📜

4. ජහතිකථා

1. නසුත්තාහරණකථා

279. ජහති පුථුජ්ජනො කාමරාගබ්යාපාදන්ති? ආමන්තා. අච්චන්තං ජහති, අනවසෙසං ජහති, අප්පටිසන්ධියං ජහති, සමූලං ජහති, සතණ්හං ජහති, සානුසයං ජහති, අරියෙන ඤාණෙන ජහති, අරියෙන මග්ගෙන ජහති, අකුප්පං පටිවිජ්ඣන්තො ජහති, අනාගාමිඵලං සච්ඡිකරොන්තො ජහතීති? න හෙවං වත්තබ්බෙ…පෙ….

වික්ඛම්භෙති පුථුජ්ජනො කාමරාගබ්යාපාදන්ති? ආමන්තා. අච්චන්තං වික්ඛම්භෙති, අනවසෙසං වික්ඛම්භෙති, අප්පටිසන්ධියං වික්ඛම්භෙති, සමූලං වික්ඛම්භෙති, සතණ්හං වික්ඛම්භෙති, සානුසයං වික්ඛම්භෙති, අරියෙන ඤාණෙන වික්ඛම්භෙති, අරියෙන මග්ගෙන වික්ඛම්භෙති, අකුප්පං පටිවිජ්ඣන්තො වික්ඛම්භෙති, අනාගාමිඵලං සච්ඡිකරොන්තො වික්ඛම්භෙතීති? න හෙවං වත්තබ්බෙ…පෙ….

ජහති අනාගාමිඵලසච්ඡිකිරියාය පටිපන්නො පුග්ගලො කාමරාගබ්යාපාදං, සො ච අච්චන්තං ජහති, අනවසෙසං ජහති…පෙ… අනාගාමිඵලං සච්ඡිකරොන්තො ජහතීති? ආමන්තා. ජහති පුථුජ්ජනො කාමරාගබ්යාපාදං, සො ච අච්චන්තං ජහති, අනවසෙසං ජහති…පෙ… අනාගාමිඵලං සච්ඡිකරොන්තො ජහතීති? න හෙවං වත්තබ්බෙ…පෙ….

වික්ඛම්භෙති අනාගාමිඵලසච්ඡිකිරියාය පටිපන්නො පුග්ගලො කාමරාගබ්යාපාදං, සො ච අච්චන්තං වික්ඛම්භෙති, අනවසෙසං වික්ඛම්භෙති…පෙ… අනාගාමිඵලං සච්ඡිකරොන්තො වික්ඛම්භෙතීති? ආමන්තා. වික්ඛම්භෙති පුථුජ්ජනො කාමරාගබ්යාපාදං, සො ච අච්චන්තං වික්ඛම්භෙති, අනවසෙසං වික්ඛම්භෙති …පෙ… අනාගාමිඵලං සච්ඡිකරොන්තො වික්ඛම්භෙතීති? න හෙවං වත්තබ්බෙ…පෙ….

ජහති පුථුජ්ජනො කාමරාගබ්යාපාදං, සො ච න අච්චන්තං ජහති, න අනවසෙසං ජහති…පෙ… න අනාගාමිඵලං සච්ඡිකරොන්තො ජහතීති? ආමන්තා. ජහති අනාගාමිඵලසච්ඡිකිරියාය පටිපන්නො පුග්ගලො කාමරාගබ්යාපාදං, සො ච න අච්චන්තං ජහති…පෙ… න අනාගාමිඵලං සච්ඡිකරොන්තො ජහතීති? න හෙවං වත්තබ්බෙ…පෙ….

වික්ඛම්භෙති පුථුජ්ජනො කාමරාගබ්යාපාදං, සො ච න අච්චන්තං වික්ඛම්භෙති, න අනවසෙසං වික්ඛම්භෙති…පෙ… න අනාගාමිඵලං සච්ඡිකරොන්තො වික්ඛම්භෙතීති? ආමන්තා. වික්ඛම්භෙති අනාගාමිඵලසච්ඡිකිරියාය පටිපන්නො පුග්ගලො කාමරාගබ්යාපාදං, සො ච න අච්චන්තං වික්ඛම්භෙති, න අනවසෙසං වික්ඛම්භෙති…පෙ… න අනාගාමිඵලං සච්ඡිකරොන්තො වික්ඛම්භෙතීති? න හෙවං වත්තබ්බෙ…පෙ….

ජහති පුථුජ්ජනො කාමරාගබ්යාපාදන්ති? ආමන්තා. කතමෙන මග්ගෙනාති? රූපාවචරෙන මග්ගෙනාති. රූපාවචරො මග්ගො නිය්යානිකො ඛයගාමී බොධගාමී අපචයගාමී අනාසවො අසංයොජනියො අගන්ථනියො අනොඝනියො අයොගනියො අනීවරණියො අපරාමට්ඨො අනුපාදානියො අසංකිලෙසියොති? න හෙවං වත්තබ්බෙ. නනු රූපාවචරො මග්ගො අනිය්යානිකො න ඛයගාමී න බොධගාමී න අපචයගාමී සාසවො සංයොජනියො…පෙ… සංකිලෙසියොති? ආමන්තා. හඤ්චි රූපාවචරො මග්ගො අනිය්යානිකො න ඛයගාමී…පෙ… සංකිලෙසියො, නො ච වත රෙ වත්තබ්බෙ – ‘‘ජහති පුථුජ්ජනො රූපාවචරෙන මග්ගෙන කාමරාගබ්යාපාද’’න්ති.

ජහති අනාගාමිඵලසච්ඡිකිරියාය පටිපන්නො පුග්ගලො අනාගාමිමග්ගෙන කාමරාගබ්යාපාදං, සො ච මග්ගො නිය්යානිකො ඛයගාමී බොධගාමී අපචයගාමී අනාසවො…පෙ… අසංකිලෙසියොති? ආමන්තා. ජහති පුථුජ්ජනො රූපාවචරෙන මග්ගෙන කාමරාගබ්යාපාදං, සො ච මග්ගො නිය්යානිකො ඛයගාමී බොධගාමී අපචයගාමී අනාසවො…පෙ… අසංකිලෙසියොති? න හෙවං වත්තබ්බෙ…පෙ….

ජහති පුථුජ්ජනො රූපාවචරෙන මග්ගෙන කාමරාගබ්යාපාදං, සො ච මග්ගො අනිය්යානිකො න ඛයගාමී න බොධගාමී න අපචයගාමී සාසවො…පෙ… සංකිලෙසියොති? ආමන්තා. ජහති අනාගාමිඵලසච්ඡිකිරියාය පටිපන්නො පුග්ගලො අනාගාමිමග්ගෙන කාමරාගබ්යාපාදං, සො ච මග්ගො අනිය්යානිකො න ඛයගාමී න බොධගාමී න අපචයගාමී සාසවො…පෙ… සංකිලෙසියොති? න හෙවං වත්තබ්බෙ…පෙ….

280. පුථුජ්ජනො කාමෙසු වීතරාගො සහ ධම්මාභිසමයා අනාගාමිඵලෙ සණ්ඨාතීති? ආමන්තා. අරහත්තෙ සණ්ඨාතීති? න හෙවං වත්තබ්බෙ…පෙ….

පුථුජ්ජනො කාමෙසු වීතරාගො සහ ධම්මාභිසමයා අනාගාමිඵලෙ සණ්ඨාතීති? ආමන්තා. අපුබ්බං අචරිමං තයො මග්ගෙ භාවෙතීති? න හෙවං වත්තබ්බෙ…පෙ….

අපුබ්බං අචරිමං තයො මග්ගෙ භාවෙතීති? ආමන්තා. අපුබ්බං අචරිමං තීණි සාමඤ්ඤඵලානි සච්ඡිකරොතීති? න හෙවං වත්තබ්බෙ…පෙ….

අපුබ්බං අචරිමං තීණි සාමඤ්ඤඵලානි සච්ඡිකරොතීති? ආමන්තා. තිණ්ණං ඵස්සානං තිස්සන්නං වෙදනානං තිස්සන්නං සඤ්ඤානං තිස්සන්නං චෙතනානං තිණ්ණං චිත්තානං තිස්සන්නං සද්ධානං තිණ්ණං වීරියානං තිස්සන්නං සතීනං තිණ්ණං සමාධීනං තිස්සන්නං පඤ්ඤානං සමොධානං හොතීති? න හෙවං වත්තබ්බෙ…පෙ….

පුථුජ්ජනො කාමෙසු වීතරාගො සහ ධම්මාභිසමයා අනාගාමිඵලෙ සණ්ඨාතීති? ආමන්තා. සොතාපත්තිමග්ගෙනාති? න හෙවං වත්තබ්බෙ…පෙ….

සකදාගාමිමග්ගෙනාති? න හෙවං වත්තබ්බෙ. කතමෙන මග්ගෙනාති? අනාගාමිමග්ගෙනාති. අනාගාමිමග්ගෙන සක්කායදිට්ඨිං විචිකිච්ඡං සීලබ්බතපරාමාසං ජහතීති? න හෙවං වත්තබ්බෙ…පෙ….

2. සුත්තාහරණකථා

281. අනාගාමිමග්ගෙන සක්කායදිට්ඨිං විචිකිච්ඡං සීලබ්බතපරාමාසං ජහතීති? ආමන්තා. නනු තිණ්ණං සංයොජනානං පහානා සොතාපත්තිඵලං වුත්තං භගවතාති? ආමන්තා. හඤ්චි තිණ්ණං සංයොජනානං පහානා සොතාපත්තිඵලං වුත්තං භගවතා, නො ච වත රෙ වත්තබ්බෙ – ‘‘අනාගාමිමග්ගෙන සක්කායදිට්ඨිං විචිකිච්ඡං සීලබ්බතපරාමාසං ජහතී’’ති. අනාගාමිමග්ගෙන ඔළාරිකං කාමරාගං ඔළාරිකං බ්යාපාදං ජහතීති? න හෙවං වත්තබ්බෙ…පෙ….

අනාගාමිමග්ගෙන ඔළාරිකං කාමරාගං ඔළාරිකං බ්යාපාදං ජහතීති? ආමන්තා. නනු කාමරාගබ්යාපාදානං තනුභාවා සකදාගාමිඵලං වුත්තං භගවතාති? ආමන්තා. හඤ්චි කාමරාගබ්යාපාදානං තනුභාවා සකදාගාමිඵලං වුත්තං භගවතා, නො ච වත රෙ වත්තබ්බෙ – ‘‘අනාගාමිමග්ගෙන ඔළාරිකං කාමරාගං ඔළාරිකං බ්යාපාදං ජහතී’’ති.

පුථුජ්ජනො කාමෙසු වීතරාගො සහ ධම්මාභිසමයා අනාගාමිඵලෙ සණ්ඨාතීති? ආමන්තා. යෙ කෙචි ධම්මං අභිසමෙන්ති, සබ්බෙ තෙ සහ ධම්මාභිසමයා අනාගාමිඵලෙ සණ්ඨහන්තීති? න හෙවං වත්තබ්බෙ…පෙ….

න වත්තබ්බං – ‘‘ජහති පුථුජ්ජනො කාමරාගබ්යාපාද’’න්ති? ආමන්තා. නනු වුත්තං භගවතා –

‘‘අහෙසුං තෙ [අහිංසකා (අ. නි. 6.54)] අතීතංසෙ, ඡ සත්ථාරො යසස්සිනො;

නිරාමගන්ධා කරුණෙධිමුත්තා [කරුණාධිමුත්තා (සී. ක.)], කාමසංයොජනාතිගා.

‘‘කාමරාගං විරාජෙත්වා, බ්රහ්මලොකූපගා අහු;

අහෙසුං සාවකා තෙසං, අනෙකානි සතානිපි.

‘‘නිරාමගන්ධා කරුණෙධිමුත්තා, කාමසංයොජනාතිගා;

කාමරාගං විරාජෙත්වා, බ්රහ්මලොකූපගා අහූ’’ති [අ. නි. 6.54].

අත්ථෙව සුත්තන්තොති? ආමන්තා. තෙන හි ජහති පුථුජ්ජනො කාමරාගබ්යාපාදන්ති.

ජහති පුථුජ්ජනො කාමරාගබ්යාපාදන්ති? ආමන්තා. නනු වුත්තං භගවතා – ‘‘සො හි නාම, භික්ඛවෙ, සුනෙත්තො සත්ථා එවං දීඝායුකො සමානො එවං චිරට්ඨිතිකො අපරිමුත්තො අහොසි ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි අපරිමුත්තො දුක්ඛස්මාති වදාමි. තං කිස්ස හෙතු? චතුන්නං ධම්මානං අනනුබොධා අප්පටිවෙධා. කතමෙසං චතුන්නං? අරියස්ස සීලස්ස අනනුබොධා අප්පටිවෙධා, අරියස්ස සමාධිස්ස, අරියාය පඤ්ඤාය, අරියාය විමුත්තියා අනනුබොධා අප්පටිවෙධා. තයිදං, භික්ඛවෙ, අරියං සීලං අනුබුද්ධං පටිවිද්ධං, අරියො සමාධි අනුබුද්ධො පටිවිද්ධො, අරියා පඤ්ඤා අනුබුද්ධා පටිවිද්ධා, අරියා විමුත්ති අනුබුද්ධා පටිවිද්ධා, උච්ඡින්නා භවතණ්හා, ඛීණා භවනෙත්ති, නත්ථි දානි පුනබ්භවොති.

‘‘සීලං සමාධි පඤ්ඤා ච, විමුත්ති ච අනුත්තරා;

අනුබුද්ධා ඉමෙ ධම්මා, ගොතමෙන යසස්සිනා.

‘‘ඉති බුද්ධො අභිඤ්ඤාය, ධම්මමක්ඛාසි භික්ඛුනං;

දුක්ඛස්සන්තකරො සත්ථා, චක්ඛුමා පරිනිබ්බුතො’’ති [අ. නි. 7.66].

අත්ථෙව සුත්තන්තොති? ආමන්තා. තෙන හි න වත්තබ්බං – ‘‘ජහති පුථුජ්ජනො කාමරාගබ්යාපාද’’න්ති.

ජහතිකථා නිට්ඨිතා.