📜

5. සබ්බමත්ථීතිකථා

1. වාදයුත්ති

282. සබ්බමත්ථීති ? ආමන්තා. සබ්බත්ථ සබ්බමත්ථීති? න හෙවං වත්තබ්බෙ. සබ්බමත්ථීති? ආමන්තා. සබ්බදා සබ්බමත්ථීති? න හෙවං වත්තබ්බෙ. සබ්බමත්ථීති? ආමන්තා. සබ්බෙන සබ්බං සබ්බමත්ථීති? න හෙවං වත්තබ්බෙ. සබ්බමත්ථීති? ආමන්තා. සබ්බෙසු සබ්බමත්ථීති? න හෙවං වත්තබ්බෙ. සබ්බමත්ථීති? ආමන්තා. අයොගන්ති කත්වා සබ්බමත්ථීති? න හෙවං වත්තබ්බෙ. සබ්බමත්ථීති? ආමන්තා. යම්පි නත්ථි, තම්පත්ථීති? න හෙවං වත්තබ්බෙ. සබ්බමත්ථීති? ආමන්තා. සබ්බමත්ථීති යා දිට්ඨි සා දිට්ඨි මිච්ඡාදිට්ඨීති, යා දිට්ඨි සා දිට්ඨි සම්මාදිට්ඨීති, හෙවමත්ථීති? න හෙවං වත්තබ්බෙ. (සංඛිත්තං). වාදයුත්ති.

2. කාලසංසන්දනා

283. අතීතං අත්ථීති? ආමන්තා. නනු අතීතං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති? ආමන්තා. හඤ්චි අතීතං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතං, නො ච වත රෙ වත්තබ්බෙ – ‘‘අතීතං අත්ථී’’ති.

අනාගතං අත්ථීති? ආමන්තා. නනු අනාගතං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති? ආමන්තා. හඤ්චි අනාගතං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතං, නො ච වත රෙ වත්තබ්බෙ – ‘‘අනාගතං අත්ථී’’ති.

පච්චුප්පන්නං අත්ථි පච්චුප්පන්නං අනිරුද්ධං අවිගතං අවිපරිණතං න අත්ථඞ්ගතං න අබ්භත්ථඞ්ගතන්ති? ආමන්තා. අතීතං අත්ථි අතීතං අනිරුද්ධං අවිගතං අවිපරිණතං න අත්ථඞ්ගතං න අබ්භත්ථඞ්ගතන්ති? න හෙවං වත්තබ්බෙ…පෙ… පච්චුප්පන්නං අත්ථි පච්චුප්පන්නං ජාතං භූතං සඤ්ජාතං නිබ්බත්තං අභිනිබ්බත්තං පාතුභූතන්ති? ආමන්තා. අනාගතං අත්ථි අනාගතං ජාතං භූතං සඤ්ජාතං නිබ්බත්තං අභිනිබ්බත්තං පාතුභූතන්ති? න හෙවං වත්තබ්බෙ…පෙ….

අතීතං අත්ථි අතීතං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති? ආමන්තා. පච්චුප්පන්නං අත්ථි පච්චුප්පන්නං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති? න හෙවං වත්තබ්බෙ…පෙ… අනාගතං අත්ථි අනාගතං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති? ආමන්තා. පච්චුප්පන්නං අත්ථි පච්චුප්පන්නං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති? න හෙවං වත්තබ්බෙ.

284. අතීතං රූපං අත්ථීති? ආමන්තා. නනු අතීතං රූපං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති? ආමන්තා. හඤ්චි අතීතං රූපං නිරුද්ධං…පෙ… අබ්භත්ථඞ්ගතං, නො ච වත රෙ වත්තබ්බෙ – ‘‘අතීතං රූපං අත්ථී’’ති.

අනාගතං රූපං අත්ථීති? ආමන්තා. නනු අනාගතං රූපං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති? ආමන්තා. හඤ්චි අනාගතං රූපං අජාතං…පෙ… අපාතුභූතං, නො ච වත රෙ වත්තබ්බෙ – ‘‘අනාගතං රූපං අත්ථී’’ති.

පච්චුප්පන්නං රූපං අත්ථි පච්චුප්පන්නං රූපං අනිරුද්ධං අවිගතං අවිපරිණතං න අත්ථඞ්ගතං න අබ්භත්ථඞ්ගතන්ති? ආමන්තා. අතීතං රූපං අත්ථි අතීතං රූපං අනිරුද්ධං අවිගතං අවිපරිණතං න අත්ථඞ්ගතං න අබ්භත්ථඞ්ගතන්ති? න හෙවං වත්තබ්බෙ.

පච්චුප්පන්නං රූපං අත්ථි පච්චුප්පන්නං රූපං ජාතං භූතං සඤ්ජාතං නිබ්බත්තං අභිනිබ්බත්තං පාතුභූතන්ති? ආමන්තා. අනාගතං රූපං අත්ථි අනාගතං රූපං ජාතං භූතං සඤ්ජාතං නිබ්බත්තං අභිනිබ්බත්තං පාතුභූතන්ති? න හෙවං වත්තබ්බෙ.

අතීතං රූපං අත්ථි අතීතං රූපං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති? ආමන්තා. පච්චුප්පන්නං රූපං අත්ථි පච්චුප්පන්නං රූපං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති? න හෙවං වත්තබ්බෙ.

අනාගතං රූපං අත්ථි අනාගතං රූපං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති? ආමන්තා. පච්චුප්පන්නං රූපං අත්ථි පච්චුප්පන්නං රූපං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති? න හෙවං වත්තබ්බෙ.

අතීතා වෙදනා අත්ථි…පෙ… සඤ්ඤා අත්ථි, සඞ්ඛාරා අත්ථි, විඤ්ඤාණං අත්ථීති? ආමන්තා. නනු අතීතං විඤ්ඤාණං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති? ආමන්තා . හඤ්චි අතීතං විඤ්ඤාණං නිරුද්ධං…පෙ… අබ්භත්ථඞ්ගතං, නො ච වත රෙ වත්තබ්බෙ – ‘‘අතීතං විඤ්ඤාණං අත්ථී’’ති.

අනාගතං විඤ්ඤාණං අත්ථීති? ආමන්තා. නනු අනාගතං විඤ්ඤාණං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති? ආමන්තා. හඤ්චි අනාගතං විඤ්ඤාණං අජාතං…පෙ… අපාතුභූතං, නො ච වත රෙ වත්තබ්බෙ – ‘‘අනාගතං විඤ්ඤාණං අත්ථී’’ති.

පච්චුප්පන්නං විඤ්ඤාණං අත්ථි පච්චුප්පන්නං විඤ්ඤාණං අනිරුද්ධං…පෙ… න අබ්භත්ථඞ්ගතන්ති? ආමන්තා. අතීතං විඤ්ඤාණං අත්ථි අතීතං විඤ්ඤාණං අනිරුද්ධං…පෙ… න අබ්භත්ථඞ්ගතන්ති? න හෙවං වත්තබ්බෙ.

පච්චුප්පන්නං විඤ්ඤාණං අත්ථි පච්චුප්පන්නං විඤ්ඤාණං ජාතං…පෙ… පාතුභූතන්ති? ආමන්තා. අනාගතං විඤ්ඤාණං අත්ථි අනාගතං විඤ්ඤාණං ජාතං…පෙ… පාතුභූතන්ති? න හෙවං වත්තබ්බෙ.

අතීතං විඤ්ඤාණං අත්ථි අතීතං විඤ්ඤාණං නිරුද්ධං…පෙ… අබ්භත්ථඞ්ගතන්ති? ආමන්තා. පච්චුප්පන්නං විඤ්ඤාණං අත්ථි පච්චුප්පන්නං විඤ්ඤාණං නිරුද්ධං…පෙ… අබ්භත්ථඞ්ගතන්ති? න හෙවං වත්තබ්බෙ. අනාගතං විඤ්ඤාණං අත්ථි අනාගතං විඤ්ඤාණං අජාතං…පෙ… අපාතුභූතන්ති? ආමන්තා.

පච්චුප්පන්නං විඤ්ඤාණං අත්ථි පච්චුප්පන්නං විඤ්ඤාණං අජාතං…පෙ… අපාතුභූතන්ති? න හෙවං වත්තබ්බෙ.

285. ‘‘පච්චුප්පන්නන්ති වා රූප’’න්ති වා, ‘‘රූපන්ති වා පච්චුප්පන්න’’න්ති වා පච්චුප්පන්නං රූපං අප්පියං කරිත්වා එසෙසෙ එකට්ඨෙ සමෙ සමභාගෙ තජ්ජාතෙති? ආමන්තා. පච්චුප්පන්නං රූපං නිරුජ්ඣමානං පච්චුප්පන්නභාවං ජහතීති? ආමන්තා. රූපභාවං ජහතීති? න හෙවං වත්තබ්බෙ…පෙ….

‘‘පච්චුප්පන්නන්ති වා රූප’’න්ති වා, ‘‘රූපන්ති වා පච්චුප්පන්න’’න්ති වා පච්චුප්පන්නං රූපං අප්පියං කරිත්වා එසෙසෙ එකට්ඨෙ සමෙ සමභාගෙ තජ්ජාතෙති? ආමන්තා. පච්චුප්පන්නං රූපං නිරුජ්ඣමානං රූපභාවං න ජහතීති? ආමන්තා. පච්චුප්පන්නභාවං න ජහතීති? න හෙවං වත්තබ්බෙ…පෙ….

‘‘ඔදාතන්ති වා වත්ථ’’න්ති වා, ‘‘වත්ථන්ති වා ඔදාත’’න්ති වා ඔදාතං වත්ථං අප්පියං කරිත්වා එසෙසෙ එකට්ඨෙ සමෙ සමභාගෙ තජ්ජාතෙති? ආමන්තා. ඔදාතං වත්ථං රජ්ජමානං ඔදාතභාවං ජහතීති? ආමන්තා. වත්ථභාවං ජහතීති? න හෙවං වත්තබ්බෙ.

‘‘ඔදාතන්ති වා වත්ථ’’න්ති වා, ‘‘වත්ථන්ති වා ඔදාත’’න්ති වා ඔදාතං වත්ථං අප්පියං කරිත්වා එසෙසෙ එකට්ඨෙ සමෙ සමභාගෙ තජ්ජාතෙති? ආමන්තා. ඔදාතං වත්ථං රජ්ජමානං වත්ථභාවං න ජහතීති? ආමන්තා. ඔදාතභාවං න ජහතීති? න හෙවං වත්තබ්බෙ.…පෙ….

286. රූපං රූපභාවං න ජහතීති? ආමන්තා. රූපං නිච්චං ධුවං සස්සතං අවිපරිණාමධම්මන්ති ? න හෙවං වත්තබ්බෙ. නනු රූපං රූපභාවං න ජහතීති රූපං අනිච්චං අධුවං අසස්සතං විපරිණාමධම්මන්ති? ආමන්තා. හඤ්චි රූපං අනිච්චං අධුවං අසස්සතං විපරිණාමධම්මං, නො ච වත රෙ වත්තබ්බෙ – ‘‘රූපං රූපභාවං න ජහතී’’ති.

නිබ්බානං නිබ්බානභාවං න ජහතීති නිබ්බානං නිච්චං ධුවං සස්සතං අවිපරිණාමධම්මන්ති? ආමන්තා. රූපං රූපභාවං න ජහතීති [න ජහති (සී. ක.)] රූපං නිච්චං ධුවං සස්සතං අවිපරිණාමධම්මන්ති? න හෙවං වත්තබ්බෙ…පෙ… රූපං රූපභාවං න ජහති රූපං අනිච්චං අධුවං අසස්සතං විපරිණාමධම්මන්ති? ආමන්තා. නිබ්බානං නිබ්බානභාවං න ජහති නිබ්බානං අනිච්චං අධුවං අසස්සතං විපරිණාමධම්මන්ති? න හෙවං වත්තබ්බෙ…පෙ….

අතීතං අත්ථි අතීතං අතීතභාවං න ජහතීති? ආමන්තා. අනාගතං අත්ථි අනාගතං අනාගතභාවං න ජහතීති? න හෙවං වත්තබ්බෙ. අතීතං අත්ථි අතීතං අතීතභාවං න ජහතීති? ආමන්තා. පච්චුප්පන්නං අත්ථි පච්චුප්පන්නං පච්චුප්පන්නභාවං න ජහතීති? න හෙවං වත්තබ්බෙ…පෙ….

අනාගතං අත්ථි අනාගතං අනාගතභාවං ජහතීති [න ජහතීති (බහූසු) අට්ඨකථා ඔලොකෙතබ්බා]? ආමන්තා. අතීතං අත්ථි අතීතං අතීතභාවං ජහතීති [න ජහතීති (බහූසු) අට්ඨකථා ඔලොකෙතබ්බා]? න හෙවං වත්තබ්බෙ…පෙ….

පච්චුප්පන්නං අත්ථි පච්චුප්පන්නං පච්චුප්පන්නභාවං ජහතීති [න ජහතීති (බහූසු) අට්ඨකථා ඔලොකෙතබ්බා]? ආමන්තා. අතීතං අත්ථි අතීතං අතීතභාවං ජහතීති [න ජහතීති (බහූසු) අට්ඨකථා ඔලොකෙතබ්බා]? න හෙවං වත්තබ්බෙ.

අතීතං අත්ථි අතීතං අතීතභාවං න ජහතීති? ආමන්තා. අතීතං නිච්චං ධුවං සස්සතං අවිපරිණාමධම්මන්ති? න හෙවං වත්තබ්බෙ…පෙ… නනු අතීතං අනිච්චං අධුවං අසස්සතං විපරිණාමධම්මන්ති? ආමන්තා. හඤ්චි අතීතං අනිච්චං අධුවං අසස්සතං විපරිණාමධම්මං, නො ච වත රෙ වත්තබ්බෙ – ‘‘අතීතං අත්ථි අතීතං අතීතභාවං න ජහතී’’ති.

නිබ්බානං අත්ථි නිබ්බානං නිබ්බානභාවං න ජහතීති නිබ්බානං නිච්චං ධුවං සස්සතං අවිපරිණාමධම්මන්ති ? ආමන්තා. අතීතං අත්ථි අතීතං අතීතභාවං න ජහතීති අතීතං නිච්චං ධුවං සස්සතං අවිපරිණාමධම්මන්ති? න හෙවං වත්තබ්බෙ…පෙ….

අතීතං අත්ථි අතීතං අතීතභාවං න ජහති අතීතං අනිච්චං අධුවං අසස්සතං විපරිණාමධම්මන්ති? ආමන්තා. නිබ්බානං අත්ථි නිබ්බානං නිබ්බානභාවං න ජහති නිබ්බානං අනිච්චං අධුවං අසස්සතං විපරිණාමධම්මන්ති? න හෙවං වත්තබ්බෙ…පෙ….

287. අතීතං රූපං අත්ථි අතීතං රූපං අතීතභාවං න ජහතීති? ආමන්තා. අනාගතං රූපං අත්ථි අනාගතං රූපං අනාගතභාවං න ජහතීති? න හෙවං වත්තබ්බෙ…පෙ… අතීතං රූපං අත්ථි අතීතං රූපං අතීතභාවං න ජහතීති? ආමන්තා. පච්චුප්පන්නං රූපං අත්ථි පච්චුප්පන්නං රූපං පච්චුප්පන්නභාවං න ජහතීති? න හෙවං වත්තබ්බෙ…පෙ….

අනාගතං රූපං අත්ථි අනාගතං රූපං අනාගතභාවං ජහතීති [න ජහතීති (බහූසු) අනුලොමපඤ්හොයෙව]? ආමන්තා. අතීතං රූපං අත්ථි අතීතං රූපං අතීතභාවං ජහතීති [න ජහතීති (බහූසු) අනුලොමපඤ්හොයෙව]? න හෙවං වත්තබ්බෙ…පෙ….

පච්චුප්පන්නං රූපං අත්ථි පච්චුප්පන්නං රූපං පච්චුප්පන්නභාවං ජහතීති [න ජහතීති (බහූසු) අනුලොමපඤ්හොයෙව]? ආමන්තා. අතීතං රූපං අත්ථි අතීතං රූපං අතීතභාවං ජහතීති [න ජහතීති (බහූසු) අනුලොමපඤ්හොයෙව]? න හෙවං වත්තබ්බෙ…පෙ….

අතීතං රූපං අත්ථි අතීතං රූපං අතීතභාවං න ජහතීති? ආමන්තා. අතීතං රූපං නිච්චං ධුවං සස්සතං අවිපරිණාමධම්මන්ති? න හෙවං වත්තබ්බෙ…පෙ… නනු අතීතං රූපං අනිච්චං අධුවං අසස්සතං විපරිණාමධම්මන්ති? ආමන්තා. හඤ්චි අතීතං රූපං අනිච්චං…පෙ… විපරිණාමධම්මං, නො ච වත රෙ වත්තබ්බෙ – ‘‘අතීතං රූපං අත්ථි අතීතං රූපං අතීතභාවං න ජහතී’’ති.

නිබ්බානං අත්ථි නිබ්බානං නිබ්බානභාවං න ජහති [න ජහතීති (?) පුරිමපඤ්හෙහි සංසන්දෙතබ්බං] නිබ්බානං නිච්චං ධුවං සස්සතං අවිපරිණාමධම්මන්ති? ආමන්තා. අතීතං රූපං අත්ථි අතීතං රූපං අතීතභාවං න ජහති [න ජහතීති (?) පුරිමඤ්හෙහි සංසන්දෙතබ්බං] අතීතං රූපං නිච්චං ධුවං සස්සතං අවිපරිණාමධම්මන්ති? න හෙවං වත්තබ්බෙ…පෙ….

අතීතං රූපං අත්ථි අතීතං රූපං අතීතභාවං න ජහති අතීතං රූපං අනිච්චං අධුවං අසස්සතං විපරිණාමධම්මන්ති? ආමන්තා. නිබ්බානං අත්ථි නිබ්බානං නිබ්බානභාවං න ජහති නිබ්බානං අනිච්චං අධුවං අසස්සතං විපරිණාමධම්මන්ති? න හෙවං වත්තබ්බෙ…පෙ….

අතීතා වෙදනා අත්ථි… අතීතා සඤ්ඤා අත්ථි… අතීතා සඞ්ඛාරා අත්ථි… අතීතං විඤ්ඤාණං අත්ථි අතීතං විඤ්ඤාණං අතීතභාවං න ජහතීති? ආමන්තා. අනාගතං විඤ්ඤාණං අත්ථි අනාගතං විඤ්ඤාණං අනාගතභාවං න ජහතීති? න හෙවං වත්තබ්බෙ…පෙ… අතීතං විඤ්ඤාණං අත්ථි අතීතං විඤ්ඤාණං අතීතභාවං න ජහතීති? ආමන්තා. පච්චුප්පන්නං විඤ්ඤාණං අත්ථි පච්චුප්පන්නං විඤ්ඤාණං පච්චුප්පන්නභාවං න ජහතීති? න හෙවං වත්තබ්බෙ…පෙ….

අනාගතං විඤ්ඤාණං අත්ථි අනාගතං විඤ්ඤාණං අනාගතභාවං ජහතීති? ආමන්තා. අතීතං විඤ්ඤාණං අත්ථි අතීතං විඤ්ඤාණං අතීතභාවං ජහතීති? න හෙවං වත්තබ්බෙ…පෙ….

පච්චුප්පන්නං විඤ්ඤාණං අත්ථි පච්චුප්පන්නං විඤ්ඤාණං පච්චුප්පන්නභාවං ජහතීති [න ජහතීති (බහූසු) අනුලොමපඤ්හොයෙව]? ආමන්තා. අතීතං විඤ්ඤාණං අත්ථි අතීතං විඤ්ඤාණං අතීතභාවං ජහතීති [න ජහතීති (බහූසු) අනුලොමපඤ්හොයෙව]? න හෙවං වත්තබ්බෙ…පෙ….

අතීතං විඤ්ඤාණං අත්ථි අතීතං විඤ්ඤාණං අතීතභාවං න ජහතීති? ආමන්තා. අතීතං විඤ්ඤාණං නිච්චං ධුවං සස්සතං අවිපරිණාමධම්මන්ති? න හෙවං වත්තබ්බෙ…පෙ… නනු අතීතං විඤ්ඤාණං අනිච්චං අධුවං අසස්සතං විපරිණාමධම්මන්ති? ආමන්තා. හඤ්චි අතීතං විඤ්ඤාණං අනිච්චං අධුවං අසස්සතං විපරිණාමධම්මං, නො ච වත රෙ වත්තබ්බෙ – ‘‘අතීතං විඤ්ඤාණං අත්ථි අතීතං විඤ්ඤාණං අතීතභාවං න ජහතී’’ති.

නිබ්බානං අත්ථි නිබ්බානං නිබ්බානභාවං න ජහති [න ජහතීති (?) පුරිමපඤ්හෙහි සංසන්දෙතබ්බං] නිබ්බානං නිච්චං ධුවං සස්සතං අවිපරිණාමධම්මන්ති? ආමන්තා. අතීතං විඤ්ඤාණං අත්ථි අතීතං විඤ්ඤාණං අතීතභාවං න ජහති [න ජහතීති (?) පුරිමපඤ්හෙහි සංසන්දෙතබ්බං] අතීතං විඤ්ඤාණං නිච්චං ධුවං සස්සතං අවිපරිණාමධම්මන්ති? න හෙවං වත්තබ්බෙ…පෙ….

අතීතං විඤ්ඤාණං අත්ථි අතීතං විඤ්ඤාණං අතීතභාවං න ජහති අතීතං විඤ්ඤාණං අනිච්චං අධුවං අසස්සතං විපරිණාමධම්මන්ති? ආමන්තා. නිබ්බානං අත්ථි නිබ්බානං නිබ්බානභාවං න ජහති නිබ්බානං අනිච්චං අධුවං අසස්සතං විපරිණාමධම්මන්ති? න හෙවං වත්තබ්බෙ…පෙ….

වචනසොධනා

288. අතීතං න්වත්ථීති? ආමන්තා. හඤ්චි අතීතං න්වත්ථි, අතීතං අත්ථීති මිච්ඡා. හඤ්චි වා පන අත්ථි න්වාතීතං, අත්ථි අතීතන්ති මිච්ඡා. අනාගතං න්වත්ථීති? ආමන්තා. හඤ්චි අනාගතං න්වත්ථි, අනාගතං අත්ථීති මිච්ඡා. හඤ්චි වා පන අත්ථි න්වානාගතං, අත්ථි අනාගතන්ති මිච්ඡා.

අනාගතං හුත්වා පච්චුප්පන්නං හොතීති? ආමන්තා. තඤ්ඤෙව අනාගතං තං පච්චුප්පන්නන්ති? න හෙවං වත්තබ්බෙ…පෙ… තඤ්ඤෙව අනාගතං තං පච්චුප්පන්නන්ති? ආමන්තා. හුත්වා හොති හුත්වා හොතීති? න හෙවං වත්තබ්බෙ…පෙ… හුත්වා හොති හුත්වා හොතීති? ආමන්තා. න හුත්වා න හොති න හුත්වා න හොතීති? න හෙවං වත්තබ්බෙ…පෙ….

පච්චුප්පන්නං හුත්වා අතීතං හොතීති? ආමන්තා. තඤ්ඤෙව පච්චුප්පන්නං තං අතීතන්ති? න හෙවං වත්තබ්බෙ…පෙ… තඤ්ඤෙව පච්චුප්පන්නං තං අතීතන්ති? ආමන්තා . හුත්වා හොති හුත්වා හොතීති? න හෙවං වත්තබ්බෙ…පෙ… හුත්වා හොති හුත්වා හොතීති? ආමන්තා. න හුත්වා න හොති න හුත්වා න හොතීති? න හෙවං වත්තබ්බෙ…පෙ….

අනාගතං හුත්වා පච්චුප්පන්නං හොති, පච්චුප්පන්නං හුත්වා අතීතං හොතීති? ආමන්තා. තඤ්ඤෙව අනාගතං තං පච්චුප්පන්නං තං අතීතන්ති? න හෙවං වත්තබ්බෙ…පෙ… තඤ්ඤෙව අනාගතං තං පච්චුප්පන්නං තං අතීතන්ති? ආමන්තා. හුත්වා හොති හුත්වා හොතීති? න හෙවං වත්තබ්බෙ…පෙ… හුත්වා හොති හුත්වා හොතීති? ආමන්තා. න හුත්වා න හොති න හුත්වා න හොතීති? න හෙවං වත්තබ්බෙ.

අතීතචක්ඛුරූපාදිකථා

289. අතීතං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථීති? ආමන්තා. අතීතෙන චක්ඛුනා අතීතං රූපං පස්සතීති? න හෙවං වත්තබ්බෙ…පෙ… අතීතං සොතං අත්ථි සද්දා අත්ථි සොතවිඤ්ඤාණං අත්ථි ආකාසො අත්ථි මනසිකාරො අත්ථීති? ආමන්තා. අතීතෙන සොතෙන අතීතං සද්දං සුණාතීති? න හෙවං වත්තබ්බෙ…පෙ… අතීතං ඝානං අත්ථි ගන්ධා අත්ථි ඝානවිඤ්ඤාණං අත්ථි වායො අත්ථි මනසිකාරො අත්ථීති? ආමන්තා. අතීතෙන ඝානෙන අතීතං ගන්ධං ඝායතීති? න හෙවං වත්තබ්බෙ…පෙ… අතීතා ජිව්හා අත්ථි රසා අත්ථි ජිව්හාවිඤ්ඤාණං අත්ථි ආපො අත්ථි මනසිකාරො අත්ථීති? ආමන්තා . අතීතාය ජිව්හාය අතීතං රසං සායතීති? න හෙවං වත්තබ්බෙ…පෙ… අතීතො කායො අත්ථි ඵොට්ඨබ්බා අත්ථි කායවිඤ්ඤාණං අත්ථි පථවී අත්ථි මනසිකාරො අත්ථීති? ආමන්තා. අතීතෙන කායෙන අතීතං ඵොට්ඨබ්බං ඵුසතීති? න හෙවං වත්තබ්බෙ…පෙ… අතීතො මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථීති? ආමන්තා. අතීතෙන මනෙන අතීතං ධම්මං විජානාතීති? න හෙවං වත්තබ්බෙ…පෙ….

අනාගතං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථීති? ආමන්තා. අනාගතෙන චක්ඛුනා අනාගතං රූපං පස්සතීති? න හෙවං වත්තබ්බෙ…පෙ… අනාගතං සොතං අත්ථි… ඝානං අත්ථි… ජිව්හා අත්ථි… කායො අත්ථි … මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථීති? ආමන්තා. අනාගතෙන මනෙන අනාගතං ධම්මං විජානාතීති? න හෙවං වත්තබ්බෙ…පෙ….

පච්චුප්පන්නං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, පච්චුප්පන්නෙන චක්ඛුනා පච්චුප්පන්නං රූපං පස්සතීති? ආමන්තා. අතීතං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, අතීතෙන චක්ඛුනා අතීතං රූපං පස්සතීති? න හෙවං වත්තබ්බෙ…පෙ…. පච්චුප්පන්නං සොතං අත්ථි… ඝානං අත්ථි… ජිව්හා අත්ථි… කායො අත්ථි… මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, පච්චුප්පන්නෙන මනෙන පච්චුප්පන්නං ධම්මං විජානාතීති? ආමන්තා. අතීතො මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, අතීතෙන මනෙන අතීතං ධම්මං විජානාතීති? න හෙවං වත්තබ්බෙ…පෙ….

පච්චුප්පන්නං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, පච්චුප්පන්නෙන චක්ඛුනා පච්චුප්පන්නං රූපං පස්සතීති? ආමන්තා. අනාගතං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, අනාගතෙන චක්ඛුනා අනාගතං රූපං පස්සතීති? න හෙවං වත්තබ්බෙ…පෙ… පච්චුප්පන්නං සොතං අත්ථි… ඝානං අත්ථි… ජිව්හා අත්ථි… කායො අත්ථි… මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, පච්චුප්පන්නෙන මනෙන පච්චුප්පන්නං ධම්මං විජානාතීති? ආමන්තා. අනාගතො මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, අනාගතෙන මනෙන අනාගතං ධම්මං විජානාතීති? න හෙවං වත්තබ්බෙ…පෙ….

අතීතං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, න ච අතීතෙන චක්ඛුනා අතීතං රූපං පස්සතීති? ආමන්තා. පච්චුප්පන්නං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, න ච පච්චුප්පන්නෙන චක්ඛුනා පච්චුප්පන්නං රූපං පස්සතීති? න හෙවං වත්තබ්බෙ…පෙ… අතීතං සොතං අත්ථි… ඝානං අත්ථි… ජිව්හා අත්ථි… කායො අත්ථි… මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, න ච අතීතෙන මනෙන අතීතං ධම්මං විජානාතීති? ආමන්තා. පච්චුප්පන්නො මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, න ච පච්චුප්පන්නෙන මනෙන පච්චුප්පන්නං ධම්මං විජානාතීති? න හෙවං වත්තබ්බෙ…පෙ….

අනාගතං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, න ච අනාගතෙන චක්ඛුනා අනාගතං රූපං පස්සතීති? ආමන්තා. පච්චුප්පන්නං චක්ඛුං අත්ථි රූපා අත්ථි චක්ඛුවිඤ්ඤාණං අත්ථි ආලොකො අත්ථි මනසිකාරො අත්ථි, න ච පච්චුප්පන්නෙන චක්ඛුනා පච්චුප්පන්නං රූපං පස්සතීති? න හෙවං වත්තබ්බෙ…පෙ… අනාගතං සොතං අත්ථි… ඝානං අත්ථි… ජිව්හා අත්ථි… කායො අත්ථි… මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, න ච අනාගතෙන මනෙන අනාගතං ධම්මං විජානාතීති ? ආමන්තා. පච්චුප්පන්නො මනො අත්ථි ධම්මා අත්ථි මනොවිඤ්ඤාණං අත්ථි වත්ථුං අත්ථි මනසිකාරො අත්ථි, න ච පච්චුප්පන්නෙන මනෙන පච්චුප්පන්නං ධම්මං විජානාතීති? න හෙවං වත්තබ්බෙ…පෙ….

අතීතඤාණාදිකථා

290. අතීතං ඤාණං අත්ථීති? ආමන්තා. තෙන ඤාණෙන ඤාණකරණීයං කරොතීති? න හෙවං වත්තබ්බෙ…පෙ… තෙන ඤාණෙන ඤාණකරණීයං කරොතීති ? ආමන්තා. තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ….

අනාගතං ඤාණං අත්ථීති? ආමන්තා. තෙන ඤාණෙන ඤාණකරණීයං කරොතීති? න හෙවං වත්තබ්බෙ…පෙ… තෙන ඤාණෙන ඤාණකරණීයං කරොතීති? ආමන්තා. තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති , මග්ගං භාවෙතීති? න හෙවං වත්තබ්බෙ…පෙ….

පච්චුප්පන්නං ඤාණං අත්ථි, තෙන ඤාණෙන ඤාණකරණීයං කරොතීති? ආමන්තා. අතීතං ඤාණං අත්ථි, තෙන ඤාණෙන ඤාණකරණීයං කරොතීති? න හෙවං වත්තබ්බෙ…පෙ… පච්චුප්පන්නං ඤාණං අත්ථි, තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? ආමන්තා. අතීතං ඤාණං අත්ථි, තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ… පච්චුප්පන්නං ඤාණං අත්ථි, තෙන ඤාණෙන ඤාණකරණීයං කරොතීති? ආමන්තා. අනාගතං ඤාණං අත්ථි, තෙන ඤාණෙන ඤාණකරණීයං කරොතීති? න හෙවං වත්තබ්බෙ…පෙ… පච්චුප්පන්නං ඤාණං අත්ථි, තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? ආමන්තා . අනාගතං ඤාණං අත්ථි, තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ….

අතීතං ඤාණං අත්ථි, න ච තෙන ඤාණෙන ඤාණකරණීයං කරොතීති? ආමන්තා. පච්චුප්පන්නං ඤාණං අත්ථි, න ච තෙන ඤාණෙන ඤාණකරණීයං කරොතීති? න හෙවං වත්තබ්බෙ…පෙ… අතීතං ඤාණං අත්ථි, න ච තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? ආමන්තා. පච්චුප්පන්නං ඤාණං අත්ථි, න ච තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ….

අනාගතං ඤාණං අත්ථි, න ච තෙන ඤාණෙන ඤාණකරණීයං කරොතීති? ආමන්තා. පච්චුප්පන්නං ඤාණං අත්ථි, න ච තෙන ඤාණෙන ඤාණකරණීයං කරොතීති? න හෙවං වත්තබ්බෙ…පෙ…. අනාගතං ඤාණං අත්ථි, න ච තෙන ඤාණෙන දුක්ඛං පරිජානාති, සමුදයං පජහති , නිරොධං සච්ඡිකරොති, මග්ගං භාවෙතීති? ආමන්තා . පච්චුප්පන්නං ඤාණං අත්ථි, න ච තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ….

අරහන්තාදිකථා

291. අරහතො අතීතො රාගො අත්ථීති? ආමන්තා. අරහා තෙන රාගෙන සරාගොති? න හෙවං වත්තබ්බෙ…පෙ… අරහතො අතීතො දොසො අත්ථීති? ආමන්තා . අරහා තෙන දොසෙන සදොසොති? න හෙවං වත්තබ්බෙ…පෙ… අරහතො අතීතො මොහො අත්ථීති? ආමන්තා. අරහා තෙන මොහෙන සමොහොති? න හෙවං වත්තබ්බෙ…පෙ… අරහතො අතීතො මානො අත්ථීති? ආමන්තා. අරහා තෙන මානෙන සමානොති? න හෙවං වත්තබ්බෙ…පෙ… අරහතො අතීතා දිට්ඨි අත්ථීති? ආමන්තා. අරහා තාය දිට්ඨියා සදිට්ඨිකොති? න හෙවං වත්තබ්බෙ…පෙ… අරහතො අතීතා විචිකිච්ඡා අත්ථීති? ආමන්තා. අරහා තාය විචිකිච්ඡාය සවිචිකිච්ඡොති? න හෙවං වත්තබ්බෙ…පෙ… අරහතො අතීතං ථිනං අත්ථීති? ආමන්තා. අරහා තෙන ථිනෙන සථිනොති? න හෙවං වත්තබ්බෙ…පෙ… අරහතො අතීතං උද්ධච්චං අත්ථීති? ආමන්තා. අරහා තෙන උද්ධච්චෙන සඋද්ධච්චොති? න හෙවං වත්තබ්බෙ…පෙ… අරහතො අතීතං අහිරිකං අත්ථීති? ආමන්තා. අරහා තෙන අහිරිකෙන සඅහිරිකොති? න හෙවං වත්තබ්බෙ…පෙ… අරහතො අතීතං අනොත්තප්පං අත්ථීති? ආමන්තා. අරහා තෙන අනොත්තප්පෙන සඅනොත්තප්පීති? න හෙවං වත්තබ්බෙ…පෙ….

අනාගාමිස්ස අතීතා සක්කායදිට්ඨි අත්ථීති? ආමන්තා . අනාගාමී තාය දිට්ඨියා සදිට්ඨිකොති? න හෙවං වත්තබ්බෙ…පෙ… අනාගාමිස්ස අතීතා විචිකිච්ඡා අත්ථි… අතීතො සීලබ්බතපරාමාසො අත්ථි… අතීතො අණුසහගතො කාමරාගො අත්ථි… අතීතො අණුසහගතො බ්යාපාදො අත්ථීති? ආමන්තා. අනාගාමී තෙන බ්යාපාදෙන බ්යාපන්නචිත්තොති? න හෙවං වත්තබ්බෙ…පෙ….

සකදාගාමිස්ස අතීතා සක්කායදිට්ඨි අත්ථීති? ආමන්තා. සකදාගාමී තාය දිට්ඨියා සදිට්ඨිකොති? න හෙවං වත්තබ්බෙ…පෙ… සකදාගාමිස්ස අතීතා විචිකිච්ඡා අත්ථි… අතීතො සීලබ්බතපරාමාසො අත්ථි… අතීතො ඔළාරිකො කාමරාගො අත්ථි… අතීතො ඔළාරිකො බ්යාපාදො අත්ථීති? ආමන්තා. සකදාගාමී තෙන බ්යාපාදෙන බ්යාපන්නචිත්තොති? න හෙවං වත්තබ්බෙ…පෙ….

සොතාපන්නස්ස අතීතා සක්කායදිට්ඨි අත්ථීති? ආමන්තා. සොතාපන්නො තාය දිට්ඨියා සදිට්ඨිකොති? න හෙවං වත්තබ්බෙ…පෙ… සොතාපන්නස්ස අතීතා විචිකිච්ඡා අත්ථි… අතීතො සීලබ්බතපරාමාසො අත්ථි… අතීතො අපායගමනීයො රාගො අත්ථි… අතීතො අපායගමනීයො දොසො අත්ථි… අතීතො අපායගමනීයො මොහො අත්ථීති? ආමන්තා. සොතාපන්නො තෙන මොහෙන සමොහොති? න හෙවං වත්තබ්බෙ…පෙ….

292. පුථුජ්ජනස්ස අතීතො රාගො අත්ථි, පුථුජ්ජනො තෙන රාගෙන සරාගොති? ආමන්තා. අරහතො අතීතො රාගො අත්ථි, අරහා තෙන රාගෙන සරාගොති? න හෙවං වත්තබ්බෙ…පෙ… පුථුජ්ජනස්ස අතීතො දොසො අත්ථි…පෙ… අතීතං අනොත්තප්පං අත්ථි පුථුජ්ජනො තෙන අනොත්තප්පෙන අනොත්තප්පීති? ආමන්තා. අරහතො අතීතං අනොත්තප්පං අත්ථි, අරහා තෙන අනොත්තප්පෙන අනොත්තප්පීති? න හෙවං වත්තබ්බෙ…පෙ….

පුථුජ්ජනස්ස අතීතා සක්කායදිට්ඨි අත්ථි, පුථුජ්ජනො තාය දිට්ඨියා සදිට්ඨිකොති? ආමන්තා. අනාගාමිස්ස අතීතා සක්කායදිට්ඨි අත්ථි, අනාගාමී තාය දිට්ඨියා සදිට්ඨිකොති? න හෙවං වත්තබ්බෙ…පෙ… පුථුජ්ජනස්ස අතීතා විචිකිච්ඡා අත්ථි…පෙ… අතීතො අණුසහගතො බ්යාපාදො අත්ථි, පුථුජ්ජනො තෙන බ්යාපාදෙන බ්යාපන්නචිත්තොති? ආමන්තා. අනාගාමිස්ස අතීතො අණුසහගතො බ්යාපාදො අත්ථි, අනාගාමී තෙන බ්යාපාදෙන බ්යාපන්නචිත්තොති? න හෙවං වත්තබ්බෙ…පෙ….

පුථුජ්ජනස්ස අතීතා සක්කායදිට්ඨි අත්ථි, පුථුජ්ජනො තාය දිට්ඨියා සදිට්ඨිකොති? ආමන්තා. සකදාගාමිස්ස අතීතා සක්කායදිට්ඨි අත්ථි, සකදාගාමී තාය දිට්ඨියා සදිට්ඨිකොති? න හෙවං වත්තබ්බෙ…පෙ… පුථුජ්ජනස්ස අතීතා විචිකිච්ඡා අත්ථි… අතීතො ඔළාරිකො බ්යාපාදො අත්ථි, පුථුජ්ජනො තෙන බ්යාපාදෙන බ්යාපන්නචිත්තොති ? ආමන්තා. සකදාගාමිස්ස අතීතො ඔළාරිකො බ්යාපාදො අත්ථි, සකදාගාමී තෙන බ්යාපාදෙන බ්යාපන්නචිත්තොති? න හෙවං වත්තබ්බෙ…පෙ….

පුථුජ්ජනස්ස අතීතා සක්කායදිට්ඨි අත්ථි, පුථුජ්ජනො තාය දිට්ඨියා සදිට්ඨිකොති? ආමන්තා. සොතාපන්නස්ස අතීතා සක්කායදිට්ඨි අත්ථි, සොතාපන්නො තාය දිට්ඨියා සදිට්ඨිකොති? න හෙවං වත්තබ්බෙ…පෙ… පුථුජ්ජනස්ස අතීතා විචිකිච්ඡා අත්ථි…පෙ… අතීතො අපායගමනීයො මොහො අත්ථි, පුථුජ්ජනො තෙන මොහෙන සමොහොති? ආමන්තා. සොතාපන්නස්ස අතීතො අපායගමනීයො මොහො අත්ථි, සොතාපන්නො තෙන මොහෙන සමොහොති? න හෙවං වත්තබ්බෙ…පෙ….

අරහතො අතීතො රාගො අත්ථි, න ච අරහා තෙන රාගෙන සරාගොති? ආමන්තා. පුථුජ්ජනස්ස අතීතො රාගො අත්ථි, න ච පුථුජ්ජනො තෙන රාගෙන සරාගොති? න හෙවං වත්තබ්බෙ…පෙ… අරහතො අතීතො දොසො අත්ථි…පෙ… අතීතං අනොත්තප්පං අත්ථි, න ච අරහා තෙන අනොත්තප්පෙන අනොත්තප්පීති? ආමන්තා. පුථුජ්ජනස්ස අතීතං අනොත්තප්පං අත්ථි, න ච පුථුජ්ජනො තෙන අනොත්තප්පෙන අනොත්තප්පීති? න හෙවං වත්තබ්බෙ…පෙ….

අනාගාමිස්ස අතීතා සක්කායදිට්ඨි අත්ථි, න ච අනාගාමී තාය දිට්ඨියා සදිට්ඨිකොති? ආමන්තා. පුථුජ්ජනස්ස අතීතා සක්කායදිට්ඨි අත්ථි, න ච පුථුජ්ජනො තාය දිට්ඨියා සදිට්ඨිකොති? න හෙවං වත්තබ්බෙ…පෙ… අනාගාමිස්ස අතීතා විචිකිච්ඡා අත්ථි…පෙ… අතීතො අණුසහගතො බ්යාපාදො අත්ථි, න ච අනාගාමී තෙන බ්යාපාදෙන බ්යාපන්නචිත්තොති ? ආමන්තා. පුථුජ්ජනස්ස අතීතො අණුසහගතො බ්යාපාදො අත්ථි, න ච පුථුජ්ජනො තෙන බ්යාපාදෙන බ්යාපන්නචිත්තොති? න හෙවං වත්තබ්බෙ…පෙ….

සකදාගාමිස්ස අතීතා සක්කායදිට්ඨි අත්ථි, න ච සකදාගාමී තාය දිට්ඨියා සදිට්ඨිකොති? ආමන්තා. පුථුජ්ජනස්ස අතීතා සක්කායදිට්ඨි අත්ථි, න ච පුථුජ්ජනො තාය දිට්ඨියා සදිට්ඨිකොති? න හෙවං වත්තබ්බෙ…පෙ… සකදාගාමිස්ස අතීතා විචිකිච්ඡා අත්ථි…පෙ… අතීතො ඔළාරිකො බ්යාපාදො අත්ථි, න ච සකදාගාමී තෙන බ්යාපාදෙන බ්යාපන්නචිත්තොති? ආමන්තා. පුථුජ්ජනස්ස අතීතො ඔළාරිකො බ්යාපාදො අත්ථි, න ච පුථුජ්ජනො තෙන බ්යාපාදෙන බ්යාපන්නචිත්තොති? න හෙවං වත්තබ්බෙ…පෙ….

සොතාපන්නස්ස අතීතා සක්කායදිට්ඨි අත්ථි, න ච සොතාපන්නො තාය දිට්ඨියා සදිට්ඨිකොති? ආමන්තා. පුථුජ්ජනස්ස අතීතා සක්කායදිට්ඨි අත්ථි, න ච පුථුජ්ජනො තාය දිට්ඨියා සදිට්ඨිකොති? න හෙවං වත්තබ්බෙ…පෙ… සොතාපන්නස්ස අතීතා විචිකිච්ඡා අත්ථි…පෙ… අතීතො අපායගමනීයො මොහො අත්ථි, න ච සොතාපන්නො තෙන මොහෙන සමොහොති? ආමන්තා. පුථුජ්ජනස්ස අතීතො අපායගමනීයො මොහො අත්ථි, න ච පුථුජ්ජනො තෙන මොහෙන සමොහොති? න හෙවං වත්තබ්බෙ…පෙ….

අතීතහත්ථාදිකථා

293. අතීතා හත්ථා අත්ථීති? ආමන්තා. අතීතෙසු හත්ථෙසු සති ආදානනික්ඛෙපනං පඤ්ඤායතීති? න හෙවං වත්තබ්බෙ…පෙ… අතීතා පාදා අත්ථීති? ආමන්තා. අතීතෙසු පාදෙසු සති අභික්කමපටික්කමො පඤ්ඤායතීති? න හෙවං වත්තබ්බෙ…පෙ… අතීතා පබ්බා අත්ථීති? ආමන්තා. අතීතෙසු පබ්බෙසු සති සමිඤ්ජනපසාරණං පඤ්ඤායතීති? න හෙවං වත්තබ්බෙ…පෙ… අතීතො කුච්ඡි අත්ථීති? ආමන්තා. අතීතස්මිං කුච්ඡිස්මිං සති ජිඝච්ඡා පිපාසා පඤ්ඤායතීති? න හෙවං වත්තබ්බෙ…පෙ….

අතීතො කායො අත්ථීති? ආමන්තා. අතීතො කායො පග්ගහනිග්ගහුපගො ඡෙදනභෙදනුපගො කාකෙහි ගිජ්ඣෙහි කුලලෙහි සාධාරණොති? න හෙවං වත්තබ්බෙ…පෙ… අතීතෙ කායෙ විසං කමෙය්ය , සත්ථං කමෙය්ය, අග්ගි කමෙය්යාති? න හෙවං වත්තබ්බෙ…පෙ… ලබ්භා අතීතො කායො අද්දුබන්ධනෙන බන්ධිතුං, රජ්ජුබන්ධනෙන බන්ධිතුං, සඞ්ඛලිකබන්ධනෙන බන්ධිතුං, ගාමබන්ධනෙන බන්ධිතුං, නිගමබන්ධනෙන බන්ධිතුං, නගරබන්ධනෙන බන්ධිතුං, ජනපදබන්ධනෙන බන්ධිතුං, කණ්ඨපඤ්චමෙහි බන්ධනෙහි බන්ධිතුන්ති? න හෙවං වත්තබ්බෙ…පෙ….

අතීතො ආපො අත්ථීති? ආමන්තා. තෙන ආපෙන ආපකරණීයං කරොතීති? න හෙවං වත්තබ්බෙ…පෙ… අතීතො තෙජො අත්ථීති? ආමන්තා. තෙන තෙජෙන තෙජකරණීයං කරොතීති? න හෙවං වත්තබ්බෙ…පෙ… අතීතො වායො අත්ථීති? ආමන්තා. තෙන වායෙන වායකරණීයං කරොතීති? න හෙවං වත්තබ්බෙ…පෙ….

අතීතක්ඛන්ධාදිසමොධානකථා

294. අතීතො රූපක්ඛන්ධො අත්ථි, අනාගතො රූපක්ඛන්ධො අත්ථි, පච්චුප්පන්නො රූපක්ඛන්ධො අත්ථීති? ආමන්තා. තයො රූපක්ඛන්ධාති? න හෙවං වත්තබ්බෙ …පෙ… අතීතා පඤ්චක්ඛන්ධා අත්ථි, අනාගතා පඤ්චක්ඛන්ධා අත්ථි, පච්චුප්පන්නා පඤ්චක්ඛන්ධා අත්ථීති? ආමන්තා. පන්නරසක්ඛන්ධාති? න හෙවං වත්තබ්බෙ…පෙ….

අතීතං චක්ඛායතනං අත්ථි, අනාගතං චක්ඛායතනං අත්ථි, පච්චුප්පන්නං චක්ඛායතනං අත්ථීති? ආමන්තා. තීණි චක්ඛායතනානීති? න හෙවං වත්තබ්බෙ…පෙ… අතීතානි ද්වාදසායතනානි අත්ථි, අනාගතානි ද්වාදසායතනානි අත්ථි, පච්චුප්පන්නානි ද්වාදසායතනානි අත්ථීති? ආමන්තා. ඡත්තිංසායතනානීති? න හෙවං වත්තබ්බෙ…පෙ….

අතීතා චක්ඛුධාතු අත්ථි, අනාගතා චක්ඛුධාතු අත්ථි, පච්චුප්පන්නා චක්ඛුධාතු අත්ථීති? ආමන්තා. තිස්සො චක්ඛුධාතුයොති? න හෙවං වත්තබ්බෙ…පෙ… අතීතා අට්ඨාරස ධාතුයො අත්ථි, අනාගතා අට්ඨාරස ධාතුයො අත්ථි, පච්චුප්පන්නා අට්ඨාරස ධාතුයො අත්ථීති? ආමන්තා. චතුපඤ්ඤාස ධාතුයොති? න හෙවං වත්තබ්බෙ…පෙ….

අතීතං චක්ඛුන්ද්රියං අත්ථි, අනාගතං චක්ඛුන්ද්රියං අත්ථි, පච්චුප්පන්නං චක්ඛුන්ද්රියං අත්ථීති ? ආමන්තා. තීණි චක්ඛුන්ද්රියානීති? න හෙවං වත්තබ්බෙ…පෙ… අතීතානි බාවීසතින්ද්රියානි අත්ථි, අනාගතානි බාවීසතින්ද්රියානි අත්ථි, පච්චුප්පන්නානි බාවීසතින්ද්රියානි අත්ථීති? ආමන්තා. ඡසට්ඨින්ද්රියානීති? න හෙවං වත්තබ්බෙ…පෙ….

අතීතො රාජා චක්කවත්තී අත්ථි, අනාගතො රාජා චක්කවත්තී අත්ථි, පච්චුප්පන්නො රාජා චක්කවත්තී අත්ථීති? ආමන්තා. තිණ්ණන්නං රාජූනං චක්කවත්තීනං සම්මුඛීභාවො හොතීති? න හෙවං වත්තබ්බෙ…පෙ….

අතීතො සම්මාසම්මුද්ධො අත්ථි, අනාගතො සම්මාසම්බුද්ධො අත්ථි, පච්චුප්පන්නො සම්මාසම්බුද්ධො අත්ථීති? ආමන්තා. තිණ්ණන්නං සම්මාසම්බුද්ධානං සම්මුඛීභාවො හොතීති? න හෙවං වත්තබ්බෙ…පෙ….

පදසොධනකථා

295. අතීතං අත්ථීති? ආමන්තා . අත්ථි අතීතන්ති? අත්ථි සියා අතීතං, සියා න්වාතීතන්ති.

ආජානාහි නිග්ගහං. හඤ්චි අතීතං අත්ථි, අත්ථි සියා අතීතං, සියා න්වාතීතං, තෙනාතීතං න්වාතීතං, න්වාතීතං අතීතන්ති. යං තත්ථ වදෙසි – ‘‘වත්තබ්බෙ ඛො – ‘අතීතං අත්ථි අත්ථි සියා අතීතං, සියා න්වාතීතං, තෙනාතීතං න්වාතීතං, න්වාතීතං අතීත’’’න්ති මිච්ඡා.

නො චෙ පන අතීතං න්වාතීතං න්වාතීතං අතීතන්ති, නො ච වත රෙ වත්තබ්බෙ – ‘‘අතීතං අත්ථි අත්ථි සියා අතීතං, සියා න්වාතීත’’න්ති. යං තත්ථ වදෙසි – ‘‘වත්තබ්බෙ ඛො – ‘අතීතං අත්ථි අත්ථි සියා අතීතං, සියා න්වාතීතං, තෙනාතීතං න්වාතීතං, න්වාතීතං අතීත’’’න්ති මිච්ඡා.

අනාගතං අත්ථීති? ආමන්තා. අත්ථි අනාගතන්ති? අත්ථි සියා අනාගතං, සියා න්වානාගතන්ති.

ආජානාහි නිග්ගහං. හඤ්චි අනාගතං අත්ථි අත්ථි සියා අනාගතං සියා න්වානාගතං, තෙනානාගතං න්වානාගතං, න්වානාගතං අනාගතන්ති. යං තත්ථ වදෙසි – ‘‘වත්තබ්බෙ ඛො – ‘අනාගතං අත්ථි අත්ථි සියා අනාගතං, සියා න්වානාගතං, තෙනානාගතං න්වානාගතං, න්වානාගතං අනාගත’’’න්ති මිච්ඡා.

නො චෙ පනානාගතං න්වානාගතං න්වානාගතං අනාගතන්ති, නො ච වත රෙ වත්තබ්බෙ – ‘‘අනාගතං අත්ථි අත්ථි සියා අනාගතං, සියා න්වානාගත’’න්ති. යං තත්ථ වදෙසි – ‘‘වත්තබ්බෙ ඛො – ‘අනාගතං අත්ථි අත්ථි සියා අනාගතං, සියා න්වානාගතං, තෙනානාගතං න්වානාගතං, න්වානාගතං අනාගත’’’න්ති මිච්ඡා.

පච්චුප්පන්නං අත්ථීති, ආමන්තා. අත්ථි පච්චුප්පන්නන්ති? අත්ථි සියා පච්චුප්පන්නං, සියා නො පච්චුප්පන්නන්ති.

ආජානාහි නිග්ගහං. හඤ්චි පච්චුප්පන්නං අත්ථි අත්ථි සියා පච්චුප්පන්නං, සියා නො පච්චුප්පන්නං, තෙන පච්චුප්පන්නං, නො පච්චුප්පන්නං, නො පච්චුප්පන්නං පච්චුප්පන්නන්ති. යං තත්ථ වදෙසි – ‘‘වත්තබ්බෙ ඛො – ‘පච්චුප්පන්නං අත්ථි අත්ථි සියා පච්චුප්පන්නං, සියා නො පච්චුප්පන්නං, තෙන පච්චුප්පන්නං නො පච්චුප්පන්නං, නො පච්චුප්පන්නං පච්චුප්පන්න’’’න්ති මිච්ඡා.

නො චෙ පන පච්චුප්පන්නං නො පච්චුප්පන්නං, නො පච්චුප්පන්නං පච්චුප්පන්නන්ති, නො ච වත රෙ වත්තබ්බෙ – ‘‘පච්චුප්පන්නං අත්ථි අත්ථි සියා පච්චුප්පන්නං, සියා නො පච්චුප්පන්න’’න්ති. යං තත්ථ වදෙසි – ‘‘වත්තබ්බෙ ඛො – ‘පච්චුප්පන්නං අත්ථි අත්ථි සියා පච්චුප්පන්නං, සියා නො පච්චුප්පන්නං, තෙන පච්චුප්පන්නං නො පච්චුප්පන්නං, නො පච්චුප්පන්නං පච්චුප්පන්න’’’න්ති මිච්ඡා.

නිබ්බානං අත්ථීති? ආමන්තා. අත්ථි නිබ්බානන්ති? අත්ථි සියා නිබ්බානං සියා නො නිබ්බානන්ති.

ආජානාහි නිග්ගහං. හඤ්චි නිබ්බානං අත්ථි අත්ථි සියා නිබ්බානං, සියා නො නිබ්බානං, තෙන නිබ්බානං නො නිබ්බානං, නො නිබ්බානං නිබ්බානන්ති. යං තත්ථ වදෙසි – ‘‘වත්තබ්බෙ ඛො – ‘නිබ්බානං අත්ථි අත්ථි සියා නිබ්බානං, සියා නො නිබ්බානං, තෙන නිබ්බානං නො නිබ්බානං, නො නිබ්බානං නිබ්බාන’’’න්ති මිච්ඡා.

නො චෙ පන නිබ්බානං නො නිබ්බානං, නො නිබ්බානං නිබ්බානන්ති, නො ච වත රෙ වත්තබ්බෙ – ‘‘නිබ්බානං අත්ථි අත්ථි සියා නිබ්බානං, සියා නො නිබ්බාන’’න්ති. යං තත්ථ වදෙසි – ‘‘වත්තබ්බෙ ඛො – ‘නිබ්බානං අත්ථි අත්ථි සියා නිබ්බානං, සියා නො නිබ්බානං, තෙන නිබ්බානං නො නිබ්බානං, නො නිබ්බානං නිබ්බාන’’’න්ති මිච්ඡා.

සුත්තසාධනං

296. න වත්තබ්බං – ‘‘අතීතං අත්ථි, අනාගතං අත්ථී’’ති? ආමන්තා. නනු වුත්තං භගවතා – ‘‘යං කිඤ්චි, භික්ඛවෙ, රූපං අතීතානාගතපච්චුප්පන්නං අජ්ඣත්තං වා බහිද්ධා වා ඔළාරිකං වා සුඛුමං වා හීනං වා පණීතං වා යං දූරෙ සන්තිකෙ වා – අයං වුච්චති රූපක්ඛන්ධො. යා කාචි වෙදනා… යා කාචි සඤ්ඤා… යෙ කෙචි සඞ්ඛාරා… යං කිඤ්චි විඤ්ඤාණං අතීතානාගතපච්චුප්පන්නං අජ්ඣත්තං වා බහිද්ධා වා ඔළාරිකං වා සුඛුමං වා හීනං වා පණීතං වා යං දූරෙ සන්තිකෙ වා – අයං වුච්චති විඤ්ඤාණක්ඛන්ධො’’ති [සං. නි. 3.48]. අත්ථෙව සුත්තන්තොති? ආමන්තා. තෙන හි අතීතං අත්ථි, අනාගතං අත්ථීති.

අතීතං අත්ථි, අනාගතං අත්ථීති? ආමන්තා. නනු වුත්තං භගවතා – ‘‘තයොමෙ, භික්ඛවෙ, නිරුත්තිපථා අධිවචනපථා පඤ්ඤත්තිපථා අසඞ්කිණ්ණා අසඞ්කිණ්ණපුබ්බා න සඞ්කියන්ති න සඞ්කියිස්සන්ති අප්පටිකුට්ඨා සමණෙහි බ්රාහ්මණෙහි විඤ්ඤූහි. කතමෙ තයො? යං, භික්ඛවෙ, රූපං අතීතං නිරුද්ධං විගතං විපරිණතං ‘අහොසී’ති තස්ස සඞ්ඛා, ‘අහොසී’ති තස්ස සමඤ්ඤා, ‘අහොසී’ති තස්ස පඤ්ඤත්ති; න තස්ස සඞ්ඛා ‘අත්ථී’ති, න තස්ස සඞ්ඛා ‘භවිස්සතී’ති. යා වෙදනා…පෙ… යා සඤ්ඤා… යෙ සඞ්ඛාරා… යං විඤ්ඤාණං අතීතං නිරුද්ධං විගතං විපරිණතං ‘අහොසී’ති තස්ස සඞ්ඛා, ‘අහොසී’ති තස්ස සමඤ්ඤා, ‘අහොසී’ති තස්ස පඤ්ඤත්ති; න තස්ස සඞ්ඛා ‘අත්ථී’ති, න තස්ස සඞ්ඛා ‘භවිස්සතී’ති.

‘‘යං, භික්ඛවෙ, රූපං අජාතං අපාතුභූතං ‘භවිස්සතී’ති තස්ස සඞ්ඛා, ‘භවිස්සතී’ති තස්ස සමඤ්ඤා, ‘භවිස්සතී’ති තස්ස පඤ්ඤත්ති; න තස්ස සඞ්ඛා ‘අත්ථී’ති, න තස්ස සඞ්ඛා ‘අහොසී’ති. යා වෙදනා…පෙ… යා සඤ්ඤා… යෙ සඞ්ඛාරා… යං විඤ්ඤාණං අජාතං අපාතුභූතං ‘භවිස්සතී’ති තස්ස සඞ්ඛා, ‘භවිස්සතී’ති තස්ස සමඤ්ඤා, ‘භවිස්සතී’ති තස්ස පඤ්ඤත්ති; න තස්ස සඞ්ඛා ‘අත්ථී’ති, න තස්ස සඞ්ඛා ‘අහොසී’ති.

‘‘යං, භික්ඛවෙ, රූපං ජාතං පාතුභූතං ‘අත්ථී’ති තස්ස සඞ්ඛා, ‘අත්ථී’ති තස්ස සමඤ්ඤා, ‘අත්ථී’ති තස්ස පඤ්ඤත්ති; න තස්ස සඞ්ඛා ‘අහොසී’ති, න තස්ස සඞ්ඛා ‘භවිස්සතී’ති. යා වෙදනා…පෙ… යා සඤ්ඤා… යෙ සඞ්ඛාරා… යං විඤ්ඤාණං ජාතං පාතුභූතං ‘අත්ථී’ති තස්ස සඞ්ඛා, ‘අත්ථී’ති තස්ස සමඤ්ඤා, ‘අත්ථී’ති තස්ස පඤ්ඤත්ති; න තස්ස සඞ්ඛා ‘අහොසී’ති, න තස්ස සඞ්ඛා ‘භවිස්සතී’ති. ඉමෙ ඛො, භික්ඛවෙ, තයො නිරුත්තිපථා අධිවචනපථා පඤ්ඤත්තිපථා අසඞ්කිණ්ණා අසඞ්කිණ්ණපුබ්බා න සඞ්කියන්ති න සඞ්කියිස්සන්ති අප්පටිකුට්ඨා සමණෙහි බ්රාහ්මණෙහි විඤ්ඤූහි.

‘‘යෙපි තෙ, භික්ඛවෙ, අහෙසුං උක්කලා වස්සභඤ්ඤා අහෙතුකවාදා අකිරියවාදා නත්ථිකවාදා, තෙපිමෙ තයො නිරුත්තිපථෙ අධිවචනපථෙ පඤ්ඤත්තිපථෙ න ගරහිතබ්බං න පටික්කොසිතබ්බං අමඤ්ඤිංසු. තං කිස්ස හෙතු? නින්දාබ්යාරොසඋපාරම්භභයා’’ති [සංයුත්තනිකායෙ]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අතීතං අත්ථි, අනාගතං අත්ථී’’ති.

අතීතං අත්ථීති? ආමන්තා. නනු ආයස්මා ඵග්ගුනො භගවන්තං එතදවොච – ‘‘අත්ථි නු ඛො තං, භන්තෙ, චක්ඛුං යෙන චක්ඛුනා අතීතෙ බුද්ධෙ පරිනිබ්බුතෙ ඡින්නපපඤ්චෙ ඡින්නවටුමෙ පරියාදින්නවට්ටෙ සබ්බදුක්ඛවීතිවත්තෙ පඤ්ඤාපයමානො පඤ්ඤාපෙය්යාති. අත්ථි නු ඛො සා, භන්තෙ, ජිව්හා…පෙ… අත්ථි නු ඛො සො, භන්තෙ, මනො යෙන මනෙන අතීතෙ බුද්ධෙ පරිනිබ්බුතෙ ඡින්නපපඤ්චෙ ඡින්නවටුමෙ පරියාදින්නවට්ටෙ සබ්බදුක්ඛවීතිවත්තෙ පඤ්ඤාපයමානො පඤ්ඤාපෙය්යා’’ති.

‘‘නත්ථි ඛො තං, ඵග්ගුන, චක්ඛුං යෙන චක්ඛුනා අතීතෙ බුද්ධෙ පරිනිබ්බුතෙ ඡින්නපපඤ්චෙ ඡින්නවටුමෙ පරියාදින්නවට්ටෙ සබ්බදුක්ඛවීතිවත්තෙ පඤ්ඤාපයමානො පඤ්ඤාපෙය්ය. නත්ථි ඛො සා, ඵග්ගුන, ජිව්හා…පෙ… නත්ථි නු ඛො සො, ඵග්ගුන, මනො යෙන මනෙන අතීතෙ බුද්ධෙ පරිනිබ්බුතෙ ඡින්නපපඤ්චෙ ඡින්නවටුමෙ පරියාදින්නවට්ටෙ සබ්බදුක්ඛවීතිවත්තෙ පඤ්ඤාපයමානො පඤ්ඤාපෙය්යා’’ති [සං. නි. 4.83]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අතීතං අත්ථී’’ති.

අතීතං අත්ථීති? ආමන්තා. නනු ආයස්මා නන්දකො එතදවොච – ‘‘අහු පුබ්බෙ ලොභො තදහු අකුසලං, සො එතරහි නත්ථි, ඉච්චෙතං කුසලං. අහු පුබ්බෙ දොසො… අහු පුබ්බෙ මොහො, තදහු අකුසලං, සො එතරහි නත්ථි, ඉච්චෙතං කුසල’’න්ති [අඞ්ගුත්තරනිකායෙ]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අතීතං අත්ථී’’ති.

න වත්තබ්බං – ‘‘අනාගතං අත්ථී’’ති? ආමන්තා. නනු වුත්තං භගවතා – ‘‘කබළීකාරෙ චෙ, භික්ඛවෙ, ආහාරෙ අත්ථි රාගො, අත්ථි නන්දී, අත්ථි තණ්හා; පතිට්ඨිතං තත්ථ විඤ්ඤාණං විරූළ්හං. යත්ථ පතිට්ඨිතං විඤ්ඤාණං විරූළ්හං, අත්ථි තත්ථ නාමරූපස්ස අවක්කන්ති. යත්ථ අත්ථි නාමරූපස්ස අවක්කන්ති, අත්ථි තත්ථ සඞ්ඛාරානං වුද්ධි. යත්ථ අත්ථි සඞ්ඛාරානං වුද්ධි, අත්ථි තත්ථ ආයතිං පුනබ්භවාභිනිබ්බත්ති. යත්ථ අත්ථි ආයතිං පුනබ්භවාභිනිබ්බත්ති, අත්ථි තත්ථ ආයතිං ජාතිජරාමරණං. යත්ථ අත්ථි ආයතිං ජාතිජරාමරණං, සසොකං තං, භික්ඛවෙ, සරජං [සදරං (සං. නි. 2.64) තදෙව යුත්තතරං] සඋපායාසන්ති වදාමි.

‘‘ඵස්සෙ චෙ, භික්ඛවෙ, ආහාරෙ… මනොසඤ්චෙතනාය චෙ, භික්ඛවෙ, ආහාරෙ… විඤ්ඤාණෙ චෙ, භික්ඛවෙ, ආහාරෙ අත්ථි රාගො, අත්ථි නන්දී…පෙ… සරජං සඋපායාසන්ති වදාමී’’ති [සං. නි. 2.64]. අත්ථෙව සුත්තන්තොති? ආමන්තා . තෙන හි අනාගතං අත්ථීති.

අනාගතං අත්ථීති? ආමන්තා. නනු වුත්තං භගවතා – ‘‘කබළීකාරෙ චෙ, භික්ඛවෙ, ආහාරෙ නත්ථි රාගො, නත්ථි නන්දී, නත්ථි තණ්හා; අප්පතිට්ඨිතං තත්ථ විඤ්ඤාණං අවිරූළ්හං. යත්ථ විඤ්ඤාණං අප්පතිට්ඨිතං අවිරූළ්හං, නත්ථි තත්ථ නාමරූපස්ස අවක්කන්ති. යත්ථ නත්ථි නාමරූපස්ස අවක්කන්ති, නත්ථි තත්ථ සඞ්ඛාරානං වුද්ධි. යත්ථ නත්ථි සඞ්ඛාරානං වුද්ධි, නත්ථි තත්ථ ආයතිං පුනබ්භවාභිනිබ්බත්ති. යත්ථ නත්ථි ආයතිං පුනබ්භවාභිනිබ්බත්ති, නත්ථි තත්ථ ආයතිං ජාතිජරාමරණං. යත්ථ නත්ථි ආයතිං ජාතිජරාමරණං, අසොකං තං, භික්ඛවෙ, අරජං අනුපායාසන්ති වදාමි.

‘‘ඵස්සෙ චෙ, භික්ඛවෙ, ආහාරෙ… මනොසඤ්චෙතනාය චෙ, භික්ඛවෙ, ආහාරෙ… විඤ්ඤාණෙ චෙ, භික්ඛවෙ, ආහාරෙ නත්ථි රාගො, නත්ථි නන්දී…පෙ… අරජං අනුපායාසන්ති වදාමී’’ති [සං. නි. 2.64]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අනාගතං අත්ථී’’ති.

සබ්බමත්ථීතිකථා නිට්ඨිතා.