📜

2. පරිහානිකථා

1. වාදයුත්තිපරිහානි

239. පරිහායති අරහා අරහත්තාති? ආමන්තා. සබ්බත්ථ අරහා අරහත්තා පරිහායතීති? න හෙවං වත්තබ්බෙ…පෙ… සබ්බත්ථ අරහා අරහත්තා පරිහායතීති? ආමන්තා. සබ්බත්ථ අරහතො පරිහානීති? න හෙවං වත්තබ්බෙ…පෙ….

පරිහායති අරහා අරහත්තාති? ආමන්තා . සබ්බදා අරහා අරහත්තා පරිහායතීති? න හෙවං වත්තබ්බෙ…පෙ… සබ්බදා අරහා අරහත්තා පරිහායතීති? ආමන්තා. සබ්බදා අරහතො පරිහානීති? න හෙවං වත්තබ්බෙ…පෙ….

පරිහායති අරහා අරහත්තාති? ආමන්තා. සබ්බෙව අරහන්තො අරහත්තා පරිහායන්තීති? න හෙවං වත්තබ්බෙ…පෙ… සබ්බෙව අරහන්තො අරහත්තා පරිහායන්තීති? ආමන්තා. සබ්බෙසංයෙව අරහන්තානං පරිහානීති? න හෙවං වත්තබ්බෙ…පෙ….

පරිහායති අරහා අරහත්තාති? ආමන්තා. අරහා අරහත්තා පරිහායමානො චතූහි ඵලෙහි පරිහායතීති? න හෙවං වත්තබ්බෙ…පෙ….

චතූහි සතසහස්සෙහි සෙට්ඨී සෙට්ඨිත්තං කාරෙන්තො සතසහස්සෙ පරිහීනෙ සෙට්ඨිත්තා පරිහීනො හොතීති? ආමන්තා. සබ්බසාපතෙය්යා පරිහීනො හොතීති? න හෙවං වත්තබ්බෙ…පෙ….

චතූහි සතසහස්සෙහි සෙට්ඨී සෙට්ඨිත්තං කාරෙන්තො සතසහස්සෙ පරිහීනෙ භබ්බො සබ්බසාපතෙය්යා පරිහායිතුන්ති? ආමන්තා. අරහා අරහත්තා පරිහායමානො භබ්බො චතූහි ඵලෙහි පරිහායිතුන්ති? න හෙවං වත්තබ්බෙ…පෙ….

2. අරියපුග්ගලසංසන්දනපරිහානි

240. පරිහායති අරහා අරහත්තාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

පරිහායති අරහා අරහත්තාති? ආමන්තා. පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

පරිහායති අරහා අරහත්තාති? ආමන්තා. පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

පරිහායති අනාගාමී අනාගාමිඵලාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

පරිහායති අනාගාමී අනාගාමිඵලාති? ආමන්තා. පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

පරිහායති සකදාගාමී සකදාගාමිඵලාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

න පරිහායති සොතාපන්නො සොතාපත්තිඵලාති? ආමන්තා. න පරිහායති අරහා අරහත්තාති? න හෙවං වත්තබ්බෙ…පෙ….

න පරිහායති සකදාගාමී සකදාගාමිඵලාති? ආමන්තා. න පරිහායති අරහා අරහත්තාති? න හෙවං වත්තබ්බෙ…පෙ….

න පරිහායති අනාගාමී අනාගාමිඵලාති? ආමන්තා. න පරිහායති අරහා අරහත්තාති? න හෙවං වත්තබ්බෙ…පෙ….

න පරිහායති සොතාපන්නො සොතාපත්තිඵලාති? ආමන්තා. න පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

න පරිහායති සකදාගාමී සකදාගාමිඵලාති? ආමන්තා . න පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

න පරිහායති සොතාපන්නො සොතාපත්තිඵලාති? ආමන්තා. න පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

241. පරිහායති අරහා අරහත්තාති? ආමන්තා. අරහා අරහත්තා පරිහායමානො කත්ථ සණ්ඨාතීති? අනාගාමිඵලෙති. අනාගාමී අනාගාමිඵලා පරිහායමානො කත්ථ සණ්ඨාතීති? සකදාගාමිඵලෙති. සකදාගාමී සකදාගාමිඵලා පරිහායමානො කත්ථ සණ්ඨාතීති? සොතාපත්තිඵලෙති. සොතාපන්නො සොතාපත්තිඵලා පරිහායමානො පුථුජ්ජනභූමියං සණ්ඨාතීති? න හෙවං වත්තබ්බෙ.

ආජානාහි නිග්ගහං. හඤ්චි අරහා අරහත්තා පරිහායමානො අනාගාමිඵලෙ සණ්ඨාති, අනාගාමී අනාගාමිඵලා පරිහායමානො සකදාගාමිඵලෙ සණ්ඨාති, සකදාගාමී සකදාගාමිඵලා පරිහායමානො සොතාපත්තිඵලෙ සණ්ඨාති; තෙන වත රෙ වත්තබ්බෙ – ‘‘සොතාපන්නො සොතාපත්තිඵලා පරිහායමානො පුථුජ්ජනභූමියං සණ්ඨාතී’’ති.

අරහා අරහත්තා පරිහායමානො සොතාපත්තිඵලෙ සණ්ඨාතීති? ආමන්තා. සොතාපත්තිඵලස්ස අනන්තරා අරහත්තංයෙව සච්ඡිකරොතීති? න හෙවං වත්තබ්බෙ…පෙ….

242. පරිහායති අරහා අරහත්තාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ… කස්ස බහුතරා කිලෙසා පහීනා අරහතො වා සොතාපන්නස්ස වාති? අරහතො. හඤ්චි අරහතො බහුතරා කිලෙසා පහීනා, පරිහායති අරහා අරහත්තා; තෙන වත රෙ වත්තබ්බෙ – ‘‘පරිහායති සොතාපන්නො සොතාපත්තිඵලා’’ති.

පරිහායති අරහා අරහත්තාති? ආමන්තා. පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ… කස්ස බහුතරා කිලෙසා පහීනා අරහතො වා සකදාගාමිස්ස වාති? අරහතො. හඤ්චි අරහතො බහුතරා කිලෙසා පහීනා, පරිහායති අරහා අරහත්තා; තෙන වත රෙ වත්තබ්බෙ – ‘‘පරිහායති සකදාගාමී සකදාගාමිඵලා’’ති.

පරිහායති අරහා අරහත්තාති? ආමන්තා. පරිහායති අනාගාමී අනාගාමිඵලාති? න හෙවං වත්තබ්බෙ…පෙ… කස්ස බහුතරා කිලෙසා පහීනා අරහතො වා අනාගාමිස්ස වාති? අරහතො. හඤ්චි අරහතො බහුතරා කිලෙසා පහීනා, පරිහායති අරහා අරහත්තා; තෙන වත රෙ වත්තබ්බෙ – ‘‘පරිහායති අනාගාමී අනාගාමිඵලා’’ති.

පරිහායති අනාගාමී අනාගාමිඵලාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ… කස්ස බහුතරා කිලෙසා පහීනා අනාගාමිස්ස වා සොතාපන්නස්ස වාති? අනාගාමිස්ස. හඤ්චි අනාගාමිස්ස බහුතරා කිලෙසා පහීනා, පරිහායති අනාගාමී අනාගාමිඵලා; තෙන වත රෙ වත්තබ්බෙ – ‘‘පරිහායති සොතාපන්නො සොතාපත්තිඵලා’’ති.

243. පරිහායති අනාගාමී අනාගාමිඵලාති? ආමන්තා. පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ… කස්ස බහුතරා කිලෙසා පහීනා අනාගාමිස්ස වා සකදාගාමිස්ස වාති? අනාගාමිස්ස. හඤ්චි අනාගාමිස්ස බහුතරා කිලෙසා පහීනා, පරිහායති අනාගාමී අනාගාමිඵලා; තෙන වත රෙ වත්තබ්බෙ – ‘‘පරිහායති සකදාගාමී සකදාගාමිඵලා’’ති.

පරිහායති සකදාගාමී සකදාගාමිඵලාති? ආමන්තා. පරිහායති සොතාපන්නො සොතාපත්තිඵලාති ? න හෙවං වත්තබ්බෙ…පෙ… කස්ස බහුතරා කිලෙසා පහීනා සකදාගාමිස්ස වා සොතාපන්නස්ස වාති? සකදාගාමිස්ස. හඤ්චි සකදාගාමිස්ස බහුතරා කිලෙසා පහීනා, පරිහායති සකදාගාමී සකදාගාමිඵලා; තෙන වත රෙ වත්තබ්බෙ – ‘‘පරිහායති සොතාපන්නො සොතාපත්තිඵලා’’ති.

244. පරිහායති අරහා අරහත්තාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ… කස්ස අධිමත්තා මග්ගභාවනා අරහතො වා සොතාපන්නස්ස වාති? අරහතො. හඤ්චි අරහතො අධිමත්තා මග්ගභාවනා, පරිහායති අරහා අරහත්තා; තෙන වත රෙ වත්තබ්බෙ – ‘‘පරිහායති සොතාපන්නො සොතාපත්තිඵලා’’ති.

පරිහායති අරහා අරහත්තාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ… කස්ස අධිමත්තා සතිපට්ඨානභාවනා…පෙ… සම්මප්පධානභාවනා… ඉද්ධිපාදභාවනා… ඉන්ද්රියභාවනා … බලභාවනා… බොජ්ඣඞ්ගභාවනා අරහතො වා සොතාපන්නස්ස වාති? අරහතො. හඤ්චි අරහතො අධිමත්තා බොජ්ඣඞ්ගභාවනා, පරිහායති අරහා අරහත්තා; තෙන වත රෙ වත්තබ්බෙ – ‘‘පරිහායති සොතාපන්නො සොතාපත්තිඵලා’’ති.

පරිහායති අරහා අරහත්තාති? ආමන්තා. පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ… කස්ස අධිමත්තා මග්ගභාවනා…පෙ… බොජ්ඣඞ්ගභාවනා අරහතො වා සකදාගාමිස්ස වාති? අරහතො. හඤ්චි අරහතො අධිමත්තා බොජ්ඣඞ්ගභාවනා, පරිහායති අරහා අරහත්තා; තෙන වත රෙ වත්තබ්බෙ – ‘‘පරිහායති සකදාගාමී සකදාගාමිඵලා’’ති.

පරිහායති අරහා අරහත්තාති? ආමන්තා. පරිහායති අනාගාමී අනාගාමිඵලාති? න හෙවං වත්තබ්බෙ…පෙ… කස්ස අධිමත්තා මග්ගභාවනා…පෙ… බොජ්ඣඞ්ගභාවනා අරහතො වා අනාගාමිස්ස වාති? අරහතො. හඤ්චි අරහතො අධිමත්තා බොජ්ඣඞ්ගභාවනා, පරිහායති අරහා අරහත්තා; තෙන වත රෙ වත්තබ්බෙ – ‘‘පරිහායති අනාගාමී අනාගාමිඵලා’’ති.

245. පරිහායති අනාගාමී අනාගාමිඵලාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ… කස්ස අධිමත්තා මග්ගභාවනා…පෙ… බොජ්ඣඞ්ගභාවනා අනාගාමිස්ස වා සොතාපන්නස්ස වාති? අනාගාමිස්ස. හඤ්චි අනාගාමිස්ස අධිමත්තා බොජ්ඣඞ්ගභාවනා, පරිහායති අනාගාමී අනාගාමිඵලා; තෙන වත රෙ වත්තබ්බෙ – ‘‘පරිහායති සොතාපන්නො සොතාපත්තිඵලා’’ති.

පරිහායති අනාගාමී අනාගාමිඵලාති? ආමන්තා. පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ… කස්ස අධිමත්තා මග්ගභාවනා…පෙ… බොජ්ඣඞ්ගභාවනා අනාගාමිස්ස වා සකදාගාමිස්ස වාති? අනාගාමිස්ස. හඤ්චි අනාගාමිස්ස අධිමත්තා බොජ්ඣඞ්ගභාවනා, පරිහායති අනාගාමී අනාගාමිඵලා; තෙන වත රෙ වත්තබ්බෙ – ‘‘පරිහායති සකදාගාමී සකදාගාමිඵලා’’ති.

246. පරිහායති සකදාගාමී සකදාගාමිඵලාති? ආමන්තා. පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ… කස්ස අධිමත්තා මග්ගභාවනා…පෙ… බොජ්ඣඞ්ගභාවනා සකදාගාමිස්ස වා සොතාපන්නස්ස වාති? සකදාගාමිස්ස. හඤ්චි සකදාගාමිස්ස අධිමත්තා බොජ්ඣඞ්ගභාවනා, පරිහායති සකදාගාමී සකදාගාමිඵලා; තෙන වත රෙ වත්තබ්බෙ – ‘‘පරිහායති සොතාපන්නො සොතාපත්තිඵලා’’ති…පෙ….

247. අරහතා දුක්ඛං දිට්ඨං, පරිහායති අරහා අරහත්තාති? ආමන්තා. සොතාපන්නෙන දුක්ඛං දිට්ඨං, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතා සමුදයො දිට්ඨො, පරිහායති අරහා අරහත්තාති ? ආමන්තා. සොතාපන්නෙන සමුදයො දිට්ඨො, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතා නිරොධො දිට්ඨො, පරිහායති අරහා අරහත්තාති? ආමන්තා. සොතාපන්නෙන නිරොධො දිට්ඨො, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතා මග්ගො දිට්ඨො, පරිහායති අරහා අරහත්තාති? ආමන්තා. සොතාපන්නෙන මග්ගො දිට්ඨො, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතා චත්තාරි සච්චානි දිට්ඨානි, පරිහායති අරහා අරහත්තාති? ආමන්තා. සොතාපන්නෙන චත්තාරි සච්චානි දිට්ඨානි, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතා දුක්ඛං දිට්ඨං, පරිහායති අරහා අරහත්තාති? ආමන්තා. සකදාගාමිනා දුක්ඛං දිට්ඨං, පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

අරහතා සමුදයො දිට්ඨො…පෙ… නිරොධො දිට්ඨො…පෙ… මග්ගො දිට්ඨො…පෙ… චත්තාරි සච්චානි දිට්ඨානි, පරිහායති අරහා අරහත්තාති? ආමන්තා. සකදාගාමිනා චත්තාරි සච්චානි දිට්ඨානි, පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

අරහතා දුක්ඛං දිට්ඨං, පරිහායති අරහා අරහත්තාති? ආමන්තා. අනාගාමිනා දුක්ඛං දිට්ඨං, පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

අරහතා සමුදයො දිට්ඨො…පෙ… නිරොධො දිට්ඨො…පෙ… මග්ගො දිට්ඨො…පෙ… චත්තාරි සච්චානි දිට්ඨානි, පරිහායති අරහා අරහත්තාති? ආමන්තා. අනාගාමිනා චත්තාරි සච්චානි දිට්ඨානි, පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

248. අනාගාමිනා දුක්ඛං දිට්ඨං, පරිහායති අනාගාමී අනාගාමිඵලාති? ආමන්තා. සොතාපන්නෙන දුක්ඛං දිට්ඨං, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අනාගාමිනා සමුදයො දිට්ඨො…පෙ… නිරොධො දිට්ඨො…පෙ… මග්ගො දිට්ඨො…පෙ… චත්තාරි සච්චානි දිට්ඨානි, පරිහායති අනාගාමී අනාගාමිඵලාති? ආමන්තා . සොතාපන්නෙන චත්තාරි සච්චානි දිට්ඨානි, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අනාගාමිනා දුක්ඛං දිට්ඨං, පරිහායති අනාගාමී අනාගාමිඵලාති? ආමන්තා. සකදාගාමිනා දුක්ඛං දිට්ඨං, පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

අනාගාමිනා සමුදයො දිට්ඨො…පෙ… නිරොධො දිට්ඨො…පෙ… මග්ගො දිට්ඨො…පෙ… චත්තාරි සච්චානි දිට්ඨානි, පරිහායති අනාගාමී අනාගාමිඵලාති? ආමන්තා. සකදාගාමිනා චත්තාරි සච්චානි දිට්ඨානි, පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

249. සකදාගාමිනා දුක්ඛං දිට්ඨං, පරිහායති සකදාගාමී සකදාගාමිඵලාති? ආමන්තා. සොතාපන්නෙන දුක්ඛං දිට්ඨං, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

සකදාගාමිනා සමුදයො දිට්ඨො…පෙ… නිරොධො දිට්ඨො…පෙ… මග්ගො දිට්ඨො…පෙ… චත්තාරි සච්චානි දිට්ඨානි, පරිහායති සකදාගාමී සකදාගාමිඵලාති? ආමන්තා. සොතාපන්නෙන චත්තාරි සච්චානි දිට්ඨානි, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

250. සොතාපන්නෙන දුක්ඛං දිට්ඨං, න පරිහායති සොතාපන්නො සොතාපත්තිඵලාති? ආමන්තා. අරහතා දුක්ඛං දිට්ඨං, න පරිහායති අරහා අරහත්තාති? න හෙවං වත්තබ්බෙ…පෙ….

සොතාපන්නෙන සමුදයො දිට්ඨො…පෙ… නිරොධො දිට්ඨො…පෙ… මග්ගො දිට්ඨො…පෙ… චත්තාරි සච්චානි දිට්ඨානි, න පරිහායති සොතාපන්නො සොතාපත්තිඵලාති? ආමන්තා. අරහතා චත්තාරි සච්චානි දිට්ඨානි, න පරිහායති අරහා අරහත්තාති? න හෙවං වත්තබ්බෙ…පෙ….

සකදාගාමිනා දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති සකදාගාමී සකදාගාමිඵලාති? ආමන්තා. අරහතා චත්තාරි සච්චානි දිට්ඨානි, න පරිහායති අරහා අරහත්තාති? න හෙවං වත්තබ්බෙ…පෙ….

අනාගාමිනා දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති අනාගාමී අනාගාමිඵලාති? ආමන්තා. අරහතා චත්තාරි සච්චානි දිට්ඨානි, න පරිහායති අරහා අරහත්තාති? න හෙවං වත්තබ්බෙ…පෙ….

සොතාපන්නෙන දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති සොතාපන්නො සොතාපත්තිඵලාති? ආමන්තා.

අනාගාමිනා දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

සකදාගාමිනා දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති සකදාගාමී සකදාගාමිඵලාති? ආමන්තා. අනාගාමිනා දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

සොතාපන්නෙන දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති සොතාපන්නො සොතාපත්තිඵලාති? ආමන්තා. සකදාගාමිනා දුක්ඛං දිට්ඨං…පෙ… චත්තාරි සච්චානි දිට්ඨානි, න පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

251. අරහතො රාගො පහීනො, පරිහායති අරහා අරහත්තාති? ආමන්තා. සොතාපන්නස්ස සක්කායදිට්ඨි පහීනා, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතො රාගො පහීනො, පරිහායති අරහා අරහත්තාති? ආමන්තා. සොතාපන්නස්ස විචිකිච්ඡා පහීනා…පෙ… සීලබ්බතපරාමාසො පහීනො…පෙ… අපායගමනීයො රාගො පහීනො …පෙ… අපායගමනීයො දොසො පහීනො…පෙ… අපායගමනීයො මොහො පහීනො, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතො දොසො පහීනො…පෙ… මොහො පහීනො… මානො පහීනො… දිට්ඨි පහීනා… විචිකිච්ඡා පහීනා… ථිනං [ථීනං (සී. ස්යා. කං. පී.)] පහීනං… උද්ධච්චං පහීනං… අහිරිකං පහීනං…පෙ… අනොත්තප්පං පහීනං, පරිහායති අරහා අරහත්තාති ? ආමන්තා. සොතාපන්නස්ස සක්කායදිට්ඨි පහීනා, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතො අනොත්තප්පං පහීනං, පරිහායති අරහා අරහත්තාති? ආමන්තා. සොතාපන්නස්ස විචිකිච්ඡා පහීනා…පෙ… සීලබ්බතපරාමාසො පහීනො…පෙ… අපායගමනීයො රාගො පහීනො…පෙ… අපායගමනීයො දොසො පහීනො…පෙ… අපායගමනීයො මොහො පහීනො, පරිහායති සොතාපන්නො සොතාපත්තිඵලාති? න හෙවං වත්තබ්බෙ…පෙ….

අරහතො රාගො පහීනො, පරිහායති අරහා අරහත්තාති? ආමන්තා. සකදාගාමිස්ස සක්කායදිට්ඨි පහීනා, පරිහායති සකදාගාමී සකදාගාමිඵලාති? න හෙවං වත්තබ්බෙ.

අරහතො රාගො පහීනො, පරිහායති අරහා අරහත්තාති? ආමන්තා. සකදාගාමිස්ස විචිකිච්ඡා පහීනා…පෙ… සීලබ්බතපරාමාසො පහීනො…පෙ… ඔළාරිකො කාමරාගො පහීනො… ඔළාරිකො බ්යාපාදො පහීනො, පරිහායති සකදාගාමී සකදාගාමිඵලාති? න හෙවං වත්තබ්බෙ…පෙ….

අරහතො දොසො පහීනො…පෙ… අනොත්තප්පං පහීනං, පරිහායති අරහා අරහත්තාති? ආමන්තා. සකදාගාමිස්ස සක්කායදිට්ඨි පහීනා…පෙ… ඔළාරිකො බ්යාපාදො පහීනො, පරිහායති සකදාගාමී සකදාගාමිඵලාති? න හෙවං වත්තබ්බෙ.

අරහතො රාගො පහීනො, පරිහායති අරහා අරහත්තාති? ආමන්තා. අනාගාමිස්ස සක්කායදිට්ඨි පහීනා, පරිහායති අනාගාමී අනාගාමිඵලාති? න හෙවං වත්තබ්බෙ…පෙ….

අරහතො රාගො පහීනො, පරිහායති අරහා අරහත්තාති? ආමන්තා. අනාගාමිස්ස විචිකිච්ඡා පහීනා…පෙ… සීලබ්බතපරාමාසො පහීනො… අණුසහගතො කාමරාගො පහීනො… අණුසහගතො බ්යාපාදො පහීනො, පරිහායති අනාගාමී අනාගාමිඵලාති? න හෙවං වත්තබ්බෙ.

අරහතො දොසො පහීනො…පෙ… අනොත්තප්පං පහීනං, පරිහායති අරහා අරහත්තාති? ආමන්තා. අනාගාමිස්ස සක්කායදිට්ඨි පහීනා…පෙ… අණුසහගතො බ්යාපාදො පහීනො, පරිහායති අනාගාමී අනාගාමිඵලාති? න හෙවං වත්තබ්බෙ.

252. අනාගාමිස්ස සක්කායදිට්ඨි පහීනා, පරිහායති අනාගාමී අනාගාමිඵලාති? ආමන්තා. සොතාපන්නස්ස සක්කායදිට්ඨි පහීනා, පරිහායති සොතාපන්නො සොතාපත්තිඵලාති? න හෙවං වත්තබ්බෙ.

අනාගාමිස්ස සක්කායදිට්ඨි පහීනා, පරිහායති අනාගාමී අනාගාමිඵලාති? ආමන්තා. සොතාපන්නස්ස විචිකිච්ඡා පහීනා…පෙ… අපායගමනීයො මොහො පහීනො, පරිහායති සොතාපන්නො සොතාපත්තිඵලාති? න හෙවං වත්තබ්බෙ.

අනාගාමිස්ස විචිකිච්ඡා පහීනා…පෙ… අණුසහගතො බ්යාපාදො පහීනො, පරිහායති අනාගාමී අනාගාමිඵලාති? ආමන්තා . සොතාපන්නස්ස සක්කායදිට්ඨි පහීනා…පෙ… අපායගමනීයො මොහො පහීනො, පරිහායති සොතාපන්නො සොතාපත්තිඵලාති? න හෙවං වත්තබ්බෙ.

අනාගාමිස්ස සක්කායදිට්ඨි පහීනා, පරිහායති අනාගාමී අනාගාමිඵලාති? ආමන්තා. සකදාගාමිස්ස සක්කායදිට්ඨි පහීනා, පරිහායති සකදාගාමී සකදාගාමිඵලාති? න හෙවං වත්තබ්බෙ.

අනාගාමිස්ස සක්කායදිට්ඨි පහීනා, පරිහායති අනාගාමී අනාගාමිඵලාති? ආමන්තා. සකදාගාමිස්ස විචිකිච්ඡා පහීනා…පෙ… සීලබ්බතපරාමාසො පහීනො… ඔළාරිකො කාමරාගො පහීනො… ඔළාරිකො බ්යාපාදො පහීනො, පරිහායති සකදාගාමී සකදාගාමිඵලාති? න හෙවං වත්තබ්බෙ.

අනාගාමිස්ස විචිකිච්ඡා පහීනා…පෙ… අණුසහගතො බ්යාපාදො පහීනො, පරිහායති අනාගාමී අනාගාමිඵලාති? ආමන්තා. සකදාගාමිස්ස සක්කායදිට්ඨි පහීනා…පෙ… ඔළාරිකො බ්යාපාදො පහීනො, පරිහායති සකදාගාමී සකදාගාමිඵලාති? න හෙවං වත්තබ්බෙ.

253. සකදාගාමිස්ස සක්කායදිට්ඨි පහීනා, පරිහායති සකදාගාමී සකදාගාමිඵලාති? ආමන්තා. සොතාපන්නස්ස සක්කායදිට්ඨි පහීනා, පරිහායති සොතාපන්නො සොතාපත්තිඵලාති? න හෙවං වත්තබ්බෙ.

සකදාගාමිස්ස සක්කායදිට්ඨි පහීනා, පරිහායති සකදාගාමී සකදාගාමිඵලාති? ආමන්තා. සොතාපන්නස්ස විචිකිච්ඡා පහීනා…පෙ… අපායගමනීයො මොහො පහීනො, පරිහායති සොතාපන්නො සොතාපත්තිඵලාති? න හෙවං වත්තබ්බෙ.

සකදාගාමිස්ස විචිකිච්ඡා පහීනා…පෙ… ඔළාරිකො කාමරාගො පහීනො… ඔළාරිකො බ්යාපාදො පහීනො, පරිහායති සකදාගාමී සකදාගාමිඵලාති ? ආමන්තා . සොතාපන්නස්ස සක්කායදිට්ඨි පහීනා…පෙ… අපායගමනීයො මොහො පහීනො, පරිහායති සොතාපන්නො සොතාපත්තිඵලාති? න හෙවං වත්තබ්බෙ.

254. සොතාපන්නස්ස සක්කායදිට්ඨි පහීනා, න පරිහායති සොතාපන්නො සොතාපත්තිඵලාති? ආමන්තා. අරහතො රාගො පහීනො, න පරිහායති අරහා අරහත්තාති? න හෙවං වත්තබ්බෙ.

සොතාපන්නස්ස සක්කායදිට්ඨි පහීනා, න පරිහායති සොතාපන්නො සොතාපත්තිඵලාති? ආමන්තා. අරහතො දොසො පහීනො…පෙ… අනොත්තප්පං පහීනං, න පරිහායති අරහා අරහත්තාති? න හෙවං වත්තබ්බෙ.

සොතාපන්නස්ස විචිකිච්ඡා පහීනා…පෙ… අපායගමනීයො මොහො පහීනො, න පරිහායති සොතාපන්නො සොතාපත්තිඵලාති? ආමන්තා. අරහතො රාගො පහීනො…පෙ… අනොත්තප්පං පහීනං, න පරිහායති අරහා අරහත්තාති? න හෙවං වත්තබ්බෙ.

255. සකදාගාමිස්ස සක්කායදිට්ඨි පහීනා, න පරිහායති සකදාගාමී සකදාගාමිඵලාති? ආමන්තා. අරහතො රාගො පහීනො…පෙ… අනොත්තප්පං පහීනං, න පරිහායති අරහා අරහත්තාති? න හෙවං වත්තබ්බෙ.

සකදාගාමිස්ස විචිකිච්ඡා පහීනා…පෙ… ඔළාරිකො බ්යාපාදො පහීනො, න පරිහායති සකදාගාමී සකදාගාමිඵලාති? ආමන්තා. අරහතො රාගො පහීනො…පෙ… අනොත්තප්පං පහීනං, න පරිහායති අරහා අරහත්තාති? න හෙවං වත්තබ්බෙ.

256. අනාගාමිස්ස සක්කායදිට්ඨි පහීනා, න පරිහායති අනාගාමී අනාගාමිඵලාති? ආමන්තා. අරහතො රාගො පහීනො…පෙ… අනොත්තප්පං පහීනං, න පරිහායති අරහා අරහත්තාති? න හෙවං වත්තබ්බෙ .

අනාගාමිස්ස විචිකිච්ඡා පහීනා…පෙ… අණුසහගතො බ්යාපාදො පහීනො, න පරිහායති අනාගාමී අනාගාමිඵලාති? ආමන්තා. අරහතො රාගො පහීනො…පෙ… අනොත්තප්පං පහීනං, න පරිහායති අරහා අරහත්තාති? න හෙවං වත්තබ්බෙ.

257. සොතාපන්නස්ස සක්කායදිට්ඨි පහීනා, න පරිහායති සොතාපන්නො සොතාපත්තිඵලාති? ආමන්තා. අනාගාමිස්ස සක්කායදිට්ඨි පහීනා… අණුසහගතො බ්යාපාදො පහීනො, න පරිහායති අනාගාමී අනාගාමිඵලාති? න හෙවං වත්තබ්බෙ.

සොතාපන්නස්ස විචිකිච්ඡා පහීනා…පෙ… අපායගමනීයො මොහො පහීනො, න පරිහායති සොතාපන්නො සොතාපත්තිඵලාති? ආමන්තා. අනාගාමිස්ස සක්කායදිට්ඨි පහීනා…පෙ… අණුසහගතො බ්යාපාදො පහීනො, න පරිහායති අනාගාමී අනාගාමිඵලාති? න හෙවං වත්තබ්බෙ.

258. සකදාගාමිස්ස සක්කායදිට්ඨි පහීනා, න පරිහායති සකදාගාමී සකදාගාමිඵලාති? ආමන්තා. අනාගාමිස්ස සක්කායදිට්ඨි පහීනා…පෙ… අණුසහගතො බ්යාපාදො පහීනො, න පරිහායති අනාගාමී අනාගාමිඵලාති? න හෙවං වත්තබ්බෙ.

සකදාගාමිස්ස විචිකිච්ඡා පහීනා…පෙ… ඔළාරිකො බ්යාපාදො පහීනො, න පරිහායති සකදාගාමී සකදාගාමිඵලාති? ආමන්තා. අනාගාමිස්ස සක්කායදිට්ඨි පහීනා…පෙ… අණුසහගතො බ්යාපාදො පහීනො, න පරිහායති අනාගාමී අනාගාමිඵලාති? න හෙවං වත්තබ්බෙ.

259. සොතාපන්නස්ස සක්කායදිට්ඨි පහීනා, න පරිහායති සොතාපන්නො සොතාපත්තිඵලාති? ආමන්තා. සකදාගාමිස්ස සක්කායදිට්ඨි පහීනා…පෙ… ඔළාරිකො බ්යාපාදො පහීනො, න පරිහායති සකදාගාමී සකදාගාමිඵලාති? න හෙවං වත්තබ්බෙ.

සොතාපන්නස්ස විචිකිච්ඡා පහීනා…පෙ… අපායගමනීයො මොහො පහීනො, න පරිහායති සොතාපන්නො සොතාපත්තිඵලාති? ආමන්තා. සකදාගාමිස්ස සක්කායදිට්ඨි පහීනා…පෙ… ඔළාරිකො බ්යාපාදො පහීනො, න පරිහායති සකදාගාමී සකදාගාමිඵලාති? න හෙවං වත්තබ්බෙ.

260. පරිහායති අරහා අරහත්තාති? ආමන්තා. නනු අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො [අනභාවකතො (සී.)] ආයතිං අනුප්පාදධම්මොති? ආමන්තා. හඤ්චි අරහතො රාගො පහීනො උච්ඡින්නමූලො තාලාවත්ථුකතො අනභාවඞ්කතො ආයතිං අනුප්පාදධම්මො, නො ච වත රෙ [නො වත රෙ (ස්යා. පී.) එවමුපරිපි] වත්තබ්බෙ – ‘‘පරිහායති අරහා අරහත්තා’’ති.

පරිහායති අරහා අරහත්තාති? ආමන්තා. නනු අරහතො දොසො පහීනො…පෙ… මොහො පහීනො… මානො පහීනො… දිට්ඨි පහීනා… විචිකිච්ඡා පහීනා… ථිනං පහීනං… උද්ධච්චං පහීනං… අහිරිකං පහීනං… අනොත්තප්පං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මන්ති? ආමන්තා. හඤ්චි අරහතො අනොත්තප්පං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මං, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

පරිහායති අරහා අරහත්තාති? ආමන්තා. නනු අරහතො රාගප්පහානාය මග්ගො භාවිතොති ? ආමන්තා. හඤ්චි අරහතො රාගප්පහානාය මග්ගො භාවිතො, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

පරිහායති අරහා අරහත්තාති? ආමන්තා. නනු අරහතො රාගප්පහානාය සතිපට්ඨානා භාවිතා…පෙ… සම්මප්පධානා භාවිතා… ඉද්ධිපාදා භාවිතා… ඉන්ද්රියා භාවිතා… බලා භාවිතා… බොජ්ඣඞ්ගා භාවිතාති? ආමන්තා. හඤ්චි අරහතො රාගප්පහානාය බොජ්ඣඞ්ගා භාවිතා, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

පරිහායති අරහා අරහත්තාති? ආමන්තා. නනු අරහතො දොසප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතාති? ආමන්තා. හඤ්චි අරහතො අනොත්තප්පපහානාය බොජ්ඣඞ්ගා භාවිතා, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

261. පරිහායති අරහා අරහත්තාති? ආමන්තා. නනු අරහා වීතරාගො වීතදොසො වීතමොහො කතකරණීයො ඔහිතභාරො අනුප්පත්තසදත්ථො පරික්ඛීණභවසංයොජනො සම්මදඤ්ඤාවිමුත්තො උක්ඛිත්තපලිඝො සඞ්කිණ්ණපරිඛො අබ්බූළ්හෙසිකො නිරග්ගළො අරියො පන්නද්ධජො පන්නභාරො විසඤ්ඤුත්තො සුවිජිතවිජයො; දුක්ඛං තස්ස පරිඤ්ඤාතං, සමුදයො පහීනො, නිරොධො සච්ඡිකතො, මග්ගො භාවිතො, අභිඤ්ඤෙය්යං අභිඤ්ඤාතං , පරිඤ්ඤෙය්යං පරිඤ්ඤාතං, පහාතබ්බං පහීනං, භාවෙතබ්බං භාවිතං, සච්ඡිකාතබ්බං සච්ඡිකතන්ති? ආමන්තා. හඤ්චි අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

262. පරිහායති අරහා අරහත්තාති? ( ) [(ආමන්තා) (ක.)] සමයවිමුත්තො අරහා අරහත්තා පරිහායති, අසමයවිමුත්තො අරහා අරහත්තා න පරිහායතීති. සමයවිමුත්තො අරහා අරහත්තා පරිහායතීති? ආමන්තා. අසමයවිමුත්තො අරහා අරහත්තා පරිහායතීති [න පරිහායතීති (ක.)]? න හෙවං වත්තබ්බෙ.

අසමයවිමුත්තො අරහා අරහත්තා න පරිහායතීති? ආමන්තා. සමයවිමුත්තො අරහා අරහත්තා න පරිහායතීති? න හෙවං වත්තබ්බෙ.

සමයවිමුත්තස්ස අරහතො රාගො පහීනො, පරිහායති සමයවිමුත්තො අරහා අරහත්තාති? ආමන්තා. අසමයවිමුත්තස්ස අරහතො රාගො පහීනො, පරිහායති අසමයවිමුත්තො අරහා අරහත්තාති? න හෙවං වත්තබ්බෙ.

සමයවිමුත්තස්ස අරහතො දොසො පහීනො…පෙ… අනොත්තප්පං පහීනං, පරිහායති සමයවිමුත්තො අරහා අරහත්තාති? ආමන්තා. අසමයවිමුත්තස්ස අරහතො අනොත්තප්පං පහීනං, පරිහායති අසමයවිමුත්තො අරහා අරහත්තාති? න හෙවං වත්තබ්බෙ.

සමයවිමුත්තස්ස අරහතො රාගප්පහානාය මග්ගො භාවිතො, පරිහායති සමයවිමුත්තො අරහා අරහත්තාති? ආමන්තා. අසමයවිමුත්තස්ස අරහතො රාගප්පහානාය මග්ගො භාවිතො, පරිහායති අසමයවිමුත්තො අරහා අරහත්තාති? න හෙවං වත්තබ්බෙ.

සමයවිමුත්තස්ස අරහතො රාගප්පහානාය සතිපට්ඨානා භාවිතා…පෙ… සම්මප්පධානා භාවිතා… ඉද්ධිපාදා භාවිතා… ඉන්ද්රියා භාවිතා… බලා භාවිතා… බොජ්ඣඞ්ගා භාවිතා, පරිහායති සමයවිමුත්තො අරහා අරහත්තාති? ආමන්තා. අසමයවිමුත්තස්ස අරහතො රාගප්පහානාය සතිපට්ඨානා භාවිතා…පෙ… බොජ්ඣඞ්ගා භාවිතා, පරිහායති අසමයවිමුත්තො අරහා අරහත්තාති? න හෙවං වත්තබ්බෙ.

සමයවිමුත්තස්ස අරහතො දොසප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, පරිහායති සමයවිමුත්තො අරහා අරහත්තාති? ආමන්තා. අසමයවිමුත්තස්ස අරහතො අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, පරිහායති අසමයවිමුත්තො අරහා අරහත්තාති? න හෙවං වත්තබ්බෙ…පෙ….

සමයවිමුත්තො අරහා වීතරාගො වීතදොසො වීතමොහො කතකරණීයො ඔහිතභාරො අනුප්පත්තසදත්ථො පරික්ඛීණභවසංයොජනො සම්මදඤ්ඤාවිමුත්තො උක්ඛිත්තපලිඝො සඞ්කිණ්ණපරිඛො අබ්බූළ්හෙසිකො නිරග්ගළො අරියො පන්නද්ධජො පන්නභාරො විසඤ්ඤුත්තො සුවිජිතවිජයො, දුක්ඛං තස්ස පරිඤ්ඤාතං, සමුදයො පහීනො, නිරොධො සච්ඡිකතො, මග්ගො භාවිතො, අභිඤ්ඤෙය්යං අභිඤ්ඤාතං, පරිඤ්ඤෙය්යං පරිඤ්ඤාතං, පහාතබ්බං පහීනං, භාවෙතබ්බං භාවිතං, සච්ඡිකාතබ්බං සච්ඡිකතං , පරිහායති සමයවිමුත්තො අරහා අරහත්තාති? ආමන්තා. අසමයවිමුත්තො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, පරිහායති අසමයවිමුත්තො අරහා අරහත්තාති? න හෙවං වත්තබ්බෙ.

263. අසමයවිමුත්තස්ස අරහතො රාගො පහීනො, න පරිහායති අසමයවිමුත්තො අරහා අරහත්තාති? ආමන්තා. සමයවිමුත්තස්ස අරහතො රාගො පහීනො, න පරිහායති සමයවිමුත්තො අරහා අරහත්තාති? න හෙවං වත්තබ්බෙ.

අසමයවිමුත්තස්ස අරහතො දොසො පහීනො…පෙ… අනොත්තප්පං පහීනං, න පරිහායති අසමයවිමුත්තො අරහා අරහත්තාති? ආමන්තා. සමයවිමුත්තස්ස අරහතො අනොත්තප්පං පහීනං, න පරිහායති සමයවිමුත්තො අරහා අරහත්තාති? න හෙවං වත්තබ්බෙ.

අසමයවිමුත්තස්ස අරහතො රාගප්පහානාය මග්ගො භාවිතො…පෙ… බොජ්ඣඞ්ගා භාවිතා, න පරිහායති අසමයවිමුත්තො අරහා අරහත්තාති? ආමන්තා. සමයවිමුත්තස්ස අරහතො රාගප්පහානාය මග්ගො භාවිතො…පෙ… බොජ්ඣඞ්ගා භාවිතා, න පරිහායති සමයවිමුත්තො අරහා අරහත්තාති? න හෙවං වත්තබ්බෙ.

අසමයවිමුත්තස්ස අරහතො දොසප්පහානාය…පෙ… අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, න පරිහායති අසමයවිමුත්තො අරහා අරහත්තාති? ආමන්තා. සමයවිමුත්තස්ස අරහතො අනොත්තප්පපහානාය මග්ගො භාවිතො…පෙ… බොජ්ඣඞ්ගා භාවිතා, න පරිහායති සමයවිමුත්තො අරහා අරහත්තාති? න හෙවං වත්තබ්බෙ.

අසමයවිමුත්තො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, න පරිහායති අසමයවිමුත්තො අරහා අරහත්තාති? ආමන්තා. සමයවිමුත්තො අරහා වීතරාගො වීතදොසො වීතමොහො…පෙ… සච්ඡිකාතබ්බං සච්ඡිකතං, න පරිහායති සමයවිමුත්තො අරහා අරහත්තාති? න හෙවං වත්තබ්බෙ…පෙ….

264. පරිහායති අරහා අරහත්තාති? ආමන්තා. සාරිපුත්තො ථෙරො පරිහායිත්ථ අරහත්තාති ? න හෙවං වත්තබ්බෙ. මහාමොග්ගල්ලානො [මහාමොග්ගලානො (ක.)] ථෙරො… මහාකස්සපො ථෙරො… මහාකච්චායනො [මහාකච්චානො (ම. නි. 1.202 ආදයො)] ථෙරො… මහාකොට්ඨිකො [මහාකොට්ඨිතො (සී. ස්යා. කං. පී.)] ථෙරො… මහාපන්ථකො ථෙරො පරිහායිත්ථ අරහත්තාති? න හෙවං වත්තබ්බෙ.

සාරිපුත්තො ථෙරො න පරිහායිත්ථ අරහත්තාති? ආමන්තා. හඤ්චි සාරිපුත්තො ථෙරො න පරිහායිත්ථ අරහත්තා, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

මහාමොග්ගල්ලානො ථෙරො… මහාකස්සපො ථෙරො… මහාකච්චායනො ථෙරො… මහාකොට්ඨිකො ථෙරො… මහාපන්ථකො ථෙරො න පරිහායිත්ථ අරහත්තාති? ආමන්තා. හඤ්චි මහාපන්ථකො ථෙරො න පරිහායිත්ථ අරහත්තා, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

අරියපුග්ගලසංසන්දනං.

3. සුත්තසාධනපරිහානි

265. පරිහායති අරහා අරහත්තාති? ආමන්තා. නනු වුත්තං භගවතා –

‘‘උච්චාවචා හි පටිපදා [පටිපාදා (අට්ඨ.)], සමණෙන පකාසිතා;

න පාරං දිගුණං යන්ති, නයිදං එකගුණං මුත’’න්ති [සු. නි. 719 සුත්තනිපාතෙ].

අත්ථෙව සුත්තන්තොති? ආමන්තා. තෙන හි න වත්තබ්බං – ‘‘පරිහායති අරහා අරහත්තා’’ති.

පරිහායති අරහා අරහත්තාති? ආමන්තා. අත්ථි ඡින්නස්ස ඡෙදියන්ති? න හෙවං වත්තබ්බෙ.

අත්ථි ඡින්නස්ස ඡෙදියන්ති? ආමන්තා. නනු වුත්තං භගවතා –

‘‘වීතතණ්හො අනාදානො, කිච්චං යස්ස න විජ්ජති;

ඡින්නස්ස ඡෙදියං නත්ථි, ඔඝපාසො සමූහතො’’ති.

අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි ඡින්නස්ස ඡෙදිය’’න්ති.

266. පරිහායති අරහා අරහත්තාති? ආමන්තා. අත්ථි කතස්ස පතිචයොති? න හෙවං වත්තබ්බෙ.

අත්ථි කතස්ස පතිචයොති? ආමන්තා. නනු වුත්තං භගවතා –

‘‘තස්ස සම්මා විමුත්තස්ස, සන්තචිත්තස්ස භික්ඛුනො;

කතස්ස පතිචයො නත්ථි, කරණීයං න විජ්ජති.

‘‘සෙලො යථා එකග්ඝනො, වාතෙන න සමීරති;

එවං රූපා රසා සද්දා, ගන්ධා ඵස්සා ච කෙවලා.

‘‘ඉට්ඨා ධම්මා අනිට්ඨා ච, නප්පවෙධෙන්ති තාදිනො;

ඨිතං චිත්තං විප්පමුත්තං, වයං චස්සානුපස්සතී’’ති [මහාව. 244; අ. නි. 6.55].

අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අත්ථි කතස්ස පතිචයො’’ති.

267. න වත්තබ්බං – ‘‘පරිහායති අරහා අරහත්තා’’ති? ආමන්තා. නනු වුත්තං භගවතා – ‘‘පඤ්චිමෙ, භික්ඛවෙ, ධම්මා සමයවිමුත්තස්ස භික්ඛුනො පරිහානාය සංවත්තන්ති. කතමෙ පඤ්ච? කම්මාරාමතා, භස්සාරාමතා, නිද්දාරාමතා, සඞ්ගණිකාරාමතා, යථාවිමුත්තං චිත්තං න පච්චවෙක්ඛති. ඉමෙ ඛො, භික්ඛවෙ, පඤ්ච ධම්මා සමයවිමුත්තස්ස භික්ඛුනො පරිහානාය සංවත්තන්තී’’ති [අ. නි. 5.149]. අත්ථෙව සුත්තන්තොති? ආමන්තා. තෙන හි පරිහායති අරහා අරහත්තාති.

අත්ථි අරහතො කම්මාරාමතාති? න හෙවං වත්තබ්බෙ.

අත්ථි අරහතො කම්මාරාමතාති? ආමන්තා. අත්ථි අරහතො රාගො කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණන්ති? න හෙවං වත්තබ්බෙ.

අත්ථි අරහතො භස්සාරාමතා, අත්ථි අරහතො නිද්දාරාමතා, අත්ථි අරහතො සඞ්ගණිකාරාමතාති? න හෙවං වත්තබ්බෙ.

අත්ථි අරහතො සඞ්ගණිකාරාමතාති? ආමන්තා. අත්ථි අරහතො රාගො කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණන්ති? න හෙවං වත්තබ්බෙ.

268. පරිහායති අරහා අරහත්තාති? ආමන්තා. අරහා අරහත්තා පරිහායමානො කිං පරියුට්ඨිතො පරිහායතීති? රාගපරියුට්ඨිතො පරිහායතීති. පරියුට්ඨානං කිං පටිච්ච උප්පජ්ජතීති? අනුසයං පටිච්ච උප්පජ්ජතීති. අත්ථි අරහතො අනුසයාති? න හෙවං වත්තබ්බෙ.

අත්ථි අරහතො අනුසයාති? ආමන්තා. අත්ථි අරහතො කාමරාගානුසයො පටිඝානුසයො මානානුසයො දිට්ඨානුසයො විචිකිච්ඡානුසයො භවරාගානුසයො අවිජ්ජානුසයොති? න හෙවං වත්තබ්බෙ.

දොසපරියුට්ඨිතො පරිහායතීති…පෙ… මොහපරියුට්ඨිතො පරිහායතීති…. පරියුට්ඨානං කිං පටිච්ච උප්පජ්ජතීති? අනුසයං පටිච්ච උප්පජ්ජතීති. අත්ථි අරහතො අනුසයාති? න හෙවං වත්තබ්බෙ…පෙ….

අත්ථි අරහතො අනුසයාති? ආමන්තා. අත්ථි අරහතො කාමරාගානුසයො…පෙ… අවිජ්ජානුසයොති? න හෙවං වත්තබ්බෙ.

පරිහායති අරහා අරහත්තාති? ආමන්තා. අරහතො අරහත්තා පරිහායමානස්ස කිං උපචයං ගච්ඡතීති? රාගො උපචයං ගච්ඡතීති. සක්කායදිට්ඨි උපචයං ගච්ඡතීති, විචිකිච්ඡා උපචයං ගච්ඡතීති, සීලබ්බතපරාමාසො උපචයං ගච්ඡතීති? න හෙවං වත්තබ්බෙ. දොසො උපචයං ගච්ඡතීති…පෙ… මොහො උපචයං ගච්ඡතීති, සක්කායදිට්ඨි උපචයං ගච්ඡතීති, විචිකිච්ඡා උපචයං ගච්ඡතීති, සීලබ්බතපරාමාසො උපචයං ගච්ඡතීති? න හෙවං වත්තබ්බෙ.

පරිහායති අරහා අරහත්තාති? ආමන්තා. අරහා ආචිනතීති? න හෙවං වත්තබ්බෙ. අරහා අපචිනතීති? න හෙවං වත්තබ්බෙ. අරහා පජහතීති? න හෙවං වත්තබ්බෙ. අරහා උපාදියතීති? න හෙවං වත්තබ්බෙ. අරහා විසිනෙතීති? න හෙවං වත්තබ්බෙ. අරහා උස්සිනෙතීති? න හෙවං වත්තබ්බෙ. අරහා විධූපෙතීති? න හෙවං වත්තබ්බෙ. අරහා සන්ධූපෙතීති? න හෙවං වත්තබ්බෙ.

නනු අරහා නෙවාචිනති න අපචිනති අපචිනිත්වා ඨිතොති? ආමන්තා. හඤ්චි අරහා නෙවාචිනති න අපචිනති අපචිනිත්වා ඨිතො, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

නනු අරහා නෙව පජහති න උපාදියති පජහිත්වා ඨිතොති? ආමන්තා. හඤ්චි අරහා නෙව පජහති න උපාදියති පජහිත්වා ඨිතො, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

නනු අරහා නෙව විසිනෙති න උස්සිනෙති විසිනිත්වා ඨිතොති? ආමන්තා. හඤ්චි අරහා නෙව විසිනෙති න උස්සිනෙති විසිනිත්වා ඨිතො, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

නනු අරහා නෙව විධූපෙති න සන්ධූපෙති විධූපෙත්වා ඨිතොති? ආමන්තා. හඤ්චි අරහා නෙව විධූපෙති න සන්ධූපෙති විධූපෙත්වා ඨිතො, නො ච වත රෙ වත්තබ්බෙ – ‘‘පරිහායති අරහා අරහත්තා’’ති.

පරිහානිකථා නිට්ඨිතා.