📜

2. දුතියනයො

2. සඞ්ගහිතෙනඅසඞ්ගහිතපදනිද්දෙසො

171. චක්ඛායතනෙන යෙ ධම්මා… ඵොට්ඨබ්බායතනෙන යෙ ධම්මා… චක්ඛුධාතුයා යෙ ධම්මා… ඵොට්ඨබ්බධාතුයා යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි අසඞ්ගහිතා? තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි අසඞ්ගහිතා.

172. චක්ඛුවිඤ්ඤාණධාතුයා යෙ ධම්මා… සොතවිඤ්ඤාණධාතුයා යෙ ධම්මා… ඝානවිඤ්ඤාණධාතුයා යෙ ධම්මා… ජිව්හාවිඤ්ඤාණධාතුයා යෙ ධම්මා… කායවිඤ්ඤාණධාතුයා යෙ ධම්මා… මනොධාතුයා යෙ ධම්මා… මනොවිඤ්ඤාණධාතුයා යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා…පෙ… තෙ ධම්මා චතූහි ඛන්ධෙහි එකාදසහායතනෙහි ද්වාදසහි ධාතූහි අසඞ්ගහිතා.

173. චක්ඛුන්ද්රියෙන යෙ ධම්මා… සොතින්ද්රියෙන යෙ ධම්මා… ඝානින්ද්රියෙන යෙ ධම්මා… ජිව්හින්ද්රියෙන යෙ ධම්මා… කායින්ද්රියෙන යෙ ධම්මා… ඉත්ථින්ද්රියෙන යෙ ධම්මා… පුරිසින්ද්රියෙන යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා…පෙ… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි අසඞ්ගහිතා.

174. අසඤ්ඤාභවෙන යෙ ධම්මා… එකවොකාරභවෙන යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා…පෙ… තෙ ධම්මා චතූහි ඛන්ධෙහි තීහායතනෙහි නවහි ධාතූහි අසඞ්ගහිතා.

175. පරිදෙවෙන යෙ ධම්මා… සනිදස්සනසප්පටිඝෙහි ධම්මෙහි යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා…පෙ… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි අසඞ්ගහිතා.

176. අනිදස්සනසප්පටිඝෙහි ධම්මෙහි යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා…පෙ… තෙ ධම්මා චතූහි ඛන්ධෙහි දසහායතනෙහි සොළසහි ධාතූහි අසඞ්ගහිතා.

177. සනිදස්සනෙහි ධම්මෙහි යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා…පෙ… තෙ ධම්මා චතූහි ඛන්ධෙහි ද්වීහායතනෙහි අට්ඨහි ධාතූහි අසඞ්ගහිතා.

178. සප්පටිඝෙහි ධම්මෙහි යෙ ධම්මා… උපාදාධම්මෙහි යෙ ධම්මා ඛන්ධසඞ්ගහෙන සඞ්ගහිතා ආයතනසඞ්ගහෙන අසඞ්ගහිතා ධාතුසඞ්ගහෙන අසඞ්ගහිතා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි අසඞ්ගහිතා? තෙ ධම්මා චතූහි ඛන්ධෙහි එකාදසහායතනෙහි සත්තරසහි ධාතූහි අසඞ්ගහිතා.

දසායතනා සත්තරස ධාතුයො,

සත්තින්ද්රියා අසඤ්ඤාභවො එකවොකාරභවො;

පරිදෙවො සනිදස්සනසප්පටිඝං,

අනිදස්සනං පුනදෙව [පුනරෙව (පී.)] සප්පටිඝං උපාදාති.

සඞ්ගහිතෙනඅසඞ්ගහිතපදනිද්දෙසො දුතියො.