මූල > අභිධම්මපිටක > පට්ඨානපාළි-4 > 1-55. කුසලත්තික-සාරම්මණදුකං

6. අබ්යාකතො අනාරම්මණො ධම්මො අබ්යාකතස්ස අනාරම්මණස්ස ධම්මස්ස සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො… ආහාරපච්චයෙන පච්චයො… ඉන්ද්රියපච්චයෙන පච්චයො… අත්ථිපච්චයෙන පච්චයො… අවිගතපච්චයෙන පච්චයො (සබ්බත්ථ එකං. සංඛිත්තං.)

7. කුසලො ¶ චිත්තො ධම්මො කුසලස්ස චිත්තස්ස ධම්මස්ස ආරම්මණපච්චයෙන පච්චයො (සංඛිත්තං).

ආරම්මණෙ නව, අධිපතියා සත්ත (සංඛිත්තං).

නහෙතුයා නව, නආරම්මණෙ නව (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)

8. කුසලං ¶ නොචිත්තං ධම්මං පටිච්ච කුසලො නොචිත්තො ධම්මො උප්පජ්ජති ¶ හෙතුපච්චයා… තීණි.

අකුසලං නොචිත්තං ධම්මං පටිච්ච අකුසලො නොචිත්තො ධම්මො උප්පජ්ජති හෙතුපච්චයා… තීණි.

අබ්යාකතං නොචිත්තං ධම්මං පටිච්ච අබ්යාකතො නොචිත්තො ධම්මො උප්පජ්ජති හෙතුපච්චයා. (1)

කුසලං නොචිත්තඤ්ච අබ්යාකතං නොචිත්තඤ්ච ධම්මං පටිච්ච අබ්යාකතො නොචිත්තො ධම්මො උප්පජ්ජති හෙතුපච්චයා. (1)

අකුසලං නොචිත්තඤ්ච අබ්යාකතං නොචිත්තඤ්ච ධම්මං පටිච්ච අබ්යාකතො නොචිත්තො ධම්මො උප්පජ්ජති හෙතුපච්චයා. (1)

කුසලං නොචිත්තං ධම්මං පටිච්ච කුසලො නොචිත්තො ධම්මො උප්පජ්ජති ආරම්මණපච්චයා (සංඛිත්තං).

9. හෙතුයා ¶ නව, ආරම්මණෙ තීණි, අධිපතියා නව…පෙ… අවිගතෙ නව (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).

10. කුසලො නොචිත්තො ධම්මො කුසලස්ස නොචිත්තස්ස ධම්මස්ස හෙතුපච්චයෙන පච්චයො (සංඛිත්තං).

හෙතුයා සත්ත, ආරම්මණෙ නව, අධිපතියා දස…පෙ… අවිගතෙ තෙරස (සංඛිත්තං).

11. කුසලං ¶ චෙතසිකං ධම්මං පටිච්ච කුසලො චෙතසිකො ධම්මො උප්පජ්ජති හෙතුපච්චයා. (1)

අකුසලං චෙතසිකං ධම්මං පටිච්ච අකුසලො චෙතසිකො ධම්මො උප්පජ්ජති හෙතුපච්චයා. (1)

අබ්යාකතං ¶ චෙතසිකං ධම්මං පටිච්ච අබ්යාකතො චෙතසිකො ධම්මො උප්පජ්ජති හෙතුපච්චයා. (1) (සංඛිත්තං.)

12. හෙතුයා තීණි, ආරම්මණෙ තීණි…පෙ… (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).

13. කුසලො චෙතසිකො ධම්මො කුසලස්ස චෙතසිකස්ස ධම්මස්ස හෙතුපච්චයෙන පච්චයො. (1)

අකුසලො ¶ චෙතසිකො ධම්මො අකුසලස්ස චෙතසිකස්ස ධම්මස්ස හෙතුපච්චයෙන පච්චයො. (1)

අබ්යාකතො චෙතසිකො ධම්මො අබ්යාකතස්ස චෙතසිකස්ස ධම්මස්ස හෙතුපච්චයෙන පච්චයො. (1)

කුසලො චෙතසිකො ධම්මො කුසලස්ස චෙතසිකස්ස ධම්මස්ස ආරම්මණපච්චයෙන පච්චයො… තීණි.

අකුසලො චෙතසිකො ධම්මො අකුසලස්ස චෙතසිකස්ස ධම්මස්ස ආරම්මණපච්චයෙන පච්චයො… තීණි.

අබ්යාකතො චෙතසිකො ධම්මො අබ්යාකතස්ස චෙතසිකස්ස ධම්මස්ස ආරම්මණපච්චයෙන පච්චයො… තීණි (සංඛිත්තං).

14. හෙතුයා තීණි, ආරම්මණෙ නව, අධිපතියා සත්ත…පෙ… අවිගතෙ තීණි (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)

15. කුසලං ¶ අචෙතසිකං ධම්මං පටිච්ච අබ්යාකතො අචෙතසිකො ධම්මො උප්පජ්ජති හෙතුපච්චයා. (1)

අකුසලං අචෙතසිකං ධම්මං පටිච්ච අබ්යාකතො අචෙතසිකො ධම්මො උප්පජ්ජති හෙතුපච්චයා. (1)

අබ්යාකතං අචෙතසිකං ධම්මං පටිච්ච අබ්යාකතො අචෙතසිකො ධම්මො උප්පජ්ජති හෙතුපච්චයා. (1)

කුසලං ¶ අචෙතසිකඤ්ච අබ්යාකතං අචෙතසිකඤ්ච ධම්මං පටිච්ච අබ්යාකතො අචෙතසිකො ධම්මො උප්පජ්ජති හෙතුපච්චයා. (1)

අකුසලං ¶ අචෙතසිකඤ්ච අබ්යාකතං අචෙතසිකඤ්ච ධම්මං පටිච්ච අබ්යාකතො අචෙතසිකො ධම්මො උප්පජ්ජති හෙතුපච්චයා. (1) (සංඛිත්තං.)

16. හෙතුයා පඤ්ච, ආරම්මණෙ එකං…පෙ… අවිගතෙ පඤ්ච.

නහෙතුයා එකං, නආරම්මණෙ පඤ්ච, නොවිගතෙ පඤ්ච.

(සහජාතවාරම්පි…පෙ… පඤ්හාවාරම්පි එවං විත්ථාරෙතබ්බං.)

1-58-65. කුසලත්තික-චිත්තසම්පයුත්තාදිදුකානි

17. කුසලං චිත්තසම්පයුත්තං ධම්මං පටිච්ච…පෙ… කුසලං චිත්තසංසට්ඨං ධම්මං පටිච්ච…පෙ… කුසලං චිත්තසමුට්ඨානං ධම්මං පටිච්ච…පෙ… කුසලං චිත්තසහභුං ධම්මං පටිච්ච…පෙ… කුසලං චිත්තානුපරිවත්තිං ධම්මං පටිච්ච…පෙ… කුසලං චිත්තසංසට්ඨසමුට්ඨානං ධම්මං පටිච්ච…පෙ… කුසලං චිත්තසංසට්ඨසමුට්ඨානසහභුං ධම්මං පටිච්ච…පෙ… කුසලං චිත්තසංසට්ඨසමුට්ඨානානුපරිවත්තිං ධම්මං පටිච්ච කුසලො චිත්තසංසට්ඨසමුට්ඨානානුපරිවත්ති ධම්මො උප්පජ්ජති හෙතුපච්චයා (සංඛිත්තං).

හෙතුයා තීණි, ආරම්මණෙ තීණි…පෙ… අවිගතෙ තීණි (සංඛිත්තං. සහජාතවාරම්පි…පෙ… සම්පයුත්තවාරම්පි පඤ්හාවාරම්පි එවං විත්ථාරෙතබ්බං).

18. අබ්යාකතං ¶ අජ්ඣත්තිකං ධම්මං පටිච්ච අබ්යාකතො අජ්ඣත්තිකො ධම්මො උප්පජ්ජති හෙතුපච්චයා (සංඛිත්තං).

හෙතුයා එකං, සහජාතෙ එකං…පෙ… අවිගතෙ එකං (සංඛිත්තං).

(සහජාතවාරම්පි…පෙ… සම්පයුත්තවාරම්පි පටිච්චවාරසදිසං.)

19. කුසලො ¶ ¶ අජ්ඣත්තිකො ධම්මො කුසලස්ස අජ්ඣත්තිකස්ස ධම්මස්ස ආරම්මණපච්චයෙන පච්චයො. කුසලො අජ්ඣත්තිකො ධම්මො අකුසලස්ස අජ්ඣත්තිකස්ස ධම්මස්ස ආරම්මණපච්චයෙන පච්චයො. කුසලො අජ්ඣත්තිකො ධම්මො අබ්යාකතස්ස අජ්ඣත්තිකස්ස ධම්මස්ස ආරම්මණපච්චයෙන පච්චයො. (3)

අකුසලො අජ්ඣත්තිකො ධම්මො අකුසලස්ස අජ්ඣත්තිකස්ස ධම්මස්ස ආරම්මණපච්චයෙන පච්චයො… තීණි.

අබ්යාකතො අජ්ඣත්තිකො ධම්මො අබ්යාකතස්ස අජ්ඣත්තිකස්ස ධම්මස්ස ආරම්මණපච්චයෙන පච්චයො… තීණි (සංඛිත්තං).

20. ආරම්මණෙ නව, පුරෙජාතෙ තීණි…පෙ… අවිගතෙ පඤ්ච (සංඛිත්තං. යථා කුසලත්තිකෙ පඤ්හාවාරං, එවං විත්ථාරෙතබ්බං).

21. කුසලං බාහිරං ධම්මං පටිච්ච කුසලො බාහිරො ධම්මො උප්පජ්ජති හෙතුපච්චයා (සංඛිත්තං).

හෙතුයා නව, ආරම්මණෙ තීණි…පෙ… විපාකෙ එකං…පෙ… අවිගතෙ නව (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).

22. කුසලො ¶ බාහිරො ධම්මො කුසලස්ස බාහිරස්ස ධම්මස්ස හෙතුපච්චයෙන පච්චයො (සංඛිත්තං).

හෙතුයා සත්ත, ආරම්මණෙ නව…පෙ… අවිගතෙ තෙරස (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)

23. අබ්යාකතො ¶ උපාදා ධම්මො අබ්යාකතස්ස උපාදා ධම්මස්ස ආහාරපච්චයෙන පච්චයො… ඉන්ද්රියපච්චයෙන පච්චයො… අත්ථිපච්චයෙන පච්චයො… අවිගතපච්චයෙන පච්චයො.

ආහාරෙ එකං, ඉන්ද්රියෙ අත්ථියා අවිගතෙ එකං (සංඛිත්තං).

24. කුසලං ¶ නොඋපාදා ධම්මං පටිච්ච කුසලො නොඋපාදා ධම්මො උප්පජ්ජති හෙතුපච්චයා… තීණි.

අකුසලං නොඋපාදා ධම්මං පටිච්ච අකුසලො නොඋපාදා ධම්මො උප්පජ්ජති හෙතුපච්චයා… තීණි.

අබ්යාකතං නොඋපාදා ධම්මං පටිච්ච අබ්යාකතො නොඋපාදා ධම්මො උප්පජ්ජති හෙතුපච්චයා. (1)

කුසලං නොඋපාදා ච අබ්යාකතං නොඋපාදා ච ධම්මං පටිච්ච අබ්යාකතො නොඋපාදා ධම්මො උප්පජ්ජති හෙතුපච්චයා. (1)

අකුසලං නොඋපාදා ච අබ්යාකතං නොඋපාදා ච ධම්මං පටිච්ච අබ්යාකතො නොඋපාදා ධම්මො උප්පජ්ජති හෙතුපච්චයා. (1) (සංඛිත්තං.)

25. හෙතුයා නව… (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).

26. කුසලො නොඋපාදා ධම්මො කුසලස්ස නොඋපාදා ධම්මස්ස හෙතුපච්චයෙන පච්චයො… තීණි.

අකුසලො ¶ නොඋපාදා ධම්මො අකුසලස්ස නොඋපාදා ධම්මස්ස හෙතුපච්චයෙන පච්චයො… තීණි.

අබ්යාකතො නොඋපාදා ¶ ධම්මො අබ්යාකතස්ස නොඋපාදා ධම්මස්ස හෙතුපච්චයෙන පච්චයො. (1)

27. කුසලො නොඋපාදා ධම්මො කුසලස්ස නොඋපාදා ධම්මස්ස ආරම්මණපච්චයෙන පච්චයො… තීණි.

අකුසලො නොඋපාදා ධම්මො අකුසලස්ස නොඋපාදා ධම්මස්ස ආරම්මණපච්චයෙන පච්චයො… තීණි.

අබ්යාකතො නොඋපාදා ධම්මො අබ්යාකතස්ස නොඋපාදා ධම්මස්ස ආරම්මණපච්චයෙන පච්චයො… තීණි (සංඛිත්තං).

28. හෙතුයා සත්ත, ආරම්මණෙ නව, අධිපතියා දස…පෙ… අවිගතෙ එකාදස (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)

29. අබ්යාකතං ¶ උපාදින්නං ධම්මං පටිච්ච අබ්යාකතො උපාදින්නො ධම්මො උප්පජ්ජති හෙතුපච්චයා. (1) (සංඛිත්තං.)

හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ එකං.)

30. කුසලං ¶ අනුපාදින්නං ධම්මං පටිච්ච කුසලො අනුපාදින්නො ධම්මො උප්පජ්ජති හෙතුපච්චයා… තීණි.

අකුසලං අනුපාදින්නං ධම්මං පටිච්ච අකුසලො අනුපාදින්නො ධම්මො උප්පජ්ජති හෙතුපච්චයා… තීණි ¶ .

අබ්යාකතං අනුපාදින්නං ධම්මං පටිච්ච අබ්යාකතො අනුපාදින්නො ධම්මො උප්පජ්ජති හෙතුපච්චයා. (1)

කුසලං අනුපාදින්නඤ්ච අබ්යාකතං අනුපාදින්නඤ්ච ධම්මං පටිච්ච අබ්යාකතො අනුපාදින්නො ධම්මො උප්පජ්ජති හෙතුපච්චයා. (1)

අකුසලං අනුපාදින්නඤ්ච අබ්යාකතං අනුපාදින්නඤ්ච ධම්මං පටිච්ච අබ්යාකතො අනුපාදින්නො ධම්මො උප්පජ්ජති හෙතුපච්චයා. (1) (සංඛිත්තං.)

31. හෙතුයා නව, ආරම්මණෙ තීණි…පෙ… අවිගතෙ නව (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).

32. කුසලො අනුපාදින්නො ධම්මො කුසලස්ස අනුපාදින්නස්ස ධම්මස්ස හෙතුපච්චයෙන පච්චයො… තීණි.

අකුසලො අනුපාදින්නො ධම්මො අකුසලස්ස අනුපාදින්නස්ස ධම්මස්ස හෙතුපච්චයෙන පච්චයො… තීණි.

අබ්යාකතො අනුපාදින්නො ධම්මො අබ්යාකතස්ස අනුපාදින්නස්ස ධම්මස්ස හෙතුපච්චයෙන පච්චයො. (1)

33. කුසලො ¶ අනුපාදින්නො ධම්මො කුසලස්ස අනුපාදින්නස්ස ධම්මස්ස ආරම්මණපච්චයෙන පච්චයො… තීණි.

අකුසලො ¶ අනුපාදින්නො ධම්මො අකුසලස්ස අනුපාදින්නස්ස ධම්මස්ස ආරම්මණපච්චයෙන පච්චයො… තීණි.

අබ්යාකතො අනුපාදින්නො ධම්මො අබ්යාකතස්ස අනුපාදින්නස්ස ධම්මස්ස ආරම්මණපච්චයෙන පච්චයො. අබ්යාකතො අනුපාදින්නො ධම්මො කුසලස්ස අනුපාදින්නස්ස ධම්මස්ස ආරම්මණපච්චයෙන පච්චයො. අබ්යාකතො අනුපාදින්නො ධම්මො අකුසලස්ස අනුපාදින්නස්ස ධම්මස්ස ආරම්මණපච්චයෙන පච්චයො… තීණි (සංඛිත්තං).

34. හෙතුයා සත්ත, ආරම්මණෙ නව, අධිපතියා දස, අනන්තරෙ ඡ…පෙ… සහජාතෙ නව, නිස්සයෙ නව, උපනිස්සයෙ නව…පෙ… අවිගතෙ එකාදස (සංඛිත්තං).

කුසලත්තිකමහන්තරදුකං නිට්ඨිතං.

1-69-74. කුසලත්තික-උපාදානාදිදුකානි

35. අකුසලං ¶ උපාදානං ධම්මං පටිච්ච අකුසලො උපාදානො ධම්මො උප්පජ්ජති හෙතුපච්චයා (සංඛිත්තං).

හෙතුයා එකං, ආරම්මණෙ එකං…පෙ… අවිගතෙ එකං (උපාදානගොච්ඡකං විත්ථාරෙතබ්බං).

කුසලත්තිකඋපාදානගොච්ඡකං නිට්ඨිතං.