📜

9. නවමනයො

9. සම්පයුත්තෙනසම්පයුත්තපදනිද්දෙසො

319. වෙදනාක්ඛන්ධෙන යෙ ධම්මා… සඤ්ඤාක්ඛන්ධෙන යෙ ධම්මා… සඞ්ඛාරක්ඛන්ධෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි සම්පයුත්තා? තෙ ධම්මා තීහි ඛන්ධෙහි එකෙනායතනෙන සත්තහි ධාතූහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

320. විඤ්ඤාණක්ඛන්ධෙන යෙ ධම්මා… මනායතනෙන යෙ ධම්මා… චක්ඛුවිඤ්ඤාණධාතුයා යෙ ධම්මා…පෙ… මනොධාතුයා යෙ ධම්මා… මනොවිඤ්ඤාණධාතුයා යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා…පෙ… තෙ ධම්මා තීහි ඛන්ධෙහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

321. සමුදයසච්චෙන යෙ ධම්මා… මග්ගසච්චෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

322. මනින්ද්රියෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

323. සුඛින්ද්රියෙන යෙ ධම්මා… දුක්ඛින්ද්රියෙන යෙ ධම්මා… සොමනස්සින්ද්රියෙන යෙ ධම්මා … දොමනස්සින්ද්රියෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

324. උපෙක්ඛින්ද්රියෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන ඡහි ධාතූහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

325. සද්ධින්ද්රියෙන යෙ ධම්මා… වීරියින්ද්රියෙන යෙ ධම්මා… සතින්ද්රියෙන යෙ ධම්මා… සමාධින්ද්රියෙන යෙ ධම්මා… පඤ්ඤින්ද්රියෙන යෙ ධම්මා… අනඤ්ඤාතඤ්ඤස්සාමීතින්ද්රියෙන යෙ ධම්මා… අඤ්ඤින්ද්රියෙන යෙ ධම්මා… අඤ්ඤාතාවින්ද්රියෙන යෙ ධම්මා… අවිජ්ජාය යෙ ධම්මා… අවිජ්ජාපච්චයා සඞ්ඛාරෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

326. සඞ්ඛාරපච්චයා විඤ්ඤාණෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

327. සළායතනපච්චයා ඵස්සෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන සත්තහි ධාතූහි සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

328. ඵස්සපච්චයා වෙදනාය යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන සත්තහි ධාතූහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

329. වෙදනාපච්චයා තණ්හාය යෙ ධම්මා… තණ්හාපච්චයා උපාදානෙන යෙ ධම්මා… කම්මභවෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

330. සොකෙන යෙ ධම්මා… දුක්ඛෙන යෙ ධම්මා… දොමනස්සෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

331. උපායාසෙන යෙ ධම්මා… සතිපට්ඨානෙන යෙ ධම්මා… සම්මප්පධානෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

332. ඉද්ධිපාදෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා ද්වීහි ඛන්ධෙහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

333. ඣානෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා ද්වීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

334. අප්පමඤ්ඤාය යෙ ධම්මා… පඤ්චහි ඉන්ද්රියෙහි යෙ ධම්මා … පඤ්චහි බලෙහි යෙ ධම්මා… සත්තහි බොජ්ඣඞ්ගෙහි යෙ ධම්මා… අරියෙන අට්ඨඞ්ගිකෙන මග්ගෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

335. ඵස්සෙන යෙ ධම්මා… චෙතනාය යෙ ධම්මා… මනසිකාරෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන සත්තහි ධාතූහි සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

336. වෙදනාය යෙ ධම්මා… සඤ්ඤාය යෙ ධම්මා සම්පයුත්තා , තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන සත්තහි ධාතූහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

337. චිත්තෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

338. අධිමොක්ඛෙන යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන ද්වීහි ධාතූහි සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

339. සුඛාය වෙදනාය සම්පයුත්තෙහි ධම්මෙහි යෙ ධම්මා… දුක්ඛාය වෙදනාය සම්පයුත්තෙහි ධම්මෙහි යෙ ධම්මා… අදුක්ඛමසුඛාය වෙදනාය සම්පයුත්තෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

340. සවිතක්කසවිචාරෙහි ධම්මෙහි යෙ ධම්මා… අවිතක්කවිචාරමත්තෙහි ධම්මෙහි යෙ ධම්මා… පීතිසහගතෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

341. සුඛසහගතෙහි ධම්මෙහි යෙ ධම්මා… උපෙක්ඛාසහගතෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

342. හෙතූහි ධම්මෙහි යෙ ධම්මා… හෙතූහි චෙව සහෙතුකෙහි ච ධම්මෙහි යෙ ධම්මා… හෙතූහි චෙව හෙතුසම්පයුත්තෙහි ච ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

343. සහෙතුකෙහි චෙව න ච හෙතූහි ධම්මෙහි යෙ ධම්මා… හෙතුසම්පයුත්තෙහි චෙව න ච හෙතූහි ධම්මෙහි යෙ ධම්මා… න හෙතුසහෙතුකෙහි ධම්මෙහි යෙ ධම්මා සම්පයුත්තා, තෙහි ධම්මෙහි [න හෙතූහි සහෙතුකෙහි (බහූසු)] යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

344. ආසවෙහි ධම්මෙහි යෙ ධම්මා… ආසවෙහි චෙව සාසවෙහි ච ධම්මෙහි යෙ ධම්මා… ආසවෙහි චෙව ආසවසම්පයුත්තෙහි ච ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

345. ආසවසම්පයුත්තෙහි චෙව නො ච ආසවෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

346. සංයොජනෙහි… ගන්ථෙහි… ඔඝෙහි… යොගෙහි… නීවරණෙහි… පරාමාසෙහි ධම්මෙහි යෙ ධම්මා… පරාමාසෙහි චෙව පරාමට්ඨෙහි ච ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

347. පරාමාසසම්පයුත්තෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

348. චිත්තෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

349. චෙතසිකෙහි ධම්මෙහි යෙ ධම්මා… චිත්තසම්පයුත්තෙහි ධම්මෙහි යෙ ධම්මා… චිත්තසංසට්ඨෙහි ධම්මෙහි යෙ ධම්මා… චිත්තසංසට්ඨසමුට්ඨානෙහි ධම්මෙහි යෙ ධම්මා… චිත්තසංසට්ඨසමුට්ඨානසහභූහි ධම්මෙහි යෙ ධම්මා… චිත්තසංසට්ඨසමුට්ඨානානුපරිවත්තීහි ධම්මෙහි යෙ ධම්මා සම්පයුත්තා , තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන සත්තහි ධාතූහි සම්පයුත්තා.

350. උපාදානෙහි ධම්මෙහි යෙ ධම්මා… කිලෙසෙහි ධම්මෙහි යෙ ධම්මා… කිලෙසෙහි චෙව සංකිලෙසිකෙහි ච ධම්මෙහි යෙ ධම්මා… කිලෙසෙහි චෙව සංකිලිට්ඨෙහි ච ධම්මෙහි යෙ ධම්මා… කිලෙසෙහි චෙව කිලෙසසම්පයුත්තෙහි ච ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා තීහි ඛන්ධෙහි එකෙනායතනෙන එකාය ධාතුයා සම්පයුත්තා; එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

351. සංකිලිට්ඨෙහි චෙව නො ච කිලෙසෙහි ධම්මෙහි යෙ ධම්මා… කිලෙසසම්පයුත්තෙහි චෙව නො ච කිලෙසෙහි ධම්මෙහි යෙ ධම්මා… සවිතක්කෙහි ධම්මෙහි යෙ ධම්මා… සවිචාරෙහි ධම්මෙහි යෙ ධම්මා… සප්පීතිකෙහි ධම්මෙහි යෙ ධම්මා… පීතිසහගතෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා… තෙ ධම්මා එකෙන ඛන්ධෙන එකෙනායතනෙන එකාය ධාතුයා කෙහිචි සම්පයුත්තා.

352. සුඛසහගතෙහි ධම්මෙහි යෙ ධම්මා… උපෙක්ඛාසහගතෙහි ධම්මෙහි යෙ ධම්මා සම්පයුත්තා, තෙහි ධම්මෙහි යෙ ධම්මා සම්පයුත්තා, තෙ ධම්මා කතිහි ඛන්ධෙහි කතිහායතනෙහි කතිහි ධාතූහි සම්පයුත්තා? තෙ ධම්මා එකෙන ඛන්ධෙන සම්පයුත්තා; එකෙනායතනෙන එකාය ධාතුයා කෙහිචි සම්පයුත්තා.

අරූපක්ඛන්ධා චත්තාරො, මනායතනමෙව ච;

විඤ්ඤාණධාතුයො සත්ත, ද්වෙ සච්චා චුද්දසින්ද්රියා.

පච්චයෙ ද්වාදස පදා, තතො උපරි සොළස;

තිකෙසු අට්ඨ ගොච්ඡකෙ, තෙචත්තාලීසමෙව ච.

මහන්තරදුකෙ සත්ත, පදා පිට්ඨි දුකෙසු ඡ;

නවමස්ස පදස්සෙතෙ, නිද්දෙසෙ සඞ්ගහං ගතාති.

සම්පයුත්තෙනසම්පයුත්තපදනිද්දෙසො නවමො.