📜
မူလသိက္ခာ
ဂန္ထာရမ္ဘကထာ
နတွာ ¶ ¶ နာထံ ပဝက္ခာမိ၊ မူလသိက္ခံ သမာသတော၊
ဘိက္ခုနာ နဝကေနာဒေါ၊ မူလဘာသာယ သိက္ခိတုံ။
၁။ ပါရာဇိကနိဒ္ဒေသော
သံ နိမိတ္တံ ပဝေသန္တော၊ ဘိက္ခု မဂ္ဂတ္တယေ စုတော၊
ပဝေသနဋ္ဌိတုဒ္ဓါရ-ပဝိဋ္ဌေ စေပိ သာဒိယံ။
အဒိန္နံ မာနုသံ ဘဏ္ဍံ၊ ထေယျာယေကေန အာဒိယံ၊
ပဉ္စဝီသာဝဟာရေသု၊ ဂရုကံ စေ စုတော ဘဝေ။
အာဒိယန္တော ¶ ဟရန္တောဝ-ဟရန္တောပိရိယာပထံ၊
ဝိကောပေန္တော တထာ ဌာနာ၊ စာဝေန္တောပိ ပရာဇိကော။
တတ္ထ နာနေကဘဏ္ဍာနံ၊ ပဉ္စကာနံ ဝသာ ပန၊
အဝဟာရာ ဒသဉ္စေတိ၊ ဝိညာတဗ္ဗာ ဝိဘာဝိနာ။
သာဟတ္ထာဏတ္တိကော စေဝ၊ နိဿဂ္ဂေါ စာတ္ထသာဓကော၊
ဓုရနိက္ခေပနဉ္စေဝ၊ ဣဒံ သာဟတ္ထပဉ္စကံ။
ပုဗ္ဗသဟပ္ပယောဂေါ ¶ စ၊ သံဝိဓာဟရဏမ္ပိ စ၊
သင်္ကေတကမ္မံ နိမိတ္တံ၊ ပုဗ္ဗပ္ပယောဂပဉ္စကံ။
ထေယျာပသယှပရိကပ္ပ-ပ္ပဋိစ္ဆန္နကုသာဒိကာ၊
အဝဟာရာ ဣမေ ပဉ္စ၊ ဝိညာတဗ္ဗာ ဝိဘာဝိနာ။
မနုဿပါဏံ ပါဏောတိ၊ ဇာနံ ဝဓကစေတသာ၊
ဇီဝိတာ ယော ဝိယောဇေတိ၊ သာသနာ သော ပရာဇိတော။
ဈာနာဒိဘေဒံ ဟဒယေ အသန္တံ၊
အညပဒေသဉ္စ ဝိနာဓိမာနံ၊
မနုဿဇာတိဿ ဝဒေယျ ဘိက္ခု၊
ဉာတက္ခဏေ တေန ပရာဇိကော ဘဝေတိ။
၂။ ဂရုကာပတ္တိနိဒ္ဒေသော
မောစေတုကာမစိတ္တေန၊ ဥပက္ကမ္မ ဝိမောစယံ၊
သုက္ကမညတြ သုပိနာ၊ သမဏော ဂရုကံ ဖုသေ။
ကာယသံသဂ္ဂရာဂေန ¶ ၊ မနုဿိတ္ထိံ ပရာမသံ၊
ဣတ္ထိသညီ ဥပက္ကမ္မ၊ သမဏော ဂရုကံ ဖုသေ။
ဒုဋ္ဌုလ္လဝါစဿာဒေန၊ မဂ္ဂံ ဝါရဗ္ဘ မေထုနံ၊
ဩဘာသန္တော မနုဿိတ္ထိံ၊ သုဏမာနံ ဂရုံ ဖုသေ။
ဝဏ္ဏံ ဝတွာတ္တနောကာမ-ပါရိစရိယာယ မေထုနံ၊
ဣတ္ထိံ မေထုနရာဂေန၊ ယာစမာနော ဂရုံ ဖုသေ။
သန္ဒေသံ ပဋိဂ္ဂဏှိတွာ၊ ပုရိသဿိတ္ထိယာပိ ဝါ၊
ဝီမံသိတွာ ဟရံပစ္စာ၊ သမဏော ဂရုကံ ဖုသေ။
စာဝေတုကာမော စောဒေန္တော၊ အမူလန္တိမဝတ္ထုနာ၊
စောဒါပယံ ဝါ သမဏော၊ သုဏမာနံ ဂရုံ ဖုသေ။
လေသမတ္တံ ဥပါဒါယ၊ အမူလန္တိမဝတ္ထုနာ၊
စာဝေတုကာမော စောဒေန္တော၊ သုဏမာနံ ဂရုံ ဖုသေတိ။
၃။ နိဿဂ္ဂိယနိဒ္ဒေသော
ဝိကပ္ပနမဓိဋ္ဌာန-မကတွာ ¶ ကာလစီဝရံ၊
ဒသာဟမတိမာပေတိ၊ တဿ နိဿဂ္ဂိယံ သိယာ။
ဘိက္ခုသမ္မုတိယာညတြ၊ တိစီဝရမဓိဋ္ဌိတံ၊
ဧကာဟမတိမာပေတိ၊ နိဿဂ္ဂိ သမယံ ဝိနာ။
အညာတိကာ ဘိက္ခုနိယာ၊ ပုရာဏစီဝရံ ပန၊
ဓောဝါပေတိ ရဇာပေတိ၊ အာကောဋာပေတိ တံ သိယာ။
အညာတိကာ ¶ ဘိက္ခုနိယာ၊ ဟတ္ထတော ကိဉ္စိ မူလကံ၊
အဒတွာ စီဝရာဒါနေ၊ နိဿဂ္ဂိယမုဒီရိတံ။
အပ္ပဝါရိတမညာတိံ၊ ဝိညာပေန္တဿ စီဝရံ၊
အညတြ သမယာ တဿ၊ နိဿဂ္ဂိယမုဒီရိတံ။
ရဇတံ ဇာတရူပံ ဝါ၊ မာသကံ ဝါ ကဟာပဏံ၊
ဂဏှေယျ ဝါ ဂဏှာပေယျ၊ နိဿဂ္ဂိ သာဒိယေယျ ဝါ။
ပရိဝတ္တေယျ နိဿဂ္ဂိ၊ ရဇတာဒိ စတုဗ္ဗိဓံ၊
ကပ္ပိယံ ကပ္ပိယေနာပိ၊ ဌပေတွာ သဟဓမ္မိကေ။
ဝိကပ္ပနမဓိဋ္ဌာန-မကတွာန ပမာဏိကံ၊
ဒသာဟမတိမာပေတိ၊ ပတ္တံ နိဿဂ္ဂိယံ သိယာ။
ပဉ္စဗန္ဓနတော ဦန-ပတ္တေ သတိ ပရံ ပန၊
ဝိညာပေတိ နဝံ ပတ္တံ၊ တဿ နိဿဂ္ဂိယံ သိယာ။
ပဋိဂ္ဂဟေတွာ ဘုဉ္ဇန္တော၊ သပ္ပိတေလာဒိကံ ပန၊
သတ္တာဟမတိမာပေတိ၊ တဿ နိဿဂ္ဂိယံ သိယာ။
ဘိက္ခုဿ စီဝရံ ဒတွာ၊ အစ္ဆိန္ဒန္တဿ တံ ပုန၊
သကသညာယ နိဿဂ္ဂိ၊ အစ္ဆိန္ဒာပယတောပိ ဝါ။
အပ္ပဝါရိတမညာတိံ ¶ ၊ သုတ္တံ ယာစိယ စီဝရံ၊
ဝါယာပေန္တဿ နိဿဂ္ဂိ၊ ဝိနာ ဉာတိပ္ပဝါရိတေ။
ဇာနန္တော ¶ ဘိက္ခု သင်္ဃဿ၊ လာဘံ ပရိဏတံ ပန၊
အတ္တနော ပရိဏာမေတိ၊ တဿ နိဿဂ္ဂိယံ သိယာတိ။
၄။ ပါစိတ္တိယနိဒ္ဒေသော
သမ္ပဇာနမုသာဝါဒေ၊ ပါစိတ္တိယမုဒီရိတံ၊
ဘိက္ခုဉ္စ ဩမသန္တဿ၊ ပေသုညဟရဏေပိ စ။
ဌပေတွာ ဘိက္ခုနိံ ဘိက္ခုံ၊ အညေန ပိဋကတ္တယံ၊
ပဒသောဓမ္မံ ဘဏန္တဿ၊ ပါစိတ္တိယမုဒီရိတံ။
အနုပသမ္ပန္နေနေဝ၊ သယိတွာန တိရတ္တိယံ၊
ပါစိတ္တိ သဟသေယျာယ၊ စတုတ္ထတ္ထင်္ဂတေ ပုန။
ဣတ္ထိယာ ဧကရတ္တမ္ပိ၊ သေယျံ ကပ္ပယတောပိ ဝါ၊
ဒေသေန္တဿ ဝိနာ ဝိညုံ၊ ဓမ္မဉ္စ ဆပ္ပဒုတ္တရိံ။
ဒုဋ္ဌုလ္လံ ဘိက္ခုနော ဝဇ္ဇံ၊ ဘိက္ခုသမ္မုတိယာ ဝိနာ၊
အဘိက္ခုနော ဝဒန္တဿ၊ ပါစိတ္တိယမုဒီရိတံ။
ခဏေယျ ဝါ ခဏာပေယျ၊ ပထဝိဉ္စ အကပ္ပိယံ၊
ဘူတဂါမံ ဝိကောပေယျ၊ တဿ ပါစိတ္တိယံ သိယာ။
အဇ္ဈောကာသေ တု မဉ္စာဒိံ၊ ကတွာ သန္ထရဏာဒိကံ၊
သင်္ဃိကံ ယာတိ ပါစိတ္တိ၊ အကတွာပုစ္ဆနာဒိကံ။
သင်္ဃိကာဝသထေ သေယျံ၊ ကတွာ သန္ထရဏာဒိကံ၊
အကတွာပုစ္ဆနာဒိံ ယော၊ ယာတိ ပါစိတ္တိ တဿပိ။
ဇာနံ သပ္ပာဏကံ တောယံ၊ ပါစိတ္တိ ပရိဘုဉ္ဇတော၊
အညာတိကာ ဘိက္ခုနိယာ၊ ဌပေတွာ ပါရိဝတ္တကံ။
စီဝရံ ¶ ¶ ဒေတိ ပါစိတ္တိ၊ စီဝရံ သိဗ္ဗတောပိ စ၊
အတိရိတ္တံ အကာရေတွာ၊ ပဝါရေတွာန ဘုဉ္ဇတော။
ဘိက္ခုံ အာသာဒနာပေက္ခော၊ ပဝါရေတိ ပဝါရိတံ၊
အနတိရိတ္တေန ဘုတ္တေ တု၊ ပါစိတ္တိယမုဒီရိတံ။
သန္နိဓိဘောဇနံ ဘုဉ္ဇေ၊ ဝိကာလေ ယာဝကာလိကံ၊
ဘုဉ္ဇတော ဝါပိ ပါစိတ္တိ၊ အဂိလာနော ပဏီတကံ။
ဝိညာပေတွာန ဘုဉ္ဇေယျ၊ သပ္ပိဘတ္တာဒိကမ္ပိ စ၊
အပ္ပဋိဂ္ဂဟိတံ ဘုဉ္ဇေ၊ ဒန္တကဋ္ဌောဒကံ ဝိနာ။
တိတ္ထိယဿ ဒဒေ ကိဉ္စိ၊ ဘုဉ္ဇိတဗ္ဗံ သဟတ္ထတော၊
နိသဇ္ဇံ ဝါရဟော ကပ္ပေ၊ မာတုဂါမေန စေကတော။
သုရာမေရယပါနေပိ၊ ပါစိတ္တိယမုဒီရိတံ၊
အင်္ဂုလိပတောဒကေ စာပိ၊ ဟသဓမ္မေပိ စောဒကေ။
အနာဒရေပိ ပါစိတ္တိ၊ ဘိက္ခုံ ဘီသယတောပိ ဝါ၊
ဘယာနကံ ကထံ ကတွာ၊ ဒဿေတွာ ဝါ ဘယာနကံ။
ဌပေတွာ ပစ္စယံ ကိဉ္စိ၊ အဂိလာနော ဇလေယျ ဝါ၊
ဇောတိံ ဇလာပယေယျာပိ၊ တဿ ပါစိတ္တိယံ သိယာ။
ကပ္ပဗိန္ဒုမနာဒါယ၊ နဝစီဝရဘောဂိနော၊
ဟသာပေက္ခဿ ပါစိတ္တိ၊ ဘိက္ခုနော စီဝရာဒိကံ။
အပနေတွာ ¶ နိဓေန္တဿ၊ နိဓာပေန္တဿ ဝါ ပန၊
ဇာနံ ပါဏံ မာရေန္တဿ၊ တိရစ္ဆာနဂတမ္ပိ စ။
ဆာဒေတုကာမော ဆာဒေတိ၊ ဒုဋ္ဌုလ္လံ ဘိက္ခုနောပိ စ၊
ဂါမန္တရဂတဿာပိ၊ သံဝိဓာယိတ္ထိယာ သဟ။
ဘိက္ခုံ ¶ ပဟရတော ဝါပိ၊ တလသတ္တိကမုဂ္ဂိရေ၊
စောဒေတိ ဝါ စောဒါပေတိ၊ ဂရုကာမူလကေနပိ။
ကုက္ကုစ္စုပ္ပာဒနေ စာပိ၊ ဘဏ္ဍနတ္ထာယုပဿုတိံ၊
သောတုံ ဘဏ္ဍနဇာတာနံ၊ ယာတိ ပါစိတ္တိယံ သိယာ။
သင်္ဃဿ လာဘံ ပရိဏာမိတံ တု၊
နာမေတိ ယော တံ ပရပုဂ္ဂလဿ၊
ပုစ္ဆံ အကတွာပိ စ သန္တဘိက္ခုံ၊
ပါစိတ္တိ ဂါမဿ ဂတေ ဝိကာလေတိ။
၅။ ပကိဏ္ဏကနိဒ္ဒေသော
သင်္ဃိကံ ဂရုဘဏ္ဍံ ယော၊ ဒေတိ အညဿ ဣဿရော၊
ထုလ္လစ္စယံ ယထာဝတ္ထုံ၊ ထေယျာ ပါရာဇိကာဒိပိ။
ကုသာဒိမယစီရာနိ၊ ကမ္ဗလံ ကေသဝါလဇံ၊
သမယံ ဝိနာ ဓာရယတော၊ လူကပက္ခာဇိနက္ခိပံ။
သတ္ထကမ္မေ ဝတ္ထိကမ္မေ၊ သံ နိမိတ္တဉ္စ ဆိန္ဒတော၊
ထုလ္လစ္စယံ မနုဿာနံ၊ မံသာဒိဘောဇနေပိ ဝါ။
ကဒလေရကက္ကဒုဿာနိ ¶ ၊ ပေါတ္ထကံ သဗ္ဗနီလကံ၊
သဗ္ဗပီတာဒိကဉ္စာပိ၊ ဓာရယန္တဿ ဒုက္ကဋံ။
ဟတ္ထိဿုရဂသောဏာနံ၊ သီဟဗျဂ္ဃစ္ဆဒီပိနံ၊
တရစ္ဆဿ စ မံသာဒိံ၊ ဥဒ္ဒိဿကတကမ္ပိ စ။
အနာပုစ္ဆိတမံသဉ္စ၊ ဘုဉ္ဇတော ဒုက္ကဋံ သိယာ၊
ယာတာနုပုဗ္ဗံ ဟိတွာန၊ ဒကတိတ္ထာဒိကံ ဝဇေ။
သဟသာ ¶ ဝုဗ္ဘဇိတွာန၊ ပဝိသေ နိက္ခမေယျ ဝါ၊
ဝစ္စပဿာဝကုဋိကံ၊ ဝိနာ ဥက္ကာသိကံ ဝိသေ။
နိတ္ထုနန္တော ကရေ ဝစ္စံ၊ ဒန္တကဋ္ဌဉ္စ ခါဒယံ၊
ဝစ္စပဿာဝဒေါဏီနံ၊ ဗဟိ ဝစ္စာဒိကံ ကရေ။
ခရေန စာဝလေခေယျ၊ ကဋ္ဌံ ပါတေယျ ကူပကေ၊
ဦဟတဉ္စ န ဓောဝေယျ၊ ဥက္လာပဉ္စ န သောဓယေ။
ဒကကိစ္စံ ကရောန္တဿ၊ ကတွာ ‘‘စပုစပူ’’တိ စ၊
အနဇ္ဈိဋ္ဌောဝ ထေရေန၊ ပါတိမောက္ခမ္ပိ ဥဒ္ဒိသေ။
အနာပုစ္ဆာယ ပဉှဿ၊ ကထနေ ဝိဿဇ္ဇနေပိ စ၊
သဇ္ဈာယကရဏေ ဒီပ-ဇာလနေ ဝိဇ္ဈာပနေပိ စ။
ဝါတပါနကဝါဋာနိ၊ ဝိဝရေယျ ထကေယျ ဝါ၊
ဝန္ဒနာဒိံ ကရေ နဂ္ဂေါ၊ ဂမနံ ဘောဇနာဒိကံ။
ပရိကမ္မံ ¶ ကရေ ကာရေ၊ တိပဋိစ္ဆန္နကံ ဝိနာ၊
ကာယံ နဟာယံ ဃံသေယျ၊ ကုဋ္ဋေ ထမ္ဘေ တရုမှိ ဝါ။
ကုရုဝိန္ဒကသုတ္တေန၊ အညမညဿ ကာယတော၊
အဂိလာနော ဗဟာရာမေ၊ စရေယျ သဥပါဟနော။
ဥပါဟနံ ယော ဓာရေတိ၊ သဗ္ဗနီလာဒိကမ္ပိ စ၊
နိမိတ္တံ ဣတ္ထိယာ ရတ္တော၊ မုခံ ဝါ ဘိက္ခဒါယိယာ။
ဥဇ္ဈာနသညီ အညဿ၊ ပတ္တံ ဝါ အတ္တနော မုခံ၊
အာဒါသာဒိမှိ ပဿေယျ၊ ဥစ္စာသနမဟာသနေ။
နိသဇ္ဇာဒိံ ကရောန္တဿ၊ ဒုက္ကဋံ ဝန္ဒနေပိ စ၊
ဥက္ခိတ္တာနုပသမ္ပန္န-နာနာသံဝါသကာဒိနံ။
ဧကတော ပဏ္ဍကိတ္ထီဟိ၊ ဥဘတောဗျဉ္ဇနေန ဝါ၊
ဒီဃာသနေ နိသီဒေယျ၊ အဒီဃေ အာသနေ ပန။
အသမာနာသနိကေန၊ မဉ္စပီဌေ သယေယျ ဝါ၊
ကုလသင်္ဂဟတ္ထံ ဒဒတော၊ ဖလပုပ္ဖာဒိကမ္ပိ စ။
ဂန္ထိမာဒိံ ¶ ကရေ ကာရေ၊ ဇိနဝါရိတပစ္စယေ၊
ပရိဘုဉ္ဇေယျ အဗျတ္တော၊ အနိဿာယ ဝသေယျ ဝါ။
အနုညာတေဟိ အညဿ၊ ဘေသဇ္ဇံ ဝါ ကရေ ဝဒေ၊
ကရေ သာပတ္တိကော ဘိက္ခု၊ ဥပေါသထပ္ပဝါရဏံ။
ဒွါရဗန္ဓာဒိကေ ¶ ဌာနေ၊ ပရိဝတ္တကဝါဋကံ၊
အပိဓာယ ဝိနာဘောဂံ၊ နိယောဂံ ဝါ သယေ ဒိဝါ။
ဓညိတ္ထိရူပရတနံ၊ အာဝုဓိတ္ထိပသာဓနံ၊
တူရိယဘဏ္ဍံ ဖလံ ရုက္ခေ၊ ပုဗ္ဗဏ္ဏာဒိဉ္စ အာမသေ။
သသိတ္ထောဒကတေလေဟိ၊ ဖဏဟတ္ထဖဏေဟိ ဝါ၊
ကေသမောသဏ္ဌနေကသ္မိံ၊ ဘာဇနေ ဘောဇနေပိ စ။
ဧကတ္ထရဏပါဝုရဏာ၊ သယေယျုံ ဒွေကမဉ္စကေ၊
ဒန္တကဋ္ဌဉ္စ ခါဒေယျ၊ အဓိကူနံ ပမာဏတော။
ယောဇေတိ ဝါ ယောဇာပေတိ၊ နစ္စံ ဂီတဉ္စ ဝါဒိတံ၊
ဒဿနံ သဝနံ တေသံ၊ ကရောန္တဿ စ ဒုက္ကဋံ။
ဝီဟာဒိရောပိမေ စာပိ၊ ဗဟိပါကာရကုဋ္ဋကေ၊
ဝစ္စာဒိဆဍ္ဍနာဒိမှိ၊ ဒီဃကေသာဒိဓာရဏေ။
နခမဋ္ဌကရဏာဒိမှိ၊ သမ္ဗာဓေ လောမဟာရဏေ၊
ပရိကမ္မကတံ ဘူမိံ၊ အက္ကမေ သဥပါဟနော။
အဓောတအလ္လပါဒေဟိ၊ သင်္ဃိကံ မဉ္စပီဌကံ၊
ပရိကမ္မကတံ ဘိတ္တိံ၊ အာမသန္တဿ ဒုက္ကဋံ။
သင်္ဃာဋိယာပိ ပလ္လတ္ထေ၊ ဒုပ္ပရိဘုဉ္ဇေယျ စီဝရံ၊
အကာယဗန္ဓနော ဂါမံ၊ ဝဇေ ကတွာန ဝစ္စကံ။
နာစမေယျ ¶ ဒကေ သန္တေ၊ သမာဒေယျ အကပ္ပိယေ၊
ဒေသနာရောစနာဒိမှိ၊ သဘာဂါပတ္တိယာပိ စ။
န ¶ ဝသေ ဝဿံ ဝိသံဝါဒေ၊ သုဒ္ဓစိတ္တေ ပဋိဿဝံ၊
ဝဿံ ဝသိတွာ ဂမနေ၊ အနနုညာတကိစ္စတော။
ဝိနာပဒံ တရုဿုဒ္ဓံ၊ ပေါရိသမှာဘိရူဟဏေ၊
အပရိဿာဝနောဒ္ဓါနံ၊ ဝဇေ တံ ယာစတော န ဒေ။
အတ္တနော ဃာတနေ ဣတ္ထိ-ရူပါဒိံ ကာရယေယျ ဝါ၊
ဟိတွာ မာလာဒိကံ စိတ္တံ၊ ဇာတကာဒိံ သယံ ကရေ။
ဘုဉ္ဇန္တမုဋ္ဌပေ တဿ၊ သာလာဒီသု နိသီဒတော၊
ဝုဍ္ဎာနံ ပန ဩကာသံ၊ အဒတွာ ဝါပိ ဒုက္ကဋံ။
ယာနာဒိမဘိရူဟေယျ၊ ကလ္လကော ရတနတ္တယံ၊
အာရဗ္ဘ ဝဒေ ဒဝည-ပရိသာယောပလာလနေ။
ကာယာဒိံ ဝိဝရိတွာန၊ ဘိက္ခုနီနံ န ဒဿယေ၊
ဝါစေ လောကာယတံ ပလိတံ၊ ဂဏှေယျ ဂဏှာပေယျ ဝါ။
ယတ္ထ ကတ္ထစိ ပေဠာယံ၊ ဘုဉ္ဇတော ပတ္တဟတ္ထကော၊
ဝါတပါနကဝါဋံ ဝါ၊ ပဏာမေ သောဒကမ္ပိ စ။
ဥဏှေယျ ပဋိသာမေယျ၊ အတိဥဏှေယျ ဝေါဒကံ၊
ဌပေယျ ဘူမိယံ ပတ္တံ၊ အင်္ကေ ဝါ မဉ္စပီဌကေ။
မိဍ္ဎန္တေ ¶ ပရိဘဏ္ဍန္တေ၊ ပါဒေ ဆတ္တေ ဌပေတိ ဝါ၊
စလကာဒိံ ဌပေ ပတ္တံ၊ ပတ္တေ ဝါ ဟတ္ထဓောဝနေ။
ပတ္တေန နီဟရန္တဿ၊ ဥစ္ဆိဋ္ဌမုဒကမ္ပိ စ၊
အကပ္ပိယမ္ပိ ပတ္တံ ဝါ၊ ပရိဘုဉ္ဇေယျ ဒုက္ကဋံ။
ဝဒေ ‘‘ဇီဝါ’’တိ ခိပိတေ၊ န သိက္ခတိ အနာဒရော၊
ပရိမဏ္ဍလကာဒိမှိ၊ သေခိယေ ဒုက္ကဋံ သိယာ။
ယော ¶ ဘဏ္ဍဂါရေ ပယုတောဝ ဘဏ္ဍကံ၊
မာတူန ပါစိတ္တိယမဿ ဂေါပယေ၊
ဒဝါယ ဟီနေနပိ ဇာတိအာဒိနာ၊
ဝဒေယျ ဒုဗ္ဘာသိတမုတ္တမမ္ပိ ယောတိ။
၆။ ဝတ္တာဒိကဏ္ဍနိဒ္ဒေသော
ဥပဇ္ဈာစရိယဝတ္တဉ္စ၊ ဂမိကာဂန္တုကမ္ပိ စ၊
သေနာသနာဒိဝတ္တဉ္စ၊ ကာတဗ္ဗံ ပိယသီလိနာ။
ဟတ္ထပါသေ ဌိတော ကိဉ္စိ၊ ဂဟိတဗ္ဗံ ဒဒေ တိဓာ၊
ဂဟေတုကာမော ဂဏှေယျ၊ ဒွိဓာယံ သမ္ပဋိဂ္ဂဟော။
သင်္ဃာဋိမုတ္တရာသင်္ဂံ၊ တထာ အန္တရဝါသကံ၊
‘‘ဧတံ ဣမံ အဓိဋ္ဌာမိ’’၊ တထာ ‘‘ပစ္စုဒ္ဓရာမိ’’တိ။
‘‘ဣမံ ဣမာနိ ဧတာနိ၊ ဧတမ္ပိ စီဝရ’’န္တိ ဝါ၊
‘‘ပရိက္ခာရစောဠာနီ’’တိ၊ တထာ ‘‘ပစ္စုဒ္ဓရာမိ’’တိ။
‘‘ဧတံ ¶ ဣမံ အဓိဋ္ဌာမိ၊ ပတ္တံ ပစ္စုဒ္ဓရာမိ’’တိ၊
ဧဝံ ပစ္စုဒ္ဓရေဓိဋ္ဌေ၊ စီဝရာဒိံ ယထာဝိဓိ။
သဉ္စရိတ္တံ ဝိနာ သေသာ၊ သစိတ္တာ ဂရုကန္တိမာ၊
အစ္ဆိန္နံ ပရိဏတံ ဟိတွာ၊ နိဿဂ္ဂိယမစိတ္တကံ။
ပဒသောဓမ္မံ ဒုဝေ သေယျာ၊ ဣတ္ထိယာ ဓမ္မဒေသနာ၊
ဒုဝေ သေနာသနာနီပိ၊ သိဗ္ဗနံ စီဝရဿပိ။
ပဝါရိတံ သုရာပါနံ၊ ပဉ္စသန္နိဓိအာဒိကံ၊
ဇောတိနုဇ္ဇာလနဉ္စေဝ၊ ကပ္ပဗိန္ဒုမနာဒိကံ၊
ဂါမပ္ပဝေသနန္တေတေ၊ ပါစိတ္တီသု အစိတ္တကာ။
ပကိဏ္ဏကေသု ဥဒ္ဒိဿ-ကတံ ဟိတွာညမံသကံ၊
ဧကတ္ထရဏပါဝုရဏံ၊ ဧကမဉ္စေ တုဝဋ္ဋနံ၊
ဧကတော ဘုဉ္ဇနဉ္စာပိ၊ နစ္စဂီတာဒိသတ္တပိ။
အကာယဗန္ဓနဉ္စာပိ ¶ ၊ ပတ္တဟတ္ထကဝါဋကံ၊
အစိတ္တကမိဒံ သဗ္ဗံ၊ သေသမေတ္ထ သစိတ္တကံ။
ဝီတိက္ကမနစိတ္တေန၊ သစိတ္တကမစိတ္တကံ၊
ပညတ္တိဇာနနေနာပိ၊ ဝဒန္တာစရိယာ တထာ။
ပုဗ္ဗကရဏာဒိကံ ကတွာ၊ ဥပေါသထပ္ပဝါရဏံ၊
နဝဓာ ဒီပိတံ သဗ္ဗံ၊ ကာတဗ္ဗံ ပိယသီလိနာ။
သမ္မဇ္ဇနီ ပဒီပေါ စ၊ ဥဒကံ အာသနေန စ၊
ဥပေါသထဿ ဧတာနိ၊ ပုဗ္ဗကရဏန္တိ ဝုစ္စတိ။
ဆန္ဒပါရိသုဒ္ဓိဥတုက္ခာနံ ¶ ၊ ဘိက္ခုဂဏနာ စ ဩဝါဒေါ၊
ဥပေါသထဿ ဧတာနိ၊ ပုဗ္ဗကိစ္စန္တိ ဝုစ္စတိ။
ဥပေါသထော ယာဝတိကာ စ ဘိက္ခူ ကမ္မပ္ပတ္တာ၊
သဘာဂါပတ္တိယော စ န ဝိဇ္ဇန္တိ၊
ဝဇ္ဇနီယာ စ ပုဂ္ဂလာ တသ္မိံ န ဟောန္တိ၊
ပတ္တကလ္လန္တိ ဝုစ္စတိ။
၁၁၁။ ပုဗ္ဗကရဏပုဗ္ဗကိစ္စာနိ သမာပေတွာ ဒေသိတာပတ္တိကဿ သမဂ္ဂဿ ဘိက္ခုသင်္ဃဿ အနုမတိယာ ပါတိမောက္ခံ ဥဒ္ဒိသိတုံ အာရာဓနံ ကရောမ။
ပါရိသုဒ္ဓိအဓိဋ္ဌာန-သုတ္တုဒ္ဒေသဝသာ တိဓာ၊
ဂဏပုဂ္ဂလသင်္ဃာ စ၊ တံ ကရေယျုံ ယထာက္ကမံ။
စာတုဒ္ဒသော ပန္နရသော၊ သာမဂ္ဂီ ဒိနတော တိဓာ၊
ဒိနပုဂ္ဂလကတ္တဗ္ဗာ-ကာရတော တေ နဝေရိတာ။
တယော တယောတိ ကတွာန၊ ဒိနပုဂ္ဂလဘေဒတော၊
တေဝါစီဒွေကဝါစီတိ၊ နဝ ဝုတ္တာ ပဝါရဏာ။
ကတ္တိကန္တိမပက္ခမှာ၊ ဟေမံ ဖဂ္ဂုနပုဏ္ဏမာ၊
တဿ အန္တိမပက္ခမှာ၊ ဂိမှံ အာသာဠှိပုဏ္ဏမာ၊
ဝဿကာလံ တတော သေသံ၊ စတုဝီသတုပေါသထာ။
စာတုဒ္ဒသာ ¶ ဆ ဧတေသု၊ ပက္ခာ တတိယသတ္တမာ၊
ဉေယျာ ပန္နရသာ သေသာ၊ အဋ္ဌာရသ ဥပေါသထာ။
၁၁၇။ ‘‘ဆန္ဒံ ဒမ္မိ၊ ဆန္ဒံ မေ ဟရ၊ ဆန္ဒံ မေ အာရောစေဟီ’’တိ ဆန္ဒံ ဒါတဗ္ဗံ။
၁၁၈။ ‘‘ပါရိသုဒ္ဓိံ ¶ ဒမ္မိ၊ ပါရိသုဒ္ဓိံ မေ ဟရ၊ ပါရိသုဒ္ဓိံ မေ အာရောစေဟီ’’တိ ပါရိသုဒ္ဓိ ဒါတဗ္ဗာ။
၁၁၉။ ‘‘ပဝါရဏံ ဒမ္မိ၊ ပဝါရဏံ မေ ဟရ၊ ပဝါရဏံ မေ အာရောစေဟိ၊ မမတ္ထာယ ပဝါရေဟီ’’တိ ပဝါရဏာ ဒါတဗ္ဗာ။
၁၂၀။ အာပတ္တိဒေသကေန ‘‘အဟံ၊ ဘန္တေ၊ သမ္ဗဟုလာ နာနာဝတ္ထုကာ အာပတ္တိယော အာပဇ္ဇိံ၊ တာ တုမှမူလေ ပဋိဒေသေမီ’’တိ ဝတွာ ပဋိဂ္ဂဏှန္တေန ‘‘ပဿသိ၊ အာဝုသော၊ တာ အာပတ္တိယော’’တိ ဝုတ္တေ ‘‘အာမ၊ ဘန္တေ၊ ပဿာမီ’’တိ ဝတွာ ပုန ပဋိဂ္ဂဏှန္တေန ‘‘အာယတိံ၊ အာဝုသော၊ သံဝရေယျာသီ’’တိ ဝုတ္တေ ‘‘သာဓု၊ သုဋ္ဌု၊ ဘန္တေ သံဝရိဿာမီ’’တိ တိက္ခတ္တုံ ဝတွာ ဒေသေတဗ္ဗံ။
၁၂၁။ ဝေမတိံ အာရောစေန္တေန ‘‘အဟံ၊ ဘန္တေ၊ သမ္ဗဟုလာသု နာနာဝတ္ထုကာသု အာပတ္တီသု ဝေမတိကော၊ ယဒါ နိဗ္ဗေမတိကော ဘဝိဿာမိ၊ တဒါ တာ အာပတ္တိယော ပဋိကရိဿာမီ’’တိ တိက္ခတ္တုံ ဝတွာ အာရောစေတဗ္ဗံ။
၁၂၂။ ‘‘အဇ္ဇ မေ ဥပေါသထော ‘ပန္နရသော၊ စာတုဒ္ဒသော’တိ ဝါ အဓိဋ္ဌာမီ’’တိ တိက္ခတ္တုံ ဝတွာ ပုဂ္ဂလေန အဓိဋ္ဌာနုပေါသထော ကာတဗ္ဗော။
၁၂၃။ ဒွီသု ပန ထေရေန ‘‘ပရိသုဒ္ဓါ အဟံ အာဝုသော၊ ‘ပရိသုဒ္ဓါ’တိ မံ ဓာရေဟီ’’တိ တိက္ခတ္တုံ ဝတ္တဗ္ဗံ။ နဝကေနပိ တထေဝ ဝတ္တဗ္ဗံ။ ‘‘ဘန္တေ၊ ဓာရေထာ’’တိ ဝစနံ ဝိသေသော။
၁၂၄။ တီသု ¶ ပန ‘‘သုဏန္တု မေ အာယသ္မန္တာ၊ အဇ္ဇုပေါသထော ပန္နရသော၊ ယဒါယသ္မန္တာနံ ပတ္တကလ္လံ၊ မယံ အညမညံ ပါရိသုဒ္ဓိဥပေါသထံ ကရေယျာမာ’’တိ ဉတ္တိံ ဌပေတွာ ပဋိပါဋိယာ ဝုတ္တနယေန ပါရိသုဒ္ဓိဥပေါသထော ကာတဗ္ဗော။
၁၂၅။ ‘‘အဇ္ဇ မေ ပဝါရဏာ ‘စာတုဒ္ဒသီ၊ ပန္နရသီ’တိ ဝါ အဓိဋ္ဌာမီ’’တိ တိက္ခတ္တုံ ဝတွာ ဧကေန ပဝါရေတဗ္ဗံ။
၁၂၆။ ဒွီသု ¶ ပန ထေရေန ‘‘အဟံ၊ အာဝုသော၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒတု မံ အာယသ္မာ အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ တိက္ခတ္တုံ ဝတွာ ပဝါရေတဗ္ဗံ။ နဝကေနာပိ တထေဝ ဝတ္တဗ္ဗံ။ ‘‘ဘန္တေ’’တိ ဝစနံ ဝိသေသော။
၁၂၇။ တီသု ဝါ စတူသု ဝါ ပန ‘‘သုဏန္တု မေ အာယသ္မန္တာ၊ အဇ္ဇ ပဝါရဏာ ပန္နရသီ၊ ယဒါယသ္မန္တာနံ ပတ္တကလ္လံ၊ မယံ အညမညံ ပဝါရေယျာမာ’’တိ ဉတ္တိံ ဌပေတွာ ထေရေန ‘‘အဟံ၊ အာဝုသော၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တာ အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ တိက္ခတ္တုံ ဝတွာ ပဝါရေတဗ္ဗံ။ နဝကေဟိပိ တထေဝ ပဋိပါဋိယာ ပဝါရေတဗ္ဗံ။ ‘‘ဘန္တေ’’တိဝစနံ ဝိသေသော။
၁၂၈။ စတူဟိ အဓိကေသု ပန ‘‘သုဏာတု မေ အာဝုသော သင်္ဃော၊ အဇ္ဇ ပဝါရဏာ ပန္နရသီ၊ ယဒိ သင်္ဃဿ ပတ္တကလ္လံ၊ သင်္ဃော ပဝါရေယျာ’’တိ ဉတ္တိံ ဌပေတွာ ဝုဍ္ဎတရေန ‘‘သင်္ဃံ၊ အာဝုသော၊ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ၊ ဝဒန္တု မံ အာယသ္မန္တော အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ တိက္ခတ္တုံ ဝတွာ ပဝါရေတဗ္ဗံ။ နဝကေဟိပိ တထေဝ ပဋိပါဋိယာ ‘‘သင်္ဃံ၊ ဘန္တေ၊ ပဝါရေမိ ဒိဋ္ဌေန ဝါ သုတေန ¶ ဝါ ပရိသင်္ကာယ ဝါ၊ ဝဒန္တု မံ အာယသ္မန္တော အနုကမ္ပံ ဥပါဒါယ၊ ပဿန္တော ပဋိကရိဿာမီ’’တိ တိက္ခတ္တုံ ဝတွာ ပဝါရေတဗ္ဗံ။
မူလသိက္ခာ နိဋ္ဌိတာ။
နမော တဿ ဘဂဝတော အရဟတော သမ္မာသမ္ဗုဒ္ဓဿ