📜

7. එකච්චං අත්ථීතිකථා

1. අතීතාදිඑකච්චකථා

299. අතීතං අත්ථීති? එකච්චං අත්ථි, එකච්චං නත්ථීති. එකච්චං නිරුද්ධං, එකච්චං න නිරුද්ධං; එකච්චං විගතං, එකච්චං අවිගතං; එකච්චං අත්ථඞ්ගතං, එකච්චං න අත්ථඞ්ගතං; එකච්චං අබ්භත්ථඞ්ගතං, එකච්චං න අබ්භත්ථඞ්ගතන්ති? න හෙවං වත්තබ්බෙ…පෙ….

අතීතං එකච්චං අත්ථි, එකච්චං නත්ථීති? ආමන්තා. අතීතා අවිපක්කවිපාකා ධම්මා එකච්චෙ අත්ථි, එකච්චෙ නත්ථීති? න හෙවං වත්තබ්බෙ…පෙ… අතීතං එකච්චං අත්ථි, එකච්චං නත්ථීති? ආමන්තා. අතීතා විපක්කවිපාකා ධම්මා එකච්චෙ අත්ථි, එකච්චෙ නත්ථීති? න හෙවං වත්තබ්බෙ…පෙ… අතීතං එකච්චං අත්ථි, එකච්චං නත්ථීති? ආමන්තා. අතීතා අවිපාකා ධම්මා එකච්චෙ අත්ථි එකච්චෙ නත්ථීති? න හෙවං වත්තබ්බෙ…පෙ….

අතීතං එකච්චං අත්ථි එකච්චං නත්ථීති? ආමන්තා. කිං අත්ථි කිං නත්ථීති? අතීතා අවිපක්කවිපාකා ධම්මා – තෙ අත්ථි; අතීතා විපක්කවිපාකා ධම්මා – තෙ නත්ථීති. අතීතා අවිපක්කවිපාකා ධම්මා – තෙ අත්ථීති? ආමන්තා . අතීතා විපක්කවිපාකා ධම්මා – තෙ අත්ථීති? න හෙවං වත්තබ්බෙ…පෙ… අතීතා අවිපක්කවිපාකා ධම්මා – තෙ අත්ථීති? ආමන්තා. අතීතා අවිපාකා ධම්මා – තෙ අත්ථීති [අතීතා අවිපක්කවිපාකා ධම්මා තෙ නත්ථීති (ක.)]? න හෙවං වත්තබ්බෙ…පෙ….

අතීතා විපක්කවිපාකා ධම්මා – තෙ නත්ථීති? ආමන්තා. අතීතා අවිපක්කවිපාකා ධම්මා – තෙ නත්ථීති? න හෙවං වත්තබ්බෙ …පෙ….

අතීතා අවිපාකා [විපක්කවිපාකා (ස්යා.), අවිපක්කවිපාකා (ක.)] ධම්මා – තෙ නත්ථීති? ආමන්තා. අතීතා අවිපක්කවිපාකා [අවිපාකා (ස්යා.)] ධම්මා – තෙ නත්ථීති? න හෙවං වත්තබ්බෙ…පෙ….

අතීතා අවිපක්කවිපාකා ධම්මා – තෙ අත්ථීති? ආමන්තා. නනු අතීතා අවිපක්කවිපාකා ධම්මා නිරුද්ධාති? ආමන්තා. හඤ්චි අතීතා අවිපක්කවිපාකා ධම්මා නිරුද්ධා, නො ච වත රෙ වත්තබ්බෙ – ‘‘අතීතා අවිපක්කවිපාකා ධම්මා – තෙ [ධම්මා නිරුද්ධා තෙ (ස්යා. ක.)] අත්ථී’’ති.

අතීතා අවිපක්කවිපාකා ධම්මා නිරුද්ධා – තෙ අත්ථීති? ආමන්තා. අතීතා විපක්කවිපාකා ධම්මා නිරුද්ධා – තෙ අත්ථීති? න හෙවං වත්තබ්බෙ…පෙ… අතීතා අවිපක්කවිපාකා ධම්මා නිරුද්ධා – තෙ අත්ථීති? ආමන්තා. අතීතා අවිපාකා [අවිපක්කවිපාකා (සී. ක.)] ධම්මා නිරුද්ධා – තෙ අත්ථීති? න හෙවං වත්තබ්බෙ…පෙ….

අතීතා විපක්කවිපාකා ධම්මා නිරුද්ධා – තෙ නත්ථීති? ආමන්තා. අතීතා අවිපක්කවිපාකා ධම්මා නිරුද්ධා – තෙ නත්ථීති? න හෙවං වත්තබ්බෙ…පෙ….

අතීතා අවිපාකා [විපක්කවිපාකා (ස්යා.), අවිපක්කවිපාකා (ක.)] ධම්මා නිරුද්ධා – තෙ නත්ථීති? ආමන්තා. අතීතා අවිපක්කවිපාකා [අවිපාකා (ස්යා.)] ධම්මා නිරුද්ධා – තෙ නත්ථීති? න හෙවං වත්තබ්බෙ…පෙ….

අතීතා අවිපක්කවිපාකා ධම්මා නිරුද්ධා – තෙ අත්ථීති? ආමන්තා . අතීතා විපක්කවිපාකා ධම්මා නිරුද්ධා – තෙ නත්ථීති? ආමන්තා. අතීතා එකදෙසං විපක්කවිපාකා ධම්මා එකදෙසං අවිපක්කවිපාකා ධම්මා නිරුද්ධා – තෙ එකච්චෙ අත්ථි එකච්චෙ නත්ථීති? න හෙවං වත්තබ්බෙ…පෙ….

න වත්තබ්බං – ‘‘අතීතා අවිපක්කවිපාකා ධම්මා – තෙ අත්ථී’’ති? ආමන්තා. නනු අතීතා අවිපක්කවිපාකා ධම්මා විපච්චිස්සන්තීති? ආමන්තා. හඤ්චි අතීතා අවිපක්කවිපාකා ධම්මා විපච්චිස්සන්ති, තෙන වත රෙ වත්තබ්බෙ – ‘‘අතීතා අවිපක්කවිපාකා ධම්මා – තෙ අත්ථී’’ති.

අතීතා අවිපක්කවිපාකා ධම්මා විපච්චිස්සන්තීති කත්වා තෙ අත්ථීති? ආමන්තා. විපච්චිස්සන්තීති කත්වා පච්චුප්පන්නාති? න හෙවං වත්තබ්බෙ…පෙ… විපච්චිස්සන්තීති කත්වා පච්චුප්පන්නාති? ආමන්තා. පච්චුප්පන්නා ධම්මා නිරුජ්ඣිස්සන්තීති කත්වා තෙ නත්ථීති? න හෙවං වත්තබ්බෙ…පෙ….

2. අනාගතාදිඑකච්චකථා

300. අනාගතං අත්ථීති? එකච්චං අත්ථි, එකච්චං නත්ථීති. එකච්චං ජාතං, එකච්චං අජාතං; එකච්චං සඤ්ජාතං, එකච්චං අසඤ්ජාතං; එකච්චං නිබ්බත්තං, එකච්චං අනිබ්බත්තං; එකච්චං පාතුභූතං, එකච්චං අපාතුභූතන්ති? න හෙවං වත්තබ්බෙ…පෙ….

අනාගතං එකච්චං අත්ථි, එකච්චං නත්ථීති? ආමන්තා. අනාගතා උප්පාදිනො ධම්මා එකච්චෙ අත්ථි, එකච්චෙ නත්ථීති? න හෙවං වත්තබ්බෙ…පෙ… අනාගතං එකච්චං අත්ථි, එකච්චං නත්ථීති? ආමන්තා. අනාගතා අනුප්පාදිනො ධම්මා එකච්චෙ අත්ථි, එකච්චෙ නත්ථීති? න හෙවං වත්තබ්බෙ…පෙ….

අනාගතං එකච්චං අත්ථි, එකච්චං නත්ථීති? ආමන්තා. කිං අත්ථි, කිං නත්ථීති? අනාගතා උප්පාදිනො ධම්මා – තෙ අත්ථි; අනාගතා අනුප්පාදිනො ධම්මා – තෙ නත්ථීති. අනාගතා උප්පාදිනො ධම්මා – තෙ අත්ථීති? ආමන්තා. අනාගතා අනුප්පාදිනො ධම්මා – තෙ අත්ථීති ? න හෙවං වත්තබ්බෙ…පෙ… අනාගතා අනුප්පාදිනො ධම්මා – තෙ නත්ථීති? ආමන්තා. අනාගතා උප්පාදිනො ධම්මා – තෙ නත්ථීති? න හෙවං වත්තබ්බෙ…පෙ….

අනාගතා උප්පාදිනො ධම්මා – තෙ අත්ථීති? ආමන්තා. නනු අනාගතා උප්පාදිනො ධම්මා අජාතාති? ආමන්තා. හඤ්චි අනාගතා උප්පාදිනො ධම්මා අජාතා, නො ච වත රෙ වත්තබ්බෙ – ‘‘අනාගතා උප්පාදිනො ධම්මා – තෙ අත්ථී’’ති.

අනාගතා උප්පාදිනො ධම්මා අජාතා – තෙ අත්ථීති? ආමන්තා. අනාගතා අනුප්පාදිනො ධම්මා අජාතා – තෙ අත්ථීති? න හෙවං වත්තබ්බෙ…පෙ… අනාගතා අනුප්පාදිනො ධම්මා අජාතා – තෙ නත්ථීති? ආමන්තා. අනාගතා උප්පාදිනො ධම්මා අජාතා – තෙ නත්ථීති? න හෙවං වත්තබ්බෙ…පෙ….

න වත්තබ්බං – ‘‘අනාගතා උප්පාදිනො ධම්මා – තෙ අත්ථී’’ති? ආමන්තා. නනු අනාගතා උප්පාදිනො ධම්මා උප්පජ්ජිස්සන්තීති? ආමන්තා . හඤ්චි අනාගතා උප්පාදිනො ධම්මා උප්පජ්ජිස්සන්ති, තෙන වත රෙ වත්තබ්බෙ – ‘‘අනාගතා උප්පාදිනො ධම්මා – තෙ අත්ථී’’ති.

අනාගතා උප්පාදිනො ධම්මා උප්පජ්ජිස්සන්තීති කත්වා තෙ අත්ථීති? ආමන්තා. උප්පජ්ජිස්සන්තීති කත්වා පච්චුප්පන්නාති? න හෙවං වත්තබ්බෙ…පෙ… උප්පජ්ජිස්සන්තීති කත්වා පච්චුප්පන්නාති? ආමන්තා. පච්චුප්පන්නා ධම්මා නිරුජ්ඣිස්සන්තීති කත්වා තෙ නත්ථීති? න හෙවං වත්තබ්බෙ…පෙ….

එකච්චං අත්ථීතිකථා නිට්ඨිතා.