📜

7-12. පච්චනීයපට්ඨානවණ්ණනා

1. ඉදානි කුසලාදීනං පදානං පටික්ඛෙපවසෙන ධම්මානං පච්චනීයතාය ලද්ධනාමං පච්චනීයපට්ඨානං දස්සෙතුං නකුසලං ධම්මං පටිච්ච නකුසලො ධම්මො උප්පජ්ජති හෙතුපච්චයාතිආදි ආරද්ධං. තත්ථ නකුසලං ධම්මං පටිච්චාති කුසලස්ස පච්චයභාවං වාරෙති. නකුසලො ධම්මො උප්පජ්ජතීති කුසලස්ස උප්පත්තිං වාරෙති, තස්මා ‘‘අකුසලාබ්යාකතං එකං ඛන්ධං පටිච්ච අකුසලාබ්යාකතා තයො ඛන්ධා චිත්තසමුට්ඨානඤ්ච රූප’’න්ති එවමාදිනා නයෙනෙත්ථ පඤ්හං විස්සජ්ජිතබ්බං. තස්මිං තස්මිං පච්චයෙ ලද්ධගණනා පන පාළියං වුත්තායෙව. යෙපි වාරා සදිසවිස්සජ්ජනා, තෙපි තත්ථෙව දස්සිතා. තස්මා සබ්බමෙත්ථ හෙට්ඨා වුත්තනයානුසාරෙන පාළිං උපපරික්ඛිත්වා වෙදිතබ්බං. යථා චෙත්ථ, එවං දුකපට්ඨානෙ, දුකතිකපට්ඨානෙ, තිකදුකපට්ඨානෙ තිකතිකපට්ඨානෙ, දුකදුකපට්ඨානෙ ච.

එත්තාවතා –

තිකඤ්ච පට්ඨානවරං දුකුත්තමං,

දුකං තිකඤ්චෙව තිකං දුකඤ්ච;

තිකං තිකඤ්චෙව, දුකං දුකඤ්ච,

ඡ පච්චනීයම්හි නයා සුගම්භීරාති. –

අට්ඨකථායං වුත්තගාථාය දීපිතා. ධම්මපච්චනීයපට්ඨානෙ ඡ නයා නිද්දිට්ඨා හොන්ති. පච්චයවසෙන පනෙත්ථ එකෙකස්මිං පට්ඨානෙ අනුලොමාදයො චත්තාරො චත්තාරො නයාති එකෙන පරියායෙන චතුවීසතිනයපටිමණ්ඩිතං පච්චනීයපට්ඨානඤ්ඤෙව වෙදිතබ්බං.

පච්චනීයපට්ඨානවණ්ණනා.