📜

6. අතීතක්ඛන්ධාදිකථා

1. නසුත්තසාධනං

297. අතීතං ඛන්ධාති? ආමන්තා. අතීතං අත්ථීති? න හෙවං වත්තබ්බෙ…පෙ… අතීතං ආයතනන්ති? ආමන්තා. අතීතං අත්ථීති? න හෙවං වත්තබ්බෙ…පෙ… අතීතං ධාතූති? ආමන්තා. අතීතං අත්ථීති ? න හෙවං වත්තබ්බෙ…පෙ… අතීතං ඛන්ධා ධාතු ආයතනන්ති [ඛන්ධධාතුආයතනන්ති (ස්යා.)]? ආමන්තා. අතීතං අත්ථීති? න හෙවං වත්තබ්බෙ…පෙ….

අනාගතං ඛන්ධාති? ආමන්තා. අනාගතං අත්ථීති? න හෙවං වත්තබ්බෙ…පෙ… අනාගතං ආයතනන්ති? ආමන්තා. අනාගතං අත්ථීති? න හෙවං වත්තබ්බෙ…පෙ… අනාගතං ධාතූති? ආමන්තා. අනාගතං අත්ථීති? න හෙවං වත්තබ්බෙ…පෙ… අනාගතං ඛන්ධා ධාතු ආයතනන්ති? ආමන්තා. අනාගතං අත්ථීති? න හෙවං වත්තබ්බෙ…පෙ….

පච්චුප්පන්නං ඛන්ධා පච්චුප්පන්නං අත්ථීති? ආමන්තා. අතීතං ඛන්ධා අතීතං අත්ථීති? න හෙවං වත්තබ්බෙ…පෙ… පච්චුප්පන්නං ආයතනං පච්චුප්පන්නං අත්ථීති? ආමන්තා. අතීතං ආයතනං අතීතං අත්ථීති? න හෙවං වත්තබ්බෙ…පෙ… පච්චුප්පන්නං ධාතු පච්චුප්පන්නං අත්ථීති? ආමන්තා. අතීතං ධාතු අතීතං අත්ථීති? න හෙවං වත්තබ්බෙ…පෙ… පච්චුප්පන්නං ඛන්ධා ධාතු ආයතනං පච්චුප්පන්නං අත්ථීති? ආමන්තා. අතීතං ඛන්ධා ධාතු ආයතනං අතීතං අත්ථීති? න හෙවං වත්තබ්බෙ…පෙ….

පච්චුප්පන්නං ඛන්ධා පච්චුප්පන්නං අත්ථීති? ආමන්තා. අනාගතං ඛන්ධා අනාගතං අත්ථීති? න හෙවං වත්තබ්බෙ…පෙ… පච්චුප්පන්නං ආයතනං පච්චුප්පන්නං අත්ථීති? ආමන්තා. අනාගතං ආයතනං අනාගතං අත්ථීති? න හෙවං වත්තබ්බෙ…පෙ… පච්චුප්පන්නං ධාතු පච්චුප්පන්නං අත්ථීති? ආමන්තා. අනාගතං ධාතු අනාගතං අත්ථීති ? න හෙවං වත්තබ්බෙ…පෙ… පච්චුප්පන්නං ඛන්ධා ධාතු ආයතනං පච්චුප්පන්නං අත්ථීති? ආමන්තා. අනාගතං ඛන්ධා ධාතු ආයතනං අනාගතං අත්ථීති? න හෙවං වත්තබ්බෙ…පෙ….

අතීතං ඛන්ධා අතීතං නත්ථීති? ආමන්තා. පච්චුප්පන්නං ඛන්ධා පච්චුප්පන්නං නත්ථීති? න හෙවං වත්තබ්බෙ…පෙ… අතීතං ආයතනං අතීතං නත්ථීති? ආමන්තා. පච්චුප්පන්නං ආයතනං පච්චුප්පන්නං නත්ථීති? න හෙවං වත්තබ්බෙ…පෙ… අතීතං ධාතු අතීතං නත්ථීති? ආමන්තා. පච්චුප්පන්නං ධාතු පච්චුප්පන්නං නත්ථීති? න හෙවං වත්තබ්බෙ…පෙ… අතීතං ඛන්ධා ධාතු ආයතනං අතීතං නත්ථීති? ආමන්තා. පච්චුප්පන්නං ඛන්ධා ධාතු ආයතනං පච්චුප්පන්නං නත්ථීති? න හෙවං වත්තබ්බෙ…පෙ….

අනාගතං ඛන්ධා අනාගතං නත්ථීති? ආමන්තා. පච්චුප්පන්නං ඛන්ධා පච්චුප්පන්නං නත්ථීති? න හෙවං වත්තබ්බෙ…පෙ… අනාගතං ආයතනං…පෙ… අනාගතං ධාතු…පෙ… අනාගතං ඛන්ධා ධාතු ආයතනං අනාගතං නත්ථීති? ආමන්තා. පච්චුප්පන්නං ඛන්ධා ධාතු ආයතනං පච්චුප්පන්නං නත්ථීති? න හෙවං වත්තබ්බෙ…පෙ….

අතීතං රූපං ඛන්ධොති? ආමන්තා. අතීතං රූපං අත්ථීති? න හෙවං වත්තබ්බෙ…පෙ… අතීතං රූපං ආයතනන්ති? ආමන්තා. අතීතං රූපං අත්ථීති? න හෙවං වත්තබ්බෙ…පෙ… අතීතං රූපං ධාතූති? ආමන්තා. අතීතං රූපං අත්ථීති? න හෙවං වත්තබ්බෙ…පෙ… අතීතං රූපං ඛන්ධා ධාතු ආයතනන්ති ? ආමන්තා. අතීතං රූපං අත්ථීති? න හෙවං වත්තබ්බෙ…පෙ….

අනාගතං රූපං ඛන්ධොති? ආමන්තා. අනාගතං රූපං අත්ථීති? න හෙවං වත්තබ්බෙ…පෙ… අනාගතං රූපං ආයතනං…පෙ… අනාගතං රූපං ධාතු…පෙ… අනාගතං රූපං ඛන්ධා ධාතු ආයතනන්ති? ආමන්තා. අනාගතං රූපං අත්ථීති? න හෙවං වත්තබ්බෙ…පෙ….

පච්චුප්පන්නං රූපං ඛන්ධො පච්චුප්පන්නං රූපං අත්ථීති? ආමන්තා. අතීතං රූපං ඛන්ධො අතීතං රූපං අත්ථීති? න හෙවං වත්තබ්බෙ…පෙ… පච්චුප්පන්නං රූපං ආයතනං…පෙ… පච්චුප්පන්නං රූපං ධාතු…පෙ… පච්චුප්පන්නං රූපං ඛන්ධා ධාතු ආයතනං පච්චුප්පන්නං රූපං අත්ථීති? ආමන්තා. අතීතං රූපං ඛන්ධා ධාතු ආයතනං අතීතං රූපං අත්ථීති? න හෙවං වත්තබ්බෙ…පෙ….

පච්චුප්පන්නං රූපං ඛන්ධො පච්චුප්පන්නං රූපං අත්ථීති? ආමන්තා. අනාගතං රූපං ඛන්ධො අනාගතං රූපං අත්ථීති? න හෙවං වත්තබ්බෙ…පෙ… පච්චුප්පන්නං රූපං ආයතනං…පෙ… පච්චුප්පන්නං රූපං ධාතු…පෙ… පච්චුප්පන්නං රූපං ඛන්ධා ධාතු ආයතනං පච්චුප්පන්නං රූපං අත්ථීති? ආමන්තා. අනාගතං රූපං ඛන්ධා ධාතු ආයතනං අනාගතං රූපං අත්ථීති? න හෙවං වත්තබ්බෙ…පෙ….

අතීතං රූපං ඛන්ධො අතීතං රූපං නත්ථීති? ආමන්තා. පච්චුප්පන්නං රූපං ඛන්ධො පච්චුප්පන්නං රූපං නත්ථීති? න හෙවං වත්තබ්බෙ…පෙ… අතීතං රූපං ආයතනං…පෙ… අතීතං රූපං ධාතු…පෙ… අතීතං රූපං ඛන්ධා ධාතු ආයතනං අතීතං රූපං නත්ථීති? ආමන්තා. පච්චුප්පන්නං රූපං ඛන්ධා ධාතු ආයතනං පච්චුප්පන්නං රූපං නත්ථීති? න හෙවං වත්තබ්බෙ…පෙ….

අනාගතං රූපං ඛන්ධො අනාගතං රූපං නත්ථීති? ආමන්තා. පච්චුප්පන්නං රූපං ඛන්ධො පච්චුප්පන්නං රූපං නත්ථීති? න හෙවං වත්තබ්බෙ…පෙ… අනාගතං රූපං ආයතනං…පෙ… අනාගතං රූපං ධාතු…පෙ… අනාගතං රූපං ඛන්ධා ධාතු ආයතනං අනාගතං රූපං නත්ථීති? ආමන්තා. පච්චුප්පන්නං රූපං ඛන්ධා ධාතු ආයතනං පච්චුප්පන්නං රූපං නත්ථීති? න හෙවං වත්තබ්බෙ…පෙ….

අතීතා වෙදනා… අතීතා සඤ්ඤා… අතීතා සඞ්ඛාරා… අතීතං විඤ්ඤාණං ඛන්ධොති? ආමන්තා. අතීතං විඤ්ඤාණං අත්ථීති? න හෙවං වත්තබ්බෙ…පෙ… අතීතං විඤ්ඤාණං ආයතනං …පෙ… අතීතං විඤ්ඤාණං ධාතු…පෙ… අතීතං විඤ්ඤාණං ඛන්ධා ධාතු ආයතනන්ති? ආමන්තා. අතීතං විඤ්ඤාණං අත්ථීති? න හෙවං වත්තබ්බෙ…පෙ….

අනාගතං විඤ්ඤාණං ඛන්ධොති? ආමන්තා. අනාගතං විඤ්ඤාණං අත්ථීති? න හෙවං වත්තබ්බෙ…පෙ… අනාගතං විඤ්ඤාණං ආයතනං…පෙ… අනාගතං විඤ්ඤාණං ධාතු…පෙ… අනාගතං විඤ්ඤාණං ඛන්ධා ධාතු ආයතනන්ති? ආමන්තා. අනාගතං විඤ්ඤාණං අත්ථීති? න හෙවං වත්තබ්බෙ…පෙ….

පච්චුප්පන්නං විඤ්ඤාණං ඛන්ධො පච්චුප්පන්නං විඤ්ඤාණං අත්ථීති? ආමන්තා. අතීතං විඤ්ඤාණං ඛන්ධො අතීතං විඤ්ඤාණං අත්ථීති? න හෙවං වත්තබ්බෙ…පෙ… පච්චුප්පන්නං විඤ්ඤාණං ආයතනං…පෙ… පච්චුප්පන්නං විඤ්ඤාණං ධාතු…පෙ… පච්චුප්පන්නං විඤ්ඤාණං ඛන්ධා ධාතු ආයතනං පච්චුප්පන්නං විඤ්ඤාණං අත්ථීති? ආමන්තා. අතීතං විඤ්ඤාණං ඛන්ධා ධාතු ආයතනං අතීතං විඤ්ඤාණං අත්ථීති? න හෙවං වත්තබ්බෙ…පෙ….

පච්චුප්පන්නං විඤ්ඤාණං ඛන්ධො පච්චුප්පන්නං විඤ්ඤාණං අත්ථීති? ආමන්තා. අනාගතං විඤ්ඤාණං ඛන්ධො අනාගතං විඤ්ඤාණං අත්ථීති? න හෙවං වත්තබ්බෙ…පෙ… පච්චුප්පන්නං විඤ්ඤාණං ආයතනං…පෙ… පච්චුප්පන්නං විඤ්ඤාණං ධාතු…පෙ… පච්චුප්පන්නං විඤ්ඤාණං ඛන්ධා ධාතු ආයතනං පච්චුප්පන්නං විඤ්ඤාණං අත්ථීති? ආමන්තා. අනාගතං විඤ්ඤාණං ඛන්ධා ධාතු ආයතනං අනාගතං විඤ්ඤාණං අත්ථීති? න හෙවං වත්තබ්බෙ…පෙ….

අතීතං විඤ්ඤාණං ඛන්ධො අතීතං විඤ්ඤාණං නත්ථීති? ආමන්තා. පච්චුප්පන්නං විඤ්ඤාණං ඛන්ධො පච්චුප්පන්නං විඤ්ඤාණං නත්ථීති? න හෙවං වත්තබ්බෙ…පෙ… අතීතං විඤ්ඤාණං ආයතනං…පෙ… අතීතං විඤ්ඤාණං ධාතු…පෙ… අතීතං විඤ්ඤාණං ඛන්ධා ධාතු ආයතනං අතීතං විඤ්ඤාණං නත්ථීති? ආමන්තා. පච්චුප්පන්නං විඤ්ඤාණං ඛන්ධා ධාතු ආයතනං පච්චුප්පන්නං විඤ්ඤාණං නත්ථීති? න හෙවං වත්තබ්බෙ…පෙ… අනාගතං විඤ්ඤාණං ඛන්ධො අනාගතං විඤ්ඤාණං නත්ථීති? ආමන්තා. පච්චුප්පන්නං විඤ්ඤාණං ඛන්ධො පච්චුප්පන්නං විඤ්ඤාණං නත්ථීති? න හෙවං වත්තබ්බෙ…පෙ… අනාගතං විඤ්ඤාණං ආයතනං…පෙ… අනාගතං විඤ්ඤාණං ධාතු…පෙ… අනාගතං විඤ්ඤාණං ඛන්ධා ධාතු ආයතනං අනාගතං විඤ්ඤාණං නත්ථීති? ආමන්තා. පච්චුප්පන්නං විඤ්ඤාණං ඛන්ධා ධාතු ආයතනං පච්චුප්පන්නං විඤ්ඤාණං නත්ථීති? න හෙවං වත්තබ්බෙ…පෙ….

2. සුත්තසාධනං

298. න වත්තබ්බං – ‘‘අතීතානාගතා ඛන්ධා ධාතු ආයතනං නත්ථි චෙතෙ’’ති? ආමන්තා . නනු වුත්තං භගවතා – ‘‘තයොමෙ, භික්ඛවෙ, නිරුත්තිපථා අධිවචනපථා පඤ්ඤත්ති…පෙ… විඤ්ඤූහීති…පෙ…’’. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අතීතානාගතා ඛන්ධා ධාතු ආයතනං නත්ථි චෙතෙ’’ති.

අතීතානාගතා ඛන්ධා ධාතු ආයතනං නත්ථි චෙතෙති? ආමන්තා. නනු වුත්තං භගවතා – ‘‘යං කිඤ්චි, භික්ඛවෙ, රූපං අතීතානාගතපච්චුප්පන්නං අජ්ඣත්තං වා බහිද්ධා වා ඔළාරිකං වා සුඛුමං වා හීනං වා පණීතං වා යං දූරෙ සන්තිකෙ වා, අයං වුච්චති රූපක්ඛන්ධො. යා කාචි වෙදනා… යා කාචි සඤ්ඤා… යෙ කෙචි සඞ්ඛාරා… යං කිඤ්චි විඤ්ඤාණං අතීතානාගතපච්චුප්පන්නං…පෙ… අයං වුච්චති විඤ්ඤාණක්ඛන්ධො’’ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘අතීතානාගතා ඛන්ධා ධාතු ආයතනං නත්ථි චෙතෙ’’ති.

අතීතක්ඛන්ධාදිකථා නිට්ඨිතා.