📜

12. ද්වාදසමනයො

12. සම්පයුත්තෙනසඞ්ගහිතාසඞ්ගහිතපදනිද්දෙසො

417. වෙදනාක්ඛන්ධෙන යෙ ධම්මා… සඤ්ඤාක්ඛන්ධෙන යෙ ධම්මා… සඞ්ඛාරක්ඛන්ධෙන යෙ ධම්මා සම්පයුත්තා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි සඞ්ගහිතා? තෙ ධම්මා තීහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? ද්වීහි ඛන්ධෙහි දසහායතනෙහි දසහි ධාතූහි අසඞ්ගහිතා.

418. විඤ්ඤාණක්ඛන්ධෙන යෙ ධම්මා… මනායතනෙන යෙ ධම්මා… චක්ඛුවිඤ්ඤාණධාතුයා යෙ ධම්මා…පෙ… මනොධාතුයා යෙ ධම්මා… මනොවිඤ්ඤාණධාතුයා යෙ ධම්මා සම්පයුත්තා…පෙ… තෙ ධම්මා තීහි ඛන්ධෙහි එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? ද්වීහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

419. සමුදයසච්චෙන යෙ ධම්මා… මග්ගසච්චෙන යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

420. මනින්ද්රියෙන යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? ද්වීහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

421. සුඛින්ද්රියෙන යෙ ධම්මා… දුක්ඛින්ද්රියෙන යෙ ධම්මා… සොමනස්සින්ද්රියෙන යෙ ධම්මා… දොමනස්සින්ද්රියෙන යෙ ධම්මා සම්පයුත්තා…, තෙ ධම්මා තීහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? ද්වීහි ඛන්ධෙහි දසහායතනෙහි සොළසහි ධාතූහි අසඞ්ගහිතා.

422. උපෙක්ඛින්ද්රියෙන යෙ ධම්මා සම්පයුත්තා… තෙ ධම්මා තීහි ඛන්ධෙහි ද්වීහායතනෙහි සත්තහි ධාතූහි සඞ්ගහිතා. කතිහි අසඞ්ගහිතා? ද්වීහි ඛන්ධෙහි දසහායතනෙහි එකාදසහි ධාතූහි අසඞ්ගහිතා.

423. සද්ධින්ද්රියෙන යෙ ධම්මා… වීරියින්ද්රියෙන යෙ ධම්මා… සතින්ද්රියෙන යෙ ධම්මා… සමාධින්ද්රියෙන යෙ ධම්මා… පඤ්ඤින්ද්රියෙන යෙ ධම්මා… අනඤ්ඤාතඤ්ඤස්සාමීතින්ද්රියෙන යෙ ධම්මා… අඤ්ඤින්ද්රියෙන යෙ ධම්මා… අඤ්ඤාතාවින්ද්රියෙන යෙ ධම්මා… අවිජ්ජාය යෙ ධම්මා… අවිජ්ජාපච්චයා සඞ්ඛාරෙහි යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

424. සඞ්ඛාරපච්චයා විඤ්ඤාණෙන යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? ද්වීහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

425. සළායතනපච්චයා ඵස්සෙන යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

426. ඵස්සපච්චයා වෙදනාය යෙ ධම්මා සම්පයුත්තා… තෙ ධම්මා තීහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? ද්වීහි ඛන්ධෙහි දසහායතනෙහි දසහි ධාතූහි අසඞ්ගහිතා.

427. වෙදනාපච්චයා තණ්හාය යෙ ධම්මා… තණ්හාපච්චයා උපාදානෙන යෙ ධම්මා… කම්මභවෙන යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

428. සොකෙන යෙ ධම්මා… දුක්ඛෙන යෙ ධම්මා… දොමනස්සෙන යෙ ධම්මා සම්පයුත්තා… තෙ ධම්මා තීහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? ද්වීහි ඛන්ධෙහි දසහායතනෙහි සොළසහි ධාතූහි අසඞ්ගහිතා.

429. උපායාසෙන යෙ ධම්මා… සතිපට්ඨානෙන යෙ ධම්මා… සම්මප්පධානෙන යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

430. ඉද්ධිපාදෙන යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? ද්වීහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

431. ඣානෙන යෙ ධම්මා සම්පයුත්තා… තෙ ධම්මා තීහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? ද්වීහි ඛන්ධෙහි දසහායතනෙහි සොළසහි ධාතූහි අසඞ්ගහිතා.

432. අප්පමඤ්ඤාය යෙ ධම්මා… පඤ්චහි ඉන්ද්රියෙහි යෙ ධම්මා… පඤ්චහි බලෙහි යෙ ධම්මා… සත්තහි බොජ්ඣඞ්ගෙහි යෙ ධම්මා… අරියෙන අට්ඨඞ්ගිකෙන මග්ගෙන යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

433. ඵස්සෙන යෙ ධම්මා… චෙතනාය යෙ ධම්මා… මනසිකාරෙන යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

434. වෙදනාය යෙ ධම්මා… සඤ්ඤාය යෙ ධම්මා සම්පයුත්තා… තෙ ධම්මා තීහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? ද්වීහි ඛන්ධෙහි දසහායතනෙහි දසහි ධාතූහි අසඞ්ගහිතා.

435. චිත්තෙන යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? ද්වීහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

436. අධිමොක්ඛෙන යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි තීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි පන්නරසහි ධාතූහි අසඞ්ගහිතා.

437. සුඛාය වෙදනාය සම්පයුත්තෙහි ධම්මෙහි යෙ ධම්මා… දුක්ඛාය වෙදනාය සම්පයුත්තෙහි ධම්මෙහි යෙ ධම්මා… අදුක්ඛමසුඛාය වෙදනාය සම්පයුත්තෙහි ධම්මෙහි යෙ ධම්මා… සවිතක්කසවිචාරෙහි ධම්මෙහි යෙ ධම්මා… අවිතක්කවිචාරමත්තෙහි ධම්මෙහි යෙ ධම්මා… පීතිසහගතෙහි ධම්මෙහි යෙ ධම්මා… සුඛසහගතෙහි ධම්මෙහි යෙ ධම්මා… උපෙක්ඛාසහගතෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? චතූහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

438. හෙතූහි ධම්මෙහි යෙ ධම්මා… හෙතූහි චෙව සහෙතුකෙහි ච ධම්මෙහි යෙ ධම්මා… හෙතූහි චෙව හෙතුසම්පයුත්තෙහි ච ධම්මෙහි යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

439. සහෙතුකෙහි චෙව න ච හෙතූහි ධම්මෙහි යෙ ධම්මා… හෙතුසම්පයුත්තෙහි චෙව න ච හෙතූහි ධම්මෙහි යෙ ධම්මා… න හෙතුසහෙතුකෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? චතූහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

440. ආසවෙහි ධම්මෙහි යෙ ධම්මා… ආසවෙහි චෙව සාසවෙහි ච ධම්මෙහි යෙ ධම්මා… ආසවෙහි චෙව ආසවසම්පයුත්තෙහි ච ධම්මෙහි යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

441. ආසවසම්පයුත්තෙහි චෙව නො ච ආසවෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? චතූහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

442. සංයොජනෙහි ධම්මෙහි යෙ ධම්මා… ගන්ථෙහි ධම්මෙහි යෙ ධම්මා… ඔඝෙහි ධම්මෙහි යෙ ධම්මා… යොගෙහි ධම්මෙහි යෙ ධම්මා… නීවරණෙහි ධම්මෙහි යෙ ධම්මා… පරාමාසෙහි ධම්මෙහි යෙ ධම්මා… පරාමාසෙහි චෙව පරාමට්ඨෙහි ච ධම්මෙහි යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

443. පරාමාසසම්පයුත්තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? චතූහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

444. චිත්තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? ද්වීහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

445. චෙතසිකෙහි ධම්මෙහි යෙ ධම්මා… චිත්තසම්පයුත්තෙහි ධම්මෙහි යෙ ධම්මා… චිත්තසංසට්ඨෙහි ධම්මෙහි යෙ ධම්මා… චිත්තසංසට්ඨසමුට්ඨානෙහි ධම්මෙහි යෙ ධම්මා… චිත්තසංසට්ඨසමුට්ඨානසහභූහි ධම්මෙහි යෙ ධම්මා… චිත්තසංසට්ඨසමුට්ඨානානුපරිවත්තීහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන සත්තහි ධාතූහි සඞ්ගහිතා. කතිහි අසඞ්ගහිතා? චතූහි ඛන්ධෙහි එකාදසහායතනෙහි එකාදසහි ධාතූහි අසඞ්ගහිතා.

446. උපාදානෙහි ධම්මෙහි යෙ ධම්මා… කිලෙසෙහි ධම්මෙහි යෙ ධම්මා… කිලෙසෙහි චෙව සංකිලෙසිකෙහි ච ධම්මෙහි යෙ ධම්මා… කිලෙසෙහි චෙව සංකිලිට්ඨෙහි ච ධම්මෙහි යෙ ධම්මා… කිලෙසෙහි චෙව කිලෙසසම්පයුත්තෙහි ච ධම්මෙහි යෙ ධම්මා සම්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

447. සංකිලිට්ඨෙහි චෙව නො ච කිලෙසෙහි ධම්මෙහි යෙ ධම්මා… කිලෙසසම්පයුත්තෙහි චෙව නො ච කිලෙසෙහි ධම්මෙහි යෙ ධම්මා… සවිතක්කෙහි ධම්මෙහි යෙ ධම්මා… සවිචාරෙහි ධම්මෙහි යෙ ධම්මා… සප්පීතිකෙහි ධම්මෙහි යෙ ධම්මා… පීතිසහගතෙහි ධම්මෙහි යෙ ධම්මා… සුඛසහගතෙහි ධම්මෙහි යෙ ධම්මා… උපෙක්ඛාසහගතෙහි ධම්මෙහි යෙ ධම්මා සම්පයුත්තා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි සඞ්ගහිතා? තෙ ධම්මා එකෙන ඛන්ධෙන එකෙනායතනෙන එකාය ධාතුයා සඞ්ගහිතා. කතිහි අසඞ්ගහිතා? චතූහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

රූපක්ඛන්ධා චත්තාරො, මනායතනමෙව ච;

විඤ්ඤාණධාතුයො සත්ත, ද්වෙ සච්චා චුද්දසින්ද්රියා.

පච්චයෙ ද්වාදස පදා, තතො උපරි සොළස;

තිකෙසු අට්ඨ ගොච්ඡකෙ, තෙචත්තාලීසමෙව ච.

මහන්තරදුකෙ සත්ත, පදා පිට්ඨිදුකෙසු ඡ;

නවමස්ස පදස්සෙතෙ, නිද්දෙසෙ සඞ්ගහං ගතාති.

සම්පයුත්තෙනසඞ්ගහිතාසඞ්ගහිතපදනිද්දෙසො ද්වාදසමො.