📜

သေခိယကထာဝဏ္ဏနာ

၁၈၇၀။ ဧဝံ ပါဋိဒေသနီယဝိနိစ္ဆယံ ဒဿေတွာ တဒနန္တရံ ဥဒ္ဒိဋ္ဌာနံ သေခိယာနံ ဝိနိစ္ဆယံ ဒဿေတုမာဟ ‘‘ယော အနာဒရိယေနေဝါ’’တိအာဒိ။ ယောတိ ထေရော ဝါ နဝေါ ဝါ မဇ္ဈိမော ဝါ။ ဧတ္ထ အနာဒရိယံ နာမ သဉ္စိစ္စ အာပတ္တိအာပဇ္ဇနံ၊ နိဝါသနာဒိဝတ္ထဿ ဥဂ္ဂဟဏေ နိရုဿာဟဉ္စ။ ပစ္ဆတောပိ ဝါတိ ဧတ္ထ ဝါ-သဒ္ဒေန ‘‘ပဿတောပိ ဝါ’’တိ ဣဒံ သင်္ဂဏှာတိ။ တဿ စာတိ ဧတ္ထ စ-သဒ္ဒေါ ဝက္ခမာနသမုစ္စယော။

၁၈၇၁။ န ကေဝလံ ဝုတ္တနယေန နိဝါသေန္တဿေဝ ဟောတိ၊ ခန္ဓကာဂတဟတ္ထိသောဏ္ဍာဒိအာကာရေနာပိ နိဝါသေန္တဿ ဒုက္ကဋံ ဟောတီတိ အာဟ ‘‘ဟတ္ထိသောဏ္ဍာဒီ’’တိအာဒိ။ ဟတ္ထိသောဏ္ဍာဒိနိဝါသနံ ပရတော ခုဒ္ဒကဝတ္ထုက္ခန္ဓကေ (စူဠဝ။ ၂၈၀) အာဝိ ဘဝိဿတိ။ ပရိမဏ္ဍလန္တိ သမန္တတော မဏ္ဍလံ ကတွာ။ ဝတ္ထဗ္ဗန္တိ နိဝတ္ထဗ္ဗံ နိဝါသေတဗ္ဗန္တိ အတ္ထော။

၁၈၇၂။ ဇာဏုမဏ္ဍလတောဟေဋ္ဌာတိ ဧတ္ထ ‘‘ဇင်္ဃဋ္ဌိသီသတော ပဋ္ဌာယာ’’တိ သေသော။ အဋ္ဌင်္ဂုလပ္ပမာဏကန္တိ ဝဍ္ဎကိအင်္ဂုလေန အဋ္ဌင်္ဂုလမတ္တန္တိ အာစရိယာ။ ‘‘ယော ပန သုက္ခဇင်္ဃော ဝါ မဟာပိဏ္ဍိကမံသော ဝါ ဟောတိ၊ တဿ သာရုပ္ပတ္ထာယ ဇာဏုမဏ္ဍလတော အဋ္ဌင်္ဂုလာဓိကမ္ပိ ဩတာရေတွာ နိဝါသေတုံ ဝဋ္ဋတီ’’တိ (ပါစိ။ အဋ္ဌ။ ၅၇၆) အဋ္ဌကထံ သင်္ဂဏှိတုမာဟ ‘‘တတော ဦနံ န ဝဋ္ဋတီ’’တိ။

၁၈၇၃။ အသဉ္စိစ္စ အပရိမဏ္ဍလံ နိဝါသေန္တဿ အနာပတ္တီတိ ယောဇနာ။ ဧဝမုပရိပိ။ အသဉ္စိစ္စာတိ ‘‘အပရိမဏ္ဍလံ နိဝါသေဿာမီ’’တိ ဧဝံ အသဉ္စိစ္စ၊ အထ ခေါ ‘‘ပရိမဏ္ဍလံယေဝ နိဝါသေဿာမီ’’တိ ဝိရဇ္ဈိတွာ အပရိမဏ္ဍလံ နိဝါသေန္တဿ အနာပတ္တိ။ အသတိဿာပီတိ အညဝိဟိတဿာပိ တထာ နိဝါသေန္တဿ အနာပတ္တိ။ အဇာနန္တဿာတိ ကေဝလံ ပရိမဏ္ဍလံ နိဝါသေတုံ အဇာနန္တဿ အနာပတ္တိ။ အပိစ နိဝါသနဝတ္တံ ဥဂ္ဂဟေတဗ္ဗံ။ ဥဂ္ဂဟိတဝတ္တောပိ သစေ ‘‘အာရုဠှ’’န္တိ ဝါ ‘‘ဩရုဠှ’’န္တိ ဝါ န ဇာနာတိ၊ တဿာပိ အနာပတ္တိယေဝ။ ဂိလာနဿာတိ ယဿ ဇင်္ဃာယ ဝါ ပါဒေ ဝါ ဝဏော ဟောတိ၊ တဿ ဥက္ခိပိတွာ ဝါ ဩတာရေတွာ ဝါ နိဝါသေန္တဿ အနာပတ္တိ။ ပါဒေါတိ စေတ္ထ ပါဒသမီပံ အဓိပ္ပေတံ။ အာပဒါသူတိ ဝါဠာ ဝါ စောရာ ဝါ အနုဗန္ဓန္တိ၊ ဧဝရူပါသု အာပဒါသု အနာပတ္တိ။

ပရိမဏ္ဍလကထာဝဏ္ဏနာ။

၁၈၇၄။ ဥဘော ကောဏေ သမံ ကတွာတိ ပါရုပနဿ ဧကံသေ ကတဿ ပိဋ္ဌိပဿေ၊ ဥဒရပဿေ စ ဩလမ္ဗမာနေ ဥဘော ကဏ္ဏေ ဟတ္ထိပိဋ္ဌေ ဂဏ္ဍာ ဝိယ သမံ ကတွာ။ ပရိမဏ္ဍလံ ကတွာတိ ဧတဿေဝ အတ္ထပဒံ။ သာဒရန္တိ ဘာဝနပုံသကနိဒ္ဒေသော။ သာဒရံ ဝါ ပါရုပိတဗ္ဗန္တိ ယောဇနာ၊ သာဒရံ ပါရုပနံ ကတ္တဗ္ဗန္တိ အတ္ထော။ ဧဝံ အကရောန္တဿာတိ ပါရုပနဝတ္တေ အာဒရံ ဇနေတွာ ဧဝံ အပါရုပန္တဿ။

၁၈၇၅။ ‘‘ပရိမဏ္ဍလံ နိဝါသေဿာမီတိ သိက္ခာ ကရဏီယာ’’တိ (ပါစိ။ ၅၇၆) ဝါ ‘‘ပရိမဏ္ဍလံ ပါရုပိဿာမီတိ သိက္ခာ ကရဏီယာ’’တိ (ပါစိ။ ၅၇၇) ဝါ ‘‘အန္တရဃရေ’’တိ အဝိသေသေတွာ ဝုတ္တတ္တာ အာဟ ‘‘အဝိသေသေန ဝုတ္တ’’န္တိ။ ဣဒံ သိက္ခာပဒဒွယံ ယသ္မာ အဝိသေသေန ဝုတ္တံ၊ တသ္မာ ဃရေ၊ ဝိဟာရေ ဝါ ကာတဗ္ဗံ ပရိမဏ္ဍလန္တိ ယောဇနာ။ ဃရေတိ အန္တရဃရေ။ ဝိဟာရေ ဝါတိ ဗုဒ္ဓုပဋ္ဌာနာဒိကာလံ သန္ဓာယ ဝုတ္တံ။ ပရိမဏ္ဍလံ ကတ္တဗ္ဗန္တိ ပရိမဏ္ဍလမေဝ နိဝါသေတဗ္ဗံ ပါရုပိတဗ္ဗန္တိ အတ္ထော။

ဒုတိယံ။

၁၈၇၆။ ဥဘော ကောဏေ သမံ ကတွာတိ သမ္ဗန္ဓော။ ဂီဝမေဝ စ အနုဝါတေန ဆာဒေတွာတိ ယောဇနာ။

၁၈၇၇။ တထာ အကတွာတိ ယထာဝုတ္တဝိဓာနံ အကတွာ။ ဇတ္တူနိပီတိ ဥဘော အံသကူဋာနိပိ။ ဥရမ္ပိ စာတိ ဟဒယမ္ပိ။ ဝိဝရိတွာတိ အပ္ပဋိစ္ဆာဒေတွာ။ ယထာကာမန္တိ ဣစ္ဆာနုရူပံ။ ဂစ္ဆတောတိ ဧတ္ထ ‘‘အန္တရဃရေ’’တိ သေသော။ အန္တရဃရံ နာမ ဂါမေ ဝါ ဟောတု ဝိဟာရေ ဝါ၊ ပစိတွာ ဘုဉ္ဇိတွာ ဂိဟီနံ ဝသနဋ္ဌာနံ။

တတိယံ။

၁၈၇၈-၉။ ‘‘မဏိဗန္ဓတော’’တိ ဣမိနာပိ ‘‘ဟေဋ္ဌာ’’တိ ယောဇေတဗ္ဗံ။ ဝါသူပဂဿာတိ ဧတ္ထ ‘‘ကာယံ ဝိဝရိတွာ နိသီဒတော’’တိ သေသော။ ဝါသူပဂေါ နာမ ရတ္တိဝါသတ္ထာယ ဥပဂတော၊ ဧတေန ဝါသတ္ထာယ အန္တရဃရံ ဥပဂစ္ဆန္တေန သုပ္ပဋိစ္ဆန္နေနေဝ ဥပဂန္တဗ္ဗန္တိ ဒီပိတံ ဟောတိ၊ ဧတေနေဝ ဝါသူပဂတဿ သန္တိကံ ဥပဂတဿ ယထာကာမံ ဂမနေ န ဒေါသောတိ စ ဝုတ္တမေဝ ဟောတိ။ တေနာဟ ဂဏ္ဌိပဒေ ‘‘ဧကဒိဝသမ္ပိ ဝါသူပဂတဿ သန္တိကံ ယထာသုခံ ဂန္တုံ ဝဋ္ဋတိ၊ ကော ပန ဝါဒေါ စတုပဉ္စာဟံ ဝါသမဓိဋ္ဌာယ ဝသိတဘိက္ခူနံ သန္တိက’’န္တိ။

စတုတ္ထံ။

၁၈၈၀။ သုဝိနီတေနာတိ ဟတ္ထပါဒါနံ အကီဠာပနေနေဝ သုဋ္ဌု ဝိနီတေန။

ပဉ္စမံ။

၁၈၈၁။ ဂါထာဗန္ဓဝသေန ‘‘သတီမတာ’’တိ ဒီဃော ကတော။ အဝိကာရေနာတိ တံတဒဝလောကာသဟိတေန ။ ယုဂံ မတ္တာ ပမာဏံ ဧတဿာတိ ယုဂမတ္တံ၊ ရထယုဂံ စတုဟတ္ထပ္ပမာဏံ၊ တတ္တကံ ပဒေသံ။ ပေက္ခိနာတိ ဩလောကေန္တေန။ ‘‘ဘိက္ခုနာ ဩက္ခိတ္တစက္ခုနာ’’တိ ပဒစ္ဆေဒေါ။

၁၈၈၂။ အန္တရဃရေ ယတ္ထ ကတ္ထစိပိ ဧကသ္မိမ္ပိ ဌာနေ ဌတွာတိ ယောဇနာ။ ဧဝံ ဝုတ္တေပိ တထာရူပေ အန္တရာယေ သတိ ဂစ္ဆတောပိ ဩလောကေတုံ လဗ္ဘတိ။ ဧကသ္မိံ ပန ဌာနေ ဌတွာတိ ဧတ္ထ ဂစ္ဆန္တောပိ ပရိဿယာဘာဝံ ဩလောကေတုံ လဗ္ဘတိယေဝ။ ‘‘တထာ ဂါမေ ပူဇ’’န္တိ ဂဏ္ဌိပဒေသု ဝုတ္တံ။ ပိ-သဒ္ဒေါ ပန-သဒ္ဒတ္ထော၊ ဩလောကေတုံ ပန ဝဋ္ဋတီတိ ဝုတ္တံ ဟောတိ။

၁၈၈၃။ ဩလောကေန္တော တဟံ တဟန္တိ ယော အနာဒရိယံ ပဋိစ္စ တံ တံ ဒိသာဘာဂံ ပါသာဒံ ကူဋာဂါရံ ဝီထိံ ဩလောကေန္တော။

သတ္တမံ။

၁၈၈၄။ ဧကတောဝါပီတိ ဧကအံသကူဋတော ဝါ။ ဥဘတော ဝါပီတိ ဥဘယံသကူဋတော ဝါ။ ဣန္ဒခီလကတော အန္တောတိ ဂါမဒွါရိန္ဒခီလတော အန္တော၊ ဃရေတိ ဝုတ္တံ ဟောတိ။

နဝမံ။

၁၈၈၅။ တထာ နိသိန္နကာလေပီတိ ဣန္ဒခီလဿ အန္တော နိသိန္နကာလေပိ။ ကုဏ္ဍိကံ နီဟရန္တေန စ စီဝရံ အနုက္ခိပိတွာ ဒါတဗ္ဗာ ကုဏ္ဍိကာတိ ယောဇနာ။ ကုဏ္ဍိကန္တိ စ ဥပလက္ခဏမတ္တံ။ ဓမ္မကရဏာဒီသုပိ ဧသေဝ နယော။

ဒသမံ။

ပဌမော ဝဂ္ဂေါ။

၁၈၈၆။ ဂန္တုဉ္စေဝ နိသီဒိတုဉ္စ န ဝဋ္ဋတီတိ ယောဇနာ။ စ-သဒ္ဒေါ ကိရိယာသမုစ္စယော။ ဟသနီယသ္မိံ ဝတ္ထုသ္မိန္တိ ဟာသဇနကေ ကာရဏေ။ သိတမတ္တန္တိ မန္ဒဟာသံ။

ပဌမဒုတိယာနိ။

၁၈၈၇။ အပ္ပသဒ္ဒေနာတိ ‘‘ကိတ္တာဝတာ အပ္ပသဒ္ဒေါ ဟောတိ? ဒွါဒသဟတ္ထေ ဂေဟေ အာဒိမှိ သင်္ဃတ္ထေရော၊ မဇ္ဈေ ဒုတိယတ္ထေရော၊ အန္တေ တတိယတ္ထေရောတိ ဧဝံ နိသိန္နေသုယံ သင်္ဃတ္ထေရော ဒုတိယတ္ထေရေန သဒ္ဓိံ မန္တေတိ၊ ဒုတိယတ္ထေရော တဿ သဒ္ဒဉ္စေဝ သုဏာတိ၊ ကထဉ္စ ဝဝတ္ထပေတိ။ တတိယတ္ထေရော ပန သဒ္ဒမေဝ သုဏာတိ၊ ကထံ န ဝဝတ္ထပေတိ။ ဧတ္တာဝတာ အပ္ပသဒ္ဒေါ ဟောတီ’’တိ (ပါစိ။ ၅၈၈) ဝုတ္တအပ္ပသဒ္ဒယုတ္တေန။ သစေ ပန တတိယတ္ထေရော ကထဉ္စ ဝဝတ္ထပေတိ၊ မဟာသဒ္ဒေါ နာမ ဟောတီတိ။

တတိယံ။

၁၈၈၈။ ကာယပ္ပစာလကံ ကတွာတိ ကာယံ စာလေတွာ စာလေတွာ။ ဥပရိပိ ဧသေဝ နယော။ ဟတ္ထဿ ဝုတ္တလက္ခဏတ္တာ ‘‘ဗာဟူ’’တိ မဏိဗန္ဓတော ယာဝ အံသကူဋာ ဂဟေတဗ္ဗာ။

၁၈၈၉။ ဥဇုံ ပဂ္ဂဟေတွာတိ ဥဇုံ ဌပေတွာ။ အာသိတဗ္ဗန္တိ နိသီဒိတဗ္ဗံ။ ‘‘သမေန ဣရိယာပထေန တူ’’တိ ပဒစ္ဆေဒေါ။

၁၈၉၀။ ဣတ္ထမ္ဘူတေ ကရဏဝစနံ။ ဂမနပဋိသံယုတ္တေသု သိက္ခာပဒေသု ဂမနဿ အသမ္ဘဝေါတိ အာဟ ‘‘နိသီဒနေန ယုတ္တေသူ’’တိ။

ပဉ္စမဆဋ္ဌသတ္တမဋ္ဌမနဝမာနိ။

ဒုတိယော ဝဂ္ဂေါ။

၁၈၉၁။ ခမ္ဘံ ကတွာတိ ကဋိယာ ဧကပဿေ ဝါ ဒွီသု ဝါ ပဿေသု ကပ္ပရသန္ဓိတော အာဘုဇိတွာ ဟတ္ထံ ဌပေတွာ။ ယထာဟ – ‘‘ခမ္ဘကတော နာမ ကဋိယံ ဟတ္ထံ ဌပေတွာ ကတခမ္ဘော’’တိ (ပါစိ။ အဋ္ဌ။ ၅၉၆)။ ဥက္ကုဋိကာယ ဝါ ဂစ္ဆတောတိ ယောဇနာ။ ဥက္ကုဋိကာ ဝုစ္စတိ ပဏှိယော ဥက္ခိပိတွာ အဂ္ဂပါဒေဟိ ဝါ အဂ္ဂပါဒေ ဥက္ခိပိတွာ ပဏှီဟိ ဧဝ ဝါ ဘူမိံ ဖုသန္တဿ ဂမနံ။

၁၈၉၂။ ဒုဿပလ္လတ္ထိကာယာတိ အာယောဂပလ္လတ္ထိကာယ။ အန္တရဃရေ နိသီဒန္တဿ တဿ ဒုက္ကဋံ ဟောတီတိ ယောဇနာ။

၁၈၉၃။ ဒုတိယေစာတိ ‘‘န ခမ္ဘကတော အန္တရဃရေ နိသီဒိဿာမီ’’တိ (ပါစိ။ ၅၉၇) သိက္ခာပဒေ စ။ စတုတ္ထေ စာတိ ‘‘န ဩဂုဏ္ဌိတော အန္တရဃရေ နိသီဒိဿာမီ’’တိ (ပါစိ။ ၅၉၉) သိက္ခာပဒေ စ။ ဆဋ္ဌေတိ ‘‘န ပလ္လတ္ထိကာယ အန္တရဃရေ’’ဣစ္စာဒိ (ပါစိ။ ၆၀၁) သိက္ခာပဒေ စ။ ဣတိ ဧဝံ သာရုပ္ပာ သမဏာစာရာနုစ္ဆဝိကာ ဆဗ္ဗီသတိ သိက္ခာပဒါနိ ပကာသိတာနိ။

ပဌမဒုတိယတတိယစတုတ္ထပဉ္စမဆဋ္ဌာနိ။

၁၈၉၄။ ဝိညုနာ ဘိက္ခုနာ သက္ကစ္စံ သတိယုတ္တေန၊ ပတ္တသညိနာ စ ဟုတွာ သမသူပေါဝ ပိဏ္ဍပါတော ဂဟေတဗ္ဗောတိ ယောဇနာ။ ဧဝံ ဧတာယ ဂါထာယ သိက္ခာပဒတ္တယံ သင်္ဂဟိတံ။ သက္ကစ္စန္တိ သတိံ ဥပဋ္ဌပေတွာ။ ‘‘သတိယုတ္တေနာ’’တိ ဣဒံ ‘‘သက္ကစ္စ’’န္တိ ဧတဿ အတ္ထပဒံ။ ‘‘သတိံ ဥပဋ္ဌပေတွာ’’တိ (ပါစိ။ အဋ္ဌ။ ၆၀၂) ဟိ အဋ္ဌကထာယံ ဝုတ္တံ။ ပတ္တေ သညာ ပတ္တသညာ၊ သာ အဿ အတ္ထီတိ ပတ္တသညီ၊ အနညဝိဟိတေန အတ္တနော ဘာဇနေယေဝ ဥပနိဗဒ္ဓသညိနာတိ အတ္ထော။

၁၈၉၅။ ဘတ္တစတုဗ္ဘာဂေါတိ ဘတ္တဿ စတုဗ္ဘာဂပ္ပမာဏော။ တတော အဓိကံ ဂဏှတော ဒုက္ကဋံ။

၁၈၉၆။ ‘‘ရသရသေ’’တိ ဝတ္တဗ္ဗေ ‘‘ရသေရသေ’’တိ ဂါထာဗန္ဓဝသေန ဝုတ္တံ။ ဒွေ သူပေ ဌပေတွာ အဝသေသာနိ ဩလောဏိသာကသူပေယျမစ္ဆရသမံသရသာဒီနိ ရသရသာတိ ဝေဒိတဗ္ဗာနိ။ ဧတ္ထ စ ‘‘ဩလောဏီတိ ဒဓိကတံ ဂေါရသ’’န္တိ ကေစိ။ ‘‘ဧကာ ဗျဉ္ဇနဝိကတီ’’တိ အပရေ။ ‘‘ယော ကောစိ သုဒ္ဓါ ကဉ္ဇိကတက္ကာဒိရသော’’တိ အညေ။ သာကသူပေယျဂ္ဂဟဏေန ယာ ကာစိ သူပေယျသာကေဟိ ကတာ ဗျဉ္ဇနဝိကတိ ဝုတ္တာ။ မံသရသာဒီနီတိ အာဒိ-သဒ္ဒေန အဝသေသာ သဗ္ဗာပိ ဗျဉ္ဇနဝိကတိ သင်္ဂဟိတာတိ ဒဋ္ဌဗ္ဗံ။ ဉာတကာဒီနန္တိ ဧတ္ထ ‘‘သန္တကံ ဂဏှန္တဿာ’’တိ သေသော။ အညတ္ထာယာတိ ဧတ္ထ ‘‘ကတံ ဂဏှန္တဿာ’’တိ သေသော။ ဓနေနာတိ ဧတ္ထ ‘‘အတ္တနော’’တိ စ ‘‘ကီတ’’န္တိ စ ‘‘ဂဏှန္တဿာ’’တိ စ သေသော။ ဉာတကာဒီနံ သန္တကံ ဂဏှန္တဿ၊ အညတ္ထာယ ကတံ ဂဏှန္တဿ၊ အတ္တနော ဓနေန ကီတံ ဂဏှန္တဿ အနာပတ္တီတိ အတ္ထော။

သတ္တမဋ္ဌမနဝမာနိ။

၁၈၉၇။ အဓိဋ္ဌာနူပဂဿ ပတ္တဿ မုခဝဋ္ဋိယာ အန္တောလေခါပမာဏေန ပူရိတောဝ ဂဟေတဗ္ဗောတိ ယောဇနာ။

၁၈၉၈။ အနာပတ္တိဝိသယံ ဒဿေတွာ အာပတ္တိဝိသယံ ဒဿေတုမာဟ ‘‘တတ္ထာ’’တိအာဒိ။ တတ္ထာတိ အဓိဋ္ဌာနူပဂေ ပတ္တေ။ ထူပီကတံ ကတွာတိ ဧတ္ထ ‘‘ဒိယျမာန’’န္တိ သေသော။ ယထာဝုတ္တလေခါတိက္ကမော ယထာ ဟောတိ၊ ဧဝံ ထူပီကတံ ဒိယျမာနံ ဂဏှတော အာပတ္တိ ဒုက္ကဋန္တိ သမ္ဗန္ဓော။ ဣမိနာ ပဌမံ ထူပီကတဿ အဓိဋ္ဌာနူပဂပတ္တဿ ပစ္ဆာ ပဋိဂ္ဂဟဏဉ္စ ပဌမပဋိဂ္ဂဟိတပတ္တေ ပစ္ဆာ ဘောဇနဿ ထူပီကတဿ ပဋိဂ္ဂဟဏဉ္စ နိဝါရိတန္တိ ဝေဒိတဗ္ဗံ။

၁၈၉၉။ ကာလိကတ္တယမေဝ စ ထူပီကတံ ဝဋ္ဋတေဝါတိ ယောဇနာ။ သေသေတိ အနဓိဋ္ဌာနူပဂေ ပတ္တေ။ သဗ္ဗန္တိ စတုဗ္ဗိဓံ ကာလိကံ ထူပီကတံ ဝဋ္ဋတီတိ ယောဇနာ။

၁၉၀၀။ ပေသေတီတိ ဧတ္ထ ‘‘ဘိက္ခူ’’တိ သေသော။ ဘိက္ခု ဘိက္ခူနံ ယဒိ ပေသေတီတိ ယောဇနာ။ ‘‘ဝိဟာရံ ပေသေတုံ ဝဋ္ဋတီ’’တိ (ပါစိ။ အဋ္ဌ။ ၆၀၅) အဋ္ဌကထာယ အဓိပ္ပာယံ ဒဿေတုံ ‘‘ဘိက္ခူန’’န္တိ ဝစနေန ပဋိဂ္ဂဟဏံ အဝိဇဟိတွာ ဘိက္ခုနာ ဧဝ ပေသိတံ ဂဏှန္တာနံ ဘိက္ခူနံ အနာပတ္တီတိ ဒီပိတံ ဟောတိ။ အညထာ ‘‘ပူရေတုံ ဝဋ္ဋတီ’’တိ ဧတ္တကမေဝ ဝတ္တဗ္ဗန္တိ ဝိညာယတိ။

၁၉၀၁။ ပက္ခိပ္ပမာနန္တိ မုခဝဋ္ဋိတော ဥစ္စံ ကတွာ မဇ္ဈေ ပက္ခိပိယမာနံ။ ဖလာဒိကန္တိ အာဒိ-သဒ္ဒေန ဩဒနာဒိမ္ပိ သင်္ဂဏှာတိ။ ဟေဋ္ဌာဩရောဟတီတိ သမန္တာ ဩကာသသမ္ဘဝတော စာလိယမာနံ မုခဝဋ္ဋိပ္ပမာဏတော ဟေဋ္ဌာ ဘဿတိ။

၁၉၀၂။ တက္ကောလကာဒီနန္တိ ဧတ္ထ အာဒိ-သဒ္ဒေန ပူဂဖလာဒီနံ သင်္ဂဟော။ ဌပေတွာတိ ဘတ္တမတ္ထကေ နိက္ခိပိတွာ။ ဝဋံသကန္တိ အဝဋံသကံ။

၁၉၀၃။ ပူဝဿာတိ ဝိကာရသမ္ဗန္ဓေ သာမိဝစနံ၊ ပူဝဝဋံသကန္တိ ဝုတ္တံ ဟောတိ။ ပူဝဿ ယာဝကာလိကတ္တာ အာဟ ‘‘ဣဒံ ထူပီကတံ သိယာ’’တိ။

၁၉၀၄။ ပဏ္ဏာနံ ဝိသုံ ဘာဇနတ္တာ အာဟ ‘‘ဝဋ္ဋတီ’’တိ။

၁၉၀၅။ အဿာတိ ဘိက္ခုဿ။ တံ တု သဗ္ဗန္တိ ‘‘ထူပီကတတ္တာ န ဝဋ္ဋတီ’’တိ ဝုတ္တံ တံ ပန သဗ္ဗံ။ ဂဟိတံ သုဂဟိတန္တိ ဝိရာဓေတွာ ပဋိဂ္ဂဟိတံ စေ၊ သုပ္ပဋိဂ္ဂဟိတံ။

ဒသမံ။

တတိယော ဝဂ္ဂေါ။

၁၉၀၆။ ‘‘ဥပရိ ဩဓိ’’န္တိ ပဒစ္ဆေဒေါ။ ဥပရီတိ ဘတ္တဿ ဥပရိ။ ဩဓိန္တိ ပရိစ္ဆေဒံ။ ပဋိပါဋိယာတိ အတ္တနော ဒိသာယ ပရိယန္တတော ပဋ္ဌာယ အနုက္ကမေန။

၁၉၀၇။ အညေသန္တိ ဧတ္ထ ‘‘ဒေန္တော’’တိ သေသော။ အတ္တနော ဘတ္တံ အညေသံ ဒေန္တော အညဿ ဘာဇနေ အာကိရံ အာကိရန္တော ပန ပဋိပါဋိံ ဝိနာပိ တဟိံ တဟိံ ဩမသတိ စေ၊ နတ္ထိ ဒေါသောတိ ယောဇနာ။ ဥတ္တရိဘင်္ဂကံ တထာ အာကိရန္တော တတ္ထ တတ္ထ ဩမသတိ၊ နတ္ထိ ဒေါသောတိ ယောဇနာ ။ ဘုဉ္ဇနတ္ထာယ ဂဏှန္တောပိ စေတ္ထ ဝတ္တဗ္ဗော။ ဥတ္တရိဘင်္ဂံ နာမ ဗျဉ္ဇနံ။

တတိယံ။

၁၉၀၈။ မတ္ထကံ ဩမဒ္ဒိတွာ ပရိဘုဉ္ဇတော ဒေါသောတိ ယောဇနာ။ ‘‘ထူပကတောတိ မတ္ထကတော၊ ဝေမဇ္ဈတော’’တိ (ပါစိ။ အဋ္ဌ။ ၆၁၀) အဋ္ဌကထာဝစနတော မတ္ထကန္တိ ဧတ္ထ ဘတ္တမတ္ထကမာဟ။ ဩမဒ္ဒိတွာတိ ဟတ္ထေန ဘတ္တံ အဝမဒ္ဒိတွာ။

၁၉၀၉။ သေသကေ ပရိတ္တေပိ စာတိ အဝသိဋ္ဌေ အပ္ပကေပိ စ။ သံကဍ္ဎိတွာနာတိ တသ္မိံ တသ္မိံ ဌာနေ ဌိတံ သံဟရိတွာ။ ဧကတော ပန မဒ္ဒိတွာ ဘုဉ္ဇတော အနာပတ္တီတိ ယောဇနာ။

ပဉ္စမံ။

၁၉၁၀။ ဘိယျောကမျတာဟေတူတိ ပုန ဂဏှိတုကာမတာဟေတု။ သူပံ ဝါတိ မုဂ္ဂါဒိသူပံ ဝါ။ ဗျဉ္ဇနံ ဝါတိ ဥတ္တရိဘင်္ဂံ ဝါ။

ဆဋ္ဌံ။

၁၉၁၁။ ဝိညတ္တိယန္တိ သူပေါဒနဝိညတ္တိယံ။ ‘‘ဉာတကာနံ ဝါ ပဝါရိတာနံ ဝါ အညဿ အတ္ထာယ ဝါ အတ္တနော ဓနေန ဝါ’’တိ ဣဒံ အနာပတ္တိယံ အဓိကံ။ ဂိလာနောပိ ဟုတွာ ပရေသံ ပတ္တံ ဥဇ္ဈာနသညာယ ဩလောကေန္တဿ အာပတ္တိ ဟောတီတိ အာဟ ‘‘ဥဇ္ဈာနေ ဂိလာနောပိ န မုစ္စတီ’’တိ။ ဥဇ္ဈာနေတိ နိမိတ္တတ္ထေ ဘုမ္မံ။

၁၉၁၂။ ဒဿာမီတိ ဣမဿ ဘတ္တံ ဩလောကေတွာ ‘‘ယံ တတ္ထ နတ္ထိ၊ တံ ဒဿာမီ’’တိ ဝါ ‘‘ဒါပေဿာမီ’’တိ ဝါ။ အဝမညိတွာ ဥဇ္ဈာယနစိတ္တံ ဥဇ္ဈာနံ၊ ဥဇ္ဈာနေ သညာ ဥဇ္ဈာနသညာ၊ သာ အဿ အတ္ထီတိ ဝိဂ္ဂဟော။ နဥဇ္ဈာနသညိနော စ အနာပတ္တီတိ ဉာတဗ္ဗန္တိ ယောဇနာ။

သတ္တမဋ္ဌမာနိ။

၁၉၁၃။ ‘‘တေသံ မဇ္ဈပ္ပမာဏေနာ’’တိ ဣမိနာ အသာရုပ္ပဝသေန ခုဒ္ဒကပဋိက္ခေပေါ ကတောတိ ဝေဒိတဗ္ဗော။ ‘‘နာတိမဟန္တ’’န္တိ စ အတိမဟန္တဿေဝ ပဋိက္ခိတ္တတ္တာ ခုဒ္ဒကေ အာပတ္တိ န ဒိဿတီတိ။ ကဗဠောတိ အာလောပေါ။

၁၉၁၄။ မူလခါဒနီယာဒိကေ သဗ္ဗတ္ထ ခဇ္ဇကေ ပနာတိ ယောဇနာ။ ဖလာဖလေတိ ခုဒ္ဒကေ၊ မဟန္တေ စ ဖလေ။

နဝမံ။

၁၉၁၅။ ဒသမေ နတ္ထိ ကိဉ္စိ ဝတ္တဗ္ဗံ။

ဒသမံ။

စတုတ္ထော ဝဂ္ဂေါ။

၁၉၁၆။ ‘‘အနာဟဋေ’’တိ ဧတဿ အတ္ထပဒံ ‘‘မုခဒွါရံ အပ္ပတ္တေ’’တိ။ ယထာဟ ‘‘အနာဟဋေတိ အနာဟရိတေ၊ မုခဒွါရံ အသမ္ပာပိတေတိ အတ္ထော’’တိ (ပါစိ။ အဋ္ဌ။ ၆၁၇)။ ‘‘မုခဒွါရံ ဝိဝရန္တဿာ’’တိ ဧတ္တကေ ဝုတ္တေ မုခဒွါရ-သဒ္ဒဿ သမ္ဗန္ဓိသဒ္ဒတ္တာ ကဿာတိ အပေက္ခာယ ‘‘မုခဒွါရံ ဝိဝရိဿာမီ’’တိ အတ္တနောပဒေကဝစနေန ဗျဉ္ဇိတမေဝတ္ထံ ပကာသေတုံ အတ္တနော-ဂဟဏံ ကတန္တိ ဝေဒိတဗ္ဗံ။ စ-သဒ္ဒေါ ဧဝကာရတ္ထော၊ အပ္ပတ္တေ ဝါတိ ယောဇေတဗ္ဗော၊ အသမ္ပတ္တေယေဝါတိ အတ္ထော။

ပဌမံ။

၁၉၁၇။ သကလံဟတ္ထန္တိ ဧတ္ထ ဟတ္ထ-သဒ္ဒေါ တဒေကဒေသေသု အင်္ဂုလီသု ဒဋ္ဌဗ္ဗော။ ‘‘ဟတ္ထမုဒ္ဒါ’’တိအာဒီသု ဝိယ သမုဒါယေ ပဝတ္တဝေါဟာရဿ အဝယဝေပိ ပဝတ္တနတော ဧကင်္ဂုလိမ္ပိ မုခေ ပက္ခိပိတုံ န ဝဋ္ဋတိ။

၁၉၁၈။ အဿာတိ ဘိက္ခုနော။ ဗျာဟရန္တဿာတိ ကထေန္တဿ။

ဒုတိယတတိယာနိ။

၁၉၂၀။ ပိဏ္ဍုက္ခေပကန္တိ ပိဏ္ဍံ ဥက္ခိပိတွာ ဥက္ခိပိတွာ။ ဣဓာပိ ခဇ္ဇကဖလာဖလေသု အနာပတ္တိ။ ကဗဠစ္ဆေဒကမ္ပိ ဝါတိ ကဗဠံ ဆိန္ဒိတွာ။ ဣဓ ခဇ္ဇကဖလာဖလေဟိ သဒ္ဓိံ ဥတ္တရိဘင်္ဂေပိ အနာပတ္တိ။ ဂဏ္ဍေ ကတွာတိ ဧတ္ထ ဖလာဖလမတ္တေယေဝ အနာပတ္တိ။

စတုတ္ထပဉ္စမဆဋ္ဌာနိ။

၁၉၂၁-၂။ ဟတ္ထံ နိဒ္ဓုနိတွာနာတိ ဟတ္ထံ နိဒ္ဓုနိတွာ ဘတ္တံ ဘုဉ္ဇတောတိ စ သမ္ဗန္ဓော။ သိတ္ထာဝကာရကန္တိ သိတ္ထာနိ အဝကိရိတွာ အဝကိရိတွာ။ ဇိဝှာနိစ္ဆာရကံ ဝါပီတိ ဇိဝှံ နိစ္ဆာရေတွာ နိစ္ဆာရေတွာ။ စပု စပူတိ ဝါတိ ‘‘စပု စပူ’’တိ ဧဝံ သဒ္ဒံ ကတွာ။ သတ္တမေတိ ‘‘န ဟတ္ထနိဒ္ဓုနက’’န္တိ သိက္ခာပဒေ။ အဋ္ဌမေတိ ‘‘န သိတ္ထာဝကာရက’’န္တိ သိက္ခာပဒေ။ ကစဝရုဇ္ဈနေတိ ကစဝရာပနယနေ။

သတ္တမဋ္ဌမနဝမဒသမာနိ။

ပဉ္စမော ဝဂ္ဂေါ။

၁၉၂၃။ ‘‘သုရု သုရူ’’တိ ဧဝံ သဒ္ဒံ ကတွာ န ဘောတ္တဗ္ဗန္တိ ယောဇနာ။ ဟတ္ထနိလ္လေဟကံ ဝါပီတိ ဟတ္ထံ နိလ္လေဟိတွာ နိလ္လေဟိတွာ။

၁၉၂၄။ ဖာဏိတံ ၊ ဃနယာဂုံ ဝါ အင်္ဂုလီဟိ ဂဟေတွာ အင်္ဂုလိယော မုခေ ပဝေသေတွာပိ တံ ဘောတ္တုံ ဝဋ္ဋတီတိ ယောဇနာ။

၁၉၂၅။ ဧကာယ အင်္ဂုလိကာယပိ ပတ္တော န လေဟိတဗ္ဗောဝ။ ဇိဝှာယ ဧကဩဋ္ဌောပိ န နိလ္လေဟိတဗ္ဗကောတိ ယောဇနာ။ ဗဟိ ဩဋ္ဌဉ္စ ဇိဝှာယ န လေဟိတဗ္ဗံ။ ဩဋ္ဌေ လဂ္ဂံ သိတ္ထာဒိံ ယံ ကိဉ္စိ ဥဘောဟိ ဩဋ္ဌမံသေဟိယေဝ ဂဟေတွာ အန္တော ကာတုံ ဝဋ္ဋတိ။

ပဌမဒုတိယတတိယစတုတ္ထာနိ။

၁၉၂၆-၈။ န စ ဂဟေတဗ္ဗံ၊ ပဋိက္ကူလဝသေန ပဋိက္ခိတ္တန္တိ ယောဇနာ။ ဟိ-ဣတိ ‘‘ယသ္မာ’’တိ ဧတဿ အတ္ထေ၊ တေနေဝ ဝက္ခတိ ‘‘တသ္မာ’’တိ။ ‘‘ပါနီယထာလက’’န္တိ ဣဒံ ဥပလက္ခဏမတ္တံ သင်္ခါဒီနမ္ပိ တထာ နဂဟေတဗ္ဗတ္တာ။ သရာဝံ ဝါတိ တဋ္ဋကံ ဝါ။

အနာမိသေန ဟတ္ထေနာတိ အာမိသရဟိတေန ဟတ္ထေကဒေသေန။ ယထာဟ ‘‘သစေ ပန ဟတ္ထဿ

ဧကဒေသော အာမိသမက္ခိတော န ဟောတိ၊ တေန ပဒေသေန ဂဟေတုံ ဝဋ္ဋတီ’’တိ (ပါစိ။ အဋ္ဌ။ ၆၃၁)။ အာမိသမက္ခိတေနေဝ ဟတ္ထေန ‘‘ဓောဝိဿာမီ’’တိ ဝါ ‘‘ဓောဝါပေဿာမီ’’တိ ဝါ ဂဏှန္တဿ ပန အနာပတ္တိ။

ပဉ္စမံ။

၁၉၂၉။ ဥဒ္ဓရိတွာတိ သသိတ္ထကာ ပတ္တဓောဝနာ သိတ္ထကာနိ ဥဒ္ဓရိတွာ တံ ပတ္တဓောဝနောဒကံ ဃရာ ဗဟိ အန္တရဃရေ ဆဍ္ဍေန္တဿ အနာပတ္တိ။ ဘိန္ဒိတွာတိ သသိတ္ထကေ ပတ္တဓောဝနေ သိတ္ထကာနိ မဒ္ဒိတွာ ဥဒကေန သမ္ဘိန္ဒိတွာ ဥဒကဂတိကာနေဝ ကတွာ တံ ဥဒကံ ဃရာ ဗဟိ အန္တရဃရေ ဆဍ္ဍေန္တဿ အနာပတ္တိ။ ဂဟေတွာတိ သသိတ္ထကံ ပတ္တဓောဝနောဒကံ ဂဟေတွာ ပဋိဂ္ဂဟေ ဆဍ္ဍေန္တဿ အနာပတ္တိ။ သသိတ္ထကံ ပတ္တဓောဝနောဒကံ ဃရာ ဗဟိ နီဟရိတွာ အန္တရဃရေ ဆဍ္ဍေန္တဿ အနာပတ္တီတိ အဇ္ဈာဟာရယောဇနာ ဝေဒိတဗ္ဗာ။ ဧတ္ထ ပဋိဂ္ဂဟော နာမ ခေဠမလ္လာဒိကော ဥစ္ဆိဋ္ဌဟတ္ထဓောဝနဘာဇနဝိသေသော။

ဆဋ္ဌံ။

၁၉၃၀။ ဆတ္တံ ယံ ကိဉ္စီတိ ‘‘ဆတ္တံ နာမ တီဏိ ဆတ္တာနိ သေတစ္ဆတ္တံ ကိလဉ္ဇစ္ဆတ္တံ ပဏ္ဏစ္ဆတ္တံ မဏ္ဍလဗဒ္ဓံ သလာကဗဒ္ဓ’’န္တိ (ပါစိ။ ၆၃၄) ဝုတ္တေသု တီသု ဆတ္တေသု အညတရံ။ ဧတ္ထ စ သေတစ္ဆတ္တန္တိ ဝတ္ထပလိဂုဏ္ဌိတံ ပဏ္ဍရစ္ဆတ္တံ။ ကိလဉ္ဇစ္ဆတ္တန္တိ ဝိလီဝစ္ဆတ္တံ။ ပဏ္ဏစ္ဆတ္တန္တိ တာလပဏ္ဏာဒီဟိ ယေဟိ ကေဟိစိ ကတံ။ ‘‘မဏ္ဍလဗဒ္ဓံ သလာကဗဒ္ဓ’’န္တိ ဣဒံ ပန တိဏ္ဏမ္ပိ ဆတ္တာနံ ပဉ္ဇရဒဿနတ္ထံ ဝုတ္တံ။ တာနိ ဟိ မဏ္ဍလဗဒ္ဓါနိ စေဝ ဟောန္တိ သလာကဗဒ္ဓါနိ စ။ ‘‘ယံ ကိဉ္စီ’’တိ အနဝသေသပရိဂ္ဂဟဝစနေန ‘‘ယမ္ပိ စ တတ္ထဇာတဒဏ္ဍေန ကတံ ဧကပဏ္ဏစ္ဆတ္တံ ဟောတိ၊ တမ္ပိ ဆတ္တမေဝါ’’တိ (ပါစိ။ အဋ္ဌ။ ၆၃၄) အဋ္ဌကထာယ ဝုတ္တံ ဆတ္တဝိသေသံ ဂဏှာတိ။ ဟတ္ထေနာတိ ဧတ္ထ ‘‘အမုဉ္စိတွာ’’တိ သေသော။ သရီရာဝယဝေနာတိ ဧတ္ထ ‘‘ဂဟေတွာ’’တိ သေသော။ ဝါ-သဒ္ဒေါ အပိ-သဒ္ဒတ္ထော။ အံသကူဋာဒိသရီရာဝယဝေန ဂဟေတွာပိ ဟတ္ထေန အမုဉ္စိတွာ ဓာရေန္တဿာတိ အတ္ထော။

သစေ ပနဿ အညော ဆတ္တံ ဓာရေတိ၊ ဆတ္တပါဒုကာယ ဝါ ဌိတံ ဟောတိ၊ ပဿေ ဝါ ဌိတံ ဟောတိ၊

ဟတ္ထတော အပဂတမတ္တေ ဆတ္တပါဏိ နာမ န ဟောတိ၊ တဿ ဓမ္မံ ဒေသေတုံ ဝဋ္ဋတိ။ ‘‘န ဆတ္တပါဏိဿ အဂိလာနဿာ’’တိ ဝစနတော၊ ဣဓ ‘‘သဗ္ဗတ္ထ အဂိလာနဿာ’’တိ ဝက္ခမာနတ္တာ စ ဧတ္ထ ‘‘အဂိလာနဿာ’’တိ လဗ္ဘတိ။ ဓမ္မပရိစ္ဆေဒေါ စေတ္ထ ပဒသောဓမ္မေ ဝုတ္တနယေနေဝ ဝေဒိတဗ္ဗော။ ဧဝမုပရိပိ။

သတ္တမံ။

၁၉၃၁။ ဒဏ္ဍပါဏိမှီတိ ဧတ္ထ ဒဏ္ဍော ပါဏိမှိ အဿာတိ ဝိဂ္ဂဟော။ ကိတ္တကပ္ပမာဏော ဒဏ္ဍောတိ အာဟ ‘‘စတုဟတ္ထပ္ပမာဏော’’တိအာဒိ။ မဇ္ဈိမဟတ္ထတောတိ ပမာဏမဇ္ဈိမဿ ပုရိသဿ ဟတ္ထတော၊ ယော ‘‘ဝဍ္ဎကိဟတ္ထော’’တိ ဝုစ္စတိ။

အဋ္ဌမံ။

၁၉၃၂။ သတ္ထပါဏိဿာတိ ဧတ္ထာပိ ဝိဂ္ဂဟော ဝုတ္တနယောဝ။ ဝက္ခမာနံ သကလံ ဓနုဝိကတိံ၊ သရဝိကတိဉ္စ ဌပေတွာ အဝသေသံ ခဂ္ဂါဒိ သတ္ထံ နာမ။ ခဂ္ဂံ သန္နဟိတွာ ဌိတောပိ သတ္ထပါဏိ နု ခေါတိ အာသင်္ကာယ နိဝတ္တနတ္ထမာဟ ‘‘သတ္ထပါဏီ’’တိအာဒိ။ ‘‘န ဟောတိ အသိ’’န္တိ ပဒစ္ဆေဒေါ။

နဝမံ။

၁၉၃၃-၅။ သရေန သဒ္ဓိံ ဓနုံ ဝါ သုဒ္ဓဓနုံ ဝါ သုဒ္ဓသရံ ဝါ သဇိယံ ဓနုဒဏ္ဍံ ဝါ နိဇိယံ ဓနုဒဏ္ဍံ ဝါ ဂဟေတွာ ဌိတဿာပိ ဝါ နိသိန္နဿာပိ ဝါ နိပန္နဿာပိ ဝါ သစေ ယော တထာ ပဒသောဓမ္မေ ဝုတ္တလက္ခဏံ သဒ္ဓမ္မံ ဒေသေတိ၊ တဿ အာပတ္တိ ဒုက္ကဋံ ဟောတီတိ ယောဇနာ။ သစေ ပနဿ ဓနု ခန္ဓေ ပဋိမုက္ကံ ဟောတိ၊ ယာဝ န ဂဏှာတိ၊ တာဝ ဝဋ္ဋတိ။ ဇိယာယ သဟ ဝတ္တတီတိ သဇိယံ။

ဒသမံ။

ဆဋ္ဌော ဝဂ္ဂေါ။

၁၉၃၆။ ပါဒုကာရုဠှကဿာတိ ပါဒုကံ အာရုဠှော ပါဒုကာရုဠှော၊ သောယေဝ ပါဒုကာရုဠှကော၊ တဿ။ ကထံ အာရုဠှဿာတိ အာဟ ‘‘အက္ကမိတွာ’’တိအာဒိ။ အက္ကမိတွာ ဌိတဿာတိ ဆတ္တဒဏ္ဍကေ အင်္ဂုလန္တရံ အပ္ပဝေသေတွာ ကေဝလံ ပါဒုကံ အက္ကမိတွာ ဌိတဿ။ ပဋိမုက္ကဿ ဝါတိ ပဋိမုဉ္စိတွာ ဌိတဿ။ ဧတံ ဒွယမ္ပိ ‘‘ပါဒုကာရုဠှကဿာ’’တိ ဧတဿ အတ္ထပဒံ။ ယထာဟ ‘‘န ပါဒုကာရုဠှဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ အက္ကန္တဿ ဝါ ပဋိမုက္ကဿ ဝါ ဩမုက္ကဿ ဝါ အဂိလာနဿ ဓမ္မံ ဒေသေတိ၊ အာပတ္တိ ဒုက္ကဋဿာ’’တိ (ပါစိ။ ၆၃၈)။

ပဌမံ။

၁၉၃၇-၄၀။ ဥပါဟနဂတဿာပီတိ အက္ကန္တာဒိအာကာရေန ဥပါဟနာရုဠှဿ စ။ ယထာဟ ‘‘အက္ကန္တဿ ဝါ ပဋိမုက္ကဿ ဝါ’’တိ။ သဗ္ဗတ္ထာတိ ဆတ္တပါဏိအာဒီသု သဗ္ဗသိက္ခာပဒေသု။ အဂိလာနဿာတိ ဣဒံ ယောဇေတဗ္ဗန္တိ သေသော။ ယာနေ ဝါ ဂတဿ အဂိလာနဿ ဓမ္မံ ဒေသေတိ၊ ဒုက္ကဋန္တိ ယောဇနာ။ တတ္ထ ယာနေ ဝါ ဂတဿာတိ သစေ ဒွီဟိ ဇနေဟိ ဟတ္ထသင်္ဃာတေန ဂဟိတော၊ သာဋကေ ဝါ ဌပေတွာ ဝံသေန ဝယှတိ၊ အယုတ္တေ ဝါ ဝယှာဒိကေ ယာနေ၊ ဝိသင်္ခရိတွာ ဝါ ဌပိတေ စက္ကမတ္တေပိ နိသိန္နော ဟောတိ၊ ယာနဂတောတွေဝ သင်္ချံ ဂစ္ဆတိ။

သယနေပိ ဝါ အန္တမသော ကဋသာရကေ ဝါ ဆမာယ ဝါ နိပန္နဿာပိ အဂိလာနဿာတိ ယောဇနာ။ ယထာဟ ‘‘သယနဂတဿာတိ အန္တမသော ကဋသာရကေပိ ပကတိဘူမိယမ္ပိ နိပန္နဿာ’’တိ (ပါစိ။ အဋ္ဌ။ ၆၄၁)။ ဥစ္စေ ပီဌေ ဝါ ဥစ္စေ မဉ္စေပိ ဝါ နိသိန္နေန၊ ဌိတေန ဝါ နိပန္နဿ ဒေသေတုံ န ဝဋ္ဋတီတိ ယောဇနာ။ ‘‘ဌတွာ’’တိ ဣမိနာ ‘‘နိသီဒိတွာ’’တိ ဣဒဉ္စ သင်္ဂဟိတမေဝ။ သယနေသု ဂတဿ စ ဒေသေန္တေန သယနေသု ဂတေနာပိ သမာနေ ဝါပိ ဥစ္စေ ဝါ နိပန္နေနေဝ ဝဋ္ဋတီတိ ယောဇနာ။

၁၉၄၁။ ‘‘တထေဝစာ’’တိ ဣမိနာ ‘‘ဝဋ္ဋတီ’’တိ ဣဒံ ဂဟိတံ။

ဒုတိယတတိယစတုတ္ထာနိ။

၁၉၄၂။ ‘‘ပလ္လတ္ထိကာယ နိသိန္နဿာ’’တိ ဝတ္တဗ္ဗေ ဂါထာဗန္ဓဝသေန ယကာရဿ လောပံ ကတွာ ‘‘ပလ္လတ္ထိကာ နိသိန္နဿာ’’တိ ဝုတ္တံ၊ အာယောဂပလ္လတ္ထိကာယ ဝါ ဟတ္ထပလ္လတ္ထိကာယ ဝါ ဒုဿပလ္လတ္ထိကာယ ဝါ ယာယ ကာယစိ ပလ္လတ္ထိကာယ နိသိန္နဿာတိ အတ္ထော။ ဝေဌိတသီသဿာတိ ဒုဿဝေဌနေန ဝါ မောလိအာဒီဟိ ဝါ ယထာ ကေသန္တော န ဒိဿတိ၊ ဧဝံ ဝေဌိတသီသဿ။

၁၉၄၃။ ယဒိ ကေသန္တံ ဝိဝရာပေတွာ ဒေသေတိ၊ ဝဋ္ဋတီတိ ယောဇနာ။ ‘‘အယမေဝ ဝိနိစ္ဆယော’’တိ ဣမိနာ ‘‘သီသံ ဝိဝရာပေတွာ ဒေသေတိ၊ ဝဋ္ဋတီ’’တိ အနာပတ္တိဝါရောပိ ဝုတ္တော ဟောတိ။

ပဉ္စမဆဋ္ဌသတ္တမာနိ။

၁၉၄၄-၅။ အဋ္ဌမေ ‘‘အာသနေ နိသိန္နဿာတိ အန္တမသော ဝတ္ထမ္ပိ တိဏာနိပိ သန္ထရိတွာ နိသိန္နဿာ’’တိ (ပါစိ။ အဋ္ဌ။ ၆၄၅) ဣဒဉ္စ နဝမေ ‘‘ဥစ္စေ အာသနေတိ အန္တမသော ဘူမိပ္ပဒေသေပိ ဥန္နတေ ဌာနေ နိသိန္နဿ ဒေသေတုံ န ဝဋ္ဋတီ’’တိ (ပါစိ။ အဋ္ဌ။ ၆၄၇) ဣဒဉ္စ ဒသမေ ‘‘သစေပီ’’တိအာဒိနာ ဝက္ခမာနဝိနိစ္ဆယဉ္စ ဌပေတွာ ဝတ္တဗ္ဗဝိသေသာဘာဝါ အာဟ ‘‘အဋ္ဌမေ နဝမေဝါပိ၊ ဒသမေ နတ္ထိ ကိဉ္စိပီ’’တိ။ ဧတ္ထ ‘‘ဝတ္တဗ္ဗ’’န္တိ သေသော။ ထေရုပဋ္ဌာနံ ဂန္တွာန ဌိတံ ဒဟရံ အာသနေ နိသိန္နော ထေရော စေ ပဉှံ ပုစ္ဆတီတိ အဇ္ဈာဟာရယောဇနာ။ ကထေတဗ္ဗမုပါယံ ဒဿေတုမာဟ ‘‘တဿ ပဿေ ပနညဿ၊ ကထေတဗ္ဗံ ဝိဇာနတာ’’တိ။ ဧတ္ထ ‘‘ဌိတဿာ’’တိ သေသော ။ တဿ သမီပဝတ္တိနော ကဿစိ အဘာဝေ သဇ္ဈာယံ အဓိဋ္ဌဟိတွာပိ ဝတ္တုံ ဝဋ္ဋတိ။

အဋ္ဌမနဝမဒသမာနိ။

သတ္တမော ဝဂ္ဂေါ။

၁၉၄၆။ ဂစ္ဆတော ပုရတောတိ ဧတ္ထ ‘‘ပစ္ဆတော ဂစ္ဆန္တေနာ’’တိ သေသော။ ပစ္ဆတော ဂစ္ဆန္တေန ပုရတော ဂစ္ဆတော ပဉှံ န ဝတ္တဗ္ဗန္တိ ယောဇနာ။ သစေ ပုရတော ဂစ္ဆန္တော ပဉှံ ပုစ္ဆတိ၊ ကိံ ကာတဗ္ဗန္တိ အာဟ ‘‘ပစ္ဆိမဿာ’’တိအာဒိ။

၁၉၄၇။ ဥဂ္ဂဟိတံ ဓမ္မံ ပုရတော ဂစ္ဆန္တေန သဒ္ဓိံ ပစ္ဆတော ဂစ္ဆန္တော သဇ္ဈာယတိ၊ ဝဋ္ဋတီတိ ယောဇနာ။ သမမေဝ ဂစ္ဆတော ယုဂဂ္ဂါဟံ ကထေတုံ ဝဋ္ဋတီတိ ယောဇနာ။ ယုဂဂ္ဂါဟန္တိ အညမညံ။ အညမည-သဒ္ဒပရိယာယော ဟိ ယုဂဂ္ဂါဟ-သဒ္ဒေါ။

ပဌမံ။

၁၉၄၈။ သကဋမဂ္ဂေ ဧကေကဿ စက္ကဿ ပထေန ဂစ္ဆန္တော ဧကေကဿ စက္ကဿ ပထေန သမံ ဂစ္ဆတော ဓမ္မံ ဒေသေတုံ ဝဋ္ဋတိ။ ဥပ္ပထေနာပိ ဂစ္ဆန္တော ဥပ္ပထေန သမံ ဂစ္ဆန္တဿ ဓမ္မံ ဒေသေတုံ ဝဋ္ဋတီတိ အဇ္ဈာဟာရယောဇနာ။ ဥပ္ပထေနာတိ အမဂ္ဂေန။ ဧဝံ အနာပတ္တိဝိသယေ ဒဿိတေ တဗ္ဗိပရိယာယတော အာပတ္တိဝိသယော ဒဿိတောယေဝါတိ ဝေဒိတဗ္ဗော။

ဒုတိယံ။

၁၉၄၉။ တတိယေ နတ္ထိ ဝတ္တဗ္ဗန္တိ ‘‘န ဌိတော အဂိလာနော ဥစ္စာရံ ဝါ ပဿာဝံ ဝါ ကရိဿာမီ’’တိ (ပါစိ။ ၆၅၁) ဧတဿ ဝိနိစ္ဆယော ယထာရုတဝသေန သုဝိညေယျောတိ ကတွာ ဝုတ္တံ။ သစေ ပဋိစ္ဆန္နံ ဌာနံ ဂစ္ဆန္တဿ သဟသာ ဥစ္စာရော ဝါ ပဿာဝေါ ဝါ နိက္ခမတိ၊ အသဉ္စိစ္စ ကတော နာမ၊ အနာပတ္တိ။ အယမေတ္ထ ဝိသေသော ဒဋ္ဌဗ္ဗော။ သိင်္ဃာဏိကာယ ခေဠေနေဝ သင်္ဂဟိတတ္တေပိ ဗာတ္တိံသကောဋ္ဌာသေသု ဝိသုံယေဝ ဒဿိတော ဧကော ကောဋ္ဌာသောတိ သိက္ခာပဒေသု အဝုတ္တမ္ပိ သင်္ဂဟေတွာ အာဟ ‘‘ဥစ္စာရာဒိစတုက္က’’န္တိ။

၁၉၅၀။ ဧတ္ထ ဟရိတံ နာမ ဣဒန္တိ ဒဿေတုမာဟ ‘‘ဇီဝရုက္ခဿာ’’တိအာဒိ။ ရုက္ခဿာတိ ဥပလက္ခဏံ ဇီဝမာနကတိဏလတာဒီနမ္ပိ ဟရိတေယေဝ သင်္ဂဟိတတ္တာ။ ‘‘ဒိဿမာနံ ဂစ္ဆတီ’’တိ ဝစနေနေဝ အဒိဿမာနဂတံ အဟရိတန္တိ ဗျတိရေကတော ဝိညာယတိ။ သာခါ ဝါ ဘူမိလဂ္ဂါ ဒိဿမာနာ ဂစ္ဆတိ၊ တံ သဗ္ဗံ ဟရိတမေဝါတိ ယောဇနာ။

၁၉၅၁။ သဟသာ ဝစ္စံ နိက္ခမတေဝါတိ သမ္ဗန္ဓော။ အဿ ဘိက္ခုနော။ ဝစ္စန္တိ ဥပလက္ခဏံ ပဿာဝါဒီနမ္ပိ ဒဿိတတ္တာ။ ဝဋ္ဋတီတိ ဧတ္ထ ‘‘ဂိလာနဋ္ဌာနေ ဌိတတ္တာ’’တိ သေသော။

၁၉၅၂။ ပလာလဏ္ဍုပကေ ဝါပီတိ ပလာလစုမ္ဗဋကေပိ။ ဧတ္ထ ‘‘အပ္ပဟရိတံ အလဘန္တေနာ’’တိ သေသော။ ကိသ္မိဉ္စီတိ သုက္ခတိဏာဒိမှိ ကိသ္မိဉ္စိ။ တံ ဝစ္စံ ပစ္ဆာ ဟရိတံ ဩတ္ထရတိ၊ ဝဋ္ဋတီတိ ယောဇနာ။

၁၉၅၃။ ဧတီတိ ပဝိသတိ။ ဧတ္ထာတိ ဣမသ္မိံ သိက္ခာပဒေ။ ‘‘ခေဠေန ဧဝ စာ’’တိ ပဒစ္ဆေဒေါ။

တတိယစတုတ္ထာနိ။

၁၉၅၄။ ဝစ္စကုဋိသမုဒ္ဒါဒိဥဒကေသူတိ ဧတ္ထ အာဒိ-သဒ္ဒေန သဗ္ဗံ အပရိဘောဂဇလံ သင်္ဂဏှာတိ။ တေနေဝ ‘‘တေသံ အပရိဘောဂတ္တာ’’တိ အပရိဘောဂတ္တမေဝ ကာရဏမာဟ။

၁၉၅၅။ ဥဒကောဃေတိ ဧတ္ထ ‘‘ဇာတေ’’တိ သေသော။ အဇလန္တိ အဇလဋ္ဌာနံ။ ဇလေတိ ပရိဘောဂါရဟဇလေ။ ဣဓာပိ ထလကတော ဥဒကံ ဩတ္ထရတိ၊ အနာပတ္တိ။

ပဉ္စမံ။

အဋ္ဌမော ဝဂ္ဂေါ။

၁၉၅၆-၇။ ပကိဏ္ဏကဝိနိစ္ဆယံ ဒဿေတုမာဟ ‘‘သမုဋ္ဌာနာဒယော’’တိအာဒိ။ ဉေယျာတိ ဝက္ခမာနနယေန ဝေဒိတဗ္ဗာ။ ဧတ္ထာတိ ဧတေသု သေခိယေသု။ ဥဇ္ဇဂ္ဃိကာ အာဒိ ယေသန္တိ ဝိဂ္ဂဟော၊ တဂ္ဂုဏသံဝိညာဏောယံ ဗာဟိရတ္ထသမာသော၊ ဥဇ္ဇဂ္ဃိကာအပ္ပသဒ္ဒပဋိသံယုတ္တာနိ စတ္တာရိ သိက္ခာပဒါနီတိ အတ္ထော။ ဆမာ စ နီစာသနဉ္စ ဌာနဉ္စ ပစ္ဆာ စ ဥပ္ပထော စ ဆမာနီစာသနဋ္ဌာနပစ္ဆာဥပ္ပထာ၊ တေ သဒ္ဒါ ဧတေသံ သိက္ခာပဒါနံ အတ္ထီတိ တပ္ပဋိသံယုတ္တာနိ သိက္ခာပဒါနိ ဆမာ…ပေ… ဥပ္ပထဝါ၊ ဆမာဒိပဒဝန္တာနိ ပဉ္စ သိက္ခာပဒါနီတိ အတ္ထော။ ဧတ္ထ ဌာန-သဒ္ဒေန ဌာ-ဓာတုဿေဝ ရူပတ္တာ သိက္ခာပဒါဂတော ဌိတ-သဒ္ဒေါ ဂဟိတော။ ‘‘ဒသသူ’’တိ ဝတ္တဗ္ဗေ ဝဏ္ဏလောပေန၊ ဝိဘတ္တိဝိပလ္လာသေန ဝါ ‘‘ဒသာ’’တိ ဝုတ္တံ။ သမနုဘာသနေ သမုဋ္ဌာနာဒီဟိ ဧတေသု ဒသသု သိက္ခာပဒေသု သမုဋ္ဌာနာဒယော တုလျာ ဝုတ္တာတိ ယောဇနာ။

ကိံ ဝုတ္တံ ဟောတိ? ဣမာနိ ဒသ သိက္ခာပဒါနိ သမနုဘာသနသမုဋ္ဌာနာနိ၊ ဧကေကမေတ္ထ ကိရိယံ၊ သညာဝိမောက္ခံ၊ သစိတ္တကံ၊ လောကဝဇ္ဇံ၊ ကာယကမ္မံ၊ ဝစီကမ္မံ၊ အကုသလစိတ္တံ၊ ဒုက္ခဝေဒနန္တိ ဝုတ္တံ ဟောတိ။

၁၉၅၈-၉။ ‘‘ဆတ္တ’’န္တိအာဒီနိ သိက္ခာပဒါနံ ဥပလက္ခဏပဒါနိ။ ဧတာနိ ဧကာဒသ သိက္ခာပဒါနိ သမုဋ္ဌာနာဒိနာ ပန ဓမ္မဒေသနေန တုလျာဝ သဒိသာ ဧဝါတိ ယောဇနာ။ ဣဒံ ဝုတ္တံ ဟောတိ – ဣမာနိ ဧကာဒသ သိက္ခာပဒါနိ ဓမ္မဒေသနာသမုဋ္ဌာနာနိ၊ ကိရိယာကိရိယာနိ၊ သညာဝိမောက္ခာနိ၊ သစိတ္တကာနိ၊ လောကဝဇ္ဇာနိ၊ ဝစီကမ္မာနိ၊ အကုသလစိတ္တာနိ၊ ဒုက္ခဝေဒနာနီတိ။

သူပေါဒနေန ဝိညတ္တီတိ သူပေါဒန-သဒ္ဒေန လက္ခိတံ ဝိညတ္တိသိက္ခာပဒံ။ ဝိညတ္တိသိက္ခာပဒါနံ ဗဟုတ္တာ ဣဒမေဝ ဝိသေသိတံ။ ထေယျသတ္ထသမံ မတန္တိ သမုဋ္ဌာနာဒီဟိ ထေယျသတ္ထသိက္ခာပဒေန သမာနံ မတန္တိ အတ္ထော။ ဣဒံ ဝုတ္တံ ဟောတိ – သူပေါဒနဝိညတ္တိသိက္ခာပဒံ ထေယျသတ္ထသမုဋ္ဌာနံ၊ ကိရိယံ၊ သညာဝိမောက္ခံ၊ သစိတ္တကံ၊ လောကဝဇ္ဇံ၊ ကာယကမ္မံ၊ ဝစီကမ္မံ၊ အကုသလစိတ္တံ၊ ဒုက္ခဝေဒနန္တိ။

၁၉၆၀။ အဝသေသာ တိပညာသာတိ အဝသေသာနိ တေပညာသသိက္ခာပဒါနိ။ သမာနာ ပဌမေန တူတိ ပဌမေန ပါရာဇိကေန သမုဋ္ဌာနာဒိတော သမာနာနီတိ အတ္ထော၊ ပဌမပါရာဇိကသဒိသသမုဋ္ဌာနာနီတိ ဝုတ္တံ ဟောတိ။ ‘‘အနာပတ္တိ အာပဒါသူ’’တိ ပဒစ္ဆေဒေါ။ ပရိမဏ္ဍလံ နိဝါသေတွာ၊ ပါရုပိတွာ စရန္တာနံ စောရုပဒ္ဒဝါဒိ အာပဒါ နာမ။ အပိ-သဒ္ဒေန နဒိသန္တရဏာဒိံ သင်္ဂဏှာတိ။ သေခိယေသု သဗ္ဗေသူတိ ယေဘုယျဝသေန ဝုတ္တံ။

၁၉၆၁။ ‘‘န ဥဇ္ဈာနသညီ ပရေသံ ပတ္တံ ဩလောကေဿာမီ’’တိအာဒီနံ (ပါစိ။ ၆၁၄) ဣမဿ အနာပတ္တိဝါရဿ အသမ္ဘဝတော န ပနာဂတောတိ ပါဠိယံ န ဝုတ္တော။ တဿာပိ ယထာဝတ္ထုကာဝ အာပတ္တိယော ဒဋ္ဌဗ္ဗာ။

ဣတိ ဝိနယတ္ထသာရသန္ဒီပနိယာ

ဝိနယဝိနိစ္ဆယဝဏ္ဏနာယ

သေခိယကထာဝဏ္ဏနာ နိဋ္ဌိတာ။

၁၉၆၂။ ယော ဣမံ ဝိနိစ္ဆယံ ဝိဒိတွာ ဌိတော၊ သော ဟိ ယသ္မာ ဝိနယေ ဝိသာရဒေါ ဟောတိ၊ ဝိနီတမာနသော စ ဟောတိ၊ ပရေဟိ ဒုပ္ပဓံသိယော စ ဟောတိ၊ တတော တသ္မာ ကာရဏာ သမာဟိတော သတတံ ဣမံ ဝိနယဝိနိစ္ဆယံ သိက္ခေယျာတိ ယောဇနာ။

တတ္ထ ဣမံ ဝိနိစ္ဆယံ ဝိဒိတွာတိ သဗ္ဗလောကိယလောကုတ္တရဂုဏသမ္ပတ္တိနိဒါနံ ဣမံ ဝိနယဝိနိစ္ဆယံ အတ္ထတော၊ ဂန္ထတော၊ ဝိနိစ္ဆယတော စ သက္ကစ္စံ ဉတွာ။ ဝိသာရဒေါတိ သာရဇ္ဇနံ သာရဒေါ၊ ဝိဂတော သာရဒေါ အဿာတိ ဝိသာရဒေါ၊ ဝိနယပရိယတ္တိယာ၊ အာပတ္တာဒိဝိဘာဂေ စ နိဗ္ဘယော နိရာသင်္ကောတိ ဝုတ္တံ ဟောတိ။ န ကေဝလံ ဣမဿ ဇာနနေ ဧသောဝ အာနိသံသော၊ အထ ခေါ ဝိနီတမာနသော စ ဟောတိ၊ သံယတစိတ္တော ဟောတီတိ အတ္ထော။ သောတိ ဣမံ ဝိနိစ္ဆယံ သက္ကစ္စံ ဝိဒိတွာ ဌိတော ဘိက္ခု။ ပရေဟီတိ ဣမံ အဇာနန္တေဟိ အညေဟိ။ ဒုပ္ပဓံသိယော စ ဟောတီတိ အနဘိဘဝနီယော စ ဟောတိ။

တတောတိ တသ္မာ ဝိနယေ ဝိသာရဒတာဒိသဗ္ဗဂုဏသမ္ပန္နဟေတုတ္တာ။ ဟီတိ ယသ္မာတိ အတ္ထော။ သိက္ခေတိ သဇ္ဈာယနသဝနာဒိဝသေန သိက္ခေယျ၊ ဥဂ္ဂဏှေယျာတိ အတ္ထော။ ‘‘သတတ’’န္တိ ဣမိနာ သဗ္ဗတ္ထကကမ္မဋ္ဌာနေ ဝိယ ဧတ္ထာပိ သတတာဘိယောဂေါ ကာတဗ္ဗောတိ ဒဿေတိ။ ဝိက္ခိတ္တဿ ယထာဘူတပဋိဝေဓာဘာဝတော တပ္ပဋိပက္ခာယ ဧကဂ္ဂတာယ နိယောဇေန္တော အာဟ ‘‘သမာဟိတော’’တိ၊ သမ္မာ ဝိနယဝိနိစ္ဆယေ အာဟိတော ပတိဋ္ဌိတော ဧကဂ္ဂစိတ္တောတိ ဝုတ္တံ ဟောတိ။ ယထာဟ ‘‘အဝိက္ခိတ္တဿာယံ ဓမ္မော၊ နာယံ ဓမ္မော ဝိက္ခိတ္တဿာ’’တိ။

၁၉၆၃။ ဧဝံ ဣမာယ ဂါထာယ ဝုတ္တမေဝတ္ထံ ပကာရန္တရေနာပိ ဒဿေတုမာဟ ‘‘ဣမ’’န္တိအာဒိ။ တေတိ အပေက္ခိတွာ ‘‘ယေ’’တိ လဗ္ဘတိ။ ယေ ထေရာ ဝါ နဝါ ဝါ မဇ္ဈိမာ ဝါ။ ပရမန္တိ အမတမဟာနိဗ္ဗာနပ္ပတ္တိယာ မူလကာရဏဿ သီလဿ ပကာသနတော ဥတ္တမံ။ အသံကရန္တိ နိကာယန္တရလဒ္ဓီဟိ အသမ္မိဿံ။ သံကရန္တိ ဝုတ္တပ္ပကာရဂုဏောပေတတ္တာ ကာယစိတ္တသုခကာရဏံ သမ္မုခံ ကရောတီတိ သံကရံ။ သဝနာမတန္တိ သဒ္ဒရသာဒိယောဂေန ကဏ္ဏရသာယနံ။ အမတန္တိ တတောယေဝ အမတံ သုမဓုရံ။ အမတမဟာနိဗ္ဗာနာဝဟတ္တာ ဝါ ဖလူပစာရေန အမတံ။ ဣမံ ဝိနယဝိနိစ္ဆယံ။ အဝေစ္စာတိ သက္ကစ္စံ ဝိဒိတွာ။ အဓိကေတိ အဓိသီလာဒိသိက္ခတ္တယပ္ပကာသနေန ဥက္ကဋ္ဌေ။ ဟိတေတိ လောကိယလောကုတ္တရသုခဟေတုတ္တေန ဟိတေ။ ဟိနောတိ အတ္တနော ဖလန္တိ ‘‘ဟိတ’’န္တိ သုခဟေတု ဝုစ္စတိ။ ကလိသာသနေတိ လောဘာဒိကိလေသဝိဒ္ဓံသနေ။ သာသနေတိ ဝိနယပရိယတ္တိသင်္ခါတသာသနေကဒေသေ။ ပဋုတ္တန္တိ ဗျတ္တဘာဝံ။ န ယန္တိ န ဂစ္ဆန္တိ။ ကေ တေတိ ကတမေ တေ။ ‘‘န ကေစိ သန္တိ စာ’’တိ နိဿန္ဒေဟေ ဣမိဿာ ဂါထာယ အတ္ထော လိခိတော။

ဧဝံ ဧတ္ထ အတ္ထယောဇနာ ဝေဒိတဗ္ဗာ – ပရမံ ဥတ္တမံ အသံကရံ နိကာယန္တရလဒ္ဓီဟိ အသမ္မိဿံ သံကရံ သကလလောကိယလောကုတ္တရသုခါဘိနိပ္ဖာဒကံ သဝနာမတံ သောတရသာယနံ ဣမံ ဝိနိစ္ဆယပ္ပကရဏံ အဝေစ္စ သက္ကစ္စံ ဝိဒိတွာ အဓိကေ အဓိသီလာဒိသိက္ခတ္တယပ္ပကာသနေန ဥက္ကဋ္ဌေ ဟိတေ လောကိယလောကုတ္တရသုခဟေတုဘူတေ ကလိသာသနေ သကလသံကိလေသဝိဒ္ဓံသကေ သာသနေ ဝိနယပိဋကသင်္ခါတေ ပရိယတ္တိသာသနေ ယေ ပဋုတ္တံ န ယန္တိ၊ တေ ကေ နာမာတိ ယောဇနာ၊ ယေ ဣမံ ပကရဏံ အဝေစ္စ ဝိဒိတွာ ဌိတာ၊ တေ ဧကံသတော ဝိနယပိဋကေ ပဋုတ္တံ ပါပုဏန္တိ ယေဝါတိ အဓိပ္ပာယော။

ဣတိ ဝိနယတ္ထသာရသန္ဒီပနိယာ

ဝိနယဝိနိစ္ဆယဝဏ္ဏနာယ

ဘိက္ခုဝိဘင်္ဂကထာဝဏ္ဏနာ နိဋ္ဌိတာ။