ဌိံ ဝါ။ ဟီရံ ဝါတိ နာဠိကေရာဒိဟီရံ ဝါ။ အာကောဋေတုန္တိ ယထာ ဧကကောဋိ ဘူမိံ ပဝိသတိ၊ တထာ တာဠေတုံ။ ပဝေသေတုန္တိ ဘူမိံ ဂမယိတုံ။

၉၈၁။ ပဿာဝံ မုတ္တံ။ မေဒနိန္တိ ဧတ္ထ အကပ္ပိယပထဝိမာဟ။ ဘိန္ဒိဿာမီတိ ဧတ္ထ ‘‘ဧဝံ စိန္တေတွာ’’တိ သေသော။

၉၈၂။ ကရောန္တဿာတိ သုဒ္ဓစိတ္တေန ပဿာဝံ ကရောန္တဿာတိယောဇေတဗ္ဗံ။ ‘‘သမ္မဇ္ဇတော’’တိ ဣဒံ ‘‘သမ္မဇ္ဇန္တေနာ’’တိ ဂဟေတဗ္ဗံ ၊ ‘‘သမ္မဇ္ဇနိယာ’’တိ သေသော၊ အနန္တရံ မေဒနီပဒံ ဥပယောဂဝသေန ‘‘မေဒနိ’’န္တိ ဂဟေတဗ္ဗံ၊ ‘‘ဝိသမ’’န္တိ သေသော၊ ‘‘သမံ ကာတု’’န္တိ ဣမိနာ ယောဇေတဗ္ဗံ၊ သမ္မဇ္ဇန္တေန ဥစ္စဋ္ဌာနံ မဒ္ဒိတွာ၊ အာဝါဋဋ္ဌာနံ ပဝေသေတွာ သမံ ကာတုံ သမ္မဇ္ဇနိယာ ဃံသေတုံ န ဝဋ္ဋတီတိ အတ္ထော။ ယထာဟ အဋ္ဌကထာယံ ‘‘ဝိသမံ ဘူမိံ သမံ ကရိဿာမီတိ သမ္မဇ္ဇနိယာ ဃံသိတုမ္ပိ န ဝဋ္ဋတီ’’တိ (ပါစိ။ အဋ္ဌ။ ၈၆)။

၉၈၃။ ပါဒင်္ဂုဋ္ဌေန ဝါတိ ဧတ္ထ သမုစ္စယတ္ထေန ဝါ-သဒ္ဒေန အဋ္ဌကထာယံ ဝုတ္တံ ‘‘ကတ္တရယဋ္ဌိယာ ဘူမိံ ကောဋ္ဋေန္တီ’’တိ ဣဒံ သင်္ဂဏှာတိ။ လိခိတုမ္ပီတိ ရာဇိံ ကာတုမ္ပိ ဘူမိံ ဘိန္ဒန္တေနာတိ ယောဇနာ။ ပါဒေဟီတိ ပါဒတလေဟိ။

၉၈၅။ ဘူမိန္တိ အကပ္ပိယဘူမိံ။ ဒဟတိ ဒဟာပေတီတိ ဧတ္ထ ‘‘ယော’’တိ စ ‘‘တဿာ’’တိ စ သမ္ဗန္ဓဝသေန လဗ္ဘတိ။ ပတ္တံ ဒဟန္တဿာတိ ဆဝိယာ ထိရဘာဝတ္ထံ ဓူမံ ဂါဟာပေတွာ တိဏုက္ကာဒီဟိ ပတ္တံ ဂဏှန္တဿ။

၉၈၆။ တတ္တကာနေဝါတိ ဌာနပ္ပမာဏာနေဝ။ ဣဓာပိ ‘‘ယော’’တိ စ ‘‘တဿာ’’တိ စ သာမတ္ထိယာ လဗ္ဘတိ။

၉၈၇။ ဘူမိယန္တိ အကပ္ပိယဘူမိယံ။ ပတ္တံ ပစီယတိ ဧတ္ထာတိ ပတ္တပစနံ၊ ကပါလံ၊ တသ္မိံ ကပါလေ။

၉၈၈။ သော အဂ္ဂိ တာနိ ဒါရူနိ ဒဟန္တော ဂန္တွာ စေ ဧကံသေန ဘူမိံ ဒဟတိ၊ တသ္မာ ဒါရူနံ ဥပရိ အဂ္ဂိံ ဌပေတုံ န ဝဋ္ဋတီတိ ယောဇနာ။

၉၈၉။ ဣဋ္ဌကာ အာဝပီယန္တိ ပစ္စန္တိ ဧတ္ထာတိ ဣဋ္ဌကာဝါပေါ၊ သော ဧဝ ဣဋ္ဌကာဝါပကော၊ ဣဋ္ဌကာပစနဋ္ဌာနံ။ အာဒိ-သဒ္ဒေန ကုမ္ဘကာရာဝါပါဒိံ သင်္ဂဏှာတိ။

၉၉၀။ ဥပါဒီယတီတိ ဥပါဒါနံ၊ ဣန္ဓနံ၊ န ဥပါဒါနံ အနုပါဒါနံ၊ ဣန္ဓနတော အညံ၊ တတော အနုပါဒါနတောတိ အတ္ထော။ ခါဏုကေတိ မတခါဏုကေ စ သုက္ခရုက္ခေ စ ဘူမိဂတံ အဒတွာ ‘‘နိဗ္ဗာပေဿာမီ’’တိ အဂ္ဂိဒါနံ ဝဋ္ဋတိ။ ပစ္ဆာ ဥဿာဟေ ကတေပိ န နိဗ္ဗာယတိ၊ န ဒေါသောတိ။ ယထာဟ အဋ္ဌကထာယံ ‘‘သစေ ပန ဘူမိံ အပ္ပတ္တမေဝါ’’တိအာဒိ (ပါစိ။ အဋ္ဌ။ ၈၇)။

၉၉၁။ တိဏုက္ကန္တိ တိဏေန ဗဒ္ဓဥက္ကံ။ တိဏုက္ကန္တိ ဥပလက္ခဏံ။ နာဠိကေရပဏ္ဏာဒီဟိ ဗဒ္ဓါပိ သင်္ဂယှန္တိ။

၉၉၂။ တဿ အဂ္ဂိဿ ပတိတဋ္ဌာနေ ဣန္ဓနံ ဒတွာ ပုန တံ အဂ္ဂိံ ကာတုံ ဝဋ္ဋတီတိ မဟာပစ္စရိယံ ရုတံ ကထိတန္တိ ယောဇနာ။

၉၉၃။ ‘‘တဿ အပထဝိယ’’န္တိ ပဒစ္ဆေဒေါ။ ဝိမတိဿုဘယတ္ထာပီတိ ပထဝိအပထဝိဒွယေပိ ဝေမတိကဿ။ တတ္ထ ဇာတာ ပထဝီ၊ ဣတရာ အပထဝီ။

၉၉၄။ ဣမန္တိ အာဝါဋံ၊ မတ္တိကံ၊ ပံသုံ ဝါ။

ပထဝီခဏနကထာဝဏ္ဏနာ။

မုသာဝါဒဝဂ္ဂေါ ပဌမော။

၉၉၅။ ဘဝန္တဿာတိ ဇာယန္တဿ၊ ဝဍ္ဎမာနဿ စ။ ဘူတဿာတိ ဇာတဿ၊ ဝဍ္ဎိတဿ စာတိ အတ္ထော။ ယထာဟ အဋ္ဌကထာယံ ‘‘ဘဝန္တိ အဟုဝုဉ္စာတိ ဘူတာ၊ ဇာယန္တိ ဝဍ္ဎန္တိ၊ ဇာတာ ဝဍ္ဎိတာ စာ’’တိ (ပါစိ။ အဋ္ဌ။ ၉၀)။ ဧတ္ထ စ ‘‘ဘဝန္တီ’’တိ ဣမိနာ ဝိရုဠှမူလေ နီလဘာဝံ အာပဇ္ဇိတွာ ဝဍ္ဎမာနကေ တရုဏဂစ္ဆေ ဒဿေတိ။ ‘‘အဟုဝု’’န္တိ ဣမိနာ ပန ဝဍ္ဎိတွာ ဌိတေ မဟန္တေ ရုက္ခဂစ္ဆာဒိကေ ဒဿေတိ။ ‘‘ဘဝန္တီ’’တိ ဣမဿ ဝိဝရဏံ ‘‘ဇယန္တိ ဝဍ္ဎန္တီ’’တိ၊ ‘‘အဟုဝု’’န္တိ ဣမဿ ‘‘ဇာတာ ဝဍ္ဎိတာ’’တိ။ ဧဝံ ဘူတ-သဒ္ဒေါ ပစ္စုပ္ပန္နာတီတဝိသယောတိ ဒဿေတိ။ ‘‘ဘဝန္တဿ ဘူတဿာ’’တိ ဣမိနာ ပဒဒွယေန ‘‘ဘူတဂါမဿာ’’တိ ပဒဿ တုလျာဓိကရဏတာဒဿနေန ဂါမ-သဒ္ဒဿ ဒိဋ္ဌိဂတဝနန္တာဒိသဒ္ဒါနံ ဒိဋ္ဌိဝနာဒိသဒ္ဒတ္ထေ ဝိယ ဘူတသဒ္ဒတ္ထေ ဝုတ္တိပက္ခမာဟ။ ယထာဟ အဋ္ဌကထာယံ (ပါစိ။ အဋ္ဌ။ ၉၀) ‘‘ဘူတာ ဧဝ ဝါ ဂါမော ဘူတဂါမော၊ ပတိဋ္ဌိတဟရိတတိဏရုက္ခာဒီနမေတံ အဓိဝစန’’န္တိ။ ဘူတာနံ ဒေဝတာနံ ဂါမော နိဝါသောတိ ဝါ ဘူတဂါမော။ ဘူမိယံ ပတိဋ္ဌဟိတွာ ဟိ ဟရိတဘာဝမာပန္နာ တိဏရုက္ခဂစ္ဆာဒယော ဒေဝတာဟိ ပရိဂယှန္တီတိ။ ဇာယန္တဿ ဝဍ္ဎန္တဿ ဝါ သမ္ပတ္တဝုဒ္ဓိမရိယာဒဿ ဝါ ရုက္ခာဒိနောတိ အတ္ထော။

ပါတဗျတာနိမိတ္တန္တိ ဧတ္ထ ပါတဗျဘာဝေါ ပါတဗျတာ၊ ‘‘ဆေဒနဘေဒနာဒီဟိ ယထာရုစိ ပရိဘုဉ္ဇိတဗ္ဗတာတိ အတ္ထော’’တိ အဋ္ဌကထာဝစနတော ပါတဗျတာ-သဒ္ဒဿ ပရိဘုဉ္ဇိတဗ္ဗတာတိ အတ္ထော ဝေဒိတဗ္ဗော၊ သာ နိမိတ္တံ ဟေတု ယဿ ပါစိတ္တိယဿ တံ ပါတဗျတာနိမိတ္တံ။ ရုက္ခာဒီနံ ဆေဒနဖာလနာဒိဝသေန ဝိကောပနီယတာသင်္ခါတပါတဗျတာနိမိတ္တံ ပရိဘုဉ္ဇိတဗ္ဗတာဟေတု ပါစိတ္တိယံ ဥဒီရိတံ ဝုတ္တန္တိ အတ္ထော။

၉၉၆-၇။ သောတိ ဘူတဂါမော။ တိလဗီဇာဒိကောတိ တိလဗီဇမေတ္ထ သုခုမပဏ္ဏသေဝါလာဒိကော။ အာဒိ-သဒ္ဒေန စ တာဒိသာ ဣတရာ သေဝါလဇာတိ ဂဟိတာ။ ‘‘ဥပရိ ခုဒ္ဒါနုခုဒ္ဒကပဏ္ဏင်္ကုရော၊ ဟေဋ္ဌာ ခုဒ္ဒါနုခုဒ္ဒကမူလင်္ကုရော သေဝါလော တိလဗီဇံ နာမာ’’တိ ဂဏ္ဌိပဒေ ဝုတ္တန္တိ။ ဝိကောပေန္တဿ တံ သဗ္ဗန္တိ ဘူမိယံ ပတိဋ္ဌာယ ဥဒကေ ဇာယမာနကသေဝါလာဒိံ ဘူမိယာ ဥပ္ပာဋနစ္ဆေဒနဝသေန ဇလေ ဧဝ ပတိဋ္ဌိတံ သုခုမပဏ္ဏနီလိကာဒိံ ဥဒကတော ဥဒ္ဓရဏစ္ဆေဒနဝသေန တံ သဗ္ဗံ သေဝါလံ ဝိကောပေန္တဿာတိ အတ္ထော။

၉၉၈။ ဟတ္ထေနဝိယူဟိတွာတိ ဇလတော အမောစေတွာ ဟတ္ထေန ဒူရတော အပနေတွာ။ ‘‘ဟောတီ’’တိအာဒိ တဿ ဟေတုသန္ဒဿနတ္ထံ။ သကလံ အနဝသေသံ သဗ္ဗံ ဇလံ တဿ ယသ္မာ ဌာနံ ဟောတိ၊ တသ္မာတိ အတ္ထော။

၉၉၉။ စေစ္စာတိ ဇာနန္တော။ တံ သေဝါလဇာတိကံ ဇလာ ဥဒ္ဓရိတုံ ဥဒကေန ဝိနာ ဘိက္ခုဿ န ဝဋ္ဋတီတိ ယောဇနာ။ ဌာနသင်္ကမနဉှိ တန္တိ ဟေတုဒဿနံ။ တံ တထာကရဏံ ယသ္မာ ဌာနသင်္ကမနံ ဌာနတော စာဝနံ၊ တသ္မာ တံ န ဝဋ္ဋတီတိ ယောဇနာ။

၁၀၀၀။ ယထာဝုတ္တဿ ဗျတိရေကံ ဒဿေတုမာဟ ‘‘ဥဒကေနာ’’တိအာဒိ။ တတ္ထ ဥဒကေနာတိ သဟတ္ထေ ကရဏဝစနံ။ တံ သေဝါလဇာတိကံ။ ဝါရိသူတိ ဧတ္ထ ဝါသံ ဝါရယန္တီတိ ဝါရီ၊ တေသု။

၁၀၀၁။ ဇလေ ဝလ္လိတိဏာဒီနီတိ ဇလမတ္ထကေ ဝလ္လိဉ္စ ဇာယမာနကရဝလ္လိတိဏာဒီနိ စ။ ဥဒ္ဓရန္တဿာတိ ဘူမိယံ ပတိဋ္ဌိတံ ဘူမိတော၊ ဥဒကေ ပတိဋ္ဌိတံ ဥဒကတော စ ဥဒ္ဓရန္တဿ။ တတ္ထ အန္တပက္ခံ ဒဿေတုမာဟ ‘‘တောယတော’’တိ။ ဝိကောပေန္တဿာတိ ခဏ္ဍနာဒိဝသေန ကောပေန္တဿ။ တတ္ထာတိ တသ္မိံ ဥဒကေ၊ ဧဝ-ကာရော လုတ္တနိဒ္ဒိဋ္ဌော ‘‘တတ္ထေဝါ’’တိ (ပါစိ။ အဋ္ဌ။ ၉၂) အဋ္ဌကထာဝစနတော။

၁၀၀၂။ ဧတ္ထာတိ ဥဒကေ ဧဝ။ ဝိကောပေန္တဿာတိ ကပ္ပိယံ အကာရာပေတွာ ဆေဒနာဒိံ ကရောန္တဿ။ တာနီတိ တထာ ပရေဟိ ဥပ္ပာဋိတတ္တာ ဘူတဂါမဘာဝတော မုတ္တာနိ ဝလ္လိတိဏာဒီနိ။ ဗီဇဂါမေနာတိ မူလဗီဇဂါမာဒိဝသေန။

၁၀၀၃။ ဧဝံ ဥဒကဋ္ဌေ သင်္ခေပတော ဝိနိစ္ဆယံ ဒဿေတွာ ဣဒါနိ ဣတရတြာပိ ဝိနိစ္ဆယံ ဒဿေတုမာဟ ‘‘ထလဋ္ဌေ’’တိအာဒိ။ ဟရိတခါဏုကောတိ ဧတ္ထ ‘‘ယော’’တိ သေသော။ ‘‘တဿာ’’တိ ဣမိနာ သမ္ဗန္ဓော၊ ကကုဓကရဉ္ဇာဒီနံ ဆိန္နာဝသိဋ္ဌခါဏုကောတိ ဝုတ္တံ ဟောတိ။ ‘‘ဘူတဂါမေန သင်္ဂဟော’’တိ ဣမိနာ တံဝိကောပနေ ပါစိတ္တိယဘာဝံ ဒီပေတိ။ ဧဝမုပရိပိ။

၁၀၀၄။ နာဠိကေရာဒိကာနံခါဏူတိ ဧတ္ထာပိ ‘‘ဥပရိဟရိတော’’တိ သာမတ္ထိယာ လဗ္ဘတိ။ ‘‘ဗီဇဂါမေန သင်္ဂဟော’’တိ ဣမိနာ ဒုက္ကဋဝတ္ထုတမာဟ။ ဧဝမုပရိပိ။ ကိဉ္စာပိ ဟိ တာလနာဠိကေရာဒီနံ ခါဏု ဥဒ္ဓံ အဝဍ္ဎနကော ဘူတဂါမဿ ကာရဏံ န ဟောတိ၊ တထာပိ ဘူတဂါမသင်္ခါတနိဗ္ဗတ္တပဏ္ဏမူလဗီဇတော သမ္ဘူတတ္တာ ဘူတဂါမတော ဥပ္ပန္နော နာမ ဟောတီတိ ဗီဇဂါမေန သင်္ဂဟံ ဂစ္ဆတိ။

၁၀၀၅။ တထာပကာသိတောတိ ‘‘ဗီဇဂါမော’’တိ ဝုတ္တော။

၁၀၀၆။ ဖလိတာ ကဒလီ ယာဝ နီလပဏ္ဏာ၊ တာဝ သာ စ ဘူတဂါမောတိ ပကာသိတာတိ ယောဇနာ။ ယထာဟ အဋ္ဌကထာယံ ‘‘ကဒလီ ပန ဖလိတာ ယာဝ နီလပဏ္ဏာ၊ တာဝ ဘူတဂါမေနေဝ သင်္ဂဟိတာ’’တိ (ပါစိ။ အဋ္ဌ။ ၉၂)။ နဠန္တိ ခုဒ္ဒကဝေဠု။ ဝေဠူတိ မဟာဝေဠု။ တိဏာဒီနန္တိ အာဒိ-သဒ္ဒေန သဿာဒယော ဂဟိတာ။

၁၀၀၇။ ယော အယံ ပန ဝေဠု အဂ္ဂတော ပဋ္ဌာယ ယဒါ သုဿတိ၊ တဒါ သော ဗီဇဂါမေန သင်္ဂဟိတော နာမ ဟောတီတိ ယောဇနာ။ ဗီဇဂါမေနာတိ ဖဠုဗီဇဂါမေန။ ယထာဟ အဋ္ဌကထာယံ ‘‘ကတရဗီဇဂါမေန? ဖဠုဗီဇဂါမေနာ’’တိ။

၁၀၀၈။ ဣန္ဒသာလော သလ္လကီ။ အာဒိ-သဒ္ဒေန သောဘဉ္ဇနာဒီနံ သင်္ဂဟော။ တု-သဒ္ဒေန အဋ္ဌကထာယံ ‘‘ကိဉ္စာပိ ရာသိကတဒဏ္ဍကေဟိ ရတနပ္ပမာဏာပိ သာခါ နိက္ခမန္တီ’’တိ (ပါစိ။ အဋ္ဌ။ ၉၂) ဝုတ္တဝိသေသံ ဇောတေတိ။ ဆိန္ဒိတွာ ဌပိတဒဏ္ဍကေသု ရတနမတ္တာသုပိ သာခါသု ဥဋ္ဌိတာသု ဘူတဂါမံ အဟုတွာ ဗီဇဂါမမေဝ ဟောတိ အဝိရုဠှမူလကတ္တာတိ အယံ ဝိနိစ္ဆယော ဝိနယညုနာ ဉာတော ကုက္ကုစ္စကာနမုပကာရာယ ဟောတီတိ အာဟ ‘‘ဝိညေယျော ဝိနယညုနာ’’တိ။ ဣမမေဝတ္ထံ ‘‘မူလမတ္တေပိ ဝါ’’တိအာဒိနာ ဝက္ခတိ။

၁၀၀၉။ မဏ္ဍပါဒီနမတ္ထာယာတိ မဏ္ဍပဝတိပါကာရာဒီနမတ္ထာယ။ သစေ တေ နိက္ခဏန္တီတိ ယဒိ တေ ဣန္ဒသာလာဒိဒဏ္ဍကေ ဘူမိယံ နိခဏန္တိ။ နိဂ္ဂတေ မူလပဏ္ဏသ္မိန္တိ တထာ နိခါတဒဏ္ဍတော မူလေ စ ပဏ္ဏေ စ ဇာတေ။ ဘူတဂါမေန သင်္ဂဟောတိ ဧတ္ထ ‘‘တေသ’’န္တိ သာမတ္ထိယာ လဗ္ဘတိ၊ ‘‘ဝိညေယျော’’တိ အဓိကာရော။

၁၀၁၀။ နိဂ္ဂတေပီတိ တတိယေန ပိ-သဒ္ဒေန အတိခုဒ္ဒကတံ သူစေတိ။

၁၀၁၁။ သကန္ဒာ တာလဋ္ဌီတိ သကန္ဒတာလဗီဇံ။ ပတ္တဝဋ္ဋီတိ သူစိသဏ္ဌာနာ အင်္ကုရပတ္တဝဋ္ဋိ။ န စ ဗီဇဂါမောတိ ဝုစ္စတီတိ ယောဇနာ။ ‘‘ဘူတဂါမော’’တိ ဣဒံ ယထာဝုတ္တဿ ဗျတိရေကဝသေန ဒဿေတိ။

၁၀၁၂။ နာဠိကေရတစန္တိ နာဠိကေရဖလဆလ္လိံ။ ဒန္တသူစီဝါတိ ဒန္တမယသူစိ ဣဝ။ သောပီတိ နာဠိကေရောပိ။ ရုက္ခတစသဒ္ဒါနံ ဖလေသု ဝတ္တမာနကာလေသုပိ တံလိင်္ဂတာ န ဝိရုဇ္ဈတီတိ ‘‘သော’’တိ အာဟာတိ ဝိညာယတိ။

၁၀၁၃။ မိဂသိင်္ဂသမာနာယာတိ ဟရိတဝိသာဏသဒိသာယ။ ပတ္တဝဋ္ဋိယာတိ အင်္ကုရပတ္တဝဋ္ဋိယာ။ သတိယာတိ ဝိဇ္ဇမာနာယ။ ဘူတဂါမောတိ ဝုစ္စတီတိ အမူလကဘူတဂါမောတိ ဝုစ္စတိ။ ဣဒံ နာဠိကေရဿ အာဝေဏိကံ ကတွာ ဝုတ္တံ။

စတုဘာဏဝါရဝဏ္ဏနာ နိဋ္ဌိတာ။

၁၀၁၅-၆။ အမ္ဗဋ္ဌီတိ အမ္ဗဗီဇံ။ ဇမ္ဗုဋ္ဌီတိ ဇမ္ဗုဗီဇံ။ အာဒိ-သဒ္ဒေန မဓုကပနသာဒိဗီဇာနံ ဂဟဏံ။ ဝန္ဒာကာတိ ရုက္ခာဒနီ။ အညံ ဝါတိ ဘဏ္ဍကဒလိမနောရဟံ ဝါ။ အဿာတိ ဝန္ဒာကာဒိနော။ အမူလဝလ္လီတိ ဧဝံနာမိကာ ဝလ္လိ။

၁၀၁၇။ သော သေဝါလောတိ ယောဇနာ။

၁၀၁၈။ ဃံသိတွာတိ ယေန ကေနစိ ဃံသိတွာ။ တံ သေဝါလံ။ တသ္မာတိ တသ္မာ ပါကာရာ။

၁၀၁၉။ သေဝါလေ အပနီတေ။ အန္တောတိ ပါနီယဃဋာဒီနံ အန္တောကုစ္ဆိမှိ။ ကဏ္ဏကံ အဗ္ဗောဟာရန္တိ ယောဇနာ။ ပါနီယဃဋာဒီနံ ဗဟိ သေဝါလော ဥဒကေ အဋ္ဌိတတ္တာ၊ ဗီဇဂါမာနုလောမတ္တာ စ ဒုက္ကဋဝတ္ထူတိ ဝဒန္တိ။ ကဏ္ဏကံ နီလဝဏ္ဏမ္ပိ အဗ္ဗောဟာရိကမေဝ။

၁၀၂၀။ ပါသာဏဒဒ္ဒူတိ မနုဿသရီရေ ရောဂါကာရေန ပါသာဏေ ဇာယမာနဿေတံ အဓိဝစနံ။ သေဝါလန္တိ ပါသာဏသေဝါလံ။ သေလေယျကာ နာမ သိလာယ သမ္ဘူတာ ဧကာ သုဂန္ဓဇာတိ။ အပတ္တာနီတိ ပဏ္ဏရဟိတာနိ။

၁၀၂၁။ ပုပ္ဖိတန္တိ ဝိကသိတံ။ တံ အဟိစ္ဆတ္တံ။ မကုလန္တိ အဝိကသိတံ။

၁၀၂၂။ အလ္လသ္မိံ ရုက္ခေ တစံ ဝိကောပေတွာ ယထာ ဂဟေတုံ န ဝဋ္ဋတိ၊ တထာ ပပ္ပဋိကမ္ပိ နိယျာသမ္ပိ ဝိကောပေတွာ ဂဟေတုံ န ဝဋ္ဋတီတိ ယောဇနာ၊ ပါစိတ္တိယမေဝါတိ အဓိပ္ပာယော။ ပပ္ပဋိကမ္ပီတိ အလ္လတစမတ္ထကေ သုက္ခတစပဋလမ္ပိ။ ‘‘အလ္လသ္မိ’’န္တိ ဣမိနာ ဗျတိရေကေန မတရုက္ခေ ဒေါသာဘာဝံ ဒီပေတိ။ ‘‘တစံ ဝိကောပေတွာ’’တိ ဝစနတော ရုက္ခတစမ္ပိ ပပ္ပဋိကမ္ပိ သာလကပိတ္ထာဒိနိယျာသမ္ပိ ရုက္ခေ အလ္လတစံ အဝိကောပေတွာ မတ္ထကတော ဆိန္ဒိတွာ ဂဟေတုံ ဝဋ္ဋတိ။

၁၀၂၃။ အက္ခရစ္ဆိန္ဒနာရဟေသု နုဟိကဒလိအာဒီသု ရုက္ခေသု၊ တတ္ထဇာတေသု တာလပဏ္ဏာဒိကေသု ဝါ အက္ခရံ လိခတော ပါစိတ္တိယမုဒီရယေတိ ယောဇနာ။ ‘‘တတ္ထဇာတေသူ’’တိ ဣမိနာ ရုက္ခတော အပနီတပဏ္ဏေသု လိခိတုံ ဝဋ္ဋတီတိ ဗျတိရေကတော ဒီပေတိ။

၁၀၂၄။ ‘‘ပက္ကမေဝ ဝါ’’တိ ဝိသုံ ဝစနတော ‘‘ဖလံ ဝါ’’တိ ဣမိနာ အပက္ကံ ဖလံ ဂဟိတံ။

၁၀၂၅။ ဖလိနိံသာခန္တိ ခါဒနာရဟဖလဝတိံ ဇမ္ဗုသာခါဒိကံ သာခံ။ ဂဏှတော အနုပသမ္ပန္နဿာတိ ဂဟေတဗ္ဗံ။ သယံ ခါဒိတုကာမော စေတိ တထာ ဩနမိတွာ သာခတော ဩစိနိတွာ ဒိန္နဖလံ သစေ သယံ ခါဒိတုကာမော ဟောတိ။ ဧဝံ ဒါတုန္တိ ယထာဝုတ္တပ္ပကာရံ နာမေတွာ ဒါတုံ။

၁၀၂၆။ ပရံ ကဉ္စိ ဥက္ခိပိတွာတိ အညံ ကဉ္စိ အနုပသမ္ပန္နံ ဥက္ခိပိတွာ။ ပုပ္ဖာနိ ဩစိနန္တေသူတိ ကုသုမာနိ လုနန္တေသု။ အယမေဝ ဝိနိစ္ဆယောတိ သာမညနိဒ္ဒေသေပိ ဧတ္ထ အတ္တနော နာမေတွာ ဒိန္နသာခါယ ပုပ္ဖာနိ ပါနီယဝါသတ္ထာယ န ဂဟေတဗ္ဗာနိ။ အနုပသမ္ပန္နံ ဥက္ခိပိတွာ ပုပ္ဖာနိ ဩစိနာပေတွာ ဂဟိတပုပ္ဖာနိ ဂဟေတဗ္ဗာနီတိ အယမေတ္ထ ဝိသေသော။ ယထာဟ အဋ္ဌကထာယံ ‘‘တေဟိ ပန ပုပ္ဖေဟိ ပါနီယံ န ဝါသေတဗ္ဗံ။ ပါနီယဝါသတ္ထိကေန သာမဏေရံ ဥက္ခိပိတွာ ဩစိနာပေတဗ္ဗာနီ’’တိ (ပါစိ။ အဋ္ဌ။ ၉၂)။

၁၀၂၇။ ‘‘သာခါ’’တိ ဘိန္ဒိတွာ ဝါ ဆိန္ဒိတွာ ဝါ မောစိတာ ဝုစ္စတိ။ သာခီနန္တိ ရုက္ခာနံ။ တန္တိ ယထာဝုတ္တရုက္ခတော မောစိတသာခံ။ ယေသံ ရုက္ခာနံ သာခါ ရုဟတိ၊ တေသံ သာခီနံ တံ သာခံ ကပ္ပိယံ အကာရာပေတွာ ဝိကောပေန္တဿ ဒုက္ကဋန္တိ ယောဇနာ။ ‘‘ယေသံ ရုက္ခာနံ သာခါ ရုဟတီ’’တိ ဝုတ္တတ္တာ ယေသံ သာခါ န ရုဟတိ၊ တေသံ တဿာ ကပ္ပိယကရဏကိစ္စံ နတ္ထီတိ ဝဒန္တိ။

၁၀၂၈။ အလ္လသိင်္ဂိဝေရာဒိကေသုပီတိ အာဒိ-သဒ္ဒေန ဝစလသုဏာဒီနံ ဂဟဏံ။

၁၀၂၉။ အနိယာမတော ဝဋ္ဋတေဝါတိ ယောဇနာ။ နိယာမသရူပံ ဒဿေတုံ ‘‘ဣမံ ရုက္ခ’’န္တိအာဒိဝက္ခမာနတ္တာ အနိယာမတောတိ သာမညနိဒ္ဒေသေ ‘‘ဣမ’’န္တိ နိယာမဝစနာဘာဝတောတိ ဂဟေတဗ္ဗံ။

၁၀၃၂။ ဥစ္ဆုခဏ္ဍာနန္တိ ပူရဏယောဂေ သာမိဝစနံ၊ ဥစ္ဆုခဏ္ဍေဟီတိ ဝုတ္တံ ဟောတိ။ သဗ္ဗမေဝါတိ ပစ္ဆိယံ ဌိတံ သဗ္ဗံ ခဏ္ဍံ။ ကတံ ဟောတီတိ ကတံ ကပ္ပိယံ ဟောတိ။ ဧကသ္မိံ ကပ္ပိယေ ကတေတိ ပစ္ဆိယံ သဗ္ဗခဏ္ဍေသု ဖုသိတွာ ဌိတေသု ဧကသ္မိံ ခဏ္ဍေ ကပ္ပိယေ ကတေ။ ‘‘အနုဇာနာမိ ဘိက္ခဝေ ပဉ္စဟိ သမဏကပ္ပေဟိ ဖလံ ပရိဘုဉ္ဇိတုံ အဂ္ဂိပရိဇိတံ သတ္ထပရိဇိတံ နခပရိဇိတံ အဗီဇံ နိဗ္ဗဋ္ဋဗီဇံယေဝ ပဉ္စမ’’န္တိ (စူဠဝ။ ၂၅၀) ဣတိ ဝုတ္တေသု အဂ္ဂိသတ္ထနခေသု အညတရေန တတ္တ အယောခဏ္ဍေန ဝါ ဇလိတဂ္ဂိနာ ဝါ သူစိမုခေန ဝါ နခစ္ဆေဒနေန ဝါ သတ္ထကဓာရာယ ဝါ မနုဿသီဟာဒီနံ ဥပ္ပာဋိတာနုပ္ပာဋိတအပူတိနခေန ဝါ ဝိဇ္ဈိတွာ ဝါ ဆိန္ဒိတွာ ဝါ ကပ္ပိယံ ကာတဗ္ဗံ။ ကရောန္တေန စ အနုပသမ္ပန္နေန ဘိက္ခုနာ ‘‘ကပ္ပိယံ ကရောဟီ’’တိ ဝုတ္တေယေဝ ‘‘ကပ္ပိယ’’န္တိ ပဌမံ ဝတွာ ပစ္ဆာ အဂ္ဂိပရိဇိတာဒိ ကာကဗ္ဗန္တိ ဂဟေတဗ္ဗံ။ ဝက္ခတိ စ ‘‘ကပ္ပိယန္တိ…ပေ… ဝဋ္ဋတီ’’တိ။ ‘‘ကပ္ပိယ’’န္တိ ဝစနံ ပန ယာယ ကာယစိ ဝါစာယ ဝတ္တုံ ဝဋ္ဋတီတိ ဝဒန္တိ။ ပဌမံ အဂ္ဂိံ နိက္ခိပိတွာ နခါဒီဟိ ဝါ ဝိဇ္ဈိတွာ ဝါ ဆိန္ဒိတွာ ဝါ ကပ္ပိယံ ကာတဗ္ဗံ။ ကရောန္တေန စ တံ အနုဒ္ဓရိတွာဝ ‘‘ကပ္ပိယ’’န္တိ ဝတွာ ပစ္ဆာ ဥဒ္ဓရိတုံ ဝဋ္ဋတီတိ ဝဒန္တိ၊ ‘‘ကပ္ပိယ’’န္တိ ဝတ္တုကာမော ‘‘ကပ္ပ’’န္တိ စေ ဝဒတိ၊ ဝဋ္ဋတီတိ ကေစိ။

၁၀၃၃။ ဒါရုန္တိ ဥစ္ဆူဟိ သဒ္ဓိံ ဧကတောဗဒ္ဓဒါရုံ။ ဒါရုံ ဝိဇ္ဈတီတိ ဧတ္ထ ဇာနိတွာပိ ဝိဇ္ဈတိ ဝါ ဝိဇ္ဈာပေတိ ဝါ၊ ဝဋ္ဋတိယေဝ။ ‘‘ဧကသိတ္ထေပီ’’တိ ဧတ္ထာပိ ဧသေဝ နယော။

၁၀၃၄။ တာနိ ဥစ္ဆုဒါရူနိ။ တန္တိ ဝလ္လိံ၊ ရဇ္ဇုံ ဝါ။

၁၀၃၅။ မရိစပက္ကေဟီတိ ပရိဏတေဟိ မရိစပက္ကေဟိ။ အပရိဏတာနံ ပန အဗီဇတ္တာ ကပ္ပိယေ အကတေပိ ဝဋ္ဋတိ။ ဣဒဉ္စ သေတလသုဏတစလသုဏာဒီဟိ မိဿဘတ္တဿ ဥပလက္ခဏံ။ ဧတ္ထ စ ဘတ္တသိတ္ထသမ္ဗန္ဓဝသေန ဧကာဗဒ္ဓတာ ဝေဒိတဗ္ဗာ၊ န ဖလာဒီနမေဝ အညမညသမ္ဗန္ဓဝသေန။

၁၀၃၆။ တိလတဏ္ဍုလကာဒိသူတိ ကပ္ပိယံ ကာတဗ္ဗတိလေဟိ မိဿတဏ္ဍုလာဒီသု။ အာဒိ-သဒ္ဒေန ကပ္ပိယံ ကာတဗ္ဗဝတ္ထူဟိ မိဿိတာနိ ဣတရဝတ္ထူနိ ဂဟိတာနိ။ ဧကာဗဒ္ဓေ ကပိတ္ထေပီတိ ကဋာဟေန ဗဒ္ဓဗီဇေ ပရိဏတကပိတ္ထဖလေပိ။ ကဋာဟေတိ ဗဒ္ဓမိဉ္ဇေ ကပါလေ။

၁၀၃၇။ ကဋာဟံ မုဉ္စိတွာတိ သုက္ခတ္တာ သမန္တတော ကဋာဟံ မုဉ္စိတွာ။ မိဉ္ဇကန္တိ ပရိဏတကပိတ္ထဖလမိဉ္ဇံ။ တံ ကပိတ္ထံ ဘိန္ဒာပေတွာတိ ကပိတ္ထကဋာဟံ ဘိန္ဒာပေတွာ၊ ဣဒံ ဗီဇတော မုတ္တဿ ကဋာဟဿ ဘာဇနဂတိကတ္တာ ဝုတ္တံ။

၁၀၃၈။ ‘‘အဘူတဂါမအဗီဇေသူ’’တိ ပဒစ္ဆေဒေါ၊ အဘူတဂါမေ စ အဗီဇေ စာတိ အတ္ထော။ နနု စ ‘‘အဗီဇေ ဗီဇသညီ၊ ဝေမတိကော၊ အာပတ္တိ ဒုက္ကဋဿာ’’တိ (ပါစိ။ ၉၂) ပါဌံ ဝိနာ ‘‘အဘူတဂါမေ ဘူတဂါမသညီ’’တိ ပါဌော နတ္ထီတိ အဘူတဂါမဂ္ဂဟဏံ ကသ္မာ ကတန္တိ? ဝုစ္စတေ – တသ္မိံ ပါဌေ ဗီဇံ ဘူတဂါမဉ္စ ဗီဇဂါမံ ဗီဇဉ္စ ဗီဇဗီဇန္တိ ဝတ္တဗ္ဗေ ဧကသေသနယေန ‘‘ဗီဇ’’န္တိ ဂဟေတွာ ဝိနိစ္ဆိတန္တိ ဥဘယံ ဝိဘဇိတွာ ဒဿနတ္ထံ ဝုတ္တံ။ တတ္ထ တသ္မိံ အဘူတဂါမအဗီဇဂါမဒွယေ။ ဣမိဿာ ဂါထာယ ‘‘အဘူတဂါမေ ဘူတဂါမသညိနော ဒုက္ကဋံ၊ ဝေမတိကဿ ဒုက္ကဋံ၊ အဗီဇဂါမေ ဗီဇဂါမသညိနော ဒုက္ကဋံ၊ ဝေမတိကဿ ဒုက္ကဋ’’န္တိ စတ္တာရိ ဒုက္ကဋာနိ ဒဿိတာနိ။ တတ္ထ အဘူတဂါမန္တိ ဗီဇဂါမံ ဂဟေတဗ္ဗံ။ အဗီဇဂါမန္တိ နော ဗီဇံ။

၁၀၃၉။ တတ္ထ တသ္မိံ ဘူတဂါမဗီဇဂါမဒွယေ။ ‘‘အတထာသညိနော’’တိအာဒီသု ‘‘ဘူတဂါမံ ဝိကောပေန္တဿာ’’တိ သေသော၊ အနာပတ္တိ ပကာသိတာတိ သမ္ဗန္ဓော၊ အဘူတဂါမံ၊ အဗီဇန္တိ ဝါ သညိနော ဘူတဂါမံ ဗီဇမ္ပိ ဝိကောပေန္တဿ အနာပတ္တိ ပကာသိတာတိ အတ္ထော ဂဟေတဗ္ဗော။ ယထာဟ ပါဠိယံ ‘‘ဗီဇေ အဗီဇသညီ ဆိန္ဒတိ ဝါ…ပေ… အနာပတ္တီ’’တိ။

အသဉ္စိစ္စ ဘူတဂါမံ ဝိကောပေန္တဿ အနာပတ္တီတိ ယောဇနာ။ ဧဝမုပရိပိ ယောဇေတဗ္ဗံ။ ဂစ္ဆန္တဿ ပါဒေသု ဂဟေတွာ ဝါ အာလမ္ဗဏကတ္တရယဋ္ဌိယာ ဃံသိတွာ ဝါ တိဏာဒီသု ဆိဇ္ဇေသုပိ ‘‘ဣမံ ဆိန္ဒိဿာမီ’’တိ အမနသိကတတ္တာ အနာပတ္တီတိ အတ္ထော။ အသတိဿာတိ အညဝိဟိတသတိဿ ဝါ အညေန ကထယတော ဝါ ပါဒင်္ဂုဋ္ဌာဒီဟိ တိဏာဒီနိ ဆိန္ဒန္တဿ။ စ-ကာရေန ဣဓ အဝုတ္တံ ‘‘အဇာနန္တဿာ’’တိ ဣဒံ သမုစ္စိတံ။ ‘‘ဣမံ ဘူတဂါမ’’န္တိ ဝါ ‘‘ဣမသ္မိံ အဂ္ဂိမှိ ပတိတေ ဣမံ ဍယှတီ’’တိ ဝါ ‘‘ဣမိနာ ဣဒံ ဘိဇ္ဇတိ ဆိဇ္ဇတီ’’တိအာဒိံ ဝါ အဇာနန္တဿ အနာပတ္တီတိ အတ္ထော။

၁၀၄၀။ ဣဒံစာတိ ဣဒံ ဘူတဂါမသိက္ခာပဒဉ္စ။ တိသမုဋ္ဌာနန္တိ ကာယစိတ္တဝါစာစိတ္တကာယဝါစာစိတ္တဝသေန တိသမုဋ္ဌာနံ။ ဆေဒနာဒိကိရိယာယ အာပဇ္ဇနတော ကြိယံ။ တိစိတ္တန္တိ ပဏ္ဏတ္တိံ အဇာနိတွာ စေတိယာဒီသု တိဏဂဟနာဒိကံ ကရောန္တဿ အခီဏာသဝဿ ကုသလံ၊ ခီဏာသဝဿ ကိရိယံ၊ ဖလပုပ္ဖာဒိလောဘေန ဝိကောပေန္တာနံ သေခပုထုဇ္ဇနာနံ အကုသလန္တိ တိစိတ္တံ။

ဘူတဂါမကထာဝဏ္ဏနာ။

၁၀၄၁။ အညဝါဒဝိဟေသကေ ကမ္မသ္မိံ သင်္ဃေန ကတေတိ ယောဇနာ၊ အညဝါဒကဝိဟေသကာရောပနကမ္မေ ဉတ္တိဒုတိယာယ ကမ္မဝါစာယ ပစ္စေကံ သင်္ဃေန ကတေတိ အတ္ထော။ ‘‘အညံ ဝဒတီတိ အညဝါဒကံ၊ အညေနညံ ပဋိစရဏဿေတံ နာမံ။ ဝိဟေသေတီတိ ဝိဟေသကံ၊ တုဏှီဘူတဿေတံ နာမ’’န္တိ (ပါစိ။ အဋ္ဌ။ ၉၈) ဝစနတော သင်္ဃမဇ္ဈေ ဝတ္ထုနာ၊ အာပတ္တိယာ ဝါ စောဒနာယ ကတာယ တံ အဝတ္တုကာမော ဟုတွာ ‘‘ကော အာပန္နော၊ ကိံ အာပန္နော၊ ကိသ္မိံ အာပန္နော’’တိအာဒိနာ (ပါစိ။ ၉၄) ပဒဘာဇနာနုက္ကမေန ပုစ္ဆိတံ ဌပေတွာ အညဿ အဝစနံ အညေနညံ ပဋိစရဏံ၊ တံ ကရောန္တော အညဝါဒကော။ ဣဓ ပန ဘာဝပ္ပဓာနဝသေန ကိရိယာ ဂဟိတာ။

တထေဝ စောဒိယမာနော ဟုတွာ ပုစ္ဆိတံ အဝတ္တုကာမော ဟုတွာ အာပတ္တိဘီရုကတာယ အညေနညံ ပဋိစရဏံ အကတွာ သင်္ဃံ ဝိဟေသေတုံ တုဏှီဘူတော ဝိဟေသကော နာမ။ ဧတ္ထာပိ ဘာဝပ္ပဓာနဝသေန ကိရိယာဝ ဂဟေတဗ္ဗာ။ ဣဓ ပန တဗ္ဘာဝါရောပနကမ္မံ ဝုစ္စတီတိ သံခေပေါ။ ပုန တထာ ကရောန္တဿာတိ ပုနပိ တေနေဝ ပကာရေန အညဝါဒကဝိဟေသကာနိ ဝိသုံ ဝိသုံ ကရောန္တဿ။ ပါစိတ္တိယဒွယံ ဟောတီတိ ပဒဘာဇနေ ‘‘ရောပိတေ အညဝါဒကေ’’တိအာဒိနာ (ပါစိ။ ၁၀၀) နယေန စ ‘‘ရောပိတေ ဝိဟေသကေ’’တိအာဒိနာ (ပါစိ။ ၁၀၀) နယေန စ ဝိသုံ ဝိသုံ ပါစိတ္တိယဿ ဝုတ္တတ္တာ ဧကေကသ္မိံ ဝတ္ထုမှိ ဧကေကာယ အာပတ္တိယာ သမ္ဘဝတော ပါစိတ္တိယဒွယံ ဟောတီတိ ဂဟေတဗ္ဗံ။

၁၀၄၂။ ဓမ္မေတိ ဧတ္ထ ‘‘ကမ္မေ’’တိ သေသော။ ဓမ္မကမ္မေ ဓမ္မကမ္မသညီ၊ ဝေမတိကော၊ အဓမ္မကမ္မသညီတိ တီသု ဝိကပ္ပေသု။ အဓမ္မေတိ ဧတ္ထာပိ ဧသေဝ နယော။ ကမ္မေ အရောပိတေတိ အညဝါဒကကမ္မာရောပနေ အကတေ။ ဧဝံ ဝဒန္တဿာတိ ‘‘ကော အာပန္နော’’တိအာဒီနိ ဝဒန္တဿ။ ဝဒန္တဿ စာတိ ဧတ္ထ စကာရေန ကမ္မေ အရောပိတေ ဧဝံ ဝိဟေသန္တဿ စ ဒုက္ကဋန္တိ သမုစ္စိနောတိ။ ဣမသ္မိံ ပက္ခေ ကမ္မေ အရောပိတေတိ ဝိဟေသကကာလမာဟ။

၁၀၄၃။ အာပန္နန္တိ အတ္တနာ အာပန္နံ။ ဘဏ္ဍနံ ဘဝိဿတီတိ သညိဿာတိ မယာ ဣမသ္မိံ ဝုတ္တေ သင်္ဃဿ ဘဏ္ဍနကလဟာဒယော ဟောန္တီတိ သညာယ တုဏှီ ဘဝန္တဿ။ ဂိလာနဿာတိ ဝတ္တုံ အသက္ကုဏေယျမုခရောဂါဒိယုတ္တဿ။

၁၀၄၄။ ကြိယာကြိယန္တိ အညေနညပဋိစရဏံ ကြိယံ။ တုဏှီဘာဝေါ အကြိယံ။

အညဝါဒကကထာဝဏ္ဏနာ။

၁၀၄၅-၆။ သမ္မတဿာတိ ခန္ဓကာဂတသေနာသနပညာပကသမ္မုတိအာဒီသု တေရသသု သမ္မုတီသု ဧကံ ဝါ ကတိပယာ ဝါ သဗ္ဗာ ဝါ ဒါတုံ သင်္ဃေန ဉတ္တိံ ဌပေတွာ ကမ္မဝါစံ ဝတွာ ဒိန္နသမ္မုတိကဿ။ ‘‘ဥပသမ္ပန္နံ သင်္ဃေန သမ္မတ’’န္တိ (ပါစိ။ ၁၀၆) ဝစနတော ဘိက္ခုနောတိ ဥပသမ္ပန္နမာဟ၊ အယသံ ကတ္တုကာမောတိ သမ္ဗန္ဓော။ ဝဒန္တောတိ ‘‘ဆန္ဒေန ဣတ္ထန္နာမော သေနာသနံ ပညာပေတိ၊ ဆန္ဒေန ဘတ္တာနိ ဥဒ္ဒိသတီ’’တိအာဒိံ ဘဏန္တော။ ‘‘ဥပသမ္ပန္နေ’’တိ ဣဒံ ‘‘ဥဇ္ဈာပေတီ’’တိ ကိရိယမပေက္ခိတွာ ကမ္မနိ ဥပယောဂဗဟုဝစနံ။ အယဉှေတ္ထ အတ္ထော – ဥဇ္ဈာပေတိ အဝညာယ ဩလောကာပေတိ၊ လာမကတော ဝါ စိန္တာပေတိ၊ ခီယတီတိ ‘‘ဆန္ဒေန ဣတ္ထန္နာမော သေနာသနံ ပညပေတီ’’တိအာဒိံ ကထေန္တော ပကာသေတီတိ။ ဣမသ္မိံ ပက္ခေ ‘‘ဥပသမ္ပန္နာန’’န္တိ ဝတ္တဗ္ဗေ သာမိအတ္ထေ ဥပယောဂဝသေန ‘‘ဥပသမ္ပန္နေ’’တိ ဝုတ္တံ၊ ဥပသမ္ပန္နာနံ သန္တိကေ ပကာသေတီတိ အတ္ထော။

‘‘ပါစိတ္တိယဒွယံ ဟောတီ’’တိ ဣဒံ ‘‘ဥဇ္ဈာပနကေ ခိယျနကေ ပါစိတ္တိယ’’န္တိ (ပါစိ။ ၁၀၅) ဒွိန္နံ ဝတ္ထူနံ ဧကတော ဝုတ္တတ္တာ ဣဓာပိ ဧကတော ဝုတ္တံ၊ ဝိသုံ ဝိသုံ ပန ဂဟေတဗ္ဗံ။ ဓမ္မေတိ ဧတ္ထ ‘‘ကမ္မေ’’တိ သေသော၊ ဥပသမ္ပန္နဿ သမ္မတဿ သင်္ဃေန ဒိန္နသမ္မုတိကမ္မံ သစေ ဓမ္မကမ္မံ ဟောတီတိ အတ္ထော။ အဓမ္မေတိ ဧတ္ထာပိ ဧသေဝ နယော။

၁၀၄၇-၈။ ဘိက္ခုနောတိ သမ္မတဿ ဘိက္ခုနော။ အသမ္မတဿ ဘိက္ခုဿ အဝဏ္ဏံ ဘာသတောတိ ယောဇနာ။ ယဿ ကဿစီတိ ဧတ္ထ ‘‘သန္တိကေ’’တိ သေသော၊ ဥပသမ္ပန္နဿ စ အနုပသမ္ပန္နဿ စ ယဿ ကဿစိ သန္တိကေတိ အတ္ထော။ ဥပသမ္ပန္နကာလေ သမ္မတံ ပစ္ဆာ သာမဏေရဘာဝံ ဥပဂတံ သန္ဓာယ ‘‘သမ္မတဿ သာမဏေရဿာ’’တိ ဝုတ္တံ။ အဝဏ္ဏံ ဝဒတောတိ ယောဇနာ။

၁၀၄၉။ ကရောန္တံ သမ္မတံ။ ဘဏတောတိ ဥဇ္ဈာပယတော၊ ခီယတော။ အတ္ထော ပန ဝုတ္တနယောဝ။ ဥဇ္ဈာပနခီယနကိရိယာဟိ အာပဇ္ဇနတော ကြိယံ။ ယသ္မာ ဥဇ္ဈာပနံ၊ ခီယနဉ္စ မုသာဝါဒဝသေနေဝ ပဝတ္တံ၊ တသ္မာ ‘‘အာဒိကမ္မိကဿ အနာပတ္တီ’’တိ ပါစိတ္တိယဋ္ဌာနေ၊ ဒုက္ကဋဋ္ဌာနေ စ ဣမိနာ စ အနာပတ္တိဒဿနတ္ထံ ဝုတ္တန္တိ ဂဟေတဗ္ဗံ။ ဧဝဉ္စ ကတွာ ဥဇ္ဈာပေန္တဿ၊ ခီယန္တဿ စ ဧကက္ခဏေ ဒွေ ဒွေ အာပတ္တိယော ဟောန္တီတိ အာပန္နံ။

ဥဇ္ဈာပနကကထာဝဏ္ဏနာ။

၁၀၅၀။ သင်္ဃဿ မဉ္စာဒိန္တိ သမ္ဗန္ဓော။ ‘‘သင်္ဃိကံ မဉ္စံ ဝါ ပီဌံ ဝါ ဘိသိံ ဝါ ကောစ္ဆံ ဝါ’’တိ ပါဠိယံ ဒဿိတံ သင်္ဃသန္တကံ မဉ္စာဒိံ။ ဧတ္ထ စ မဉ္စော နာမ ပါဠိယံ ‘‘စတ္တာရော မဉ္စာ မသာရကော ဗုန္ဒိကာဗဒ္ဓါ ကုဠီရပါဒကော အာဟစ္စပါဒကော’’တိ (ပါစိ။ ၁၁၁) စ ဒဿိတော စတုဗ္ဗိဓော မဉ္စော။ တတ္ထ မသာရကော နာမ မဉ္စပါဒေ ဝိဇ္ဈိတွာ တတ္ထ အဋနိသိခါဟိ အာဝုဏိတွာ ကတမဉ္စော။ သော ဣဒါနိ ဝတ္တမာနော ဝေတ္တမဉ္စော။ ဗုန္ဒိကာဗဒ္ဓါ နာမ အဋနိသီသေသု ဗုန္ဒိကရန္တရတော မဉ္စပါဒေ ဍံသာပေတွာ ကတော ဝေတ္တမဉ္စပဒရမဉ္စော ဒဋ္ဌဗ္ဗော။ ကုဠီရပါဒကော နာမ ပါဒဗုန္ဒေ အဿခုရာဒိအာကာရံ ဒဿေတွာ ကက္ကဋပါဒေဟိ ဝိယ ဝင်္ကပါဒေဟိ ယောဇိတမဉ္စော။ အာဟစ္စပါဒကော နာမ အဋနိယော ဝိဇ္ဈိတွာ အဋနိဆိဒ္ဒေ ပါဒသီသေ သိခံ ကတွာ တံ ပဝေသေတွာ အဋနိယာ ဥပရိ နိက္ခန္တေ ပါဒသိခါမတ္ထကေ တိရိယံ ဝိဇ္ဈိတွာ အာဏိံ ပဝေသေတွာ ကတမဉ္စော။

ပီဌံ နာမ ဧဝမေဝ ကတံ တန္နာမကမေဝ စတုဗ္ဗိဓံ၊

ဘိသိ နာမ ‘‘ပဉ္စ ဘိသိယော ဥဏ္ဏဘိသိ စောဠဘိသိ ဝါကဘိသိ တိဏဘိသိ ပဏ္ဏဘိသီ’’တိ ဂဗ္ဘဝသေန ဒဿိတာ ပဉ္စ ဘိသိယော။ တတ္ထ ဥဏ္ဏာ နာမ မနုဿလောမံ ဌပေတွာ အဝသေသလောမာနိ။ စောဠာ နာမ ပိလောတိကာ။ ဝါကံ နာမ မကစိဝါကာဒိကံ။ တိဏံ နာမ ဒဗ္ဗတိဏာဒိ။ ပဏ္ဏံ နာမ တမာလပဏ္ဏံ ဌပေတွာ အဝသေသပဏ္ဏံ။

ကောစ္ဆန္တိ ပါဠိယံ ‘‘ကောစ္ဆံ နာမ ဝါကမယံ ဝါ ဥသီရမယံ ဝါ မုဉ္ဇမယံ ဝါ ပဗ္ဗဇမယံ ဝါ အန္တော သံဝေဌေတွာ ဗဒ္ဓံ ဟောတီ’’တိ (ပါစိ။ ၁၁၁) ဒဿိတံ ဝါကံ ဝါ ဥသီရံ ဝါ မုဉ္ဇတိဏံ ဝါ ဧဠကလောမာနိ ဝါ ပဗ္ဗဇတိဏံ ဝါ အာဒါယ ဥဘောဟိ ကောဋီဟိ ဝိတ္ထတံ ကတွာ မဇ္ဈေ ပီဠေတွာ သင်္ကုစိတွာ တံ ဗန္ဓိတွာ သီဟစမ္မာဒီဟိ ဝေဌနဗန္ဓနာနိ ပဋိစ္ဆာဒေတွာ ပါဒပုဉ္ဆနီ ဝိယ နိသဇ္ဇတ္ထာယ ကတံ အာသနန္တိ ဝဒန္တိ။ ယထာဟ အဋ္ဌကထာယံ ‘‘ဟေဋ္ဌာ စ ဥပရိ စ ဝိတ္ထတံ၊ မဇ္ဈေ သံခိတ္တံ၊ ပဏဝသဏ္ဌာနံ ကတွာ ဗဒ္ဓံ ဟောတိ၊ တံ ကိရ မဇ္ဈေ သီဟဗျဂ္ဃစမ္မပရိက္ခိတ္တမ္ပိ ကရောန္တိ။ အကပ္ပိယစမ္မံ နာမေတ္ထ နတ္ထီ’’တိအာဒိ (ပါစိ။ အဋ္ဌ။ ၁၁၁)။ သန္ထရာပေတွာတိ ဥပသမ္ပန္နေန ဝါ အနုပသမ္ပန္နေန ဝါ သန္ထရာပေတွာ။ ဧတ္ထ ဝိနိစ္ဆယံ ဝက္ခတိ။ သန္ထရိတွာတိ သယံ သန္ထရိတွာ ဝါ။

၁၀၅၁။ နေဝုဒ္ဓရေယျာတိ ပညတ္တဋ္ဌာနတော ဥဒ္ဓရိတွာ န ပဋိသာမေယျ။ န ဥဒ္ဓရာပေယျ ဝါတိ အညေန ဝါ တထာ န ကာရာပေယျ။ တန္တိ မဉ္စာဒိံ။ ပက္ကမန္တောတိ ဧတ္ထ ‘‘ယော ဘိက္ခူ’’တိ လဗ္ဘတိ၊ မဉ္စာဒီနံ အတ္ထတဋ္ဌာနတော ထာမမဇ္ဈိမဿ ပုရိသဿ ထာမပ္ပမာဏေန ဟတ္ထံ ပသာရေတွာ ခိတ္တပါသာဏဿ ပတနဋ္ဌာနံ အတိက္ကမ္မ ဂစ္ဆန္တောတိ အတ္ထော။ ယထာဟ ပါဠိယံ ‘‘မဇ္ဈိမဿ ပုရိသဿ လေဍ္ဍုပါတံ အတိက္ကမန္တဿာ’’တိ။

၁၀၅၂။ ဝဿိကေ စတုရော မာသေတိ အန္တောဝဿံ စာတုမာသေ။ သစေ ဒေဝေါ န ဝဿတီတိ ဧတ္ထ ‘‘ကတ္ထစိ ဇနပဒေ’’တိ သေသော။ တေနေဝ ‘‘သစေ’’တိ သာသင်္ကမာဟ။ ‘‘ယေသု ဇနပဒေသု ဝဿကာလေ န ဝဿတိ၊ တေသုပိ စတ္တာရော မာသေ နိက္ခိပိတုံ န ဝဋ္ဋတိယေဝါ’’တိ (ပါစိ။ အဋ္ဌ။ ၁၁၀) အဋ္ဌကထာယံ ဝုတ္တံ။ တထာ စာပီတိ တေ စတ္တာရော မာသေ အဝဿန္တေပိ။

၁၀၅၃။ ယတ္ထာတိ ယသ္မိံ လင်္ကာဒီပသဒိသေ ဒေသေ။ ယတ္ထ အပရေပိ ဟေမန္တေ စတ္တာရော မာသေ ဒေဝေါ ဝဿတိ၊ တတ္ထ အဋ္ဌ မာသေ အဇ္ဈောကာသေ မဉ္စာဒိံ ဌပေတုံ န ဝဋ္ဋတီတိ ယောဇနာ။ ဂိမှာနေ ပန စတ္တာရော မာသေ ဗဟိ ဌပေတုံ ဝဋ္ဋတီတိ ဗျတိရေကတော ဒဿေတိ။

၁၀၅၄။ နိဝါသသ္မိန္တိ ရုက္ခေ ကုလာဝကံ ကတွာ နိရန္တရဝါသေ သတိ။ ယထာဟ အဋ္ဌကထာယံ ‘‘ယသ္မိံ ပန ဓုဝနိဝါသေန ကုလာဝကေ ကတွာ ဝသန္တီ’’တိ (ပါစိ။ အဋ္ဌ။ ၁၁၀)။ ကဒါစိပီတိ အနောဝဿကာလေပိ။

၁၀၅၅-၆။ သင်္ဃိကံ ယံ ကိဉ္စိ မဉ္စာဒီတိ ယောဇနာ။ သန္ထတံ ယဒီတိ အနာဏတ္တေန ယဒိ အတ္ထတံ၊ ပညတ္တန္တိ ဝုတ္တံ ဟောတိ။ ယတ္ထ ကတ္ထစိ ဌာနေတိ ရုက္ခမူလမဏ္ဍပအဗ္ဘောကာသာဒိမှိ ယတ္ထ ကတ္ထစိ ဌာနေ။ ယေန ကေနစီတိ သဒ္ဓိဝိဟာရိကေန ဝါ အန္တေဝါသိကေန ဝါ အညေန ဝါ။ ဘိက္ခုနာတိ ဥပသမ္ပန္နေန။ သောတိ ယဿတ္ထာယ ပညတ္တံ၊ သော ဘိက္ခု။

၁၀၅၇။ တန္တိ တံ သင်္ဃိကံ ဝေတ္တမဉ္စာဒိံ။ သန္ထရာပိတ-သဒ္ဒေါ ကတ္တုသာဓနော၊ သန္ထရိတုံ နိယောဇကဿေဝ ဘိက္ခုနောတိ အတ္ထော။

၁၀၅၈။ ဘိက္ခုနာတိ ဧတ္ထ ‘‘အာဏာပကော’’တိ ဝက္ခမာနတ္တာ အာဏတ္တေန ဘိက္ခုနာ ဥပသမ္ပန္နေနာတိ လဗ္ဘတိ။ တဿေဝါတိ အာဏတ္တိယာ အာသနပညာပကဿ တဿေဝ ဘိက္ခုနော။ ‘‘နိသီဒတီ’’တိ ဝစနဿ ဥပလက္ခဏတ္တာ အာဂန္တွာ ထဝိကံ ဝါ စီဝရံ ဝါ ယံ ကိဉ္စိဒေဝ ဌပေတိ၊ ‘‘မယှမေဝ ဘာရော’’တိ ဝါ ဝဒတိ၊ ပညာပကော မုစ္စတီတိ ဂဟေတဗ္ဗော။

၁၀၅၉-၆၀။ အနာပုစ္ဆာတိ ဧတ္ထ ‘‘ယော ဘိက္ခု ဝါ သာမဏေရော ဝါ အာရာမိကော ဝါ လဇ္ဇီ ဟောတိ၊ အတ္တနော ပလိဗောဓံ ဝိယ မညတီ’’တိ (ပါစိ။ အဋ္ဌ။ ၁၁၃) အဋ္ဌကထာယ ဝုတ္တသရူပံ ယံ ကဉ္စိ အနာပုစ္ဆာတိ အတ္ထော။ ‘‘ဘိက္ခု ဝါ သာမဏေရော ဝါ အာရာမိကော ဝါ လဇ္ဇီ ဟောတီ’’တိ (ပါစိ။ အဋ္ဌ။ ၁၁၃) ဝုတ္တတ္တာ အလဇ္ဇိံ အာပုစ္ဆိတွာ ဂန္တုံ န ဝဋ္ဋတီတိ ဝဒန္တိ။ ‘‘မယံ ဂမိဿာမာ’’တိ ဝတွာ အနုမတိဂဟဏံ အာပုစ္ဆနံ နာမ၊ တံ အနာပတ္တိယာ ကထံ အင်္ဂံ ဟောတီတိ စေ? ဂမနဿ အနုမတိယာ လဒ္ဓတ္တာ။ ‘‘ကပ္ပံ လဘိတွာ ဂန္တဗ္ဗ’’န္တိ ဝစနတော အနုမတိဒါယကေန ဝတ္တာဝတ္တံ သမ္ပဋိစ္ဆိတံ ဝိယ ဟောတီတိ လဒ္ဓကပ္ပတ္တာ ဧဝံ ဂစ္ဆတိ စေ၊ ဝဋ္ဋတိ။ အနိယျာတေတွာတိ နိယျာတနံ အကတွာ ဝတ္တာဝတ္တံ အပ္ပဋိယာဒေတွာ၊ အသမ္ပဋိစ္ဆာပေတွာတိ ဝုတ္တံ ဟောတိ။ ဝါရေတိ ပဒဝါရေ။

၁၀၆၂။ တသ္မာ ဌာနာတိ အတ္တနာ ဌတွာ အာဏာပိတဘောဇနသာလတော။ ယထာဟ အဋ္ဌကထာယံ ‘‘ဘောဇနသာလတော နိက္ခမိတွာ အညတ္ထ ဂစ္ဆတီ’’တိ (ပါစိ။ အဋ္ဌ။ ၁၁၁)။

၁၀၆၃။ သင်္ဃိကေ သင်္ဃိကသညိဝေမတိကပုဂ္ဂလိကသညီနံ ဝသေန တိကပါစိတ္တိယံ။ တိကာတီတေနာတိ အကုသလမူလတ္တိကာဒိတော သဝါသနသမုစ္ဆေဒပ္ပဟာနဝသေန အတိက္ကန္တေန။ တိကဒုက္ကဋန္တိ ‘‘ပုဂ္ဂလိကေ သင်္ဃိကသညီ၊ ဝေမတိကော၊ ပုဂ္ဂလိကသညီ အညဿ ပုဂ္ဂလိကေ အာပတ္တိ ဒုက္ကဋဿာ’’တိ (ပါစိ။ ၁၁၂) ဝစနတော ဒုက္ကဋတ္တယံ ဟောတိ။

၁၀၆၄-၅။ စိမိလိကံ နာမ ပရိကမ္မကတာယ ဘူမိယာ ဆဝိရက္ခနတ္ထံ အတ္ထရိတဗ္ဗပိလောတိကံ။ တဋ္ဋိကာ နာမ တာလပဏ္ဏာဒီဟိ ကတတဋ္ဋိကာ။ စမ္မံ သီဟစမ္မာဒိ။ သေနာသနပရိက္ခာရေ အကပ္ပိယစမ္မံ နာမ နတ္ထိ။ ယထာဟ ‘‘အဋ္ဌကထာသု ဟိ သေနာသနပရိဘောဂေ ပဋိက္ခိတ္တစမ္မံ နာမ န ဒိဿတိ၊ တသ္မာ သီဟစမ္မာဒီနံ ပရိဟရဏေယေဝ ပဋိက္ခေပေါ ဝေဒိတဗ္ဗော’’တိ (ပါစိ။ အဋ္ဌ။ ၁၁၂)။ ဣမဿ စ အဋ္ဌကထာပါဌဿ သာရတ္ထဒီပနိယာ (သာရတ္ထ။ ဋီ။ ပါစိတ္တိယ ၃။၁၁၂) ဧဝံ အတ္ထော ဝဏ္ဏိတော –

‘‘သီဟစမ္မာဒီနံ ပရိဟရဏေယေဝ ပဋိက္ခေပေါ ဝေဒိတဗ္ဗော’’တိ ဣမိနာ ‘‘န ဘိက္ခဝေ မဟာစမ္မာနိ ဓာရေတဗ္ဗာနိ သီဟစမ္မံ ဗျဂ္ဃစမ္မံ ဒီပိစမ္မံ၊ ယော ဓာရေယျ၊ အာပတ္တိ ဒုက္ကဋဿာ’’တိ ဧဝံ ဝုတ္တာယ ခန္ဓကပါဠိယာ အဓိပ္ပာယံ ဝိဘာဝေတိ။ ဣဒံ ဝုတ္တံ ဟောတိ – ‘‘အန္တောပိ မဉ္စေ ပညတ္တာနိ ဟောန္တိ၊ ဗဟိပိ မဉ္စေ ပညတ္တာနိ ဟောန္တီ’’တိ (မဟာဝ။ ၂၅၅) ဣမသ္မိံ ဝတ္ထုသ္မိံ သိက္ခာပဒဿ ပညတ္တတ္တာ မဉ္စပီဌေသု အတ္ထရိတွာ ပရိဘောဂေါယေဝ ပဋိက္ခိတ္တော၊ ဘူမတ္ထရဏဝသေန ပရိဘောဂေါ ပန အပ္ပဋိက္ခိတ္တောတိ။ ယဒိ ဧဝံ ‘‘ပရိဟရဏေယေဝ ပဋိက္ခေပေါ’’တိ ဣဒံ ကသ္မာ ဝုတ္တန္တိ? ယထာ ‘‘အနုဇာနာမိ ဘိက္ခဝေ သဗ္ဗံ ပါသာဒပရိဘောဂ’’န္တိ (စူဠဝ။ ၃၂၀) ဝစနတော ပုဂ္ဂလိကေပိ သေနာသနေ သေနာသနပရိဘောဂဝသေန နိယမိတံ သုဝဏ္ဏဃဋာဒိကံ ပရိဘုဉ္ဇိတုံ ဝဋ္ဋမာနမ္ပိ ကေဝလံ အတ္တနော သန္တကံ ကတွာ ပရိဘုဉ္ဇိတုံ န ဝဋ္ဋတိ၊ ဧဝမိဒံ ဘူမတ္ထရဏဝသေန ပရိဘုဉ္ဇိယမာနမ္ပိ အတ္တနော သန္တကံ ကတွာ တံ တံ ဝိဟာရံ ဟရိတွာ ပရိဘုဉ္ဇိတုံ န ဝဋ္ဋတီတိ ဒဿနတ္ထံ ‘‘ပရိဟရဏေယေဝ ပဋိက္ခေပေါ ဝေဒိတဗ္ဗော’’တိ ဝုတ္တန္တိ။

‘‘ဖလက’’န္တိ ဣမိနာ ပါဌာဂတံ ဖလကပီဌမေဝ ဒဿိတံ။ ယထာဟ အဋ္ဌကထာယံ ‘‘ဖလကပီဌံ နာမ ဖလကမယံ ပီဌ’’န္တိ (ပါစိ။ အဋ္ဌ။ ၁၁၂)။ ပါဒပုဉ္ဆနိန္တိ ကဒလိဝါကာဒီဟိ ကတံ ပါဒပုဉ္ဆနိကံ။ ဘူမတ္ထရဏံ နာမ စိမိလိကာယ သတိ တဿာ ဥပရိ၊ အသတိ သုဒ္ဓဘူမိယံ အတ္ထရိတဗ္ဗာ ကဋသာရကာဒိဝိကတိ။ ဥတ္တရတ္ထရဏံ နာမ သင်္ဃိကမဉ္စပီဌာဒီနံ ဥပရိ အတ္ထရိတဗ္ဗပစ္စတ္ထရဏံ။

ပတ္တာဓာရကန္တိ ပတ္တဝလယာဓာရကံ။ တံ ယထာဝုတ္တပရိက္ခာရံ။ ဂစ္ဆတောတိ လေဍ္ဍုပါတံ အတိက္ကမ္မ ဂစ္ဆတော။ သစေ ပန ဒါယကေဟိ ဒါနကာလေယေဝ သဟဿဂ္ဃနကမ္ပိ ကမ္ဗလံ ‘‘ပါဒပုဉ္ဆနိံ ကတွာ ပရိဘုဉ္ဇထာ’’တိ ဒိန္နံ၊ တထေဝ ပရိဘုဉ္ဇိတုံ ဝဋ္ဋတိ။ တသ္မာ ဣမံ မဉ္စပီဌာဒိသေနာသနမ္ပိ ‘‘အဗ္ဘောကာသေပိ ယထာသုခံ ပရိဘုဉ္ဇထာ’’တိ ဒါယကေဟိ ဒိန္နံ စေ၊ သဗ္ဗသ္မိမ္ပိ ကာလေ အဗ္ဘောကာသေ နိက္ခိပိတုံ ဝဋ္ဋတီတိ ဝဒန္တိ။

၁၀၆၆။ အာရညကေနာပိ သစေ ဂန္တဗ္ဗံ ဟောတိ၊ အနောဝဿကေ နောသတိ မဉ္စပီဌာဒိံ ရုက္ခသ္မိံ လဂ္ဂေတွာ ယထာသုခံ ဂန္တဗ္ဗန္တိ ယောဇနာ။

၁၀၆၇။ ဥပစိကာဒီဟီတိ ဧတ္ထ အာဒိ-သဒ္ဒေန မူသိကာ ဂဟိတာ။ န လုဇ္ဇတီတိ န နဿတိ။ တံ သဗ္ဗန္တိ မဉ္စာဒိကံ သကလံ။

၁၀၆၈။ အတ္တနော သန္တကေတိ အတ္တနော ပုဂ္ဂလိကေ မဉ္စာဒိဝိသယေ။ ရုဒ္ဓေတိ ဝုဍ္ဎဘိက္ခုနာ ဝါ ဣဿရာဒီဟိ ဝါ ယက္ခသီဟာဒီဟိ ဝါ မဉ္စာဒိကေ ရုဒ္ဓေ အဇ္ဈာဝုတ္ထေ၊ အဘိဘဝိတွာ ဂဟိတေတိ အတ္ထော ။ အာပဒါသုပီတိ ဗြဟ္မစရိယန္တရာယာဒီသု စ သန္တေသု။ ဂစ္ဆတော ဘိက္ခုနော အနာပတ္တီတိ ယောဇနာ။

၁၀၆၉။ ကာယဝါစတော၊ ကာယဝါစာစိတ္တတော စ သမုဋ္ဌာနံ ကထိနသမုဋ္ဌာနံ နာမ။ ပညတ္တိံ အဇာနိတွာ သယံ အနုဒ္ဓရန္တဿ ကာယေန ဟောတိ၊ အနာပုစ္ဆန္တဿ ဝါစာယ ဟောတိ၊ ပညတ္တိံ ဇာနိတွာ ဧဝံ အကရောန္တဿ သစိတ္တကေန တေနေဝ ဒွယေန သမုဋ္ဌာတီတိ ဝေဒိတဗ္ဗံ။ လေဍ္ဍုပါတာတိက္ကမော ကြိယံ။ မဉ္စာဒီနံ အနုဒ္ဓရဏာဒိ အကြိယံ။

ပဌမသေနာသနကထာဝဏ္ဏနာ။

၁၀၇၀-၃။ ဘိသီတိ ပဌမသိက္ခာပဒေ ဝုတ္တပဉ္စပ္ပကာရာ ဣမိဿာ အဋ္ဌကထာယ ‘‘မဉ္စကဘိသိ ဝါ ပီဌကဘိသိ ဝါ’’တိ (ပါစိ။ အဋ္ဌ။ ၁၁၆) ဧဝံ ဒဿိတဘိသိ စ။ ပစ္စတ္ထရဏံ နာမ ပါဝါရော ကောဇဝေါ ဝါ။ ‘‘ဧတ္တကမေဝ ဝုတ္တန္တိ အဋ္ဌကထာသု ဝုတ္တံ။ ‘ဣဒဉ္စ အဋ္ဌကထာသု တထာဝုတ္တဘာဝဒဿနတ္ထံ ဝုတ္တံ၊ အညမ္ပိ တာဒိသံ မဉ္စပီဌေသု အတ္ထရိတဗ္ဗံ ပစ္စတ္ထရဏမေဝါ’တိ တီသုပိ ဂဏ္ဌိပဒေသု ဝုတ္တ’’န္တိ (သာရတ္ထ။ အဋ္ဌ။ ပါစိတ္တိယ ၃။၁၁၆) သာရတ္ထဒီပနိယာ လိခိတံ။ နိသီဒနန္တိ နိသီဒနစီဝရံ။

တိဏသန္ထာရော ဧရကာဒီနိ တိဏာနိ ဒွီသု တီသု ဌာနေသု ဂေါပေတွာ ကတသန္ထာရော။ ပဏ္ဏသန္ထာရော နာမ နာဠိကေရာဒိပဏ္ဏေ တထေဝ ဂေါပေတွာ ကတသန္ထာရော။ သယန္တိ ဧတ္ထာတိ သေယျာ။ ‘‘သဗ္ဗစ္ဆန္နပရိစ္ဆန္နေ’’တိ ဣဒံ သဟသေယျကထာယ ဝုတ္တတ္ထမေဝ။

ဒသဝိဓံ သေယျန္တိ ဒသဝိဓာသု သေယျာသု အညတရန္တိ ဝုတ္တံ ဟောတိ။ သန္ထရိတွာပိ ဝါတိ ဧတ္ထ ပိ-သဒ္ဒေါ သမ္ပိဏ္ဍနတ္ထော၊ သော သန္ထရာပေတွာပီတိ ဣမံ သမ္ပိဏ္ဍေတိ။ ဝါ-သဒ္ဒံ ‘‘သယံ အနုဒ္ဓရိတွာ’’တိ ဧတ္ထ ‘‘အနုဒ္ဓရိတွာ ဝါ’’တိ ယောဇေတွာ ‘‘အနုဒ္ဓရာပေတွာ ဝါ’’တိ အယံ ဝိကပ္ပော သင်္ဂယှတိ။ တံ သေယျံ။

အာရာမဿူပစာရန္တိ ‘‘အပရိက္ခိတ္တဿ ဥပစာရော နာမ သေနာသနတော ဒွေ လေဍ္ဍုပါတာ’’တိ အဋ္ဌကထာယံ ဝုတ္တံ ဥပစာရမာဟ။ အဿာတိ ဝိဟာရဿ ပရိက္ခိတ္တဿ။

၁၀၇၄။ ဥဘယေသန္တိ သေနာသနသေယျာနံ။ အန္တောဂဗ္ဘေ သန္ထရိတွာ ဂစ္ဆတောတိ သမ္ဗန္ဓော။

၁၀၇၅။ ဥပစာရေ ဝိဟာရဿာတိ ဧတ္ထ ဝိဟာရော နာမ အန္တောဂဗ္ဘာဒိသဗ္ဗပရိစ္ဆန္နဂုတ္တသေနာသနံ။ ယထာဟ အဋ္ဌကထာယံ ‘‘ဝိဟာရောတိ အန္တောဂဗ္ဘော ဝါ အညံ ဝါ သဗ္ဗပရိစ္ဆန္နံ ဂုတ္တသေနာသနံ ဝေဒိတဗ္ဗ’’န္တိ (ပါစိ။ အဋ္ဌ။ ၁၁၇)။ တတ္ထ ဥပစာရော နာမ တံသမီပံ ဌာနံ။ ယထာဟ ‘‘ဥပစာရေတိ တဿ ဗဟိ အာသန္နေ ဩကာသေ’’တိ။ မဏ္ဍပေါ နာမ ပရိစ္ဆန္နာပရိစ္ဆန္နသန္နိပါတမဏ္ဍပေါ။ ယထာဟ ‘‘မဏ္ဍပေ ဝါတိ အပရိစ္ဆန္နေ ပရိစ္ဆန္နေ ဝါပိ ဗဟူနံ သန္နိပါတမဏ္ဍပေ’’တိ။ အာဒိ-သဒ္ဒေန ဥပဋ္ဌာနသာလာရုက္ခမူလာနိ သင်္ဂဟိတာနိ။ ဥပဋ္ဌာနသာလာ နာမ အဂုတ္တာ ဘောဇနသာလာ။ ယထာဟ ‘‘ဥပဋ္ဌာနသာလာယံ ဝါတိ ဘောဇနသာလာယံ ဝါ’’တိ (ပါစိ။ အဋ္ဌ။ ၁၁၇)။ အဂုတ္တတာ စ ‘‘ဌာနဿ အဂုတ္တတာယာ’’တိ (ပါစိ။ အဋ္ဌ။ ၁၁၇) အဋ္ဌကထာဝစနတော ဝေဒိတဗ္ဗာတိ။

၁၀၇၆။ တိကပါစိတ္တိယံ ဝုတ္တန္တိ ‘‘သင်္ဃိကေ သင်္ဃိကသညီ၊ ဝေမတိကော၊ ပုဂ္ဂလိကသညီ’’တိ ဝါရတ္တယေ ပါစိတ္တိယတ္တယံ ဝုတ္တံ။ ဒသဝတ္ထူသု ဘဝံ တဒန္တောဂဓတ္တာတိ ဒသဝတ္ထုကံ၊ ဒသန္နံ ဝါ ဝတ္ထု ဒသဝတ္ထု၊ တံယေဝ ဒသဝတ္ထုကန္တိ ဘိသိအာဒိကံ အညတရံ သေယျာဘဏ္ဍံ။ တဿာတိ သန္ထာရကဿ။ ‘‘ပုဂ္ဂလိကေ သင်္ဃိကသညီ၊ ဝေမတိကော၊ ပုဂ္ဂလိကသညီ အညဿ ပုဂ္ဂလိကေ အာပတ္တိ ဒုက္ကဋဿာ’’တိ (ပါစိ။ ၁၁၇) တိကဒုက္ကဋံ ဒီပိတံ။

၁၀၇၇။ ဥဒ္ဓရိတွာတိ အတ္ထတသေယျံ ယထာ ဥပစိကာဟိ န ခဇ္ဇတိ၊ တထာ ပဋိသာမေတွာ၊ ‘‘ဂစ္ဆတော’’တိ ဣမိနာ သမ္ဗန္ဓော။ အညေန ဝုဒ္ဓဘိက္ခုဣဿရာဒိနာ။ ပလိဗုဒ္ဓေတိ သေနာသနေ ပရိဗုဒ္ဓေ နိဝါရိတေ။

၁၀၇၈။ သာပေက္ခောဝ စ ဂန္တွာတိ ‘‘အဇ္ဇေဝ ဂန္တွာ ဣဒံ ပဋိသာမေဿာမီ’’တိ အပေက္ခာသဟိတောဝ ဂါမန္တရာဒိံ ဂန္တွာ။ ယထာဟ ‘‘အဇ္ဇေဝ အာဂန္တွာ ပဋိဇဂ္ဂိဿာမီ’တိ ဧဝံ သာပေက္ခော နဒီပါရံ ဝါ ဂါမန္တရံ ဝါ ဂန္တွာ’’တိ (ပါစိ။ အဋ္ဌ။ ၁၁၈)။ တတ္ထ ဌတွာတိ ဂတဋ္ဌာနေ ဌတွာ၊ တတော ဗဟိ ဂစ္ဆာမီတိ စိတ္တေ ဥပ္ပန္နေတိ ဝုတ္တံ ဟောတိ။ ယထာဟ ‘‘ယတ္ထဿ ဂမနစိတ္တံ ဥပ္ပန္နံ၊ တတ္ထေဝ ဌိတော’’တိ (ပါစိ။ အဋ္ဌ။ ၁၁၈)။ တံ ပုစ္ဆတီတိ သမ္ဗန္ဓော။ တံ သေယျံ ကဉ္စိ ပေသေတွာ အာပုစ္ဆတီတိ ဝုတ္တံ ဟောတိ။ ယထာဟ ‘‘ကဉ္စိ ပေသေတွာ အာပုစ္ဆတီ’’တိ (ပါစိ။ အဋ္ဌ။ ၁၁၈)။ ဧတ္ထ စ ပုရိမသိက္ခာပဒေ မဉ္စာဒီနံ ပညတ္တဋ္ဌာနတော အန္တောဝိဟာရေ ဝါ ဟောတု ဗဟိ ဝါ၊ လေဍ္ဍုပါတာတိက္ကမေန၊ ဣဓ ဥပစာရာတိက္ကမေန ပါစိတ္တိယန္တိ အယံ ဝိသေသော ဝေဒိတဗ္ဗော။

အဗ္ဘောကာသမှိ မဉ္စာဒိံ၊ ဝိဟာရေ သေယျမတ္တကံ၊

ဟိတွာ ဝဇန္တဿ ဒေါသော၊ လေဍ္ဍုပါတူပစာရတောတိ။

ဒုတိယသေနာသနကထာဝဏ္ဏနာ။

၁၀၇၉။ ယော ဘိက္ခု သင်္ဃိကာဝါသေ ပုဗ္ဗုပဂတံ ဘိက္ခုံ ဇာနံ အနုပခဇ္ဇ သေယျံ ကပ္ပေယျ စေ၊ အဿ ဘိက္ခုနော ပါစိတ္တိယံ သိယာတိ ယောဇနာ။ ပုဗ္ဗုပဂတော နာမ ဝဿဂ္ဂေန ပါပေတွာ ဒိန္နံ သေနာသနံ ဂဟေတွာ ဝသန္တော။ ဇာနန္တိ ‘‘အနုဋ္ဌာပနီယော အယ’’န္တိ ဇာနန္တော။ အနုဋ္ဌာပနီယာ နာမ ဝုဒ္ဓါဒယော။ ယထာဟ ပဒဘာဇနေ ‘‘ဇာနာတိ နာမ ဝုဍ္ဎောတိ၊ ဂိလာနောတိ၊ သင်္ဃေန ဒိန္နောတိ ဇာနာတီ’’တိ (ပါစိ။ ၁၂၁)။ အနုပခဇ္ဇာတိ အနုပဝိသိတွာ၊ တဿ ပဌမံ ပညတ္တံ မဉ္စာဒီနံ အာသန္နတရံ ဝက္ခမာနလက္ခဏံ ဥပစာရံ ပဝိသိတွာတိ အတ္ထော။ သေယျံ ကပ္ပေယျာတိ ဒသဝိဓာသု သေယျာသု အညတရံ အတ္ထရိတွာ သယနံ ကရေယျ၊ နိပဇ္ဇေယျာတိ ဝုတ္တံ ဟောတိ။ ဝက္ခတိ စ ‘‘ဒသသွညတရံ သေယျ’’န္တိအာဒိ။ ‘‘နိသဇ္ဇံ ဝါ’’တိ သေသော။ ယထာဟ ပဒဘာဇနေ ‘‘အဘိနိသီဒတိ ဝါ အဘိနိပဇ္ဇတိ ဝါ’’တိ။

၁၀၈၀-၂။ ဥဒ္ဒိဋ္ဌမတ္ထံ နိဒ္ဒိသိတုကာမော ပဌမံ ‘‘အနုပခဇ္ဇသေယျံ ကပ္ပေယျာ’’တိ ဧတ္ထ ဝိနိစ္ဆယံ ဒဿေတုမာဟ ‘‘ပါဒဓောဝနပါသာဏာ…ပေ… ဒုက္ကဋ’’န္တိ။ သေနာသနံ ပဝိသန္တဿ ဘိက္ခုနော ပါဒဓောဝနပါသာဏာ ယာဝ တံ မဉ္စံ ဝါ ပီဌံ ဝါ နိက္ခမန္တဿ ပန မဉ္စပီဌတော ယာဝ ပဿာဝဋ္ဌာနံ၊ ဧတ္ထန္တရေ တု ယံ ဌာနံ၊ ဣဒမေဝ ဥပစာရောတိ ဝုစ္စတီတိ ယောဇနာ။ တတ္ထ ဥပစာရေတိ ယောဇနာ။ ဗာဓေတုကာမဿာတိ ‘‘ယဿ သမ္ဗာဓော ဘဝိဿတိ၊ သော ပက္ကမိဿတီ’’တိ ဧဝံ ဥပ္ပန္နစိတ္တဿ။ သယန္တိ ဧတ္ထာတိ ဝိဂ္ဂဟော။

၁၉၈၃။ ‘‘ပါစိတ္တိယဿာ’’တိ ဥဒ္ဒေသတော ဝုတ္တံ နိဒ္ဒိသိတုမာဟ ‘‘နိသီဒန္တဿာ’’တိအာဒိ။ တတ္ထာတိ တထာ အနုပခဇ္ဇ အတ္ထတာယ သေယျာယ။ ‘‘ပါစိတ္တိယဒွယ’’န္တိ ဣဒံ ‘‘ဒွေပိ ကရောန္တဿာ’’တိ ဣမံ ပစ္ဆိမဝိကပ္ပံ သန္ဓာယ ဝုတ္တံ။ ပုရိမဝိကပ္ပဒွယေ ပန ‘‘နိသီဒန္တဿ ဝါ ပါစိတ္တိယံ၊ နိပဇ္ဇန္တဿ ဝါ ပါစိတ္တိယ’’န္တိ ဝတ္တဗ္ဗံ။ ဣမသ္မိံ ဝိကပ္ပတ္တယေ ပစ္စေကံ ‘‘တိကပါစိတ္တိယံ တိကဒုက္ကဋ’’န္တိ ဥဘယဿာပိ ဝတ္တဗ္ဗတာ အဋ္ဌကထာယံ ဝုတ္တာ။ ကထံ? သင်္ဃိကေ သင်္ဃိကသညီ၊ ဝေမတိကော၊ ပုဂ္ဂလိကသညီ နိသဇ္ဇံ ကပ္ပေတိ၊ ပါစိတ္တိယန္တိ နိသဇ္ဇာယ တိကပါစိတ္တိယံ၊ ဧဝံ သေယျာယ တိကပါစိတ္တိယံ၊ ဥဘယတ္ထ တိကပါစိတ္တိယဒွယန္တိ ဧဝံ ဝိကပ္ပဒွယေ ဒွါဒသ ပါစိတ္တိယာနိ။ ပုဂ္ဂလိကေ သင်္ဃိကသညီ၊ ဝေမတိကော၊ ပုဂ္ဂလိကသညီ အညဿ ပုဂ္ဂလိကေ နိသဇ္ဇံ ကပ္ပေတိ၊ ဒုက္ကဋန္တိ နိသဇ္ဇာယ တိကဒုက္ကဋံ၊ ဧဝံ သေယျာယ တိကဒုက္ကဋံ၊ ဥဘယတ္ထ တိကဒုက္ကဋဒွယန္တိ ဒွါဒသ ဒုက္ကဋာနိ စ ဝေဒိတဗ္ဗာနိ။

၁၀၈၄။ ကရောန္တဿာတိ ဧတ္ထ ‘‘နိသီဒနာဒိ’’န္တိ ပကရဏတော လဗ္ဘတိ။ တိကပါစိတ္တိယံ ဝုတ္တန္တိ ‘‘သင်္ဃိကေ သင်္ဃိကသညီ၊ ဝေမတိကော၊ ပုဂ္ဂလိကသညီ’’တိ ဝိကပ္ပတ္တယေ တိကပါစိတ္တိယံ ပါဠိယံ (ပါစိ။ ၁၂၂) ဝုတ္တံ။ ဧဝံ ပုဂ္ဂလိကေပိ တိကဒုက္ကဋံ ဝုတ္တံ။ တေနာဟ ‘‘ပုဂ္ဂလေ တိကဒုက္ကဋ’’န္တိ။ ဣမိနာ ယထာဝုတ္တပါစိတ္တိယဒုက္ကဋာနိ သာမညေန တိကေ ပက္ခိပိတွာ ဧဝံ ဝုတ္တာနီတိ ဝေဒိတဗ္ဗံ။

၁၀၈၅-၆။ ‘‘ဝုတ္တူပစာရ’’န္တိအာဒိဂါထာဒွယေ ဝိဟာရဿ ဝုတ္တူပစာရံ မုဉ္စိတွာ ဥပစာရေ ဝါ အဗ္ဘောကာသေပိ ဝါ သန္ထရတောပိ ဝါ သန္ထရာပယတောပိ ဝါ တတ္ထ နိသီဒတော ဝါ ဒုက္ကဋံ ဝုတ္တံ။ တတ္ထ သဗ္ဗတ္ထေဝ တဿ နိဝါသော ဝါရိတောတိ ယောဇနာ။ တတ္ထ ဝိဟာရဿာတိ ယထာဝုတ္တသေနာသနဿ။ ဥပစာရေတိ အဝိဒူရေ။ အဗ္ဘောကာသေတိ တဿ သေနာသနဿ နစ္စာသန္နေ အင်္ဂဏပ္ပဒေသေ။

နိသီဒတော ဝါတိ ဝါဂ္ဂဟဏေန နိပဇ္ဇတော ဝါ ဒွေပိ ကရောန္တဿ ဝါတိ သင်္ဂဏှာတိ။ ယထာဟ ပါဠိယံ ‘‘အဘိနိသီဒတိ ဝါ အဘိနိပဇ္ဇတိ ဝါ၊ အာပတ္တိ ဒုက္ကဋဿာ’’တိ (ပါစိ။ ၁၂၂)။ တတ္ထာတိ တသ္မိံ ပုဗ္ဗူပဂတဿ ပတ္တေ သေနာသနေ။ သဗ္ဗတ္ထေဝါတိ ယထာဝုတ္တူပစာရတော အန္တော စ ဗဟိ စ အန္တမသော အဇ္ဈောကာသေပီတိ သဗ္ဗတ္ထေဝ။ တဿာတိ အနတ္တမနဿ အနုပခဇ္ဇ သေယျံ ကပ္ပယတော တဿ ဝိသဘာဂပုဂ္ဂလဿ။ နိဝါသော ဝါရိတော ပရဝိဟေဌကေန သဟဝါသဿ မဟာနတ္ထကရတ္တာတိ အဓိပ္ပာယော။ ယထာဟ အဋ္ဌကထာယံ ‘‘ဧဝရူပေန ဟိ ဝိသဘာဂပုဂ္ဂလေန ဧကဝိဟာရေ ဝါ ဧကင်္ဂဏေ ဝါ ဝသန္တေန အတ္ထော နတ္ထိ၊ တသ္မာ သဗ္ဗတ္ထေဝဿ နိဝါသော ဝါရိတော’’တိ (ပါစိ။ အဋ္ဌ။ ၁၂၂)။

၁၀၈၇။ ‘‘သီတာဒိဥပပီဠိတဿာ’’တိ ပဒစ္ဆေဒေါ၊ သီတာဒီဟိ ဥပပီဠိတဿ ဗာဓိတဿာတိ အတ္ထော။ အာဒိ-သဒ္ဒေန ‘‘ဥဏှေန ဝါ’’တိအာဒိကံ သင်္ဂဏှာတိ။ ယထာဟ ‘‘သီတေန ဝါ ဥဏှေန ဝါ ပီဠိတော ပဝိသတီ’’တိ။ ဧတ္ထ အာပဒါ နာမ ဗဟိ သယန္တဿ ဇီဝိတဗြဟ္မစရိယန္တရာယာပဇ္ဇနံ။

၁၀၈၈။ ဣဒံ သိက္ခာပဒံ ဒုက္ခဝေဒနံ ဟောတီတိ ယောဇနာ။

အနုပခဇ္ဇကထာဝဏ္ဏနာ။

၁၀၈၉။ နိက္ကဍ္ဎေယျာတိ နီဟရေယျ။ နိက္ကဍ္ဎာပေယျ ဝါတိ နီဟရာပေယျ ဝါ။

၁၉၉၀။ ဗဟူ ဘူမိယော ဝါလိကာတလသင်္ခါတာ ယဿ သော ဗဟုဘူမော၊ ပါသာဒေါ။ သမာသန္တဝိဓိဝသေန ‘‘ဗဟုဘူမော’’တိ ဝုစ္စတိ။

၁၀၉၁။ ဌပေတွာ ဌပေတွာတိ တသ္မိံ တသ္မိံ ဌာနေ ဂတိနိဝတ္တိံ ကတွာ ကတွာ။

၁၀၉၂။ အယံ နယောတိ ‘‘နိက္ခမာ’တိ ဧကဝစနေန ဂစ္ဆန္တေ အနေကေပိ ဒွါရကောဋ္ဌကေ အတိက္ကန္တေ အာဏာပကဿ ဧကာဝ အာပတ္တိ ဟောတိ၊ ဌိတဋ္ဌာနတော ဌတွာ ဌတွာ နီဟရန္တဿ ဒွါရကောဋ္ဌဂဏနာယ ဟောတီ’’တိ အယံ နယော။ အာဏတ္တိယာ ခဏေယေဝါတိ ‘‘ဣမံ နိက္ကဍ္ဎာဟီ’’တိ အာဏတ္တိက္ခဏေယေဝ။

၁၀၉၃။ ဧကာဝါတိ ဧတ္ထ ‘‘ပါစိတ္တိ ဟောတီ’’တိ ဝတ္တဗ္ဗော။ ဗဟုကာနိ စေတိ ဧတ္ထ ‘‘ဒွါရာနီ’’တိ ဝတ္တဗ္ဗံ၊ အတိက္ကာမေတီတိ သမ္ဗန္ဓော။ ‘‘ဧတ္တကေ ဒွါရကောဋ္ဌကေ အတိက္ကမာပေတွာ နိက္ကဍ္ဎာဟီ’’တိ စ ‘‘ယာဝ ပရိယန္တဒွါရကောဋ္ဌကာ နိက္ကဍ္ဎာဟီ’’တိ စ ‘‘ဗဟူ ဒွါရကောဋ္ဌကေ အတိက္ကာမေတွာ နိက္ကဍ္ဎာဟီ’’တိ စ အာဏတ္တတ္တာ ဗဟူ ဒွါရကောဋ္ဌကေ အတိက္ကာမေတွာ သစေ နိက္ကဍ္ဎတီတိ အတ္ထော။ ယထာဟ အဋ္ဌကထာယံ ‘‘သစေ ပန ဧတ္တကာနိ ဒွါရာနိ နိက္ကဍ္ဎာဟီ’တိ ဝါ ‘ယာဝ မဟာဒွါရံ၊ တာဝ နိက္ကဍ္ဎာဟီ’တိ ဝါ ဧဝံ နိယမေတွာ အာဏတ္တော ဟောတိ၊ ဒွါရဂဏနာယ ပါစိတ္တိယာနီ’’တိ (ပါစိ။ အဋ္ဌ။ ၁၂၆)။ ဗဟူနိ ပါစိတ္တိယာနိ ဟောန္တီတိ ယောဇနာ။

၁၀၉၄။ ဥပဋ္ဌာနသာလာဒီတိ ဧတ္ထ နိဿက္ကတ္ထေ ပစ္စတ္တဝစနတော ဥပဋ္ဌာနသာလာဒိတောတိ အတ္ထော ဂဟေတဗ္ဗော။ ‘‘ဥပစာရတော’’တိ ဣမိနာ သမာနာဓိကရဏတ္တာ ဝိဟာရဿ ဥပဋ္ဌာနသာလာဒိတော ဥပစာရတောတိ ဝုတ္တံ ဟောတိ။ ယထာဟ ဂဏ္ဌိပဒေ ‘‘ဥပစာရော နာမ ဥပဋ္ဌာနသာလာဒိမတ္တမေဝါ’’တိ။ ကာယေနပိ ဝါစာယပိ တထာ နိက္ကဍ္ဎနေ စ ဒုက္ကဋန္တိ ဝက္ခမာနေန သဟ ယောဇနာ။ တဿာတိ ဥပသမ္ပန္နဿ။ အာဒိ-သဒ္ဒေန မဏ္ဍပါဒယော ဂဟိတာ။ ယထာဟ ‘‘ဝိဟာရဿ ဥပစာရာ ဝါ ဥပဋ္ဌာနသာလာယ ဝါ မဏ္ဍပါ ဝါ ရုက္ခမူလာ ဝါ အဇ္ဈောကာသာ ဝါ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ဒုက္ကဋဿာ’’တိ (ပါစိ။ ၁၂၇)။ ‘‘ဝါစာယာ’’တိ ဣမိနာ ‘‘နိက္ခမာ’’တိ စ ‘‘ဣမံ နိက္ကဍ္ဎာဟီ’’တိ အာဏာပနဉ္စ ဂဟိတံ။ ‘‘တထာ’’တိ ဣမိနာ ဧကေန ပယောဂေန ဧကာပတ္တိ၊ နာနာပယောဂေသု ပယောဂဂဏနာယ၊ ဒွါရဂဏနာယ ဝါ ဟောတီတိ ဝုတ္တမေဝ ပကာရံ ဥပသံဟရတိ။

၁၀၉၅။ ‘‘တထာ’’တိ ဣဒံ ‘‘ဣတရံ နိက္ကဍ္ဎန္တဿ ဒုက္ကဋ’’န္တိ ဣမိနာပိ ယောဇေတဗ္ဗံ။ ယထာ ဝိဟာရူပစာရတော ဥပဋ္ဌာနသာလာဒိတော ဥပသမ္ပန္နံ နိက္ကဍ္ဎန္တဿ၊ နိက္ကဍ္ဎာပေန္တဿ စ ဒုက္ကဋံ ဟောတိ၊ တထာ အနုပသမ္ပန္နဿ ဝိဟာရတော စ ဝိဟာရူပစာရတော စ နိက္ကဍ္ဎနာဒိံ ကရောန္တဿ ဘိက္ခုနော ဒုက္ကဋံ ဟောတီတိ အတ္ထော။ တထာ ဝိဟာရဿူပစာရာ ဝါ ဝိဟာရာ ဝါ သဗ္ဗေသမ္ပိ ပရိက္ခာရံ နိက္ကဍ္ဎန္တဿ ဒုက္ကဋန္တိ ယောဇနာ။ သဗ္ဗေသန္တိ ဥပသမ္ပန္နာနုပသမ္ပန္နာနံ။ ပရိက္ခာရန္တိ အန္တမသော ရဇနဆလ္လိပိ သင်္ဂယှတိ။ ယထာဟ အဋ္ဌကထာယံ ‘‘အန္တမသော ရဇနဆလ္လိမ္ပီ’’တိ (ပါစိ။ အဋ္ဌ။ ၁၂၆)။

၁၀၉၆။ ‘‘အသမ္ဗဒ္ဓေသူ’’တိ ဣမိနာ ဗျတိရေကတော အသိထိလဗဒ္ဓေသု ပရိက္ခာရေသု ဧကိဿာယေဝ အာပတ္တိယာ သမ္ဘဝံ ဒဿေတိ။ ယထာဟ အဋ္ဌကထာယံ ‘‘ဂါဠှံ ဗန္ဓိတွာ ဌပိတေသု ပန ဧကာဝ အာပတ္တီ’တိ မဟာပစ္စရိယံ ဝုတ္တ’’န္တိ (ပါစိ။ အဋ္ဌ။ ၁၂၆)။ သိထိလဗန္ဓနံ ပန သမ္မာ ဗန္ဓနံ န ဟောတီတိ အသမ္ဗဒ္ဓဝစနေန ဂဟိတန္တိ ဒဋ္ဌဗ္ဗံ။ အဿ ဘိက္ခုဿ ဝတ္ထူနံ ဂဏနာယ ဒုက္ကဋံ ပရိဒီပယေတိ ယောဇနာ၊ ပရိက္ခာရံ နီဟရန္တဿ၊ နီဟရာပေန္တဿ စ အဿ ဘိက္ခုနောတိ ဝုတ္တံ ဟောတိ။

၁၀၉၇-၈။ အန္တေဝါသိန္တိ စ သဒ္ဓိဝိဟာရိကန္တိ စ ဧတ္ထ ‘‘အသမ္မာဝတ္တန္တ’’န္တိ သေသော။ ယထာဟ အနာပတ္တိဝါရေ ‘‘အန္တေဝါသိကံ ဝါ သဒ္ဓိဝိဟာရိကံ ဝါ န သမ္မာ ဝတ္တန္တံ နိက္ကဍ္ဎတီ’’တိအာဒိ (ပါစိ။ ၁၂၈)။ နိက္ကဍ္ဎန္တဿာတိ ဧတ္ထ ‘‘နိက္ကဍ္ဎာပေန္တဿာ’’တိ သေသော။ အသမ္မာဝတ္တန္တံ အန္တေဝါသိံ ဝါ အလဇ္ဇိံ ဝါ တထာ အသမ္မာဝတ္တန္တံ သဒ္ဓိဝိဟာရိကံ ဝါ ဥမ္မတ္တကံ ဝါ တေသံ အန္တေဝါသိအာဒီနံ ပရိက္ခာရံ ဝါ အတ္တနော ဝသနဋ္ဌာနာ ဝါ တထာ ဝိဿာသိကဿ ဝသနဋ္ဌာနာ ဝါ နိက္ကဍ္ဎန္တဿ၊ နိက္ကဍ္ဎာပေန္တဿ ဝါ ဥပသမ္ပန္နံ ဝါ အနုပသမ္ပန္နံ ဝါ သင်္ဃိကဝိဟာရာ နိက္ကဍ္ဎန္တဿ သယံ ဥမ္မတ္တကဿ ဝါ အနာပတ္တိ ပကာသိတာတိ ယောဇနာ။

အဋ္ဌကထာယံ ‘‘အလဇ္ဇီအာဒယော ပန အတ္တနော ဝသနဋ္ဌာနတောယေဝ နိက္ကဍ္ဎိတဗ္ဗာ’’တိ (ပါစိ။ အဋ္ဌ။ ၁၂၈) ဝုတ္တံ၊ ပါဠိယဉ္စ ‘‘အတ္တနော ပုဂ္ဂလိကေ အနာပတ္တီ’’တိ (ပါစိ။ ၁၂၇) ဝုတ္တံ၊ ‘‘အတ္တနော ဝိဿာသိကဿ ဝသနဋ္ဌာနာ’’တိ ဣဒံ ကသ္မာ ဝုတ္တန္တိ စေ? ဣမဿေဝ ပါဌဿ အနုလောမတော ဝုတ္တံ။ အန္တေဝါသိကန္တိအာဒီသု ပဌမံ အသမ္မာဝတ္တနာဒိဘာဝေန ‘‘နိက္ကဍ္ဎိဿာမီ’’တိ စိန္တေတွာ နိက္ကဍ္ဎန္တဿ စိတ္တလဟုပရိဝတ္တိတာယ ကောပေ ဥပ္ပန္နေပိ အနာပတ္တိ။

၁၀၉၉။ ‘‘တထာ’’တိ ဣမိနာ ‘‘နိက္ကဍ္ဎန္တဿာ’’တိ စ တတ္ထေဝ သေသံ ‘‘နိက္ကဍ္ဎာပေန္တဿာ’’တိ (ပါစိ။ အဋ္ဌ။ ၁၂၆) စ ‘‘တဿ ပရိက္ခာရံ ဝါ’’တိ စ ယထာဝုတ္တံ ဥပသံဟရတိ။ ‘‘သင်္ဃာရာမာပိ သဗ္ဗသ္မာ’’တိ ဣဒံ ကလဟကာရကေနေဝ ယောဇေတဗ္ဗံ။ ယထာဟ အဋ္ဌကထာယံ ‘‘ဘဏ္ဍနကာရကကလဟကာရကမေဝ သကလသင်္ဃာရာမတော နိက္ကဍ္ဎိတုံ လဘတိ။ သော ဟိ ပက္ခံ လဘိတွာ သင်္ဃမ္ပိ ဘိန္ဒေယျာ’’တိ (ပါစိ။ အဋ္ဌ။ ၁၂၈)။ ဣဒံ တူတိ ဧတ္ထ ဝိသေသတ္ထဇောတကေန တု-သဒ္ဒေန ဝုတ္တဝိသေသနံ ဝိနာ အဝသေသဝိနိစ္ဆယော အနန္တရသဒိသောယေဝါတိ ဒီပေတိ။ တိသမုဋ္ဌာနံ ကာယစိတ္တဝါစာစိတ္တကာယဝါစာစိတ္တတော သမုဋ္ဌာနတောတိ။

နိက္ကဍ္ဎနကထာဝဏ္ဏနာ။

၁၁၀၀-၁။ မဇ္ဈိမာသီသဃဋ္ဋာယာတိ သီသံ န ဃဋ္ဋေတီတိ အသီသဃဋ္ဋာ၊ မဇ္ဈိမဿ အသီသဃဋ္ဋာ မဇ္ဈိမာသီသဃဋ္ဋာ၊ တာယ၊ ပမာဏမဇ္ဈိမဿ ပုရိသဿ သီသာဃဋ္ဋနပ္ပမာဏုဗ္ဗေဓဟေဋ္ဌိမတလာယာတိ အတ္ထော။ ဝေဟာသကုဋိယာတိ ပဒရာဒီဟိ ဥပရိ အစ္ဆန္နတလာယ ဒွိဘူမိကာဒိဘေဒါယ ကုဋိယာ။ ဥပရီတိ မတ္ထကေ၊ အကတပဒရာဒိအတ္ထရဏာယ တုလာမတ္တယုတ္တာယ ဥပရိမတလေတိ ဝုတ္တံ ဟောတိ။ ယထာဟ အဋ္ဌကထာယံ ‘‘ယာဟိ ကာဟိစိ ဥပရိ အစ္ဆန္နတလာ ဒွိဘူမိကကုဋိ ဝါ တိဘူမိကာဒိကုဋိ ဝါ ‘ဝေဟာသကုဋီ’တိ ဝုစ္စတိ၊ ဣဓ ပန အသီသဃဋ္ဋာ အဓိပ္ပေတာ’’တိ (ပါစိ။ အဋ္ဌ။ ၁၃၁)။ အာဟစ္စပါဒကေမဉ္စေတိ ‘‘အာဟစ္စပါဒကော နာမ မဉ္စော အင်္ဂေ ဝိဇ္ဈိတွာ ဌိတော ဟောတီ’’တိ ပါဠိယံ ဒဿိတေ အဋနိသီသာနိ ဝိဇ္ဈိတွာ ပါဒသိခံ အာဝုဏိတွာ ဥပရိသိခါယ အနာကောဋိတအာဏိမှိ ဌိတမဉ္စေတိ အတ္ထော။ အာဟစ္စပါဒကေ ပီဌေတိ သမ္ဗန္ဓော။ ယထာဟ ပါဠိယံ ‘‘အာဟစ္စပါဒကံ နာမ ပီဌံ အင်္ဂေ ဝိဇ္ဈိတွာ ဌိတံ ဟောတီ’’တိ (ပါစိ။ ၁၃၁)။ သောယေဝတ္ထော။

တသ္မိံ အာဟစ္စပါဒကေ မဉ္စေ ဝါ ပီဌေ ဝါ နိသီဒန္တဿ ဝါ နိပဇ္ဇန္တဿ ဝါ တဿ ဘိက္ခုနော ပယောဂဂဏနာယ ပါစိတ္တိယော သိယုန္တိ ယောဇနာ။

၁၁၀၂-၃။ သင်္ဃိကေ သင်္ဃိကသညိဝေမတိကပုဂ္ဂလိကသညီနံ ဝသေန တိကပါစိတ္တိယံ။ ပုဂ္ဂလေတိ ပုဂ္ဂလိကေ ဝိဟာရေ။ ဝေဟာသကုဋိယာ…ပေ… ဂဏနာယေဝ တဿ တိကဒုက္ကဋန္တိ ယောဇနာ။ ပုဂ္ဂလိကေ သင်္ဃိကသညိဝေမတိကအညပုဂ္ဂလိကသညီနံ ဝသေန တိကဒုက္ကဋံ။

ဟေဋ္ဌာ အပရိဘောဂေ ဝါတိ ဒါရုသမ္ဘာရာဒီနံ ဝသေန ဟေဋ္ဌိမတလေ အဝလဉ္ဇေ ဝါ။ သီသဃဋ္ဋာယ ဝါတိ သီသဃဋ္ဋနပ္ပမာဏတလာယ ကုဋိယာ ဝါ။ အဝေဟာသဝိဟာရေ ဝါတိ အဝေဟာသကုဋိယာ ဘူမိယံ ကတပဏ္ဏသာလာဒီသု။ ဧတ္ထာပိ ‘‘ဝိဿာသိကဝိဟာရေ’’တိ ဣဒံ ‘‘အတ္တနော ပုဂ္ဂလိကေ အနာပတ္တီ’’တိ (ပါစိ။ ၁၃၂) ဣမဿ အနုလောမနတော ဝုတ္တံ။

၁၁၀၄။ ယတ္ထ ပဋာဏိ ဝါ ဒိန္နာတိ ယသ္မိံ မဉ္စေ ပါဒသီသာနံ ဥပရိ အဋနိမတ္ထကတော တိရိယံ အာဏိ ပဝေသိတာ ဟောတိ၊ တတ္ထ အဘိနိသီဒတော၊ အဘိနိပဇ္ဇတော ဝါ န ဒေါသောတိ ယောဇနာ။ တတ္ထာတိ ပုဗ္ဗေ ဝုတ္တအပဝေသိတပဋာဏိမှိ မဉ္စေ ဝါ ပီဌေ ဝါ။ ‘‘ဌတွာ’’တိ ဣမိနာ နိပဇ္ဇနံ နိဝတ္တေတိ။ လဂေတီတိ ဥပရိဗဒ္ဓအင်္ကုသသိက္ကာဒီသု ယံ ကိဉ္စိ ပရိက္ခာရံ လဂေတိ။ ဣဒံ သိက္ခာပဒံ သမုဋ္ဌာနတော ဧဠကလောမေန သိက္ခာပဒေန သမံ မတန္တိ ယောဇနာ။

ဝေဟာသကုဋိကထာဝဏ္ဏနာ။

၁၁၀၅။ ယာဝ ဒွါရဿ ကောသမှာတိ ဧတ္ထ ‘‘မဟလ္လကဿ ဝိဟာရဿာ’’တိ သေသော၊ ‘‘မဟလ္လကော နာမ ဝိဟာရော သဿာမိကော ဝုစ္စတီ’’တိ (ပါစိ။ ၁၃၆) ပါဠိယံ ဝုတ္တတ္တာ ကာရာပေတာနံ ဒါယကာနံ သမ္ဘဝတော မဟလ္လကဿ ‘‘ဝိဟာရော နာမ ဥလ္လိတ္တော ဝါ ဟောတိ အဝလိတ္တော ဝါ ဥလ္လိတ္တာဝလိတ္တော ဝါ’’တိ ဒဿိတဘေဒဿ ဝိဟာရဿ ဒွါရကောသသင်္ခါတပိဋ္ဌသင်္ဃာဋဿ ‘‘သမန္တာ ဟတ္ထပါသာ’’တိ (ပါစိ။ ၁၃၆) ပါဠိယံ ဝုတ္တဒွါရကဝါဋပုထုလပ္ပမာဏဒွါရဗာဟသမီပံ အဝဓိံ ကတွာတိ အတ္ထော။ ယထာဟ အဋ္ဌကထာယံ ‘‘ဒွါရကောသော နာမ ပိဋ္ဌသင်္ဃာဋဿ သမန္တာ ကဝါဋဝိတ္ထာရပ္ပမာဏော ဩကာသော’’တိ (ပါစိ။ အဋ္ဌ။ ၁၃၅)။

အဂ္ဂဠဋ္ဌပနာယာတိ ဧတ္ထ အဂ္ဂဠသဟစရိယေန တံသဟိတဒွါရကဝါဋေန ယုတ္တဒွါရဗာဟာနမေဝ ဝုတ္တတ္တာ ဒွါရဗာဟာနံ နိစ္စလတ္ထာယာတိ အတ္ထော။ ယထာဟ အဋ္ဌကထာယံ ‘‘သကဝါဋဿ ဒွါရဗန္ဓဿ နိစ္စလဘာဝတ္ထာယာတိ အတ္ထော’’တိ (ပါစိ။ အဋ္ဌ။ ၁၃၅)။ လိမ္ပိတဗ္ဗန္တိ ဧတ္ထ ‘‘ပုနပ္ပုန’’န္တိ သေသော။ ယထာဟ အဋ္ဌကထာယံ ‘‘ပုနပ္ပုနံ လိမ္ပိတဗ္ဗော ဝါ လေပါပေတဗ္ဗော ဝါ’’တိ (ပါစိ။ အဋ္ဌ။ ၁၃၅)။ တိဏမတ္တိကာနံ ဥပရိ ပုနပ္ပုနံ မတ္တိကာလေပေါ ကာတဗ္ဗောတိ အတ္ထော။

၁၁၀၆-၇။ ယော ဉေယျော၊ အယံ နယောတိ သမ္ဗန္ဓော၊ ‘‘ပုနပ္ပုနံ လိမ္ပိတဗ္ဗံ ဝါ လေပါပေတဗ္ဗမေဝ ဝါ’’တိ ယော ဝုတ္တော၊ အယံ နယော ဝေဒိတဗ္ဗောတိ အတ္ထော။ အာလောကံ သန္ဓေတိ ပိဓေတီတိ အာလောကသန္ဓိ၊ ဝါတပါနကဝါဋာနမေတံ အဓိဝစနံ။ ယထာဟ ‘‘အာလောကသန္ဓီတိ ဝါတပါနကဝါဋကာ ဝုစ္စန္တီ’’တိ (ပါစိ။ အဋ္ဌ။ ၁၃၅)။ ဧတ္ထ ကဝါဋဿ သာမန္တာ ကဝါဋဒွါရဖလကဝိတ္ထာရပ္ပမာဏံ လေပဋ္ဌာနံ။ ယထာဟ ‘‘သဗ္ဗဒိသာသု ကဝါဋဝိတ္ထာရပ္ပမာဏော ဩကာသော’’တိ (ပါစိ။ အဋ္ဌ။ ၁၃၅)။

ဧတ္ထာယမဓိပ္ပာယော – ဝါတပါနကဝါဋဿ သာမန္တာ ဒွါရဖလကဝိတ္ထာရပ္ပမာဏေ ဌာနေ တိဏ္ဏံ မတ္တိကာနံ ဥပရိပိ ယတ္တကံ ဗဟလံ ဣစ္ဆတိ၊ တတ္တကေ ဌာနေ အာလောကသန္ဓိ ပရိကမ္မတ္ထာယ လိမ္ပိတဗ္ဗော ဝါ လေပါပေတဗ္ဗော ဝါတိ။ ‘‘ပုနပ္ပုနံ ဆာဒါပေသိ ပုနပ္ပုနံ လေပါပေသီ’’တိ (ပါစိ။ ၁၃၄) ဣမသ္မိံ ဝတ္ထုသ္မိံ ဥပ္ပန္နဒေါသေန သိက္ခာပဒဿ ပညတ္တတ္တာ လေပံ အနုဇာနန္တေန စ ဒွါရဗန္ဓနဿ သာမန္တာ အဍ္ဎတေယျဟတ္ထပ္ပမာဏေယေဝ ပဒေသေ ပုနပ္ပုနံ လေပဿ အနုညာတတ္တာ တတော အညတ္ထ ပုနပ္ပုနံ လိမ္ပေန္တဿ ဝါ လိမ္ပာပေန္တဿ ဝါ ဘိတ္တိယံ မတ္တိကာဟိ ကတ္တဗ္ဗကိစ္စံ နိဋ္ဌာပေတွာ ပုန စတုတ္ထလေပေ ဒိန္နေ ပါစိတ္တိယေန ဘဝိတဗ္ဗန္တိ ဝဒန္တိ။ ဂဏ္ဌိပဒေသု ပန တီသုပိ ပုနပ္ပုနံ လေပဒါနဿ ဝုတ္တပ္ပမာဏတော အညတ္ထ ပဋိက္ခိတ္တမတ္တံ ဌပေတွာ ပါစိတ္တိယဿ အဝုတ္တတ္တာ ဒုက္ကဋံ အနုရူပန္တိ ဝုတ္တံ။

ဆဒနဿာတိ ပဒဘာဇနေ ဝုတ္တာနံ ဣဋ္ဌကာသိလာသုဓာတိဏပဏ္ဏစ္ဆဒနာနံ အညတရဿ။ ဒွတ္တိပရိယာယန္တိ ဧတ္ထ အဋ္ဌကထာယံ ‘‘ပရိယာယေနာတိ ပရိက္ခေပေန၊ ဧဝံ ဆဒနံ ပန တိဏပဏ္ဏေဟိ လဗ္ဘတီ’’တိ (ပါစိ။ အဋ္ဌ။ ၁၃၆) ဝုတ္တတ္တာ ပရိယာယန္တိ တိဏေဟိ ဝါ ပဏ္ဏေဟိ ဝါ ပရိက္ခိပိတွာ ဆဒနမေဝ ဂဟေတဗ္ဗံ။ ဣဋ္ဌကာယ ဝါ သိလာယ ဝါ သုဓာယ ဝါ ဆဒနေ လဗ္ဘမာနံ မဂ္ဂေန ဆဒနံ ပန ဥပလက္ခဏဝသေန လဗ္ဘတိ။ ဒွတ္တိပရိယာယေန ဆဒနဉ္စ ‘‘သဗ္ဗမ္ပိ စေတံ ဆဒနံ ဆဒနူပရိ ဝေဒိတဗ္ဗ’’န္တိ (ပါစိ။ အဋ္ဌ။ ၁၃၆) အဋ္ဌကထာဝစနတော ဥပရူပရိ ဆဒနဝသေန ဝေဒိတဗ္ဗံ။ ဟရိတံ နာမ ပုဗ္ဗဏ္ဏာဒိ။ ယထာဟ အဋ္ဌကထာယံ ‘‘ဟရိတန္တိ စေတ္ထ သတ္တဓညဘေဒံ ပုဗ္ဗဏ္ဏံ၊ မုဂ္ဂမာသတိလကုလတ္ထအလာဗုကုမ္ဘဏ္ဍာဒိဘေဒဉ္စ အပရဏ္ဏံ အဓိပ္ပေတ’’န္တိ (ပါစိ။ အဋ္ဌ။ ၁၃၅)။ ဣမေသု အညတရဿာဘာဝေန အဟရိတံ နာမ။

အဓိဋ္ဌေယျန္တိ ဝိဓာတဗ္ဗံ။ တတော ဥဒ္ဓန္တိ တီဟိ ပရိယာယေဟိ ဝါ တီဟိ မဂ္ဂေဟိ ဝါ ဥဒ္ဓံ။ ယထာဟ အဋ္ဌကထာယံ ‘‘တိဏ္ဏံ မဂ္ဂါနံ ဝါ ပရိယာယာနံ ဝါ ဥပရီ’’တိ (ပါစိ။ အဋ္ဌ။ ၁၃၆)။ ပါစိတ္တိယံ ဟောတီတိ ဝက္ခမာနဒူရတာယ ယုတ္တေ အဟရိတဋ္ဌာနေ ဌတွာ သံဝိဒဟိတွာ တိက္ခတ္တုံ ဆာဒါပေတွာ တတိယဝါရေ ‘‘ဧဝံ ကရောဟီ’’တိ အာဏာပေတွာ ပက္ကမိတဗ္ဗံ။ အပက္ကမန္တေန တုဏှီဘူတေန ဌာတဗ္ဗံ၊ တတော ဥတ္တရိ စတုတ္ထဝါရေ ဆဒနတ္ထံ ဝိဒဟန္တဿ ဣဋ္ဌကာဒိဂဏနာယ၊ တိဏေသု တိဏဂဏနာယ၊ ပဏ္ဏေသု ပဏ္ဏဂဏနာယ ပါစိတ္တိယန္တိ ဝုတ္တံ ဟောတိ။ ယထာဟ ပါဠိယံ ‘‘မဂ္ဂေန ဆာဒေန္တဿ ဒွေ မဂ္ဂေ အဓိဋ္ဌဟိတွာ တတိယာယ မဂ္ဂံ အာဏာပေတွာ ပက္ကမိတဗ္ဗ’’န္တိအာဒိ (ပါစိ။ ၁၃၆)။ တတိယာယ မဂ္ဂန္တိ ဧတ္ထ တတိယာယာတိ ဥပယောဂတ္ထေ သမ္ပဒါနဝစနံ၊ တတိယံ မဂ္ဂန္တိ အတ္ထော။ တတ္ထာတိ ဟရိတေ၊ ‘‘သစေ ဟရိတေ ဌိတော အဓိဋ္ဌာတိ၊ အာပတ္တိ ဒုက္ကဋဿာ’’တိ (ပါစိ။ ၁၃၇) ဝစနတော အဓိဋ္ဌာနာယ တိဋ္ဌတောတိ လဗ္ဘတိ။ ဗီဇရောပနတော ပဋ္ဌာယ ယာဝ သဿံ တိဋ္ဌတိ၊ တာဝ ဟရိတံ နာမ။ ယထာဟ အဋ္ဌကထာယံ ‘‘ယသ္မိမ္ပိ ခေတ္တေ ဝုတ္တံ ဗီဇံ န တာဝ သမ္ပဇ္ဇတိ၊ ဝဿေ ပန ပတိတေ သမ္ပဇ္ဇိဿတီ’’တိအာဒိ (ပါစိ။ အဋ္ဌ။ ၁၃၅)။

၁၁၀၈-၉။ အဟရိတဋ္ဌာနေပိ တိဋ္ဌတော ပရိစ္ဆေဒံ ဒဿေတုမာဟ ‘‘ပိဋ္ဌိဝံသေ’’တိအာဒိ။ ‘‘ပိဋ္ဌိဝံသေ’’တိ ဣဒံ ဝံသယုတ္တသေနာသနဝသေန ဝုတ္တံ။ ကဏ္ဏိကံ ဂါဟာပေတွာ ကတသေနာသနဿာပိ ဥပလက္ခဏံ ဟောတိ။ ပိဋ္ဌိဝံသေတိ စ ‘‘ဂင်္ဂါယံ ဃောသော’’တိအာဒီသု ဝိယ သာမီပိကာဓာရေ ဘုမ္မံ။ ကုတောယံ ဝိသေသော လဗ္ဘတီတိ? အဋ္ဌကထာယံ ‘‘ပိဋ္ဌိဝံသဿ ဝါ ကူဋာဂါရကဏ္ဏိကာယ ဝါ ဥပရိ၊ ထုပိကာယ ဝါ ပဿေ နိသိန္နော ဟောတီ’’တိ (ပါစိ။ အဋ္ဌ။ ၁၃၅) ဝုတ္တဝိဓာနတော လဗ္ဘတိ။ ‘‘နိသိန္နော’’တိ အဋ္ဌကထာဝစနတော ဌိတောတိ ဧတ္ထ ဂတိနိဝတ္တိသာမညေန နိသိန္နော စ ဝုတ္တောတိ ဂဟေတဗ္ဗော။ ယသ္မိံ ဌာနေတိ ဧတ္ထ ‘‘အဟရိတေ’’တိ ပကရဏတော လဗ္ဘတိ။ ‘‘ဌာတု’’န္တိ ဣဒံ အဓိဋ္ဌာနကရဏတ္ထာယ ဌာနံ ဂဟေတွာ ဝုတ္တန္တိ ‘‘တဿ အန္တော အဟရိတေပိ ဌတွာ အဓိဋ္ဌာတုံ န လဗ္ဘတီ’’တိ (ပါစိ။ အဋ္ဌ။ ၁၃၆) အဋ္ဌကထာဝစနတော ဝိညာယတိ။

ပတနောကာသတောတိ ဧတ္ထ ပဌမတ္ထေ တော-ပစ္စယော။ တဉှိ ဌာနံ ဝိဟာရဿ ပတနောကာသောတိ ယောဇနာ။ ဟီတိ ဟေတုအတ္ထေ ဝတ္တမာနတော ယသ္မာ အဟရိတေ ပတန္တဿ ဝိဟာရဿေတံ ဌာနံ ပတနောကာသော၊ တသ္မာ တတ္ထ ဌာတုံ န ဝဋ္ဋတီတိ ဂဟေတဗ္ဗံ။

၁၁၁၁။ ဣမသ္မိံ သိက္ခာပဒေ အာဒေါ တာဝ ဝိဟာရပဒဿ ပဒဘာဇနေ ‘‘ဝိဟာရော နာမ ဥလ္လိတ္တော ဝါ’’တိအာဒိဝုတ္တတ္တာ (ပါစိ။ အဋ္ဌ။ ၁၃၆) တဗ္ဗိပရိယာယတော တိဏေဟေဝ ကတဆဒနဘိတ္တိကာ ကုဋိ တိဏကုဋိကာတိ ဝိညာယတီတိ တိဏဆဒနာ ကုဋိကာ တိဏကုဋိကာ။

ဒွတ္တိပရိယာယကထာဝဏ္ဏနာ။

၁၁၁၂။ ဇာနန္တိ တောယဿ သပ္ပာဏကဘာဝံ ဇာနန္တော။ သိဉ္စေယျ သိဉ္စာပေယျာတိ ဧတ္ထ ‘‘တေန ဥဒကေနာ’’တိ ဝတ္တဗ္ဗံ။ ယထာဟ အဋ္ဌကထာယံ ‘‘တေန ဥဒကေန သယံ ဝါ သိဉ္စေယျာ’’တိအာဒိ (ပါစိ။ အဋ္ဌ။ ၁၄၀)။

၁၁၁၃။ ယော ပန ဓာရံ အစ္ဆိန္ဒိတွာ သစေ မတ္တိကံ သိဉ္စေယျ၊ ဧဝံ သိဉ္စတော တဿာတိ ယောဇနာ။

၁၁၁၄-၅။ သန္ဒမာနကန္တိ တောယဝါဟိနိံ။ မာတိကံ အာဠိံ။ သမ္မုခံ ကရောန္တဿာတိ ဥဒကံ နှာယိတုမိစ္ဆိတံ ယဒိ၊ သယံ အဘိမုခံ ကရောန္တဿ။ တတ္ထ တတ္ထ ဗန္ဓတော အဿ ဘိက္ခုဿ ပယောဂဂဏနာယ အာပတ္တိ သိယာတိ ယောဇနာ။ ပယောဂဂဏနာတိ ပယောဂဂဏနာယ၊ ဥဒကံ ဗန္ဓိတွာ ဗန္ဓိတွာ ယထိစ္ဆိတဒိသာဘိမုခကရဏပယောဂါနံ ဂဏနာယာတိ အတ္ထော။

၁၁၁၆-၇။ ယံ ဇလံ တိဏာဒိမှိ ပက္ခိတ္တေ သစေ ခယံ ဝါ အာဝိလတ္တံ ဝါ ဂစ္ဆတိ၊ တာဒိသေ ဥဒကေ မတ္တိကံ၊ တိဏမေဝ ဝါ သစေ သကဋပုဏ္ဏမ္ပိ ဧကတော ပက္ခိပေယျ၊ ဧဝံ ပက္ခိပန္တဿ ဧကာ ပါစိတ္တိ။ ဧကေကံ မတ္တိကံ၊ တိဏမေဝ ဝါ။ ဝါ-သဒ္ဒေန ကဋ္ဌဂေါမယာဒိံ ဝါ ပက္ခိပန္တဿ ပယောဂဂဏနာယ ပါစိတ္တိယန္တိ ယောဇနာ။ အာဝိလတ္တန္တိ ပါဏကာ ယထာ နဿန္တိ၊ တထာ အာလုဠိတဘာဝံ။ ဣမိနာ ဧဝံ အဝိနဿမာနပါဏကေ မဟာဥဒကေ တိဏာဒိံ ပက္ခိပန္တဿ အနာပတ္တိဘာဝံ ဒီပေတိ။ ယထာဟ အဋ္ဌကထာယံ ‘‘ဣဒံ ပန မဟာဥဒကံ…ပေ… သန္ဓာယ ဝုတ္တ’’န္တိ (ပါစိ။ အဋ္ဌ။ ၁၄၀)။

၁၁၁၈။ ဒုက္ကဋံ ဟောတီတိ အာဏာပနပစ္စယာ ဒုက္ကဋံ ဟောတိ။ ဧကာ ပါစိတ္တိ။

၁၁၁၉။ သဗ္ဗတ္ထာတိ သပ္ပာဏကေ စ အပ္ပာဏကေ စ။ ဝိမတိဿာတိ သဟစရိယေန ဝိမတိသဟိတမာဟ။

၁၁၂၀။ ‘‘သဗ္ဗတ္ထာပါဏသညိဿာ’’တိအာဒီသု အဓိကာရတော လဗ္ဘမာနံ ‘‘သိဉ္စနာဒီသု ယံ ကိဉ္စိ ကရောန္တဿာ’’တိ ဣဒံ ပစ္စေကံ သမ္ဗန္ဓနီယံ။ သဗ္ဗတ္ထာတိ သပ္ပာဏကေ၊ အပ္ပာဏကေ စ။ အပါဏသညိဿာတိ ဧဝံ ကတေန ပယောဂေန နဿမာနာ ပါဏကာ န သန္တီတိသညိဿ။ အသဉ္စိစ္စာတိ ယထာ ပါဏကာ န နဿန္တိ၊ ဧဝံ ဃဋာဒီဟိ ဂဟိတံ သပ္ပာဏကဥဒကံ ဥဒကေယေဝ ဩသိဉ္စန္တဿ ဝါ ဩသိဉ္စာပေန္တဿ ဝါ ဝဋ္ဋိတွာ တသ္မိံ ဥဒကေ တိဏာဒိမှိ ပတိတေ အသဉ္စိစ္စ ကတံ နာမ ဟောတိ။ အသတိဿာတိ အသတိယာ ကရောန္တဿ။ အဇာနတောတိ ပါဏကာနံ အတ္ထိဘာဝံ အဇာနိတွာ ကရောန္တဿ။

၁၁၂၁-၂။ ဝဓကစိတ္တေ သတိ သတ္တမေ သပ္ပာဏကဝဂ္ဂေ ပဌမသိက္ခာပဒဿ ဝိသယဘာဝတော တတော ဝိသေသေတုမာဟ ‘‘ဝိနာ ဝဓကစိတ္တေနာ’’တိ။ ဣမသ္မိံ သိက္ခာပဒေ ပါဠိယံ (ပါစိ။ ၁၄၀) ‘‘သပ္ပာဏကံ ဥဒက’’န္တိ ဣမိနာ အဋ္ဌကထာဂတံ ပဌမင်္ဂဉ္စ ‘‘ဇာန’’န္တိ ဣမိနာ ဒုတိယင်္ဂဉ္စ ‘‘သိဉ္စေယျ ဝါ သိဉ္စာပေယျ ဝါ’’တိ ဣမိနာ စတုတ္ထင်္ဂဉ္စ ဝုတ္တံ၊ န ဝုတ္တံ တတိယင်္ဂံ။ တဉ္စ ခေါ ဝဓကစိတ္တဿ သတ္တမဝဂ္ဂေ ပဌမသိက္ခာပဒေန ပါစိတ္တိယဝစနတော ဧတ္ထ တဒဘာဝလက္ခဏံ တတိယင်္ဂံ ဝုတ္တမေဝ ဟောတီတိအဓိပ္ပာယေန အဋ္ဌကထာယံ ဝုတ္တန္တိ အာဟ ‘‘ဝိနာ ဝဓကစိတ္တေနာ’’တိ။ တေနေဝါဟ ‘‘စတ္တာရေဝဿ အင်္ဂါနိ၊ နိဒ္ဒိဋ္ဌာနိ မဟေသိနာ’’တိ။ အဿာတိ ဣမဿ သိက္ခာပဒဿ။

၁၁၂၃။ သပ္ပာဏကသညိဿ ‘‘ပရိဘောဂေန ပါဏကာ မရိဿန္တီ’’တိ ပုဗ္ဗဘာဂေ ဇာနန္တဿာပိ သိဉ္စနသိဉ္စာပနံ ‘‘ပဒီပေ နိပတိတွာ ပဋင်္ဂါဒိပါဏကာ မရိဿန္တီ’’တိ ဇာနန္တဿ ပဒီပုဇ္ဇလနံ ဝိယ ဝိနာပိ ဝဓကစေတနာယ ဟောတီတိ အာဟ ‘‘ပဏ္ဏတ္တိဝဇ္ဇံ တိစိတ္တ’’န္တိ။ ဧတ္ထ ကိသ္မိဉ္စိ ကုပိတဿ ဝါ ကီဠာပသုတဿ ဝါ သိဉ္စတော အကုသလစိတ္တံ၊ မာလာဂစ္ဆာဒိံ သိဉ္စတော ကုသလစိတ္တံ၊ ပဏ္ဏတ္တိံ အဇာနတော ခီဏာသဝဿ အဗျာကတစိတ္တန္တိ တိစိတ္တံ ဝေဒိတဗ္ဗံ။ တဿာတိ သတ္တမဝဂ္ဂေ ပဌမသိက္ခာပဒဿ။ အဿ စာတိ ဣမဿ သိဉ္စနသိက္ခာပဒဿ စ။ ဣဒံ ဝိသေသနန္တိ ဣဒံ နာနာကရဏံ။ ဧတ္ထ ဣမသ္မိံ ပကရဏေ နိဒ္ဒိဋ္ဌံ ပကာသိတန္တိ အတ္ထော။ တံ လောကဝဇ္ဇံ၊ ဣဒံ ပဏ္ဏတ္တိဝဇ္ဇံ။ တံ အကုသလစိတ္တံ၊ ဣဒံ တိစိတ္တံ။ တံ ဒုက္ခဝေဒနံ၊ ဣဒံ တိဝေဒနန္တိ ဝုတ္တံ ဟောတိ။

သတ္တမဝဂ္ဂေ ဒုတိယဿ ဣမဿ စ ကော ဝိသေသောတိ စေ? ဣမဿ သိက္ခာပဒဿ ‘‘သိဉ္စေယျ ဝါ သိဉ္စာပေယျ ဝါ’’တိ ဗာဟိရပရိဘောဂဝသေန ပဌမံ ပညတ္တတ္တာ ‘‘သပ္ပာဏကံ ဥဒကံ ပရိဘုဉ္ဇေယျာ’’တိ (ပါစိ။ ၃၈၈) သိက္ခာပဒံ အတ္တနော နဟာနပါနာဒိပရိဘောဂဝသေန ပညတ္တန္တိ ဝေဒိတဗ္ဗံ။ တသ္မိံ ဝါ ပဌမံ ပညတ္တေပိ အတ္တနော ပရိဘောဂဝသေနေဝ ပညတ္တတ္တာ ပုန ဣဒံ သိက္ခာပဒံ ဗာဟိရပရိဘောဂဝသေန ပညတ္တန္တိ ဂဟေတဗ္ဗံ။

သပ္ပာဏကကထာဝဏ္ဏနာ။

သေနာသနဝဂ္ဂေါ ဒုတိယော။

၁၁၂၄-၆။ အဋ္ဌင်္ဂယုတ္တဿာတိ ဧတ္ထ ‘‘သီလဝါ’’တိအာဒိ ဧကမင်္ဂံ၊ ‘‘ဗဟုဿုတော’’တိအာဒိ ဒုတိယံ၊ ‘‘ဥဘယာနိ ခေါ ပနဿာ’’တိအာဒိ တတိယံ၊ ‘‘ကလျာဏဝါစော ဟောတီ’’တိအာဒိ စတုတ္ထံ၊ ‘‘ယေဘုယျေန ဘိက္ခုနီနံ ပိယော ဟောတိ မနာပေါ’’တိ ပဉ္စမံ၊ ‘‘ပဋိဗလော ဟောတိ ဘိက္ခုနိယော ဩဝဒိတု’’န္တိ ဆဋ္ဌံ၊ ‘‘န ခေါ ပနေတံ ဘဂဝန္တံ ဥဒ္ဒိဿာ’’တိအာဒိ သတ္တမံ၊ ‘‘ဝီသတိဝဿော ဝါ ဟောတိ အတိရေကဝီသတိဝဿော ဝါ’’တိ အဋ္ဌမန္တိ ဧတာနိ ပါဌာဂတာနိ အဋ္ဌ အင်္ဂါနိ နာမ။ ဘိက္ခုနီနံ ဩဝါဒေါ၊ တဒတ္ထာယ သမ္မုတီတိ ဝိဂ္ဂဟော။ ဣဓာတိ ဣမသ္မိံ သိက္ခာပဒေ။ ဉတ္တိ စတုတ္ထီ ယဿ ကမ္မဿာတိ ဝိဂ္ဂဟော။ ‘‘ကမ္မေနာ’’တိ သေသော။

အဋ္ဌင်္ဂယုတ္တဿ ဘိက္ခုဿ မဟေသိနာ ဉတ္တိစတုတ္ထေန ကမ္မေန ယာ ဘိက္ခုနောဝါဒကသမ္မုတိ ဣဓ အနုညာတာ၊ တာယ အသမ္မတော ယော ဘိက္ခူတိ ယောဇနာ။

ဂရုဓမ္မေဟိ အဋ္ဌဟီတိ ‘‘ဝဿသတူပသမ္ပန္နာယ ဘိက္ခုနိယာ တဒဟုပသမ္ပန္နဿ ဘိက္ခုနော အဘိဝါဒနံ ပစ္စုပဋ္ဌာနံ အဉ္ဇလိကမ္မံ သာမီစိကမ္မံ ကာတဗ္ဗ’’န္တိအာဒီဟိ (ပါစိ။ ၁၄၉) ပါဠိယံ အာဂတေဟိ အဋ္ဌဟိ ဂရုဓမ္မေဟိ။ ဧကံ ဘိက္ခုနိံ၊ သမ္ဗဟုလာ ဝါ ဘိက္ခုနိယောတိ ဣဒံ ပကရဏတော လဗ္ဘတိ။ ဩသာရေန္တောဝါတိ ပါဠိံ ဥစ္စာရေန္တောဝ။ ယထာဟ အဋ္ဌကထာယံ ‘‘ဩသာရေတဗ္ဗာတိ ပါဠိ ဝတ္တဗ္ဗာ’’တိ (ပါစိ။ အဋ္ဌ။ ၁၄၉)။ တေ ဓမ္မေတိ ပုဗ္ဗေ ဝုတ္တေ တေ အဋ္ဌ ဂရုဓမ္မေ။ ဩဝဒေယျာတိ အဋ္ဌဂရုဓမ္မပါဠိဘာသနသင်္ခါတံ ဩဝါဒံ ကရေယျ။

ကိံ ဝုတ္တံ ဟောတိ? ပါဋိပဒေ ဩဝါဒတ္ထာယ အာဂန္တွာ ဝန္ဒိတွာ ဧကမန္တံ နိသိန္နာ ဘိက္ခုနိယော ‘‘တေန ဘိက္ခုနာ’’တိအာဒိနာ ပါဌာဂတနယေန ‘‘သမဂ္ဂတ္ထ ဘဂိနိယော’’တိ ပုစ္ဆိတွာ ‘‘သမဂ္ဂမှယျာ’’တိ ယဒိ ဝဒေယျုံ၊ ‘‘ဝတ္တန္တိ ဘဂိနိယော အဋ္ဌ ဂရုဓမ္မာ’’တိ ပုနပိ ပုစ္ဆိတွာ ‘‘ဝတ္တန္တယျာ’’တိ ယဒိ ဝဒေယျုံ၊ ‘‘ဧသော ဘဂိနိယော ဩဝါဒေါ’’တိ နိယျာဒေယျ။ ‘‘န ဝတ္တန္တယျာ’’တိ ယဒိ ဝဒေယျုံ၊ ‘‘ဝဿသတူပသမ္ပန္နာယာ’’တိအာဒိနာ အဋ္ဌဂရုဓမ္မပါဠိဘာသနဝသေန ဩဝါဒံ ကရေယျာတိ ဝုတ္တံ ဟောတိ။ ယထာဟ ‘‘ဩသာရေန္တောဝ တေ ဓမ္မေ ဩဝဒေယျာ’’တိ။

၁၁၂၇။ အညေန ဓမ္မေနာတိ သုတ္တန္တေန ဝါ အဘိဓမ္မေန ဝါ။ ဧကတောဥပသမ္ပန္နန္တိ ဘိက္ခုနိသင်္ဃေယေဝ ဥပသမ္ပန္နံ။ ယထာဟ အဋ္ဌကထာယံ ‘‘ဘိက္ခုနီနံ သန္တိကေ ဧကတောဥပသမ္ပန္နာယာ’’တိ။ တထာတိ ဩဝဒန္တဿ ဒုက္ကဋန္တိ ဒဿေတိ။

၁၁၂၈။ ဘိက္ခူနံ သန္တိကေယေဝ ဥပသမ္ပန္နန္တိ မဟာပဇာပတိယာ ဂေါတမိယာ သဒ္ဓိံ ပဗ္ဗဇိတာ ပဉ္စသတာ သာကိယာနိယော သင်္ဂဏှာတိ။ လိင်္ဂဝိပလ္လာသေ ဥပသမ္ပန္နဘိက္ခုနော လိင်္ဂပရိဝတ္တနေ သတိ တထာ ပါစိတ္တိ ဧဝ ပကာသိတာတိ အတ္ထော။

၁၁၂၉။ ဩဝါဒံအနိယျာဒေတွာတိ ‘‘ဝတ္တန္တိ ဘဂိနိယော အဋ္ဌ ဂရုဓမ္မာ’’တိ ပုစ္ဆိတွာ ‘‘ဝတ္တန္တယျာ’’တိ ဝုတ္တေတိ ဧတ္ထာပိ သောယေဝတ္ထော။

၁၁၃၀။ ဂရုဓမ္မေဟိ ဩဝဒတော ဒုက္ကဋန္တိ ယောဇနာ။

၁၁၃၁။ အဂဏှန္တဿ ဩဝါဒန္တိ ဧတ္ထ ဩဝါဒတ္ထံ ယာစနသန္ဒေသော တဒတ္ထတာယ ဩဝါဒေါတိ ဂဟိတောတိ ဩဝါဒသာသနံ အသမ္ပဋိစ္ဆန္တဿာတိ အတ္ထော။ အပစ္စာဟရတောပိ တန္တိ တံ အတ္တနာ ဂဟိတံ ဩဝါဒသာသနံ ဥပေါသထဂ္ဂေ အာရောစေတွာ ပါတိမောက္ခုဒ္ဒေသကေန ဒိန္နံ ပဋိသာသနံ ဘိက္ခုနိသင်္ဃဿ နေတွာ အဝဒန္တဿာပိ။ ဗာလန္တိ သာသနသမ္ပဋိစ္ဆနဉ္စ ဥပေါသထဂ္ဂံ နေတွာ အာရောစနဉ္စ ပဋိသာသနံ ဟရိတွာ ပါဋိပဒေ ဘိက္ခုနိသင်္ဃဂဏပုဂ္ဂလာနံ ယထာနုရူပံ ပစ္စာရောစနဉ္စ ကာတုံ အဇာနနတာယ ဗာလံ။ ဂိလာနန္တိ ဥပေါသထဂ္ဂံ ဂန္တွာပိ အာရောစနဿ ဗာဓကေန ဂေလညေန သမန္နာဂတံ ဂိလာနံ။ ဂမိကန္တိ ပါဋိပဒံ အနိသီဒိတွာ ဂန္တဗ္ဗံ အစ္စာယိကဂမနံ ဂမိကဉ္စ ဌပေတွာ ဒုက္ကဋံ သိယာတိ သမ္ဗန္ဓော။

၁၁၃၂။ ကမ္မသ္မိန္တိ ဧတ္ထ ကမ္မ-သဒ္ဒေန ဘိက္ခုနောဝါဒကဿ ဉတ္တိစတုတ္ထေန ကမ္မေန ဒိန္နံ သမ္မုတိကမ္မံ အဓိပ္ပေတန္တိ အဋ္ဌကထာယံ ဝုတ္တံ။ ဉတ္တိံ၊ ကမ္မဝါစဉ္စ ပရိဟာပေတွာ၊ ပရိဝတ္တေတွာ ဝါ ကတံ စေ၊ အဓမ္မကမ္မံ နာမ။ ဝဂ္ဂေတိ ဆန္ဒာရဟာနံ ဆန္ဒဿ အနာဟရဏေန ဝါ သန္နိပတိတာနံ ဥက္ကောဋေန ဝါ ဝဂ္ဂေ သတိ။ တိကပါစိတ္တိယံ သိယာတိ ‘‘အဓမ္မကမ္မေ အဓမ္မကမ္မသညီ ဝဂ္ဂံ ဘိက္ခုနိသင်္ဃံ ဝဂ္ဂသညီ ဩဝဒတိ၊ ဝေမတိကော ဩဝဒတိ၊ သမဂ္ဂသညီ ဩဝဒတိ၊ အာပတ္တိ ပါစိတ္တိယဿာ’’တိ (ပါစိ။ ၁၅၀) အဓမ္မကမ္မေ အဓမ္မကမ္မသညိပက္ခေ ဝုတ္တပါစိတ္တိယတ္တယံ ဟောတိ။

၁၁၃၃။ အဓမ္မေ ပန ကမ္မသ္မိံ ဝေမတိကဿာပီတိ ယောဇနာ။ ‘‘တထာ’’တိ ဣမိနာ ‘‘ဝဂ္ဂေ ဘိက္ခုနိသင်္ဃသ္မိံ၊ တိကပါစိတ္တိယံ သိယာ’’တိ ဣဒံ သင်္ဂဏှာတိ။ ကိံ ဝုတ္တံ ဟောတိ? အဓမ္မကမ္မေ ဝေမတိကပက္ခေ ‘‘ဝဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ပါစိတ္တိယဿာ’’တိ (ပါစိ။ ၁၅၀) အဓမ္မိကကမ္မေယေဝ ဝိမတိဝါရေ ဝုတ္တတိကပါစိတ္တိယံ ဟောတီတိ ဝုတ္တံ ဟောတိ။ ‘‘ဓမ္မကမ္မန္တိ သညိနော’’တိ ဣမိနာပိ ‘‘အဓမ္မေ ပန ကမ္မသ္မိ’’န္တိ ဣဒံ ယောဇေတဗ္ဗံ၊ ‘‘တထာ’’တိ သမ္ဗန္ဓော၊ တေန ‘‘ဝဂ္ဂေ’’တိအာဒိကံ သင်္ဂဏှာတိ။ ‘‘အဓမ္မကမ္မေ ဓမ္မကမ္မသညီ ဝဂ္ဂံ ဘိက္ခုနိသင်္ဃံ ဝဂ္ဂသညီ ဩဝဒတိ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ပါစိတ္တိယဿာ’’တိ (ပါစိ။ ၁၅၀) ဝုတ္တံ တိကပါစိတ္တိယံ ဟောတိ။ ဧဝမေတာ ပါစိတ္တိယော သန္ဓာယာဟ ‘‘နဝ ပါစိတ္တိယော ဝုတ္တာ’’တိ။

ဣမသ္မိံ ဝိယ အဓမ္မကမ္မဝါရေ ‘‘သမဂ္ဂေ ဘိက္ခုနိသင်္ဃသ္မိ’’န္တိ ဝိကပ္ပေ စ ဧဝမေဝ နဝ ပါစိတ္တိယော ဟောန္တီတိ အတိဒိသန္တော ‘‘သမဂ္ဂေပိ စ တတ္တကာ’’တိ အာဟ။ ယထာဟ ‘‘အဓမ္မကမ္မေ အဓမ္မကမ္မသညီ သမဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ပါစိတ္တိယဿ။ အဓမ္မကမ္မေ ဝေမတိကော သမဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ပါစိတ္တိယဿ။ အဓမ္မကမ္မေ ဓမ္မကမ္မသညီ သမဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ပါစိတ္တိယဿာ’’တိ (ပါစိ။ ၁၅၀)။

၁၁၃၄။ ဒွိန္နံ နဝကာနံ ဝသာတိ ယထာဒဿိတံ ဝဂ္ဂနဝကံ၊ သမဂ္ဂနဝကန္တိ ဒွိန္နံ နဝကာနံ ဝသေန။ တာတိ ပါစိတ္တိယော။

‘‘ဓမ္မကမ္မေ အဓမ္မကမ္မသညီ ဝဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ဒုက္ကဋဿ။ ဓမ္မကမ္မေ ဝေမတိကော ဝဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ဒုက္ကဋဿ။ ဓမ္မကမ္မေ ဓမ္မကမ္မသညီ ဝဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ဒုက္ကဋဿာ’’တိ ဝဂ္ဂပက္ခေ နဝ ဒုက္ကဋာနိ။ ‘‘ဓမ္မကမ္မေ အဓမ္မကမ္မသညီ သမဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ဒုက္ကဋဿ။ ဓမ္မကမ္မေ ဝေမတိကော သမဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော၊ သမဂ္ဂသညီ ဩဝဒတိ၊ အာပတ္တိ ဒုက္ကဋဿ။ ဓမ္မကမ္မေ ဓမ္မကမ္မသညီ သမဂ္ဂံ ဘိက္ခုနိသင်္ဃံ ဝဂ္ဂသညီ၊ ဝေမတိကော ဩဝဒတိ၊ အာပတ္တိ ဒုက္ကဋဿ။ ဓမ္မကမ္မေ ဓမ္မကမ္မသညီ သမဂ္ဂံ ဘိက္ခုနိသင်္ဃံ သမဂ္ဂသညီ ဩဝဒတိ၊ အနာပတ္တီ’’တိ (ပါစိ။ ၁၅၁) ဧတ္ထ အန္တေ ဝုတ္တံ အနာပတ္တိဝါရံ ဝိနာ အဝသေသေသု အဋ္ဌသု ဝါရေသု သမဂ္ဂပက္ခေ အဋ္ဌ ဒုက္ကဋာနိ။ ဧဝံ ပုရိမာနိ နဝ၊ ဣမာနိ အဋ္ဌာတိ ဓမ္မကမ္မပက္ခေ သတ္တရသ ဒုက္ကဋာနိ ဟောန္တီတိ အာဟ ‘‘ဒုက္ကဋံ ဓမ္မကမ္မေပိ၊ သတ္တရသဝိဓံ သိယာ’’တိ။

၁၁၃၅။ ‘‘ဩသာရေဟီ’’တိ ဝုတ္တော ကထေတိ ဝါတိ ယောဇနာ။ ‘‘အဋ္ဌဂရုဓမ္မံ ကထေဟီ’’တိ ဝုတ္တော တံ ကထေတိ ဝါ။ ပဉှံ ပုဋ္ဌော ကထေတိ ဝါတိ အဋ္ဌဂရုဓမ္မဝိသယေ ပဉှံ ပုဋ္ဌော တမေဝ ဝဒတိ ဝါ။ သိက္ခမာနာယ ကထေတိ ဝါတိ သမ္ဗန္ဓော။ သိက္ခမာနာယ အဋ္ဌဂရုဓမ္မေ ကထေတိ ဝါ၊ နေဝ ဒေါသောတိ အတ္ထော။ ဥမ္မတ္တကာဒိနော ကထယတော နေဝ ဒေါသောတိ ယောဇနာ။

၁၁၃၆။ ဣဒါနိ တိဏ္ဏမ္ပိ ဗဟုဿုတာနံ လက္ခဏေ ဧကတ္ထ ဒဿိတေ ဘိက္ခုနောဝါဒကဿ ဝိသေသော သုဝိညေယျော ဟောတီတိ တံ ဒဿေတုမာဟ ‘‘ဝါစုဂ္ဂတာဝ ကာတဗ္ဗာ’’တိအာဒိ။ ဒွေ မာတိကာ ပဂုဏာ ဝါစုဂ္ဂတာ ကာတဗ္ဗာတိ ယောဇနာ။ ဘိက္ခုဘိက္ခုနိဝိဘင်္ဂေ မာတိကာ ပဂုဏာ ဝါစုဂ္ဂတာဝ ကာတဗ္ဗာတိ ယောဇနာ၊ ဘိက္ခုဘိက္ခုနိဝိဘင်္ဂမာတိကာ ပဂုဏာ ကတွာ တာသံ အဋ္ဌကထံ ဥဂ္ဂဟေတွာ ပါဠိတော၊ အတ္ထတော စ ဝစနပထာရုဠှာ ဝေါဟာရက္ခမာယေဝ ကာတဗ္ဗာတိ ဝုတ္တံ ဟောတိ။ စတ္တာရော ဘာဏဝါရာ ပဂုဏာ ဝါစုဂ္ဂတာဝ ကာတဗ္ဗာတိ ပကာသိတာတိ ယောဇနာ။ ‘‘ပဂုဏာ’’တိ ဣမိနာ ပါဠိယံ ပဂုဏံ ကတွာ ဓာရေတွာ ပရိပုစ္ဆိတဗ္ဗန္တိ ဒဿေတိ။ ‘‘ဝါစုဂ္ဂတာဝ ကာတဗ္ဗာ’’တိ ဣမိနာ တဒတ္ထံ သုတွာ ဓာရေတွာ ပရိပုစ္ဆိတဗ္ဗမေဝါတိ ဒဿေတိ။

၁၁၃၇။ ပရိကထတ္ထာယာတိ သမ္ပတ္တာနံ ဓမ္မကထနတ္ထာယ။ ကထာမဂ္ဂေါတိ မဟာသုဒဿနကထာမဂ္ဂေါ။ မင်္ဂလ…ပေ… အနုမောဒနာတိ အဂ္ဂဿ ဒါနာဒိမင်္ဂလေသု ဘတ္တာနုမောဒနာသင်္ခါတာ ဒါနကထာ စ၊ ကုမာရမင်္ဂလာဒီသု မဟာမင်္ဂလသုတ္တာဒိမင်္ဂလာနုမောဒနာ စ၊ အမင်္ဂလံ နာမ ကာလကိရိယာ၊ တတ္ထ မတကဘတ္တာဒီသု တိရောကုဋ္ဋာဒိကထာ စာတိ ဧဝံ တိဿောယေဝါနုမောဒနာ။

၁၁၃၈။ ဥပေါသထာဒိအတ္ထာယာတိ ဧတ္ထ အာဒိ-သဒ္ဒေန ပဝါရဏာဒီနံ သင်္ဂဟော။ ကမ္မာကမ္မဝိနိစ္ဆယောတိ ကမ္မဝဂ္ဂေ ဝုတ္တဝိနိစ္ဆယော၊ ပရိဝါရေ ကမ္မဝဂ္ဂေ အာဂတခုဒ္ဒါနုခုဒ္ဒကကမ္မဝိနိစ္ဆယောတိ ဝုတ္တံ ဟောတိ။ ‘‘ကမ္မဋ္ဌာန’’န္တိ ဣမိနာ ‘‘ဥတ္တမတ္ထဿ ပါပက’’န္တိ ဝက္ခမာနတ္တာ ဝိပဿနာကမ္မဋ္ဌာနမာဟ။ ဝိပဿနာဝသေန ဥဂ္ဂဏှန္တေန စ ဓာတုဝဝတ္ထာနမုခေန ဥဂ္ဂဟေတဗ္ဗန္တိ ဂဏ္ဌိပဒေသု ဝုတ္တံ။ ဥတ္တမတ္ထဿာတိ အရဟတ္တဿ။

၁၁၃၉။ ဧတ္တကံ ဥဂ္ဂဟေတွာန ဗဟုဿုတောတိ ယထာဝုတ္တဓမ္မာနံ ဥဂ္ဂဟိတတ္တာ ဗဟုဿုတော။ ပဉ္စဝဿောတိ ဥပသမ္ပဒတော ပဋ္ဌာယ ပရိပုဏ္ဏပဉ္စသံဝစ္ဆရော။ ‘‘ဒသဝဿော’’တိ ဧတ္ထာပိ ဧသေဝ နယော။ သံဝစ္ဆရဝသေန ပဉ္စဝဿေသု ပရိပုဏ္ဏေသု ဝုတ္ထဝဿဝသေန အပရိပုဏ္ဏေသုပိ ပဉ္စဝဿောယေဝ။ ဣတရထာ ဦနပဉ္စဝဿောတိ ဝေဒိတဗ္ဗော။ ပရိပုဏ္ဏဝီသတိဝဿူပသမ္ပဒါဒီသု ဝိယ ကေစိ သံဝစ္ဆရဂဏနံ အဝိစာရေတွာ ‘‘ပဉ္စဝဿော’’တိဝစနသာမညေန ဝုတ္ထဝဿဂဏနမေဝ ဂဏှန္တိ၊ တဒယုတ္တံ။ တထာ ဂဟဏေသု ယုတ္တိ ဝါ မဂ္ဂိတဗ္ဗာ။ မုဉ္စိတွာ နိဿယန္တိ နိဿယဝါသံ ဇဟိတွာ။ ဣဿရောတိ နိဿယာစရိယဝိရဟေန ဣဿရော၊ ဣမိနာ နိဿယမုတ္တလက္ခဏံ ဒဿိတံ။

၁၁၄၀။ ဒွေဝိဘင်္ဂါတိ ဘိက္ခုဘိက္ခုနိဝိဘင်္ဂဒွယံ။ ဣဓ ‘‘ဝါစုဂ္ဂတာ’’တိ ဣဒံ ပရိပုစ္ဆမ္ပိ သန္ဓာယာဟာတိပိ ဝုတ္တံ။ တေနာဟ သာရတ္ထဒီပနိယံ ‘‘ဒွေ ဝိဘင်္ဂါ ပဂုဏာ ဝါစုဂ္ဂတာ ကာတဗ္ဗာ’တိဣဒံ ပရိပုစ္ဆာဝသေန ဥဂ္ဂဟဏမ္ပိ သန္ဓာယ ဝုတ္တ’န္တိ ဝဒန္တီ’’တိ (သာရတ္ထ။ ဋီ။ ပါစိတ္တိယ ၃။၁၄၅-၁၄၇)။ ဗျဉ္ဇနာဒိတောတိ ဧတ္ထ ဗျဉ္ဇနံ နာမ ပဒံ၊ အာဒိ-သဒ္ဒေန သင်္ဂဟိတံ အနုဗျဉ္ဇနံ နာမ အက္ခရံ၊ ပဒက္ခရာနိ အပရိဟာပေတွာတိ ဝုတ္တံ ဟောတိ။ စတူသွပိ နိကာယေသူတိ ဒီဃမဇ္ဈိမသံယုတ္တ အင်္ဂုတ္တရနိကာယေသု၊ နိဒ္ဓါရဏေ ဘုမ္မံ။ ဧကော ဝါ နိကာယော ပေါတ္ထကောပိ စ ဧကောတိ ယောဇနာ။ အပိ-သဒ္ဒေန ခုဒ္ဒကနိကာယဿာပိ သင်္ဂဟော ဝေဒိတဗ္ဗော။ ‘‘ပိ ဝါ’’တိ ဣမိနာ ခုဒ္ဒကနိကာယေ ဇာတကဘာဏကေန သာဋ္ဌကထံ ဇာတကံ ဥဂ္ဂဟေတွာပိ ဓမ္မပဒံ သဟ ဝတ္ထုနာ ဥဂ္ဂဟေတဗ္ဗမေဝါတိ ဒဿိတေ ဒွေ ပေါတ္ထကေ သမုစ္စိနောတိ၊ စတ္တာရိ ခန္ဓကဝတ္တာနိ ဝါ။

၁၁၄၂။ ဒိသာပါမောက္ခော ယတ္ထ ယတ္ထ ဝသတိ၊ တဿာ တဿာဒိသာယ ပါမောက္ခော ပဓာနော။ ယေနကာမံဂမောတိ ယတ္ထ ကတ္ထစိ ဒိသာဘာဂေ ယထာကာမံ ဝုတ္တိကော ဟောတီတိ အတ္ထော ။ ပရိသံ ဥပဋ္ဌာပေတုံ ကာမံ လဘတေ ဣဿရောတိ ယောဇနာ၊ ဣဿရော ဟုတွာ ဘိက္ခုပရိသာယ အတ္တာနံ ဥပဋ္ဌာပေတုံ ယထာရုစိယာ လဘတီတိ အတ္ထော။ ဧတ္တာဝတာ ပရိသူပဋ္ဌာပကလက္ခဏံ ဝုတ္တံ။

၁၁၄၃။ ဝါစုဂ္ဂန္တိ ဝါစုဂ္ဂတံ။ ဧတ္ထ စ ‘‘ဣဒါနိ အယံ ဘဏ္ဍပါထာဝိဓိ န ဟောတီတိ မိဟကပရိပုစ္ဆနကထာနုရူပတော အတ္ထကရဏံ န ဝါစုဂ္ဂတကရဏံ နာမာတိ ဝိညာယတီ’’တိ နိဿန္ဒေဟေ ဝုတ္တံ။ ဣမိနာ ယထာဝုတ္တံ ဒုတိယင်္ဂမေဝ သင်္ဂဟိတံ။

၁၁၄၄။ အဿာတိ ဣမဿ သိက္ခာပဒဿ။ အသမ္မတတာဒီနိ တီဏိ အင်္ဂါနီတိ အတ္တနော အသမ္မတတာ၊ ဘိက္ခုနိယာ ပရိပုဏ္ဏူပသမ္ပန္နတာ၊ ဩဝါဒဝသေန အဋ္ဌဂရုဓမ္မဘဏနန္တိ ဣမာနိ တီဏိ အင်္ဂါနိ။

ဩဝါဒကထာဝဏ္ဏနာ။

၁၁၄၆။ တိကပါစိတ္တိယန္တိ ‘‘အတ္ထင်္ဂတေ သူရိယေ အတ္ထင်္ဂတသညီ၊ ဝေမတိကော၊ အနတ္ထင်္ဂတသညီ’’တိ ဝိကပ္ပတ္တယေ။ ဧကတောဥပသမ္ပန္နန္တိ ဘိက္ခုနိသင်္ဃေ ဥပသမ္ပန္နံ။ ‘‘ဘိက္ခုသင်္ဃေ ဥပသမ္ပန္နံ ပန ဩဝဒတော ပါစိတ္တိယမေဝါ’’တိ အဋ္ဌကထာယံ ဝုတ္တံ။

၁၁၄၈။ ဥဒ္ဒေသာဒိနယေနာတိ ‘‘အနာပတ္တိ ဥဒ္ဒေသံ ဒေန္တော၊ ပရိပုစ္ဆံ ဒေန္တော’’တိအာဒိနာ အနာပတ္တိဝါရနယေန။ အဿာတိ ဘိက္ခုဿ။

အတ္ထင်္ဂတသူရိယကထာဝဏ္ဏနာ။

၁၁၄၉။ ‘‘သစေ အသမ္မတော’’တိ ဝက္ခမာနတ္တာ ဩဝဒန္တဿာတိ ဧတ္ထ ‘‘သမ္မတဿာ’’တိ လဗ္ဘတိ။ ဘိက္ခုနုပဿယန္တိ ဘိက္ခုနိဝိဟာရံ။ အညတြ ကာလာတိ ‘‘တတ္ထာယံ သမယော ၊ ဂိလာနာ ဟောတိ ဘိက္ခုနီ’’တိ ဝုတ္တကာလတော အညတြ။ ‘‘ဂိလာနာ နာမ ဘိက္ခုနီ န သက္ကောတိ ဩဝါဒါယ ဝါ သံဝါသာယ ဝါ ဂန္တု’’န္တိ (ပါစိ။ ၁၆၁) ဒဿိတေ ဂိလာနကာလေ အနာပတ္တီတိ ဝုတ္တံ ဟောတိ။

၁၁၅၀။ ပါစိတ္တိယဒွယံ ဟောတီတိ ပဌမသိက္ခာပဒေန၊ ဣမိနာ စ သိက္ခာပဒေန ဒွေ ပါစိတ္တိယာနိ ဟောန္တီတိ။ ‘‘တီဏိပိ ပါစိတ္တိယာနီ’’တိ ယောဇေတဗ္ဗာ၊ ပဌမဒုတိယတတိယေဟိ သိက္ခာပဒေဟိ တီဏိ ပါစိတ္တိယာနိ ဟောန္တီတိ အတ္ထော။

၁၁၅၁။ အညေန ဓမ္မေနာတိ ဂရုဓမ္မတော အညေန ဗုဒ္ဓဝစနေန။ ဒုက္ကဋဒွယန္တိ အသမ္မတဘိက္ခုနုပဿယဂမနမူလကံ ဒုက္ကဋဒွယံ။ ဘိက္ခုနောတိ အသမ္မတဿ ‘‘သမ္မတဿာပီ’’တိ ဝက္ခမာနတ္တာ။ ‘‘အဋ္ဌဟိ ဝါ ဂရုဓမ္မေဟိ အညေန ဝါ ဓမ္မေန ဩဝဒတိ၊ အာပတ္တိ ပါစိတ္တိယဿာ’’တိ (ပါစိ။ ၁၅၅) အတ္ထင်္ဂတသိက္ခာပဒေ ဝုတ္တတ္တာ ‘‘ရတ္တိဟေတုက’’န္တိ အာဟ၊ ရတ္တိဩဝါဒနမူလန္တိ အတ္ထော။

၁၁၅၂။ ပါစိတ္တိယဒွယန္တိ ဒုတိယတတိယမူလကံ။ ဂရုဓမ္မေန ဩဝါဒေါ ဂရုဓမ္မော၊ သော နိဒါနံ ယဿ ပါစိတ္တိယဿာတိ ဝိဂ္ဂဟော။ သမ္မတတ္တာ ဂရုဓမ္မနိဒါနဿ ပါစိတ္တိယဿ အဘာဝတောတိ သမ္ဗန္ဓော။ ဣမိနာ ပဌမသိက္ခာပဒေန အနာပတ္တိဘာဝံ ဒဿေတိ။

၁၁၅၃။ တဿေဝါတိ သမ္မတဿေဝ။ ဒုက္ကဋံ ဣမိနာ တတိယသိက္ခာပဒေန။ အနာပတ္တိ ပဌမသိက္ခာပဒေန၊ တေနေဝါဟ ‘‘သမ္မတတ္တာ’’တိ။ ပါစိတ္တိ ဒုတိယသိက္ခာပဒေန၊ တေနေဝါဟ ‘‘ရတ္တိယ’’န္တိ။

၁၁၅၄။ တိကပါစိတ္တိယံဝုတ္တန္တိ ‘‘ဥပသမ္ပန္နာယ ဥပသမ္ပန္နသညီ၊ ဝေမတိကော၊ အနုပသမ္ပန္နသညီ ဘိက္ခုနုပဿယံ ဥပသင်္ကမိတွာ အညတြ သမယာ ဩဝဒတိ၊ အာပတ္တိ ပါစိတ္တိယဿာ’’တိ (ပါစိ။ ၁၆၂) တိကပါစိတ္တိယံ ဝုတ္တံ။ ဣတရဒွယေတိ ‘‘အနုပသမ္ပန္နာယ ဥပသမ္ပန္နသညီ၊ အာပတ္တိ ဒုက္ကဋဿ။ အနုပသမ္ပန္နာယ ဝေမတိကော၊ အာပတ္တိ ဒုက္ကဋဿာ’’တိ (ပါစိ။ ၁၆၂) ဒဿိတေ ဣတရဒွယေ။ ဩဝဒန္တဿာတိ ယေန ကေနစိ ဩဝဒန္တဿ။

၁၁၅၅။ တိကပါစိတ္တိယံ၊ ဒုက္ကဋဋ္ဌာနေ ဒုက္ကဋမေဝ ဟောတီတိ ဒဿေတုမာဟ ‘‘တထာ’’တိ။ ဘိက္ခုနုပဿယံ ဂန္တွာ အညေန ဓမ္မေန ဩဝဒန္တဿ တထာတိ ယောဇနာ။

ဘိက္ခုနုပဿယကထာဝဏ္ဏနာ။

၁၁၅၆။ စီဝရာဒီနန္တိ အာဒိ-သဒ္ဒေန ပိဏ္ဍပါတာဒိဣတရပစ္စယတ္တယဉ္စ သက္ကာရဂရုကာရမာနနဝန္ဒနပူဇနာနိ စ သင်္ဂဟိတာနိ။ သမ္မတေတိ ဘိက္ခုနောဝါဒကသမ္မုတိယာ သမ္မတေ။

၁၁၅၇။ တိကပါစိတ္တိယံ ဝုတ္တန္တိ ‘‘ဓမ္မကမ္မေ ဓမ္မကမ္မသညီ၊ ဝေမတိကော၊ အဓမ္မကမ္မသညီ ဧဝံ ဝဒတိ၊ အာပတ္တိ ပါစိတ္တိယဿာ’’တိ (ပါစိ။ ၁၆၇) တိကပါစိတ္တိယံ ပါဠိယံ ဒဿိတမေဝ။ ဣဓ ကမ္မံ နာမ ယထာဝုတ္တံ သမ္မုတိကမ္မံ။ အဓမ္မကမ္မေ ဓမ္မကမ္မသညိဝေမတိကအဓမ္မကမ္မသညီနံ ဝသေန တိကဒုက္ကဋံ။ ဝီသတိဝဿော ဝါ အတိရေကဝီသတိဝဿော ဝါတိ သမ္မုတိယာ အင်္ဂါနိ။

၁၁၅၈။ ‘‘သမ္မတံ အနုပသမ္ပန္န’’န္တိ ကံ သန္ဓာယာဟာတိ စေ? သမ္မတေန ဟုတွာ သိက္ခံ ပစ္စက္ခာယ သာမဏေရဘာဝမုပဂတံ သန္ဓာယ ဝုတ္တံ။ အာမိသတ္ထာယာတိ စီဝရာဒီနမတ္ထာယ။

အာမိသကထာဝဏ္ဏနာ။

၁၁၆၂။ ဘိက္ခုနိယာ ဒိန္နန္တိ ဧတ္ထ ‘‘ဘိက္ခုဿာ’’တိ ဝတ္တဗ္ဗံ။ ဘိက္ခုနာ ဒိန္နန္တိ ယောဇနာ။ ‘‘ဘိက္ခုနိယာ’’တိ သေသော ။ တတ္ထာတိ စီဝရပဋိဂ္ဂဟဏသိက္ခာပဒေ။ သူစိတာတိ ပကာသိတာ။

စီဝရဒါနကထာဝဏ္ဏနာ။

၁၁၆၃။ အညာတိကာယ ဘိက္ခုနိယာ စီဝရန္တိ ယောဇနာ။

၁၁၆၄။ ဧတ္ထာတိ ဣမသ္မိံ သိက္ခာပဒေ။

၁၁၆၅။ သူစိံ စီဝရံ ပဝေသေတွာတိ သမ္ဗန္ဓော။ သူစိနီဟရဏေတိ စီဝရတော။

၁၁၆၆။ ပယောဂဿ ဝသာတိ ဧကက္ခဏေ ဗဟူ အာဝုဏိတွာ သူစိယာ နီဟရဏပယောဂဂဏနာယ။ ဗဟူ ပါစိတ္တိယောတိ ယောဇနာ၊ ပယောဂပ္ပမာဏာပတ္တိယော ဟောန္တီတိ အတ္ထော။

၁၁၆၉။ အနေကာ ပါစိတ္တိယာပတ္တီ ဟောန္တီတိ ယောဇနာ။ အာရပထေတိ သူစိမဂ္ဂေ။ ဒုတိယေ ပထေတိ ဧတ္ထ အာရ-သဒ္ဒေါ ဂါထာဗန္ဓသုခတ္ထံ လုတ္တောတိ ဝေဒိတဗ္ဗော။

၁၁၇၀။ ကာ ဟိ နာမ ကထာတိ ‘‘အနေကာပတ္တိယော ဟောန္တီ’’တိ ဧတ္ထ ကိံ ဝတ္တဗ္ဗန္တိ အတ္ထော။ တိကပါစိတ္တိယန္တိ ‘‘အညာတိကာယ အညာတိကသညီ၊ ဝေမတိကော၊ ဉာတိကသညီ စီဝရံ သိဗ္ဗတိ ဝါ သိဗ္ဗာပေတိ ဝါ၊ အာပတ္တိ ပါစိတ္တိယဿာ’’တိ (ပါစိ။ ၁၇၈) ဝုတ္တံ တိကပါစိတ္တိယံ။

၁၁၇၂။ အညံ ပရိက္ခာရန္တိ ဥပါဟနတ္ထဝိကာဒိံ။ သိဗ္ဗတောတိ ဧတ္ထ ‘‘သိဗ္ဗာပယတော’’တိ အဓိကာရတော လဗ္ဘတိ။ သိက္ခမာနသာမဏေရိယော သိက္ခမာနာဒိကာ နာမ။

၁၁၇၃။ သိဗ္ဗနကိရိယာယ အာပဇ္ဇိတဗ္ဗတော ကြိယံ။

စီဝရသိဗ္ဗနကထာဝဏ္ဏနာ။

၁၁၇၄-၅။ သံဝိဓာယာတိ ‘‘အဇ္ဇ ယာမ၊ သွေ ယာမာ’’တိအာဒိနာ နယေန သံဝိဒဟိတွာ။ ယထာဟ ‘‘အဇ္ဇ ဝါ ဟိယျော ဝါ ပရေ ဝါ ဂစ္ဆာမာတိ သံဝိဒဟတီ’’တိ (ပါစိ။ ၁၈၃)။ မဂ္ဂန္တိ ဧကဒ္ဓါနမဂ္ဂံ၊ အန္တမသော ဂါမန္တရမ္ပိ။ အညတြ သမယာတိ ‘‘တတ္ထာယံ သမယော၊ သတ္ထဂမနီယော ဟောတိ မဂ္ဂေါ သာသင်္ကသမ္မတော သပ္ပဋိဘယော’’တိ (ပါစိ။ ၁၈၂) ဝုတ္တကာလဝိသေသာ အညတြာတိ ဝုတ္တံ ဟောတိ။ သတ္ထဝါဟေဟိ ဝိနာ အဂမနီယော မဂ္ဂေါ သတ္ထဂမနီယော နာမ။ စောရာနံ သယိတနိသိန္နဋ္ဌိတခါဒိတပီတဋ္ဌာနာနိ ယတ္ထ ဒိဿန္တိ၊ တာဒိသော မဂ္ဂေါ သာသင်္ကော နာမ။ စောရေဟိ ဟတမာရိတဃာတဝိလုတ္တမနုဿာ ယတ္ထ ပညာယန္တိ၊ သော သပ္ပဋိဘယော နာမ။ ဣဓာတိ ဣမသ္မိံ ဘိက္ခုနိယာ သဒ္ဓိံ ကတသံဝိဓာနံ အဝိရာဓေတွာ တာယ ဧကဒ္ဓါနမဂ္ဂံ ပဋိပဇ္ဇနကာလေတိ အတ္ထော။

အညော ဂါမော ဂါမန္တရံ၊ တတ္ထ ဩက္ကမနံ ဥပဂမနံ ဂါမန္တရောက္ကမော၊ တသ္မိံ ကတေတိ အတ္ထော။ အဂါမကေ အရညေ အဒ္ဓယောဇနာတိက္ကမေ ဝါတိ ယောဇနာ၊ ဂါမရဟိတံ အရညမဂ္ဂမ္ပိ ဒွိဂါဝုတံ အတိက္ကန္တေ ဝါတိ အတ္ထော။

၁၁၇၆။ ‘‘အာပတ္တိ ဟောတီ’’တိ သာမညတော ဒဿိတအာပတ္တိယာ ဘေဒါဘေဒံ ဒဿေတုမာဟ ‘‘ဧတ္ထာ’’တိအာဒိ။ ဧတ္ထာတိ ဣမသ္မိံ သိက္ခာပဒဝိနိစ္ဆယေ၊ ပကရဏေ ဝါ။ ဒုက္ကဋံ ဒီပိတန္တိ သမ္ဗန္ဓော။ အကပ္ပိယဘူမဋ္ဌောတိ ဧတ္ထ အကပ္ပိယာ ဘူမိ နာမ အန္တောဂါမေ ဘိက္ခုနုပဿယဒွါရကောဋ္ဌကောတိ ဧဝမာဒိ။ ယထာဟ အဋ္ဌကထာယံ ‘‘သစေ ပန အန္တောဂါမေ ဘိက္ခုနုပဿယဒွါရေ ရထိကာယ၊ အညေသု ဝါ စတုက္ကသိင်္ဃာဋကဟတ္ထိသာလာဒီသု သံဝိဒဟန္တိ၊ ဘိက္ခုနော အာပတ္တိ ဒုက္ကဋဿာ’’တိ (ပါစိ။ အဋ္ဌ။ ၁၈၂-၁၈၃)။ ဧတ္ထ စ စတုန္နံ မဂ္ဂါနံ သမ္ဗန္ဓဋ္ဌာနံ စတုက္ကံ။ တိဏ္ဏံ မဂ္ဂါနံ သမ္ဗန္ဓဋ္ဌာနံ သိင်္ဃာဋကံ။

၁၁၇၇။ ကပ္ပိယဘူမိ နာမ ဘိက္ခုနုပဿယာဒိ။ ယထာဟ ‘‘သစေ ဥဘောပိ ဘိက္ခုနုပဿယေ ဝါ အန္တရာရာမေ ဝါ အာသနသာလာယ ဝါ တိတ္ထိယသေယျာယ ဝါ ဌတွာ သံဝိဒဟန္တိ၊ အနာပတ္တိ။ ကပ္ပိယဘူမိ ကိရာယံ။ တသ္မာ ဧတ္ထ သံဝိဒဟနပစ္စယာ ဒုက္ကဋာပတ္တိံ န ဝဒန္တီ’’တိ (ပါစိ။ အဋ္ဌ။ ၁၈၂-၁၈၃)။ တေနေဝါဟ ‘‘န ဝဒန္တဿ ဒုက္ကဋ’’န္တိ။ ‘‘န ဝဒန္တိ အဿာ’’တိ ပဒစ္ဆေဒေါ။

၁၁၇၈။ ဥဘယတ္ထာတိ အကပ္ပိယဘူမိယံ ဌတွာ သံဝိဓာယ ဂမနေ၊ ကပ္ပိယဘူမိယံ ဌတွာ သံဝိဓာယ ဂမနေ စာတိ ဥဘယဝိကပ္ပေ။ ဂစ္ဆန္တဿေဝါတိ ဧဝကာရေန နိက္ခန္တဿ ဇောတကံ။ ယထာဟ ‘‘နိက္ခမနေ အနာပတ္တီ’’တိ။ ‘‘ဘိက္ခုနော’’တိ ဣမိနာ ဘိက္ခုနိယာ အနာပတ္တိဘာဝံ ဒီပေတိ။ အာပတ္တိခေတ္တနိယမနတ္ထမာဟ ‘‘အနန္တရဿာ’’တိအာဒိ။

၁၁၇၉။ တတြာပီတိ ကပ္ပိယဘူမိဥပစာရောက္ကမနေပိ။ ဥဒီရိတန္တိ မဟာပစ္စရိယံ။ ယထာဟ ‘‘မဟာပစ္စရိယံ ဝုတ္တ’’န္တိ။

၁၁၈၀။ အန္တရာတိ အတ္တနော နိက္ခန္တဂါမဿ၊ အနန္တရဂါမဿ စ ဝေမဇ္ဈေ။ ယထာဟ ‘‘ဂါမတော နိက္ခမိတွာ ပန ယာဝ အနန္တရဂါမဿ ဥပစာရံ န ဩက္ကမတိ၊ ဧတ္ထန္တရေ သံဝိဒဟိတေပိ ဘိက္ခုနော ဒုက္ကဋ’’န္တိ (ပါစိ။ အဋ္ဌ။ ၁၈၂-၁၈၃)။ ဣမသ္မိံ သိက္ခာပဒေ ကာလဒွါရမဂ္ဂါနံ ဝသေန တယော သင်္ကေတဝိသင်္ကေတာတိ တေသု မဂ္ဂဒွါရဝိသင်္ကေတေပိ အာပတ္တိ ဟောတေဝါတိ ဒဿေတုမာဟ ‘‘ဒွါရ…ပေ… ဝုစ္စတီ’’တိ။ ကာလဝိသင်္ကေတေ ပန အနာပတ္တိံ ဝက္ခတိ။ အာပတ္တိ ပါစိတ္တိ။

၁၁၈၁။ အသံဝိဒဟိတေ ကာလေတိ ‘‘ပုရေဘတ္တံ ဂမိဿာမာ’’တိအာဒိနာ ကတသံဝိဓာနာနံ ပစ္ဆာဘတ္တာဒိ အသံဝိဒဟိတကာလံ နာမ၊ တသ္မိံ။ ဘိက္ခုဿေဝ ဝိဓာနသ္မိန္တိ ဘိက္ခုနိယာ သံဝိဓာနံ ဝိနာ ဘိက္ခုဿေဝ ဝိဓာနေ သတိ အာပတ္တိ ဒုက္ကဋံ။

၁၁၈၂။ သမယေ ဝိဒဟိတွာ ဂစ္ဆတော ဝါ အသမယေ ဝိဒဟိတွာ ဝိသင်္ကေတေန ဂစ္ဆတော ဝါ အာပဒါသု ဝိဒဟိတွာ ဂစ္ဆတော ဝါ အနာပတ္တီတိ ယောဇနာ။ တထာတိ ‘‘ဝိဒဟိတွာ ဂစ္ဆတော အနာပတ္တီ’’တိ ဣဒံ အတိဒိသတိ။

တတ္ထ သမယော နာမ ယထာဝုတ္တကာလဝိသေသော။ ဝိသင်္ကေတော နာမ ကာလဝိသင်္ကေတော၊ ‘‘အသုကသ္မိံ ဒိဝသေ အသုကဝေလာယ ဂမိဿာမာ’’တိ သံဝိဒဟိတွာ ဂမနကာလေ တဿ ကာလသင်္ကေတဿ ဝိဘဝနန္တိ ဝုတ္တံ ဟောတိ။ ယထာဟ ‘‘ကာလဝိသင်္ကေတေယေဝ အနာပတ္တီ’’တိ (ပါစိ။ အဋ္ဌ။ ၁၈၅)။ အာပဒါ နာမ ရဋ္ဌဘေဒေ ဇနပဒါနံ ပလာယနကာလော။ ယထာဟ ‘‘ရဋ္ဌဘေဒေ စက္ကသမာရုဠှာ ဇနပဒါ ပရိယာယန္တိ၊ ဧဝရူပါသု အာပဒါသူ’’တိ (ပါစိ။ အဋ္ဌ။ ၁၈၅)။ ဧတ္ထ စ ရဋ္ဌဘေဒေတိ ရဋ္ဌဝိလောပေ။ စက္ကသမာရုဠှာတိ ဣရိယာပထစက္ကံ၊ သကဋစက္ကံ ဝါ သမာရုဠှာ။ ဥမ္မတ္တကာဒိနောတိ အာဒိ-သဒ္ဒေန ခိတ္တစိတ္တာဒယော ဂဟိတာ။

၁၁၈၃။ ကာယဝါစာဒိကတ္တယာတိ ဧတ္ထ အာဒိ-သဒ္ဒေန စိတ္တံ ဂဟိတံ၊ ကာယဝါစာစိတ္တာတိ ဝုတ္တံ ဟောတိ။

သံဝိဓာနကထာဝဏ္ဏနာ။

၁၁၈၄။ ဥဒ္ဓံ ဇဝတီတိ ဥဇ္ဇဝနီ၊ ပဋိသောတဂါမိနီ နာဝါ၊ တံ။ အဓော ဇဝနတော ဩဇဝနီ၊ အနုသောတဂါမိနီ နာဝါ၊ တံ။ အဘိရုဟေယျာတိ ဧတ္ထ ‘‘သံဝိဓာယာ’’တိ သေသော။ ယထာဟ ‘‘ယော ပန ဘိက္ခု ဘိက္ခုနိယာ သဒ္ဓိံ သံဝိဓာယ ဧကံ နာဝံ အဘိရုဟေယျာ’’တိ (ပါစိ။ ၁၈၆)။ လောကဿာဒသင်္ခါတမိတ္တသန္ထဝေန တံ နာဝံ အာရုယှ ကီဠနစိတ္တံ ပုဗ္ဗင်္ဂမံ ကတွာ အညမညံ သံဝိဓာယာတိ အတ္ထော။ ယထာဟ အဋ္ဌကထာယံ ‘‘လောကဿာဒမိတ္တသန္ထဝဝသေန ကီဠာပုရေက္ခာရော သံဝိဒဟိတွာ’’တိ (ပါစိ။ အဋ္ဌ။ ၁၈၈)။

၁၁၈၅။ သဂါမတီရပဿေန ဂမနေ ဂါမန္တရဝသေန ဝါ ပါစိတ္တိ၊ အဂါမတီရပဿေန ဂမနေ အဒ္ဓယောဇနေ ပါစိတ္တိ အဒ္ဓယောဇနာတိရေကေ ဌာနေ ဂါမေ ဝိဇ္ဇမာနေပိ အဝိဇ္ဇမာနေပိ။

၁၁၈၆။ ယောဇနပုထုလာယ နဒိယာ မဇ္ဈေန ဂစ္ဆတော အဒ္ဓယောဇနဝသေန အာပတ္တိဒဿနတ္ထမာဟ ‘‘တထာ’’တိအာဒိ။ ‘‘ဦနယောဇနပုထုလာယ နဒိယာ မဇ္ဈံ ဥဘယဘာဂံ ဘဇတီတိ တာဒိသိကာယ နဒိယာ မဇ္ဈေန ဂစ္ဆန္တဿ ဂါမန္တရဂဏနာယ၊ အဒ္ဓယောဇနဂဏနာယ စ အာပတ္တီ’’တိ ဝဒန္တိ။

၁၁၈၇။ ယထာသုခံ သမုဒ္ဒသ္မိန္တိ ဧတ္ထ ‘‘ဂန္တဗ္ဗ’’န္တိ သေသော။ ‘‘သဗ္ဗအဋ္ဌကထာသူ’’တိအာဒိနာ ယထာသုခဂမနာနုညာယ ဟေတုံ ဒဿေတိ။ ဣမိနာဝ အသန္ဒမာနောဒကေသု ဝါပိတဠာကာဒီသု အနာပတ္တီတိ ဝိညာယတိ။

၁၁၈၈။ တိတ္ထသမ္ပာဒနတ္ထာယာတိ ပရတိတ္ထံ ပါပေတုံ။ တံ နာဝံ။ ယုတ္တာတိ နာဝါပါဇကာ။

၁၁၈၉။ ‘‘တထာ’’တိ ဣမိနာ ‘‘အနာပတ္တိ ပကာသိတာ’’တိ ဣမံ သင်္ဂဏှာတိ။ အသံဝိဒဟိတွာ ဘိက္ခုနိယာ သဒ္ဓိံ ဧကံ နာဝံ အဘိရုဟေယျ ဝါ၊ တိရိယံ တရဏာယ ဘိက္ခုနိယာ သဒ္ဓိံ သံဝိဒဟိတွာပိ ဧကံ နာဝံ အဘိရုဟေယျ ဝါ၊ အာပဒါသု ဘိက္ခုနိယာ သဒ္ဓိံ သံဝိဒဟိတွာပိ ဧကံ နာဝံ အဘိရုဟေယျ ဝါ၊ တထာ အနာပတ္တိ ပကာသိတာတိ ယောဇနာ။

‘‘အနန္တရသမော’’တိ ဣမိနာ ‘‘အသံဝိဒဟိတေ ကာလေ’’တိအာဒိနာ ဝုတ္တဝိနိစ္ဆယံ သင်္ဂဏှာတိ။ ဣဓာပိ ကာလဝိသင်္ကေတေ အနာပတ္တိ၊ တိတ္ထနာဝါဝိသင်္ကေတေ အာပတ္တိယေဝ။ ယထာဟ ‘‘ဣဓာပိ ကာလဝိသင်္ကေတေနေဝ အနာပတ္တီ’’တိအာဒိ (ပါစိ။ အဋ္ဌ။ ၁၉၁)။ ‘‘လောကဿာဒမိတ္တသန္ထဝဝသေန ကီဠာပုရေက္ခာရော သံဝိဒဟိတွာ’’တိ (ပါစိ။ အဋ္ဌ။ ၁၈၈) ဝစနတော ကေစိ ‘‘ဣမံ သိက္ခာပဒံ အကုသလစိတ္တံ လောကဝဇ္ဇ’’န္တိ ဝဒန္တိ၊ တံ န ဂဟေတဗ္ဗံ။ ကီဠာပုရေက္ခာရတာယ ဟိ အဘိရုဟိတွာ ဂါမန္တရောက္ကမနေ၊ အဒ္ဓယောဇနာတိက္ကမေ ဝါ ကုသလာဗျာကတစိတ္တသမင်္ဂီပိ ဟုတွာ အာပတ္တိံ အာပဇ္ဇတိ။ ယဒိ ဟိ သော သံဝေဂံ ပဋိလဘိတွာ အရဟတ္တံ ဝါ သစ္ဆိကရေယျ၊ နိဒ္ဒံ ဝါ ဩက္ကမေယျ၊ ကမ္မဋ္ဌာနံ ဝါ မနသိ ကရောန္တော ဂစ္ဆေယျ၊ ကုတော တဿ အကုသလစိတ္တသမင်္ဂိတာ၊ ယေနိဒံ သိက္ခာပဒံ ‘‘အကုသလစိတ္တံ၊ လောကဝဇ္ဇ’’န္တိ ဝုစ္စတိ၊ တသ္မာ ပဏ္ဏတ္တိဝဇ္ဇံ၊ တိစိတ္တန္တိ သိဒ္ဓံ။

နာဝါဘိရုဟနကထာဝဏ္ဏနာ။

၁၁၉၀။ ဂိဟိသမာရမ္ဘံ ဟိတွာ ဘိက္ခုနိယာ ပရိပါစိတံ ဘတ္တံ ဉတွာ ဘုဉ္ဇတော ဘိက္ခုနော ပါစိတ္တိ ဟောတီတိ ယောဇနာ။ ပရိပါစိတံ နာမ ဘိက္ခုနော သီလသုတာဒိဂုဏံ ကုလာနံ ဝတွာ နိပ္ဖာဒိတံ။ ယထာဟ ‘‘ဘိက္ခုနိယာ ပရိပါစိတံ၊ ဂုဏပ္ပကာသနေန နိပ္ဖာဒိတံ လဒ္ဓဗ္ဗံ ကတန္တိ အတ္ထော’’တိ (ပါစိ။ အဋ္ဌ။ ၁၉၄)။ ဂိဟိသမာရမ္ဘန္တိ ဘိက္ခုနိယာ ပရိပါစနတော ပုဗ္ဗေယေဝ ဂိဟိပဋိယတ္တံ။ ယထာဟ ‘‘ဘိက္ခုနိယာ ပရိပါစနတော ပဌမမေဝ ယံ ဂိဟီနံ ပဋိယာဒိတံ ဘတ္တ’’န္တိ (ပါစိ။ အဋ္ဌ။ ၁၉၄)။ ဝက္ခတိ ဟိ ‘‘ဂိဟိသမ္ပာဒိတမ္ပိ ဝါ ဝိနာ’’တိ။

၁၁၉၁။ ‘‘တဿာ’’တိ ဝက္ခမာနတ္တာ ‘‘ယံ ဘောဇန’’န္တိ ယောဇေတဗ္ဗံ။ တဿာတိ ပဉ္စဓာ ဝုတ္တဿ ဘောဇနဿ။ သဗ္ဗေသုအဇ္ဈောဟာရေသူတိ သဗ္ဗေသု ပရဂလကရဏပ္ပယောဂေသု။

၁၁၉၂။ ဘိက္ခုနိယာ ပရိပါစိတံ ဘုဉ္ဇတော ဒေါသောတိ ယောဇနာ။

၁၁၉၃။ ဥဘောသူတိ ပရိပါစိတေပိ အပရိပါစိတေပိ။ သဗ္ဗတ္ထာတိ ဣမေသု ဒွီသု ပရိဘုဉ္ဇတော အဇ္ဈောဟာရဝသေနေဝ ဒုက္ကဋန္တိ ယောဇနာ။

၁၁၉၅။ ပဉ္စဘောဇနံ ဌပေတွာ အညံ ပန ယံ ကိဉ္စိ ယာဂုခဇ္ဇဖလာဒိကံ ဘုဉ္ဇန္တဿ အနာပတ္တီတိ ယောဇနာ။

ပရိပါစိတကထာဝဏ္ဏနာ။

၁၁၉၇။ ဣဒံ သဗ္ဗံ ဒသမံ သိက္ခာပဒံ သမုဋ္ဌာနနယာဒိနာ ဒုတိယာနိယတေနေဝ သဒိသံ မတန္တိ ယောဇနာ။ ဣဒံ သိက္ခာပဒန္တိ ‘‘ယော ပန ဘိက္ခု ဘိက္ခုနိယာ သဒ္ဓိံ ဧကော ဧကာယ ရဟော နိသဇ္ဇံ ကပ္ပေယျ၊ ပါစိတ္တိယ’’န္တိ (ပါစိ။ ၁၉၉) ဝုတ္တံ ရဟောနိသဇ္ဇသိက္ခာပဒံ။

ရဟောနိသဇ္ဇကထာဝဏ္ဏနာ။

ဘိက္ခုနိဝဂ္ဂေါ တတိယော။

၁၁၉၈။ ဧကောတိ ဧကဒိဝသိကော။ အာဝသထော ပိဏ္ဍောတိ ပုညတ္ထိကေဟိ ဧကံ ပါသဏ္ဍံ အနုဒ္ဒိဿ ယာဝဒတ္ထံ ဒါတုံ သာလာဒီသု ပညတ္တံ ပဉ္စသု ဘောဇနေသု အညတရံ ဘောဇနံ။ ယထာဟ ‘‘အာဝသထပိဏ္ဍော နာမ ပဉ္စန္နံ ဘောဇနာနံ အညတရံ ဘောဇနံ သာလာယ ဝါ မဏ္ဍပေ ဝါ ရုက္ခမူလေ ဝါ အဇ္ဈောကာသေ ဝါ အနောဒိဿ ယာဝဒတ္ထော ပညတ္တော ဟောတီ’’တိ (ပါစိ။ ၂၀၆)။ အဂိလာနေနာတိ ဧတ္ထ ‘‘အဂိလာနော နာမ သက္ကောတိ တမှာ အာဝသထာ ပက္ကမိတု’’န္တိ ဝုတ္တ ပဒဘာဇနိယအဋ္ဌကထာယံ ‘‘အဒ္ဓယောဇနံ ဝါ ယောဇနံ ဝါ ဂန္တုံ သက္ကောတီ’’တိ (ပါစိ။ အဋ္ဌ။ ၂၀၆) ဝုတ္တတ္တာ တမှာ အာဝသထာ အဒ္ဓယောဇနံ ဝါ ယောဇနံ ဝါ ဂန္တုံ သမတ္ထေန အဂိလာနေနာတိ အတ္ထော။ တတော ဥဒ္ဓန္တိ ဒုတိယဒိဝသတော ဥတ္တရိ။

၁၁၉၉။ အနောဒိဿေဝ ပညတ္တေ ပိဏ္ဍေတိ ယောဇနာ၊ ‘‘ဣမေသံယေဝ ဝါ’’တိ အညတရံ ပါသဏ္ဍံ ဝါ ‘‘ဧတ္တကာနံယေဝ ဝါ’’တိ တတ္ထ ပုဂ္ဂလပရိစ္ဆေဒံ ဝါ အကတွာ သဗ္ဗသာဓာရဏံ ကတွာ ပညတ္တေ အာဝသထပိဏ္ဍေတိ အတ္ထော။ ယာဝဒတ္ထေ ဧဝ ပိဏ္ဍေ ပညတ္တေတိ ယောဇနာ၊ ယာဝတာ အတ္ထော ကုစ္ဆိပူရဏာဒိကံ ပယောဇနမေတ္ထ ပိဏ္ဍေတိ ဝိဂ္ဂဟော၊ ‘‘ဧတ္တကံ ဒါတဗ္ဗ’’န္တိ အပရိစ္ဆိန္ဒိတွာ ‘‘ဘုဉ္ဇန္တာနံ ယာဝဒတ္ထံ ဒါတဗ္ဗ’’န္တိ ပညတ္တေ ပိဏ္ဍေ ဧဝါတိ အတ္ထော။ ဘုဉ္ဇိတဗ္ဗန္တိ ကမ္မသာဓနံ ဝါ ဘာဝသာဓနံ ဝါ။ ‘‘ဘောဇန’’န္တိ အဇ္ဈာဟရဏီယံ။ သကိန္တိ ဧကဝါရံ။ တတ္ထာတိ အာဝသထေ။

၁၂၀၀။ တဿ ပိဏ္ဍဿ။ အဇ္ဈောဟာရေသု သဗ္ဗေသူတိ သဗ္ဗေသု အဇ္ဈောဟာရပ္ပယောဂေသု ကတေသု။ တဿ အဇ္ဈောဟာရကဿ။ ပါစိတ္တိယော ပယောဂဂဏနာယ။

၁၂၀၁။ ‘‘ဧကေန ကုလေန နာနေကဋ္ဌာနဘေဒေသု ပညတ္တေ’’တိ၊ ‘‘နာနာကုလေဟိ ဝါ နာနေကဋ္ဌာနဘေဒေသု ပညတ္တေ’’တိ စာတိ ယောဇနာ။ ‘‘ပိဏ္ဍေ’’တိ အဓိကာရော။ နာနာ စ ဧကော စ နာနေကာ၊ ဌာနာနံ ဘေဒါ ဌာနဘေဒါ၊ နာနေကာ စ တေ ဌာနဘေဒါ စာတိ ဝိဂ္ဂဟော၊ တေသု။ ဧကဘောဂေါတိ ဧကပိဏ္ဍပရိဘောဂေါ။ ဧဝကာရေန ဒုတိယဒိဝသာဒိပရိဘောဂံ နိဝတ္တေတိ။

၁၂၀၄။ ဂိလာနဿာတိ ဝုတ္တလက္ခဏေန ဂိလာနော ဟုတွာ ပုနပ္ပုနံ ဘုဉ္ဇန္တဿ ဂစ္ဆတော ဝါ အာဂစ္ဆန္တဿ ဝါ အနာပတ္တီတိ ယောဇနာ၊ အန္တမသော အဒ္ဓယောဇနမ္ပိ ဂစ္ဆတော၊ ဂန္တွာ အာဂစ္ဆတော ဝါ အန္တရာမဂ္ဂေ စ ဂတဋ္ဌာနေ စ ဧကသ္မိံ ဒိဝသေ ဘုဉ္ဇန္တဿ အနာပတ္တီတိ ဝုတ္တံ ဟောတိ။ ယထာဟ ‘‘ယော ဂစ္ဆန္တော အန္တရာမဂ္ဂေ ဧကဒိဝသံ၊ ဂတဋ္ဌာနေ စ ဧကဒိဝသံ ဘုဉ္ဇတိ၊ တဿာပိ အနာပတ္တိ။ အာဂစ္ဆန္တေပိ ဧသေဝ နယော’’တိ (ပါစိ။ အဋ္ဌ။ ၂၀၈)။ ဩဒိဿ ပညတ္တေတိ ဧတ္ထ ‘‘ဘိက္ခူ’’တိ သေသော။ ယထာဟ ‘‘ဘိက္ခူနံယေဝ အတ္ထာယ ဥဒ္ဒိသိတွာ ပညတ္တော ဟောတီ’’တိ (ပါစိ။ အဋ္ဌ။ ၂၀၈)။ ပရိတ္တေတိ ဥဒရပူရဏာယ အပ္ပဟောနကေ ထောကေ ဘောဇနေ။ ယထာဟ ‘‘ယာဝဒတ္ထံ ပညတ္တော န ဟောတိ၊ ထောကံ ထောကံ လဗ္ဘတိ၊ တာဒိသံ နိစ္စမ္ပိ ပရိဘုဉ္ဇိတုံ ဝဋ္ဋတီ’’တိ (ပါစိ။ အဋ္ဌ။ ၂၀၈)။ သကိန္တိ ယာဝဒတ္ထံ ပညတ္တံ ဝုတ္တနယေန ဧကဝါရံ ဘုဉ္ဇတော အနာပတ္တိ။

၁၂၀၅။ ယာဂုအာဒီနီတိ အာဒိ-သဒ္ဒေန ပဉ္စဘောဇနတော အညေသံ အဇ္ဈောဟရဏီယာနံ ဂဟဏံ။

အာဝသထကထာဝဏ္ဏနာ။

၁၂၀၆။ ဝုတ္တာ သမယာ အညတြာတိ ယောဇနာ၊ ‘‘တတ္ထာယံ သမယော၊ ဂိလာနသမယော စီဝရဒါနသမယော စီဝရကာရသမယော အဒ္ဓါနဂမနသမယော နာဝါဘိရုဟနသမယော မဟာသမယော သမဏဘတ္တသမယော’’တိ (ပါစိ။ ၂၁၇) ဝုတ္တာ သတ္တဝိဓကာလာ အညတြ။

တတ္ထ ယဒါ ပါဒါနံ ဖလိတတ္တာ န သက္ကောတိ ပိဏ္ဍာယ စရိတုံ၊ အယံ ဂိလာနသမယော။ အတ္ထတကထိနာနံ ပဉ္စ မာသာ၊ ဣတရေသံ ကတ္တိကမာသောတိ အယံ စီဝရဒါနသမယော။ ယဒါ စီဝရေ ကရိယမာနေ ကိဉ္စိဒေဝ စီဝရေ ကတ္တဗ္ဗံ ကရောတိ၊ အယံ စီဝရကာရသမယော။ ယဒါ အဒ္ဓယောဇနမ္ပိ ဂန္တုကာမော ဝါ ဟောတိ၊ ဂစ္ဆတိ ဝါ၊ ဂတော ဝါ၊ အယံ အဒ္ဓါနဂမနသမယော။ နာဝါဘိရုဟနသမယေပိ ဧသေဝ နယော။ ယဒါ ဂေါစရဂါမေ စတ္တာရော ဘိက္ခူ ပိဏ္ဍာယ စရိတွာ န ယာပေန္တိ၊ အယံ မဟာသမယော။ ယဒါ ယော ကောစိ ပဗ္ဗဇိတော ဘတ္တေန နိမန္တေတိ၊ အယံ သမဏဘတ္တသမယော။ ဂဏော ကတမောတိ အာဟ ‘‘ဂဏော’’တိအာဒိ။

၁၂၀၇။ ဂဏဘောဇနံ နာမ ကိန္တိ အာဟ ‘‘ယ’’န္တိအာဒိ။ ယံ ပဉ္စန္နံ အညတရံ နိမန္တနတော၊ ဝိညတ္တိတော ဝါ လဒ္ဓံ၊ တံ ဣဓ ဘောဇနန္တိ အဓိပ္ပေတံ ဟောတီတိ ယောဇနာ။ နိမန္တနတောတိ ‘‘ဘောဇနာန’’န္တိအာဒိနာ ဝက္ခမာနပ္ပကာရေန ကတံ အကပ္ပိယနိမန္တနမာဟ။ ဝိညတ္တိတောပိ ဝါတိ ‘‘သစေပီ’’တိအာဒိနာ ဝက္ခမာနနယေန ကတမကပ္ပိယဝိညတ္တိမာဟ။

၁၂၀၈-၁၁။ ဘောဇနာနန္တိ နိဒ္ဓါရဏေ သာမိဝစနံ၊ ‘‘အညတရဿာ’’တိ သေသော၊ ‘‘ဩဒနော သတ္တု ကုမ္မာသော၊ မစ္ဆော မံသဉ္စ ဘောဇန’’န္တိ သင်္ဂဟိတာနံ ပဉ္စန္နံ ဘောဇနာနံ အညတရဿ။ နာမန္တိ ဝက္ခမာနံ ဩဒနာဒိနာမံ။ ဘိက္ခူ နိမန္တေတီတိ ဧတ္ထ ‘‘ဧကတော၊ နာနတော ဝါ’’တိ သေသော။ ယထာဟ ‘‘ဧကတော နိမန္တိတာ။ နာနတော နိမန္တိတာ’’တိ (ပါစိ။ အဋ္ဌ။ ၂၁၇-၂၁၈)။ ဧကတော နိမန္တနံ နာမ သဗ္ဗေသံ ဘိက္ခူနံ ဧကတော ဌိတာနံ နိမန္တနံ။ နာနတော နိမန္တနံ နာမ ဘိက္ခူနံ ဝိသုံ ဝိသုံ ဝသနဋ္ဌာနံ ဂန္တွာ ဝါ ဧကတော ဌိတဋ္ဌာနံ ဂန္တွာ ဝါ အနေကေဟိ နိမန္တနံ။ ယထာဟ ‘‘စတ္တာရိ ပရိဝေဏာနိ ဝါ ဝိဟာရေ ဝါ ဂန္တွာ နာနတော နိမန္တိတာ၊ ဧကဋ္ဌာနေ ဌိတေသုယေဝ ဝါ ဧကော ပုတ္တေန၊ ဧကော ပိတရာတိ ဧဝမ္ပိ နာနတော နိမန္တိတာ’’တိ (ပါစိ။ အဋ္ဌ။ ၂၁၇-၂၁၈)။

ဝေဝစနံ နာမ ဩဒနာဒိသဗ္ဗပဒါနံ၊ သမ္ပဋိစ္ဆထာတိအာဒိကိရိယာပဒါနဉ္စ ပရိယာယဝစနံ။ ဘာသန္တရံ နာမ မာဂဓဝစနတော အညံ သီဟဠဒမိဠာဒိဝေါဟာရန္တရံ။ ဝေဝစနေဟိ ဧဝ ဝါ ဘာသန္တရေန ဝါ နိမန္တေတီတိ သမ္ဗန္ဓော။

တတော နိမန္တနာနန္တရံ။ နိမန္တနန္တိ ယထာဝုတ္တံ အကပ္ပိယနိမန္တနံ။ ဧကတော ဂဏှန္တီတိ အညမညဿ ဒွါဒသဟတ္ထံ အမုဉ္စိတွာ ဌိတာ ဝါ နိသိန္နာ ဝါ ဧကတော ဂဏှန္တိ။

‘‘ဂဏဘောဇနကာရဏ’’န္တိ ဣဒံ ဘောဇနပစ္စယာ ပါစိတ္တိယံ ဧဝံ ဂဟဏမန္တရေန န ဟောတီတိ ဝုတ္တံ။

၁၂၁၂။ ဧကတော၊ နာနတော ဝါပိ ယံ ဂမနံ၊ ဘောဇနမ္ပိ ဝါ၊ တံ ဂဏဘောဇနေ န ကာရဏန္တိပိ ဝိညူ ဘဏန္တီတိ ယောဇနာ။ ဧကတော နာနတော ဝါပီတိ ဧတ္ထ ‘‘ဌိတာ ဝါ နိသိန္နာ ဝါ’’တိ သေသော။

၁၂၁၃-၄။ ဝိညာပေတွာတိ ‘‘အမှာကံ စတုန္နမ္ပိ ဘတ္တံ ဒေဟီ’’တိအာဒိနာ ဧကတော ဝါ ‘‘မယှံ ဒေဟိ၊ မယှံ ဒေဟီ’’တိ ပါဋေက္ကံ ဝါ ဝိညာပေတွာ။ ဧဝမ္ပီတိ ဝိညတ္တိတောပိ။

၁၂၁၅။ ဒုဝိဓဿာတိ နိမန္တကဿ၊ ဝိညာပကဿ စ။

၁၂၁၆။ သတ္တသုပိ သမယေသု ဘုဉ္ဇတံ အနာပတ္တီတိ ယောဇနာ၊ ‘‘ဂဏဘောဇန’’န္တိ ပကရဏတော လဗ္ဘတိ၊ ယထာဝုတ္တေသု ဂိလာနာဒီသု သတ္တသု ကာလေသု လေသံ ဝိနာ ဘုဉ္ဇန္တာနန္တိ အတ္ထော။ ‘‘ဧကတော’’တိ ဣဒံ ‘‘ဂဟေတွာ’’တိ ဣမိနာ ယောဇေတဗ္ဗံ။ ဘုဉ္ဇတန္တိ ဘုဉ္ဇန္တာနံ။ တထာတိ ‘‘အနာပတ္တီ’’တိ ဣဒံ ပစ္စာမသတိ။

၁၂၁၇။ အနုပသမ္ပန္နော စ စာရီ စ ပတ္တော စ အနိမန္တိတော စ အနုပသမ္ပန္န…ပေ… နိမန္တိတာ၊ တေ စတုတ္ထေ ကတွာတိ အတ္ထော ၊ အနုပသမ္ပန္နံ ဝါ ပိဏ္ဍစာရိံ ဝါ စတုတ္ထဿ ပတ္တံ ဝါ အနိမန္တိတံ ဝါ စတုတ္ထံ ကတွာ ဧကတော ဂဟေတွာ ဘုဉ္ဇန္တာနံ ဂဏဘေဒေါ မုနိနာ ပကာသိတော၊ ဂဏဿ အပရိပုဏ္ဏတာ ဒီပိတာတိ ဝုတ္တံ ဟောတိ။ ပိဏ္ဍာယ စရတိ သီလေနာတိ ပိဏ္ဍစာရီ၊ သော ဣဓ ပုဗ္ဗပဒလောပေန ‘‘စာရီ’’တိ ဝုတ္တော၊ ပိဏ္ဍပါတိကော။ သော ဟိ နိမန္တနံ အသာဒိယန္တော ဂဏဘောဇနကော ဂဏခါဒကော န ဟောတီတိ အဓိပ္ပာယော။ ပတ္တော နာမ ဝိဟာရေ နိသီဒိတွာ စတုတ္ထေန အတ္တနာ လဒ္ဓဗ္ဗဘောဇနတ္ထာယ ပေသိတော ပတ္တော။ အနိမန္တိတော နာမ ပဌမံ အကပ္ပိယနိမန္တနာယ နိမန္တိတေ အနန္တောဂဓော ဥပသမ္ပန္နော။ ဧတ္ထာတိ ဣမသ္မိံ သိက္ခာပဒေ။ အပိ-သဒ္ဒေါ ဟေဋ္ဌာ ဒဿိတံ ဒွိန္နံ၊ တိဏ္ဏံ ဝါ ဝသေန ဝုတ္တဝိနိစ္ဆယံ အပေက္ခတိ။

၁၂၁၈။ သမယလဒ္ဓါနန္တိ ဂိလာနာဒယော သတ္တသမယာ လဒ္ဓါ ယေဟိ တေ သမယလဒ္ဓါ၊ တေသံ၊ နိဒ္ဓါရဏေ သာမိဝစနံ။ ‘‘အညတရဿာ’’တိ သေသော၊ ‘‘ဝသေနာ’’တိ ဣမိနာ သမ္ဗန္ဓော။ နေဝ ဂဏဘေဒေါတိ ယောဇနာ။ သမယလဒ္ဓကဿ အတ္တနော အနာပတ္တိဘာဝမန္တရေန တံ စတုတ္ထံ ကတွာ ဂဏဘောဇနံ ဂဏှန္တာနံ ပန အာပတ္တိသမ္ဘဝတော အာဟ ‘‘အာပတ္တိ ပန ဝေဒိတဗ္ဗာ’’တိ။ ယထာဟ မဟာပစ္စရိယံ ‘‘သမယလဒ္ဓကော သယမေဝ မုစ္စတိ၊ သေသာနံ ဂဏပူရကတ္တာ အာပတ္တိကရော ဟောတီ’’တိ (ပါစိ။ အဋ္ဌ။ ၂၂၀)။

၁၂၁၉။ ပဉ္စဘောဇနေသု အညတရဿ နာမံ ဂဟေတွာ နိမန္တေတွာ တေသုယေဝ အညံ ဒိယျမာနံ ဂဏှန္တဿ ဝိသင်္ကေတာဘာဝံ ဒဿေတုမာဟ ‘‘ဘောဇနာနဉ္စာ’’တိအာဒိ။ ဘောဇနာနန္တိ နိဒ္ဓါရဏေ သာမိဝစနံ၊ အညတရဿ ဝသေနာတိ ဝုတ္တံ ဟောတိ။ တံ ဝိသင်္ကေတံ၊ ဩဒနာဒီနံ နာမေန နိမန္တေတွာ ဒိယျမာနံ ယာဂုအာဒိံ ဂဏှန္တဿ ဂဏဘောဇနံ န ဟောတီတိ ဝုတ္တံ ဟောတိ။

၁၂၂၁။ ‘‘နိစ္စဘတ္တ’’န္တိ ဓုဝဘတ္တံ ဝုစ္စတိ။ ‘‘နိစ္စဘတ္တံ ဂဏှထာ’’တိ ဝဒန္တိ၊ ဗဟူနမ္ပိ ဧကတော ဂဟေတုံ ဝဋ္ဋတိ။ သလာကဘတ္တာဒီသုပိ ဧသေဝ နယော။

ဂဏဘောဇနကထာဝဏ္ဏနာ။

၁၂၂၃-၄။ ဗဟူဟိ မနုဿကေဟီတိ ဝိသုံ ဝိသုံ နိမန္တိတေဟိ အနေကေဟိ မနုဿေဟိ။ ပဉ္စသု ယဿ ကဿာတိ ဧတ္ထ ‘‘သဟဓမ္မိကေသူ’’တိ သေသော၊ နိဒ္ဓါရဏေ ဘုမ္မံ၊ ပဉ္စသု သဟဓမ္မိကေသု ယဿ ကဿစီတိ အတ္ထော။ ‘‘ဟိတွာ’’တိအာဒိနာ ကိမာဟာတိ? ယဿ ဝိကပ္ပေတိ၊ တသ္မိံ သန္နိဟိတေ ‘‘မယှံ ဘတ္တပစ္စာသံ တုယှံ ဒမ္မီ’’တိ သမ္မုခါ ဝိကပ္ပနဝသေန ဝါ တသ္မိံ အသန္နိဟိတေ တဿ နာမံ ဂဟေတွာ ‘‘မယှံ ဘတ္တပစ္စာသံ ဣတ္ထန္နာမဿ ဒမ္မီ’’တိ အသမ္မုခါ ဝိကပ္ပနဝသေန ဝါ ပဌမနိမန္တနာယ ဝိကပ္ပနံ ဟိတွာ၊ တံ အဝိကပ္ပေတွာတိ ဝုတ္တံ ဟောတိ။

ဘတ္တန္တိ ဧတ္ထ ‘‘ယော ဘုဉ္ဇတီ’’တိ သေသော။ နိမန္တိတော ယော ပစ္ဆာ နိမန္တိတံ ဘတ္တံ ဘုဉ္ဇတိ၊ တဿ ပါစိတ္တိယန္တိ ယောဇနာ။ ဥပ္ပဋိပါဋိယာ ဧကသိတ္ထမ္ပိ ဘုဉ္ဇတော တဿ ပါစိတ္တိယံ သိယာတိ ယောဇနာတိ။ ကိံ ဝုတ္တံ ဟောတိ? ပစ္ဆာ နိမန္တိတာနံ ဘောဇနံ ပဌမံ ဘုဉ္ဇိတွာ ပဌမံ နိမန္တိတာနံ ဘောဇနံ ပစ္ဆာ ဘုဉ္ဇန္တဿ စ ဧကပတ္တေယေဝ ဟေဋ္ဌာ ပဌမံ နိမန္တိတာနံ ဘောဇနံ ပက္ခိပိတွာ ဣတရံ ဥပရိ ပက္ခိပိတွာ ဟေဋ္ဌာ ဟတ္ထံ ဩတာရေတွာ ဟေဋ္ဌာ ဌိတဘောဇနေ ဧကသိတ္ထမ္ပိ ပဌမံ အဘုဉ္ဇိတွာ ဥပရိ ဌိတံ ပဌမံ ဘုဉ္ဇန္တဿ စာတိ ဝုတ္တံ ဟောတိ။ တေနေဝ ယထာ ဥပ္ပဋိပါဋိ န ဟောတိ၊ တထာ မိဿီကတံ ဘောဇနံ ဘုဉ္ဇန္တဿ န ဒေါသောတိ မဟာပစ္စရိယံ ဝိနိစ္ဆယော ဗျတိရေကတော ဒဿိတော ဟောတိ။ ယထာဟ ‘‘ဒွေ တီဏိ ကုလာနိ နိမန္တေတွာ ဧကသ္မိံ ဌာနေ နိသီဒါပေတွာ ဣတော စိတော စ အာဟရိတွာ ဘတ္တံ အာကိရန္တိ၊ သူပဗျဉ္ဇနံ အာကိရန္တိ၊ ဧကမိဿကံ ဟောတိ၊ ဧတ္ထ အနာပတ္တီတိ မဟာပစ္စရိယံ ဝုတ္တ’’န္တိ (ပါစိ။ အဋ္ဌ။ ၂၂၉)။

၁၂၂၅-၆။ ပရမ္ပရဘောဇနဿ သရူပံ ပဒဘာဇနေ ဝုတ္တနယေန ဒဿေတုမာဟ ‘‘ဘောဇနာနမ္ပီ’’တိအာဒိ။ တေသမေဝ ပဉ္စန္နံ ဘောဇနာနံ အညတရံ ဘောဇနံ ပရိဘုဉ္ဇတီတိ ယောဇနာ။ မဟေသိနာ ပရိဒီပိတန္တိ ပဒဘာဇနေ ‘‘ပရမ္ပရဘောဇနံ နာမ ပဉ္စန္နံ ဘောဇနာန’’န္တိအာဒိနာ (ပါစိ။ ၂၂၇) နယေန ဝုတ္တံ။

၁၂၂၇။ ယတ္ထာတိ အနေကေဟိ ဧကဘာဇနေ ပက္ခိတ္တေ ယသ္မိံ ဘောဇနေတိ ဝုတ္တံ ဟောတိ ဧကေနေဝ ဒိန္နေ ဝိစာရဏာဘာဝါ။ သဗ္ဗမေကရသံ သိယာတိ ဝိသုံ ဝိသုံ ဝိညာယမာနရသံ အဟုတွာ ဧကရသမေဝ ဟောတိ။

၁၂၃၀။ ‘‘ဂါမေနာ’’တိ ဣမိနာ ဂါမဋ္ဌာယေဝ ဝုတ္တာ။ ‘‘နိမန္တိတဿ ဒေါသော န ဝိဇ္ဇတီ’’တိ ဣဒံ ဂါမပူဂနိဂမေဟိ ပစ္စေကံ ယောဇေတဗ္ဗံ။ ဂါမ-သဒ္ဒေန ‘‘ဂါမာ ဝါ အရညာ ဝါ’’တိ (ပါရာ။ ၉၁) ဧတ္ထ ဝိယ နဂရမ္ပိ သင်္ဂဟိတံ။ ပူဂေါ နာမ ဝိသုံ ဝိသုံ သမူဟာ ဟုတွာ ပုညကာရိနော ဓမ္မိကမနုဿာ။ နိဂမော နာမ သာပဏော မဟာဂါမော။ သကလဂါမေန နိမန္တိတော ဟုတွာ သမ္ပတ္တေ ယတ္ထ ကတ္ထစိ ဂေဟေ ဘုဉ္ဇန္တဿ အနာပတ္တီတိ အတ္ထော။ ပူဂါဒီသုပိ ဧသေဝ နယော။ ယထာဟ ‘‘သကလေန ဂါမေန ဧကတော ဟုတွာ နိမန္တိတဿေဝ ယတ္ထ ကတ္ထစိ ဘုဉ္ဇတော အနာပတ္တိ။ ပူဂေပိ ဧသေဝ နယော’’တိ (ပါစိ။ အဋ္ဌ။ ၂၂၉)။ နိစ္စဘတ္တေ ဒေါသော န ဝိဇ္ဇတီတိ အနေကဋ္ဌာနတော ဒိယျမာနံ နိစ္စဘတ္တမ္ပိ ဥပ္ပဋိပါဋိယာ ဘုဉ္ဇန္တဿ န ဒေါသောတိ ဝုတ္တံ ဟောတိ။

၁၂၃၁။ ကာယော ဝါစာ ကာယဝါစာစိတ္တန္တိ ဣမေဟိ အာပဇ္ဇနံ ကထိနသမုဋ္ဌာနံ နာမ။ ဣဓ ကြိယံ နာမ ဘောဇနံ၊ အကြိယံ နာမ ပဌမနိမန္တနဿ အဝိကပ္ပနံ၊ ဣဒံ ဒွယမေဝါဟ ‘‘ဘောဇနဉ္စာဝိကပ္ပန’’န္တိ။

ပရမ္ပရဘောဇနကထာဝဏ္ဏနာ။

၁၂၃၂-၃။ ပူဝါတိ အတိရသာဒယော ရသာ။ ပဟေဏကတ္ထာယာတိ ပဏ္ဏာကာရတ္ထာယ။ ပဋိယတ္တာတိ သမ္ပာဒိတာ။ ပါထေယျတ္ထာယာတိ ဂမိကဿ သမ္ဗလတ္ထာယ။ ပဋိယတ္တာ မန္ထာ ဝါတိ သမ္ဗန္ဓော။ မန္ထာ နာမ ဗဒ္ဓသတ္တုအဗဒ္ဓသတ္တုတိလတဏ္ဍုလာဒယော။ ယထာဟ ‘‘ဗဒ္ဓသတ္တုအဗဒ္ဓသတ္တုတိလတဏ္ဍုလာဒိ သဗ္ဗံ ဣဓ မန္ထောတွေဝ သင်္ခံ ဂစ္ဆတီ’’တိ (ပါစိ။ အဋ္ဌ။ ၂၃၃)။ ယေ ပူဝါ၊ မန္ထာ ဝါတိ ယောဇနာ။ ဟီတိ နိပါတမတ္တံ။ တတ္ထ ပဋိယတ္တေသု တေသု ပူဝေသု ဝါ မန္ထေသု ဝါ။ ဘိက္ခုနာတိ ဧတ္ထ ‘‘အာကင်္ခမာနေနာ’’တိ သေသော။

ဒွတ္တိပတ္တာတိ ဒွေ ဝါ တယော ဝါ ပတ္တာတိ ဝိဂ္ဂဟော။ ပူရာတိ မုခဝဋ္ဋိယာ ဟေဋ္ဌိမရာဇိသမံ ပုဏ္ဏာ။ ယထာဟ ‘‘မုခဝဋ္ဋိယာ ဟေဋ္ဌိမလေခါယ သမပူရေ ပတ္တေ ဂဟေတွာ’’တိ (ပါစိ။ အဋ္ဌ။ ၂၃၃)။ ‘‘ဒွတ္တိပတ္တာ ပူရာ’’တိ စေတ္ထ ပရိမာဏံ ဒဿိတံ၊ ပရိမာဏပရိမေယျာနံ အဘေဒေါပစာရေန ပူဝမန္ထာ ဂဟေတဗ္ဗာ ယထာ ‘‘ဒွေ တိဿော တဏ္ဍုလနာဠိယော’’တိ။ ပူဝေဟိ ဝါ သတ္တူဟိ ဝါတိ ယောဇနာ။ သတ္တူတိ ဗဒ္ဓသတ္တုအဗဒ္ဓသတ္တူနံ ဂဟဏံ၊ ဣမိနာဝ တိလာဒီနိ ဥပလက္ခိတာနိ။ တတိယပတ္တဿ မုခဝဋ္ဋိယာ ဟေဋ္ဌာရာဇိယာ ဥဒ္ဓံ ကတွာ ပက္ခိတ္တဉ္စေတံ ‘‘တတော ဥတ္တရိ’’န္တိ ဣမိနာ စ ဂယှတိ။ ယထာဟ ‘‘သစေ တတိယံ ပတ္တံ ထူပီကတံ ဂဏှာတိ၊ ပူဝဂဏနာယ ပါစိတ္တိယ’’န္တိ (ပါစိ။ အဋ္ဌ။ ၂၃၃)။

၁၂၃၇။ တတ္ထ တေသု ပူဝေသု ဝါ မန္ထေသု ဝါ ဒွေ စေ ပတ္တပူရာ လဒ္ဓါတိ ယောဇနာ။ ဧကော ပတ္တပူရော ပဒါတဗ္ဗောတိ ယောဇနာ။ ဧကတောတိ ဧကပတ္တပူရတော န ပဒါတဗ္ဗောတိ ယောဇနာ၊ ကိဉ္စိပိ အကာမာ န ဒါတဗ္ဗန္တိ အတ္ထော။ ယထာဟ ‘‘ယေန ဧကော ဂဟိတော၊ န တေန ကိဉ္စိ အကာမာ ဒါတဗ္ဗံ။ ယထာရုစိ ကာတဗ္ဗ’’န္တိ (ပါစိ။ အဋ္ဌ။ ၂၃၃)။ ဧဝံ ဒဒန္တေန အာသနသာလာယ ဝါ အတ္တနော နိဗဒ္ဓဝါသဋ္ဌာနေ ဝါ ဒိဋ္ဌဿ ဘိက္ခုသင်္ဃဿ သာဓာရဏံ ကတွာ ဒါနမန္တရေန န မိတ္တာနမေဝ ဒါတဗ္ဗံ။ ယထာဟ ‘‘ယထာမိတ္တံ ပန ဒါတုံ န လဗ္ဘတီ’’တိ (ပါစိ။ အဋ္ဌ။ ၂၃၃)။

၁၂၃၈-၉။ အပဟေဏကံ အပါထေယျံ ဒေန္တာနန္တိ သမ္ဗန္ဓော။ ယထာဟ ‘‘န ပဟေဏကတ္ထာယ န ပါထေယျတ္ထာယ ပဋိယတ္တံ ဒေန္တီ’’တိ (ပါစိ။ ၂၃၅)။ တတောတိ ပဟေဏကပါထေယျတော။ ဝါ-သဒ္ဒေန ဣဓ အဝုတ္တံ ‘‘ဂမနေ ပဋိပ္ပဿဒ္ဓေ ဒေန္တီ’’တိ (ပါစိ။ ၂၃၅) အနာပတ္တိဝါရေ ဝုတ္တံ သင်္ဂဏှာတိ။ တဒူနကန္တိ တတော ဒွတ္တိပတ္တတော ဦနကံ။ ယထာဟ ‘‘ဦနကဒွတ္တိပတ္တပူရေ ပဋိဂ္ဂဏှာတီ’’တိ (ပါစိ။ ၂၃၅)။ အပါထေယျာဒိအတ္ထာယ ပဋိယာဒိတန္တိ သညာယ ပါထေယျာဒိံ ဂဏှန္တဿာပိ အာပတ္တိယေဝ အစိတ္တကတ္တာ သိက္ခာပဒဿ။ အတ္တနောယေဝ ဂဟဏတ္ထံ ‘‘ဣမဿ ဟတ္ထေ ဒေဟီ’’တိ ဝစနေနာပိ အာပဇ္ဇနတော ဝစီကမ္မံ။

ကာဏမာတုကထာဝဏ္ဏနာ။

၁၂၄၀။ အညေနာတိ တဒ္ဓိတလောပေန နိဒ္ဒေသော၊ အညတရေနာတိ အတ္ထော၊ ပဝါရိတောတိ သမ္ဗန္ဓော။ ဘောဇနာနန္တိ နိဒ္ဓါရဏေ ဘုမ္မံ။ ပဝါရိတောတိ ‘‘ဂဏှထ ဘန္တေ ယာဝ ဣစ္ဆထာ’တိ ဧဝံ ယာဝဒတ္ထပဝါရဏာယ၊ သယဉ္စ ‘အလံ အာဝုသော ထောကံ ထောကံ ဒေဟီ’တိ ဧဝံ ပဋိက္ခေပပဝါရဏာယာ’’တိ အဋ္ဌကထာယ ဝုတ္တပ္ပကာရဒွယေန ပဝါရိတောတိ အတ္ထော ။ ဝိကပ္ပဒွယေ ပကာရဒွယေ ပဝါရိတ-သဒ္ဒေ ဝရ-ဓာတုဿ ပတ္ထနဝါရဏတ္ထဝသေနာယမတ္ထော ဝေဒိတဗ္ဗော၊ ‘‘ပါစိတ္တိ အနတိရိတ္တ’’န္တိ ပဒစ္ဆေဒေါ။ ‘‘အနတိရိတ္တံ ဘောဇန’’န္တိ ဝိသေသိတဗ္ဗမပေက္ခိတွာ ‘‘အညေနာ’’တိ ဧတ္ထ ဝိဘတ္တိံ ဝိပရိဏာမေတွာ ‘‘ပဉ္စန္နံ ဘောဇနာနံ အညတရံ ဘောဇန’’န္တိ ယောဇေတဗ္ဗံ၊ ဝက္ခမာနေ အနတိရိတ္တကတဘောဇနနိဒ္ဒေသေ ဝုတ္တေသု ပဉ္စသု ဘောဇနေသု အညတရံ ဘောဇနန္တိ အတ္ထော။ ‘‘ခါဒနီယံ ဝါ ဘောဇနီယံ ဝါ’’တိ (ပါစိ။ ၂၃၆၊ ၂၃၈) သဟ ဒေသိတတ္တာ ဧကယောဂဉာယေန ‘‘ခါဒနီယံ ဝါ’’တိ စ ဂဟေတဗ္ဗံ။ ပဉ္စ ဘောဇနာနိ၊ ကာလိကတ္တယဉ္စ ဌပေတွာ သဗ္ဗံ ယာဝကာလိကံ ခါဒနီယန္တိ ဝုတ္တံ။

၁၂၄၁။ အသနန္တိ ဧတ္ထ ဝိပ္ပကတဘောဇနံ ဒိဿတိ၊ ဘုဉ္ဇမာနော စေ ပုဂ္ဂလော ဟောတိ၊ ဘောဇနကိရိယာနုပစ္ဆိန္နာ ဝတ္တတီတိ အတ္ထော။ ဘောဇနန္တိ ပဝါရဏပဟောနကဩဒနာဒိ ဟတ္ထာဒီသု ဒိဿတိ။ ဟတ္ထပါသောတိ ပဝါရဏပဟောနကံ ဘောဇနံ ဒါတုံ အဘိဟရိတွာ ဌိတောကာသော အဍ္ဎတေယျဟတ္ထပ္ပမာဏော ဟောတီတိ ဝုတ္တံ ဟောတိ။ အဘိဟရဏံ အဘိဟာရော၊ သော ဧဝ အဘိဟာရတာ၊ တထာ ဒါတုံ ဌိတဿ ကာယေန ကတော အဘိဟာရော ဒိဿတီတိ ဝုတ္တံ ဟောတိ။ ကာယဝါစာပဋိက္ခေပေါတိ တထာ အဘိဟဋေ ဘောဇနေ ပဋိဂ္ဂါဟကဿ ဟတ္ထဝိကာရာဒိကော ကာယိကော ဝါ ‘‘အလ’’န္တိအာဒိကော ဝါစသိကော ဝါ ပဋိက္ခေပေါ ပညာယတီတိ အတ္ထော။

၁၂၄၂။ နိပ္ပပဉ္စေနာတိ သဟ ဝါသနာယ ပဟီနတဏှာဒိပပဉ္စတ္တယရဟိတေန တထာဂတေန။

၁၂၄၃။ တတ္ထာတိ ဩဒနာဒီသု။ သတ္တန္နန္တိ ‘‘သာလီ’’တိအာဒိနာ ဝက္ခမာနာနုရူပါနံ။

၁၂၄၄။ ဩဒကောတိ ဥဒကေ ဘဝေါ။ ဧတ္ထာတိ ပဉ္စင်္ဂပဝါရဏာယ။ အယံနိစ္ဆယောတိ ဝက္ခမာနဝိဓိပ္ပကာရံ ဝိနိစ္ဆယံ ဒဿေတိ။

၁၂၄၅။ သာလီတိ သဗ္ဗသာလိဇာတိ။ ဝီဟီတိ သဗ္ဗဝီဟိဇာတိ။ ကင်္ဂူတိ သေတရတ္တကာဠဘေဒါ သဗ္ဗာ ကင်္ဂုဇာတိ။ ဝရကော သေတဝရကော။ ဓညေန သမ္ဘတပုညသမ္ဘာရေန ဘဂဝတာ။

၁၂၄၆။ တိဏန္တိ တိဏဗီဇမေဝ ဝုတ္တံ။ ဒီပိတံ သင်္ဂဟိတံ။ ဝရကစောရကောတိ သုခုမဝရကော။

၁၂၄၈။ အင်္ဂသမ္ပတ္တိံ ဒဿေတုမာဟ ‘‘ဟတ္ထေနာ’’တိအာဒိ။

၁၂၄၉။ တနူတိ တနုကာ။

၁၂၅၀။ န ရက္ခတိ ပဝါရဏံ။

၁၂၅၁-၂။ ဓညရသာဒီနီတိ အာဒိ-သဒ္ဒေန ဒဓိအာဒယော ဂဟိတာ။ အာရောပေတွာတိ ဥဒ္ဓနံ အာရောပေတွာ။ ဖလန္တိ ဧလာဠုကာဒိဖလံ။ ပဏ္ဏန္တိ သူပသာကံ။ ကဠီရန္တိ ဝေဠုအာဒီနံ ကဠီရံ။ ဗဟူနီတိ တေသမေဝ ဝိသေသနံ။ တတ္ထ စာတိ ပက္ခိတ္တပဏ္ဏာဒိမှိ တက္ကာဒိကေ။ ဩဓိံ ဒဿေတီတိ ဧတ္ထ ‘‘ပရိဘောဂကာလေ’’တိ သေသော။ သဉ္ဇနေတီတိ ဧတ္ထ ‘‘ဖလာဒိယာဂူ’’တိ လဗ္ဘတိ။

၁၂၅၃-၄။ ရသေတိ မံသာဒိရသေ။ ‘‘ယာဂုံ ဂဏှထာ’’တိ ဝါ ‘‘ယာဂု’’န္တိ ဝါ ဝတွာတိ ယောဇေတဗ္ဗာ။ ယာဂု သင်္ဂဟိတာတိ ဧတ္ထ ဩဓိပညာယနအပညာယနဝိကပ္ပဒွယေ ယာဂုယာ သမော ဝိနိစ္ဆယောတိ အဓိပ္ပာယော။

၁၂၅၅။ ဆုပန္တီတိ သမ္ဖုသန္တိ။ ဆုပ သမ္ဖဿေတိ ဓာတု၊ ပက္ခိပန္တီတိ ဝုတ္တံ ဟောတိ။ ယထာဟ ‘‘ယတ္ထ မစ္ဆမံသံ ပက္ခိပန္တီ’’တိ (ပါစိ။ အဋ္ဌ။ ၂၃၈-၂၃၉)။ သာသပမတ္တမ္ပိ မစ္ဆမံသံ ဝါ သစေ ပညာယတီတိ ယောဇနာ။ ပဝါရဏန္တိ ဧတ္ထ ‘‘ဇနေတီ’’တိ သေသော။ ယာဂုယာတိ ပဒံ ပစ္စတ္တဝသေန ဝိပရိဏာမေတွာ ယာဂု ဇနေတီတိ ယောဇေတဗ္ဗံ။

၁၂၅၆။ သံသဋ္ဌောတိ ပရိဿာဝိတော န သဉ္ဇနေတီတိ ယောဇနာ။

၁၂၅၇။ သဗ္ဗသော ဌပေတွာတိ သမ္ဗန္ဓော။ မံသာဒိပက္ခိတ္တဩဒနာဒိပ္ပကရဏာဝသေသတော အင်္ဂံ ဒဿေတုမာဟ ‘‘သဗ္ဗသော’’တိ။ သဗ္ဗသော န ပဝါရေတီတိ ယောဇနာ။ ဝေဠုတဏ္ဍုလန္တိ ဝေဠုဝီဟီနံ တဏ္ဍုလံ။ အာဒိ-သဒ္ဒေန ကန္ဒမူလံ သင်္ဂဟိတံ။ ယထာဟ ‘‘ဝေဏုတဏ္ဍုလာဒီဟိ ဝါ ကန္ဒမူလဖလေဟိ ဝါ ယေဟိ ကေဟိစိ ကတဘတ္တ’’န္တိ။

၁၂၅၈။ တတောတိ သာလိအာဒိတော၊ ဝေဠုအာဒိတော စ၊ တတော နိဗ္ဗတ္တာ ပုထုကာ ဝါတိ အတ္ထော။ တာဟီတိ ပုထုကာဟိ။ သုဒ္ဓါတိ ပုထုကာဒီဟိ အမိဿာ န ပဝါရေန္တီတိ သမ္ဗန္ဓော။

၁၂၅၉။ ဘဋ္ဌာနန္တိ ဘဇ္ဇိတာနံ။ သတ္တူဟိ သင်္ဂဟိတံ သတ္တုသင်္ဂဟိတံ။

၁၂၆၁။ သတ္တူနံ မောဒကောတိ သတ္တုဗဒ္ဓံ၊ ဗဒ္ဓသတ္တူတိ အတ္ထော။

၁၂၆၃။ တေဟေဝါတိ လာဇေဟိ ဧဝ။ သုဒ္ဓံ ခဇ္ဇကံ ဝါတိ ဝက္ခမာနနယေန မစ္ဆာဒီဟိ အသမ္မိဿံ ခဇ္ဇကံ။

၁၂၆၄။ ‘‘ပူရိတ’’န္တိအာဒိနာ တဗ္ဗိပရိယာယံ ဒဿေတိ။ တန္တိ ကုဏ္ဍကာဒိ။

၁၂၆၆။ အကပ္ပိယံ မံသံ။ အဝတ္ထုတ္တာတိ အကပ္ပိယမံသာနံ ဝါရေတဗ္ဗတ္တာ ပဝါရဏာယ အဝတ္ထုတ္တာ။

၁၂၆၇။ ဝတ္ထုကတ္တာတိ ကပ္ပိယမံသဿ ပဝါရဏာယ ဝတ္ထုဘူတတ္တာ။ ပဝါရေတီတိ ဧတ္ထ ‘‘ခါဒိယမာနဿ စ မံသတ္တာ’’တိ သေသော ဒဋ္ဌဗ္ဗော။ ယထာဟ ‘‘ယံ ပန ခါဒတိ၊ တံ ကိဉ္စာပိ ပဋိက္ခိပိတဗ္ဗဋ္ဌာနေ ဌိတံ၊ ခါဒိယမာနံ ပန မံသဘာဝံ န ဇဟတီ’’တိ (ပါစိ။ အဋ္ဌ။ ၂၃၈-၂၃၉)။

၁၂၆၈။ ကိဉ္စိ ကပ္ပိယဘောဇနန္တိ ပဉ္စသု ဘောဇနေသု ယံ ကိဉ္စိ ကပ္ပိယဘောဇနံ။

၁၂၆၉။ အကပ္ပိယံ မံသံ အညန္တိ အကပ္ပိယမံသတော အဝသေသံ ကုလဒူသနာဒိဝသေန ဥပ္ပန္နဘောဇနံ ဂဟိတံ။ ယထာဟ ‘‘ကုလဒူသနဝေဇ္ဇကမ္မဥတ္တရိမနုဿဓမ္မာရောစနသာဒိတရူပိယာဒီဟိ နိဗ္ဗတ္တံ ဗုဒ္ဓပဋိကုဋ္ဌံ အနေသနာယ ဥပ္ပန္နံ အကပ္ပိယဘောဇနံ ပဋိက္ခိပတိ၊ န ပဝါရေတီ’’တိ။

၁၂၇၀-၁။ အသနံ ဘောဇနန္တိ အင်္ဂဒွယေ ဝိနိစ္ဆယံ ဒဿေတုမာဟ ‘‘သစေ အဇ္ဈောဟဋ’’န္တိအာဒိ။ အဇ္ဈောဟဋန္တိ ပရဂလဂတံ ဟောတိ။ ‘‘ပတ္တေ’’တိ ဣမိနာ ထာလကာဒိဘာဇနဉ္စ ဂဟိတံ။ ကတ္ထစိ ဘောဇနံ နတ္ထီတိ ယောဇနာ။ ပတ္တေ၊ ဟတ္ထေ၊ မုခေ ဝါ ယတ္ထ ကတ္ထစိ ပဉ္စန္နံ ဘောဇနာနံ ကိဉ္စိ န ဝိဇ္ဇတိ၊ ဂန္ဓမတ္တံ ပညာယတီတိ ဝုတ္တံ ဟောတိ။

၁၂၇၂။ အာဒါယာတိ ဧတ္ထ ‘‘အညတြ ဘုဉ္ဇိတု’’န္တိ သေသော။ ‘‘ယောပိ အညတြ ဂန္တွာ ဘုဉ္ဇိတုကာမော မုခေ ဘတ္တံ ဂိလိတွာ သေသံ အာဒါယာ’’တိအာဒိနာ (ပါစိ။ အဋ္ဌ။ ၂၃၈-၂၃၉) မဟာပစ္စရိယဋ္ဌကထာယံ ဝုတ္တဝစနဿ ပမာဏတ္တာ အာဟ ‘‘န ပဝါရေတီ’’တိ။

၁၂၇၃။ ‘‘မုခေ ဘတ္တံ ဂိလိတံ၊ ဟတ္ထေ ဘတ္တံ ဝိဃာသာဒဿ ဒါတုကာမော၊ ပတ္တေ ဘတ္တံ ဘိက္ခုဿ ဒါတုကာမော၊ သစေ တသ္မိံ ခဏေ ပဋိက္ခိပတိ၊ န ပဝါရေတီ’’တိ (ပါစိ။ အဋ္ဌ။ ၂၃၈-၂၃၉) ဧဝမာဂတံ ကုရုန္ဒဋ္ဌကထံ သင်္ဂဟေတုံ ‘‘မုခေ စ ဘတ္တ’’န္တိအာဒိဝစနတော စ ‘‘အသနဿ ဥပစ္ဆေဒါ’’တိအာဒိနာ ဝက္ခမာနာယ ယုတ္တိယာ အသနာဝသာနေ ယုဇ္ဇမာနတ္တာ စ ဣမိဿာ ဂါထာယ ‘‘ဘောတ္တုကာမော’’တိ ပါဌံ အဂ္ဂဟေတွာ ‘‘ဒါတုကာမော’’တိ ပါဌော ဂဟေတဗ္ဗော။

၁၂၇၄။ ‘‘အသနဿ ဥပစ္ဆေဒါ’’တိ ဣမိနာ တသ္မိံယေဝ အာသနေ ယထာနိသိန္နေနေဝ ကာတဗ္ဗေ အသနေ အာသာဝစ္ဆေဒေါ ဒီပိတော။ ယထာဟ အဋ္ဌကထာယံ ‘‘တသ္မိံ ပန အာသနေ န ဘုဉ္ဇိတုကာမော၊ ဝိဟာရံ ပဝိသိတွာ ဘုဉ္ဇိတုကာမော၊ အညဿ ဝါ ဒါတုကာမော’’တိ (ပါစိ။ အဋ္ဌ။ ၂၃၈-၂၃၉)။ ကုရုန္ဒဋ္ဌကထာယံ တဿ ဝိနိစ္ဆယဿ ဒဿိတတ္တာ ‘‘မဟာပညာ’’တိ ကုရုန္ဒဋ္ဌကထာစရိယံ သန္ဓာယာဟ။ ကာရဏာကာရဏညုနောတိ ‘‘ပဝါရဏဿ ဣဒံ ကာရဏံ၊ ဣဒံ အကာရဏ’’န္တိ ဇာနန္တာ။ ‘‘ကာရဏာကာရဏညုနာ’’တိ ကတ္ထစိ ပေါတ္ထကေ လိခန္တိ။ တတ္ထ မဟာပညာ ကာရဏာကာရဏညုနော အာစရိယာ အသနဿ…ပေ… သောတိ ဟိ ကာရဏံ ကထယန္တီတိ ယောဇနာ။

၁၂၇၅။ ဟတ္ထပါသင်္ဂေ ဝိနိစ္ဆယံ ဒဿေတုမာဟ ‘‘ဂဏှတော…ပေ… ပသာရိတ’’န္တိ။ ဂဏှတောတိ ယေန ဣရိယာပထေန သမန္နာဂတော ဟုတွာ ဂဏှာတိ၊ ဧဝံ ဂဏှတော။ ပစ္ဆိမံ အင်္ဂန္တိ ဒါယကေန ဒိန္နဿ ပဋိဂ္ဂါဟကဿ ယော အဝယဝေါ ပရဘာဂေ ဟောတိ ၊ တံ ဌာနာဒိဣရိယာပထသမန္နာဂတဿ ပဋိဂ္ဂါဟကဿ ပဏှိအာဒိံ ပစ္ဆိမံ အင်္ဂံ။ ဒဒတော ပသာရိတံ ဟတ္ထံ ဝိနာ ပုရိမံ အင်္ဂန္တိ ယောဇနာ။ ပသာရိတံ ဟတ္ထန္တိ ဧတ္ထ ‘‘ဒါတု’’န္တိ သေသော။ ဥဘိန္နန္တိ ဧတ္ထ ‘‘အန္တရေ’’တိ သေသော။ ပဋိဂ္ဂါဟကဒါယကာနံ ပစ္ဆိမပုရိမာနံ ဥဘိန္နံ အင်္ဂါနံ အန္တရေ ဩကာသေ။ အဍ္ဎံ ဥပဍ္ဎံ ဟတ္ထံ တေယျံ တတိယံ ယဿာတိ ဝိဂ္ဂဟော၊ အတိရေကဝိဒတ္ထိဒွိရတနပ္ပမာဏန္တိ အတ္ထော။

၁၂၇၆။ အဘိဟာရင်္ဂေ ဝိနိစ္ဆယံ ဒဿေတုမာဟ ‘‘တသ္မိ’’န္တိအာဒိ။ အဍ္ဎတေယျေ တသ္မိံ ဌာနေ ဌတွာတိ ယောဇနာ၊ ဒွိရတနဝိဒတ္ထိပမာဏေ တသ္မိံ ဌာနေ ဌတွာတိ အတ္ထော။ အဘိဟဋန္တိ ဥပနီတံ။ တာဒိသန္တိ အဘိဟဋသဒိသံ၊ ပဝါရဏပဟောနကာနံ ပဉ္စန္နံ ဘောဇနာနံ အညတရန္တိ အတ္ထော။

၁၂၇၇-၈။ အာဓာရကေ ဝါပီတိ ဝလယာဒိပတ္တာဓာရကေပိ။ ဦရူသူတိ ဒွိန္နံ ဦရူနံ မဇ္ဈေ၊ အင်္ကေတိ အတ္ထော။ အာဟရိတွာတိ အဘိဟရိတွာ။ ဘတ္တံ ဂဏှာတီတိ ဧတ္ထ ‘‘ဣတော’’တိ သေသော၊ ‘‘ဣတော ဘတ္တံ ဂဏှာ’’တိ အနန္တရေ နိသိန္နော စ ဘာသတီတိ ယောဇနာ။ ဘတ္တန္တိ ဥပလက္ခဏံ၊ ပဉ္စသု ဘောဇနေသု ယံ ကိဉ္စီတိ အတ္ထော။ တန္တိ တထာ ဂဏှိတုံ ဝုတ္တဘတ္တာဒိဘောဇနံ။ အဘိဟာရဿ စာတိ ဧတ္ထ စ-သဒ္ဒေါ ပဒပူရဏတ္ထော၊ ဧဝကာရတ္ထော ဝါ၊ အဘာဝါ ဧဝါတိ ယောဇနာ။

၁၂၇၉။ ‘‘ဘတ္တပစ္ဆိ’’န္တိ ဣဒံ ဥပလက္ခဏံ။

၁၂၈၀။ ဒီယမာနေတိ ဧတ္ထ ‘‘ဘောဇနေ’’တိ သေသော။ ဣတရောတိ ဟတ္ထပါသေ နိသိန္နော။ အဘိဟာရင်္ဂဿ အဘာဝါ သော န ပဝါရိတောတိ။

၁၂၈၁။ ပဋိက္ခေပင်္ဂေ ဝိနိစ္ဆယံ ဒဿေတုမာဟ ‘‘ကာယေနာ’’တိအာဒိ။ ဝါစာဘိဟာရဿ အနင်္ဂတ္တာ အာဟ ‘‘ကာယေနာဘိဟဋ’’န္တိ။ ယထာဟ ‘‘ဝါစာယ အဘိဟဋံ ပဋိက္ခိပတော ပဝါရဏာ နတ္ထီ’’တိ (ပါစိ။ အဋ္ဌ။ ၂၃၈-၂၃၉)။ အဘိဟဋဘောဇနံ ပဋိက္ခိပိတုံ အင်္ဂုလိယော ဝါ ဟတ္ထံ ဝါ ဟတ္ထဂတဿ ကဿစိ စလနာဒိံ ယံ ကဉ္စိ ကာယဝိကာရံ ကရောန္တော၊ ဘမုံ ဥက္ခိပန္တော၊ ကုဇ္ဈိတွာ ဩလောကေန္တော ဝါ ကာယေန ပဋိက္ခိပတီတိ ဝုစ္စတိ။ ‘‘အလ’’န္တိ ဝါ ‘‘န ဂဏှာမီ’’တိ ဝါ ‘‘အာဂမေဟီ’’တိ ဝါ ‘‘အဓိဝါသေဟီ’’တိ ဝါ ‘‘မာ အာကိရာ’’တိ ဝါ ‘‘အပဂစ္ဆာဟီ’’တိ ဝါ ဧဝမာဒိကံ ဝဒန္တော ဝါစာယ ပဋိက္ခိပတီတိ ဝုစ္စတိ။

၁၂၈၂-၃။ အာကိရာတိ ဧတ္ထာပိ ‘‘ဣတိ စာ’’တိ ယောဇေတဗ္ဗံ။ ဧဝံ ဝဒန္တဿ နိဝါရေတုကာမတာစိတ္တေ သတိပိ နိဝါရဏဝစနေန ဟောန္တံ ပဝါရဏံ အာကိရာတိအာဒိဝိဓိဝစနေ န ဟောတီတိ အာဟ ‘‘န ပန’န္တိ ပဝါရဏာ’’တိ။ ပဝါရဏာ ပန န အတ္ထီတိ ယောဇနာ။

၁၂၈၄။ ‘‘ရသံ ဂဏှထာ’’တိ ဝဒေတိ သမ္ဗန္ဓော။ တံ သုတွာတိ တံ ဝစနံ သုတွာ။

၁၂၈၅။ ‘‘သာရ’’န္တိ ဣဒံ ဝဏ္ဏဘဏနမတ္တံ။ ‘‘ဣဒ’’န္တိ သာမညေန မစ္ဆမံသံ ဝဒတိ၊ ပဝါရဏင်္ဂံ ဟောတိ။ မစ္ဆရသံ မံသရသန္တိ ဧတ္ထ ဒွန္ဒသမာသဿပိ သမ္ဘဝတော ‘‘မစ္ဆံ၊ မံသံ ဂဏှာ’’တိ စ ဝုတ္တံ ဟောတိ၊ တဉ္စ အင်္ဂံ ဟောတိ။

၁၂၈၆။ ‘‘ရသံ ဂဏှာ’’တိ ဝုတ္တေ ပနဿ ဝိကပ္ပဿ အဘာဝါ ပဝါရဏဿ အင်္ဂံ န ဟောတိ။ တေနေဝါဟ ‘‘အတ္ထိ စ မံသံ စေ’’တိ။

၁၂၈၇။ မုဟုတ္တံအာဂမေဟီတိ ကဉ္စိ ကာလံ ဩလောကေဟိ။

၁၂၈၈။ ပနသာဒီဟီတိ အာဒိ-သဒ္ဒေန ဝေတ္တင်္ဂါဒီနံ ဂဟဏံ။

၁၂၉၀။ မစ္ဆသူပံ မံသသူပန္တိ ဧတ္ထ သမာသဝိကပ္ပာ ‘‘မစ္ဆရသံ မံသရသ’’န္တိ ဧတ္ထ ဝိယ ဒဋ္ဌဗ္ဗာ။

၁၂၉၁။ ကရမ္ဗကန္တိ မစ္ဆမံသေန ဝါ အညေန ဝါ မိဿဿေဝ သူပဝိသေသဿ နာမံ။ တေနေဝ စ ‘‘မံသကရမ္ဗကံ ဂဏှထ၊ မစ္ဆကရမ္ဗကံ ဂဏှထာ’’တိ ဝုတ္တေ နိသေဓေန ပဝါရဏာ ဟောတိ၊ ‘‘ကရမ္ဗကံ ဂဏှထာ’’တိ ဝုတ္တေ အနိယတဝစနတ္တာ န ဟောတိ။ ကဠီရသူပါဒီဟိ သမာနဝိနိစ္ဆယဘာဝံ ဒဿေတုမာဟ ‘‘ဧသေဝ နယော ဝုတ္တော’’တိ။

၁၂၉၂။ ဝုတ္တသ္မိန္တိ ဝုတ္တေ။

၁၂၉၃။ ယေနာတိ ဘတ္တေန။ အာပုစ္ဆိတောတိ ‘‘ဂဏှထာ’’တိ ဝုတ္တော။ တဿ ဘတ္တဿ။ အတ္ထိတာယ ယာဂုယာ ဝိဇ္ဇမာနတ္တာ။ ဣတိ ကာရဏန္တိ ဣဒံ ပဝါရဏကာရဏံ။

၁၂၉၄။ ‘‘ယာဂုမိဿကံ ဂဏှာ’’တိ ဝုတ္တေ သာ ယာဂု တတ္ထ တသ္မိံ အဘိဟဋေ ဘာဇနေ ပက္ခိတ္တဘတ္တေန သမာ ဝါ ဗဟုတရာ ဝါ စေ ဟောတိ၊ သော ဧဝံ ဝတွာ အဘိဟဋံ ပဋိက္ခေပံ ဘိက္ခု န ပဝါရေတိ ကိရာတိ ယောဇနာ။ ကိရာတိ အရုစိံ သူစေတိ။ တေနေဝ ဝက္ခတိ ‘‘ကာရဏံ ပန ဒုဒ္ဒသ’’န္တိ။

၁၂၉၅။ သဗ္ဗတ္ထာတိ သဗ္ဗအဋ္ဌကထာသု။

၁၂၉၆။ ဝိသုံ ကတွာတိ ဧကသိတ္ထမ္ပိ ယထာ န ဟောတိ၊ တထာ ရသံ ဝါ ခီရံ ဝါ ဘတ္တတော ဝိယောဇေတွာ။

၁၂၉၇။ ဂစ္ဆန္တေနေဝါတိ ယာဝ ဘောဇနနိဋ္ဌာနံ၊ တာဝ ဂစ္ဆန္တေနေဝ။ ယထာဟ ‘‘ဂစ္ဆန္တေန နဒိပူရံ ပတ္တေနပိ အဋ္ဌတွာ နဒိတီရေ ဂုမ္ဗံ ပရိက္ခိပိတွာ ဝိစရန္တေန နာဝံ ဝါ သေတုံ ဝါ အာရုဠှေန အဋ္ဌတွာ ဝဋ္ဋေတွာ ဝိစရန္တေနာ’’တိ။

၁၂၉၈။ သောတိ ဂစ္ဆန္တော။ တတောတိ ဌာနတော၊ ဂမနဣရိယာပထဿ ဝိကောပိတတ္တာတိ အဓိပ္ပာယော။

၁၂၉၉။ အာသနံအဝိစာလေတွာတိ နိသဇ္ဇာဝသေန ဖုဋ္ဌဋ္ဌာနံ အစာလေတွာ၊ အနုဋ္ဌဟိတွာတိ ဝုတ္တံ ဟောတိ။ ‘‘အဒိန္နာဒါနေ ဝိယ ဌာနာစာဝနံ ဂဟေတဗ္ဗ’’န္တိ ဂဏ္ဌိပဒေ ဝုတ္တံ။

၁၃၀၀။ တတောတိ ပဝါရိတကာလတော ဥဒ္ဓံ၊ တတော နိသိန္နဋ္ဌာနတော ဝါ။ ဣတော၊ ဧတ္တော ဝါ။ ဤသကမ္ပိ သံသရိတုန္တိ နိသိန္နဋ္ဌာနတော ဣတော စိတော စ ထောကမ္ပိ သံသရိတုံ၊ အပဂန္တုန္တိ အတ္ထော။

၁၃၀၁။ သဗ္ဗတ္ထာတိ ပီဌကာဒိသံဟာရိမေ သဗ္ဗသ္မိံ အာသနေ။ ‘‘ဝိနယညုနာ’’တိ ဣမိနာ ‘‘သစေ ပန နံ သဟ မဉ္စေန ဥက္ခိပိတွာ အညတြ နေန္တိ၊ ဝဋ္ဋတီ’’တိ (ပါစိ။ အဋ္ဌ။ ၂၃၈-၂၃၉) အဋ္ဌကထာယံ ‘‘ပီဌကာဒီသုပိ အယမေဝ ဝိနိစ္ဆယော’’တိ ဝုတ္တဘာဝံ ဇာနန္တေနာတိ ဝုတ္တံ ဟောတိ။

၁၃၀၂။ နိပဇ္ဇိတွာတိ ဧတ္ထ ‘‘ပရိဝတ္တန္တေန ယေန ပဿေန နိပန္နော၊ တဿ ဌာနံ နာတိက္ကမေတဗ္ဗ’’န္တိ ဝစနတော ပုဗ္ဗသယိတဋ္ဌာနံ အဝိဇဟိတွာ သယိတွာယေဝါတိ အတ္ထော။ တထေဝါတိ ဥက္ကုဋိကော ဟုတွာဝါတိ ဝုတ္တံ ဟောတိ။ ‘‘တဿ ပန ဟေဋ္ဌာ ပလာလပီဌံ ဝါ ကိဉ္စိ ဝါ နိသီဒနကံ ဒါတဗ္ဗ’’န္တိ (ပါစိ။ အဋ္ဌ။ ၂၃၈-၂၃၉) အဋ္ဌကထာယံ ဝုတ္တံ။

၁၃၀၃။ အတိရိတ္တံ ကရောန္တေန သိက္ခုနာ ဘာဇနံ ဩနမေတွာန ဘောဇနေ ဒဿိတေ အထ ‘‘အလမေတံ သဗ္ဗ’’န္တိ ဝတ္တဗ္ဗန္တိ ယောဇနာ။ တတ္ထ အတိရိတ္တံ ကရောန္တေနာတိ ‘‘အတိရိတ္တံ နာမ ကပ္ပိယကတံ ဟောတိ၊ ပဋိဂ္ဂဟိတကတံ ဟောတိ၊ ဥစ္စာရိတကတံ ဟောတိ၊ ဟတ္ထပါသေ ကတံ ဟောတိ၊ ဘုတ္တာဝိနာ ကတံ ဟောတိ၊ ဘုတ္တာဝိနာ ပဝါရိတေန အာသနာ အဝုဋ္ဌိတေန ကတံ ဟောတိ၊ ‘အလမေတံ သဗ္ဗ’န္တိ ဝုတ္တံ ဟောတိ၊ ဂိလာနာတိရိတ္တံ ဟောတီ’’တိ (ပါစိ။ ၂၃၉) ဝုတ္တေသု အဋ္ဌသု အာကာရေသု အန္တံ ဝိနာ ပုရိမေဟိ သတ္တဟိ ဝိနယကမ္မာကာရေဟိ အတိရိတ္တံ ကရောန္တေနာတိ ဝုတ္တံ ဟောတိ။ ယထာဟ ‘‘ဣမေဟိ သတ္တဟိ ဝိနယကမ္မာကာရေဟိ ယံ အတိရိတ္တ’’န္တိအာဒိ (ပါစိ။ အဋ္ဌ။ ၂၃၈-၂၃၉)။

ဣဓ အတိရိတ္တံ ကာတုံ အဘိဟဋဘောဇနံ ကပ္ပိယဉ္စ နာမ ဟောတိ၊ ကပ္ပိယကတေန သိင်္ဂိဝေရလသုဏာဒိဝတ္ထုနာ ယုတ္တတာယ စ အကပ္ပိယမံသာဘာဝေန စ ကုလဒူသနာဒီဟိ အနုပ္ပန္နဘာဝေန စ ကတဉ္စ နာမ ဟောတိ။ ‘‘အလမေတံ သဗ္ဗ’’န္တိ အတိရိတ္တကတဘာဝတော ဧဝံ ကပ္ပိယဉ္စ တံ ကတံ စာတိ ကပ္ပိယကတန္တိ ဝုတ္တံ ဟောတိ။ ဧဝမုပရိပိ ကတ-သဒ္ဒဿ အတ္ထော စ သမာသဝိဂ္ဂဟော စ ဝေဒိတဗ္ဗော ။ အဝသိဋ္ဌပဒေသု ဘိက္ခုနာ ပဋိဂ္ဂဟိတံ ပဋိဂ္ဂဟိတံ နာမ။ တံ ကာရာပေတွာ အာဂတေန ဘိက္ခုနာ ထောကံ ဥစ္စာရေတွာ၊ ဩတာရေတွာ ဝါ ဒဿိတံ ဥစ္စာရိတကတံ နာမ။ ကပ္ပိယံ ကာရာပေတုမာဂတဿ အဍ္ဎတေယျဟတ္ထပ္ပမာဏဟတ္ထပါသဗ္ဘန္တရဂတေန အတိရိတ္တကတံ ‘‘ဟတ္ထပါသေ ကတ’’န္တိ ဝုစ္စတိ။ အန္တမသော ပဝါရဏဇနကံ ယံ ကိဉ္စိ ဘောဇနံ ကုသဂ္ဂေနာပိ ဂဟေတွာ ဘုတ္တတ္တာ ဘုတ္တာဝိနာ။ ယထာဟ ‘‘ပဉ္စန္နံ ဘောဇနာနံ အညတရံ ဘောဇနံ အန္တမသော ကုသဂ္ဂေနာပိ ဘုတ္တံ ဟောတီ’’တိ။ ဘုဉ္ဇန္တော ပဝါရိတော ဟုတွာ ယော အာသနံ န ကောပေတိ၊ သော ဘုတ္တာဝီ ပဝါရိတော ‘‘အာသနာ အဝုဋ္ဌိတော’’တိ ဝုစ္စတိ၊ တေန ကတံ ‘‘ဘုတ္တာဝိနာ…ပေ… အဝုဋ္ဌိတေန ကတ’’န္တိ ဝုတ္တံ။ ‘‘အလမေတံ သဗ္ဗ’’န္တိ ဝစီဘေဒံ ကတွာ ဝုတ္တံ ‘‘အလမေတံ သဗ္ဗန္တိ ဝုတ္တံ ဟောတီ’’တိ ဒဿိတံ။ အယံ သတ္တဝိဓော ဝိနယကမ္မာကာရော နာမ။

ဂိလာနာတိရိတ္တကံ ပန ဣမိဿာ ဂါထာယ အဝုတ္တမ္ပိ အနတိရိတ္တသန္ဒဿနတ္ထံ ဝက္ခမာနာယ ‘‘ကတ’’န္တိအာဒိဂါထာယ ‘‘န ဂိလာနာတိရိတ္တဉ္စာ’’တိ ဣမဿ ဝိပရိယာယတော ဝေဒိတဗ္ဗံ။ ဂိလာနတော အတိရိတ္တံ၊ တဿ အညဒိနေသု ဘုဉ္ဇနတ္ထာယ ဥပဋ္ဌာပိတမ္ပိ ဂိလာနာတိရိတ္တံ နာမ။

‘‘တေန ဘိက္ခုနာ’’တိ ဣမိနာ ‘‘ဘုတ္တာဝိနာ’’တိ စ ‘‘ဘုတ္တာဝိနာ ပဝါရိတေန အာသနာ ဝုဋ္ဌိတေနာ’’တိ စ ဝုတ္တပ္ပကာရေန ဝိသိဋ္ဌံ တေနေဝ ပါကဋံ ဘိက္ခုံ ပရာမသတိ၊ ပဝါရဏဇနကာနံ ပဉ္စန္နံ ဘောဇနာနံ အညတရံ အပ္ပမတ္တကမ္ပိ ဘုတ္တာဝိနာ၊ ဘုတ္တာဝီ ပဝါရိတောပိ ဟုတွာ အာသနာ အဝုဋ္ဌိတေန ဝါ ဘိက္ခုနာတိ ဝုတ္တံ ဟောတိ။ ဩနမိတွာန ဘာဇနေတိ ဧတ္ထ ‘‘ဒဿိတေ ဘောဇနေ’’တိ သေသော၊ ‘‘အထာ’’တိ ဣမိနာ သမ္ဗန္ဓော။ ကပ္ပိယကရဏာရဟာနိ သိင်္ဂိဝေရာဒီနိ ကပ္ပိယံ ကာရေတွာ ပဋိဂ္ဂဟာပေတွာ အာဂန္တွာ ဟတ္ထပါသဗ္ဘန္တရေ ပတွာ အတိရိတ္တံ ကာရာပေန္တေန ဘိက္ခုနာ ဘာဇနံ ထောကံ ဩနာမေတွာ ဥစ္စာရေတွာ ဒဿိတကာလာနန္တရာတိ ဝုတ္တံ ဟောတိ။ ဥတ္တရိ ကာတဗ္ဗံ ဒဿေတုမာဟ ‘‘အလ’’န္တိအာဒိ။

ဧတ္တာဝတာ ‘‘တေန ဘိက္ခုနာ’’တိ ဣမိနာ ‘‘ဘုတ္တာဝိနာ ကတံ၊ ဘုတ္တာဝိနာ ပဝါရိတေန အာသနာ အဝုဋ္ဌိတေန ကတ’’န္တိ အင်္ဂဒွယံ သင်္ဂဟိတံ။ ‘‘ဩနမေတွာန ဘာဇန’’န္တိ ဣမိနာ ‘‘ဥစ္စာရိတကတံ ဟောတီ’’တိ ဣဒံ သင်္ဂဟိတံ။ ‘‘ကပ္ပိယကတံ၊ ပဋိဂ္ဂဟိတကတံ၊ ဟတ္ထပါသေကတ’’န္တိ ဣဒံ တယံ အနန္တရိယဝါစိနာ အထ-သဒ္ဒေန သင်္ဂဟိတံ။ ‘‘အလမေတံ သဗ္ဗ’’န္တိ ဣဒံ ပနေတ္ထ သရူပေနေဝ ဒဿိတန္တိ ဒဋ္ဌဗ္ဗံ။

၁၃၀၄။ ပတ္တေ ဌိတဘောဇနမေဝ အတိရိတ္တံ ကာတဗ္ဗန္တိ နတ္ထိ၊ ပစ္ဆိအာဒီသု ယတ္ထ ကတ္ထစိ ဘာဇနေ ဌိတမ္ပိ ကာတဗ္ဗန္တိ ဒဿေတုမာဟ ‘‘ကပ္ပိယံ ပနာ’’တိ။ ကုဏ္ဍေတိ ဘဏ္ဍုက္ခလိယံ။ ဘာဇနေတိ ယံ ကိဉ္စိ ဘာဇနံ ဂဟိတံ။

၁၃၀၅။ ဧတန္တိ အတိရိတ္တကတံ ဧတံ ဘောဇနံ။ တံ ဧကမေဝ ဌပေတွာတိ ယောဇနာ။ ‘‘ဝဋ္ဋတေဝါ’’တိ ဝုတ္တေပိ အဗ္ဘင်္ဂါဒီနမတ္ထာယာတိ ဂဏှေယျုန္တိ အာဟ ‘‘ဘုဉ္ဇိတဗ္ဗ’’န္တိ၊ တမေကံ ဝိနာ ပရေဟိ ပရိဘုဉ္ဇိတဗ္ဗန္တိ အတ္ထော။

၁၃၀၆-၇။ ကပ္ပိယံ ကာရေတွာတိ အတိရိတ္တံ ကာရေတွာ။ အာကိရန္တိ စေတိ ယဒိ ပက္ခိပန္တိ။ ပုန တထာ အတိရိတ္တံ ကာရေတွာ ဘုဉ္ဇိတဗ္ဗန္တိ ယောဇနာ။

တံ ကေန အတိရိတ္တံ ကာတဗ္ဗန္တိ အာဟ ‘‘ယေနာ’’တိအာဒိ။ တန္တိ အတိရိတ္တကတံ ဘောဇနံ။ ယေန အကတန္တိ ယေန ဘိက္ခုနာ ပဌမံ အတိရိတ္တံ န ကတံ၊ တေန ကာတဗ္ဗန္တိ သမ္ဗန္ဓော။ ယထာဟ ‘‘ယေန အကတန္တိ အညေန ဘိက္ခုနာ ယေန ပဌမံ န ကတံ၊ တေန ကာတဗ္ဗ’’န္တိ (ပါစိ။ အဋ္ဌ။ ၂၃၈-၂၃၉)။ ယံ ဝါ အကတံ၊ တံ ဝိသုံ တေန ဝါ ကာတဗ္ဗန္တိ ယောဇနာ။ ယံ ဝါ အကတန္တိ တသ္မိံ အတိရိတ္တကတဘောဇနေ အပက္ခိတ္တံ ယံ ဘောဇနံ အတိရိတ္တံ န ကတံ။ တံ ဝိသုံ တေန ဝါ ကာတဗ္ဗန္တိ ပစ္ဆာ ပက္ခိတ္တံ ဘောဇနံ အတိရိတ္တံ ကတေန ယထာ အမိဿံ ဟောတိ၊ တထာ အညဿ ဘာဇနဿ ဂဟဏဝသေန ဝိသုံ ကာရေတွာ တေန ပဌမံ ကတာတိရိတ္တေနာပိ အတိရိတ္တံ ကာတဗ္ဗံ။ ယထာဟ – ‘‘ယဉ္စ အကတန္တိ ယေန ပဌမံ ကပ္ပိယံ ကတံ၊ တေနာပိ ယံ အကတံ၊ တံ ကာတဗ္ဗံ။ ပဌမဘာဇနေ ပန ကာတုံ န လဗ္ဘတိ။ တတ္ထ ဟိ ကရိယမာနံ ပဌမံ ကတေန သဒ္ဓိံ ကတံ ဟောတိ၊ တသ္မာ အညသ္မိံ ဘာဇနေ ကာတုံ ဝဋ္ဋတီတိ အဓိပ္ပာယော’’တိ။

၁၃၀၈။ အကပ္ပိယာဒီဟိသတ္တဟီတိ ‘‘အနတိရိတ္တံ နာမ အကပ္ပိယကတံ ဟောတိ၊ အပ္ပဋိဂ္ဂဟိတကတံ ဟောတိ၊ အနုစ္စာရိတကတံ ဟောတိ၊ အဟတ္ထပါသေ ကတံ ဟောတိ၊ အဘုတ္တာဝိနာ ကတံ ဟောတိ၊ ဘုတ္တာဝိနာ စ ပဝါရိတေန အာသနာ ဝုဋ္ဌိတေန ကတံ ဟောတိ၊ ‘အလမေတံ သဗ္ဗ’န္တိ အဝုတ္တံ ဟောတီ’’တိ (ပါစိ။ ၂၃၉) ဝုတ္တေဟိ သတ္တဟိ ဝိနယကမ္မာကာရေဟိ။ အတိရိတ္တံ ကတန္တိ ယောဇနာ။ ‘‘ဟောတိ အနတိရိတ္တက’’န္တိ ပဒစ္ဆေဒေါ။

၁၃၀၉။ ဥပကဋ္ဌဝေလာယပိ အတိရိတ္တံ ကရောန္တေန ‘‘အဟံ ပါတောဝ ဘုဉ္ဇိ’’န္တိ ဝါ ‘‘ထောကံ ပရိဘုဉ္ဇိ’’န္တိ ဝါ အစိန္တေတွာ ကာတဗ္ဗန္တိ ဒဿေတုမာဟ ‘‘ယောပီ’’တိအာဒိ။ ဥပကဋ္ဌူပနီတမ္ပီတိ ဥပကဋ္ဌဝေလာယ ဥပနီတမ္ပိ ဘောဇနံ။

၁၃၁၀။ ယာမာဒိကာလိကန္တိ ယာမသတ္တာဟယာဝဇီဝိကကာလိကံ။ အနာမိဿန္တိ အာမိသေန အမိဿံ။ တံ ယာမာဒိကာလိကံ ပရိဘုဉ္ဇတောတိ သမ္ဗန္ဓော။

၁၃၁၂။ ဂိလာနဿ ဘုတ္တာတိရိတ္တံ ဝိယ ကဒါစိ ဘုဉ္ဇိဿတီတိ ဥဒ္ဒိဿ ဌပိတမ္ပိ ဂိလာနာတိရိတ္တံ နာမာတိ အဋ္ဌကထာယံ (ပါစိ။ အဋ္ဌ။ ၂၃၈-၂၃၉ အတ္ထတော သမာနံ) ဝုတ္တံ။ ‘‘ဝိဟာရာဒီသု ဂိလာနဿ ပါပုဏနကောဋ္ဌာသမ္ပိ ဂိလာနာတိရိတ္တံ နာမာ’’တိ ဝဒန္တိ။

၁၃၁၃။ ကထိနေနာတိ ပဌမကထိနေန။

ပဌမပဝါရဏကထာဝဏ္ဏနာ။

၁၃၁၄။ အနတိရိတ္တေနာတိ ဧတ္ထ ‘‘ခါဒနီယေန ဝါ ဘောဇနီယေန ဝါ’’တိ သေသော။ ဧတ္ထ ‘‘ခါဒနီယံ နာမ ပဉ္စဘောဇနာနိ ယာမကာလိကံ သတ္တာဟကာလိကံ ယာဝဇီဝိကံ ဌပေတွာ အဝသေသ’’န္တိ (ပါစိ။ ၂၃၉) ဝုတ္တံ ပဉ္စဘောဇနတော အညံ သဗ္ဗံ ယာဝကာလိကံ ခါဒနီယံ နာမ။ ‘‘ဘောဇနီယံ နာမ ပဉ္စ ဘောဇနာနိ ဩဒနော ကုမ္မာသော သတ္တု မစ္ဆော မံသ’’န္တိ (ပါစိ။ ၂၃၉) ဝုတ္တံ။ ဧတ္ထ ဝိနိစ္ဆယော အနန္တရသိက္ခာပဒေ ဝုတ္တော။ ပဝါရေယျာတိ ဧတ္ထ ‘‘အဘိဟဋ္ဌု’’န္တိ သေသော။ အဘိဟဋ္ဌုံ ပဝါရေယျာတိ အဘိဟရိတွာ ‘‘ဟန္ဒ ဘိက္ခု ယာဝတကံ ဣစ္ဆသိ၊ တာဝတကံ ဂဟေတွာ ခါဒ ဝါ ဘုဉ္ဇ ဝါ’’တိ ဧဝံ ပဝါရေယျ။ ‘‘ပဝါရိတ’’န္တိပဒံ ဝုတ္တတ္ထမေဝ။ ဇာနန္တိ သုတွာ ဝါ ဒိသွာ ဝါ တဿ ပဝါရိတဘာဝံ ဇာနန္တော။ အာသာဒနာပေက္ခောတိ အာသာဒနံ စောဒနံ မင်္ကုကရဏဘာဝံ အပေက္ခမာနော။ ဘုတ္တေတိ တဿ ပယောဂေန ဣတရေန ဘုဉ္ဇိတွာ ပရိယောသာပိတေ။ တဿာတိ ယော တဿ ပဝါရိတဘာဝံ ဉတွာ ‘‘ဘုဉ္ဇာ’’တိ နိယောဇေသိ၊ တဿ။

၁၃၁၅-၆။ ဧကဿ ဘုဉ္ဇနေန အညဿ ပါစိတ္တိ ဟောတီတိ ကထမေတန္တိ အာသင်္ကာယ တထာ ဝုတ္တတ္တာ ပရိဟရိတုမာဟ ‘‘ဒုက္ကဋံ…ပေ… ဒဿိတ’’န္တိ။ ဣတရဿ ဂဟဏေတိ ပဝါရိတဘိက္ခုနော ဘုဉ္ဇနတ္ထာယ ပဋိဂ္ဂဟဏေ။ အဇ္ဈောဟာရပယောဂေသု စာတိ ဧတ္ထာပိ ‘‘ဣတရဿာ’’တိ သမ္ဗန္ဓော။ သဗ္ဗံ ဒုက္ကဋံ၊ ပါစိတ္တိယဉ္စ။ ဒဿိတန္တိ ‘‘အဘိဟရတိ၊ အာပတ္တိ ဒုက္ကဋဿ။ တဿ ဝစနေန ‘ခါဒိဿာမိ ဘုဉ္ဇိဿာမီ’တိ ပဋိဂ္ဂဏှာတိ၊ အာပတ္တိ ဒုက္ကဋဿ။ အဇ္ဈောဟာရေ အဇ္ဈောဟာရေ အာပတ္တိ ဒုက္ကဋဿ။ ဘောဇနပရိယောသာနေ အာပတ္တိ ပါစိတ္တိယဿာ’’တိ (ပါစိ။ ၂၄၄) ဒေသိတံ ဘဂဝတာတိ အတ္ထော။

၁၃၁၇။ ဥဘယတ္ထာပိ ဝိမတိဿာတိ ပဝါရိတေ စ အပဝါရိတေ စ ဝိမတိဿ။ ဒုက္ကဋံ ပရိဒီပိတန္တိ ‘‘ပဝါရိတေ ဝေမတိကော။ အပ္ပဝါရိတေ ဝေမတိကော၊ အာပတ္တိ ဒုက္ကဋဿာ’’တိ (ပါစိ။ ၂၄၅) ဒေသိတံ။

၁၃၁၈။ ကာရာပေတွာတိ ဧတ္ထ ‘‘ဘုဉ္ဇာဟီ’’တိ သေသော။ အညဿတ္ထာယာတိ ဧတ္ထ ‘‘အဘိဟရန္တော ဂစ္ဆာဟီ’’တိ သေသော။

၁၃၁၉။ ဩမသဝါဒတုလျာဝါတိ ဣဒံ အဒိန္နာဒါနသမုဋ္ဌာနံ သန္ဓာယာဟ။

ဒုတိယပဝါရဏကထာဝဏ္ဏနာ။

၁၃၂၀။ ခါဒနီယံ ဝါတိ ပဉ္စ ဘောဇနာနိ စ ကာလိကတ္တယဉ္စ ဝိနာ အဝသေသေသု ယံ ကိဉ္စိ ဝါ။ ဘောဇနီယံ ဝါတိ ပဉ္စသု ဘောဇနေသု အညတရမ္ပိ။ ဝိကာလေတိ ဝိဂတေ ကာလေ။ ကာလော နာမ အရုဏုဂ္ဂမနတော ယာဝ မဇ္ဈန္တိကာ၊ တဒညော ဝိကာလော။ ယထာဟ ‘‘ဝိကာလော နာမ မဇ္ဈန္တိကေ ဝီတိဝတ္တေ ယာဝ အရုဏုဂ္ဂမနာ’’တိ (ပါစိ။ ၂၄၉)။ ဌိတမဇ္ဈန္တိကောပိ ကာလေယေဝ သင်္ဂယှတိ။ ယထာဟ ‘‘ဌိတမဇ္ဈန္တိကောပိ ကာလသင်္ဂဟံ ဂစ္ဆတိ။ တတော ပဋ္ဌာယ ပန ခါဒိတုံ ဝါ ဘုဉ္ဇိတုံ ဝါ န သက္ကာ၊ သဟသာ ပိဝိတုံ ပန သက္ကာ ဘဝေယျ။ ကုက္ကုစ္စကေန ပန န ကာတဗ္ဗံ။ ကာလပရိစ္ဆေဒဇာနနတ္ထဉ္စ ကာလတ္ထမ္ဘော ယောဇေတဗ္ဗော၊ ကာလဗ္ဘန္တရေဝ ဘတ္တကိစ္စံ ကာတဗ္ဗ’’န္တိ (ပါစိ။ အဋ္ဌ။ ၂၄၈-၂၄၉)။ ဒေါသန္တိ ပါစိတ္တိယံ။

၁၃၂၁။ ‘‘ခါဒနီယံ ဝါ ဘောဇနီယံ ဝါ’’တိ ဧတ္ထ ဘောဇနီယဿ ပဝါရဏသိက္ခာပဒေ ဒဿိတသရူပတ္တာ ခါဒနီယံ တာဝ သရူပတော ဒဿေတုမာဟ ‘‘ယမာမိသဂတ’’န္တိအာဒိ။ ဧတ္ထာတိ ဧတေသု ခါဒနီယဘောဇနီယေသု။ ယံ ပန ဝနမူလဖလာဒိကံ အာမိသဂတံ အာမိသေ ယာဝကာလိကေ ပရိယာပန္နံ၊ တံ ခါဒနီယန္တိ ယောဇနာ။ ကာလိကေသွသမောဟတ္ထန္တိ ဧတ္ထ ဂါထာဗန္ဓဝသေန မ-ကာရလောပေါ၊ အသမ္မောဟတ္ထန္တိ ဝုတ္တံ ဟောတိ။ ဣဒန္တိ ဝက္ခမာနံ သန္ဓာယာဟ။

၁၃၂၂။ မူလန္တိ ယံ ကိဉ္စိ ရုက္ခလတာနံ မူလံ။ ကန္ဒန္တိ ရုက္ခလတာနမေဝ ကန္ဒံ။ မုဠာလန္တိ ပဒုမဂစ္ဆမူလကန္ဒံ။ မတ္ထကန္တိ တာလနာဠိကေရာဒီနံ မတ္ထကံ၊ ဝေဠုကဠီရပလ္လဝင်္ကုရာနဉ္စ ဧတ္ထေဝ သင်္ဂဟော။ ခန္ဓကန္တိ ဥစ္ဆုအာဒိခန္ဓကံ။ တစန္တိ ဆလ္လိ။ ပတ္တန္တိ ပဏ္ဏံ။ ပုပ္ဖန္တိ ကုသုမံ။ ဖလန္တိ ရုက္ခလတာဒီနံ ဖလံ။ အဋ္ဌီတိ ရုက္ခလတာဒိဗီဇံ။ ပိဋ္ဌန္တိ ဓညာဒိပိဋ္ဌံ။ နိယျာသန္တိ သိလေသံ။ ‘‘ခါဒနီယ’’န္တိ သဗ္ဗတ္ထ ပကရဏတော လဗ္ဘတိ။

၁၃၂၃။ ဧဝံ ခါဒနီယာနံ မာတိကံ နိက္ခိပိတွာ တေ သရူပတော ဒဿေတုမာဟ ‘‘မူလခါဒနီယာဒီန’’န္တိအာဒိ။ တတ္ထ ရုက္ခမူလမေဝ ခါဒနီယံ၊ တံ အာဒိ ယေသန္တိ ဝိဂ္ဂဟော။ မုခမတ္တနိဒဿနံ နိဗောဓထာတိ ဧတ္ထ ‘‘မယာ ကရိယမာန’’န္တိ သေသော။ မုခမတ္တန္တိ ပဝေသဒွါရမတ္တံ၊ နိရဝသေသတော ဒဿနေ ပပဉ္စဘီရုကာနံ ပုဗ္ဗေ ဘယံ ဟောတီတိ သင်္ခေပတော ခါဒနီယာနိ ဒဿိဿန္တိ ဝုတ္တံ ဟောတိ။ တထာ ဒဿနေ ပယောဇနမာဟ ‘‘နာမတ္ထေသု ဘိက္ခူနံ ပါဋဝတ္ထာယာ’’တိ၊ မူလခါဒနီယာဒီနံ နာမေသု စ တဒတ္ထေသု စ ဘိက္ခူနံ ပါဋဝုပ္ပာဒနတ္ထန္တိ အတ္ထော။

၁၃၂၄-၅။ မူလကမူလာဒီနိ ဥပဒေသတောယေဝ ဝေဒိတဗ္ဗာနိ။ န ဟိ တာနိ ပရိယာယန္တရေန ဝုစ္စမာနာနိပိ သက္ကာ ဝိညာတုံ။ ပရိယာယန္တရေနပိ ဟိ ဝုစ္စမာနေ တံ တံ နာမံ အဇာနန္တာနံ သမ္မောဟောယေဝ သိယာ၊ တသ္မာ တတ္ထ န ကိဉ္စိ ဝက္ခာမ။ သာကာနန္တိ သူပေယျပဏ္ဏာနံ။ ဣဓာတိ ဣမသ္မိံ သိက္ခာပဒေ။ အာဟာရတ္ထန္တိ အာဟာရေန ကတ္တဗ္ဗပယောဇနံ၊ အာဟာရကိစ္စန္တိ ဝုတ္တံ ဟောတိ။ ‘‘အာမိသတ္ထ’’န္တိပိ လိခန္တိ။ ဖရန္တီတိ ဝိတ္ထာရေန္တိ။

၁၃၂၆။ ဇရဋ္ဌန္တိ ပုရာဏကန္ဒံ။ ယံ တံ ဇရဋ္ဌန္တိ သမ္ဗန္ဓော။ သေသာနံ ဇရဋ္ဌံ ယာဝကာလိကန္တိ ယောဇနာ။ သေသာနန္တိ မူလကာဒီနိ ဝုတ္တာနိ။ ယထာဟ ‘‘မူလကခါရကဇဇ္ဈရီမူလာနံ ပန ဇရဋ္ဌာနိပိ အာမိသဂတိကာနေဝါ’’တိ (ပါစိ။ အဋ္ဌ။ ၂၄၈-၂၄၉)။

၁၃၃၁။ ဓောတောတိ နိဗ္ဗတ္တိတပိဋ္ဌော။

၁၃၃၂။ အဓောတော ခီရဝလ္လိယာ ကန္ဒောတိ ယောဇနာ။ ဝါကျပထာတီတာတိ ‘‘အသုကော ဝါ အသုကော ဝါ’’တိ ဝတွာ ပရိယန္တံ ပါပေတုံ အသက္ကုဏေယျတ္တာ ဝစနပထာတီတာ။

၁၃၃၃။ ပုဏ္ဍရီကံ သေတံ။ ပဒုမံ ရတ္တံ။

၁၃၃၄။ သမ္ဘဝံ ဇာတံ။

၁၃၃၈။ ဇရဋ္ဌဗုန္ဒောတိ ကန္ဒဿ ဟေဋ္ဌာ အတီဝ ပရိဏတဋ္ဌာနံ။

၁၃၃၉။ ပထဝိယံ ဂတောတိ အန္တောပထဝိယံ ဂတော၊ ပထဝိယံ နိမုဇ္ဇိတွာ ဂတတရုဏဒဏ္ဍောတိ ဝုတ္တံ ဟောတိ။

၁၃၄၀။ ဧဝံ အန္တောဘူမိယံ ဂတော။ ‘‘ပဏ္ဏဒဏ္ဍော ဥပ္ပလာဒီန’’န္တိ ပဒစ္ဆေဒေါ။ သဗ္ဗောတိ တရုဏောပိ ပရိဏတောပိ။ ဥပ္ပလာဒီနံ၊ ပဒုမဇာတိယာ စ သဗ္ဗော ပဏ္ဏဒဏ္ဍော ယာဝကာလိကောတိ ယောဇနာ။

၁၃၄၅။ ပတ္တခါဒနီယံနာမာတိ ပတ္တသင်္ခါတံ ခါဒနီယံ နာမ။

၁၃၄၈။ မူလကာဒီနန္တိ ‘‘မူလကံ ခါရကဉ္စေဝါ’’တိအာဒိကာယ ဂါထာယ ဝုတ္တမူလကာဒီနံ။

၁၃၄၉။ ကဏ္ဏိကာတိ ပဒုမကဏ္ဏိကာ။

၁၃၆၀။ ကေတကာဒီနန္တိ ဧတ္ထ အာဒိ-သဒ္ဒေန တိမ္ဗရုသကံ ဂဟိတံ။ တာလဖလဋ္ဌီတိ တရုဏဖလာနံ အဋ္ဌိ။

၁၃၆၁။ ‘‘ပုန္နာဂမဓုကဋ္ဌီနီ’’တိ စ ‘‘ပုန္နာဂမဓုကဋ္ဌိစာ’’တိ စ ပေါတ္ထကေသု ဥဘယထာ ပါဌော ဒိဿတိ၊ အတ္ထော ပန ဧကောယေဝ။ ‘‘သေလု အဋ္ဌီ’’တိ ပဒစ္ဆေဒေါ။ အနာမိသေတိ ယာဝဇီဝိကေ။

၁၃၆၃။ ဓောတံတာလပိဋ္ဌန္တိ တာလဖေဂ္ဂုံ ကောဋ္ဋေတွာ ဥဒကေ မဒ္ဒိတွာ ပရိဿာဝေတွာ ကလလေ ဘာဇနတလံ ဩတိဏ္ဏေ ပသန္နောဒကံ အပနေတွာ ဂဟိတတာလပိဋ္ဌန္တိ ဝုတ္တံ ဟောတိ။ တထာ ခီရဝလ္လိယာ ပိဋ္ဌန္တိ ယောဇနာ၊ တထေဝ ကောဋ္ဋေတွာ ပရိဿာဝေတွာ ဂဟိတခီရဝလ္လိယာ ပိဋ္ဌန္တိ အတ္ထော။

၁၃၆၄။ အဓောတံ ဝုတ္တဝိပရိယာယတော ဂဟေတဗ္ဗံ။ ‘‘အာဟာရတ္ထမသာဓေန္တံ၊ သဗ္ဗံ တံ ယာဝဇီဝိက’’န္တိ ဝစနတော တေသု တေသု ဇနပဒေသု မနုဿာနံ အာဟာရကိစ္စံ အကရောန္တံ မူလာဒိ ယာဝဇီဝိကံ၊ တဒညံ ယာဝကာလိကန္တိ သင်္ခေပလက္ခဏံ ကာတဗ္ဗန္တိ။

ဝိကာလဘောဇနကထာဝဏ္ဏနာ။

၁၃၆၉။ ဘောဇနံ သန္နိဓိံ ကတွာ ခါဒနံ ဝါတိ ဧတ္ထ ဘောဇနခါဒနီယာနိ ယထာဝုတ္တဘေဒသရူပါနေဝ။ သန္နိဓိံ ကတွာတိ ပဋိဂ္ဂဟေတွာ ဧကရတ္တမ္ပိ အတိက္ကာမေတွာ၊ သန္နိဒဟိတွာတိ ဝုတ္တံ ဟောတိ။ ယထာဟ ‘‘ပဋိဂ္ဂဟေတွာ ဧကရတ္တမ္ပိ ဝီတိနာမိတဿေတံ အဓိဝစန’’န္တိ (ပါစိ။ အဋ္ဌ။ ၂၅၃)။ တဒေဝ ဝက္ခတိ ‘‘သယ’’န္တိအာဒိနာ။ ခါဒနန္တိ ကမ္မသာဓနောယံ၊ ‘‘ခဇ္ဇ’’န္တိ ဣမိနာ သမာနတ္ထော။

၁၃၇၁။ ‘‘သန္နိဓိံ ကတွာ’’တိ ဧတ္ထ နိဒ္ဒေသံ ဒဿေတုမာဟ ‘‘သယ’’န္တိအာဒိ။

၁၃၇၂။ ‘‘တံ န ဝဋ္ဋတီ’’တိ ဧတ္ထ အတ္ထံ ဒဿေတုမာဟ ‘‘တတော’’တိအာဒိ။ တတောတိ သန္နိဓိကတဘောဇနတော။ သုဒ္ဓစိတ္တေနာတိ သဝါသနသကလကိလေသပ္ပဟာနတော နိမ္မလစိတ္တေန။ တာဒိနာတိ အဋ္ဌသု လောကဓမ္မေသု နိဗ္ဗိကာရဘာဝေန တာဒိနာ။ အထ ဝါ ယာဒိသာ ပုရိမကာ သမ္မာသမ္ဗုဒ္ဓါ ရူပါရူပဂုဏေဟိ အဟေသုံ၊ တာဒိသေန ဘဂဝတာ။

၁၃၇၃။ ဩဒနာဒီသု ပဉ္စသု ဘောဇနေသု တာဝ အကပ္ပိယမံသေန သန္နိဓိဝသေန ပါစိတ္တိယဉ္စ အာပတ္တိဝိသေသဉ္စ ဒဿေတုမာဟ ‘‘အကပ္ပိယေသူ’’တိအာဒိ။ ပါစိတ္တီတိ သန္နိဓိပါစိတ္တိယမာဟ။ ဣတရေတိ သီဟာဒိမံသမှိ။ ဒုက္ကဋေန သဟ ပါစိတ္တီတိ ယောဇနာ။

၁၃၇၄။ ယာမကာလိကသင်္ခါတံ ပရိဘုဉ္ဇတောတိ ဧတ္ထ ‘‘သန္နိဓိံ ကတွာ’’တိ အဓိကာရတော လဗ္ဘတိ ။ ‘‘ဒုက္ကဋေန သဟာ’’တိ အဝတွာ ‘‘ပါစိတ္တီ’’တိ ဝုတ္တတ္တာ သတိ ပစ္စယေ ပရိဘုဉ္ဇတောတိ ဂဟေတဗ္ဗံ။ ယထာဟ ‘‘ယာမကာလိကံ သတိ ပစ္စယေ အဇ္ဈောဟာရတော ပါစိတ္တိယံ။ အာဟာရတ္ထာယ အဇ္ဈောဟာရတော ဒုက္ကဋေန သဒ္ဓိံ ပါစိတ္တိယ’’န္တိ (ပါစိ။ အဋ္ဌ။ ၂၅၃)။

၁၃၇၅။ အန္နန္တိ ဧတ္ထာပိ ‘‘သန္နိဓိကတ’’န္တိ ဣဒံ ပုရေ ဝိယ လဗ္ဘတိ၊ ‘‘ပကတိ’’န္တိ ဣဒံ ‘‘အန္န’’န္တိ ဧတဿ ဝိသေသနံ၊ မနုဿမံသာဒီဟိ အသမ္မိဿံ နာတိရိတ္တကတံ အန္နမတ္တန္တိ အတ္ထော။ ပါစိတ္တိယဒွယန္တိ အနတိရိတ္တပစ္စယာ စ သန္နိဓိပစ္စယာ စ ဒွေ ပါစိတ္တိယာနိ။

၁၃၇၆။ ‘‘ဒွေ ၊ ဒွယ’’န္တိ ဥဘယတ္ထာပိ အယမေဝတ္ထော။

၁၃၇၇။ သာမိသေန မုခေန ဒွေတိ ဧတ္ထ ‘‘ပဉ္စ ဘောဇနာနိ ယာမကာလိကံ သတ္တာဟကာလိကံ ယာဝဇီဝိကံ ဌပေတွာ အဝသေသံ ခါဒနီယံ နာမာ’’တိ (ပါစိ။ ၂၅၄) ဝုတ္တတ္တာ ခါဒနီယာသင်္ဂဟိတေန ယာမကာလိကေန စ တေန သမ္မိဿတ္တာ သန္နိဓိနာမေန မုခဂတအာမိသမူလကေန စ သန္နိဓိပါစိတ္တိယာနိ ဒွေ ဟောန္တီတိ အတ္ထော။ သာမိသေန မုခေနာတိ ဥပလက္ခဏတ္တာ ယထာကထဉ္စိ အာမိသေ မိဿီဘူတေ ဧတ္တကာ အာပတ္တိယောတိ ဒဋ္ဌဗ္ဗံ။ နိရာမိသံ ယာမကာလိကံ ဘုဉ္ဇတော ဧကမေဝ ပါစိတ္တိယန္တိ ယောဇနာ၊ ယေန ကေနစိ အာကာရေန အသမ္မိဿံ ယာမကာလိကံ ပရိဘုဉ္ဇတော ဧကမေဝ ပါစိတ္တိယံ ဟောတီတိ အတ္ထော။

၁၃၇၈။ တမေဝါတိ သန္နိဟိတမေဝ ကာလိကံ။ တေသု ဒွီသု ဝိကပ္ပေသူတိ သာမိသနိရာမိသဝိကပ္ပဒွယေ။ ကေဝလံ ဒုက္ကဋံ ဝဍ္ဎတီတိ ပဌမဝိကပ္ပေ ဒွီဟိ ပါစိတ္တိယေဟိ သဒ္ဓိံ ဒုက္ကဋံ၊ ဒုတိယဝိကပ္ပေ ပါစိတ္တိယေန သဒ္ဓိံ ဒုက္ကဋံ ဟောတီတိ ဝုတ္တံ ဟောတိ။

၁၃၇၉။ သုဒ္ဓန္တိ ဧတ္ထ ‘‘သန္နိဓိကတံ ဘောဇန’’န္တိ သေသော။ ဣဒံ ‘‘ပကတိဘောဇနေ’’တိ (ပါစိ။ အဋ္ဌ။ ၂၅၃) အဋ္ဌကထာယံ၊ ဣဓ စ ‘‘န ဒေါသော ယာမကာလိကေ’’တိ ယာမကာလိကဿ ဝိသုံ ဝက္ခမာနတ္တာ ဝိညာယတိ၊ အကပ္ပိယမံသယာမကာလိကေဟိ အမိဿံ ဘောဇနန္တိ ဝုတ္တံ ဟောတိ။

၁၃၈၀။ မံသေတိ ဧတ္ထ ‘‘အကပ္ပိယေ’’တိ ဣဒံ ထုလ္လစ္စယာဒိဝစနေနေဝ လဗ္ဘတိ။ ဝဍ္ဎတီတိ ပုဗ္ဗေ ဝုတ္တေဟိ ပါစိတ္တိယဒွယေဟိ သဒ္ဓိံ မနုဿမံသေ ထုလ္လစ္စယဉ္စ သီဟာဒိမံသေ ဒုက္ကဋဉ္စ ဝဍ္ဎတိ။ မနုဿမံသေ စ သေသေ သီဟမံသာဒိကေ အကပ္ပိယမံသေ စ ယထာနုက္ကမတော ထုလ္လစ္စယဉ္စေဝ ဒုက္ကဋဉ္စာတိ ဒွယံ ဝဍ္ဎတီတိ ယောဇနာ။

၁၃၈၁။ အနတိရိတ္တမ္ပိ ဘောဇနံ ဝိကာလေ ပရိဘုဉ္ဇတော ဘိက္ခုနော တန္နိမိတ္တကော ဒေါသော ယထာဝုတ္တေသု သဗ္ဗဝိကပ္ပေသု နတ္ထီတိ ယောဇနာ။ ‘‘ဝိကာလ…ပေ… ကာလိကေ’’တိ ယာမကာလိကဿ ဝိသုံ ဝက္ခမာနတ္တာ စ အတိရိတ္တကာရာပနဉ္စ ဘောဇနေယေဝ သမ္ဘဝတီတိ အနတိရိတ္တန္တိ ဧတ္ထ ‘‘နိဟိတဘောဇန’’န္တိ သေသော။ ‘‘အနတိရိတ္တပစ္စယာ ပန ဝိကာလေ သဗ္ဗဝိကပ္ပေသု အနာပတ္တီ’’တိ (ပါစိ။ အဋ္ဌ။ ၂၅၃) အဋ္ဌကထာဝစနတော ဒေါသောတိ အနတိရိတ္တပစ္စယာ ပါစိတ္တိယမာဟ။ တေနေဝ ဝက္ခတိ ‘‘တန္နိမိတ္တကော’’တိ၊ အနတိရိတ္တနိမိတ္တကောတိ အတ္ထော။ သဗ္ဗဝိကပ္ပေသူတိ ‘‘သုဒ္ဓံ ဝါ မနုဿမံသမိဿံ ဝါ သီဟာဒိမံသမိဿံ ဝါ ယာမကာလိကမိဿံ ဝါ’’တိ သဗ္ဗေသု ဝိကပ္ပေသု။ ‘‘တန္နိမိတ္တကော’’တိ ဝစနေနေဝ ဝါရိတဝိကာလာဒိနိမိတ္တဿ ဒေါသဿ သမ္ဘဝံ ဒဿေတိ။

၁၃၈၂-၃။ ဝိကာလပစ္စယာ ဝါတိ ဧတ္ထ ဝါ-သဒ္ဒေန ‘‘အနတိရိတ္တပစ္စယာ’’တိ ဣဒံ သမုစ္စိတံ။ အပိ-သဒ္ဒေါ ‘‘ယာမကာလိကေပီ’’တိ ယောဇေတဗ္ဗော။ သတ္တာဟကာလိကံ၊ ယာဝဇီဝိကံ အာဟာရဿေဝ အတ္ထာယ ပဋိဂ္ဂဏှတော ဂဟဏေ၊ ယထာဝုတ္တဿ သတ္တာဟကာလိကယာဝဇီဝိကဘေဒေန ဒုဝိဓဿ တု အဇ္ဈောဟာရပယောဂေသု နိရာမိသေ ဝါ ဒုက္ကဋန္တိ ယောဇနာ။ တု-သဒ္ဒေါ ဧဝ-ကာရတ္ထော။

၁၃၈၄။ အထာတိ ဝါကျာရမ္ဘေ နိပါတော။ အာမိသသံသဋ္ဌံ သတ္တာဟကာလိကံ၊ ယာဝဇီဝိကံ ဝါတိ ယောဇနာ။ ဂဟေတွာတိ ပဋိဂ္ဂဟေတွာ။ ဌပိတန္တိ အရုဏံ အတိက္ကာမေတွာ ဌပိတံ။ ပါစိတ္တီတိ သန္နိဓိပါစိတ္တိ။

၁၃၈၅။ ကာလောတိ အရုဏုဂ္ဂမနာဒိမဇ္ဈန္တိကာဝသာနော ကာလော။ ယာမောတိ မဇ္ဈန္တိကာဒိဒုတိယအရုဏုဂ္ဂမနာဝသာနော။ တံ တံ ကာလံ ကာလိကံ အတိက္ကာမယတော တု ဒေါသောတိ ယောဇနာ။ တု-သဒ္ဒေါ ဧဝကာရတ္ထော။ တံ ဝါ ကာလိကန္တိ ယထာက္ကမံ ယာဝကာလိကံ ယာမကာလိကံ သတ္တာဟကာလိကန္တိ ဝုတ္တံ ဟောတိ။

၁၃၈၆။ ယာဝကာလိကံ အတ္တနာ သမ္ဘိန္နာနိ ဣတရာနိ တီဏိ ကာလိကာနိ အတ္တနောယေဝ သဘာဝံ ဥပနေတီတိ ယောဇနာ။ သကော ဘာဝေါ သဘာဝေါ၊ တံ။

၁၃၈၇-၈။ ဧဝမေဝဝိနိဒ္ဒိသေတိ ‘‘ပုရိမံ ပုရိမံ ကာလိကံ အတ္တနာ သမ္မိဿံ ပစ္ဆိမံ ပစ္ဆိမံ အတ္တနော သဘာဝမေဝ ဂါဟာပေတီ’’တိ ကထေယျာတိ ဝုတ္တံ ဟောတိ။

ဣမေသူတိအာဒီသု နိဒ္ဓါရဏေ ဘုမ္မံ။ အန္တောဝုတ္ထံ ဟောတီတိ အကပ္ပိယကုဋိယံ ဌပေတွာ အရုဏုဋ္ဌာပနေန အန္တောဝုတ္ထံ နာမ ဟောတိ။ သန္နိဓိ စ ဟောတီတိ ပဋိဂ္ဂဟေတွာ ပဋိဂ္ဂဟဏံ အဝိဇဟိတွာ အရုဏုဋ္ဌာပနေန သန္နိဓိ စ နာမ ဟောတိ။ ပေါတ္ထကေသု ‘‘သန္နိဓိ’’န္တိ သာနုနာသိကော ပါဌော ဒိဿတိ၊ ‘‘ဟောတီ’’တိ ကိရိယာယ သမ္ဗန္ဓတ္တာ သန္နိဓိ-သဒ္ဒေါ ပဌမေကဝစနန္တောတိ အနုနာသိကော အာဂမသန္ဓိဇောတိ ဝေဒိတဗ္ဗော။ ဥဘယမ္ပီတိ ယထာဝုတ္တံ အန္တောဝုတ္ထံ၊ သန္နိဓိ စာတိ ဥဘယမ္ပိ။ န ဟောတေဝါတိ ပုရိမကာလိကဒွယေန အမိဿံ န ဟောတေဝ။

၁၃၈၉။ ကပ္ပိယကုဋိနာမေန အကတံ၊ အသမ္မတံ၊ အပရိဂ္ဂဟံ၊ ပါကာရာဒီဟိ ပရိက္ခိတ္တံ သေနာသနံ အကပ္ပိယကုဋိ နာမာတိ သင်္ခေပတော ဂဟေတဗ္ဗံ။ အန္တဒွယေနာတိ သတ္တာဟကာလိကယာဝဇီဝိကေန၊ သဟတ္ထေ ကရဏဝစနံ။ ‘‘မိဿိတ’’န္တိ သေသော။ ဂဟိတန္တိ ပဋိဂ္ဂဟိတံ။ တံ ပုဗ္ဗံ ဒွယန္တိ ယာဝကာလိကယာမကာလိကဒွယံ။ ပုရိမကာလိကဒွယေ ယံ ကိဉ္စိ တဒဟုပဋိဂ္ဂဟိတမ္ပိ အကပ္ပိယကုဋိယာယေဝ ဌပေတွာ အရုဏံ ဥဋ္ဌာပိတေန ပစ္ဆိမကာလိကဒွယေ ယေန ကေနစိ သမ္မိဿံ အန္တောဝုတ္ထံ နာမ ဟောတီတိ ဝုတ္တံ ဟောတိ။

၁၃၉၀။ အန္တောဝုတ္ထေန ပစ္ဆိမကာလိကဒွယေန သံသဋ္ဌံ ယဒိဒံ ပုရိမကာလိကဒွယံ၊ အယံ မုခသန္နိဓိ နာမ ဟောတီတိ အဋ္ဌကထာယံ (မဟာဝ။ အဋ္ဌ။ ၂၉၅ အတ္ထတော သမာနံ) ဝုတ္တံ။ မဟာပစ္စရိယံ ပန အန္တောဝုတ္ထံ ဟောတိ၊ န ကပ္ပတိ ဣတိ ဒဠှံ ကတွာ ဝုတ္တန္တိ ယောဇနာ။

တတ္ထ ‘‘မုခသန္နိဓီ’’တိ စ ‘‘အန္တောဝုတ္ထ’’န္တိ စ နာမမတ္တမေဝ နာနာကရဏံ၊ သောယေဝတ္ထောတိ ဥဘိန္နံ အဋ္ဌကထာဝစနာနံ အနတ္ထန္တရတာ ဝေဒိတဗ္ဗာ။ တထာ ဟိ မုခ-သဒ္ဒေါ အန္တော-သဒ္ဒပရိယာယော၊ သန္နိဓိ-သဒ္ဒေါ ပရိဝုတ္ထ-သဒ္ဒပရိယာယော။ မုခေ သန္နိဓိ မုခသန္နိဓီတိ ကမ္မသာဓနံ။ ဗဟိ သန္နိဓိနိဝတ္တနတ္ထံ အဋ္ဌကထာသု မုခ-ဂ္ဂဟဏံ၊ အန္တော-ဂဟဏဉ္စ ကတံ။ ဗဟီတိ စ ပဋိဂ္ဂဟေတွာ အကပ္ပိယကုဋိယာ ဗဟိ ယတ္ထ ကတ္ထစိ ပရိဝုတ္ထံ ပစ္ဆိမကာလိကဒွယံ ပုရိမေန ကာလိကဒွယေန သံသဋ္ဌံ အဓိပ္ပေတံ။ မုခသန္နိဓိအန္တောဝုတ္ထပဒါနံ အနတ္ထန္တရဘာဝေါ သမန္တပါသာဒိကာယံ ဝုတ္တော။

ယထာဟ ‘‘သာမဏေရော ဘိက္ခုဿ တဏ္ဍုလာဒိကံ အာမိသံ အာဟရိတွာ ကပ္ပိယကုဋိယံ နိက္ခိပိတွာ ပုနဒိဝသေ ပစိတွာ ဒေတိ၊ အန္တောဝုတ္ထံ န ဟောတိ။ တတ္ထ အကပ္ပိယကုဋိယံ နိက္ခိတ္တသပ္ပိအာဒီသု ယံ ကိဉ္စိ ပက္ခိပိတွာ ဒေတိ၊ မုခသန္နိဓိ နာမ ဟောတိ။ မဟာပစ္စရိယံ ပန ‘အန္တောဝုတ္ထံ ဟောတီ’တိ ဝုတ္တံ၊ တတ္ထ နာမမတ္တမေဝ နာနာကရဏ’’န္တိ (မဟာဝ။ အဋ္ဌ။ ၂၉၅)။ နိဿန္ဒေဟေ ပန အညထာ ဝုတ္တော ဝိယ ဝိညာယတိ၊ တတ္ထပိ အယမေဝ နယော ဝေဒိတဗ္ဗော။

၁၃၉၁။ နဒေါသောတိ သန္နိဓိဒေါသော န ဟောတိ။ နိဒဟိတွာတိ ပဋိဂ္ဂဟေတွာ ပဋိဂ္ဂဟဏံ အဝိဇဟိတွာ သကသကကာလဗ္ဘန္တရေယေဝ နိဒဟိတွာ။ ဧတ္ထ စ ဟေဋ္ဌိမန္တတော သန္နိဓိံ ဒဿေတုံ ‘‘ပတ္တံ ဓောဝိတွာ ပုန တတ္ထ အစ္ဆောဒကံ ဝါ အာသိဉ္စိတွာ အင်္ဂုလိယာ ဝါ ဃံသိတွာ နိသ္နေဟဘာဝေါ ဇာနိတဗ္ဗော’’တိ (ပါစိ။ အဋ္ဌ။ ၂၅၃) အဋ္ဌကထာယံ ဝုတ္တံ။ ဧတေန နိရပေက္ခေန ပဋိဂ္ဂဟဏံ အဝိဿဇ္ဇေတွာဝ သယံ ဝါ အညေန ဝါ တုစ္ဆံ ကတွာန သမ္မာ ဓောဝိတွာ နိဋ္ဌာပိတေ ပတ္တေ လဂ္ဂမ္ပိ အဝိဇဟိတပဋိဂ္ဂဟိတမေဝ ဟောတီတိ တတ္ထ အာပတ္တိ ဝုတ္တာတိ ဂဏ္ဌိပဒေသု ဝုတ္တံ။ ဧတေန နိရပေက္ခေန ပဋိဂ္ဂဟဏေ ဝိဿဋ္ဌေ တာဒိသေပိ ပတ္တေ ဒေါသော နတ္ထီတိ သိဒ္ဓံ။

သန္နိဓိကထာဝဏ္ဏနာ။

၁၃၉၃။ ပဏီတာနိ ဘောဇနာနီတိ ပါဠိယံ ‘‘သေယျထိဒံ? သပ္ပိ နဝနီတံ တေလံ မဓု ဖာဏိတံ မစ္ဆော မံသံ ခီရံ ဒဓီ’’တိ (ပါစိ။ ၂၅၉) ဥဒ္ဒိသိတွာ –

‘‘သပ္ပိ နာမ ဂေါသပ္ပိ ဝါ အဇိကာသပ္ပိ ဝါ မဟိံသသပ္ပိ ဝါ၊ ယေသံ မံသံ ကပ္ပတိ၊ တေသံ သပ္ပိ။ နဝနီတံ နာမ တေသညေဝ နဝနီတံ။ တေလံ နာမ တိလတေလံ သာသပတေလံ မဓုကတေလံ ဧရဏ္ဍကတေလံ ဝသာတေလံ။ မဓု နာမ မက္ခိကာမဓု။ ဖာဏိတံ နာမ ဥစ္ဆုမှာ နိဗ္ဗတ္တံ။ မစ္ဆော နာမ ဩဒကော ဝုစ္စတိ။ မံသံ နာမ ယေသံ မံသံ ကပ္ပတိ၊ တေသံ မံသံ။ ခီရံ နာမ ဂေါခီရံ ဝါ အဇိကာခီရံ ဝါ မဟိံသခီရံ ဝါ၊ ယေသံ မံသံ ကပ္ပတိ၊ တေသံ ခီရံ။ ဒဓိ နာမ တေသညေဝ ဒဓီ’’တိ (ပါစိ။ ၂၆၀) –

နိဒ္ဒိဋ္ဌာနိ နဝ ပဏီတဘောဇနာနီတိ အတ္ထော။ အဂိလာနောတိ ‘‘အဂိလာနော နာမ ယဿ ဝိနာ ပဏီတဘောဇနာနိ ဖာသု ဟောတီ’’တိ (ပါစိ။ ၂၆၀) ဝုတ္တော။ အဂိလာနောတိ ဧတ္ထ ‘‘ဟုတွာ’’တိ သေသော။

၁၃၉၄။ သပ္ပိနာ ဒေဟီတိအာဒိ ဝိညာပနပ္ပကာရော။ သပ္ပိဘတ္တန္တိ ဧတ္ထ ကိဉ္စာပိ သပ္ပိသံသဋ္ဌံ ဘတ္တံ၊ သပ္ပိ စ ဘတ္တဉ္စ သပ္ပိဘတ္တန္တိ ဝိညာယတိ၊ အဋ္ဌကထာသု ပန ‘‘သာလိဘတ္တံ ဝိယ သပ္ပိဘတ္တံ နာမ နတ္ထီ’’တိ (ပါစိ။ အဋ္ဌ။ ၂၅၉) ကာရဏံ ဝတွာ ဒုက္ကဋဿေဝ ဒဠှတရံ ကတွာ ဝုတ္တတ္တာ န သက္ကာ အညံ ဝတ္တုံ။ အဋ္ဌကထာစရိယာ ဧဝ ဟိ ဤဒိသေသု ဌာနေသု ပမာဏံ။

၁၃၉၅။ ပါစိတ္တိ ပရိယာပုတာတိ ‘‘အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿာ’’တိ (ပါစိ။ ၂၆၀) ဧဝံ အဇ္ဈောဟာရဂဏနာယ ပါစိတ္တိ ဝုတ္တာ။

၁၃၉၆။ သုဒ္ဓါနီတိ အန္နေန အမိဿာနိ။ သေခိယေသူတိ သိက္ခာကရဏီယေ ဝုတ္တန္တိ အတ္ထော။

၁၃၉၇။ ယသ္မာ သုဒ္ဓါနံ ပဏီတဘောဇနာနံ ဝိညာပေတွာ ပရိဘုဉ္ဇနံ ဒုက္ကဋဝိသယံ၊ တသ္မာ။ သတ္တဓညမယန္တိ သာလိအာဒီနံ သတ္တန္နံ ဓညာနံ အညတရဿ ဝိကာရဘူတံ။

၁၃၉၈။ သစေ ဒဒါတီတိ ယောဇနာ။ ဝိသင်္ကေတန္တိ အနာပတ္တိ ဟောတီတိ ဝုတ္တံ ဟောတိ။

၁၃၉၉။ ဒေတိ စေတိ သမ္ဗန္ဓော။ အညတရေနာတိ သဟတ္ထေ ကရဏဝစနံ။ ‘‘ဘတ္တ’’န္တိ အဓိကာရတော လဗ္ဘတိ။ အဿ ဘိက္ခုဿ။ ဝိသင်္ကေတန္တိ အညံ ယာစိတဿ အညဿ ဒိန္နတ္တာ သင်္ကေတဿ ဝိရာဓနေန အနာပတ္တီတိ ဝုတ္တံ ဟောတိ။

၁၄၀၀။ ယေန ယေန ဟီတိ ဧတ္ထာပိ တထေဝ ကရဏဝစနံ။ ‘‘ဝိညတ္တ’’န္တိ ဣဒံ အဓိကတဿ ‘‘ဘတ္တ’’န္တိ ဧတဿ ဝိသေသနံ။ ယေနယေနာတိ အနိယမေန ပဏီတေန။ တေန သပ္ပိအာဒိ ဝိသုံ ဝိသုံ ဂဟိတမေဝ၊ သပ္ပိအာဒီနံ ဂေါသပ္ပိအာဒိဘေဒေါ စ သင်္ဂဟိတော။ တသ္မိံ လဒ္ဓေပီတိ ယာစိတေယေဝ လဒ္ဓေ သတိ။ တဿ တဿ မူလေပိ လဒ္ဓေတိ ဝိစ္ဆာဝသေန ယောဇနာ။

ကိံ ဝုတ္တံ ဟောတိ? ‘‘သပ္ပိနာ ဘတ္တံ ဒေဟီ’’တိ သာမညေန ဝိညာပေန္တဿ တမေဝ ဝါ ‘‘ဣမိနာ သပ္ပိံ ကတွာ ဂဏှထာ’’တိ နဝနီတာဒီသု အညတရံ ဝါ ဓေနုံ ဝါ မူလံ ဝါ ဒေတိ စေ၊ ‘‘ဂေါသပ္ပိနာ ဘတ္တံ ဒေဟီ’’တိ ဝိသေသယုတ္တံ ကတွာ ဝိညာပေန္တဿ တမေဝ ဝါ ဂေါနဝနီတာဒီနိ ဝါ ဂါဝိံ ဝါ ‘‘ဣဒံ ဒတွာ သပ္ပိံ ဂဏှထာ’’တိ မူလံ ဝါ သစေ ဒေတိ၊ ဝိသင်္ကေတံ န ဟောတိ၊ ယထာဝတ္ထုကမေဝ အာပတ္တိံ အာပဇ္ဇတီတိ ဝုတ္တံ ဟောတိ။

န အညထာတိ သပ္ပိံ ယာစိတဝတော ‘‘ဣမံ ဂဟေတွာ သပ္ပိံ ကတွာ ဂဏှထာ’’တိ အဝတွာ ‘‘သပ္ပိ နတ္ထိ၊ ဣဒံ ဂဏှထာ’’တိ ဝတွာ ဝါ တုဏှီဘူတေန ဝါ နဝနီတာဒီသု ကိသ္မိဉ္စိ ဒိန္နေ ဝိသေသဝိညာပကဿ တဒညဒါနေပိ ဝိသင်္ကေတမေဝ ဟောတီတိ အတ္ထော။ ပါဠိယာ အနာဂတေပိ ဒိန္နေ ဝိသင်္ကေတမေဝ ဟောတိ။ ‘‘သစေ ပန အညံ ပါဠိယာ အာဂတံ ဝါ အနာဂတံ ဝါ ဒေတိ၊ ဝိသင်္ကေတ’’န္တိ (ပါစိ။ အဋ္ဌ။ ၂၅၉) အဋ္ဌကထာယံ ဝုတ္တံ။

၁၄၀၁။ ပါဠိယန္တိ ပုဗ္ဗေ ဒဿိတံ ‘‘သပ္ပိ နာမ ဂေါသပ္ပီ’’တိအာဒိံ နိဒ္ဒေသပါဠိမာဟ။ ယထာဟ ‘‘ပါဠိယံ အာဂတနဝနီတာဒီနိ ဌပေတွာ’’တိအာဒိ (ပါစိ။ အဋ္ဌ။ ၂၅၉)။ အညေဟိ နဝနီတာဒီဟိ။ သဟတ္ထေ ကရဏဝစနံ။

၁၄၀၂။ ‘‘ဝိညာပေတွာ’’တိ ဣမဿ ကမ္မဘူတံ ‘‘ဘတ္တ’’န္တိ အဓိကတံ။ ဂါထာဗန္ဓဝသေန ဝါ-သဒ္ဒဿ ရဿော ကတော။ ဧကတော ဝါတိ ယောဇနာ၊ ‘‘နာနတော’’တိပိ ဂဟိတမေဝ၊ ဧကဋ္ဌာနတော ဝါ နာနဋ္ဌာနတော ဝါတိ ဝုတ္တံ ဟောတိ။ ယထာဟ ‘‘သစေ ပန သဗ္ဗေဟိပိ သပ္ပိအာဒီဟိ ဧကဋ္ဌာနေ ဝါ နာနဋ္ဌာနေ ဝါ ဝိညာပေတွာ’’တိအာဒိ (ပါစိ။ အဋ္ဌ။ ၂၅၉)။ တေနေဝ ဘုဉ္ဇတီတိ ဧတ္ထ ပရိကပ္ပသူစကံ ‘‘စေ’’တိ ဣဒဉ္စ အဝကံသသန္ဒဿနတ္ထံ ‘‘ကုသဂ္ဂေန ဧကဗိန္ဒုမ္ပီ’’တိ ဣဒဉ္စ အဇ္ဈာဟရိတဗ္ဗံ။ မတာတိ အဋ္ဌကထာယံ (ပါစိ။ အဋ္ဌ။ ၂၅၉) ဝုတ္တံ သန္ဓာယာဟ။ ဧကတော ဝါ နာနတော ဝါ ဌာနာ ဘတ္တံ ဝိညာပေတွာ ဧကရသံ ကတွာ အန္တမသော ကုသဂ္ဂေန ဧကဗိန္ဒုမ္ပိ ဘုဉ္ဇတိ စေ၊ နဝ ပါစိတ္တိယော မတာတိ ယောဇနာ။

၁၄၀၃။ အကပ္ပိယေန သပ္ပိနာ ဒေဟီတိ ဝုတ္တေပီတိ ယောဇနာ၊ သဟတ္ထေ ကရဏဝစနံ။ ‘‘ဘတ္တ’’န္တိ အဓိကတံ။ ‘‘ယေသံ မံသံ ကပ္ပတိ၊ တေသံ သပ္ပီ’’တိ (ပါစိ။ ၂၆၀) ဝုတ္တပ္ပကာရဿ ဝိပရိယာယတော အကပ္ပိယံ ဒဋ္ဌဗ္ဗံ။ တေန စေ ဒေတီတိ ယဒိ တေန ယာစိတေန တေနေဝ အကပ္ပိယေန သဒ္ဓိံ ဩဒနံ ဒေတီတိ။

၁၄၀၄။ တထာသညိဿာတိ တထာသညိနော၊ ဂိလာနောမှီတိသညိနောတိ အတ္ထော။ ယထာဟ ‘‘ဂိလာနော ဂိလာနသညီ၊ အနာပတ္တီ’’တိ (ပါစိ။ ၂၆၁)။

၁၄၀၅။ ဂိလာနကာလေ ဝိညတ္တံ အဂိလာနဿ ဘုဉ္ဇတော အနာပတ္တိ ပကာသိတာတိ ယောဇနာ။ ဧဝမိတရေဟိပိ ဒွီဟိ ပဒေဟိ ယောဇေတဗ္ဗံ။ ယထာဟ ‘‘အနာပတ္တိ ဂိလာနော ဟုတွာ ဝိညာပေတွာ အဂိလာနော ဘုဉ္ဇတီ’’တိအာဒိ (ပါစိ။ ၂၆၂)။ ဉာတကာဒီနန္တိ ဧတ္ထ ‘‘အာယတ္တ’’န္တိ သေသော။ အာဒိ-သဒ္ဒေန ‘‘ပဝါရိတာနံ အညဿတ္ထာယ အတ္တနော ဓနေန ဥမ္မတ္တကဿ အာဒိကမ္မိကဿာ’’တိ ဣဒံ သင်္ဂဏှာတီတိ။

၁၄၀၆။ စတ္တာရိ သမုဋ္ဌာနာနိ ဒဿေတုမာဟ ‘‘ကာယတော’’တိအာဒိ။

ပဏီတဘောဇနကထာဝဏ္ဏနာ။

၁၄၀၇။ ‘‘အဒိန္န’’န္တိ ဣမိနာ အဒိန္နာဒါနသိက္ခာပဒေ (ပါရာ။ ၉၁ အာဒယော) ဝိယ ပရပရိဂ္ဂဟိတံ အဝတွာ အပ္ပဋိဂ္ဂဟိတမေဝ ဝတ္တဗ္ဗံ။ ယထာဟ ‘‘အဒိန္နံ နာမ အပ္ပဋိဂ္ဂဟိတကံ ဝုစ္စတီ’’တိ (ပါစိ။ ၂၆၆)။ မုခဒွါရန္တိ မုခေ ဒွါရံ မုခဒွါရံ၊ ဂလနာဠိကာ၊ ဣမိနာ ပန ဝစနေန ယံ ကိဉ္စိ အဇ္ဈောဟရဏီယံ၊ တံ မုခေန ဝါ ပဝိသတု နာသိကာယ ဝါ၊ ဂလဗိလံ ပဝိဋ္ဌမေဝ အာပတ္တိကရန္တိ ဒီပေတိ။ အာဟာရန္တိ ဥဒကဒန္တပေါနေဟိ အညံ အဇ္ဈောဟရိတဗ္ဗံ ယံ ကိဉ္စိ ယာဝကာလိကာဒိံ။ ယထာဟ ‘‘အာဟာရော နာမ ဥဒကဒန္တပေါနံ ဌပေတွာ ယံ ကိဉ္စိ အဇ္ဈောဟရဏီယ’’န္တိ (ပါစိ။ ၂၆၆)။

အာဟရေယျာတိ မုခဒွါရံ ပဝေသေယျ၊ ဣမိနာ ပရဂလံ အကတွာ မုခေန ပဋိဂ္ဂဟိတဂ္ဂဟဏေပိ နတ္ထိ ဒေါသောတိ သူစိတံ။ တေနေဝါဟ ‘‘ဒန္တပေါနောဒကံ ဟိတွာ’’တိ။ တေနေဝ ဝုတ္တံ ဂဏ္ဌိပဒေ ‘‘ဘဂဝတော ဒန္တကဋ္ဌဿ မုခဒွါရဌပနေ အနာပတ္တိဝစနေနေဝ ယံ ကိဉ္စိ ဝတ္ထုံ ပရဂလံ အကတွာ မုခေ ဌပနေ အနာပတ္တိဘာဝေါ ဝုတ္တော’’တိ။ ဥဒကဉှိ ယထာသုခံ ပါတုံ၊ ဒန္တကဋ္ဌဉ္စ ဒန္တပေါနပရိဘောဂေန ပရိဘုဉ္ဇိတုံ ဝဋ္ဋတိ၊ တဿ ပန ရသံ ဂိလိတုံ န ဝဋ္ဋတိ။ သစေပိ ဒန္တကဋ္ဌရသော အဇာနန္တဿ အန္တော ပဝိသတိ၊ ပါစိတ္တိယမေဝ။ ဒန္တေ ပုနန္တိ နိမ္မလေ ကရောန္တိ ဧတေနာတိ ဒန္တပေါနံ။

၁၄၀၈-၉။ ဗျတိရေကမုခေန အဒိန္နလက္ခဏံ၊ ပဒဘာဇနေ စ ဝုတ္တနယေန ပဌမံ ဒိန္နလက္ခဏံ ဒဿေန္တော အာဟ ‘‘ဟတ္ထပါသော’’တိအာဒိ။ ဟတ္ထပါသောတိ ပဝါရဏသိက္ခာပဒေ –

‘‘ဂဏှတော ပစ္ဆိမံ အင်္ဂံ၊ ဒဒတော ပုရိမံ ပန၊

ဥဘိန္နံ အဍ္ဎတေယျံ စေ၊ ဝိနာ ဟတ္ထံ ပသာရိတ’’န္တိ။ (ဝိ။ ဝိ။ ၁၂၇၅) –

ဝုတ္တလက္ခဏော ဟတ္ထပါသော။ အဘိနီဟာရောတိ တတ္ထေဝ ဝုတ္တနယေန အဘိမုခံ ကတွာ ဟရဏဉ္စ။ မဇ္ဈိမုစ္စာရဏက္ခမောတိ ပဋိဂ္ဂဟေတဗ္ဗဘာရဿ ဥက္ကဋ္ဌပရိစ္ဆေဒေန ထာမမဇ္ဈိမေန ပုရိသေန ဥက္ခိပနာရဟတာ။ ဘာဝပ္ပဓာနောယံ နိဒ္ဒေသော။ အဝကံသော ပန ‘‘အန္တမသော ရထရေဏုမတ္တမ္ပီ’’တိ (ပါစိ။ အဋ္ဌ။ ၂၆၉) အဋ္ဌကထာဝစနတော ဝေဒိတဗ္ဗော။ ဥစ္စာရဏံ ဥက္ခိပနံ။ ‘‘အမနုဿော’’တိ ဣမိနာ တဒညသတ္တသာမညေန တိရစ္ဆာနဂတာပိ ဝေဒိတဗ္ဗာ။ ‘‘ပက္ခီ ဝါ’’တိအာဒိဝက္ခမာနေန ဝါ ဝေဒိတဗ္ဗာ။ ကာယာဒိနာတိ ကာယကာယပဋိဗဒ္ဓနိဿဂ္ဂိယာနံ အညတရေန။ တေနေဝါဟ ‘‘တိဓာ’’တိ။

ဒွိဓာတိ ကာယေန ဝါ ကာယပဋိဗဒ္ဓေန ဝါ။ ပဉ္စင်္ဂသံယောဂေတိ ဧတ္ထ ‘‘ဟတ္ထပါသော’’တိ ပဌမင်္ဂံ၊ ‘‘အဘိနီဟာရော’’တိ ဒုတိယံ၊ ‘‘မဇ္ဈိမုစ္စာရဏက္ခမော’’တိ တတိယံ၊ ‘‘မနုဿော…ပေ… တိဓာ’’တိ စတုတ္ထံ၊ ‘‘ပဋိဂ္ဂဏှာတိ…ပေ… ဒွိဓာ’’တိ ပဉ္စမန္တိ ဣမာနိ ပဉ္စ အင်္ဂါနိ၊ ပဉ္စန္နံ အင်္ဂါနံ သံယောဂေါ သမာဂမော သန္နိပါတော ပဉ္စင်္ဂသံယောဂေါ၊ တသ္မိံ။ ဂဟဏန္တိ ပဋိဂ္ဂဟဏံ။ တဿ ဘိက္ခုနော။ ရူဟတိ သမ္ပဇ္ဇတိ။

၁၄၁၀-၁၂။ ဣတရောတိ ပဋိဂ္ဂါဟကော။ တဿ အင်္ဂဿ။ န ဂစ္ဆတီတိ နဂေါ၊ ‘‘နဂေါ’’တိ ရုက္ခောပိ ပဗ္ဗတောပိ ဝုစ္စတိ။ ဧဝရူပေတိ ဤဒိသေ ဥစ္စနီစဋ္ဌာနေ။

၁၄၁၃။ သောဏ္ဍာယာတိ ဟတ္ထေန။

၁၄၁၅-၆။ ဤသကံ ဩနတွာ ထောကံ နာမေတွာ တေန ဘိက္ခုနာ တံ ဟေဋ္ဌိမံ ဘာဇနံ ဧကဒေသေနာပိ ပဋိစ္ဆိတဗ္ဗန္တိ ယောဇနာ။

၁၄၁၇။ ဥဂ္ဃာဋေတွာ ဥစ္စာရေတွာ၊ ဘာဇနာနိ ဝိသုံ ဝိသုံ ဩရောပေတွာတိ ဝုတ္တံ ဟောတိ။

၁၄၁၈။ ကာဇဘတ္တန္တိ ဘတ္တကာဇံ၊ ဘတ္တဘရိတံ ပိဋကန္တိ ဝုတ္တံ ဟောတိ။ ဩနတွာ ဒေတီတိ သယံ ဩနမိတွာ ဗျာဘင်္ဂိံ ဒေတိ။

၁၄၁၉။ ‘‘တိံသဟတ္ထော’’တိ ဣဒံ တိံသရတနမတ္တော စေ ဟောတိ၊ ‘‘ဒူရ’’န္တိ န ပရိသင်္ကိတဗ္ဗောတိ ဒဿနတ္ထမာဟ။ ဂဟိတေကသ္မိန္တိ ဥဘယကောဋီသု ဌပိတေ ဒွေ ဃဋေ ပဋိဂ္ဂဟာပေတုံ ဟတ္ထပါသေ ဌိတေန ဒါယကေန ဒိယျမာနံ တိံသဟတ္ထဝေဏုံ ပဋိဂ္ဂဏှန္တေန ယေန ကေနစိ ကာယပ္ပဒေသေန ဝါ ကာယပဋိဗဒ္ဓေန ဝါ ‘‘ဣမံ ဂဏှာမီ’’တိ အာဘောဂံ ကတွာ မဉ္စာဒီသု ယတ္ထ ကတ္ထစိ ဖုသိတွာ ပဋိဂ္ဂဟိတေတိ ဝုတ္တံ ဟောတိ။ တံ သဗ္ဗန္တိ တေသု ဒွီသု ဃဋေသု ပက္ခိတ္တံ သဗ္ဗမေဝ။ ဂဟိတမေဝါတိ ပဋိဂ္ဂဟိတမေဝ ဟောတိ၊ ဒါယကဿ ဟတ္ထပါသဗ္ဘန္တရေ ဂတတ္တာ ဣဒံ တဿ ကာယပဋိဗဒ္ဓန္တိ ‘‘ဒူရ’’န္တိ သင်္ကာ န ကာတဗ္ဗာတိ ဧဝကာရေန ဒီပေတိ။ ‘‘ဒွီသု ဃဋေသု ဘူမိယံ ဌပိတေသုပိ တတ္ထ ဗန္ဓနဝေဠုယံ ပဋိဂ္ဂဏှနမတ္တေနေဝ ပဋိဂ္ဂဟိတံ ဟောတီ’’တိ ဂဏ္ဌိပဒေ ဝုတ္တံ။

၁၄၂၀-၂၄။ ‘‘ကဋသာရကေ’’တိ ဣမိနာ ဒေါဏိဖလကာဒယော ဥပလက္ခိတာ။ ‘‘နိသီဒတီ’’တိ ဣဒံ ‘‘တိဋ္ဌတီ’’တိအာဒီနံ ဥပလက္ခဏံ။ မဉ္စာဒီနိ ဖုသိတွာတိ ဧတ္ထ ‘‘အင်္ဂုလိယာပီ’’တိ သေသော။ ယထာဟ ‘‘ပဋိဂ္ဂဟဏသညာယ မဉ္စာဒီနိ အင်္ဂုလိယာပိ ဖုသိတွာ ဌိတေန ဝါ နိသိန္နေန ဝါ နိပန္နေန ဝါ’’တိအာဒိ (ပါစိ။ အဋ္ဌ။ ၂၆၅)။ ပတ္တေသူတိ တထာ ဌပိတေသု သဗ္ဗေသု ပတ္တေသုယေဝ။ ယဉ္စ ဒီယတီတိ ဧတ္ထ ‘‘တထာ ဌိတေနာ’’တိ သာမတ္ထိယာ လဗ္ဘတိ။

မဉ္စာဒီသု အင်္ဂုလိအာဒိနာ ယေန ကေနစိ ဖုဋ္ဌမတ္တေပိ ပဋိဂ္ဂဟဏဿ ရုဟဏဘာဝံ ဒဿေတွာ ဣဒါနိ တဒါရောဟဏေနာပိ သိဇ္ဈတီတိ ဒဿေတုမာဟ ‘‘ပဋိဂ္ဂဟေဿာမီ’’တိအာဒိ။ သစေ ပန ပဋိဂ္ဂဟေဿာမိစ္စေဝ မဉ္စာဒီနိ အာရုဟိတွာ နိသီဒတိ၊ ဒါယကောပိ ဟတ္ထပါသေ ဌတွာန ဒေတိ စေ၊ တံ သဗ္ဗံ ဂဟိတံ ဟောတီတိ ယောဇနာ။

ကုစ္ဆိယာ ကုစ္ဆိံ အာဟစ္စ ယေ ပတ္တာ ဘူမိယံ ဌိတာ၊ တေသု ယံ ယံ ပတ္တံ အင်္ဂုလိယာပိ ဝါ သူစိယာပိ ဝါ ဖုသိတွာ နိသိန္နော၊ တတ္ထ တတ္ထေဝ ဒီယမာနမ္ပိ ပဋိဂ္ဂဏှာတိ၊ ဝဋ္ဋတီတိ ယောဇနာ။

၁၄၂၅။ ကဋသာရာဒယော သစေ မဟန္တာ၊ ပဋိဂ္ဂဟဏံ န ရုဟေယျာတိ ဝိကပ္ပော သိယာတိ တန္နိဝတ္တနတ္ထမာဟ ‘‘ကဋသာရကေ’’တိအာဒိ။ ‘‘မဟန္တသ္မိ’’န္တိ ဣမိနာ ကဋသာရကဿ ပုန ဝစနေ ဟေတုမာဟ။ ဟတ္ထတ္ထရံ နာမ ဟတ္ထိပိဋ္ဌေ အတ္ထရိတဗ္ဗံ အတ္ထရဏံ။ အာဒိ-သဒ္ဒေန အဿတ္ထရရထတ္ထရာဒိံ သင်္ဂဏှာတိ။ ဌိတပတ္တေသု ဒိယျမာနံ ဂဏှတော ပဋိဂ္ဂဟဏရုဟဏဟေတုံ ဒဿေတိ ‘‘ဟတ္ထပါသသ္မိံ ဝိဇ္ဇမာနေ တူ’’တိ။ တု-သဒ္ဒေါ ဝုတ္တဝိသေသမေဝ ဇောတေတိ။

၁၄၂၆။ တတ္ထဇာတကပဏ္ဏေသူတိ ရုက္ခေယေဝ ဌိတေသု ပဏ္ဏေသု။ ဂဟေတုန္တိ ပဋိဂ္ဂဟေတုံ။ ‘‘န ပနေတာနီ’’တိအာဒိ ယေန ဟေတုနာ န ဝဋ္ဋတိ၊ တဿ ဒဿနံ။ ဟိ-သဒ္ဒေါ ပသိဒ္ဓိံ သူစေတိ။

၁၄၂၇။ ထာမမဇ္ဈိမေန ပုရိသေန ဥက္ခိပိတုံ အသက္ကုဏေယျံ အသံဟာရိယံ။ တာဒိသေတိ တထာရူပေ၊ အသံဟာရိယေတိ ဝုတ္တံ ဟောတိ။ ခါဏုဗဒ္ဓေတိ ဘူမိယံ နိခါတခါဏုကေ ဗဒ္ဓေ။

၁၄၂၈။ တိန္တိဏိကာတိ စိဉ္စာ။ အာဒိ-သဒ္ဒေန တထာ ခုဒ္ဒကာနံ ကဒမ္ဗပုပ္ဖပဏ္ဏာဒီနံ ဂဟဏံ။ ‘‘တိန္တိဏိကာဒိပဏ္ဏေသူ’’တိ ဝစနတော သာခါသု ပဋိဂ္ဂဟဏံ ရုဟတီတိ ဒဋ္ဌဗ္ဗံ။ ဘူမိယံ ပတ္ထဋေသူတိ ယောဇေတဗ္ဗံ။ ယထာဟ ‘‘ဘူမိယံ အတ္ထတေသု သုခုမေသု တိန္တိဏိကာဒိပဏ္ဏေသုပိ ပဋိဂ္ဂဟဏံ န ရုဟတီ’’တိ (ပါစိ။ အဋ္ဌ။ ၂၆၅)။

၁၄၂၉။ ပရိဝေသကောတိ ဒါယကော။

၁၄၃၀။ အသေသတော ပုဉ္ဆိတွာတိ ယောဇနာ။

၁၄၃၁။ ပဋိဂ္ဂဟေတွာဝါတိ ပတ္တံ ပဋိဂ္ဂဟေတွာဝ။ ဘိက္ခာ ဂဟေတဗ္ဗာတိ သမ္ဗန္ဓော။

၁၄၃၂။ အပဋိဂ္ဂဟိတေတိ ဧတ္ထ ‘‘ပတ္တေ’’တိ သေသော။ တံ ပစ္ဆာ ပဋိဂ္ဂဟေတွာ ပရိဘုဉ္ဇတော အနာပတ္တီတိ ယောဇနာ။

၁၄၃၃။ အနာဒိယိတွာတိ အဂ္ဂဟေတွာ၊ တသ္မိံ ဝစနေ အာဒရံ အကတွာတိ ဝုတ္တံ ဟောတိ။

၁၄၃၅။ အညဿ အနုပသမ္ပန္နဿ။

၁၄၃၆။ ပုဗ္ဗာဘောဂဿ အနုရူပဝသေန ‘‘သာမဏေရဿ တံ ဒတွာ…ပေ… ပန ဝဋ္ဋတီ’’တိ ဝုတ္တံ။ ယသ္မာ ပန တံ ‘‘အညဿ ဒဿာမီ’’တိ စိတ္တုပ္ပာဒမတ္တေန ပရသန္တကံ နာမ န ဟောတိ၊ တသ္မာ တဿ အဒတွာပိ ပဋိဂ္ဂဟေတွာ ပရိဘုဉ္ဇိတုံ ဝဋ္ဋတိ။

၁၄၃၇-၉။ ဘိက္ခုနောတိ အညဿ ဘိက္ခုဿ။ ဘတ္တဿာတိ ကဉ္ဇိကာဒိဒြဝမိဿဘတ္တမာဟ။ ဥပ္လဝတီတိ ဥပရိ ပ္လဝတိ။ ကဉ္ဇိကန္တိ အာရနာလံ၊ ဣမဿ ဥပလက္ခဏတ္တာ ခီရတက္ကာဒိဒြဝံ သင်္ဂဟိတံ။ ပဝါဟေတွာတိ မတ္ထကတော ပလာပေတွာ။ အန္တော ပဝိဋ္ဌံ သစေ တန္တိ တံ ရဇံ ယဒိ ဘတ္တဿ အန္တော ပဝိဋ္ဌံ ဟောတိ။ ပဋိဂ္ဂဟေတဗ္ဗန္တိ အနုပသမ္ပန္နေ အသတိ ဟတ္ထတော အမောစေန္တေနေဝ ယတ္ထ အနုပသမ္ပန္နော အတ္ထိ၊ တံ တတ္ထ နေတွာ ပဋိဂ္ဂဟေတဗ္ဗံ။

၁၄၄၀။ အပနီယာဝါတိ ဧတ္ထ ‘‘ထူလ’’န္တိ ဣဒံ ‘‘သုခုမံ စေ’’တိ ဝက္ခမာနဝိပရိယာယတော လဗ္ဘတိ။ သဘတ္တံ အပနီယာတိ သမ္ဗန္ဓော။ ယထာဟ ‘‘ဥပရိဘတ္တေန သဒ္ဓိံ အပနေတဗ္ဗံ၊ ပဋိဂ္ဂဟေတွာ ဝါ ဘုဉ္ဇိတဗ္ဗ’’န္တိ (ပါစိ။ အဋ္ဌ။ ၂၆၅)။

၁၄၄၁။ ထေဝေါတိ ဗိန္ဒု။ ထေဝေါ…ပေ… ဝဋ္ဋတီတိ ဧတ္ထ ယထာ ပဌမတရံ ပတိတထေဝေ ဒေါသော နတ္ထိ၊ တထာ အာကိရိတွာ အပနေန္တာနံ ပစ္ဆာ ပတိတထေဝေပိ အဘိဟဋတ္တာ နေဝတ္ထိ ဒေါသော။

၁၄၄၂-၄။ စရုကေနာတိ ခုဒ္ဒကဥက္ခလိယာ။ တတော စရုကတော။ မသီတိ ဇလ္လိကာအာဒိကာ ဘသ္မာ။ ဘာဇနေတိ ဘာဇနပတ္တာဒိဘာဇနေ။ တဿ စာတိ တဿ မသိအာဒိနော စ။

အနန္တရဿ ဘိက္ခုဿ ဒီယမာနံ ယံ ပတ္တတော ဥပ္ပတိတွာ ဣတရဿ ဘိက္ခုနော ပတ္တေ သစေ ပတတိ၊ တံ ပဋိဂ္ဂဟိတမေဝ ဟောတိ၊ တသ္မာ ဝဋ္ဋတေဝါတိ ယောဇနာ။ ‘‘ဒီယမာန’’န္တိ ဧတ္ထ ‘‘ဘတ္တာဒိကံ ယံ ကိဉ္စီ’’တိ ပကရဏတော လဗ္ဘတိ။ ဝဋ္ဋတေဝါ ယန္တိ ဧတ္ထ ‘‘ဝဋ္ဋတေဝ အယ’’န္တိ ပဒစ္ဆေဒေါ န ကာတဗ္ဗော ‘‘အယ’’န္တိ ဣမိနာ သမ္ဗန္ဓနီယဿ အဘာဝတော။ တသ္မာ ဝ-ကာရော ဂါထာဆန္ဒဝသေန ဒီဃံ ကတွာ ဝုတ္တောတိ ဝေဒိတဗ္ဗော။

၁၄၄၅-၆။ ပါယာသဿာတိ ဧတ္ထ ပူရဏယောဂေ သာမိဝစနံ၊ ပါယာသေနာတိ ဝုတ္တံ ဟောတိ။ ဥဏှတောတိ ဥဏှတ္တာ။ န သက္ကတီတိ န သက္ကောတိ။ မုခဝဋ္ဋိယံ ဝဋ္ဋတီတိ မုခဝဋ္ဋိံ ဥက္ခိပိတွာ ဟတ္ထေ ဖုသာပိတေ ဂဏှိတုံ ဝဋ္ဋတိ။ တထာ မုခဝဋ္ဋိယာ ဂဟေတုံ န သက္ကာ စေ၊ အာဓာရကေနပိ ဂဟေတဗ္ဗောတိ ယောဇနာ။

၁၄၄၇-၈။ အာဟရိယမာနံ ဝါ နေဝ ဇာနာတိ၊ ဒီယမာနံ ဝါ န ဇာနာတီတိ ယောဇနာ။ ဂါထာဗန္ဓဝသေန ‘‘ဇာနတီ’’တိ ရဿော ကတော။ အာဘောဂန္တိ ‘‘ဂဏှာမီ’’တိ အာဘောဂံ။ ယထာဟ မဟာပစ္စရိယံ ‘‘အာဘောဂမတ္တမေဝ ဟိ ဧတ္ထ ပမာဏ’’န္တိ (ပါစိ။ အဋ္ဌ။ ၂၆၅)။ ‘‘ကာယေန ဝါ ကာယပဋိဗဒ္ဓေန ဝါ ပဋိဂ္ဂဏှာတီ’’တိ (ပါစိ။ အဋ္ဌ။ ၂၆၅) ဝုတ္တတ္တာ ပတ္တံ ဂဟေတွာ နိသိန္နတ္တာ ‘‘ကာယပဋိဗဒ္ဓေန ဂဏှိဿာမီ’’တိ အာဘောဂံ ကတွာတိပိ ယုဇ္ဇတေဝ။

၁၄၄၉။ ‘‘ဟတ္ထေန မုဉ္စိတွာ’’တိ ဣဒံ ‘‘အာဓာရကမ္ပိ ဝါ’’တိ ဣမိနာပိ ယောဇေတဗ္ဗံ။ ‘‘ပါဒေန ပေလ္လေတွာ’’တိ ဣမိနာ ပန ‘‘အာဓာရက’’န္တိ ဣဒမေဝ ယောဇေတဗ္ဗံ။ ယထာဟ ‘‘ဟတ္ထေန အာဓာရကံ မုဉ္စိတွာ ပါဒေန ပေလ္လေတွာ နိဒ္ဒါယတီ’’တိ (ပါစိ။ အဋ္ဌ။ ၂၆၅)။ ပေလ္လေတွာတိ ပီဠေတွာ၊ အက္ကမိတွာတိ ဝုတ္တံ ဟောတိ။

၁၄၅၀။ ကမိ-ဓာတုဿ မဇ္ဈေ ‘‘အက္က’’ဣတိ ပဒစ္ဆေဒေါ ယတိဟီနဒေါသောတိ။

‘‘သိလောကေ နိယတဋ္ဌာနံ၊ ပဒစ္ဆေဒံ ယတိံ ဝိဒူ၊

တဒပေတံ ယတိဗ္ဘဋ္ဌံ၊ သဝနုဗ္ဗေဇနံ ယထာ’’တိ။ –

ဒဏ္ဍိနာ ဝုတ္တလက္ခဏတော သိဒ္ဓတာယ ဒေါသော ယထာ န ဟောတိ၊ တထာ ဝိစာရေတွာ ဂဟေတဗ္ဗံ။ ကေစိ ပနေတ္ထ ဣ-ကာရာဂမဿ ပစ္စယဘာဝတ္တာ တံသဟိတော မ-ကာရော တဂ္ဂဟဏေန သင်္ဂယှတီတိ ဥဘယပက္ခဘာဂီတိ ဓာတုပစ္စယာနံ မဇ္ဈေ ယတိယာ ဣစ္ဆိတတ္တာ န ဒေါသောတိ ပရိဟရန္တိ။ ဇာဂရဿာပီတိ အနိဒ္ဒါယန္တဿာပိ။ အနာဒရောတိ အနာဒရဘာဝေါ။

၁၄၅၁။ တသ္မာတိ တထာ ဂဟဏဿ အနာဒရဘာဝတော။ တန္တိ တံ အာဓာရကံ ပါဒေန အက္ကမိတွာ ပဋိဂ္ဂဟဏဉ္စ။ ဒီယမာနန္တိ ဒါယကေန ပဋိဂ္ဂဟာပိယမာနံ။ ပတတီတိ ပဋိဂ္ဂါဟကဿ ဟတ္ထံ အဖုသိတွာ ရဇောရဟိတာယ သုဒ္ဓဘူမိယာ ဝါ ပဒုမိနိပဏ္ဏာဒီသု ဝါ ပတတိ။ ယထာဟ ‘‘ယံ ဒိယျမာနံ ဒါယကဿ ဟတ္ထတော ပရိဂဠိတွာ သုဒ္ဓါယ ဘူမိယာ ဝါ ပဒုမိနိပဏ္ဏဝတ္ထကဋသာရကာဒီသု ဝါ ပတတိ၊ တံ သာမံ ဂဟေတွာ ပရိဘုဉ္ဇိတုံ ဝဋ္ဋတီ’’တိ (ပါစိ။ အဋ္ဌ။ ၂၆၅)။ သရဇာယ ဘူမိယာ ပတိတေ ရဇံ ပုဉ္ဆိတွာ ဝါ ဓောဝိတွာ ဝါ ပဋိဂ္ဂဟာပေတွာ ဝါ ပရိဘုဉ္ဇိတဗ္ဗန္တိ ဣဒံ အဋ္ဌကထာယံ ပန ‘‘သရဇာယ ဘူမိယံ ပတတီ’’တိအာဒိနာ ဒဿိတံ။ ဂဟေတုန္တိ ဧတ္ထ ‘‘ဘုဉ္ဇိတု’’န္တိ စ ဝဋ္ဋတီတိ ဧတ္ထ ‘‘ပရိစ္စတ္တံ ဒါယကေဟီ’’တိ စ သေသော။ ယထာဟ ‘‘အနုဇာနာမိ ဘိက္ခဝေ ယံ ဒိယျမာနံ ပတတိ၊ တံ သာမံ ဂဟေတွာ ပရိဘုဉ္ဇိတုံ။ ပရိစ္စတ္တံ တံ ဘိက္ခဝေ ဒါယကေဟီ’’တိ (စူဠဝ။ ၂၇၃)။ ‘‘ယံ ဒိယျမာနံ ပတတီ’’တိ အဝိသေသေန ဝုတ္တတ္တာ စတူသုပိ ကာလိကေသု အယံ နယော ဝေဒိတဗ္ဗော။

၁၄၅၂။ အဗ္ဗောဟာရိကနယံ ဒဿေတုမာဟ ‘‘ဘုဉ္ဇန္တာန’’န္တိ။

၁၄၅၃-၄။ တံ မလံ။ တေသူတိ ဥစ္ဆုအာဒီသု ဝတ္ထူသု။ တန္တိ မလမိဿကံ ဥစ္ဆုအာဒိကံ ဝတ္ထု။ န ပညာယတီတိ န ပန ပညာယတိ။ တသ္မိန္တိ ဥစ္ဆုအာဒိဝတ္ထုသ္မိံ။

၁၄၅၅။ နိသဒေါဒုက္ခလာဒီနန္တိ အာဒိ-သဒ္ဒေန နိသဒပေါတမုသလာဒီနံ ဂဟဏံ။

၁၄၅၆။ ဝါသိယာ ဥပလက္ခဏတ္တာ တဇ္ဇာတိကံ ယံ ကိဉ္စိ သတ္ထမ္ပိ ဂဟေတဗ္ဗံ။ ခီရေတိ အနုပသမ္ပန္နေန တာပိတခီရေ၊ ဣဒံ ဥပရိ အာမကဿ ဝိသုံ ဂဟဏေန ဝိညာယတိ။ နီလိကာတိ နီလဝဏ္ဏံ။ သတ္ထကေ ဝိယ နိစ္ဆယောတိ သတ္ထေန ဥဋ္ဌိတမလေ ဥစ္ဆုခဏ္ဍေ ဝိယ ပဋိဂ္ဂဟေတွာ ပရိဘုဉ္ဇိတဗ္ဗန္တိ ဝိနိစ္ဆယော ဝေဒိတဗ္ဗော။

၁၄၅၇။ တန္တိ တံ အဂ္ဂိသန္တတ္တဝါသိအာဒိံ၊ တာပဝတ္ထုတော ဝါသိ ဂဟေတဗ္ဗာ။

၁၄၅၉။ တန္တိ တံ ဟတ္ထာဒိကာယာဝယဝံ ဝါ စီဝရံ ဝါ ဓောဝိတွာ ပတိတကိလိဋ္ဌဇလမိဿမောဒနံ။ ရုက္ခမူလာဒီသု နိသီဒိတွာ ဘုဉ္ဇန္တဿ ပတ္တာဒီသု ရုက္ခပဏ္ဏာဒိံ ဓောဝိတွာ ပတိတကိလိဋ္ဌောဒကေပိ ဧသေဝ ဝိနိစ္ဆယောတိ ဒဿေတုမာဟ ‘‘ဧသေဝါ’’တိအာဒိ။

၁၄၆၀။ ဇလံ သစေ သုဒ္ဓံ ပတတိ၊ ဝဋ္ဋတီတိ ယောဇနာ၊ ‘‘ရုက္ခတော’’တိ လဗ္ဘတိ။ အဗ္ဘောကာသေ စ သစေ သုဒ္ဓံ တောယံ ပတတိ၊ ဝဋ္ဋတီတိ ဧတ္ထ ‘‘အာကာသတော’’တိ လဗ္ဘတိ။ ဥဘယတ္ထာပိ ရုက္ခပဏ္ဏေသု၊ အာကာသေ စ ရဇဿ ပဌမမေဝ ဝဿောဒကေန ဓောဝိတတ္တာ အာဟ ‘‘သုဒ္ဓ’’န္တိ။

၁၄၆၁။ အစ္ဆုပန္တေနာတိ အဖုသန္တေန။ တဿ သာမဏေရဿ။

၁၄၆၂။ ပတ္တန္တိ အနုပသမ္ပန္နဿ ပတ္တံ။ ဆုပိတွာတိ အနုပသမ္ပန္နပတ္တဂတောဒနံ ဖုသိတွာ။ တံ အတ္တနော ပတ္တေ ဘတ္တံ။ ယထာဟ ‘‘အပ္ပဋိဂ္ဂဟိတေ ဩဒနံ ဆုပိတွာ ပုန အတ္တနော ပတ္တေ ဩဒနံ ဂဏှန္တဿ ဥဂ္ဂဟိတကော ဟောတီ’’တိ (ပါစိ။ အဋ္ဌ။ ၂၆၅)။

၁၄၆၄။ ပစ္ဆာတိ တသ္မိံ ဂဟိတေပိ အဂဟိတေပိ ပစ္ဆာ။ တံ ပဋိဂ္ဂဟိတဘောဇနံ။

၁၄၆၇။ တဿ အတ္တနော ပတ္တဂတဿ ဘတ္တဿ။

၁၄၆၈။ ပရေနာတိ အပ္ပဋိဂ္ဂဟိတပတ္တေန။

၁၄၆၉-၇၀။ ‘‘ယာဂုအာဒီနံ ပစနေ ဘိက္ခူနံ ဘာဇနေ’’တိ သမ္ဗန္ဓော။ ပစန္တိ ဧတ္ထာတိ ပစနံ၊ ဘာဇနံ။ ဘာဇနူပရိ ဟတ္ထေသု သာမဏေရဿာတိ ဘာဇနဿ ဥပရိ ကတေသု သာမဏေရဿ ဟတ္ထေသု။ ပတိတံ ဟတ္ထတော တသ္မိန္တိ တဿ သာမဏေရဿ ဟတ္ထတော ပရိဂဠိတွာ တသ္မိံ ဘာဇနေ ပတိတံ။

၁၄၇၁။ ‘‘န ကရောတိ အကပ္ပိယ’’န္တိ ဧတ္ထ ကာရဏမာဟ ‘‘ပရိစ္စတ္တဉှိ တ’’န္တိ။ တဉှိ ယသ္မာ ပရိစ္စတ္တံ၊ တသ္မာ အကပ္ပိယံ န ကရောတီတိ ဝုတ္တံ ဟောတိ။ ဧဝံ အကတွာတိ ယထာဝုတ္တပကာရေန အကတွာ။ အာကိရတေဝ စေတိ သစေ ဘာဇနေ အာကိရတိ ဧဝ။ တံ တထာ ပက္ခိတ္တံ ဘတ္တဘာဇနံ။ နိရာမိသံ ကတွာတိ တတ္ထ ပတိတံ အာမိသံ ယထာ န တိဋ္ဌတိ၊ ဧဝံ ဓောဝိတွာ ဘုဉ္ဇိတဗ္ဗန္တိ သမ္ဗန္ဓော။

၁၄၇၂-၃။ ကုဋန္တိ ဃဋံ။ အာဝဇ္ဇေတီတိ ကုဋံ နာမေတွာ ယာဂုံ အာသိဉ္စတိ။

၁၄၇၄။ ဟတ္ထေတိ ဒွေ ဟတ္ထေ။ တတ္ထာတိ တတ္ထ ဘူမိယံ ဌပိတေသု ဒွီသု ဟတ္ထတလေသု။

၁၄၇၅-၆။ ဧကဿ ဂဟဏူပဂံ စေ ဘာရန္တိ ထာမမဇ္ဈိမေန ဧကေန ပုရိသေန ဥက္ခိပနပ္ပမာဏံ ဘာရံ သစေ ဘဝေယျ။ ‘‘တထာ’’တိ ဣမိနာ ‘‘ဧကဿ ဂဟဏူပဂံ ဘာရ’’န္တိ ဣဒံ ပစ္စာမသတိ။

၁၄၇၇။ လဂ္ဂေန္တီတိ ဩလမ္ဗန္တိ။ တတ္ထာတိ တသ္မိံ မဉ္စပီဌေ။ ဝဋ္ဋတေဝါတိ ဥဂ္ဂဟိတကံ န ဟောတီတိ ဒီပေတိ။

၁၄၇၈။ သမ္မုဇ္ဇန္တောတိ သမ္မဇ္ဇန္တော။ ဃဋ္ဋေတီတိ အသဉ္စိစ္စ သမ္မဇ္ဇနိယာ ဖုသတိ။

၁၄၇၉။ တံ ဉတွာတိ ပဋိဂ္ဂဟိတဘာဝံ ဉတွာ။ ဌပေတုံ ဝဋ္ဋတိ ဥဂ္ဂဟိတကံ န ဟောတီတိ အဓိပ္ပာယော။

၁၄၈၀။ တန္တိ ပဋိဂ္ဂဟိတသညာယ ဂဟိတံ တံ အပ္ပဋိဂ္ဂဟိတံ။ အညထာ ပန န ကတ္တဗ္ဗန္တိ အပိဟိတံ ပိဓာတုဉ္စ ပိဟိတံ ဝိဝရိတုဉ္စ န ဝဋ္ဋတီတိ အတ္ထော။

၁၄၈၁။ ဗဟိဌပေတိ စေတိ ယဒိ ပုဗ္ဗေ ဌပိတဋ္ဌာနတော ဗဟိ ဌပေတိ။ တေနာတိ ဗဟိ ဌပေတွာ မုတ္တဟတ္ထေန တေန ဘိက္ခုနာ။ တန္တိ ဗဟိ ဌပိတံ ဟတ္ထတော မုတ္တံ။ ဉတွာတိ အပ္ပဋိဂ္ဂဟိတဘာဝံ ဉတွာ။ တံ တထာ ဉတွာ ဌပိတံ။

၁၄၈၂-၃။ ဥဋ္ဌေတိ ယဒိ ကဏ္ဏိကာတိ သစေ ကဏ္ဏိကာ သဉ္ဇာယတိ။ သိင်္ဂိဝေရာဒိကေတိ ဧတ္ထ အာဒိ-သဒ္ဒေန ပိပ္ဖလိအာဒီနံ ဂဟဏံ။ မူလေတိ ပဉ္စမူလာဒိကေ မူလေ။ ဃုဏစုဏ္ဏန္တိ ဃုဏပါဏကေဟိ ဥပ္ပာဒိတစုဏ္ဏံ။ ‘‘တထာ’’တိ ဣမိနာ ‘‘ဥဋ္ဌေတီ’’တိ ကိရိယံ ပစ္စာမသတိ။ တံသမုဋ္ဌာနတောတိ ပဋိဂ္ဂဟိတတေလာဒီသု သမုပ္ပန္နတ္တာ။ တညေဝါတိ ပဝုစ္စတီတိ ပဌမပဋိဂ္ဂဟိတံ တမေဝ တေလာဒိကန္တိ ဝုစ္စတိ။ တေနာဟ ‘‘ပဋိဂ္ဂဟဏ…ပေ… န ဝိဇ္ဇတီ’’တိ။

၁၄၈၄-၅။ ကောစိပုဂ္ဂလောတိ သာမဏေရဂမိကာဒီသုပိ ယော ကောစိ သတ္တော။ တာလပိဏ္ဍိန္တိ တာလကဏ္ဏိကံ ဖလံ။ အညော ဘူမဋ္ဌောတိ ဘူမိယံ ဌိတော အညော ကောစိ ပုဂ္ဂလော ဣတ္ထီ ဝါ ပုရိသော ဝါ။

၁၄၈၆။ ဆိန္ဒိတွာတိ ဆိန္ဒံ ကတွာ။ ဝတိန္တိ ဟတ္ထပါသပ္ပဟောနကဗဟလဝတိံ။ ယထာဟ ‘‘ဟတ္ထပါသေ သတီ’’တိ (ပါစိ။ အဋ္ဌ။ ၂၆၅)။ ဒဏ္ဍကေ အဖုသိတွာဝါတိ ယတ္တကေန ဂမနဝေဂေါ နိဗ္ဗာယတိ၊ ဧတ္တကံ၊ ပဟရဏတော ဝတိဒဏ္ဍကေ ဝါ အပ္ပဟရိတွာတိ ဝုတ္တံ ဟောတိ။ ပဟရိတွာ ဌတွာ ဂစ္ဆတိ စေ၊ န ဝဋ္ဋတိ။ ယထာဟ အဋ္ဌကထာယံ ‘‘မယံ ပန ‘ယံ ဌာနံ ပဟဋံ၊ တတော သယံ ပတိတမိဝ ဟောတီ’တိ တက္ကယာမ။ တသ္မိမ္ပိ အဋ္ဌတွာ ဂစ္ဆန္တေ ယုဇ္ဇတိ သုင်္ကဃာတကတော ပဝဋ္ဋေတွာ ဗဟိ ပတိတဘဏ္ဍံ ဝိယာ’’တိ (ပါစိ။ အဋ္ဌ။ ၂၆၅)။

၁၄၈၇-၈။ ပါကာရောတိ ဧတ္ထ ‘‘ဝတိံ ဝါ’’တိ (ပါစိ။ အဋ္ဌ။ ၂၆၅) အဋ္ဌကထာယံ အာဂတတ္တာ ဣဒံ အဓိကာရတော ဂဟေတဗ္ဗံ။ ‘‘န ပုထုလော’’တိ ဧတ္ထ အဓိပ္ပေတပ္ပမာဏံ ဒဿေတုမာဟ ‘‘အန္တော…ပေ… ပဟောတိ စေ’’တိ။ ‘‘ဥဒ္ဓံ ဟတ္ထသတံ ဂန္တွာ’’တိ ဣမိနာ ဒါယကဿ ဒါတုမိစ္ဆာယ အာကာသံ တံ ဥက္ခိပိတွာ ဝိဿဋ္ဌဘာဝံ ဉာပေတိ။ သမ္ပတ္တန္တိ ဟတ္ထပ္ပတ္တံ။ ဂဏှတောတိ ပဋိဂ္ဂဟဏသညာယ ဂဏှတော။

၁၄၈၉။ ‘‘သာမဏေရ’’န္တိ ဣဒံ ဥပလက္ခဏန္တိ ဂိဟိနောပိ ဂဟဏံ။ တတ္ထေဝါတိ ခန္ဓေ ဧဝ။ နိသိန္နော သာမဏေရော။

၁၄၉၁-၂။ ဖလိနိံ သာခန္တိ ဖလဝတိံ သာခံ။ ‘‘ခါဒိတု’’န္တိ ဣဒံ ‘‘စိတ္တေ သမုပ္ပန္နေ’’တိ ဣမိနာ ယောဇေတဗ္ဗံ။ သစေ ဖလံ ခါဒတိ၊ ဧဝံ ခါဒိတုံ ဝဋ္ဋတီတိ ယောဇနာ။ မက္ခိကာနံ နိဝါရတ္ထန္တိ မက္ခိကာနံ နိဝါရေတုံ။

၁၄၉၃။ ဆာယတ္ထဉ္စ မက္ခိကာ နိဝါရေတုဉ္စ ဂယှမာနာ ဖလသာခါ သုခပရိဘောဂတ္ထာယ ကပ္ပိယံ ကာရာပေတွာ ပဋိဂ္ဂဟိတာ စေ၊ ခါဒိတုမိစ္ဆာယ သတိ ပုန အပ္ပဋိဂ္ဂဟိတာပိ ဝဋ္ဋတီတိ ဒဿေတုမာဟ ‘‘ကပ္ပိယံ ပန ကာရေတွာ’’တိအာဒိ။

၁၄၉၄-၅။ ‘‘တံ သော ပဋိဂ္ဂဟာပေတွာ’’တိ ဝက္ခမာနတ္တာ ‘‘ဂဟေတွာ’’တိ ဣဒံ အပ္ပဋိဂ္ဂဟာပေတွာ ဂဟဏံ သန္ဓာယ ဝုတ္တန္တိ ဂဟေတဗ္ဗံ။ တံ ပဋိဂ္ဂဟိတန္တိ ဧတ္ထ ‘‘စေ ပုဗ္ဗမေဝါ’’တိ သေသော။

၁၄၉၆-၉။ ဘိက္ခုဿ ပါထေယျတဏ္ဍုလေတိ သမ္ဗန္ဓော။ သောတိ သာမဏေရော။ ဣတရေဟီတိ ဘိက္ခုနာ ဂဟိတေဟိ အတ္တနော တဏ္ဍုလေဟိ။

ဒွီသု ပတ္တေသူတိ ဥပလက္ခဏံ။ ဗဟူသုပိ ဧသေဝ နယော။ အတ္တနာ လဒ္ဓံ ဘိက္ခူနံ ဒတွာ တေဟိ လဒ္ဓံ အတ္တနာ ဂဟေတွာ အညေသံ ဒါနဝသေန ဗဟုန္နမ္ပိ ဒါတုံ ဝဋ္ဋတီတိ အဋ္ဌကထာယံ (ပါစိ။ အဋ္ဌ။ ၂၆၅ အတ္ထတော သမာနံ) ဝုတ္တံ တမေဝ ဒဿေတုမာဟ ‘‘ယာဂုံ ဘိက္ခုဿာ’’တိအာဒိ။ ‘‘အာဝုသော တုယှံ ယာဂုံ မယှံ ဒေဟီ’တိ ဧဝံ ထေရေဟိ ပဋိပါဋိယာ ယာစိတွာပိ ပိဝိတုံ ဝဋ္ဋတိ၊ သဗ္ဗေဟိ သာမဏေရဿ သန္တကမေဝ ဘုတ္တံ ဟောတီ’’တိ (ပါစိ။ အဋ္ဌ။ ၂၆၅) အဋ္ဌကထာယံ ဝုတ္တံ။ သာမဏေရဿ ပီတတ္တာတိ ဧတ္ထ ‘‘ယာဂုယာ’’တိဣဒံ အဓိကာရတော လဗ္ဘတိ။

၁၅၀၀။ ဣမဿာတိ ပါထေယျတဏ္ဍုလဟာရကဿ။ ‘‘န ဝိသေသတာ’’တိ ဣမိနာ ဝိသုံ အဝတ္တဗ္ဗတံ ဒီပေတိ။

၁၅၀၁။ အဿ ဝိသေသဿာတိ ယထာဝုတ္တဝိနိစ္ဆယဝိသေသဿ ဝိသုံ ဝတ္တဗ္ဗဘာဝေတိ သေသော။ တဿာတိ သာမဏေရတဏ္ဍုလဟာရကဿ ဘိက္ခုဿ။ သာလယဘာဝန္တိ အတ္တနာ ဟဋတဏ္ဍုလေသု ပရိက္ခီဏေသု ‘‘ဣဒံ အမှာကမ္ပိ ပဒဿတီ’’တိ သာလယဘာဝေါ။ ဆာယာဒီနမတ္ထာယ ဂယှမာနာယ သာခါယ ဣမိဿာ ဖလံ ခါဒိတုကာမတာယ သတိ ခါဒနာရဟန္တိ အာလယဿ ကာတုံ သက္ကုဏေယျတ္တာ အယမ္ပိ အဝိသေသောတိ ဝိညာယတိ၊ တတ္ထ သမ္ဘဝန္တံ ပန ဝိသေသံ ဒဿေတုမာဟာတိ ဝတ္တုံ ယုဇ္ဇတိ။

၁၅၀၂-၄။ နိစ္စာလေတုံ န သက္ကောတီတိ နိစ္စာလေတွာ သက္ခရာ အပနေတုံ န သက္ကောတိ။ စေလကောတိ စူဠသာမဏေရော။ ပက္ကကာလသ္မိံ ဝိဝရိတွာ ပက္ကတာ ဉာတဗ္ဗာတိ ယောဇနာ။ ပိ-သဒ္ဒေါ ပန-သဒ္ဒတ္ထေ။ ဩရောပေတွာတိ ဥဒ္ဓနတော ဩရောပေတွာ။ ပုဗ္ဗတဏ္ဍုလဓောဝနတ္ထာယ ကတပဋိဂ္ဂဟဏဿေဝ ပမာဏတ္တာ အာဟ ‘‘န ပစ္ဆဿ ပဋိဂ္ဂဟဏကာရဏ’’န္တိ။ အဿာတိ ဘောဇနဿ။

၁၅၀၅။ ကာရိတန္တဿ ဒွိကမ္မကတ္တာ အာဟ ‘‘ဥဒ္ဓနံ သုဒ္ဓဘာဇန’’န္တိ၊ ဥဒ္ဓနေတိ ဝုတ္တံ ဟောတိ။

၁၅၀၆။ ကောစီတိ အနုပသမ္ပန္နော။ တေန ဘိက္ခုနာတိ ဥဒ္ဓနံ သုဒ္ဓဘာဇနံ အာရောပေတွာ ယေန အဂ္ဂိ ကတော၊ တေန ဘိက္ခုနာ။ ဣဒဉ္စ ဥပလက္ခဏံ အညေနပိ န ကာတဗ္ဗတ္တာ။

၁၅၀၇။ ပစ္ဆာတိ တဏ္ဍုလပက္ခေပတော ပစ္ဆာ။ တံ ယာဂုံ။ သစေ ပစတီတိ အဂ္ဂိံ ကရောန္တော ပစတိ။ သာမပါကာ န မုစ္စတီတိ တံ ယာဂုံ ပိဝန္တော သာမပါကဒုက္ကဋတော န မုစ္စတိ။

၁၅၀၈။ ဝလ္လိယာ သဟ တတ္ထ ဝလ္လိယံ ဇာတံ ဖလံ ကိဉ္စိ ဤသကမ္ပိ စာလေတိ၊ တတော လဒ္ဓံ ကိဉ္စိ ဖလံ တဿေဝ ဘိက္ခုနော န ဝဋ္ဋတီတိ ယောဇနာ၊ တံ ပရိဘုဉ္ဇတော ဒုရုပစိဏ္ဏဒုက္ကဋံ ဟောတီတိ အဓိပ္ပာယော။ တဿေဝါတိ ဧဝကာရေန အညေသံ ဝဋ္ဋတီတိ ဒီပေတိ။

၁၅၀၉။ ပရာမဋ္ဌုန္တိ အာမသိတုံ။ အပဿယိတုန္တိ အဝလမ္ဗိတုံ၊ အပဿနံ ဝါ ကာတုံ။ ‘‘ကိရာ’’တိ ဣမိနာ ကေဝလံ မဟာပစ္စရိယံ (ပါစိ။ အဋ္ဌ။ ၂၆၅) ဝုတ္တဘာဝံ သူစေတိ။

၁၅၁၀-၁။ တတ္ထာတိ တသ္မိံ တေလေ။ ဟတ္ထေန သဏ္ဍာသဂ္ဂဟဏံ အမုဉ္စန္တေန။ တံ တေလံ။

၁၅၁၅-၆။ လောဏကိစ္စန္တိ အလဝဏဋ္ဌာနေ လောဏေန ကာတဗ္ဗကိစ္စံ။ သန္နိဟိတသေသကာလိကသမ္မိဿံ ယာဝဇီဝိကံ ဝိယ သမုဒ္ဒေါဒကဿ အသန္နိဓိဘာဝံ ဒဿေတုမာဟ ‘‘ယာဝဇီဝိကသင်္ခါတ’’န္တိအာဒိ။ ကာလဝိနိမ္မုတ္တန္တိ အကာလိကံ၊ စတူသု ကာလိကေသု အသင်္ဂဟိတန္တိ အတ္ထော။

၁၅၁၇။ ဟိမဿ ကရကာတိ ဟိမောဒကဿ မုတ္တာ ဝိယ ပတ္ထိနသက္ခရာ။ ဗဟလမ္ပိ စာတိ ပက္ခိတ္တဋ္ဌာနေ မုခေ ဝါ ကဒ္ဒမဝဏ္ဏဿ အပညာယနပ္ပမာဏဗဟလံ ပါနီယဉ္စ။ အပ္ပဋိဂ္ဂဟိတံ ဝဋ္ဋတိ။ သစေ ကဒ္ဒမဝဏ္ဏံ ပညာယတိ၊ န ဝဋ္ဋတီတိ။ ယထာဟ ‘‘သစေ ပန မုခေ စ ဟတ္ထေ စ လဂ္ဂတိ၊ န ဝဋ္ဋတိ၊ ပဋိဂ္ဂဟေတွာ ပရိဘုဉ္ဇိတဗ္ဗ’’န္တိ (ပါစိ။ အဋ္ဌ။ ၂၆၅)။

၁၅၁၈။ ကသိတဋ္ဌာနေတိ ကဋ္ဌဋ္ဌာနေ။ န ဝဋ္ဋတိ အပ္ပဋိဂ္ဂဟိတံ။ ဧဝံ သဗ္ဗတ္ထ။

၁၅၁၉။ သောဗ္ဘော ဒုက္ခောဂါဟနဇလာသယော။ ‘‘အာဝါဋော’’တိ ကေစိ။ ကကုဓောတိ အဇ္ဇုနော။

၁၅၂၀။ ပါနီယဿ ဃဋေတိ ပါနီယဃဋေ။ တံ ပါနီယဃဋံ။

၁၅၂၁။ ဝါသတ္ထာယ ပုပ္ဖာနိ ဝါသပုပ္ဖာနိ။ တတ္ထာတိ တသ္မိံ ပါနီယဃဋေ။ ကမလ္လိကာသူတိ ပါဋလိကုသုမာဒီဟိပိ သဟ ကဏ္ဋကမလ္လိကာသု။ ဒိန္နာသူတိ ပါနီယေ ပက္ခိတ္တာသု။

၁၅၂၂။ ဝိသတီတိ အန္တောဂလံ ပဝိသတိ။ တေနေဝ အဋ္ဌကထာယံ ‘‘အပ္ပဋိဂ္ဂဟေတွာ ဌပိတံ ပဋိဂ္ဂဟေတဗ္ဗ’’န္တိ (ပါစိ။ အဋ္ဌ။ ၂၆၅) ဝုတ္တံ။ ဣဒံ အဋ္ဌကထာဝစနံ ‘‘အညတြ ဥဒကဒန္တပေါနာ’’တိ (ပါစိ။ ၂၆၆) ပါဠိယာ ဝိရုဇ္ဈတီတိ စေ? န ဝိရုဇ္ဈတိ။ သာ ဟိ ကေဝလံ ဒန္တကိစ္စံ သန္ဓာယ ဝုတ္တာ၊ ဣဒံ ရသံ သန္ဓာယ ဝုတ္တန္တိ။ တေနေဝ တဒနန္တရံ ‘‘အဇာနန္တဿ ရသေ ပဝိဋ္ဌေပိ အာပတ္တိယေဝ။ အစိတ္တကဉှိ ဣဒံ သိက္ခာပဒ’’န္တိ (ပါစိ။ အဋ္ဌ။ ၂၆၅) ဝုတ္တံ။ တဿ သိက္ခာပဒဿ အစိတ္တကတာ ‘‘အပ္ပဋိဂ္ဂဟိတကေ ပဋိဂ္ဂဟိတသညီ’’တိအာဒိကာယ ပါဠိယာ ကပ္ပိယသညိနောပိ ပါစိတ္တိယဿ ဝုတ္တတ္တာ ဝိညာယတိ။ ပသန္နောဒကဿ ပန အပ္ပဋိဂ္ဂဟေတွာပိ ပါတဗ္ဗတာယ ဒန္တကဋ္ဌေန သဒိသတ္တာ ဧကယောဂနိဒ္ဒိဋ္ဌာနံ သဟေဝ ပဝတ္တီတိ ဝိညာယတိ။ ဥဒကဿ စ ဒန္တပေါနဿ စ တုလျဒေါသေန ဘဝိတဗ္ဗန္တိ။

၁၅၂၃။ မုတ္တောဒကသိင်္ဃာဏိကာဒိဒြဝအဿုခီရာဒိဒြဝဿ အာပေါဓာတုပ္ပကာရတ္တာ၊ ကဏ္ဏမလာဒိနော ဃနဒဗ္ဗဿ ပထဝိဓာတုပ္ပကာရတ္တာ ‘‘သရီရဋ္ဌေသု ဘူတေသူ’’တိ ဣမိနာ ခီရာဒိမာဟ။ ‘‘ကိ’’န္တိ ဣဒံ န ဝဋ္ဋတီတိ ပဒေနပိ ယောဇေတဗ္ဗံ။ ကပ္ပာကပ္ပိယမံသာနန္တိ ဧတ္ထ ‘‘သတ္တာန’’န္တိ သာမတ္ထိယာ လဗ္ဘတိ။

၁၅၂၄။ လောဏန္တိ ဧတ္ထ ‘‘ဧတံ သဗ္ဗမ္ပီ’’တိ ဣဒံ အဓိကာရတော လဗ္ဘတိ။

၁၅၂၅။ ဧတ္ထာတိ ဧတေသု ယထာဝုတ္တေသု ကဏ္ဏမလာဒီသု။

၁၅၂၈။ စတ္တာရိဝိကဋာနီတိ မဟာဝိကဋံ နာမ ဂူထံ၊ မတ္တိကာ၊ မုတ္တံ၊ ဆာရိကာ စာတိ ဝုတ္တာနိ စတ္တာရိ ဝိကဋာနိ။ တာနိ ဟိ ဝိရုဒ္ဓါနိ သပ္ပဝိသာနိ ကတာနိ ဝိဟတာနီတိ ‘‘ဝိကဋာနီ’’တိ ဝုစ္စန္တိ။ နတ္ထိ ဒါယကော ဧတ္ထာတိ နဒါယကံ၊ ဌာနံ၊ တသ္မိံ။ ‘‘န အ နော မာ အလံ ပဋိသေဓေ’’တိ ဝုတ္တတ္တာ ပဋိသေဓဝါစိနာ န-သဒ္ဒေန သမာသော၊ ‘‘အဒါယကေ’’တိ ဣမိနာ အနတ္ထန္တရံ။ ဣဓ ဒုဗ္ဗစော စ အသမတ္ထော စ အသန္တော နာမာတိ အဋ္ဌကထာယံ (ပါစိ။ အဋ္ဌ။ ၂၆၅၊ ကင်္ခါ။ အဋ္ဌ။ ဒန္တပေါနသိက္ခာပဒဝဏ္ဏနာ၊ အတ္ထတော သမာနံ) ဝုတ္တံ။ ဣဒံ ကာလောဒိဿံ နာမ။

၁၅၂၉။ ပထဝိန္တိ အကပ္ပိယပထဝိံ။ တရုန္တိ အလ္လရုက္ခံ။ ဣမိနာ သပ္ပဒဋ္ဌကာလေ အသတိ ကပ္ပိယကာရကေ ဝိကဋတ္ထာယ အတ္တနာ စ ကတ္တဗ္ဗန္တိ ဒဿေတိ။

၁၅၃၀။ အစ္ဆေဒဂါဟတောတိ ဝိလုမ္ပိတွာ ဂဏှနတော။ ‘‘တဿာ’’တိ ဣဒံ သဗ္ဗေဟိ ဟေတုပဒေဟိ ယုဇ္ဇတိ။ တဿာတိ အပ္ပဋိဂ္ဂဟိတဿာတိ အတ္ထော။ အပရဿ အဘိက္ခုကဿ ဒါနေန စာတိ ယောဇနာ။ ‘‘အဘိက္ခုကဿာ’’တိ ပန ဝိသေသနေန ဥပသမ္ပန္နဿ ဒိန္နေ ပဋိဂ္ဂဟဏံ န ဝိဇဟတီတိ ဒီပေတိ။ သဗ္ဗန္တိ ယထာဝုတ္တံ ကာယေန ဂဟဏာဒိပ္ပကာရဿ ကလျံ ဂဟိတံ။ ဧဝန္တိ ဣမိနာ နိယာမေန။

၁၅၃၁။ ဒုရုပစိဏ္ဏေတိ ဒုဋ္ဌု ဥပစိဏ္ဏေ ဒုရာမဋ္ဌေ၊ အပ္ပဋိဂ္ဂဟိတဿ အာမိသဘတ္တဘာဇနာဒိနော ကီဠာဝသေန ဟတ္ထေန ပရာမသနေ စ တတ္ထဇာတကဖလိနိံ သာခါယ ဝါ ဝလ္လိယာ ဝါ ဂဟေတွာ စာလနေ စာတိ အတ္ထော။ ဥဂ္ဂဟိတဿ ဂဟဏေတိ အပ္ပဋိဂ္ဂဟိတဘာဝံ ဉတွာဝ ဂဟိတဿ ကဿစိ ဝတ္ထုနော ပဋိဂ္ဂဟဏေ စ။ အန္တောဝုတ္ထေ စာတိ အကပ္ပိယကုဋိယာ အန္တော ဌပေတွာ အရုဏံ ဥဋ္ဌာပိတေ စ။ သယံပက္ကေ စာတိ ယတ္ထ ကတ္ထစိ အတ္တနာ ပက္ကေ စ။ အန္တောပက္ကေ စာတိ အကပ္ပိယကုဋိယာ အန္တောယေဝ ပက္ကေ စ။ ဒုက္ကဋံ နိဒ္ဒိဋ္ဌန္တိ သမ္ဗန္ဓော။

၁၅၃၂-၃။ ပဋိဂ္ဂဟိတကေ တသ္မိံ ပဋိဂ္ဂဟိတသညိဿာတိ သမ္ဗန္ဓော။ ဒန္တပေါနံ ဒန္တကဋ္ဌံ။

၁၅၃၄။ ဘိက္ခုနီနန္တိ ဘိက္ခုနော စ ဘိက္ခုနိယာ စ ဘိက္ခုနီနံ၊ ဧကဒေသသရူပေကသေသော။ ဧတ္ထ ဣမသ္မိံ သိက္ခာပဒေ။ ဝိနိစ္ဆယော နဝမဇ္ဈိမထေရဘိက္ခုနီနံ ယတော အဝိသေသေန ဣစ္ဆိတဗ္ဗကော၊ တတော တသ္မာ ဟေတုနာ သကလော အယံ ဝိနိစ္ဆယော အသမာသတော မယာ ကထိတောတိ ယောဇနာ။ ကုသလတ္တိကာဒီသု ဝိယ အတ္ထသာကလျဿ အတ္ထသင်္ခေပတောဝ ဝတ္တုံ သက္ကုဏေယျတ္တာ ‘‘သကလော’’တိ ဝတွာပိ ကထာယ ဝိတ္ထာရိတဘာဝံ ဒဿေတုမာဟ ‘‘အသမာသတော’’တိ။

ဒန္တပေါနကထာဝဏ္ဏနာ။

ဘောဇနဝဂ္ဂေါ စတုတ္ထော။

၁၅၃၅။ ‘‘အစေလကာဒီန’’န္တိအာဒီသု ‘‘အစေလကော နာမ ယော ကောစိ ပရိဗ္ဗာဇကသမာပန္နော နဂ္ဂေါ’’တိ (ပါစိ။ ၂၇၁) ပဒဘာဇနေ ဝုတ္တံ၊ တဒဋ္ဌကထာယ ‘‘ပရိဗ္ဗာဇကသမာပန္နောတိ ပဗ္ဗဇ္ဇံ သမာပန္နော’’တိ (ပါစိ။ အဋ္ဌ။ ၂၆၉) ဝုတ္တံ၊ တသ္မာ အစေလကပဗ္ဗဇ္ဇမုပဂတောယေဝေတ္ထ အစေလကော နာမ။ အာဒိ-သဒ္ဒေန ‘‘ပရိဗ္ဗာဇကဿ ဝါ ပရိဗ္ဗာဇိကာယ ဝါ’’တိ (ပါစိ။ ၂၇၀) မာတိကာ-ဂတေ ဒွေ သင်္ဂဏှာတိ။ ဣမေသု စ ဒွီသု ‘‘ပရိဗ္ဗာဇကော နာမ ဘိက္ခုဉ္စ သာမဏေရဉ္စ ဌပေတွာ ယော ကောစိ ပရိဗ္ဗာဇကသမာပန္နော’’တိ (ပါစိ။ ၂၇၁) ဝုတ္တော ပရိဗ္ဗာဇကော နာမ။ ‘‘ဘိက္ခုနိဉ္စ သိက္ခမာနဉ္စ သာမဏေရိဉ္စ ဌပေတွာ ယာ ကာစိ ပရိဗ္ဗာဇိကသမာပန္နာ’’တိ (ပါစိ။ ၂၇၁) ဝုတ္တာ ပရိဗ္ဗာဇိကာ နာမာတိ ဂဟေတဗ္ဗာ။ ပရိဗ္ဗာဇကာ ပနေတ္ထ ဆန္နာယေဝ ဂဟေတဗ္ဗာ။ ဒေန္တဿာတိ ဧတ္ထ ‘‘ဘိက္ခုဿာ’’တိ ပကရဏတော လဗ္ဘတိ၊ ဧတ္ထ ‘‘ကာယာဒိနာ’’တိ သေသော။ ယထာဟ ‘‘ဒဒေယျာတိ ကာယေန ဝါ ကာယပဋိဗဒ္ဓေန ဝါ နိဿဂ္ဂိယေန ဝါ ဒေတီ’’တိ (ပါစိ။ ၂၇၁)။

၁၅၃၆။ တိကပါစိတ္တိယန္တိ တိတ္ထိယေ တိတ္ထိယသညီ၊ ဝေမတိကော၊ အတိတ္ထိယသညီတိ တိကေ ပါစိတ္တိယတ္တယံ။

၁၅၃၇။ အတိတ္ထိယေ တိတ္ထိယသညိဿ၊ ဝေမတိကဿ စ တဿ ဘိက္ခုနော ဒုက္ကဋန္တိ ယောဇနာ။

၁၅၃၈-၉။ တေသန္တိ တိတ္ထိယာနံ။ ဗဟိလေပနန္တိ ဗဟိသရီရေ လိမ္ပိတဗ္ဗံ ကိဉ္စိ ဒေန္တဿ။ တေသံ တိတ္ထိယာနံ သန္တိကေ သမီပေ အတ္တနော ဘတ္တပတ္တာဒိကံ ဘောဇနံ ဌပေတွာ ‘‘ဘောဇနံ ဂဏှထာ’’တိ ဝဒန္တဿ စ အနာပတ္တီတိ ယောဇနာ။ ‘‘သမုဋ္ဌာနံ ဧဠကူပမ’’န္တိ ပဒစ္ဆေဒေါ။

အစေလကကထာဝဏ္ဏနာ။

၁၅၄၀-၂။ ဘိက္ခု ဘိက္ခုနော ယံ ကိဉ္စိ အာမိသံ ဒါပေတွာ ဝါ အဒါပေတွာ ဝါတိ ယောဇနာ။ ကိံ ဝုတ္တံ ဟောတိ? ‘‘ဧဟာဝုသော၊ ဂါမံ ဝါ နိဂမံ ဝါ ပိဏ္ဍာယ ပဝိသိဿာမာ’’တိ (ပါစိ။ ၂၇၅) သိက္ခာပဒေ ဝုတ္တနယေနေဝ ဝတွာ ယေန သဒ္ဓိံ ဂါမံ ပိဏ္ဍာယ ပဝိဋ္ဌော၊ တဿ ဘိက္ခုဿ ခါဒနီယာဒိဘေဒံ ယံ ကိဉ္စိ အာမိသံ ဒါပေတွာ ဝါ အဒါပေတွာ ဝါတိ။

တံ ဘိက္ခုံ ‘‘ဂစ္ဆာ’’တိ ဝတွာ ဥယျောဇေတီတိ ယောဇနာ။ ကိံ ဝုတ္တံ ဟောတိ? ဧဝံ ယော ဘိက္ခု တေန သဒ္ဓိံ ဂါမံ ပဝိဋ္ဌော၊ တံ ‘‘ဂစ္ဆာဝုသော၊ န မေ တယာ သဒ္ဓိံ ကထာ ဝါ နိသဇ္ဇာ ဝါ ဖာသု ဟောတိ၊ ဧကကဿ မေ ကထာ ဝါ နိသဇ္ဇာ ဝါ ဖာသု ဟောတီ’’တိ (ပါစိ။ ၂၇၅) ဝတွာ တပ္ပစ္စယာ တေသံ ဣတ္ထိယာသဒ္ဓိံ ဝစနာဒီနံ အနာစာရာနံ ပစ္စယာ ဂန္တုံ နိယောဇေတီတိ။ တပ္ပစ္စယာတိ ‘‘ဥယျောဇနမတ္တသ္မိ’’န္တိ ဝိသေသနံ။ ပဌမေန စာတိ ဧတ္ထ စ-သဒ္ဒေါ အဋ္ဌာနပ္ပယုတ္တော ‘‘ဥယျောဇနမတ္တသ္မိဉ္စာ’’တိ ယောဇေတဗ္ဗော။ တဿာတိ ဥယျောဇကဿ။

အဿာတိ ဥယျောဇိတဿ၊ အဝယဝသမ္ဗန္ဓေ သာမိဝစနံ။ ဥပစာရသ္မိံ အတိက္ကန္တေတိ ဝက္ခမာနလက္ခဏေ ဒဿနူပစာရေ ဝါ သဝနူပစာရေ ဝါ အတိက္ကန္တေတိ အတ္ထော၊ ဘာဝလက္ခဏေ ဘုမ္မံ။ ပုန အဿာတိ ဥပစာရဿ။ ဒွါဒသရတနပရိယောသာနံ၊ တဒန္တောဂဓံ ပါကာရာဒိ ဧဝ ဝါ ဥပစာရဿ သီမာ နာမ။

၁၅၄၃။ တံ သရူပတော ဒဿေတုမာဟ ‘‘ဒဿနေ’’တိအာဒိ။ အဇ္ဈောကာသေ ဒဿနေ ဥပစာရဿ ဒွါဒသ ဟတ္ထာ ပမာဏံ ဒေသိတာတိ ယောဇနာ။ သဝနေ စ အဇ္ဈောကာသေ ဧဝံ သဝနူပစာရဿ အဇ္ဈောကာသေ ဒွါဒသ ဟတ္ထာ ပမာဏံ ဒေသိတာတိ ယောဇနာ၊ သဝနေ စ ဥပစာရဿ အဝဓိ ဒွါဒသဟတ္ထပ္ပမာဏမေဝါတိ ဝုတ္တန္တိ အတ္ထော။ န စေတရေတိ ဣတရသ္မိံ အနဇ္ဈောကာသေ ဧဝံ ဥပစာရဿ ပမာဏံ ဒွါဒသဟတ္ထာ န စ ဒေသိတာ၊ ကိံ နု ဗျာဝဓာကရာ ကုဋ္ဋာဒယော ဥပစာရဿ ပမာဏန္တိ ဒေသိတာတိ ဝုတ္တံ ဟောတိ။ ဝုတ္တဉ္စေတံ အဋ္ဌကထာယံ ‘‘သစေ ပန အန္တရာ ကုဋ္ဋဒွါရပါကာရာဒယော ဟောန္တိ၊ တေဟိ အန္တရိတဘာဝေါယေဝ ဒဿနူပစာရာတိက္ကမော၊ တဿ ဝသေန အာပတ္တိ ဝေဒိတဗ္ဗာ’’တိ (ပါစိ။ အဋ္ဌ။ ၂၇၆)။ ဣဓ ဥပစာရဒွယေ သမာနေပိ ဥယျောဇိတမဝဓိအန္တံ သန္ဓာယ အသဝနူပစာရံ ဝုတ္တန္တိ ဝိညာယတိ။

၁၅၄၄။ ‘‘တိကပါစိတ္တီတိ ဥပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီဟိ တိကပါစိတ္တိယံ ။ ဣတရေတိ အနုပသမ္ပန္နေ။ တိကဒုက္ကဋန္တိ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တိကဒုက္ကဋံ။ ‘‘ဣတရေတိ သာမဏေရေယေဝါ’’တိ နိဿန္ဒေဟေ လိခိတံ။ ဧတဿေဝတ္ထဿ ဝဇိရဗုဒ္ဓိနာပိ ဝုတ္တဘာဝေါ ဒဿိတော။ တထာဒဿနံ ပဉ္စသဟဓမ္မိကေသု ဣဓာဓိပ္ပေတမနုပသမ္ပန္နံ သန္ဓာယ ဝုတ္တံ စေ၊ ယုဇ္ဇတိ။ အညထာ ပါဠိအဋ္ဌကထာသု ‘‘အနုပသမ္ပန္နေ’’တိ သာမညေန နိဒ္ဒိဋ္ဌတ္တာ ဂဟဋ္ဌာနုပသမ္ပန္နမ္ပိ တထာ ဥယျောဇေန္တဿ အနာပတ္တိ န ဝတ္တဗ္ဗာတိ အမှာကံ ခန္တိ။

ဥဘိန္နန္တိ ဥပသမ္ပန္နာနုပသမ္ပန္နာနံ။ နိဿန္ဒေဟေ ပန ‘‘ဘိက္ခုသာမဏေရာန’’န္တိ လိခိတံ။ ကလိသာသနာရောပနေတိ ဧတ္ထ ကလီတိ ကောဓော၊ တဿ သာသနံ အာဏာ ကလိသာသနံ၊ တဿ အာရောပနံ ပဝတ္တနံ ကလိသာသနာရောပနံ၊ တသ္မိံ၊ ကောဓဝသေန ဌာနနိသဇ္ဇာဒီသု ဒေါသံ ဒဿေတွာ ‘‘ပဿထ ဘော ဣမဿ ဌာနံ နိသဇ္ဇံ အာလောကိတံ ဝိလောကိတံ၊ ခါဏုကော ဝိယ တိဋ္ဌတိ၊ သုနခေါ ဝိယ နိသီဒတိ၊ မက္ကဋော ဝိယ ဣတော စိတော စ ဝိလောကေတီ’’တိ ဧဝံ ‘‘အပ္ပေဝ နာမ ဣမိနာပိ ဥဗ္ဗာဠှော ပက္ကမေယျာ’’တိ အမနာပဝစနဿ ဘဏနေတိ ဝုတ္တံ ဟောတိ။

၁၅၄၅။ ဥယျောဇေန္တဿကိစ္စေနာတိ ဝိဟာရပါလကာဒီနံ ဘောဇနဟရဏာဒိကိစ္စေန ပေသေန္တဿ၊ ဣမဿ ဥပလက္ခဏတ္တာ ‘‘အနာပတ္တိ ‘ဥဘော ဧကတော န ယာပေဿာမာ’တိ ဥယျောဇေတီ’’တိအာဒိနာ (ပါစိ။ ၂၇၈) အနာပတ္တိဝါရာဂတာ သဗ္ဗေပိ ပကာရာ ဂဟေတဗ္ဗာ။

ဥယျောဇနကထာဝဏ္ဏနာ။

၁၅၄၆။ ခုဒ္ဒကေတိ ဧတ္ထ ‘‘သယနိဃရေ’’တိ သေသော ဥပရိ ‘‘အသယနိဃရေ တဿ၊ သယနိဃရသညိနော’’တိ ဝက္ခမာနတ္တာ လဗ္ဘတိ။ ‘‘မဟလ္လကေ’’တိ ဧတ္ထာပိ ဧသေဝ နယော။ ပိဋ္ဌိသင်္ဃာဋတော အဍ္ဎတေယျဟတ္ထပ္ပမာဏံ ယဿ ဝေမဇ္ဈေ ဟောတိ၊ ဤဒိသေ ခုဒ္ဒကေ သယနိဃရေတိ အတ္ထော။ ပိဋ္ဌိဝံသန္တိ ပိဋ္ဌိဝံသေန နိယမိတံ ဂေဟမဇ္ဈံ။ တေနာဟ အဋ္ဌကထာယံ ‘‘ပိဋ္ဌိဝံသံ အတိက္ကမိတွာ’တိ ဣမိနာ မဇ္ဈာတိက္ကမံ ဒဿေတီ’’တိ (ပါစိ။ အဋ္ဌ။ ၂၈၀)။ သဘောဇနေတိ သဟ ဘောဇနေဟီတိ သဘောဇနံ၊ တသ္မိံ သဘောဇနေ။ အထ ဝါ သဘောဇနေတိ သဘောဂေ။ ရာဂပရိယုဋ္ဌိတဿ ပုရိသဿ ဟိ ဣတ္ထီ ဘောဂေါ၊ ဣတ္ထိယာ စ ပုရိသော၊ မေထုနရာဂေန သာရတ္တပုရိသိတ္ထိသဟိတေတိ ဝုတ္တံ ဟောတိ။ ယထာဟ ပဒဘာဇနေ ‘‘သဘောဇနံ နာမ ကုလံ ဣတ္ထီ စေဝ ဟောတိ ပုရိသော စ၊ ဣတ္ထီ စ ပုရိသော စ ဥဘော အနိက္ခန္တာ ဟောန္တိ၊ ဥဘော အဝီတရာဂါ’’တိ (ပါစိ။ အဋ္ဌ။ ၂၈၁)။ ဣမိနာ ပရိယုဋ္ဌိတဿ မေထုနရာဂဂ္ဂိနော တင်္ခဏေ နိဗ္ဗတ္တဘာဝေါ ဒီပိတော။ ကုလေတိ ဃရေ။

၁၅၄၇။ ဟတ္ထပါသန္တိ အဍ္ဎတေယျရတနပ္ပမာဏဒေသံ။ ပိဋ္ဌိသင်္ဃာဋကဿ စာတိ ဒွါရသဗန္ဓဿ စ။ သယနဿာတိ သယန္တိ ဧတ္ထာတိ သယနံ၊ တဿ၊ အာသန္နေ ဌာနေ ယော နိသီဒတိ သဘောဇနေ ကုလေ၊ ‘‘တဿာ’’တိ ဣမိနာ ယောဇေတဗ္ဗံ၊ သယနဿ သမီပေ ဌာနေ ယော နိသီဒတီတိ အတ္ထော။ မဟလ္လကေတိ ပုဗ္ဗေ ဝုတ္တပ္ပမာဏတော မဟန္တေ သယနိဃရေ။ ‘‘ဤဒိသဉ္စ သယနိဃရံ မဟာစတုသာလာဒီသု ဟောတီ’’တိ (ပါစိ။ အဋ္ဌ။ ၂၈၀) အဋ္ဌကထာယံ ဝုတ္တံ။

၁၅၄၈။ သယနမေတဿ အတ္ထီတိ သယနီ၊ သယနီ စ တံ ဃရဉ္စာတိ ဝိဂ္ဂဟော။ တတ္ထာတိ သယနိဃရေ။

၁၅၄၉-၅၀။ ဒုတိယေ သတီတိ ဒုတိယေ ဘိက္ခုမှိ သတိ။ ယထာဟ အနာပတ္တိဝါရေ ‘‘ဘိက္ခု ဒုတိယော ဟောတီ’’တိ (ပါစိ။ ၂၈၃)။ ဝီတရာဂေသူတိ ဝီတရာဂပရိယုဋ္ဌာနေသု။ ဝုတ္တလက္ခဏံ ပဒေသန္တိ ခုဒ္ဒကမဟန္တသေနာသနေ ဝုတ္တလက္ခဏပဒေသ။ အနတိက္ကမ္မ နိသိန္နဿာတိ အနတိက္ကမိတွာ နိသီဒတော။

သဘောဇနကထာဝဏ္ဏနာ။

၁၅၅၂။ တေသန္တိ ဒွိန္နံ အနိယတသိက္ခာပဒါနံ။ ဧသန္တိ ဣမေသံ ဒွိန္နံ ရဟောပဋိစ္ဆန္နရဟောနိသဇ္ဇသိက္ခာပဒါနံ၊ အယမေဝ ဝိသေသောတိ အနန္တရသိက္ခာပဒေန သမုဋ္ဌာနဘာဝသင်္ခါတော အယံ ဝိသေသော ဒီပိတောတိ ယောဇနာ။

ရဟောပဋိစ္ဆန္နရဟောနိသဇ္ဇကထာဝဏ္ဏနာ။

၁၅၅၃-၆။ ဝုတ္တောတိ နိမန္တိတော။ သန္တံ ဘိက္ခုန္တိ ‘‘ကုလံ ဥပသင်္ကမိဿာမီ’’တိ ယသ္မိံ ပဒေသေ စိတ္တံ ဥပ္ပန္နံ၊ တဿ သာမန္တာ ဒွါဒသဟတ္ထဗ္ဘန္တရေ ဌိတံ ဘိက္ခုန္တိ အတ္ထော။ ယထာဟ ‘‘ယတ္ထ ဌိတဿ ကုလာနိ ပယိရုပါသနစိတ္တံ ဥပ္ပန္နံ၊ တတော ပဋ္ဌာယ ယံ ပဿေ ဝါ အဘိမုခေ ဝါ ပဿတိ၊ ယဿ စ သက္ကာ ဟောတိ ပကတိဝစနေန အာရောစေတုံ၊ အယံ သန္တော နာမာ’’တိ (ပါစိ။ အဋ္ဌ။ ၂၉၈)။ ဧတ္ထ ယံ ဒွါဒသဟတ္ထဗ္ဘန္တရေ ဌိတေန သောတုံ သက္ကာ ဘဝေယျ၊ တံ ပကတိဝစနံ နာမ။ အနာပုစ္ဆာတိ ‘‘အဟံ ဣတ္ထန္နာမဿ ဃရံ ဂစ္ဆာမီ’’တိ ဝါ ‘‘စာရိတ္တံ အာပုစ္ဆာမီ’’တိ ဝါ ဤဒိသေန ဝစနေန အနာပုစ္ဆိတွာ။ စာရိတ္တံ အာပဇ္ဇေယျ စေတိ ယဒိ သဉ္စရေယျာတိ ဝုတ္တံ ဟောတိ။ အညတြ သမယာတိ ‘‘တတ္ထာယံ သမယော၊ စီဝရဒါနသမယော စီဝရကာရသမယော’’တိ (ပါစိ။ ၂၉၉) သိက္ခာပဒေ အနုပညတ္တိဝသေန ဝုတ္တာ ဒုဝိဓာ သမယာ အညသ္မိံ ကာလေ။

အာပတ္တိဘေဒံ ဒဿေတုမာဟ ‘‘ဌပေတွာ’’တိအာဒိ။ ‘‘အဝီတိဝတ္တေ မဇ္ဈနှေ’’တိ ဣမိနာ ပုရေဘတ္တံ၊ ပစ္ဆာဘတ္တဉ္စ သင်္ဂဟိတံ။ ဧတ္ထ စ ပုရေဘတ္တံ ပစ္ဆာဘတ္တန္တိ ယေန ဘတ္တေန နိမန္တိတော၊ တသ္မိံ အဘုတ္တေ ဝါ ဘုတ္တေ ဝါတိ အတ္ထော။ ယထာဟ ‘‘ပုရေဘတ္တံ နာမ ယေန နိမန္တိတော၊ တံ အဘုတ္တာဝီ။ ပစ္ဆာဘတ္တံ နာမ ယေန နိမန္တိတော၊ တံ အန္တမသော ကုသဂ္ဂေနပိ ဘုတ္တံ ဟောတီ’’တိ (ပါစိ။ ၃၀၀) ပဒဘာဇနေ ဝုတ္တံ။ အညဿ ဃရန္တိ နိမန္တိတတော အညဿ ဂေဟံ။ ဃရူပစာရောက္ကမနေ ဒုက္ကဋန္တိ သမ္ဗန္ဓော၊ အတ္တနာ ဂတဂေဟဿ ဥပစာရောက္ကမနေ ဒုက္ကဋန္တိ အတ္ထော။ ပဌမေန ပါဒေနာတိ သမ္ဗန္ဓော။

ဃရုမ္မာရေတိ အညဿ ဂေဟုမ္မာရေ။ ဃရူပစာရေ ဒုက္ကဋံ သန္ဓာယ ‘‘အပရမ္ပိ စာ’’တိ ဝုတ္တံ။ ‘‘သမတိက္ကမေ’’တိ ဣမိနာ သဟ ‘‘ဃရုမ္မာရေ’’တိ ပဒံ ‘‘ဃရုမ္မာရဿာ’’တိ ဝိဘတ္တိဝိပရိဏာမေန ယောဇေတဗ္ဗံ။

၁၅၅၇။ ဌိတဋ္ဌာနေတိ ယတ္ထ ဌိတဿ ဂမနစိတ္တံ ဥပ္ပန္နံ၊ တသ္မိံ ဌာနေ ဒွါဒသဟတ္ထဗ္ဘန္တရေတိ ဣဒံ ယထာဝုတ္တနိယာမေနေဝ ဂဟေတဗ္ဗံ။ ဩလောကေတွာတိ ဥဘယပဿံ၊ အဘိမုခဉ္စ ဩလောကေတွာ။ ‘‘ယံ ပဿေ ဝါ အဘိမုခေ ဝါ ပဿတီ’’တိ (ပါစိ။ အဋ္ဌ။ ၂၉၈) အဋ္ဌကထာယံ ဝုတ္တံ။

၁၅၅၈။ ဒူရေတိ ဒွါဒသဟတ္ထတော ဒူရမေဝါဟ။ ဣတော စိတော စ ဂဝေသိတွာ အာရောစနေ ကိစ္စံ နတ္ထီတိ ယောဇနာ။

၁၅၅၉။ န ဒေါသောတိ အနာပတ္တိ။ သမယေတိ ဧတ္ထ ‘‘အနာပုစ္ဆတော’’တိ သေသော။ ဧတ္ထ စ ဥပရိ စ ‘‘န ဒေါသော’’တိ ပစ္စေကံ ယုဇ္ဇတိ။ သန္တံ ဘိက္ခုန္တိ သမ္ဗန္ဓော။ ဃရေနာတိ အညဿ ဃရေန၊ ဧတ္ထ ‘‘ဃရူပစာရေန စာ’’တိ သေသော။ အာရာမံ ဂစ္ဆတောတိ ဧတ္ထ တေန မဂ္ဂေနာတိ ဝုတ္တံ ဟောတိ။

၁၅၆၀။ ‘‘တေန မဂ္ဂေနာ’’တိ စ ‘‘ဂစ္ဆတော’’တိ စ ပဒဒွယံ ‘‘တိတ္ထိယာနံ ပဿယ’’န္တိ စ ‘‘ဘိက္ခုနိပဿယ’’န္တိ စ ဥဘယတ္ထ တထာ-သဒ္ဒေန လဗ္ဘတိ။ တေန ဃရေန၊ ဃရူပစာရေန ဝါ ဂန္တဗ္ဗမဂ္ဂေန တိတ္ထိယာရာမံ ဝါ ဘိက္ခုနိပဿယံ ဝါ ဂစ္ဆတော အနာပတ္တီတိ အတ္ထော။ အာပဒါယ ဂစ္ဆတီတိ ယောဇနာ။ ဇီဝိတဗြဟ္မစရိယန္တရာယာ အာပဒါ။ အာသနသာလံ ဝါတိ သီဟဠဒီပေ ဝိယ ဘိက္ခူနံ ဘုဉ္ဇနတ္ထာယ ယတ္ထ ဒါနပတီဟိ အာသနာနိ ပညာပီယန္တိ၊ တံ အာသနသာလံ ဝါ၊ ဘောဇနသာလန္တိ အတ္ထော။ ‘‘အာပဒါယာသနသာလ’’န္တိ ဝတ္တဗ္ဗေ ဂါထာဗန္ဓဝသေန ယကာရလောပေါ။ ဘတ္တိယဿ ဃရန္တိ နိမန္တိတဃရံ ဝါ သလာကဘတ္တဒါယကာနံ ဝါ ဃရံ။

၁၅၆၁။ ပဝေသနံ ကြိယံ။ အနာပုစ္ဆနံ အကြိယံ။ အစိတ္တကသမုဋ္ဌာနမိဿကတ္တာ ‘‘အစိတ္တ’’န္တိ ဝုတ္တံ။ ကုသလာကုသလာဗျာကတာနံ အညတရစိတ္တသမင်္ဂိနာ အာပဇ္ဇိတဗ္ဗံ သန္ဓာယ ‘‘တိစိတ္တဉ္စာ’’တိ ဝုတ္တံ။

စာရိတ္တကထာဝဏ္ဏနာ။

၁၅၆၂။ ‘‘သဗ္ဗာ’’တိ ဣဒံ ဝိဝရန္တော ‘‘စတုမာသပဝါရဏာ ပုနပဝါရဏာ နိစ္စပဝါရဏာ’’တိ ပဝါရဏတ္တယံ ဒဿေတိ။ ဧတ္ထ စ ‘‘စတုမာသပစ္စယပဝါရဏာ သာဒိတဗ္ဗာတိ ဂိလာနပစ္စယပဝါရဏာ သာဒိတဗ္ဗာ’’တိ (ပါစိ။ ၃၀၇) ပဒဘာဇနေ ဝုတ္တံ။ ပုနပဝါရဏာ စ စတ္တာရောယေဝ မာသေ ဘေသဇ္ဇေန ပဝါရဏံ။ တေနာဟ အဋ္ဌုပ္ပတ္တိယံ ‘‘တေန ဟိ တွံ မဟာနာမ သင်္ဃံ အပရမ္ပိ စတုမာသံ ဘေသဇ္ဇေန ပဝါရေဟီ’’တိ။ နိစ္စပဝါရဏာ နာမ ယာဝဇီဝံ ဘေသဇ္ဇေဟေဝ ပဝါရဏာ။ ဝုတ္တမ္ပိ စေတံ ဘဂဝတာ အဋ္ဌုပ္ပတ္တိယံ ‘‘တေန ဟိ တွံ မဟာနာမ သင်္ဃံ ယာဝဇီဝံ ဘေသဇ္ဇေန ပဝါရေဟီ’’တိ (ပါစိ။ ၃၀၃)။

သဗ္ဗာ စေတာ ပဝါရဏာ ဘေသဇ္ဇပရိယန္တရတ္တိပရိယန္တတဒုဘယပရိယန္တအပရိယန္တဝသေန စတုဗ္ဗိဓာ ဟောန္တိ။ ယထာဟ –

‘‘ဘေသဇ္ဇပရိယန္တာ နာမ ဘေသဇ္ဇာနိ ပရိဂ္ဂဟိတာနိ ဟောန္တိ ‘ဧတ္တကေဟိ ဘေသဇ္ဇေဟိ ပဝါရေမီ’တိ။ ရတ္တိပရိယန္တာ နာမ ရတ္တိယော ပရိဂ္ဂဟိတာယော ဟောန္တိ ‘ဧတ္တကာသု ရတ္တီသု ပဝါရေမီ’တိ။ ဘေသဇ္ဇပရိယန္တာ စ ရတ္တိပရိယန္တာ စ နာမ ဘေသဇ္ဇာနိ စ ပရိဂ္ဂဟိတာနိ ဟောန္တိ ရတ္တိယော စ ပရိဂ္ဂဟိတာယော ဟောန္တိ ‘ဧတ္တကေဟိ ဘေသဇ္ဇေဟိ ဧတ္တကာသု ရတ္တီသု ပဝါရေမီ’တိ။ နေဝဘေသဇ္ဇပရိယန္တာ နရတ္တိပရိယန္တာ နာမ ဘေသဇ္ဇာနိ စ အပရိဂ္ဂဟိတာနိ ဟောန္တိ ရတ္တိယော စ အပရိဂ္ဂဟိတာယော ဟောန္တီ’’တိ (ပါစိ။ ၃၀၇)။

၁၅၆၃။ ‘‘သာဒိတဗ္ဗာ’’တိ ဝုတ္တေ သာဒိယနပ္ပကာရေ ဒဿေတုမာဟ ‘‘ဝိညာပေဿာမီ’’တိအာဒိ။ ဘေသဇ္ဇမ္ပိ သတိ မေ ပစ္စယေ ဝိညာပေဿာမီတိ ယောဇနာ၊ ‘‘သာဒိတဗ္ဗာ’’တိ ဣမိနာ သမ္ဗန္ဓော။ တဒေဝ ဗျတိရေကတော ဒဿေတုမာဟ ‘‘န ပဋိက္ခိပိတဗ္ဗာ’’တိ။ ပဋိက္ခေပကာရဏံ ဒဿေတုမာဟ ‘‘ရောဂေါဒါနိ န မေတိ စာ’’တိ။ သာ တိဝိဓာ ပဝါရဏာ။

၁၅၆၄။ တိကပါစိတ္တိယံဝုတ္တန္တိ ‘‘တတုတ္တရိ တတုတ္တရိသညီ၊ ဝေမတိကော၊ နတတုတ္တရိသညီ ဘေသဇ္ဇံ ဝိညာပေတိ၊ အာပတ္တိ ပါစိတ္တိယဿာ’’တိ (ပါစိ။ ၃၀၉) ဝုတ္တံ ပါစိတ္တိယတ္တယံ။ ဣဓ တတုတ္တရီတိ ဧတ္ထ ယေဟိ ဘေသဇ္ဇေဟိ ပဝါရိတော၊ ယာသု စ ရတ္တီသု ပဝါရိတော၊ တတော စေ ဥတ္တရိ အဓိကန္တိ အတ္ထော။ ယထာဟ ‘‘ဘေသဇ္ဇပရိယန္တေ ယေဟိ ဘေသဇ္ဇေဟိ ပဝါရိတော ဟောတိ၊ တာနိ ဘေသဇ္ဇာနိ ဌပေတွာ အညာနိ ဘေသဇ္ဇာနိ ဝိညာပေတိ၊ အာပတ္တိ ပါစိတ္တိယဿာ’’တိ စ ‘‘ရတ္တိပရိယန္တေ ယာသု ရတ္တီသု ပဝါရိတော ဟောတိ၊ တာ ရတ္တိယော ဌပေတွာ အညာသု ရတ္တီသု ဝိညာပေတိ၊ အာပတ္တိ ပါစိတ္တိယဿာ’’တိ (ပါစိ။ ၃၀၈) စ။ တတ္ထ ဝေမတိကဿ စ ဒုက္ကဋံ ဝုတ္တန္တိ ယောဇနာ။

၁၅၆၅။ တတော စတုမာသတော ဥတ္တရိ အတိရေကံ တတုတ္တရိ၊ တတုတ္တရိ န ဟောတီတိ နတတုတ္တရိ၊ နတတုတ္တရီတိ သညာ အဿ အတ္ထီတိ နတတုတ္တရိသညီ၊ ဘိက္ခု၊ တဿ အနာပတ္တီတိ ယောဇနာ။ ယေဟိ ဘေသဇ္ဇေဟိ ပဝါရိတော၊ တာနိ ဝိညာပေန္တဿ အနာပတ္တီတိ သဟ သေသေန ယောဇေတဗ္ဗံ။ ယထာဟ ‘‘အနာပတ္တိ ယေဟိ ဘေသဇ္ဇေဟိ ပဝါရိတော ဟောတိ၊ တာနိ ဘေသဇ္ဇာနိ ဝိညာပေတီ’’တိ (ပါစိ။ ၃၁၀)။ ယေန ဝါ ယေဟိ ဘေသဇ္ဇေဟိ ယာသု ဝါ ရတ္တီသု ပဝါရိတော၊ တတော အညမ္ပိ ယထာတထံ အာစိက္ခိတွာ ဘိယျော ဝိညာပေန္တဿ အနာပတ္တီတိ သဟ သေသေန ယောဇေတဗ္ဗံ။ ယထာတထံ အာစိက္ခိတွာ ဘိယျော ဝိညာပေန္တဿာတိ ဧတ္ထ ‘‘ဣမေဟိ တယာ ဘေသဇ္ဇေဟိ ပဝါရိတမှ၊ အမှာကဉ္စ ဣမိနာ စ ဣမိနာ စ ဘေသဇ္ဇေန အတ္ထော’တိ အာစိက္ခိတွာ ဝိညာပေတိ၊ ‘ယာသု တယာ ရတ္တီသု ပဝါရိတမှ၊ တာယော စ ရတ္တိယော ဝီတိဝတ္တာ၊ အမှာကဉ္စ ဘေသဇ္ဇေန အတ္ထော’တိ အာစိက္ခိတွာ ဝိညာပေတီ’’တိ (ပါစိ။ ၃၁၀) ဝစနတော ယထာတထံ ဝတွာ အဓိကံ ဝိညာပေန္တဿာတိ အတ္ထော။

၁၅၆၆။ အညဿ ဘိက္ခုဿ အတ္ထာယ ဝါ ဝိညာပေန္တဿ ဘိက္ခုဿ အနာပတ္တီတိ ယောဇနာ။ ဉာတကာနံ ဝိညာပေန္တဿ အနာပတ္တီတိ ဧတ္ထ ဉာတကာနံ သန္တကံ ဝိညာပေန္တဿ အနာပတ္တီတိ အတ္ထော။ အတ္တနော ဝါ ဓနေန ဝိညာပေန္တဿ အနာပတ္တီတိ ယောဇနာ။ ဧတ္ထ ဓနံ နာမ တဏ္ဍုလာဒိ ကပ္ပိယဝတ္ထု။

၁၅၆၇။ ‘‘တထာ’’တိ ဣမိနာ ‘‘ဝိညာပေန္တဿာ’’တိ ဣဒံ ပစ္စာမသတိ။ ဥမ္မတ္တကာဒီနန္တိ ဝိသေသိတဗ္ဗမပေက္ခိတွာ ‘‘ဝိညာပေန္တာန’’န္တိ ဗဟုဝစနံ ကာတဗ္ဗံ။

ဘေသဇ္ဇကထာဝဏ္ဏနာ။

၁၅၆၈။ ဥယျုတ္တန္တိ သင်္ဂါမတ္ထာယ ကတဥယျောဂံ၊ ဂါမတော နိက္ခမ္မ ဂစ္ဆန္တံ ဝါ ဧကတ္ထ သန္နိဝိဋ္ဌံ ဝါ။ ယထာဟ ‘‘ဥယျုတ္တာ နာမ သေနာ ဂါမတော နိက္ခမိတွာ နိဝိဋ္ဌာ ဝါ ဟောတိ ပယာတာ ဝါ’’တိ (ပါစိ။ ၃၁၄)။ အညတြ ပစ္စယာတိ ဌပေတွာ တထာရူပပစ္စယံ။

၁၅၆၉။ ဒဿနဿုပစာရသ္မိန္တိ ဧတ္ထ ဒဿနူပစာရံ နာမ ယသ္မိံ ဌာနေ ဌိတဿ သေနာ ပညာယတိ၊ တံ ဌာနံ။ ယထာဟ ‘‘ယတ္ထ ဌိတော ပဿတိ၊ အာပတ္တိ ပါစိတ္တိယဿာ’’တိ (ပါစိ။ ၃၁၄)။ ဥပစာရံ ဝိမုဉ္စိတွာ ပဿန္တဿာတိ ယထာဝုတ္တဒဿနောပစာရဋ္ဌာနံ ဧတ္ထ ဌတွာ ဩလောကေတုံ န သုကရန္တိအာဒိနာ ကာရဏေန တံ ဌာနံ ပဟာယ အညတ္ထ ဝိလောကေန္တဿာတိ ဝုတ္တံ ဟောတိ။ ကေနစိ ပဋိစ္ဆန္နံ ဟုတွာ အဒိဿမာနမ္ပိ နိန္နံ ဌာနံ ဩတိဏ္ဏံ အပညာယမာနမ္ပိ ပညာယန္တမ္ပိ ဩလောကေတုံ န သက္ကာ ဧဝမေဝ ဝိနိစ္ဆယော ဝေဒိတဗ္ဗော။ ယထာဟ ‘‘ကေနစိ အန္တရိတာ ဝါ နိန္နံ ဩရုဠှာ ဝါ န ဒိဿတီ’’တိအာဒိ (ပါစိ။ အဋ္ဌ။ ၃၁၄)။ ပယောဂတောတိ ယထာဝုတ္တဒဿနပယောဂဂဏနာယ။

၁၅၇၀။ ဣဒါနိ စတုရင်္ဂသေနာလက္ခဏံ ဒဿေတုမာဟ ‘‘အာရောဟာ ပန စတ္တာရော’’တိအာဒိ။ အာရောဟာတိ ဧတ္ထ ဟတ္ထာရောဟာ ဒဋ္ဌဗ္ဗာ။ တပ္ပာဒရက္ခကာတိ တဿ ပါဒရက္ခကာတိ ဝိဂ္ဂဟော။ ဒွေ ဒွေတိ ဧကေကံ ပါဒံ ရက္ခန္တာ ဒွေ ဒွေ။ ဒွါဒသပေါသောတိ ဒွါဒသ ပေါသာ ဧတဿာတိ ဝိဂ္ဂဟော။ ဒွါဒသပုရိသယုတ္တော ဧကော ဟတ္ထီ နာမ။

၁၅၇၁။ အာရောဟောတိ ဧတ္ထ အဿာရောဟော ဝုစ္စတိ။ တိပုရိသောတိ တယော ပုရိသာ အဿာတိ ဝိဂ္ဂဟော။ ဟယောတိ အဿော။ ဧကော သာရထီတိ ရထစာရိကော။ ‘‘ယောဓော ဧကော’’တိ ပဒစ္ဆေဒေါ။ အာဏိရက္ခာတိ ရထစက္ကဒွယဿ အဂဠနတ္ထံ အက္ခကဿ ဥဘောသု ကောဋီသု အာကောဋိတာ ဒွေ အာဏိယော ရက္ခနကာ။

၁၅၇၂။ စတုပေါသောတိ စတ္တာရော ပေါသာ ယဿာတိ ဝိဂ္ဂဟော။ စတုသစ္စဝိဘာဝိနာတိ စတုန္နံ အရိယသစ္စာနံ ဒေသကေန ဘဂဝတာ။ ပဒဟတ္ထာတိ အာဝုဓဟတ္ထာ။ ပဇ္ဇတေ ဂမျတေ အနေန ပရေ ဟနိတုန္တိ ပဒံ၊ အာဝုဓံ၊ ပဒါနိ ဟတ္ထေသု ယေသံ တေ ပဒဟတ္ထာတိ ဘိန္နာဓိကရဏော ဗာဟိရတ္ထသမာသော ယထာ ‘‘ဝဇိရပါဏီ’’တိ။ ပတ္တိပဒါတိ-သဒ္ဒေါ အနတ္ထန္တရာ၊ မနုဿသေနာယ အဓိဝစနံ။

၁၅၇၃။ စတုရင်္ဂသမာယုတ္တာတိ စတူဟိ အင်္ဂေဟိ အဝယဝေဟိ သမာယုတ္တာတိ ဝိဂ္ဂဟော။

၁၅၇၄။ ဟတ္ထိအာဒီသူတိ ယထာဝုတ္တလက္ခဏဟတ္ထိအဿရထပဒါတိနာမကေသု စတူသု အင်္ဂေသု၊ နိဒ္ဓါရဏေ ဘုမ္မံ။ ဧကေကန္တိ ဧကေကံ အင်္ဂံ။ ဧတေသု အဝကံသတော ဧကံ ပုရိသာရုဠှမပိ ဟတ္ထိဉ္စ တထာ အဿဉ္စ ဧကံ ပဒဟတ္ထပုရိသဉ္စ ဧကမေကံ ကတွာ အာဟ ‘‘ဧကေကံ ဒဿနတ္ထာယ ဂစ္ဆတော’’တိ။ ယထာဟ အဋ္ဌကထာယံ ‘‘အန္တမသော ဧကပုရိသာရုဠှံ ဧကမ္ပိ ဟတ္ထိမ္ပီ’’တိအာဒိ (ပါစိ။ အဋ္ဌ။ ၃၁၅)။ အနုယျုတ္တေပီတိ သင်္ဂါမံ ဝိနာ အညေန ကာရဏေန နိက္ခန္တေ။ ယထာဟ ‘‘အနုယျုတ္တာ နာမ ရာဇာ ဥယျာနံ ဝါ နဒိံ ဝါ ဂစ္ဆတိ၊ ဧဝံ အနုယျုတ္တာ ဟောတီ’’တိ (ပါစိ။ အဋ္ဌ။ ၃၁၅)။

၁၅၇၅။ သမ္ပတ္တန္တိ ဧတ္ထ ‘‘သေန’’န္တိ ပကရဏတော လဗ္ဘတိ။ အာပဒါသူတိ ဇီဝိတဗြဟ္မစရိယန္တရာယေ သတိ ‘‘ဧတ္ထ ဂတော မုစ္စိဿာမီ’’တိ ဂစ္ဆတော အနာပတ္တိ။ တထာရူပေ ပစ္စယေ ဂိလာနာဝလောကနာဒိကေ ဂမနာနုရူပပစ္စယေ သတိ အနာပတ္တီတိ ယောဇနာ။

ဥယျုတ္တကထာဝဏ္ဏနာ။

၁၅၇၆-၇။ ‘‘သိယာ စ တဿ ဘိက္ခုနော ကောစိဒေဝ ပစ္စယော သေနံ ဂမနာယ၊ ဒိရတ္တတိရတ္တံ တေန ဘိက္ခုနာ သေနာယ ဝသိတဗ္ဗ’’န္တိ (ပါစိ။ ၃၁၈) အနုညာတတ္တာ ကေနစိ ကရဏီယေန သင်္ဂါမတ္ထံ ဥယျုတ္တာယ သေနာယ ဒိရတ္တတိရတ္တံ ပဋိပါဋိယာ ဝသိတွာ စတုတ္ထရတ္တိယံ ဝသန္တဿ ပန ဘိက္ခုနော အာပတ္တိံ ဒဿေတုမာဟ ‘‘စတုတ္ထေ’’တိအာဒိ။ အနာပတ္တိဝါရေ ‘‘ဂိလာနော ဝသတီ’’တိ (ပါစိ။ ၃၂၁) ဝုတ္တတ္တာ အာဟ ‘‘အရောဂဝါ’’တိ။ သေနာယာတိ ဧတ္ထ ပရိက္ခေပါရဟဋ္ဌာနေန ဝါ သဉ္စရဏပရိယန္တေန ဝါ သေနာ ပရိစ္ဆိန္ဒိတဗ္ဗာ၊ ဧဝံ ပရိစ္ဆိန္နာယ သေနာယ အန္တောဝါတိ အတ္ထော။

တိကပါစိတ္တိယန္တိ ‘‘အတိရေကတိရတ္တေ အတိရေကသညီ၊ ဝေမတိကော၊ ဦနကသညီ သေနာယ ဝသတိ၊ အာပတ္တိ ပါစိတ္တိယဿာ’’တိ (ပါစိ။ ၃၂၀) ပါစိတ္တိယတ္တယံ ဝုတ္တံ။

သေနာဝါသကထာဝဏ္ဏနာ။

၁၅၈၀။ ဥယျောဓိကံ နာမ သင်္ဂါမဋ္ဌာနံ။ ယထာဟ အဋ္ဌကထာယံ ‘‘ဥဂ္ဂန္တွာ ဥဂ္ဂန္တွာ ဧတ္ထ ယုဇ္ဈန္တီတိ ဥယျောဓိကံ၊ သမ္ပဟာရဋ္ဌာနဿေတံ အဓိဝစန’’န္တိ (ပါစိ။ အဋ္ဌ။ ၃၂၂)။ ဗလဂ္ဂန္တိ ‘‘ဧတ္တကာ ဟတ္ထီ’’တိအာဒိနာ (ပါစိ။ ၃၂၄) ပဒဘာဇနာဂတနယေန ဗလဿ ဂဏနဋ္ဌာနံ ဗလဂ္ဂံ။ ယထာဟ ‘‘ဗလဿ အဂ္ဂံ ဇာနန္တိ ဧတ္ထာတိ ဗလဂ္ဂံ၊ ဗလဂဏနဋ္ဌာနန္တိ အတ္ထော’’တိ (ပါစိ။ အဋ္ဌ။ ၃၂၂)။ သေနာဗျူဟန္တိ ‘‘ဣတော ဟတ္ထီ ဟောန္တု၊ ဣတော အဿာ၊ ဣတော ရထာ၊ ဣတော ပတ္တီ ဟောန္တူ’’တိ (ပါစိ။ ၃၂၄) ပဒဘာဇနေ ဝုတ္တသေနာသန္နိဝေသဋ္ဌာနံ သေနာဗျူဟံ။ ယထာဟ ‘‘သေနာယ ဝိယူဟံ သေနာဗျူဟံ၊ သေနာသန္နိဝေသဿေတံ အဓိဝစန’’န္တိ (ပါစိ။ အဋ္ဌ။ ၃၂၂)။

၁၅၈၁။ ပုရိမေတိ အနန္တရသိက္ခာပဒေ။ ‘‘ဒွါဒသပုရိသော ဟတ္ထီ’’ဣတိ ယော ဟတ္ထီ ဝုတ္တောတိ ယောဇနာ။ တေနာတိ တေန ဟတ္ထိနာ ဟေတုဘူတေန။

၁၅၈၂။ ‘‘သေသေသူ’’တိ ဣမိနာ အဿာနီကရထာနီကပတ္တာနီကာ ဂဟိတာ။ ပတ္တာနီကံ နာမ ‘‘စတ္တာရော ပုရိသာ ပဒဟတ္ထာ ပတ္တီ ပစ္ဆိမံ ပတ္တာနီက’’န္တိ (ပါစိ။ ၃၂၄) သေနင်္ဂေသု ပဋိနိဒ္ဒေသေန နိဗ္ဗိသေသံ ကတွာ ဝုတ္တံ။ တိဏ္ဏန္တိ ဧတေသံ ဥယျုတ္တာဒီနံ။

ဥယျောဓိကကထာဝဏ္ဏနာ။

အစေလကဝဂ္ဂေါ ပဉ္စမော။

၁၅၈၃။ ပိဋ္ဌာဒီဟီတိ ဧတ္ထ အာဒိ-သဒ္ဒေန ပူဝါဒိံ သင်္ဂဏှာတိ။ ယထာဟ ‘‘သုရာ နာမ ပိဋ္ဌသုရာ ပူဝသုရာ ဩဒနသုရာ ကိဏ္ဏပက္ခိတ္တာ သမ္ဘာရသံယုတ္တာ’’တိ (ပါစိ။ ၃၂၈)။ ဧတ္ထ စ ပိဋ္ဌံ ဘာဇနေ ပက္ခိပိတွာ တဇ္ဇံ ဥဒကံ ဒတွာ ပက္ခိပိတွာ ကတာ ပိဋ္ဌသုရာ။ ဧဝံ ပူဝေ၊ ဩဒနေ စ ဘာဇနေ ပက္ခိပိတွာ တဇ္ဇံ ဥဒကံ ဒတွာ မဒ္ဒိတွာ ကတာ ‘‘ပူဝသုရာ၊ ဩဒနသုရာ’’တိ ဝုစ္စတိ။ ‘‘ကိဏ္ဏာ’’တိ ပန တဿာ သုရာယ ဗီဇံ ဝုစ္စတိ၊ ယေ ‘‘သုရာမောဒကာ’’တိပိ ဝုစ္စန္တိ၊ တေ ပက္ခိပိတွာ ကတာ ကိဏ္ဏပက္ခိတ္တာ။ ဟရီတကိသာသပါဒိနာနာသမ္ဘာရေဟိ သံယောဇိတာ သမ္ဘာရသံယုတ္တာ။

ပုပ္ဖာဒီဟီတိ ဧတ္ထ အာဒိ-သဒ္ဒေန ဖလာဒီနံ ဂဟဏံ။ ယထာဟ ‘‘မေရယော နာမ ပုပ္ဖာသဝေါ ဖလာသဝေါ မဓွာသဝေါ ဂုဠာသဝေါ သမ္ဘာရသံယုတ္တော’’တိ (ပါစိ။ ၃၂၈)။ တတ္ထ စ ပုပ္ဖာသဝေါ နာမ မဓုကပုပ္ဖာဒီနံ ဇာတိရသကတော စေဝ တာလနာဠိကေရပုပ္ဖာနဉ္စ ရသော စိရပရိဝါသိတော။ ဖလာသဝေါ ပန မုဒ္ဒိကာပနသဖလာဒီနိ မဒ္ဒိတွာ တေသံ ရသေန ကတော။ မဓွာသဝေါ နာမ မုဒ္ဒိကာနံ ဇာတိရသေန ကတော။ မက္ခိကာမဓုနာပိ ကရီယတီတိ ဝဒန္တိ။ ဥစ္ဆုရသော ဂုဠာသဝေါ။ ဟရီတကာမလကကဋုကဘဏ္ဍာဒိနာနာသမ္ဘာရာနံ ရသော စိရပရိဝါသိတော သမ္ဘာရသံယုတ္တော။ အာသဝေါ မေရယံ ဟောတီတိ ယောဇနာ။

၁၅၈၄။ ဗီဇတော ပဋ္ဌာယာတိ သမ္ဘာရေ ပဋိယာဒိတွာ စာဋိယံ ပက္ခိတ္တကာလတော ပဋ္ဌာယ တာလနာဠိကေရာဒီနံ ပုပ္ဖရသေ ပုပ္ဖတော ဂဠိတာဘိနဝကာလတောယေဝ စ ပဋ္ဌာယ။ ပိဝန္တဿာတိ ဧတ္ထ ‘‘ကုသဂ္ဂေနာ’’တိပိ သေသော။ ဥဘယမ္ပိ စာတိ သုရံ၊ မေရယဉ္စာတိ ဥဘယမ္ပိ။ ဗီဇတော ပန ပဋ္ဌာယ ကုသဂ္ဂေန ပိဝန္တဿပိ ဘိက္ခုနော ပါစိတ္တိယံ ဟောတီတိ ယောဇေတဗ္ဗံ။ ပယောဂဗာဟုလ္လေန အာပတ္တိဗာဟုလ္လံ ဒဿေတုမာဟ ‘‘ပယောဂေ စ ပယောဂေ စာ’’တိ။ ဣဒဉ္စ ဝိစ္ဆိန္ဒိတွာ ဝိစ္ဆိန္ဒိတွာ ပိဝန္တဿ ဘိက္ခုနော ပယောဂေ စ ပယောဂေ စ ပါစိတ္တိယံ ဟောတီတိ ယောဇေတဗ္ဗံ။ ယထာဟ ‘‘ဝိစ္ဆိန္ဒိတွာ ဝိစ္ဆိန္ဒိတွာ ပိဝတော ပယောဂဂဏနာယ အာပတ္တိယော’’တိ (ပါစိ။ အဋ္ဌ။ ၃၂၈)။ ဧကေနေဝ ပယောဂေန ဗဟုမ္ပိ ပိဝန္တဿ ဧကံ ဧဝ အာပတ္တိံ ဗျတိရေကတော ဒီပေတိ။ ယထာဟ ‘‘ဧကေန ပန ပယောဂေန ဗဟုမ္ပိ ပိဝန္တဿ ဧကာ အာပတ္တီ’’တိ (ပါစိ။ အဋ္ဌ။ ၃၂၈)။

၁၅၈၅။ တိကပါစိတ္တိယံ ဝုတ္တန္တိ ‘‘မဇ္ဇေ မဇ္ဇသညီ၊ မဇ္ဇေ ဝေမတိကော၊ မဇ္ဇေ အမဇ္ဇသညီ ပိဝတိ၊ အာပတ္တိ ပါစိတ္တိယဿာ’’တိ (ပါစိ။ ၃၂၈) တိကပါစိတ္တိယံ ဝုတ္တံ။

၁၅၈၆။ ‘‘အနာပတ္တိ နမဇ္ဇံ ဟောတိ မဇ္ဇဝဏ္ဏံ မဇ္ဇဂန္ဓံ မဇ္ဇရသံ၊ တံ ပိဝတီ’’တိ (ပါစိ။ ၃၂၈) ဝုတ္တတ္တာ အာဟ ‘‘အမဇ္ဇံ မဇ္ဇဝဏ္ဏ’’န္တိအာဒိ။ အရိဋ္ဌံ နာမ အာမလကဖလရသာဒီဟိ ကတော အာသဝဝိသေသော။ လောဏသောဝီရကံ နာမ အဋ္ဌကထာယံ –

‘‘ဟရီတကာမလကဝိဘီတကကသာဝေ၊ သဗ္ဗဓညာနိ၊ သဗ္ဗအပရဏ္ဏာနိ၊ သတ္တန္နမ္ပိ ဓညာနံ ဩဒနံ၊ ကဒလိဖလာဒီနိ သဗ္ဗဖလာနိ၊ ဝေတ္တကေတကခဇ္ဇူရိကဠီရာဒယော သဗ္ဗကဠီရေ၊ မစ္ဆမံသခဏ္ဍာနိ၊ အနေကာနိ စ မဓုဖာဏိတသိန္ဓဝလောဏတိကဋုကာဒီနိ ဘေသဇ္ဇာနိ ပက္ခိပိတွာ ကုမ္ဘိမုခံ လိမ္ပိတွာ ဧကံ ဝါ ဒွေ ဝါ တီဏိ ဝါ သံဝစ္ဆရာနိ ဌပေန္တိ၊ တံ ပရိပစ္စိတွာ ဇမ္ဗုရသဝဏ္ဏံ ဟောတိ။ ဝါတကာသကုဋ္ဌပဏ္ဍုဘဂန္ဒလာဒီနဉ္စ သိနိဒ္ဓဘောဇနဘုတ္တာနဉ္စ ဥတ္တရပါနံ ဘတ္တဇီရဏကဘေသဇ္ဇံ တာဒိသံ နတ္ထိ။ တံ ပနေတံ ဘိက္ခူနံ ပစ္ဆာဘတ္တမ္ပိ ဝဋ္ဋတိ၊ ဂိလာနာနံ ပါကတိကမေဝ။ အဂိလာနာနံ ပန ဥဒကသမ္ဘိန္နံ ပါနပရိဘောဂေနာ’’တိ (ပါရာ။ အဋ္ဌ။ ၂။၁၉၂) –

ဝိဘာဝိတော ဘေသဇ္ဇဝိသေသော။ သုတ္တံ နာမ အနေကေဟိ ဘေသဇ္ဇေဟိ အဘိသင်္ခတော အမဇ္ဇဘူတော အာသဝဝိသေသော။

၁၅၈၇။ ဝါသဂါဟာပနတ္ထာယာတိ သုဂန္ဓိဘာဝဂါဟာပနတ္ထံ။ ဤသကန္တိ မဇ္ဇဝဏ္ဏဂန္ဓရသာ ယထာ န ပညာယန္တိ၊ ဧဝံ အပ္ပမတ္တကံ။ ယထာဟ ‘‘အနတိက္ခိတ္တမဇ္ဇေယေဝ အနာပတ္တိ။ ယံ ပန အတိက္ခိတ္တမဇ္ဇံ ဟောတိ၊ ယတ္ထ မဇ္ဇဿ ဝဏ္ဏဂန္ဓရသာ ပညာယန္တိ၊ တသ္မိံ အာပတ္တိယေဝါ’’တိ (ပါစိ။ အဋ္ဌ။ ၃၂၉)။ သူပါဒီနံ တု ပါကေတိ ဧတ္ထ အာဒိ-သဒ္ဒေန မံသပါကာဒယော သင်္ဂဟိတာ။ ယထာဟ ‘‘သူပသမ္ပာကေ မံသသမ္ပာကေ တေလသမ္ပာကေ’’တိ (ပါစိ။ ၃၂၈)။

၁၅၈၈။ ဝတ္ထုအဇာနနာ အစိတ္တန္တိ သမ္ဗန္ဓော။ ယထာဟ ‘‘ဝတ္ထုအဇာနနတာယ စေတ္ထ အစိတ္တကတာ ဝေဒိတဗ္ဗာ’’တိ (ပါစိ။ အဋ္ဌ။ ၃၂၉)။ ဝတ္ထုအဇာနနတာ စ နာမ ‘‘မဇ္ဇ’’န္တိ အဇာနနဘာဝေါ။ ဣဒန္တိ ဣဒံ သိက္ခာပဒံ။ စ-သဒ္ဒေန အညာနိ စ ဂိရဂ္ဂသမဇ္ဇာဒိသိက္ခာပဒါနိ သမုစ္စိနောတိ။ အကုသလေနေဝါတိ အကုသလစိတ္တေနေဝ။ ပါနတောတိ ပါတဗ္ဗတော။ လောကဝဇ္ဇကန္တိ သာဓုလောကေန ဝဇ္ဇေတဗ္ဗန္တိ အတ္ထော။ လောကဝဇ္ဇမေဝ လောကဝဇ္ဇကံ။

နနု စေတ္ထ ဝတ္ထုအဇာနနတာယ အစိတ္တကတ္တေ တံဝတ္ထုအဇာနနံ ကုသလာဗျာကတစိတ္တသမင်္ဂိနောပိ သမ္ဘဝတိ၊ ကသ္မာ ‘‘အကုသလေနေဝ ပါနတော လောကဝဇ္ဇက’’န္တိ ဝုတ္တန္တိ? ဝုစ္စတေ – ယသ္မာ အမဇ္ဇသညာယ ပိဝတော၊ မဇ္ဇသညာယ စ ပိဝတော မဇ္ဇံ ဝတ္ထုနိယာမေန ကိလေသုပ္ပတ္တိယာဝ ပစ္စယော ဟောတိ၊ ယထာ မဇ္ဇံ ပီတံ အဇာနန္တဿာပိ အကုသလာနမေဝ ပစ္စယော ဟောတိ၊ န ကုသလာနံ၊ တထာ အဇ္ဈောဟရဏကာလေပိ ဝတ္ထုနိယာမေန အကုသလဿေဝ ပစ္စယော ဟောတီတိ ကတွာ ဝုတ္တံ ‘‘အကုသလေနေဝ ပါနတော လောကဝဇ္ဇက’’န္တိ။ ယထာ တံ နိဠိနိဇာတကေ (ဇာ။ ၂။၁၈။၁ အာဒယော၊ ဇာ။ အဋ္ဌ။ ၅။၁၈။၁ အာဒယော) ဘေသဇ္ဇသညာယ ဣတ္ထိယာ မဂ္ဂေ အင်္ဂဇာတံ ပဝေသေန္တဿ ကုမာရဿ ‘‘ဣတ္ထီ’’တိ ဝါ ‘‘တဿာ မဂ္ဂေ မေထုနံ ပဋိသေဝါမီ’’တိ ဝါ သညာယ အဘာဝေပိ ကာမရာဂုပ္ပတ္တိယာ သီလာဒိဂုဏပရိဟာနိ ဝတ္ထုနိယာမတော စ အဟောသိ၊ ဧဝမိဓာပိ ဒဋ္ဌဗ္ဗော။

ကေစိ ပန ‘‘အကုသလေနေဝ ပါနတော’’တိ ဣဒံ ဣမဿ သိက္ခာပဒဿ သစိတ္တကပက္ခံ သန္ဓာယ ဝုတ္တံ၊ အညထာ ပါဏာတိပါတာဒီသုပိ အတိပ္ပသင်္ဂေါတိ မညမာနာ ဗဟုကာရဏံ၊ နိယမနဉ္စ ဒဿေသုံ။ ဝိနယဋ္ဌကထာယံ (ပါစိ။ အဋ္ဌ။ ၃၂၉)၊ ပန ခုဒ္ဒကပါဌဋ္ဌကထာယံ (ခု။ ပါ။ အဋ္ဌ။ သိက္ခာပဒဝဏ္ဏနာ)၊ ဝိဘင်္ဂဋ္ဌကထာဒီသု စ ‘‘တိစိတ္တ’’န္တိ အဝတွာ ‘‘အကုသလစိတ္တ’’မိစ္စေဝ ဝုတ္တတ္တာ၊ သိက္ခာပဒဿ သာမညလက္ခဏံ ဒဿေန္တေန ပက္ခန္တရလက္ခဏဒဿနဿ အယုတ္တတ္တာ စ အဋ္ဌကထာသု ယထာရုတဝသေနေဝ အတ္ထဂ္ဂဟဏေ စ ကဿစိ ဝိရောဓဿ အသမ္ဘဝတော သစိတ္တကပက္ခမေဝ သန္ဓာယ အကုသလစိတ္တတာ၊ လောကဝဇ္ဇတာ စေတ္ထ န ဝတ္တဗ္ဗာ။ ‘‘ဝတ္ထုံ ဇာနိတွာပိ အဇာနိတွာပိ မဇ္ဇံ ပိဝတော ဘိက္ခုဿ ပါစိတ္တိယံ။ သာမဏေရဿ ပန ဇာနိတွာဝ ပိဝတော သီလဘေဒေါ၊ န အဇာနိတွာ’’တိ (မာဟာဝ။ အဋ္ဌ။ ၁၀၈ အတ္ထတော သမာနံ) ယံ ဝုတ္တံ၊ တတ္ထ ကာရဏံ မဂ္ဂိတဗ္ဗံ။ သိက္ခာပဒပညတ္တိယာ ဗုဒ္ဓါနမေဝ ဝိသယတ္တာ န တံ မဂ္ဂိတဗ္ဗံ၊ ယထာပညတ္တေယေဝ ဝတ္တိတဗ္ဗံ။ ဣဒံ ပန သိက္ခာပဒံ အကုသလစိတ္တံ၊ သုခေါပေက္ခာဝေဒနာနံ ဝသေန ဒုဝေဒနဉ္စ ဟောတိ။ ဝိနယဋ္ဌကထာယံ (ပါစိ။ အဋ္ဌ။ ၃၂၉)၊ ပန မာတိကဋ္ဌကထာယဉ္စ (ကင်္ခါ။ အဋ္ဌ။ သုရာပါနသိက္ခာပဒဝဏ္ဏနာ) ‘‘တိဝေဒန’’န္တိ ပါဌော ဒိဿတိ၊ ခုဒ္ဒကပါဌဝဏ္ဏနာယ (ခု။ ပါ။ အဋ္ဌ။ သိက္ခာပဒဝဏ္ဏနာ)၊ ဝိဘင်္ဂဋ္ဌကထာဒီသု (ဝိဘ။ အဋ္ဌ။ ၇၀၃ အာဒယော) စ ‘‘သုခမဇ္ဈတ္တဝေဒနာဝသေန ဒုဝေဒန’’န္တိ စ ‘‘လောဘမောဟမူလဝသေန ဒွိမူလက’’န္တိ စ ဝုတ္တတ္တာ သော ‘‘ပမာဒပါဌော’’တိ ဂဟေတဗ္ဗော။

သုရာပါနကထာဝဏ္ဏနာ။

၁၅၈၉။ ယေနကေနစိ အင်္ဂေနာတိ အင်္ဂုလိအာဒိနာ ယေန ကေနစိ သရီရာဝယဝေန။ ဟသာဓိပ္ပာယိနောတိ ဟသေ အဓိပ္ပာယော ဟသာဓိပ္ပာယော၊ သော ဧတဿ အတ္ထီတိ ဝိဂ္ဂဟော၊ တဿ၊ ဣမိနာ ကီဠာဓိပ္ပာယရဟိတဿ အနာပတ္တိံ ဗျတိရေကတော ဒီပေတိ။ ဝက္ခတိ စ ‘‘အနာပတ္တိ နဟသာဓိပ္ပာယဿာ’’တိ။ ဖုသတော ဖုသန္တဿ။

၁၅၉၀။ သဗ္ဗတ္ထာတိ သဗ္ဗေသု ဥပသမ္ပန္နာနုပသမ္ပန္နေသု။ ကာယပဋိဗဒ္ဓါဒိကေ နယေတိ ‘‘ကာယေန ကာယပဋိဗဒ္ဓံ အာမသတိ၊ အာပတ္တိ ဒုက္ကဋဿာ’’တိဧဝမာဒိနာ (ပါစိ။ ၃၃၂) ဒဿိတေ နယေ။ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တီဏိ ဒုက္ကဋာနိ ဝုတ္တာနီတိ အာဟ ‘‘တထေဝါနုပသမ္ပန္နေ၊ ဒီပိတံ တိကဒုက္ကဋ’’န္တိ။ ဧတ္ထ စ ‘‘တထေဝါ’’တိ ဣမိနာ ဥပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တိကပါစိတ္တိယဿ ဝုတ္တဘာဝေါ ဒီပိတော ဟောတိ။ ယထာ ဥပသမ္ပန္နေ တိကပါစိတ္တိယံ ဒီပိတံ၊ တထေဝ အနုပသမ္ပန္နေ တိကဒုက္ကဋံ ဒီပိတန္တိ ယောဇနာ။

၁၅၉၁။ ဧတ္ထ…ပေ… ဘိက္ခုနီတိ ဧတ္ထ ဘိက္ခုပိ ဘိက္ခုနိယာ အနုပသမ္ပန္နဋ္ဌာနေ ဌိတောတိ ဝေဒိတဗ္ဗော။

၁၅၉၂။ နဟသာဓိပ္ပာယဿ ဖုသတောတိ ဟသာဓိပ္ပာယံ ဝိနာ ဝန္ဒနာဒီသု ပါဒါဒိသရီရာဝယဝေန ပရံ ဖုသန္တဿ။ ကိစ္စေ သတီတိ ပိဋ္ဌိပရိကမ္မာဒိကိစ္စေ သတိ။

အင်္ဂုလိပတောဒကကထာဝဏ္ဏနာ။

၁၅၉၃။ ဇလေတိ ဧတ္ထ ‘‘ဥပရိဂေါပ္ဖကေ’’တိ သေသော။ ယထာဟ ‘‘ဥပရိဂေါပ္ဖကေ ဥဒကေ’’တိ (ပါစိ။ ၃၃၇)။ နိမုဇ္ဇနာဒီနန္တိ ဧတ္ထ အာဒိ-သဒ္ဒေန ဥမ္မုဇ္ဇနပ္လဝနာနိ ဂဟိတာနိ။ ယထာဟ ‘‘ဥပရိဂေါပ္ဖကေ ဥဒကေ ဟသာဓိပ္ပာယော နိမုဇ္ဇတိ ဝါ ဥမ္မုဇ္ဇတိ ဝါ ပလဝတိ ဝါ’’တိ (ပါစိ။ ၃၃၇)။ ‘‘ကေဝလ’’န္တိ ဣမိနာ နဟာနာဒိကိစ္စေန ဩတရန္တဿ အနာပတ္တီတိ ဒီပေတိ။

၁၅၉၄။ ဥပရိဂေါပ္ဖကေ ဇလေတိ ဂေါပ္ဖကာနံ ဥပရိဘာဂပ္ပမာဏေ ဇလေ။ နိမုဇ္ဇေယျပိ ဝါတိ အန္တောဇလံ ပဝိသန္တော နိမုဇ္ဇေယျ ဝါ။ တရေယျ ဝါတိ ပ္လဝေယျ ဝါ။

၁၅၉၅-၆။ အန္တောယေဝေါဒကေ နိမုဇ္ဇိတွာန ဂစ္ဆတော တဿ ဟတ္ထပါဒပယောဂေဟိ ပါစိတ္တိံ ပရိဒီပယေတိ ယောဇနာ။

၁၅၉၇။ ဟတ္ထာဒိသကလသရီရာဝယဝံ သင်္ဂဏှိတုံ ‘‘ယေန ယေနာ’’တိ အနိယမာမေဍိတမာဟ။ ဇလံ တရတော ဘိက္ခုနော ယေန ယေန ပန အင်္ဂေန တရဏံ ဟောတီတိ ယောဇနာ။

၁၅၉၈။ တရုတော ဝါပီတိ ရုက္ခတောပိ ဝါ။ တိကပါစိတ္တိယန္တိ ဥဒကေ ဟသဓမ္မေ ဟသဓမ္မသညိဝေမတိကအဟသဓမ္မသညီနံ ဝသေန တိကပါစိတ္တိယံ။ ‘‘တိကဒုက္ကဋ’’န္တိ ပါဌော ဒိဿတိ၊ ‘‘ဥဒကေ အဟသဓမ္မေ ဟသဓမ္မသညီ၊ အာပတ္တိ ဒုက္ကဋဿ။ ဥဒကေ အဟသဓမ္မေ ဝေမတိကော၊ အာပတ္တိ ဒုက္ကဋဿာ’’တိ (ပါစိ။ ၃၃၈) ဝတွာ ‘‘ဥဒကေ အဟသဓမ္မေ အဟသဓမ္မသညီ၊ အနာပတ္တီ’’တိ (ပါစိ။ ၃၃၈) တတိယဝိကပ္ပေ ပါဠိယံ အနာပတ္တိ ဝုတ္တာတိ သော ပမာဒပါဌော၊ ‘‘ဒွိကဒုက္ကဋ’’န္တိ ပါဌောယေဝ ဂဟေတဗ္ဗော။

၁၅၉၉။ နာဝံ တီရေ ဥဿာရေန္တောပိ ဝါတိ သမ္ဗန္ဓော။ ဥဿာရေန္တောတိ တီရမာရောပေန္တော။ ‘‘ကီဠတီ’’တိ ဣဒံ ‘‘ပါဇေန္တော’’တိ ဣမိနာပိ ယောဇေတဗ္ဗံ။

၁၆၀၀။ ကထလာယ ဝါတိ ခုဒ္ဒကကပါလိကာယ ဝါ။ ဥဒကန္တိ ဧတ္ထ ‘‘ဘာဇနဂတံ ဝါ’’တိ သေသော။ ‘‘ဘာဇနဂတံ ဥဒကံ ဝါ’’တိ (ပါစိ။ ၃၃၈) ဟိ ပဒဘာဇနေ ဝုတ္တံ။

၁၆၀၁။ ကဉ္စိကံဝါတိ ဓညရသံ ဝါ။ အပိ-သဒ္ဒေါ ‘‘ခီရံ ဝါ တက္ကံ ဝါ ရဇနံ ဝါ ပဿာဝံ ဝါ’’တိ (ပါစိ။ ၃၃၈) ပါဠိယံ အာဂတေ သမ္ပိဏ္ဍေတိ။ စိက္ခလ္လံ ဝါပီတိ ဥဒကကဒ္ဒမံ ဝါ။ ဧတ္ထ ဝိသေသဇောတကေန အပိ-သဒ္ဒေန ‘‘အပိစ ဥပရိဂေါပ္ဖကေ ဝုတ္တာနိ ဥမ္မုဇ္ဇနာဒီနိ ဌပေတွာ အညေန ယေန ကေနစိ အာကာရေန ဥဒကံ ဩတရိတွာ ဝါ အနောတရိတွာ ဝါ ယတ္ထ ကတ္ထစိ ဌိတံ ဥဒကံ အန္တမသော ဗိန္ဒုံ ဂဟေတွာ ခိပနကီဠာယပိ ကီဠန္တဿ ဒုက္ကဋမေဝါ’’တိ (ပါစိ။ အဋ္ဌ။ ၃၃၆) အဋ္ဌကထာဂတံ ဝိနိစ္ဆယဝိသေသံ သမ္ပိဏ္ဍေတိ။ ဝိက္ခိပန္တိ ဝိက္ခိပိတွာ။

၁၆၀၂။ သတိ ကိစ္စေ ဇလံ ဝိဂါဟိတွာ နိမုဇ္ဇနာဒိကံ ကရောန္တဿ အနာပတ္တီတိ ယောဇနာ။ ကိစ္စံ နာမ နဟာနာဒိကံ။

၁၆၀၃။ အနန္တရဿာတိ အင်္ဂုလိပတောဒကသိက္ခာပဒဿ။ ဝိသေသောဝ ဝိသေသတာ၊ ကောစိ ဝိသေသော နတ္ထီတိ အတ္ထော။

ဟသဓမ္မကထာဝဏ္ဏနာ။

၁၆၀၄-၅။ ယော ဘိက္ခု ဘိက္ခုနာ ပညတ္တေန ဝုစ္စမာနော အဿ ဝစနံ အကတ္တုကာမတာယ အာဒရံ ပန သစေ န ကရောတိ၊ တဿ တသ္မိံ အနာဒရိယေ ပါစိတ္တိယမုဒီရယေတိ ယောဇနာ၊ ဣမိနာ ဝါကျေန ပုဂ္ဂလာနာဒရမူလကံ ပါစိတ္တိယံ ဝုတ္တံ။ ယထာဟ ‘‘အနာဒရိယံ နာမ ဒွေ အနာဒရိယာနိ ပုဂ္ဂလာနာဒရိယဉ္စ ဓမ္မာနာဒရိယဉ္စာ’’တိ (ပါစိ။ ၃၄၂)၊ ‘‘ပုဂ္ဂလာနာဒရိယံ နာမ ဥပသမ္ပန္နေန ပညတ္တေန ဝုစ္စမာနော ‘အယံ ဥက္ခိတ္တကော ဝါ ဝမ္ဘိတော ဝါ ဂရဟိတော ဝါ ဣမဿ ဝစနံ အကတံ ဘဝိဿတီ’တိ အနာဒရိယံ ကရောတိ၊ အာပတ္တိ ပါစိတ္တိယဿာ’’တိ (ပါစိ။ ၃၄၂) စ။

ဓမ္မမေဝ ဝါ အသိက္ခိတုကာမော ယော ဘိက္ခု ဘိက္ခုနာ ပညတ္တေန ဝုစ္စမာနော အဿ ဝစနံ အကတ္တုကာမတာယ အာဒရံ ပန သစေ န ကရောတိ၊ တဿ တသ္မိံ အနာဒရိယေ ပါစိတ္တိယမုဒီရယေတိ ယောဇနာ၊ ဣမိနာ ဓမ္မာနာဒရိယမူလကံ ပါစိတ္တိယံ ဝုတ္တံ။ ယထာဟ ‘‘ဓမ္မာနာဒရိယံ နာမ ဥပသမ္ပန္နေန ပညတ္တေန ဝုစ္စမာနော ကထာယံ နဿေယျ ဝါ ဝိနဿေယျ ဝါ အန္တရဓာယေယျ ဝါ၊ တံ နသိက္ခိတုကာမော အနာဒရိယံ ကရောတိ၊ အာပတ္တိ ပါစိတ္တိယဿာ’’တိ (ပါစိ။ ၃၄၂)။ အနာဒရိယေတိ နိမိတ္တတ္ထေ ဘုမ္မံ။

၁၆၀၆။ တိကပါစိတ္တိယံ ဝုတ္တန္တိ ‘‘ဥပသမ္ပန္နေ ဥပသမ္ပန္နသညီ၊ ဝေမတိကော၊ အနုပသမ္ပန္နသညီ အနာဒရိယံ ကရောတိ၊ အာပတ္တိ ပါစိတ္တိယဿာ’’တိ (ပါစိ။ ၃၄၃) တိကပါစိတ္တိယံ ဝုတ္တံ။ တိကာတီတေနာတိ လောကတ္တိကမတိက္ကန္တေန။ အနုပသမ္ပန္နာနာဒရေ တိကဒုက္ကဋန္တိ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တိကဒုက္ကဋံ။

၁၆၀၇။ သုတ္တေနေဝါဘိဓမ္မေနာတိ ဧတ္ထ ဧဝကာရော ‘‘ဒုက္ကဋ’’န္တိ ဣမိနာ ယောဇေတဗ္ဗော။ ‘‘သုတ္တေနအဘိဓမ္မေနာ’’တိ ပဒဒွယေန အဘေဒေါပစာရတော သုတ္တာဘိဓမ္မာဂတော ပရိယတ္တိဓမ္မော ဝုတ္တော။ အပညတ္တေနာတိ ပညတ္တသင်္ခါတဝိနယတော အညတ္တာ အပညတ္တေန။ ‘‘အပညတ္တေနာ’’တိ ဣဒံ ‘‘သုတ္တေန အဘိဓမ္မေနာ’’တိ ပဒဒွယဝိသေသနံ။ ဘိက္ခုနာ ဝုတ္တဿ တသ္မိံ ဘိက္ခုမှိ ဝါ ဓမ္မေ ဝါ အနာဒရံ ကရောတော ဒုက္ကဋမေဝ။ သာမဏေရေန ဥဘယေနပိ ပညတ္တေန ဝါ အပညတ္တေန ဝါ ဝုတ္တဿ တသ္မိံ သာမဏေရေ ဝါ ပညတ္တေ ဝါ အပညတ္တေ ဝါ ဓမ္မေ အနာဒရံ ကရောတော ဘိက္ခုဿ ဒုက္ကဋမေဝါတိ ယောဇနာ။

၁၆၀၈။ ဒေါသောတိ ပါစိတ္တိယဒုက္ကဋသင်္ခါတော ကောစိ ဒေါသော။

၁၆၀၉။ ဧတ္ထာတိ ဣမသ္မိံ အာစရိယာနံ ဂါဟေ။ ဂါရယှော အာစရိယုဂ္ဂဟော နေဝ ဂဟေတဗ္ဗောတိ ယောဇနာ။ ဂါရယှော အာစရိယုဂ္ဂဟောတိ ဧတ္ထ ‘‘ယသ္မာ ဥစ္ဆုရသော သတ္တာဟကာလိကော၊ တဿ ကသဋော ယာဝဇီဝိကော၊ ဒွိန္နံယေဝ သမဝါယော ဥစ္ဆုယဋ္ဌိ၊ တသ္မာ ဝိကာလေ ဥစ္ဆုယဋ္ဌိံ ခါဒိတုံ ဝဋ္ဋတိ ဂုဠဟရီတကေ ဝိယာ’’တိ ဧဝမာဒိကော သမ္ပတိ နိဗ္ဗတ္တော ဂါရယှာစရိယဝါဒေါ။ ကတရော ပန ဂဟေတဗ္ဗောတိ? ပဝေဏိယာ အာဂတော အာစရိယုဂ္ဂဟောဝ ဂဟေတဗ္ဗော။

ကုရုန္ဒိယံ ပန ‘‘လောကဝဇ္ဇေ အာစရိယုဂ္ဂဟော န ဝဋ္ဋတိ၊ ပဏ္ဏတ္တိဝဇ္ဇေ ပန ဝဋ္ဋတီ’’တိ (ပါစိ။ အဋ္ဌ။ ၃၄၄) ဝုတ္တံ။ မဟာပစ္စရိယံ ‘‘သုတ္တံ၊ သုတ္တာနုလောမဉ္စ ဥဂ္ဂဟိတကာနံယေဝ အာစရိယာနံ ဥဂ္ဂဟော ပမာဏံ၊ အဇာနန္တာနံ ကထာ အပ္ပမာဏ’’န္တိ (ပါစိ။ အဋ္ဌ။ ၃၄၄) ဝုတ္တံ။ ‘‘တံ သဗ္ဗံ ပဝေဏိယာ အာဂတေ သမောဓာနံ ဂစ္ဆတီ’’တိ (ပါစိ။ အဋ္ဌ။ ၃၄၄) အဋ္ဌကထာယံ ဝုတ္တံ။ ဧတ္ထ လောကဝဇ္ဇေ အာစရိယုဂ္ဂဟော န ဝဋ္ဋတီတိ လောကဝဇ္ဇသိက္ခာပဒေ အာပတ္တိဋ္ဌာနေ ယော အာစရိယဝါဒေါ၊ သော န ဂဟေတဗ္ဗော၊ လောကဝဇ္ဇမတိက္ကမိတွာ ‘‘ဣဒံ အမှာကံ အာစရိယုဂ္ဂဟော’’တိ ဝဒန္တဿ ဥဂ္ဂဟော န ဝဋ္ဋတီတိ အဓိပ္ပာယော။ သုတ္တာနုလောမံ နာမ အဋ္ဌကထာ။ ပဝေဏိယာ အာဂတေ သမောဓာနံ ဂစ္ဆတီတိ ‘‘ပဝေဏိယာ အာဂတော အာစရိယုဂ္ဂဟောဝ ဂဟေတဗ္ဗော’’တိ (ပါစိ။ အဋ္ဌ။ ၃၄၄) ဧဝံ ဝုတ္တေ မဟာအဋ္ဌကထာဝါဒေယေဝ သင်္ဂဟံ ဂစ္ဆတီတိ အဓိပ္ပာယော။

အနာဒရိယကထာဝဏ္ဏနာ။

၁၆၁၀-၁။ ‘‘ယော ပန ဘိက္ခု ဘိက္ခုံ ဘိံသာပေယျ၊ ပါစိတ္တိယ’’န္တိ (ပါစိ။ ၃၄၆) မာတိကာဝစနတော ဘယသဉ္ဇနနတ္ထာယာတိ ဧတ္ထ ‘‘ဘိက္ခုဿာ’’တိ သေသော။ တေနေဝ ဝက္ခတိ ‘‘ဣတရဿ တု ဘိက္ခုဿာ’’တိ။ ရူပါဒိန္တိ ရူပသဒ္ဒဂန္ဓာဒိံ။ ဥပသံဟရေတိ ဥပဋ္ဌပေတိ ၊ ဒဿေတီတိ ဝုတ္တံ ဟောတိ။ ဘယာနကံ ကထန္တိ စောရကန္တာရာဒိကထံ။ ယထာဟ ‘‘စောရကန္တာရံ ဝါ ဝါဠကန္တာရံ ဝါ ပိသာစကန္တာရံ ဝါ အာစိက္ခတီ’’တိ (ပါစိ။ ၃၄၈)။ ပရသန္တိကေတိ ဧတ္ထ ‘‘ပရော’’တိ ဝုတ္တနယေန လဗ္ဘမာနော ဥပသမ္ပန္နော ဂဟေတဗ္ဗော။

ဒိသွာ ဝါတိ ဥပဋ္ဌာပိတံ တံ ရူပါဒိံ ဒိသွာ ဝါ။ သုတွာ ဝါတိ တံ ဘယာနကံ ကထံ သုတွာ ဝါ။ ယဿ ဘယဒဿနတ္ထာယ တံ ဥပဋ္ဌာပေသိ၊ သော ဘာယတု ဝါ မာ ဝါ ဘာယတု။ ဣတရဿာတိ တဒုပဋ္ဌာပကဿ ဘိက္ခုဿ။ တင်္ခဏေတိ ဥပဋ္ဌာပိတက္ခဏေ။

၁၆၁၂။ တိကပါစိတ္တိယံ ဝုတ္တန္တိ ‘‘ဥပသမ္ပန္နေ ဥပသမ္ပန္နသညီ၊ ဝေမတိကော၊ အနုပသမ္ပန္နသညီ ဘိံသာပေတိ၊ အာပတ္တိ ပါစိတ္တိယဿာ’’တိ (ပါစိ။ ၃၄၈) တိကပါစိတ္တိယံ ဝုတ္တံ။ တိကဒုက္ကဋန္တိ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တိကဒုက္ကဋံ။ ‘‘အနုပသမ္ပန္နံ ဘိံသာပေတုကာမော’’တိအာဒိကေ ဒုက္ကဋဝါရေ အနုပသမ္ပန္နဂ္ဂဟဏေန ဂိဟိနောပိ သင်္ဂယှမာနတ္တာ ‘‘သာမဏေရံ ဂဟဋ္ဌံ ဝါ’’တိ အာဟ။ သာမဏေရံ…ပေ… ဘိက္ခုနော တထေဝ ဘိံသာပေန္တဿ တိကဒုက္ကဋံ ဝုတ္တန္တိ ယောဇနာ။

ဘိံသာပနကထာဝဏ္ဏနာ။

၁၆၁၄။ ဇောတိန္တိ အဂ္ဂိံ။ တပ္ပေတုကာမောတိ ဝိသိဗ္ဗေတုကာမော။ ‘‘တေန ခေါ ပန သမယေန ဘိက္ခူ ပဒီပေပိ ဇောတိကေပိ ဇန္တာဃရေပိ ကုက္ကုစ္စာယန္တီ’’တိ (ပါစိ။ ၃၅၂) ဥပ္ပန္နဝတ္ထုမှိ ‘‘အနုဇာနာမိ ဘိက္ခဝေ တထာရူပပစ္စယာ ဇောတိံ သမာဒဟိတုံ သမာဒဟာပေတု’’န္တိ (ပါစိ။ ၃၅၂) ဝုတ္တတ္တာ ဧတ္ထ ‘‘တထာရူပံ ပစ္စယ’’န္တိ ဣမိနာ ပဒီပုဇ္ဇလနဉ္စ ပတ္တပစနသရီရသေဒနာဒိကမ္မဉ္စ ဇန္တာဃရဝတ္တဉ္စ ဂဟေတဗ္ဗံ။ ဧတ္ထ စ ဇောတိကေပီတိ ပတ္တပစနသေဒနကမ္မာဒီသု ဇောတိကရဏေတိ အတ္ထော။

၁၆၁၅။ သယံသမာဒဟန္တဿာတိ အတ္တနာ ဇာလေန္တဿ။

၁၆၁၆။ ဇာလာပေန္တဿ…ပေ… ဒုက္ကဋန္တိ အာဏတ္တိယာ အာပဇ္ဇိတဗ္ဗံ ဒုက္ကဋံ သန္ဓာယာဟ။ အာဏတ္တိယာ ဇလိတေ အာပဇ္ဇိတဗ္ဗာပတ္တိ ‘‘ဇာလုဋ္ဌာနေ ပနာပတ္တိ၊ ပါစိတ္တိ ပရိကိတ္တိတာ’’တိ အနုဝတ္တမာနတ္တာ သိဒ္ဓါတိ ဝိသုံ န ဝုတ္တာ။

၁၆၁၇။ ဂိလာနဿာတိ ‘‘ဂိလာနော နာမ ယဿ ဝိနာ အဂ္ဂိနာ န ဖာသု ဟောတီ’’တိ (ပါစိ။ ၃၅၄) ဝုတ္တဿ ဂိလာနဿ။ အဝိဇ္ဈာတံ အလာတံ ဥက္ခိပန္တဿာတိ ဂဟဏေန ဘဋ္ဌံ အနိဗ္ဗုတာလာတံ အဂ္ဂိနော သမီပံ ကရောန္တဿ၊ ယထာဌာနေ ဌပေန္တဿာတိ ဝုတ္တံ ဟောတိ။

၁၆၁၈-၉။ ဝိဇ္ဈာတံ အလာတန္တိ နိဗ္ဗုတာလာတံ။ ယထာဝတ္ထုကံ ပါစိတ္တိယန္တိ ဝုတ္တံ ဟောတိ။ အညေန ဝါ ကတံ ဝိသိဗ္ဗေန္တဿ အနာပတ္တီတိ ယောဇနာ။ ဝိသိဗ္ဗေန္တဿာတိ တပ္ပေန္တဿ။ အင်္ဂါရန္တိ ဝီတစ္စိကံ အင်္ဂါရံ။ ပဒီပုဇ္ဇလနာဒိကေတိ အာဒိ-သဒ္ဒေန ‘‘ဇောတိကေ ဇန္တာဃရေ တထာရူပပစ္စယာ’’တိ (ပါစိ။ ၃၅၂) အာဂတံ သင်္ဂဏှာတိ။ ဧတ္ထ စ တထာရူပပစ္စယာတိ ဌပေတွာ ပဒီပါဒီနိ အညေနပိ တထာရူပေန ပစ္စယေန။

ဇောတိသမာဒဟနကထာဝဏ္ဏနာ။

၁၆၂၀-၁။ မဇ္ဈိမေ ဒေသေတိ ဇမ္ဗုဒီပေ ယတ္ထ ဗောဓိမဏ္ဍလံ ဟောတိ၊ တသ္မိံ နဝယောဇနသတာဝဋ္ဋေ မဇ္ဈိမမဏ္ဍလေ၊ ဣမိနာ ဣဒံ သိက္ခာပဒံ တတ္ထေဝ ဒေသောဒိဿကတာယ နိယတန္တိ ဒဿေတိ။ တေနေဝ ဝက္ခတိ အနာပတ္တိဝါရေ ‘‘ပစ္စန္တိမေပိ ဝါ ဒေသေ’’တိ။ စုဏ္ဏန္တိ သိရီသစုဏ္ဏာဒိကံ စုဏ္ဏံ။ အဘိသင်္ခရတောတိ ပဋိယာဒေန္တဿ။

၁၆၂၂-၃။ ‘‘မာသေ ဦနသညိနော’’တိ ပဒစ္ဆေဒေါ။ အတိရေကဒ္ဓမာသေ ဦနသညိနော ဝါ အတိရေကဒ္ဓမာသေ ဝိမတိဿ ဝါ ဒုက္ကဋန္တိ ယောဇနာ။ အတိရေကဒ္ဓမာသေ နှာယန္တဿ အနာပတ္တီတိ ယောဇနာ။ သမယေသု စ နှာယန္တဿ အနာပတ္တီတိ ဧတ္ထ ‘‘ဥဏှသမယော ပရိဠာဟသမယော ဂိလာနသမယော ကမ္မသမယော အဒ္ဓါနဂမနသမယော ဝါတဝုဋ္ဌိသမယော’’တိ (ပါစိ။ ၃၆၃) ဒဿိတေသု ဆသု သမယေသု အညတရေ သမ္ပတ္တေ သမယေ သတိံ ပစ္စုပဋ္ဌပေတွာ ဦနမာသေပိ နဟာယန္တဿ အနာပတ္တီတိ အတ္ထော။

တတ္ထ ဇေဋ္ဌမာသော စ အာသာဠှိမာသဿ ပုရိမပက္ခော စာတိ ဒိယဍ္ဎမာသော ဥဏှသမယော နာမ။ ယထာဟ ‘‘ဥဏှသမယော နာမ ဒိယဍ္ဎော မာသော သေသော ဂိမှာန’’န္တိ (ပါစိ။ ၃၆၄)၊ ဝဿာနဿ ပဌမော မာသော ပရိဠာဟသမယော နာမ။ ယထာဟ ‘‘ပရိဠာဟသမယော နာမ ဝဿာနဿ ပဌမော မာသော’’တိ (ပါစိ။ ၃၆၄)။ ‘‘ယဿ ဝိနာ နဟာနာ န ဖာသု ဟောတီ’’တိ (ပါစိ။ ၃၆၄) ဝုတ္တော သမယော ဂိလာနသမယော နာမ။ ‘‘အန္တမသော ပရိဝေဏမ္ပိ သမ္မဋ္ဌံ ဟောတီ’’တိ (ပါစိ။ ၃၆၄) ဝုတ္တော ကမ္မသမယော နာမ။ ‘‘အဒ္ဓယောဇနံ ဂစ္ဆိဿာမီ’တိ နဟာယိတဗ္ဗ’’န္တိ (ပါစိ။ ၃၆၄) ဝုတ္တော အဒ္ဓါနဂမနသမယော နာမ။ ‘‘ဘိက္ခူ သရဇေန ဝါတေန ဩကိဏ္ဏာ ဟောန္တိ၊ ဒွေ ဝါ တီဏိ ဝါ ဥဒကဖုသိတာနိ ကာယေ ပတိတာနိ ဟောန္တီ’’တိ (ပါစိ။ ၃၆၄) ဝုတ္တော ဝါတဝုဋ္ဌိသမယော နာမ။

နဒီပါရံ ဂစ္ဆတောပိ ဦနကဒ္ဓမာသေ နှာယန္တဿ အနာပတ္တီတိ ယောဇနာ။ ဝါလိကံ ဥက္ကိရိတွာနာတိ ဧတ္ထ သုက္ခာယ နဒိယာ ဝါလိကံ ဥက္ကိရိတွာ။ ကတာဝါဋေသုပိ ဦနကဒ္ဓမာသေ နှာယန္တဿပိ အနာပတ္တီတိ။ ‘‘တထာ’’တိ ဣမိနာ ‘‘နှာယန္တဿ အနာပတ္တီ’’တိ ဣဒံ ပစ္စာမသတိ။

၁၆၂၄။ ပစ္စန္တိမေပိ ဝါ ဒေသေတိ ဇမ္ဗုဒီပေ ယထာဝုတ္တမဇ္ဈိမဒေသတော ဗဟိ ပစ္စန္တိမေသု ဇနပဒေသု၊ ခုဒ္ဒကေသု စ ဒီပေသု။ သဗ္ဗေသန္တိ လဒ္ဓသမယာနံ၊ အလဒ္ဓသမယာနဉ္စ သဗ္ဗေသံ ဘိက္ခူနံ။ အာပဒါသူတိ ဘမရအနုဗန္ဓာဒိအာပဒါသု။ ယထာဟ ‘‘ဘမရာဒီဟိ အနုဗဒ္ဓဿ ဥဒကေ နိမုဇ္ဇိတုံ ဝဋ္ဋတီ’’တိ (ပါစိ။ အဋ္ဌ။ ၃၆၆)။ ကာယစိတ္တသမုဋ္ဌာနံ ဧဠကလောမသမုဋ္ဌာနံ နာမ။

နှာနကထာဝဏ္ဏနာ။

၁၆၂၅-၇။ ‘‘နဝံ နာမ အကတကပ္ပံ ဝုစ္စတီ’’တိ (ပါစိ။ ၃၆၉) ပါဠိဝစနတော စ ‘‘ပဋိလဒ္ဓနဝစီဝရေနာတိ အတ္ထော’’တိ (ပါစိ။ အဋ္ဌ။ ၃၆၈) အဋ္ဌကထာဝစနတော စ စီဝရန္တိ ဧတ္ထ ‘‘နဝ’’န္တိ သေသော။ ကပ္ပိယံ ဗိန္ဒုံ အဒတွာ နဝံ စီဝရံ ဘိက္ခု ပရိဘုဉ္ဇတိ၊ တဿေဝံ ပရိဘုဉ္ဇတော ပါစိတ္တီတိ သမ္ဗန္ဓော။ ဆန္နန္တိ ခေါမာဒီနံ၊ နိဒ္ဓါရဏေ သာမိဝစနံ။ အညတရံ နဝံ စီဝရန္တိ နိဒ္ဓါရေတဗ္ဗံ။ ယတ္ထ ကတ္ထစီတိ ‘‘စတူသု ဝါ ကောဏေသု တီသု ဝါ ဒွီသု ဝါ ဧကသ္မိံ ဝါ ကောဏေ’’တိ (ပါစိ။ အဋ္ဌ။ ၃၆၈) အဋ္ဌကထာဝစနတော စီဝရကောဏေသု ယတ္ထ ကတ္ထစိ။

ကံသနီလေနာတိ စမ္မကာရနီလေန။ စမ္မကာရနီလံ နာမ ပကတိနီလံ။ ဂဏ္ဌိပဒေ ပန ‘‘စမ္မကာရာ ဥဒကေ တိဖလံ၊ အယောဂူထဉ္စ ပက္ခိပိတွာ စမ္မံ ကာဠံ ကရောန္တိ၊ တံ စမ္မကာရနီလ’’န္တိ ဝုတ္တံ။ မဟာပစ္စရိယံ ပန ‘‘အယောမလံ လောဟမလံ၊ ဧတံ ကံသနီလံ နာမာ’’တိ (ပါစိ။ အဋ္ဌ။ ၃၆၈) ဝုတ္တံ။ ပတ္တနီလေန ဝါတိ ‘‘ယော ကောစိ နီလဝဏ္ဏော ပဏ္ဏရသော’’တိ (ပါစိ။ အဋ္ဌ။ ၃၆၈) အဋ္ဌကထာယ ဝုတ္တေန နီလပဏ္ဏရသေန။ ယေန ကေနစိ ကာဠေနာတိ အင်္ဂါရဇလ္လိကာဒီသု အညတရေန ယေန ကေနစိ ကာဠဝဏ္ဏေန။ ‘‘ကဒ္ဒမော နာမ ဩဒကော ဝုစ္စတီ’’တိ (ပါစိ။ ၃၆၉) ဝုတ္တတ္တာ ကဒ္ဒမေနာတိ ဥဒကာနုကဒ္ဒမသုက္ခကဒ္ဒမာဒိံ သင်္ဂဏှာတိ။

‘‘မင်္ဂုလဿ ပိဋ္ဌိပ္ပမာဏကံ မယူရဿ အက္ခိပ္ပမာဏက’’န္တိ ယထာက္ကမေန ယောဇနာ။

၁၆၂၈။ ‘‘ပါဠိကပ္ပော ကဏ္ဏိကာကပ္ပော’’တိ ယောဇနာ၊ မုတ္တာဝလိ ဝိယ ပါဠိံ ကတွာ အပ္ပိတကပ္ပော စ ကဏ္ဏိကာကာရေန အပ္ပိတကပ္ပော စာတိ အတ္ထော။ ကတ္ထစီတိ ဧတ္ထ ‘‘ယထာဝုတ္တပ္ပဒေသေ’’တိ သေသော။ ‘‘စတူသု ဝါ ကောဏေသု တီသု ဝါ’’တိ (ပါစိ။ အဋ္ဌ။ ၃၆၈) ဝုတ္တတ္တာ ‘‘အနေကံ ဝါ’’တိ အာဟ။ ဝဋ္ဋမေဝ ဝဋ္ဋကံ၊ ဣမိနာ အညံ ဝိကာရံ န ဝဋ္ဋတီတိ ဒဿေတိ။ ယထာဟ ‘‘ဌပေတွာ ဧကံ ဝဋ္ဋဗိန္ဒုံ အညေန ကေနစိပိ ဝိကာရေန ကပ္ပော န ကာတဗ္ဗော’’တိ (ပါစိ။ ၃၆၈)။

၁၆၂၉။ ‘‘အနာပတ္တိ ပကာသိတာ’’တိ ဣဒံ ‘‘ဝိမတိဿစာ’’တိ ဧတ္ထ စ-သဒ္ဒေန သမုစ္စိတံ ‘‘အာဒိန္နေ အာဒိန္နသညိနော’’တိ တတိယဝိကပ္ပံ သန္ဓာယ ဝုတ္တံ။ ယထာဟ ‘‘အာဒိန္နေ အာဒိန္နသညီ၊ အနာပတ္တီ’’တိ။

၁၆၃၀။ ‘‘ကပ္ပေ နဋ္ဌေပိ ဝါ’’တိအာဒီဟိ စ ယောဇေတဗ္ဗံ။ ပိ-သဒ္ဒေန ‘‘ကပ္ပကတောကာသေ ဇိဏ္ဏေ’’တိ ဣဒံ သမ္ပိဏ္ဍေတိ။ ယထာဟ ‘‘ကပ္ပကတောကာသော ဇိဏ္ဏော ဟောတီ’’တိ။ တေန ကပ္ပကတေနာတိ သဟတ္ထေ ကရဏဝစနံ။ သံသိဗ္ဗိတေသူတိ ဧတ္ထ ‘‘အကပ္ပကတေသူ’’တိ သေသော။ ယထာဟ ‘‘ကပ္ပကတေန အကပ္ပကတံ သံသိဗ္ဗိတံ ဟောတီ’’တိ။ နိဝါသနပါရုပနံ ကြိယံ။ ကပ္ပဗိန္ဒုအနာဒါနံ အကြိယံ။

ဒုဗ္ဗဏ္ဏကရဏကထာဝဏ္ဏနာ။

၁၆၃၁-၄။ ‘‘ဝိကပ္ပနာ နာမ ဒွေ ဝိကပ္ပနာ သမ္မုခါဝိကပ္ပနာ စ ပရမ္မုခါဝိကပ္ပနာ စာ’’တိ (ပါစိ။ ၃၇၄) ဝုတ္တတ္တာ ‘‘ဝိကပ္ပနာ ဒုဝေ’’တိအာဒိမာဟ။ ဣတီတိ နိဒဿနေ၊ ဧဝန္တိ အတ္ထော။ ကထံ သမ္မုခါဝိကပ္ပနာ ဟောတီတိ အာဟ ‘‘သမ္မုခါယ…ပေ… နိဒ္ဒိသေ’’တိ။ ဧကဿာတိ ဧတ္ထ ‘‘ဗျတ္တဿာ’’တိ သေသော။ ဣဓ ဗျတ္တော နာမ ဝိကပ္ပနပစ္စုဒ္ဓါရဏဝိဓိံ ဇာနန္တော။

ယထာဝစနယောဂတောတိ ‘‘ဣမံ စီဝရ’န္တိ ဝါ၊ ‘ဣမာနိ စီဝရာနီ’တိ ဝါ၊ ‘ဧတံ စီဝရ’န္တိ ဝါ၊ ‘ဧတာနိ စီဝရာနီ’တိ ဝါ’’တိ (ပါရာ။ အဋ္ဌ။ ၂။၄၆၉) အဋ္ဌကထာယ ဝုတ္တံ အနတိက္ကမ္မ၊ ဝစနသမ္ဗန္ဓက္ကမေနာတိ အတ္ထော။ တဒေကဒေသသရူပံ ဒဿေတိ ‘‘ဣမံ စီဝရ’’န္တိ။

‘‘အပစ္စုဒ္ဓဋတော’’တိ ဣမိနာ ‘‘န ကပ္ပတီ’’တိ ဧတဿ ဟေတုံ ဒဿေတိ။

၁၆၃၅။ ‘‘သန္တက’’မိစ္စာဒိ ပစ္စုဒ္ဓရဏပ္ပကာရော။ ယထာပစ္စယံ ကရောဟီတိ တုယှံ ရုစ္စနကံ ကရောဟီတိ အတ္ထော။

၁၆၃၆။ သမ္မုခါဝိကပ္ပန္တရံ ဒဿေတုမာဟ ‘‘အပရာ သမ္မုခါ ဝုတ္တာ’’တိအာဒိ။ အတ္တနာ အဘိရုစိတဿ ယဿ ကဿစိ နာမံ ဂဟေတွာတိ ယောဇနာ။ သဟဓမ္မိနန္တိ ဧတ္ထ ‘‘ပဉ္စန္န’’န္တိ သေသော၊ နိဒ္ဓါရဏေ သာမိဝစနံ။

၁၆၃၉။ ဧဝန္တိ ဝက္ခမာနာပေက္ခံ။ အပိ-သဒ္ဒေါ ပန သဒ္ဒဿတ္ထေ။

၁၆၄၀။ မိတ္တောတိ ဒဠှမိတ္တော၊ ‘‘တေန ဝတ္တဗ္ဗံ ‘ကော တေ မိတ္တော ဝါ သန္ဒိဋ္ဌော ဝါ’’တိ (ပါစိ။ ၃၇၄) ဝစနတော ဣဒံ ဥပလက္ခဏံ။ ပုန တေနပိ ဘိက္ခုနာ ဝတ္တဗ္ဗန္တိ ယောဇနာ။

၁၆၄၁-၂။ ‘‘အဟံ တိဿဿ ဘိက္ခုနော ဒမ္မီ’တိ ဝါ…ပေ… ‘တိဿာယ သာမဏေရိယာ ဒမ္မီ’တိ ဝါ’’တိ (ပါရာ။ အဋ္ဌ။ ၂။၄၆၉) သေသအဋ္ဌကထာပါဌေန ‘‘ဣဒ’’မိစ္စာဒိပါဌော ယောဇေတဗ္ဗော။

၁၆၄၃။ ဒွီသူတိ နိဒ္ဓါရဏေ ဘုမ္မံ၊ ဧတ္ထ ‘‘ဝိကပ္ပနာသူ’’တိ ပကရဏတော လဗ္ဘတိ။

၁၆၄၄-၅။ ဣဓပန ဣမသ္မိံ သာသနေ ယေန ပန ဘိက္ခုနာ သဟ စီဝရသာမိကေန တံ ဝိနယကမ္မံ ကတံ၊ တဿ အဝိဿာသေန ဝိဿာသဘာဝံ ဝိနာ သော ဝိနယကမ္မကတော ဘိက္ခု တံ စီဝရံ ပရိဘုဉ္ဇေယျ၊ တဿ ဘိက္ခုနော ပါစိတ္တီတိ ယောဇနာ။ ဆန္ဒာနုရက္ခနတ္ထံ ‘‘ဝိနယံကမ္မ’’န္တိ အနုဿာရာဂမော ဝေဒိတဗ္ဗော၊ ဝိနယကမ္မန္တိ အတ္ထော။ တံ စီဝရံ အဓိဋ္ဌဟန္တဿ ဝါ ဝိဿဇ္ဇန္တဿ ဝါ ဒုက္ကဋန္တိ ယောဇနာ။

၁၆၄၆။ ပစ္စုဒ္ဓါရကဝတ္ထေသူတိ ပစ္စုဒ္ဓဋဝတ္ထေသု။ အပစ္စုဒ္ဓါရသညိနောတိ အပစ္စုဒ္ဓဋသညိနော။ တတ္ထာတိ အပစ္စုဒ္ဓဋဝတ္ထေသု။ ဝေမတိကဿာတိ ‘‘ပစ္စုဒ္ဓဋာနိ နု ခေါ မယာ၊ အပစ္စုဒ္ဓဋာနီ’’တိ သံသယာပန္နဿ။

၁၆၄၇။ ပစ္စုဒ္ဓါရဏသညိဿာတိ ပစ္စုဒ္ဓဋမိဒန္တိ သညိဿ။ ဝိဿာသာတိ ယဿ ဝါ စီဝရံ ဝိကပ္ပေသိ၊ တေန အပစ္စုဒ္ဓဋမ္ပိ တဿ ဝိဿာသာ ပရိဘုဉ္ဇတော စ။ ယထာဟ ‘‘တဿ ဝါ ဝိဿသန္တော ပရိဘုဉ္ဇတီ’’တိ (ပါစိ။ ၃၇၆)။

ဝိကပ္ပနကထာဝဏ္ဏနာ။

၁၆၄၈-၉။ ‘‘ပတ္တော နာမ ဒွေ ပတ္တာ အယောပတ္တော မတ္တိကာပတ္တော’’တိ (ပါစိ။ ၃၇၉) ဇာတိယာ ကပ္ပိယပတ္တာနံ ဝုတ္တတ္တာ အာဟ ‘‘အဓိဋ္ဌာနုပဂံ ပတ္တ’’န္တိ။ တာဒိသန္တိ အဓိဋ္ဌာနုပဂံ။ သူစိဃရံ နာမ သသူစိကံ ဝါ အသူစိကံ ဝါ။ ကာယဗန္ဓနံ နာမ ပဋ္ဋိကာ ဝါ သူကရန္တကံ ဝါ။ နိသီဒနံ နာမ သဒသံ ဝုစ္စတိ။

‘‘ပတ္တံ ဝါ’’တိအာဒီဟိ ဥပယောဂန္တပဒေဟိ ‘‘အပနေတွာ နိဓေန္တဿာ’’တိ ပစ္စေကံ ယောဇေတဗ္ဗံ။ နိဓေန္တဿာတိ ဧတဿ ‘‘ဟသာပေက္ခဿာ’’တိ ဝိသေသနံ။ ယထာဟ ‘‘ဟသာပေက္ခောပီတိ ကီဠာဓိပ္ပာယော’’တိ (ပါစိ။ ၃၇၉)။ ‘‘ကေဝလ’’န္တိ ဣမိနာ ဒုန္နိက္ခိတ္တဿ ပဋိသာမနာဓိပ္ပာယာဒိအညာဓိပ္ပာယာဘာဝံ ဒီပေတိ။ ဝက္ခတိ စ ‘‘ဒုန္နိက္ခိတ္တမနာပတ္တိ၊ ပဋိသာမယတော ပနာ’’တိ။

၁၆၅၀။ တေနာပီတိ အာဏတ္တေန။ တဿာတိ အာဏာပကဿ။ တိကဒုက္ကဋံ ဝုတ္တန္တိ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တိကဒုက္ကဋံ ဝုတ္တံ၊ ဣမိနာ စ ဥပသမ္ပန္နသန္တကေ တိကပါစိတ္တိယန္တိ ဣဒဉ္စ ဝုတ္တမေဝ ဟောတိ။

၁၆၅၁။ အညန္တိ ပါဠိယံ အနာဂတံ ပတ္တတ္ထဝိကာဒိပရိက္ခာရံ။

၁၆၅၂။ သဗ္ဗေသူတိ ပါဠိယံ အာဂတေသု စ အနာဂတေသု စ သဗ္ဗေသု ပရိက္ခာရေသု။

၁၆၅၃။ ဓမ္မကထံ ကတွာတိ ‘‘သမဏေန နာမ အနိဟိတပရိက္ခာရေန ဘဝိတုံ န ဝဋ္ဋတီ’’တိ (ပါစိ။ အဋ္ဌ။ ၃၇၇) အဋ္ဌကထာဂတနယေန ဓမ္မကထံ ကတွာ။ အနိဟိတပရိက္ခာရေနာတိ အပ္ပဋိသာမိတပရိက္ခာရေန။ နိဓေတိ စေ၊ တထာ အနာပတ္တီတိ ယောဇနာ။ အဝိဟေသေတုကာမဿာတိ ဝိဟေသာဓိပ္ပာယရဟိတဿ။ အကီဠဿာတိ ကီဠာဓိပ္ပာယရဟိတဿ ကေဝလံ ဝတ္တသီသေန ‘‘ပဋိသာမေတွာ ဒဿာမီ’’တိ အပနိဓေန္တဿ။

၁၆၅၄။ အဒိန္နာဒါနသမုဋ္ဌာနာပတ္တီနံ အကုသလာဒိဝသေနပိ သစိတ္တကတ္တာ အာဟ ‘‘ဣဒံ အကုသလေနေဝ သစိတ္တ’’န္တိ။

စီဝရာပနိဓာနကထာဝဏ္ဏနာ။

သုရာပါနဝဂ္ဂေါ ဆဋ္ဌော။

၁၆၅၅။ ‘‘တိရစ္ဆာနဂတံ ပါဏ’’န္တိ ဣမိနာ ‘‘ယော ပန ဘိက္ခု သဉ္စိစ္စ ပါဏံ ဇီဝိတာ ဝေါရောပေယျ၊ ပါစိတ္တိယ’’န္တိ (ပါစိ။ ၃၈၃) ဣမသ္မိံ သိက္ခာပဒေ အဓိပ္ပေတံ ပါဏံ ဒဿေတိ။ အာပတ္တိနာနတ္တာဘာဝါ အာဟ ‘‘မဟန္တံ ခုဒ္ဒကမ္ပိ ဝါ’’တိ။ ယထာဟ ‘‘ဣမသ္မိဉ္စ သိက္ခာပဒေ တိရစ္ဆာနဂတောယေဝ ‘ပါဏော’တိ ဝေဒိတဗ္ဗော၊ တံ ခုဒ္ဒကမ္ပိ မဟန္တမ္ပိ မာရေန္တဿ အာပတ္တိနာနာကရဏံ နတ္ထိ၊ မဟန္တေ ပန ဥပက္ကမမဟန္တတ္တာ အကုသလံ မဟန္တံ ဟောတီ’’တိ (ပါစိ။ အဋ္ဌ။ ၃၈၂)။ ‘‘မာရေန္တဿ အဿာ’’တိ ပဒစ္ဆေဒေါ။ ‘‘ခုဒ္ဒကမ္ပိ ဝါ မာရေန္တဿာ’’တိ ဣမိနာ အဋ္ဌကထာယံ ‘‘အန္တမသော မဉ္စပီဌံ သောဓေန္တော မင်္ဂုလဗီဇကေပိ ပါဏသညီ နိက္ကာရုဏိကတာယ တံ ဘိန္ဒန္တော အပနေတိ၊ ပါစိတ္တိယံ။ တသ္မာ ဧဝရူပေသု ဌာနေသု ကာရုညံ ဥပဋ္ဌပေတွာ အပ္ပမတ္တေန ဝတ္တံ ကာတဗ္ဗ’’န္တိ ဝုတ္တဝိနိစ္ဆယောပိ သင်္ဂဟိတော။

၁၆၅၆။ ဥဘယတ္ထစာတိ ပါဏေ ဝါ အပါဏေ ဝါတိ ဥဘယတ္ထာပိ။ အဝသေသဝိနိစ္ဆယော ပနေတ္ထ မနုဿဝိဂ္ဂဟေ ဝုတ္တနယေနေဝ ဝေဒိတဗ္ဗော။

သဉ္စိစ္စပါဏကထာဝဏ္ဏနာ။

၁၆၅၈။ သပ္ပာဏကန္တိ သဟ ပါဏကေဟီတိ သပ္ပာဏကံ။ ယေ ပရိဘောဂေန မရန္တိ၊ ဧဝရူပါ ဣဓ ‘‘ပါဏကာ’’တိ အဓိပ္ပေတာ။ အဿာတိ ဘိက္ခုနော။

၁၆၅၉။ ‘‘အဝိစ္ဆိဇ္ဇာ’’တိ ဣမိနာ ဝိစ္ဆေဒေနေဝ ပယောဂနာနတ္တံ ဟောတီတိ ဒီပေတိ။ ပတ္တပူရမ္ပီတိ ဧတ္ထ ပိ-သဒ္ဒေါ ဗျတိရေကေ။

၁၆၆၀-၁။ အဿ ပါစိတ္တိ ပရိဒီပိတာတိ သမ္ဗန္ဓော။ တာဒိသေနာတိ သပ္ပာဏကေန။ အာဝိဉ္ဆိတွာနာတိ ပရိဗ္ဘမိတွာ။ ယာဂုယောတိ ဧတ္ထ ‘‘ဥဏှာ’’တိ သာမတ္ထိယာ လဗ္ဘတိ။ ဣဒဉ္စ ပါဏီနံ မာရဏတ္ထံ ယံ ကိဉ္စိ ဥဏှဝတ္ထုံ သပ္ပာဏကေန ဥဒကေန အနိဗ္ဗာပေတုံ ဥပလက္ခဏံ။ တံ သပ္ပာဏကံ ဥဒကံ။ နှာယတောပိ ဝါတိ ဧတ္ထ ပိ-သဒ္ဒေန အဋ္ဌကထာယံ –

‘‘ဥဒကသောဏ္ဍိံ ဝါ ပေါက္ခရဏိံ ဝါ ပဝိသိတွာ ဗဟိ နိက္ခမနတ္ထာယ ဝီစိံ ဥဋ္ဌာပယတောပိ။ သောဏ္ဍိံ ဝါ ပေါက္ခရဏိံ ဝါ သောဓေန္တေဟိ တတော ဂဟိတဥဒကံ ဥဒကေယေဝ အာသိဉ္စိတဗ္ဗံ။ သမီပမှိ ဥဒကေ အသတိ ကပ္ပိယဥဒကဿ အဋ္ဌ ဝါ ဒသ ဝါ ဃဋေ ဥဒကသဏ္ဌာနကပ္ပဒေသေ အာသိဉ္စိတွာ တတ္ထ အာသိဉ္စိတဗ္ဗံ။ ‘ပဝဋ္ဋိတွာ ဥဒကေ ပတိဿတီ’တိ ဥဏှပါသာဏေ ဥဒကံ နာသိဉ္စိတဗ္ဗံ။ ကပ္ပိယဥဒကေန ပန ပါသာဏံ နိဗ္ဗာပေတွာ အာသိဉ္စိတုံ ဝဋ္ဋတီ’’တိ (ပါစိ။ အဋ္ဌ။ ၃၈၇) –

ဝုတ္တဝိနိစ္ဆယံ သမ္ပိဏ္ဍေတိ။

၁၆၆၂။ ဥဘယတ္ထပီတိ သပ္ပာဏကေပိ အပ္ပာဏကေပီတိ ဥဘယတ္ထေဝ။

၁၆၆၄-၆။ ပါဏပဋိဗဒ္ဓတာယ ကာရဏံ ဒဿေတုမာဟ ‘‘ပတန’’န္တိအာဒိ။ သလဘာဒီနန္တိ ပဋင်္ဂါဒီနံ ။ ဉတွာတိ ဧတ္ထ ပိ-သဒ္ဒေါ လုတ္တနိဒ္ဒိဋ္ဌော။ ဧဝမုပရိပိ။ ပဒီပုဇ္ဇလနန္တိ ဧတ္ထ ‘‘ဝိယာ’’တိ သေသော။ ဧတ္ထာတိ ဣမသ္မိံ သိက္ခာပဒေ။ သပ္ပာဏဘာဝေါဝ သပ္ပာဏဘာဝတာ၊ တံ။ ဘုဉ္ဇတောတိ ဘုဉ္ဇိတဗ္ဗတော။

သလဘာဒီနံ ပတနံ ဉတွာပိ သုဒ္ဓေန စေတသာ ပဒီပုဇ္ဇလနံ ဝိယ သပါဏဘာဝံ ဉတွာပိ ဇလသညာယ ဘုဉ္ဇိတဗ္ဗတော ဧတ္ထ ပဏ္ဏတ္တိဝဇ္ဇတာ ဉေယျာတိ ယောဇနာ။

ဧဝံ သန္တေ သိဉ္စနသပ္ပာဏကသိက္ခာပဒါနံ ဥဘိန္နမ္ပိ ကော ဝိသေသောတိ အာဟ ‘‘သိဉ္စနေ’’တိအာဒိ။ သိဉ္စနံ သိဉ္စနသိက္ခာပဒံ သိဉ္စနေ ဝုတ္တံ သိဉ္စနဝိသယေ ပညတ္တံ၊ ဣဒံ ပန သပ္ပာဏကသိက္ခာပဒံ ပရိဘောဂေ ဝုတ္တံ အဇ္ဈောဟာရဝိသယေ ပညတ္တန္တိ အယမေဝ တဿ စေဝ အဿ စ ဝိသေသောတိ ယောဇနာ။

သပ္ပာဏကကထာဝဏ္ဏနာ။

၁၆၆၇။ ယထာဓမ္မန္တိ ယော ယဿ အဓိကရဏဿ ဝူပသမနာယ ဓမ္မော ဝုတ္တော၊ တေနေဝ ဓမ္မေနာတိ အတ္ထော။ ‘‘ကိစ္စာဓိကရဏ’’န္တိ ဣမိနာ ဣတရာနိ အဓိကရဏာနိ ဥပလက္ခိတာနိ။ ယထာဟ ‘‘အဓိကရဏံ နာမ စတ္တာရိ အဓိကရဏာနိ ဝိဝါဒါဓိကရဏံ အနုဝါဒါဓိကရဏံ အာပတ္တာဓိကရဏံ ကိစ္စာဓိကရဏ’’န္တိ (ပါစိ။ ၃၉၄)။ အပလောကနကမ္မာဒီနိ စတ္တာရိ သင်္ဃကိစ္စံ နာမ၊ တဒေဝ သမထေဟိ အဓိကရဏီယတ္တာ ဝူပသမေတဗ္ဗတ္တာ အဓိကရဏန္တိ ကိစ္စာဓိကရဏံ။ ပုန နီဟာတဗ္ဗန္တိ ပုန နီဟရိတဗ္ဗံ၊ ဝူပသမေတဗ္ဗန္တိ အတ္ထော။ ဣမိနာ ‘‘အကတံ ကမ္မ’’န္တိအာဒိနာ ပါဠိယံ ဒဿိတာ ဒွါဒသ ဥက္ကောဋာ ဥပလက္ခိတာတိ ဒဋ္ဌဗ္ဗာ။ ဥက္ကောဋေန္တဿာတိ တဿ တဿ ဘိက္ခုနော သန္တိကံ ဂန္တွာ ‘‘အကတံ ကမ္မ’’န္တိအာဒီနိ ဝတွာ ဥစ္စာလေန္တဿ ယထာပတိဋ္ဌိတဘာဝေန ပတိဋ္ဌာတုံ န ဒေန္တဿ။ ဧတ္ထ စ ပတိဋ္ဌာတုံ န ဒေန္တဿာတိ တဿ ပဝတ္တိအာကာရဒဿနတ္ထံ ဝုတ္တံ။ ယံ ပန ဓမ္မေန အဓိကရဏံ နိဟဋံ၊ တံ သုနိဟဋမေဝ။

၁၆၆၈။ ‘‘အကတံ ကမ္မံ၊ ဒုက္ကဋံ ကမ္မံ၊ ပုန ကာတဗ္ဗံ ကမ္မ’’န္တိ ဝဒတာ ဝဒန္တေန ဘိက္ခုနာ တံ ကမ္မံ ဥစ္စာလေတုံ န ဝဋ္ဋတီတိ ယောဇနာ။

၁၆၆၉။ ဝိပ္ပကတေတိ အာရဒ္ဓါနိဋ္ဌိတေ။ တန္တိ ပဋိက္ကောသန္တံ။ သညာပေတွာတိ ကတကမ္မဿ အနဝဇ္ဇဘာဝံ ဉာပေတွာ။ န ပနညထာတိ တထာ အသညာပေတွာ။

၁၆၇၀။ အဓမ္မေ ပန ကမ္မသ္မိန္တိ ယထာပါဠိအာဂတေ ကမ္မသ္မိံ။ ဥဘယတ္ထာပီတိ ဓမ္မကမ္မေ၊ အဓမ္မကမ္မေ ဝါတိ ဥဘယတ္ထ။

၁၆၇၁။ န စ ကမ္မာရဟဿ ဝါတိ ဧတ္ထ စ-သဒ္ဒေါ ‘‘ဝဂ္ဂေန စာ’’တိ ယောဇေတဗ္ဗော။ စ-သဒ္ဒေါ ဝါ-သဒ္ဒတ္ထေ ဒဋ္ဌဗ္ဗော။ ‘‘အဓမ္မေန၊ ဝဂ္ဂေန ဝါ န ကမ္မာရဟဿ ဝါ ကတ’’န္တိ ဇာနတော ဥက္ကောဋနေ ဒေါသော နတ္ထီတိ ယောဇနာ။

ဥက္ကောဋနကထာဝဏ္ဏနာ။

၁၆၇၃။ ‘‘ဒုဋ္ဌုလ္လာ နာမ အာပတ္တိ စတ္တာရိ စ ပါရာဇိကာနိ တေရသ စ သင်္ဃာဒိသေသာ’’တိ (ပါစိ။ ၃၉၉) ဝစနတော ပါရာဇိကာနမ္ပိ ဒုဋ္ဌုလ္လတ္တာ၊ ဣဓ စ ပါရာဇိကဿ အနဓိပ္ပေတတ္တာ ဣဓာဓိပ္ပေတမေဝ ဒဿေတုံ ‘‘သင်္ဃာဒိသေသ’’န္တိ ဣမိနာ ဒုဋ္ဌုလ္လ-ပဒံ ဝိသေသိတံ။ ယထာဟ ‘‘ဧတ္ထ စတ္တာရိ ပါရာဇိကာနိ အတ္ထုဒ္ဓါရဝသေန ဒဿိတာနိ၊ သင်္ဃာဒိသေသာပတ္တိ ပန အဓိပ္ပေတာ’’တိ (ပါစိ။ အဋ္ဌ။ ၃၉၉)။ ဉတွာတိ သာမံ ဝါ အညတော ဝါ ဇာနိတွာ။ ဆာဒယတော တဿ ပရိယာပုတာတိ ‘‘ဣမံ ဇာနိတွာ စောဒေဿန္တိ၊ သာရေဿန္တိ၊ နာရောစေဿာမီ’’တိ ပဋိစ္ဆာဒေန္တဿ တဿ ပရိယာပုတာ ဒေသိတာ။

၁၆၇၄-၅။ ဓုရံ နိက္ခိပိတွာတိ ‘‘အညဿ န အာရောစေဿာမီ’’တိ ဓုရနိက္ခေပံ ကတွာ။ တဿာတိ ဒုဋ္ဌုလ္လဿ။ ပဋိစ္ဆာဒနံ ဟေတု ကာရဏံ ယဿ အာရောစနဿာတိ ဝိဂ္ဂဟော။ ပဋိစ္ဆာဒနဟေတုကန္တိ အာရောစနကိရိယာယ ဝိသေသနံ၊ ‘‘ဣတ္ထန္နာမော ဣတ္ထန္နာမံ သင်္ဃာဒိသေသံ အာပန္နော၊ အညဿ န အာရောစေဟီ’’တိ ဝတွာ အာရောစနံ ကရောတီတိ ဝုတ္တံ ဟောတိ။ ဣတီတိ ဝုတ္တနိဒဿနေ၊ ဟီတိ ဧဝကာရတ္ထေ၊ ဧဝမေဝ ဝဒတီတိ အတ္ထော။

ယာဝ ကောဋိ န ဆိဇ္ဇတိ၊ တာဝ ဧဝံ ဘိက္ခူနံ သတမ္ပိ သဟဿမ္ပိ တံ အာပတ္တိံ အာပဇ္ဇတိ ဧဝါတိ ယောဇနာ။

၁၆၇၆။ မူလေနာတိ သင်္ဃာဒိသေသံ အာပန္နပုဂ္ဂလေန။ အာရောစိတဿ ဒုတိယဿာတိ သမာနာဓိကရဏံ။ မူလေန ‘‘မမ အာပတ္တိံ အာပန္နဘာဝံ အညဿ န အာရောစေဟီ’’တိ အာရောစိတဿ ဒုတိယဘိက္ခုဿ သန္တိကာ သုဏန္တေန တတိယေန နိဝတ္တိတွာ တဿေဝ ဒုတိယဿ ပကာသိတေ အာရောစနဿ ကောဋိ ဆိန္နာတိ ဝုစ္စတီတိ ယောဇနာ။ ကောဋီတိ အာရောစနကိရိယာဝသာနံ ဝုစ္စတိ။

၁၆၇၇။ ဒုဋ္ဌုလ္လာယ စ ဒုဋ္ဌုလ္လသညီတိ ဧတ္ထ ‘‘အာရောစေန္တော’’တိ ပကရဏတော လဗ္ဘတိ။ ဣတရေသု ပန ဒွီသူတိ ဒုဋ္ဌုလ္လာယ ဝေမတိကော၊ အဒုဋ္ဌုလ္လသညီတိ ဒွီသု။

၁၆၇၈။ အဒုဋ္ဌုလ္လာယာတိ ပဉ္စဝိဓာယ လဟုကာပတ္တိယာ။ သဗ္ဗတ္ထာတိ သဗ္ဗေသု ဝိကပ္ပေသု။ တိကဒုက္ကဋံ နိဒ္ဒိဋ္ဌန္တိ အဒုဋ္ဌုလ္လာယ ဒုဋ္ဌုလ္လသညိဝေမတိကအဒုဋ္ဌုလ္လသညီနံ ဝသေန ဒုက္ကဋတ္တယံ ပါဠိယံ (ပါစိ။ ၄၀၀) ဒဿိတန္တိ အတ္ထော။ သဗ္ဗတ္ထာတိ သဗ္ဗေသု။ အနုပသမ္ပန္နဝါရေသူတိ တီသု အနုပသမ္ပန္နဝိကပ္ပေသု။ ဒုက္ကဋန္တိ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တိကဒုက္ကဋန္တိ အတ္ထော။

၁၆၇၉-၈၀။ ‘‘သင်္ဃဿ ဘေဒနာဒီနိ ဘဝိဿန္တီ’’တိအာဒီဟိ သဗ္ဗေဟိ ပဒေဟိ ‘‘န အာရောစေတိ စေ၊ ဒေါသော နတ္ထီ’’တိ ဣဒံ ပစ္စေကံ ယောဇေတဗ္ဗံ။ သဘာဂံ ဝါ န ပဿတီတိ တထာ အပဿန္တော န အာရောစေတိ စေ၊ ဒေါသော နတ္ထိ။ ကက္ခဠော အယန္တိ န အာရောစေတိ စေ၊ ဒေါသော နတ္ထိ။

၁၆၈၁။ အညဿ အနာရောစနေန အာပဇ္ဇိတဗ္ဗတော ‘‘အကြိယ’’န္တိ ဝုတ္တံ။ ‘‘အာရောစေတဗ္ဗ’’န္တိ အနုညာတဿ အနာရောစနံ အနာဒရမန္တရေန န ဟောတီတိ အာဟ ‘‘ဒုက္ခဝေဒန’’န္တိ။ ဧတ္ထ စ မာတိကဋ္ဌကထာယံ ‘‘သမနုဘာသနသဒိသာနေဝါ’’တိ (ကင်္ခါ။ အဋ္ဌ။ ဒုဋ္ဌလ္လသိက္ခာပဒဝဏ္ဏနာ) ဝုတ္တံ၊ ဣဓ ‘‘ဓုရနိက္ခေပတုလျာဝါ’’တိ၊ ဥဘယတ္ထ နာမမတ္တမေဝ ဝိသေသော၊ ဧကမေဝ သမုဋ္ဌာနန္တိ ဝေဒိတဗ္ဗံ။

ဒုဋ္ဌုလ္လကထာဝဏ္ဏနာ။

၁၆၈၂။ ဦနဝီသတိဝဿန္တိ ဧတ္ထ ‘‘ဇာန’’န္တိ သေသော၊ ‘‘ဦနဝီသတိဝဿော’’တိ ဇာနန္တောတိ အတ္ထော။ ဦနဝီသတိဝဿော နာမ ပဋိသန္ဓိတော ပဋ္ဌာယ အပရိပုဏ္ဏဝီသတိသံဝစ္ဆရော။ ယောတိ ယော ဘိက္ခု ဥပဇ္ဈာယော ဟုတွာ။ ကရေယျာတိ ကာရာပေယျ။ ဥပသမ္ပဇ္ဇတီတိ ဥပသမ္ပဒေါ၊ တံ။ ယော ဇာနံ ဦနဝီသတိဝဿံ ပုဂ္ဂလံ ဥပသမ္ပဒံ ဥပသမ္ပန္နံ ကရေယျ၊ တဿ ဧဝံ ဥပသမ္ပာဒေန္တဿ ဘိက္ခုနော ပါစိတ္တိယံ ဟောတီတိ ယောဇနာ။ သေသာနန္တိ ‘‘ဂဏဿ စ အာစရိယဿ စ အာပတ္တိ ဒုက္ကဋဿာ’’တိ (ပါစိ။ ၄၀၄) ပါဠိယံ ဒဿိတာနံ ဂဟဏံ။

၁၆၈၃။ ဦနဝီသတိဝဿဘာဝံ ဇာနတာ ဝါ အဇာနတာ ဝါ ဘိက္ခုနာ ယော ပုဂ္ဂလော စေ ဥပသမ္ပာဒိတော၊ သော အနုပသမ္ပန္နောဝ ဟောတိ၊ ပုန သော ပရိပုဏ္ဏဝီသတိဝဿော သမာနော ဥပသမ္ပန္နော ကာတဗ္ဗော ဥပသမ္ပာဒေတဗ္ဗောယေဝါတိ ယောဇနာ။

၁၆၈၄။ ဒသဝဿစ္စယေန ပရိပုဏ္ဏဒသဝဿော ဟုတွာ ဥပဇ္ဈာယဿ သတော အဿ ဘိက္ခုပဋိညဿ အညေသံ ဥပသမ္ပာဒနေ ကောစိ ဒေါသော စေ ဧကံသေန နတ္ထိ န ဝိဇ္ဇတီတိ ယောဇနာ။

၁၆၈၅။ တံ ဘိက္ခုန္တိ ဦနဝီသတိဝဿော ဟုတွာ ဥပသမ္ပဇ္ဇိတွာ ပရိပုဏ္ဏဒသဝဿော ဥပဇ္ဈာယော ဟုတွာ ဥပသမ္ပာဒေန္တံ တံ ဘိက္ခုပဋိညံ။ ဂဏော စေ ပရိပူရတီတိ မဇ္ဈိမဒေသေ ဒသဝဂ္ဂေါ၊ ပစ္စန္တိမေသု ဇနပဒေသု ပဉ္စဝဂ္ဂေါ ဂဏော သစေ အနူနော ဟောတိ။ တေတိ ဥပသမ္ပာဒိတာ။ သူပသမ္ပန္နာတိ သုဋ္ဌု ဥပသမ္ပန္နာ။

၁၆၈၆-၇။ ယော ဘိက္ခု ဥပဇ္ဈာယော ဟုတွာ ‘‘ဦနဝီသတိဝဿပုဂ္ဂလံ ဥပသမ္ပာဒယိဿာမိ’’ဣတိ ဂဏမ္ပိ ဝါ အာစရိယမ္ပိ ဝါ ပတ္တမ္ပိ ဝါ ပရိယေသတိ၊ မာဠကဉ္စ သမ္မန္နတိ ဗဒ္ဓသီမံ ဗန္ဓတိ၊ တဿ သဗ္ဗေသု ပယောဂေသု ဒုက္ကဋံ။ တထာ ဉတ္တိယာ ဒုက္ကဋံ။ တထာ ဒွီသု ကမ္မဝါစာသုပိ ဒုက္ကဋန္တိ ယောဇနာ။

၁၆၈၈-၉။ ဝီသတိ စ တာနိ ဝဿာနိ စာတိ ဝီသတိဝဿာနိ၊ ဦနာနိ ဝီသတိဝဿာနိ ယဿ သော ဦနဝီသတိဝဿော၊ ဦနဝီသတိဝဿောတိ သညာ ဦနဝီသတိဝဿသညာ၊ သာ ဧတဿ အတ္ထီတိ ‘‘ဦနဝီသတိဝဿသညီ’’ဣတိ ဝတ္တဗ္ဗေ နိပါတနလက္ခဏေန ဝဿ-သဒ္ဒလောပံ ကတွာ ‘‘ဦနဝီသတိသညီ’’တိ ဝုတ္တံ၊ တဿ ဦနဝီသတိသညိဿ။ ပရိပုဏ္ဏာနိ ဝီသတိဝဿာနိ ဧတဿာတိ ‘‘ပရိပုဏ္ဏဝီသတိဝဿော’’တိ ဝတ္တဗ္ဗေ နိပါတနလက္ခဏေန ဝီသတိဝဿ-သဒ္ဒလောပံ ကတွာ ‘‘ပရိပုဏ္ဏော’’တိ ပုဂ္ဂလော ဝုစ္စတိ၊ တသ္မိံ ပရိပုဏ္ဏေ၊ ပရိပုဏ္ဏဝီသတိဝဿေ ပုဂ္ဂလေတိ အတ္ထော။ ဥဘယတ္ထာတိ ဦနဝီသတိပရိပုဏ္ဏဝီသတိဝဿေသု ဥဘောသု ပုဂ္ဂလေသု။

ဦနဝီသတိဝဿကထာဝဏ္ဏနာ။

၁၆၉၁။ ထေယျသတ္ထေနသဒ္ဓိန္တိ ‘‘ထေယျသတ္ထော နာမ စောရာ ကတကမ္မာ ဝါ ဟောန္တိ အကတကမ္မာ ဝါ’’တိအာဒိနာ (ပါစိ။ ၄၀၉) ပဒဘာဇနေ ဝုတ္တသရူပေန သတ္ထသင်္ခါတေန ဇနသမူဟေန သဟာတိ ဝုတ္တံ ဟောတိ။ သဟာဒိယောဂေ ကရဏဝစနံ။ ဇာနန္တောတိ ‘‘ထေယျသတ္ထော’’တိ ဇာနန္တော။ သံဝိဓာယာတိ ‘‘ဂစ္ဆာမာဝုသော၊ ဂစ္ဆာမ ဘန္တေ၊ ဂစ္ဆာမာဝုသော၊ အဇ္ဇ ဝါ ဟိယျော ဝါ ပရေ ဝါ အပရေ ဝါ ဂစ္ဆာမာ’’တိ ပဒဘာဇနေ ဝုတ္တနယေန သံဝိဒဟိတွာတိ အတ္ထော။ မဂ္ဂန္တိ ဧကဒ္ဓါနမဂ္ဂံ၊ ဧတ္ထ ‘‘အန္တမသော ဂါမန္တရမ္ပီ’’တိ သေသော။ ယထာဟ ‘‘ဧကဒ္ဓါနမဂ္ဂံ ပဋိပဇ္ဇေယျ အန္တမသော ဂါမန္တရမ္ပီ’’တိ။ ပါစိတ္တိယံ သိယာတိ ‘‘ဂါမေ ဂါမန္တရေ ဂါမန္တရေ အာပတ္တိ ပါစိတ္တိယဿ။ အဂါမကေ အရညေ အဒ္ဓယောဇနေ အဒ္ဓယောဇနေ အာပတ္တိ ပါစိတ္တိယဿာ’’တိ ဝုတ္တပ္ပကာရံ ပါစိတ္တိယံ ဘဝေယျ။

၁၆၉၂။ န ဥဒ္ဓဋောတိ ဣဓ န ဝုတ္တော။

၁၆၉၃-၄။ မဂ္ဂါဋဝိဝိသင်္ကေတေတိ မဂ္ဂဝိသင်္ကေတေ၊ အဋဝိဝိသင်္ကေတေ စ။ ယထာဝတ္ထုကမေဝါတိ ပါစိတ္တိယမေဝ။ တေသူတိ သတ္ထိကေသု။ အသံဝိဒဟန္တေသူတိ သံဝိဓာနံ အကရောန္တေသု။ သယံ ဝိဒဟတောပိ စာတိ အတ္တနာ သံဝိဒဟန္တဿ စ။ ဥဘယတ္ထာတိ ထေယျသတ္ထေ ဝါ အထေယျသတ္ထေ ဝါတိ ဒွီသု။

၁၆၉၅။ အထေယျသတ္ထသညိဿာတိ ဧတ္ထ ‘‘ဥဘယတ္ထာ’’တိ အနုဝတ္တေတဗ္ဗံ။ ကာလဿာယန္တိ ကာလိကော၊ ဝိသင်္ကေတော၊ တသ္မိံ၊ ကာလသမ္ဗန္ဓိနိ ဝိသင်္ကေတေ စ အနာပတ္တီတိ အတ္ထော။ ‘‘ကာလိကေ’’တိ ဣမိနာ ဝိသင်္ကေတဝိသေသနေန မဂ္ဂါဋဝိဝိသင်္ကေတေပိ အာပတ္တိယေဝါတိ ဒီပေတိ။

၁၆၉၆။ ကာယစိတ္တတော ၊ ကာယဝါစာစိတ္တတော စ သမုဋ္ဌာနတော ဣဒံ သိက္ခာပဒံ ထေယျသတ္ထသမုဋ္ဌာနံ ကထိတန္တိ ယောဇနာ။

ထေယျသတ္ထကထာဝဏ္ဏနာ။

၁၆၉၇။ သတ္တမန္တိ ‘‘ယော ပန ဘိက္ခု မာတုဂါမေန သဒ္ဓိံ သံဝိဓာယာ’’တိအာဒိနာ (ပါစိ။ ၄၁၃) ဥဒ္ဒိဋ္ဌံ သတ္တမသိက္ခာပဒံ။ ဘိက္ခုနိယာ သဒ္ဓိံ သံဝိဓာနေနာတိ ဘိက္ခုနိယာ သဒ္ဓိံ သံဝိဓာနသိက္ခာပဒေန။ သမုဋ္ဌာနာဒိနာတိ သမုဋ္ဌာနာဒိနာ ဝိနိစ္ဆယေန။ တုလျန္တိ သဒိသံ။ ကောစိပီတိ အပ္ပမတ္တကောပိ။

သံဝိဓာနကထာဝဏ္ဏနာ။

၁၆၉၈။ ဧတေ ပဉ္စ ဓမ္မာ အန္တရာယကရာတိ ပကာသိတာတိ ယောဇနာ။ ဣဓ အယံ အန္တရာယကရ-သဒ္ဒေါ ပါဠိယံ အာဂတေန အန္တရာယိက-သဒ္ဒေန သမာနတ္ထော။ တသ္မာ ကမ္မန္တရာယိကာ၊ ကိလေသန္တရာယိကာ၊ ဝိပါကန္တရာယိကာ၊ ဥပဝါဒန္တရာယိကာ၊ အာဏာဝီတိက္ကမန္တရာယိကာတိ ဣမေ ပဉ္စ အန္တရာယိကာ ဓမ္မာ ဘဂဝတာ ပကာသိတာတိ ဝုတ္တံ ဟောတိ။

တတ္ထ တံတံသမ္ပတ္တိယာ ဝိဗန္ဓနဝသေန သတ္တသန္တာနဿ အန္တရေ ဝေမဇ္ဈေ ဧတိ အာဂစ္ဆတီတိ အန္တရာယော၊ ဒိဋ္ဌဓမ္မိကာဒိအနတ္ထော၊ အနတိက္ကမနဋ္ဌေန တသ္မိံ အန္တရာယေ နိယုတ္တာ၊ အန္တရာယံ ဝါ ဖလံ အရဟန္တိ၊ အန္တရာယဿ ဝါ ကရဏသီလာတိ အန္တရာယိကာ (သာရတ္ထ။ ဋီ။ ပါစိတ္တိယ ၃။၄၁၇၊ ကင်္ခါ။ အဘိ။ ဋီ။ အရိဋ္ဌသိက္ခာပဒဝဏ္ဏနာ)။

ပဉ္စာနန္တရိယကမ္မာနေဝ ကမ္မန္တရာယိကာ၊ တထာ ဘိက္ခုနိဒူသကကမ္မံ။ တံ ပန မောက္ခဿေဝ အန္တရာယံ ကရောတိ၊ န သဂ္ဂဿ။ ဣဒဉ္စ မိစ္ဆာစာရလက္ခဏဿ အဘာဝတော ဝုတ္တံ။ န ဟိ ဘိက္ခုနိယာ ဓမ္မရက္ခိတဘာဝေါ အတ္ထိ။ ပါကတိကဘိက္ခုနိဝသေန စေတံ ဝုတ္တံ။ အရိယာယ ပန ပဝတ္တံ အပါယသံဝတ္တနိကမေဝ။ နန္ဒမာဏဝကော (မ။ နိ။ အဋ္ဌ။ ၃။၇၊ ဓ။ ပ။ အဋ္ဌ။ ၁။၆၈ ဥပ္ပလဝဏ္ဏတ္ထေရီဝတ္ထု၊ အ။ နိ။ အဋ္ဌ။ ၂။၃။၃၄) စေတ္ထ နိဒဿနံ။ ဥဘိန္နံ သမာနစ္ဆန္ဒတာဝသေန ဝါ န သဂ္ဂန္တရာယိကတာ၊ မောက္ခန္တရာယိကတာ ပန မောက္ခတ္ထာယ ပဋိပတ္တိယာ ဝိဒူသနတော။ အဘိဘဝိတွာ ပန ပဝတ္တိယာ သဂ္ဂန္တရာယိကတာပိ န သက္ကာ နိဝါရေတုန္တိ ဝဒန္တိ။

အဟေတုကဒိဋ္ဌိအကိရိယဒိဋ္ဌိနတ္ထိကဒိဋ္ဌိသင်္ခါတာ မိစ္ဆာဒိဋ္ဌိဓမ္မာ နိယတဘာဝပ္ပတ္တာ ကိလေသန္တရာယိကာ နာမ။ ပဏ္ဍကတိရစ္ဆာနဂတဥဘတောဗျဉ္ဇနကာနံ ပဋိသန္ဓိစိတ္တုပ္ပာဒဓမ္မာ ဝိပါကန္တရာယိကာ နာမ။ ပဏ္ဍကာဒိဂ္ဂဟဏဉ္စေတ္ထ နိဒဿနမတ္တံ သဗ္ဗာယပိ အဟေတုကပဋိသန္ဓိယာ ဝိပါကန္တရာယိကဘာဝတော ။ အရိယူပဝါဒါ ဥပဝါဒန္တရာယိကာ နာမ။ တေ ပန ယာဝ အရိယေ န ခမာပေန္တိ၊ တာဝဒေဝ၊ န တတော ပရံ။ သဉ္စိစ္စ အာပန္နာ သတ္တာပတ္တိက္ခန္ဓာ အာဏာဝီတိက္ကမန္တရာယိကာ နာမ။ တေပိ ယာဝ ဘိက္ခုဘာဝံ ဝါ ပဋိဇာနာတိ၊ န ဝုဋ္ဌာတိ ဝါ န ဒေသေတိ ဝါ၊ တာဝဒေဝ၊ န တတော ပရံ။

၁၆၉၉-၇၀၀။

‘‘အနန္တရာယိကာ ဧတေ၊

ယထာ ဟောန္တိ တထာ အဟံ၊

ဒေသိတံ မုနိနာ ဓမ္မံ၊

အာဇာနာမီတိ ယော ဝဒေ’’တိ။ –

ဧဝံ ဒုတိယဂါထာ ဝတ္တဗ္ဗာ။ တထာ အဝုတ္တေ ‘‘တိက္ခတ္တု’’န္တိအာဒိဂါထာ ပဌမဂါထာယ သဒ္ဓိံ ဃဋနာ ဧဝ န သိယာ။ တသ္မာ ဧတ္ထာယံ ဂါထာ ပရိဟီနာတိ ဝိညာယတိ။

ဧတေတိ ‘‘အန္တရာယိကာ’’တိ ဘဂဝတာ ပကာသိတာ ပဉ္စ ဓမ္မာ ‘‘ယထာ အနန္တရာယိကာ ဟောန္တိ၊ တထာ အဟံ မုနိနာ ဒေသိတံ ဓမ္မံ အာဇာနာမီ’’တိ ယော ဘိက္ခု ဝဒေယျ၊ သော ပန ဘိက္ခု တိက္ခတ္တုံ ဝတ္တဗ္ဗောတိ သမ္ဗန္ဓော။ ကေဟိ ကထံ ဝတ္တဗ္ဗောတိ အာဟ ‘‘ယေ ပဿန္တီ’’တိအာဒိ။ ယေ တထာဝါဒိတံ ဘိက္ခုံ ပဿန္တိ၊ ‘‘အသုကော အာယသ္မာ ဧဝံဝါဒီ’’တိ ပရတော သုဏန္တိ စ၊ တေဟိ။ သော ပန ဘိက္ခု ‘‘မာ အာယသ္မာ ဧဝံ အဝစာ’’တိ တိက္ခတ္တုံ ဝတ္တဗ္ဗောတိ ယောဇနာ။

၁၇၀၁။ အဝဒန္တဿာတိ တံ ဒိသွာ ဝါ သုတွာ ဝါ ယထာဝုတ္တနယေန အဝဒန္တဿ။ ဒုက္ကဋန္တိ ဉာတဒုက္ကဋံ။ တံ ဒုလဒ္ဓိံ။ အနိဿဇတောတိ ဘိက္ခူဟိ ဧဝံ ဝုတ္တေပိ အနိဿဇန္တဿ။ တထာ ဒုက္ကဋန္တိ အတိဒိသတိ။

၁၇၀၂။ ကမ္မဝါစာယာတိ တတိယာယ ကမ္မဝါစာယ။ ဩသာနေတိ ပရိယောသာနေ၊ ယျကာရေ ပတ္တေတိ အဓိပ္ပာယော။ တိကပါစိတ္တိယံ ဝုတ္တန္တိ ‘‘ဓမ္မကမ္မေ ဓမ္မကမ္မသညီ န ပဋိနိဿဇ္ဇတိ၊ အာပတ္တိ ပါစိတ္တိယဿ။ ဓမ္မကမ္မေ ဝေမတိကော န ပဋိနိဿဇ္ဇတိ၊ အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညီ န ပဋိနိဿဇ္ဇတိ၊ အာပတ္တိ ပါစိတ္တိယဿာ’’တိ (ပါစိ။ ၄၂၁) တိကပါစိတ္တိယံ ဝုတ္တံ။ အဓမ္မေ တိကဒုက္ကဋံ ဝုတ္တန္တိ အဓမ္မကမ္မေ ဓမ္မကမ္မသညိဝေမတိကအဓမ္မကမ္မသညီနံ ဝသေန တိကဒုက္ကဋံ ဝုတ္တံ။

၁၇၀၃။ ‘‘အနာပတ္တိ အကတကမ္မဿာ’’တိ ပဒစ္ဆေဒေါ။ ကမ္မံ နာမ သမနုဘာသနကမ္မံ။ ယထာဟ ‘‘အနာပတ္တိ အသမနုဘာသန္တဿာ’’တိ (ပါစိ။ ၄၂၂)။

အရိဋ္ဌကထာဝဏ္ဏနာ။

၁၇၀၄။ ဉတွာတိ အနောသာရိတဘာဝံ သယမေဝ ဝါ ပရတော ဝါ တဿ ဝါ သန္တိကာ ဉတွာ။ အကတာနုဓမ္မေနာတိ အကတော ဩသာရဏသင်္ခါတော အနုဓမ္မော ယဿ သော အကတာနုဓမ္မော၊ တေန၊ သဟယောဂေ ကရဏဝစနံ။ တထာဝါဒိကဘိက္ခုနာတိ ‘‘တထာဟံ ဘဂဝတာ ဓမ္မံ ဒေသိတံ အာဇာနာမီ’’တိအာဒိံ ဝဒန္တေန ဘိက္ခုနာ။ ‘‘အကတာနုဓမ္မေနာ’’တိ ဣမိနာ သမာနာဓိကရဏံ။ သံဝသေယျာတိ ဥပေါသထာဒိကံ သင်္ဃကမ္မံ ကရေယျ။ ဘုဉ္ဇေယျ စာတိ အာမိသသမ္ဘောဂံ ဝါ ဓမ္မသမ္ဘောဂံ ဝါ ကရေယျ။ သဟ သေယျ ဝါတိ နာနူပစာရေပိ ဧကစ္ဆန္နေ နိပဇ္ဇေယျ။

၁၇၀၅။ ဣဒါနိ ယထာဝုတ္တပါစိတ္တိယဿ ခေတ္တနိယမံ ဒဿေတုမာဟ ‘‘ဥပေါသထာဒိကံ ကမ္မ’’န္တိအာဒိ။ အာဒိ-သဒ္ဒေန ပဝါရဏံ ဂဟိတံ။ ယထာဟ ‘‘ဥပေါသထံ ဝါ ပဝါရဏံ ဝါ’’တိ (ပါစိ။ ၄၂၅)။ တေန သဟာတိ ဥက္ခိတ္တကေန သဟ။ ‘‘ကမ္မဿ ပရိယောသာနေ’’တိ ဣဒံ သံဝါသေန အာပတ္တိခေတ္တနိဒဿနံ။

၁၇၀၆။ ဧကေနေဝ ပယောဂေန ဗဟုံ ယာမကာလိကာဒိအာမိသံ ဂဏှတော ဧကံ ပါစိတ္တိယံ။ တထာ ဧကေနေဝ ပယောဂေန ဗဟုံ အာမိသံ ဒဒတောပိ ဧကံ ပါစိတ္တိယံ။ ဗဟူသု ပယောဂေသု ဗဟူနိ ပါစိတ္တိယာနီတိ ယောဇနာ။ ဣမိနာ စ အာမိသသမ္ဘောဂေန တုလျဖလံ ဓမ္မသမ္ဘောဂမ္ပိ သဟစရိယေန အာဟာတိ ဝေဒိတဗ္ဗံ။ တတ္ထ ပန ပဒါဒီဟိ ဥဒ္ဒိသန္တဿ ဝါ ဥဒ္ဒိသာပေန္တဿ ဝါ ပဒသောဓမ္မေ ဝုတ္တနယေန အာပတ္တိ ဝေဒိတဗ္ဗာ။

၁၇၀၇။ ဣတရောတိ ပကတတ္တော။ ဣတရသ္မိန္တိ ဥက္ခိတ္တကေ။ ပရောတိ ပကတတ္တော။ ဥဘောပိ ဝါတိ ပကတတ္တဥက္ခိတ္တာ ဒွေပိ ဝါ။ ‘‘ဧကတ္ထ ဧကတော နိပဇ္ဇန္တီ’’တိ သေသော။ ဣမေသု တီသုပိ ဌာနေသု ‘‘ပါစိတ္တီ’’တိ ပကရဏတော လဗ္ဘတိ။

၁၇၀၈။ ဥဋ္ဌဟိတွာ ပုနပ္ပုနံ နိပဇ္ဇန္တဿ နိပဇ္ဇနပယောဂါနံ ဝသေန အာပတ္တိယော သိယုန္တိ အဇ္ဈာဟာရယောဇနာ ကာတဗ္ဗာ။ ‘‘ဥက္ခိတ္တကေ နိပန္နသ္မိ’’န္တိအာဒိနာ ဝုတ္တာပတ္တိဝိနိစ္ဆယော ကတ္ထ ဟောတီတိ အာဟ ‘‘ဧကနာနူပစာရေသု၊ ဧကစ္ဆန္နေ ဝိနိစ္ဆယော’’တိ။ နာနူပစာရေသူတိ ဧတ္ထ ပိ-သဒ္ဒေါ စ ‘‘ဝိနိစ္ဆယော’’တိ ဧတ္ထ အယန္တိ စ ယောဇေတဗ္ဗော။ ဧကော ဥပစာရော အဿာတိ ဧကူပစာရံ၊ နာနာ ဥပစာရော အဿာတိ နာနူပစာရံ၊ ဧကူပစာရဉ္စ နာနူပစာရဉ္စ ဧကနာနူပစာရာနိ ဧကဒေသသရူပေကသေသေန၊ တေသု။ ဧကတော ဆန္နာနိ ဧကစ္ဆန္နာနိ၊ တေသု ဧကစ္ဆန္နေသူတိ ဝတ္တဗ္ဗေ ဝဏ္ဏလောပေန ဝါ ဝစနဝိပလ္လာသေန ဝါ ‘‘ဧကစ္ဆန္နေ’’တိ ဝုတ္တံ။ ဧကနာနူပစာရေသုပိ သေနာသနေသု ဧကစ္ဆန္နေသု အယံ ယထာဝုတ္တအာပတ္တိဝိနိစ္ဆယော ဒဋ္ဌဗ္ဗောတိ အတ္ထော။

၁၇၀၉။ ဥဘယတ္ထာပီတိ ဥက္ခိတ္တာနုက္ခိတ္တေသု ဒွီသုပိ။

၁၇၁၀။ ‘‘သညိဿ ဩသာရိတောတိ စာ’’တိ ပဒစ္ဆေဒေါ။

ဥက္ခိတ္တကထာဝဏ္ဏနာ။

၁၇၁၂။ တထာ ဝိနာသိတန္တိ ‘‘အဇ္ဇတဂ္ဂေ တေ အာဝုသော သမဏုဒ္ဒေသ န စေဝ သော ဘဂဝါ သတ္ထာ အပဒိသိတဗ္ဗော၊ ယမ္ပိ စညေ သမဏုဒ္ဒေသာ လဘန္တိ ဘိက္ခူဟိ သဒ္ဓိံ ဒိရတ္တတိရတ္တံ သဟသေယျံ၊ သာပိ တေ နတ္ထိ၊ စရ ပိရေ ဝိနဿာ’’တိ (ပါစိ။ ၄၂၉) ဝုတ္တနယေန နာသိတံ။ ‘‘တထာ နာသိတံ သမဏုဒ္ဒေသ’’န္တိ (ပါစိ။ ၄၂၈) ဝစနတော ‘‘သမဏုဒ္ဒေသ’’န္တိ သေသော။ ဇာနန္တိ ဝုတ္တနယေန ‘‘နာသိတော အယ’’န္တိ ဇာနန္တော။ ဥပလာပေယျာတိ ‘‘ဥပလာပေယျ ဝါတိ တဿ ပတ္တံ ဝါ စီဝရံ ဝါ ဥဒ္ဒေသံ ဝါ ပရိပုစ္ဆံ ဝါ ဒဿာမီ’’တိ (ပါစိ။ ၄၃၀) ပဒဘာဇနေ အာဂတနယေန သင်္ဂဏှေယျ။ တေနာတိ နာသိတေန။ ဥပဋ္ဌာပေယျ ဝါတိ တေန ဒိယျမာနာနိ စုဏ္ဏမတ္တိကာဒီနိ သာဒိယန္တော တေန အတ္တနော ဥပဋ္ဌာနံ ကာရာပေယျ ဝါ။ ‘‘တေနာ’’တိ ဣဒံ သဟတ္ထေ ကရဏဝသေန ‘‘သမ္ဘုဉ္ဇေယျာ’’တိအာဒီဟိ စ ယောဇေတဗ္ဗံ။ ဝါတိ ဧတ္ထ ဂါထာဗန္ဓဝသေန ရဿော။ သမ္ဘောဂသဟသေယျာ အနန္တရသိက္ခာပဒေ ဝုတ္တနယာ ဧဝ။ တသ္မာ အာပတ္တိပရိစ္ဆေဒေါပေတ္ထ တသ္မိံ ဝုတ္တနယေနေဝ ဝေဒိတဗ္ဗော။

၁၇၁၃။ အတ္ထုဒ္ဓါရဝသေန အဋ္ဌကထာယံ (ပါစိ။ အဋ္ဌ။ ၄၂၈) ဝုတ္တာ တိဿော နာသနာ ဒဿေတုမာဟ ‘‘သံဝါသေန…ပေ… တိဿော’’တိ။ တတ္ထ တီသု ကတမာ အဓိပ္ပေတာတိ အာဟ ‘‘ဧတ္ထာ’’တိအာဒိ။ ဒဏ္ဍကမ္မေန နာသနာ ဧတ္ထ အဓိပ္ပေတာတိ ယောဇနာ။ ဧတာသံ ဝိဘာဂေါ စ ‘‘တတ္ထ အာပတ္တိယာ အဒဿနာဒီသု ဥက္ခေပနာ သံဝါသနာသနာ နာမ။ ‘ဒူသကော နာသေတဗ္ဗော၊ မေတ္တိယံ ဘိက္ခုနိံ နာသေထာ’တိ အယံ လိင်္ဂနာသနာ နာမ။ ‘အဇ္ဇတဂ္ဂေ တေ အာဝုသော သမဏုဒ္ဒေသ န စေဝ သော ဘဂဝါ သတ္ထာ အပဒိသိတဗ္ဗော’တိ အယံ ဒဏ္ဍကမ္မနာသနာ နာမာ’’တိ (ပါစိ။ အဋ္ဌ။ ၄၂၈) အဋ္ဌကထာယ ဝုတ္တော။

၁၇၁၅။ ‘‘ဝုတ္တာ သမနုဘာသနေ’’တိ (ဝိ။ ဝိ။ ၁၇၀၃) တတ္ထ ဝုတ္တတ္တာ အာဟ ‘‘အရိဋ္ဌေန သမာ မတာ’’တိ။

ကဏ္ဋကကထာဝဏ္ဏနာ။

သပ္ပာဏကဝဂ္ဂေါ သတ္တမော။

၁၇၁၆-၇။ ယော ဘိက္ခု သိက္ခာပဒံ ဝီတိက္ကမန္တော တံ ဝီတိက္ကမံ ယေ ပဿန္တိ၊ သုဏန္တိ စ၊ တေဟိ ဘိက္ခူဟိ သိက္ခာပဒေန ဝုစ္စမာနော ‘‘မာဝုသော ဧဝံ အကာသိ၊ န ကပ္ပတိ ဧတံ ဘိက္ခုဿာ’’တိ သိက္ခာပဒေ ဝုတ္တနယေန ဝုစ္စမာနော ‘‘ဧတသ္မိံ သိက္ခာပဒေ ယေန မံ တုမှေ ဝဒေထ၊ ဧတသ္မိံ သိက္ခာပဒတ္ထေ ယာဝ အညံ ဝိယတ္တံ ဗဟုဿုတံ ပကတညုံ ဝိနယဓရံ န ပုစ္ဆာမိ၊ တာဝ အဟံ န သိက္ခိဿာမီ’’တိ ဘဏတိ၊ တဿ ဧဝံ ဘဏန္တဿ ပါစိတ္တိယံ သိယာတိ သာဓိပ္ပာယယောဇနာ။

၁၇၁၈-၉။ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန အနုပသမ္ပန္နေ သတ္ထုနာ တိကဒုက္ကဋံ ဒီပိတန္တိ ယောဇနာ၊ ဣမိနာ စ ဥပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန ဥပသမ္ပန္နေ တိကပါစိတ္တိယံ ဒီပိတံ ဟောတိ။ အပညတ္တေန ဩဝဒနပ္ပကာရံ ဒဿေတုမာဟ ‘‘န သလ္လေခါယိဒံ ဟောတီ’’တိ။ ဥဘောဟိပိ ဥပသမ္ပန္နာနုပသမ္ပန္နေဟိ ။ ‘‘ဣဒံ သလ္လေခါယ န ဟောတီ’’တိ အပညတ္တေန ဝုစ္စမာနဿ ‘‘န တာဝါဟ’’န္တိအာဒီနိ ဝဒတော တဿ ဘိက္ခုနော ဒုက္ကဋံ ဟောတီတိ ယောဇနာ။ ‘‘န ဒေါသော ဥမ္မတ္တကာဒီန’’န္တိ ပဒစ္ဆေဒေါ။

သဟဓမ္မိကကထာဝဏ္ဏနာ။

၁၇၂၀။ ‘‘ယော ပန ဘိက္ခု ပါတိမောက္ခေ ဥဒ္ဒိဿမာနေ ဧဝံ ဝဒေယျာ’’တိအာဒိသိက္ခာပဒပါဌတော (ပါစိ။ ၄၃၉) ဥဒ္ဒိဋ္ဌေဟီတိ ဧတ္ထ ‘‘ခုဒ္ဒါနုခုဒ္ဒကေဟိ သိက္ခာပဒေဟီ’’တိ သေသော။ ပါရာဇိကံ ဌပေတွာ အဝသေသာ ဥပါဒါယုပါဒါယ ခုဒ္ဒါနုခုဒ္ဒကာတိ နိဒ္ဒိဋ္ဌာ။ ဧတ္ထ ကိန္တိ ပဋိက္ခေပေ၊ ဧတေဟိ ကိံ၊ ပယောဇနံ နတ္ထီတိ ဝုတ္တံ ဟောတိ။ ဧတေဟီတိ သမီပတ္ထေ ဝစနသာမညေန ‘‘ဣမေဟီ’’တိ ဧတဿ ပရိယာယော။ ‘‘ကိံ ပနိမေဟီ’’တိ (ပါစိ။ ၄၃၉) သိက္ခာပဒပါဌေ ပဋိက္ခေပဿ ကာရဏံ ဒဿေတိ ‘‘ကုက္ကုစ္စာဒိနိဒါနတော’’တိ။ ဧတ္ထ အာဒိ-သဒ္ဒေန ဝိဟေသာဝိလေခါ ဂဟိတာ။ ဧတ္ထ ကုက္ကုစ္စံ နာမ ‘‘ကပ္ပတိ နု ခေါ၊ န ကပ္ပတိ နု ခေါ’’တိ ကုက္ကုစ္စကရဏံ။ ဝိဟေသာ နာမ ဝိပ္ပဋိသာရော။ ဝိလေခါ နာမ ဝိစိကိစ္ဆာသင်္ခါတာ မနောဝိလေခတာ မနောဝိလေခါ၊ ဣမေဟိ သကလေဟိ ပဒေဟိ သိက္ခာပဒဝိဝဏ္ဏကပ္ပကာရော ဒဿိတော။ ‘‘ဣတိ သိက္ခာပဒဝိဝဏ္ဏနေ’’တိ ဣတိ-သဒ္ဒေါ အဇ္ဈာဟရိတွာ ယောဇေတဗ္ဗော။ ဝိဝဏ္ဏနေတိ နိမိတ္တတ္ထေ ဘုမ္မံ။

ကုက္ကုစ္စာဒိနိဒါနတော ဧတေဟိ ခုဒ္ဒါနုခုဒ္ဒကေဟိ သိက္ခာပဒေဟိ ဥဒ္ဒိဋ္ဌေဟိ ကိံ ဣတိ သိက္ခာပဒဝိဝဏ္ဏနေ ပါစိတ္တိယာပတ္တိ ဟောတီတိ ယောဇနာ။

၁၇၂၁။ တိကပါစိတ္တိယံ ဝုတ္တန္တိ ‘‘ဥပသမ္ပန္နေ ဥပသမ္ပန္နသညီ ဝိနယံ ဝိဝဏ္ဏေတိ၊ အာပတ္တိ ပါစိတ္တိယဿ။ ဥပသမ္ပန္နေ ဝေမတိကော…ပေ… အနုပသမ္ပန္နသညီ…ပေ… ပါစိတ္တိယဿာ’’တိ (ပါစိ။ ၄၄၁) တီဏိ ပါစိတ္တိယာနိ ဝုတ္တာနိ။ တံ ဝိနယံ သစေ ပန အနုပသမ္ပန္နဿ သန္တိကေ ဝိဝဏ္ဏေတိ၊ တိကဒုက္ကဋန္တိ ယောဇနာ။

၁၇၂၂-၄။ ဥဘိန္နမ္ပီတိ ဥပသမ္ပန္နာနံ၊ အနုပသမ္ပန္နာနံ ဥဘိန္နမ္ပိ၊ ‘‘သန္တိကေ’’တိ သေသော။ အညဓမ္မဝိဝဏ္ဏနေတိ ဝိနယတော အညေသံ သုတ္တာဘိဓမ္မာနံ ဝိဝဏ္ဏနေ။

အနာပတ္တိဝိသယံ ဒဿေတုမာဟ ‘‘နဝိဝဏ္ဏေတုကာမဿာ’’တိအာဒိ။ နဝိဝဏ္ဏေတုကာမဿ ‘‘ဟန္ဒ သုတ္တန္တံ ပရိယာပုဏ၊ ပစ္ဆာပိ ဝိနယံ ပရိယာပုဏိဿသိ’’ ဣတိ ဧဝံ ဝဒန္တဿ အနာပတ္တီတိ ယောဇနာ။ သဒိသာ ဧဝ သာဒိသာ။

ဝိလေခနကထာဝဏ္ဏနာ။

၁၇၂၅။ မောဟနကထာယံ တာဝ –

‘‘အနွဍ္ဎမာသံ ယော ဘိက္ခု၊

ပါတိမောက္ခေ အသေသတော၊

ဥဒ္ဒိဿမာနေ အညာဏ-

တာယ ပုစ္ဆတိ အတ္တနော’’တိ။ –

ပဌမဂါထာယ ဘဝိတဗ္ဗံ။ ဧဝဉှိ သတိ ‘‘အညာဏေနာ’’တိအာဒိဂါထာ ပရိပုဏ္ဏသမ္ဗန္ဓာ သိယာတိ ဝိညာယတိ။

အညာဏေနာတိ ဧတ္ထ ဝါ ‘‘အာပန္နတ္တာ’’တိ သေသော။ အာပတ္တိမောက္ခောတိ အာပတ္တိယာ မောက္ခော။ အညာဏေန အာပန္နတ္တာ အာပတ္တိမောက္ခော နေဝ ဝိဇ္ဇတီတိ ယောဇနာ။ ကိံ ကာတဗ္ဗန္တိ အာဟ ‘‘ကာရေတဗ္ဗော’’တိအာဒိ။ ယထာ ဓမ္မော ဌိတော၊ တထာ ဘိက္ခု ကာရေတဗ္ဗောတိ သမ္ဗန္ဓော။ ဓမ္မ-သဒ္ဒေါ ပါဠိဝါစကော၊ ပါဠိယံ ယထာ ဝုတ္တံ၊ တထာ ကာရေတဗ္ဗောတိ အတ္ထော၊ ဒေသနာဂါမိနီ အာပတ္တိ စေ၊ ဒေသာပေတဗ္ဗော၊ ဝုဋ္ဌာနဂါမိနီ စေ၊ ဝုဋ္ဌာပေတဗ္ဗောတိ ဝုတ္တံ ဟောတိ။ ယထာဟ ‘‘ယထာဓမ္မော ကာရေတဗ္ဗော’’တိ (ပါစိ။ ၄၄၄)။ အညာဏေန အာပန္နတ္တာ တဿ အာပတ္တိယာ မောက္ခော နတ္ထိ။ ယထာ ပန ဓမ္မော စ ဝိနယော စ ဌိတော၊ တထာ ဘိက္ခု ကာရေတဗ္ဗော၊ ဒေသနာဂါမိနိံ စေ အာပန္နော ဟောတိ၊ ဒေသာပေတဗ္ဗော၊ ဝုဋ္ဌာနဂါမိနိံ စေ၊ ဝုဋ္ဌာပေတဗ္ဗောတိ အတ္ထော။

၁၇၂၆။ ဥတ္တရိန္တိ ယထာဓမ္မကရဏတော ဥတ္တရိံ။ ဒုတိယေနေဝါတိ ဉတ္တိဒုတိယေနေဝ။ နိန္ဒိတွာတိ ‘‘တဿ တေ အာဝုသော အလာဘာ’’တိအာဒိနာ ဂရဟိတွာ။

၁၇၂၇။ ဧဝံအာရောပိတေ မောဟေတိ ယထာဓမ္မကရဏတော ဥပရိ ယထာဝုတ္တနယေန တံ ပုဂ္ဂလံ ဂရဟိတွာ ဉတ္တိဒုတိယာယ ကမ္မဝါစာယ တဿ ဧဝံ မောဟေ အာရောပိတေ။ ပုန ယဒိ မောဟေတီတိ ယောဇနာ။ တသ္မိံ မောဟနကေ ပုဂ္ဂလေ ပါစိတ္တိ ဝုတ္တာတိ ယောဇနာ။

၁၇၂၈။ ဒီပိတံ တိကဒုက္ကဋန္တိ ‘‘အဓမ္မကမ္မေ ဓမ္မကမ္မသညီ မောဟေတိ၊ ဝေမတိကော၊ အဓမ္မကမ္မသညီ မောဟေတိ၊ အာပတ္တိ ဒုက္ကဋဿာ’’တိ (ပါစိ။ ၄၄၇) တိကဒုက္ကဋံ ဒဿိတံ။ ဧတဿ ဝိပရိယာယတော တိကပါစိတ္တိယံ ဝေဒိတဗ္ဗံ။ ယထာဟ ‘‘ဓမ္မကမ္မေ ဓမ္မကမ္မသညီ မောဟေတိ၊ ဝေမတိကော၊ အဓမ္မကမ္မသညီ မောဟေတိ၊ အာပတ္တိ ပါစိတ္တိယဿာ’’တိ (ပါစိ။ ၄၄၇)။ ဧတ္ထ ကမ္မန္တိ မောဟာရောပနကမ္မံ အဓိပ္ပေတံ။ ယထာဟ ‘‘ဓမ္မကမ္မေတိအာဒီသု မောဟာရောပနကမ္မံ အဓိပ္ပေတ’’န္တိ (ပါစိ။ အဋ္ဌ။ ၄၄၇)။

၁၇၂၉-၃၀။ ‘‘န စ မောဟေတုကာမဿာ’’တိအာဒီဟိ ‘‘အနာပတ္တီတိ ဝိညေယျ’’န္တိ ဣဒံ ပစ္စေကံ ယောဇေတဗ္ဗံ။ ‘‘ဝိတ္ထာရေန အသုတဿာ’’တိ ပဒစ္ဆေဒေါ။ ဧတ္ထ ‘‘ပါတိမောက္ခ’’န္တိ ကမ္မပဒံ အပေက္ခိတဗ္ဗံ။ ဝိတ္ထာရေန ဦနကဒွတ္တိက္ခတ္တုံ သုတဿ စာတိ ယောဇနာ။ တထာတိ ဣမိနာ ‘‘အနာပတ္တီတိ ဝိညေယျ’’န္တိ ဣဒံ ပစ္စာမသတိ။

မောဟနကထာဝဏ္ဏနာ။

၁၇၃၁-၂။ ကုဒ္ဓါတိ ကုပိတော။ ပဟာရံ ဒေတီတိ ကာယေန ဝါ ကာယပဋိဗဒ္ဓေန ဝါ နိဿဂ္ဂိယေန ဝါ အန္တမသော ဥပ္ပလပတ္တေနာပိ ပဟာရံ ဒေတိ။ ယထာဟ ‘‘ပဟာရံ ဒဒေယျာတိ ကာယေန ဝါ ကာယပဋိဗဒ္ဓေန ဝါ နိဿဂ္ဂိယေန ဝါ အန္တမသော ဥပ္ပလပတ္တေနာပိ ပဟာရံ ဒေတီ’’တိ (ပါစိ။ ၄၅၁)။ ဧတ္ထ ‘‘အညဿ ဘိက္ခုဿာ’’တိ သေသော။ တဿာတိ အပေက္ခိတွာ ‘‘ယော’’တိ လဗ္ဘတိ။

အဋ္ဌကထာဂတံ ဝိနိစ္ဆယံ ဒဿေတုမာဟ ‘‘သမ္ပဟရိတုကာမေနာ’’တိအာဒိ၊ ဣမိနာ မရဏာဓိပ္ပာယေန ပဟဋေ ပါရာဇိကန္တိ ဝုတ္တံ ဟောတိ။

၁၇၃၃။ ‘‘ဣတိ ဧဝံ ကတေ အယံ သင်္ဃမဇ္ဈေန ဝိရောစတီ’’တိ ဝိရူပကရဏာပေက္ခော ဝိရူပကရဏေ အပေက္ခဝါ တဿ စ အပေက္ခိတဿ ဘိက္ခုဿ ကဏ္ဏံ ဝါ နာသံ ဝါ ယဒိ ဆိန္ဒတိ၊ ဒုက္ကဋန္တိ ယောဇနာ။

၁၇၃၄။ အနုပသမ္ပန္နေတိ သာမိဝစနတ္ထေ ဘုမ္မံ။ ‘‘ဣတ္ထိယာ’’တိအာဒီဟိ ပဒေဟိ ယထာရဟံ ယောဇေတဗ္ဗံ ‘‘အနုပသမ္ပန္နာယ ဣတ္ထိယာ အနုပသမ္ပန္နဿ ပုရိသဿာ’’တိ။ တိရစ္ဆာနဂတဿပီတိ ဧတ္ထ ‘‘အန္တမသော’’တိ သေသော။ ယထာဟ ‘‘အန္တမသော တိရစ္ဆာနဂတဿပီ’’တိ (ပါစိ။ အဋ္ဌ။ ၄၅၂)။

၁၇၃၅။ ‘‘သစေ ပဟရတိ ဣတ္ထိဉ္စာ’’တိ ပဒစ္ဆေဒေါ။ ရတ္တေန စေတသာတိ ကာယသံသဂ္ဂရာဂေန ရတ္တေန စိတ္တေန။ ဝိနိဒ္ဒိဋ္ဌာတိ ‘‘ယော ပန ဘိက္ခု ဩတိဏ္ဏော ဝိပရိဏတေန စိတ္တေန မာတုဂါမေန သဒ္ဓိံ ကာယသံသဂ္ဂံ သမာပဇ္ဇေယျာ’’တိအာဒိနာ (ပါရာ။ ၂၇၀) ဒဿိတာ။

၁၇၃၆။ မောက္ခာဓိပ္ပာယောတိ တတော အတ္တနော မောက္ခံ ပတ္ထေန္တော။ ဒေါသော န ဝိဇ္ဇတီတိ ဒုက္ကဋာဒိကောပိ ဒေါသော နတ္ထိ။

၁၇၃၇-၉။ ဟေဌေတုကာမမာယန္တံ စောရမ္ပိ ဝါ ပစ္စတ္ထိကမ္ပိ ဝါ အန္တရာမဂ္ဂေ ပဿိတွာတိ ယောဇနာ။ ဒိသွာ ကထံ ပဋိပဇ္ဇိတဗ္ဗန္တိ အာဟ ‘‘မာ ဣဓာဂစ္ဆုပါသကာ’’တိအာဒိ၊ အာဂမနပဋိက္ခေပေန တတ္ထေဝ တိဋ္ဌာတိ ဝုတ္တံ ဟောတိ။ အာယန္တန္တိ ဧဝံ ဝုတ္တေ တံ အနာဒိယိတွာ အာဂစ္ဆန္တံ။ ယထာဟ ‘‘ဝစနံ အနာဒိယိတွာ အာဂစ္ဆန္တ’’န္တိ (ပါစိ။ အဋ္ဌ။ ၄၅၃)။

ဧသေဝ နယောတိ ‘‘မာ အာဂစ္ဆာ’တိ ဝုတ္တေပိ အာဂစ္ဆန္တံ ပဟဋေ မတေပိ အနာပတ္တီ’’တိ အယံ နယော။

၁၇၄၀။ တိကပါစိတ္တိယံ ဝုတ္တန္တိ ‘‘ဥပသမ္ပန္နေ ဥပသမ္ပန္နသညီ၊ ဝေမတိကော၊ အနုပသမ္ပန္နသညီ ပဟာရံ ဒေတိ၊ အာပတ္တိ ပါစိတ္တိယဿာ’’တိ (ပါစိ။ ၄၅၂) တိကပါစိတ္တိယံ ဝုတ္တံ။ သေသေတိ အနုပသမ္ပန္နေ။ တိကဒုက္ကဋန္တိ ‘‘အနုပသမ္ပန္နေ ဥပသမ္ပန္နသညီ၊ ဝေမတိကော ၊ အနုပသမ္ပန္နသညီ ပဟာရံ ဒေတိ၊ အာပတ္တိ ဒုက္ကဋဿာ’’တိ (ပါစိ။ ၄၅၂) တိကဒုက္ကဋံ ဝုတ္တံ။ အနာဏတ္တိကတ္တာ အာဟ ‘‘ကာယစိတ္တသမုဋ္ဌာန’’န္တိ။ ကာယစိတ္တာနံ သုခေါပေက္ခာပိ သမ္ဘဝန္တီတိ တတော ဝိသေသေတုမာဟ ‘‘ဒုက္ခဝေဒန’’န္တိ။

ပဟာရကထာဝဏ္ဏနာ။

၁၇၄၁။ ကာယန္တိ ကာယေကဒေသံ ဟတ္ထာဒိအဝယဝမာဟ။ ဝါတိ ဒုတိယတ္ထသမ္ပိဏ္ဍနေ။ ကာယဗဒ္ဓန္တိ ကာယပဋိဗဒ္ဓံ ပဟရဏယောဂ္ဂါယောဂ္ဂေသု ကတ္တရယဋ္ဌိသတ္ထာဒီသု အညတရံ။ သစေ ဥစ္စာရေယျာတိ သစေ ပဟရဏာကာရံ ဒဿေတွာ ဥက္ခိပေယျ၊ ဣဒံ ‘‘ကာယံ ဝါ ကာယပဋိဗဒ္ဓံ ဝါ’’တိ ဣမေဟိ ပဒေဟိ ပစ္စေကံ ယောဇေတဗ္ဗံ။ တဿာတိ ဥစ္စာရိတကာယာဒိကဿ။ ဥဂ္ဂိရဏပစ္စယာတိ ဥက္ခိပနကာရဏာ။

၁၇၄၂။ အသမ္ပဟရိတုကာမေနာတိ ပဟာရဒါနံ အနိစ္ဆန္တေန။ ဒိန္နတ္တာတိ ပဟာရဿ ဒိန္နတ္တာ။ အပ္ပဟရိတုကာမတ္တာ ပုရိမသိက္ခာပဒေန ပါစိတ္တိယံ န ဟောတိ၊ ဥဂ္ဂိရိတုကာမတာယ ကတပယောဂဿ ဥဂ္ဂိရဏမတ္တေ အဋ္ဌတွာ ပဟာရဿ ဒိန္နတ္တာ ဣမိနာပိ ပါစိတ္တိယံ န ဟောတိ၊ အဇ္ဈာသယဿ၊ ပယောဂဿ စ အသုဒ္ဓတ္တာ အနာပတ္တိယာပိ န ဘဝိတဗ္ဗန္တိ ဒုက္ကဋံ ဝုတ္တံ။

၁၇၄၃။ သစေ တေန ပဟာရေန ဘိက္ခုနော ဟတ္ထာဒီသုပိ ယံ ကိဉ္စိ အင်္ဂံ ဘိဇ္ဇတိ၊ ပဟဋဿ ပဟာရဒါယကဿ ဒုက္ကဋန္တိ သမ္ဗန္ဓော။

၁၇၄၄။ သေသော ဝိနိစ္ဆယော ‘‘မောက္ခာဓိပ္ပာယော’’တိအာဒိကော ဣဓ အဝုတ္တော ဝိနိစ္ဆယော သမုဋ္ဌာနာဒိနာ သဒ္ဓိံ အနန္တရေ ဝုတ္တနယေန ဝိနယညုနာ ဝေဒိတဗ္ဗောတိ ယောဇနာ။ ‘‘တိရစ္ဆာနာဒီနံ ဝစ္စကရဏာဒိံ ဒိသွာန ပလာပေတုကာမတာယ ကုဇ္ဈိတွာပိ ဥဂ္ဂိရန္တဿ မောက္ခာဓိပ္ပာယော ဧဝါ’’တိ ဝဒန္တိ။

တလသတ္တိကထာဝဏ္ဏနာ။

၁၇၄၅။ အမူလကေနာတိ ဒိဋ္ဌာဒိမူလဝိရဟိတေန၊ ဧတ္ထ ‘‘ဘိက္ခု’’န္တိ သေသော။ သင်္ဃာဒိသေသေနာတိ တေရသန္နံ အညတရေန။ တဿာတိ စောဒကဿ၊ စောဒါပကဿ ဝါ ပါပဘိက္ခုနော။ သစေ စုဒိတကော တသ္မိံ ခဏေ ‘‘ဧသ မံ စောဒေတီ’’တိ ဇာနာတိ၊ ပါစိတ္တိယံ သိယာတိ ယောဇနာ၊ ဣမိနာ ‘‘သစေ ဧဝံ န ဇာနာတိ၊ စိရေန ဝါ ဇာနာတိ၊ ဒုက္ကဋံ ဟောတီ’’တိ သိဒ္ဓံ။

၁၇၄၆။ တတ္ထာတိ ဥပသမ္ပန္နေ။ တိကပါစိတ္တိယန္တိ ‘‘ဥပသမ္ပန္နေ ဥပသမ္ပန္နသညီ အမူလကေန သင်္ဃာဒိသေသေန အနုဒ္ဓံသေတိ၊ အာပတ္တိ ပါစိတ္တိယဿ။ ဝေမတိကော…ပေ… အနုပသမ္ပန္နသညီ အမူလကေန သင်္ဃာဒိသေသေန အနုဒ္ဓံသေတိ၊ အာပတ္တိ ပါစိတ္တိယဿာ’’တိ (ပါစိ။ ၄၆၂) တိကပါစိတ္တိယံ ။ ဒိဋ္ဌာစာရဝိပတ္တိယာ စောဒကော ဒုက္ကဋာပတ္တီတိ အမူလိကာယ ဒိဋ္ဌိဝိပတ္တိယာ ဝါ အာစာရဝိပတ္တိယာ ဝါ အနုဒ္ဓံသေန္တဿ ဒုက္ကဋာပတ္တိ ဟောတီတိ အတ္ထော။ သေသေ စာတိ အနုပသမ္ပန္နေ။ တိကဒုက္ကဋန္တိ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တီဏိ ဒုက္ကဋာနိ ဟောန္တီတိ အတ္ထော။

၁၇၄၇။ ‘‘တထာသညိဿ အနာပတ္တီ’’တိ ပဒစ္ဆေဒေါ။ တထာသညိဿာတိ သမူလကသညိဿ။

အမူလကကထာဝဏ္ဏနာ။

၁၇၄၈-၉။ သဉ္စိစ္စာတိ တဿ ပရိပုဏ္ဏဝီသတိဝဿာဒိဘာဝံ ဇာနန္တောယေဝ။ ဘိက္ခုနောတိ ဧတ္ထ ‘‘အညဿာ’’တိ သေသော ။ ဦနဝီသတိဝဿော တွံ မညေတိ ဧတ္ထ ‘‘မညေ’’တိ ဣမိနာ ပရိကပ္ပတ္ထဝါစိနာ နိပါတေန ‘‘ဥဒကံ မညေ အာဒိတ္တ’’န္တိအာဒီသု (ပါရာ။ ၃၈၃) ဝိယ မုသာဝါဒါပတ္တိယာ အဝိသယတံ ဒီပေတိ။ ဟိတေသိတာယ အနုသိဋ္ဌိဒါနာဒိကေ တထာရူပေ အညသ္မိံ ပစ္စယေ ကာရဏေ အသတိ ‘‘ဦနဝီသတိဝဿော တွံ မညေ’’ ဣတိ ဧဝမာဒိနာ အညဿ ဘိက္ခုနော ယော ဘိက္ခု သစေ သဉ္စိစ္စ ကုက္ကုစ္စံ ဥပ္ပာဒေယျ၊ တဿ ဧဝံ ကုက္ကုစ္စံ ဥပ္ပာဒေန္တဿ ဘိက္ခုနော ဝါစာယ ဝါစာယ ပါစိတ္တိ ဟောတီတိ ယောဇနာ။

၁၇၅၀။ တိကပါစိတ္တိယံ ဝုတ္တန္တိ ‘‘ဥပသမ္ပန္နေ ဥပသမ္ပန္နသညီ သဉ္စိစ္စ ကုက္ကုစ္စံ ဥပဒဟတိ၊ အာပတ္တိ ပါစိတ္တိယဿ။ ဝေမတိကော…ပေ… အနုပသမ္ပန္နသညီ သဉ္စိစ္စ ကုက္ကုစ္စံ ဥပဒဟတိ၊ အာပတ္တိ ပါစိတ္တိယဿာ’’တိ (ပါစိ။ ၄၆၇) တိကပါစိတ္တိယံ ဝုတ္တံ။ သေသေ စာတိ အနုပသမ္ပန္နေ စ။ တိကဒုက္ကဋန္တိ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန တိကဒုက္ကဋံ။ ဝဇ္ဇမေဝ ဝဇ္ဇတာ။

၁၇၅၁။ ဟိတေသိတာယ ဘာသတောတိ သမ္ဗန္ဓော။ မာ ဧဝန္တိ ဧတ္ထ ‘‘ကရောဟီ’’တိ သေသော၊ ပုနပိ မာ ဧဝံ ကရောဟီတိ အတ္ထော။ ‘‘အဟံ တံ ဣတ္ထိယာ သဟ နိသိန္နံ မညေ၊ တယာ ဝိကာလေ ဘုတ္တံ မညေ၊ ပုန မာ ဧဝံ ကရောဟိ’’ ဣတိ ဟိတေသိတာယ ဘာသတော အနာပတ္တိ ပကာသိတာတိ ယောဇနာ။

သဉ္စိစ္စကထာဝဏ္ဏနာ။

၁၇၅၃။ ဘဏ္ဍနံ နာမ ကလဟော၊ ဘဏ္ဍနံ ဇာတံ ယေသန္တိ ဝိဂ္ဂဟော၊ ဇာတဘဏ္ဍနာနန္တိ အတ္ထော၊ ‘‘ဝစန’’န္တိ သေသော။ သောတုံ ဥပဿုတိံ တိဋ္ဌေယျာတိ ယောဇနာ။ ဥပေစ္စ သုယျတိ ဧတ္ထာတိ ဟိ ဥပဿုတိ၊ ဌာနံ၊ ယံ ဌာနံ ဥပဂတေန သက္ကာ ဟောတိ ကထေန္တာနံ သဒ္ဒံ သောတုံ၊ တတ္ထာတိ အတ္ထော။ ယော ပန ဘိက္ခု ဘဏ္ဍနဇာတာနံ ဘိက္ခူနံ ဝစနံ သောတုံ ဥပဿုတိံ သစေ တိဋ္ဌေယျ၊ တဿ ပါစိတ္တိယံ သိယာတိ ယောဇနာ။

၁၇၅၄။ စောဒေတုကာမတာယ ဂစ္ဆတော အဿာတိ ယောဇနာ။

၁၇၅၅။ သောတုန္တိ ပစ္ဆတော ဂစ္ဆန္တာနံ ဘဏ္ဍနဇာတာနံ ဝစနံ သောတုံ။ ဩဟီယန္တဿာတိ ပကတိဂမနံ ဟာပေတွာ ဩသက္ကန္တဿ။ ပုရတော ဂစ္ဆတော ဘိက္ခုဿ ဒုက္ကဋန္တိ ယောဇနာ။ ဂစ္ဆတော တုရိတံ ဝါပီတိ ပုရတော ဂစ္ဆန္တာနံ ဘဏ္ဍနဇာတာနံ ဝစနံ သောတုံ ပစ္ဆတော သီဃံ ဂစ္ဆန္တဿာပိ။ အယမေဝ ဝိနိစ္ဆယောတိ ပဒေ ပဒေ အယံ ဧဝ ဝိနိစ္ဆယော။

၁၇၅၆။ အတ္တနော ဌိတောကာသန္တိ သမ္ဗန္ဓော။ ဥက္ကာသိတွာပိ ဝါတိ ဥက္ကာသိတသဒ္ဒံ ကတွာ ဝါ။ ဧတ္ထ အဟန္တိ ဝါ ဝတွာ ဉာပေတဗ္ဗန္တိ ယောဇနာ။

၁၇၅၇။ တိကပါစိတ္တိယံ ဝုတ္တံ ဥပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန။ သေသေ စာတိ အနုပသမ္ပန္နေ။ တိကဒုက္ကဋံ အနုပသမ္ပန္နေ ဥပသမ္ပန္နသညိဝေမတိကအနုပသမ္ပန္နသညီနံ ဝသေန။

၁၇၅၈။ ဩရမိဿန္တိ မယာ ဂဟိတဒုဂ္ဂါဟတော ဝိရမိဿာမိ။

၁၇၅၉။ ကာယစိတ္တတော စ ကာယဝါစာစိတ္တတော စ သမုဋ္ဌာနတော ထေယျသတ္ထသမုဋ္ဌာနံ။ သိယာ ကိရိယံ သောတုကာမတာယ ဂမနဝသေန၊ သိယာ အကိရိယံ ဌိတဋ္ဌာနံ အာဂန္တွာ မန္တယမာနံ အဇာနာပနဝသေန၊ တေနာဟ ‘‘ဣဒံ ဟောတိ ကြိယာကြိယ’’န္တိ။ ဂမနေန သိဇ္ဈနတော ကာယကမ္မံ။ တုဏှီဘာဝေန သိဇ္ဈနတော ဝစီကမ္မံ။ သဒေါသန္တိ သာဝဇ္ဇံ၊ အကုသလစိတ္တန္တိ ဝုတ္တံ ဟောတိ။

ဥပဿုတိကထာဝဏ္ဏနာ။

၁၇၆၀။ ဓမ္မိကာနန္တိ ဓမ္မေန ဝိနယေန သတ္ထုသာသနေန ကတာနံ။ ကမ္မာနန္တိ အပလောကနကမ္မံ၊ ဉတ္တိကမ္မံ၊ ဉတ္တိဒုတိယကမ္မံ၊ ဉတ္တိစတုတ္ထကမ္မန္တိ ဣမေသံ စတုန္နံ ကမ္မာနံ။ ခီယတီတိ အရုစိံ ပကာသေတိ။

၁၇၆၁။ ဥဘယတ္ထာတိ အဓမ္မေ၊ ဓမ္မေ စ။

၁၇၆၂။ အဓမ္မေနာတိ ဧတ္ထ ‘‘ကမ္မေနာ’’တိ သေသော၊ ဓမ္မဝိရုဒ္ဓေန ကမ္မေနာတိ အတ္ထော။ ‘‘ကမ္မသ္မိ’’န္တိ ဣဒံ ဝိဘတ္တိံ ဝိပရိဏာမေတွာ ‘‘ကမ္မေနာ’’တိ အနုဝတ္တေတဗ္ဗံ။ ဝဂ္ဂေနာတိ ‘‘ဆန္ဒာရဟာနံ ဆန္ဒော အာဟဋော ဟောတိ၊ သမ္မုခီဘူတာ န ပဋိက္ကောသန္တီ’’တိ (မဟာဝ။ ၃၈၇) ဝုတ္တသာမဂ္ဂိလက္ခဏဿ ဝိရုဒ္ဓတ္တာ အသမဂ္ဂေန၊ ဧတ္ထ ‘‘သင်္ဃေနာ’’တိ သေသော။ ‘‘တထာ အကမ္မာရဟဿာ’’တိ ပဒစ္ဆေဒေါ။ ‘‘အဓမ္မေန ကမ္မေန ဣမေ ကမ္မံ ကရောန္တီ’’တိ စ ‘‘အသမဂ္ဂေန သင်္ဃေန ဣမေ ကမ္မံ ကရောန္တီ’’တိ စ ‘‘အဓမ္မေန ကမ္မေန ဝဂ္ဂေန သင်္ဃေန ဣမေ ကမ္မံ ကရောန္တီ’’တိ စ တထာ ‘‘အကမ္မာရဟဿ ဣမေ ကမ္မံ ကရောန္တီ’’တိ စ ဉတွာ ယော ခီယတိ၊ တဿ စ အနာပတ္တိ ပကာသိတာတိ ယောဇနာ။

ကမ္မပဋိဗာဟနကထာဝဏ္ဏနာ။

၁၇၆၄-၅။ အာရောစိတံ ဝတ္ထု ယာဝ န ဝိနိစ္ဆိတံ ဝါတိ ယောဇနာ၊ ‘‘စောဒကေန စ စုဒိတကေန စ အတ္တနော ကထာ ကထိတာ၊ အနုဝိဇ္ဇကော သမ္မတော၊ ဧတ္တာဝတာပိ ဝတ္ထုမေဝ အာရောစိတံ ဟောတီ’’တိ (ပါစိ။ အဋ္ဌ။ ၄၈၁) အဋ္ဌကထာယ ဝုတ္တတ္တာ အာရောစိတံ ဝတ္ထု ယာဝ န ဝိနိစ္ဆိတံ ဟောတီတိ အတ္ထော။ ဉတ္တိ ဝါ ဌပိတာ ၊ ကမ္မဝါစာ နိဋ္ဌံ ယာဝ န ဂစ္ဆတိ၊ ဧတသ္မိံ…ပေ…ဟောတိ အာပတ္တိ ဒုက္ကဋန္တိ ယောဇနာ။

၁၇၆၆။ ဆန္ဒံ အဒတွာ ဟတ္ထပါသေ ဇဟိတေ တဿ ပါစိတ္တိယံ သိယာတိ ယောဇနာ။

၁၇၆၇-၉။ အဓမ္မေပိ ကမ္မသ္မိံ ဓမ္မကမ္မန္တိ သညိနော ဒုက္ကဋန္တိ ယောဇနာ။ ဓမ္မကမ္မေ စ အဓမ္မကမ္မသညိနော အနာပတ္တိ ဣဓ န ဝုတ္တာ၊ ပါဠိယံ ပန ဝုတ္တတ္တာ ဣဓာပိ ယောဇေတဗ္ဗာ။ ‘‘သင်္ဃဿ ဘဏ္ဍနာဒီနိ ဘဝိဿန္တီ’’တိ သညိနော ဂစ္ဆတော စ ယော ဝါ ဂိလာနော ဟောတိ၊ တဿ ဂစ္ဆတော စ ဂိလာနဿ ကရဏီယေ သတိ ဂစ္ဆတော စ ကမ္မံ နကောပေတုကာမဿ ဂစ္ဆတော စ ပဿာဝနာဒိနာ ပီဠိတဿ ဂစ္ဆတော စ ‘‘အာဂမိဿာမိ’’ဣတိ ဧဝံ ဂစ္ဆတောပိ န ဒေါသတာတိ ယောဇနာ။ တတ္ထ ဒေါသော ဧဝ ဒေါသတာ၊ အာပတ္တိ၊ နဒေါသတာ အနာပတ္တိ။ ဟတ္ထပါသံ ဝိဇဟိတွာ ဂမနေန၊ ဆန္ဒဿ အဒါနေန စ အာပဇ္ဇနတော ကြိယာကြိယံ။

ဆန္ဒံအဒတွာဂမနကထာဝဏ္ဏနာ။

၁၇၇၀-၁။ သမဂ္ဂေန သင်္ဃေန သဒ္ဓိန္တိ သမာနသံဝါသကေန သမာနသီမာယံ ဌိတေန သင်္ဃေန သဒ္ဓိံ။ ဝုတ္တဉှိ ‘‘သမဂ္ဂေါ နာမ သင်္ဃော သမာနသံဝါသကော သမာနသီမာယံ ဌိတော’’တိ (ပါစိ။ ၄၈၆)။ စီဝရန္တိ ဝိကပ္ပနုပဂမာဟ။ ယထာဟ ‘‘စီဝရံ နာမ ဆန္နံ စီဝရာနံ အညတရံ စီဝရံ ဝိကပ္ပနုပဂံ ပစ္ဆိမ’’န္တိ (ပါစိ။ ၄၈၆)။ သမ္မတဿာတိ သေနာသနပညာပကာဒိသမ္မုတိံ ပတ္တေသု အညတရဿ။ ခီယတီတိ ‘‘ယော ယော မိတ္တော၊ တဿ တဿ ဒေန္တီ’’တိအာဒိနာ နယေန အဝဏ္ဏံ ဘဏတိ။

ဓမ္မကမ္မေ ဓမ္မကမ္မသညိဝေမတိကအဓမ္မကမ္မသညီနံ ဝသေန တိကပါစိတ္တိယံ ဝုတ္တံ။

၁၇၇၂-၄။ သင်္ဃေနာသမ္မတဿာပိ စီဝရံ၊ အညမေဝ ဝါ တထေဝ သမဂ္ဂေန သင်္ဃေန ဒတွာ ခီယတိ၊ တဿ ဒုက္ကဋန္တိ ယောဇနာ။ အနုပသမ္ပန္နေ တထေဝ သမဂ္ဂေန သင်္ဃေန ဒိန္နေ သဗ္ဗတ္ထ စီဝရေ၊ အညပရိက္ခာရေ စ ဒုက္ကဋန္တိ ယောဇနာ။ အနုပသမ္ပန္နေတိ သမ္ပဒါနတ္ထေ ဘုမ္မံ၊ အနုပသမ္ပန္နဿာတိ အတ္ထော။

သဘာဝတော ဆန္ဒာဒီနံ ဝသေနေဝ ကရောန္တံ ခီယန္တဿ စ အနာပတ္တီတိ ယောဇနာ။ နယာ ဝိနိစ္ဆယက္ကမာ။

ဒုဗ္ဗလကထာဝဏ္ဏနာ။

၁၇၇၅။ ဣဒံ ဒွါဒသမန္တိ သမ္ဗန္ဓော၊ ‘‘ယော ပန ဘိက္ခု ဇာနံ သင်္ဃိကံ လာဘံ ပရိဏတံ ပုဂ္ဂလဿ ပရိဏာမေယျ၊ ပါစိတ္တိယ’’န္တိ (ပါစိ။ ၄၉၀) ဣမံ ဒွါဒသမံ သိက္ခာပဒန္တိ အတ္ထော။ တိံသကကဏ္ဍသ္မိံ နိဿဂ္ဂိယကဏ္ဍေ။ အန္တိမေနာတိ ဧတ္ထ ‘‘သိက္ခာပဒေနာ’’တိ ပကရဏတော လဗ္ဘတိ။ စ-သဒ္ဒေါ ဧဝကာရတ္ထော။ ‘‘ယော ပန ဘိက္ခု ဇာနံ သင်္ဃိကံ လာဘံ ပရိဏတံ အတ္တနော ပရိဏာမေယျ၊ နိဿဂ္ဂိယံ ပါစိတ္တိယ’’န္တိ (ပါရာ။ ၆၅၈) ဣမိနာ အန္တိမေနေဝ သိက္ခာပဒေန သဗ္ဗထာ သဗ္ဗံ ဝတ္တဗ္ဗံ တုလျန္တိ ယောဇနာ။ အယမေဝ ဝိသေသတာတိ ဧတ္ထ ဝိသေသောယေဝ ဝိသေသတာ၊ အယမေဝ ဝိသေသောတိ အတ္ထော။

၁၇၇၆။ တတ္ထာတိ တသ္မိံ နိဿဂ္ဂိယာဝသာနေ သိက္ခာပဒေ။ အတ္တနော ပရိဏာမနာတိ အတ္တနော ပရိဏာမနဟေတု။

ပရိဏာမနကထာဝဏ္ဏနာ။

သဟဓမ္မိကဝဂ္ဂေါ အဋ္ဌမော။

၁၇၇၇-၈။ ယော ပန ဘိက္ခု ဒေဝိယာ ဝါပိ ရညော ဝါပိ အဝိဒိတာဂမနော အပ္ပဋိသံဝိဒိတာဂမနော သယနီယဃရာ ရာဇသ္မိံ အနိက္ခန္တေ၊ ဒေဝိယာ အနိက္ခန္တာယ တဿ သယနီယဃရဿ ဥမ္မာရံ ဣန္ဒခီလံ သစေ အတိက္ကမေယျ၊ တဿ ဘိက္ခုနော ပဌမေ ပါဒေ ဒုက္ကဋံ သိယာ၊ ဒုတိယေ ပါဒေ ပါစိတ္တိယံ သိယာတိ ယောဇနာ။

၁၇၇၉။ ပဋိသံဝိဒိတေတိ အတ္တနော အာဂမနေ နိဝေဒိတေ။ နေဝပဋိသံဝိဒိတသညိနောတိ အနိဝေဒိတသညိနော။ တတ္ထာတိ တသ္မိံ ပဋိသံဝိဒိတာဂမနေ။ ဝေမတိကဿာတိ ‘‘ပဋိသံဝိဒိတံ နု ခေါ၊ န ပဋိသံဝိဒိတံ နု ခေါ’’တိ သံသယမာပန္နဿ။

၁၇၈၀-၁။ နေဝ ခတ္တိယဿ အပ္ပဋိသံဝိဒိတေပိ ဝါ န ခတ္တိယာဘိသေကေန အဘိသိတ္တဿ အပ္ပဋိသံဝိဒိတေပိ ဝါ ပဝိသတော န ဒေါသောတိ ယောဇနာ၊ ဧဝရူပါနံ အနိဝေဒိတေပိ ပဝိသန္တဿ အနာပတ္တီတိ အတ္ထော။

ဥဘောသု ရာဇိနိ စ ဒေဝိယာ စ သယနိဃရတော ဗဟိ နိက္ခန္တေသု ပဝိသတောပိ ဝါ ဥဘိန္နံ အညတရသ္မိံ နိက္ခန္တေ ပဝိသတောပိ ဝါ န ဒေါသောတိ ယောဇနာ။ ကထိနေနာတိ ဧတ္ထ ‘‘သမုဋ္ဌာနာဒိနာ သမ’’န္တိ သေသော၊ ဣဒံ သိက္ခာပဒံ သမုဋ္ဌာနာဒိဝသေန ကထိနသိက္ခာပဒေန သမာနန္တိ ဝုတ္တံ ဟောတိ။ သယနီယဃရပ္ပဝေသော ကြိယံ။ အပ္ပဋိသံဝေဒနံ အကြိယံ။

အန္တေပုရကထာဝဏ္ဏနာ။

၁၇၈၂။ ရဇတံ ၊ ဇာတရူပံ ဝါ အတ္တနော အတ္ထာယ ဥဂ္ဂဏှန္တဿ၊ ဥဂ္ဂဏှာပယတောပိ ဝါ တဿ နိဿဂ္ဂိယာပတ္တီတိ ယောဇနာ။

၁၇၈၃။ ဂဏပုဂ္ဂလသင်္ဃာနံ အတ္ထာယ စေတိယေ နဝကမ္မဿ အတ္ထာယ ဥဂ္ဂဏှာပယတော၊ ဥဂ္ဂဏှတောပိ ဝါ ဒုက္ကဋံ ဟောတီတိ ယောဇနာ။ ဇာတရူပရဇတာနံ သရူပံ နိဿဂ္ဂိယေ ဝုတ္တနယေနေဝ ဝေဒိတဗ္ဗံ။

၁၇၈၄။ မုတ္တာဒိရတနမ္ပိ ဝုတ္တသရူပမေဝ။ သင်္ဃာဒီနမ္ပီတိ ဧတ္ထ အာဒိ-သဒ္ဒေန ဂဏပုဂ္ဂလစေတိယာနံ သင်္ဂဟော။

၁၇၈၅-၆။ ယံ ကိဉ္စိ ဂိဟိသန္တကံ သစေ ကပ္ပိယဝတ္ထု ဝါ ဟောတု၊ အကပ္ပိယဝတ္ထု ဝါပိ ဟောတု၊ မာတုကဏ္ဏပိဠန္ဓနံ တာလပဏ္ဏမ္ပိ ဝါ ဟောတု၊ ဘဏ္ဍာဂါရိကသီသေန ပဋိသာမယတော တဿ ပါစိတ္တိယာပတ္တိ ဟောတီတိ ယောဇနာ။

၁၇၈၇။ န နိဓေတဗ္ဗမေဝါတိ န ပဋိသာမေတဗ္ဗမေဝ။

၁၇၈၈။ ဧသော ဟိ ယသ္မာ ပလိဗောဓော နာမ၊ တသ္မာ ဌပေတုံ ပန ဝဋ္ဋတီတိ ယောဇနာ။

၁၇၈၉။ အနုညာတေ ဌာနေတိ ဧတ္ထ ‘‘ပတိတ’’န္တိ သေသော။ ဧတ္ထ အနုညာတဋ္ဌာနံ နာမ အဇ္ဈာရာမော ဝါ အဇ္ဈာဝသထော ဝါ။ ယထာဟ ‘‘အနုဇာနာမိ ဘိက္ခဝေ ရတနံ ဝါ ရတနသမ္မတံ ဝါ အဇ္ဈာရာမေ ဝါ အဇ္ဈာဝသထေ ဝါ ဥဂ္ဂဟေတွာ ဝါ ဥဂ္ဂဟာပေတွာ ဝါ နိက္ခိပိတုံ ‘ယဿ ဘဝိဿတိ၊ သော ဟရိဿတီ’’တိ (ပါစိ။ ၅၀၄)။ ဧတ္ထ စ အဇ္ဈာရာမော နာမ ပရိက္ခိတ္တဿ အန္တောပရိက္ခေပေါ၊ အပရိက္ခိတ္တဿ ဒွိန္နံ လေဍ္ဍုပါတာနံ အန္တော။ အဇ္ဈာဝသထော နာမ ပရိက္ခိတ္တဿ အန္တောပရိက္ခေပေါ၊ အပရိက္ခိတ္တဿ မုသလပါတဗ္ဘန္တရံ။ ‘‘ဥဂ္ဂဟေတွာ’’တိ ဣဒံ ဥပလက္ခဏံ၊ ဥဂ္ဂဟာပေတွာတိပိ ဝုတ္တံ ဟောတိ။

၁၇၉၀-၁။ အနုညာတေ ပန ဌာနေ ယထာဝုတ္တအဇ္ဈာရာမာဒိကေ ဌာနေ ရတနံ ဝါ ရတနသမ္မတံ ဝါ မနုဿာနံ ဥပဘောဂပရိဘောဂံ ဝါ သယနဘဏ္ဍံ ဝါ ဂဟေတွာ နိက္ခိပန္တဿ၊ ရတနသမ္မတံ ဝိဿာသံ ဂဏှန္တဿ စ တာဝကာလိကမေဝ ဝါ ဂဏှန္တဿ ဥဘယတ္ထ ဥမ္မတ္တကာဒီနဉ္စ န ဒေါသောတိ ယောဇနာ။

သဉ္စရိတ္တသမောဒယန္တိ ဧတ္ထ ‘‘သမုဋ္ဌာနာဒိနာ ဣဒံ သိက္ခာပဒ’’န္တိ ဝတ္တဗ္ဗံ၊ ဣဒံ သိက္ခာပဒံ သမုဋ္ဌာနာဒိနာ သဉ္စရိတ္တသမဇာတိကန္တိ အတ္ထော။

ရတနကထာဝဏ္ဏနာ။

၁၇၉၂။ ပုရေတိ ပုဗ္ဗဘာဂေ။

၁၇၉၃-၄။ သန္တန္တိ စာရိတ္တသိက္ခာပဒေ ဝုတ္တသရူပံ။ အနာပုစ္ဆာတိ ‘‘ဝိကာလေ ဂါမပ္ပဝေသနံ အာပုစ္ဆာမီ’’တိ အနာပုစ္ဆိတွာ။ ပစ္စယံ ဝိနာတိ တာဒိသံ အစ္စာယိကံ ကရဏီယံ ဝိနာ။ ပရိက္ခေပေါက္ကမေတိ ပရိက္ခေပဿ အန္တောပဝေသေ။ ဥပစာရောက္ကမေတိ ဧတ္ထာပိ ဧသေဝ နယော။

၁၇၉၅။ အထာတိ ဝါကျန္တရာရမ္ဘေ။

၁၇၉၆။ တတော အညန္တိ ပဌမံ ဝိကာလေ ဂါမပ္ပဝေသနံ အာပုစ္ဆိတွာ တတော ပဝိဋ္ဌဂါမတော အညံ ဂါမံ။ ပုန တတောတိ ဒုတိယဂါမမာဟ။ ကတ္ထစိ ပေါတ္ထကေ ‘‘အာပုစ္ဆနေ ကိစ္စ’’န္တိ ပါဌော ဒိဿတိ၊ ‘‘အာပုစ္ဆနကိစ္စ’’န္တိ ပါဌောယေဝ ပန ယုတ္တတရော။ ယထာအာကင်္ခိတပမာဏံ ဒဿေတုမာဟ ‘‘ဂါမသတေပိ ဝါ’’တိ။

၁၇၉၇။ ပဿမ္ဘေတွာနာတိ ပဋိဝိနောဒေတွာ။ အန္တရာ အညံ ဂါမံ ပဝိသန္တိ စေတိ ယောဇနာ။

၁၇၉၈-၉။ ကုလဃရေ ဝါ အညတ္ထ အာသနသာလာယ ဝါ ဘတ္တကိစ္စံ ကတွာ ယော ဘိက္ခု သပ္ပိဘိက္ခာယ ဝါ တေလဘိက္ခာယ ဝါ သစေ စရိတုကာမော သိယာတိ ယောဇနာ။

ပဿေတိ ပကတိဝစနသဝနာရဟေ အတ္တနော သမီပေ၊ ဧတေနေဝ ဧတ္တကာ ဌာနာ ဒူရီဘူတော အသန္တော နာမ ဟောတီတိ ဗျတိရေကတော လဗ္ဘတီတိ ဒဿေတိ။ အသန္တေတိ အဝိဇ္ဇမာနေ ဝါ ဝုတ္တပ္ပမာဏတော ဒူရီဘူတေ ဝါ။ နတ္ထီတိ ဧတ္ထ ‘‘စိန္တေတွာ’’တိ သေသော။

၁၈၀၂။ အနောက္ကမ္မာတိ အနုပသက္ကိတွာ။ မဂ္ဂါတိ ဂန္တဗ္ဗမဂ္ဂါ။

၁၈၀၃။ တိကပါစိတ္တိယန္တိ ဝိကာလေ ဝိကာလသညိဝေမတိကကာလသညီနံ ဝသေန တိကပါစိတ္တိယံ ဝုတ္တံ။

၁၈၀၄။ အစ္စာယိကေ ကိစ္စေ ဝါပီတိ သပ္ပဒဋ္ဌာဒီနံ ဘေသဇ္ဇပရိယေသနာဒိကေ အစိရာယိတဗ္ဗကိစ္စေ သတိ ဂစ္ဆတော။

၁၈၀၅။ အန္တရာရာမန္တိ ဂါမဗ္ဘန္တရေ သင်္ဃာရာမံ။ ဘိက္ခုနီနံ ဥပဿယန္တိ ဘိက္ခုနိဝိဟာရံ။ တိတ္ထိယာနံ ဥပဿယန္တိ တိတ္ထိယာရာမံ။

၁၈၀၆-၇။ အန္တရာရာမာဒိဂမနေ န ကေဝလံ အနာပုစ္ဆာ ဂစ္ဆတောယေဝ၊ ကာယဗန္ဓနံ အဗန္ဓိတွာ၊ သင်္ဃာဋိံ အပါရုပိတွာ ဂစ္ဆန္တဿာပိ အနာပတ္တိ။

အာပဒါသုပီတိ သီဟော ဝါ ဗျဂ္ဃော ဝါ အာဂစ္ဆတိ၊ မေဃော ဝါ ဥဋ္ဌေတိ၊ အညော ဝါ ကောစိ ဥပဒ္ဒဝေါ ဥပ္ပဇ္ဇတိ၊ ဧဝရူပါသု အာပဒါသုပိ ဗဟိဂါမတော အန္တောဂါမံ ဂစ္ဆတော အနာပတ္တီတိ အတ္ထော။

ဝိကာလဂါမပ္ပဝေသနကထာဝဏ္ဏနာ။

၁၈၀၈။ အဋ္ဌိဒန္တမယံ ဝါပိ ဝိသာဏဇံ ဝါပိ သူစိဃရန္တိ ယောဇနာ။ အဋ္ဌိ နာမ ယံ ကိဉ္စိ အဋ္ဌိ။ ဒန္တောတိ ဟတ္ထိဒန္တော။ ဝိသာဏံ နာမ ယံ ကိဉ္စိ ဝိသာဏံ။

၁၈၀၉။ လာဘေတိ ပဋိလာဘေ။ ဘေဒနကန္တိ ဘေဒနမေဝ ဘေဒနကံ၊ တံ အဿ အတ္ထီတိ ဘေဒနကံ၊ ပဌမံ ဘိန္ဒိတွာ ပစ္ဆာ ဒေသေတဗ္ဗတ္တာ တံ ဘေဒနကံ အဿ ပါစိတ္တိယဿ အတ္ထီတိ ဘေဒနကံ၊ ပါစိတ္တိယံ၊ အဿတ္ထိအတ္ထေ အ-ကာရပစ္စယော။

၁၈၁၀-၁။ ‘‘အနာပတ္တိ အရဏိကေ’’တိ ပဒစ္ဆေဒေါ။ အရဏိကေတိ အရဏိဓနုကေ။ ဝိဓေတိ ကာယဗန္ဓနဿ ဝိဓကေ။ အဉ္ဇနိကာတိ အဉ္ဇနိနာဠိကာ။ ဒကပုဉ္ဆနိယာတိ နဟာတဿ ဂတ္တေ ဥဒကပုဉ္ဆနပေသိကာယ။ ဝါသိဇဋေတိ ဝါသိဒဏ္ဍကေ။

သူစိဃရကထာဝဏ္ဏနာ။

၁၈၁၂-၃။ မဉ္စပီဌသရူပံ ဒုတိယေ ဘူတဂါမဝဂ္ဂေ စတုတ္ထသိက္ခာပဒေ ဝုတ္တမေဝ။ ‘‘သုဂတင်္ဂုလေန အဋ္ဌင်္ဂုလပါဒက’’န္တိ အဋ္ဌင်္ဂုလပါဒကဿ အာဂတတ္တာ ‘‘အဋ္ဌင်္ဂုလပ္ပမာဏေနာ’’တိ ဧတ္ထ ‘‘ပါဒေနာ’’တိ သေသော။

ဟေဋ္ဌိမာဋနိန္တိ အဋနိယာ ဟေဋ္ဌိမတလံ။ အဋနိယာ ဟေဋ္ဌိမံ ဟေဋ္ဌိမာဋနီ၊ တံ ဌပေတွာ၊ အညတြ ဟေဋ္ဌိမာယ အဋနိယာတိ ဝုတ္တံ ဟောတိ။ ဒေသနာပုဗ္ဗဘာဂိယေန မဉ္စပါဒစ္ဆေဒေန သဟ ဝတ္တတီတိ သစ္ဆေဒါ။ တံ ပမာဏံ။ အတိက္ကမတောတိ အတိက္ကာမယတော၊ ဂါထာဗန္ဓဝသေန ယ-ကာရလောပေါ။

၁၈၁၅။ ပမာဏေန ကရောန္တဿာတိ အဋနိယာ ဟေဋ္ဌာ ဝဍ္ဎကိရတနပ္ပမာဏေန ပါဒေန ယောဇေတွာ ကရောန္တဿ၊ ဧတေနေဝ ‘‘ဦနကံ ကရောန္တဿာ’’တိ ဣဒံ ဥပလက္ခိတံ။ တဿာတိ တဿ အပ္ပမာဏိကဿ။ ဆိန္ဒိတွာတိ အဋနိတော ဟေဋ္ဌာ ဝဍ္ဎကိရတနာတိရိတ္တံ ဌာနံ ဆိန္ဒိတွာ။

၁၈၁၆။ ပမာဏတော နိခဏိတွာတိ ဧတ္ထ ‘‘အဓိက’’န္တိ သာမတ္ထိယာ လဗ္ဘတိ၊ ပမာဏတော အဓိကံ ဌာနံ နိခဏိတွာ၊ အန္တောဘူမိံ ပဝေသေတွာတိ ဝုတ္တံ ဟောတိ။ ဥတ္တာနံ ဝါပီတိ ဥဒ္ဓံ ပါဒံ ကတွာ ဘူမိယံ ဝါ ဒါရုဃဋိကာသု ဝါ ဌပေတွာ။ အဋ္ဋံ ဝါ ဗန္ဓိတွာ ပရိဘုဉ္ဇတောတိ ဥက္ခိပိတွာ တုလာသင်္ဃာဋေ ဌပေတွာ အဋ္ဋံ ဗန္ဓိတွာ ပရိဘုဉ္ဇန္တဿ အနာပတ္တိ။

မဉ္စကထာဝဏ္ဏနာ။

၁၈၁၇။ တူလံ ဩနဒ္ဓမေတ္ထာတိ တူလောနဒ္ဓံ၊ တူလံ ပက္ခိပိတွာ ဥပရိ စိမိလိကာယ ဩနဒ္ဓံ၊ ‘‘တူလံ နာမ တီဏိ တူလာနိ ရုက္ခတူလံ လတာတူလံ ပေါဋကိတူလ’’န္တိ (ပါစိ။ ၅၂၈) ဝုတ္တတူလာနံ အညတရံ ပက္ခိပိတွာ ဥပရိ ပိလောတိကာယ သိဗ္ဗိတွာ ကတန္တိ ဝုတ္တံ ဟောတိ။ ပေါဋကိတူလန္တိ ဧရကတူလာဒိ ယံ ကိဉ္စိ တိဏဇာတီနံ တူလံ။ ဥဒ္ဒါလနမေဝ ဥဒ္ဒါလနကံ၊ တံ အဿ အတ္ထီတိ ဥဒ္ဒါလနကန္တိ ဝုတ္တနယမေဝ။ အတိက္ကန္တာ ဤတိ ဥပဒ္ဒဝေါ ယေန သော အနီတိ၊ ဘဂဝါ၊ တေန အနီတိနာ။

၁၈၁၈။ အာယောဂေတိ အာယောဂပတ္တေ။ ဗန္ဓနေတိ ကာယဗန္ဓနေ။ အံသဗဒ္ဓကေတိ အံသဗန္ဓနကေ။ ဗိဗ္ဗောဟနေတိ ဥပဓာနေ။ ထဝိကာတိ ပတ္တထဝိကာ။ ထဝိကာဒီသူတိ အာဒိ-သဒ္ဒေန သိပါဋိကာဒီနံ သင်္ဂဟော။ ထဝိကာဒီသု တူလောနဒ္ဓေသု ပရိဘုတ္တေသု ဘိက္ခုနော အနာပတ္တီတိ ယောဇနာ။

၁၈၁၉။ အညေန စ ကတန္တိ ဧတ္ထ ‘‘မဉ္စံ ဝါ ပီဌံ ဝါ’’တိ ပကရဏတော လဗ္ဘတိ။ ဥဒ္ဒါလေတွာတိ ပိလောတိကံ ဥပ္ပာဋေတွာ တူလံ အပနေတွာ။ နယာတိ သမုဋ္ဌာနာဒယော။

တူလောနဒ္ဓကထာဝဏ္ဏနာ။

၁၈၂၀။ နိသီဒနန္တိ နိသီဒနစီဝရံ။ ပမာဏတောတိ ‘‘တတြိဒံ ပမာဏံ၊ ဒီဃသော ဒွေ ဝိဒတ္ထိယော သုဂတဝိဒတ္ထိယာ၊ တိရိယံ ဒိယဍ္ဎံ ၊ ဒသာ ဝိဒတ္ထီ’’တိ (ပါစိ။ ၅၃၁) ဝုတ္တပမာဏတော။ ပမာဏာတိက္ကမေ ပယောဂေ တဿ ဒုက္ကဋံ သိယာတိ ယောဇနာ။

၁၈၂၁။ သစ္ဆေဒန္တိ ပမာဏတော အတိရိတ္တပဒေသဿ ဆေဒနကိရိယာသဟိတပဋိကမ္မံ ပါစိတ္တိယမုဒီရိတန္တိ အတ္ထော။ တဿာတိ နိသီဒနဿ။ ဒွီသု ဌာနေသု ဖာလေတွာ တိဿော ဒသာ ကာတဗ္ဗာ သိယုန္တိ ယောဇနာ။

၁၈၂၂။ တဒူနကန္တိ တတော ပမာဏတော ဦနကံ။ ဝိတာနာဒိံ ကရောန္တဿာတိ ဧတ္ထ အာဒိ-သဒ္ဒေန အတ္ထရဏသာဏိပါကာရဘိသိဗိဗ္ဗောဟနာနံ သင်္ဂဟော။ ‘‘သဉ္စရိတ္တသမာ နယာ’’တိ ဣဒံ ဝုတ္တတ္ထမေဝ။

နိသီဒနကထာဝဏ္ဏနာ။

၁၈၂၃။ ရောဂေတိ ကဏ္ဍုပိဠကာဒိရောဂေ သတိ။ ယထာဟ ‘‘အနုဇာနာမိ ဘိက္ခဝေ ယဿ ကဏ္ဍု ဝါ ပိဠကာဝါ အဿာဝေါ ဝါ ထုလ္လကစ္ဆု ဝါ အာဗာဓော၊ တဿ ကဏ္ဍုပဋိစ္ဆာဒိ’’န္တိ (မဟာဝ။ ၃၅၄)။ ဧတ္ထ ကဏ္ဍူတိ ကစ္ဆု။ ပိဠကာတိ လောဟိတတုဏ္ဍိကာ သုခုမပိဠကာ။ အဿာဝေါတိ အရိသဘဂန္ဒလမဓုမေဟာဒိဝသေန အသုစိပဂ္ဃရဏံ။ ထုလ္လကစ္ဆု ဝါ အာဗာဓောတိ မဟာပိဠကာဗာဓော ဝုစ္စတိ။ ပမာဏတောတိ ‘‘တတြိဒံ ပမာဏံ၊ ဒီဃသော စတဿော ဝိဒတ္ထိယော သုဂတဝိဒတ္ထိယာ၊ တိရိယံ ဒွေ ဝိဒတ္ထိယော’’တိ (ပါစိ။ ၅၃၈) ဝုတ္တပ္ပမာဏတော။

ကဏ္ဍုပဋိစ္ဆာဒိကထာဝဏ္ဏနာ။

၁၈၂၅။ ပမာဏေနေဝါတိ ‘‘တတြိဒံ ပမာဏံ၊ ဒီဃသော ဆ ဝိဒတ္ထိယော သုဂတဝိဒတ္ထိယာ၊ တိရိယံ အဍ္ဎတေယျာ’’တိ (ပါစိ။ ၅၄၃) ဝုတ္တပ္ပမာဏေနေဝ။ ပမာဏာတိက္ကမေတိ ဝဿိကသာဋိကာယ ယထာဝုတ္တပမာဏတော အတိက္ကမနေ၊ နိမိတ္တတ္ထေ စေတံ ဘုမ္မံ။ တဿ ဘိက္ခုဿ။ နယောတိ ဆေဒနပါစိတ္တိယာဒိကော ဝိနိစ္ဆယနယော။

ဝဿိကသာဋိကကထာဝဏ္ဏနာ။

၁၈၂၆။ သုဂတဿ စီဝရေန တုလျပ္ပမာဏံ စီဝရံ ယော ဘိက္ခု သစေ ကာရေယျ၊ တဿ စီဝရဿ ကရဏေ တဿ ဘိက္ခုဿ ဒုက္ကဋံ သိယာတိ ယောဇနာ။ တုလျံ ပမာဏံ ယဿာတိ ဝိဂ္ဂဟော။

၁၈၂၇။ အတ္တနော ဝတ္ထာနံ ကရဏကာရာပနံ ဝိနာ အညတော ပဋိလာဘော နာမ နတ္ထိ၊ သူစိကမ္မပရိယောသာနေ စီဝရသရူပဿ ပဋိလာဘောယေဝေတ္ထ ပဋိလာဘောတိ ဝိညာယတိ။

၁၈၂၈။ တဿာတိ ယံ ‘‘သုဂတဿ စီဝရေနာ’’တိ ဝုတ္တံ၊ တဿ သုဂတစီဝရဿ။ ဒီဃသော ပမာဏေန သုဂတဿ ဝိဒတ္ထိယာ နဝ ဝိဒတ္ထိယော၊ တိရိယံ ပမာဏေန ဆ ဝိဒတ္ထိယော ဝိနိဒ္ဒိဋ္ဌာ သိက္ခာပဒေယေဝ ကထိတာတိ ယောဇနာ။

နန္ဒကထာဝဏ္ဏနာ။

ရာဇဝဂ္ဂေါ နဝမော။

ဣတိ ဝိနယတ္ထသာရသန္ဒီပနိယာ ဝိနယဝိနိစ္ဆယဝဏ္ဏနာယ

ပါစိတ္တိယကထာဝဏ္ဏနာ နိဋ္ဌိတာ။

ပဌမော ဘာဂေါ နိဋ္ဌိတော။

နမော တဿ ဘဂဝတော အရဟတော သမ္မာသမ္ဗုဒ္ဓဿ

ဝိနယပိဋကေ

ဝိနယဝိနိစ္ဆယ-ဋီကာ (ဒုတိယော ဘာဂေါ)