📜

14. චුද්දසමනයො

14. විප්පයුත්තෙනසඞ්ගහිතාසඞ්ගහිතපදනිද්දෙසො

1. ඛන්ධාදි

456. රූපක්ඛන්ධෙන යෙ ධම්මා විප්පයුත්තා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි සඞ්ගහිතා? තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

457. වෙදනාක්ඛන්ධෙන යෙ ධම්මා… සඤ්ඤාක්ඛන්ධෙන යෙ ධම්මා… සඞ්ඛාරක්ඛන්ධෙන යෙ ධම්මා… විඤ්ඤාණක්ඛන්ධෙන යෙ ධම්මා… මනායතනෙන යෙ ධම්මා… මනින්ද්රියෙන යෙ ධම්මා විප්පයුත්තා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි සඞ්ගහිතා? තෙ ධම්මා අසඞ්ඛතං ඛන්ධතො ඨපෙත්වා එකෙන ඛන්ධෙන එකාදසහායතනෙහි එකාදසහි ධාතූහි සඞ්ගහිතා. කතිහි අසඞ්ගහිතා? චතූහි ඛන්ධෙහි එකෙනායතනෙන සත්තහි ධාතූහි අසඞ්ගහිතා.

458. චක්ඛායතනෙන යෙ ධම්මා…පෙ… ඵොට්ඨබ්බායතනෙන යෙ ධම්මා… චක්ඛුධාතුයා යෙ ධම්මා…පෙ… ඵොට්ඨබ්බධාතුයා යෙ ධම්මා විප්පයුත්තා…පෙ… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

459. චක්ඛුවිඤ්ඤාණධාතුයා යෙ ධම්මා… සොතවිඤ්ඤාණධාතුයා යෙ ධම්මා… ඝානවිඤ්ඤාණධාතුයා යෙ ධම්මා… ජිව්හාවිඤ්ඤාණධාතුයා යෙ ධම්මා… කායවිඤ්ඤාණධාතුයා යෙ ධම්මා… මනොධාතුයා යෙ ධම්මා… මනොවිඤ්ඤාණධාතුයා යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි සත්තරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි, එකාය ධාතුයා අසඞ්ගහිතා.

2. සච්චාදි

460. දුක්ඛසච්චෙන යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

461. සමුදයසච්චෙන යෙ ධම්මා… මග්ගසච්චෙන යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

462. නිරොධසච්චෙන යෙ ධම්මා… චක්ඛුන්ද්රියෙන යෙ ධම්මා … කායින්ද්රියෙන යෙ ධම්මා… ඉත්ථින්ද්රියෙන යෙ ධම්මා… පුරිසින්ද්රියෙන යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

463. සුඛින්ද්රියෙන යෙ ධම්මා… දුක්ඛින්ද්රියෙන යෙ ධම්මා… සොමනස්සින්ද්රියෙන යෙ ධම්මා… දොමනස්සින්ද්රියෙන යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

464. උපෙක්ඛින්ද්රියෙන යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි තෙරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි පඤ්චහි ධාතූහි අසඞ්ගහිතා.

465. සද්ධින්ද්රියෙන යෙ ධම්මා… වීරියින්ද්රියෙන යෙ ධම්මා… සතින්ද්රියෙන යෙ ධම්මා… සමාධින්ද්රියෙන යෙ ධම්මා… පඤ්ඤින්ද්රියෙන යෙ ධම්මා… අනඤ්ඤාතඤ්ඤස්සාමීතින්ද්රියෙන යෙ ධම්මා… අඤ්ඤින්ද්රියෙන යෙ ධම්මා… අඤ්ඤාතාවින්ද්රියෙන යෙ ධම්මා… අවිජ්ජාය යෙ ධම්මා… අවිජ්ජාපච්චයා සඞ්ඛාරෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

466. සඞ්ඛාරපච්චයා විඤ්ඤාණෙන යෙ ධම්මා… සළායතනපච්චයා ඵස්සෙන යෙ ධම්මා… ඵස්සපච්චයා වෙදනාය යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා එකෙන ඛන්ධෙන එකාදසහායතනෙහි එකාදසහි ධාතූහි සඞ්ගහිතා. කතිහි අසඞ්ගහිතා? චතූහි ඛන්ධෙහි එකෙනායතනෙන සත්තහි ධාතූහි අසඞ්ගහිතා.

467. වෙදනාපච්චයා තණ්හාය යෙ ධම්මා… තණ්හාපච්චයා උපාදානෙන යෙ ධම්මා… කම්මභවෙන යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

468. උපපත්තිභවෙන යෙ ධම්මා… සඤ්ඤාභවෙන යෙ ධම්මා… පඤ්චවොකාරභවෙන යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි තීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි පන්නරසහි ධාතූහි අසඞ්ගහිතා.

469. කාමභවෙන යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි පඤ්චහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි තෙරසහි ධාතූහි අසඞ්ගහිතා.

470. රූපභවෙන යෙ ධම්මා… අසඤ්ඤාභවෙන යෙ ධම්මා… එකවොකාරභවෙන යෙ ධම්මා… පරිදෙවෙන යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

471. අරූපභවෙන යෙ ධම්මා… නෙවසඤ්ඤානාසඤ්ඤාභවෙන යෙ ධම්මා… චතුවොකාරභවෙන යෙ ධම්මා… සොකෙන යෙ ධම්මා… දුක්ඛෙන යෙ ධම්මා… දොමනස්සෙන යෙ ධම්මා… උපායාසෙන යෙ ධම්මා… සතිපට්ඨානෙන යෙ ධම්මා… සම්මප්පධානෙන යෙ ධම්මා… ඉද්ධිපාදෙන යෙ ධම්මා… ඣානෙන යෙ ධම්මා… අප්පමඤ්ඤාය යෙ ධම්මා… පඤ්චහි ඉන්ද්රියෙහි යෙ ධම්මා… පඤ්චහි බලෙහි යෙ ධම්මා … සත්තහි බොජ්ඣඞ්ගෙහි යෙ ධම්මා… අරියෙන අට්ඨඞ්ගිකෙන මග්ගෙන යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

3. ඵස්සාදිසත්තකං

472. ඵස්සෙන යෙ ධම්මා… වෙදනාය යෙ ධම්මා… සඤ්ඤාය යෙ ධම්මා… චෙතනාය යෙ ධම්මා… චිත්තෙන යෙ ධම්මා… මනසිකාරෙන යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා එකෙන ඛන්ධෙන එකාදසහායතනෙහි එකාදසහි ධාතූහි සඞ්ගහිතා. කතිහි අසඞ්ගහිතා? චතූහි ඛන්ධෙහි එකෙනායතනෙන සත්තහි ධාතූහි අසඞ්ගහිතා.

473. අධිමොක්ඛෙන යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි සත්තරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි එකාය ධාතුයා අසඞ්ගහිතා.

4. තිකං

474. කුසලෙහි ධම්මෙහි යෙ ධම්මා… අකුසලෙහි ධම්මෙහි යෙ ධම්මා… සුඛාය වෙදනාය සම්පයුත්තෙහි ධම්මෙහි යෙ ධම්මා… දුක්ඛාය වෙදනාය සම්පයුත්තෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

475. අබ්යාකතෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

476. අදුක්ඛමසුඛාය වෙදනාය සම්පයුත්තෙහි ධම්මෙහි යෙ ධම්මා… විපාකෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි තෙරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි පඤ්චහි ධාතූහි අසඞ්ගහිතා.

477. විපාකධම්මධම්මෙහි යෙ ධම්මා… සංකිලිට්ඨසංකිලෙසිකෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

478. නෙවවිපාකනවිපාකධම්මධම්මෙහි යෙ ධම්මා… අනුපාදින්නුපාදානියෙහි ධම්මෙහි යෙ ධම්මා… අනුපාදින්නඅනුපාදානියෙහි ධම්මෙහි යෙ ධම්මා… අසංකිලිට්ඨඅසංකිලෙසිකෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

479. උපාදින්නුපාදානියෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි තීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි පන්නරසහි ධාතූහි අසඞ්ගහිතා.

480. අසංකිලිට්ඨසංකිලෙසිකෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

481. සවිතක්කසවිචාරෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි සත්තරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි එකාය ධාතුයා අසඞ්ගහිතා.

482. අවිතක්කවිචාරමත්තෙහි ධම්මෙහි යෙ ධම්මා… පීතිසහගතෙහි ධම්මෙහි යෙ ධම්මා… සුඛසහගතෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

483. අවිතක්කඅවිචාරෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි තීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි පන්නරසහි ධාතූහි අසඞ්ගහිතා.

484. උපෙක්ඛාසහගතෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි තෙරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි පඤ්චහි ධාතූහි අසඞ්ගහිතා.

485. දස්සනෙන පහාතබ්බෙහි ධම්මෙහි යෙ ධම්මා… භාවනාය පහාතබ්බෙහි ධම්මෙහි යෙ ධම්මා… දස්සනෙන පහාතබ්බහෙතුකෙහි ධම්මෙහි යෙ ධම්මා… භාවනාය පහාතබ්බහෙතුකෙහි ධම්මෙහි යෙ ධම්මා… ආචයගාමීහි ධම්මෙහි යෙ ධම්මා… අපචයගාමීහි ධම්මෙහි යෙ ධම්මා… සෙක්ඛෙහි ධම්මෙහි යෙ ධම්මා… අසෙක්ඛෙහි ධම්මෙහි යෙ ධම්මා… මහග්ගතෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

486. නෙව දස්සනෙන න භාවනාය පහාතබ්බෙහි ධම්මෙහි යෙ ධම්මා… නෙව දස්සනෙන න භාවනාය පහාතබ්බහෙතුකෙහි ධම්මෙහි යෙ ධම්මා… නෙවාචයගාමිනාපචයගාමීහි ධම්මෙහි යෙ ධම්මා… නෙවසෙක්ඛනාසෙක්ඛෙහි ධම්මෙහි යෙ ධම්මා… පරිත්තෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

487. අප්පමාණෙහි ධම්මෙහි යෙ ධම්මා… පණීතෙහි ධම්මෙහි යෙ විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

488. පරිත්තාරම්මණෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි ද්වාදසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි ඡහි ධාතූහි අසඞ්ගහිතා.

489. මහග්ගතාරම්මණෙහි ධම්මෙහි යෙ ධම්මා… අප්පමාණාරම්මණෙහි ධම්මෙහි යෙ ධම්මා… හීනෙහි ධම්මෙහි යෙ ධම්මා… මිච්ඡත්තනියතෙහි ධම්මෙහි යෙ ධම්මා… සම්මත්තනියතෙහි ධම්මෙහි යෙ ධම්මා… මග්ගාරම්මණෙහි ධම්මෙහි යෙ ධම්මා… මග්ගහෙතුකෙහි ධම්මෙහි යෙ ධම්මා… මග්ගාධිපතීහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

490. මජ්ඣිමෙහි ධම්මෙහි යෙ ධම්මා… අනියතෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

491. උප්පන්නෙහි ධම්මෙහි යෙ ධම්මා… අනුප්පන්නෙහි ධම්මෙහි යෙ ධම්මා… උප්පාදීහි ධම්මෙහි යෙ ධම්මා… අතීතෙහි ධම්මෙහි යෙ ධම්මා… අනාගතෙහි ධම්මෙහි යෙ ධම්මා… පච්චුප්පන්නෙහි ධම්මෙහි යෙ ධම්මා… අජ්ඣත්තෙහි ධම්මෙහි යෙ ධම්මා… බහිද්ධාහි ධම්මෙහි යෙ ධම්මා… සනිදස්සනසප්පටිඝෙහි ධම්මෙහි යෙ ධම්මා… අනිදස්සනසප්පටිඝෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

492. අතීතාරම්මණෙහි ධම්මෙහි යෙ ධම්මා… අනාගතාරම්මණෙහි ධම්මෙහි යෙ ධම්මා… අජ්ඣත්තාරම්මණෙහි ධම්මෙහි යෙ ධම්මා… බහිද්ධාරම්මණෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

493. පච්චුප්පන්නාරම්මණෙහි ධම්මෙහි යෙ ධම්මා… අජ්ඣත්තබහිද්ධාරම්මණෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි ද්වාදසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි ඡහි ධාතූහි අසඞ්ගහිතා.

5. දුකං

494. හෙතූහි ධම්මෙහි යෙ ධම්මා… සහෙතුකෙහි ධම්මෙහි යෙ ධම්මා… හෙතුසම්පයුත්තෙහි ධම්මෙහි යෙ ධම්මා… හෙතූහි චෙව සහෙතුකෙහි ච ධම්මෙහි යෙ ධම්මා… සහෙතුකෙහි චෙව න ච හෙතූහි ධම්මෙහි යෙ ධම්මා… හෙතූහි චෙව හෙතුසම්පයුත්තෙහි ච ධම්මෙහි යෙ ධම්මා… හෙතුසම්පයුත්තෙහි චෙව න ච හෙතූහි ධම්මෙහි යෙ ධම්මා… න හෙතුසහෙතුකෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

495. අහෙතුකෙහි ධම්මෙහි යෙ ධම්මා… හෙතුවිප්පයුත්තෙහි ධම්මෙහි යෙ ධම්මා… න හෙතුඅහෙතුකෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

496. අප්පච්චයෙහි ධම්මෙහි යෙ ධම්මා… අසඞ්ඛතෙහි ධම්මෙහි යෙ ධම්මා… සනිදස්සනෙහි ධම්මෙහි යෙ ධම්මා… සප්පටිඝෙහි ධම්මෙහි යෙ ධම්මා… රූපීහි ධම්මෙහි යෙ ධම්මා… ලොකුත්තරෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

497. ලොකියෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

498. ආසවෙහි ධම්මෙහි යෙ ධම්මා… ආසවසම්පයුත්තෙහි ධම්මෙහි යෙ ධම්මා… ආසවෙහි චෙව සාසවෙහි ච ධම්මෙහි යෙ ධම්මා… ආසවෙහි චෙව ආසවසම්පයුත්තෙහි ච ධම්මෙහි යෙ ධම්මා… ආසවසම්පයුත්තෙහි චෙව නො ච ආසවෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

499. සාසවෙහි ධම්මෙහි යෙ ධම්මා… ආසවවිප්පයුත්තෙහි ධම්මෙහි යෙ ධම්මා… සාසවෙහි චෙව නො ච ආසවෙහි ධම්මෙහි යෙ ධම්මා… ආසවවිප්පයුත්තෙහි සාසවෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

500. අනාසවෙහි ධම්මෙහි යෙ ධම්මා… ආසවවිප්පයුත්තෙහි අනාසවෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

501. සංයොජනෙහි ධම්මෙහි යෙ ධම්මා… ගන්ථෙහි ධම්මෙහි යෙ ධම්මා… ඔඝෙහි ධම්මෙහි යෙ ධම්මා… යොගෙහි ධම්මෙහි යෙ ධම්මා… නීවරණෙහි ධම්මෙහි යෙ ධම්මා… පරාමාසෙහි ධම්මෙහි යෙ ධම්මා… පරාමාසසම්පයුත්තෙහි ධම්මෙහි යෙ ධම්මා… පරාමාසෙහි චෙව පරාමට්ඨෙහි ච ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා ? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

502. පරාමට්ඨෙහි ධම්මෙහි යෙ ධම්මා… පරාමාසවිප්පයුත්තෙහි ධම්මෙහි යෙ ධම්මා… පරාමට්ඨෙහි චෙව නො ච පරාමාසෙහි ධම්මෙහි යෙ ධම්මා… පරාමාසවිප්පයුත්තෙහි පරාමට්ඨෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

503. අපරාමට්ඨෙහි ධම්මෙහි යෙ ධම්මා… පරාමාසවිප්පයුත්තෙහි අපරාමට්ඨෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

504. සාරම්මණෙහි ධම්මෙහි යෙ ධම්මා… චිත්තෙහි ධම්මෙහි යෙ ධම්මා… චෙතසිකෙහි ධම්මෙහි යෙ ධම්මා… චිත්තසම්පයුත්තෙහි ධම්මෙහි යෙ ධම්මා… චිත්තසංසට්ඨෙහි ධම්මෙහි යෙ ධම්මා… චිත්තසංසට්ඨසමුට්ඨානෙහි ධම්මෙහි යෙ ධම්මා… චිත්තසංසට්ඨසමුට්ඨානසහභූහි ධම්මෙහි යෙ ධම්මා… චිත්තසංසට්ඨසමුට්ඨානානුපරිවත්තීහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා එකෙන ඛන්ධෙන එකාදසහායතනෙහි එකාදසහි ධාතූහි සඞ්ගහිතා. කතිහි අසඞ්ගහිතා? චතූහි ඛන්ධෙහි එකෙනායතනෙන සත්තහි ධාතූහි අසඞ්ගහිතා.

505. අනාරම්මණෙහි ධම්මෙහි යෙ ධම්මා… චිත්තවිප්පයුත්තෙහි ධම්මෙහි යෙ ධම්මා… චිත්තසංසට්ඨෙහි ධම්මෙහි යෙ ධම්මා… උපාදාධම්මෙහි යෙ ධම්මා… අනුපාදින්නෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා ? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

506. උපාදින්නෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි තීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි පන්නරසහි ධාතූහි අසඞ්ගහිතා.

507. උපාදානෙහි ධම්මෙහි යෙ ධම්මා… කිලෙසෙහි ධම්මෙහි යෙ ධම්මා… සංකිලිට්ඨෙහි ධම්මෙහි යෙ ධම්මා… කිලෙසසම්පයුත්තෙහි ධම්මෙහි යෙ ධම්මා… කිලෙසෙහි චෙව සංකිලෙසිකෙහි ච ධම්මෙහි යෙ ධම්මා… කිලෙසෙහි චෙව සංකිලිට්ඨෙහි ච ධම්මෙහි යෙ ධම්මා… සංකිලිට්ඨෙහි චෙව නො ච කිලෙසෙහි ධම්මෙහි යෙ ධම්මා… කිලෙසෙහි චෙව කිලෙසසම්පයුත්තෙහි ච ධම්මෙහි යෙ ධම්මා… කිලෙසසම්පයුත්තෙහි චෙව නො ච කිලෙසෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

508. සංකිලෙසිකෙහි ධම්මෙහි යෙ ධම්මා… අසංකිලිට්ඨෙහි ධම්මෙහි යෙ ධම්මා… කිලෙසවිප්පයුත්තෙහි ධම්මෙහි යෙ ධම්මා… සංකිලෙසිකෙහි චෙව නො ච කිලෙසෙහි ධම්මෙහි යෙ ධම්මා… කිලෙසවිප්පයුත්තෙහි සංකිලෙසිකෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

509. අසංකිලෙසිකෙහි ධම්මෙහි යෙ ධම්මා… කිලෙසවිප්පයුත්තෙහි අසංකිලෙසිකෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

510. දස්සනෙන පහාතබ්බෙහි ධම්මෙහි යෙ ධම්මා… භාවනාය පහාතබ්බෙහි ධම්මෙහි යෙ ධම්මා… දස්සනෙන පහාතබ්බහෙතුකෙහි ධම්මෙහි යෙ ධම්මා… භාවනාය පහාතබ්බහෙතුකෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

511. න දස්සනෙන පහාතබ්බෙහි ධම්මෙහි යෙ ධම්මා… න භාවනාය පහාතබ්බෙහි ධම්මෙහි යෙ ධම්මා… න දස්සනෙන පහාතබ්බහෙතුකෙහි ධම්මෙහි යෙ ධම්මා… න භාවනාය පහාතබ්බහෙතුකෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

512. සවිතක්කෙහි ධම්මෙහි යෙ ධම්මා… සවිචාරෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි සත්තරසහි ධාතූහි සඞ්ගහිතා . කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි එකාය ධාතුයා අසඞ්ගහිතා.

513. සප්පීතිකෙහි ධම්මෙහි යෙ ධම්මා… පීතිසහගතෙහි ධම්මෙහි යෙ ධම්මා… සුඛසහගතෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

514. උපෙක්ඛාසහගතෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි තෙරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි පඤ්චහි ධාතූහි අසඞ්ගහිතා.

515. කාමාවචරෙහි ධම්මෙහි යෙ ධම්මා… පරියාපන්නෙහි ධම්මෙහි යෙ ධම්මා… සඋත්තරෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

516. න කාමාවචරෙහි ධම්මෙහි යෙ ධම්මා… අපරියාපන්නෙහි ධම්මෙහි යෙ ධම්මා… අනුත්තරෙහි ධම්මෙහි යෙ ධම්මා විප්පයුත්තා… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි දසහි ධාතූහි අසඞ්ගහිතා.

517. රූපාවචරෙහි ධම්මෙහි යෙ ධම්මා… අරූපාවචරෙහි ධම්මෙහි යෙ ධම්මා… නිය්යානිකෙහි ධම්මෙහි යෙ ධම්මා… නියතෙහි ධම්මෙහි යෙ ධම්මා … සරණෙහි ධම්මෙහි යෙ ධම්මා විප්පයුත්තා… තෙ ධම්මා අසඞ්ඛතං ඛන්ධතො ඨපෙත්වා පඤ්චහි ඛන්ධෙහි ද්වාදසහායතනෙහි අට්ඨාරසහි ධාතූහි සඞ්ගහිතා. කතිහි අසඞ්ගහිතා? න කෙහිචි ඛන්ධෙහි න කෙහිචි ආයතනෙහි න කාහිචි ධාතූහි අසඞ්ගහිතා.

518. න රූපාවචරෙහි ධම්මෙහි යෙ ධම්මා… න අරූපාවචරෙහි ධම්මෙහි යෙ ධම්මා… අනිය්යානිකෙහි ධම්මෙහි යෙ ධම්මා… අනියතෙහි ධම්මෙහි යෙ ධම්මා… අරණෙහි ධම්මෙහි යෙ ධම්මා විප්පයුත්තා , තෙ ධම්මා කතිහි ඛන්ධෙහි කතිහායතනෙහි කතිහි ධාතූහි සඞ්ගහිතා? තෙ ධම්මා චතූහි ඛන්ධෙහි ද්වීහායතනෙහි ද්වීහි ධාතූහි සඞ්ගහිතා. කතිහි අසඞ්ගහිතා? එකෙන ඛන්ධෙන දසහායතනෙහි සොළසහි ධාතූහි අසඞ්ගහිතා.

ධම්මායතනං ධම්මධාතු, අථ ජීවිතං නාමරූපං;

සළායතනං ජාතිජරාමතං, ද්වෙ ච තිකෙ න ලබ්භරෙ.

පඨමන්තරෙ සත්ත ච, ගොච්ඡකෙ දස අපරන්තෙ;

චුද්දස ඡ ච මත්ථකෙ, ඉච්චෙතෙ සත්තචත්තාලීස ධම්මා;

සමුච්ඡෙදෙ න ලබ්භන්ති, මොඝපුච්ඡකෙන චාති.

විප්පයුත්තෙනසඞ්ගහිතාසඞ්ගහිතපදනිද්දෙසො චුද්දසමො.

ධාතුකථාපකරණං නිට්ඨිතං.